Habacuc1
Minti' elb'a'n b'yojxjali'n ex mya tnik'alti'j toj twitz Ab'akuk
1A pakb'ab'l ja'lu tzaj tyek'u'n Qman Dyos te Ab'akuk ju' t-sanjelal.2Qman Dyos, ¿Jtojtzun chin q'jene' tu'n nqanin o'nb'ile' twitza ex min nchin tzaj tb'i'na? ¿Jtojlo tu'n nq'jene' tu'n tpaju' b'yojxjali'n ex na'mxtula tzaqpilqeye'?3¿Tiqu'n ntjo'naya tu'n nka'yinteye' txqan mya tnik'alilti'j ex txqan il? Txqan myab'a'n txoli'nk wi'je' ex xitb'il; naqx q'oj nok toj tkyaqil najb'il.4Min nb'inchetju' ntma'n kawb'il, nb'aj wab'la'nju' toklen xjal, ljo'n toj tq'iju' b'a'n tu'nju' myab'a'n ex matxi' txalpuju' tnik'alilti'j. Tzaq'web'l tu'n Qman Dyos5Kyka'yinxpe'ye' nb'aj kyxolju' txqantl tnam najlqe' kyi'jileye'; kyka'yinxpe'ye' ex che xob'xe'. Naqxi'x tu'n nb'inchantetle ti'xti' expe' jaku' layx txi' kyoksla'ne', qa ati jun matxi' q'mante kyeye'.6Che tzajel wi'ne' kaldey q'ojil kyi'je', aye'ju' txkup xjalqe', ex axi'x tb'is kyk'u'ju' tu'n kyxi' toj tkyaqil twitz tx'otx' toj jun plaj ex tojun plajtel tu'n tkub' ktzyu'nju' tx'otx' mya kye.7Xob'ajilqe'x, mixti' nxi' knima'n juntl kawb'il aye'ku' nche kub' q'onte kykawb'il.8Kuwxi'x che ojqelanju' kychej kyekywitz Leopa'rt, myalqexi'x kyekywitzju' xo'j toj chq'ajlaj. Txqanju' kyxjal aj chejil najchaq nche'x q'ojina' kyi'ju' kyajq'oj, kse'n t'iw najchaq ntzaj t-xona' tib' ti'j tchi'.9Nkyaj xitj tkyaqil kyu'n ja nche' ik'a'; nkyaj kyawanxi'ju' xob'ajil nche b'etxi', nimxi'x txqan xjal nche'x kyk'lo'n kyetwitzju' tz'awun toj ninnjab'.10Nche' jaw xmayin kyi'ju' nimaqkawil ex kyi'ju' xjal nim kyoklen. Nche jaw tze'n kyi'ju' ja kuwsa'nqe', qu'n njaw kych'uqi'nju' tx'otx' twitzju' ja ex nche b'jo'kx lipan toj.11Nche' ik' kse'n jun kyq'iq' jb'al; axju' kyipumal nok kyq'o'n te kydyos. Jaw yolin jumajtl Ab'akuk ti'j Qman Dyos12Qman Dyos, atina'ta tejumajx, Nman Dyos milo b'ajela'ta ex xjana. A na'ta klol weye' Qman Dyos, matxi' txitq'o'na kyipumal kaldey tu'n kyb'inchanteju' tnik'alilti'j ntma'na.13Majx b'a'nxi'xta, min ntk'mo'nju'ya taq'wixil, tu'nju' ntka'yi'nju'ya taq'wixxi'x naku'j b'a'n toj twitza; ¿Se'n taq'witzun naq nka'yina ex mixti' ntma'na kyeju' nimaq aj il, ex mixti'te' ntma'na kyeju' b'inchal myab'a'n nche kub' kb'yo'nju' b'a'nqe'xi'x kyetwitz?14¿Titiqu'n ntb'incha'na' lu kyeju' xjal naku'xwitloj kyiẍqe' toj ninnjab', kse'nkye txkup mixti' jun kawb'il kyxol?15Nkub' kyi'ju' junjuntl tnam kyu'nju' kaldey kse'n tzyul kyiẍ nkub'ti'ju' kyiẍ tu'n: ntzyet tu'n tuk'i'l jun k'uxb'il ẍok twi' ex tuk'i'l pa te tzuyb'il kyiẍ, ajtzun tka'yinte, matxi'toq che chmet tu'n junx, ntzalajxi'x kyi'j.16Qu'mtzun aju' tzyul kyiẍ inxi'x tzalaj kyi'ju' pa exju' k'uxb'il ẍok ti'j, inkub'tq'o'n chojb'il kye ex sturak te ninb'il kye, chjontexi'x kye qu'n ati twa nim ex tb'anilxi'x kyu'n.17¡Lalun taja tu'n kyoktenju' kaldey tzyulqeye' tu'n pa tzuyb'il kyiẍ! ¡Lalun taja tu'n kyb'iyonju' xjal mixti'x tch'yon juntl kye! Aju' tzaj tyek'u'n Qman Dyos te Ab'akuk1Naqx chin ayole' ex chin xq'uqile', kse'n xq'uqil toju' taq'un, tu'n wlonteye' titi' ktzajel tma'n Qman Dyos ex titi' tzaq'web'l tzultq'o'n kyeju' nxjele'.2Tzaj ttzaq'we'nte Qman Dyos kjalu: Tz'ib'anku'ya kywitz loq' naku'j tz'lanqe' aju' kxe'l nyek'u'ne' teya, tu'n tb'ent t-ẍch'et b'a'n ex ojqel.3Na'mx tpon kmuj tu'n tjapun ntma'nju' witzik' lu; extzun ilti'j tu'n tjapun. Naq tz'ayona, nakuj nimtoj, kpomel jun tq'ijlalil tu'n tjapun.4Tz'ib'a'nku'ya qa njaw kynima'nkyib'ju' b'inchal myab'a'n, aye'tzu'n tnik'alkyi'j kche anq'il tu'nju' nkyb'incha'n wajb'ile' ayine' Dyos, chij. Tz'e'ysb'il kywitzju' nche kub' kyjtz'o'n xjal5Kyajb'ilu' ichan nknima'n kyib' tu'n kpon toj oklenj, inxi'x kyjyo'n ex min nche qen ex kyajb'il txqantl, b'a'nqa myab'a'nju' oklenj. Inxi' kyjqo'n toj kytzi kse'n kyjulil kyimni; mixjun nche noj, kse'n kamik, qu'mtzun nche b'etenje jyolte txqantl tnam tu'n tkub'ti'j kyu'n.6Ex kykyaqilxju' tnam b'aj kub'ni kyi'j kyu'n kche xmayil kyi'ju' oje kub'kyi'j kyu'n, tuk'i'l b'itz kjalu: ¡Layxwita, matxi' jaw q'inumaxa tu'nju' mya teya! ¿Jtojtzun tu'n tq'jena tu'n tb'uyinteya tq'inumala, noq tzaj tmajena'na?7Mixti' tnab'ena ti'j, che pomelju' ati tk'asa kye, ktzajel kna'n kyib'ju' che okyelten yajulteya ex majx kjel ẍb'iqb'ana kyu'n.8Kb'ajel kb'uyi'n kyib'ju' nimaqtnam ti'ja ex k'elex kyelq'a'n ti'xti' teya kse'nxju' tb'inchaya kye. Kb'el tchjo'na tkyaqilju' xb'aj tb'incha'na, jni'xju' myab'a'n xb'aj tb'inchana toj tnam kyi'ju' nintnam exqe' xjal najlqe' kyoj.9¡Layxwita, tu'nju matxi' noj toj tjaya naqx tu'n teleq'a, tu'n tb'ant tklonte tib'a teju' xob'ajil tzul!10Iktzun sela' kych'ixawju' toj tjaya tu'na, ex matxi' tzaj tiq'inju'ya xitb'il tib'aja tu'n tpaju' nim txqan tnam matxi' kub' xitj tu'na.11Che ẍch'ilju' ab'j teju' tapi exqe'ju' ptzo'n te ja, ti'ja tu'nju' ẍe kub' t-xituna.12¡Layxwita, njaw tb'incha'na ninttanama naqx tu'n b'yojxjali'n ex mya tnik'alilti'j ntb'incha'na!13Ate Qman Dyos nimtipumal lay kub' tk'iwlanju' taq'unb'ena ex t-sikte'na, qu'n tkyaqilju' taq'unb'ena kb'ajel wan tu'n q'aq'.14Knojelju' tkyaqil twitz tx'otx' tu'nju' tojtzqib'l ex ninb'ilte Qman Dyos kse'nqe' a' nnoju' ninnjab' kyu'n.15¡Layxwita, toka tx'ujt-salkyeju' tqe' nqayin tk'etza nxi' tq'o'nju'ya q'e'n kye smo'n twitz tuk'i'l k'ul chuksal nab'l, tu'n tkub' xnakyix tu'ntzun tok tka'yi'n ẍb'iqli!16K'elel tch'ixawa, mya tu'nwit tjaw nimana, qu'n ate Qman Dyos kxe'l q'onte jun k'wab'l teya tu'n txi' tk'wana ex kb'el tyek'u'n qa mixti' techila ti'j tchib'jila ex kjawil miltz'uju' tninb'ila te tch'ixawa.17Tu'nju' taq'wixil xb'aj tb'incha'na ti'j witz Lib'ano axtzun che okyel miltz'uju' ti'ja, ex kjawil xob'a tu'nju' ẍe kub' tb'yo'na talu'n. Atzun tzulju' ti'ja tu'n tpaju' nimaq il xkub' tb'incha'na exju' txqan il xb'aj tb'incha'na toj tnam kyi'ju' nimaqtnam exqe' xjal najlqe' kyoj.18¿Titi' k'ajb'ela' jun tilb'ilal xb'aj b'incha'n? ¿Titi' k'ajb'ela' jun tilb'ilal noq nqo'x tiq'in toj chajyolil? Min b'ent kyolinju' witzileb'; ¿se'ntzun taq'wi tu'n tokqe tk'u'j kyi'j aju' xjal nb'inchankye?19¡Layxwita, nxi' tma'na te jun witzileb' tze tu'n ttzaj tna'ntib', ex te jun ab'j min yolin tu'n tkub' we'! ¿Ma atitzun tu'me'l tu'n ttzaj kma'n jun pakb'ab'l? ¡Lay, qu'n mixti' kychwinqlal, b'a'nqa ktxu'nqe' tu'n q'anpwaq ex saqpwaq!20Atzunte Qman Dyos ati toj tja: ¡che numeku' xjal twitz te tkyaqil twitz tx'otx'! Tna'j Dyos Ab'akuk1Aja'lu jun tna'j Dyos t-sanjelal Dyos Ab'akuk.2Aju' nb'i'ne' ti'ja, Qman Dyos, ex ti'ju' matxi' tb'inchaya, nqe nk'u'je' ex nchin nimane' tu'n. B'inchama ja'lo, toj qchwinqlale', axju' oje tb'inchaya ojtxi', tu'ntzun telqnik'e' ti'j. Yek'untzju'ya tk'ujlalila qeye' b'a'nqa toj ttx'u'jila.3Ate Qman Dyos atzu' tzula' toju' tnej tx'otx' te Teman; twi'ju' witz te Paran tzulaju' Dyos xjan. Matxi' kub' noju' twitz kya'j tu'nju' tajwalil, ex matxi' noju' tkyaqil twitz tx'otx' tu'n ajwalb'ilte.4Inxi'x qoptza'j ti'j ajtul, ex nche etz qoptz'aj spik'un toj tq'ob' atzuntzu' ntyek'u'na' tipumal e'wa'n tu'n.5Twitz nche' etza'ju' yajb'il taq'wixqe'xi'x, ex ti'jxi' netza'ju' kyeq inxi'x k'ant kse'n q'aq'.6Inlu'lunju' tx'otx' kse'n ajtkub' we'; nche b'aj yukchiju' nimaqtnam qama txi' ka'yi'n kyi'j; nche tzaj niq'ju' ojtxi' witz ex nche kub' niwju' ojtxi' k'ul; ayetzunkye' tb'eyil Qman Dyos tejumajxqe'.7Oje che wile' xjal te Kusan matxi' che kub' yajt, exqe'ju' najlqe' Madyan matxi' che b'ajxob' b'a'nxi'x.8¿Matxi' tzaj ttx'ujila, Qman Dyos kyi'ju' nin a'? ¿Matxi' tzaj ttx'ujila kyi'ju' ninnjab'? ¿In chejina kyi'ju' ttcheja ex njaxa toju' tkarwaja te kanb'ab'l?9B'incha'nqe'tlju' t-smaja ex ikqe'x tal t-smaja kykyaqil. Matxi' jqetju' tb'e a' toj tx'otx' kyu'nju' nin a'.10Nche lu'lunju' witz ajtka'yinjtza kyu'n; ntzaj txqan jb'al twitz kya'j, ex ntinunju' ninnjab' nimin t-xe kse'n nche' jaw lipanju' ttolob' nimaqxi'x.11Minti' nche etzju' q'ij exju' xjaw toju' knajb'il kse'n nche' qoptz'aju' tal t-smaja exqa nche' qoptz'aju' tch'uta.12Ntb'eti'na tx'otx' tkyaqil toju' ttx'ujila; ex toj ttx'ujila nche b'aj kub'twab'e'na nimaqtnam.13Matxi' tz'etza onilteju' ttanama ex onilteju' nimaqkawil xjaw t-sk'o'na. Matxi' kub' t-xitu'na twi' tjaju' b'inchal taq'wix, ex matxi' kyej q'ancha'lixju' tq'uqlil pik tu'na.14Kyu'nxju' ksmaj ekub'a tb'yo'na knejel, tej aye'ju' aj chejil naku'j jun q'ankyaqqe', e'tzaj sputilkyeju' minti' nb'ent kyq'ojin tu'n kykub' xitu'ne' kyu'n toj ewaj.15Kyuk'i'lju' ttcheja nb'aj tb'eti'na toj tkyaqilju' ninnjab', aju' txqan a' nimin t-xe ex nimin twitz.16Tetzunj nb'inteye' lu tkyaqilju' tzaj xob'il wi'je'. E'b'jaw lu'lunju' ttxo'w ntziye', el kyipumalju' nkuxe' tu'n nwe'ye' kyib'aj tkyaqilju' nxmilale' mixti'tl kyipumal. Tu'npetzunju' lu, kchin ayole' q'uqli nk'u'je' ajtpon tq'ijlalil tu'n ttzaju' yajb'il tu'n Dyos kyib'aj xjal te q'oj ate'qe'k yajlal qeye'.17Oktzun chin tzalajeltze' nimxi'x tu'n Qman Dyos klol weye'. Chin b'itzale' te b'a'nqa min nche' ub'chin tqan iw ex b'a'nqa min ẍe' witzan tqan ub'a exqe' olib'o; b'a'nqa min xjaw twitz awal toj kojb'il; b'a'n qama che b'aju' tnej rit ex b'a'nqa mixti'qe'tl wakx toj kyja.19Qu'n ate Qman Dyos ktzajel q'onte' wipumale'; ktzajel tq'o'n ipumalj kyeju' nkuxe' tu'n kyojqelan se'n te masat ex kchin xe'l tiq'ine' twi' witz ja tu'me'l kchin kletela'ye'.Bible Society in Guatemala