Read Zacarías 1

Zacarías1

Ttxokb'il Qman Dyos teju' ttanam

¹Toj twajxaqi'n xjaw teju' tkab' ab'q'i nkawinju' nimaqkawil Dariy, tzaj tma'n Qman Dyos Pakb'ab'l lu te Sakariy ju' t-sanjelal, tk'wal B'erekyiy, ttchman Ido. Tma kjalu:

²Ayine', Dyos Manb'aj nimwipumale', tzaj txqan ntx'u'jile' kyi'ju' ojtxi' kychmane'. Qu'mtzun q'manxa toj nb'iye' kyeju' tnam ja'lo: Kutanjtz kyi'je' wuk'i'le', ex chin tenb'ilwe' kyuk'i'le'. Ayine', Dyos Manb'aj nchin q'mante.⁴Lalun kyb'inchakye' kse'nqe' ojtxi' kychmane', xiq'ma'n kye kyu'n ojtxi' nsanjelale' tu'n tkyaj kytzaqpi'nju' kychwinqlal myab'a'n exju' kb'inchb'aj taq'wix, aye'tzunkye min kyaj tu'n tkub' kyb'i'nju' nxi' nmane'. Ayine' Dyos Manb'aj nchin q'mante.⁵Atzu'n ja'lo, ¿Jatzun ta'qe' ojtxi' kychmane'? ¿Ma kukxtzun kynajan nsanjelal ju'ye'?⁶Aye'tzunwe' nyol ex nchaq'b'ile', ojetoq txinma'ne' kyeju' nmajine' sanjelal e'pon kyeju' ojtxi' kychmane'. Aye'tzunkye anjtzkyi'j wuk'i'le', qu'n elkynik' qa ayine' Dyos Manb'aj nimwipumale', nchin tz'e'ysante kywitz kse'nxju' tu'me'l kyb'inchb'aj, chij. Yek'b'il kyi'j aj chejil

⁷A tpakb'al ja'lu wu'ne', ayine' Sakariy t-sanjelal Dyos, tk'wal B'erekyiy, ttchman Ido, nk'ame' te Qman Dyos toju' q'ij junaq kyaje' (24) te tjunlajoji'n (11) xjaw (aju' xjaw tok tb'i Seb'at) te tkab' ab'q'i nkawin nimaqkawil Dariy.⁸Tzaj yek'un jun ti'xti' weye toj jun qonik'an: wile' jun aj chejil ti'j jun chej kyeqti'j. Wa'ltoq toj jun b'ya' kyxol junjun ktxab' ex ate'toq jun tnejtl chej ti'jxi', junjun kyaq kyi'j, junjun sb'u'j kyi'j ex junjuntl saq kyi'j.⁹Atitoqtzun jun anjl nyolin wuk'i'le', xinqanine' te: ¿Taye alkyeqe'tzu'n aj chejil lu? nchije'. Tzajtzun ttzaq'we'n anjl weye' kjalu: Kxe'l nyek'une' teya alkyeqe', chij.¹⁰Atzunju' ati kyxol ktxab' tzaj tma'n: Aye'kye' lu e'xi'tchq'o'n Qman Dyos ẍaqlulte tkyaqil twitz tx'otx', chij.

¹¹Xi'tzun kyma'n aj chejil teju' tanjl Qman Dyos atitoq kyxolju' ktxab': Matxi' b'aj qb'etine' tkyaqilju' twitz tx'otx', ex maqile' toj nak'b'il ta'ya', chechij.¹²Tmatzu'n Qman Dyos kjalu: Qman Dyos nimtipumala, matxi' b'ent oxnaq lajoj (70) ab'q'i ttzajlen tq'oja ti'j Jerusalen ex kyi'ju' nimaqtnam toj Juda ¿Jte'tzun ab'q'itl tu'n tik' tu'n ttzajlaqj tk'u'ja kyi'j? chij.¹³Tzajtzun ttzaq'we'n Qman Dyos kyuk'i'l tb'anil yol te q'uqb'ab'l k'u'jb'aj teju' anjl nyolin wuk'i'le',¹⁴Tchaq'tzu'n anjl weye' tu'n txinma'nju'ye' tqanil lu: A ntma'n Qman Dyos nimtipumal kjalu: Nxi'x nk'u'jla'nwe' Jerusalen exju' witz Syon.¹⁵Qu'mtzun matxi' tzaj txqan ntx'u'jile' kyi'ju' nimaqtnam lu mixti'x nche ximan, tej naqtoq ch'inju' ntx'u'jile', mache b'inchanxi'xtl il nwitze'.¹⁶Qu'mtzun ja'lo, ayine' Dyos Manb'aj nchin q'mante: Matxi' tzaj q'aq'an nk'u'je' ti'j Jerusalen, knb'incha'ye' tu'n tjaw b'inchet jumajtlju' ja te k'u'lb'il ex tkyaqilu' nimaqtnam, Chi Dyos chiku'ya, chij.

¹⁷Tzaj tma'ntlju' anjl weye': Ex q'manxju'ya lu kye: Intma'n Qman Dyos nimtipumal kjalu: knb'incha'ye' tu'n kyjawb'ent jumajtlju' nimaqntaname'; knq'a' jumajtle' tipumal Syon, ex k'okyel jumajtl Jerusalen te nintaname' sk'o'n wu'ne', chiku'ya, chij. Tzaj yek'un kyi'ju' uk'a exqe'ju' tx'nol K'uxb'il

¹⁸Tzaj yek'un juntl ti'xti' weye', ex wile' kyaje' tuk'a (wakx)¹⁹Ex xinqanine' teju' anjl intoq yolin wuk'i'le' titi' ntechla'nju' kyuk'a (wakx) lu, atzunte ate tzaj ttzaqwe'n weye': A ntechla'n uk'aju' lu aju' kyipumalju' ẍe b'ajx sputi'nkye najlqe' toj tnam te Juda, Israel ex Jerusalen.

²⁰Yajxi'tzuntl e'tzaj tyek'u'n Qman Dyos kyaje' tx'nol k'uxb'il weye'.²¹Xi'tzun nqanine' te: ¿Ti'tzu'n sul kyla' tx'nol k'uxb'il lu? nchije', tzajtzun ttzaq'we'n weye': Ikytzu'n kse'nqe' kyuk'a (wakx) lu nkyechla'n kyi'ju' ẍeb'ajx spuntinkyeju' xjal aj Juda ju' mixtoq a'lo'x tu'n tklontetib', mache ulju' tx'nol k'uxb'il xob'tzalkyeju' nimaqtnam ex majx che elel kyjonju' kyuk'a, qu'n tu'n kyuk'a eb'ajxa' kyspunti'n xjal najlqe' toj Juda. Yek'unjtz jun echb'il

¹Tzaj yek'u'n junjtl ti'xti' weye'. Wile' jun ichan tzyu'n jun echb'il tu'n.²Xi'tzun nqani'ne' te: ¿Jamatxa'ya? nchije'. Tzajtzun tzaj ttzaq'we'n: Machinxe' echalte nintnam Jerusalen, tu'n t-xika'yit jni' tnuqub' ex jni' twitz, chij.

³Xi'toqtzu'n t-xi'ju' anjl intoq yolin wuk'i'le', ex etz juntl anjl k'lulte⁴ex xitma'n te: kutxi'ya ojqel q'malte teju' ku'xun q'ilte echb'il: Che kb'el najan jumajtlu' xjal toj Jerusalen, ex nim txqan xjal ex alu'mj che najal toj ex lay tz'oktl nintapi ti'j.⁵Ayinku'tzunwe' chin okyel te jun nintapi q'aq'ile ti'jele Jerusalen, ex knyek'u'ye' wajwalile' toj nky'ajchaqu' nintnam, chij. A Qman Dyos kklolteju' ttanam

⁶Chi Qman Dyos kjalu: Ayinwe' nxisputinkyeye' toj tkyaqil twitz tx'otx'. Atzu'n ja'lo kxe'l nmane' kyeye': ¡Kukyoqe' teju' tnam toj tb'a'nq'ob' kya'j! ¡kukyoqe' teju' B'ab'ilon, jata'qe'ye' toj juntl tnam, kutanjtl kyi'je' janajlqe'toqe' toj Syon! Ayine' Dyos Manb'aj nchin q'mante, chi Dyos.

⁸Machin tzaj tchq'o'ne' Qman Dyos nimtipumal tuk'i'lju' tpakb'al kyi'ju' tnam eb'aj elq'anteju' ti'xti' kyeye' kjalu: Alkyexku' matxiyek'unte ntaname', tyuẍil nwitze' kxe'l tyek'u'n. Qu'mtzun ayinku'ye' chin q'ojil kyi'ju' tnam lu, ex knb'incha'ye' tu'n aye'xju' kylq'o'n majen che okyel tzaqpaj elq'al kyi'j chi Dyos. Ikytzu'n ktyek'uya' Qman Dyos nimtipumal tajwalil, k'eleltzun kynik'tze' qa a Qman Dyos saj chq'onweye'.

¹⁰Chi Qman Dyos kjalu: ¡Che' b'itzan qe'ye' tuk'i'l tzalajb'il aye'ye' aj Jerusalen, qu'n chin tenb'elwe' kyxole'!¹¹Ajtzun tjapunju' lu, b'a'npun nimaqtnam k'okyel kyq'o'n kyib' tuk'i'l Qman Dyos. Ex ktma' kjalu: Ikyxqe'xju' nimaqtnam lu che okyel te ntaname'. Ex chin najale' kyxole'. K'eleltzun kynik'tze' qa a Qman Dyos nimtipumal saj chq'onweye'.¹²K'okyel jumajtlu' Juda teteku'xi'x Qman Dyos toju' tx'otx' xjan, ex k'okyel jumajtl Jerusalen te ninttanam Sk'o'n.¹³¡Che numeku' kykyaqil xjal twitz Qman Dyos, qu'n tzul quk'i'l ktzajelx toju' najb'il xjan janajla'!

¹Ex tzaj tyek'u'n Qman Dyos Joswe weye', ju' kynejel pale, wa'ltoq twitzu' tanjl Qman Dyos, ex atitoqju' anjl poqol tk'etz Joswe toj tb'a'nq'ob', tu'n tpoqon ti'j.²Xi'tzun tma'n tanjl Qman Dyos teju' anjl poqol: ¡Awt Qman Dyos tzak'unteya! ¡Tzak'unjtzwita tu'n Qman Dyos nk'u'jlante Jerusalen! Qu'n ikyte ichan ju'lu kse'n jun ttxalq'aq' nk'ant ajtetz q'in toj q'aq', chij.³Wa'ltoq Joswe twitzju' tanjl Dyos, tz'ilqetoqju' t-xb'alun tok.⁴Xi'tzun tma'n anjl kyeju' onilte tu'n telkyiq'i'n ti'j Joswe tz'il. Ex xitma'n te: Aja'lu a tz'elpuna'ju' qa matxi' tz'el wiq'ine' tila. ¡Ja'lo knb'incha'ye' tu'n tokq'o'n t-xb'aluna tb'anil kse'n toj ninq'ij! chij.⁵Tchaq'tzuntz kyeju' onilte tu'n tjaxkyq'on jun toj twi' Joswe ẍnu'l b'a'nxi'x. Jaxtzun kyq'o'n jun toj twi' Joswe, ex okkyq'o'n t-xb'alun te ninq'ij. Axtoqtzu' wa'la' tanjl Dyos.

⁶Xi'tzun tma'n tanjl Qman Dyos te Joswe kjalu:⁷Chi Qman Dyos nimtipumal kjalu: B'eta toju' nb'eye' ex b'inchamju'ya matxi' b'ajx nma'ne' teya. Qatzun matb'inchaya, oktzun kjeltentza ka'yilteju' njaye'. Aya kxe'l ka'yinte exu' twi' tpen, ex kxe'l nq'o'ne' jun toklena kyxolju' anjl lu nche ajb'en weye'.⁸B'inku'ya b'a'nxi'x Joswe, aya kynejel pale, ex tu'n kyb'inteju' tuk'i'la aye' pale, qu'n kykyaqilxe' jun techlal t-sanjelal Dyos qeye': Ktzajel wiq'inju'ye' nmajine', aju' tch'ẍu'l.⁹Matxi' kub' nq'o'ne' jun ab'j wuq ttx'u'k twitz Joswe, ex ayinku'ye' chin okyel tz'ib'ante twitzu' ab'j. Ex toj jun q'ijx k'elela' wi'ne' kyilju' tnam lu.¹⁰Ajtzun tponju' tq'ijlalil lu, che oyile' junjun te juntl ajkytene' toj nak'b'il tjaq' tqan lob'j ub'a ex tqan lob'j iw. Ayine' Dyos Manb'aj nimwipumale' nchin q'mante, chi Dyos. Yek'u'njtz tkb'el kantil ex Olib'o

¹Ul jumajtlu' anjl ntoq yolin wuk'i'le, nnokxtk'asune' kse'n jun xjal b'a'n watl. Ex tzaj tqani'n weye':²¿Titi' nxitka'yi'na? chij. Xi'tzun ntzaq'we'ne' te: Nxi' nka'yi'ne' jun kykb'el kantil q'anpwaq, tuk'i'lju' tkub'ex aseyt tib'aj. Ate' wuq tkantilil tib'aj, ex wuq kymechilju' kantil.³Ate' kab'e' tqan olib'o tk'etzju' kykb'el kantil, jun toj tb'a'nq'ob' ex juntl toj tnayaj.

⁴Xi'tzun nqani'ne' teju' anjl ntoq yolin wuk'i'le': Taye ¿titi' tz'elpuna'ju' lu? nchije'⁵Tzajtzun ttzaq'we'nju' anjl weye': ¿Ma min nkane toj twitza titi' tz'elpuna'? chij, xi'tzun nma'ne' te mixti' taye nchije' te.

⁶Oktentzuntz q'malte weye' kjalu: A tqanil ja'lu tu'n Qman Dyos te Sorob'ab'el: mya kyu'n txqan xjal te q'oj, ex mya tu'n ipumalj, xi'qeka't a tk'u'j tiju' nxewe', chi Qman Dyos nimtipumal.⁷¿Ti'xi'xtzunta toklen, jun nimaq witz? ¡Naq plan tx'otx'tl kjela'ya twitz Sorob'ab'el! K'eletz tiq'in ab'j nim toklen, ex njawxi' kyẍch'in xjal kjalu ¡Tb'anilxi'x, lutzun t-xtalb'il Dyos!

⁸Ex tzaj tq'o'n Qman Dyos tpakb'al weye' kjalu:⁹Matxi' ku'x tq'o'n Sorob'ab'el tq'uqlilju' ja te k'u'lb'il lu, ex axte kb'ajsalte, chi Dyos. Ikytzu'n k'elela' kynik'e' qa a Qman Dyos nimtipumal saj chq'onweye'.¹⁰Aye'tzu'n mixti'x xi' toj kywinqil ex min e'onin tej ttzyetku' tnejel, ja'lo che tzalajel ajkyka'yinte njapun b'aju' aq'untl tu'n Sorob'ab'el.
Yajxi'tzuntl, tmaju' anjl kjalu: Aju' wuq kantil lu aye' tb'aq' twitz Qman Dyos, nche b'et ka'yilteju' twitz tx'otx', chij.¹¹Xi'tzun nqani'ne' te: ¿Ti'tzu'n tz'elpuna' kab'e' tqan Olib'o lu, junjun te junjun plaju' kykb'el kantil?¹²Ex ¿Titi' tz'elpuna' kab'e' tqan Olib'o ate'k kyk'etzu' tub' q'anpwaq janpona' aseyt toju' kantil? nchije'.¹³Tzaj ttzaq'we'n anjl weye': ¿Ma mitzun jun b'i'n tu'na titi' tz'elpuna'? chij. Mixti' taye, nchije' te.

¹⁴Tzajtzun tma'n weye' kjalu: Xi'nyolina'te' kyi'j Sorob'ab'el ex Joswe, matxi' che sk'onjtz tu'n Dyos tu'n kyajb'en te Qman Dyos toj tkyaqil twitz tx'otx'. Tzaj yek'u'n jun tloj u'j tz'ib'a'n twitz

¹Tzaj yek'u'n juntl ti'xti' weye'. Wile' jun tloj u'j tz'ib'a'n twitz, in lik'ik'i'nje'.²Aju' anjl tzaj tqani'n weye': ¿Titi' nxi' tka'yina? xi'ntzaq'we'n te: nxi' nka'yi'ne' jun tloj u'j tz'ib'a'n twitz nlik'ik'i'nje; b'eljoj metr tnuqub' ex kyaje' metr tk'i' nik'jan twitz.

³Ex tzaj tma'ntzuntz weye': Atzu' tz'ib'a'na'ju' qanb'en tib'aj tkyaqilu' tnam. Kse'nxu' tz'ib'a'nk twitz toj kab'e' plaj, mix-a'lo' jun mlaywit kub' tz'e'yset twitz qa nalq'an mujqa nxi' tma'n jun ti'xti' mya ax toj tb'i Qman Dyos.⁴Intma'n Qman Dyos nimtipumal kjalu: ktzajel nq'o'ne' qanb'en toj tjaju' inelq'an ex toj tjaju' nq'man jun ti'xti' mya ax toj nb'iye'. Ex atzun qanb'en lu kjelten tzmaxi'j ajtb'aj xitju' tqul ja exju' tab'jil. Tzaj yek'u'n ti'ju' malb'il exju' qya

⁵Etzju' anjl nyolintoq wuk'i'le' ex tzaj tma'n weye': ¡Q'onkpe' twitza ti'ju' tyek'utib' ja'lo!⁶Xi'tzun nqanine' te: ¿Ti'tzun ti'ju' lu? Atzunte tzaj ttzaq'we'n weye': jun malb'ilte'. Aju' malb'il kyil nche najan toju' tnam.⁷Jpu'ntoqju' malb'il tu'n jun tjpel plom. Tku'xtoq jun qya q'uqli toj, tej tjaw jqo'nju' malb'il.⁸Aju' qya lu atzun ilju' chiju' anjl tzaj tma'n weye'. Ex ku'x tk'opi'n tojxi'ju' malb'il, ex ku'x tjpu'n tu'nju' tjpel plom.⁹Ex xinka'yi'n junmajtle', ex wile' kab'e' qya kub' kyek'un kyib'. Atitoq kxik', ex kyq'iq' xi' iq'inkye. Ikxi'x kse'n kyxik' pich' Siwenya ex iq'i'nju' malb'il kyu'n toj kyq'iq'.

¹⁰Ex xinqani'ne' teju' anjl ntoq yolin wuk'i'le': ¿Jatzun matxa' q'i'nju' malb'il lu? chij.¹¹Atzunte tzaj ttzaq'we'n weye: kjawil b'incha'n jun tja dyos toj B'ab'ilon. Ajtzun tjapun b'aju' tja kydyos, kb'el q'uqb'a'ntzuntz tib'a jun tq'uqb'il kuw. Tzaj yek'u'n kyi'ju' kyaje' karwaj te q'oj

¹Tzaj yek'u'n juntl ti'xti' weye'. Wile' kyaje' karwaj te q'oj kxol kab'e' witz q'ank'uxb'ilqe'.²Aju' tnejel karwaj jk'u'n kyu'nju' chej kyeq kyi'j; atzunju' tkab' karwaj jk'u'n kyu'nju' chej q'eq kyi'j;³atzunju' toxi'n, jk'u'n kyu'n chej saq kyi'j; atzunju' tkyaji'n jk'u'n kyu'n chej chinaq' kyi'j.

⁴Xi'tzun nqanine' teju' anjl ntoq yolin wuk'i'le'. Taye ¿Ti'tzu'n tz'elpuna'ju' lu? nchije'.⁵Tzajtzun ttzaq'we'n anjl weye': Kyaje' kyq'iq'qekye' lu nche' etz twitz Qman Dyos te tkyaqil twitz tx'otx'.⁶Aye'ju' karwaj jk'u'nqe' kyu'n chej q'eq kyi'j mache'x toju' tnam toj tb'anq'ob' kya'j; atzunju' jk'u'nqe' kyu'n chej saq kyi'j, toju' tnam te tkub'exq'ij; atzunju' jk'u'n kyu'n chej chinaq' kyi'j toju' tnam toj qnayaj kya'j.⁷Ex eb'je'tzu' chej chinaq' kyi'j, atixi'x tb'is kyk'u'j tu'n tb'aj kyb'eti'n tkyaqil twitz tx'otx'. Xitma'n anjl kye: kukyxi'ye' b'etil toj tkyaqil twitz tx'otx', chij. Aye'tzunkye kyb'incha ikju'.

⁸Yajxi'tzuntl tzaj ẍch'inju' anjl weye': ¡Ka'yinxtzuna ẍe b'ajtx'anj toju' tnam te qb'anq'ob' kya'j kqenb'ilu' ttx'u'jil Qman Dyos kyu'n toju' tnam lu! Tej tjax q'o'nju' toj twi' Joswe te ninb'il

⁹Ate Qman Dyos tzaj tq'o'nju' tpakb'al lu weye':¹⁰Iq'inktza jun onb'il kxolju' b'je'xniqe' toj junxi'tl tx'otx' oje tz'anjtz kyi'j toj B'ab'ilon: Elday, Tob'iy ex Jedayiy. Texu' q'ij lu, kuxtxi'ya toj tja Josiy, tk'wal Soponiy.¹¹B'inchanqeku'ya koron tu'n saqpwaq exu' q'anpwaq matxi' jawtb'u'yina, ex q'onkx juna toj twi' Joswe kynejel pale, tk'wal Josadak.¹²Ex q'manxa te: Aju' Qman Dyos nimtipumal ntma'n qa aju' ku'xun tok tb'i t-xul k'eletz puqli ti'ju' tlok' ex kjawil tb'incha'n tja Qman Dyos.¹³Kjawil tb'incha'n jumajtlu' tja Qman Dyos ex ktk'ma' ninb'il kse'nte jun nimaqkawil. Kb'el qe' toj tq'uqb'il kawil, ex tk'etzu' tq'uqb'il kb'el qeju' pale, ex ktenb'il nak'b'il kxol kykab'il.¹⁴Jun nab'ab'l qekye' koron che kjelten toj tja Qman Dyos te ninb'ilkye Elday, Tob'iy, Jedayiy ex Josiy tk'wal Soponiy.

¹⁵Che ulju' xjal te najchaq, tu'n kyonin tu'n tjaw b'inchetlu' tja Qman Dyos; oktzun k'elel kynik'tze' qa a Qman Dyos nimtipumal tzaj tchq'o'n weye'. Atzunju' lu kjapumel ajkyb'inteye' tq'ojq'ojel twi' Qman Dyos ex aj kyoksla'ne' te.

¹Toj tkyaji'n q'ij teju' tb'eljuji'n xjaw (aju' tok tb'i Kislew) toj tkyaji'n ab'q'i teju' tkawb'il nimaqkawil Dariyo, ate Qman Dyos tzaj t-sma'n jun pakb'ab'l teju' t-sanjelal Sakariy.²Toju' tq'ijlalil, aju' tnam te B'etel ojetoq txi' ttchq'o'nju' Sareser exu' Rekeme-lek, kyuk'i'lju' t-xjal, qanil onb'il te Qman Dyos³ex qanilte kyeju' t-sanjelal Dyos ex kyeju' pale toj tja Dyos nimtipumal: ¿Ma kukxlo tu'n qb'inchateye' techlal b'is ex mewayi'n toj tjwe'yi'n xjaw te junjun ab'q'i, kse'nxu' nqb'incha'ne' ja'lo?

⁴Atzunte Qman Dyos nimtipumal tzaj yolin weye', ex tma:⁵Q'manxa kyeju' xjal toju' tnam, ex kyeju' pale kjalu: Inche mewayinkye' ex nkub' kynimane' techlal b'is toj tjweyi'n ex toj twuqi'n xjaw atxi'x mab'ent oxnaq lajoj (70) ab'q'i. Extzun min nkyb'incha'ne' te ninb'ilweye',⁶ajtzun kyaq'wi'ye' wal ex k'wal, kyexe' najb'ena'.⁷¿Mamyaye'xtzun yol ja'lu tma Qman Dyos kyu'nelju' t-sanjelal ojtxi', tej atitoq Jerusalen toj nak'b'il nojni toj kyu'n xjal, exqe' txqantl nimaqtnam kyi'jele exju' tx'otx' Nekeb' exju' plan tx'otx'? E'b'je'x toj juntl tx'otx' tu'n tpaju' kpi'sal

⁸Ate Qman Dyos tzaj yolin teju' t-sanjelal Sakariy, ex xitma'n te:⁹A nxinma'ne' lu kyeye': Che kyq'onke' xjal toj xjel tojxi'x ax, che oke' b'a'nwnaq ex laqjx kyk'u'je' kyxolilexe'.¹⁰Lalun che kub' kyjtz'one' qya kyimni kychmil, exqe'ju' meb'a, exqe'ju' najchaq xjal, exqe'ju' prow. Lalun kximaye' tu'n kyoktene' b'inchal taq'wix jun ti'j juntel.¹¹Ex minti' kyajkye' tnam tu'n txi' kb'incha'n. Kykyaqilx xikymiltz'u'n kytze'lkyi'j ex kub' kẍkyinsa'n kyib'.¹²Kub' kych'uẍsa'nju' kyanmi kse'n ab'j, tu'n lalun txi' kb'i'nju' xnaq'tzb'il exu' chaq'b'il tzaj tma'n Qman Dyos nimtipumal tu'nju' t-xew, kyu'nelu' ojtxi' t-sanjelal.
Qu'mtzun tzajxi'x ttxqan ttx'u'jil Qman Dyos tu'n,¹³ex tma: Kse'nkye min kyaj tu'n nxi' kb'i'ne' tej intoq che ntxko'ne', extzun ikxwe' lalun che'x nb'i'ne' ajkytxokon weye'.¹⁴Qu'mtzun ẍe'xa' nsputi'na'ye' toj naku'j jun xkyeqlenpach kxolju' nimaqtnam minti' ojtzqi'n kyu'n, xkyejtzun tnamtzu' te jun chq'ajlaj ja mix-a'lo' jun tu'n tanq'in toj. ¡Kyu'nx xkub'a tzqiju' ktx'otx', juntaq tnam tb'anilxi'x! Yol tzaj ttziya'n Qman Dyos tu'n tb'inchante

¹Matzaj tq'o'n Qman Dyos nimtipumal pakb'ab'l weye' lu:²Atzun lu nmane' ayine' Qman Dyos nimtipumal: Nchin xky'aqline' ti'j Syon, tx'u'j xky'aqli'n.³K'anjetl wi'je' toj Jerusalen tu'n nnajane' toj. Ex atzunju' Jerusalen k'okyel tb'i nintnam japumnixi'x ti'j, exu' witz te Qman Dyos nimtipumal k'okyel tb'i witz xjan.⁴Che kb'el qe jumajtlu' tijwnaq ichan ex qya kyoju' k'wik toj Jerusalen, teyile junjun k'okyelju' ktze te kyipumal tu'n tpaju' matxi' che tijin.⁵Che nojelju' k'wik toju' nintnam kyu'n k'wal q'a ex txin ex che ẍchal toj.⁶Ch'uẍ k'elela' toj kwitzu' jni'tl che kjelten toju' ntaname' toju' tq'ijlalil lu; atzun wewe' mya ch'uẍ k'elela'. Ayine' Dyos Manb'aj te tkyaqil ipumalj, nchin q'mante:⁷Knkla'ju'ye' ntaname' te tipumalju' tnam te tjawetzq'ij ex teju' tnam te tkub'exq'ij.⁸Ex ktzajel wiq'ine' toj Jerusalen tu'n tnajan atzu'. Kche okyeltzuntz te ntaname', chin okyele' te Kydyos axxi'x ex toj tnik'alilkyi'j, chi Dyos.

⁹Atzun ntma'n Qman Dyos nimtipumal kjalu: Kq'onk tilile', aye'ye' matxi' kb'ijuye' tpakb'al kyeju' sanjelal toju' tq'ijlalil lu, tzaj toju' q'ij tej tku'x q'o'nju' tq'uqlil tja Qman Dyos tej tkub' b'incha'n jumajtlu' tja Qman dyos te tkyaqil ipumalj.¹⁰Qu'n mixtoqti' twi' kyk'u'j xjal ojtxi' exqe' alu'mj. Tu'n kpaju' ajq'oj, mixtoqti' nak'b'il kyeju' najlqe' toj, extzun ayine' ẍin b'inchante tu'n kyjaw miltz'uj junjun ti'j juntl.¹¹Atzun ja'lo, lay nb'inchatle' kyeju' ẍe kyejten toju' tnam lu, kse'n toju' tnejel q'ij. Ayine' Dyos Manb'aj nchin q'mante.¹²Qu'n ktenb'il nak'b'il kxol. Che witzalju' tqan ub'a; exju' tx'otx', exju' twitz; ex ikxu' kya'j, exju' ta'l che'w. Ex kxe'l nq'o'nwe' lu kyeju' che kjelten toju' tnam lu.¹³Ikse'nkye' aj Juda ex aj Israel, myab'a'n kyolinjtze' kxolju' txqantl nimaqtnam, ikxtzu'n che kletele wu'ne' ex che okyel nq'o'ne' te k'iwb'il ja'lo. ¡Lalun che xob'e'! ¡Kuwqexe' toj!¹⁴A intma'n Qman Dyos nimtipumal ja'lu: Mataq kub' nximane' tu'n ttz'e'yset kwitzju' ojtxi' kychmane' tej tok kyq'o'nju' ntx'u'jile', ex mixti' anjtzti'j nk'u'je'.¹⁵Atzun ja'lo, matxi' kub' nximane' tu'n tb'inchetju' b'a'n kyeju' aj Juda ex aj Jerusalen. Qu'mtzun lalun che xob'e'.¹⁶A ati tu'n kyb'inchanteye' lu kukxju': Che yolinqeye' axi'x kxolilexe', che yolinqeye' toj tnik'alilti'j ex kyjyome' nak'b'il kyoju' ja te kawb'il;¹⁷Lalun kb'incha myab'a'ne' te juntl expe' lalun txi' kma'n jun ti'xtiye' mya ax toj tb'i Qman Dyos. Qu'n majx nche elwik'o'ne' kykyaqil. Ayine' Dyos Manb'aj, nchin q'mante.¹⁸Ate Qman Dyos nimtipumal tzaj yolin weye' kjalu:¹⁹Ayeju' mewayi'n kyoju' tkyaji'n, tjweyi'n, twuqi'n ex tlajoji'n xjaw che jawil b'ent te tzalajb'il, te niq'ij tzalajb'ilxi'x kyeju' kyyajilb'en aj Juda. ¡Kyk'u'jlame' axi'x exju' nak'b'il!²⁰A ntma'n Qman Dyos nimtipumal ja'lu: Ate'xju' xjal najlqe' kyoju' txqan nintnam na'mx kyul.²¹Kxe'ltzun kyma'n junjun nintnam kye juntl: ¡Qo'qeye' jyolte Qman Dyos nin tipumal ex qqanix te tu'n qtzaj tk'iwla'n! Aye'tzunju' txqantl kxe'l ktzaq'we'n kye: ¡Ex ikxqe' maqo'xqe'!²²Ex che b'ju'l txqan tnam ex nimaqtnam toj Jerusalen, jyolteju' Qman Dyos ex qanilte te tu'n kykub' tk'iwla'n.²³Tojtzunju' q'ij lu, lajoj najchaq xjal kyoju' txqantl tnam che okyel lutx'e tiju' ttxow jun aj Juda, ex kxe'l kma'n te: ¡Qajb'ilqe' tu'n qxiye' kyuk'i'le', qu'n matxi' qb'iye' qa ati Qman Dyos kyuk'i'le'! Tz'e'ysb'il kwitzju' tnam nqaku' te'qe' kyk'etz aj Israel

¹A tpakb'al ja'lu tzaj tma'n Qman Dyos tiju' tx'otx' Adrak ex ti'ju' nintnam Damask: Te Qman Dyos qeju' nimaqtnam Sirya, ex ikxqe' tnej kyyajajil aj Israel.²Ex tete' Qman Dyosju' Amat, nqayin kyk'etzju' nimaqtnam Damask, exju' Tiro ex Sidon tuk'i'lxi'ju' kyanq'ib'l.³Mache jawtb'incha'n Tiro ja kuwsa'n, ex mache kub' tchmo'nju' q'anpwaq ex saqpwaq kse'n jun ch'uq q'antx'otx'.⁴Atzunte Qman Dyos k'elel q'inte tkyaqil ex kb'elex tq'o'nju' tq'inumal toj ninnjab', ex majx kb'el tz'e'ysa'nju' nintnam tkyaqil.

⁵Ajtka'yinteju' nintnam Askalon, tzul nim xob'ajil ti'j. Ex ikxte Kasa kyajtel nim, exu' q'uqb'ab'l tk'u'j Ekron tzul tz'aq twitz tx'otx'. ¡Kjeltente Kasa mixti'tl tnimaqkawil, atzunte Askalon kjelten mixti' xjal toj!⁶Che najalju' xjal smo'n kyyajil toj Asdod, iktzu'n kb'el nme'ssa'nju'ye' nimjtib'il kyeju' pilistey.⁷K'elel wi'ne' kychi' tuk'i'l chik' toj ktzi aju' nkch'yo'n, ex k'elel nxk'a'yine' toj ktzi, aye'ju' wab'j minti' tu'n kwante. Kxoltzunju' xjal lu ate junjun che kjelten weye'; che okyel naku'j aj Judaqe', atzunte Ekron k'okyel kse'nqe' jeb'usey.⁸Ayintzunwe' atinqine' klolkyeju' weye' te alchaqxkyeku' matzik' tzalu. Aju' tok yajulkye lay tz'oktentl yajulkye, qu'n ayinku'we' chin ka'yilkye ja'lo tu'nku' nwitze'. Tulilju' jun nimaqkawil⁹¡Tzalajxa nimxi'x, nintnam Syon! ¡B'itzana tuk'i'l tzalajb'il nintnam Jerusalen! Tzulju' tnimaqkawila tk'etza, tnik'alti'j ex ati kanb'ab'l tk'etz, extzun me's nchejin tib'aj jun b'ur, tib'aj jun tal b'ur tal jun ttxu b'ur.¹⁰Che kb'el t-xitu'n tkarwaj Eprayin, exqe' chej toj Jerusalen exqe' smaj te q'oj. Ktma' tqanil nak'b'il kyeju' nimaqtnam ex ktzajelxju' tkawb'il ttzi ninnjab' kpomelx ttzi juntl ninnjab', tzajx tk'etz nin a' Ewprates ponx b'ajsb'il twitz tx'otx'. Kjawil b'incha'n jumajtlju' Israel

¹¹A ntma'n Qman Dyos ja'lu: Tu'nju' chojb'il tu'n chik' tiju' yol kyejni b'entti'j tuk'i'la, Jerusalen, che jawitz wiq'inju'ye' jpu'nqe'ku'x toju' xoch mixti' a' toj.¹²¡Atixu' oyb'il kyeye' aye'ye' jpu'nqeye', kutanj kyi'je' toju' ja kuwsa'n! Kxe'l nmane' kyeye' qa k'anjel wanjsa'n ti'je' ky'i'wb'il kamajxi'x kse'n matxi' che yajtiye'.¹³Ate Juda matxi' tz'ok te nsmaje' te q'oj, ex matxi' kub' nq'o'ne' jun talsmaj, aju' Eprayin. Ti'jta Syon kb'ela nb'inchane' jun k'uẍtx'e'nb'il, kjawil kyiq'inkyib'u' tk'wala kyi'ju' tk'wal Kresya, chi Dyos.

¹⁴Ktyek'utib' Qman Dyos tib'aju' ttanam; che b'ajex t-xonju' tal t-smaj kse'n q'ankyaq. Kxe'l tq'ajsa'nte Qman Dyos chun ex kb'etel toju' q'ankyaq te tnayajkya'j.¹⁵Kche tkla'te Qman Dyos nimtipumalju' teqe', aye'tzunkye che b'ajel kywab'e'n kab'aju' chik'tzeyil ex che b'ajelju' kyajq'oj kyu'n; che k'wal ti'ju' kychk'el kse'n nche k'wan b'in, kche nojel ti'j naku'j nnoj jun ninlaq, kse'n tuk'a q'olb'eb'l.

¹⁶Tojtzu'n tq'ijlalil lu, che tkla' Qman Dyos ju' ttanam naku'j te jun tnej rit, ex che qoptz'ajelju' te tojku' kytx'otx' kse'nqe' tb'anil ab'j te jun koron te oklenj.¹⁷¡B'a'nxi'x, ex xawa'nkuxi'xju' tx'otx'! tu'nju' kche chmetelju' ttriy exu' tk'wa' b'in, kche ch'iyelju' ku'xun exqe' qpoj tb'anilqexi'x. Ttziya Qman Dyos tzaqpib'l

¹Kqaninxe' jb'al toj q'ijal te Qman Dyos, ex ate Qman Dyos nb'inchanteju' xloq'lokya'j, ktzajel tq'o'n jb'al nimxi'x, ex ktzajel tq'o'nju' itzaj toj kojb'il kye kykyaqil xjal.²Chajyolilju' kyol witzileb', ex naq chajyolilju' nkyka'yi'n jyolkyi'j xjal. Aju' pakb'ab'l nkma'n witzik'qe' mixti' knab'l, aye'ju' kyol te q'uqb'ab'l k'u'jb'aj mixti' kyoklen. Qu'mtzun aju' tnam naq ate'qe' se'n jun tnej rit, ex che yajt tu'n tpaju' mixti' k'ik'lel kyi'j.

³Qu'mtzun ntma'n Qman Dyos: Aju' ntx'u'jile' matxi' tzaj b'ent kyi'ju' k'ik'lel, ex kb'el ntz'e'ysa'n kwitzjuye' nejenel teju' ntaname'. Ate Qman Dyos nimtipumal, xq'uqilteju' tnej trit, aye'ju' tyajajil Juda, che okyel te tchej kuwqe' toj q'oj.⁴Kxolkye k'eletza'ju' ab'j nim toklen, aju' stak te ja exu' smaj te q'oj, kxolkye che elitza' kykyaqilu' nejenel.⁵Ikqe' kse'nqe' xjal te q'oj nkub' kwab'a'nju' kuw tx'otx' kyoj b'e; In oktilil kyu'n, qu'n ati Qman Dyos kyuk'i'l, ex che b'el ch'ixwi'ju' aj chejil kyu'n.⁶Chi Qman Dyos kjalu: Ayine' chin q'olte kyipumalju' tyajajil Juda ex che nkla'ju'ye' tyajajil Jse. Kche nẍaqluye' tu'n kyanjtz toj ktanam, qu'n nlaqj nk'u'je' kyi'j. Kche okyel jumajtl naku'xwitloj b'ajx che ela' wik'u'ne', qu'n ayine' Qman Dyos kye, nxi' nb'i'nju'ye' kna'j Dyos.⁷Naku'j jun xjal te Eprayin te q'oj, ktzalajelju' tanmi se'nju' tu'n b'in. Ex ikx che tzalajelju' kyk'wal ajkyka'yinte. ¡Ktzalajelju' tanmi tu'n tpaj Qman Dyos!⁸Kche ntxka'ye' ex che tzajel nb'u'yine', qu'n matxi' che nkole', Kche chmetel jumajtlu' kb'aj kse'nxu' kyb'aj ojtxi'.⁹Ayine' ẍinx sputinkye' kyxolju' nimaqtnam b'a'nqa najchaq ta'qe', chin tzajel kyna'ne', ex jun q'ij k'anjetz kyi'j kyuk'i'lju' kyk'wal.¹⁰K'anjetz kyi'j wu'ne' toj Ejipt che eletz wiq'ine' toj Asirya, che xe'l wiq'ine' toj Kalaad ex toj Lib'ano, ex nim txqan kb'aj expe' lay kanunju' najb'il kye.¹¹Kche ik'ex jlajin toju' ninnjab' te Ejipt, knk'ixb'saju'ye' ttolob' ninnjab'. kb'el ntzqijsa'ne' nin a' Nilo tzmax t-xe, kb'el nxi'tu'nju'ye' nimjtib'il te Asirya Ex kb'el nb'ajsa'ne' tipumal Ejipt.¹²Kxe'l nq'o'nwe' kyipumale', ex kb'elti'j kyu'ne' toj nb'iye'. Ayine' Dyos Manb'aj nchin q'mante.¹¡Jqonxa, tjpela Lib'ano, ex awtju' q'aq' b'aj wanteju' tk'uteya!²¡Tz'oq'a, tzaj, qu'n makub' tz'aqju' k'ute, qu'n aye'ju' tze tb'anilqe' matxi' che kub' xitj! ¡Che jiq'chanqeye', b'a'nsi te B'asan, qu'n matxi' kub' xitju' k'ul jupinxi'x!³Che' ẍch'inqe'ye' tu'n kyoq'ile' aye'ye' k'iklel, qu'n aju' kwab'l rit tb'anilxi'x matxi' kub' xitj. Q'ojq'oju' b'alun ntzanun, qu'n matxi' kub' xitju' jupin k'ul te Jordan. Kab'e' k'ik'lel

⁴A tzajtma'n Qman Dyos weye' kjalu: ka'yinqexju'ya rit sk'o'nqe' tu'n kykub' b'yet.⁵Aye'ju' loq'ol nche kub' kyb'yo'n ex minti' nkxima'n qa ati kyil tu'n tpaj, ex aye'tzunju' k'ayil nkma'n: ¡Chjonte te Qman Dyos, matxi' chin q'inumaxe'! Expe' mixti' ntzaj laqj kyk'u'ju' k'ik'lel kyi'j.⁶Qu'n ikxtzuwe' lay tzaj laqjwe' nk'u'j kyi'ju' xjal najlqe' toju' tnam lu, xipe' che kxe'la' nq'o'ne' toj kq'ob'ju' kwnaqil ex toj tq'ob'ju' kynimaqkawil. Ex mix-alo'x jun kkletel toj kq'ob'ju' lu ajtkub' kxitunju' tnam. Ayine' Dyos Manb'aj nchin q'mante.

⁷Ex noktene' xq'uqilkyeju' rit pa'nqe' tu'n kykub' b'yet. Nb'inchaye' trat kyuk'i'lju' nche b'inchante. Ex tzaj njyone' kab'e' xtok: Aju' jun oknq'o'ne' tb'i B'a'n ta' Atzu'n juntl Tzyu'ntib'.⁸Ex naq toj jun xjaw e'el wiq'ine' oxe' k'ik'lel matxi'toq b'aj npasense' kyi'j ex nchin elkyik'o'ne'.⁹Ex xinma'ne' kyeju' rit kjalu: ¡Lay chin oktle' te k'ik'lel kyeye'! ¡Qa ati jun makyim, kyimku'j! ¡Ex qa ati jun makub' b'yo'n, kub'ku' b'yo'nj! ¡Ex aye'tzunju' che kjelten b'aj kwanku' kyib'j kxolilex!.

¹⁰Tzajtzun wiq'inju'ye' nxtokye' tok tb'i B'a'n ta' Kub' ntoqi'ne' te techlal qa oje kub' xitju' yol kyejni b'antti'j tu'n Dyos kyuk'i'lju' nimaqtnam.¹¹Tetzunju' q'ij lu kyej naju' yol kyejni b'entti'j, aye'tzunju' lq'ol rit, intoq che ka'yink weye' kane toj kwitz qa a Qman Dyos nyolin toj tkyaqilu' nb'incha'ne'.¹²Xi'tzun nma'ntze' kye: Qa b'a'n toj kwitze', kychjontzju'ye' twi' nk'u'je'; qatzun minti', xtenku'j. Ex tzaj kychjo'n junaq lajoj (30) saqpwaq weye'.

¹³Ate Qman Dyos tzaj tma'n weye': Q'intzu'ya pwaq, chojb'il weye' saj q'o'n tb'nailxi'x, q'onku'xa toju' k'uwenj te tja Dyos. Ex tzaj wiqinju'ye' junaq lajoj (30) pwaq ex ku'x nq'o'ne' toju' k'uwenj te tja Dyos.¹⁴Ex kub'ntoqi'nju'ye' tkab' xtok, aju' tok tb'i Tzyu'ntib', Iktzun kub' xitja' mujb'ab'ltib'il kyxol Juda tuk'i'l Israel.¹⁵Ate Qman Dyos tzaj tma'n weye': Atzu'n ja'lo kutoka te jun myab'a'n k'ik'lel.¹⁶Qu'n kb'el nq'o'ne' toju' tnam lu jun k'ik'lel lay che'x tka'yi'nju' rit elni tpa'ntib', ex lay txi' jyolteju' kyejni tz'aq, ex lay tz'ok tq'a'na'nju' k'ixb'ni, ex lay txi' tq'o'n twaju' numjni, naq o'kx k'okyelten ch'yolkyeju' rit majx etzni kwitz expe' layx kyej tq'o'nju' kxky'eq.¹⁷¡Layxwitju' k'ik'lel mixti'x b'a'n tu'n matxi' che kyej ttzaqpi'nju' tnej rit! ¡Kub'wit tz'aqju' k'uẍtx'e'nb'il tib'aju' tq'ob' exu' twitz te tb'anq'ob'! ¡kyexwit ttzqiju' tq'ob' exu' twitz kyejwit moẍix tkyaqil! Tzaqpib'lte tnam Jerusalen¹Jun tpakb'al tu'n Qman Dyos ti'j Israel. A Qman Dyos xilik'unte kya'j, xkub' q'onte tq'uqlil tx'otx' ex saj q'onte tchwinqlal xjal, ntma'n kjalu:²K'okyel Jerusalen wu'ne' naku'j jun b'itidor te b'in ja che tx'ojtelaju' nimaqtnam nqaku' tqe' tk'etz tu'n. Ajtzun tb'jo'k ktxoli'n kyib' ti'j Jerusalen, ex che okyel tzaqpaj kyi'ju' txqantl nimaqtnam toj Juda.³Kjawil b'entju' Jerusalen wu'ne' te jun nimin ab'j alxi'x kye kkyaqilju' nimaqtnam. Majx kb'o'ljel Alkyexku' nintnam tu'n qama jawtiq'i'ntib' ti'j. Kykyaqilju' nimaqtnam kjawil kyi'nkyib' ti'j.⁴chin okyel tentzuntze' xob'tzalkyeju' chej ex knb'incha'ye' tu'n tok toj kywi'ju' aj chejil. Che nkla'we' tyajajil Juda, ex che kjel moẍix kycheju' nimaqtnam wu'ne'.⁵Ajtok kyka'yin nejenel te Juda ja'lu ok kyma'tzuntz toj kyanmi: A Qman Dyos nimtipumal k'okyel te Kydyosju' najlqe' toj Jerusalen, ex ate natzaj q'onte kyipumal.⁶Tojtzu'n tq'ijlalil lu che okyelju' nejenel wu'ne' kse'n ttxalq'aq' kyxolju' si, ex kse'n q'aq' kyxol pchoj t-spiyil triy. Che b'ajel kywanju' nimaqtnam tqe'k toj kyb'anq'ob' ex toj kynayaj, aye'tzu'n najlqe' toj Jerusalen che najal jumajtl toju' ninktanam.⁷Ayintzunwe' Dyos Manb'aj nej che nkla'ye' toj kyja aj Juda, tu'ntzun lalun jaw knima'n kyib'ju' tyajajil Dab'i exqe'ju' najlqe' toj Jerusalen kyib'aju' txqantl tyajajil Juda.⁸Ayine' Dyos Manb'aj, chin klolkyeju' najlqe' toj Jerusalen. Che okyelju' nche' numj kxol kuw kse'n nimaqkawil Dab'i, aye'tzunju' tyajajil Dab'i che okyel naku'j Dyos, nakuj anjl te Qman Dyos, nejlqe' kwitz.⁹Majx kb'el nxitune' alkyexku' jun nimaqtnam qama tz'ok tzaqpaj q'ojil ti'j Jerusalen toj tq'ijlalil lu.¹⁰Kche nnojasaye' tyajajil Dab'i tu'n xtalb'il ex tu'n kna'n Dyos nwitze' exqe'ju' najlqe' toj Jerusalen. K'okyel kyka'yintzuntz aju' xb'aj kxyu'n, che b'isul ex che oq'el ti'j kse'n nche oq' ajtkyim jun tal twitz k'wal mujqa ti'ju' tnejel k'walb'aj.¹¹K'okyel jun nimaq b'is toj Jerusalen kse'n tiju' dyos Adad-rimon toju' plan tx'otx' te Mewido.¹²Tojile junjun ja, che b'isul toju' tnam: aye' tyajajil Dab'i, ex ikqexju' kxu'jil; aye' tyajajil Natan ex ikqexju' kxu'jil;¹³aye' kyyajajil aj Leb'i, ex ikqexju' kxu'jil; aye' kyyajajil Simi, ex ikqexju' kxu'jil;¹⁴Ex ikqexju' txqantl tnej xjal tojile kyja teyile junjun ex ikqexju' kxu'jil.

¹Tojtzunju' tq'ijlalil lu kjawitz anq'in jun t-xiklil a', tu'ntzun kytx'jetju' tyajajil Dab'i exqe'ju' najliqe' toj Jerusalen toju' kyil ex kytz'ilil.²Expe' kb'el nxitune' kyb'iju' witzileb' toj tkyaqilu' tnam lu, tu'n lalun che k'uluntl xjal kwitz. Ex ikx che elel wiq'ine' sanjelal ex tkyaqilju' xewb'aj tz'il toju' tnam lu. Ayine', Dyos Manb'aj nchin q'mante.

³Qatzun ati jun tajb'il tu'n t-xitljo'n tmante jun tpakb'alil, aye'xu' tman kche q'malte kjalu: ¡Kkyimelta qu'n tajb'ila tu'n tmanteju'ya ttchaj yolila ku'xwitloj tpakb'ab'l Qman Dyos! chechiku'. ¡Aye'xju' tman che okyel xyunte tu'n tpaj nok tq'o'ntib' te t-sanjel Dyos!⁴Tojtzunju' tq'ijlalil lu aye'ju' sanjelal kche ch'ixwel tu'n kmante ntzaj yek'u'n kye tu'n kpakb'ante. Mix-a'lo' jun ksb'ul tu'n tok tq'o'nju' ktxo'w sanjelal,⁵Ape' kyma'ju' teyile junjun: kjolqinwe', mya t-sanjelal Dyos qinwe'. Ntzajlenxe' tal k'walqine' atzu' nchin aq'unane' toj kojb'il.⁶Ex qa ati jun maxjelunte: ¿Yajtzunju' k'ixb'ni lu iqa'n tu'nju' t-xmilala?, ate ktzajel ttzaq'we'n: atzu' soka' b'incha'n wi'je' kyja wamiwe'. Ate Qman Dyos wajawe'

⁷Ntma'n Qman Dyos nimtipumal kjalu: ¡We'ktza k'uẍtx'e'nb'il, ti'ju' nk'ik'lele' ex ti'ju' onilweye'!
¡B'yonku'ya k'iklel ex che b'ajex slamju' tnej rit, ex chin okyel meltz'uje' kyi'ju' a'la'j!⁸Che kyimel masch'i'n nik'janju' nche najan toj tnam lu: atzun min tz'aqli nik'jan che kjel anq'in. Che' ik'elju' che kjel anq'in wu'ne' toj q'aq'; kche nẍtilsa'ye' kse'n nẍtilseta'ju' saqpwaq, k'okyel wu'ne' kuw kse'n nkuwseta'ju' q'anpwaq. Ex che kub'saltzuntz weye', ex kxe'l ntzaq'we'ne' kykub'sb'il. Che okyel nq'o'ne' te ntaname'. Aye'tzunkye' ktzajel ktzaq'we'n: Ate Qman Dyos qajawe'. Ayine', Dyos Manb'aj nchi q'mante. Aju' b'ajsb'il tkanb'ab'l Jerusalen

¹Luju' q'ij tzul te Qman Dyos, ajtb'aj sipa'nju' xb'jex q'in toja Jerusalen kxole'.²Che b'ajel tb'u'yi'n Qman Dyos kykyaqil nimaqtnam toju' tq'ijlalil lu, tu'n kyq'ojin ti'j Jerusalen. Ex kb'elti'ju' nintnam kyu'n, kb'je'lex kyelq'anju' toj kyja, che b'ajel kyajla'n kyxu'jil ex che b'ajex q'in nik'jan xjal toj juntl tx'otx'. Noq o'kxu' txkyajb'len che kjelten toju' nintnam.³Lwiyxi'xtzun k'eletz Qman Dyos q'ojil kyi'ju' nimaqtnam lu, kse'nxu' nq'ojin tojxi'xju' q'ij te q'oj.⁴Kb'el tq'onte Qman Dyos tqan tib'aju' witz Olib'os ati twitz Jerusalen tu'me'lju' plaj te tjawetzq'ij toju' q'ij lu. Ex jun ninb'ya', tzajnix tk'etz tjawetzq'ij tu'n tkanun toj tkub'exq'ij, kb'el taq'pu'n witz Olib'os toj kab'e'. Nik'janju' witz kxe'l toj qb'anq'ob' kya'j atzunju' nik'jantl toj tnayajkya'j,⁵atzuntzu' che elixa' oqe' toju' b'ya' kjelten kxolju' witz, inpon kanun tzmaxtzu' Asal, toj jun plajtl. Kche oqele' kse'nqe' ojtxi' kychmane' tu'n tpaju' kyajnajnab' tzaj tej intoq kawinju' nimaqkawil Usiy toj Juda. Ex tzulju' Qman Dyos kyuk'i'l kykyaqilu' wa'lqexi'x toj kyokslab'l.

⁶Mixti'te che'w ex lay kub' txun che'w toju' qi'j lu.⁷Mixti' juntl q'ij kse'n ja'lu, naq o'kx Qman Dyos ojtzqilte. Lay tz'el tnik'tzilju' q'ijtl ex qonik'an toju' q'ij lu, qu'n kukx ttente spik'unju' te qonik'an.⁸Che' b'je'letz b'ent a' ẍnu'l toj Jerusalen, kche b'etel toj jb'alil ex toj q'ijal, nik'jantzun kxe'l tu'me'lju' Kyimni Ninnjab' ex nik'jantl kxe'l tu'me'lju' ninnjab' tku'x kyxolju' tnej tx'otx'.⁹Ate Qman Dyos kykawil toj tkyaqil twitz tx'otx' toju' tq'ijlalil lu. O'kxkute Qman Dyos, ex ikx o'kxku'ju' tb'i.¹⁰Tkyaqilu' tnam kjel b'ent te plan tx'otx'xi', tzajx toj Keb'a pomnix toj Rimon, toj tnayaj Jerusalen. Atzunte Jerusalen kjel jawtl, ex che kb'el najan xjal toj, tzajx tk'etz tjpel tok tb'i B'enjamin tzmax tk'etzu' tjpel nim toklen (jatena' tjpel ojtxi') ex tzajx tk'etzu' ja nimin twe' te Ananel tzmax jata' yotz'b'il taseyt nimaqkawil.¹¹Iku', ate Jerusalen kb'el naja'n, ex lay kub' xitj jumajtl. Kche najalju' xjal toj mixti'te kxob'il.

¹²Aye'tzunju' nimaqtnam mache' q'ojin ti'j Jerusalen, kb'el tz'e'ysa'n kwitz kuwxi'x tu'n Qman Dyos: kb'el q'ayj kychib'jilju' kxjal itz'qe'x ex ikxqe'xju' kwitz toj tjulil ex ikxu' kyaq' kb'el q'ayj toj ktzi.¹³Toju' q'ij lu kche t-xob'tza' Qman Dyos. Teyile junjun kttzyu' tq'ob'ju' tuk'i'l, ex k'aq'pomel kyq'ob' junjun ti'j juntl.¹⁴Ex kq'ojilte' Juda toj Jerusalen, ex k'elel kyiq'in txqan q'inumal saqpwaq, q'anpwaq ex xb'alun kyi'ju' nimaqtnam nqaku' ta'qe' kyk'etz.¹⁵Axu' tz'e'ysb'il witzb'aj kb'eltz'aq kyib'aj xjal, axtzulju' kyi'j chej, mul, kamey, b'ur ex kykyaqilu' chej ati kyeju' ajq'oj toju' xmuj.

¹⁶Tb'ajlenxi'tzun ja'lu, aye'ju' che kjel anq'in kyoju' tnam e'q'ojin ti'j Jerusalen che kxe'l atl junjun ab'q'i k'ulul twitzju' nimaqkawil toj Jerusalen, twitz Qman Dyos nimtipumal ex che ik'salq'ij te tq'ob' tze.¹⁷Extzunqa ati jun nimaqtnam te twitz tx'otx' minxi' toj Jerusalen k'ulul teju' nimaqkawil, te Qman Dyos nimtipumal, lay tzaju' jb'al tib'aju' ktx'otx'.¹⁸Extzunqa min ẍe'xju' aj Ejipt k'ulul, kb'el tz'e'ysa'n kwitz tu'n Qman Dyos ex alchaqxkyeku' juntl tnam qa minti' xi' ik'salteju' ninq'ij te tq'ob' tze.¹⁹Atzun tz'e'ysb'il twitz Ejiptju' exqe' txqantl tnam qa minti' ẍe'x ik'salteju' ninq'ij te tq'ob' tze.²⁰Tojtzu'n q'ij lu, k'okyelpe' tz'ib'a'n kyi'ju' kykanpani chej kjalu Xjansa'n te Qman Dyos. Ex ikqe'xu' tz'qajsb'il ti'xti' toj tja Dyos ex ikx kche okyel xjanxi'x ex ikqexu' nimaqlaq ateqe' twitz q'olb'eb'l.²¹Kykyaqilu' tzq'ajsb'il ti'xti' toj Jerusalen ex toj Juda che xjansetel te Qman Dyos nimtipumal. Alkye makub' tq'o'n jun chojb'il, che ajb'el tu'n, ex atzu' kb'elexa' ttzq'ajsa'nju' kychib'jilju' alu'mj kxe'l kq'o'n. Mix-a'lo' juntl xk'aẍlel ktenb'il toju' tq'ijlalil lu toj tja Qman Dyos nimtipumal.

Bible Society in Guatemala

https://app.library.bible/content/aea9d9099feb3a24