Nahúm1
Ttx'u'jil Dyos ex tu'me'l t-xel tu'n
1U'j te pakb'ab'l tk'am Nawum te Elkos toj nakuj witzik'. Ti'j Ninib'e yolina' pakb'ab'l lu.2Nxky'aqlante Qman Dyos ex nq'on tu'me'l t-xel: Ntq'o'n tz'e'ysb'il witzb'aj kyeju' min nche' b'in te, ex ntzaj ttx'u'jil kyi'ju' tajq'oj.3Atite Qman Dyos tpasensi ex nimtipumal, ex nkub' ttz'e'ysa'n twitzju' ati tpaj. Ate Qman Dyos nb'et toj q'ankyaq, ex njawju' muj nakuj quq tu'n tqan.4Ntzqiju' ninnjab', qama txi' tma'n te. Nche tzqiju' nin a' tu'n kykyaqil. Nche kub' jilju' witz te B'asan exju' witz te Karmelo tu'n, ex ikx nche' ch'uẍi'xju' b'ech toj tx'otx' te Lib'ano tu'n.5Nche lu'lunju' witz twitz; ex nche kub' niwju' k'ok'e witz twitz. Tkyaqilju' tx'otx' njaw yukchi aj tlonte tkyaqilju' twitz tx'otx' ex ikxqe' xjal najlqe' twitz.6¿Alxi'xkyeju' kweb'il twitzju' ttx'u'jil? ¿Alxi'xkye jun k'ik'exju' ttx'u'jil tu'n? In ximlenju' ttx'u'jil kse'n q'aq', ex twitzku' nche'xa' aq'puju' pik.7B'a'nxi'x te Qman Dyos; ntq'uqb'a'n qk'u'j toj k'ixk'oj: nche' tklo'nju' q'uqlok kyk'u'j ti'j.8Extzun, kse'n tnimal a' tkyaqil kb'ajel t-xitu'n, nche kub' tb'ajsa'nju' nche okmiltz'uj ti'j; kb'el kyi'ju' tajq'oj tu'nju' qlolj.9¿Titi' nkyxima'ne' ti'j Qman Dyos? ¡Che b'elxitu'n jumajx tu'n! ¡Mix-a'lo'x kb'entel tmyonte tkamaji'n!10Ikyqe' kse'n ch'i'x tzyu'nkyib', tzyu'n kywi' b'a'nxi'x tu'n q'e'n, ikyche okyela' kse'n t-xaq tze tzqij te q'aq'.11Tnam Ninib'e, toja setza'ju' xjaw ximante' taq'wixil ti'j Qman Dyos: Jun taq'wix q'ol nab'l.12Qu'mtzun ntma'n Qman Dyos teju' ttanam: B'a'nqa kuwqe'kye' aj Asirya ex nim kyb'aj, kche b'elxitit ex che najel. Matxi' yajtixi'ya wu'ne', Extzun lay yajtitla wu'ne'.13Kb'ajel nq'uchi'ne' tiqb'ila ti'j tqula ex k'elel nlaqu'ne' txpatx'k'uxb'ila.14Oje tchaq'te Qman Dyos teya, nimaqkawil toj Ninib'e kjalu: Mixti' tyajajila kjelten tu'n tkyeju' tb'iya kukxju'; toju' tja tdyosa che kb'el nxitu'ne'. witzileb' exju' tilb'ilal b'incha'n, ex atzu' kb'elexa' mqu'na qu'n mya b'a'na toj nwitze'. Tqanil tu'n tkub' tz'aqju' nintnam Ninib'e15¡Kyka'yinxe'! ¡Lu tzul kwi'ju' witz lu sanjelal tzul ti'nju' tqanil te nak'b'il! Kyik'samjuye' ninq'ij, Juda; japunx tyola oje tmaya. Lay tz'el q'i'n jumajtlju' ttx'otx'a kyu'nju' b'inchal myab'a'n; matxi' che kub' xiti'n kykyaqil.1Lu xitul tzul ti'ja Ninib'e. ¡Q'onqe'ka xq'uqil toju' ja kuwsa'n! ¡Xq'uqimju'ya b'e! ¡K'lonkjuya k'uẍtx'e'nb'il b'a'nxi'x tk'uja! ¡Kq'onk kyipumale' b'a'nxi'x!2Qu'n kjawil nimsa'n jumajltlu' Jakob' tu'n Qman Dyos, ex kjawil nimsa'nju' Israel tu'n, kse'nx tej na'mxtoq tb'aje'x iq'inju' ti'xti' toj ex na'mxtoq tkyej nakuj jun tqan ub'a mixti'tl tq'ob'.3Kyeq che ka'yin kykolb'ilju' q'ojil ex kyeq che ka'yinju' kxb'alun kxjal te q'oj. ¡Ma matxi' b'ent ktene' tu'n kq'ojine'! Nakuj q'aq'qeju' kykarwaj; exqetzunju' kychej inxi'x che ayon tu'n kq'ojin.4Inxi'x che ik' jumju' kykarwaj tu'n ktx'ujil toj xky'ichb'e, inxi'x nche jumunje tiju' plas, naku'j q'aq' che k'ant, ex nche qoptz'aj nakuj xloq'lokya'j.5Ntxokinju' nimaqkawil kyeju' nejenel, aye'tzunkye nche jaw tz'aq ajkypon ojqel twitzju' nintapi, ja taju' kolb'il kyib'.6Nche etz jaqlju' tjpel nin a', ex ntzaj niq'ju' tja kawb'il.7Nxi' iq'i'n t-xu'jil nimaqkawil toj juntl tnam; nche'x lpeju' tmajen ti'j, nche oq' kse'nqe' xu'ch ex nok kyjumi'n ttzikyk'uj kuw tu'n b'is.8Nche' b'je'x oqkye' xjal toju' tnam Ninib'e naku'j kse'n a' nex toju' tk'b'el pa'x. ¡Che we'ku'ye'! ¡Kutanjtz kyi'je'! chechij nxi'kyma'n kye, Ex mix-a'loxte anjtzti'j.9¡Kyelq'anxjiye' saqpwaq! ¡kyelq'anxjiye' q'anpwaq! ¡Qu'n layx mankunju' tq'inumal Ninib'e!10Matxi' kub' xitj, chq'ajlajtl ex mixti'tl toju' tnam Ninib'e. Inxi'x ch'onju' kyanmi tu'n xob'il, inxi'x lu'lun kyqan tu'n xob'il, kykyaqilx mixti'tl kyipumal, ex majx matxi' che kub' sq'anax.11¿Jatzun taju' kyjul b'alun ja'lo, exju' kyja tal tman b'alun? Jamitoq jun nche xob'a b'alun kyuk'i'lju' kyal; Ex mixa'lo'toq nok sak'punkye.12Intoq kub' tb'yonte b'alunju' tchi', ex nxi' t-sipa'n kxolju' ttxu b'alun exqe'ju' tal tma'n b'alun, ex nojnitoqju' tjul kyu'nju' tchi'. Kub' xiti'nju' tnam Ninib'e tkyaqil13Chi Qman Dyos nimtipumal kjalu: Luqine' nchin q'ojine' ti'ja: che kb'el ntz'e'ysa'ne tkarwaja te q'oj ex sib'tl che jela' wu'ne'; che kb'el nb'yo'ne' tal tman b'alun ateqe' toja, lay che alq'antlju' xjal najlqe' toj ttx'otx'a, ex lay txi' b'intl tq'ojq'ojel kywi'ju' t-sanjelala.1¡Qab'anx twitza, b'yolxjal nintnam, nojni toja tu'n chajyolil ex b'yojxjali'n; layx b'aj ttxa'nju' alq'an toja!2¡B'inxa tq'ojq'ojel asyal, exqe' ttulil! ¡tq'ojq'ojel kyqan chej, nche t'ikpuju' karwaj kyu'n!3¡Txqan xjal aj chejil! ¡Nche tilk'aju' k'uẍtx'e'nb'il, ex nche qoptz'aju' ch'ut! ¡Txqan k'ixjb'niqe', txqan kyimni pa'k'lqe'! ¡Layx b'ent kyajletju' kyimni! ¡Nche jaw tz'aqju' xjal kyi'j!4Naqx tu'n tpaju' ajpaji'n saja' lu tu'nju' qya ajpajil tb'anilxi'x, xnaq'tzalteju' jk'ayi'n kye xjal, naqx tu'nju' ajpaji'n ex jk'ayi'n nche kub' t-sb'u'nju' tnam exqe'ju' nimaqtnam.5Chi Qman Dyos nimtipumal kjalu: Luqine' nchin q'ojin ti'ja: k'elel wi'ne' ti'ja ex majx kb'el nẍb'iqb'a'na, tu'ntzun tel tch'ixawa kwitzju' nimaqtnam.6Kb'el nq'o'n txqan tz'ile' tib'aja; ex majx k'elel tch'ixawa wu'ne kwitz txqan xjal.7Kykyaqilju' che okyel ka'yinteya che b'el oq ex kkyma': ¡Matxi' kub' xitjte' Ninib'e! ¿Alxi'xkye jun ktzajel laqj tk'u'j ti'j? ¿Ja k'elel yala jun q'uqb'al tk'u'j?8¿B'a'nxi'xtzunta kyetwitz Teb'as, aju' nintnam ati ttzi nin a' Nilo, tok txqan a' ti'jile; tu'nju' nin a' nkleta' ex tokju' a' te jun tapi ti'j?9Atoq Etyopiy ex Ejipt kuwsalte; ex tqe'ktoq xjal te Put, exqe' aj Lib'ya tuk'i'l.10Xipe' q'inte Teb'as toj juntl tnam; eb'aj kub't'aqu'n kyk'wal twitz tx'otx' ja nkymujb'ana' kyib'ju' xkichb'e; eb'ajx pa'nju nimaq kyoklen kyeju' jatu'n kxa' q'o'na ex eb'ajk'lo'n kyq'ob'ju' kynejel toj xpatx'k'uxb'il.11Ex kxe'l q'o'n q'e'n teya tu'n tjaw tx'ujtiya; kb'el ewintzuntza twitz tajq'oja.12Tkyaqilju' ja kuwsa'n tu'na ikqeju' kse'n iw txijli toj twitz cha'x, nche kutz tz'aq qama che'x yukchet, toj ktziju' nche'x wante.13Naku'j qyaqe' t-xjala te q'oj; matxi' che okx jaqliju' tjpel tnam kyeju' ajq'oj; matxi' che b'aju' t-xq'e'l tjpel ja tu'n q'aq'.14Q'intza a' tu'ntzun twe'ya kwitzju' ajq'oj; kuwsanqema ja te kolb'ilteya, we'kuxa toju' xo'q'l, wab'enku'ya xo'q'l b'a'nxi'x, q'intza malb'ilkyeju' tladrisa.15Atzuntzu' kb'ajelaya tu'n q'aq', tu'n k'uẍtx'e'nb'il, kse'n kyu'n ẍt'ikt'u'l, majx kb'el b'ajsa'na. ¡Maskye nim txqan t-xjal ate'! ¡Maskye iky kyajlal kse'nqe' ẍt'ikt'u'l!16Mape' che chmet-xi'xju' t-ẍk'aẍlela kyewitzju' che'w twitz kya'j. (In chukjte' ẍt'ikt'u'l ti'j ex nlipan.)17Naku'j ẍt'ikt'u'l t-xq'uqila; exqetzunju' nejenel kyeju' t-xjala te q'oj naku'j txqan txkupqe' snuk'li twitz kya'j: qa ati che'w nche ok snuk'e twitz tapi; ajtzun tjawil q'ij nche'x lipan ex mix-a'loxte b'ilte ja nche'xa'.18¡Naq nche wtanju' tk'ik'lela, nimaqkawil toj Asirya! Nche wtanju' nejenel kye xjal te q'oj, matxi' che'x sputju' t-xjala te q'oj toj k'ul ex mix-a'lox jun tu'nwt tok b'uyinkye.19¡Mixti'xte q'anb'il teju' tk'ixb'ena; layx b'ent tq'anitju' tx'a'k ti'ja! Kykyaqilju' matxi' kb'i ti'ju' k'ulb'a'n saj ti'ja nche ploq'chan toj kyq'ob' tu'n tzalajb'il, qu'n, ¿alkye jun min xyajt tu'nju' tila mib'ajela'?Bible Society in Guatemala