Hageo1
Tza'k'b'il tu'n tjaw kb'inchanju' tja Dyos
1Toju' tkab' ab'q'i teju' tkawb'il nimaqkawil Dariy, toju' tnejel q'ij te twaqaqi'n xjaw, ate Qman Dyos, tu'nelju' t-sanjelal Akey, yolin teju' Sorob'ab'el kawil toj Juda, tk'wal Salatyel ex teju' Joswe knejel pale, tk'wal Josadak.2Atzu'n tma Qman Dyos nimtipumal tu'nelju' t-sanjelal: Aye'ju' xjal lu nkma'n qa na'mx tpon tq'ijlalil tu'n tjaw b'inchet jumajtlju' njaye'.4¿Yajtzunkye' ma matxi' pon kmuj toj kwitze' tu'n knajane' toj kyjaye' tb'anilqe', atzunwe' nja ttenxu' xitjni?5Ayine', Dyos Manb'aj nimwipumale', kxe'l nmane' kyeye' tu'n kximane' b'a'nxi'x ti'ju' tu'me'l kychwinqlale'.6Nim txqankye' kyawal nok, extzun ch'i'n njaw kyb'u'yine'; nche wane', ex min nqe kyk'u'je'; nche k'wane' ex kukx kyk'wajtiju'ye'; nim txqan kyxb'alune' nokkyq'o'ne' extzun min nche' moq'tiye'; ex aju' naq'unan kyja xjal, naku'j toj ẍla'q kostal nku'xa' tq'o'n twi'tk'u'j.7Ayine', Dyos Manb'aj nimwipumale', kxe'l nmane' kyeye' tu'n kximane' b'a'nxi'x ti'ju' nkyb'incha'ne' myab'a'n.8Kukxi'ye' kywi' witz, kyiq'intze' tze ex kyb'incha'nktz jumajtle' njaye'. Chin tzalajelwe' toj, ex chin jawil kyajwali'ne'.9Nimkye' nkjyo'n, ex noq ch'i'n nknet kyu'ne'; atzunju' k'u'n kyu'ne' toj kyjaye', kxe'l wiq'i'ne' noq toj jun xupinx. ¿Tiqu'ntzun? qu'n aju' njaye' matxi' kub' xitj, aye'tzunkye' naq o'kx noka' tilil kyu'ne' ti'jxju' kyjaye'. Ayine', Dyos Manb'aj nchin q'mante.10Qu'mtzun min ntzajtl jb'al, ex min ntzajtl tawalju' tx'otx'.11Ayine' matxi' chin tzaj q'onte q'ijal kyib'aju' kojb'il ex kyib'aju' witz, tib'aj triy, exju' awal ub'a ex olib'o, ex tib'aju' tawal tx'otx', kyib'aj xjal ex kyib'aj a'lumj, ex kyib'aj tkyaqilju' kyaq'un.12Tzaj xob'il kyi'j Sorob'ab'el, Joswe exqe' txqantl xjal tej kyb'inteju' tyol Qman Dyos tu'nelju' t-sanjelal Akey, atzun ojetoq tma Qman Dyosju' tu'n txitma'n kye.13Atzunte Akey, t-sanjelal Qman Dyos, xi' yolin kye xjal toj tb'i Qman Dyos ex tma: Ate Qman Dyos ntma'n kjalu: Ayine', Dyos Manb'aj nchin q'mante: Atinqinwe' kyuk'i'le'.14Iktzu'n exa' k'asuna' Sorob'ab'el, kawil te Juda exju' Joswe, knejel pale, exqe'ju' txqantl xjal tu'n Qman Dyos, tzyettzun tb'inchet jumajtlu' tja Qman Dyos nimtipumal kyu'n toju' junaq kyaje' (24) q'ij teju' twaqaqi'n xjaw te tkab' ab'q'i nkawin nimaqkawil Dariy. Tajwalilju' ak'a'j tja Qman Dyos1Toju' junaq jun (21) q'ij te twuqi'n xjaw, tzaj yolin jumajtl Qman Dyos teju' t-sanjelal Akey,2ex tchaq' tu'n txitma'n te Sorob'ab'el, te Joswe ex kyeju' txqantl xjal:3Aye'ju' eb'jo'k ka'yinteju' tja Dyos nej tb'anilxi'x, b'a'n tu'n ttzaj kyma'n se'n nelaju' lu toj kwitz ja'lo: ¿Ma junxtzun tuk'ilju' tnejel toj kwitze' mixti'xna' tz'oka'te'?4¡Extzun kuwx tk'uja toj Sorob'ab'el! ¡Kuwxa Joswe, knejel pale! Ex kykuwsam kyib'e' kykyaqilxe' xjal najlqe'ye' toju' tnam. Che aq'unane', atinqinwe' kyuk'i'le'. Ayine' Dyos Manb'aj te tkyaqil ipumalj nchin q'mante.5Kse'nxju' ojetoq txi' nma'ne' kyeye' tej kyetze' toj Ejipt, aju' nxewe' kxe'l kyuk'i'le'. Lalun che xob'e'.6Klu'lulju' kya'j exju' tx'otx' wu'ne' toj jte' q'ijtl, e'ninnjab' exju' tx'otx' kuw.7Che lu'lul kykyaqilju' nimaqtnam wu'ne', ex kb'ajtzajel kyiq'in kyq'inumal, ex atzuntzu' knojila' njaye' toj ajwalb'il. Chi Qman Dyos nimtipumal:8Weqe'we' saqpwaq ex q'anpwaq.9Kjelte' tkab' njaye' xa'wankuxi'x kyetwitzju' tnejel. Knb'incha'tzuntze' tu'n tten nak'b'il toju' najb'il lu. Ayine', Dyos Manb'aj te tkyaqil ipumalj nchin q'mante. Ttzak'u Qman Dyos tnam min nokslan10Toju' tjunaqi'n (21) q'ij te tb'eljuji'n xjaw texju' ab'q'i te tkawb'il nimaqkawil Dariyo, tzaj yolin Qman Dyos te Akey ju' t-sanjelal11ex tchaq' toj tb'i Qman Dyos nimtipumal, tu'n t-xjelun kye pale ti'ju' kawb'il kjalu:12Qa ati jun ichan iq'i'n chib'j tu'n xjansa'n ptzo'n toj tpinpa't, exqa matzik' ttxa'n pinpa't ti'ju' wab'j, chib'j, b'in, aseyt mo ti'xku'chaq t-xilel wab'j: ¿Majx kxjansetel t-xilel wab'j lu? chij. Aye'tzu'n pale tzaj ktzaqwe'n qa min.13Tmatzuntl te Akey: qatzun ati jun xjal makyej tz'ilix tu'n tpaju' matxi' ttzyu'n t-xmilal jun kyimni, ex matxi' tzyul juntl ti'xti': ¿ma laytzun che kyej tz'ilix? Aye'tzunju' pale tzaj ktzaq'we'n qa iku'.14Atzunte Akey tma: Chite Qman Dyos ntma'n: axtzun nb'ajiju' kyu'nju' xjal lu: Tkyaqilju' nkb'incha'n ex tkyaqilju' ntzaj kq'o'n weye' tz'il.15Ja'lo che ximanqeye' tiju' lu tjax chix. Na'mxku' ttzyet tb'inchetju' tja Qman Dyos kyu'ne',16¿titi'ju' nb'ajkyeye'? Qa ati jun matxi' tk'etz jun ch'uq twitz awal te winqi'n mlon, ex noq lajoj mlon xknet tu'n; qa ati jun matxi' janb'incheta' k'wab'j b'in, tu'n ttzaj tiq'in kab'naqlajoj (50) ẍoq', ex noq winqi'n knet tu'n.17Tzaj soj wu'ne' ex saqb'aqun tib'aju' twitzju' tkyaqil kyaq'unb'ene', aye'tzunkye' mixti' anjtzkyi'je' wuk'i'le'. Ayine', Dyos Manb'aj nchin q'mante.18Ja'lo, junaq kyaje' (24) tajlalju' tb'eljuji'n xjaw, xku'xaju' tq'uqlil tja Qman Dyos.19Kq'onktzun kwiye' ti'j, ja'lo lay jatz b'aju' ktriye' toju' k'ub'lte. Na'mxpe'tzun twitzan ub'a, exju' tqan iw, exju' kranad, exju' olib'o, textzun kmuj ja'lo, kche nky'iwla'ye'. Kyej ttziya'n Qman Dyos tyol te Sorob'ab'el20Textzunju' q'ij lu tzaj yolin jumajtlu' Qman Dyos te Akey,21ex tchaq' tu'n txitma'n te Sorob'ab'el, kawil toj Juda: Klu'lilju' kya'j ex tx'otx' wu'ne';22kb'el nxitu'ne' tipumalju' kawb'il tkyaqil twitz tx'otx' ex kb'el nxone' kq'uqb'il twitz tx'otx'; che jawil npich'k'une' karwaj te q'oj exqe'ju' nche' jax kyoj, ex che kyimelju' chej exqe'ju' aj chejil; teyile junjun kkyimel tu'n tk'uẍtx'e'nb'il ttzik exni jlajin toj tk'u'j.23Tojtzunju' q'ij lu, aya Sorob'ab'el nmajine', knxq'uqiya kse'n nxmilq'ob'e' te techlal, qu'n ayine' ẍin jaw sk'onteya. Ayine' Dyos Manb'aj nimwipumale' nchin q'mante.Bible Society in Guatemala