Read Malaquías 1

Malaquías1

Tk'u'jlalil Dyos Ti'j Israel

¹A tpakb'alil ja'lu tzaj tma'n Qman Dyos te Malakyiy ju' t-sanjelal tu'n txitma'n kye aj Israel.

²Chi Qma Dyos kjalu: K'u'jla'n qe'ye' wu'ne', chij. Aye'tzunkye' ntzaj kytzaq'we'ne' kjalu: ¿Se'n taq'wi tu'n telqnik'e' ti'j qa nqo tk'u'jla'na? chechije'. Atzunte Qman Dyos ntzaj ttzaq'we'n: Inche nk'u'jla'ne', kse'nx k'u'jlb'ente Jakob' wu'ne', extzun kyitz'inkyib' tuk'i'l Esawu³elwik'o'ne' Esawu. Nimaq k'ul toqu' ttx'otx' Esawu, jun chq'ajlajtl xkyaj wu'ne', ex xinq'o'ne' ttx'otx' kye tojk'ul txkup, chi Dyos.

⁴Qatzun makyma aj Edom tyajajil Esawu kjalu: Matxi' kub' xitu'n qtaname', oktzun jawil qb'incha'ntlqe' qtanam, qa chechi, ktzajel ttzaq'we'n Qman Dyos nimtipumal kye kjalu: kjawil kyb'incha'n jumajtl, ex kb'el nxitu'n jumajtle'. K'okyel tb'i kytx'otx' te Kytx'otx' b'inchal myab'a'n ex Nintnam tkub' ttx'u'jil Dyos tib'aj tejumajx.⁵Kyka'yi'ye' tu'nku' kywitze' ex kkyma'ye' kjalu: ¡Nimxi'xte Qman Dyos toklen, majx matz'ex tqanil kyi'jxi' tnaqach Israel! Eb'aj tzak'u'n pale tu'n Qman Dyos

⁶Chi Qman Dyos nimtipumal kye pale: Nche nimankye' k'wa'lb'aj kye kyman, exqe' lq'o'n majin nche niman kye kyajaw. Qatzun ayine' Manb'aj kyeye', ¿tiqu'ntzun min nchin kynima'ne'? Qa ayine' Kyajawe', ¿Tiqu'ntzun min nche okslane' weye'? Inchin elkyik'o'ne', extzun nkyma'ntle': ¿Alkye tu'me'l nela' qik'u'na? chechije'.⁷Intzaj kyiq'i'ne' wab'j taq'wix tib'aju' q'olb'eb'l weye', extzun ntzaj kyqani'ntle': ¿Titi'tzu'n taq'wix nqb'incha'ne' twitza? chechije'. Inkyb'incha'ne' taq'wix weye' ajtkub' kyxima'ne' qa b'a'n tu'n tel kysuchu'ne' q'olb'eb'l weye'⁸ex qa mya taq'wix tu'n kykub' kyq'o'ne' alu'mj moẍ, kox mo yab'qe' te chojb'il nwitze'. ¡Kux kyxi'tzune' ex kyiq'inxe' kyeju' nche kawin kyxole'! ¡Atzun kyile' qama txikyk'mo'n kyoyaje' lu tuk'i'l tzalajb'il! chi Qman Dyos.⁹Kyqaninxe' te Dyos tu'n ttzaj q'aq'an tk'u'j qi'j. Qatzun ikyqe' kyoyaju'ye' nche kub' kyq'o'ne' lu, lalun kymaye' qa che k'monjtzele' tu'n Dyos tuk'i'l tzalajb'il. Intma'n Qman Dyos nimtipumal kjalu:¹⁰¡Noqwit tzul jun kyxole' jpulkye tjpelju' ja te k'u'lb'il, tu'ntzun lalun che ultle' txqolte q'aq' mixti' tajb'en tib'aju' q'olb'eb'l weye'! Qu'n min nchin tzalaje' kyi'je' ex lay che nk'amtle' kyoyaje'.¹¹Inchin nimanjtzwe' kyoj kykyaqil nimaqtnam; inkytz'e'ysa'n xjal sturak te ninb'ilweye' toj tkyaqil najb'il ex nkub' kyq'o'n kyoyaj tb'anilxi'x weye'.¹²Aye'tzunkye' myab'a'n nkyb'incha'ne' weye', qu'n in elkyik'o'ne' q'olb'eb'l weye' ex nkyxima'ne' qa i'k'b'ilxju' wab'j tkub' tib'aj.¹³Intzun kyma'ntle': ¡Matxi' qo siktiye' ti'j tkyaqil ja'lu! chechije'. Ex nchin elkyik'o'ne'. Expe' toj kynab'le' qa nchin tzalaje' ajkyule' q'ol jun alu'mj elq'a'n te chojb'il nwitze', mo jun wakx kox mujqa yab'.¹⁴¡Kb'el taq'wix tib'aju' xjal sb'ul ntzaj tma'n tu'n ttzaj tq'o'n jun alu'mj tb'anilxi'x weye' kyxolju' talu'n, extzun makub' tq'o'n jun alu'mj tzkaj nwitze'! Ayinweju'ye' Nimaqkawil nim toklen, ex ati nchiylale' kyoj nimaqtnam, chi Qman Dyos nimtipumal.

¹Ja'lotzun, a yol ja'lu kyeye' pale:²Ilti'j tu'n t-xikyb'i'ne' nyole' ex ati tu'n kynimane' axxi'x weye'. Extzunqa min xkyb'inchaye', che kjel nq'o'ne' tjaq' taq'wix. Na'mxna' kynimane' weye', expe' ktzajel nq'o'ne' taq'wix kyib'aju' ti'xti' nkyk'mo'ne' toju' kyajb'eb'le' te pale. Chi Qman Dyos nimtipumal.

³K'elel wiq'i'ne' kyipumale' ex k'okyel nxone' kytxa alu'mj nche tzaj kyiq'i'ne' te chojb'il kyplaje'. ¡Ex majx che b'je'lex nxone' tuk'i'lxi' kytxa alu'mj!⁴K'eleltzun kynik'tze' qa ayine' nchin q'onte chaq'b'il lu tu'n ttenju' nyole' kyej b'entti'j tuk'i'l Leb'i kukxju', chi Qman Dyos nimtipumal.

⁵Chwinqlal ex nak'b'il toqju' nyole' kyejni b'entti'j kyuk'i'l aj Leb'i. Xinq'o'ne' kye tu'n kyniman ex tu'n kyxob' weye', ex kyek'u tchiylal ex ninb'ilweye'.⁶Xikyq'o'n aj Leb'i xnaq'tzb'il tib'aju' ax ex mixtoqti' nkyma'n taq'wixil. Intoq che anq'in b'a'n wuk'i'le' ex nim xjal kyej kytzaqpi'n b'inchaj myab'a'n kyu'n.⁷A kyaq'un paleju' tu'n kyxi' kyxnaq'tza'n xjal tu'n telkynik' wi'je', ex kykyaqil xjal tu'n kyul k'mol xnaq'tzb'il kye, qu'n aye' nsanjelju'ye' ayine' Dyos Manb'aj nimwipumale'.

⁸Aye'tzunkye' pale, matxi' che el txalpuje' ti'ju' b'a'n b'e; nim xjal matxi' che kub' tz'aq tu'n kyxnaq'tzb'ile' myab'a'n. Tu'ntzu'n matxi' che okye' xitulteju' nyole' kyejni b'entti'j kyuk'i'l aj Leb'i.⁹Tu'ntzunju', b'ajxna' chinxa' kyb'i'ne' expe' mya junelni kyilwi xjal kyu'ne' ajt-xikyq'o'ne' xnaq'tzb'il kye, knb'incha'ye' tu'n kyokq'o'ne te mya'l ex tu'n kyel ik'u'ne' kyu'n kykyaqil xjal, chij. Aku' Qman Dyos nimtipumal inq'mante. Lalun kyej kykolb'e'n kyxu'jile', chi Dyos.

¹⁰¿Ma myatzun junx Qman, aju' Dyos kub' b'inchanqe qkyaqil? ¿Tiqu'ntzun noqx nqsb'u'nchaq qib', ikytzu'n to'ka' xitulteju' yol kyejni b'enti ti'j tu'n Dyos kyuk'i'l ojtxi' qchman?¹¹Min njapun kyol aj Juda tu'n kyajb'en te Dyos, ex nkyb'incha'n ti'xti' taq'wixi'x toj Jerusalen ex toj Israel. Matxi' kub'kyya'ju'n aj Juda t-xjanilju' ja te k'u'lb'il k'u'jla'nxi'x tu'n Qman Dyos, exqe' ichan aj Juda mab'ajtzaj kyiq'i'n kyxu'jil k'lul witzleb'qe'.¹²¡Che kub'xwit tnajsa'n Qman Dyos xjal nche b'inchante ti'xti' lu toju' ninqtanam, alkyexku'chaq xjal b'a'nqa ntzaj kyiq'i'n kyoyaj twitzju' Qman Dyos nimtipumal!

¹³Aye'tzunkye' inxi'xpe' kyb'incha'n txqantle': inxi'x kukyak'sa'ne' q'olb'eb'l te Dyos tu'n ta'l kywitze', inxi'x che oq'e' kuw tu'nju' min nxitk'mo'ntl Dyos kyoyaje' tuk'i'l tzalajb'il.¹⁴¿Inxtzun kyqani'ntle' titiqu'n? Kanlina' twitzte Qman Dyos tu'nju' min xjapun tyola xittziya'na te t-xu'jila tej mjeya tuk'i'l ku'xunqe'toqe'. ¡Atoq t-xq'lab'ju'ya, ex xittziya'na tu'n tjapun tyola te!¹⁵¿Ma myatzun ax Dyos b'inchanteju' xmil exju' t-xew xjal? ¿Titi'tzu'n tajb'ilju' Dyos lu qa mya tu'n kyxjansetju' tyajajil te? ¡Kyka'yinx kyib'e' ex japunx kyole' xikytziya'ne' te kyxu'jile' ku'xunqe'toqe'!¹⁶Intma'n Qman Dyos nimtipumal, Kydyos aj Israel, kjalu: ¡Kyka'yinxtzun kyib'e', ex japunx kyole'; inel wik'o'nwe' xjal nkub' tpa'ntib' tuk'i'l t-xu'jil ex nb'aj ttz'ilsa'ntib' tu'n txqan il ntb'incha'n!, chi Dyos.

¹⁷Matxi' siktite Qman Dyos b'ib'enkyeye'; aye'tzunkye' inx kyxjelu'ne': ¿Titi'tzu'n matxi' txiqma'ne' tu'n qa matxi' sikti b'ib'enqeye'? chechije'. Matxi' kymaxi'ye' qa b'a'nqe' b'inchal myab'a'n toj twitz Qman Dyos, exqa ntzalaj kyi'j. ¡Min nkyoksla'ne' qa tz'aqlite Dyos!

¹Chi Qman Dyos nimtipumal kjalu: Kxel nsma'ne' nsanjelale' tu'n tkub'nej nwitze' b'inchalteju' b'e. ¡Aju' Dyos Manb'aj nche jyone' ti'j, lwiyxi'x k'okyix toju' tja te k'u'lb'il; ch'inxtl tulju' sanjelal q'malteju' yol kyejni b'entti'j kyuk'i'le', aju' nche ayone' ti'j!

²¿Alxixlokye kweb'el twitz toju' q'ij ajtul? ¿Alxixkye kb'antel twe' twitz ajtul? Qu'n tzul kse'n jun q'aq', ẍtilsalqe; ikyk'okyela' kse'n jun q'eq, kb'je'lel tiq'i'n qtz'ilil.³Kb'el qe Qman Dyos ẍtilsalkyeju' pale, tyajajil Leb'i, kse'n xjal nokxtq'o'n q'anpwaq ex saqpwaq toj q'aq' tu'n t-ẍtilset. Yajxi'tzuntl b'a'n tu'n tkub' kyq'o'n kyoyaj twitz Qman Dyos kse'nxju' tu'me'l.⁴Oktzun tzalajel Qman Dyostz ti'ju' kyoyaj aj Juda ex aj Jerusalen, kse'nx intoq tzalaj ti'j nejtl.

⁵Chi Qman Dyos nimtipumal kjalu: Chin nule' xjelul kyeye'. Ex ikx chin okyile' tziyalkyeju' ajk'a, e'ajpajil, exqe' ntzaj kyna'n tb'i Dyos ti'ju' mya ax, exqe' nche kub' kyjtz'o'n aq'unal, exqe' qya kyimni kychmil ex meb'a, exqe' nche okten yajulkye najchaq xjal, exqe' min nche niman weye', chi Dyos. Aju' tlajoji'n tnej exqe' oyaj

⁶Ayinweju'ye' Dyos Manb'aj. Na'mx nch'exb'ete'. Qu'npena'tzun na'mx kynaje' tyajajil Jakob'.⁷Mache el txalpuje' kyi'ju' nchaq'b'ile', kse'n telkypa'nkyib' ojtxi' kychmane', ex min nche kynima'ne'. Nxinma'ne' kyeye' ayine' Dyos Manb'aj nimwipumale': ¡Kukyajtle' wuk'i'le' ex k'anjetztl tink'u'je' kyi'je'! Aye'tzunkye' nkyma'ne': ¿Tiqu'n k'anjela'tlqi'je' tk'etza?⁸Atzunwe' nchin xjelune': ¿Ma b'a'ntzun tu'n talq'an jun xjal ti'j Dyos? ¡Matxina' chin kub'kyalq'a'nkye'! Extzun ntzaj kyqani'ntle': ¿Ti'tzu'n matxi' kub' qelq'a'ne' teya? chechije'. ¡Matxi' kub'kyelq'a'ne' tlajoji'n tnej exqe' oyaj!⁹Iku', tkyaqilju' nintnam ex kykyaqile' nche kub' alq'anweye', qu'mtzun ktzajel nq'o'ne' taq'wix kyib'aje'. Ayine' Dyos Manb'aj nimwipumale' nchin yolin:¹⁰Kyiq'intze' kyoyaje' tlajoji'n tnej toju' k'uwenj toj njaye', tu'ntzun tten wab'j toj njaye'. Tzik' kywitze' wi'je' tu'n ja'lu, atzun kyile' qa min ẍenjaqe' tjpel kya'j tu'n ttzaj ntzaqpi'ne' ky'i'wb'il kyib'aje'.¹¹Lay waje' tu'ntb'aju' twitz kyawale' ex tqan kyawale' tu'n soj.¹²Kykyaqil xjal kyoj nimaqtnam kyma'n kyeye' qa majx b'a'n ta'qe'ye', qu'n achb'ajilixi'x ktenb'ela' kytx'otx'e'. Ayine' Dyos Manb'aj matxi' chin q'mante. Q'aq'an tk'u'j Dyos kyi'ju' ttanam

¹³Chi Qman Dyos kjalu: Matxi' kyma kyole' kuwxi'x wi'je'. Extzun nkyqani'ntle' kjalu: ¿Ti'tzu'n taq'wix matxi' qmaye' ti'ja? chechije'.¹⁴A oje kymaye' wi'je' kjalu: Mixti'xte' tajb'en tu'n qajb'en te Dyos. ¿Tixi'xti' qkanb'a' qama txiqb'i'ncha'n ntchaq'u'n qe, tu'n qb'et toj b'is twitz Qman Dyos nimtipumal?¹⁵Matxi' qile' tzalajb'il ta'qe' nkynima'n kyib', b'a'n nche ela' ti'xti' kyu'n b'inchal myab'a'n, nkub' kyq'o'n Dyos toj joyb'ilti'j ex min ntzaj jun tz'e'ysb'il kywitz, chechije'.

¹⁶(Eb'ajtzun yolinju' nche niman te Dyos kyxolilex, inxi'xtoq b'in Qman Dyos ti'ju' ntoq kyma'n. Ex kub' tz'ib'a'n jun u'j twitzku' Qman Dyos, intoq tma'n tu'n ttzaj na'n kyeju' nche niman te Dyos ex nche ximan ti'j.)

¹⁷Ntma'n Qman Dyos nimtipumal kjalu: Kjel b'ent jun q'ij wu'ne' tu'n kyok jumajtl te ntaname'. Kse'n jun manb'aj ntzaj laqtk'u'j ti'ju' tk'wal najb'en te, ikytzu'n ktzajel q'aq'an nk'u'je' kyi'j.¹⁸K'eleltzun jumajtl kynik'tze' qa mya junju' b'a'n tuk'i'lju' myab'a'n, mya junxju' nk'ulun te Dyos tuk'i'lju' min nk'ulun te Dyos. Tq'ijlalil tulel Qman Dyos

¹Chi Qman Dyos nimtipumal: Xi' tul lq'e tq'ijlalil, nxi'x k'ant kse'n q'aq' toj jun chuj, kykyaqilju' nkynima'nkyib' ex b'inchal myab'a'n che b'ajel tz'e'y toj, ex mixti'tlkye kjelten.²Aye'tzunkye' nche nimane' weye', kqob'tz'ajel tnik'alilti'j wu'ne' kse'n t-spik'umal q'ij, nultiq'i'n chwinqlal kyoju' ttilky'ajel. Aye'tzunkye' che xlik'pule' tu'n kytzalajb'ile' kse'nqe' qpoj tman wakx ajkyetz ti'jxi' kywab'l.³Tojtzu'n q'ij lu in nb'inch'a'ne' tten, che b'el kywab'e'ne' b'inchal myab'a'n naku'xwitloj quq.

⁴Kyna'ntze' kawb'il xinq'o'ne' te nmajine' Moyses twi' witz Oreb'. ¡Kawb'il qe' ex chaq'b'il qe' atitoq tu'n t-xikynima'n kykyaqil aj Israel!

⁵Kyb'intzpe'ye': Kxel nchq'o'ne' nsanjelale' Eliy kyxole', na'mxtoq tpon kanun nq'ije' ayine' Dyos Manb'aj, nim toklenju' q'ij lu ex kuw.⁶Ktb'incha' tu'n kyb'anixju' manb'aj kyuk'i'l k'walb'aj. Qatzun min, chin ule' ex ktzajel nq'o'ne' tz'e'ysb'il witzb'aj tib'aju' ttx'otx'a, majx kb'el nxitu'ne', chi Dyos.

Bible Society in Guatemala

https://app.library.bible/content/aea9d9099feb3a24