Miqueas1
Tze'ysb'il kywitz aj Samarya tu'n Qman Dyos
1A tqanil ja'lu tzaj tq'o'n Qman Dyos te Mikey te tnam Moreset, exju' xitma'n te toj naku'j witzik' ti'ju' tnam Samarya ex Jerusalen, toju' tq'ijlalil tej intoq che kawinju' nimaqkawil Jotam, Akas ex Esekyiy toj tnam Juda.2Kyb'inku'ye' lu kykyaqile' tnam; aye'ye' najlqe'ye' toju' tx'otx' lu, kb'inku'ye' b'a'nxi'x: Aku' Qman Dyos k'okel te tziyal, tzmaxtzu' toju' tja xjan kyi'je'.3K'eletzte Qman Dyos janajla' ex kb'etel kwi'ju' witz ajtul.4Kche kb'el niwju' witz tjaq' tqan naku'j ser nkub' niwj tu'n q'aq', aye'tzu'n b'ya' kche kb'el aq'puj toj kab'e' kse'n nxi' xaqix tu'n jun tnimal a'.5Tkyaqil ja'lu naq tu'n tpi'salu' ttanam Jakob', tu'n tpaju' il toj kawb'il te Israel. ¿Jatzunta'ju' tpi'sal Jakob'? ¡Toju' tnam Samarya! ¿Ex jatzun ta'qe'ju' ja xjan kye txqantl dyos te Juda? ¡Qa myatzu' toj Jerusalen!6Qu'mtzun ntma'n Qman Dyos kjalu: Naq tik'lentlte' nintnam Samarya kjelten wu'ne', jun tnej tx'otx' tu'n tawet tqan ub'a. Che kb'je'lix nxone' tab'jelju' nintnam toj b'ya' ex che kjel q'ancha'lixju' tq'uqlil wu'ne'.7Kykyaqilju' witzleb' ate' toj majx che kjel b'uchj, ex kykyaqilju' ẍwank xjansa'nqe' kyu'n che b'ajel patj tu'n q'aq'. Qu'n ekub'incha'n tu'n kypwaq qya ajpajil, kjawil b'ent jumajtl tex kypwaq qya ajpajil wu'ne'. Exch'yon toj tk'u'j Mikey8Qu'mtzun chin oq'ile' tu'n b'is nimxi'x; qu'mtzun chin b'etele' mixti' nxajab'e' ex ẍb'iqlqine', chin xo'jile' kse'n jun xo'j ex chin ẍch'ile' kse'n jun pich' ab'estrus.9Qu'n mixti'tlte q'a'nb'il teju' tk'ixb'len Samarya: matxi' ponju' k'ixk'oj toj tnam Juda ex matxi' pon tzmaxtzu' toj Jerusalen, toju' nintnam ja najla'ju' ntaname'.10Lalun txi' kyma'ne' lu kyeju' xjal najlqe' toj tnam Kat; lalun che oq'e'. Kytolimkyib'e' tu'n taq'len k'ixk'oj toj quq te B'et-le-apra.11¡Kukxi'ye' toj juntl tnam aye'ye' najlqe'ye' toj Sapir, ẍb'iqlqe'ye' ex elni kych'ixawe'! ¡Lay che etzju' xjal najlqe' toj Sanan! ¡Ati oq'el toj B'et-esel, ex lay b'ent kyoninjtze' kyu'n!12Aye'ju' xjal najlqe' toj tnam Marot nkyxb'aq'la'nkyib' tu'n k'ixk'oj naqxi'xwit tu'n telju' k'ixk'oj kyi'j, qu'n ate Qman Dyos xb'inchante tu'n tpon kanun taq'wixil ttzi nintnam Jerusalen.13Aye'ye' najlqe'ye' toj tnam Lakis, mache okye' pi's kse'n Israel, tu'n kpaje' xb'incha'na' il Syon, che kyk'lonkye' chej kyi'j kykarwaje'.14Kypa'mil kyib'e' tejumajx ti'ju' tnam Moreset-kat. k'okyilte' nintnam Aksib' te trakpuje'n kyeju' nimaqkawil te Israel.15Chi Qman Dyos: Kyi'je' najlqe'ye' toj tnam Maresa, ktzajel nchq'o'ne' jun xjal tu'n tkub'kyi'je' tu'n, atzunju' sk'o'n b'a'nxi'x toj Israel kxe'l ewal kyoju' jul te Adulam.16Atzunta nintnam Syon, sk'o'jimilju'ya twi'ya techlalju' k'ixk'oj, tu'n kpaju' tk'wala inxi'x che tk'u'jla'na. B'ajsamilju'ya twi'ya tu'n tkyejtena sk'o'j kse'n ti'j twi' jun k'utz, qu'n che kxe'lq'i'nju' tk'wala toj juntl tx'otx'. Kyipumalju' nche' yajlan1¡Qab'anx kwitzju' xjal, naqpe' toj kwitzik' nche' ximan tu'n kb'inchante myab'a'n, ajtzun qsqix nkb'incha'n qu'n tojna' kq'ob' ta'ju' oklenj!2Inxi'x che jamjon ti'j tx'otx', ex nkub' kyetza'n; inxi'x che jamjon ti'j ja, ex nel kyelq'a'n. Nche' yaju'n kye xjal, ex kyeju' toj kyja, kyeju' tajaw exqe'ju' nche etzan.3Qu'mtzun ntma'n Qman Dyos: Ex ikxwe' atiwe' nxim kyi'je'. Ktzajel nq'o'ne' jun yajb'il kyib'aje', ja lay b'enta' kyklete', ex lalun che b'etle' tuk'i'l nimjtib'il qu'n yajb'ilte' tq'ijlalil lu.4Toju' q'ij lu che b'itzanjtzel b'itz kyeye' toj tq'ojq'ojel b'is. Chilo kq'manjtzel kyeye': Majx matxi' qo' kub' xitune'; matxi' kub' xitu'n qtaname', teku' Qman Dyos, junxi'tl tajaw ex mix-a'lo' jun xmyonte; matxi' b'ajx aq'pu'n qtx'otx'e' kxolju' ajq'oj ẍekanb'an qi'je'.5Qu'mtzun mixti' kyoklene' kxolju' ttanam Qman Dyos. Aye' myab'a'n sanjelal6¡Lalun che ule' q'mal tqanil tu'n Dyos qeye'! —chechij—. ¡Lay tzul kanunte' taq'wixil qi'j!7¿Ma atitzun qanb'en tib'aju' tnam Jakob'? ¿Matxi'tzun b'aj tpasensi Qman Dyos qi'j? ¿Ma iktzun ntb'incha'n Qman Dyosju'? ¿Ma mitzunjunti' njapunju' tyol teju' nb'et toj tnik'alilti'j?8Matxi' che okmiltz'ujkye' ti'ju' ntaname'. Inel kyelq'a'ne' kyi'ju' nanjtzkyi'j toj q'oj twi' wi'yal chechiloye' qa matxi' che klete'.9Mache ex kxla'jane' qya tojku' ktanam, atzu'n kyeju' kyal matz'elkyiq'i'nju'ye' oklenj xini nq'o'ne' kye.10Che we'ktze' ex kljom kb'eye', mya ojb'ilte najb'il lu; tu'nju' myab'a'n ati toj, kb'el xitu'n jumajx.11Qa ati jun majaw t-xima'n chajyolil, exqa matma: Kxe'l q'onte tk'wa'ya b'in ex q'e'n tu'n Qman Dyos, atzun sanjelalju' lu chq'o'n teju' tnam lu. Ttziya Qman Dyos tu'n ttzaqpet ttanam12Che ktzajel nb'u'yi'ne' ttnam Jakob'; ex che kxe'l wiq'i'ne' jte'tl aj Israel ate'x. Che okyel nb'uyi'ne' junx kse'nqe' rit toj ch'laj, kse'nqe' rit toj k'ik'leb'l, ex che kxe'l b'i'n naku'j txqan kb'aj,13Ate Qman Dyos kb'el nej yek'ulte kb'e, aye'tzunkye che okyel lpe ti'j ex atzu' che elixa' ttzi tjpel nintnam. Kb'el neju' kynimaqkawil kwitz, aju' Qman Dyos. Tqanil kyi'ju' myab'a'n kawil1Kyb'intze' ja'lo, e'kawil ex nejenel kyxol aj Israel, ¿ma mitzun jun nojqelan kyeye' tu'n telkynik'e' ti'ju' tnik'alilti'j?2Atzunkye', nelkyik'u'nju'ye' b'a'n, ex nkyk'ujla'ne' myab'a'n; nel kyi'ne' ttz'umalju' ntaname' ex majx nkyej sji'lixju' tb'aqil kyu'ne'.3Nche'x kwanju'ye' ntaname' itz'; inel ktzaqu'nju'ye' tchib'jil ex nkub' ktoqi'nju'ye' tb'aqil; iknela'ju' kyeye' kse'n chib'j nku'x toj k'wil.4Kpomil jun q'ij che txkole' ti'j Qman Dyos, ex lay che tzaj tzaq'we'ne' tu'n. Toju' tq'ijlalil lu kb'el tewa'ntib' kwitze' tu'n tpaju' il matxi' kb'inchaye'.5Myab'a'n b'e ljo'n tu'nju' ntaname' tu'n kpaju' nche sb'un sanjelal, nxi' kpakb'a'n nak'b'il kyeju' nxi' q'o'n kwa kyu'n qatzun min nxi' q'o'n kye nkma'n qa tzul q'oj. Atzunte Qman Dyos ntma'n kyeju' sanjelal kjalu:6Lay kyk'amtlkye' tqanil toj naku'j witzik' te qonik'an ex lalun kmatle' ti'ju' tzul toj qlolj. K'elexte' q'ij kyeju' sanjelal lu, ex kb'el qloljixju' q'ij kye.7K'elil kych'ixawju' sanjelal lu exqe'ju' jyolkyi'j xjal. Lay tz'eltl ktzi kykyaqil qu'n lay che tzaj tzaq'we'ntl tu'n Qman Dyos.8Ayintzunwe' nojniqine' tu'n t-xew Qman Dyos, ntzaj tq'o'n wipumale', tnik'alilti'j ex tu'n michin xob'aye', tu'n txi' npajune' kpi'sal aj Israel exju' kyil kplajku'.9Kyb'intzju'ye' lu ja'lo, aye'ye' kawil ex nejenel toj Israel, aye'ye' nelkyik'u'nju'ye' tnik'alilti'j ex inel kypa'n kyib'e' ti'ju' ttxolilti'j,10njaw kyb'incha'ne' nintnam Jerusalen, tkub' twi' witz Syon, tib'aj tq'uqlil b'yojxjali'n ex tib'aj mya tnik'alilti'j.11Nkyq'a' sb'u'kyib'ju' ajkawil toj nintnam tu'n pwaq, exqe' pale naqx tu'n pwaq nche xnaq'tzana', aye'tzuntlju' sanjelal majx chjo'nqe' ajkymante jun tqanil, extzun nkma'n qa ati Qman Dyos kyuk'i'l. Qu'mtzun nkma'n: Atite Qman quk'i'le'; mixti'te jun taq'wixil tzul qi'je'.12Qu'mtzun tu'n kpaje', kjelu' Jerusalen, nintnam twi' witz Syon naku'j q'uwaj, naqx tik'lentl kjelten, ex kb'el k'ulixu' witz jata' tja Qman Dyos. Kawb'il toj nak'b'il tu'n Qman Dyos1Kjeltenju' witz ja tkub'a' tja Qman Dyos tejumajx toju' tq'ijlalil tzul tjax chix. A witzju' niminxi'x twe' ktenb'el; niminxi'x k'okyela' kyekwitzju' txqantl witz. Kykyaqilju' nimaqtnam kche ul twitz;2tnam xjal kche pomel ex kma': Kuktzaje' qo'qe' jax twi' witz te Qman Dyos, toju' tja Dyos janajb'ena' Jakob', tu'n ttzaj tyek'u'nju' tb'eyil qe, tu'ntzun qb'et tojku'xi'xju' tb'e. Qu'n toju' tnam Syon k'eletza'ju' xnaq'tzb'il tu'n Qman Dyos, toj Jerusalen tzula'ju' tyol.3Kkawilte' Qman Dyos kyib'aju' nimaqtnam, ex kb'el tnk'u'nju' q'oj kxolju' tnam nim txqan kb'aj, expe' kyeju' najchaq ta'qe'. Che okyelju' kyk'uẍtx'e'nb'il te ktz'utz' kyu'n, aye'tzunju' kych'ut te semu'l. Mix-a'lo' jun tnam okwit kjawil tiq'i'ntl tq'aq' ti'j juntl tnam, mujqa okwit tk'ma' xnaq'tzb'il tu'n tq'ojin.4Che anq'iltzuntz kykyaqil mixti'tlte' xob'il kyi'j, ex b'a'n tu'n tojlan junjun tjaq' t-xlekumalju' tqan tlob'aj ub'a ex iw. ¡Tyolku' Qman Dyos nimtipumal!5Nche nimankye' txqantl tnam kyexju' kydyos, ayo'tzunqe qo' nimal te Qman Dyos Qdyos kukxju'. Ok tkla' Qman Dyos ttanam6Chi Qman kjalu: Che kb'ajel nb'u'yi'nju'ye' nrite' toju' tq'ijlalil lu, aye'ju' ojetoq kub' ntz'e'ysa'ne' kwitz; aye'ju' kox, siktniqe' exqe'ju' b'ajxni slamj. Kyuk'i'lkye, aye' ẍeb'aj kyejten, kche okyel wu'ne' te jun nintnam ex kuw b'a'nxi'x. Ayintzune' Dyos Manb'aj chin kawile' tib'aju' ntaname' tzmaxtzu' twi' witz Syon, ja'lo ex tejumajx.8Atzunta Jerusalen, tka'yb'il ex tkuwal Syon, toja kb'ela' jumajtlju' kawb'il, kse'nxju' toklena nejtl tib'aj tkyaqil Israel.9Atzu'n ja'lo, ¿tiqu'n inxi'x ẍch'ina kse'n jun qya ati tch'on wnaq ti'j? ¿Ma tu'n tpaju' mixti' nimaqkawil kxole'? ¿Mujqa tu'n tpaju' matxi' che kyimju' q'ol knab'le'?10K'oyimtib'a ex ẍch'ina, nintnam twi' Syon, kse'n jun qya ati tch'on wnaq ti'j, qu'n kche elixju' xjal najlqe' toja tu'n knajan toj kojb'il, expe' kche pomel tzmaxtzu' B'ab'ilon. Atzuntzu' ktkla'ya' Qman Dyos ttanam; oktkla' kyeju' tajq'oj.11Ja'lo matxi' jaw kb'u'yi'nkyib' txqan nimaqtnam ti'ja, ex nkma'n: ¡Okxi'xpe'tzun qo' tzalajel aj qka'yinte Jerusalen mixti'tl toklen!12Aye'kye' tnam lu mixti' b'i'n kyu'n titi' t-xim Qman Dyos exju' nk'u'ntl tu'n; min b'i'n kyu'n qa che kb'ajel tb'u'yi'n Qman Dyos kse'n triy manoji'n toj er.13¡We'ktza ex triyina, nintnam twi' Syon! Qu'n chi Qman kjalu: Kxe'l nq'o'ne' tipumala kse'n tipumal jun tman wakx k'uxb'ilqe' tuk'a, atzun q'ank'uxb'ilqe' t-xky'aq, tu'ntzun kykub' t-xitu'n txqan tnama. K'elel tiq'i'nju'ya kq'inumal myab'a'n kanb'ante ex che ktzajel tiq'i'na weye', weye', tajaw tkyaqil twitz tx'otx'. Tzul q'onte' kawil Israel tu'n Qman Dyos1Atzu'n ja'lo, b'incham ttenju'ya kolb'ilteya, Jerusalen, qu'n matxi' b'aj ktxoli'n kyib'ju' ajq'oj ti'ja, ex kb'el ktz'e'ysa'n twitzju' nejenel te Israel kuwxi'x.2Atzunta B'elen Eprata, tal b'o'sa kyxolju' txqantl tnam toj Juda, xi'k'elitza' jun kawil te Israel toja, k'itz'jel ti'j jun tyajajil ojtxi' xjal.3Che kjel ttzaqpi'nte Qman Dyos ttanam ja'lo, naq o'kx aj tb'anixju' qya nayon tu'n titz'jiju' tal. Oktzun kb'ajel kmujb'a'n kyib'tz kyuk'i'lju' kwnaqil aye' aj Israel exi'ni iq'i'n toj junxi'tl tx'otx'.4Kjawilwe'tzun nimaqkawiltz k'ik'lelkyeju' ttanam tuk'i'l tipumal ex toklenju' Dyos Manb'aj, aye'tzunkye kche anq'il toj nak'b'il, qu'n knimanjtzel Qman Dyos toj tkyaqil mankb'il twitz tx'otx'.5Ktenb'el nak'b'il tu'n. Ajtkub' ktzyu'n aj Asirya qtanam ex aj kyokx kyoju' tja kawb'il, che kxe'l qchq'o'n wuq nejenel ex wajxaq xjal nimaq kyoklen kyi'j.6Aye'kye che kawilju' toj Asirya, aju' ttanam Nimrod, tu'n k'uẍtx'e'nb'il, kb'ela kyi'ju' aj Asirya, ex qo' kletel kyu'n kye aj Asirya ju' matxi'toq che b'jo'ktz toju' qtanam ex matxi'toq kub' ktzyu'nju' qtx'otx'.7Aye'tzu'n che kjelten toju' ttanam Jakob' kxol txqan tnam ikyche okyela' kse'n ta'l muj ntzaj tq'o'n Qman Dyos, ex kse'n jb'al ntzaj tib'aj k'ul, ntzaj mya tu'n jun xjal.8Ex kxolju' txqan tnam ja che kjela' jte'tl te ttanam Jakob' che okyel kse'n jun b'alun kxol tojk'ul txkup, kse'n jun b'alun kxol jun tnej rit, nche b'aj ttzaqu'n ex majx nche kyajtb'yo'n, ex mixti'te jun nb'ent toq twitz.9Iktzu'n k'okyela' tzaqpaja Qman Dyos kyi'ju' tajq'oja, ex majx che kb'ajel tu'na.10Chi Qman Dyos kjalu: Toju' q'ij lu che kb'el nb'yo'nju'ye' tcheja ex che kb'el nxitunju'ye' tkarwaja te q'oj;11naq tik'lenxtlju' ninttanama kjelten wu'ne' ex majx che kb'el nxitune' ja kuwsa'nqe' tu'na;12Che najelju' ajk'a wu'ne' ex che mankulju' jyolkyi'j xjal wu'ne';13che kb'el nxitunju'ye' twitzileb'a exqe'ju' ab'j xjansa'nqe' tu'na, tu'ntzun lalun k'uluntla kwitzju' dyos ẍe kub' tb'incha'na.14Che jawitz nb'ultx'i'ne' tze xjansa'n tu'na ex majx che kb'el nxitu'ne' nimaqttanama.15K'okyel tu'me'l t-xel wu'ne' toju' ntx'u'jile' kye'ju' nimaqtnam min kyaj tu'n kniman weye'. Tq'oj Qman Dyos kyi'j aj Israel1Kyb'intzpe'ye' ja'lo ti' ntma'n Qman Dyos: ¡We'ktza ex chik'b'anxa tila kwitzju' witz, ex tzajxwit b'i'n tq'ojq'ojel twi'ya kyu'nju' witz!2Kyb'intzpe'ye' aye'ye' witz, exqe'ye' tq'uqlil tx'otx': k'okyel tq'o'n Qman Dyos ttanam toj xjel, ktzyetel jun q'oj tu'n ti'j Israel.3Lu ntma'n Qman Dyos kjalu: Ktzaq'wentze' ntanam, ¿titi' oje nb'inchaye' kyeye' mujqa titi' myab'a'n xnb'inchaye' kyeye'?4Ayine' netz iq'inteya toj Ejipt, wu'ne' kletiya toj yajb'il; e'tzaj nchq'o'ne' Moyses, Aaron ex Mariy, tu'n kykub'nej kwitze'.5Ntanam, na'ntzpe'ju'ya t-xim B'alak, nimaqkawil toj Moab', exju' tzaq'web'l xitq'o'n B'alaam te, tk'wal B'eor. Na'ntza tej kyik'e' Sitim tu'n kpone' Kilkal, ex tz'elx tnik'a ti'ju' tkanb'ab'l Qman Dyos. Aju' tajb'il Qman Dyos tu'n tb'ent kyu'n xjal6¿Titi' kxe'l wiq'i'ne' ajnxi'ye' k'ulul twitz Qman Dyos te toj kya'j? ¿Ma kchin pomile' twitz kyuk'i'l tal tman wakx te jun ab'q'iqe', tu'n kykub' q'et te chojb'il k'ok'sb'il?7¿Ma ktzalajel Qman Dyos qama kub' nq'o'ne' kab'k'al lajnaq (1,000) rit twitz mujqa junmutx' jo'k'al (10,000) t-xiklil aseyt? ¿Mujqa tu'n txi' nq'o'ne' tnejel nk'wale' tu'n tchjetju' nb'inchb'ene' myab'a'n exju' wile'?8Matxi'na' tzaj tma'nte' Qman Dyos teya, xjal, titi'ju' b'a'n ex titi'ju' tajb'il Qman Dyos teya: tu'n tb'inchanteya tnik'alilti'j, tu'n toka tnik'alti'j ex b'a'n ex tu'n tnimana te Qman Dyos tu'n tkyaqil tanmiya.9Ntxokonte Qman Dyos teju' nintnam, ex ati qnab'l tuk'i'l qama txi' qb'i'n; Kyb'intzpe'ye' tnam ex q'ol nab'l toju' nintnam:10Nim q'inumal myab'a'n kanb'ab'ente ati tjaju' xjal b'inchal myab'a'n, exqe'ju' malb'il mya tz'aqlqe' nche elwik'o'ne'.11¿Se'n taq'wi kb'el nnajsa'ne' tilju' najb'en malb'il txalchi ex mya tz'aqlqe' tu'n?12Kykyaqilju' q'inun toju' nintnam lu yajulqe'; kykyaqilju' xjal najlqe' toj chalyolqe' ex sb'ulqe'.13Qu'mtzun kb'el ntz'e'ysa'ne' twitza; kb'el yajtiya wu'ne' tu'n tpaju' tila.14Layx qe tk'u'ja maskye mawana, kukx kwe'yajtelju'ya; qama txi' tk'u'n twaya, kb'el b'o'lj, maskyepe' mak'u'yit ch'i'n tu'na, kb'ajelte' tu'n q'oj.15K'awala, ex lay jaw twitz tawala; kb'el tchena aseytun, ex lay tnik'b'eya aseyt; k'elil tyitz'o'na ta'l ub'a, ex lay txi' tk'wa'na ta'l.16Qu'n matxi' lpeya ti'ju' tchaq'b'il Omri exju' toj tja Akab' ex matxi' tb'incha'na nkb'incha'n, matz'ela junx kyuk'i'l kse'nxju' nkb'incha'n. Qu'mtzun k'okyela wu'ne' exqe'ju' najlqe' toja majx taq'wixi'x ex ch'ixb'ajilx, extzunju' tch'ixawju' ntaname' kb'eltz'aq tib'aja. Myab'a'n kb'incha aj Israel1¡Qab'anxwe' nwitz! Ikyqinju'ye' kse'n jun xjal nex sakwil tjawlenxi' awal, ex mixti'te ub'a nknet ex iw tu'n, aye'ju' lob'j tajb'il tu'n txi' tlo'n.2Mixti'qe'tl xjal twitz tx'otx' tnik'alkyi'j ex tz'aqlqe'wt twitz Qman Dyos; kykyaqilx naq nche ayon tu'n kb'inchante myab'a'n; kyib'xkyib' nkub' kq'o'n xpatxab' toj kb'e.3Majxpe'tzun kanli kywitz tu'n kyb'inchante myab'a'n; ilxi'xti'j nelkyqani'n nejenel tu'me'l t-xel exqetzunju' ajkawil nkub'kyi'j tu'n pwaq, aye'tzunju' nimaq kyoklen nkyb'incha'n aju' b'a'n toj kywitz ex nche okten chuksalkye xjal toj nintnam.4Nakuj jun ch'i'xju' xjal atixi'x b'a'n tu'n kxol; atzu'nju' tnik'alxi'xti'j, kse'n ch'i'x sarsa. Tzultzun tq'ijlalil tu'n kyok toj xjel, aju' q'ij tmaju' xq'uqil te qonik'an. Tzultzun xitb'iltzu' kxol.5Lalun txi' toksla'na tyolju' twnaqila ex lalun tz'okqe tk'u'ja ti'j jun tamiwa; expe' ka'yinxa tyola nxi' tma'na teju' t-xu'jila.6Nche b'jelkyik'o'ne' k'wal kyman, njaw kyi'nkyib'ju' txin kyi'j ktxu, njaw ti'ntib' lib'j ti'ju' lib'alte, ex kywitze'lx nche ok ajq'oj.7Ayintzunwe' chin ayole' ti'j Qman Dyos; k'okyel qe nk'u'je' ti'j Qman Dyos klol weye', qu'n chin ktzajel b'i'nwe' tu'n. Kanb'ab'l tejumajx kyu'n aj Israel8Lan jaw tzalaja nintnamju' ajq'oja wi'je', tu'n ẍin k'ulb'ane', b'a'nqa machin kub' tz'aqe', chin jawilwe'tlwe'; b'a'nqa matz'ok qloljix wi'je', ate Qman Dyos kq'olte spik'un weye'.9Matxi' chin b'inchan ile' twitz Qman Dyos, qu'mtzun k'ik'exju' ttx'u'jil wu'ne'; b'ankxpun b'aja' lu, a kq'malte se'nju' wile' ex ktb'incha' tnik'alilti'j weye'. Chin kxe'l tiq'i'ne' Qman Dyos toj spik'un, ex ktzajel tyek'u'n aj tkanb'ab'l weye'.10Ex k'okyel ka'yin tu'n wajq'oje, ex majx kb'el ch'ixwi tu'n tpaj. Intoq tzaj tma'n weye': ¿Jatzunta' Dyos Manb'aj tdyosa? chij, atzu'n ja'lo tzalajb'il weye' ajtok nka'yine' wab'la'n b'a'nxi'x kse'n xoq'l toj b'e.11Luju' q'ij tzul, Jerusalen tu'n kyjaw b'incha'n jumajtlju' ninttapiya ex che kxe'l lq'ech'i'ntlju' tnqacha.12Luju' q'ij tzul tu'n kyul xjal toja jaxjaku' che tzajela': tzajx Asirya ponx Ejipt, tzajx ttziju' nin a' Nilo ponx Euprates, tzajx ttzi jun ninnjab' pomnix ttzi juntl, ex tzaj tk'etz jun witz pomnix twi' juntl witz.13Kjeltenju' tx'otx' naq chq'ajlajtl tu'n kypaju' xjal najlqe' twitz, tu'n tpaju' kyil.14¡Xq'uqima ttanama, Nman Dyos, exqe'ju' trita etza'nqe' tu'na, ayeju' teqe' toj k'ul o'qekxkye, kyoju' tb'anil tx'otx'! Iq'inqexa kse'nxju' ojtxi', kyoju' k'ul te B'asan ex Kalaad.15Yek'unxa b'a'nq'ob'aj kye, kse'n toju' tq'ijlalil tej kyetztiq'i'na Ejipt.16¡Tu'n kyka'yinte junjuntl nimaqtnam, ex tz'elxwit kych'ixaw tu'npetzunj nim kyipumal toj kwitz! ¡Che kyajxwit meyix ex t-ẍkyinix!17¡Che wanxwit quq kse'nqe' kan ex kse'nqe' txqantl txkup nche qititinje twitz tx'otx'! ¡Che lu'lunxwit ajkyetz toj kyjul, ex tu'nwt kxob'il che pon tk'etza, Nman Dyos! Kub' tnajsa'n Qman Dyos kyilju' ttanam18Mixti' juntl Dyos kse'n aya Nman Dyos, qu'n nkub' tnajsa'nta il ex nche' ik'tna'lju' myab'a'n nkb'incha'nju' ch'i'ntl ttanama xkyejten. Intzaj tyek'u'na tk'u'jlalila qeye' ex minti' ntenju' ttx'u'jila tejumajx.19Q'aq'antz jumajtl tk'u'ja qi'je' ex tzik'x tna'lju' qb'inchb'ene' myab'a'n tu'na. ex xonku'xa qile' tzmax t-xe ninnjab'.20¡Nman Dyos, japunxju' tyola exju' tk'u'jlalila tmaya ojtxi' kyeju' ojtxi' qyajilb'ene' Ab'raam ex Jakob'!Bible Society in Guatemala