1 Кур.кн19
1Икмыняр жап гыч Наас, аммон кугыжа, колен. Тудын олмеш кугыжалан эргыже шогалын.2Давид каласен: «Мый Аннонлан, Наас эргылан, порылыкым ончыктем, вет тудын ачаже мый декем поро лийын». Давид шке еҥже-влакым Аннонын ачаж шотышто чаманмутым каласаш колтен. Кунам нунышт аммон-шамычын мландышкышт толыныт,3тусо он-влак Аннонлан каласеныт: «Давид тый декет шке еҥже-шамычым чаманмутым каласаш колтен. Чынжымак ачатым пагален, тудо нуным колтен шонет мо? Уке, Давидын тарзыже-влак тый декет мландым ончен лекташ да тудым сеҥен налаш толыныт».4Аннон Давидын тарзыже-влакым руалтен кучен, пондашыштым нӱжын, вургемыштын пел урвалтыжым кутан начка марте пӱчкын, вара колтен.5Кунам нуно эше корнышто лийыныт, нине еҥ дене мом ыштыме нерген Давидлан увертареныт. Нуным вашлияш тудо еҥ-шамычым колтен, вет нунышт пеш чот намыслыме лийыныт. Кугыжа каласен: «Иерихонышто кодса. Кунам пондашда кушкеш, тунам пӧртылыда».6Аннон да тудын аммон калыкше, Давидлан ужмышудымо лиймыштым умылымеке, Месопотамий, Сирий-Мааха да Цова гыч орва ден имнешке-влакым тарлаш манын, тушко ик тӱжем талант шийым колтеныт.7Нуно шкаланышт кумло кок тӱжем орвам да Маахан кугыжаж ден сарзыже-шамычым тарленыт. Нунышт толыныт да стан дене Медева ончылно шогалыныт. Аммон-влакат, шке олалашт гыч лектын, пырля погыненыт да сар дене каяш тарваненыт.8Давид, тидым колмеке, нунын дене кредалаш Иоавым да эн тале сарзывийым колтен.9Аммон-влак ончыко лектыныт да, кредалаш манын, ола капка воктеке шогалыныт. А полшаш толшо кугыжа-шамыч ӧрдыжтӧ, нурышто, шогеныт.10Ончылнат, шеҥгелнат кредалаш кӱлмым ужын, Иоав израиль сарзе-влак кокла гыч эн сайыштым ойырен да нуным сириян-влак ваштареш шогалтен.11А кодшо еҥ-шамычым аммон-влак ваштареш шогалташ Авесса шольыжлан ӱшанен.12Иоав каласен: «Сириян-влак мыйым сеҥаш тӱҥалыт гын, тый мыланем полшет, а аммон-шамыч тыйым сеҥаш тӱҥалыт гын, мый тылат полшаш мием.13Лӱддымӧ лий, калыкна да Юмынан олаж-влак верч пеҥгыдын шогаш тӱҥалына! А Господь мом сайлан шотла, тек тудым ышта».14Иоав да тудын дене улшо калык сириян-влак дене кредалаш тӱҥалыныт. Нунышт Иоав деч куржыныт.15Сириян-шамычын куржмыштым ужын, аммон-влакат Авесса деч, Иоавын шольыж деч, куржыныт да шке олашкышт пӧртылыныт. А Иоав Иерусалимыш толын.16Израильтян-влаклан сеҥалтмыштым ужмеке, сириян-шамыч уверзе-влакым колтеныт, нунышт эҥер вес велне улшо сарзывийым ӱжын конденыт. Тудын вуйлатышыже Совак, Адраазарын сарзывуйжо, лийын.17Тидын нерген Давидлан увертареныт. Тудо израиль сарзывийым поген да, Иорданым вончен, сириян-влак ваштареш лектын шогалын. Давид нунын дене кредалаш пижын. Икмыняр жап гыч18сириян-влак израильтян-шамыч деч куржыныт. Давид сириян-влакын шым тӱжем орваштым да нылле тӱжем йолешкыштым пытарен, тыгак Совак сарзывуйыштым пуштын.19Кунам Адраазарын тарзыже-влак израильтян-шамычлан сеҥалтмыштым ужыныт, нуно Давид дене келшымаш ойпидышым ыштеныт да тудын кидше йымак кусненыт. Тетла сириян-влакын аммон-шамычлан полшаш кумылышт лийын огыл.
Institute for Bible Translation, Finland