1 Кур.кн17
1Кунам Давид шке полатыштыже илен, тудо пророк Нафанлан каласен: «Теве мый кедр дене чоҥымо пӧртыштӧ илем, а Господьын ойпидыш шондыкшо – куэм дене ыштыме омашыште».2Нафан Давидлан вашештен: «Мом шонен пыштыметым ыште, вет Юмо тыйын пеленет».3Но тиде йӱдымак Нафанлан Юмын шомакше лийын:4«Кай, мыйын Давид тарземлан каласе: ”Тыге Господь ойла: тый огыл Мыланем илаш пӧртым чоҥет.5Вет тудо кече гыч, кунам Мый израиль эрге-влакым Египет гыч луктынам, тачысе кече марте пӧртыштӧ илен омыл – Мый омаш ден скинийыште иленам.6Кушто гына Мый израильтян-влак дене коштын омыл, Мыйын калыкемым кӱташ шогалтыме Израильын судьяже-влак деч, ’Молан Мыланем кедр пӧртым огыда ыште’ манын, иктаж гана йодынам мо?”7Мыйын Давид тарземлан каласе: ”Господь Саваоф тыге ойла: Израиль калыкемын вуйлатышыжым ышташ манын, Мый тыйым шорыкым кӱтымӧ вер гыч налынам.8Кушко гына каен отыл, Мый эре пеленет лийынам, ончылнет чыла тушманетым пытаренам. Мый тыйын лӱметым чапландаренам, тудо тӱнясе эн лӱмлӧ еҥ-влакын лӱмышт гай кугу лиеш.9Шке Израиль калыкемлан Мый верым ойыренам, тушан тудын вожшым пеҥгыдемдем. Тудо шке верыштыже тыныслын илаш тӱҥалеш. Израиль калыкемлан судья-влакым шогалтыме годсо жап семын осал еҥ-шамыч тудым тетла шыгыремдылаш огыт тӱҥал. Мый чыла тушманетым кидышкет пуэм. Мый, Господь, тыланет ойлем: ’Мый тый дечет кугыжа тукымым шуем’.11Жап шумеке, тыят шке ача-кочат-влак деке кает. Тунам Мый тыйын урлыкет гыч, эргыч-влак кокла гыч иктыжым кугыжалан шогалтем да тудын кучемвийжым пеҥгыдемдем.12Тудо Мыланем пӧртым чоҥа, да Мый тудын престолжым курымешлан пеҥгыдемдем.13Мый тудлан Ачаже лиям, а тудо Мыланем эргым лиеш. Тый дечет ончыч лийше кугыжа дене ыштыме семын Мый тудын деч шке порылыкем ом нал.14Мый тудым курымешлан шке пӧртем да кугыжанышем вуйлаташ шогалтем, тудын престолжо курымеш пеҥгыдын шогаш тӱҥалеш”».15Нафан чыла тиде мутым да ужмо кончымашыжым Давидлан каласен.16Тунам Давид кугыжа каен, Господь чурий ончылно каласен: «Господь Юмем, кӧ мый улам да мо мыйын тукымем – Тый мыйым тынар кӱшкӧ нӧлталынат?17Но тиде Тыйын шинча ончылнет шагал лийын, Юмем – Тый шке тарзетын тукымжын ончыкылыкшо нерген увертарет да мыйын ӱмбакем кугу айдеме ӱмбаке ончымо семын ончет, Господь Юмем!18Шке тарзетым тынар кӱшкӧ шындыметлан Давид Тыланет эше мом каласен кертеш? Тый палет шке тарзетым!19Господь, шке тарзетлан кӧра да шке кумылет почеш Тый тыгай кугу пашам ыштет да тидым ончыкташ тӱҥалат.20Господь, уке Тый гает весе, Тый дечет моло вес Юмо уке! Чыла колмына тидым пеҥгыдемда.21Тыйын Израиль калыкет гай могай вес калык уло? Мландымбалне тыгай калык икте веле – тудым, сулен налын, шке калыкетым ышташ да кӱдыратле, лӱдмашан пашат-влак дене Шкаланет лӱмым ышташ манын, Тый тудын деке толынат. Тый шке калыкетым Египет гыч луктынат да чурийже ончыч моло калыкым поктен колтенат.22Тый Израиль калыкетым курымешлан шкендыным ыштенат! Тый, Господь, тудын Юмыжо лийынат!23А ынде, Господь, шке тарзет да тудын тукымжо шотышто сӧрыметым шукто да каласымет семын ыште.24Тек Тыйын лӱмет курымеш ила да чапландарыме лиеш, тек ойлат: ”Господь Саваоф, Израильын Юмыжо, Израиль дене озаланыше Юмо улеш!” Тек Давид тарзетын тукымжо Тыйын ончылнет пеҥгыдын шогаш тӱҥалеш!25Вет Тый, Юмем, шке тарзетлан ”Мый тый дечет кугыжа тукымым ыштем” манынат, садлан тарзет Тыйын ончылнет кумалаш тоштын.26Господь, Тый Юмо улат да шке тарзетлан тыгай суапым увертарышыч!27Тугеже йодам: суапландарен шого шке тарзетын тукымжым, тек тудо эре Тыйын чуриет ончылно лиеш. Вет Тый, Господь, тарзетын тукымжым суапландарет гын, тудо курым-курымеш суапландарыме лиеш».
Institute for Bible Translation, Finland