1 Кур.кн18
1Тидын деч вара Давид филистим-влакым кырен шалатен, нуным шке кид йымакше налын. Нунын деч тудо Гефым да тудын йыр улшо илем-влакым шупшын налын.2Давид тыгак моав-шамычым кырен шалатен. Нуно Давидын тарзыже лийыныт да тудлан йозакым тӱлаш тӱҥалыныт.3Эше Давид Емафыште Адраазарым, Цован кугыжажым, кырен шалатен. Тудыжо Евфрат эҥер воктенысе мландым кид йымакыже налаш кая улмаш.4Давид тудын деч тӱжем сарлык орвам, шым тӱжем имнешкым да коло тӱжем йолешкым поген налын. Тудо орван имне-влакын шӧныштым пӱчкын, шӱдӧ имньым веле коден.5Адраазарлан, Цован кугыжажлан, полшаш Дамаск гыч сириян-влак толыныт, но Давид нунымат кырен шалатен – чылаже коло кок тӱжем сириян колен.6Давид шке орол отрядшым Сирийысе Дамаскыште шогалтен. Сириян-влак тудын тарзыже лийыныт да йозакым тӱлаш тӱҥалыныт. Давид кушко гына каен огыл, Господь тудлан чыла вере сеҥымашым конден.7Давид Адраазарын тарзыже-влак деч шӧртньӧ авыртыш-шамычым налын да Иерусалимыш конден.8А Адраазарын Тивхава ден Кун олаштыже Давид пеш шуко тойым поген налын. Тудын дене Соломон варажым кугу той чаным, меҥге-влакым да той ате-ӱзгарым ыштен.9Фой, Емафын кугыжаже, колын: Адраазарын, Цова кугыжан, сарзывийжым Давид кырен шалатен.10Давид кугыжам саламлаш да Адраазарым кырен шалатымыжлан таушташ манын, тудо Иорам эргыжым колтен. Фой Адраазар дене кредал илен улмаш. Иорам пеленже шӧртньӧ, ший да той дене ыштыме тӱрлӧ арверым конден.11Моло калык деч – идумей, моав, аммон, филистим да амалик деч – поген налме ший да шӧртньӧ дене пырля Давид кугыжа тудым Господьлан святой пӧлек семын пуэн.12Авесса, Саруя эрге, Шинчалан лапверыште латкандаш тӱжем идумейым кырен шалатен.13Идумейыште тудо шке орол отрядшым шогалтен, да идумей-влак Давидын тарзышкыже савырненыт. Давид кушко гына каен огыл, Господь тудлан чыла вере сеҥымашым конден.14Давид пӱтынь Израиль дене кугыжаланен, шке калыкше коклаште чын суд ден чынлыкым ыштен.15Иоав, Саруя эрге, тӱҥ сарзывуй лийын, Иосафат, Ахилуд эрге – курымсерышым возышо.16Садок, Ахитув эрге, да Авимелех, Авиафар эрге, иерей лийыныт. Сераий – возкалыше,17Ваней, Иодай эрге – хелефей ден фелефей-шамычын вуйлатышышт, а Давидын эргыже-влак кугыжа деч вара икымше лийыныт.
Institute for Bible Translation, Finland