Read Salmos 1

Salmos1

Jun tzalajb'il axxi'x

¹Tzalajb'il teju' xjal min nxitb'i'n kynab'lju' b'inchal myab'a'n, ex min nb'et toj kyb'e aj il, ex min nkub' qe la'jil kyxolju' xjal nche xmayin ti'j Dyos,²o'kxtzu' ntzalaja' ti'j tkawb'il Qman Dyos nximan ti'j q'ijtl ex qonik'an.³Ikyte xjal ja'lu kse'n junwi' tze awa'n ttzi jun nin a', intq'o'n twitz tojxi'x tq'ijlalil ex min nkub' tzqiju' t-xaq. ¡Tkyaqilju' ntb'incha'n, b'a'n nnela'!

⁴Aye'tzu'n b'inchal myab'a'n mikxa' nb'ajkyeju', qu'n ikyqe'ju' kse'n mu'p, nxi' iqa'n tu'n kyq'iq'.⁵Layx che kletju' b'inchal myab'a'n ajkyok toj xjel tu'n Dyos; ex lay che ten aj il kyxolju' tnik'alkyi'j.⁶Ate Qman Dyos xq'uqilkyeju' tnik'alkyi'j toj kyb'e, aye'tzu'n b'inchal myab'a'n tojxju' kyb'e che b'ajela', chiju' b'itzal. Nk'wal ta¹¿Titiqu'n njawa' kyiq'i'n kyib'ju' tnam min ojtzqi'n Dyos kyu'n? ¿Titiqu'n nkub' kynk'u'na' jun kyxim myab'a'n?²Min kyajb'ilju' nimaqkawil exqe' nche kawin twitz tx'otx' tu'n kyniman te Qman Dyos, ex nkyb'u'yi'nkyib' tu'n kyq'ojin ti'j Dyos ex ti'ju' nimaqkawil sk'o'ntl tu'n.

³Ex inkyma'n: ¡Qiq'imilju' kyxpatx'k'uxb'il qi'j! ¡Ex qpjumilju' k'alb'ilqe kyu'n!, chechij.

⁴Naq nxmayinte Qman Dyos kyi'j, naq nche jawttze'nju' nkawin toj kya'j;⁵tuk'i'ltzun ttx'u'jil nche'x t-xob'tza'n; ex tuk'i'l tq'oj nxitma'n kye:⁶Matxi' tz'ok nq'o'ne' nimaqkawil tib'aj Syon, aju' witz xjan, chij.

⁷Kxe'l nma'ne' tma Qman Dyos tu'n tb'inchet, tzaj tma'n weye': aya nk'wale'; mank'waliya ja'lo.⁸Qaninqe'tzju'ya tnam weye' tu'n kyxi' nq'o'ne' te tetzb'ila, ex tkyaqilju' twitz tx'otx', che kxe'l nq'o'nwe' teya.⁹Che b'elt-xitu'na kawil twitz tx'otx' tu'n jun b'ar k'uxb'il; ¡Majx che b'elttxiju'na kse'n jun tx'otx' k'wil!

¹⁰Kaneku' toj kywitze' nimaqkawil kyib'aj xjal ¡kyknome' xnaq'tzb'il lu e'kawil twitz tx'otx'!¹¹Che ajb'enqe'ye' te Qman Dyos tuk'i'l tchiylal; che k'ulun qe'ye' te tuk'i'l ninb'il.¹²Che tzipeku'ye' twitz tuk'i'l xob'ajil, qu'n jaku' tzaj ttx'u'jil jaku'tzun che b'ajtzu'ye' toj b'e, qu'n lwiy ntzajte Qman Dyos tq'oj.
¡Tzalajb'ilte' kyeju' q'uqlok kyk'u'j ti'j! chiju' b'itzal Na'j Dyos qanb'il o'nb'il te Qman Dyos¹Nimu' wajq'oje, Nman Dyos, nimqe' matxi' che b'jo'k miltz'uj wi'je',²¡nim xjal inq'mante wi'je': Mixti'tlte' kolb'ilte tu'n Dyos! chechij.

³Atzunta Taye, aya klol weye' b'a'nxi'x, nim woklene' tu'na, aya in kuwsante wanmiye'.

⁴Njaw tq'ojq'ojel nwi'ye' tu'n nqanin o'nb'ile' te Qman Dyos ex nchin tzaj ttzaq'we'ne' tzmajx twi' witz xjan.⁵Ajnkub' kẍeye' ex ajwik'wtane', ex ajttzaj nna'n wib'e', ate Qman Dyos xq'uqilweye'.⁶Min nchin xob'e' kyeju' tnam xjal txoli'nkyib' wi'je' tu'n kyok tzaqpaj wi'je'.

⁷¡Iq'i'nktz tib'a Taye! ¡Chin tkloma, Nman Dyos! Poq'ima kywitzju' wajq'oje; ¡q'uchimitza kywitzte b'inchal myab'a'n!⁸Aya Nman Dyos inkolon; ¡ky'iwlanku'ya ttanama! chiju' b'itzal. Tu'n tqe qk'u'j ti'j Qman Dyos¹Nman Dyos klol weye', ¡chin ttzaq'wetza ajntxokone' teya! Aya klonweye', tej intoq chin yajtiye', ¡q'aq'antz tk'u'ja wi'je' ex b'intzju'ya nna'j Dyose'!

²Aye'ye', nkynima'n kyib'e', ¿ma kukx wel kyik'o'nju'ye'?, ¿makukxju' kyu'ne' kyajb'ile' tu'n kyjyonteye' mixti' tajb'en?³Tz'elku' kynik'e' qa nche tk'u'jla'n Qman Dyosju' xjal nche niman te; tz'elx kynik'e' inchin tzaj ttzaq'we'nwe' Qman Dyos ajnkub'sane' te.⁴¡Che xob'xe' ex lalun che b'inchantl ile'! Ajkykub' kẍeye', tkyaqil nak'litl, kyximanku'xi'xe' titi' nkyb'incha'ne';⁵Kyq'onxe' chojb'il axxi'x te Qman Dyos ex qek kyk'u'je' ti'j.

⁶Nim xjal inkyma'n: ¿Alkye ktzajel yek'unte tzalajb'il qeye'? chechij ¡Nman Dyos, qo tka'yitza tuk'i'l tk'u'jlalila!⁷Nimxi'x tzalajb'il saj tq'o'na toj wanmiye' kyekwitzju' ati txqan kytriy ex lob'j ub'a.

⁸Inchin kub' kẍeye' ex nchin wtane' toj nak'b'il, qu'n o'kxta xq'uqilweye' Nman Dyos, chiju' b'itzal. Na'j Dyos ajqsqix¹Nman Dyos, b'intzju'ya nyole', chin tb'intza ajtjaw tq'ojq'ojel nwi'ye', Nimaqkawil weye' b'intzju'ya nkub'sb'ile', qu'n teya nchin k'ulna'ye'.

³Intzaj tb'i'nju'ya tq'ojq'ojel nwi'ye' te prim; qlax inxi' nchik'b'a'n wib'e' teya, ex nchin ayone' te ttzaq'web'la.⁴Qu'n aya Dyos minti' ntzalaj ti'ju' il; lay b'ent kyanq'inju' b'inchal myab'a'n tuk'i'la,⁵exqe'ju' njaw kynima'n kyib' lay che ten twitza. Inche el tik'o'nteju'ya b'inchal taq'wix,⁶inche kub' t-xitu'nju'ya chalyol ex nche el tik'o'nju'ya xmletz' exqe' b'yol wnaq.⁷Ayintzunwe', kb'antel wokxe' toju' tjaya, tu'nju' tk'u'jlalila wi'je'; ¡kb'entel nk'ulune' teya tuk'i'l tkyaqil ninb'il tu'n nxi' ka'yine' tu'me'lju' tjaya xjan!

⁸Nman Dyos, chin tiq'ima toju' tnik'alilti'j, tu'n lalun chin b'o'lje' kyu'n wajq'oje. Chin tiq'inxa toju' b'e b'a'n.⁹Min nche yolinkye' xjal lu ax; ¡nojniqe' tu'n taq'wixil! Ikykyqulju' kse'n tjulil kyimni k'ab'li; ¡twi' chalyolju' kyaq'!

¹⁰¡Tz'e'ysanku'ya kywitz, Nman Dyos! ¡Xitunku'ya kyxim myab'a'n! ik'unqe'mila tu'n tpaju' kyil nim, qu'n matxi' jawkyi'nkyib' ti'ja.¹¹Che tzalajxju' q'uqlok kyk'u'j ti'ja; che b'itzanx tu'n kytzalajb'il kukxju' qu'n aya klol kye. Inche tzalaju' inche k'u'jlanteya,¹²Nman Dyos, nche tky'i'wla'n teju'ya tnik'alkyi'j; ex ktxu'milekyi'j tu'na, naku'j tu'n jun kolb'il tu'nju' t-xtalb'ila, chiju' b'itzal. Na'j Dyos toj k'ixk'oj¹Nman Dyos, lalun chin ttzak'uya tuk'i'l ttx'u'jila, lalun kub' ttz'e'ysa'na nwitze' toj tq'oja.

²Nman Dyos, q'aq'antz tk'u'ja wi'je', qu'n mixti'tl wipumale'. Chin tq'anama Nman Dyos, qu'n inxi'x ch'yon tkyaqil toj nwinqile'.³¡Nchin lu'lune' tu'n xob'el! Nman Dyos, ¿jtojtzun tzula?

⁴Kutzaja Nman Dyos, ¡chin tkloma!, ¡chin tkloma tu'n tk'u'jlalila kukxju'!⁵Mixti' jun xjal kyimnitl tzulwit na'ntla tu'n; ¿alxi'xwitlokye knimalteya toj muqb'il?

⁶Matxi' chin siktiye' tu'n woq'e'. Inxi'x exta'l nkuẍb'ile' tu'n woq'ele' atl junjun qonik'an ex nxi'x ex ak' nq'axweye' tu'n ta'l nwitze'.⁷Matxi' che kub'sjumjixju' nwitze' tu'n k'ixk'oj; ¡matxi' che kub' b'o'lj naq tu'n kpaju' wajq'oje!

⁸¡Kypa'mil kyib'e' wi'je', b'inchal taq'wix, qu'n matxi' tb'ite Qman Dyos woq'ele'!⁹Matxi' tb'i te Qman Dyos nkub'sb'ile, ¡matxi' tk'amju' nna'j Dyose'!¹⁰Che b'elb'aju' wajq'oje tu'n kyxob'el, majx che kb'el ch'ixwi; ¡naq toj jun kmujx che oqel tu'n kych'ixaw! chiju' b'itzal. Ate Qman Dyos ajkawil tnik'alti'j¹Nman Dyos, o'kxtzu' in njyo'na'ye' kolb'il tuk'i'la; ¡chin tkloma kye kykyaqilju' inche jyon wi'je'! ¡Chin tkloma, qu'n naku'j b'alunqe'; jaku' chin b'ajkytzaqu'ne' ex mix-a'lo' jun klol weye'!

³Nman Dyos, ¿ti'tzu'n matxi' nb'inchaye'? ¿Mujqa matxi' nb'icha jun nin ile'?⁴¿Mujqa matxinq'o'ne' jun tu'me'l t-xel taq'wix te jun wuk'i'le' tu'nju' b'a'n xtb'incha weye'? ¿Mujqa matxi' b'aj nyajla'ne' wajq'oje mya toj tu'me'l?⁵Qa matxi' nb'inchaye' ikju', b'a'ntzun njyonjtztze' tu'nju' wajq'oje; tu'n tkub' wi'je' ex tu'n njowajlaye' tu'n twitz tx'otx', ex tu'n tkub' t-xonju' woklene' twitz tx'otx'.

⁶¡Iq'i'nktz tib'a Nman Dyos tuk'i'l ttx'u'jila! ¡We'ka twitz kytx'u'jilju' wajq'oje! qu'n ojena' tchaq'ta tu'n tb'inchetju' tnik'alilti'j, ¡q'onk tib'a te nxele'!⁷B'uyinqe'tzju'ya tnam twitza ex q'onku'ju'ya tkawb'ila kyib'aj.

⁸Nman Dyos, aya nokq'onkye tnam toj xjel: b'inchama tkawb'ila weye' kse'nxju' nb'inchb'aje' b'a'n; kanli twitza mixti'we' wil.⁹Aya Dyos tz'aqli, qu'n inxi'x el tnik'a teju' qxime' exju' b'is toj qanmiye', ¡xitunku'ya kyb'inchb'aju' b'inchal myab'a'n, atzunju' tnik'alti'j tzyuma tu'n lalun kub' tz'aq!

¹⁰Awe' kolb'il we aju' Dyos ati jawnixi', aju' in klonte xjal mixti' sb'ub'l toj tanmi.¹¹Jun ajkawilte' Dyos tz'aqlixi'x inel tik'o'nju' taq'wixil toj tkyaqil tab'q'iyil.¹²Qa min sanjtz ti'j tk'u'ju' xjal, kb'ajel tjqu'n te Dyos tk'uẍtx'e'nb'il; naq tu'n txi' ttzaqpi'ntlju' t-smaj,¹³naq tu'n kyxi' t-xontlju' tch'ut nche jayjon, ¡matxi' b'ent kytenju' tq'aq' tu'n tb'iyun!¹⁴Kyka'yinxpe'ye' b'inchal myab'a'n: ati tk'ixk'ojal yab'wnaq ti'j, ch'onwi' tu'n taq'wixil ex ktala' chajyolil¹⁵Matxi' kub' tb'incha'n jun tjul nim t-xe, tojxtzunju' tjul kb'elixa' tz'aq.¹⁶¡Tib'ajx kb'ela' tz'aqju' tb'inchb'en taq'wix ex ttx'u'jil!

¹⁷Kwajwali'ye' Qman Dyos qu'n tnik'alti'j; knb'itza'ye' tb'i Qman Dyos aju' ati toj kya'j, chiju' b'itzal. Tajwalil Dyos exu' toklen xjal¹Nman Dyos, nimaqkawil qib'aje' ¡tb'anilxi'xju' tb'iya tib'aj tkyaqil twitz tx'otx'!, ¡nimxi'x tajwalila tib'ajxi' kya'j!²Inpe' xikyb'itza'n tal k'wal exqe' tal ne'ẍ. Jawtb'incha'na jun ja kuwsa'n tu'n tkleta kyeju' tajq'oja, tu'n tjpet kytziju' nche jawmiltz'uj ti'ja exqe' ajq'oj.

³Ajt-xi nka'yi'ne' kya'j kub' tb'incha'na, exju' xjaw exqe' che'w e'kub' tq'o'na twitz,⁴inkub' nxima'ne': ¿Titi' toklenju' xjal? ¿Titi'xi'xtzu'n toklenju' wnaq, tu'nju' ntzaj tna'na ex nb'ajx tk'u'ja ti'j?⁵Kub' tb'incha'na naq ch'intlmi kse'n jun anjl, okttxoli'na ti'j tu'n oklenj,⁶kub' tq'o'na tu'n tkawin tib'aju' tb'inchb'ena, xitq'o'na toklen tib'aj tkyaqil:⁷kyib'aj rit ex wakx, kyib'aj tojk'ul txkup,⁸kyib'aj pich' nche' lipan twitz kya'j, kyib'aj kyiẍ toj ninnjab', ¡ex kyib'aj tkyaqilju' ati toj ninnjab'!

⁹Nman Dyos, aya nkawin qib'aje', ¡tb'anilxi'xju' tb'iya tib'aj tkyaqil twitz tx'otx'! chiju' b'itzal. Ninb'ilte Dyos tu'nju' taq'unb'en¹Nman Dyos, wajb'ile' tu'n nb'itzane' teya tu'n tkyaqil nk'u'je' ex tu'nt-xi nchik'b'a'ne' nim tb'inchb'ena tb'anilxi'x.²Aya atiya toj kya'j, naq tu'nela wajb'ile' tu'n nẍch'ine' tu'n tzalajb'il; ¡wajb'ile' tu'n nb'itzane' b'itz toj tb'iya!

³In cheb'aj oqu' wajq'oje twitza; inche kub' tz'aq ex nche kyim.⁴Machin tkola toj tnik'alilti'j: nche oktq'o'na xjal toj xjel tojxi'x tu'me'l kukxju' toj tq'uqb'ila.⁵Matxi' che'x ttzak'u'na nche niman kye txqantl dyos, matxi' che kub't-xitu'na b'inchal taq'wix, ¡matxi' kub' tnajsa'nju'ya kyb'i tejumajx!⁶Matxi' kyimju' ajq'oj, ex matxi' che b'aju' nimaqttanam tuk'i'l; aya xkub' xitunkye, ex mixti' jun nab'ab'lkye xkyaj.

⁷Atzunte Qman Dyos nimaqkawil tejumajx; makub' tq'o'n tkawb'il tu'n kyok xjal toj xjel tu'n:⁸kykyaqilu' xjal twitz tx'otx' che okyel tq'o'n toj xjel tojxi'x tu'me'l, kb'el ttz'e'ysa'n kywitzju' tnam kse'nxju' kyb'inchb'en.⁹A Qman Dyos nklonkyeju' nche yajlanjtz; inche tklo'n toj tq'ijlalil yajb'il.

¹⁰Nman Dyos, aye'ju' ojtzqilteya q'uqli kyk'u'ju' ti'ja, mixti' nche kyej ttzaqpi'nju'ya nche jyon ti'ja.¹¹Che b'itzanqe' b'itze' te Qman Dyos, ju' nkawin toj Syon; kymanxe' kye tnam aju' matxi' tb'incha.¹²Inche tzaj tna'n Dyosju' xjal nche yajti ex min in ik'tna'lju' kyb'is tu'n; inkub' ttz'e'ysa'n kywitzju' nche b'iyun kye.

¹³Nman Dyos, q'aq'antz tk'u'ja wi'je', ka'yintzpe'ya nchin yajtiye' kyu'n ik'ul weye', ¡chin tiq'imitza ttziju' kamik!¹⁴Kxel nma'ntzuntze' kye xjal ttziju' tnam Jerusalen, qa o'kxa b'a'n tu'n tjaw nimeta, exqa nchin tzalaje' tu'nju' ẍin tkola.

¹⁵Tojx kyjulju' min nche okslan teya nche ku'xtz'aqa'; inche kyej q'e'tju' kyqan tojxju' kyxpatxab' e'wa'n kyu'n.¹⁶Matxi' tyek'utib' Qman Dyos: ¡tu'nju' tnik'alilti'j xtb'incha! Nkyaj jupliju' b'inchal myab'a'n tojxju' t-xpatxab' kub'ni tq'o'n.¹⁷Che b'ajelkye' b'inchal myab'a'n exqe' nche niman kye txqantl dyos, toj tkawb'il kamik; aye' in ik'tna'l Dyos kyu'n;¹⁸lay tzik'kyna'lju' prow tu'n, ex lay b'aju' q'uqb'ab'l kyk'u'j.

¹⁹Iq'i'nktz tib'a Nman Dyos; lalun taja tu'n tjaw ti'ntib'ju' xjal; ¡Q'onqe'ka nche niman kye txqantl dyos toj xjel!²⁰Nman Dyos, q'onk tchiylala kye; ¡q'manxa kye qa naq xjalqe'xi'! chiju' b'itzal. Na'j Dyos qanb'il o'nb'il te Dyos¹Nman Dyos, ¿tiqu'n nkyaja' tena najchaq?, ¿tiqu'n nkub' tewa'ntib'a tojxi'x tq'ijlalil k'ixk'oj?²Aye' xjal b'inchal taq'wix, tuk'i'l nimjtib'il nche okten ljoltojkyq'iju' xjal me's; ¡che kub'xwit tz'aq tu'na Dyos tojx kyxpatxab' kub'ni kyq'o'n!.³Nkynima'n kyib'ju' b'inchal myab'a'n ti'jxju' kyajb'il; nche txkon taq'wixu' jamjol, ex nel kyik'o'n Qman Dyos.⁴Nkynima'n kyib'ju' b'inchal taq'wix, ex min nche jyon ti'ja Dyos. Mixti'x nkyq'o'n anb'il tu'n kyximan ti'ja Dyos.⁵Kukx kych'iyju' toju' nkyb'incha'n. Najchaq ta' tkawb'ila kye, min nnel kynik' ti'j. Nche xmayin kyi'ju' kyajq'oj,⁶toj kynab'l qa mix-a'lo' kb'elsantekyi'j, exqa mixti' che ik'ela'.⁷Naqx txkoj il e'chaj yolil ex wuli'n tokx toj kytzi; ajkyyolin nkub' kyewa'n yajb'il ex taq'wix nkyb'incha'n.⁸Nche kub'ten xq'uqil kyoju' kojb'il, ex nche kub' kyb'yo'n xjal mixti' kyil toj ewaj. Majx tokkywitz kyi'ju' tal xjal mixti' kolb'ilkye:⁹naku'jxi'xtej jun b'alun toj tjul, nnxq'uqin tzmax toj tewb'il, nnayon tu'n txi' t-xontib' kyib'aju' prow, ajtzun kytzyet tu'n, nchex tjwo'ntzuntz toj t-xpatxab'.¹⁰Nche kub' tz'aqu' mixti' kolb'ilkye toj tq'ob', majx nche kub'b'aj tjaq' tipumal.

¹¹Chiloju' b'inchal myab'a'n qa matxi' tzik'tna'lju' til, exqa ntjpu'nte Dyos twitz ex mintlo'n titi' nb'aj.¹²¡Iq'i'nktz tib'a Nman Dyos, q'oma te! ¡Lalun tzik' kyna'lu' nt'uẍjne kyk'u'j tu'na!¹³¿Nman Dyos, tiqu'n nche xmayina' b'inchal myab'a'n ti'ja, tu'nju' nkub' kyxima'n qa lay kub' ttz'e'ysa'na kywitz tu'n tpaju' kyil?¹⁴Aku'ya matxi' ka'yinteju' kyil taq'wixi'x; ¡matxi' tka'yita ex kb'el ttz'e'ysa'na kywitz! In kyoqxena'n kyib'ju' mixti' kolb'ilkye tuk'i'la; aya nnoninkyeju' meb'a.¹⁵¡Xitunku'ya kyipumalju' b'inchal myab'a'n! ¡Tz'e'ysama kywitz tu'n tpaj tkyaqilju' kyb'inchb'en taq'wix!

¹⁶Ate Qman Dyos nimaqkawil tejumajx; ¡che elex t-xla'ja'nju' nche niman kye txqantl dyos ti'jxi' ttanam!¹⁷Nman Dyos, intzaj tb'i'nta kyna'j Dyosu' me's, intq'uqb'a'na kyk'u'j ex nche tzaj ttzaq'we'na.¹⁸B'inchama tnik'alilti'j teju' meb'a ex teju' nyajlanjtz: ¡tu'ntzun lalun yajuntlu' xjal, tzajni ti'j tx'otx'!, chiju' b'itzal. Tu'n tqexi'x qk'u'j ti'j Qman Dyos¹Tuk'i'l Qman Dyos nklo'na' we'wib' Maskye matzaj q'ma'n weye': Kutoqa toj k'ul kse'nkye pich'.²Ka'yinqe'xpe'ju'ya b'inchal myab'a'n: inok kyq'o'n tal kysmaj, nxikyqinu'n kysmaj ex toj ewaj nche tzaja' kysmaji'nju' tnik'alkyi'j.³Qatzun makub' xitj tkyaqilju' tu'me'l chwinqlal, ¿ti'xi'xti' kb'antel tu'nju' b'a'n xjal?

⁴Atite Qman Dyos toju' tja xjan, ex atzu' ta' tkawb'il toj kya'j, in ka'yin b'a'nxi'x, titi' nkyb'incha'n xjal.⁵Nka'yinte Qman Dyos kyi'ju' japumniqe' ex kyi'ju' b'inchal myab'a'n, ex majx nche el tik'u'nju' kuw kytx'u'jil.⁶Ktzajel tq'o'n Qman Dyos q'aq' naku'j jb'al tuk'i'l txtaji'n q'ol, kyib'aju' b'inchal myab'a'n, ex ktzajel tq'o'n jun kyq'iq' tkyaqil kb'ajel ttz'e'ysa'n. ¡A Qman Dyos kb'el tz'e'ysante kywitz!⁷Tz'aqlite Qman Dyos ex intk'u'jla'nju' japumniti'j; ¡qu'mtzun aye' mya xmletz'qe' k'okyel kyka'yi'nku' Qman Dyos!, chiju' b'itzal. Na'j Dyos qanb'il o'nb'il te Dyos¹Qo tkloma Nman Dyos, qu'n mixti'qe'tl okslal wa'lqe'xi'x; mixti'qe'tlkye xjal ax che yolin.²Nche b'ajchanyol kyxolilex; kyexi'x che yolin tuk'i'l xmletz'il.

³Nman Dyos, xb'oqinqe'ktza xmletz' exqe' nimal kyib',⁴aye'ju' nkyma'n: Yaqi'n petzunte' ati qtziye'; tu'nqe' qyol nqo' kleta'ye'. ¿Alxi'xkye kb'el kawinqeye'? chechij.

⁵A ntma'n Qman Dyos kjalu: Ina' che kub' yaju'n prow exqe' mixti' kyipumal ex majx jtz'o'nqe'. Qu'mtzun kjawil wiq'i'n wib'e' onilkye, kse'nxju' kyajb'il, chij.

⁶Slub'in qe'xi'xju' yol kyejni ttziya'n Qman Dyos; ¡ikyqe'ju' kse'n saqpwaq ẍk'atu'n, tzq'ajsa'n wuq maj toj q'aq'!⁷Aya Nman Dyos kxq'uqil qeye'; ¡kqo tkla'ya kukxju' kyeju' xjal lu!⁸Jaxjaku' ta'qe'ju' b'inchal myab'a'n ex kkyaqilxju' xjal twitz tx'otx' nche niman te taq'wixil, chiju' b'itzal. Na'j Dyos qanb'il o'nb'il¹Nman Dyos, ¿Jtojtzun chin tzaj tna'na? ¿Ma oktzun k'ik'el nna'le' tu'na tejumajx? ¿Ma kuxtzun kb'el tewa'n tib'ju'ya nwitze'?²¿Jtojtzun tz'elju' yajb'il toj wanmiye' exju' b'is wi'je' tkyaqil q'ij? ¿Jtoj chin tzaqpete' toj tq'ob'ju' wajq'oje?³Nman Dyos, ¡chin tka'yitza, chin ttzaq'wentza, spik'b'ama toj nwitze'! ¡Tu'n lalun chinx tz'aqe' toj watl te kamik!⁴¡Tu'n lalun tma wajq'oje: Matxi' kub'ti'j wu'ne'! chiwt. ¡Tu'n lalun tzalaj qama chin kub' tz'aqe'!

⁵Q'uqliwe' nk'u'j ti'ju' tk'u'jlalila; inxi'x chin tzalaje' qu'n aya klol weye'.⁶¡Kchin b'itzale' teya Nman Dyos tu'nju' b'a'n xtb'incha weye'!, chiju' b'itzal. Kyb'inchb'aj xjal myab'a'n (Sal 53)¹Inkyxima'n mixti' kynab'l qa mixti'te Dyos: kykyaqil matxi' che b'aj kub' tzpet; taq'wixi'xju' nkyb'incha'n; ¡mix-a'lo' jun nb'inchan b'a'n!²Inka'yintz Qman Dyos tzmax toj kya'j kyib'aju' xjal qa ate' junjun ati kynab'l, exqa nche jyon ti'j Dyos.³Aye'tzunkye xjal matxi' che b'ajx toju' b'e taq'wix; kykyaqilx matxi' che b'aj kub'tzpet. ¡Mix-a'lo'tl jun nb'inchan b'a'n! ¡K'i'xpe'wt jun!

⁴Mixti'x kynab'lju' b'inchal il, aye' ate'qe'k kutz'ilkyeju' ntaname' naku'j wab'j kye, aye' mixti'x ntzaj kyna'n Qman Dyos.⁵Kche lu'lulkye' tu'n kyxob'il, qu'n atite Dyos kyuk'i'lju' nche okslan te.⁶Nche xmayin ti'j tb'is tk'u'ju' me's, atzunte Qman Dyos nklonte.

⁷¡Naqwit tzaju' kolb'ilte Israel,
ti'ju' witz Syon! Aj tch'exb'ente Qman Dyos tchwinqlalju' ttanam, Che tzalajelju' tyajajil Jakob', tkyaqilju' tnam Israel, chiju' b'itzal. Aju' tajb'il Dyos tu'n kyb'inchante xjal¹Nman Dyos, ¿Alkye kb'entel tnajan toju' tjaya xjan?, ¿alkye knajal twi' witz xjan?²O'kxju' xjal b'a'n tb'inchb'aj ex mixti' ttzakaj; ax yolin tu'n tkyaqil tk'u'j;³aju' min nyolin taq'wix ti'j juntl; mixti' taq'wixil ntb'incha'n ti'j twnaqil ex b'a'n tten tuk'i'l tb'esin;⁴aju' nnel ik'u'nteju' inel tik'u'n Dyos ex nniman kyeju' nche niman te Qman Dyos; aju' in japun tyol tu'n, maskye nyajti tu'n tpaj;⁵aju' inq'on pwaq ch'ex ex min ntqani'n tub'chil; aju' min nk'mon medi naqx tu'n tb'o'lju' xjal mixti' til. Milo kb'ela' tz'aqu' in nanq'in ikju', chiju' b'itzal. Mixti' juntl etzb'il tb'anilxi'x¹¡Chin t-xq'uqima Nman Dyos, qu'n tuk'i'la njyo'na'ye' kolb'ilweye'!²Oje txi' nma'ne' teya: Aya Nman Dyos, aya ntzaj q'onte b'a'n weye'; mixti' juntl kse'n aya.

³Nxi'x chin tzalaje' kyu'nju' xjal toju' ntaname' o'kxtzu' nche k'uluna' teya,⁴aye'ju' nche kub' kychmo'n kywitzileb' ex nche k'ulun kye tuk'i'l ninb'il. ¡Milo najchi'j tu'n telwe' chik' wu'n te chojb'il kywitzu' kydyos!
¡Milo najchi'j tu'n tjaw nma'nwe' kyb'i!

⁵Nman Dyos, aya wetzb'ile';
aya nky'i'wlana weye'; toj tq'ob'a ta'ju' nchwinqlale'.⁶Achb'ajilxi'xju' nnajb'ile' yab'o'k; ¡tb'anilxi'xju' etzb'il nk'ame' teya!

⁷Kjawil nnima'nwe' Qman Dyos, qu'n ate ẍaqlul weye', ex nyolin toj wanmiye' kyoj qonik'an tu'n nb'inchanteye' b'a'n.⁸Majx na'n Qman Dyos wu'ne'; qa ati Dyos wuk'i'le', lay chin kub' tz'aqe'.⁹Qu'mtzun nojni wanmiye' tu'n tzalajb'il.
Kchin anq'ile' q'uqlixi'x nk'u'je',¹⁰layna' chin kyej tq'o'na toju' muqb'il, ¡lay kyej tq'o'na nniman teya toj jul!

¹¹Ktzajel tyek'u'na tb'eyil chwinqlal weye'. Nim tzalajb'il ati twitza; ati tzalajb'il tejumajx tuk'i'la, chiju' b'itzal. Na'j Dyos qanb'il tnik'alilti'j¹Nman Dyos, b'intzju'ya nqanb'e'tze' toj tu'me'l, b'intzju'ya nkub'sb'ile', chin tb'itza, qu'n min nchin chanyole'.

²¡Aya q'malte qa ktz'e'ysetel nwitze', qu'n tojtzqi'nju'ya japumni twitza!³Chik'li twitza aju' xim toj wanmiye'; in ka'yina wi'je' te qonik'an; matzik' twitza wi'je' kse'n tu'n q'aq', ex min xknet taq'wixil woje' tu'na. B'ajx txa' nma'n jun ti'xti'ye' myab'a'n,⁴kse'n nkyb'incha'n txqantl; matxi' tz'el npa'nwib'e' kyi'ju' jyol q'oj, kse'nxju' tchaq'b'ila.⁵B'ajx tz'ela' npa'nwib'e' ti'j tb'eyila; qu'n wa'lqine' toj wokslab'le'.

⁶Nman Dyos, twitza in jawa' tq'ojq'ojel nwi'ye', qu'n inchin tzaj ttzaq'we'na; chin tb'itza, ex b'intzju'ya nyole'.⁷Q'ontza jun yek'b'il chik'li ti'ju' tk'u'jlalila, qu'n inche tklo'na q'uqlok kyk'u'j ti'ja, kyeju' kyajq'oj.⁸Chin t-xq'uqima kse'n tyuẍil twitza; chin tkloma tjaq'ju' t-xlekumal t-xik'a.⁹Kyeju' b'inchal myab'a'n nche oktzaqpaj wi'je', ¡kyeju' wajq'oje txoli'nkyib' wi'je' tu'n nkub' kyb'yo'ne'!¹⁰Mixti' xtalb'il kyuk'i'l, ajkyyolin inkynima'n kyib';¹¹nqaku' lepchqe'ka' wi'je' nche ayon alkye kmuj tu'n nkub' tz'aqe' kyu'n.¹²Naku'j b'alunqe', inxi'x che elje ti'j kychi' nche okxjutze toj kyewb'il tu'ntzun nb'aje' kyu'n.

¹³Taye, iq'i'nktz tib'a, ¡ex we'ka kywitz! ¡B'inchama tu'n kykub' meje twitza! Chin tkloma twitzju' b'inchal myab'a'n tu'n tk'uẍtx'e'nb'ila;¹⁴Nman Dyos, chin tkloma tuk'i'l tipumala toj kyq'ob'; ¡najsanqeku'ya twitz tx'otx', ana' kyetzb'ilju' toju' chwinqlal ja'lo! Q'oma anb'il kye tu'n kyjaw q'inumax, che wanku' kyk'walj tzmaxi'j ajkyel link'aj, expe' tu'n tkyajtentl kyeju' kychman.¹⁵Ayintzunwe', okxi'x qeb'ilwe' nk'u'j ajtok nka'yi'nku'ye' twitza, ¡ajttzaj nna'n wib'e' twitza!, chiju' b'itzal. Jun b'itz te kanb'ab'l (2 S 22.1-51)¹Nman Dyos, aya wipumale'; ¡inchin laqje' ti'ja!²Aya klol weye', wewb'ile', tzaqpil weye', Nmane' Dyos, aya pik te kolb'il wib'e', aya kolb'ilweye', aya ipumalj nklonweye', jun wewb'ile' tb'anilxi'x.³Nman Dyos, o'kxa b'a'n tu'n tjaw nimeta: ajttzaj ntxko'na inchin tklo'na kye wajq'oje.

⁴Machin b'ajt-xwaku'ne' kamik kyoju' taqwil; nna'ye' xob'ajilxju' tipumal.

⁵Machin b'ajtb'alq'i'ne' kamik kyoju' taqwil; ¡kxi'toq nxiqititine' tu'n toju' t-xpatxab'!⁶Ntxoke' Qman Dyos toju' yajb'il, xinqani'ne' o'nb'il te, ex intzaj tb'i'ne'; ¡ponju' tq'ojq'ojel nwi'ye' tzmax toj tja Dyos!

⁷Tzajtzun jun nin kyejnajnab'tz twitz tx'otx': majxpe' eb'aj yukchi kyq'uqlilju' witz; eb'aj yukchi b'a'nxi'x tu'n ttx'u'jil Qman Dyos.⁸Intoq etz sib' toj ttxa'n, atzu'n toj ttzi q'aq' te xitb'il; ¡b'je'tz t-xon ttxalq'aq' toj ttzi inxi'x ja'yon!⁹El tjqo'n xb'alun twitz kya'j ex ku'tztzuntz. ¡Atitoq nimaq tnej muj tjaq' tqan!¹⁰Jaxqe tib'aj jun kyerb'in, xi' lik'ik'intzuntz tzaj lipantzuntz toj kyq'iq'.¹¹Ajb'enju' qlolj te tewb'il exju' q'eqmuj tuk'i'l jb'al, naku'j t-xmuj.¹²Tzaj qoptz'aj jun q'ankyaq tzmax tk'etz; ex tzaj saqb'aqun toju' muj ex ttxalq'aq' in ja'yon.

¹³Tb'incha Qman Dyos te jawnixi', tu'n tb'injtzu' tq'ojq'ojel twi' ntinun tzmax toj kya'j; tzaj tq'o'n saqb'aqun ex ttxalq'aq' njayun.¹⁴E'tzaj t-xonju' tq'ankyaq naku'j talsmaj, aye'tzu'n wajq'oje eb'aj oq ex eb'ajx slamj.¹⁵Kyej q'ancha'lix t-xeju' ninnjab'; b'aj kyej q'ancha'lixju' tq'uqlil tx'otx' tu'nju' tq'ojq'ojel twi' Qman Dyos xob'ajilx, tu'nju' tzaj t-xupi'n kuw.

¹⁶Tzaj tnuqpi'n Qman Dyos tq'ob' weye' tzmax toj kya'j, ex in jatz tiq'i'ne' toju' tnimal ninnjab'.¹⁷Machin tkole' kyeju' wajq'oje kuwqe' aye' ntx'a'lti'j kyk'u'j wi'je' ex nimxi'x kyipumal kye nwitze'.¹⁸E' b'jo'k tzaqpaj wi'je' tej nkub' yajtiye', atzunte Qman Dyos oninweye':¹⁹in jatz tiq'i'ne' tu'n ntzaqpete'; ¡intkole' qu'n intoq chin tk'u'jla'ne'!²⁰Matzaj tq'o'n Qman Dyos tu'me'l t-xel weye' tu'nju' b'a'n nchin anq'ina'ye' twitz,²¹kukxwe' nb'et toj tb'e Qman Dyos; ¡b'ajx kub'a' nxk'a'yi'nwe' wib' te Nmane' Dyos!²²Majx na'nqe' kykyaqilju' tchaq'b'il wu'ne'; ¡mixti' jumaj matxi'wt che elwik'o'ne' tkawb'il!²³Nchin b'etwe' mixti' wile' twitz; matxi' tz'el npa'nwib'e' ti'ju' taq'wixil.²⁴Matzaj tq'o'n Qman Dyos tu'me'l t-xel weye' tu'nju' b'a'n nchwinqlale' twitz.

²⁵Nman Dyos, majx atita tuk'i'lju' majx ati tuk'i'la, ex b'a'nta tuk'i'lju' xjal b'a'n,²⁶ax tyola tuk'i'lju' xjal ax yolin, atzu'n teju' tx'yan tuk'i'l kuwa.²⁷Aya nklonkyeju' me's, aye'tzu'n nkynima'n kyib' nche kub' tme'ssa'na.²⁸Nman Dyos, intzaj tq'o'na spik'un weye'; Nman Dyos, intzaj ttxqo'na spik'un weye' toju' qxopin.²⁹Tu'nju' t-o'nb'ila chin okyel tzaqpaje' q'ojil ti'ju' wajq'oje, ex chin okyixe' tib'aju' nintapi kyi'jile nimaqkytanam.

³⁰Ttzinunte' tb'eyil Qman Dyos; ex b'a'n tu'n tqe qk'u'j ti'ju' yol ntzaj ttziya'n; ¡Inche tklo'nte Qman Dyos ju' inqe kyk'u'j ti'j!³¹¿Alkye juntl dyos ti'jxi' Qman Dyos? ¿Alkye juntl dyos jaku' qoklet tu'n?³²Ate Dyos nq'onte wipumale', tu'n b'a'n wela'ye' twitz,³³intzaj tq'o'n kyipumalu' nqane' tu'n wojqelane' kse'n msat, ex tojawl ta'qine', qu'n tzyu'nqine' tu'n,³⁴nchin t-xnaq'tza'ne' te q'oj, intq'o'n wipumale' tu'n tjk'etju' smaj q'ank'uxb'il wu'ne'.

³⁵Aya nxq'uqin weye' ex nklonweye', tzyu'nqine' tu'n tb'a'nq'ob'a; ex tu'n t-xtalb'ila ẍin jawa' b'enta'ye'.³⁶Nqaku' sela' nb'eye' tu'na, ex min ẍin jawtz'aqe'.

³⁷Mankan toj kyq'iju' wajq'oje ex makub'kyi'j wu'ne', ex tzmaxi' sanjtzwi'ju'ye' tej ẍeb'aj wu'ne'.³⁸Mache b'ajnpẍu'ne' ex min ẍeb'jawe'tl. ¡Mache kub' tz'aq tjaq' nqane'!³⁹Matzaj tq'o'na wipumale' toj q'oj; mache kub'tzipeju' mib'a'n che b'in nwitze' tu'na,⁴⁰ex e'kub' oqju' wajq'oje nwitze'. Iktzu'n ekub'a' nb'ajsa'ne' ntx'a'lti'j kyk'u'j wi'je'.⁴¹Eqanin o'nb'il, ex mix-a'lo' oninkye; ekub'san twitza Nman Dyos, ex minti' e'tzaj tb'i'na.⁴²¡E'kub'naj wu'ne' kse'n quq nxi' tiqa'n kyq'iq'! ¡Eb'aj nwab'e'ne' kse'n tz'is toj b'e!⁴³Machin tkola te jun tnam pi's, machin nok tq'o'na te nejenel kyib'aj tnam nche ajb'en xjal weye', ju' min ojtzqi'nqe' wu'ne'.⁴⁴Naqa xinma'ne', nche b'in weye'; e'najchaq xjal nche okslan weye',⁴⁵e'xjal te juntl tnam nche xob' weye' ex nche lu'lun aj kyb'je'tz toju' kyewb'il.

⁴⁶¡Nimanjtzxwit Qman Dyos! ¡Nimanjtzxwitju' klol weye'! ¡Jawxwit nima'n Dyos klol weye'!⁴⁷Ate Dyos xq'onte tu'me'l t-xel kyeju' wajq'oje ex mache kyej tq'o'n tnam tjaq' nkawb'ile'.⁴⁸Ate nklonweye' te kytx'u'jilju' wajq'oje, kyeju' nkych'uẍsa'n kyib' xjaw kyi'nkyib' wi'je'. ¡Aya Nman Dyos nklonweye' kyeju' xjal tx'u'jqe'!⁴⁹Qu'mtzun njaw wajwali'na kyxolju' tnam ex nchin b'itzane' toj tb'iya.⁵⁰Intq'o'na tipumalju' nimaqkawil jawni t-sk'o'na tu'n tkanb'an; In tk'u'jla'nju'ya Dab'i kukxju' kyuk'i'lju' tyajajil, chiju' b'itzal. Tajwalil Qman Dyos toju' tb'inchb'en¹Intma'n kya'j ninb'ilte Dyos; aju' twitz kya'j nyek'unteju' taq'unb'en tq'ob'.²Atl junjun q'ij nkyma'nju' tb'inchb'en Dyos; exju' qonik'an nxitma'n tqanil te juntl qonik'an.³Maskyepe' mixti' jun tqanil tu'n tyol ex mixti' jun tq'ojq'ojel yol nb'injtz,⁴atiju' tqanil toj tkyaqil twitz tx'otx', tzmax toj mankb'il t-xe kya'j, atzuntzu' kub'a' tq'o'n Dyos tkub'elu' q'ij.⁵Ntzyet tb'ettzuntz kse'n jun ku'xun ajtmje, kse'n jun xjal aj txi' ojqelanjeb'il,⁶In jawu'lu' q'ij toj jun plaj kya'j ex innex toj jun plajtl, ex mix-a'lo' jun nb'ent tewan teju' ttantonil.

⁷Ttzinunalxi'xte' t-xnaq'tzb'il Qman Dyos, qu'n intq'o'n ak'a'j chwinqlal. Tnik'alti'jte' tchaq'b'il Qman Dyos, qu'n intq'o'n tnab'lju' xjal mixti' xnaq'tzb'il te.⁸Tz'aqliqe'ju' tkawb'il Qman Dyos, qu'n intzalaj qanmi kyu'n. Tb'anilxi'xte' tchaq'b'il Qman Dyos, in t-spik'b'a'n toj qwitz.

⁹Majx Ẍtilunte' nqo niman te Qman Dyos, ex ati tejumajx. Ax qe'kye' tchaq'b'il Qman Dyos, kykyaqil tz'aqliqe',¹⁰¡nimxi'x kyoklen kyetwitz tb'anil q'anpwaq!, ¡maj chi'xi'x kyetwitzju' ta'lkab' nb'ent kyu'n onon!¹¹Ex k'asb'ilqe' weye' ayine' tmajena, ex b'a'nxi'x tu'n kyxi' nnb'i'ne'.

¹²¿Alxi'xkye jun inel tnik' ti'jxu' tchuksb'en? ¡Nman Dyos, najsanku'ya jni'xu' nb'inchb'ene' min inel nnik'e' kyi'j!¹³Iq'imilju'ya nimjtib'il woje'; lalun taja tu'n tkub' wi'je' tu'nju' nimjtib'il. Tu'ntzun wokye' mixti' ntz'ilile' twitza; ex tu'n ntzaqpete' te nimaq il.

¹⁴Che elxwit b'a'nju' nyole' exju' nxime' toj twitza, Nman Dyos, wewb'ile' ex tzaqpil weye', chiju' b'itzal. Na'j Dyos ti'j kanb'ab'l¹Tzajxwit b'i'na tu'n Qman Dyos aj ttena toj yajb'il; awt Qman Dyos ja k'uluna' Jakob' klonteya.²Tzajxwit t-sma'n jun onilteya ex klolteya tzmax toju' ja xjan twi' Syon.³Tzajxwit tna'n tkyaqilju' toyaja ex tk'amxwit toj tzalajb'il tkyaqilu' nkub' tq'o'na te chojb'il k'ok'sb'il.⁴Tzajxwit ttzaq'we'n tkyaqilju' tb'is tk'u'ja ex che japunxwit tkyaqilju' t-xima.⁵Kb'eltzun qik'sa'nju' q'ij ajtkanb'ana, che jawil qyob'a'nju' t-sut tnam twitz kya'j toj tb'i Qman Dyos. ¡Che tzajxwit tq'o'n Qman Dyos tkyaqilju' tqanb'etza!

⁶Matxi' tz'el nnik'e' b'a'nxi'x qa ktzajel tq'o'nte Qman Dyos tu'n tkanb'anju' nimaqkawil jaw t-sk'o'n; qa ktzajel ttzaq'we'n tzmax toju' kya'j xjan, ktzajel tq'o'n nimaq kanb'ab'l te tu'nju' tipumal.⁷Ate' junjun q'uqlok kyk'u'j kyi'j kykarwaj te q'oj, ex junjuntl kyi'j kychej; atzunqe atzu' q'uqloka' qk'u'j ti'j Qman Dyos.⁸Inche kub' tz'umj kye kych'eky ex nche kub' tz'aq, ayo'tzunqe wa'lqo'xi'x ex minti' nqo'kub' tz'aq.

⁹Nman Dyos, ¡q'ontzju'ya kanb'ab'l teju' nimaqkawil! ¡Qo' ttzaq'wetza ajqtxokone' teya!, chiju' b'itzal. B'itz te kanb'ab'l¹Nman Dyos, intzalaju' nimaqkawil tu'nju' matxi' tq'o'na tipumal; ¡inxi'x tzalaj tu'nju' ma kanb'an tu'na!²Mache tzaj tq'o'na tb'is tk'u'j; minti' xkub' t-xk'a'yi'nju'ya tqanb'etz.³Matk'ama tuk'i'l nim ky'i'wb'il ex majaxtq'o'na jun q'anpwaq koron toj twi'.⁴Xitqani'n tchwinqlal teya, ex matzaj tq'o'na: nimtoj ex tejumajx.⁵Chjonte tu'nju' t-o'nb'ila, nimte' tipumal tu'na; matxi' tq'o'na oklenj ex ninb'ilte.⁶Matxi' kub' tky'i'wla'na tejumajx; intzalaj nimxi'x qu'n atiya tuk'i'l.

⁷Layxna' kub'tz'aqta, nimaqkawil, q'uqlina' tk'u'ja ti'j Qman Dyos; ¡q'uqli tk'u'ja ti'ju' tk'u'jlalil Manb'aj te toj kya'j!⁸Kpomelju' tipumala kyib'aju' tajq'oja; kpomel kanunju' tb'a'nq'ob'a kyib'aju' nche i'k'un teya;⁹che okyex tq'o'na toj tq'aq'al jun chuj ajtula malul kyib'aj. Atzunte Qman Dyos tu'n ttx'u'jil, che kb'el tnajsa'n tu'n q'aq'.¹⁰Che b'el tnajsa'nju'ya kyk'wal ex kyyajajil Kyxolju' xjal twitzju' tx'otx' che kb'el tnajsa'nju'ya kyk'wal exqe' kyyajajil.¹¹B'a'ntzun qa kyajb'il tu'n kyb'inchante jun taq'wix ti'ja exqa makub' kyxima'n jun ti'xti' myab'a'n, lay b'ent kyu'n,¹²che kb'el oqkye' teya; kxe'l tnik'u'na t-smaja kyi'j.

¹³¡Iq'i'nktz tib'a Nman Dyos tuk'i'l tipumala,! ¡Che kb'el qtzalajsa'ne' tkanb'ab'la kyu'n b'itz!, chiju' b'itzal. Sich' toj yajb'il ex b'itz te ajwalb'il¹Nman Dyos, Nman Dyos, ¿tiqu'n ẍin kyeja' ttzaqpi'na? ¿titiqu'n minti' ntzaja' klol weye'? ¿titiqu'n minti' ntzaj tb'i'nju'ya nkub'sb'ile'?²Taye, intzaj ntxko'na q'ijtl ex qonik'an, ex min nchin tzaj ttzaq'we'na; ¡mixti'x nchin ojlane'!

³Xjan na'ta Nman Dyos; aya nkawin ex nima'na kyu'n aj Israel.⁴Okqe kyk'u'ju' qmane' ti'ja; qe kyk'u'j ti'ja ex e'tzaqpet tu'na;⁵e'qanin o'nb'il teya, ex aya tzaqpinkye; okqe kyk'u'j ti'ja ex min e'kyaj tkolb'e'na.

⁶Naqna' jun xton qinwe', mya jun ichan; ¡matxi' chin okye' te kytzeb'l xjal!⁷Nchin xmayinjtze' kyu'nju' nche okka'yin weye'; nxi' kyokcha'n kytzi ex kywi'⁸ex inkyma'n: Q'uqlitoq te'lu tk'u'j ti'j Qman Dyos; tzajku'na'tzuntz klolte. Ina' laqj ti'j, klonjtz ku'natzuntz tu'n, chechij.

⁹Ikytzu'n Nman Dyos: tb'inchaya tu'n witz'je' ti'j ntxuye'; tu'na nnojlana'ye' ttzitk'u'j.¹⁰Atxi'x na'mxtoq witz'jiye', inkub' q'o'ne' toj tq'ob'a; tej atinqintoqe' toj t-xmilal ntxuye', ti'ja q'uqla' nk'u'je'.¹¹Lalun tz'el tpa'ntib'a wi'je', qu'n xi' woke' toju' yajb'il ex mix-a'lo' jun klol weye'.

¹²Txoli'ntl kyib'ju' wajq'oje wi'je' naku'j tman wakxqe', ikyqe' kse'n tman wakx toj B'asan tx'u'jqe';¹³nche tzanun naku'j b'alun, inxi' kyk'ab'a'n toj kytzi ex ntzaj kyxonkyib' wib'aje'.¹⁴Ikyqinju'ye' kse'n a' kub' ẍa'lj; qutz'jni qe'ju' nb'aqile'. Inkub' yulju' wanmiye' woje' kse'n ser.¹⁵Matxi tzqiju' ntziye' naku'j jun xk'o'n; matxi' tz'oklak'e waq'e' toj nk'o'ne'. ¡Matxi' chin kyej tq'o'na ex machin ponxe' twitz kamik!¹⁶Naku'j tx'yan qe'ju' b'inchal taq'wix matxi' tz'ok kytxoli'n kyib' wi'je'; matxi' b'aj kyk'ixb'sa'n nq'ob'e' ex nqane'.¹⁷¡Jaku' b'ent kyajletu' nb'aqile' wu'ne'! Majx tokkywitzju' wajq'oje wi'je';¹⁸matxi' b'ajx kysipa'n nxb'alune' kyxol, ex nche' ẍchan alkye kkanb'al ti'j.

¹⁹Atzunta Nman Dyos, aya wipumale', ¡lalun txi' lq'eya!, ¡lwix kuttzaja onilweye'!²⁰Chin tkloma tu'n lan chin b'aje' tu'n k'uẍtx'e'nb'il, lalun taja tu'n nkub' kyb'yo'ne' twak'utz lu,²¹chin tkloma toj kytziju' b'alun lu, ¡chin tkloma te kyuk'aju' tman wakx lu!

²²Kxe'l nyoli'na kyeju' witz'ine' ex ntzike', kjawil nnima'na toju' b'u'yb'ilkyib'.²³¡Che b'itzan qe'ye' te Qman Dyos!, aye'ye' nche nimane' te. ¡Che nimanqe'ye' te, kykyaqile' tyajajil Jakob'! ¡Che k'ulun qe'ye' te, kykyaqile' tyajajil Israel!²⁴Qu'n minti' nche eltik'o'n ex min nnik'tna'lu' yajb'ilkye prow tu'n, ex minti' nkub' ewan kywitz. ¡Inche tzaj tb'i'n aj txi' kyqani'n o'nb'il te!²⁵Kjawil nb'itza'ne' tyola njapun; kywitzju' ttanama nim kyajlal, kywitzju' nche niman teya kjapumelju' nyole' xintziya'ne' teya.

²⁶Che wanqe'kye', ju' nche yajlanjtze', che nojxe' b'a'nxi'x; che b'itzan qe'ye' ju' nche jyone' ti'j Dyos, ex che anq'inxwite' b'a'npun ab'q'i.²⁷Kykyaqil kyyajajil xjal ex kykyaqil nimaqtnam, e'xjal toj tkyaqil twitz tx'otx': kyna'ntze' Qman Dyos, ex kukytzaje' tk'etz; ¡che mejeku'ye' twitz!²⁸Qu'n ate Qman Dyos nimaqkawil, ex ate nkawin kyib'aj kykyaqil nimaqtnam.²⁹Che tzipeku'ye' ex che k'ulun qe'ye' o'kxte kykyaqile' b'a'n te'qe'ye', kykyaqile' ju' k'anjetl kyi'je' toj tx'otx', qu'n mixti' kychwinqlale' kyu'nx kyib'e'.

³⁰Kche k'ululkye' nyajajile' te Qman Dyos ex kche yolil ti'j toj tkyaqilju' kychwinqlal;³¹kxe'l kyoli'nju' tkawb'il ex taq'unb'en kyeju' che itz'jel yajxi'tel, chiju' b'itzal. A Qman Dyos k'ik'lel weye'¹Ate Qman Dyos k'ik'lel weye'; ntzaj tq'o'n tkyaqilju' nnojqelan weye'.²Nchin ojlane' tu'n kyoj cha'x k'ul, ex nchinx tiq'i'ne' kytzi a' chab'a kyel,³ntzaj tq'o'ntl wipumale' ex nchinx tiq'ine' kyoj b'a'n b'e, te ninb'ilte tb'i.

⁴Maskye machin nik'e' toj jun b'e xob'ajilx, lay chin xob'e', qu'n atiya wuk'i'le', Nman Dyos; q'uqli nk'u'je' kyi'ju' ttzeya.

⁵Matxi' kub' tb'incha'na jun ninwan weye' kywitzku' wajq'oje; majaxtqo'na aseyt toj nwi'ye' naku'j nimaqxjal qine', ex matzaj tnojsa'na nb'ase' b'a'nxi'x.⁶Atiju' t-xtalb'ila ex tk'u'jlalila wuk'i'le', ex chin najale' toju' tjaya Nman Dyos toj tkyaqilju' nchwinqlale', chiju' b'itzal. Nimaqkawil nim tajwalil¹Tete' Qman Dyos tkyaqilju' tx'otx', kyuk'i'l tkyaqilju' ati twitz, kyuk'i'l kykyaqilju' itz'qe' twitz.²Qu'n ana'te Qman Dyos kub' q'onteju' tq'uqlil tx'otx' ex kub' tq'o'n tib'aj njab' ex kyib'aj a'.

³¿Alkye kjapumel twi'ju' witz te Qman Dyos? ¿Alkye ktenb'il toj tja Dyos xjan?⁴Aju' ẍtilun tq'ob' ex tnab'l te tkyaqil il; aju' min nk'ulun kywitz witzleb'
ex min ntzaj tna'n tb'i Dyos ti'j chajyolil.⁵A Qman Dyos kolol kb'el k'i'wlanteju' ichan lu, ex ktb'incha' b'a'n te.⁶Ikyqe'tzun xjalju' nche k'ulun te Dyos, aye' nche jyon ti'ju' Dyos ja k'uluna' Jakob'.

⁷¡E' tjpel tnam tejumajx,! ¡Kukykyaje' jqo'n qe'ye', tu'n tokxju' nimaqkawil nim tajwalil!

⁸¿Alkyetzu'n nimaqkawil nim tajwalil? ¡Ate Qman Dyos nimtipumal ex kuw! ¡Kuwte' Qman Dyos toj q'oj!

⁹¡Kyjqom kyib'e' tjpel tnam tejumajx! ¡Kukykyaje' jqo'n qe'ye', tu'n tokxju' nimaqkawil nim tajwalil!

¹⁰¿Alkyetzu'n nimaqkawil nim tajwalil lu? ¡A Qman Dyos nimtipumal tib'aj tkyaqil!
¡Ate nimaqkawilju' nim tajwalil! chiju' b'itzal. Qanb'il o'nb'il te Dyos toj na'j Dyos¹Nman Dyos, teya nchin kub'sana'ye';²Taye, ti'ja q'uqla' nk'u'je': lalun taja tu'n tel nch'ixawe'. ¡Tu'n lalun chin kub'kytze'ne' wajq'oje!³¡Miwt tz'ela' kych'ixawju' q'uqlok kyk'u'j ti'ja! ¡Aye'wt tz'el kych'ixawju' naqx kyak'a'n njaw kyiq'i'n kyib' ti'ja!

⁴Nman Dyos, yek'unqe'tzju'ya tb'eya weye'; chin t-xb'etzama kyoj;⁵chin t-ẍaqluma, chin t-xb'etzama toju' ax, qu'n a na'ta Dyos ja q'uqla' nk'u'je' ex klol weye'. ¡Tkyaqil kmuj q'uqlok nk'u'je' ti'ja!

⁶Nman Dyos, na'ntza ttzalajb'ila tuk'i'l tk'u'jlalila ju' ntzaj tyek'u'na qeye' kukxju',⁷lantzun tzaj tna'nteju'ya wile' exju' taq'wix xnb'inchaye' toj nku'xumale'. Nman Dyos, chin tna'tza, tuk'i'l tk'u'jlalila ex t-xtalb'ila.

⁸Majx b'a'nte' Qman Dyos ex tnik'alti'j; intzak'un ti'j kyb'inchb'enju' aj il⁹aye'tzu'n min nkynima'n kyib' inche t-ẍaqlu'n toju' tb'eyil; ¡nche t-xnaq'tza'n tu'n kyb'et toj tnik'alti'j!¹⁰Tkyaqilju' tb'e Qman Dyos tk'u'jlalil ex ax qe',
kyeju' xjal njapunju' tyol ex tchaq'b'il kyu'n.

¹¹Nman Dyos, nimwe' wil twitza; najsama, nimanjtzwitu' tb'iya.¹²In xityek'u'n Qman Dyos b'e, teju' xjal nniman te;¹³intb'incha'n tu'n tanq'in b'a'n ex kxe'l tq'o'n kytx'otx'ju' tyajajil toju' tx'otx'.¹⁴In nokte Qman Dyos te kamiwju' nche niman te, ex nxityek'u'nju' tyol kyejni b'entti'j kye.¹⁵Majx tokwe' nwitz ti'j Qman Dyos, qu'n inchin tklo'ne' toj tkyaqil xob'ajil.

¹⁶Chin tka'yintza, Nman Dyos, ex q'aq'antz tk'u'ja wi'je', qu'n njunale' intinqine' ex nchin b'isune'.¹⁷Inxi'x chin b'isune' atl junjun q'ij; chin tkloma toju' yajb'ilweye'.¹⁸Ka'yintzju'ya nchin nik'a'ye' toju' aq'untl ex toju' b'is, ex najsama wile'.¹⁹Ka'yintza, nim wajq'oje inxi'x walti'j kyk'u'j wi'je'.²⁰¡Chin t-xq'uqima, klomju'ya nchwinqlale'! ¡Lalun taja tu'n tel nch'ixawe', qu'n tuk'i'la njyona'ye' kolb'il!²¹Chin kletxwite' tu'nju' b'a'n wele' mixti' wile' twitza, qu'n matxi' tz'okqe nk'u'je' ti'ja.

²²¡Nman Dyos, klomqe'ju'ya aj Israel toj tkyaqilju' yajb'ilkye!, chiju' b'itzal. Jun chwinqlal ẍtilun q'uqli tk'u'jlalil¹Nman Dyos, b'inchama tnik'alilti'j weye', qu'n mixti' taq'wix toju' nchwinqlale'. Q'uqlokxi'xwe' nk'u'j ti'ja Nman Dyos;²chin t-xpich'uma, ¡kutik' twitza wi'je'!, ¡kutik' twitza kyi'ju' nxime' ex kyi'ju' nna'ne' toj wanmiye'!³Minti' in ik'tna'lju' tk'u'jlalila wu'ne' ex in nb'incha'nju'ye' tajb'ila;⁴b'ajx chin tena'we' kyuk'i'lju' chalyol ex b'ajx chin uk'ilana'ye' kyuk'i'lju' xmletz'.⁵Inel wik'u'ne' b'u'yb'il kyib'ju' b'inchal il; ¡b'ajx chin tena'we' kyuk'i'lju' b'inchal myab'a'n!

⁶Nman Dyos, wajb'ile' tu'n woklq'eye' ti'ju' q'olb'eb'l teya, txjo'nqe'tlwe' nq'ob' ex ẍnu'lqe'tl te il,⁷tu'ntzun nb'itzane' te ajwalb'il tb'iya, ex tu'n t-xi'npakb'a'ne' taq'unb'ena tb'anilxi'x.

⁸Nman Dyos, ink'u'jla'nwe' ja, janajla'ya, ja tkub'a' tajwalila.⁹Lalun tz'el tiq'i'na nchwinqlale' junx kyuk'i'lju' aj il; ex lalun tb'inchaya weye' kse'n nche t-se'na'ju'ya b'yolxjal,¹⁰kse'nqe' naq'li kyq'ob' tu'n kyb'inchan il ex tu'n kyk'mon medi ti'j jun taq'wixil.

¹¹Atzunwe' mixti'we' ttz'ilil nchwinqlal; ¡chin tkloma, q'aq'antz tk'u'ja wi'je'!¹²Wa'lqe' nqane' b'a'nxi'x twitz tx'otx'; ¡kjawil nnima'na Wajaw, kywitzju' ttanama!, chiju' b'itzal. A Qman Dyos spik'un es kolb'il weye'¹Ate Qman Dyos spik'un ex klol weye', ¿altzun qe chin xob'ila'ye'? Ate Qman Dyos nklonte nchwinqlale', ¿altzun qe chin xob'ila'ye'?²Aye' aj il exqe' ju' wajq'oje, ajtb'aj kb'u'yi'n kyib' tu'n kq'ojin wi'je' ex tu'n nkub' kb'yo'ne'; aye'pekye inche jaw trakpuj ex inche kub' tz'aq.³Maskye matz'ok kytxoli'n kyib'ju' xjal q'ojil wi'je', lay chin xob'we'; b'a'ntzun qa makyb'inchakyib' tu'n kyul q'ojil wi'je' q'uqliwe' nk'u'j.

⁴Noq jun ti'xti' matxi' txi' nqanine' te Dyos, noq jun ti'xti' wajb'ile': tu'n ntene' toj tja Dyos toj tkyaqilju' nchwinqlale', tu'ntzun nk'ulune' te, toj tja ex tu'n toknka'yi'nju'ye' tajwalil.⁵Ajtzun tulju' tq'ijlalil myab'a'n, kchin kletile' tja; ex tjaq'ju' t-xlekumal kchin tenb'ila'ye'. ¡Ex tib'aj ju' pik chin kletela'ye' tu'n!⁶Oktzun kjawil wi'n nwi'tzu'ye' kyib'aj wajq'oje; kchin xe'ltzuntze' q'ol chojb'il toj tja Dyos, ex kchin ẍch'ile' tu'n tzalajb'il, ex chin b'itzale' te Qman Dyos.

⁷inchin kub'sane' twitza Wajaw: chin tb'itza. Q'aq'antz tk'u'ja wi'je', ¡chin ttzaq'wetza!⁸Intma'n wanmiye' weye' kjalu: Jyoma Qman Dyos. Qu'mtzun Wajaw, inchin jyone' ti'ja.⁹¡Lalun txi' tewa'ntib'a nwitze'! ¡Lalun chin nel tik'u'na tuk'i'l ttx'u'jila! ¡Qu'n o'kxta onilweye'! Lalun chin kyej tq'o'na njunale' mixti' kolb'ilweye', qu'n a na'ta Ndyose' ex klol weye'.¹⁰Maskye machin kyej kykolb'e'ne' nmane' ex ntxuye', aya Nman Dyos, kxe'l ka'yinweye'.

¹¹Nman Dyos, yek'untza tb'eya weye'; chin t-ẍaqluma toju' tb'eya b'a'n noqx tu'n kpaju' wajq'oje;¹²lalun taja tu'n nkub' tz'aqe' toj kyq'ob', qu'n matxi' jawkyi'nkyib' tziyal chalyolqe' ex mya'lqe' wi'je'.¹³Ayintzunwe' q'uqlixi'xwe' nk'u'j qa k'okyel nka'yine' t-xtalb'il Dyos toju' nchwinqlale'.

¹⁴¡Qek tk'u'ja ti'j Qman Dyos! ¡Tenx tipumala, lalun kub' numja! ¡Axxi'x, qek tk'u'ja ti'j Qman Dyos!, chiju' b'itzal. Ntzaj tb'i'n Qman Dyos qkub'sb'il¹inchin kub'sane' teya Nman Dyos, aya klol weye'. ¡Chin ttzaq'wetza, lalun kub' t-xk'a'yi'n tib'a! Qu'n qama kub' tewa'ntib'a nwitze', matxi'tzun chin noktzu'ye' kyajlal kyimni.²B'intzju'ya tq'ojq'ojel nwi'ye' ajt-xi' nqani'ne' o'nb'il teya, aj txi' nmujb'a'n nq'ob'e' tu'me'lju' tjaya xjan.

³Lalun kub' ttz'e'ysa'na nwitze' junx kyuk'i'lju' b'inchal myab'a'n, lalun tb'inchaya weye' kse'n kb'ajel kyi'ju' b'inchal il, qu'n naq kywitz xjal ati kyk'u'jlalil atzu'n toj kyanmi nojni tu'n taq'wixil.⁴Q'onxju'ya tu'me'l t-xel kye, kse'nxju' kyaq'unb'en; tz'e'ysanku'ya kywitz, kse'nxju' kyb'inchb'en taq'wix.⁵Qu'n min ntzaj kyna'n jni'ju' taq'unb'en Qman Dyos, ¡awt kub' xitunkye ex mixwit che jawa' we'tl!

⁶¡Nimanjtzwitju' Qman Dyos, matxi' tzaj tb'i'nju' nkub'sb'ile'!⁷Ate Dyos klol weye' nimtipumal; ti'j sokqeya' nk'u'je', ex matz'onin wi'je'. inchin tzalaje'; kchin b'itzale' ex chin q'ol chjonteye' te Qman Dyos.

⁸Ate Qman Dyos kyipumalju' ttanam; ate onil ex klolb'ilteju' nimaqkawil jawni t-sk'o'n.⁹Nman Dyos, klomju'ya ttanama; ky'iwlanqeku'ya tk'wala. Xq'uqimqe'ya kse'n jun k'ik'lel; ¡iq'imqe'ya toj tq'ob'a tejumajx!, chiju' b'itzal. Tq'ojq'ojel twi' Qman Dyos nimtipumal¹Kyajwalinktze' Qman Dyos aye'ye' anjl te toj kya'j: kyajwalinktze' tipumal ex tajwalil,²kyajwanlinkju'ye' tb'i Qman Dyos, che k'ulun qe'ye' twitz toju' tja xjan tb'anilxi'x.

³In q'ajti tq'ojq'ojel twi' Qman Dyos tib'aj ninnjab'; tu'n Dyos nim tajwalil nq'ajta': ¡atite Qman Dyos tib'ajile tnimal ninnjab'!⁴Inxi'x q'ajtiju' tq'ojq'ojel twi' Qman Dyos kuw; inxi'x tinun tq'ojq'ojel twi' b'a'nxi'x;⁵inche kub' jachju' tq'ob' tze k'ute tu'nju' tq'ojq'ojel twi' Qman Dyos. ¡Inche kub'tjachu'n Qman Dyos tze toj Lib'ano!⁶Nche lu'lunju' witz Lib'ano ex Siriyon tu'n; ¡nche t'ikpuj tu'n, kse'nqe' tman wakx ex qpoj tman wakx!⁷Intzaj t-xon tq'ojq'ojel twi' Qman Dyos tqan taq' q'aq';⁸inche lu'lun chq'ajlaj tu'n tq'ojq'ojel twi' Qman Dyos; ¡tu'n inlu'luna' chq'ajlaj Kades!⁹Majx nche b'ajtchto'n tq'ojq'ojel twi' Qman Dyos b'ansi ex mixti' jun wi'tl tze in kyej tq'o'n toj k'ul. Kykyaqil nche nimam te toju' tja.

¹⁰Ate Qman Dyos in nk'unteju' jb'al; ¡a Qman Dyos nimaqkawil nkawin tejumajx!¹¹Intq'o'n Qman Dyos tipumalju' ttanam; ex inkub' tky'i'wla'n tuk'i'l nak'b'il, chiju' b'itzal. B'itz aq'b'il chjonte te Qman Dyos¹Kjawil nnima'na, Nman Dyos qu'n machin klete' tu'na, ex min xtaja tu'n nb'aj xmayine' kyu'n wajq'oje.²Nman Dyos, xinqanine' o'nb'il teya, ex machin tq'anaya;³Nman Dyos, machin tkola teju' kamik; matzaj tq'o'na nchwinqlale', ex min ẍin kyime'.

⁴Aye'ye' tnik'alkyi'je' twitz Qman Dyos, ¡che b'itzan b'itze' te!, ¡kyb'itzanxju'ye' tb'i xjan!⁵Qu'n naq jun kmuj ntenju' ttx'u'jil, atzu'n t-xtalb'il kukx ttenju' toj tkyaqil qchwinqlal. Qama qo oq' te qonik'an, qo tzalajel te prim.

⁶Okqexi'xwe' nk'u'j, ex kub' nxima'ne': Milo najchi'j tu'nkub' tz'aqwe'.⁷Atzunta Nman Dyos, matxitoq chin kub'twab'a'na b'a'nxi'x tu'n t-xtalb'ila. Tetzunj min sonintla wi'je' machin kub'chukjiye' tu'nju' xob'il.

⁸Nman Dyos, teya njawa' tq'ojq'ojel nwi'ye'; twitza nchin kub'sana'ye', Nman Dyos:⁹¿titi' tajb'en qama chin kyime', ex tu'n nxi'q'i'ne' toj muqb'il? ¡lay b'entl tnimanju' quq teya ex lay yolintl ti'ju' tyola ax!¹⁰Nman Dyos, chin tb'itza ex q'aq'antz tk'u'ja wi'je'; Nman Dyos, ¡chin toniya!

¹¹Matz'okju' njiq'cha'ne' tu'na te tzalajb'il; matz'el tiq'i'nju'ya b'is wi'je', ex machin oktktxu'na tu'n tzalajb'il.¹²Qu'mtzun, Nman Dyos, lay chin kyejtene' kukxju': ¡kjawil wajwali'ne' tb'iya kyuk'i'l b'itz ex kxe'l nq'o'n chjonteye' teya kukxju'!, chiju' b'itzal. Tu'n tqexi'x qk'u'j ti'j Qman Dyos¹Nman Dyos, tuk'i'la in njyo'na'ye' kolb'il; ¡lalun taja tu'n tel nch'ixawe'! ¡Chin tkloma, qu'n tz'aqli ta!²Chin tb'intza; ¡chin tkloma ja'loxi'x! Tz'okxwita kse'n jun nin ab'j te kolb'ilweye', ¡tz'okxwita te wewb'ile' tu'n nklete'!³¡Aya nin ab'j ex ja te kolb'ilweye'!
¡Chin t-ẍaqluma ex chin t-xq'uqima; tu'n tb'ent nnimanteye' tb'iya!⁴¡Chin tiq'imitza toju' xpatxab' kub'ni q'o'n nwitze', qu'n a na'ta klol weye'!⁵Kxe'l woqxena'ne' wanmiye' toj tq'ob'a; ¡chin tkloma, Wajaw, aya Dyos axxi'x!

⁶Inche elwik'o'ne' k'lul witzileb' mixti' kyajb'en. Matxi' tz'okqewe' nk'u'j ti'j Qman Dyos.⁷Intzaj tq'o'n tk'u'jlalila tzalajb'il ex nak'b'il weye'. Matila machin b'isune', tojtzqi'na k'ixk'oj ntzaj wi'je';⁸min ẍinx tq'o'na toj kyq'ob'ju' wajq'oje; ¡Machin kub'we'ye' toj nkub'ele' b'a'n tu'na!

⁹Nman Dyos, q'aq'antz tk'u'ja wi'je', qu'n xob'ajilx atinqina'ye'. Matxi' tz'el kyipumalju' nwitze', ¡tkyaqil toj nwinqile' in ch'yon!¹⁰¡Matxi' chin kub'e' tu'n k'ixk'oj ex oq'el ex noq ch'inx nkyime'! Matxi' chin kub' numje' tu'n b'is, ¡Mixti'tl wipumale'!

¹¹Matxi' chin nokye' te kytzeb'e'tz wajq'oje, ex te kyxmayb'il najlqe' wi'jileye', xob'ajilqinxe' kyeju' ojtzqi'nqine' kyu'n. ¡Kykyaqilju' nche okyal nwitze' nche el oq!¹²Majx matxi' tzik'nna'le' kyu'n, naku'j oje chin kyime' kye. Ikqinju'ye' kse'n jun xar kub'ni b'uchj.¹³In nb'i'ne' nche jasjne xjal wi'je': Jaxjaku' atinqina'ye' nchin xob'e'. Inkb'u'yi'nkyib' tu'n kyyolin wi'je'; ¡inche ximan tu'n nkub' kyb'yo'ne'!

¹⁴Ayintzunwe', q'uqlok nk'u'je' ti'ja, Nman Dyos; oje nmaye': ¡Ateju'ya Nman Dyos!¹⁵Toj tq'ob'a ta'ju' nchwinqlale'; ¡chin tkloma kyeju' wajq'oje, inche jyon wi'je'!¹⁶Chin tka'yintza tu'n t-xtalb'ila ayine' tmajena, chin tkloma, tu'n tk'u'jlalila.¹⁷inchin kub'sane' teya Nman Dyos; ¡lalun taja tu'n tel nch'ixawe'! ¡Aye'wtu' aj il tz'el kych'ixaw; che ku'xwit qoptz'aj tzmax t-xexi' muqb'il!¹⁸Jpet-xwit kytziju' chalyol, aye' nche yolin tuk'i'l xmayb'il ex i'k'jtib'ill, ex nche yolin ti'ju' xjal tnik'alti'j.

¹⁹¡Nimta t-xtalb'il kyeju' nche niman teya! Intk'u'na kse'n jun k'uwenj ex kywitzku' xjal, nxa' t-sipa'na kyeju' q'uqlok kyk'u'j ti'ja.²⁰Tu'nju' atiya kyuk'i'l, inche tklo'na te tkyaqilju' kyxim xjal myab'a'n; inche tklo'na toj tjaya kyeju' kyajq'oj nche ok ik'lenkye.

²¹Nimanxwit tb'i Qman Dyos tu'nju' tk'u'jlalil nim t-xtalb'il xtb'incha weye', tej antintoqe' toj k'ixk'oj.²²Tej njaw ximane' nmaye' qa matxi' tzik'nna'le' tu'na; atzunj txi' nqani'ne' o'nb'il teya, tzaj tb'i'na tq'ojq'ojel nwi'ye'.

²³Kyk'u'jlame' Qman Dyos, kykyaqile' okslalqe'xi'xe' te. Inche t-xq'uqi'nte Qman Dyos ax che yolin, aye'tzu'n nkynima'n kyib' inkub' ttz'e'ysa'n kywitz b'a'nxi'x.²⁴Kykuwsam kyk'u'je' kykyaqile' q'uqlok kyk'u'je' ti'j Qman Dyos, chiju' b'itzal. Q'mab'l il ex najsb'il il¹Tzalajb'ilte' teju' xjal matxi' kub' najsa'n til ex tb'inchb'aj myab'a'n.²Tzalajb'ilte' teju' xjal mixti' t-xim taq'wix ex mixti' jun til nnelyal tu'n Qman Dyos.

³Tej na'mxtoq tjatz nma'ne' wile', kxi'toq nkub'numje' tu'n oq'e'n atl junjun q'ij,⁴qu'n q'ijtl ex qonik'an nchin k'ixb'iye' tu'n tq'ob'a, naku'j jun b'ech nkub' tzqij toj q'ijal, iktoqtzun nna'ju'ye' xi'toq nkub'numje'.

⁵B'jatztzun npa'n wiltze' ex nb'inchb'aje' myab'a'n teya mixti' kub' wewa'n juntle', b'jaw nma'ne' wile' teya, atzunta Nman Dyos, b'ajkub' tnajsa'na.

⁶Qu'mtzun che kub'salju' okslalqe'xi'x teya toju' kmuj te k'ixk'oj, b'a'ntzun qa ati tnimal a' in toloq'in, lay pon kanun kyi'j.⁷Aya kolb'ilweye': nchin tklo'na teju' xob'ajil, nttxoli'na wi'je' kyu'n sich' te tzaqpib'l.

⁸Intma'n Qman Dyos kjalu: Majx toknwitze' ti'ja. Ayine' chin xnaq'tzalteya, kxe'l nq'o'n tnab'la, kxe'l nyek'u'ne' b'e teya ju' ati tu'n txi' tiq'i'na.⁹Lalun tz'oka naku'j chej, minti' nb'in ex mixti' tnab'l ati tu'n tokx k'uxb'il toj ttzi tu'n ttzaj jk'et, qatzun min lay tzaj lq'e tk'etza.

¹⁰Aju' tk'u'jlalil Qman Dyos, nktxunkyeju' q'uqlok kyk'u'j ti'j, aye'tzu'n b'inchal il kche yajtel b'a'nxi'x.¹¹Che tzalajxe' ti'j Qman Dyos, aye'ye' b'a'n xjal qe'ye' ex tnik'alkyi'je' twitz Dyos; ¡che tzalajxe' ex che ẍch'inqe'ye' tu'n kytzalajb'ile'!, chiju' b'itzal. B'itz aq'b'il chjonte te Qman Dyos¹Che kub'sanqe'ye' twitz Qman Dyos b'a'n xjal; tb'anilxi'xte' b'itz inetz toj kytziju' b'a'n xjal.²Kyq'onx chjonteye' te Qman Dyos tuk'i'l chnab' arpa, kyb'itzanxe' b'itz tuk'i'l tq'ojq'ojel chnab' tzintzin,³kyb'itzanxe' jun ak'a'j b'itz, ¡kyq'ajtzanx kychinab'e' nk'u'n tb'anilxi'x aj kyb'itzane'!

⁴Axxi'xte' tyol Qman Dyos; kyu'nju' tb'inchb'en nq'ancha'lixa'.⁵Intk'u'jla'nte Qman Dyos tnik'alilti'j exju' tzinun; ¡ati tk'u'jlalil toj tkyaqil twitz tx'otx'!⁶B'aj b'entju' kya'j ex kykyaqilju' che'w tu'n tyol Qman Dyos tu'nju' t-xew xit-xupi'n.⁷Ate Dyos k'u'lteju' a' toju' ninnjab' nim t-xe.

⁸Kynimanktze' Qman Dyos kykyaqile' ate'ye' twitz tx'otx'; ¡che nimane' te, kykyaqile' najlqe'ye' toj tkyaqil twitz tx'otx'!⁹Qu'n yolin, ex b'enti tkyaqil; a q'mante, ex tkyaqil kyej b'enti.

¹⁰Ate Qman Dyos inkub' xitunte tkyaqil kyximju' tnam nche niman kye txqantl dyos,¹¹aye'tzunkye tb'is tk'u'j Qman Dyos kukx kytenju' tejumajx.¹²Tzalajb'il ta'te' tnam nk'ulun teku' Qman Dyos, aju' jawni t-sk'o'n te ttanam.

¹³In ka'yin te Qman Dyos kyib'aj kykyaqil xjal tzmax toj kya'j;¹⁴tzmax janajla' nka'yin kyeju' najlqe' twitz tx'otx';¹⁵Ate kub' b'inchanteju' kyanmi ex in tka'yi'n tkyaqilju' nkyb'incha'n.

¹⁶Mixti'te nimaqkawil nklet kyu'n txqan t-xjal te q'oj, ex lay kletju' xjal te q'oj tu'nx tipumal;¹⁷mixti'x kyajb'entu' chej tu'n tklet jun xjal; b'a'ntzun qa nim kyipumal, lay b'ent kykolon.

¹⁸Atzunte Qman Dyos kukx t-xq'uqinju' kyi'ju' nche niman te ex q'uqlok kyk'u'j ti'ju' tk'u'jlalil,¹⁹tu'n kyklet te kamik ex tu'n tq'o'nte kychwinqlal toj tq'ijlalil we'yaj.

²⁰Q'uqliqe qk'u'j ti'j Qman Dyos; ¡Ate onilqe ex xq'uqilqe!²¹Intzalaj qanmi ti'j Qman Dyos; q'uqli qk'u'j b'a'nxi'x ti'ju' tb'i xjan.²²¡Tenwtju' tk'u'jlalila quk'i'le', Nman Dyos qu'n atzu' q'uqla' qk'u'je' ti'ja!, chiju' b'itzal. B'itz te Qman Dyos tu'nju' t-xtalb'il¹Kjawil nnima'ne' Qman Dyos tkyaqil kmuj; kchin b'itzale' kukxju' te.²Inxi'x chin tzalajwe' ti'j Qman Dyos; ¡Kyb'ime' ex che tzalajxe', me's qe'ye'!³Qo'qe' b'itzan junx, ti'ju' nim toklen tb'i Qman Dyos.

⁴Inkub'sane' te Qman Dyos, ex intzaj ttzaq'we'ne', ex machin tkole' te tkyaqil xob'ajil⁵Okxi'x che tzalajelju' tokkywitz ti'j Qman Dyos ex layx tz'el kych'ixaw.⁶Jaw ẍch'inju' prow lu, ex tzaj tb'i'n Qman Dyos ex tkol toj tkyaqilju' yajb'ilte.⁷In xq'uqinju' tanjl Qman Dyos ex inkolon kyi'ju' nche niman te.⁸Tz'elx kynik'e', qa b'a'n te Qman Dyos. ¡Tzalajb'il ta'te' xjal q'uqlok tk'u'j ti'j!⁹Kynimanktze' Qman Dyos, xjansa'n kyib'e', qu'n ntzaj tq'o'n tkyaqilju' ati tajb'en kyeju' nche niman te.¹⁰Inche kub'prowixju' q'inun, ex nche ok toj we'yaj, aye'tzu'n nche jyon ti'j Dyos, ktenb'il tkyaqilju' b'a'n kye.

¹¹Che lq'etze' nk'wal, ex chin kyb'inku'ye': che kxe'l nxnaq'tza'ne' tu'n kynimane' te Qman Dyos.¹²¿Ma tajb'ila tu'n tanq'ina nimtoj? ¿Ma tajb'ila tu'n ttzalaja toju' chwinqlal?¹³Jk'um taq'a kyi'j xlab'yol, ex lalun chanyola.¹⁴Pa'mil tib'a ti'ju' myab'a'n, ex b'inchamju'ya b'a'n; jyomju'ya nak'b'il ex ljonxa.

¹⁵Ate Qman Dyos xq'uqilkyeju' tnik'alkyi'j ex ntzaj tb'i'nju' kykub'sb'il.¹⁶Inq'ojin Qman Dyos kyi'ju' b'inchal myab'a'n, tu'n kynaj twitz tx'otx' ex tu'n miche tzaja' na'ntl.¹⁷Intzaj tb'i'n te Qman Dyos tkub'sb'ilju' xjal tnik'alti'j, ex intklo'n toj tkyaqilju' yajb'ilte.¹⁸Nqaku' ta'te Qman Dyos klolkyeju' nche' b'isun ex mixjaloja tu'n toka'qe kyk'u'j.

¹⁹Inik'ju' xjal tnik'alti'j toj chukchaq joyb'ilti'j, atzunte Qman Dyos nklonte toj tkyaqil ja'lu.²⁰Tkyaqilju' tb'aqil xq'uqi'n tu'n Dyos; ex mix-a'lo' jun kb'el toqinte.²¹Aye'tzu'n aj il tu'nxju' kyil nche kyima'; kb'el tz'e'ysa'n kywitzju' ntx'a'lti'j kyk'u'j kyi'ju' tnik'alkyi'j.²²Atzunte Qman Dyos inklonkyeju' tmajen; ¡lay kub' ttz'e'ysa'n kywitzju' q'uqlok kyk'u'j ti'j!, chiju' b'itzal. Na'j Dyos qanb'il o'nb'il te Qman Dyos¹Nman Dyos, mqom kywitzju'ya wajq'oje; q'ojina kyuk'i'lju' kyajb'il tu'n kyq'ojin wi'je'.²Q'intzju'ya tkolb'ila ex kuttzaja onilweye';³q'intza tch'uta ex we'ku'ya kywitzju' ljol weye'; ¡q'mantza qa aya klol weye'!

⁴Che kub'xwit oq tu'n kych'ixaw ju' kyajb'il tu'n nkub' kyb'yo'ne'; che kub'xwit oq tu'n kych'ixaw ju' kyajb'il tu'n kyb'inchante jun taq'wixil wi'je';⁵¡che okxwit kse'n ttxa triy nche'x iqi'n tu'n kyq'iq', ajkyex xla'ja'n tu'n tanjl Qman Dyos!⁶¡Tz'okxwitju' kyb'e qxopin ex ẍb'ilun ajkyb'jik' xla'ja'n tu'n tanjl Qman Dyos!⁷Mixti' wile' kye, ex makub' kyq'o'n jun xpatxab' weye'; mixti' xnb'inchaye' kye, ex ma ku'x kyb'incha'n jun jul tu'n nku'x tz'aqe' toj.⁸¡Tzajxwit jun taq'wixil kyxol! ¡Che kub'xwit tz'aq tojxju' kyxpatxab'! ¡Kub'xwit kyk'ulb'a'n jun ti'xti' myab'a'n!

⁹Chin tzalajeltzuntze' ti'j Qman Dyos, qu'n matxi'toq chin klete' tu'n.¹⁰Knma'ye' tu'n tkyaqil nk'u'je': ¿Alxi'xkye jun kse'n aya Nman Dyos? Inche tklo'nju'ya prow exqe' ati nojqelan kye toj kyq'ob'ju' kuwqe' kyekywitz, ex kyeju' nche elq'an kyi'j, nchiky'ye'.

¹¹Inkyma'n b'inchal myab'a'n chajyolil wi'je' ex nchin kypoqo'ne' kyi'j ti'xti' min kanli nwitze'.¹²Taq'wix xkyb'incha weye' tu'nju' b'a'n xnb'inchaye' kye, intzaj txqan nb'ise' tu'n tpaj ja'lu;¹³qu'n tej ntoq che kub' yab'ti tzaj nb'ise' kyi'j, intoq oknq'o'n wi'je' te b'is ex intoq chin mewayine', ex mixtoqti' nchin q'jene' tu'n nna'n Dyose' toj wanmiye'.¹⁴Intoq chin numje' nchin b'ete' tu'n b'is, naku'j makyim ntxuye', jun wuk'i'le' mujqa jun ntzikku'ye'.¹⁵Tetzu'n ẍinkub' tz'aqe', kykyaqil ẍeb'jaw tze'n wi'je'; naku'j najchaq xjal qine' ex min ojtzqi'nqine' kye, ex min nche qen tu'n kywulin wi'je'.¹⁶Machin b'ajkyyajla'ne' ex machin b'ajkxmayine', inxi'x tx'u'jin kywitz ajkytzaj ka'yin weye'.

¹⁷Nman Dyos, ¿jte'lo q'ijtl naq kka'yila ti'j ja'lu? ¡Klom ch'iwe' nchwinqlale', kyeju' b'alun nche' tzanunk wi'je' lu!¹⁸Chin q'olwe' chjonte teya kywitzju' ttanama nim kyajlal; ¡kjawil wajwali'na kywitzju' tnam xjal!

¹⁹Lalun che b'jaw tzalaju' wajq'oje wi'je'; lalun taq'a anb'il tu'n kyxmayin wi'je', mixti'we' wil kye.²⁰Qu'n min nkyjyo'n kye'lu nak'b'il, xi'pe' nkyximana' tu'n kyb'inchan jun ti'xti' taq'wix kyi'ju' xjal me'sqe' toju' tnam;²¹inxi' kyk'ab'u'n toj kytzi wi'je', ex inkyma'n ¡ja ja'! ¡Ka'yinxtzuna la, matxi' qila tu'n qwitze'! chechij.

²²¡Matilta Taye! ¡Lalun noqxwit tzaj b'ina! ¡Lalun tz'el tpa'ntib'a wi'je'!²³Iq'i'nktz tib'a, Nman Dyos, b'inchama tu'me'l b'a'n weye', yolina wi'je'.²⁴Chin tq'onka toj xjel, Nman Dyos, qu'n tz'aqli ta. ¡Tu'n lalun che b'jaw tze'n wi'je'!²⁵Tu'n lalun kyma ex tu'n lan kub' kyxima'n: ¡Atzun qajb'ilju'ye' lu! ¡Majx matxi' kub'o'lj qu'ne'! chechiwt.²⁶Tz'elxwit kych'ixaw ju' nche tzalaj tu'n nkub' b'o'lje'; tz'elxwit kych'ixaw b'a'nxi'x ju' nkyxima'n qa nimxi'x kynab'l nwitze'.

²⁷Aye'tzu'n kyajb'il tu'n nkanb'ane' che tzalajxwit ex che ẍch'inxwit tu'n kytzalajb'il; ex tu'n kmante kukxju': ¡Nim te Qman Dyos toklen, ex a ttzalajb'ilju' tu'n tten tmajen b'a'n! chechiku'.²⁸Kchin yolile' ti'ju' tz'aqli ntb'incha'na; ¡kb'ajel q'ij wu'ne' tu'n nb'itzane' teya!, chiju' b'itzal. Til xjal ex t-xtalb'il Dyos¹Tokju' il jask'ulte toj tanmiju' b'inchal myab'a'n. Mixti'xtzun nximan qa ati tu'n qxob' te Dyos.²Toj twitz qa b'a'n tu'n tjaw nima'n, exqa lay tz'el ik'o'nju' til.³Taq'wix yolin ex chalyol, matz'el tzpet tnab'l, ex mixti'tl ntb'incha'n.⁴Kse'n kuẍli toj tkuẍb'il, innaq'wi ximal tu'nt-xi' b'inchalte myab'a'n; matxi' nq'et toju' tb'e myab'a'n ex min tajb'il tu'n tkyej ttzaqpi'nju' il.

⁵Atzunta tk'u'jlalil, Nman Dyos, nimxi'x, npon tzmax twitz ẍkul kya'j; in nik'ju' tyola tzmax tib'ajxi' muj.⁶Ikyqe' tkawb'ilju'ya kse'nqe' nimaq witz; ikyqe' tchaq'b'ilju'ya kse'n ninnjab' nim t-xe. Nman Dyos, nche t-xq'uqi'n teju'ya xjal ex alu'mj.⁷¡Tb'anilxi'xju' tk'u'jlalila Nman Dyos! ¡Nkyjyo'n xjal kolb'ilkye tjaq' t-xik'a!⁸Ex majx nqe kyk'u'j tu'nju' nim wab'j ati toj tjaya; nxitq'o'na kyk'wa' ti'ju' nin a' tchi'yalxi'x,⁹qu'n ti'jta ta'ya'ju' a' te chwinqlal ex in qka'yi'nju'ye' spik'un toju' t-spik'umala.

¹⁰K'u'jlana kukxju' ex b'inchama tnik'alilti'j kyeju' ojtzqi'na kyu'n, kyeju' tnik'alkyi'j twitza.¹¹Lalun taja tu'n nkub' wab'e'ne' kyu'nju' nimal kyib' ex tu'n lalun chin b'aj kyxt'u'yla'ne' b'inchal myab'a'n.¹²¡Kyka'yinxe' se'ntaq'wi nche kub' tz'aqju' b'inchal il! ¡Majx nche kub' tz'aq tu'n lalun che jawe'tl!, chiju' b'itzal. Qek tk'u'ja ti'j Qman Dyos¹Lalun tzaj ttx'u'jila tu'n kypaju' b'inchal myab'a'n, ex lalun tzaj tx'a'lti'j tk'u'ja kyi'ju' b'inchal il,²qu'n ikyqe'ju' kse'n k'ul lwiy nche kub' tzqij; ¡ex nche kub'ch'u'ẍix kse'n itzaj!

³Qek tk'u'ja ti'j Qman Dyos ex b'inchamju'ya b'a'n, tz'anq'ina twitz tx'otx' ex we'ku'ya toj tokslab'la.⁴K'u'jlama Dyos tu'n tkyaqil tanmiya, ktzajel q'onte' tkyaqilju' tajb'ila.

⁵Q'onkja tchwinqlala toj tq'ob' Qman Dyos; qek tk'u'ja ti'j, tzulte' onilteya.⁶Tu'nte kqoptz'ajelju' ttxolilti'j ex tnik'alilti'j ntb'incha'na kse'n nqoptz'aj q'ij te wanq'ij.

⁷Numeku'ya twitz Qman Dyos; naq tz'ayona te ajtul onilteya. Lalun tzaj ttx'u'jila ti'ju' xjal xi'tjaw b'ent, ti'ju' nximan tu'n tb'inchante myab'a'n.

⁸Tzaqpinkju'ya q'oj, ex lalun tx'u'jintla; qu'n tu'nju' q'oj nche kub'a' ichinxi'xju' ti'xti'.⁹Kna' che elix xla'ja'nkye' b'inchal myab'a'n toju' tnam, aye'tzu'n q'uqlok kyk'u'j ti'j Qman Dyos kche etzal ti'ju' tx'otx'.

¹⁰Naqch'inxtl kyb'aju' b'inchal myab'a'n; b'a'n qama jyona kyi'j, lay che okyaltl tu'na.¹¹Aye'tzu'n me'sqe' kkyetza'ju' tx'otx' ex kche anq'il tojxi'x nak'b'il.

¹²Intjyo'n b'inchal myab'a'n tu'me'l tu'n tb'inchan taq'wixil ti'ju' xjal tnik'alti'j, ex aj t-xika'yin te ntx'a'lti'j tk'u'j.¹³Atzunte Qman Dyos naq ntze'n, qu'n kanli twitz qa tzma nq'naxju' b'inchal myab'a'n.

¹⁴In jatz kyiq'i'n aj il kyk'uẍtx'e'nb'il toj tja ex inel kyqinu'n kysmaj tu'n kykub'ju' prow exqe'ju' me's kyu'n, ¡tu'n kyb'yetju' b'a'n kychwinqlal!¹⁵Axtzu'n kyk'uẍtx'e'nb'il k'okyix xuyli toj kyanmi, exqe'tzu'n kysmaj che b'ajel toqj.

¹⁶Aju' ch'i'n ati teju' xjal b'a'n tb'anilxi'x kyetwitz txqan kyq'inumalu' b'inchal myab'a'n.¹⁷Qu'n che kb'el tnajsa'n Qman Dyosju' xjal aj il, aye'tzu'n b'a'n xjal lalun che kub' tnajsa'n.

¹⁸Nxq'uqinte Qman Dyos kyi'ju' xjal mixti' kytz'ilil, ex ktenb'elju' kyetzb'il tejumajx.¹⁹Lay tz'el kych'ixaw toju' tq'ijlalil yajb'il, ajttzaj we'yaj, qu'n ktenb'il kywa nim.

²⁰Kche k'antelju' b'inchal myab'a'n, naku'j tzqij k'ul; Exqe'ju' ajq'oj ti'j Qman Dyos che kb'el naj kse'n sib'.

²¹In qanin tch'exju' b'inchal myab'a'n ex min ntchjo'ntl, atzu'n xjal tnik'alti'j nchjon tk'as ex inq'on chjonte.²²Aye' nche tky'iwla'n Qman Dyos, kkyetza'ju' tx'otx', aye'tzu'n txko'n taq'wix kyb'aj, che b'elt-xitu'n.

²³Ate Qman Dyos ẍaqlulkye xjal ex nche kub' tq'o'n toju' b'e b'a'n toj twitz;²⁴exqa mache jaw tz'aq, lay che kyejten axtzu', qu'n tzyu'nqe' tu'n Qman Dyos.

²⁵Machin nokye' ku'xun, ja'lo matxi' chin tijine', ex min ẍewil jumaju'ye' ichan tnik'alkyi'j, ma'wt che kyej ttzaqpi'n Dyos ex mixjaloja ẍe oka' nka'yi'n jumajuye' kyk'wal inwt che mon.²⁶Tkyaqil maj nq'aq'an tk'u'j, ex inq'on ch'ex; ky'i'wla'nqe'ju' tk'wal.

²⁷Pa'mil tib'a ti'ju' taq'wix, ex b'inchamju'ya b'a'n, ktenb'iltzun jun najb'iltzu' teya ja knajala'ya.²⁸Qu'n intk'u'jla'nte Qman Dyos tnik'alilti'j ex min nche kyajttzaqpi'nju' wa'lqe' toj kyokslab'l; aye'tzu'n b'inchal myab'a'n nche kub't-xitu'n ex mixti' nkyajtq'o'n kyyajil.²⁹Kche etzalju' xjal tnik'alkyi'j ti'ju' tx'otx' ex kche anq'il twitz tejumajx.

³⁰Nyolinju' xjal tnik'alti'j tuk'i'l nab'l; ex ax yolin.³¹Atiju' t-xnaq'tzb'il Qman Dyos toj tanmi; ¡layx che jaw jiktz'aju' tqan!

³²Inche ka'ylaju' b'inchal myab'a'n kyi'ju' xjal tnik'alti'j, tu'n kykub' tb'yo'n;³³atzunte Dyos lay taj tu'n kykub'tz'aq toj kyq'ob', expe' lay taj tu'n tjaw chan il kyi'j.

³⁴Qek tk'u'ja ti'j Qman Dyos, ex okslanku'ya, kjawil nima'nta tu'n, ex ktzajel tq'o'nju' tnam te tetzb'ila. ¡Ktka'yi'ya ajtkub' tz'e'ysa'n kywitzu' b'inchal myab'a'n!

³⁵Matxi' wile' b'inchal myab'a'n, nojni tu'n nimjtib'il, kse'n jun tze pujin toj t-xaq;³⁶makub'naj; machin jyone' ti'j, ex mixti' sokyal.

³⁷Ka'yinxpe'ju'ya xjal tnik'alti'j ex mixti' til: ktenb'el nak'b'il te toju' tq'ijlalil tzul.³⁸Aye'tzu'n b'inchal myab'a'n che kb'el xitu'n; lay che anq'intl toju' tq'ijlalil tzul.

³⁹Atzu' ntzaja' o'nb'il kyeju' xjal tnik'alkyi'j tk'etz Dyos, qu'n a kolb'ilju' kye kyoju' tq'ijlalil ch'uẍ.

⁴⁰A Qman Dyos noninkye tu'n kytzaqpaj. Inche ttzaqpi'n toj kyq'ob'ju' b'inchal myab'a'n, ex nche tklo'n, qu'n ti'j te nkyjyo'na'ju' kolb'ilkye, chiju' b'itzal. Na'j Dyos qanb'il o'nb'il te Qman Dyos¹Nman Dyos, lalun chin ttzak'uya tuk'i'l ttx'u'jila expe' lalun kub' ttz'e'ysa'na nwitze' toj tq'oja.²Qu'n matxi' chin k'ixb'iye' kyu'n tal t-smaja; ¡makub' talal tq'ob'a wib'aje'!³Tu'n ttx'u'jila wi'je' tu'n tpaju' wile', yab' tkyaqil toj nwinqile'. ¡mixti' jun nb'aqile' b'a'nwt ta'!⁴Inchin yajtiye' kyu'nju' wile'; jun iqtz tokx wib'aje' ex lay k'is wu'ne'.⁵Tu'n tpaj nxnakyile', nche q'ayju' nk'ixb'lene' ex nche tzu'wix.⁶Tkyaqil q'ij nchin b'isune', tzipin wele' ex inchin numje'.⁷Inxi'x q'aq'lixju' tze'lwi'je' tu'n kyeq; ¡tkyaqil nxmilale' yab'!⁸Matxi' chin b'ajtx'uyje' ex mixti'tl wipumale'; ¡inchin uxine' tu'n k'ixk'oj toj wanmiye'!

⁹Nman Dyos, tojtzqi'n teju'ya tb'is nk'u'je', ¡mya ewaj nchin jiq'chana'ye' twitza!¹⁰Inxi'x lipan wanmiye', ex mixti'tl wipumale', ¡exqe' nche kub' sjumjixju' nwitze'!¹¹Min nche oklq'eju' wamiwe' kyetoq qtene' kyuk'i'l exqe' nwitze'le' nk'etze', tu'n tpaju' tx'a'k wi'je'.¹²Aye' kyajb'il tu'n nkub' kyb'yo'ne', inkub' kyq'o'n xpatxab' toj nb'eye'; exqe' kyajb'il tu'n kyxitun wi'je', nche yolin tu'n nb'o'lje' kyu'n tkyaqil kmuj nkyxima'n myab'a'n wi'je'.

¹³Atzunwe' nkub' nẍkyinsa'n wib'e', naku'j min nchin b'ine'; ex min njqo'n ntziye', naku'j me qine'.¹⁴Ikqinju'ye' kse'n jun xjal chkyin ex min jqet ttzi tu'n tklontetib'.¹⁵inchin ayone' ti'ja Nman Dyos, awta txi' tzaq'wente kye.¹⁶Naq o'kx in nqani'nju'ye' tu'n lalun che tze'n wi'je', tu'n lalun che b'itzan b'itz te kanb'ab'l aj nkub' tz'aqe'.

¹⁷Axxi'x, naqch'inxtl nkub' tz'aqe'; mixjun nq'jen junkmuju' k'ixk'oj wi'je'.¹⁸¡Kjawitz npa'nju'ye' wile', qu'n matxi' tzaj nb'ise' tu'n tpaj!¹⁹Matxi' che chmetju' wajq'oje; nimqe'ju' ntx'a'lti'j kyk'u'j wi'je' ex mixti' wile' kye.²⁰Myab'a'nju' tu'me'l t-xel nkyq'o'n weye' tu'nju' b'a'n nb'incha'ne' kye; qu'n nche okmiltz'uj wi'je' tu'nju' lepchqinkye' ti'ju' b'a'n.

²¹Nman Dyos, ¡lalun chin kyej tq'o'na njunale'! Taye, ¡lalun tz'el tpa'ntib'a wi'je'!²²Nman Dyos ex klol weye', ¡lwix ku'tzaja onilweye'!, chiju' b'itzal. Naqch'i'n toju' qchwinqlal¹Ojetoq ntziyaye' tu'n wanq'ine' b'a'n, tu'n lalun chin b'inchan ile' tu'n waq'e', ex tu'n njk'unte ntziye' kwitzju' b'inchal myab'a'n.²Ex oknq'o'n wib'e' me: mixtoqti' nchin yoline'. ¡Mixtoqpe'ti'x nchin yoline' ti'ju' b'a'n! Atzu'n nk'ixk'oje' xitoq tichin;³¡Inxi'xtoq q'aq'lixju' wanmiye' ttzi nk'u'je'! ex kub' nximane' qa q'aq' ati woje', nmatzuntze' tuk'i'l tq'ojq'ojel nwi'ye' kuw:

⁴Taye, yek'untza weye' ja chin pomela' b'aje' ex jte' ab'q'i chin anq'ile'; tu'n tkane toj nwitze' qa naqch'i'n toju' nchwinqlale'⁵Noq ch'i'n toju' nchwinqlale' saj tq'o'na; mixti'x tz'oka' twitza. ¡Kykyaqil xjal noq jun kmuj nche ten, kse'n jun jiq'cha'n!⁶¡Kykyaqil xjal nche ik' twitz tx'otx' kse'n jun leku'n! Mixti'x tajb'en qama kub' tchmo'n txqan tq'inumal, qu'n min b'i'n tu'n alkye kjelten tajaw.⁷Qu'mtzun Nman Dyos, ¿Titi'tzun kb'el nyo'ne'? ¡Anatzu' q'uqla'we' nk'u'j ti'ja!⁸Chin tkloma te tkyaqilju' wile'; lalun taja tu'n kyxmayinju' xnak wi'je'.

⁹Matz'oknq'o'n wib'e' me ex min ẍin yoline', qu'n aya b'inchalte tten.¹⁰Iq'imila yajb'il wib'aje'; matxi' chin kub'aje' tjaq'ju' yajb'il tu'n tq'ob'a.¹¹Inttzak'u'n teju'ya xjal ajtkub' ttz'e'ysa'na twitz tu'n tpaju' til, tkyaqilju' nlaq ti'j, inok kse'n quq ajtkub' t-xitu'na. ¡Kykyaqilju' xjal naq jun jiq'cha'nqe'!

¹²Nman Dyos, b'intzju'ya nna'j Dyose', ¡b'intzju'ya nkub'sb'ile'!, ¡lalun naq chin tzaj tka'yi'na ajtel ta'l nwitze'! Jun najchaq xjal qinwe' teya, naq ajb'etun, kse'nqe' ojtxi' nyajilb'ene'.¹³Iq'imil jun kmuj twitza wi'je', q'ontza anb'il tu'n ntzalaj jun kmuje', na'mxku' nkyime', chiju' b'itzal. Nchin tzalaje' tu'n nb'inchanteye' tajb'ila, Nman Dyos (Sal 70)¹Matz'ok qe nk'u'je' ti'j Qman Dyos, ex tzaj tb'i'nju' tq'ojq'ojel nwi'ye' tej nkub'sane' te;²machinjatz tiq'i'ne' toju' jul te kamik, machin tkole' tu'n lalun chinx mulq'aje' toj sob'on. Machin kub'twab'a'ne' tib'aj pik; machin tkuwsa'ye' toj nb'eye'.³Makub' tq'o'n ak'a'j b'itz toj ntziye', jun b'itz te ajwalb'ilte Qman Dyos. Nim xjal eb'jaw lab'ti tej kyka'yinte ja'lu ex okqe kyk'u'j ti'j Qman Dyos.⁴¡Tzalajb'ilte' teju' xjal q'uqlok tk'u'j ti'j Qman Dyos ex min ntmujb'a'ntib' kyuk'i'lju' pi'sqe' twitz Qman Dyos ex kyuk'i'lju' nche k'ulun kywitz txqantl dyos!

⁵Taye, Nman Dyos, nimte' ti'xti' tb'anilqexi'x matxi' che tb'inchaya nimju' t-xtalb'ila qib'aje'. ¡Mixti' juntl kse'n aya! Naqwit b'ajx npakb'a'ne' ex tu'n nyoline' kyi'j, layxlo b'aj nchik'b'anteye' tkyaqil.

⁶Min ntzalajta kyi'ju' chojb'il ex kyi'ju' oyaj twitz awal k'ok'e'kywitz; ex b'ajx tzaja' tqani'na jun chojb'il k'ok'sb'il e'oyaj tu'n tnajset il.
Mape' che tjaqju'ya nẍkyine' tu'n nb'inteye' tyola.⁷Qu'mtzun oje nmaye': Luqine' lu, kse'nx tz'ib'a'n toju' tu'jil nyolin wi'je'. Nchije'.⁸Inchin tzalajwe' tu'n nb'inchanteye' tajb'ila Nman Dyos; ¡majx na'nqe'ju' t-xnaq'tzb'ila wu'ne'!⁹Oje txinma'ne' kywitzku' ttanama nim kyajlal qa aya tz'aqlixi'x. ¡Nman Dyos, ojtzqi'n tu'na minti' ẍin kyej numeye'!¹⁰Min xkub' njpu'ne' kolb'il tz'aqlixi'x tu'na; matxi' txinma'ne' qa in japun tyola ex ati kolb'il tu'na. B'ajx kub'a' wewana'ye' tk'u'jlalila exju' tyola ax, kywitzju' ttanama nim kyajlal.

¹¹Atzunta Nman Dyos, ¡lalun txi' tewa'n twitza weye'! ¡Chin tkloma tu'nju' tk'u'jlalila ex tu'nju' tyola ax!¹²Matxi'na' chin ik'xi'ye' kyoj txqan yajb'il layxpena' b'ent kyajlet wu'ne'. Matxi' chin kub'jitz'liye' tu'nxju' wile'; ¡expe' matxi' che naju' nwitze'! Nimxi'x kyajlalju' wile' kywitzju' t-xya'mal nwi'ye', expe' matxi' chin kub' numje'.

¹³Najsama Nman Dyos, ¡kuttzaja kolpilweye'! Taye, ¡Lwix kuttzaja onilweye'!¹⁴¡Che kub'xwit ch'ixwi ex che kub'xwit oq ju' kyajb'il tu'n nb'o'lje' kyu'n! ¡Che kub'xwit oq toj kych'ixaw ju' kyajb'il tu'n nb'o'lje' kyu'n!¹⁵¡Che kub'xwit oqju' nche xmayin wi'je' toj kych'ixaw!¹⁶Aye'tzu'n nche jyon ti'ja che tzalajxwit; exqe'ju' nche tzalaj ti'ju' kolb'il tu'na kymaxwit kukxju': ¡Nim toklen Qman Dyos! Chechiwt.

¹⁷Lalun tzik'nna'le' tu'na, Nman Dyos qu'n prowqine' ex nchin b'isune'. A na'ta onilweye' ex klol weye'; ¡Lwix kuttzaja, Nman Dyos!, Chiju' b'itzal. Tna'j Dyos jun yab'¹Tzalajb'ilte' teju' nximan kyi'ju' prow ex mixti' kyipumal, qu'n kkletel tu'n Qman Dyos toju' tq'ijlalil ch'uẍ.²Kxq'uqinjtzel tu'n Qman Dyos, kxe'l tq'o'n tchwinqlala ex ktzalajel twitz tx'otx' tu'n, ex lay kyej ttzaqpi'n toj kyq'ob'ju' tajq'oj.³Ktzajel tq'o'n Qman Dyos tipumal toj k'ixk'oj twitz kuẍb'il; ¡kb'anixel tu'n toju' yab'il!

⁴Oje nmaye' ikjalu: Nman Dyos, q'aq'antz tk'u'ja wi'je'; chin tq'anama, b'a'nqa matxi' chin b'inchan ile' twitza. Nchije'⁵In txkonjtz toj nwi'ye' kyu'n wajq'oje, inkyma'n: ¿Jtojlo kyim ex tu'n tik' tna'l tejumajx? Chechij.⁶Mya tu'n tkyaqil kyk'u'j nche ula' nelweye'; ex noq k'u'jla'nju' kq'oj kyu'n, ajtzun kyex toj b'e nche yolintzuntz wi'je'.⁷Nb'aj kyb'u'yi'n kyib'ju' ntx'a'lti'j kyk'u'j wi'je' tu'n kyolin; inkyma'n qa tu'n tpaj wile' nchin yajta'ye',⁸ex inkyma'n: Tu'nte tajaw ilju' tyab'il; matxi' kub' twitz kuẍb'il ex lay jawe'tl. Chechij.⁹Naqpena' wamiwe' q'uqlitoq nk'u'je' ti'j, aju' ntoq wan wuk'i'le', matxi' tz'ok miltz'uj wi'je'.¹⁰Atzunta Nman Dyos, q'aq'antz tk'u'ja wi'je'; chin tiq'i'nktza twitz kuẍb'il, tu'n nq'onte tu'me'l t-xele' kye.¹¹Kkaneb'eltzuntz toj nwitze' qa ntzalaja wi'je': qa min xtaja tu'n tkub' wi'je' kyu'n wajq'oje.¹²Tu'nju' nchin anq'ine' b'a'n twitza, chin ttzyuma tu'n tq'ob'a, chin tq'o'nku'ya twitza tejumajx.

¹³¡Nimanjtzxwitju' Qman Dyos janche k'uluna' Israel, ja'lo ex tejumajx! ¡Ikxwitju'!, Chiju' b'itzal. Tkab' u'j (E' b'itz 42—72) Ti'j Dyos q'uqla'we' nk'u'j¹Nman Dyos, in njyo'na, ikyqinju'ye' kse'n jun msat nk'o'k'on ex njyon tk'wa' a'.²Nchin nelb'aje' ti'ja Dyos, tajaw chwinqlal. ¿Jtojtzunlo chinx junmajtle' twitza Nman Dyos?³Min nchin wane' tu'n tpaj nchin oq'e' q'ijtl ex qonik'an, aye'tzunkye' xjal jachq'al ntzaj kyqani'n weye': ¿Jatzunta' Tdyosa? Chechij.

⁴Ajtkub' nximane' tkyaqilju' ti'xti' lu, majx noktchib'l ti'nk'u'je'. Ajttzaj nna'ne' tej ntoq chinxe' kyuk'i'l xjal, intoq che'x wiq'i'ne' toj tja Qman Dyos tuk'i'l sich' te tzalajb'il ex aq'b'il chjonte. ¡Juntoq tzalajb'il tb'anilxi'x!

⁵¿Tiqu'ntzun chin b'ela' numje'?¿Tiqu'ntzun kb'ajxe'la' nk'u'je'?Matxi'na' tz'okqewe' nk'u'j ti'ja Nman Dyos,chin b'itzale' teya kukxju'.¡Tena'ta nchin k'uluna'ye' ex aya klol weye'!

⁶Inxi'x ch'yon wanmiye'. Qu'mtzun nxi'x chin ximane' ti'ja, tzmax toj tx'otx' jata' nin a' Jordan, ex tzmax ja ta'qe' witz Ermon ex Misar.⁷Nxi'x jukyin a' ntzaj twi' xaq ajtkb'u'l tzmax t-xexi'; aye' tnimal t-spinpujal a' ntzaj tq'o'na matxi' che ik' wib'aje'.

⁸Inchin tzajtk'u'jla'ne' Qman Dyos te q'ijtl, tetzun qonik'an min nchin q'jene' tu'n nb'itzane' ex tu'n nk'ulune' twitzju' Dyos tajaw nchwinqlale'.⁹Inxi' nma'ne' te Dyos, ju' klol weye': ¿Titiqu'n ẍin kyeja' ttzaqpi'na? ¿Titiqu'n ati tu'n nb'ete' toj b'is ex toj yajb'il kyu'n wajq'oje? Nchije' te.¹⁰Majx inexch'yon toj nwinqile' tu'nju' nchinok ik'le'ne' kyu'n wajq'oje qu'n tkyaqil q'ij ntzaj kyma'n weye': ¿Jatzunta'ju' Tdyosa? Chechij.

¹¹¿Titiqu'n chin kb'ela' numje'?¿Titiqu'n kb'ajxe'la' nk'u'je'?Matxi'na' tz'okqewe' nk'u'j ti'j Qman Dyos,kchin b'itzale' te kukxju'¡Tena'te nchin k'uluna'ye' ex a klol weye'! Chiju' b'itzal.¹Nman Dyos, b'inchama tnik'alilti'j weye'; ¡Chin tkloma kyeju' nche niman kye txqantl dyos! ¡Chin tkloma toj ttziju' chalyol ex teju' b'inchal myab'a'n,²qu'n teya nchin k'uluna'ye' ex aya klol weye'! ¿Titiqu'n ẍin ela' tik'u'na? ¿Titiqu'n ati tu'n ntene' toj b'is ex toj yajb'il kyu'n wajq'oje?³Q'ontzju'ya t-spik'umala exju' tyola ax, tu'ntzun woklpeye' kyi'j tu'n npone' twi' witz xjan, ja najla'ya.⁴Kchin pomiltzuntze' twitzju' q'olb'eb'l teya Nman Dyos, atzuntzu' chin b'itzala'ye' teya tuk'i'l tq'ojq'ojel chnab' arpa, a na'ta Nman Dyos, intzalajsanweye'

⁵¿Titiqu'n kchin b'ela' numje'? ¿Titiqu'n kb'ajxe'la' nk'u'je'? Matxi'na' tz'okqewe' nk'u'j ti'ja Nman Dyos, chin b'itzale' teya kukxju' ¡Tena'ta nchin k'uluna'ye' ex aya klol weye'! Chiju' b'itzal. Na'j Dyos qanb'il o'nb'il te Dyos¹Nman Dyos, oje qb'iye' tu'nku' qẍkyine', kyej q'ma'n qeye' kyu'n qmane' aju' tb'inchaya kye, kyoju' tq'ijlalil ojtxi':²aku'ya ex xla'jankyeju' xjal nche niman kye txqantl dyos, kub' ttz'e'ysa'na kwitzju' nimaqtnam ex e'kub' tq'o'nju'ya qmane' toju' kytx'otx'.³Qu'n mya tu'n kyq'ob' ex mya tu'n kyk'uẍtx'e'nb'il; ẍe kanb'ana' myana' kyu'nkye xkanb'eta'ju' tx'otx'. ¡Tu'nate tq'ob'ju'ya, tu'n tipumala! ¡Ulku'ya tuk'i'l tajwalila, qu'n intoq che tk'u'jla'na!

⁴¡Nman Dyos! ¡Nnimaqkawil! Tu'na e'kanb'ana'ju' ttanama;⁵tu'na nkub'a' kyi'ju' qajq'oje' qu'ne'; ¡toj tb'iya nche b'aju' nche oktzaqpaj qi'je' qu'ne'!⁶Qu'n layna' tz'okqewe' nk'u'j ti'ju' nsmaje', ex lay chin kanb'ane' tu'n nk'uẍtx'e'nb'ile';⁷tu'nateju'ya xkub'a' kyi'ju' qajq'oje' qu'ne', tu'na sela' kych'ixawju' nche el ik'onqe'ye'⁸¡Qo tzalajele' kukxju' ti'ja Nman Dyos, kjawil qajwali'na tkyaqil q'ij!

⁹Naqtzun aju' matxi' qo' eltik'o'na; matxi' tz'el qch'ixawe' tu'na. Minti' nxi'tla kyuk'i'lju' qxjale' te q'oj.¹⁰Maqo kub' oqe' tu'na kywitzju' qajq'oje'; In qo alq'anjtze' kyu'nju' nche el ik'unqeye', inxikyiq'i'n tkyaqilju' kyajb'il.¹¹Maqo'x tq'o'na naku'jxi'xtej rit aj txi' toj b'i'yb'il; maqo'x t-sputi'na kyxolju' xjal nche niman kye txqantl dyos;¹²naqxi'x xxi' t-suqu'na ttanama, mixti'te qoklene' toj twitza.¹³Mataja tu'n qb'aj yasune'; nqo' el ik'u'ne' kyu'nju' najlqe' nqayin qk'etze' ex inel qch'ixawe' kyu'n.¹⁴Mataja tu'n qb'aj xmayine' kyu'n nche niman kye txqantl dyos; ajkytzaj ka'yin qeye', nxi' kyukcha'n kywi' te xmayb'ilqeye'.¹⁵Tzipin wele' tu'n nch'ixawe'; tkyaqil q'ij inel nch'ixawe'¹⁶tu'n i'lb'ilweye' tu'n wajq'oje nchin noktik'le'ne' ex nchin tyasu'ne'.

¹⁷Tkyaqilju' saj qi'je' lu, mya tu'nwtju' matzik'tna'la qu'ne'. ¡B'ajx qoela' txalpujqe' ti'ju' tyola kyejni b'entti'j!¹⁸B'ajx kub'a' qxima'ne' tu'n tkyej qtzaqpi'na ex b'ajx kyeja' qtzaqpi'nju'ye' tb'eyila.¹⁹Extzun nqo yajtijtle' tu'na kyoj kyjul xo'j. ¡Matzaj tq'o'na t-xlekumil kamik qib'aje'!²⁰Nman Dyos, naqwit matzik'tna'la qu'ne' ex ma'wt qo k'ulune' twitz juntl dyos min ojtzqi'n,²¹ma'wtlo tila, qu'n tojtzqi'na'ta tkyaqilju' toj tanmi xjal.²²Naqpena' tu'nela inelje qi'je' tu'n qkub' b'yo'ne'; nqo senjtze' kse'nqe' rit nche'x iq'i'n toj b'i'yb'il.

²³¿Nman Dyos, titiqu'n nnik'a' wtana? ¡Na'ntztib'a, ex we'ktza! ¡Lalun qo' eltik'o'na tejumajx!²⁴¿Titiqu'ntzun in xa' tewa'n twitza qeye'? ¿Titiqu'ntzun nnik'a' qna'le' tu'na, extzun luqo'ye' inxi'x qoyajtiye'?²⁵Matxi' kub'qi'je' ex matxi' tz'el qch'ixawe', inqo' jwonjtze' twitz tx'otx'.²⁶¡Iq'i'nktz tib'a kuttzaja onilqeye' qo' tkloma, qu'n nimta tk'u'jlalil!, Chiju' b'itzal. Tnej yol te tmjeb'le'n nimaqkawil¹Nim yol tb'anilqexi'x nche b'ju'l toj nwi'ye'; ik waq'ju'ye' kse'n ttz'ib'il jun b'a'n ajtz'ib'al. ¡Kxe'l nma'ne' nyole' tb'anilqexi'x teju' nimaqkawil!

²¡O'kxta tb'anilxi'x kyxol kykyaqil ichan! ¡O'kx yol tb'anilqexi'x nche etz toj ttziya tma'na! Qu'mtzun xky'i'wlanjtza'ya tu'n Dyos tejumajx.³¡K'lonka tk'uẍtx'e'nb'ila tk'u'ja, aya min nxob'a! ¡Qu'n a tachb'ilju'ya inxi'x qoptz'aj!

⁴Iq'i'nktz tib'a, kawina, tu'n tb'inchetju' ax exju' tnik'alilti'j kyeju' min nkynima'n kyib'.
¡B'inchamqe'ya nimaq ti'xti' tb'anilqexi'x tu'n tb'a'nq'ob'a!⁵Kche kb'el tz'aqju' tnam t-xe tqana, nimaqkawil; ch'ut qe'xi'xju' tal t-smaja kche pomel xuyli toj kyk'u'ju' tajq'oja.

⁶Te junmajxte' tkawb'ila, Nman Dyos, jun kawb'il tnik'alti'j.⁷In tk'u'jla'nju'ya b'a'n ex inel tik'u'na myab'a'n. Qu'mtzun jaw sk'o'na tu'n Qman Dyos, nimxi'x tzalajb'il tzaj tq'o'n teya kyekywitzju' tuk'i'la.⁸Inche k'ok'b'ixu' t-xb'aluna tu'n mir, alowe ex kanel; injaw tzalajsa'na tu'n kyq'ojq'ojel chnab' tzintzin kyoju' tja nimaqkawb'il uk'sa'n kyu'n tb'aq elepant.⁹Ate' kymyal nimaqkawil kyxolju' qya ate' toj tjaya te kawb'il; atzu'n t-xu'jila toj tb'a'nq'ob'ju' tq'uqb'ila ta', txoli'n ti'ju' t-xb'alun tu'n q'anpwaq tb'anilxi'x.

¹⁰B'intza tal nmyal; q'onk twi'ya ti'ju' kxe'l nma'ne' teya: Tzik'x kyna'lju' kyb'aje' toj kyjaye' tu'na exqe' twnaqila,¹¹qu'n intzalaju' nimaqkawil ti'ju' tilb'ilala tb'anilxi'x; nimana te qu'n ate tajawju'ya.¹²Tzulu' tmyal nimaqkawil te Tiro twitza, aye'ju' nimaq q'inun toju' tnam kyuk'i'l oyaj te ninb'ilteya.

¹³¡Luju' tmyal nimaqkawil tz'okpun tb'anilxi'x! ¡Chmo'n t-xb'alun smo'n tk'i' q'anpwaq!¹⁴Tz'okpun iq'i'n twitz nimaqkawil tuk'i'l t-xb'alun nqoptz'aj, lepchqe'xju' txin ti'j, aye'ju' tuk'i'l q'poj qe'.¹⁵Inche b'et tuk'i'l nim tzalajb'il; nche tzalaj ljo'n kyb'jo'kx toju' tja nimaqkawil.

¹⁶Aye'tzu'n tk'wala, nimaqkawil kche okyex qe toj kyq'uqb'ilju' tyajilb'ena, che okyel kawil toj tkyaqilju' tnam.¹⁷Knb'incha'ye' tu'n ttzaj na'nju' tb'iya toj junjun ak'a'j tyajajil, ex tu'n tjaw nima'na kukxju' kyu'n tnam, chiju' b'itzal. Ati Qman Dyos quk'i'l¹Ate Qman Dyos qipumal ex kolb'ilqe; lwiy nqo tklo'n toj b'is.²Qu'mtzun mixti' tu'n qxob', maskye makub' xitju' tx'otx', b'a'n qama che'x mulq'aju' witz t-xe ninnjab',³b'a'nqa ntx'u'jinju' ninnjab', ex nche tinunju' ttolob', maskye mache yukchiju' witz tu'n ttx'u'jil.

⁴Tzalajb'ilxi'x teju' ninttanam Qman Dyos tu'n jun nin a' kyuk'i'l tq'ob', ju' xjanxi'x kyxolju' nimaqttanam Qman Dyos nim toklen tib'aj tkyaqil.⁵Atite Qman Dyos toj, ex lay kub' xitj; k'onil ti'j ajttzaj t-xe kya'j.⁶Inche ẍch'inju' nimaqtnam tu'n kyxob'el, nche lu'lunju' kawb'il, inkub' xitju' tx'otx' aj txi' kyb'i'n tq'ojq'ojel twi' Dyos.

⁷¡Atite Qman Dyos nimtipumal quk'i'l!¡Ate kolb'ilqeju' Dyos ja k'uluna' Jakob'!

⁸kukytzaje' ka'yilteju' ti'xti' te lab'te'nxi'x xtb'incha Qman Dyos twitz tx'otx':⁹matxi' b'aj ttxa'nju' q'oj tu'n, toj tkyaqil twitz tx'otx'; matxi' che b'aj kub'ttoqi'nju' smaj, matxi' che b'aj kub'ttoqi'nju' ch'ut, ¡Matxi' tz'oktq'o'n kyq'aq'alju' karwaj te q'oj!¹⁰Chi Qman Dyos kye nimaqtnam: ¡Kytzaqpinkju'ye' q'oj! ¡Tz'elx kynik'e' weye' qa ayine' Dyos! ¡Qu'n ayine' atinqin kyib'aj nimaqtnam! ¡Ayine' atinqin tib'aj tkyaqil twitz tx'otx'! Chi Dyos.

¹¹¡Atite Qman Dyos nimtipumal quk'i'l!¡Ate kolb'ilqeju' Dyos ja k'uluna' Jakob'!, Chiju' b'itzal. A Qman Dyos nimaqkawil tib'aj tkyaqil twitz tx'otx'¹¡Kypoq'cham toj kyq'ob'e' tnam kykyaqile'! ¡Kynimanktze' Qman Dyos tuk'i'l tq'ojq'ojel kywi'ye' te tzalajb'il!²Qu'n xob'le'nte' Qman Dyos ati toj kya'j; ate nimaqkawil nim toklen tib'aj tkyaqil twitz tx'otx'.³Mache kub't-xitu'n b'o's tnam ex nimaqtnam ex mache kub' tq'o'n tjaq' qkawb'il.⁴Majaw t-sk'o'nju' tx'otx' te qetzb'il, ex nqo tzalaj ayo' tyajajil Jakob' tu'nju' k'u'jla'nqo' tu'n Qman Dyos.

⁵¡Matxi' japunte Qman Dyos toj tq'uqb'il tuk'i'l sich' te tzalajb'il ex tq'ojq'ojel chun!⁶¡Che b'itzan qe'ye', che b'itzanqe' b'itze' te Qman Dyos! ¡Che b'itzan qe'ye' teju' nimaqkawil!⁷¡Kyb'itzanx jun kyb'itze' te Qman Dyos, qu'n ate nimaqkawil tib'aj tkyaqil twitz tx'otx'!⁸¡Ate Qman Dyos nimaqkawil kyib'aju' nimaqtnam! ¡Q'uqlite' Qman Dyos toj tkawb'il xjan!⁹In kymujb'a'nkyib'ju' ichan nimaq kyoklen kyoj nimaqtnam kyuk'i'lju' ttanam Tdyos Abraam,¹⁰qu'n te Qman Dyos qekye' nimaq kyoklen twitz tx'otx'. ¡Ate nkawin tib'aj tkyaqil! Chiju' b'itzal. Nim toklen Syon ttanam Qman Dyos¹¡Nimte Qman Dyos toklen! ¡O'kxte' Qman Dyos b'a'n tu'n tjaw qnima'n toju' ninttanam ex twi' witz xjan!

²¡Tb'anilxi'xju' witz Syon, tu'nju' nimin twe', ati toj tnayajkya'j!
¡A kytzalajb'il xjalju' toj tkyaqil twitz tx'otx'! ¡A ninttanam nimaqkawilju' nim toklen!

³Atite Qman Dyos kyoju' ja te kawb'il toj Jerusalen; matxi' tyek'utib' Qman Dyos kse'n jun kolb'il kuwsa'n.⁴Qu'n b'aj kyb'u'yi'n kyib'u' nimaqkawil ex junx kyb'ajtzaj tilj ti'j;⁵tetzunj kyka'yinteju' nintnam eb'jaw lab'ti, tzaj xob'il kyi'j ex e'kub' oq.⁶Majx oktchi kyi'j: intoq kxq'ipla'n kyib' tu'n k'ixk'oj, kse'n jun qya yo'lok tch'yon wnaq ti'j;⁷kse'n kyq'iq' ntzaj tjawetzq'ij, nche b'aj kub't-xitu'n b'ark te Tarsis.

⁸Matxi' qil kyu'nku' qwitz toj ninttanam Qman Dyos, ju' Dyos Manb'aj nimtipumal, kse'nxu' oje b'aj tzaj q'ma'n qe: ¡Kjel tkuwsa'nte Qman Dyos Jerusalen tejumajx!

⁹Nman Dyos, nqo' ximane' toju' tjaya ti'ju' tk'u'jlalila nimxi'x.¹⁰Nman Dyos, injaw nima'na toj tkyaqil twitz tx'otx' kse'nxu' toklen tb'iya. In kawina tojxi'x tu'me'l tuk'i'l tipumala.

¹¹¡Tzalajxwitu' witz Syon! ¡Che xlik'punxwitu' nimaqtnam toj Juda tu'n kytzalajb'il tu'nju' tkawb'ila tz'aqlixi'x!

¹²Che b'ete' ti'jile tnam Syon ex kyajlanxe' jte' kyb'aju' ja nimaq kywe' te ka'yb'il;¹³kyka'yinxi'xpe'ju'ye' ninttapiyil exqe' tja ninkawb'il, tu'ntzun txi' kyoli'ne' kyeju' che b'ju'l itz'j yajxi'tl¹⁴qa ikyte Qman Dyosju' tejumajx. ¡Ate ẍaqlulqe tejumajx! Chiju' b'itzal. Mya q'uqb'ank'u'jalte' pwaq¹Kyb'intzpe'ju'ye' lu ex kyq'onk kywi'ye' ti'j, e'tnam ex kykyaqile' najlqe'ye' toj tkyaqil twitz tx'otx',²nimaqxjal exqe' xjal mixti' b'a'n kyu'n, e' q'inun ex e'prow.³Kchin yolile' tuk'i'l nab'l che kxe'lnchik'b'a'ne' nimaq nab'l;⁴k'okyel nq'o'n nwi'ye' kyi'ju' q'unb'en tuk'i'l nab'l,
ex kxe'l nchik'b'a'ne' tkub' toj nnab'le' tuk'i'l chnab' arpa.

⁵¿Titi' chin xob'ila'ye' ajkyul kanunju' tq'ijlalil ch'uẍ, ajtok txoli'n wi'je' tu'nju' taq'wix nkyb'incha'n wajq'oje?⁶Q'uqlokkye kyk'u'j ti'ju' kyq'inumal in kla'ji'n kyib' ti'j tkyaqilu' ati kye,⁷mixna' a'lo'te' jun okwit kletil tu'nxtib' exwit tu'n txi' tchjo'n te Qman Dyos tu'n tkletu' tchwinqlal.⁸¡Mixti'te jun xjal okwit kb'entel tlq'et tchwinqlal tu'n tpwaq,⁹tu'nwt tanq'in tejumajx ex tu'nwt tklet teju' kamik!¹⁰B'i'na' qu'n qa qkyaqil qokyimel, b'a'ntzun ati tnab'l mujqa xnak, atzu'n kyq'inumal kjelten te juntl.¹¹B'a'n qama kyej kyq'o'n kyb'i ti'ju' kytx'otx'; toj muqb'il che tenb'ela'kye' ¡Atzuntzu' che tenb'ela' tejumajx!.

¹²Lay tz'anq'inte' xjal tejumajx, b'a'nqa nimaq q'inun;ikyx nkyima' kse'nqe' txkup.

¹³Ikytzun nche b'aja' xjalju' inok qe kyk'u'j kyi'jx; exqe' njaw kynima'n kyib' kyib'xkyib'.¹⁴Naku'j ritqe', a kamik k'iklel kyi'j ex xi'kyxitiq'i'n toj muqb'il. Ajtzun ttzaj t-xe kya'j, Che kanb'alju' b'a'n xjal kyib'aj; chab'a' kb'ajel kyipumal ex aju' muqb'il k'okyel te kyja.¹⁵Atzunte Qman Dyos kklol weye' te tipumal kamik, qu'n chin xe'l tiq'i'ne' tuk'i'l.

¹⁶Lalun tzaj tb'isa qa a'lo jun majaw q'inumax exqa matxi' jawtb'incha'n tja achb'ajilxi'x,¹⁷qu'n mixti'te kxe'l tiq'i'n ajtkyim, ex lay che'x tiq'i'n achb'il ati te toj muqb'il.¹⁸Maskye ma'xi'x tz'achin twitz tx'otx', exqa nima'nxi'x kyu'n xjal tu'nju' tq'inumal,¹⁹kpomilte' tq'ijlalil tu'n tkyim, ex lay til jumajtlu' spik'un.

²⁰Lay tz'anq'inte' xjal tejumajx, b'a'nqa nimaq q'inun;ikx nkyima' kse'nqe' txkup. Chiju' b'itzal.Ate Qman Dyos jun ajkawil tz'aqli¹Oje yolinte Qman Dyos nim toklen kyib'aj txqantl dyos; oje txokon kyeju' xjal najlqe' twitz tx'otx' toj tjawetzq'ij ex tkub'exq'ij.²In qoptz'ajte' Qman Dyos tzmax Syon, ju' nintnam tb'anilxi'x ka'yin.³Tzulte' Qman Dyos, mya toj ewaj: nejli jun q'aq' xitul twitz; atzu'n ti'jile jun nin kyq'iq' tk'i' q'ankyaq.⁴Ntxokon Qman Dyos tzmax jawl teju' kya'j ex te tx'otx' tu'n kyka'yinteju' xitb'il tib'aju' ttanam:

⁵Kyb'uyinqe'tze' kykyaqilju' njapun nyole' kyu'n, aye' oje kyej b'entti'j kyyol wuk'i'le' tej tkub' kyq'o'n chojb'il nwitze'. Chij⁶Atzu'n kya'j nyek'u'nte qa a Qman Dyos ajkawil tz'aqli.

⁷B'intza Israel, ntanam; tkyaqilju' ti'xti' kb'ajxel nma'ne' tplaja. ¡Ayinwe' Dyos Manb'aj!⁸Min ntzak'u'na tu'n kpaju' chojb'il ex chojb'il k'ok'sb'il nche kub' tq'o'na weye' kukxju'.⁹Min nche'x nqanine' tal tman twakyixa ex tman tchib'a ate' toj tch'laja,¹⁰qu'n weqewe' tkyaqilju' tojk'ul txkup, exqe' ate'qe' kywi'witz;¹¹Weqe'weye' pich' ate' toj nimaq k'ul ex kykyaqilju' txkup ate' toj kojb'il.¹²Naqwit nchin q'aq'ane', lay txi' nma'nwe' teya, qu'n wewe' tx'otx' ex tkyaqilju' ati twitz.¹³¿Ma ntzun nk'a'cha'nwe' wib' ti'j tchib'jil tman wakx, mujqa in nk'wa'ne' tchk'el tman chib'?¹⁴¡Aye'wt toyaju'ya aye' tb'itza te aq'b'il chjonte weye', ayine' Dyos Manb'aj; japunxju' tyola tzaj ttziya'na weye'!¹⁵Chin ttxkoma kse'n atiya toj b'is ex yajb'il; knkla'ya, kchin jawil tnima'ntzuntza. Chi Qman Dyos.

¹⁶Atzu'n teju' xjal b'inchal myab'a'n, chi Qman Dyos: ¿Titi' toklena tu'n tyolina kyi'ju' nkawb'ile' ex tu'n tyolina ti'ju' yol kyejni b'entti'j wu'ne',¹⁷qu'n mina'jon ntq'a' kawi tib'a weye' ex naq inik' tolju' nyole' ti'twi'ya?¹⁸Majx kye tilwiju' eleq' tu'na; ¡kyexi'x kytene' kyuk'i'lju' ajpajil!¹⁹Minti' ntjk'u'n taq'a, kyi'ju' xlab'yol ex chajyolil.²⁰Injaw ti'n yola ti'j ttzika mujqa titz'ina; ¡ti'jku' ttzika mujqa titz'ina nxa' tlanu'n tyola!²¹Matxi' tb'inchaya tkyaqil ja'lu, ex mixti'xi' txi' nma'ne' teya; toj tnab'la qa junqinxe' tuk'i'la. Kxel nchik'b'a'nwe' tilas tplajku'ya ¡kb'el ntz'e'ysa'n twitza ja'lo!

²²Kyb'intzju'ye' lu, aye'ye' in ik'tna'l Dyos kyu'ne', qu'n jaku' o'kx aj woktene' pẍulkyeye' ex mix-a'lo' jun tzul klolkyeye':²³alkyete nq'on chjonte weye', inchin tnima'ne'. ¡In nklo'nweju'ye' ati toj nb'eye'! Chi Qman Dyos, chiju' b'itzal. Q'aq'antz tk'u'ja wi'je' Nman Dyos¹Nman Dyos, q'aq'antz tk'u'ja wi'je'; najsanku'ya wile', qu'n nimta tk'u'jlalil.²¡Chin ttxjoma te tkyaqilju' nb'inchb'aje' myab'a'n! ¡Chin t-ẍtilsama te tkyaqilju' wile'!³In kane toj nwitze' qa myab'a'nju' nb'inchb'aje' twitza; minti' in ik'tna'lju' wile' wu'ne'.⁴Matxi'xi'x chin b'inchan ile' twitza, extzun twitzku'ya, myab'a'n xnb'inchaye', aku'xi'xju' nel tik'u'na. Qu'mtzun tu'me'lte' tz'e'ysb'il nwitze' tu'na; lay tz'el wik'u'ne' se'n ẍinoka'tq'ona toj xjel.

⁵Axxi'x, aj ilqinwe' atxi'x witz'jlene'; aj ilqine' atxi'xj tej toklen iqa'n nwi'ye' tu'n ntxuye'.⁶Axxi'x, intk'u'jla'nta' xjal ax yolin, ex makub' tq'o'na nab'l toj wanmiye'.⁷Chin t-ẍtilsama tu'n k'ul isopo, tu'n nkyeje' ẍnu'l; chin ttxjoma, tu'n nkyeje' saqxi'x kyetwitz txun che'w.⁸Chin ttzalajsama b'a'nxi'x; q'ontz jumajtlju'ya tzalajb'il weye', maskye matxi' kub' ttz'e'ysa'na nwitze'.⁹Laq'b'amilju'ya wile' twitza ex najsanku'ya nb'inchb'aje' taq'wix.

¹⁰Nman Dyos, ¡ẍtilsama wanmiye'!, ¡chin tch'exb'ema tu'n wokye' tnik'alti'j!¹¹Lalun chin nel tlaq'b'a'na twitza ex lalun tz'el tiq'i'nju'ya T-xewa woje'.¹²Chin ttzalajsamtla tu'n tzalajb'il ti'ju' kolb'il tu'na; q'onku'ya toj wanmiye' tu'n wokslane' b'a'n teya,¹³tu'ntzun txi' nyek'u'ne' tb'eyila kyeju' min nche okslan teya tu'n tanjtzkyi'ju' aj il tk'etza.¹⁴Nman Dyos klol weye', chin tkloma tu'n lan chin b'yon xjale', kxe'l npakb'a'ntzuntze' tuk'i'l b'itz qa tz'aqliya.

¹⁵Nman Dyos, jqomju'ya ntziye', tu'ntzun tjaw nnima'na kyu'n b'itz.¹⁶Myana'teju'ya tajb'il chojb'il ex oyaj tz'e'ysa'n; ma'wtlo txi' nq'o'nwe' teya, naqwit intzalaja ti'j.¹⁷Aye'kye chojb'ilju' b'a'n toj twitza, Nman Dyos, aju' tu'n ttzaj tb'is xjal tu'n tpaj til; ¡Nman Dyos, nin nnel tik'u'nteju'ya xjal matz'anjtzti'j tanmi!

¹⁸B'inchama b'a'n teju' tnam Syon, tu'nju' t-xtalb'ila; wab'a'nktz jumajtlju'ya nintapi ti'jele Jerusalen.¹⁹Ktzalajeltzuntza kyi'ju' chojb'il q'ma'n toj chaq'b'il, kyi'ju' oyaj ex kyi'ju' chojb'il k'ok'sb'il, che b'eltzun q'o'n qpoj tman wakxtz tchojb'il tib'aj q'olb'eb'l teya, chiju' b'itzal. Mixti'x tajb'en nkynima'n kyib'ju' b'inchal myab'a'n¹¡Nimaq b'inchal myab'a'n! ¿titiqu'n ntla'ji'na' tib'a tu'nju' taq'wixil xntb'inchaya teju' b'a'n ajb'el te Dyos?²O'kxtzu' nximana'ta tu'n tb'inchanteya myab'a'n; iky taq'ju'ya kse'n jun kuchil ati twitzte nmiltz'je.³Xi' nlaqja'ya ti'ju' taq'wixil, mya ti'jwitu' b'a'n, axi'x tajb'ilju'ya chajyolil twitzu' ax.

⁴Twi' chalyol, majx tjonku'ya tu'n t-xituna tu'n tyola;⁵Atzunte Dyos kb'el xitunteya tejumajx: k'elitz xla'ja'na tu'n toj tjaya; k'elil tiq'i'n tchwinqlala.

⁶Aye'tzu'n nche okslan te Dyos, kkyla' ja'lu ex ktzajel tchiylal kyi'j; che xmayiltzuntz ti'ju' xjal lu ex kkyma':⁷Kyka'yinxpe'ye' xjal min njyon kolb'il tuk'i'l Dyos; aju' q'uqlok tk'u'j kyi'j txqan tq'inumal ex matxi' nq'et ti'ju' myab'a'n. Chechilo⁸Ayintzunwe' ikqine' kse'n jun tze olib'o ẍq'ayun toj tja Qman Dyos; ¡k'okyel qewe' nk'u'j ti'ju' tk'u'jlalil kukxju'!

⁹Nman Dyos, chin q'ol chjonteye' teya kukxju', tu'nju' xtb'inchaya; chin ayole' ti'ja, kywitzku' tnik'alkyi'j. qu'n majx b'a'nta, chiju' b'itzal. Kypi'sil xjal (Sal 14)¹Nkyma'nju' xnak toj kynab'l qa mixti'te Dyos, matxi' che kub' tzpet kykyaqilx, taq'wixi'xju' kyb'inchb'aj ¡mixti'xte jun inwt b'inchan b'a'n!²Inka'yintz te Qman Dyos tzmajxtzu' toj kya'j kyib'aju' xjal; qa ati jun ati tnab'l, exqa ati jun njyon ti'j Qman Dyos.³Aye'tzunkye' xjal kykyaqilx matxi' che b'je'l txalpuj, kykyaqilx ẍekub' tzpet. ¡Mix-a'lo'x jun inwt b'inchan b'a'n! ¡Tk'i'xpe'wt jun!

⁴Mixti'x kynab'lju' b'inchal myab'a'n, ate'k walkyeju' ntaname', naku'j kywa mixpeti'x ntzaj kyna'n Qman Dyos⁵Kche lu'lulkye' tu'n xob'il, maskye mix-a'lo' nxixob'sankye, qu'n kb'ajel t-sputi'n Qman Dyos kyb'aqilju' ajq'oj. K'elel kych'ixaw, qu'n che elel ik'u'n tu'n Qman Dyos.

⁶¡Naqwit tzaju' kolb'ilte Israel twi'ju' witz Syon! Ajttzaqpinte Dyos ttanam, kche tzalajelju' tyajajil Jakob', tkyaqilju' tnam Israel, chiju' b'itzal Qanb'il o'nb'il te Qman Dyos¹¡Nman Dyos, chin tkloma tu'n tb'iya! ¡Chin tkloma tuk'i'l tipumala!²Nman Dyos b'intza nna'j Dyose', chin ttzaq'wetza,³qu'n matxi' jawkyi'nkyib' xjal nkynima'n kyib' wi'je', Kyajb'ilju' ajq'oj tx'u'j kywi' tu'n nkub' kyb'yo'ne'. ¡Min nche ximan ti'ja Dyos!

⁴Tu'npetzunju', oni'n qinwe' tu'n Dyos; ate Qman Dyos q'ol nchwinqlale'.⁵Ate Qman Dyos kb'inchalte tu'n tkub' tz'aqju' kyb'inchb'en wajq'oje kyib'ajx.
¡Xitunqeku'ya Nman Dyos, qu'n njapunta tyol! Che kxe'lnq'o'nwe' chojb'il teya tu'n tkyaqil nk'u'je', ex kjawil nnima'nju'ye' tb'iya, qu'n b'a'nxi'xta,⁷qu'n matxi' chin tkola toj tkyaqilju' yajb'ilweye' ex mawile' xkub' kyi'ju' wajq'oje. Tna'j Dyos jun xjal ljo'n toj tq'ij¹Nman Dyos, b'intzju'ya nna'j Dyose', lalun txi'tewa'n twitza ajnkub'sane' teya.²Chin tb'intza ex chin ttzaq'wetza; nchin kub'sane' teya toju' yajb'ilweye' Nchin lu'lune' noqx tu'n tq'ojq'ojel twi'ju' wajq'oje ex tu'n nche ẍch'inju' b'inchal myab'a'n.
Matxi' tz'ok nb'ise' kyu'n; nche oktzaqpaj wi'je' tuk'i'l kytx'u'jil.⁴Int'uẍjne wanmiye', ex matxi' tz'oktenju' tchiylal kamik wi'je'.⁵Matxi' tz'ok jun tchiylal wi'je' xob'ajilxi'x; ¡nchin lu'lune' tu'n xob'il!⁶Ex a inma'ne': Noqwit ikj ate' nxik'e' kse'nte paloms; jaku'wtlo chinx lipane' tu'n wojlane'.⁷Jaku' chinx lipane' najchaq, jaku' chin kyej tentzuntze' najal toj chq'ajlaj.⁸Jaku' ja'lo chinxe' ewal teju' tipumal kyq'iq' ex q'ankyaq. Nchije'.

⁹Xitunqe'ku'ya Nman Dyos, chuksanku'ya kyyol; qu'n o'kx q'oj ex ik'b'il nnok nka'yine',¹⁰inkytxoli'nkyib' ti'ju' nintnam q'ijtl ex qonik'an Ati il ex ik'b'il toju' tnam; ati sb'ub'l ex taq'wixil toj;¹¹nojniqe' t-xk'ichb'e tu'n taq'wixil ex sb'ub'l.

¹²Mya jun wajq'oje sok ik'len weye', qu'n ma'wtlo tzik'x wu'ne'; ex myaju' ntx'a'lti'j tk'u'j xjaw ti'ntib' wi'je', qu'n ma'wtlo chin kub' ewane' twitz.¹³¡Kuchaqa a pe'lota nwnaqila, kyexi'x ntene' tuk'i'la,¹⁴intoq qb'u'yi'n qib' tuk'i'la toj tja Dyos q'uqlixi'xtoq qk'u'j te qib' kyi'ju' qyol tej intoq qob'et kyxol xjal!

¹⁵¡Mixwitti' kynab'enju' wajq'oje ajtul kamik kyi'j! ¡Itz'qe'xwit ajkyb'ajx qoptz'aj toj jul! qu'n majx atiju' taq'wixil toj kyanmi.

¹⁶Ayintzunwe' kchin kub'sale' te Dyos; ate Qman Dyos kklol weye'.¹⁷Chin kub'sale' tuk'i'l oq'el prim, qale ex qonik'an ktzajel tb'i'ntzun tq'ojq'ojel nwi'tze'.¹⁸Kchin tkla'ye' kyoj q'oj; kkletel nchwinqlale' tu'n, b'a'nqa txqan kyb'etju' wajq'oje.

¹⁹Aku' Dyos nkawin tejumajx, ktzajel b'inweye' ex che kb'el tme'ssa'n, qu'n mixti'x nkych'exb'e'n kye'lu kychwinqlal ex mixti' tchi Dyos kye.²⁰In aq'pon kyq'ob' kyi'j kamiw; min njapun kyol tziya'n kyu'n.²¹Majxpetzun me's che yolin, atzu'n kynab'l o'kxtzu' toka' ti'j q'oj. Majx b'uninxi'xju' kyoj nnajb'en kyetwitz aseyt, extzun ikyqe'ju' kse'n k'uẍtx'e'nb'il jqu'n kywitzte.

²²Q'onkja tkyaqilju' nnik'xtu'na toj tq'ob' Qman Dyos, qu'n ate kwab'alteya b'a'nxi'x; lay taj tu'n tkub' tz'aqu' xjal b'a'n b'in te.

²³Nman Dyos, lay che kub' anq'in kyeju' b'yolxjal exqe' chalyol, laype' japun nik'janju' kychwinqlal; che kb'elex tz'aq tu'na toj muqb'il, ayintzunwe' q'uqlokwe' nk'u'j ti'ja. Chiju' b'itzal. Q'uqli nk'u'je' ti'j Dyos ex in nima'ne' tyol¹Nman Dyos, q'aq'antz tk'u'ja wi'je', ate'kye xjal ljo'n toj nq'ije' kyu'n; q'achq'alx nche q'ojin wi'je' ex nche okten yajul weye'.²Tkyaqil kmuj nchin jyonjtze' kyu'n wajq'oje nim kyb'aju' nche oktzaqpaj wi'je' tuk'i'l nimjtib'il.

³Qa nchin xob'e' inok qe nk'u'je' ti'ja.

⁴Q'uqli nk'u'je' ti'j Dyos ex in nnima'nju'ye' tyol;q'uqli nk'u'je' ti'j Dyos ex min chin xob'e'.¿Titi' k'okyel tb'incha'n xjal wi'je'?

⁵Tkyaqil kmuj nchin kyk'ixb'sa'ne' tu'n kyyol; o'kx nkyxima'ju' tu'n kyb'inchante taq'wixil wi'je'.⁶Inxi'x che jutzajla xq'uqilweye', tokkywitz wi'je'. ja chin okyela' yale' kyu'n tu'n nkub' kyb'yo'ne'.

⁷¿Ma oktzun che tzaqpajel toju' kyil? Nman Dyos, xitunqe'ku'ya tnam tu'n ttx'u'jila.⁸Q'i'na'ta tajlal tu'n jte'xi' maj chin kub' oqe'; ex aya inel sunte ta'l nwitze'.
¿Ma mixtzunti' tz'ib'a'n tu'na toju' tuja?⁹Che xe'l oqu' wajq'oje naqa xxi'nqanine' o'nb'il teya. B'i'nxi'xwe' wu'n qa ati Dyos wuk'i'le'.

¹⁰Q'uqliwe' nk'u'j ti'j Dyos ex njaw nnima'ne' tyol,q'uqli nk'u'je' ti'j Qman Dyos ex njaw nnima'ne' tyol.

¹¹Q'uqliwe' nk'u'j ti'j Dyos ex min nchin xob'e'.¿Titi' k'okyel tb'incha'n xjal weye'?

¹²Nman Dyos, che japumelwe' nyol wu'n xintziya'ne' teya kyuk'i'l nb'itze' teya,¹³Qu'n machin tkola teju' kamik, mana' chin tkola tu'n lalun chin kub' tz'aqe', tu'ntzun nb'ete' toju' t-spik'umal chwinqlal twitz Qman Dyos, chiju' b'itzal. Na'j Dyos qanb'il o'nb'il te Qman Dyos (Sal 108.1-5)¹Q'aq'antz tk'u'ja wi'je' Nman Dyos, q'aq'antz tk'u'ja wi'je', qu'n tuk'i'la njyo'na'ye' kolb'il, wajb'ile' tu'n nklete' tjaq' t-xik'a tzmax ajtik'ju' yajb'il.²Kjawil tq'ojq'ojel nwi'ye' te Dyos jawnixi', Aju' Qman Dyos ntzaj oninweye' toj tkyaqil.³Ktzajel tq'o'n tk'u'jlalil exju' ax tzmax toj kya'j, ex chin tkla'ye' te kytx'u'jilju' ljo'n toj nq'ije' kyu'n.

⁴Matxi' chin kub' tz'aqe', kyxolju' b'alun inche ch'yon xjal; iky kywitzteju' kse'n ch'ut ex talsmaj, iky kyaq'ju' kse'n k'uẍtx'e'nb'il jqu'n twitzte.

⁵Nman Dyos, atiya tib'aju' kya'j.¡Nojni tkyaqil twitz tx'otx' tu'n tajwalila!

⁶Makub' kyq'o'n wajq'oje jun xpatxab' toj nb'eye' naq tu'n ttzaj xob'il wi'je' ma ku'x kyb'incha'n jun jul toj nb'eye', ex aye'x ẍeku'x tz'aq toj.

⁷Nman Dyos, matxi' qexi'x nk'u'je' ti'ja inchin tzalaje' tu'n nb'itzane' teya.⁸Nna'ntztzun wib'e' kyna'ntzkyib'e' chnab' arpa ex tzintzin; ¡kchin jawil weye' q'ol chjonte te Dyos ajttzaj t-xe kya'j!⁹Kchin b'itzale' teya, Nman Dyos kyxolju' k'ok'e' tnam ex nimaqtnam.¹⁰Tb'anilxi'xte' tk'u'jlalila toj kya'j nojni twitz ẍkul kya'j tu'nju' toklena.

¹¹Nman Dyos, atiya tib'aj kya'j.¡Nojni tkyaqil twitz tx'otx' tu'n tajwalila! Chiju' b'itzal.Qanb'ilte tu'n tokju' kawb'il b'a'n¹Aye'ye' nimaq kyoklene',
¿ma ax, ma nkyb'incha'ne' tz'e'ysb'il witzb'aj tojxi'x tu'me'l ex manche kawine' tojxi'x ttxolilti'j?

²Minti', inpena' che kawine' tuk'i'l kyxime' myab'a'n; nb'aj qojli chik' kyu'ne' toj tkyaqilju' tx'otx'.

³Majx nche tzajb'entju' b'inchal taq'wix exqe' chalyol toj t-xmilalju' kytxu.⁴Ikyqe' kse'n kan wotz, ati kyb'i'yb'il ikyqe' kse'n jun kan ati tb'iyb'il naq nkub' t-ẍkyinsa'n tib'.

⁵Min tajb'il tu'n t-xitb'i'n tchinab'ju' mansil kan ju' nxitq'ajtza'n tu'n tmanset.

⁶Taye, ¡q'uchimitzju'ya kywitzte! Nman Dyos, ¡q'uchimitza kykaju' b'alun na'j!⁷Che kub'xwit naj kse'n a' ajtik' qojli, che kub'xwit tzqij kse'n k'ul toj b'e. ⁸Che kub'xwit yulj kse'n xqortxa'n tu'n atz'an, ¡kse'n jun k'wal min tkno'n tq'ij!,⁹mixwitti' kynab'en ti'j ajkytzyet tu'n q'aq' kse'n ch'i'x ajkytz'e'y; che jawxwit xb'oqi'n tuk'i'l tx'u'jilj, kse'n cha'x k'ul.

¹⁰Ktzalajelju' xjal tnik'alti'j ajtok tu'me'l t-xel tu'n; ¡ajtb'aj twab'e'n tchk'elju' b'inchal myab'a'n!¹¹Kq'manjtzeltzuntz. ¡Tb'anilxi'xte' qa tnik'alqi'j! ¡Qu'n ati jun Dyos nkawin tib'aj tkyaqil twitz tx'otx'! Chiku' kq'umjeb'el. Chiju' b'itzal. A Qman Dyos klolqe¹Nman Dyos, chin tkloma kyeju' wajq'oje, chin ttzaqpima toj kyq'ob'ju' njaw kyi'nkyib' wi'je'.²Chin tkloma kyeju' b'inchal il, chin tkloma kyeju' nche b'yon xjal,³qu'n ate' xjal nim kyipumal naq nche ayon tu'n nkub' kyb'yo'ne'.
Nman Dyos, b'ajx chin jawa' miltz'uja'we' ti'ja ex b'ajx nb'inchaya'we' il⁴b'ajxa' nb'inchawe' jun ti'xti'ye' myab'a'n, extzun noktilil kyu'n tu'n kytzaj q'ojil wi'je' ¡Iq'i'nktz tib'a! ¡Kutzaja ex chin tka'yintza!

⁵Nman Dyos, aya te tkyaqil ipumalj, janche k'uluna' aj Israel, na'ntztib'a ex tz'e'ysanku'ya kywitzju' nimal kye txqantl dyos;
lalun tzaj q'aq'an tk'u'ja kyi'ju' njaw kyi'nkyib' b'inchal myab'a'n.⁶In anjtzkyi'j qonik'an ex nche chiyon naku'j tx'yan, ex inche b'ajb'et ti'jile nintnam.⁷Inel kylanu'n kyol, inkyma'n tu'n kytx'u'jil: ¡Mix-a'lo'te kb'il qe! Chechij.

⁸Atzunta Nman Dyos, naq njaw tze'nta kyi'j; inxmayinta kyi'ju' nimal lu kye txqantl dyos.⁹Ti'ja nklo'na' wib'e', Nman Dyos, qu'n aya wipumale' ex klol weye'.¹⁰Aju' Dyos ink'u'jlan weye' tzul k'ulul weye'; tu'nte knla'ju'ye' kanb'ab'l kyib'aju' wajq'oje.

¹¹Lalun tzaj laqj tk'u'ja kyi'j,
tu'ntzun lalun tzik'tna'l tu'nju' ntaname'; spuntinqe'xa tu'n tipumala, ex me'ssanqe'ku'ya. ¡Ate Qman Dyos, kolol qi'j!

¹²Inche b'inchan il tu'n tkyaqilju' inkyma'n; ¡che kyajxwit muqli tjaq'ju' nimjtib'il ati kyoj ex tjaq'ju' chajyolil nkyma'n!¹³¡Najsanqeku'ya, najsanqe'ku'ya tuk'i'l ttx'u'jila! ¡Tu'n lalun che anq'intl! ¡Tu'ntzun tel tnik'tzil qa a Dyos nimaqkawil kyib'aj tyajajil Jakob' ex tib'aj tkyaqil twitz tx'otx'!¹⁴Ajtanjtzkyi'j qonik'an nche chiyon naku'j tx'yan, ajkyb'aj b'et ti'jile nintnam jyol kywa, kche jawil xo'jin qu'n lay tz'okyal kywa nim.

¹⁶Ayintzunwe', kchin b'itzale' teya te prim; kxe'l nma'ne' tk'u'jlalila ex tipumala tuk'i'l tq'ojq'ojel nwi'ye'. Qu'n aya matxi' tz'ok te kolb'ilweye', e'wb'il weye' kyoju' kmuj te k'ixk'oj.¹⁷O'kx teya kchin b'itzala'ye' Nman Dyos, qu'n aya ipumalj weye' ex kolb'ilweye'; ¡a na'ta Dyos ink'u'jlan weye'! Chiju' b'itzal. Na'j Dyos qanb'il o'nb'il te toj kya'j (Sal 108.6-13)¹Nman Dyos, maqokyej tkolb'e'na toju' ttx'u'jila, matxi' qokub' t-xitu'na; ¡ja'lo q'ontz jumajtla qipumale'!²Tb'inchaya tu'n tyukchiju' tx'otx' ex tu'n txi' jaqli; ¡ja'lo jpunku' jumajtla xb'aj jaqj, qu'n in qotx'j!³Matb'inchaya tu'n tik'ju' ttanama toj yajb'il kuw, matzaj tq'o'na jun q'e'n qeye' nnok toj kywitz xjal tu'n;⁴¡Tzaj tq'o'na jun techlal kyeju' inche niman teya, tu'ntoq kyklet kyeju' smaj nche tzaj xon!⁵¡Qo ttzaq'wetza, qo tkloma tu'n tipumala! ¡Klomqe'ju'ya nche tk'u'jla'na!

⁶Oje tma Qman Dyos toju' tja xjan; ¡Kb'el waq'pu'nju'ye' tx'otx' Sikyem tuk'i'l tzalajb'il ex kb'ajel nsipa'ne' b'ya' Sukot!⁷Weqe'weye' Kalaad ex Manases; ate Eprayin kolb'il tokx toj nwi'ye'; atzu'n Juda ntzeye' te aq'b'il chaq'b'il.⁸A nk'o'ẍju'ye' Moab' te ntx'ajb'ile'; kb'el nxone' nxajab'e' tib'aj Edom; ¡kchin jawil ẍch'ine' ajnkanb'ane' kyib'aj pilistey! Chi Dyos.

⁹¿Alxi'xkye k'onil weye' tu'n tkub'ti'ju' nintnam jpu'mile ti'j tu'n nintapi? ¿Alkye kpomel q'inweye' toju' tnam Edom?¹⁰Aya Nman Dyos, ju' o eltik'o'na, ¡minti' nnextla kyuk'i'lju' qxjale' te q'oj!¹¹Qo tonima tu'n tkub'ti'ju' qajq'oje', qu'n aju' qe' qipumal mixti'x tz'oka'.¹²Tu'nju' t-o'nb'il Dyos kb'entel nimaq ti'xti' qu'n; ¡ate kb'el najsankyeju' qajq'oj! Chiju' b'itzal. Tu'n tqe qk'u'j ti'ju' kolb'il tu'n Dyos¹Nman Dyos, b'intza tq'ojq'ojel nwi'ye' toj k'ixk'oj; ¡b'intza nna'j Dyose'!²Inchin kub'sane' twitza tzmaxtzu' toj mankb'il ttxa'n tx'otx', qu'n kxi' nkub'aje'. Chin tkloma tib'aj jun pik nimin twe',³ana'ya kolb'ilweye'. ¡Ikju'ya kse'n jun ja nimin twe' ex kuw
inchin tklo'na kyeju' wajq'oje!⁴Wajb'ile' tu'n ntene' toju' tjaya tejumajx, tu'n nklete' tjaq' t-xik'a.⁵Matxi' che tzaj tb'i'nta nyole' xintziya'ne' teya, Nman Dyos, ex matxi' tzaj tq'o'nju'ya wetzb'ile' ti'j kyetzb'ilju' nche niman te tb'iya.

⁶Q'ontza tchwinqlalju' nimaqkawil nimtoj; tz'anq'inxwit b'a'npun ab'q'i,⁷ex kawinxwit kukxju' tuk'i'l tky'i'wb'ila. Xq'uqima tuk'i'l tk'ujlalila ex tyola ax;⁸tu'ntzun nb'itzane' ti'ju' tb'iya kukxju' ex kche japumelwe' nyol tziya'ntl wu'ne' twitza atl junjun q'ij, chiju' b'itzal. O'kx Qman Dyos kolb'ilqe¹Naq o'kx tuk'i'l Dyos nkneta' nak'b'il wu'ne', tk'etzte ntzaja' kolb'ilweye'.²Naq o'kxte klol weye' ex xq'uqilweye'. Lay chin kub' tz'aqe', qu'n ate e'wb'il weye'.

³¿Ma kukx che okyil tzaqpaju'ye' wi'je' tu'n nkub' kyxone' twitz tx'otx', kse'n jun tapi ajttzaj tz'aq mujqa kse'n ch'laj noqx tu'n ttzajtz'aqtel twitz tx'otx'?⁴O'kxtzu' nche ximana'ye' tu'n nkub' kyxitune'; axi'x kytzalajb'ilju'ye' chajyolil. Naq tu'n kytziye' nchin jawa' kynimane', atzu'n kynab'le' nche yasune' wi'je'.

⁵O'kx tuk'i'l Dyos nkneta' nak'b'il wu'ne'; qu'n tuk'i'l ntzaja' q'uqb'ab'l nk'u'je'.⁶O'kxte nklonweye' ex inxq'uqinweye'. Lay chin kub' tz'aqe', qu'n ate e'wb'il weye'.

⁷Tuk'i'l Dyos ntzaja' kolb'ilweye' exju' ninb'ilweye'; ate inklonweye' ex e'wb'il weye'.⁸¡Nwnaqil, qek kyk'u'je' ti'j Qman Dyos kukxju'! ¡Che yolinqe'ye' tuk'i'l toj na'j Dyos q'uqlixi'x kyk'u'je'! ¡Ate Dyos e'wb'il qe!

⁹Naqxgante' xjal, b'a'nqa q'inun mujqa prow; naqwit che kub' mlo'n junx toj jun malb'il, mixpeloti'xte kyalal kyetwitz kyq'iq'.¹⁰Lalun qe kyk'u'je' ti'ju' q'oj kyib'aj xjal; ¡lalun jawkynima'n kyib'e' ti'j kyeleq'e'! qama che jaw q'inumaxe', lalun tz'okqe kyk'u'je' ti'j pwaq.

¹¹B'a'npunxi' maj nb'iye' te Dyos
qa te qe'ju' ipumalj exju' tk'u'jlalil ex intq'o'n tu'me'l t-xel teyile junjun kse'nxju' tb'inchb'en, chiju' b'itzal. In qe tk'u'ju' xjal tu'n Dyos¹¡Nman Dyos, teya nchin nimana'ye'! Inxi'x chin jyone' ti'ja, qu'n inchin k'wajtiye' ti'j; inxi'x chin elb'aje' ti'ja, kse'n tx'otx' tzqij, in ojqelan a' te.²¡Wajb'ile' tu'n nka'yinteya toju' tjaya xjan, ex tu'n nka'yinteju'ye' tipumala ex tajwalila.³nimxi'xte' toklenju' tk'u'jlalila kyetwitzju' chwinqlal! Kchin b'itzale' teya tu'n ntziye';⁴tkyaqil tq'ijlalil nchwinqlale' kjawil nnima'na, ex kjawil nmujb'a'n nq'ob'e' teya toj na'j Dyos.⁵Kqeb'iltzun nk'u'jtze', kse'n xjal nxi' toj jun ninwan, ex kchin b'itzale' teya tuk'i'l tzalajb'il,

⁶Nkub'lenxi' kẍeye' toj qonik'an, intzaj nna'na ex inchin ximane' ti'ja,⁷qu'n a na'ta nnonin weye'. ¡Inchin tzalaje' kyjaq'ju' t-xik'a!⁸Tkyaqilju' nchwinqlale' ati tuk'i'la; min nchin kyej ttzaqpi'ne' tb'anq'ob'a.⁹Aye'kye' kyajb'il tu'n nkub' kyb'yo'ne' che b'elix tz'aq tzmajx t-xe muqb'il;¹⁰¡tu'n k'uẍtx'e'nb'il kb'ajela' tokywi' ex che b'ajel ch'yo'n kyu'n xo'j!¹¹Atzunte' nimaqkawil ktzalajel ti'j Dyos; kche b'itzalju' inkyma'n kyol ax twitz Dyos, aye'tzu'n nche chanyol lay jqet kytzi. Chiju' b'itzal. Na'j Dyos qanb'il kolb'il te Dyos¹Nman Dyos, b'intzju'ya tq'ojq'ojel nwi'ye', klomju'ya nchwinqlale' kyeju' wajq'oje xob'ajilqe'xi'x.²Chin tewanku'ya kywitzju' b'inchal myab'a'n ex teju' kyxim nk'u'n toj ewaj; chin tkloma kye b'inchal myab'a'n xjaw kyb'u'yi'n kyib' wi'je',³Naku'j k'uẍtx'e'nb'ilju' kyaq' jqu'n twitzte inkylanu'n kyyol te k'ixb'sab'l kse'n smaj.

⁴Inche tzaj xon tzmajx toj kyewb'il ti'ju' xjal mixti' til; naq myanim ajkytzaj xon ex min nche xob'.⁵Inkyoni'nkyib' kyxolilex tu'n kyb'inchante myab'a'n; inkub' kyxima'n tu'n tkub' kyq'o'n kyxpatxab' toj ewaj ex toj kynab'l qa mix-a'lo' kka'yilkye,⁶qa mix-a'lo' kxpich'ulteju' kyb'inchb'en myab'a'n. Ate kxpich'ulkyeju' aju' inel tnik' ti'j tkyaqilju' t-xim xjal toj tanmi.⁷Ate Dyos kk'ixb'salkye kyu'n t-smaj, naq minab'en ajkyok tk'ixb'sa'n.⁸Che kb'eltz'aq tu'nxju' kyol, aye'tzu'n che okyel ka'yinkye kche xmayil kyi'j.⁹Kykyaqiltzuntz kche nimal te Dyos ex kche yolil ti'ju' tb'inchb'en; k'elelkynik' ti'ju' matxi' b'aj tb'incha'n.¹⁰Ktzalajelju' b'a'n xjal ti'j Qman Dyos ex ktjya' kolb'il tuk'i'l, ex kykyaqilju' xjal tnik'alkyi'j kqeb'el kyk'u'j tu'n, chiju' b'itzal. A Qman Dyos b'a'n tu'n tajwalet¹Nman Dyos atiya toj Syon, ¡aya ati tu'n tjaw ajwaleta!, ¡aya ati toklena tu'n tjapun qyole' twitza,²qu'n intzaj tb'i'nju'ya na'j Dyos!
Kykyaqilju' xjal toj tkyaqil twitz tx'otx' inche ul tk'etza.³Inkub'qi'je' tu'nju' qb'inchb'ene' taq'wix, atzunta inkub' tnajsa'na qile'.⁴Tzalajb'ilte' teju' xjal injaw t-sk'o'na ex inxitiq'i'na najal tk'etza, kyoju' najb'il toju' tjaya. ¡Qo' tnajsama tu'nju' tb'anil ati toj tjaya, tu'nju' xjanb'il ati toj tjaya!

⁵Nman Dyos ex klol qeye', inqotzaj ttzaq'we'nta kyu'n tb'inchb'ena tb'anilqexi'x ex tnik'alkyi'j; kykyaqilju' xjal twitz tx'otx' q'uqlok kyk'u'j ti'ja, exqe'ju' xjal najlqe' najchaq toj ninnjab';⁶tu'nju' tipumala ex toklena wa'lqe'ju' witz.⁷Inkub' nak'eju' ttolob' ninnjab' tu'na exju' xitb'il kyxol tnam;⁸exqepe'ju' xjal te najchaq tx'otx' inche lu'lun kywitzju' tb'inchb'ena tb'anilqexi'x; naq tu'nela ati sich' te tzalajb'il toj tjawetzq'ij ex tkub'exq'ij.⁹B'a'n tilwiju' tx'otx' tu'na; intzaj tq'o'nju'ya jb'al tib'aj tu'n tjaw awal twitz ex kyuk'i'l nin a',
inche ch'iyju' triy tu'na. ¡Iktzu'n intaq'una'n tx'otx'ju'ya toj kojb'il!¹⁰Nb'aj tak'sa'nju'ya tx'otx' aj tb'ajkjet tkyaqil inb'aj ak'; ajttzaj tq'o'na jb'al nim tib'aj ex intzaj tky'i'wla'nju'ya awal twitz.¹¹Intnojsa'nju'ya ab'q'i kyu'n ky'i'wb'il nim intzaj tq'o'na kyu'nju' muj;¹²cha'x qe'ju' k'ul toj kojb'il te kywa alu'mj exqe'ju' tze toj k'ul inche tzalaj qu'n cha'xqe';¹³inche b'ajnoju' chq'ajlaj kyu'n rit, exqe' b'ya' nojniqe' kyu'n triy; ¡Kykyaqil nche b'itzan ex nche ẍch'in tu'n kytzalajb'il! chiju' b'itzal. Te lab'te'n qe'xi'xju' taq'unb'ena¹Che' b'itzan qe'ye' te Dyos tuk'i'l tzalajb'il, ju' najlqe'ye' toj tkyaqil twitz tx'otx';²kyb'itzanqe'xe' b'itz toju' tb'anilxi'x tb'i Qman Dyos; che kyb'itzanqe'xe' tb'anil b'itz te.³Kymanxe' te Qman Dyos: Tb'anilqe'xi'xju' tb'inchb'ena. Inche kub' tz'aqju' tajq'oja twitza; tu'nju' nimtipumala;⁴kykyaqilju' xjal nche k'ulun twitza ex inche b'itzan b'itz toj tb'iya. Chechiku'ye' te.

⁵Kukytzaje' ka'yilteju' taq'unb'en Dyos, e' tb'inchb'en tb'anilxi'x matxi' b'aj tb'incha'n kye xjal:⁶Xitaq'pu'nju' ninnjab' toj kab'e' plaj ex kyej tenju' tx'otx' tzqij, ex e'ik'x b'etju' ojtxi' qchman tu'n kyjlajinte nin a' Jordan; ¡qo'qe' tzalaj ti'j Dyos!⁷Tu'nju' tipumal, in kawin tejumajx. inxq'uqin kyi'ju' nimaqtnam, tu'ntzun lalun jawkyi'n kyib'ju' xjal mib'a'n che b'in te Dyos.

⁸¡Kyajwalinktze' Qman Dyos e'nimaqtnam! ¡che b'itzane' tu'n tajwalitju' tb'i!⁹Qu'n ati qchwinqlal tu'n; ex min ntjo'n tu'n qkub' tz'aq.

¹⁰Nman Dyos, matxi' qo ik'e' toj joyb'il qi'je' tu'na, ¡matxi' qob'aj t-ẍtilsa'na kse'n saqpwaq!¹¹Maqo jawtz'aqe' tu'na toj pa; majawx tq'o'na jun qiqatze' alxi'x.¹²Mataja tu'n qkub' yaju'ne' tu'n jun alkyexku' xjal; matxi' qoyajtiye' toj a' ex toj q'aq', te b'ajsb'iltzun matzaj q'aq'an tk'u'ja qi'je'.¹³Chin okyixe' toju' tjaya ex che kb'el nq'o'ne' chojb'il k'ok'sb'il twitza; kjapumeltzun nyoltze' twitza,¹⁴aye'ju' nyole' e'nmaye' teya tu'n nb'inchanteye' tej xob'ajilxtoq ta'qine'.¹⁵Che kb'el nq'o'ne' alu'mj q'u'sqe' te chojb'il k'ok'sb'il twitza; che kxe'l nq'o'ne' tman wakx ex tman chib', ex rit te chojb'il teya.

¹⁶¡Kukytzaje' kykyaqile', aye'ye' inche xob'e' te Dyos! ¡Kyb'intzpe'ye', kxe'l nma'ne' kyeye' tkyaqilju' t-xtalb'il Dyos matxi' tb'incha weye'!¹⁷Machin kub'sane' te ex majaw wajwali'ne' tu'n ntziye'.¹⁸Noqwit ati nxime' myab'a'n, mixti'wtlo ẍin tzaj tb'i'ne' Qman Dyos;¹⁹¡atzunte' ma chintzaj tb'i'ne' toj nna'j Dyose'!

²⁰¡Nimanxwitju' tb'i Dyos, min sel tik'u'nju' nna'j Dyose' ex min xkub' tewa'nju' tk'u'jlalil weye'! chiju' b'itzal. ¡Jawxwit ajwali'na kyu'n kykyaqilju' tnam!¹Nman Dyos, Q'aq'antz tk'u'ja qi'je', ex qo' tky'iwlaku'ya; qo' tka'yitza tuk'i'l tzalajb'il,²tu'ntzun telkynik' kykyaqilju' tnam teju' t-xtalb'ila exju' kolb'il tu'na.

³Nman Dyos,tz'ajwalinjtzxwita kyu'nju' tnam;¡kykyaqilxwitju' tnam che jaw ajwalinteya!

⁴Che ẍch'inxwitju' nimaqtnam tu'n kytzalajb'il, ina' kawinta kyib'aju' tnam toj tnik'alti'j; ¡aya ẍaqlulkye nimaqtnam toj tkyaqil twitz tx'otx'!

⁵Nman Dyos,tz'ajwanlinjtzxwita kyu'nju' tnam;¡kykyaqilxwitju' tnam che ajwalin teya!

⁶Matxi' taq'te tx'otx' tawal; ¡matxi' qotzaj tky'i'wla'n Qman Dyos!⁷¡Awt Qman Dyos ky'iwlanqe! ¡Kykyaqilxwitju' xjal twitz tx'otx' che q'on ninb'ilte! chiju' b'itzal. Nnche kanb'an aj Israel¹Ajtaq'wi Dyos q'ojil, inche'x slamju' tajq'oj; aye'ju' ntx'a'lti'j kyk'u'j ti'j inche kub' oq twitz;²inche kub'naj kse'n sib' toj kyq'iq', inche kub' niwj kse'n ser toj q'aq'; ¡tzpetni qe'kye' xjal b'inchal myab'a'n twitz Dyos!³Aye'tzu'n b'a'n xjal nche tzalaj; ati nak'b'il kyetwitz Dyos, ¡inche xlik'pun tu'n kytzalajb'il!

⁴Che b'itzan qe'kye' te Dyos, kyb'itzanxe' b'itz toj tb'i; kyajwalinktzju'ye' ati tib'aj muj.
¡Che tzalajxe' ti'j Qman Dyos! ¡Che tzalajxe' twitz!⁵Ate Dyos najli toju' tja xjan, Manb'aj kye meb'a ex kolol kyi'ju' qya kyimni kychmil;⁶Intq'o'nte Dyos najb'il teju' xjal mixti' najb'il te, inche ttzaqpi'nju' jpu'nqe' ex intq'o'n kytzalajb'il; aye'tzu'n nche jaw meltz'uj kche najal toj tx'otx' min tq'o'n tawal.

⁷Nman Dyos, tej nejlitoqa kywitzju' ttanama intoq b'eta kyuk'i'l toj chq'ajlaj,⁸jaw lu'lunju' tx'otx', tzaj chitj jb'al twitz kya'j, exju' witz Sinayi jawlu'lun twitzju' Qman Dyos, janche k'uluna' aj Israel.⁹Nman Dyos, nim jb'al tzaj tq'o'na matxitoq kub' b'aju' ttanama, ex tzaj tq'o'na tipumal.¹⁰Atzu' ekyeja' najana' ttanama na'tz atzunta Nman Dyos, noqx tu'n tk'u'jlalila, xitq'o'na aju' nnojqelan kyeju' prow.

¹¹Tzaj tq'o'n Qman Dyos jun tqanil; nim qya intoq che pakb'ante:¹²¡Ljo'n kyb'ajx oqju' nimaqkawil kyuk'i'lju' kyxjal te q'oj! Chechij. Aye'tzu'n qya eb'jo'kx toj kyja b'aj kysipa'n ti'xti' b'je'l kyiq'i'n kyi'ju' ajq'oj kyxolilex,¹³aye'tzunkye' e'kyajtene' kyxol ch'laj, ¡kse'n kyxik' paloms ktxu'n kyi'j tu'n saqpwaq! ¡Exju' kytzmal ktxu'n kyi'j tu'n q'anpwaq tb'anil!¹⁴Tetzu'n kyb'aj oqju' nimaqkawil tu'n Dyos nimtipumal, kub' saqche'w tib'aju' witz Salmon.

¹⁵¡Nim kyoklenju' witz B'asan ex nimaq kywe'!¹⁶Aye'ye' txqantl tnam, ¿titiqu'n ntx'a'lti'j kyk'u'je' ajt-xikyka'yinju'ye' witz ja oje tmaya' Dyos tu'n tnajan? ¡Ate Qman Dyos, knajal atzu' tejumajx!

¹⁷Ku'tz Qman Dyos twi' witz Sinayi ex ul toju' tja xjan; kyoju' tkarwaj nimxi'xtoq txqan kyb'aj.¹⁸Nman Dyos, jawxa tzmax twi' witz ex eb'ajx tiq'i'nju'ya pres; etk'ama chojb'il te tnam kyu'n xjal expe' makyaq'kyib'ju' njaw kyiq'i'n kyib' ti'ja tuk'i'la, Nman Dyos.

¹⁹¡Nimanjtzxwit tb'i Qman Dyos ex klolqe, ju' nqo toni'n atl junjun q'ij toj tkyaqilju' ti'xti'!²⁰Ate Qman Dyos nkolon ex inqo klet tu'n teju' kamik.²¹Ate Dyos kb'el pa'nte kywi' tajq'oj, kywi'ju' mixti'x nkyaj kytzaqpi'nju' b'inchaj il.

²²Oje tma Qman Dyos: K'eletz wiq'i'ntla toju' tx'otx' B'asan; ex toju' ninnjab' nim t-xe,²³tu'n tb'aj twab'ena kychk'elju' tajq'oja ex tu'n txi' kyk'wa'nju' ttx'yana. Chi Dyos.

²⁴Nman Dyos, nnimaqkawile', q'ancha'lqe' xjal txoli'n kyel toju' tjaya xjan inche ik'san ninb'il teya.²⁵Nejliqe'ju' aj b'itzal lepchqe'xtlju' aj chinb'al, kyxoltzun ta'qe'ju qpoj inche q'ajtzan tanb'orin.²⁶¡Kynimanktze' Qman Dyos kykyaqile'! ¡Kyb'uyim kyib'e' aj Israel ex kyajwali'nktze'!²⁷Nejli B'enjamin itz'inb'aj kywitz, kyuk'i'l b'a'npun nejenel kye aj Juda, aj Sab'ulon ex aj Neptali.

²⁸Nman Dyos, yek'untza tipumala; ¡b'incham jumajtla t-xtalb'ila tb'inchaya qeye'!²⁹Tzmax toju' tjaya xjan, toj Jerusalen, janpona' kyiq'i'n nimaqkawil oyaj teya,³⁰tzak'unqe'xju'ya aj Ejipt, naku'j txkupqe' toj ajlaj q'ajun, aye' jun k'loj tman wakx tx'u'jqe' exqe' qpoj tman wakx nkynima'kyib' tu'n kyq'inumal ex nche kub'kyme'sa'n tnam; ¡sputinqe'xju'ya xjal kyajb'il tu'n kyq'ojin!³¹Toj Ejipt kche tzajela' sanjelj; kjawil kymujb'a'n aj Etyopiy kyq'ob' twitz Dyos.³²¡Che b'itzan qe'ye' te Dyos kykyaqile' nche kawine' twitz tx'otx', kyb'itzanxe' b'itz te Qman Dyos,³³teju' nb'et toj kya'j, toju' kya'j tejumajx! Kyb'intze' se'ntaq'wi nq'ajtiju' tq'ojq'ojel twi', aju' tq'ojq'ojel twi' nimtipumal.³⁴Tz'elx kynik'e' ti'ju' tipumal Dyos: aju' ati toklen tib'aj Israel, npon kanun tipumal tzmax toj ẍkul kya'j.³⁵Tb'anilxi'xte Dyos toju' tja xjan; intzaj tq'o'n Qman Dyos toklen ex tipumalju' ttanam.
¡Nimanjtzxwitju' Dyos! chiju' b'itzal. Sich' toj k'ixk'oj¹Chin tkloma, Nman Dyos, qu'n naqxi'x ch'inxtl njaq'wiye' toj a';²kxi' nxi' mulq'aje' toj sob'on nim t-xe ex mixjalojax tu'n nkub'a' we'ye'. Matxi' chin ku'pune' t-xexi' a' ex xi' nxi' iqane' tu'n tnimal a'.³Matxi' ku'x tzqij toj nqule' tu'n tpaj nchin ẍch'ine' nim; in ch'yon toj nqule'; ¡matxi' che siktiju' nwitze' ayob'ente Qman Dyos!⁴Nimxi'x kyb'aju' nche el ik'unweye' kyetwitzju' t-xya'mal nwi'ye', extzun mixti' wile'; matxi' che chmetju' wajq'oje, aye'ju' naqx kyak'a'n nche okten yajlal weye' ex inxi'x kyqani'n tu'n txi' wanjsa'n ti'ju'ye' mixti' sajwelq'a'ne'.

⁵Nman Dyos, b'i'nxi'x tu'na, xnakqine' twitza; lay b'ent wewanteju'ye' wile' twitza.⁶Taye, aya Dyos nimtipumal, ¡lalun tz'el kych'ixawju' q'uqlok kyk'u'j ti'ja noqx tu'n npaje'! aya Dyos nkyk'lu'n aj Israel, ¡lalun che kub'numju' nche jyon ti'ja noqx tu'n npaje'!⁷Noqx tu'n nk'u'jlalile' ti'ja inchin yajtiye'; matxi' tz'elxi' nch'ixawe';⁸¡ikqinju'ye' kse'n jun xjal min ojtzqi'n twitz kyeju' witz'ine' ex ntzike'!

⁹Xi' nkub' b'aje' tu'n xky'aqli'n ti'ju' tjaya; machin ok ik'le'ne' kyu'n nche ok ik'lenteya.¹⁰Ajnkub' oq'e' ex aj nmewayine', inche xmayin weye';¹¹qa nnoknq'o'n wi'je' te b'is, tzeb'ajilqine' kye.¹²Noq oqinkxe' nchin kub' kyyoli'n xjal, exqe' tx'ujtenil in b'je'l kyb'itz xmayb'il weye'.

¹³Ayintzunwe', Taye, inchin kub'sane' teya. Nman Dyos, ¡chin toniya ja'lo! Naq tu'n tk'u'jlalila nimxi'x, ¡chin ttzaq'wentza! Noq tu'nju' t-o'nb'ila kukxju', ¡chin tkloma!¹⁴¡Lalun taja tu'n nxi' mulq'aje' toju' xoq'l! ¡Chin tkloma kyeju' nche el ik'unweye' ex tu'n michinxa' mulq'aje' toju' a' nim t-xe!¹⁵¡Lalun taja tu'n nxi' iqane' tu'n tnimal a'! ¡Lalun taja tu'n nxitjk'u'ne' ttolob' a' nim t-xe!

¹⁶Nman Dyos, chin ttzaq'wetza; ¡b'a'nata ex nim tk'u'jlalila! Chin tka'yitza, qu'n nimta tlaqb'il tk'u'j;¹⁷¡Lalun tz'el tik'u'nju'ya tmajena lu! ¡Chin ttzaq'wetza lwiy, qu'n xob'ajilx atinqina'ye'!¹⁸Lq'etza nk'etze' ex chin tkloma; ¡chin tkloma kyeju' wajq'oje!¹⁹Ojtzqi'n tu'na jni'xju' matxi' chin ok ik'le'ne', matxi'xi'x b'je'l nch'ixawe'; tojtzqi'nxi'xa alkyeqe' wajq'oje.²⁰Matxi' k'ixb'i wanmiye' tu'nju' nchinok ik'le'ne'; ¡mixti'tl wipumale'! Manjoye' jun q'uqb'al nk'u'je', ex jun tu'n ttzaj q'aq'an tk'u'j wi'je', ex mixti' sokyal.²¹Ku'x q'o'n b'i'yb'il toju' nwaye', ex tej ttzaj k'waj wi'je' tzaj q'o'n b'inayr te nk'wa'ye'.

²²¡Axwitju' kymes ex kywa nkukyq'o'n tu'n kytzalaj jawb'ent te jun xpatxab' kye!²³¡B'inchama tu'n kykyaj moẍix ex tu'n kylu'lunju' kyqan kukxju'!²⁴Tzaqpintzju'ya ttx'u'jila kyib'aj; ¡che b'ajxwit tu'n tq'oja ajtkb'u'l kanun!²⁵Kyajxwitju' kynajb'il te chq'ajlaj, ex mix-a'lo'xwit najan toju' kyja;²⁶qu'n inkub' kyljo'n toj tq'iju' matxi' tzaj tb'is tu'na ex inche xmayink ti'ju' b'ajni tk'ixb'sa'na.²⁷Anjsanxju'ya taq'wix kye, tu'nju' taq'wix nkyb'incha'n; ¡ex tu'n lalun kyk'amju' najsb'il kyil!²⁸¡Najsanku'xju'ya kyb'i toju' u'j te chwinqlal!
¡Lalun ku'x tq'o'na kyb'i jatku'xa' kyb'iju' tnik'alkyi'j!²⁹Ayintzunwe', yab'qine' ex nchin b'isune', chin twab'aktza, Nman Dyos ex chin tkloma.

³⁰Kjawil wajwali'ne' tb'i Dyos kyu'n b'itz kwajwali'ye' tuk'i'l aq'b'il chjonte,³¹Ex kjel tzalajxi'x Qman Dyos ti'j kyetwitzju' chojb'il tman wakx mujqa jun qpoj wakx kyuk'i'l tuk'a ex t-xky'eq³²Kche tzalajelju' nche b'isun aj txi' ka'yi'n ja'lu ex kkuwixel kyanmiju' nche jyon ti'j Dyos;³³ina' che tzaj tb'i'nte Dyos prow ex min nche eltik'o'n jpu'nqe' ju' teqe'.

³⁴¡Kyajwalinktze' Qman Dyos kya'j, tx'otx' ex ninnjab', ex kykyaqile' nche anq'ine' kyoj!³⁵Ate Qman Dyos kklolte Syon ex che jawil tb'incha'n jumajtlu' nimaqtnam toj Juda. Kkyetza' kyk'wal kymajinju' nintnam; atzu' che najala' ex kytzyu' kytx'otx'; ¡aye' nkyk'u'jla'n tb'i Dyos che najal toj! Chiju' b'itzal. Lwix kuttzaja onilweye' (Sal 40.13-17)¹Nman Dyos, ¡kuttzaja klol weye'! Taye, ¡lwix kuttzaja onilweye'!²¡Tz'elxwit kych'ixawju' xjal kyajb'il tu'n nkub' kyb'yo'ne'! ¡Che kub'xwit oqju' kyajb'il tu'n nb'o'lje' kyu'n tu'n kych'ixaw!³¡Che kub'xwit oqju' nche xmayin wi'je' tu'n kych'ixaw!⁴Kykyaqilxwitju' nche jyon ti'ja tenxwit ktzalajb'il; kymaxwitju' kyajb'ilju' tkolb'ila ikjalu: ¡Ate Dyos nim toklen!

⁵Atzunwe', prowqine' ex nchin b'isune', Nman Dyos, ¡lwix kuttzaja onilweye'! Ateju'ya nnonin weye' ex nklonweye'; ¡lwix kuttzaja, Nman Dyos! chiju' b'itzal. Tna'j Dyos jun tijwnaq¹Nman Dyos, tuk'i'la njyo'na'ye' kolb'ilweye'; ¡lalun chin kyej tkolb'e'na!²¡Chin tkloma ex chin ttzaqpima, tnik'alna'tati'j! B'incham xtalb'ila chin tb'itza, ex chin tkloma.³Tz'okxwita jun pik kolb'ilweye', ¡tz'okxwita te jun nin ja te kolb'ilweye'! ¡Ateju'ya wipumale' ex pik e'wb'il wib'e'!

⁴Nman Dyos, chin tkloma toj tq'ob'ju' b'inchal myab'a'n, toj tq'ob'ju' b'yol wnaq ex teju' tx'u'j twi',⁵Taye, ateju'ya q'uqb'ab'l nk'u'je' atxi'x kuxunqintoqe' q'uqlok nk'u'je' ti'ja.⁶Iqa'nxtoq nwi'ye' tu'n ntxuye' intoq okqe nk'u'je' ti'ja. ¡Initz'je' tu'na! ¡Kchin b'itzale' kukxju' teya!

⁷Majx nchin jaw lab'ti xjal weye', atzunta kolb'ilweye'.⁸Nim txqan nyole' te ajwalb'ilteya inb'aj q'ij tu'n nyoline' kyi'j⁹lalun chin nel tik'u'na aj ntijine'; lalun chin kyej ttzaqpi'na ajtb'aj wipumale'.¹⁰Kyajb'ilju' wajq'oje tu'n nkub' kyb'yo'ne', inkyb'u'yi'n kyib' ex in b'ajb'ent ti'j kxim wi'je'.¹¹Ex inkyma'n: ¡Che lpexe' ti'j ex kytzyunku'ye', qu'n matxi' kyej kolb'e'n tu'n Dyos ex mix-a'lo' kklolte! Chechij.

¹²Lalun tz'el tpa'ntib'a wi'je', Nman Dyos; ¡Lwix kuttzaja klol weye'!¹³¡Tz'elxwit kych'ixawju' wi'je' ex che kub'xwit naj! ¡Tz'elxwit kych'ixaw ju' kyajb'il tu'n nkub' yajtiye'!¹⁴Ayintzuwe' chin ayole' ti'ja kukxju', ex kjawil nnima'nxi'xtla;¹⁵kb'ajel q'ij wu'ne' kxe'l nchik'b'a'ne' kye xjal qama qo' tkola ex matb'inchaya tnik'alilti'j qeye'. ¡Layx kane te'lu toj nwitze'!¹⁶Nman Dyos, kxe'l ntx'olb'a'nju'ye' tb'inchb'ena tb'anilxi'x; ¡kxe'l npakb'a'ne' qa o'kxta tz'aqli!

¹⁷Nman Dyos, aya tzaj xnaq'tzan weye' atxi'x toj ju' nku'xumale', ex inx che'x npakb'a'ne' tb'inchb'ena tb'anilqexi'x.¹⁸Nman Dyos lalun chin kyej tkolb'i'na maskye matxi' chin tijine' ex saqtl nwi'ye', na'mxna' nb'aj yolinwe' ti'ju' tipumala kyeju' xjal ate' ja'lo ex kyeju' che ul yajxi'tel.

¹⁹Nimxi'x toklenju' tkawb'ila tnik'alti'j Nman Dyos; nim ti'xti' matxi' che tb'inchaya; ¡mix-a'lo' juntl kse'n aya!²⁰Maskyepe' matxi' tb'inchaya tu'n nlonteye' txqan yajb'il ex b'is, ktzajel tq'o'n jumajtlju'ya nchwinqlale'; kchin jawitz tiq'i'na tzmax t-xexi' tx'otx',²¹ktzajel tq'o'na woklene' nimxi'x ex ktzajel tq'uqb'a'n jumajtla nk'u'je'.

²²Ayintzunwe', tu'nju' toklena nim, kchin b'itzale' teya ex kjawil nnimsa'na tuk'i'l chnab' arpa ex tzintzin, Nman Dyos, aya Xjan Kydyos aj Israel.²³Okxi'x chin tzalaje'le' ajnb'itzane' teya, ex tu'n tkyaqil nk'u'je', tu'n oje chin tkola.²⁴Ex tkyaqil kmuj kxe'l ntx'olb'a'ne' qa tnik'alti'ja, matxi' tz'el kych'ixawju' kyajb'iltoq tu'n nkub' yajtiye', chiju' b'itzal. Na'j Dyos ti'ju' nimaqkawil¹Nman Dyos, onintzju'ya nimaqkawil, tu'n tb'ent tkawin kse'nta, ex tojxi'x tnik'alti'j,

²tu'ntzun tkawin toj tu'me'l ex toj tnik'alilti'j tib'aju' ttanama ex kyib'aju' prow.³Tzajxwit kyiq'i'n nimaq k'ul exqe' witz nak'b'il ex tnik'alilti'j teju' tnam.⁴¡Kawinxwitju' nimaqkawil toj tnik'alilti'j kyib'aj prow! ¡Che tkolxwit kyk'walju' ati nnojqelan kye ex che kub'xwit tnajsa'nju' ate'k yajulkye xjal!

⁵¡Tenxwit tchiylala teju' nimaqkawil kukxju'; atixku'ju' q'ij ex xjaw!⁶¡Tz'okxwit kse'n jb'al ex ẍmu's intak'sa'nju' tx'otx' ex k'ul!⁷¡Tenxixtlwit nak'b'il ex tnik'alilti'j toju' tq'ijlalil tkawb'il, atixku'ju' xjaw!⁸¡Kawinxwit tib'aj tkyaqil twitz tx'otx', tzyet-x ttzi nin a' Ewprates tu'n tpon tzmax mankb'il ttxa'n tx'otx'!

⁹¡Kyaq'xwit kyib'ju' tajq'oj najlqe' toj chq'ajlaj tuk'i'l, ex tu'n tkub' kyme'ssa'nkyib' twitz!¹⁰¡Tzajxwit iq'i'n oyaj ex chojb'il kawb'il te kyu'n nimaqkawil toj Tarsis ex kyoju' tnej tx'otx' toj ninnjab'. ex kyu'n nimaqkawil toj Sab'a ex toj Seb'a!¹¹¡Che kub'xwit meje kykyaqilju' nimaqkawil twitz! ¡Che ajb'enxwit kykyaqilju' nimaqtnam te!¹²Qu'n ate kklolteju' prow inkub'san exju' ati nnojqelan te ex mix-a'lo' onilte.¹³Ktzajel q'aq'an tk'u'j kyi'ju' me'sqe' ex che tkla'ju' prow.¹⁴Kche tkla' toju' jitz'jtib'il ex toj b'yojxjali'n, qu'n nim toklenju' kychwinqlal te.

¹⁵¡Tz'anq'inxwitju' nimaqkawil! ¡Txi'wt q'o'nju' q'anpwaq toj Sab'a te! ¡Kukxwit tok kub'sb'ilju' ti'j twitz Dyos! ¡Tzajxwit ky'i'wla'n kukxju'!¹⁶¡Tenxwit nim triy toju' tx'otx' ex chmet-xwit kywi'witz! ¡Witzanxwit kse'n tze Lib'ano ex tenxwit txqan kyspiyil kse'n k'ul toj kojb'il!¹⁷¡Tenxwit tb'iju' nimaqkawil tejumajx; tenxwitju' ninb'ilte kse'n q'ij! ¡Kykyaqilxwitju' nimaqtnam twitz tx'otx' che k'monte ky'i'wb'il noqx tu'nel! ¡Kykyaqilxwitju' nimaqtnam che q'mante, tzalajb'ilxta!

¹⁸Nimanjtzxwitju' Qman Dyos, kydyos aj Israel, o'kxte nb'inchankye ti'xti' tb'anilqexi'x;¹⁹Nimanjtzxwitju' tb'i tb'anilxi'x tejumajx. ¡Tkyaqilxwit twitz tx'otx' kub' noj tu'n tajwalil! ¡Ikxwitju'! Chiju' b'itzal.

²⁰Atzu' nb'aja' tna'j Dyos Dab'i, tk'wal Jese, tzalu. Toxi'n U'j (E' b'itz 73—89) T-xtalb'il Dyos¹¡Majx b'a'nte' Dyos tuk'i'l Israel, kyuk'i'lju' ẍtilun kyanmi!²Noq ch'intlmi ẍin kub'a' tz'aqe'; qu'n e'jawtoq jilpuju' nqane'.³Qu'n matzaj tx'a'lti'j nk'u'je' tej xxinka'yine' nche b'jawb'ent ju' b'inchal myab'a'n ex inkynima'n kyib'.

⁴Minti' nche ximankye' lu qa kche kyimel, qu'n b'a'nqe' toj kyxmilal;⁵na'mx tik' twitzlalil kyu'n, ti'ju' yajb'il ati twitz tx'otx' ex na'mx kyajti kse'nqe' txqantl xjal.⁶Qu'mtzun a kyachb'ilju' nimjtib'il ex majx ati kytx'u'jil naku'j kyxb'alun;⁷matxi' b'je'tz kywitz, nimxi'xju' myab'a'n nkub' kyxima'n.⁸Tuk'i'l xmayb'il, nimjtib'il ex taq'wix yol, nche xob'tzana' tu'n kyb'inchan myab'a'n ex b'yojxjali'n,⁹inche xon kyol ti'j Dyos te toj kya'j in elpunxju' kyol toj tkyaqil twitz tx'otx'.

¹⁰Qu'mtzun nche jaw nima'n kyu'n xjal ex min nnel kynik' ti'ju' taq'wixil nkyb'incha'n.¹¹Inkyma'n: ¿Ma oktzun ktb'i' Dyos? ¿Ma ktzunlo tzajel tka'yi'n Dyos tzmax toj kya'j? Chechij.¹²¡Kyka'yinqe'xpe'ye' b'inchal myab'a'n! Min nche yajti ex in chmet kyq'inumal.¹³¡Naqx wak'a'we' nb'aj nẍtilsa'n wanmiye' ex nche b'aj ntxjo'ne' nq'ob'e' te tkyaqil il!¹⁴Naqx k'ixk'oj ink'mo'ne' tkyaqil kmuj, intz'e'ysanjtz nwitze' atl junjun prim.

¹⁵Naqwit machin ximane' kse'nkye, matxi'wtlo che kub'nsb'u'ne' tk'wala.¹⁶Matz'oktilil wu'ne' tu'n tel nnik'e' ti'j ja'lu, ex ch'uẍxi'x sela' weye'.¹⁷Tzmaxi'j ẍin nokxe' toj tja Dyos xjan xkanetzuntz toj nwitze' ja che web'ela'kye' lu:¹⁸Matxi' che kub' tq'o'na toju' b'e ẍb'ilun ex inche'x tlmo'na toj yajb'il.¹⁹¡Toj jun kmujx che kjel xitu'n! ¡Kche b'ajel tu'n kxob'el!²⁰Ajtzun tjaw tiq'i'ntib'a Nman Dyos, kse'n ajttzaj tna'tib' jun xjal toj watl, k'elil tik'u'nju'ya che ka'yin.

²¹Machin tenwe' toj nim yajb'il ex atitoq k'ixk'oj toj wanmiye',²²qu'n xnak qintoqe' mixtoqti'x noktojnwi'ye'; ¡ikqintoqju'ye' kse'n jun chej twitza!²³Tu'npetzunju', antine' tuk'i'la kukxju'. Machin jawtiq'i'na tuk'i'l nb'a'nq'ob'e',²⁴matxi' chin tzajt-ẍaqlu'na kyu'nju' tnab'la te b'ajsb'iltzun kchin tk'ma'ya kyuk'i'l oklenj.²⁵¿Alkyetzun juntl ati toj kya'j? ¡O'kx aya! Ajntene' tuk'i'la mixti'tl wajb'ile' te twitz tx'otx'.²⁶Xi' nkub' b'ajwe', atzunte Dyos wetzb'ile' tejumajx ex a tzyulte wanmiye'.

²⁷Che kyimelju' inel kypa'n kyib' ti'ja; kb'el t-xitu'na xjal minti' nnokslan teya.²⁸Ayintzunwe' chin kxe'l lq'eye' tk'etz Dyos, qu'n a b'a'nju' weye'. Aya, Nman Dyos, kolb'ilweye', ex kxe'l npakb'a'ne' tkyaqilju' tb'inchb'ena. Chiju' b'itzal. Na'j Dyos qanb'il tzaqpib'lteju' tnam¹Nman Dyos, ¿Titiqu'n xqokyej tkolb'e'na tejumajx? ¿Titiqu'n saja' ttx'u'jila kyi'ju' rit toj tch'laja?²Na'ntzju'ya ttanama, ju' jawni t-sk'o'na ojtxi', ex klet tu'na tu'n tok te ttanama; na'ntzju'ya witz Syon, ja matxi' najana'ya.³Kutzaja ka'yilteju' tnam majx kub'ni xitu'n; ¡oktenju' ajq'oj xitulte tkyaqilju' tjaya xjan!

⁴Inche b'itzanju' tajq'oja tu'n ẍekanb'an ti'ju' tjaya xjan; ¡matxi' kub' kyq'o'n kyb'ander te juntl tnam⁵tib'aju' ttzija, janche okxa' xjal! Naku'j si'wilqe' kyxol tze toj k'ul q'ajin,⁶eb'jo'kten pa'lkye tilb'ilal toj tjaya tu'n k'uxb'il te si'wb'il ex tu'n pojb'il⁷Okkyq'o'n tq'aq'alju' tjaya xjan; ¡naku'j mixti'x toklen, kub' kytx'u'yi'n twitz tx'otx'!⁸Kyma tu'n qkub' kyxitu'ne' qkyaqile'; ¡eb'jo'kten xitulkyeju' ja te k'u'lb'il toj tnam ja nqb'u'yi'natoq qib'e' tu'n qk'ulune' teya!⁹Mixti' nche qka'yintlju'ye' techlal xjan; mixti' juntl t-sanjela xkyej, expe' min b'i'n qu'ne' jtoj we' ttxa'njalu.

¹⁰Nman Dyos, ¿ma kukxtzun kyajun ajq'oju' qi'je'? ¿Ma kukxtzun tu'n kyolil taq'wixju' ti'ja?¹¹¿Tiqu'n nxa' tewa'nju'ya tipumal tq'ob'a? ¿Tiqu'n nkyeja' tchle'n tq'ob'a ttzitk'u'ja?¹²Atxi'x ojtxi' aya nninaqkawile'.
Nimxi' kanb'ab'l matxi' kub'ti'n tu'na, Nman Dyos tza'lu twitz tx'otx':¹³kub' taq'pu'nju'ya ninnjab' tu'n tipumala, kub' tpa'na kywi'ju' nimaqtxkup toj ninnjab',¹⁴b'ajkub' tpch'u'na twi'ju' nin txkup Leb'yatan
ex xitq'o'na te kychi' txkup toj chq'ajlaj.¹⁵Eb'jatz poq'chaj a' ex eb'et nin a' tu'na, ex e'kub' ttzqijsa'nju'ya nin a' min nche kub' tzqij.¹⁶Te teya q'ij exju' qonik'an; aya b'inchante xjaw exju' q'ij;¹⁷aya kyej q'onte techelju' b'ajsb'il ttxa'n tx'otx'; kyej tnk'u'na q'ijal tuk'i'lju' jb'alil.

¹⁸Na'nku'ya Nman Dyos, nnok ik'le'na tu'n ajq'oj, exqe' xjal mixti' kynab'l nche yolin taq'wix ti'ja.¹⁹¡Lalun tzik'xi'x qna'le' tu'na! Mixti'x qipumale' kse'nqe' paloms b'o's kyyajil; ¡lalun qo'x tq'o'na kyeju' tojk'ul txkup!²⁰¡Na'ntzju'ya tyola kyej b'entti'j tu'na, qu'n nojniju' tnam tu'n taq'wixil expe' toj tkyaqil twitz tx'otx'!²¹Lalun taja tu'n tkub' me'sa'nju' xjal nyajunjtz; ¡b'inchama tu'n tjaw nima'na tu'n prow ex tu'n me's!

²²¡Iq'i'nktz tib'a Nman Dyos! ¡B'inchama tkawb'ila! ¡Na'ntza nche oktenju' xnak q'ol ttx'u'jila kukxju'!²³Lalun tzik'tna'l tq'ojq'ojel kywi' tajq'oja tu'na, ex inxi'x che ẍch'inju' min nche okslan teya. Chiju' b'itzal. A Dyos ajkawil¹Nxiqq'o'ne' chjonte teya Nman Dyos, nxiqq'o'n chjonteye' teya; ntzaj qna'ne' tb'iya ex nxiqb'itza'ne' tb'inchb'ena tb'anilqexi'x.²A ntma'n Qman Dyos ja'lu: Ajtpon tq'ijlalil tu'n kyb'jaw nsk'o'ne', che okyil toj xjel wu'ne' tojxi'x tu'me'l.³Aj tlu'lunju' tx'otx' kyuk'i'lxi' najlqe' twitz, ayinweju'ye' tzyulte tq'uqlil b'a'nxi'x. Chi Dyos.⁴Inxi'nma'ne' kyeju' nimalkyib' ex b'inchal myab'a'n: Lalun jaw kynima'n kyib'e';⁵lalun kyla'jikyib'e' qa ati kyipumale' ex lalun noq tz'el kylanu'n kyole'. Nchije' kye.

⁶Qu'n myatzu' ntzaja'te' xjel qe toj tjawetzq'ij mo toj tkub'exq'ij, ex mya toj chq'ajlaj mo kywi'witz,⁷ana'te Dyos Ajkawil: junjun nche kub'tme'ssa'n atzun junjuntl nche b'jaw tlaq'b'a'n.⁸Tzyu'n tk'wab'l Qman Dyos, smo'n twitz ex tx'amjsa'n, aju' tk'ayil ttx'u'jil. Ajtzun ttzaj tqo'nju' b'in lu, kykyaqilju' b'inchal myab'a'n twitz tx'otx' tik'x kb'ajel kyk'wa'n.

⁹Kxe'l npakb'a'ne' Qman Dyos ja k'uluna' Jakob' kukxju' ex chin b'itzale' ajwalb'ilte;¹⁰qu'n kb'el t-xitu'n kyninb'ilkyib'ju' b'inchal myab'a'n, atzu'n xjal tnik'alti'j kxe'l tq'o'nxi'xtl tipumal, chiju' b'itzal. Tkyaqil nkub'ti'j tu'n Dyos¹Ojtzqi'nte Dyos kyu'n aj Juda; b'i'nxi'xte' tb'i kyu'n kykyaqil aj Israel.²Tkub'ju' tja twi' witz Syon, toj Jerusalen;³Atzuntzu' ekub'a' ttoqi'na' q'ojb'il: e'kolb'il, e'k'uẍtx'e'nb'il, e' smaj kyuk'i'l tal.

⁴¡Nman Dyos, tb'anilxi'xta! ¡Nimxi'xta toklen kyekywitzju' witz te kanb'ab'l!⁵Aye'ju' min nche xob' b'je'l iq'i'n ti'xti' kye; mixti'xte b'ent kyu'nju' kuwqe'; ¡noq eb'jik'ktan!⁶Mixpe'ti'x b'ent kyyukchanteju' karwaj ex b'a'nchej tej kyxi' t-xob'sa'na Dyos, ju' k'lunjtza tu'n Jakob'.

⁷¡Xob'le'nxi'xta twitz, Dyos! ¿Alxi'xkye kb'entel twe' twitza ajttzaj ttx'u'jila?⁸Ntzaj tq'o'na xjel tzmax toj kya'j; nxob'ju' tx'otx' ex nkub' nak'e twitza,⁹Nman Dyos, aj tb'inchanteju'ya tnik'alti'j tu'n kykletju' nche yajti twitz tx'otx'.

¹⁰Kmiltz'ujel kytx'u'jilju' xjal te ajwalb'ilteya; ¡naqpena' ch'i'n kytx'u'jil k'okyil te tkorona toj twi'ya!¹¹Che kytziyanx kyole' te Qman Dyos, ex che japunx kyu'ne'. Aye'ye' txolchiqe'ye' ti'ju' ati t-xob'il kyi'je', ¡Kyiq'intz oyaje' te!¹²Ana'te in elq'inte kychwinqlalju' nche kawin ex ati tchi kyi'ju' nimaqkawil twitz tx'otx'. Chiju' b'itzal. Xinb'e'tz kyib'aju' tb'inchb'aj Qman Dyos¹Injaw tq'ojq'ojel nwi'ye' te Dyos tu'n ntzaj tb'i'ne'.²In njyo'ne' Qman Dyos toju' q'ij qa nchin b'isune', ex min nchin q'jene' tu'n tjaw nmujb'a'n nq'ob'e' toj na'j Dyos te qonik'an. Min nknet jatu'n toka'qe nk'u'je'.³Ajttzaj nna'ne' Dyos, inchin noq'e'; inchin kub' tene' ximal ex nchin kub' numje'.

⁴Layx chin wtane' Nman Dyos qa min ẍintzaj ttzaq'we'na; ¡mixti'x nb'entl nyoline' tu'n txqan b'is wi'je'!⁵Inchin ximane' kyi'ju' q'ij exqe' ab'q'i ojtxi';⁶na'n wu'ne' intoq chin b'itzane' te qonik'an. Inchin xjelune' ex nchin ximane' toj wanmiye' tib'aj:⁷¿Ma kukxtzunlo ttx'u'jin Qman Dyosju'? ¿Ma laytzunlo qotk'u'jla jumajtl?⁸¿Mamatxi'tzunlo b'aju' tk'u'jlalil? ¿Ma majxtzunlo oje kyajb'aju' tyol tziya'n tu'n?⁹¿Ma matxi' tzik'tna'lju' t-xtalb'il Dyos tu'n? ¿Mamajxtzun matzaj ttx'u'jil, tu'n min nlaqltk'u'j qi'j?¹⁰Axi'xwe' nch'yon we ajtkub' nxima'ne' ¿min nqo toni'ntl Qman Dyos kse'n tnejel?¹¹Che tzajel nna'nju'ye' tb'inchb'en Dyos tb'anilqexi'x ẍeb'aj tb'incha'n ojtxi';¹²kchin ximale' ti'j tkyaqilju' taq'un oje tb'incha.

¹³Nman Dyos, xjanta toj tkyaqilju' tb'inchb'ena; ¿alxi'xkye juntl dyos nim toklen kse'n aya?¹⁴¡Ateju'ya Dyos nb'inchankye tb'anil b'a'nq'ob'aj! ¡xityek'u'na tipumala kyeju' nimaqtnam!¹⁵E' tkolju'ya ttanama tu'n tipumala, aye' tk'wal Jakob' ex tk'wal Jse.

¹⁶Nman Dyos, tzaj xob'il ti'ju' ninnjab' tej txi' ka'yi'na tu'n, ex ku'pun tyukchi tzmaxtzu' t-xexi';¹⁷tzaj nim jb'al kyu'nju' muj, ojexi'x tinun twitz kya'j tu'n q'ankyaq toj tkyaqil twitz tx'otx'.¹⁸B'injtzu' tq'ojq'ojela ntinun toj saqchanpach; tkyaqil twitz tx'otx' kub' spik'e' tu'n xloq'lokya'j ex b'aj yukchiju' tx'otx' tu'n kyejnajnab'.¹⁹Jqet b'e tu'na toj ninnjab'; ik'xa kyoj txqan a', ex mix-a'lo'xte ka'yinteju' tqanb'ena.²⁰Eb'ajx t-ẍaqlu'nju'ya ttanama kse'n txqan rit, kyu'nel Moyses ex Aaron. Chiju' b'itzal. Tb'inchb'aj Dyos b'a'n kyeju' ttanam¹Ntanam, b'intzju'ya nxnaq'tzb'ile'; ¡b'inku'ya kxe'l nma'ne' teya!²Chin yolile' toj techlal; kyi'ju' ti'xti' e'wa'nqe' ttzajlenx ojtxi'.³Aju' oje qb'i ex ojtzqi'n qu'n aju' kyej q'ma'n qe kyu'n qman,⁴lalun che kub'qewa'n kywitz qk'wal. Qajwali'nktz Qman Dyos kyuk'i'lju' che itz'jel yajxi'tl ex qajwali'nktz tu'nju' tipumal ex tb'inchb'en te lab'te'nqe'.

⁵kub' tq'o'n Qman Dyos jun kawb'il te Jakob'; kub' tq'o'n jun nuk'b'il tu'n kyoklpe aj Israel ti'j, ex tchaq' kyeju' ojtxi' qyajilb'en tu'n t-xikyek'u'n kye kyyajajil che ul yajxi'tel,⁶tu'ntzun kyojtzqinteju' kyyajajil che b'ju'l yajxi'tel, e'kyk'wal che ul itz'ji, tu'n txi' kyxnaq'tza'ntl kye kyk'wal;⁷tu'ntzun tokqe kyk'u'j ti'j Dyos ex tu'n lalun tzik'tna'lju' b'aj tb'incha'n kyu'n; tu'n kyxi'kynima'n tchaq'b'il⁸ex tu'n lalun che ok kse'nqe' ojtxi' kychman, eb'jaw miltz'uj ex xnakqe', min qe kyk'u'j toj kyanmi; ¡min xjapun kyol twitz Dyos!

⁹Aye' tyajajil Eprayin, b'entnitoq kyten tu'n kyq'ojin tu'n smaj, eb'ajkub' oq toju' q'ij tej tokju' q'oj;¹⁰Min xikynima'n kyol b'entniti'j tuk'i'l Dyos ex min kyaj tu'n txi' kyb'i'n t-xnaq'tzb'il.¹¹Ik'tna'lju' tb'incha Dyos kyu'n, aye' b'a'nq'ob'aj tb'incha Dyos kywitz.¹²E'tb'incha Dyos b'a'nq'ob'aj kywitzju' kyman toju' tx'otx' Soan, toj Ejipt:¹³kub' taq'pu'n ninnjab' toj kab'e', ex eb'jik'x tiq'i'n toj, kyej tenju' a' naku'j tapi tu'n.¹⁴Nejlitoq kywitz toj jun tnej muj te q'ijtl, atzu'n qonik'an tu'n t-spik'umal jun tnej q'aq'.¹⁵E'tjaqju' pik toj chq'ajlaj, ex nim a' etz kyoj te kyk'wa' tu'n.¹⁶¡Tb'incha Dyos tu'n tetz chitj nim a' toj pik exb'et kse'n jun nin a'!

¹⁷Aye'tzunkye kukxtoq kyb'inchan ilju'; jawkyiq'i'nkyib' ti'j Dyos te jawnixi' toj chq'ajlaj.¹⁸Oktoq kyq'o'n Dyos toj joyb'ilti'j xikyqani'n kywa kse'nxtoqu' kyajb'il.¹⁹Eb'aj yolin ti'j ex kyma: ¿Ma oktzun kb'entel tkub' tq'o'n Dyos qwa toj chq'ajlaj?²⁰Axte' tjaqte Dyos pik; ex nim a' etzchitj toj kub' qojli twitz tx'otx', kse'n jun nin a'; atzu'n ja'lu, ¿ma jaku'tzun b'ent ttzaj tq'o'n Dyos wab'j? ¿ma jaku' b'ent ttzaj tq'o'n kychi'ju' ttanam? Chechij.

²¹Tetzunj tb'inte Dyos ja'lu, tzaj ttx'u'jil; ¡ojexi'x jaw ja'yon ti'j Jakob', kse'n jun q'aq'!²²Qu'n min okqe kyk'u'j ti'j Dyos ex min kyokslaju' kolb'ilkye.²³Tu'npetzunju', tzaj tchq'o'n Dyos muj ex tjaqju' kya'j;²⁴¡tzaj tchitu'n mana tib'aju' ttanam, aju' triy te toj kya'j, tu'n kywan ti'j!²⁵¡E'wanju' xjal ti'j kywa anjl!
¡Nim kywa tzaj tq'o'n Dyos!²⁶Tzaj jub'inju' kyq'iq' twitz kya'j toj tjawetzq'ij ex toj tnayajkya'j; ¡tu'n tipumal Dyos!²⁷Tzaj tchitu'n kychi'ju' ttanam; ¡e'tzaj chitj pich' twitz kya'j kse'n tz'awun ttzi ninnjab'!²⁸E'kub' tchitu'n Dyos toju' xmuj ex kyi'jileju' kypach xb'alun.²⁹Eb'aj wantzuntz tzmax kyb'ajnoj b'a'nxi'x, iktzun tb'incha Dyosju' kye kse'nxtoqu' kyajb'il.³⁰Na'mxtoqpe' tqe kyk'u'j tu'n kywan, atixtoqju' kywa toj kytzi,³¹tej tzaj ttx'u'jil Dyos kyib'aj Eb'ajkub' tb'yo'nju' ichan nim kyipumal. ¡E'kub'tb'yo'nju' ichan atixi'x kynab'l tij Israel!

³²Tu'npetzu'n tkyaqil ja'lu, eb'inchantl il twitz Dyos; mixti'x kyokslaju' tb'inchb'en Dyos te lab'te'n.³³Qu'mtzun eltiq'i'n Dyos kychwinqlal naku'j jun jiq'cha'nqe' ex e'kub' tq'o'n toj yajb'il xob'ajilx.³⁴Qa nche b'yonjtz tu'n Dyos, nche jyontzuntz ti'j; inok qe kyk'u'j ti'j, ex inxi'x che jyon ti'j;³⁵inultzuntz toj kyk'u'j qa a Dyos te toj kya'j intoq xq'uqinkye ex in klonkye.³⁶Tb'anilxi'xpetzun che yolin extzun naq chajyolil nb'je'tz toj ktzi,³⁷najchaqtoq ta' kyanmi ti'j Dyos ex min nkb'incha'n kse'nxju' yol kyejni b'entti'j.

³⁸Atzunte Dyos nimxi'x tk'u'jlalil, kub' tnajsa'n kyil myab'a'n ex min e'kub' t-xitu'n; b'a'npumaj tjuk' ttx'u'jil ex min xitq'o'n anb'il teju' tq'oj.³⁹Tzaj tna'n Dyos qa naq xjalqe'; qa ikyqe' kse'n kyq'iq' inik' jumj ex min in anjtztlti'j.

⁴⁰¡Jte' majlo min nche b'in te Dyos ex okkyq'o'n ttx'u'jil toj chq'ajlaj!⁴¹Ex intoq okkyq'o'ntl toj joyb'ilti'j; ¡intoq okkyq'o'n tb'is Dyos xjan tib'aj Israel!⁴²Min tzaj kyna'nju' q'ij tej kyklet tu'n Dyos tu'n tkyaqil ipumalj, kyeju' kyajq'oj;⁴³tej tb'inchante nimaq ti'xti' te lab'te'n kyoj kojb'il Soan, toj Ejipt;⁴⁴tej kyjaw b'entju' nin a' tu'n te chik', ex min b'ent txi' kyk'wa'n aj Ejipt.⁴⁵E'tzaj tq'o'n xtx'o ex ta'jinchej kyib'aj, b'aj kyaju'n tkyaqil ex kub' kyxitu'n;⁴⁶xitq'o'n twitz kyawal matxi'toq b'aj kyaq'una'n kye ẍt'ikt'u'l tu'n tb'aj kywan.⁴⁷B'ajkub' t-xitu'n tqan kylob'aj iw ex kyawal tu'n saqb'aqun ex txun che'w.⁴⁸Eb'aj kyimju' kywakyix ex kyrit tu'n saqb'aqun tuk'i'l q'ankyaq.⁴⁹Tzaj tq'o'n Qman Dyos ttx'u'jil kyib'aj: tx'u'jilj, k'ixk'oj ex yajb'il, sanjelalqe' te kamik.⁵⁰¡Tzaj ttx'u'jil b'a'nxi'x! Mix kub'a' tnajsa'n kyil, tzajpe' tq'o'n kamik kyib'aj;⁵¹¡tb'incha tu'n kyb'ajkyimju' tnejel k'wa'lb'aj kye kykyaqil aj Ejipt tojx kytanam!

⁵²Eb'je'tz tiq'i'n aj Israel kse'n jun k'loj rit; xitiq'i'nju' ttanam toj chq'ajlaj.⁵³Xq'uqi'nqe' b'a'nxi'x tu'n tej kyb'je'tz tiq'i'n tu'n lalun tzaj xob'il kyi'j, aye'tzu'n kyajq'oj eb'ajkyaj muqli tjaq' ninnjab'.⁵⁴Tzaj tiq'i'n Dyos ttanam toju' tx'otx' xjan, ¡kywi'witz eb'aj kanb'et tu'nku'!⁵⁵Eb'je'l tiq'i'n xjal witzleb'ilqe' kywitzju' aj Israel; ex b'ajx t-sipa'n tx'otx' kyxolju' kyyajajil, ex e'kub' najan tu'n kyoju' kypach xb'alun.

⁵⁶Aye'tzunkye okkyq'o'n Dyos te toj kya'j toj joyb'ilti'j jawkyi'nkyib' ti'j ex min exi' kynima'nju' tchaq'b'il;⁵⁷qu'n ikqe'xju' kse'nqe' kyman, kyej kykolb'e'n Dyos ex min e'okslan te; ¡eb'ajkub' ch'okyix toj kyb'e naku'j jun tze ch'okti'j!⁵⁸Okkyq'o'n ttx'u'jil Dyos tu'n kyq'olb'eb'l te witzileb'; eb'aj k'ulun kywitz ex jaw xky'aqlin kyi'j.⁵⁹Tzaj ttx'u'jil Dyos tej tka'yinte ja'lu, ex majx eb'je'l t-suchu'n aj Israel,⁶⁰ex kyej tkolb'i'n ja xjan toj Silo, ju' tjatoq kyxolju' xjal.⁶¹Taq' anb'il kyeju' tajq'oj tu'n t-xikyiq'i'n techlal tajwalil ex toklen.⁶²Ojexi'x tx'u'jin kyi'ju' ttanam, eb'ajx tq'o'n te twa kyk'uẍtx'e'nb'ilju' kyajq'oj.⁶³Eb'ajkyimju' ku'xun toj q'aq'; ¡mixti'x ok tzalajb'il te mjeb'le'n kyi'ju' qpoj!⁶⁴Ex eb'aj kyimju' pale tu'n k'uẍtx'e'nb'il, ex min e'oq'ju' kyxu'jil kyi'j.

⁶⁵O'kx ttzaj tna'nttib' Qman Dyos naku'j intoq wtan, naku'j jun xjal te q'oj inel q'e'n toj twi',⁶⁶ex kub'kyi'ju' tajq'oj, ex eb'ajkub' oq tu'n; ¡el kych'ixaw tejumajx!⁶⁷Expe' eb'je'l tik'u'n toj tja Jse, ex min e'jaw t-sk'o'n tyajajil Eprayin;⁶⁸eye'kye' tyajajil Juda eb'jaw t-sk'o'n extzu'n witz Syon k'u'jla'n tu'n.⁶⁹Jawtb'incha'n jun ja xjan, nimin twe' kse'n kya'j, ex tkuwsa tu'n tten tejumajx kse'n tx'otx'.⁷⁰Jaw t-sk'o'n Dab'i ju' tmajen aju' k'ik'leltoq rit;⁷¹eltiq'i'n ti'ju' k'ik'lej rit, tu'n t-xq'uqinteju' ttanam, tu'n tok k'ik'lel kyi'ju' aj Israel.⁷²Ex e't-xq'uqi Dab'i ttanam Dyos; e't-xq'uqi ex eb'ajx t-ẍaqlu'n tuk'i'l nab'l ex tuk'i'l tkyaqil tk'u'j. Chiju' b'itzal. K'ixk'oj tej tkub' xitu'n Jerusalen¹¡Nman Dyos, matxi' b'aj kyetza'n xjal ttx'otx'a, ju' nche niman kye txqantl dyos! ¡Matxi' b'aj kyxmayi'n tjaya xjan ex matxi' b'aj kyxitu'n tnam Jerusalen!²¡Matxi' che b'aj kub' kyb'yo'n tmajina tnik'alkyi'j, ex matxi' che b'ajkyej kyq'o'n te kychi' k'utz ex kychi' tojk'ul txkup!³Makub' qojli kychk'el naku'j a' toj tkyaqil Jerusalen, ex mix-a'lo' te' tu'n tku'x muqunkye.⁴Matxi' qo okye' te kyxmayb'il qb'esine'; ex te kytzeb'lju' xjal ate' qi'jileye'.

⁵Nman Dyos, ¿ma tejumajxtzun ju' ttx'u'jila? ¿Ma oktzun k'entil kukxju' qi'je' kse'n q'aq'?⁶¡Tzaqpinxa ttx'u'jila kyib'aj kykawb'ilju' nimal kye txqantl dyos ju' min ojtzqi'na kyu'n ex min nche kub'san twitza!⁷Qu'n eb'jo'kten walkye tk'wal Jakob' ex naq tik'lentl kyejten kyu'n.⁸Lalun tb'inchaya tu'n qchjonteju'ye' il kyb'inchaju' ojtxi' qchmane'; ¡tzajxwitju' tk'u'jlalila lwiy k'lulqeye', qu'n matxi' qokub'aje'!

⁹Nman Dyos, aya klol qeye', ¡qotoniya, qo tkloma ex najsanku'ya qile', tu'n tnimetju' tb'iya!¹⁰Mixti' tu'n kymantekye' nche niman kye txqantl dyos: ¿Jatzunta' Kydyos? Chechiwt. ¡Q'ontza anb'il tu'n qlonteye' tu'me'l t-xel kyeju' ẍekub' b'yonkye tmajena! ¡Ex tu'n kyb'inteju' xjal nche niman kye txqantl dyos!¹¹B'intza tq'ojq'ojel kywi'ju' jpu'nqe', ex klonqe'mju'ya b'entni ti'j tu'n kykyim tu'n tipumala.

¹²Nman Dyos, q'onka wuq maj tu'me'l t-xel kyeju' qb'esine' tu'nju' myab'a'n matxi' kyb'incha teya;¹³ayo'tzunqe' ottanamqo'ya, ex t-ritqo'ya toj tch'laja, qo q'ol chjonteye' teya kukxju', ¡qo b'itzale' te ninb'ilteya toj tkyaqil tab'q'iyil! Chiju' b'itzal. Q'aq'antz tk'u'ja qi'je'¹Aya k'ik'lel kye aj Israel, in t-ẍaqlu'na tyajajil Jse kse'n jun k'loj rit, ati tq'uqb'ila kyib'aju' kyerb'in, ¡qo' tb'itza! ¡Q'aq'antz tk'u'ja kyi'ju' kyyajajil Eprayin,²B'enjamin ex Manases! ¡Na'ntztib'a ex kuttzaja klol qeye' tuk'i'l tipumala!

³Nman Dyos, ¡Anjsama qi'je' tu'n qokye' kse'n tnejel! ¡Qo' tka'yitza tuk'i'l tk'u'jlalila tu'ntzun qklete'!

⁴Nman Dyos, nimtipumala, ¿jtoj q'jenju' ttx'u'jila tu'n ttzaj tb'i'na tna'j Dyos ttanama?⁵Matxi' tzaj tq'o'na b'is te t-xel qwaye'; ex ta'l qwitze' te t-xel qk'wa'ye'.⁶Matxi' qo oktq'o'na te kyxmayb'ilju' qb'esine', ex inche tze'nju' qajq'oje' qi'je'.

⁷Nman Dyos nimtipumala, ¡Anjsama qi'je' tu'n qokye' kse'n tnejel! ¡Qo' tka'yitza tuk'i'l tk'u'jlalila tu'ntzun qklete'!

⁸Etz ti'na junwi' lob'j ub'a toj Ejipt; eb'je'x t-xla'ja'na xjal nche niman kye txqantl dyos toj kytx'otx', tu'n kypon tq'o'na toj.⁹B'aj t-ẍtilsa'nju'ya tx'otx' te, atzu'n junwi' lob'j lok'an ex noj twitz tx'otx' tu'n.¹⁰B'aj tktxu'n k'ul tu'n tewun, exqe' nimaq tze eb'aj ktxet kyu'n tq'ob'.¹¹Eb'ajx lik'j tzmax tib'aj ninnjab', exqe' t-xul e'pon kanun tzmax toju' nin a' Ewprates.¹²¿Titiqu'n xkub'a' t-xitu'nju'ya tapi ti'jile, naq tu'n kyel t'uxi'n twitz ub'a kyu'n xjal nche b'et toj b'e?¹³Tokju' tb'och k'ul yajulte; ¡nche oktenju' tojk'ul txkup walte!

¹⁴B'inchama xtalb'il, Dyos nimtipumala, kutanjtz ti'ja; ka'yintza b'a'nxi'x tzmax toj kya'j ex q'aq'antz tk'u'ja ti'ju' wi' lob'j lu,¹⁵ti'ju' tqan lob'j aku'ya ku'x awante, ti'ju' t-xul aku'ya kyej q'onte.¹⁶Tu'n ttx'u'jila xitu'nqe'ku'ya ate'k tx'emulte ex tz'e'ysalte;¹⁷atzu'n ichan xjaw t-sk'o'na onima, ju' t-xul ichan aku'ya kyej q'onte,¹⁸ex lay tz'el qpa'ntl qib'e' ti'ja. ¡Q'ontza qchwinqlale', ex o'kxtzu' qo kub'sala'qe' twitza!

¹⁹Nman Dyos nimtipumala, ¡Anjsama qi'je' tu'n qokjumajltle' kse'n tnejel! ¡Q'aq'antz tk'u'ja qi'je' tu'ntzun qklete'! Chiju' b'itzal. T-xtalb'il Dyos ex kyb'inchb'aj aj Israel myab'a'n¹¡Che b'itzan qe'ye' te Dyos tuk'i'l tzalajb'il, qu'n ate qipumal! ¡Kyajwalinktze' Dyos ja ajb'ena' Jakob' tuk'i'l sich' te tzalajb'il!²Che b'itzan qe'ye' tuk'i'l tq'ojq'ojil tanb'orin, tuk'i'l chnab' arpa ex tzintzin.³Che chinb'anqe'ye' ti'j chun aj tka'yin xjaw, ex aj t-xk'o'mix xjaw, qu'n a ninq'iju' qe.⁴Qu'n a chaq'b'ilju' tzaj tq'o'n Dyos kye aj Israel ja k'uluna' Jakob';⁵a chaq'b'ilju' tzaj q'o'n te Jse tej tetz Dyos ti'j Ejipt. Xinb'i'ne' jun tq'ojq'ojel wi'yj min ojtzqi'n wu'ne':⁶Matxi' tz'el wiq'i'ne' iqtz ti'j tqula, matxi' nkolpiya toju' aq'untl kuw.⁷Inttxoka toju' yajb'il ex makleta wu'ne'; tzaj ntzaq'we'na tzmaxtzu' toj muj in julin; kub' nq'o'na toj joyb'ilti'ja ttzi a' Merib'a.⁸B'intzju'ya kxel woqxena'ne' teya ntanam; ¡noqwit ikj chinx tb'i'na, aya Israel!⁹Lalun che kub' tq'o'n tdyosa te junxi'tl tnamqe'; ex lalun k'uluna kye junxi'tl dyos.¹⁰Ayinwe' Dyos Manb'aj, inetz q'inteya toj Ejipt; qanintza twaya ex knnojsa'ya, nchije'.

¹¹Atzunte' ntaname' mixti' ẍinx tb'i'ne'; ¡Mixti'x ẍinx toksla'ne' Israel!¹²Qu'mtzun ẍe kyeja' ntzaqpi'ne' toju' tch'uẍal kyanmi. ex mache anq'in kse'nxju' kyajb'il.¹³¡Noqwit ma chinx tb'i'nju'ye' ntaname'! ¡Noqwit mab'et Israel kyoju' nb'eye'¹⁴tojwitlo jun kmujx ẍekub'a' nme'ssa'nju'ye' tajq'oj ex mawtlo kub' ntz'e'ysa'n kywitzju'ye' ẍeokmiltz'uj ti'j! Chi Dyos.

¹⁵Ma'wtlo che kub'mejeju' nche el ik'unte Qman Dyos, ex ma'wtlo kyej tenju' tz'e'ysb'il kywitz tejumajx.¹⁶Ma'wtlo tzaj tq'o'n Dyos tb'anil triy te kywaju' ttanam, ex ta'lkab' witlo toj aq saj tq'o'n tu'n tel k'waj kyi'j. Chiju' b'itzal. Ate Dyos ajkawil tib'aj tkyaqil¹Q'uqlite Dyos toj tkawb'il toj kya'j ex nchaq'un kyib'aju' ajkawil kjalu:²¿Ma kukx nxi' kypoqo'nju'ye' tuk'i'l chajyolil ex q'o'n kyib'e' kukxju' kyuk'i'l b'inchal myab'a'n?³¡Kyb'inchame' tnik'alilti'j teju' numjni ex teju' meb'a! ¡Kyb'inchame' tnik'alilti'j teju' prow ex teju' ati nojqelan te!⁴¡Che kyklomju'ye' mixti' kyipumal ex prow, che kyklome' toj kyq'ob'ju' b'inchal taq'wix!

⁵Aye'tzunkye' min nb'ant kyu'ne', min nok toj kywi'ye'; toj qxopin nche b'eta'ye'. Inxi'x yukchi tx'otx' kyu'ne' ex mixti'x nkych'exb'e'n kynab'le'.⁶Nmaye' qa dyos qe'ye'; ex kykyaqilxe' nk'walqe'ye' ayine' Dyos te toj kya'j.⁷Tu'npetzunju', che kyimele' kse'nqe' kykyaqil xjal, ¡che b'eltz'aqe' kse'n jun nimaqkawil min xkawin b'a'n! Chi Dyos.

⁸¡Atzun Nman Dyos, tzajku'ya kawil twitz tx'otx', a na'ta kyajaw kykyaqilju' nimaqtnam! Chiju' b'itzal. Na'j Dyos tu'n tkolon Dyos¹Nman Dyos, ¡lalun kyej numeya!, ¡lalun noqx qotzaj tb'i'na, qo' ttzaq'wetza!²Ka'yinqe'tzju'ya tajq'oja, aye' intx'a'lti'j kyk'u'j ti'ja: matxi' che b'jaw tilj ex matxi' che b'jo'k miltz'uj ti'ja.³Matxi' b'ajkub' kyxima'n ti'xti' taq'wix ti'ju' ttanama, ¡kyi'ju' xq'uqi'nqe' tu'na!⁴Matxi' kub' kyxima'n tu'n kyul xitulqeye' tu'n tkub' naju' qtaname', tu'ntzun lalun tzaj na'ntl tb'i Israel.⁵Kykyaqil matxi' kyej b'entti'j kyu'n, matxi' kymujb'a kyib' tu'n kyb'jo'k miltz'uj ti'ja:⁶aye' kyxmuj aj Edom ex aj Ismael, exqe' kyyajajil Awar ex Moab',⁷Web'al, Amon ex Amalek, exqe' pilistey najlqe' toj Tiro,⁸exqepe' aj Asirya matxi' kymujb'a kyib' kyuk'i'l, ex aye' kyipumalju' tyajajil Lot.

⁹B'inchama kyi'j kse'n tb'inchaya ti'j Madyan, kse'n tb'inchaya ti'j Sisara, ex ti'j Jab'in toju' tnimal a' Kyison,¹⁰aye' majx eb'aj toj Endor, ¡ex eb'jo'k te ttz'isil tx'otx'!¹¹B'inchama kyi'ju' kyxjal nimaq kyoklen kse'n tb'inchaya ti'j Oreb' ex ti'j Seeb'; b'inchama kyi'j kykyaqilju' kynejel kse'n tb'inchaya ti'j Seb'a ex ti'j Salmuna,¹²matoq kub'kyetza'n tk'ik'leb'l Dyos.

¹³Nman Dyos, b'inchama tu'n kysirun kse'n saqch'i'x, kse'n t-xaq tze nche'x tiqa'n kyq'iq';¹⁴ex kse'n k'ul nb'aj tu'n q'aq' ex nche b'aj tkyaqilju' tze tu'n,¹⁵¡iktzu'n ljoma toj kyq'ij kyu'n yajb'il ex xob'sanqe'xa kyu'n tq'ankyaqa!¹⁶¡Tz'elx kych'ixaw tu'na Nman Dyos, tu'ntzun kykub'san teya!¹⁷Tz'elxwit kych'ixaw tejumajx; ¡che kub'xwit ch'ixwi ex che kyimxwit!¹⁸¡Tu'n telkynik' qa o'kxta Dyos Manb'aj, qa o'kxta Dyos te toj kya'j tib'aj tkyaqil twitz tx'otx'! Chiju' b'itzal. Wajb'ile' tu'n ntene' toj tja Dyos¹¡Nman Dyos nimtipumala, tb'anilxi'xte' tjaya xjan!²¡Inxi'x pon nk'u'je' ex nchin elb'aje' tu'n ntene' tpenju' tjaya xjan! ¡Chin b'itzale' teya Dyos tajaw chwinqlal tuk'i'l tkyaqil wanmiye'!

³Exqepe' tz'unin ex kolondrina inokyal jatu'n kyb'inchante kypaqb'il kyal ti'ju' tq'olb'eb'la, Nman Dyos nimtipumala, aya Ndyose' ex nnimaqkawile'.

⁴¡Tzalajb'ilte' kyeju' nche najan toju' tjaya ex min nche qen tu'n kyb'itzan teya!⁵¡Tzalajb'il kyeju' nknet o'nb'il kyu'n tuk'i'la, aye' kyajb'il tu'n kyb'et toju' tb'eya xjan!⁶Aj kyb'ji'k' toju' b'ya' b'isb'ajilxi'x che jawil b'ent t-xiklil a' toj, expe' ajttzaj jb'al nche jawb'ent a' tu'n tky'iwb'il Dyos;⁷kljetel tch'iy kyipumal, ex k'okyel kyka'yi'n Dyos nim toklen toj Syon.

⁸Nman Dyos, te tkyaqil ipumalj, ja k'uluna' Jakob' ¡b'intzju'ya nna'j Dyose'!⁹Nman Dyos, ka'yintzju'ya klol qeye', tuk'i'l tk'u'jlalila aju' jawni t-sk'o'na te nimaqkawil.

¹⁰¡Nimxi'xte' toklen tu'n qten jun q'ije' tpenju' tjaya, kyetwitz junmutx' q'ij ti'jxi'! Ate b'a'n tu'n ntene' xq'uqil ttzi tja Dyos, kyetwitz tu'n ntene' janche b'inchanjtza' taq'wix.¹¹Qu'n intq'o'nte Qman Dyos spik'un qe ex nqo t-xq'uqi'n; inche tk'u'jla'nte Qman Dyos nche anq'in toj ttxolilti'j ex inche jawtnima'n, ex mixti'x nkub' t-xk'ayu'n jun b'a'n kye.

¹²Nman Dyos nimtipumala, ¡tzalajb'ilte' kyeju' q'uqlok kyk'u'j ti'ja! Chiju' b'itzal. ¡Qo tklom jumajtla!¹Nman Dyos, matxi' tz'okta majx b'a'n tuk'i'lju' ttanama lu. matxi' tzaj tanjsa'n jumajtlju'ya ttzalajb'il Jakob';²matxi' kub' tnajsa'na tilju' ttanama ex tkyaqilju' kyb'inchb'en myab'a'n;³majx matxi' kub' nak'e tq'oja ex ttx'u'jila.

⁴Nman Dyos ex Klol qeye', ¡qo' tkloma ja'lo ex lalun tx'u'jintla qi'je'!⁵¿Ma kukxtzun tq'ojinju'ya qi'je'?⁶¿Ma laytzun tzaj tq'o'n jumajtlju'ya qchwinqlale', tu'ntzun ttzalaju' ttanama ti'ja?⁷Nman Dyos, ¡yek'untza tk'u'jlalila qeye', ex qo' tkloma!

⁸Kxe'l nb'i'nwe' ktma' Qman Dyos; qu'n kyolil ti'ju' nak'b'il te ttanam, kyeju' b'a'n okslalqe' te, tu'ntzun lalun kyb'incha jumajtlju' myab'a'n.⁹Axxi'x nqaku' ta'te Dyos, kolol kyi'ju' nche niman te; ktenb'elju' tajwalil twitzju' qtx'otx'.

¹⁰Kkymujb'a'kyib'ju' tk'u'jlalil exju' ax, kkytz'u'li' kyib'ju' nak'b'il tuk'i'lju' tnik'alilti'j,¹¹kpuqilju' ax twitz tx'otx' atzu'n tnik'alilti'j ktzalajel twitz kya'j.¹²Aku'te Qman Dyos ktzajel q'onteju' jb'al, ex ktq'a' tawalju' qtx'otx'.¹³Kb'el neju' tnik'alilti'j twitz, ex kb'el tb'incha'nju' tb'e. Chiju' b'itzal. O'kxta Dyos¹Q'aq'antz tk'u'ja Nman Dyos, chin tb'itza, qu'n nchin b'isune' ex prowqine';²Chin t-xq'uqima, okslan wnaq qina'we' teya. Ateju'ya Dyos ink'lu'na; ¡chin tkloma ayine' tmajena q'uqli nk'u'je' ti'ja!

³Nman Dyos, q'aq'antz tk'u'ja wi'je', atl kmuj nchin kub'sane' teya.⁴Nman Dyos, q'uqb'antz ch'i'nwe' nk'u'j ayine' tmajena, qu'n teya nchin kub'sanaye'.⁵Qu'n majx b'a'nta Nman Dyos, ex nkub' tnajsa'na il; nim tk'u'jlalila kyi'ju' nche kub'san teya.

⁶Taye, b'intzju'ya nna'j Dyose', ¡b'intzju'ya nkub'sb'ile'!⁷Inchin kub'sane' teya toju' yajb'ilweye', qu'n inchin tzajttzaq'we'na.⁸¡Mixti' juntl dyos kse'n aya, Nman Dyos! ¡Mix-a'lo' juntl ikx tb'inchb'enju' kse'nta!

⁹Nman Dyos, aya kub' b'inchankyeju' nimaqtnam, ex che b'ju'l tk'etza tu'n kyk'ulun teya ex tu'n tjaw kynima'n tb'iya.¹⁰Qu'n o'kxta Dyos; ¡nim toklena ex nche tb'incha'na ti'xti' te lab'te'n!

¹¹Nman Dyos, yek'untza tb'eyila weye', tu'ntzun nxilpeye' ti'ja toj ttxolilti'j. Chin toniya tu'n nnimanteju'ye' tb'iya¹²Taye ex Ndyos, kjawil wajwali'na tu'n tkyaqil wanmiye' ex kjawil nnima'ne' tb'iya kukxju'.¹³¡Nimxi'xju' tk'u'jlalila wi'je'! ¡Machin tkola tu'n lalun chinxe' toj muqb'il!

¹⁴Nman Dyos, jun k'loj xjal mixti' kynab'l ex tx'u'jqe', ex mixti' tchiylala kye, matxi' che okmiltz'uj wi'je' ex kyajb'il tu'n nkub' kyb'yo'ne'.¹⁵Atzunta Taye, jun Dyosa tb'anilxi'x ex inlaq tk'u'ja. ati tpasensi, nim tk'u'jlalila exju' tyola ax.¹⁶Chin tka'yitza, ¡q'aq'antz tk'u'ja wi'je'! ¡Chin tkloma ayine' tmajena! ¡q'ontza tipumala weye'!¹⁷Q'ontz jun yek'b'il chik'lixi'x weye' ti'ju' t-xtalb'ila, ex che kub'xwit ch'ixwiju' ntx'a'lti'j kyk'u'j wi'je' ajtokkyka'yi'n. ¡Nman Dyos, inchin tzaj toni'na ex ntq'uqb'a'na nk'u'je'! Chiju' b'itzal. Ajwalb'ilteju' ninttanam Dyos¹Tkub'qe' tq'uqlil ninttanam Dyos kyib'aju' witz xjan.²Inxi'x che tk'u'jla'n Qman Dyos tjpelju' tnam Syon kyekwitzju' tja Jakob'.³Aya ttanam Dyos, nim ti'xti' tb'anilqexi'x nche q'manjtz ti'ja:⁴Kxe'l nma'ne' kyb'i junjunju' tnam ojtzqi'nqine' kyu'n: a junju' Ejipt ex B'ab'ilon, Pilistey, Tiro ex Etiopiy; kykyaqil ja'lu ti'ja ẍe tzaja' anq'in. Chiju' nq'omli.

⁵Kkyma' ti'ju' nintnam Syon: Ti'j ẍe itz'ja' ja'lu exju' chix. Chechiku'. Aku'te Dyos Manb'aj te toj kya'j q'mante.⁶Inkub' ttz'ib'a'n Qman Dyos toju' u'j ja tku'xa' kyb'iju' tnam: Ti'j saja' anq'inju' lu. Chij.

⁷Aye'tzu'n nche b'itzan exqe' nche chinb'an inkyma'n: Aju' nnajb'ile' atzu' ta' ti'ja. Chechij. Chiju' b'itzal. Nman Dyos, ¿tiqu'n nchin ela' tik'u'na?¹Nman Dyos ex klol weye', inchin qanin o'nb'ile' teya q'ijtl ex qonik'an,²¡k'momju'ya nna'j Dyose'!, ¡ex b'intzju'ya nkub'sb'ile'!

³Nim txqan taq'wix matxi' kub' tz'aq wib'aje', ttzi jul te kamik ta'qine';⁴¡nchin okq'o'ntle' toj kyajlal kyimni, qu'n matxi' chin kyaje' mixti'tl wipumale'!⁵Matxi' chin kyej kolb'ine' kyxol kyimni; ikqinju'ye' kse'nqe' matxi' che b'ajkyim toj q'oj ex matxi' che b'ajku'x mqu'n; kse'nqe'ju' oje che kyej ttzaqpi'na ex matxi' tzik' kyna'l tu'na.⁶Matxi' chin ku'x tq'o'na tzmax t-xexi' jul, kyoj qxopin ex nin kyxe.⁷Matxi' tzaj tb'ajsa'nju'ya ttx'u'jila wib'aje', ¡matxi' chin ku'x tmulq'i'na tjaq' ttolob' a'!⁸Matb'inchaya tu'n nkyaj kykolb'e'ne' wamiwe'; machin nok tq'o'na taq'wixi'x kye. ¡Ikyqinju'ye' kse'n jun pres layx tzaqpaj!⁹Tu'nju' nxi'x chin oq'e' xi'nkyeje' moẍ. ¡Tkyaqil q'ij nchin kub'sane' teya Nman Dyos, ex inche jaw wiq'i'nju'ye' nq'ob'e' twitza!¹⁰¿Ma oktzun b'entel tb'inchanteya b'a'nq'ob'aj kyi'ju' kyimqe'tl? ¿Ma oktzun b'entel kyq'on chjonteju' kyimni teya?¹¹¿Ma oktzun b'entel tpakb'etju' tyola ax ex tk'u'jlalila toj muqb'il ex toj tkawb'il kamik?¹²¿Ma ktzunlo k'elel tnik' jun ti'ju' t-xtalb'ila ex tb'inchb'ena tb'anilxi'x toju' tqxopinil kamik, jannik'a' kyna'l tkyaqil?

¹³Ayintzunwe' Nman Dyos, teya nchin kub'sana'ye'; inchin kub'sane' teya toj nna'j Dyose' te prim.¹⁴¿Titiqu'n nchin ela' tik'una, Nman Dyos? ¿Titiqu'n nkub'a' tewantib'a nwitze'?¹⁵Ttzajlenx toj nku'xumale' matxi' chin b'isunxi'ye' ex ch'inaqx min chin kyimaye'; matxi' tzik'x wu'ne' toju' yajb'il saj tq'o'na wib'aje'. ex layx wipatle'.¹⁶Matxi' tzik'ju' ttx'u'jila xob'ajilx wib'aje'; ex matxi' kub'wi'je' tu'n;¹⁷tkyaqil kmuj txoli'n wi'je' tu'n, kse'n tnimal a'.¹⁸Mache b'je'l tpa'nju'ya wamiwe' ex wuk'i'le' wi'je', noqx qlolj ati wuk'i'le' ja'lo, chiju' b'itzal. Yol kyej b'entti'j tu'n Dyos tuk'i'l Dab'i¹Nman Dyos, kxel nb'itza'ne' kukxju' qa b'inchal xtalb'ila; kxe'l nma'ne' kukxju' qa in japunxi'x tyola.²Kxe'l npakb'a'ne' qa tejumajxju' tk'u'jlalila; ex minti' nch'exb'et tyola, kse'n kya'j majx ati.³Kyej b'entti'j jun yol tu'na tuk'i'l Dab'i; kyej ttziya'na teju' tmajena sk'o'ntl tu'na:⁴Knb'incha'ye' tu'n kykawinju' tyajajila kukxju' te t-xela. Chija te.⁵Nman Dyos, Kykyaqilxju' najlqe' toj kya'j inche niman teya tu'nju' tyola njapun ex tkyaqilju' tb'inchb'ena tb'anilxi'x.⁶¡Mixti' jun dyos, mixti' jun toj kya'j ikywitju' kse'n aya, Nman Dyos!⁷Aya Dyos nim tchiylala ex nim toklena, txoli'nk ti'ja kyu'n anjl te toj kya'j.

⁸Nman Dyos, te tkyaqil ipumalj, teya tkyaqilju' ipumalj ex txoli'n ti'ja tu'nju' ax; ¡mixti' juntel kse'n aya!⁹Aya ntzak'unteju' ninnjab' intx'u'jin tu'na nkub'a' nak'eju' ttolob';¹⁰kub' tpech'u'na Raab' naku'xwitloj jun kyimni; mache'x t-slama'nju'ya tajq'oja tu'n tipumal tq'ob'a.¹¹Te teju'ya kya'j ex tx'otx'; aya kub' b'inchante tx'otx' ex tkyaqilju' ate' twitz.¹²Aya b'inchanteju' ati, tzajx tnayajkya'j pomnix tb'a'nq'ob'kya'j; nche b'itzanju' witz Tab'or ex Ermon tu'n kytzalajb'il toj tb'iya.¹³Nimtipumalju' tq'ob'a; kuwju' tb'a'nq'ob'a ex inkub'ti'j tkyaqil tu'n.¹⁴A tq'uqlil tkawb'ilju'ya ttxolilti'j ex tnik'alilti'j; nejlqe' tk'u'jlalil tuk'i'lju' ax twitza.

¹⁵Nman Dyos, ky'i'wla'nte' tnam in niman teya tuk'i'l tzalajb'il ex in b'et toju' t-spik'umala,¹⁶intzalaj tkyaqil kmuj toj tb'iya ex intzalaj tu'nju' tz'aqlixi'xa.¹⁷Axxi'x aya tipumal ex tb'anil; naq tu'n t-xtalb'ila nim qipumale' inten.¹⁸¡A Qman Dyos kolol qi'je'! ¡Ate Xjan tib'aj Israel nimaqkawil qe!

¹⁹Jun q'ij yolina toj witzik', kyeju' tmajena tnik'alkyi'j ex tzaj tma'na kye: Matxi' jawnsk'o'ne' jun ichan min nxob' toju' ntaname', matxi' txi' nq'o'ne' toklen ex matxi' woniye'.²⁰¡Matxi' knetju' nmajine' Dab'i wu'ne'! Matz'oknq'o'ne' te nimaqkawil tu'n waseyte' xjan²¹ex tkyaqil kmuj kwoni'ye'. ¡Knkuwsa'ye' tu'n wipumale'!,²²lay che q'ojinju' tajq'oj ti'j ex lay kub'ti'j kyu'n b'inchal myab'a'n.²³Che kb'el nb'yo'nju'ye' tajq'oj; ¡che elil wiq'i'ne' twitz! ¡Che kb'el ntoqi'nju'ye' ntx'a'lti'j kyk'u'j ti'j!²⁴Ktenb'el nk'u'jlalile' ti'j ex kjapumel nyole' te, ex nim tipumal ktenb'el wu'ne'.²⁵Knkuwsa'ye' toklen tu'n tkawin tzajx ttzi ninnjab' Mediteraney, tponx ttzi nin a' Ewprates.²⁶Ktma' weye': Aya Nmane'; aya Ndyose', klol weye' ex xq'uqilweye'. Chiku'.²⁷Kxe'l nq'o'ne' toklen te tnejil k'wa'lb'aj, kyib'aj kykyaqilju' nimaqkawil twitz tx'otx'.²⁸Ktenb'el nk'u'jlalile' ti'j kukxju', ex majx kjeltenju' nyole' kyejni b'entti'j tuk'i'l.²⁹Kche kawilju' tyajajil kukxju' te t-xel akx atiju' kya'j.

³⁰Qatzun makyej kykolb'i'nju' nxnaq'tzb'ile' qa min nche anq'in kse'nqe'x nchaq'b'ile',³¹qa min ẍejapun nkawb'ile' kyu'n exqa min nche'x kyb'i'n nchaq'b'ile',³²kb'el ntz'e'ysa'ne' kywitz tu'n tpaj kypi'sal ex kyb'inchb'en myab'a'n che b'ajel njumane' toj tze;³³atzu'n Dab'i lay b'aj nk'u'jlanteye', ex ilti'j kjapumel nyole' b'entniti'j tuk'i'l.³⁴Lay kub' nxitu'nju'ye' nyole' kyej b'enti ti'j tuk'i'l ex lay nch'exb'eju'ye' nyole' xintziya'ne' te.³⁵Jumajx oje txi' ntziya'ne' te, toj nxjanile', ex lay chin chanyole' te:³⁶kche kawilju' tyajajil te t-xel kukxju', akx atiju' q'ij.³⁷¡Ktenb'el kukxju', kse'n xjaw! ¡Ktenb'el kukxju', akx atiju' kya'j! Chija Dyos.

³⁸Tu'npetzunju', matxi' tz'el tik'u'nju'ya nimaqkawil jawni t-sk'o'na; ¡matxi' jaw tx'u'jina te!³⁹Matxi' kub' t-xitu'na tyola kyejni b'entti'j tuk'i'lju' tmajena; matxi' kub't-xonju'ya toklen twitz tx'otx'.⁴⁰Macheb'aj t-xopq'i'nju'ya ttapi: ¡ex mache b'ajt-xitu'na nimaqttanam!⁴¹Kykyaqilju' xjal nche b'jik' inb'ajx kyelq'a'n titi'xku' kyajb'il; inche xmayinkju' tb'esin ti'j.⁴²Matxitq'o'na kyipumalu' tajq'oj ex mataja tu'n kyb'aj tzalaj tu'nju' ẍe kanb'an.⁴³Matz'elti'na twitzteju' tk'uẍtx'e'nb'il ex min xtkuwsaya toju' q'oj.⁴⁴Matz'el ti'na tajwalil; matxi' kub't-xonju'ya tq'uqb'il twitz tx'otx';⁴⁵mattaqk'uya tab'q'iyil tchwinqlal ex nim tch'ixaw sel tu'na.

⁴⁶Nman Dyos, ¿ma kukxtzun tkub' tewa'n tib'ju'ya? ¿Ma kukxtzun ktenb'il ttx'u'jilju'ya kse'n q'aq' nk'ant?⁴⁷Taye, na'ntza naqch'i'n toju' nchwinqlale'; naq jte' q'ij in anq'inju' ichan kub' tb'incha'na.⁴⁸¡Mix-a'lo'te jun xjal in anq'in ex lay kyim! ¡Mix-a'lo' jun kkletil te tipumal kamik!⁴⁹Nman Dyos, ¿jatzunta' tk'u'jlalila atitoq tnejel, ju' kyej ttziya'na te Dab'i tu'n tjapun tu'na?⁵⁰Nman Dyos, na'nqe'tzju'ya tmajena nche ok ik'le'n kyu'n txqan xjal; ex inche exch'yonju' ik'b'il lu toj nk'u'je'.⁵¹Nman Dyos, ¡iktzun nqo oka' ik'le'naju'ye' kyu'n tajq'oja! ¡iktzu'n noka' ik'le'n tmajenju'ya jawni t-sk'o'na!

⁵²Nimanjtzxwitju' Qman Dyos tejumajx. ¡Ikxwitju'! Chiju' b'itzal. Tkyaji'n U'j (E' b'itz 90—106) Tejumajxte' Dyos, atzu'n xjal naq te jte' q'ij¹Nman Dyos, matxi' tz'oka te kolb'ilqeye' toj tkyaqil tab'q'iyil.²Atxi'x na'mxtoq kyb'aj b'entju' witz ex na'mxtoq tb'entju' tx'otx' ex tkyaqilju' ati twitz, atxi'x toju' tq'ijlalil ojtxi'xi'x ex toju' tq'ijlalil tzul, axteju'ya Dyos.³In nanjkyi'ju' xjal toj quq tu'na ajtmanteya kjalu: Kutanj kyi'je' toj quq aye'ye' xjal. Chija.

⁴Axxi'x, iky kab'k'al lajnaq (1,000) ab'q'iju' teya, kse'n q'ij ewi. ¡Ikyqe'ju' kse'n jte' kmoj xq'uqb'il toj qonik'an!⁵Inche'x b'alalan tu'na naku'j tu'n tnimal a', ex inik' kyna'l naku'j jun witzik';⁶ikyqe'ju' kse'n k'ul inche b'echin te prim, ajtzun tok qale nche kub' tzqij ex nche kyim.

⁷Axxi'x, inqo b'aje' tu'nju' ttx'u'jila, ¡inqo' kyej chukjiye' tu'n!⁸Q'ancha'l qexi'xju' qile' ex qb'inchb'ene' myab'a'n twitza.

⁹Axxi'x, tkyaqilju' qchwinqlale' kb'ajel tu'n ttx'u'jila; naq jun jiq'chanx nche ik'a'ju' qab'q'iye'.¹⁰Oxnaq lajoj (70) ab'q'iju' qchwinqlale' njapun; qatzun majx kuwqo'ye' njapun toj kyajnaq; atzu'n qama qo tene' nimtoj naqx yajb'il ex aq'untl ntzaj tq'o'n qeye'. ¡Lwiyxi'x nche b'jik'ju' ab'q'i, ikxu' kse'n ayo'ye'!

¹¹¿Alxi'xkye ojtzqilte tipumal ttx'u'jila? ¿Alkye ojtzqilteju' tq'oja?¹²Qo' t-xnaq'tzama tu'n qximane' ti'ju' qchwinqlale' ch'i'ntoj, tu'ntzun qanq'ine' tuk'i'l nab'l.

¹³¡Nman Dyos, kutanjtz ti'ja quk'i'le'! ¿Jtojtzun tzula? ¡q'aq'antz tk'u'ja qi'je' ayo'ye' tmajena!¹⁴Qo' tnajsama tu'n tk'u'jlalila ajtjawu'l q'ij, tu'ntzun qb'itzane' toj tzalajb'il toj tkyaqilju' qchwinqlale'.¹⁵Q'ontz b'a'npun ab'q'iya te tzalajb'il qeye' kse'nqe' ab'q'i te yajb'il matxi' tzik'x qu'ne'.¹⁶¡B'inchama tu'n kyka'yinteju' tmajena kyuk'i'lju' kyyajajil ju' tb'inchb'ena ex tajwalila!

¹⁷Awtju' t-xtalb'ila Nman Dyos, kub'ten qib'aj. ¡B'a'nwt tz'ela' qaq'une' twitza! ¡Iku', b'inchama tu'n telb'a'nju' qaq'une'! Chiju' b'itzal. Ate Qman Dyos kolb'ilqe¹Aju' nnajan tjaq' t-xlekumalju' Qman Dyos ati toj kya'j te tkyaqil ipumalj,²kxe'l tma'n te Qman Dyos: Aya jun kolb'ilweye', jun ja te kolb'il wib'e', ¡Ndyose', ja q'uqloka' nk'u'je'! Chij.³O'kxte ktzaqpilteya kye xpatxab' ate' toj ewaj ex kyeju' yab'il b'iyul,⁴kb'ajel tktxu'n ti'ja kyu'n t-xik', ex kkletila kyjaq' b'a'nxi'x. ¡Kkletela tu'nju' tyol njapun, kse'n tu'n jun kolb'il!⁵Lalun xob'a teju' xob'ajil toj qonik'an, ex kyeju' talsmaj nche tzaj xon te q'ijtl,⁶ex kyeju' yab'il nche b'et toj qxopin, ex kyeju' kamik nche b'iyun te q'ijtl;⁷qu'n che kb'eltz'aq kab'k'al lajnaq (1,000) tu'n kamik toj tnayaja ex junmutx' jok'al (10,000) toj tb'a'nq'ob'a atzunta mixti' k'ik'ela'ya.⁸Kche tka'yi'ya tu'n twitza: aj tq'onjtz ju' tu'me'l t-xel kyeju' b'inchal taq'wix.

⁹Qu'n matxi'na tz'ok tq'o'na Qman Dyos te tewb'ila, aju' Dyos te toj kya'j te klolteya,¹⁰lay tzaj jun ti'xti' taq'wix ti'ja ex lay ponju' yab'il toj tjaya;¹¹qu'n che tzajel tchq'o'n tanjl xq'uqilteya jaxjaku' matxa'ya.¹²Kxe'l q'i'na kyu'n toj kq'ob' tu'ntzun lalun che pon takpuju' tqana ti'j ab'j.¹³Kb'entel tb'eta kyxol b'alun, kyxol kan ex kyxol nimaqtxkup.

¹⁴Knkla'ye', kb'el nq'o'ne' ja lay che pon kanun txqantl ti'j, qu'n ojtzqi'nqine' tu'n, ex nchin tk'u'jla'ne'.¹⁵Ajttxokon weye', kxe'l ntzaq'we'ne'; ¡ayinku'we' chin tenb'il tuk'i'l! Knkla'ye' toj b'is ex kjawil nwab'a'ne' tuk'i'l oklenj;¹⁶ktzalajel wu'ne' toj jun tchwinqlal nimtoj: ¡kntzalajsa'ye' toju' kolb'il wu'ne'! Chi Dyos. Chiju' b'itzal. Jun b'itz te ajwalb'il¹Nimxi'x toklena Nman Dyos, ¡tb'anilxi'x tu'n qq'on chjonteye' teya ex tu'n tjaw qnimane' tb'iya kyu'n b'itz!²Tu'n tpakb'etju' tk'u'jlalila nimxi'x ex tyola ax atl junjun prim ex qonik'an,³toj kyq'ojq'ojel chnab' tzintzb'il, tuk'i'l b'unin kyq'ojq'ojel arpa ex tzintzin.

⁴Nman Dyos, ¡machin ttzalajsaya kyu'n tb'inchb'ena! ¡Inxi'x chin tzalaje' kyu'nju' taq'unb'ena!⁵Nman Dyos, ¡majx tb'anilqe'xi'xkye' taq'unb'ena! ¡Exqe' ju' tnab'la nimxi'x!⁶¡O'qe'kxju' mixti' kynab'l min nkane toj kywitz!⁷Qa nche ch'iyju' b'inchal myab'a'n ex b'inchal il kse'n k'ul, ex nche q'inumax, naqx tu'n kykub' xitu'nkye' tejumajx.⁸Atzunta Nman Dyos, kukx ttenju'ya toj kya'j.⁹Axxi'xte', Nman Dyos: kche b'ajel xitu'nju' tajq'oja; che b'ajel sputi'n kykyaqilju' b'inchal taq'wix.

¹⁰Intzaj tch'isa'na wipumale' kse'n tipumal jun tman wakx, ex njax tq'o'na k'ok'sb'il toj nwi'ye'.¹¹Knka'yiye' se'n ajkykub'a' tz'aqju' wajq'oje; ¡knb'i'ye' ajkyẍch'inju' b'inchal myab'a'n lu toj k'ixk'oj!

¹²Inche b'echanju' b'a'n xjal kse'n tut ex nche ch'iy kse'nqe' k'ute toj Lib'ano.¹³Awa'nqe' toj tja Qman Dyos; inche b'inchan twi' tpen tja Dyos.¹⁴Expe' kche witzal aj kytijin; ktenb'el kyipumalju' kukxju' ex kyxaq ẍlajun,¹⁵ex kxe'l kypakb'a'ntzuntz qa tzinunte' Qman Dyos klol weye', ex mixti' jun myab'a'n toj. Chiju' b'itzal. A Qman Dyos nimaqkawil¹¡Ate Qman Dyos nimaqkawil! ¡Oksa'nte Qman Dyos ti'j te oklenj txoli'n ti'j tu'n ipumalj! Ate kyej kuwsante tx'otx' tu'n lay yukchi.²Atxi'xtzunj kyej qeju' tkawb'ila Nman Dyos. ¡Atiya tejumajx!

³Nman Dyos, inche tinunju' nin a' ex njaw kytolob' nimaq;⁴Atzunta Nman Dyos, te toj kya'j, nimxi'x tipumala kyekywitzju' kytolob' ex kyetwitzju' ttx'u'jil ninnjab'.

⁵Nman Dyos, majx ateqe' tchaq'b'ila. ¡Wiqo'n ti'ju' tjaya tejumajx tu'n xjanb'il! Chiju' b'itzal. A Qman Dyos Ajkawil tib'aj tkyaqil twitz tx'otx'¹¡Yek'um tib'a Nman Dyos, aya ju' Dyos q'ol tu'me'l t-xel!²Aya Ajkawil tib'aj tkyaqil twitz tx'otx'; ¡q'i'nktz tib'a kyi'ju' njaw kynima'nkyib' tz'e'ysanku'ya kywitz!

³Nman Dyos, ¿jtoj b'aj kytzalajb'ilju' b'inchal myab'a'n?⁴Kykyaqilju' b'inchal il lu mixti'x kynab'l ex naq nkynima'n kyib'; ¡ex la'j qe'!⁵Nman Dyos, ate'qe'k xitulteju' ttanama; ¡ate'k yajlalkyeju' xjal etza'nqe' tu'na!⁶Nche kub' kyb'yo'n qya kyimni kychmil ex najchaq xjal; nche kub' kyb'yo'n meb'a.⁷Nkyma'n qa min nka'yin Dyos, exqa min b'i'n tu'n Tdyos Jakob'.

⁸¡Kanex toj kywitze', mib'a'n che b'ine' ex mixti'x kynab'le'! ¿Jtoj kane toj kywitze'?⁹¿Ma laytzun txiqb'i'nju' kub' b'inchante qẍkyin? ¿Ma laytzun txiqka'yi'nju' kub' b'inchante qwitz?¹⁰¿Ma laytzun kub' tz'e'ysa'n twitz tu'nju' nkawin kyib'aju' nimaqtnam? ¿Ex ma laytzun tb'iju' ntzaj q'onte kynab'l xjal?¹¹Kanlite' twitz Qman Dyos qa o'kxtzu' nximana' xjal ti'ju' mixti' tajb'en.

¹²Nman Dyos, tzalajb'ilte' teju' xjal nxi' ttzak'u'na ex nxitq'o'na t-xnaq'tzb'ila te¹³tu'ntzun tten tzalajb'il te aj tulju' tq'ijlalil myab'a'n, akxku' nb'inchet kyjulju' b'inchal myab'a'n.¹⁴Lay che kyej tkolb'e'nte Qman Dyos ttanam, ex lay che kyajttzaqpi'nju' etza'nqe' tu'n.¹⁵Tzul jumajtlju' tnik'alilti'j kyoju' kawb'il, ex kykyaqilju' xjal tnik'alkyi'j che kxe'l lpe ti'j.

¹⁶¿Alkye kjawil tiq'i'ntib' klol weye' toj kyq'ob'ju' b'inchal myab'a'n ex b'inchal il?¹⁷Naqwit mya Qman Dyos xklonweye', ojewtlo tzik'x nna'le' tu'n kamik.¹⁸Tej txi' nma'n jumaje': Inche el jililin nqane', nchije' ula onilweye', Nman Dyos, tuk'i'l tk'u'jlalila.¹⁹Kyoju' xim nb'ajx nk'u'je' ti'j ajkyb'ju'l toj nwi'ye', intq'uqb'a'na nk'u'je' ex nchin ttzalajsa'na.²⁰Lay tmujb'atatib' kyuk'i'lju' ajkawil mya tnik'alkyi'j, myab'a'n che kawin ex min nche oklpe ti'ju' kawb'il;²¹inb'aj kychmo'nkyib' ti'ju' mixti' til exju' tnik'alti'j, ex inkyaj b'entti'j kyu'n tu'n tkub' kyb'yo'n.²²Atzunte Qman Dyos kolb'ilweye'; ikyte Qman Dyos kse'n jun pik nklo'nwib'e' ti'j.²³Ktb'incha'te Qman Dyos tu'n kynaju' b'inchal myab'a'n tojxju' kyil. ¡A Qman Dyos kb'el najsankye! chiju' b'itzal. Qoqe' b'itzan te Qman Dyos tuk'i'l tzalajb'il¹Kukytzaje', qoqe' b'itzan tuk'i'l tzalajb'il te Qman Dyos; qoqe' b'itzan teju' xq'uqilqe ex klolqe.²Qo okx twitz tuk'i'l aq'b'il chjonte, ex qo b'itzan b'itz te ninb'ilte.³Qu'n nimte Qman Dyos toklen, aju' nimaqkawil nim toklen kyib'aj kykyaqilju' dyos.⁴Qu'n toj tq'ob' ta'ju' t-xe tx'otx'; ex te qe'ju' nimaq witz.⁵Tete' Dyos ninnjab', qu'n a kub' b'inchante; ¡kub' tb'incha'nju' tx'otx' tzqij kyu'nku' tq'ob'!

⁶Kukytzaje', qoqe' k'ulun mejliqo'; qoqe' mejeku' twitz Qman Dyos, qu'n ate kub'inchanqe.⁷Ate Qman Dyos, ayo'tzunqe ttanamqo'; tritqo' toj tch'laj.
Kyb'intzju'ye' ktma' ja'lo:⁸Lan kub' kych'uẍsa'n kyanmiye', kse'n toj Merib'a; kse'nj toj Masa, toj chq'ajlaj,⁹tej nkub' kyq'o'ne' ojtxi' kyyajilb'ene' toj joyb'ilwi'je', maskyepe' ojetoq che kyilju' waq'unb'ene'.¹⁰Kab'naq (40) ab'q'i ntx'u'jine' kyi'ju' xjal lu, ex nmaye': Matxi' che b'aj kub'tzpetkye' xjal lu; ¡min nche'x kyb'i'n nchaq'b'ile'! nchije'.¹¹Qu'mtzun nmaye' toj ntx'u'jile' qa lay che okx toju' najb'il te wojlab'le'. Chij. Chiju' b'itzal. Jun ak'a'j b'itz te Qman Dyos (1 Cr 16.23-33)¹Kyb'itzanxe' jun ak'a'j b'itz te Qman Dyos; che b'itzan qe'ye' te Qman Dyos, ju' najlqe'ye' toj tkyaqil twitz tx'otx';²che b'itzan qe'ye' te Qman Dyos, kyajwali'nktze' tb'i; kypakb'anxe' tkolb'il atl junjun q'ij.³Kyolinxju'ye' tajwalil exqe' tb'inchb'en tb'anilqexi'x kye kykyaqil b'o's tnam ex nimaqtnam,⁴qu'n nimte' Qman Dyos toklen ex o'kxte ati tu'n tjaw ajwalit: ¡atzu' tu'n qxob'a' te ex mya kyeju' kydyos xjal!⁵Mixti'x che oka' kydyos txqantl xjal, atzunte Qman Dyos kub' tb'incha'n kya'j.⁶¡In qoptz'aj ti'jile tu'n nim tajwalil! ¡Tb'anilxi'xju' tja xjan tu'n tipumal!

⁷Kynimame' Qman Dyos kykyaqile' tnam te twitz tx'otx', tz'elx kynik'e' ti'ju' tipumal ex tajwalil;⁸kynimanktze' Qman Dyos kse'nxju' toklen; kukyokxe' toju' tja tuk'i'l kyoyaje',⁹che k'ulun qe'ye' te Qman Dyos toju' tja xjan tb'anilxi'x.¹⁰Kymanxe' kye nimaqtnam: ¡Ate Qman Dyos nimaqkawil! chechiku'ye' Ate kuwsanteju' tx'otx' tu'n lay yukchi; ex junelniju' tkawb'il kyib'aj kykyaqil tnam.¹¹¡Che tzalajxju' kya'j ex tx'otx'! ¡Tinunxju' ninnjab' kyuk'i'lxi' ate' toj!¹²¡Tzalajxju' kojb'il kyuk'i'lxi' ate' twitz! ¡Che ẍch'inxju' tze toj k'ul tu'n kytzalajb'il,¹³twitzju' Qman Dyos, tzul! ¡Iku', tzul kawil twitz tx'otx', kkawil tuk'i'l ax ex tnik'alilti'j ex kkawil kyib'aj kykyaqilju' tnam twitz tx'otx' tuk'i'l tnik'alilti'j ex ax! Chiju' b'itzal. A Qman Dyos nimaqkawil¹¡Ate Qman Dyos nimaqkawil! ¡Qu'mtzun tzalajx tkyaqilju' tx'otx'! ¡Che tzalajxju' swejtx'otx' toj ninnjab'!²Txoli'n ti'j tu'n muj jupin; tzyu'n tq'uqb'il kyu'n tnik'alilti'j ex tz'aqli;³nejliju' q'aq' twitz ex nche ttz'e'ysa'n tajq'oj txoli'nkyib' ti'j.⁴In qoptz'aj twitz tx'otx' kyu'n txloq'lojkya'j; ¡inlu'lunju' tx'otx' aj kyxitka'yi'n!⁵Inche kub'niwju' witz kse'n ser twitz Qman Dyos, ju' tajaw tkyaqil tx'otx'.⁶Nyolinju' kya'j ti'ju' tkawb'il; kykyaqilju' tnam nnok kyka'yi'n tajwalil.⁷Inkub'kyi'ju' nche k'ulun kywitz witzileb', aye' nkynima'n kyib' kyi'j. ¡Kykyaqilju' dyos che kb'el tzipe twitz!

⁸Nman Dyos, inxi'x che tzalaju' Syon exqe' nimaqtnam toj Juda kyi'ju' tchaq'b'ila;⁹qu'n atiya Nman Dyos te toj kya'j, tib'aj tkyaqil twitz tx'otx' ex nim toklena kywitz kykyaqilju' dyos.

¹⁰Inche tk'u'jla'nte Qman Dyos xjal in elkyik'u'n myab'a'n; intklo'n kychwinqlalju' wa'lqe' toj kyokslab'l; inche tklo'n tu'n lalun che kub' tz'aq toj kyq'ob'ju' b'inchal myab'a'n.¹¹In qoptz'aj spik'un teju' b'a'n xjal; kyekye tnik'alkyi'ju' tzalajb'il.

¹²¡Che tzalajxe' ti'j Qman Dyos, aye'ye' b'a'n xjal qe'ye', ex kynimanktzju'ye' tb'i xjan! Chiju' b'itzal. Matxi' kanb'ante Qman Dyos¹¡Kyb'itzanxe' jun ak'a'j b'itz te Qman Dyos, qu'n matxi' che tb'incha ti'xti' te lab'te'n! ¡Matxi' kanb'an tuk'i'l nim tipumal, tu'n tq'ob' xjan!²Matma Qman Dyos tpakb'alilju' kanb'ab'l, matxi' kub' tyek'u'n tnik'alilti'j kywitzju' nimaqtnam;³matzajtna'n tk'u'jlalil ti'ju' tnam Israel ex njapunju' tyol ttziya kye. ¡Matxi' pon kanunju' kanb'ab'l tu'n Qman Dyos tzmax toj mankb'il twitz tx'otx'!

⁴Che b'itzan qe'ye' te Dyos tuk'i'l tzalajb'il, aye'ye' najlqe'ye' toj tkyaqil twitz tx'otx'; che b'itzanqe' b'itze' te tuk'i'l tkyaqil kytzalajb'ile'.⁵Kyb'itzanqe'xe' b'itz te Qman Dyos tuk'i'l arpa, kyuk'i'l chnab' tzintzin.⁶Che b'itzan qe'ye' tuk'i'l tzalajb'il twitzju' Qman Dyos, nimaqkawil, kyuk'i'l chnab' nche xupit.

⁷Q'ajtixju' ninnjab' kyuk'i'lxi' ate' toj, tkyaqilju' tx'otx' kyuk'i'lxi' najlqe' twitz;⁸kypoq'cham toj kyq'ob'ju' nin a, kyb'uyim kyib'ju' witz tu'n kẍch'in tu'n kytzalajb'il⁹twitzju' Qman Dyos, tzul kawilteju' twitz tx'otx'. Ate kkawil kyib'aju' tnam toj tkyaqil twitz tx'otx' toj ttzinunal ex junelni. Chiju' b'itzal. A Qman Dyos nimaqkawil nimxi'x toklen¹¡Ate Qman Dyos nimaqkawil! ¡Atiju' tq'uqb'il kyib'aju' kyerb'in! Che lu'lunwtju' nimaqtnam, ex tkyaqilju' tx'otx'.²Nimte Qman Dyos toklen twi' witz Syon; ati toklen Qman Dyos kyib'aj kykyaqil tnam.³Ajwalinjtzxwitju' tb'i nim toklen ex xob'ajilx;
¡Xjante' Dyos!⁴Jun Nimaqkawilta nimtipumala ntk'u'jla'na tnik'alti'j; aku'ya kyej q'onte junelni kyoklen xjal. Matxi' tb'inchaya tnik'alti'j ex ttxolilti'j kyeju' tk'wal Jakob'⁵¡Kyajwalinktze' Qman Dyos, ex che mejeku'ye' t-xe tqan!
¡Xjan te Dyos!

⁶Ate' Moyses tuk'i'l Aaron kyxolju' tpale; atzunte Samwel kyxolju' e'jaw ajwalinte tb'i. Intoq tzaj ttzaq'we'n Qman Dyos kye aj txi' kyqani'n o'nb'il.⁷Yolin Dyos kyuk'i'l tzmax toju' jun tnej muj, ex e'japunju' tchaq'b'il kyu'n exju' kawb'il tzaj q'o'n kye.

⁸Taye, Nman Dyos, ¡intoq che tzajttzaq'we'na! Kub' tnajsa'nju'ya kyil, ex kub'ttz'e'ysa'na kywitz tu'n tpaj kyil.⁹Kynimanktze' Qman Dyos, ¡che mejeku'ye' twi'ju' witz xjan te Dyos!
¡Xjante' Qman Dyos, ju' Dyos Manb'aj! Chiju' b'itzal.Okub' tb'incha'n Qman Dyos ex teqo'¹¡Che b'itzan qe'ye' te Qman Dyos tuk'i'l tzalajb'il, aye'ye' najliqe'ye' toj tkyaqil twitz tx'otx'!²Che k'ulun qe'ye' te Qman Dyos tuk'i'l tzalajb'il; ¡che lq'eqetze' twitz, tuk'i'l sich' te tzalajb'il!³Tz'elx kynik'e' qa ate Dyos; okub' tb'incha'n ex teqo'. O'ttanamqo' ¡ex tritqo' toj tch'laj!⁴Che lq'etze' ttzija ex kyoj tpenju' tja kyuk'i'l b'itz te ajwalb'ilte ex te aq'b'il chjonte. ¡Kyq'onx chjonteye' te, ex kynimanktze' tb'i!⁵Qu'n majx b'a'nte' Qman Dyos; tejumajxju' tk'u'jlalil ex njapunju' tyol ax kukxju'. Chiju' b'itzal. Ttziya nimaqkawil tyol te Dyos¹Wajb'ile' tu'n wajwalinteye' tk'u'jlalil ex tnik'alilti'j; Nman Dyos, chin b'itzal b'itze' teya;²wajb'ile' tu'n wanq'ine' toj tnik'alilti'j. ¿Jtoj tzula nk'etze'? Kchin anq'ile' b'a'n twitza expe' ikx toju' njaye' te kawb'il;³lay tz'ok nq'o'nwe' nwitz kyi'ju' xim myab'a'n.
Inche wik'u'nwe'ju' min njapun kyol twitza Dyos; ¡layx waje' tu'n kytzaj lq'e nk'etze'!⁴Lay tz'ok nq'o'nwe' nwi' kyi'ju' myab'a'n nab'l: ¡min wajb'ile' tu'n nb'inchante jun taq'wixile'!⁵Kntenb'a'ye' kyolinju' inche jk'un yol toj ewaj ti'j kyb'sin; ¡lay tzik'xju' ntnima'ntib' wu'ne'!

⁶Atzu' k'okyila' tenwe' nwitz kyi'ju' xjal njapun kyol, tu'n qnajane' junx kyuk'i'l; o'kxte xjalju' k'ajb'el weye' aju' nnanq'in toj ttxolilti'j.⁷Lay tenju' xjal sb'ul toju' njaye' te kawb'il; ¡mixti' jun chalyol ktenb'il nk'etze'!⁸Atl junjun q'ij che b'el nnajsa'ne' b'inchal myab'a'n toj tkyaqilju' tnam; ¡che b'je'lex nxla'ja'ne' kykyaqilju' b'inchal taq'wix toju' ninttanam Qman Dyos! Chiju' b'itzal. Tna'j Dyos jun xjal nb'isun¹Nman Dyos, b'intzju'ya nna'j Dyose', ¡ponxwitju' nkub'sb'ile' twitza!²Lalun txitewa'n twitza weye' qa nchin b'isune'; ¡b'inchama xtalb'il chin tb'itza!, ¡lwiyx chin ttzaq'wetza ajntxokone' teya!³Qu'n xitkub' b'aju' nchwinqlale' kse'n sib', inche k'antju' nb'aqile' naku'j ttxalq'aq',⁴matxi' kub'numj wanmiye' kse'n k'ul nkub' tzqij; ¡expe' mixti'x q'aq'a'n wi'je'!⁵Matxi' tz'ok b'aju' ntz'umale' ti'j nb'aqile' tu'nju' nchin oq'e'.⁶Ikyqinju'ye' kse'n jun tukru toj chq'ajlaj, kse'n jun tukru kyxol ttx'anqa'n ja.⁷Min nchin wtane'. Ikyqinju'ye' kse'n jun pich' tjunal twi' jun ja.⁸Kukx wok ik'le'nju'ye' kyu'n wajq'oje ex nnajb'enju' nb'iye' kyu'n te qanb'il myab'a'n.⁹Tza'j nxinwane' te t-xel nwaye'; ex nxi' simli ta'l nwitze' toju' nk'wa'ye',¹⁰tej saj ttx'u'jila ex tq'oja, injaw tiq'i'na tu'n nkub' t-xontla.¹¹Kxi' tkub' naju' nchwinqlale' kse'n leku'n; xi' wok tzqije' kse'n itzaj.¹²Atzunta Nman Dyos, in kawina tejumajx; ¡ktzajel na'n tb'iya kukxju'!

¹³Q'i'nktztib'a, q'aq'antz tk'u'ja ti'j Syon, qu'n matxi' japun tq'ijlalil; ¡matxi' ponju' kmuj tu'n tnajsanteju'ya kyil!¹⁴Kye kyilwiju' tab'jil ttapi kyu'nju' tmajena; ¡inxi'x exch'yonju' xitb'il toj kyk'u'j!

¹⁵Kykyaqilju' nimaqtnam ex nimaqkawil twitz tx'otx' kkynima' tb'i Qman Dyos tb'anilxi'x¹⁶ajtjaw tb'incha'n jumajtlju' tnam Syon ex ajtyek'u'ntetib' toj tajwalil,¹⁷ajttzajtb'i'n tna'j Dyosju' xjal mixti'x te ktzajel tb'i'nju' tkub'sb'il.¹⁸B'a'n tu'n tkyej tz'ib'et ja'lu kyeju' che ul itz'ji yajxi'tl, tu'n tjaw kynima'n Qman Dyos.

¹⁹Tzaj tka'yi'n Qman Dyos tx'otx' tzmax toj kya'j, toju' tnajb'il xjan,²⁰tu'n ttzaj tb'i'n tq'ojq'ojel kywi'ju' presi'nqe' ex tu'n kykletju' b'entnitlti'j tu'n kykyim;²¹tu'ntzun tjaw nima'n tb'i Qman Dyos, ex tu'n tpakb'anjtz toj tnam Syon ex toj Jerusalen²²ajtb'aj kyb'u'yi'n kyib'ju' xjal te kykyaqil nimaqtnam tu'n kyk'ulun te.

²³Matz'el tiq'i'n wipumale' toj nik'jan b'e; mattaqk'u tq'ijlalil nchwinqlale'.²⁴Inxi' nkub'sa'ne' te: Nman Dyos, lalun taja tu'n nkyimnaje' toj nik'janju' tq'ijlalil nchwinqlale' Nchije'.
¡Mixti'ta b'ajsb'il te!²⁵Tkuwsaju'ya tx'otx' atxi'x t-xe tnejel; aku'ya kub' b'inchante kya'j.²⁶Kykyaqil ja'lu kche b'ajel, atzunta majx atiya. Kb'ajel tkyaqil ja'lu, kse'n xb'alun; ¡ktch'ixpu'ya, kjeltzuntz ch'exb'e'ntl, kse'n jun xjal ajtel tch'ixpu'n ti'j!²⁷Atzunta axteju'ya; mixti'x b'ajsb'il kyeju' tab'q'iyila.²⁸B'a'n che anq'ila' kyk'walju' tmajena tu'na; kche tenb'il twitza. Chiju' b'itzal. Kjawil nnima'ne' Qman Dyos¹Kjawil nnima'ne' Qman Dyos tu'n tkyaqil nk'u'je'; kjawil nnima'ne' tb'i xjan tu'n tkyaqil nk'u'je'.²Kjawil nnima'ne' Qman Dyos tu'n tkyaqil wanmiye'; lay tzik'tna'l junju' t-xtalb'il wu'ne'.³A nkub'najsante tkyaqilju' wile', ex nchin tq'a'na'ne' te tkyaqil yab'il,⁴intklo'n nchwinqlale' te kamik, nim xtalb'il nk'mo'ne' te tu'n tlaqb'il tk'u'j,⁵intq'uqb'a'n nk'u'je' tu'n tkyaqil tb'anil ex nchin ku'xumix jumajtle' tu'n kse'n t'iw.

⁶Intb'incha'nte Qman Dyos tnik'alilti'j axxi'x kyeju' nche yajti.⁷Tzaj tyek'u'n tb'eyil ex tb'inchb'en te Moyses ex teju' tnam Israel.⁸Majx b'a'nte Qman Dyos ex nq'aq'an tk'u'j; ati tpasens ex nim tk'u'jlalil.⁹Mya q'achq'alxwit tok tzak'ulqe ex min nkuxtk'u'n titk'u'j;¹⁰min nttz'e'ysa'n qwitz kse'nxju' qb'inchb'en myab'a'n;¹¹nimxi'x tk'u'jlalil kyi'ju' nche niman te kse'n kya'j nim toktza' tib'aju' tx'otx'.¹²Matxi' tz'el tlaq'b'a'n qil qk'etz, kse'n kyxolju' tjawetzq'ij tuk'i'lju' tkub'exq'ij.¹³In laqj tk'u'j Qman Dyos kyi'ju' nche niman te, kse'n jun manb'aj nlaqj kyi'j tk'wal;¹⁴qu'n tojtzqi'n titi' qtx'otx'al: b'i'nxi'x tu'n qa quqqo'.

¹⁵Ik tchwinqlal xjalju' kse'n k'ul; intzaj ch'iy kse'n jun b'ech toj kojb'il:¹⁶ajtzun ttzaj jumj kyq'iq' tib'aj, nkyim, ex mix-a'lo' b'ilte ja xxa'.¹⁷Atzunte Qman Dyos tk'u'jlalil ati tejumajx kyeju' nche niman te; mixti' b'ajsb'il teju' t-xtalb'il kye kykyaqilju' che ul itz'ji yajxi'tl,¹⁸kyeju' njapun tyol kyu'n, aju' kyejni b'entti'j ex min in ik'tna'l kyu'n tu'n kyb'inchante e'tchaq'b'il.¹⁹Kub' tq'o'n Qman Dyos tq'uqb'il te kawb'il toj kya'j, ex in kawin tib'aj tkyaqil.²⁰¡Kyajwali'nktze' Qman Dyos, anjl nim kyipumale'! Aye'ye' nche japun tchaq'b'il kyu'ne', majx tokkywi'ye' ti'j tu'n kyb'inchanteye'.²¹¡Kynimanktze' Qman Dyos kykyaqile' ttanam, ju' nche ajb'ene' te ex nkyb'incha'ne' tajb'il!²²¡Kyajwali'nktze' Qman Dyos kykyaqile' e'tch'isb'en qe'ye', kyoj kykyaqil najb'il ja nkawina'!
¡Kchin nimale' te Qman Dyos tu'n tkyaqil nk'u'je'! Chiju' b'itzal. B'itz teju' B'inchalte tkyaqil¹¡Kjawil nnima'na Nman Dyos tu'n tkyaqil nk'u'je'! ¡Nimxi'x toklena Taye, Nman Dyos! Matxi' tz'ok toksa'na tajwalila tb'anilxi'x;²Matz'ok tktxu'na spik'un ti'ja naku'j jun xb'alun. ¡Xit-slik'u'na kya'j naku'j jun xb'alun!³¡E'kub' twab'a'nju'ya tqan tjaya tib'aju' a' tzmaxtzu' jawnixi'! In ajb'enju' muj tu'na te tkarwaja; ¡in b'eta tib'aj t-xik'ju' kyq'iq'!⁴Aye' t-sanjelalju'ya kyq'iq', aye'tzu'n tqan taq' q'aq' nche ajb'en teya.

⁵Kub' tq'o'na tx'otx' kyib'aju' tq'uqlil tu'n lalun yukchi.⁶Ktxu'n toqju' tx'otx' tu'n ninnjab' nim t-xe naku'xwitloj t-xb'alun. Ktxu'nqe'toqju' witz tu'n a'.⁷Tetzunj txi' ttzak'una, ik' oq; lwiy ik' oq tej txi' tb'i'nju' toj twi'ya nxi'x tinun.⁸Jax kywi' witz ex ku'tz kyoju' b'ya', xi'tzuntz toju' najb'il b'incha'ntl tu'na te,⁹kyej tq'o'nju'ya tnaqach tu'n lalun tzik'tz jlajintl, tu'ntzun lalun tzulkanun jumajtl ktxulteju' tx'otx'.

¹⁰Inche jawb'entju' kyxiklil a' tu'na exqe' a' nche b'et kyxol witz.¹¹Ti'jtzu'n a' lu nche k'wana' tojk'ul txkup; inel k'waj kyi'ju' toj k'ul chej tu'n.¹²Inkyb'incha'n pich' kyja kytziju' nin a' ¡atzuntzu' nche oq'a' kyxolju' tq'ob' tze!

¹³Aya ntzaj chitunte jb'al kyib'aju' k'ul tzmaxtzu' toj kya'j jata' tjaya; inb'aj tak'sa'nju'ya twitz tx'otx' tu'n nin jb'al intzaj twitz kya'j.¹⁴In tch'isa'nju'ya k'ul te kywa alu'mj, ex tawal xjal tu'n tjawju' twa twitz tx'otx',¹⁵aju' twa nq'onte tipumal, exju' tk'wa' ta'l ub'a ntzalajsante ex nqoptz'ajxi'xju' twitz tu'n kyetwitz tu'n aseyt.¹⁶Inel k'waj kyi'ju' tze, e' k'ute awa'nqe' tu'n Qman Dyos toj Lib'ano.¹⁷Kywi' tze lu nkyb'incha'na' kyja tal pich' b'o'sqe', ex kywi' tzaj najlqe' nimaqpich' naku'j garsqe'.¹⁸Kywi' nimaq witz ta'qe' tojk'ul chib', aye'tzu'n tojk'ul ẍiky najlqe' kyxol pik.

¹⁹Kub' tb'incha'na xjaw tu'n techitju' tq'ijlalil; b'i'n tu'nju' q'ij alkye kmoj tu'n tex.²⁰Ajttzaj tq'o'na qlolj te qonik'an, inche b'je'tztzun talu'n k'ultz.²¹Inche tzanunju' b'alun tu'n tpaj kychi'; inxikyqani'n te Dyos tu'n txiq'o'n kywa.²²Ajtzun tjawu'l q'ij, in nanjkyi'j ex nche b'ajx paqeb'il toj kyjul.²³Inextzun xjaltz aq'unal ex nnaq'unan tzmax ajqok yupj.

²⁴¡Taye, nim ti'xti' matxi' che tb'inchaya! Tkyaqil kub' tb'incha'na tuk'i'l nab'l; ¡nojni twitz tx'otx' kyu'n kykyaqilju' kub' tb'incha'na!²⁵Luju' ninnjab' nim twitz min nb'aj qka'yinte, ja najlqe' txqan txkup layx b'ent kyajlet, e'nimaq ex k'ok'e';²⁶atzu' nche b'eta' b'ark, ex atzu' ta' nin txkup Leb'yatan, ju' nin txkup kub'ni tb'incha'na tu'n t-ẍchan toj.²⁷Kykyaqilju' txkup lu nche ayon ti'ja inxitq'o'na kywa aj kyq'aq'an.²⁸Inche tk'a'cha'na, ex nche wan; intzaj tjqo'na kye ex nche noj b'a'nxi'x²⁹qatzun matxitewa'n twitza kye, inche jaw b'isun; qama tz'el tiq'i'nju'ya kyxew inche kyim ex nche kub' quqix.³⁰Qatzun ntzaj tq'o'na t-xewa te chwinqlal, inche poq'on, ikytzun ntch'exb'e'n twitz tx'otx'ju'ya.³¹¡Tejumajxju' tajwalil Qman Dyos! ¡Intzalajte Qman Dyos ti'ju' tb'inchb'en!³²Injaw lu'lunju' tx'otx' ajttzaj ka'yin Dyos te; ¡inche jaw qusinju' witz ajkyok ttzyu'n!

³³Kchin b'itzalwe' te Qman Dyos, toj tkyaqil nchwinqlale'.³⁴Tzalajxwit Qman Dyos kyi'ju' nxime', qu'n o'kxtzu' nkneta' ntzalajb'ile' tuk'i'l.³⁵¡Che kub'xwit naju' aj il twitz tx'otx'! ¡Mixwit che anq'ina'tlju' b'inchal myab'a'n!
¡Kjawil nnima'ne' Qman Dyos tu'n tkyaqil nk'u'je'! ¡Ajwalinjtzxwit! Chiju' b'itzal. Tb'anil b'a'nq'ob'aj tb'incha Dyos kye aj Israel¹¡Kyq'onx chjonteye' te Qman Dyos! ¡Kypakb'anxju'ye' tb'i! Kymanqe'xju'ye' tb'inchb'aj kye tnam.²Che b'itzanqe' b'itze' te ninb'ilte. ¡Kyolinxju'ye' nimaq tb'inchb'en!³Che tzalajxe' tu'nju' tb'i xjan. ¡Che tzalajxe' aye'ye' nche jyone' ti'j Qman Dyos!⁴Kyjyome' Qman Dyos, exju' tipumal; kyjyome' toj tkyaqil kmuj.⁵Kyna'nqe'tzju'ye' nimaq tb'inchb'en tb'anilqexi'x, exqe'ju' tchaq'b'il kyajni tma'n;⁶aye'ye' tyajajil Ab'raam ju' tmajin Dyos; aye'ye' tk'wal Jakob', ju' sk'o'nqe'ye' tu'n.

⁷Ate Dyosju' Qman Dyos; ¡ate nkawin tib'aj tkyaqil twitz tx'otx'!⁸Lay tzik'tna'lju' tyol kyejni b'entti'j tu'n b'a'nqa jte'xku' wiq kyyajajil xjal mache ik' twitz tx'otx'⁹aju' tyol kyej b'entti'j tuk'i'l Ab'raam, ju' kyej ttziya'n te Isaak¹⁰ex kyej tq'o'n te jun kawb'il te Jakob', ex jun yol kyejni b'entti'j tejumajx kye aj Israel,¹¹tej tmante: Kxe'l nq'o'ne' tx'otx' Kanaan teya tu'n tok te tetzb'ila. Chij.

¹²B'a'nqa naq ch'i'ntoq kyb'aj, jte' ajb'etun toju' tx'otx' Kanaan,¹³intoq che ik' toj jun nintnam ex nche pon toj juntl ex intoq che pon toj jun kawb'il ex inche'x toj juntl,¹⁴min taj Qman Dyos tu'n kyb'aj yajla'n, expe' xitab'tzi'n kyeju' nimaqkawil:¹⁵Lalun tzaq'pon kyq'ob'e' kyi'ju' sk'o'nqe' wu'ne' ex lalun che oktene' yajulkye nsanjelale'. Chij kye.

¹⁶Tzaj tq'o'n we'yaj toju' tx'otx' Kanaan, tkyaqilju' kywa eltiq'i'n.¹⁷Matxi'toqtzun txitnejb'a'npun Jse kywitz, xikyk'a'yi'n te majen.¹⁸Eb'aj k'ixb'sa'n tqan kyu'n xpatx'k'uxb'il; ¡okk'lo'n tqul tu'n k'uxb'il!¹⁹Ok Jse toj joyb'ilti'j tu'n tyol Dyos, tzmaxi'j tjapunju' yol ojetoq tma Jse.²⁰Tchaq'ju' nimaqkawil intoq kawin kyib'aj txqan xjal, tu'n ttzaqpet Jse;²¹oktq'o'n te nejenel toj tja ex tib'aj tkyaqilju' atitoq te,²²tu'n t-xnaq'tzan kyeju' nejenel ex tijwnaq tu'n kyok ati kynab'l.

²³Yajxi'tzuntel ul Israel, aju' Jakob', ex najan kse'n jun ajb'etun toj Ejipt, toju' tx'otx' Kam.²⁴Tb'incha Qman Dyos tu'n tchmet-xi'x kyajlalju' ttanam, ex tu'n kyok kuwqe'xi'x kyekywitzju' aj Ejipt.²⁵Tb'inchatzun tu'n kyok miltz'uju' aj Ejipt ti'ju' ttanam ex tu'n kykub' kysb'u'nju' tmajen Dyos.

²⁶Exi'tzun tchq'o'n Dyos Moysestz ju' tmajen, tuk'i'l Aaron ju' ojetoq che jaw t-sk'o'n,²⁷eb'enttzun techlaltz kyu'n toj chq'ajlaj: ¡nimaq ti'xti' te lab'te'n kyb'incha toju' tx'otx' Kam!²⁸Tzaj tq'o'n Dyos qxopin ex majx kyej qtakye', mixtzunti'x xi'ju' tyol toj kywinqilu' aj Ejipt.²⁹Eb'jaw b'entju' nin a' te chik' tu'n, ex e'kub'tb'yo'nju' kyiẍ toj;³⁰kub' tnojsa'n toju' tnam kyu'n tz'u'nxtx'o, expe' ikx ja nwtana' nimaqkawil.³¹Yolin Qman Dyos, tzajtzun b'ent txqan ta'jin chejtz ex us naku'j muj majxkub' noju' tx'otx' Ejipt kyu'n.³²Tzaj tq'o'n saqb'aqun te t-xel jb'al, tuk'i'l tqan taq' q'aq' tib'aju' tx'otx' Ejipt.³³B'aj tyaju'n kyawal ex tqan kylob'aj iw; ¡eb'aj ttoqi'n tze toj Ejipt!³⁴Yolin Dyos, ex eb'ju'l ẍt'ikt'u'l; ¡txqanxi'xtoq kyb'aj, layxtoq b'ent kyajlet!³⁵¡Eb'jo'kten walteju' k'ul toj kojb'il ex tkyaqilju' awal atitoq twitzu' tx'otx'!³⁶¡E'kub'tb'yo'n tnejel k'wa'lb'aj tojile junjun ja, toju' tx'otx' Ejipt!

³⁷Yajxi'tzuntel etzti'n Qman Dyos ttanam tuk'i'l nim q'anpwaq ex saqpwaq, ex mixti'te jun yab'wit kyxolju' tnej kyyajajil tej kyetz.³⁸Ojexi'x che tzalaju' aj Ejipt tej kyka'yinte kyb'je'tz, qu'n matxi'toq che yajti tu'n kpaj.³⁹Tzaj tq'o'n Qman Dyos jun tnej muj e'wb'ilkye ex jun tnej q'aq' spik'b'alteju' kyb'e te qonik'an.⁴⁰Xikyqani'n kychi', ex tzaj tq'o'n kychi' tz'chin, eb'aj wan tu'n b'a'nxi'x ti'ju' kywa tzaj tq'o'n toj kya'j.⁴¹Tjaqju' pik, ex etzchitj a' toj b'et kse'n jun nin a' toj chq'ajlaj.⁴²Qu'n tzaj tna'nju' tyol xjan tzaj ttziya'n te Ab'raam ju' tmajin.⁴³Ikytzun eb'je'tza' tiq'i'n Dyos ttanam sk'o'nqe' tu'n, tuk'i'l sich' te tzalajb'il,⁴⁴ex tzaj tq'o'n kytx'otx' txqantl tnam kye tuk'i'lxi' twitz kyaq'unb'en,⁴⁵tu'ntoq kyjapunju' tkawb'il Qman Dyos kyu'n ex tu'n txi' kyb'i'n t-xnaq'tzb'il.
¡Ajwalinjtzxwit Qman Dyos! Chiju' b'itzal. Kukx tjaw kyiq'i'n kyib' aj Israel¹¡Ajwalinjtzxwitju' Qman Dyos!
Kyq'onx chjonteye' te Dyos, qu'n majx b'a'nte, qu'n tejumajxju' tk'u'jlalil.²¿Alxi'xkye kb'entel tchik'b'ankyeju' tkanb'ab'l Qman Dyos? ¿Alxi'xkye k'ajwalilte kse'nxju' toklen?³Tzalajb'ilte' kyeju' nkyb'incha'n tnik'alilti'j ex kukx kyb'inchanteju'.⁴Taye, chin tna'ntza aj tb'inchanteju'ya b'a'n teju' ttanama; a chin tna'ku'ya ajtula kolol,⁵tu'ntzun nka'yinteye' kytzalajb'ilju' tmajena sk'o'nqe' tu'na, ex tu'n ntzalaje' tuk'i'lju' ttanama.

⁶Matxi' qo b'inchan ile' kse'nkye qmane'; matxi' qokub' chukjiye'; matxi' qb'inchaju'ye' myab'a'n.⁷Tej kyten qmane' toj Ejipt, min okkyq'o'n kyoklenju' tb'inchb'ena tb'anilqexi'x; ik'tna'lju' tk'u'jlalila kyu'n, ex jawkyi'nkyib' ti'ja ttziju' Kyeq Ninnjab'.

⁸Atzunte Qman Dyos e'tkol, xityek'u'n tipumal te ninb'ilteju' tb'i.⁹Xittzak'u'nju' Kyeq Ninnjab' ex kyejten b'e tzqij toj. Eb'jik'x tiq'i'n, t-xexi' ninnjab' kse'n toj chq'ajlaj.¹⁰Ikytzu'n e'tkola' kyeju' kyajq'oj, te kyipumalju' ntoq walti'j kyk'u'j kyi'j.¹¹Eb'ajkyaj mulq'aju' kyajq'oj tjaq' ninnjab' ex mixti'xte jun kyej anq'in.¹²Atzuntzu' xa'kyoksla'na' tyol Qman Dyos ojetoq kyej ttziya'n kye ex jawkyajwali'n tu'n b'itz.

¹³Lwiyxi'xtzun ik'kyna'lju' tb'inchb'en Dyos kyu'n, ex min kyxima tu'n telkynik' ti'ju' tb'is tk'u'j Dyos.¹⁴Kub' kyq'o'n Qman Dyos toj joyb'ilti'j toj chq'ajlaj, e'ok-il ti'j tu'n tb'inchanteju' kyajb'il.¹⁵Atzunte Qman Dyos tzaj tq'o'nju' ntoq kyqani'n, ex tzaj tq'o'n jun yab'il te b'iyol kyi'j.

¹⁶Tzaj tx'a'lti'j kyk'u'j ti'j Moyses toju' kyxmuj, ex ikx ti'j Aaron, ju' xjansa'n tu'n Qman Dyos.¹⁷Xi'tzun k'ab'chaj tx'otx'tz ex xiqoptz'aj Datan toj, kyuk'i'lxi' jun k'loj xjal mujlikytzi tuk'i'l Ab'iram.¹⁸¡Ojexi'x k'antju' q'aq' kyi'j kykyaqil! ¡Majx eb'aj tz'e'yju' b'inchal myab'a'n!

¹⁹Kub' kyb'incha'n jun tilb'ilal tman wakx t-xeju' witz Oreb', jun witzileb' q'anpwaq b'incha'n toj q'aq', e' k'uluntzuntz twitz:²⁰¡kych'exb'eju' Dyos nim tajwalil tuk'i'l tilb'ilal jun wakx nwan k'ul!²¹Ik'tna'l Qman Dyos kyu'n, ju' klol kye, extzun ojetoq che tb'incha nimaq techlal toj Ejipt,²²Ojetoq che tb'incha nim ti'xti' tb'anilqexi'x toj tx'otx' Kam ex e'ti'xti' te lab'te'n toju' Kyeq Ninnjab'.²³Tma Qman Dyos tu'n kykub' t-xitu'n; atzunte Moyses ju' sk'o'n tu'n, kub'san kyi'j we'tzun ttx'u'jil Dyos tu'n, ex min e'kub' t-xitu'n.

²⁴Yajxi'tzuntel el kyik'o'n jun tx'otx' tb'anilxi'x, ex min xikyoksla'nju' ojetoq tma Qman Dyos kye;²⁵e'yolin taq'wix ti'j Qman Dyos kyoj kypach ex min xikyb'i'nju' tchaq'b'il.²⁶Jawtzun tiq'i'n Qman Dyos tq'ob' ex majx tma'n kye qa oktoq che kb'el tb'yo'n toj chq'ajlaj,²⁷qa oktoq che b'eltb'yo'nju' kyyajajil ex oktoq che kxe'l t-slamu'n kyxolju' tnam nche niman kye txqantl dyos.

²⁸Eb'jo'k te tmajen k'a'yi'n B'aal-peor, ex eb'aj wan ti'ju' chojb'il kub' kyq'o'n kywitzju' dyos mixti' kyimniqe'.²⁹Okkyq'o'n ttx'u'jil Qman Dyos tu'n kyb'inchb'en taq'wix, tzajtzun jun tx'u'j yajb'iltzu' kyi'j.³⁰Jawtzun tiq'i'ntib' Pinees ex kub' tb'yo'nju' xjal intoq b'inchan il, we'tzun tx'u'j yajb'iltz.³¹B'a'n ela'ju' tb'incha toj twitz Dyos, intzaj tna'n kukxju' atl junjun tnej kyyajajil nche b'jik'.

³²Ex okkyq'o'n ttx'u'jil Qman Dyos ttziju' a' Merib'a, tu'ntzun kypaj toq'wix kyaja' Moyses,³³qu'n tzaj ttx'u'jil Moyses tu'n kpaj ex min ximan kyi'ju' tyol e'tma.

³⁴Min e'kub' kyxitu'nju' tnam ju' tchaq' Qman Dyos kye tu'n kyxitet.³⁵B'ajxpe' kysmo'nkyib', kyuk'i'lju' nche niman kye txqantl dyos ex b'je'l kykno'nju' intoq kyb'incha'n:³⁶ek'ulun kywitzju' kywitzileb' txqantl tnam Qu'mtzun ekub'a' xitu'n,³⁷e'xikyq'o'n kyk'wal ex kymyal te chojb'il kyeju' tajaw il lu.³⁸Kub' kyqo'n kychk'elju' mixti' kyil, kychk'elju' kyk'wal ex kymyal, ex kub' kyq'o'n te chojb'il kywitz witzileb' toj Kanaan. B'aj txa'jju' tx'otx' lu toj chik',³⁹eb'aj tz'ilix ex e'ok ajpajil twitz Dyos tu'n kpaju' kyb'inchb'en myab'a'n.

⁴⁰Tzaj ttx'u'jil Qman Dyos kyi'ju' ttanam, ex eb'je'l t-suchu'nju' teqe';⁴¹E'kyaj tkolb'e'n toj kyq'ob'ju' nche niman kye txqantl dyos, ex kub'kyi'j kyu'n kyajq'oj;⁴²e'kub'jtz'o'n, e'kub' yaju'n b'a'nxi'x tjaq' kykawb'ilju' kyajq'oj.⁴³B'a'npun maj e' klonjtz tu'n Qman Dyos, aye'tzunkye min xikynima'nju' t-xim tu'nxtzunju' kyb'inchb'en myab'a'n ekub'a' yajta'.⁴⁴Tu'npe'tzunju', tej kytzaj tka'yi'n nche yajti ex tej tb'inte nche oq',⁴⁵tzaj tna'nju' tyol kyej b'entti'j kyuk'i'l ex tch'exb'eju' t-xim, qu'n nimxi'x tk'u'jlalil kyi'j:⁴⁶¡tb'incha tu'n ttzaj q'aq'an kyk'u'ju' kyajq'oj kyi'j tu'ntzun b'a'nku' kyilwi tu'n!

⁴⁷¡Qo' tkloma Nman Dyos! ¡Qo' tb'uyitza kyxolu' nimaqtnam tu'ntzun qajwalinteju'ye' tb'iya xjan, tu'ntzun qajwalinteya toj tzalajb'il!

⁴⁸¡Nimanjtzxwit Qman Dyos, nkyk'lu'n aj Israel, toj tkyaqil tab'q'iyil! ¡Kykyaqilxwit che q'mante: Ikxwitju'!.
¡Ajwalinjtzxwit Qman Dyos! Chiju' b'itzal. Tjwe'yi'n U'j (E' b'itz 107—150) Tk'u'jlalil Qman Dyos kukxju'¹Kyq'onx chjonteye' te Qman Dyos, qu'n majx b'a'nte, qu'n tejumajxju' tk'u'jlalil.²Kymanxe' aye'ye' matxi' che klete' tu'n Qman Dyos, ex matxi' che klonjtze' tjaq' kykawb'il ajq'oj,³aye'ye' ẍetzaj tb'u'yi'n kyoj nimaqtnam toj tnayajkya'j ex tb'a'nq'ob'kya'j, toj tjawetzq'ij ex tkub'exq'ij.

⁴Tzpetniqe'toqe' nche b'ete' toj tz'awun toj chq'ajlaj, mixtoqti' nknet tb'eyil jun nintnam kyu'ne', jatu'n kyxa'ye' najal;⁵intoq che q'aq'ane' ex intoq che k'wajtiye', ¡ch'inxtoq kykyime' tu'n we'yaj!⁶Ekub'santzuntze' toj k'ixk'oj te Qman Dyos, e'klettzuntze' tu'n toju' yajb'il.⁷E'kub' q'o'ntzuntze' tu'n toj b'a'n b'e tu'n kypone' toj jun nintnam, jatu'n kynajana'ye'.

⁸Kyq'onx chjonteye' te Qman Dyos tu'nju' tk'u'jlalil,¡tu'nju' xtalb'il intb'incha'n kye xjal!

⁹Qu'n inqe tk'u'ju' nk'wajti tu'nex nim twaju' nwe'yajti nxitq'o'n.

¹⁰Najlqe'toqe' toj qlolj, intoq che b'isune' ex jtz'o'nqe'toqe' tu'n xpatx'k'uxb'il,¹¹tu'n tpaju' min xikyb'i'ne' tchaq'b'il Qman Dyos, tu'nju' b'je'l kysuchu'ne' t-xim Qman Dyos nim toklen.¹²E'kub' q'o'ne' toj kuw aq'untl tu'n Dyos; e'kub' tz'aqe' ex mix-a'lo' oninkyeye' tu'n kyjawe'ye'.¹³Tojtzun k'ixk'oj ekub'sana'ye' te Qman Dyos, e'klettzuntze' tu'n toju' yajb'il;¹⁴E'b'je'tz iq'i'ne' tu'n toj qxopin, ex e'tzaqpete' tu'n kyeju' xpatx'k'uxb'il.

¹⁵Kyq'onx chjonteye' te Qman Dyos tu'nju' tk'u'jlalil,¡tu'nju' xtalb'il ntb'incha'n kye xjal!

¹⁶¡E'kub' tpa'nju' tjpel ja q'ank'uxb'ilqe'!¡E'kub' ttoqi'nju' k'uxb'il xtanb'ilkye!¹⁷Yab' qe'toqe' tu'n b'is tu'nxju' kyb'inchb'ene' myab'a'n ex kyile',¹⁸mixtoqti'tl nche wane'; ¡ch'inxtltoq kypone' twitz kamik!¹⁹Tojtzunju' k'ixk'oj ekub'sane' te Qman Dyos, e'klettzuntze' tu'n toju' yajb'il;²⁰tzaj t-sma'n tyol kyeye' ex eb'anixe' tu'n; ¡eklete' tu'n teju' kamik!

²¹Kyq'onx chjonteye' te Qman Dyos tu'nju' tk'u'jlalil,¡tu'nju' xtalb'il ntb'incha'n kye xjal!

²²Kyajwali'nktze' te jun chojb'il twitzex kyolinqe'xju'ye' tb'inchb'en tuk'i'l tzalajb'il.

²³Aye'ye' xk'aẍlel nche b'ete' tib'aj ninnjab', txoli'n kytenju' kyb'arke' toj a'²⁴kyka'yiju'ye' taq'unb'en Qman Dyos tb'anilxi'x tib'aj ninnjab'.²⁵Jawb'ent jun nin kyq'iq' tu'n tq'ojq'ojel twi' Qman Dyos intoq jaw t-xon nimaq ttolob' ninnjab';²⁶Intoq che jaw xone' twitz kya'j ex intoq che ku'x mulq'i'ne' t-xe ninnjab'; ¡majx e'kub'numje' tu'n kyxob'ele'!²⁷Naqxtoq nche woqajlatle' naku'j tx'ujtenil; ¡mixti'x ajb'ena' kyojtzqib'le'!²⁸Ekub'santzuntze' twitz Qman Dyos toju' kyk'ixk'oje, e'klettzuntze' tu'n toju' yajb'il;²⁹naq el lemementlju' q'ankyaq tib'aj a' tu'n, ex e'kyaj nak'eju' ttolob' ninnjab'.³⁰Tetzunj kyka'yinteye' tkub' nak'eju' ttolob' ninnjab', eb'aj tzalaje', exi' iq'i'ntzuntze' tu'n Dyos ttziju' ninnjab' jatu'n kypona'toqe'.

³¹Kyq'onx chjonteye' te Qman Dyos tu'nju' tk'u'jlalil,¡tu'nju' xtalb'il ntb'incha'n kye xjal!

³²¡Kynimanktze' toju' b'uyjtib'il te tnam!¡Kyajwali'nktze' toju' b'uyjtib'il kye tijwnaq!

³³Inche b'jawb'ent nin a' ex t-xiklil a' tu'n Qman Dyos te chq'ajlaj ex tzqij tx'otx';³⁴intb'incha'n tb'anil tx'otx' te min ntq'o'ntl tawal, tu'n tpaj kyilju' xjal najlqe' twitz;³⁵Inche jawb'ent chq'ajlaj tu'n te njab' ex t-xiklil a' toj tzqij tx'otx';³⁶atzuntzu' nche kub'tq'o'na' nche we'yajti, intzun kub' kyb'incha'n ninkytanamtz toj.³⁷Nb'aj kyaq'una'nju' tx'otx' ex nb'ajx kyawa'n kyawal toj ex nim twitz kyawal njaw.³⁸Inche tzaj tky'i'wla'n Qman Dyos ex nchmet kyb'aj ex nche chmet kywakyix.³⁹Qatzun mache kyim exqa mako'pju' kyajlal tu'n tpaju' b'is, k'ixk'oj ex yajb'ilkye,⁴⁰inche el tik'u'n Qman Dyosu' nchi yajlankye nche kub'ttzpet-sa'n toj chq'ajlaj ex min nknetl kyb'e.⁴¹Inche etztiq'i'n prow toj b'is; ¡inche tchmet-sa'n kyk'wal, kse'n jun ch'laj rit!⁴²Inche tzalaju' xjal tnik'alkyi'j ajkyka'yinte ja'lu, aye'tzu'n b'inchal myab'a'n in jpet kytzi.

⁴³Ati tu'n t-ximanju' xjal ati tnab'l, ti'j ja'lu ex tu'n tkaneju' tk'u'jlalil Qman Dyos toj twitz. Chiju' b'itzal. Knq'a' wib'e' (Sal 57.7-11; 60.5-12)¹Nman Dyos, luqine' nchin ayone' teya, ¡naqnchin ayontle' tu'n kyxi' nb'itza'ne' b'itz! qu'n a ntzalajb'ilju'ye';²Kyna'ntzkyib'e' chnab' arpa ex tzintzin; ¡Kchin jawil we'ye' ajttzaj t-xe kya'j!³Kjawil wajwali'na Nman Dyos kyuk'i'l b'itz, kyxol k'ok'e' ex nimaqtnam.⁴Qu'n nimxi'xju' tk'u'jlalila kyekywitzju' kya'j. ¡Inpon kanunju' tyola ax, tzmax twitz ẍkul kya'j!⁵¡Nman Dyos, aya atiya tib'ajxi' kya'j; nojni tkyaqil twitz tx'otx' tu'n tajwalila!⁶Qo' tkloma tu'n tipumala, tu'ntzun kykletju' nche tk'u'jla'na. ¡Qo ttzaq'wetza!

⁷Tzaj tma'n Dyos tzmaxtzu' toju' tja xjan: ¡Kb'el waq'pu'ne' Sikyem tuk'i'l tzalajb'il ex kxe'l nsipa'nju'ye' b'ya' Sukot!⁸Weqe'we' Kalaad ex Manases; ate Eprayin jun kolb'il tokx toj nwi'ye'; atzu'n Juda ntzeye' q'ol nchaq'b'ile';⁹Atzu'n Moab' nk'o'ẍe' te ntx'ajb'ile'; atzun Edom naqtkb'el nxajab'e'; ¡kchin b'itzale' te kanb'ab'l kyib'aju' pilistey! Chij.

¹⁰¿Alxi'xkye k'onil weye' tu'n tkub'ti'ju' nintnam jpu'mile ti'j tu'n nimaqtapi? ¿Alkye kpomil iq'inweye' tzmax toj Edom?¹¹Matxi'na' qo eltik'o'na Nman Dyos; ¡min nnultla onilkye qxjale' toj q'oj!¹²Qo tonima toj kyq'ob'ju' qajq'oje', qu'n mixti'x tz'oka'te' o'nb'il kyu'n xjal.¹³Kb'entel nimaq ti'xti' qu'n tu'n tonb'il Qman Dyos; ¡ate kb'el najsankye' qajq'oj! Chiju' b'itzal. Kub'sb'il twitzju' ajkawil nim toklen¹Nman Dyos, tzaq'wentzju'ya nna'j Dyose',²qu'n aye' chalyol ex b'inchal myab'a'n inche yolin taq'wix wi'je' tuk'i'l chajyolil³Nim txqan kyjk'ujyolil tuk'i'l tx'a'lti'jk'u'jb'aj wi'je'; ¡inche q'ojink wi'je' extzun mixti' wile' kye!⁴Inche okmiltz'uj wi'je' te t-xelju' nk'u'jlalile' kyi'j; ayintzunwe' nchin na'n Dyose'.⁵Taq'wix xkyb'incha weye', tu'nju' b'a'n xnb'inchaye' kye, nchinel kyik'o'ne' te t-xelju' nk'u'jlalile' kyi'j.

⁶Q'onk jun xjala aj ilxi'x te ajkawil kyib'aj, ex axwitju' yolil kyi'j poqonkye;⁷che elxwit yal toj kyil ajkyok toj xjel; tu'nxwitju' kyyol te kolb'ilkye che'xa' toj q'aq'.⁸¡Noqwit jte' q'ijxju' kychwinqlal junxi'tlwit kyejten tib'aju' kyq'inumal!⁹¡Che kyajxwitju' kyk'wal meb'a ex che kyajxwitju' kyxu'jil mixti' kychmil!¹⁰¡Naqxwit che b'etenje kyk'wal mol najchaq! ¡Kyajxwitju' kyja naq tik'lentl!¹¹Awtju' q'ol ch'ex medi txi'q'inte tkyaqilju' ati kye. Junxi'tlwit xjal txi' elq'anteju' twitz kyaq'unb'en.¹²Mixwit alo'x tzaj q'aq'an tk'u'j kyi'j ex kyi'ju' kyk'wal meb'aqe'.¹³Kyejxwitju' kyja mutztelaq, kub'xwit naju' kyb'i tejumajx.¹⁴Tzajxwit tna'n Qman Dyos myab'a'n xkyb'inchaju' kyman mixwit tzik'a' tna'l kyilju' kytxu tu'n;¹⁵kukxwit ttzaj na'n kyilju' tu'n Qman Dyos mixwit che tzaj na'ntl twitz tx'otx'.

¹⁶Qu'n mixti'x saj q'aq'an kyk'u'j kyi'ju' prow ex kyi'ju' me's ex nche b'isun matz'ok kyljo'n toj kyq'ij ex mache kub' kyb'yo'n.¹⁷Anatzu' soka' kyxon kyk'u'j ti'ju' taq'wixil, ¡tzajxwittzun q'o'n taq'wixil kyib'aj! Matz'el kyik'o'nju' ky'i'wb'il, ¡mixwittzun che tzaja' ky'i'wla'n!¹⁸Che ktxet-xwit tu'n myab'a'n kse'n jun xb'alun; tz'exwit meq'eq'en toj kywinqil; naku'j tu'n aseyt mujqa a'.¹⁹¡tz'okxwit te kutxb'ilkye ex k'alb'il kyk'u'j!²⁰¡Awttzun tz'e'ysb'il kywitz wajq'oju'ye' tzaj tq'o'n Qman Dyos ex kyeju' nche jk'un yol wi'je'!

²¹Atzunta Nman Dyos, b'a'nxwit wilwiye' tu'na tu'n tnimanjtzju' tb'iya. ¡Chin tkloma, noqx tu'nju' tk'u'jlalila!²²Prowqine' ex nchin yajtiye', matxb'aj k'ixb'i wanmiye',²³xi' nkub'aje' kse'n leku'n, ¡inchinx iqane' tu'n kyq'iq' kse'n jun ẍt'ikt'u'l!²⁴Inche lu'lun nch'ekye' tu'n min nchin wane'; matxi' tz'okwi'je' tu'nju' min nchin wane'.²⁵¡Matxi' chin okye' te kytzeb'e'tz xjal! ¡Inche jaw xpak'lin ajntzaj kyka'yi'ne'!

²⁶Chin tonima Nman Dyos; ¡chin tkloma tu'nju' tk'u'jlalila!²⁷Nman Dyos, tz'elxwit kynik', qa tu'n tq'ob'a xb'incheta' ja'lu.²⁸B'a'n qama chin b'aj kyyasu'ne', naqqa nchin tky'i'wla'nta. Che kub'xwit ch'ixwi ayintzunwe' chin tzalajele'.²⁹¡Tz'elxwit kych'ixawju' wajq'oje! ¡Che kub'xwit ẍkyaqax tu'n kych'ixaw!

³⁰Kchin q'ol chjonteye' kukxju' te Qman Dyos; ¡kjawil wajwali'ne' kyxol tnam xjal!³¹Qu'n inok yolil kyi'ju' prow ex nche tklo'n kyeju' poqolkye. Chiju' b'itzal. Intzaj tq'o'n Qman Dyos tipumalju' nimaqkawil¹Xitma'n Qman Dyos te Wajawe' kjalu: Qeku'ya toj nb'a'nq'ob'e', tzmax ajkykub' nq'o'ne' tajq'oja tjaq' tqana. Chij.

²Ktzajel tq'o'n Qman Dyos ttzeya te kawb'il tzmax twi' Syon. ¡Kawintzuna kyib'aju' tajq'oja!³Kkyq'a'kyib'ju' ttanama tuk'i'la toju' tq'ijlalil ajtkanb'ana. kywi' witz xjan inkuwixa toj tku'xumala atl junjun q'ij, kse'n ta'l che'w nkub' ajttzaj t-xe kya'j.

⁴Oje tma Qman Dyos jun tyol tu'n tb'inchante, ex lay tz'anjtzti'tk'u'j, chij kjalu: Aya pale tejumajx, axtoklenju'ya kse'nte Melkisedek. Chij.

⁵Atite Qman Dyos toj tb'anq'ob'a; che b'elt-xitu'n nimaqkawil toju' q'ij ajttzaj ttx'u'jil;⁶kb'el ttz'e'ysa'n kywitzju' nimaqtnam; nim txqan xjal che kb'el tb'yo'n; ¡kb'el tpa'n kywi'ju' xjal toj tkyaqil twitz tx'otx'!⁷Kk'wal ti'j jun a' toj b'e, tu'ntzu'n a' k'okyelxi'x tipumal. Chiju' b'itzal. 1 Ajwalb'ilkye tb'inchb'en Dyos¹¡Ajwalinjtzxwit Qman Dyos!
Kwajwali'ye' Qman Dyos tu'n tkyaqil nk'u'je' toju' b'uyjtib'il kyeju' xjal tnik'alkyi'j, toj tkyaqilju' tnam.²Nimaq kyoklenju' tb'inchb'en Qman Dyos, aye'tzu'n nche k'u'jlante inche ximan ti'j.³Tb'anilxi'xju' tb'inchb'en ex nim toklen, ex majx atiju' tnik'alti'j ntb'incha'n.⁴Che tzajel na'nju' tb'inchb'en tb'anilxi'x kukxju'.
Inlaqjte Qman Dyos tk'u'j ex che'w tk'u'j;⁵intzaj tq'o'n kywaju' nche niman te; ¡min in ik'tna'lju' tyol kyejni b'entti'j!⁶Tzaj tyek'u'n tipumal teju' ttanam, tej tel ti'n kytx'otx'ju' witzleb'il ex tzaj tq'o'n kye.⁷Tu'me'lte' ntb'incha'n ex ax; b'a'n tu'n tokqe qk'u'j kyi'ju' tchaq'b'il,⁸qu'n majx ate'qe' toj tkyaqil tab'q'iyil b'incha'nqe' txoli'nxi'xkyi'j ex ax qe'.⁹E'ttzaqpiju' ttanam kyej tq'o'nxi'xju' tyol kyejni b'entti'j tejumajx. Xjante' Qman Dyos ex xob'ajilx.

¹⁰Ate nimaq nab'lju' qama qnima Qman Dyos; aye'ju' nche niman te, ati kynab'l. ¡K'ajwali'njtzel te Qman Dyos kukxju'! Chiju' b'itzal. Ttzalajb'ilju' xjal tnik'alti'j¹¡Ajwalinjtzxwit Qman Dyos!
Tzalajb'ilte' teju' xjal nniman te Qman Dyos ex ntzalaj tu'n kyjapu'nju' tchaq'b'il tu'n.²Che k'i'wlanjtzel tyajajil ex ktenb'el kyipumal twitzju' tx'otx'.³Nim q'inumal ati toju' tja, ex kukx tb'inchan xtalb'ilju'.⁴Ink'ant jun spik'un toj qlolj kyeju' xjal tnik'alkyi'j, kyeju' nlaqj kyk'u'j, che'w kyk'u'j ex tnik'alkyi'j.⁵Aju' b'a'n xjal inq'on ch'ex tu'n tkyaqil tk'u'j ex toj tu'me'l nche tb'incha'na' taq'un;⁶qu'mtzun milo kb'ela' tz'aq. ¡Ktzajel na'nju' xjal tnik'alti'j kukxju'!⁷Min nxob' ajtb'inte jun tpakb'alil toq'wix, q'uqlixi'x tk'u'j ti'j Qman Dyos.⁸Q'uqlixi'x tk'u'j; min nxob', expe' naq ntze'n kyi'ju' tajq'oj ajkyxi' tka'yi'n.⁹In oyin kye prow, kukx tb'inchan xtalb'ilju', majx oksla'n ex njaw nima'n.¹⁰Inxi'x ku'xtwantib'ju' b'inchal myab'a'n aj txi' tka'yi'n; naqxi'x nkuttx'a'n t-xe twitzte ajtkub'aj toj ttx'u'jil. Lay japunte' npon kyk'u'ju' b'inchal myab'a'n ti'j. Chiju' b'itzal. Ajwalb'ilte t-xtalb'il Qman Dyos.¹¡Ajwalinjtzxwit Qman Dyos! ¡Knima'nktze' tb'i! aye'ye' nche ajb'ene' te.

²¡Ajwalinjtzxwit tb'i Qman Dyos ja'lo ex tejumajx!³¡Ajwalinjtzxwit tb'i Qman Dyos tzajx tjawetzq'ij ponx tkub'exq'ij!⁴Atite Qman Dyos kyib'aj kykyaqil nimaqtnam; ¡tib'ajxi' kya'j ta'ju' tajwalil!

⁵Alxi'xkye jun ikwitju' kse'n Dyos Manb'aj, ju' nkawin tzmax toj kya'j;⁶exwittzun nkub' tzipe tu'n tka'yinteju' kya'j ex tx'otx'.⁷Inetz tiq'i'n Qman Dyos prow toj yajb'il, ex njaw tiq'i'n tal xjal mixti' ati te⁸Nnokxtq'o'ntzuntz kyxolju' xjal nimaq kyoklen, kyxolju' nimaq kyoklen toju' ktanam.⁹Exju' qya min nalan inxitq'o'n ttzalajb'il te tu'n tok te txub'aj tu'n ttzalaj kyuk'i'lku' toj tja.
¡Ajwalinjtzxwit Qman Dyos! Chiju' b'itzal. Nab'ab'lteju' kyetzlen aj Israel toj Ejipt¹Tej kyetz aj Israel, ju' tk'wal Jakob', toj Ejipt, junxi'tl tnam,²Ok Juda te ja xjan te Dyos; atzu'n Israel ok tjaq' tkawb'il.

³El oqju' ninnjab' tej tka'yinte kxi'toq kypon aj Israel, exju' nin a' Jordan anjti'j ti'jxi'.⁴¡Eb'aj xlik'punju' witz exqe' nimaq k'ul naku'j ritqe' ex nakuqe'j qpoj tman rit!

⁵¿Titi' b'ajteya ninnjab' tu'nju' el oqa? ¿titi' iq'ina Jordan tu'nju' anj ti'ja ti'jxi'ya?⁶¿Titi' b'ajkyeye' witz ex nimaq k'ul, tu'n e'jaw xlik'pune' kse'nqe' rit ex qpoj tman rit?

⁷¡Kux tjaw lu'luna tx'otx', twitz Qman Dyos, ja k'uluna' Jakob'!⁸¡Etz tnimal a' tu'n toj pik! ¡E'okju' pik tu'n te kyxiklil a'! Chiju' b'itzal. Toj kya'j ta' Qman Dyos¹Nman Dyos, nimsa'nktzju'ya tb'iya ex myaqo'ye'; ¡nimsa'nktztib'a, tu'nju' tk'u'jlalila exju' tyola ax!²Tu'ntzun lalun kyma ma' nimal txqantl dyos: ¿jata' Kydyose'? Chechiwt³Toj kya'j ta'qe' Qdyos; tkyaqilju' b'a'n toj twitz oje tb'incha.

⁴Aye'tzu'n kywitzleb' txqantl tnam q'anpwaq ex saqpwaqqe', b'incha'nqe' kyu'n xjal:⁵ati kytzi extzun min nb'ent kyyolin; ati kywitz extzun min nb'ent kyka'yin;⁶ati kyẍkyin extzun min nche b'in; ati kytxa'n extzun min nb'ent kysiqun;⁷ati kyq'ob' extzun min nb'ent kytzuyun; ati kyqan extzun min nb'ent kyb'et; ¡mixti'x jun tq'ojq'ojel yol nnetz toj kytzi!⁸Ikyqe'xtzun xjalju' aye' nche kub' b'inchankye exqe'ju' nche niman kye.

⁹¡Qek kyk'u'je' ti'j Qman Dyos, aj Israel!.Qu'n ate nnoninqe ex nklonqe.¹⁰¡E' pale, qek kyk'u'je' ti'j Qman Dyos!Qu'n ate nnoninqe ex nklonqe.¹¹¡Qek kyk'u'je' ti'j Qman Dyos, aye'ye' nche nimane' te!Qu'n ate nnoninqe ex nklonqe.

¹²¡Matxi' qotzaj tna'n Qman Dyos qo kb'el tky'i'wla'n! Che kb'el tky'i'wla'n aj Israel, che kb'el tky'i'wla'nju' pale,¹³che kb'el tky'i'wla'nju' nche niman te, eb'o's ex nimaq.

¹⁴¡Chmet-xwitju' kyyajajile' tu'n Qman Dyos ex kyyajajilju' kyk'wale'!¹⁵¡Che tzajxwit ky'i'wla'ne' tu'n Qman Dyos b'inchante kya'j ex tx'otx'!

¹⁶Tete' Qman Dyos kya'j, ex tzaj tq'o'nju' tx'otx' kyeju' xjal.¹⁷Aye'tzu'n oje che kyim aye' oje cheponj toj kynajb'il kyimni, lay b'ent kyniman te Qman Dyos;¹⁸ayo'tzunqe, kqajwali' te ja'lo ex tejumajx.
¡Ajwalinjtzxwit Qman Dyos! Chiju' b'itzal. Na'j Dyos aq'b'il chjonte¹In nk'u'jla'ne' Qman Dyos, qu'n matxi' che tzaj tb'i'nju' nkub'sb'ile',²qu'n machin tzajtb'i'ne'. ¡Kchin kub'sale' te toj tkyaqil nchwinqlale'!³Tej nna'nteye' tipumal kamik, tzaj k'ixk'oj wi'je' ex nb'isune' ex njaw xob'e' teju' muqb'il.⁴Tzajtzun nna'ne' tb'i Qman Dyos xinkub'sa'ne' te tu'n tklonte nchwinqlale'.

⁵Tnik'alte Qman Dyos ti'j ex in q'aq'an tk'u'j; che'wte Qman Dyos tk'u'j.⁶Xq'uqi'n qekye' mixti' kyoklen tu'n Qman Dyos. Intkole' tej mixtoqti' wipumale'.⁷oktzun qeb'el nk'u'je' ja'lo qu'n majx b'a'nte Qman Dyos weye',⁸qu'n machin tkole' te kamik, min xtaj tu'n woq'e' ex tu'n nkub' tz'aqe'.⁹Chin nimale' te Qman Dyos kyxolju' xjal twitz tx'otx'.

¹⁰Ati toqwe' wokslab'l tu'npetzu'n intoq nma'ne' qa nimtoq yajb'il wi'je'.¹¹Intoq chin b'isune' nmaye' qa kykyaqil xjal chalyolqe'.

¹²¿Ti'xi'xti' kxe'l nq'o'ne' te Qman Dyos te tu'me'l t-xel tkyaqilju' b'a'n matxi' tb'incha weye'?¹³¡Kjawil nnima'ne' Qman Dyos qu'n machin tkole' ex chin kub'sale' toj tb'i!¹⁴Che nb'incha'ye' nyole' xi'ni ntziya'ne' te Qman Dyos kwitz kykyaqilju' ttanam.

¹⁵Nimte' toklen toj twitz Qman Dyos ajkykyimju' nche niman te.¹⁶¡Nman Dyos, tmajen qina! ¡Ayine' talju' tmajena qya! B'je'l tlaqu'na aqwil k'lo'nqintoqe' toj.¹⁷Kxe'l nq'o'ne' chojb'il te aq'b'il chjonte teya, ex chin kub'sale' toj tb'iya Nman Dyos.¹⁸Che japumelju' nyole' xi'ni ntziya'ne' te Qman Dyos kywitz tkyaqilju' ttanam,¹⁹twi' tpenju' tja Qman Dyos ¡tnk'ejchaqila Jerusalen!
¡Ajwalinjtzxwit Qman Dyos! Chiju' b'itzal. B'itz te Qman Dyos¹Che b'itzan qe'ye' te Qman Dyos, kykyaqile' nimaqtnam ex k'ok'e'tnam,²qu'n nimxi'xju' tk'u'jlalil qi'j; ¡exju' tyol ax njapun tejumajx!
¡Ajwalinjtzxwit Qman Dyos! Chiju' b'itzal. Nimxi'x tipumal Qman Dyos¹Kyq'onx chjonteye' te Qman Dyos, qu'n majx b'a'n te, qu'n tejumajxju' tk'u'jlalil.²Kymame' aj Israel:Tejumajxte' tk'u'jlalil Qman Dyos. Chechiku'ye'.³Kymame' pale:Tejumajxte' tk'u'jlalil Qman Dyos. Chechiku'ye'.⁴Kymame' aye'ye' nkynima'ne' Qman Dyos:Tejumajxte' tk'u'jlalil Qman Dyos. Chechiku'ye'.

⁵Inkub'sane' te Qman Dyos tej nchin b'isune'; intzaj tb'i'ne' ex inttzaqpiye'.⁶Ati te Qman Dyos wuk'i'le'; min nchin xob'e'. ¿Titi' ktb'incha'ju' xjal wi'je'?⁷Ati te Qman Dyos wuk'i'le'; inchin toni'ne'. ¡Knka'yiye' ajtkub'kyi'ju' ntx'a'lti' kyk'u'j wi'je'!⁸Ate b'a'nju' tu'n tokqe qk'u'j ti'j Qman Dyos kyetwitz tu'n tokqe qk'u'j ti'j jun xjal.⁹Ate b'a'nju' tu'n tokqe qk'u'j ti'j Qman Dyos kyetwitz tu'n tokqe qk'u'j kyi'j nimaqxjal.

¹⁰Kkytxoli'kyib' kykyaqilju' nimaqtnam wi'je', ma'tzun kub'kyi'j wu'ne' toj tb'i Qman Dyos.¹¹Okkytxoli'nkyib' wi'je' toj tkyaqil plaj, extzun makub'kyi'j wu'ne' toj tb'i Qman Dyos.¹²Okkytxoli'nkyib' wi'je' naku'j secha'lqe', ex lwiy kub' maytz'aju' kytx'u'jil kse'n tq'aq'al tzqij ch'i'x; ¡kub'kyi'j wu'ne' toj tb'i Qman Dyos!¹³Inxi' kylmo'ne' tu'n kytx'u'jil tu'n nkub' tz'aqe', atzunte Qman Dyos ul onilweye'.¹⁴Inchin b'itzane' te Qman Dyos, intzaj q'onte wipumale'. ¡Ate klol weye'!

¹⁵Inche b'itzanju' xjal tnik'alkyi'j tu'n kytzalajb'il tojile kyja, qu'n mache kanb'an: ¡Makub'kyi'j ajq'oj tu'n tipumal Qman Dyos!¹⁶¡Nimxi'x toklenju' tipumal Qman Dyos! ¡Kub'kyi'ju' ajq'oj tu'n tipumal Qman Dyos! Chechij.¹⁷¡Lay chin kyimnaje', chin anq'ilwe' tu'n txi' nchik'b'a'nju'ye' xtb'incha Qman Dyos!¹⁸Makub' ttz'e'ysa'n Qman Dyos nwitze' kuw, mixtzunti' xtaj tu'n nkyimnaje'.

¹⁹¡Kyjqome' tja Qman Dyos,
wajb'ile' tu'n wokxe' q'ol chjonte te!

²⁰A ttzi tja Qman Dyos ja'lu, ja che okyixa' tnik'alkyi'j.

²¹Chjonte teya Taye, qu'n machin tzaj ttzaq'we'na ex machin tkola.²²Matxi' jawb'entju' ab'j kyej kysuchu'n b'inchal ja te ab'j nim toklen.²³Matb'incha Qman Dyos ja'lu, ex lab'te'nxi'xte' ja'lu.²⁴A q'ij ju'lu tb'inchante Qman Dyos: ¡qo'qe'tzun tzalaj toj ja'lo!

²⁵Nman Dyos, b'inchama xtalb'il, ¡qo' tkloma! Taye, b'inchama xtalb'il, ¡tu'n qtene' b'a'n!

²⁶¡K'i'wla'nte' tzul toj tb'i Qman Dyos! Inxi' qqani'ne' b'a'n kyib'aje' tzmaxtzu' toj tja Qman Dyos.²⁷Ate Dyosju' Dyos Manb'aj ¡intzaj tq'o'n spik'un qe! kynk'um kyib'e' tuk'i'l tq'ob' tze toj kyq'ob'e' tzmajx ajkypone' tk'etz q'olb'eb'l.

²⁸Chjonte teya Nman Dyos, kjawil nnima'nju'ye' toklena, qu'n aya Dyos.²⁹Kyq'onx chjonteye' te Qman Dyos, qu'n majx b'a'n te, qu'n tejumajxju' tk'u'jlalil. Chiju' b'itzal. B'itz ti'ju' tkawb'il Dyos Tnejel¹Tzalajb'ilte' kyeju' xjal min nche b'inchan il ex nkyb'incha'n kse'nx t-xnaq'tzb'il Qman Dyos.²Tzalajb'ilte' kyeju' nche japun tchaq'b'il Qman Dyos kyu'n
ex nche jyon ti'j tu'n tkyaqil kyk'u'j,³aye' min nche b'inchan myab'a'n, aye' nche b'et toju' tb'eyil Dyos.⁴Tzaj tab'tzi'nxi'xa tu'n tjapunju' tchaq'b'ila ilxi'xti'j.⁵¡Chin b'et-xwite' b'a'n! tu'n kyxinnima'ne' tkawb'ila.⁶Lay chin ch'ixwiye' ajkyxi nnima'ne' tkyaqilju' tchaq'b'ila.⁷Chin b'itzale' teya tu'n tkyaqil nk'u'je' ajkykaneju' tchaq'b'ila tz'aqliqe'xi'x toj nwitze'.⁸¡Wajb'ile' tu'n kyjapun tkawb'ila wu'ne'! ¡Lalun chin kyej tkolb'e'nch'i'na! Tkab'⁹¿Titi' ktb'incha'ju' ku'xun tu'n lalun b'inchan il? ¡Tu'n tanq'in kse'nxju' ntma'n tyola!¹⁰In njyo'na tu'n tkyaqil wanmiye'; lalun taja tu'n tel npa'nwib'e' kyi'ju' tchaq'b'ila.¹¹Matxi' che kyej tenju' tyola toj wanmiye' tu'ntzun lalun chin b'inchan ile' twitza.¹²¡Nimanjtzxwita, Nman Dyos! ¡Xnaq'tzanqe'tza tkawb'ila weye'!¹³Kxe'l npakb'a'ne' tkyaqilju' tchaq'b'ila intma'na.¹⁴Inxi'x chin tzalaje' ajnxilpeye' kyi'ju' tchaq'b'ila, kyetwitz kyi'j q'inumal.¹⁵Chin ximale' kyi'ju' tnuk'b'ila ex k'okyil nxon nk'u'je' ti'ju' tb'eya.¹⁶Chin tzalajele' kyi'ju' tkawb'ila ex lay tzik'tna'lju' tyola wu'ne'. Toxi'n¹⁷¡Q'ontza nchwinqlale' ayine' tmajena! ¡Kxe'l nnima'nwe' tyola!¹⁸Jqomqe'ju'ya nwitze' tu'n nka'yinteye' kywitzlalilju' tchaq'b'ila tb'anilqexi'x.¹⁹Naq ajb'etunqine' twitzu' tx'otx' lu; lalun che kub'tewa'na tchaq'b'ila nwitze'.²⁰Xi' nkub'aje' atl junjun kmuj, tu'n nchin elb'aje' tu'n wojtzqinteye' tchaq'b'ila.²¹Inche ttzak'u'nju'ya txko'n toj kywi' nkynima'n kyib', inel kypa'n kyib' kyi'ju' tchaq'b'ila.²²Chin tkloma teju' kyq'oj ex kyasb'il, qu'n matxi' che'x nb'i'nju'ye' tchaq'b'ila.²³Maskye nkyxima'n xjal nimaq kyoklen tu'n kyb'inchan taq'wix wi'je', chin ximalwe' kyi'ju' tkawb'ila ayine' tmajena.²⁴Inchin tzalaje' kyu'nju' tchaq'b'ila; qu'n nkyq'o'n nnab'le'. Tkyaji'n²⁵Naqch'inxtl nkyime'; ¡Chin twab'a'nktza kse'nxju' yol tzaj ttziya'na!²⁶Matxi' txinma'ne' teya se'n nchin b'eta'ye', ex matxi' chin tzaj ttzaq'we'na. ¡Xnaq'tzanqe'tzju'ya tkawb'ila weye'!²⁷Q'ontza nnab'le' tu'n nxilpeye' kyi'ju' tchaq'b'ila, wajb'ile' tu'n nximane' kyi'ju' tb'inchb'ena tb'anilqexi'x.²⁸Matxi'xi'x ku'xch'yon ti'jnk'u'je' tu'n k'ixk'oj; ¡q'uqb'ama nk'u'je', kse'nxju' tzaj ttziya'na!²⁹Chin tpa'mila ti'ju' b'e te chajyolil ex yek'u'nqe'tza tchaq'b'ila weye' tu'n tk'u'jlalila.³⁰Matxi' kub' nxima'ne' tu'n nb'i'ne' teya inchin laqje' kyi'ju' tchaq'b'ila.³¹Nman Dyos, matxi' tz'ok nxon nk'u'je' kyi'ju' tchaq'b'ila; ¡lalun taja tu'n tel nch'ixawe'!³²Nnoktilil wu'ne' tu'n kyjapunju' tchaq'b'ila qu'n inxi'x chin tzalaje' tu'na. Tjwe'yi'n³³Nman Dyos, xnaq'tzanqe'tzju'ya tkawb'ila weye', wajb'ile' tu'n woklpeye' kyi'j toj tkyaqilju' nchwinqlale'.³⁴Q'ontza nnab'le' tu'n kyjapun tchaq'b'ila wu'ne'; ¡wajb'ile' tu'n kyxinb'incha'ne' tu'n tkyaqil nk'u'je'!³⁵Yek'unqe'tza tchaq'b'ila weye', qu'n atzu' nchin tzalaja'ye' kyi'j.³⁶Chin toniya tu'n tokten nwitze' kyi'ju' tchaq'b'ila mya ti'j jamjoni'n.³⁷Lalun taja tu'n tokten nwitze' kyi'ju' noqxgan; ¡chin tonima tu'n nb'ete' toju' tb'eya!³⁸Japunxtzunju' tyola weye' e'ttziyaya kyeju' nche niman teya.³⁹Chin tkloma teju' ik'b'il nchin xob'e' te, qu'n tz'aqli qekye' tchaq'b'ila.⁴⁰Ina' chin laqjwe' kyi'ju' tchaq'b'ila; ¡q'ontza nchwinqlale', qu'n tnik'altati'j! Tqaqi'n⁴¹Nman Dyos, yek'untza tk'u'jlalila ex chin tloma, kse'nxju' kyajni ttziya'na.⁴²Tu'n ttzaq'wet wu'ne' kyeju' nche ok ik'lenweye', q'uqlina'we' nk'u'j ti'ju' tyola.⁴³Lalun taja tu'n tb'aj nyolinteye' tyola ax, matxina' tz'okqe nk'u'je' kyi'ju' tchaq'b'ila.⁴⁴¡Wajb'ile' tu'n wanq'inteye' t-xnaq'tzb'ila, kukxju', toj tkyaqil tq'ijlalil!⁴⁵Chin anq'iltzuntze' toj tzaqpib'l, matxina' chinx lpewe' kyi'ju' tchaq'b'ila.⁴⁶Chin yolile' kyi'ju' tchaq'b'ila kywitzu' nimaqkawil ex lay chin ch'ixwiye'.⁴⁷Ina' che nk'u'jla'nwe' tchaq'b'ila ex nchin tzalaje' kyi'j.⁴⁸K'u'jla'nqe' tchaq'b'ila wu'ne' ex chi' nk'u'je' kyi'j, ex nxi'x chin ximane' kyi'ju' tkawb'ila. Twuqi'n⁴⁹Na'ntza tyola tzaj tma'na weye' ayine' tmajina: qu'n ti'j soka'qe nk'u'je' tu'na.⁵⁰Ate q'uqb'ab'l nk'u'jju'ye' toj b'is: qu'n intq'o'na nchwinqlale' tu'nju' tyola tziya'n.⁵¹Kukx wok ik'le'nju'ye' kyu'nju' nknima'n kyib', ayintzunwe' min nkyaj ntzaqpi'ne' t-xnaq'tzb'ila.⁵²Inche tzaj nna'nju'ye' tchaq'b'ila te ojtxi', ex inqe nk'u'je' kyi'j.⁵³Inchin tx'u'jine' kyi'ju' b'inchal myab'a'n ju' nkyej kykoli'nju' t-xnaq'tzb'ila.⁵⁴Matxi' che okju' tkawb'ila te nb'itze' twitzju' tx'otx' lu, ajb'etun xjal qine' toj.⁵⁵Nman Dyos, intzaj nna'na toj qonik'an; ¡wajb'ile' tu'n wanq'inteju'ye' t-xnaq'tzb'ila!⁵⁶Awe' waq'un: tu'n kyxi' nb'incha'nju'ye' tchaq'b'ila. Twajxaqi'n⁵⁷Nman Dyos, o'kxa nim toklena weye'; oje ntziyaye' tu'n wanq'inteju'ye' tyola.⁵⁸Nnoktilil wu'ne' tu'n tkyaqil nk'u'je' tu'n ttzalaja wi'je'; q'aq'antz tk'u'ja wi'je' kse'nxju' kyej ttziya'na.⁵⁹Inximane' ti'ju' tu'me'l nchin anq'ina'ye', ex mache'x nb'incha'ntle' tchaq'b'ila.⁶⁰Matz'oktilil wu'ne' ex lwiy ẍe'x nb'inchanju'ye' tchaq'b'ila.⁶¹Mache oktxoli'n xpatxab' wi'je' kyu'n b'inchal myab'a'n, ex min sik'tna'lju' t-xnaq'tzb'ila wu'ne'.⁶²Inchin jawe'ye' tk'u'j aq'b'il q'ol chjonte teya tu'nju' tz'aqlqe'xi'xju' tchaq'b'ila.⁶³Wamiw qe'we' nche niman teya exqe'ju' nche japun tchaq'b'ila kyu'n.⁶⁴Nman Dyos, nojni twitz tx'otx' tu'n tk'u'jlalila; ¡xnaq'tzanqe'tzju'ya tkawb'ila weye'! Tb'eljoji'n⁶⁵Nman Dyos, majx b'a'n wilwiye' tu'na ayine' tmajina, kse'nxju' tyola ttziyaya.⁶⁶Chin t-xnaq'tzantza tu'n tten nnab'le' ex wojtzqib'le', q'uqliwe' nk'u'j kyi'ju' tchaq'b'ila.⁶⁷Nim chuksb'il xnb'inchaye' na'mxtoq nkub' tme'ssa'na, atzu'n ja'lo nxinb'i'ne' tyola.⁶⁸Majx b'a'nta, ex nb'inchan xtalb'ila; ¡xnaq'tzanqe'tza tkawb'ila weye'!⁶⁹Naqx kyak'a'nju' nkynima'n kyib' ate'qe'k poqol weye', ayintzunwe' nwanq'i'ne' tchaq'b'ila tu'n tkyaqil nk'u'je'.⁷⁰Tzpetni kye' xjal lu kynab'l, ayintzunwe' nchin tzalaje' tu'nju' t-xnaq'tzb'ila.⁷¹B'a'nte' ẍin kub'messa'ne', qu'n mache kaneju' tkawb'ila toj nwitze'.⁷²Nimxi'x toklenju' t-xnaq'tzb'ila ntma'na weye', kyetwitz txqan medi q'anpwaq ex saqpwaq. Tlajoji'n⁷³Aku'ya kub' b'inchanweye' ¡q'oma tu'n nximane' tu'n tel nnik'e' kyi'ju' tchaq'b'ila!⁷⁴Inche tzalaju' nche niman teya ajntzaj kyka'yine', qu'n matxi' tz'okqewe' nk'u'j ti'ju' tyola.⁷⁵Nman Dyos, b'i'n we'wu'n tz'aqliqe'xi'xju' tchaq'b'ila ex toj tu'me'l nchin kub'ttzak'una'ya.⁷⁶¡Tz'okxwitju' tk'u'jlalila te q'uqb'ab'l nk'u'je', kse'nxju' tyola tzaj ttziya'na weye'!⁷⁷Yek'untza tk'i'wlalila ex q'ontza nchwinqlale', qu'n nchin tzalaje' kyi'ju' tchaq'b'ila.⁷⁸Tz'elxwit kych'ixawju' nkynima'n kyib' aye' noqxkyak'a'n nchin kywuli'ne'; chin ximalwe' kyi'ju' tchaq'b'ila.⁷⁹Kymujb'axwit kyib'ju' nche niman teya wuk'i'le', aye' ojtzqi'n tchaq'b'ila kyu'n.⁸⁰Chin okxwite' tz'aqli kyoju' tkawb'ila, tu'ntzun mitz'ela' nch'ixawe'. Tjunlajoji'n⁸¹Inxi'x chin elb'aje' tu'n tula klol weye'; ¡qu'n o'kxtzu' q'uqla' nk'u'je' ti'ju' tyola!⁸²Naq tuk'ilxtl kyu'n nwitze' oyb'enteju' ttziyaya, ¿Jtojtzun tzula q'uqb'alte nk'u'je'? nchije'.⁸³Maskye matxi' chin tijine', mixti'tl wajb'ene' ex kyejni kolb'e'n qine', min nnik'kyna'lju' tkawb'ila wu'ne'.⁸⁴¿Jte'lo q'ijtl tu'n tkub' wayo'ne'? ¿Jtojtzun kub' ttz'e'ysa'n kywitzju'ya nche yajun weye'?⁸⁵Matxi' che ku'xlku'n xpatxab' toj nb'eye', kyu'nju' nkynima'n kyib' ex min lepchqe'k ti'ju' t-xnaq'tzb'ila,⁸⁶¡Chin tonima, qu'n ljo'n toj nq'ije' extzun mixti' wile'! ¡Kykyaqilju' tchaq'b'ila ax qe'!⁸⁷Ma'toq chin kub'a' najsa'ne' twitz tx'otx', ex min sik' tna'lju' tchaq'b'ila wu'ne'.⁸⁸Q'ontza nchwinqlale' tu'nju' tk'u'jlalila, ex che japumel tchaq'b'ila e'tmaya wu'ne'. Tkab'lajoji'n (12)⁸⁹Nman Dyos, tejumajxte' tyola; ¡majx ati toj kya'j!⁹⁰In japunju' tyola tu'na tejumajx; kub'tb'incha'nju'ya tx'otx' ex majx kyejten.⁹¹Kukxkyten ti'xti'ju', kse'nxju' tchaq'a, qu'n kykyaqil nche ajb'en teya.⁹²Noqwit myaju' t-xnaq'tzb'ila ntzalajsan weye', matxi'wtlo chin b'aje' tu'n b'is.⁹³Milo najchi'j tu'n tik'kyna'lju' tchaq'b'ila wu'ne', mana' tzaj tq'o'na nchwinqlale' kyu'n.⁹⁴¡Chin tkloma, qu'n teqina ex inche wanq'i'nju'ye' tchaq'b'ila!⁹⁵Inche xq'uqinju' b'inchal myab'a'n wi'je' tu'n nkub' kyb'yo'ne', ayintzunwe' toknwi'ye' kyi'ju' tchaq'b'ila.⁹⁶Matxi' wile' qa kykyaqilju' ti'xti' nche b'aj, aye'tzu'nta tchaq'b'il milo che b'ajela'. Toxlajoji'n⁹⁷¡Inxi'x che nk'u'jla'ne' tchaq'b'ila! ¡Nb'aj q'ij tu'n nximane' kyi'j!⁹⁸Weqe'we' tchaq'b'ila tejumajx; atixi'x nnab'le' kyu'n kyekywitzju' wajq'oje.⁹⁹In kanexi'x toj nwitze' kyekywitzju' xnaq'tzalweye' qu'n nxi'x chin ximane' kyi'ju' tchaq'b'ila.¹⁰⁰Inxi'x kane toj nwitze' kyekywitzju' tijwnaq qu'n nche'x nnima'nju'ye' tchaq'b'ila.¹⁰¹Matxi' tz'el npa'nwib'e' ti'ju' b'e myab'a'n tu'n tjapunju' tyola wu'ne'.¹⁰²B'ajx tz'ela' npa'nwe'wib' kyi'ju' tchaq'b'ila qu'n aya xnaq'tzalweye'.¹⁰³Chi'xi'xte' tyola ttziyaya kyetwitz ta'lkab' toj ntziye'.¹⁰⁴Tu'nju' tchaq'b'ila xtena' nnab'le'; qu'mtzun nche el wik'u'nju'ye' chajyoli'n. Tkyajlajoji'n¹⁰⁵Jun spik'unte' tyola weye' ex jun txaqb'ilte toj nb'eye'.¹⁰⁶ntziyaye' jun yol, ex kjapumel wu'ne': ¡che b'el wanq'i'nju'ye' tchaq'b'ila tnik'alkyi'j!¹⁰⁷Nman Dyos, inxi'x chin b'isune'; ¡q'ontza nchwinqlale', kse'nxju' oje tmaya!¹⁰⁸Nman Dyos, k'monxju'ya aq'b'il chjonte nxinma'ne' teya, xnaq'tzanqe'tzju'ya tchaq'b'ila weye'.¹⁰⁹Naq nneljeti'ju' nchwinqlale' tkyaqil q'ij, ex min in ik'tna'lju' tchaq'b'ila wu'ne'.¹¹⁰Inche kub' kyq'o'n b'inchal myab'a'n xpatxab' toj nb'eye', ex min nnel npa'nwe' wib' kyi'ju' tchaq'b'ila.¹¹¹Aye' wetzb'ilju'ye' tchaq'b'ila tejumajx, qu'n inxi'x chin tzalaje' kyu'n.¹¹²Oje kub' nxima'ne' tu'n kyxinb'incha'ne' tkawb'ila, kukxju' ex tejumajx. T-o'lajoji'n¹¹³Inche el wik'u'nju'ye' xjal xmletz'qe', aye'tzu'n t-xnaq'tzb'ila k'u'jla'nqe' wu'ne'.¹¹⁴Aya e'wb'il weye' ex klol weye'; atzu' matxi' tz'oka' qe nk'u'je' ti'j ju' tyola.¹¹⁵¡Kypa'mil kyib'e' wi'je' b'inchal myab'a'n, qu'n wajb'ile' tu'n kyjapun tchaq'b'il Dyos wu'ne'!¹¹⁶Q'ontza wipumale' kse'nxju' ttziyaya, chin anq'iltzuntze'; ¡lalun tz'el nch'ixawe' tu'nju' q'uqlok nk'u'je' ti'ja!¹¹⁷Chin tonima, tu'ntzun nklete'; che japumeltzun tkawb'iltzu'ya wu'ne' kukxju'.¹¹⁸Nche eltik'u'nju'ya min nche oklpe kyi'ju' tkawb'ila, qu'n mixti'x nche ximan b'a'n.¹¹⁹Naku'j tz'is qe'ju' b'inchal myab'a'n twitz tx'otx' teya; qu'mtzun nche nk'u'jla'nwe' tchaq'b'ila.¹²⁰Inchin lu'lune' tu'n xob'il twitza; ¡inche nnima'nwe' tchaq'b'ila! Tqaqlajoji'n¹²¹Kukxwe' nb'inchante tnik'alilti'j; lan chin kyej tq'o'na toj kyq'ob'ju' nche yajun weye'.¹²²Chin tka'yima tu'n ntene' b'a'n; tu'n lalun chin b'ajkyajla'ne' nkynima'n kyib'.¹²³Matxi' che sikti nwitze' ayob'enteya tu'n tula klol weye', inchin ayone' tu'n ntzaqpete' tu'na kse'nxju' ttziyaya.¹²⁴Chin tka'yika ayine' tmajena kse'nxju' tk'u'jlalila; ¡yek'unqe'tzju'ya tkawb'ila weye'!¹²⁵Ayinweju'ye' tmajena. Q'ontza nnab'le', wajb'ilwe' tu'n tel nnik'e' kyi'ju' tchaq'b'ila.¹²⁶Nman Dyos, matxi' pon tq'ijlalil tu'n tjaw tiq'i'ntib'a, kyib'aju' min nxikyima'n t-xnaq'tzb'ila.¹²⁷Qu'mtzun nche nk'u'jla'nwe' tchaq'b'ila nimxi'x kyekywitzju' q'anpwaq tb'anil.¹²⁸Qu'mtzun lepchqinxe' kyi'ju' tchaq'b'ila atzu'n myab'a'n nkyb'incha'n xjal ik'o'n wu'ne'. Twuqlajoji'n¹²⁹Majx tb'anilqe'kye' tchaq'b'ila; qu'mtzun nche'x nnima'ne'.¹³⁰Jun spik'unte' chik'b'ab'l tib'aju' tyola, inten kynab'lju' xjal noq ch'i'n kyojtzqilb' tu'n.¹³¹Inxi'x che k'atjnenju' tchaq'b'ila weye', qu'n nchin laqje' kyi'j.¹³²Chin tka'yintza, ex q'aq'antz tk'u'ja wi'je', kse'n ntb'incha'na kyeju' nche k'u'jlanteya.¹³³B'inchama tu'n nb'ete' kse'nxju' ntma'n tyola; lalun taja tu'n tkub' wi'je' tu'nju' myab'a'n.¹³⁴Chin tkloma teju' yajb'il kyu'n xjal, wajb'ile' tu'n kyjapunju' tchaq'b'ila wu'ne'.¹³⁵Chin tka'yintza tuk'i'l tk'u'jlalila, ex xnaq'tzanqe'tza tkawb'ila weye'.¹³⁶Inxi'x el ta'l nwitze' qu'n min nche'x nima'nju' t-xnaq'tzb'ila. Twajxaqlajoji'n¹³⁷Nman Dyos, tz'aqlixi'xta; ex tu'me'l qe'xi'xju' tchaq'b'ila.¹³⁸Tkyaqilju' tchaq'b'ila tz'aqliqe'xi'x ex ax qe'.¹³⁹Xi' nkub'aje' tu'n xky'aqli'n ti'j ju' tyola, qu'n matxi' tzik' kyna'l kyu'nju' wajq'oje.¹⁴⁰Toj tkuwal oje tzik' twitzlalilju' tyola ttziyaya; qu'mtzun k'u'jla'n wu'ne' ayine' tmajena.¹⁴¹B'a'ntzun qa mixti'we' woklen ex ik'u'nqine', min nik' kyna'lju' tchaq'b'ila wu'ne'.¹⁴²Te jumajxte' tnik'alilti'j tu'na, ex ax qe' t-xnaq'tzb'ila.¹⁴³Matxi' chin tene' toj b'is ex toj yajb'il, aye'tzu'n tchaq'b'ila machin kytzalajsaye'.¹⁴⁴Tz'aqliqe'kye' tchaq'b'ila kukxju'; ¡q'ontza nnab'le' tu'ntzun tb'ent wanq'ine'! Tb'eljlajoji'n¹⁴⁵Nman Dyos, in ntxko'na tu'n tkyaqil nk'u'je'; ¡chin ttzaq'wentza, wajb'ilwe' tu'n kyjapun tkawb'ila wu'ne'!¹⁴⁶Twitza nchin kub'sana'ye', chin tonima tu'n kyjapunju' tchaq'b'ila wu'ne'.¹⁴⁷Na'mxtoq qsqix nchin jawe'ye' qanil o'nb'il teya; matxi' tz'okqe nk'u'je' ti'ju' tyola tzaj ttziya'na.¹⁴⁸Ajqok yupj, min ntzajnaj nwatle' tu'n nkub' tene' ximal ti'ju' tyola tzaj ttziya'na.¹⁴⁹Nman Dyos, chin tb'intza tu'n tk'u'jlalila; q'ontza nchwinqlale' kse'nxju' b'a'n toj twitza.¹⁵⁰Okniqe' lq'eju' ljolte toj nq'ije' ti'ju' myab'a'n, atzu'n ti'ju' t-xnaq'tzb'ila najchaq ta'qe'.¹⁵¹Nman Dyos, nqaku' ta'ta, ex tkyaqilju' tchaq'b'ila ax qe'.¹⁵²Wojtzqi'nqe'we' tchaq'b'ila atxi'x ojtxi', e'kyajtq'o'na tejumajx. Tjunaqi'n¹⁵³Ka'yintza nchin yajtiye' ex chin tkloma, b'ajxna tzik'a' kyna'lju' t-xnaq'tzb'ila wu'ne'.¹⁵⁴Chin tkloma toju' yajb'il lu; ¡q'ontza nchwinqlale' kse'nxju' tziya'n tu'na!¹⁵⁵Min nnonina kyi'ju' b'inchal myab'a'n, qu'n min nche anq'in kse'nxju' tkawb'ila.¹⁵⁶Nimxi'xju' tk'u'jlalila Nman Dyos; q'ontza nchwinqlale' kse'nxju' b'a'n toj twitza.¹⁵⁷Nim kyb'aju' wajq'oje exqe' nche yajun wi'je', atzunwe' min nelnpa'n wib'e' kyi'ju' tchaq'b'ila.¹⁵⁸Lay che ik'xju' nche okmiltz'uj ti'ja wu'ne', aye' min nche'x kynima'n tchaq'b'ila.¹⁵⁹Ka'yintzpe'ya Nman Dyos, inche nk'u'jla'nwe' tchaq'b'ila; ¡q'ontza nchwinqlale' kse'nxju' tk'u'jlalila!¹⁶⁰Atiju' ax toj tkyaqilju' tyola; tkyaqilju' tchaq'b'ila tz'aqliqe' ex tejumajxqe'. Tjunaqi'n jun¹⁶¹Ljo'n toj nq'ije' kyu'n xjal nimaq kyoklen, extzun mixti' wile' kye, ayintzunwe' inche'x nnima'nju'ye' tyola.¹⁶²Inchin tzalajwe' kyi'ju' tyola tzajni ttziya'na, kse'n nknet jun k'uwenj tb'anilxi'x tu'n jun xjal.¹⁶³Inel wik'u'nwe' chajyolil, min nkub' toj nwitze' atzu'n t-xnaq'tzb'ila in nk'u'jla'ne'.¹⁶⁴Tkyaqil kmuj nchin b'itzane' teya tu'nju' tz'aqliqe'xi'xju' tchaq'b'ila.¹⁶⁵B'a'n ta'qe'kye' nche k'u'jlante t-xnaq'tzb'ila, ex lay che kub' tz'aq.¹⁶⁶Nman Dyos, awta klonweye', qu'n matxi' che wanq'inju'ye' tchaq'b'ila.¹⁶⁷Nche'x nb'i'nwe' tchaq'b'ila ex nche nk'u'jla'ne' tu'n tkyaqil nk'u'je'.¹⁶⁸Nche'x nb'i'nwe' tchaq'b'ila ex tyola; ¡ojtzqi'nta tu'n se'n tu'me'l nchin anq'ina'ye'! Tjunaqi'n kab'e' (22)¹⁶⁹Nman Dyos, b'intzju'ya nkub'sb'ile'; ¡q'ontza nnab'le' kse'nxju' ntma'n tyola!¹⁷⁰Japunxwitju' nna'j Dyose' twitza; ¡chin tkloma, kse'nxju' tyola tzajni ttziya'na!¹⁷¹Chin b'itzanxwite' te ajwalilteya, mache tzajtyek'u'na tkawb'ila weye'.¹⁷²Kchin b'itzale' tu'nju' yol tzaj ttziya'na, qu'n tkyaqilju' tchaq'b'ila tz'aqliqe'xi'x¹⁷³Nman Dyos, lwiyxwit tzaja klol weye', qu'n matxi' kub' nxima'ne' tu'n kyxi'nb'i'ne' tchaq'b'ila.¹⁷⁴Nman Dyos, ¡wajb'ile' tu'n nklete' tu'na! ¡Nchin tzalaje' ti'ju' t-xnaq'tzb'ila!¹⁷⁵Wajb'ile' tu'n wanq'ine' ajwalilteya; awtju' tchaq'b'ila tz'oninweye'.¹⁷⁶Matxi' chin tzpete' kse'n jun rit; ¡kuttzaja jyolweye', min nik'tna'lwe' tchaq'b'ila wu'n! chiju' b'itzal. Na'j Dyos toj jun xob'ajil¹Inxinna'ne' Qman Dyos kse'n antine' toj k'ixk'oj, ex nchin tzajttzaq'we'ne'.²Nman Dyos, chin tkloma toj kytziju' chalyol ex toj kytziju' xmletz'.

³¿Ti'xi'xwitzuloti' ktkanb'a'ya chalyol?⁴¡Talsmaj ch'utkywi' te q'ojil! ¡Tuk'i'l ttxaltq'aq'al tze retama!

⁵¡Qab'anx nwitze', nchin najane' naku'j ajb'etun toj Mesek, najlqine' kyxolju' pach xb'alun toj Kedar!⁶Matxi' chin najane' nimtoj kyxolju' xjal min kyajb'ilju' nak'b'il;⁷¡ajnyoline' ti'j nak'b'il; inche yolin ti'j q'oj! Chiju' b'itzal. A Qman Dyos klolteya¹Ajkyxi nka'yi'nju'ye' witz, inxjelu'n wib'e': ¿Jaloja ktzajela' o'nb'il weye'? nchije'.²Tk'etz Qman Dyos tzula'te' o'nb'il weye', ju' b'inchante kya'j ex tx'otx'.

³¡Layx taj tu'n tjaw jilpuja! ¡Layx tzik'wtante' xq'uqilteya!⁴Min nwtan te'; mixti' nwtanju' xq'uqil kyi'j aj Israel.⁵Ate Qman Dyos xq'uqilteya; ate nklonteya, majx ati tk'etza onilteya.⁶Lay kub' numja tu'n q'ij te q'ijtl, ex mixti' k'ik'el ti'ja tu'n xjaw te qonik'an.

⁷Xq'uqi'nta tu'n Qman Dyos te tkyaqil myab'a'n; xq'uqi'n tchwinqlala tu'n.⁸Xq'uqi'na tu'n Qman Dyos toj tkyaqilju' tb'eya, te ja'lo ex tejumajx. Chiju' b'itzal. B'itz ti'j Jerusalen¹¡inchin tzalaje' qama ttzaj q'ma'n weye': Qo'qe'ye' toj tja Qman Dyos! Qa chi.²Jerusalen, ¡matxi' qo'okxe' kyoju' tjpela!³Jun nintnamte' Jerusalen, b'incha'n tu'n kyb'u'yintekyib'ju' xjal toj.⁴Tojte nche ula' tnej kyyajajil ttanam Dyos ajwalilteju' tb'i, kse'nxju' tchaq' kye.⁵Toj ta'qe'ju' kawb'il te tnik'alilti'j, aye' kawb'il toj tja Dab'i.

⁶Kyqaninxe' te Dyos tu'n tkyaqil kyk'u'je':Tenxwit nak'b'il toj Jerusalen;che najanxwitju' nche k'u'jlanteya toj nak'b'il.

⁷Tenxwit nak'b'il toju' nimaqtapi;tenxwit q'uqb'ab'l tk'u'jlalil kyoju' ja te nimaqkawb'il. Chechiku'ye'.

⁸Atzu'n ja'lo, naq kyu'nelju' wamiwe', ntzike' ex witz'ine', knma'ye':Tenxwit nak'b'il toja.

⁹Tu'nelju' tja Qman Dyos,k'okyeltilil wu'ne' tu'n tten nak'b'il toja, chiju' b'itzal.Kub'sb'il tu'n tqe qk'u'j ti'j Dyos¹Twitza Nman Dyos nchin kub'sana'ye'; twitza aya nkawina toj kya'j.²In qokub'san te Qman Dyos, ja q'uqla' qk'u'j. inqo' ayon tu'n ttzaj q'aq'an tk'u'j qi'j, kse'n jun majin ichan mujqa qya inok qe tk'u'j ti'ju' tajaw.³Q'aq'antz tk'u'ja qi'je' Nman Dyos; q'aq'antz tk'u'ja qi'je', qu'n lay tzik'xtlju' ik'b'ilqeye' qu'ne'.⁴¡Matxi'xi'x qoyajtiye' tu'n xmayb'ilqeye' kyu'n q'inun ex tu'n ik'o'n qo'ye' kyu'nju' nkynima'n kyib'! Chiju' b'itzal. A Qman Dyos klol kye aj Israel¹Naqwit min xten Qman Dyos onil quk'i'lkyximankupe'ye' aj Israel,²naqwit min xten Qman Dyos onil quk'i'l tej xjaw kyi'nkyib'ju' xjal q'ojil qi'j,³itz'qo'xwitlo xqoku'x toj kylaq tej saj kytx'u'jil qi'j.⁴Ma'wtlo qo'x tiqa'n a'; ¡junwtlo tnimal a' sex qib'aj!⁵¡Ma'txi'wtlo qokyaj jaq'wi tjaq'ju' tipumal a'!

⁶¡Nimanjtzxwit Qman Dyos, min xtaj tu'n qb'aj tzaqun tu'n kywitzte!⁷Maqo tzaqpaj teju' xpatxab' kse'n jun pich' xtzaqpaj tu'n aj ub'al; laqju' xpatxab', qu'mtzun o' tzaqpaj.⁸Xi' saja'ju' o'nb'il qe tuk'i'l Qman Dyos, b'inchalte kya'j ex tx'otx'. Chiju' b'itzal. Nche tklo'n Qman Dyos e'te¹Min nche yukchikye' q'uqlok kyk'u'j ti'j Qman Dyos; ikyqe' kse'n witz Syon, ati tejumajx.²Ikyqe' kse'n Jerusalen txoli'nmile ti'j kyu'n witz, klo'mile kyi'ju' ttanam Qman Dyos tu'n, te ja'lo ex tejumajx.³Lay tenju' kawb'il myab'a'n kukxju' toju' tx'otx' xitq'o'n Qman Dyos kyeju' ttanam, qu'n jaku' o'kx ajtaq'wiju' ttanam b'inchal myab'a'n.

⁴Nman Dyos, b'inchama b'a'n kyeju' b'a'n xjal, kyeju' ax che yolin;⁵aye'tzu'n nche b'je'l txalpuj tz'e'ysa'nku'ya kywitz junx kyuky'i'lju' b'inchal myab'a'n ¡Tenxwit nak'b'il toj Israel! chiju' b'itzal. B'itz tu'n tanjtlkyi'ju' aj Israel toj Jerusalen¹Tej tanjtzti'n Qman Dyos ttanam toj Jerusalen, naku'j naq jun witzik' toj qwitze'.²Ojexi'x qo tzalaje' ex ob'itzane' tu'n qtzalajb'ile'; aye'tzu'n nche niman kye txqantl dyos, kyma: ¡Matxi' tb'incha Dyos nimaq ti'xti' kyeju' ttanam! Chechij.³Iku', tb'inchate Qman Dyos nimaq ti'xti' qeye', qu'mtzun inxi'xtoq qo tzalaje'.

⁴¡Nman Dyos, qo tq'ok jumajtla kse'n tnejel, kse'n chq'ajlaj nch'ixpuj tu'n jb'al!⁵Aye'kye' nche oq' aj kyawan, kjawil twitz kyawal toj tzalajb'il.⁶B'a'nqa nche oq' ajkyxi' awalteju' ij, che tzalajel ajtanjtzkyi'j iq'i'mile junjun pk'oj kytriy. Chiju' b'itzal. A Qman Dyos ntzaj q'onte tkyaqil¹Qa mya Qman Dyos njaw b'inchanteju' ja, mixti'x nche oka'ju' nche aq'unan ti'j; qa mya Qman Dyos nklonteju' nintnam, mixti'x nche oka'kye' xq'uqil.²Mixti'x nnoka'te' b'a'n prim nqo' aq'unan ex yaj nqo qen inxi'x qb'yo'nqib' tu'n tpaj qwa, aye'tzu'n k'u'jla'nqe' tu'n Qman Dyos inche ojlan ex ky'i'wla'nqe'.

³Tb'anilxi'x qekye' qk'wal nche itz'ji qu'n toyaj Dyos qe'.⁴Ikyqe'kye qk'walju' nche itz'ji toj qku'xumal kse'n smaj toj tq'ob' jun q'ojil.⁵¡Tzalajb'ilte' teju' xjal ate' txqan tk'wal kse'nqe' talsmaj! qu'n lay kub'ti'j kyu'n tajq'oj, aj tklontetib' kyekywitz ajkawil. Chiju' b'itzal. Tky'i'wb'il Qman Dyos¹Tzalajb'ilte' teya, innimana te Qman Dyos ex b'a'n b'ina te.²Kwala ti'ju' twitz taq'unb'ena, ktzalajela ex b'a'n kxe'la'ya.³K'okyelju' t-xu'jila toj tjaya, kse'n jun tqan ub'a txijli toj twitz; q'uqliqe'kju' tk'wala ti'j tmesa, ikqe' kse'n t-xul olib'o.⁴Iktzu'n kb'el tky'i'wla'n Qman Dyos xjal nniman te.

⁵¡Awt Qman Dyos ky'iwlanteya tzmax twi' witz Syon! ¡Tka'yixwita b'a'n ta' Jerusalen toj tkyaqilju' tchwinqlala!⁶¡Che' tilxwitju'ya tal tchmana!
¡Tenxwit nak'b'il toj Israel! Chiju' b'itzal. In qo ttzaqpi'n Qman Dyos¹Nim yajb'il matxi' chin nik'a'ye' atxi'x toj nku'xumale' —ma ax Israel mujqa mya—,²Nim yajb'il matxi' chin nik'a'ye' atxi'xj toj nku'xumale', ex min nkub'wi'je' kyu'n.³Matxi' b'aj kyk'ixb'sa'n tze'lwi'je' tu'n sjikyb'enweye', ex majx machin b'aj lanq'uje' kyu'n,⁴atzunte Qman Dyos tnik'alti'j, machin tkole' toj kyq'ob'ju' b'inchal myab'a'n.

⁵¡Tz'elxwit kych'ixawju' ajq'oj ti'j Syon ex che kub'xwit oq!⁶¡Che okxwit kse'n k'ul intzaj ch'iy twi' ja, na'mxtoqpe' kyjaw xb'oqi'n ajkytzqij!⁷Mixti'x tajb'enju' k'ul na'j teju' ch'umal triy;⁸exqepe' nche b'jik' kyk'etz lay kma: ¡Ky'iwla'nxi'x tu'n Qman Dyos! chechiwt.
In qqani'nqe' b'a'n kyib'aje' toj tb'i Qman Dyos, chiju' b'itzal. Ti'j Qman Dyos q'uqla' qk'u'j¹Inchin kub'sane' teya Nman Dyos kse'n inxi'x chin yajtiye':²¡chin tb'intza, Nman Dyos! ¡tzaq'wentzju'ya nkub'sb'ile'!

³Taye, Nman Dyos, noqwit min nik'tna'lju' qile' tu'na, ¿alxi'xwitlokye kb'entel tkyajwe' twitza?⁴A na'ta nkub'najsante qile', tu'ntzun qnimane' teya.

⁵Inchin ayone' te Qman Dyos tuk'i'l tkyaqil nk'u'je', q'uqliwe' nk'u'j ti'ju' tyol.⁶Inxi'x chin ayonwe' ti'j Qman Dyos kyekywitzju' xq'uqil tnam. Kse'nqe' xq'uqil nche ayon tu'n qsqix,⁷ikxtzunkyeju'ye' aj Israel, che ayone' te Qman Dyos, tuk'i'l na'te ta'ju' tk'u'jlalil ex tzaqpib'l axxi'x.⁸¡Ate tzaqpilkye aj Israel te tkyaqilju' kyb'inchb'en myab'a'n! Chiju' b'itzal. Na'j Dyos q'uqlixi'x tk'u'jlalil¹Nman Dyos, mixti' njaw nnima'nwe' wib', ex mya mixwitti' tz'oka' juntl weye', ex min nb'ajx nk'u'je' kyi'j txqan ti'xti' te lab'te'n qa mixti' tu'me'l tu'n tten weye'.²Naqpena' k'otzlqiwe', kse'n jun ne'ẍ akxtoq tb'aj ch'u'n chle'n tu'n ttxu. ¡Ikyqinju'ye' kse'n jun ne'ẍ akxtoq tb'aj ch'u'n!

³Aj Israel, che ayonqe'ye' ti'j Qman Dyos ja'lo ex tejumajx. Chiju' b'itzal. Aye' yol ttziya Qman Dyos te Dab'i¹Nman Dyos nimtipumal, ja k'uluna' Jakob', na'ntza Dab'i toj tkyaqilju' yajb'ilte; na'ntzju'ya tyol xi'ni ttziya'n teya:³Lay chin okxe' toj njaye' expe' lay chin kub' kẍeye' ojlal,⁴lay che kub' nmtz'u'n nwitze' ex lay chinwtan jun kmuje',⁵qa na'mxtoq tknet jun najb'il wu'ne' te Qman Dyos nimtipumal ja ajb'ena' Jakob', chij.

⁶Qb'iye' Eprata ntoq yolinjtz tkaxilju' tyol Dyos kyejni b'entti'j, ex knet qu'ne' toj kojb'il tij Jaar.⁷¡Qo'qe'ye' toj tja Qman Dyos xjan! ¡Qoqe' mejeku' t-xe tqan!

⁸Iq'i'nktz tib'a, Nman Dyos, tuk'i'lju' kax te ipumalj, ex kuttzaja twi' witz ja knajala'ya.⁹Che ktxet-xwitju' pale twitza tu'n tnik'alilti'j; qo ẍch'inxwite' tuk'i'l tzalajb'il ayo'ye' nqo nimane' teya.¹⁰Lalun tz'el tik'o'na nimaqkawil jawni t-sk'o'na, noqx tu'n tk'u'jlalila ti'ju' tmajena Dab'i.

¹¹Tzaj ttziya'n Qman Dyos tyol te Dab'i, ex lay tz'anjtzti'j tk'u'j:¹²K'okyex nq'o'n junju'ye' tk'wala toju' tkawb'ila qama japun nyole' kyejni b'entti'j exqe' nchaq'b'ile' che kxe'l nxnaq'tza'ne' kye, ex che kb'elqeju' kyk'wal kukxju' toju' tq'uqb'ila. Chij.

¹³¡Matxi' jaw t-sk'o'n Qman Dyos witz Syon! ¡Matxi' jaw t-sk'o'n tu'n tnajan atzu'!¹⁴A witz ja'lu ja wajb'ila'ye' tu'n ntene' kukxju'; chin najale' tib'aj qu'n a kub'ju' toj nwitze'.¹⁵Okxi'xb'el nky'i'wla'nju'ye' kywa nim kywaju' prow kxe'l nq'o'ne'.¹⁶Che okyel nktxu'ne' pale kyxol tu'nju' kolb'il ex che ẍch'ilju' nche niman kye tu'n kytzalajb'il.¹⁷Atzuntzu' k'itz'jela'tlju' kykawb'il tyajajil Dab'i wu'ne'. Matxi' kub' nb'incha'ne' jun spik'un teju' nimaqkawil oje jawnsk'o'ne'.¹⁸K'elel kych'ixawju' tajq'oj wu'ne', atzunte kqoptz'ajel tajwalil wu'ne'. Chi Dyos, chiju' b'itzal. B'itz ti'ju' mujb'ab'l toj tk'u'jlalil¹¡Kyka'yinxpe'ye', tb'anilxi'x ex tzalajb'ilju' nche anq'inju' kyitz'inkyib' toj mujb'ab'ltib'il!²Tb'anilxi'x kse'n tk'ok'jal tb'anil k'ok'sb'il njawx toj kywi' pale inkb'u'l tib'aj kyxmatzi ex nkb'u'l tib'aj tqulju' kyxb'alun.³Tb'anilxi'x kse'n ta'l muj nkub' twi' witz Ermon toj tb'a'nq'ob'kya'j ex nkb'u'l tenenen tib'aju' witz Syon toj tnayajkya'j. Aye'ju' nche anq'in ikyju', nche tzaj tky'i'wla'n Qman Dyos tu'n jun chwinqlal nimtoj, chiju' b'itzal. Awt Qman Dyos ky'i'wlanteya¹¡Qo'qe'ye' e'tmajen Qman Dyos! ¡Kyajwali'nktze' Qman Dyos kykyaqile', inche tene' toju' tja te qonik'an!²¡Kyiq'i'nktze' kyq'ob'e' tu'me'lju' ja xjan ex kyajwali'nktze' Qman Dyos!³¡Awtju' Qman Dyos b'inchante kya'j ex tx'otx', tzaj ky'iwlanteya tzmaxtzu' twi' witz Syon! Chiju' b'itzal. Tb'inchb'aj Qman Dyos nimaq kyoklen¹¡Ajwalinjtzxwit Qman Dyos!
Kyajwali'nktze' tb'i Qman Dyos; kyajwali'nktze' aye'ye' ajb'el te,²ate'qe'ye' toj tja Qman Dyos, exqe'ye' ate'ye' tpen tja Qman Dyos.³Kyajwali'nktze' Qman Dyos, qu'n tb'anilte; che b'itzan qe'ye' toj tb'i, qu'n in q'aq'an tk'u'j qi'j.⁴Qu'n jaw t-sk'o'n Jakob', aju' Israel, tu'n tok naku'j tkuwenku'xi'x.

⁵Kanlixi'x nwitze' nimxi'xte Qman Dyos toklen kyekywitz kykyaqilju' kydyos xjal.⁶Intb'incha'nte Qman Dyos tkyaqilju' b'a'n toj twitz, toj kya'j ex twitz tx'otx', toj ninnjab' ex t-xexi' ninnjab'.⁷Injaw muj tu'n tib'aj tkyaqil twitz tx'otx', intzaj tq'o'n xloq'lokya'j tu'n ttzaj jb'al, ex nche etztiq'i'n kyq'iq' ja b'uyina'kyib'.⁸A kub' b'yonkye kykyaqil tnejel kyk'wal aj Ejipt ex tnejel kyalju' kyalu'n.⁹E'tzaj tq'o'n techlal nimaq kyoklen tojku'xi'xju' tnam Ejipt tib'aj paraon ex kyib'aju' nche kawin tuk'i'l.¹⁰Eb'ajkub' tb'yo'n nimaqtnam, eltiq'i'n kychwinqlalju' nimaqkawil nim kyipumal;¹¹kub' tb'yo'n Siyon, nimaqkawil kye amorey, ex Ow, nimaqkawil te B'asan, ex kykyaqil nimaqkawil tij Kanaan e'kub'tb'yo'n;¹²atzu'n kytx'otx'ju' nimaqkawil lu tzaj tq'o'n te kyetzb'ilju' ttanam aj Israel.

¹³Tejumajxte' tb'iya, Nman Dyos; ktzajel na'na kukxju'.¹⁴Intb'incha'nte Qman Dyos tnik'alilti'j teju' ttanam; in q'aq'an tk'u'j kyi'ju' tmajin.¹⁵Q'anpwaq ex saqpwaqqe' kywitzleb' txqantl tnam, b'incha'nqe' tu'n q'ob'aj.¹⁶Ati kytzi, extzun min nb'ent kyolin; ate' kywitz, extzun min nb'ent kyka'yin;¹⁷ate' kyẍkyin, extzun min nb'ent kyb'in; ¡mixpeti'x kychwinqlal!¹⁸Ikyqe'xtzun xjalju' nche kub' b'inchankye exqe'ju' nche okslan kye.

¹⁹Kynimanktze' Qman Dyos aj Israel; exqe'ye' pale, kynimanktze' Qman Dyos;²⁰Kynimaktze' Qman Dyos aj Leb'i; kyajwali'nktze' Qman Dyos, aye'ye' nche nimane' te.²¹¡Nimanjtzxwitju' Qman Dyos toj Syon aju' najli toj Jerusalen!
¡Ajwalinjtzxwit Qman Dyos! Chiju' b'itzal. Tk'u'jlalil Qman Dyos tejumajx kyi'j aj Israel¹Kyq'onx chjonteye' te Qman Dyos, qu'n majx b'a'n te,qu'n tejumajxju' tk'u'jlalil.²Kyq'onx chjonteye' te Dyos, aju' nimxi'x toklen kyib'aj txqantl dyos,qu'n tejumajxju' tk'u'jlalil.³Kyq'onx chjonteye' teju' Qman Dyos in kawin kyib'aj xjal ati kyoklen,qu'n tejumajxju' tk'u'jlalil.⁴Qu'n o'kxte nb'inchankye nimaq ti'xti' te lab'te'n,qu'n tejumajxju' tk'u'jlalil.⁵Teju' b'inchante kya'j tuk'i'l nab'l,qu'n tejumajxju' tk'u'jlalil.⁶Teju' kub' q'onte tx'otx' tib'aj a',qu'n tejumajxju' tk'u'jlalil.⁷Teju' kub' b'inchante q'ij ex xjaw,qu'n tejumajxju' tk'u'jlalil:⁸kub' tb'incha'n q'ij tu'n tk'ent te q'ijtl,qu'n tejumajxju' tk'u'jlalil;⁹exju' xjaw kyuk'i'lju' che'w tu'n kyk'ent te qonik'an,qu'n tejumajxju' tk'u'jlalil.¹⁰Kyq'onx chjonteye' teju' kub' b'yonkye tnejel kyk'wal kykyaqilju' aj Ejipt,qu'n tejumajxju' tk'u'jlalil.¹¹Teju' etz iq'inkye aj Israel toj Ejipt,qu'n tejumajxju' tk'u'jlalil;¹²tej txi' tnuqpi'n tq'ob' tuk'i'l nim tipumal,qu'n tejumajxju' tk'u'jlalil.¹³Teju' aq'punte Kyeq Ninnjab',qu'n tejumajxju' tk'u'jlalil.¹⁴Teju' ik'xq'inkye aj Israel toj ninnjab',qu'n tejumajxju' tk'u'jlalil.¹⁵Teju' kyej mulq'inte Paraon kyuk'i'l t-xjal te q'oj toju' Kyeq Ninnjab',qu'n tejumajxju' tk'u'jlalil.¹⁶Teju' xiq'inte ttanam toj chq'ajlaj,qu'n tejumajxju' tk'u'jlalil.¹⁷Teju' kub' b'yonkye nimaqkawil,qu'n tejumajxju' tk'u'jlalil.¹⁸Teju' elq'inte kychwinqlalju' nimaqkawil nim kyipumal,qu'n tejumajxju' tk'u'jlalil:¹⁹Teju' kub' b'yonte Siyon, nimaqkawil kye amorey,qu'n tejumajxju' tk'u'jlalil;²⁰Teju' kub' b'yonte Ow, nimaqkawil te B'asan,qu'n tejumajxju' tk'u'jlalil.²¹Teju' kub'sipante kytx'otx'ju' nimaqkawil lu,qu'n tejumajxju' tk'u'jlalil,²²tzaj tq'o'ntzuntz te kyetzb'il aj Israel tmajen,qu'n tejumajxju' tk'u'jlalil.²³Teju' ntzaj na'nqe kse'n ato'qo' toj yajb'il,qu'n tejumajxju' tk'u'jlalil.²⁴Teju' nklonqe kyeju' qajq'oj,qu'n tejumajxju' tk'u'jlalil.²⁵Teju' intzaj q'onte kwa xjal ex kwa alu'mj,qu'n tejumajxju' tk'u'jlalil.²⁶¡Kyq'onx chjonteye' teju' Qman Dyos te toj kya'j,qu'n tejumajxju' tk'u'jlalil! Chiju' b'itzal.Kytzi nin a' toj B'ab'ilon¹Q'uqliqo'toqe' kytziju' nin a' B'ab'ilon, nqo oq'e' ajttzaj qna'nju'ye' tnam Syon.²Intoq che jaw qyob'a'ne' qchinab'e' arpa kyi'ju' tze chjaj ate' toju' nintnam.³Aye'tzu'n e'xiq'inqeye' tu'n qjpunjtze' atzu', aye' eb'je'l q'inkye tkyaqilju' ti'xti' qeye', intoq kyma'n tu'n qb'itzane' tuk'i'l tzalajb'il; ¡tu'n kyxi' qb'itza'nju'ye' b'itz ti'j Syon!

⁴¿Se'n taq'wi qo b'itzal b'itze' te Qman Dyos toj junxi'tl tx'otx'?⁵¡Kyajxwit tzqiju' nb'anq'ob'e', qama tzik'tna'la Jerusalen wu'ne'!⁶¡Tz'okxwit lak'e waq'e' toj nk'o'ne' qa min saj nna'na Jerusalen, qa min xjaw nnima'na nejtl twitz tkyaqil ntzalajb'ile'!

⁷Nman Dyos, na'ntza titi' kyma aj Edom, tej tkub' tz'aq Jerusalen: ¡Kyxitunku'ye', kyxitunku'ye' kyuk'i'lxi' tq'uqlil! chechij.

⁸¡Atzunta B'ab'ilon, kb'el xitu'na! ¡Tzalajb'ilte' teju' k'okyel q'onte tu'me'l t-xel teya tu'nju' xtb'inchaya qeye'!⁹¡Tzalajb'ilte' teju' kb'eltzyunkyeju' tk'wala tu'n kyok tb'uchi'n kyi'j pik! Chiju' b'itzal. Na'j Dyos aq'b'il chjonte te Qman Dyos¹Knq'a' chjonteye' teya Nman Dyos, tu'n tkyaqil nk'u'je'; kywitzku'pe' txqantl dyos chin b'itzale' teya.²Chin b'el mejeye' tu'me'lju' tjaya xjan q'ol chjonte teya tu'nju' tk'u'jlalila ex tyola njapun, qu'n majaw tq'o'nju'ya tb'iya ex tyola tib'aj tkyaqil ti'xti'.³Tej nkub'sane' teya, intzaj ttzaq'we'na, ex nim wipumale' tzaj tq'o'na.

⁴Che b'itzal kykyaqil nimaqkawil te twitz tx'otx' teya aj t-xikyb'i'nju' yol kyejni ttziya'na.⁵Kjawil ajwali'na Nman Dyos tu'n tkyaqilju' matxi' kub' t-xima'na, qu'n nim toklenju' tajwalila.⁶B'a'nqa tzmaxtzu' toj kya'j ta'ya Nman Dyos, majx ka'yi'nju' xjal me's tu'na, atzunju' ntnima'ntib' najchaq ta' ti'ja.

⁷Aya nxq'uqinte nchwinqlale', tu'n tipumala kse'n atinqine' toj xob'ajil, inchin tklo'na te kytx'u'jilju' wajq'oje.⁸¡Ktb'incha'ta tb'is tk'u'j weye' Nman Dyos! Nman Dyos, tejumajxte' tk'u'jlalila; ¡Lalun kyejteneju' taq'una oje tzyet tu'na! Chiju' b'itzal. Tkyaqil chik'li twitz Qman Dyos¹Nman Dyos, matxi' tzik'twitza wi'je' ex tojtzqi'n qina;²Tojtzqi'na tkyaqil nb'incha'ne'; b'a'nqa najchaq ta'ya, inel tnik'a ti'ju' nxima'ne'.³Tojtzqi'na tkyaqilju' nb'eye', ¡kanli twitza tkyaqilju' in nb'incha'ne'!⁴Na'mxtoqpe' tel nma'n jun nyole', kanlinajtl twitza, Nman Dyos.⁵Atiya wi'jileye'; tkub'ju' tq'ob'a wib'aje' kolb'ilweye'.⁶Lab'te'nxi'xte' ojtzqib'l lu, min nchin kanune' ti'j; ¡nimxi'xte', layx kane toj nwitze'!

⁷¿Jaloja tu'n nxa'ye' najchaq, ewal twitzju' t-xewa? ¿Jaloja tu'n nxa' oqe' twitza?⁸Qama chin jawxe' twitz kya'j, atiya atzu'; qama chin ku'xe' tjaq' tx'otx', ex atiya atzu';⁹qama chinx lipane' toj tjawetzq'ij, mujqa chinxwite' najal jlajxi' Ninnjab' tkub'exq'ij,¹⁰ex atinqine' toj tq'ob'a atzu'; ¡lay chin kyej ttzaqpi'ne' tb'a'nq'ob'a!¹¹Qama kub' nxima'ne' tu'n wewane' toj qxopin, mujqa jawwit b'entju' spik'un wi'jileye' te qonik'an,¹²laype' b'ent nkub' tewa'ne' qxopin twitza, ex spik'unte' qonik'an teya, kse'nxju' q'ijtl. ¡Junqe'xkye' qxopin tuk'i'lju' spik'un teya!¹³Aya kub' b'inchante tkyaqil nxmilale'; inkub' tb'incha'na toj t-xmilal ntxuye'.¹⁴Njaw wajwali'na qu'n nchin lab'tiye' tu'nju' ntene' ẍinkub' tb'incha'na, qu'n lab'te'nxi'xte' tb'inchb'aja. ¡Matxi' tz'el nnik'e' ti'j b'a'nxi'x!¹⁵Mya ewaj nch'iya'ye' twitza tej ẍinaq' kuwixe' toj t-xmilal ntxuye', tej nchin ch'iye' toj ewaj.¹⁶Tilya tej intoq tb'incha'ntib'ju' nxmilale' tu'n tch'iy; tkyaqil ja'lu tz'ib'a'nqe'tltoq toju' tuja. Na'mxtoqpe' witz'jiye' matxi'toq kyej techi'nju'ya tab'q'iyil nchwinqlale'.

¹⁷Nman Dyos, nimxi'x kyxilenju' t-xima weye'; ¡ex layx b'ent kyajlet!¹⁸Chin okwit tene' ajlalkye, nimxi'xlo kyajlal kyetwitz twitz tz'awun; qatzun mab'je'lpun kyajlet wu'ne', layxpe' cheb'aj kane toj nwitze'.

¹⁹Nman Dyos, q'imila kychwinqlalju' b'inchal myab'a'n ex laq'b'anqe'milju'ya b'yolxjal wi'je',²⁰aye' nche yolin taq'wix ti'ja ex naq kyak'a'n njaw kyi'nkyib' ti'ja.

²¹Nman Dyos, Ina' che elwik'o'nwe' nche el ik'unteya ex nche elnsuchu'nju'ye' nche q'ojink ti'ja.²²¡Majx nche elwik'o'ne'! ¡Qu'n ex ajq'ojqe' wi'je'!

²³Nman Dyos, tzik'x twitza wi'je', tz'elx tnik'a ti'ju' wanmiye'; chin tq'oka toj joyb'ilwi'je', tz'elx tnik'a ti'ju' nnab'le';²⁴ka'yintza qa nchin b'ete' toj tb'eyil taq'wixil, chin t-ẍaqluxa toju' b'e tejumajx, chiju' b'itzal. Na'j Dyos qanb'il kolb'il te Dyos¹Nman Dyos, chin tkloma kyeju' b'inchal myab'a'n; chin tkloma kyeju' nche q'ojin,²kyeju' o'kxtzu' toka' kywi' ti'ju' myab'a'n ex q'achq'alx nche jyon q'oj.³Majx mya'l kyaq' kse'n ttz'u'lub' kan; ikyqe' kyolju' kse'n tb'i'yb'il kan wotz.

⁴Nman Dyos, chin tkloma toj kyq'ob'ju' b'inchal myab'a'n, chin tkloma kyeju' nche q'ojin, kyeju' nche ximan tu'n nkub' tz'aqe' kyu'n.⁵Matxi' kub' kyq'o'n ma' nkynima'n kyib' xpatxab' weye'; matxi' kub' kyq'o'n pa ex aqwil toj nb'eye'.

⁶Oje txinma'ne' te Qman Dyos: Teya nchin ajb'ena'ye'; ¡b'intzju'ya tq'ojq'ojel nwi'ye' te kub'sb'il!⁷Taye, Nman Dyos, aya klol weye' nimtipumala, intklo'na nchwinqlale' toj q'oj. Nchije'.

⁸Nman Dyos, lalun taja tu'n tjapu'n kyajb'ilju' b'inchal myab'a'n, lalun taja tu'n tjapunju' kyxim. Inkynima'nkyib'ju' txoli'nmile wi'je' kyu'n; ¡kyib'ajxwit kub'a' tz'aqju' taq'wixil nkytxko'n!¹⁰Kub'xwit tz'aq ttxalq'aq' nk'ant kyib'aj; che ku'xxwit q'o'n toj jul, ja layx b'enta' kyjatz.¹¹Mixwit tz'anq'ina'ju' nyolin xlab'yol twitz tx'otx'; kub'xwit xitu'nju' nq'ojin tu'n myab'a'n.

¹²B'i'n wu'ne' ntb'incha'nte Qman Dyos tnik'alilti'j teju' prow ex nkolon ti'j toklenju' xjal prow.¹³Kjawil nima'n tb'iya kyu'n xjal tnik'alkyi'j; ¡che najalkye' xjal b'a'n kychwinqlal twitza! Chiju' b'itzal. O'kxtzu' toka' nwitze' ti'ja¹Nman Dyos, inchin kub'sane' teya: ¡lwix kuttzaja!, ¡b'intzju'ya tq'ojq'ojel nwi'ye' ajntxokone' teya!²Tz'okxwitju' nna'j Dyose' twitza kse'n sturak, exqe' nq'ob'e' ate'ktz jawl che okxwit kse'n oyaj te qale.

³Nman Dyos, q'onka jun xq'uqilteju' ntziye' lay taja naqx tu'n tel nma'n nyole'.⁴Lalun taja tu'n toknq'o'n nwi'ye' ti'ju' myab'a'n; lalun taja tu'n nb'ete' toju' taq'wixil ex tu'n lalun chin tene' kyoj ninwan kyuk'i'l b'inchal il.

⁵Jun xtalb'ilte' ktb'incha' xjal tnik'alti'j weye' qama chin ttzak'uye', k'elil weye' kse'n k'ok'sb'il qama chin ttzak'uye'. Lay tz'el wik'o'ne'; ex nchin na'we' Dyos kukxju' tu'n tkub'aju' kyb'inchb'aj b'inchal il.⁶Che elix xonju' kynejel b'inchal myab'a'n twi' xaq, kkaneb'iltzuntz toj kynab'l qa tb'anilxi'xju' nyole'.⁷Noqx che pomel xob'aj kyb'aqil toj jul, kse'n nxichitu'n tx'otx' ajtjaw kjo'n.⁸Nman Dyos, majx tokwe' nnab'l ti'ja. Ti'ja nklo'na' wib'e': lalun chin kyej tkolb'e'na.⁹Chin tkloma teju' xpatxab' xkub' qo'n weye' te xpatxab' xkub' kyq'o'n b'inchal myab'a'n toj nb'eye'.¹⁰Che kub'xwit tz'aqu' b'inchal myab'a'n tojx kyxpatxab', ayintzunwe' ljo'nwe' nb'e. Chiju' b'itzal. Aya kolb'ilweye'¹Inchin kub'sane' te Qman Dyos tuk'i'l tq'ojq'ojel nwi'ye' kuw, inxinqani'ne' kuw tu'n ttzaj q'aq'an tk'u'j wi'je'.²Inxinchik'b'a'nju'ye yajb'ilweye' twitz Qman Dyos, twitz nxa' nma'nju'ye' nb'ise'³Kse'n qa nchin b'isune' b'a'nxi'x.
Nman Dyos, tojtzqi'n teju'ya nb'eye': matxi' kub' q'o'n jun xpatxab' toj ju' nb'eye'.⁴Inchinx ka'yine' toj nb'a'nq'ob'e' mix-a'lo'x jun ntzaj klol weye'. ¡Mix-a'lo'x jun tu'n tkolon wi'je'! ¡Mix-a'lo'x jun nb'ajx tk'u'j wi'je'!

⁵Nman Dyos, twitza nchin kub'sana'ye', ex nxinma'ne' teya: Ateju'ya kolb'ilweye'; o'kxa q'uqb'al nk'u'je' toj nchwinqlale'. Nchije'.⁶B'intzju'ya nkub'sb'ile', qu'n mixti'tl wipumale'. Chin tkloma kyeju' ljo'n toj nq'ije' kyu'n, qu'n nimxi'x kyipumal nwitze'.⁷Chin tiq'imitza toju' jitz'b'il weye' tu'ntzun tjaw nnimsa'na. Tzul kychmo'n kyib'ju' tnik'alkyi'j nk'etze' aj tb'inchanteya b'a'n weye'. Chiju' b'itzal. Matxi' tz'okqe nk'u'je' ti'ja¹Nman Dyos, b'intzju'ya nna'j Dyose'; b'intzju'ya nkub'sb'ile' teya. ¡Chin ttzaq'wetza, tnik'altati'j ex njapun tyola!²Lalun ttxokju'ya tmajena tu'n tok toj xjel, qu'n mix-a'lo'te jun mixwitti' til twitza.

³Inxi'x chin joyliye' kyu'n wajq'oje matxi' chin kub'kyxone' twitz tx'otx'; nchin nexkyq'o'ne' tu'n nnajane' toj qlolj, kse'nqe' ojtxi' kykyimlen.⁴Kxi' nkub'aje' tu'n b'is inxi'x tzaj tchi wi'je'⁵Inche tzaj nna'nju'ye' tq'ijlalil ojtxi', ex nchin ximane' kyi'j kykyaqilju' tb'inchb'ena.⁶Injaw wi'ne' nq'ob'e' twitza, nchin k'wajtiye' ti'ja, kse'n tx'otx' tzqij.

⁷Nman Dyos, ¡lwiyx chin tzaj ttzaq'we'na, qu'n xi'tkub'aju' nxewe'! Chin tonima, lalun kub' t-xk'ayi'ntib'a, qu'n qatzun min, chin okyeltzuntze' kse'nqe' kyimni.⁸Yek'untza tk'u'jlalila weye' te prim, qu'n ti'ja soka' qe nk'u'je'. Q'mantza weye' kse'n tu'me'l tu'n wanq'ina'ye' twitza, qu'n teya nxa' nkub'sa'na'ju'ye' wajb'ile'.⁹Nman Dyos, chin tkloma kyeju' wajq'oje, qu'n tk'etza nnjyo'na'ye' kolb'il.¹⁰Chin t-xnaq'tzama tu'n nb'inchanteju'ye' tajb'ila, qu'n teya nchin k'uluna'ye'. ¡Awtju' t-xewa txi' iq'inweye' toju' b'e tzinun ti'j!

¹¹¡Nman Dyos, q'ontza nchwinqlale' tu'nelju' tb'iya! ¡chin tiq'imitza toju' yajb'il! qu'n tz'aqlixi'xta,¹²¡Xitunqe'ku'ya wajq'oje! qu'n in japun ta tyol, ¡b'yonqe'ku'ya kykyaqil, qu'n ayine' tmajena! Chiju' b'itzal. Aq'b'il chjonte te Dyos tu'n jun nimaqkawil¹¡Nimanjtzxwit Qman Dyos, klol weye'! Inchin t-xnaq'tza'ne' ex ntzaj tyek'u'n weye' tu'ntzun tb'ent wu'ne' toj q'oj;²ate tb'anil wamiwe', jun kolb'il wib'e', nin e'wb'il wib'e' ex tzaqpib'l weye'; ate kolb'ilweye', atzu' nnoka' nklo'nwib'e' ti'j; ate inche kub' q'onkyeju' tnam tjaq' nkawb'ile'.

³Nman Dyos, ¿titi' toklenju' xjal, tu'nju' nximana ti'j? ¿Ti'xi'xtzu'n toklenju' wnaq, tu'nju' kye tilwi tu'na?⁴Ikyte xjalju' kse'n jun jiq'chan; inik'ju' tchwinqlal kse'n jun leku'n.

⁵Nman Dyos, jqomju'ya twitz kya'j ex kutku'tza; yekunqe'xju'ya witz tu'ntzun kysb'en;⁶xonqe'xju'ya t-smaja, aye' q'ankyaq, ex b'inchama tu'n kyb'aj oqju' tajq'oja.⁷Q'ontz tq'ob'a tzmaxtzu' jawnixi', ex chin tkloma teju' ninnjab' nimxi'x; chin tkloma te kyipumalju' xjal te junxi'tl tnam,⁸kyeju' xjal nche chanyol ex njaw kyiq'i'n kyb'a'nq'ob' te tziyb'il kychajyolil.

⁹Nman Dyos, kxe'l nb'itzane' jun ak'a'j b'itz teya; che kxe'l nb'itzane' b'itz teya tuk'i'l chnab' tzintzin.¹⁰Tu'na nche kanb'ana'ju' nimaqkawil; aya klonte Dab'i ju' tmajena,
chin tkloma teju' k'uẍtx'e'nb'il te b'iyb'il; chin tkloma toj kyq'ob'ju' xjal te junxi'tl tnam, kyeju' chalyol ex njaw kyiq'i'n kyb'a'nq'ob' te tziyb'il kychajyolil.

¹²Che ch'iyxwitju' qk'wal kse'n awal toj awb'il; ikyqe'wt qmyale' kse'nqe' tqan ja tb'anil b'inchb'enkye nche ajb'en te tkuwal tja Dyos.¹³Che nojxwitju' qk'ujaye', tu'n tkyaqil twitz awal te wab'j. Che poq'onxwitju' qrite' che chmet-xwit txqan kyajlal toju' qkojb'ile'.¹⁴Kyiqaxwit kyalju' qwakyixe', ex japunxwit kyq'iju' kyal. Mixwitti' sich' te xob'ajil kyoju' qxk'ichb'eye'.¹⁵¡Tzalajb'ilte' teju' tnam ati tkyaqil ja'lu te! ¡Tzalajb'ilte' teju' tnam in ajb'en teku' Qman Dyos! chiju' b'itzal. Kykyaqil xjal tu'n kyajwalinte Qman Dyos¹Kwajwali'ye' toklena Nman Dyos nnimaqkawil; kjawil nnimsa'ne' tb'iya kukxju'.²Kjawil nnima'na atl junjun q'ij; kjawil wajwali'ne' tb'iya kukxju' ex tejumajx.³Nimta toklen Nman Dyos ex o'kxta tu'n tajwalit; layx qopon kanune' ti'ju' toklena.

⁴Kjawil kyajwali'n manb'aj ex k'wa'lb'aj tb'inchb'ena, che kxe'l pakb'a'nju' taq'unb'ena nimaq kyoklen.⁵Kxe'l kyoli'n toklena tb'anilxi'x, ex che kxe'l nma'ne' tb'inchb'ena te lab'te'n.⁶Che kxe'l kyoli'nju' tb'inchb'ena nimaq kyoklen ex xob'ajilqe'x, ayintzunwe' chin yolile' ti'ju' toklena.⁷kxe'l kyoli'nju' tk'u'jlalila nimxi'x, ex kxe'l kyb'itza'n tnik'alilti'j ntb'incha'na.

⁸Che'wte Qman Dyos tk'u'j ex nq'aq'an tk'u'j, ati tpasens ex nim tk'u'jlalil.⁹B'a'nxi'x te Qman Dyos kye kykyaqil, ex kye tilwi taq'unb'en tu'n.

¹⁰¡Jawxwit ajwali'na Nman Dyos, kyu'n kykyaqilju' tb'inchb'aja! ¡Jawxwit nima'na kyu'nju' njapun tyola kyu'n!¹¹¡Txi'wt kyoli'n t-spik'umalju' tkawb'ila! ¡Che'xwit kyoli'n tb'inchb'ena nimaq kyoklen!¹²¡Che'xwit kyma'nju' tipumala kye xjal exju' t-spik'umal tkawb'ila!¹³Tejumajxte' tkawb'ila, in kawina toj tkyaqil tab'q'iyil.

¹⁴Tzyu'n qekye' nche kub' tz'aq tu'na Nman Dyos ex nche jaw twab'a'na numjniqe'.¹⁵Kykyaqil nche ayon ti'ja tu'n txi' tq'o'na kywa tojxi'x tq'ijlalil.¹⁶Intzaj tq'o'na kywa tu'n tq'ob'a inche noj kykyaqilju' tch'isb'ena tu'na.¹⁷Tz'aqlixi'xta Nman Dyos toj tkyaqilju' ntb'incha'na, nim t-xtalb'ila kyib'aju' taq'unb'ena.¹⁸Nqaku' ta'ya Nman Dyos kyk'etzju' nche k'ulun teya, inche kub'san tu'n tkyaqil kyk'u'j.¹⁹Intzaj ttzaq'we'na nkyqani'nju' nche niman te; aj t-xikyqani'n o'nb'il teya, nche tzaj tb'i'na ex nche tklo'na.²⁰Inche t-xq'uqi'na nche k'u'jlanteya Nman Dyos, aye'tzu'n b'inchal myab'a'n nche kub' t-xitu'na.

²¹¡Kjawil wajwali'na Nman Dyos! ¡Kykyaqilxwit che niman teju' tb'iya xjan, te ja'lo ex tejumajx! Chiju' b'itzal. Ajwalb'ilte Dyos kyi'ju' tb'inchb'en¹¡Ajwalinjtzxwit Qman Dyos!
Chin b'itzale' te Qman Dyos tu'n tkyaqil nk'u'je'.²Kwajwali'ye' Qman Dyos toju' nchwinqlale' che kxe'l nb'itzane' b'itz te Qman Dyos itz'qinku'ye' twitz tx'otx'.³Lalun tz'okqe kyk'u'je' kyi'ju' xjal nimaq kyoklen, naq xjal qe'kye', lay b'ent kykolon,⁴qu'n ajkykyim in anjkyi'j toj tx'otx', axtzun q'iju' nb'aj tkyaqilju' kyxim.

⁵Tzalajb'ilte' teju' xjal oni'n tu'n Qman Dyos ja ajb'ena' Jakob', aye' q'uqlok tk'u'j ti'j Qman Dyos.⁶A kub' b'inchante kya'j, tx'otx' ex ninnjab', ex tkyaqilju' ti'xti' ati kywitz. In japunte tyol kukxju'.⁷Intb'incha'n tnik'alilti'j kyeju' nche yajlanjtz ex nxitq'o'n kywaju' nche we'yajti.
Inche ttzaqpi'n Qman Dyosu' jpu'nqe';⁸Intjqo'n Qman Dyos kywitzju' moẍ; inche jaw twab'a'n Qman Dyosu' kub'niqe' tz'aq; inche tk'u'jla'n Qman Dyos xjal tnik'alkyi'j;⁹Inche t-xq'uqi'n Qman Dyos najchaq xjal inche toni'nju' meb'a ex kyimni kychmil, ex nche kub' ttzpet-sa'nju' b'inchal myab'a'n tojxju' kyb'e.

¹⁰Syon, kkawilte Qman Dyos tejumajx; kkawilte Qman Dyos toj tkyaqil tab'q'iyil.
¡Ajwalinjtzxwit Qman Dyos! Chiju' b'itzal. B'itz te Dyos tu'n t-xtalb'il te Jerusalen¹¡Ajwalinjtzxwit Qman Dyos!
¡Tb'anilxi'x tu'n qb'itzan te Qman Dyos! ¡O'kxte b'a'n tu'n qajwalinte!²Injaw tb'incha'ntl Qman Dyos Jerusalen ex nche tzaj tb'u'yi'n aj Israel b'je'xniqe' slamj.³Intq'uqb'a'n kyk'u'ju' aj b'is, ex nb'aj tq'a'na'nju' kyk'ixb'len.⁴A kyej q'onte kyajlanju' che'w, ex oktq'o'n kyb'i teyle junjun.⁵Nimte' Qman Dyos toklen ex nimtipumal; ex mixti' b'ajsb'il teju' tnab'l.⁶Inche jawtlaq'b'a'n Qman Dyos me's, aye'tzu'n b'inchal myab'a'n nnel kych'ixaw tu'n.

⁷Che b'itzan qe'ye' te Qman Dyos te aq'b'il chjonte; kyb'itzanxe' b'itz te Qman Dyos, tuk'i'l chnab' arpa.⁸Intktxu'n twitz kya'j tu'n muj, ntzaj tq'o'n jb'al tib'aj tx'otx', in tch'isa'n k'ul kywi' witz,⁹intzaj tq'o'n kywaju' txkup ex kywaju' kyal joj aj kyaq' oq'il.¹⁰Myatzu' ntzalaja' te Qman Dyos ti'j tipumal chej ex tipumal ichan;¹¹atzu' ntzalaja' te Qman Dyos kyi'ju' nche niman te, aye' q'uqli kyk'u'j ti'ju' tk'u'jlalil.

¹²Kyajwali'nktze' Qman Dyos, aj Jerusalen; ju' najlqe'ye' Syon, kyajwali'nktze'.¹³Qu'n e'kyaj t-xtanu'n tjpel kytaname' ex e'kub' tky'i'wla'n kyk'wale' toju' nintnam.¹⁴Intzaj tq'o'n nak'b'il toju' kytx'otx'e' ex ntq'uqb'a'n kyk'u'je' tu'n tb'anil triy.¹⁵Intzaj t-sma'n tyol twitz tx'otx', ex lwiyxi'x nxipuqliju' tyol.¹⁶Intzaj tq'o'n che'w naku'j lan, ex ntzaj t-sputi'n kse'n quq.¹⁷Intzaj tq'o'n txun che'w naku'j saqb'aqun; nkub' qtx'e'jixju' a' tu'n che'w ntzaj tq'o'n.¹⁸Ajtzun ttzaj t-sma'nju' tyol, inkub' niwj tu'n; intzaj t-xupi'n kyq'iq', ex nb'etju' a'.¹⁹Tzaj tyek'u'n tyol, e'tkawb'il ex tnuk'b'il te Jakob', te Israel.²⁰Minkxa' tb'inchaju' kye txqantl nimaqtnam, ju' mixti'x kyojtzqiju' tchaq'b'il.
¡Ajwalinjtzxwit Qman Dyos! Chiju' b'itzal. In najwalinjtz Qman Dyos kyu'n tb'inchb'en¹¡Ajwalinjtzxwit Qman Dyos!
¡Kyajwali'nktze' Qman Dyos jata'qe'ye' toj kya'j! ¡Kyajwali'nktze' Qman Dyos jata'qe'ye' jawnixi'!²¡Kyajwali'nktze', kykyaqile' tanjl! ¡Kyajwali'nktze' aye'ye' nim txqan kyb'aje' toj kya'j!³¡Kyajwali'nktze' Qman Dyos, q'ij ex xjaw! ¡Kyajwali'nktze' Qman Dyos, che'w nche qoptz'aje'!⁴¡Ajwali'nktza, aya kya'j atiya jawnixi', ex aya a' atiya toj muj twitz kya'j!

⁵Kyajwali'nktze' tb'i Qman Dyos, qu'n tchaq' ex tkyaqil b'ajb'ent tu'n tyol;⁶tkyaqil e'kyaj tq'o'n tejumajx, ex tzaj tq'o'n jun kawb'il lay kub' txa'ju'n.

⁷¡Kyajwali'nktze' Qman Dyos jata'qe'ye' twitz tx'otx', e'nimaqtxkup toj ninnjab', ex ninnjab' nimtxe!⁸¡Q'ankyaq ex saqb'aqun, txun che'w ex q'eqmuj! ¡kyq'iq' nim tipumal njapun tchaq'b'il Dyos tu'na!⁹¡Nimaq witz ex k'ok'e' witz! ¡Kykyaqile' k'ute exqe' tze tqan lob'j!¹⁰¡E' alu'mj exqe' tojk'ul txkup! ¡Pich' ex e'txkup nche qititinjeye' twitz tx'otx'!¹¹¡Kykyaqilju' nimaqkawil twitz tx'otx' kyuk'i'lju' tnam! ¡Exqe'ju' nejenel ex kawil toj tkyaqil twitz tx'otx'!¹²¡E' ichan ex qya, e'ku'xun ex tijwnaq!

¹³¡Kyajwali'nktze' tb'i Qman Dyos kykyaqile'. o'kxnate nim toklenju' tb'i! ¡Nim toklen tib'aj kya'j ex tx'otx'!¹⁴¡Matxi' tzaj tq'o'n tipumalju' ttanam!
¡Kyb'itze' kykyaqile' nche nimane' te, kyb'itze' aj Israel, ju' ttanam nqaku' ta'qe'ye' tk'etz!
¡Ajwalinjtzxwit Qman Dyos! chiju' b'itzal. A Qman Dyos B'inchalte tkyaqil ex a Nimaqkawil¹¡Ajwalinjtzxwit Qman Dyos!
Kyb'itzanxe' jun ak'a'j b'itz te Qman Dyos; kyajwali'nktze' kyxolju' tnik'alkyi'j.²Che tzalajxe' aj Israel, toju' tnam Syon, qu'n a Dyos ch'isalkyeye' ex kynimaqkawile'.³Che b'ixinqe'ye' te ajwalb'ilte tb'i, che b'itzan qe'ye' te tuk'i'l chnab' arpa ex txijtxij.⁴Qu'n intzalajte Qman Dyos kyi'ju' ttanam; inxitq'o'n kyoklenju' me's tu'n kykanb'a'n.⁵Che tzalajxe' aye'ye' njapun tyol kyu'ne' tu'nju' kanb'ab'l, b'a'nqa kuẍliqe'tle', che b'itzan qe'ye' tuk'i'l tzalajb'il.⁶Che b'itzan qe'ye' te Qman Dyos, ex ktzyume' jun k'uẍtx'e'nb'il te kab'e' plaj twitzte⁷tu'ntzun toktq'o'n tu'me'l t-xel kye ma' witzleb'il, tu'n tkub' ttz'e'ysa'n kywitzju' nimaqtnam,⁸tu'n kyb'ajkub' k'letju' nimaqkawil ex xjal nim kyoklen kyu'n xpatx'k'uxb'il alqe'xi'x,⁹tu'ntzun tjapunju' tz'e'ysb'il witzb'aj tz'ib'a'ntl. ¡Jun ninb'ilte' kye kykyaqilju' tnik'alkyi'j!
¡Ajwalinjtzxwit Qman Dyos! Chiju' b'itzal. Qkyaqil tu'n qb'itzan te Qman Dyos¹¡Ajwalinjtzxwit Qman Dyos!
¡Kyajwali'nktze' Qman Dyos toju' tja xjan! ¡Kyajwali'nktze' aye'ye' ate'ye' twitzju' kya'j tb'anilxi'x!²¡Kyajwali'nktze' kyu'nju' tb'inchb'en nimaq kyoklen! ¡Kyajwali'nktze' tu'nju' nimxi'x toklen mixti' b'ajsb'il te!³¡Kyajwali'nktze' kyuk'i'l chun! ¡Kyajwali'nktze' tuk'i'l chnab' arpa ex tzintzin!⁴¡Che b'ixinqe'ye' ajwalb'ilte tuk'i'l chilchil! ¡Kyajwali'nktze' kyuk'i'l xux ex kyuk'i'l chnab' tzintzin!⁵¡Kyajwali'nktze' kyuk'i'l txijtxij k'ok'e' nche txijun! ¡Kyajwali'nktze' kyuk'i'l txijtxij nimaq nche k'onin!⁶¡Kykyaqile' ati kychwinqlale', kyajwali'nktze' Qman Dyos!
¡Ajwalinjtzxwit Qman Dyos! chiju' b'itzal.

Bible Society in Guatemala

https://app.library.bible/content/aea9d9099feb3a24