Jonás1
Kub' oq Jonas twitz Qman Dyos
1Tzaj yolin Qman Dyos te Jonas, tk'wal Amitay, ex xitma'n te:2Kuxtxiya toju' nintnam Ninib'e ex q'manxa kye xjal qa kb'el nxitu'ne' nintnam, qu'n matxi' tzulkanun tqanil nk'etze' ti'ju' kyil.3Atzunte Jonas kub' oq twitz Qman Dyos, mya tu'nwt txi' tb'i'nju' tyol, xi' toj tnam Jope janche pona' txqan b'ark, elyal jun b'ark tu'n ch'inxtltoq txi' toju' tx'otx' Spanya; xi' chjolte iqb'ilte, jaxtzuntz toju' b'ark tu'nt-xi' toju' tx'otx' lu.4Atzunte Qman Dyos tzaj tq'o'n jun nin kyq'iq', jawtzun b'ent jun nin q'ankyaq xob'ajilx naku'jtoq kb'ajel xitju' b'ark tu'n.5Majx ok jun xob'il kyi'ju' aq'unal toju' b'ark, teyiletzun junjun aq'wi kub'sal teju' tdyos. Kub' kxima'ntzuntz tu'n tku'x kyxonju' iqtz toj ninnjab', noqxwitlo tu'n telju' talal. Atzunte Jonas matxi'toq ku'x ja nche' k'u'yita ti'xti' toju' b'ark, atzuntzu' kub'a' kẍeya' ex majx tzyet tu'n watl b'a'nxi'x.6Atzunju' nejenel toju' b'ark ku'x ja ta'toq Jonas, ex xitma'n te: ¡lwix we'ktza ẍwat! ¡Kub'sana te Tdyosa! Qaj nab'en matzajq'aq'an tk'u'j qi'j tu'n qklet tu'n, chij.7Tjawu'lenxi'tzun Jonas kyk'etzju' aq'unal toju' b'ark, intoq kyma'n kxolilex:—Qsenx tu'n tel yal alkye ati tpaj tu'nju' myab'a'n saj qi'j, chechij.
Tetzunj t-xikyse'nti'j, elyal qa a Jonas ati tpaj.8Xikyma'ntzuntz te:
—Q'mantza titiqu'n saja' taq'wix lu qib'aj. ¿Titi'tzun taq'una? ¿Jasaja'ya? ¿Alkye ttx'otx'a? ¿Ja tzajna' tyajila? chechij.9Atzunte Jonas xittzaq'we'n kye:
—Eb'reyqine', ex nchin k'ulune' te Dyos Manb'aj, Dyos te toj kya'j, b'inchalte ninnjab' ex tx'otx', chij.10Xitma'n Jonas kyeju' nche aq'unan toju' b'ark qa intoq oq twitz Dyos Manb'aj, aye'tzunkye tej t-xikyb'i'n, ex tej kyka'yinte ljo'nxi'xtoq tichinju' ninnjab', tzajxi'xtl xob'il kyi'j, xi'kyqani'ntzuntz te:
—¿Tiqu'n xtb'inchaju'ya lu? ¿Titi' kqb'incha'ye' ti'ja naqx tu'n twe'ju' ninnjab'? chechij.12Chin kyxonku'xe' toj ninnjab', oktzun kb'el nak'ete ninnjab'tzu'. Tu'na' npajwe' saja'ju' nin kyq'iq' kyib'aje', chi Jonas xittzaq'we'n.13Aye'tzunju' aq'unal toju' b'ark, e'aq'wi lmolte b'ark tuk'i'l tkyaqil kyipumal tu'nkyelpun ttzi tx'otx', ex mixti' b'enti kyu'n, qu'n xi'toq tichinxi'xtlju' ninnjab'.14E'aq'witzuntz kub'sal twitz Qman Dyos ex kyma: Qman Dyos lalun taja tu'n qkyime' naqx tu'n tpaju' ichan lu. Qatzun mixti' til, lalun tz'ok tq'o'na tkamik te qile', qu'n in aq'unanta Nman Dyos kse'nxju' tajb'ila.15Tb'ajlenxi'tzun kyma'nju' lu, xi'kyxon Jonas toj ninnjab', kub' nak'etzun ninnjab'tzu'.16Tetzunj kyka'yinteju' aq'unal toj b'ark tkub' nak'eju' ninnjab', kyna' toj kyanmi tu'n kyniman te Qman Dyos, kub' kyq'o'n chojb'il te, ex xikytziya'n tu'n kyk'ulun te.17Atzunte Qman Dyos matxi'toq kub' tq'o'n jun nin kyiẍ toj ninnjab' tu'n t-xi'tb'ilq'u'n Jonas. Oxe' q'ij ex oxe' qonik'an ten Jonas toj tk'u'ju' kyiẍ. Tna'j Dyos Jonas1Kub'santzun Jonas te Qman Dyos, tzmax toj tk'u'ju' kyiẍ,2tma:
Nkub'sane' teya Nman Dyos toju' yajb'ilweye', atzunta ntzaj ttzaq'we'na, Tzmax t-xexi' muqb'il te kamik nkub'saniye' teya, ex ntzaj ttzaq'we'na.3Nku'x t-xona tzmax t-xe ninnjab', ex majx nkyej mulq'aje' tjaq' tnimal a'. E ik'ju' nimaq ttolob' a' wib'aje' aju' tzaj tq'o'na.4Oje nna'ye' qa matoq chinetz tiq'i'na twitza; ex majxkub' nximane' qa layxtoq tz'ok nka'yi'ntlju'ye' tjaya xjan.5Majx nkyej mulq'aje' tjaq'ju' a'; majx nku'x naje' t-xe ninnjab'; b'aj tb'alq'intib'ju' k'ul ti'j nwi'ye' toj a'.6Nku'x mulq'aje' tzmax t-xexi' ninnjab'; ¡kub' nximane' qa majxtoq chin kjeltene' toj tejumajx! Atzunta Nman Dyos machin tkola teju' kamik.7Tej nna'nteye' ch'inxtltoq nkyime'; tzaj nna'na, Nman Dyos; japun nna'j dyose' teya toju' tjaya xjan.8Aye'ju' kukx kyk'ulun kyeju' witzileb' minti' nche okslantl teya;9ayi'ntzuwe' tuk'i'l b'itz te aq'b'il chjonte, che kb'el nq'o'ne' chojb'il twitza; che kjapumelju' nyole' xintziya'ne' teya. ¡O'kxna'ta Nman Dyos, nkolon!10Tchaq'tzun Qman Dyos teju' kyiẍ tu'n tjatz t-xa'n Jonas tib'aj tx'otx'. Anjtzti'j kyanmi xjal toj Ninib'e1Tzaj yolin jumajtl Qman Dyos te Jonas, ex xitma'n te:2Kuxtxi'ya toju' nintnam Ninib'e ex pakb'anxa kye aju' kxe'l nma'ne' teya.3Xi'tzun Jonas Ninib'e, kse'nxju' tchaq' Qman Dyos te. Nintnam toqte Ninib'e, te oxe' q'ij qb'e tu'n tb'aj qb'eti'n. Okx Jonas toju' nintnam, b'et jun q'ij q'malte tuk'i'l tq'ojq'ojel twi' kuw: ¡Kb'el xitu'nte' Ninib'e ajtjapun kab'naq q'ij! chij.5Aye'tzu'n xjal toju' nintnam, nimaq kyoklen ex ch'i'n kyoklen, eb'aj okslan te Qman Dyos, etz jun tqanil kyu'n tu'n kymewayin ex okkyq'o'n kyi'j jochin te b'is.6Tetzunj tpon tqanil teju' nimaqkawil te Ninib'e, ex ikxte jawe' toju' tq'uqb'il te tkawb'il, eb'je'l tiq'i'nju' ti'j te oklenj, ex oktq'o'n ti'j jochin te b'is ex kub' qe toj tza'j.7Etztzun tq'o'n nimaqkawil jun chaq'b'il toj tkyaqilju' nintnam, kjalu: Mix-a'lo' jun tu'n twan. Ex mixti' tu'n txi' q'et kwaju' wakx ex rit.8Kyq'onk kyi'je' jochin ex che kyktxunqe'me' kyalu'ne' tu'n xb'alun jochin te yek'b'il k'ixk'oj, ex che kub'sane' twitz Qman Dyos tuk'i'l tkyaqil kyipumale'. Kytzaqpinkju'ye' taq'wix nkyb'incha'ne' ja'lo teyile junjun;9qape' jaku' kub' tnajsa'n Qman Dyos qil ex qaj nkub'ku' tk'u'j, laytzun qokyimtzu', chij.10Tzaj tka'yi'n Qman Dyosu' ntoq kyb'incha'n xjal aj Ninib'e exqa ntoq kyej kytzaqpi'n kyb'inchb'aj taq'wix, kub't-xima'n tu'n lalun tzaj tq'o'ntlju' taq'wix kyib'aj kse'n ojetoq tma kye. Tzaj ttx'u'jil Jonas ti'j Dyos1Tzaj ttx'u'jil Jonas tu'n tpaju' tb'incha Qman Dyos ikju', ex min kub' toj twitz.2Qu'mtzun kub'ten na'l Dyos ex xitma'n te:
—Nman Dyos, ikyna'tzun nmaju'ye' lu tej tinqinxtoqe' toj ntx'otx'e' qa ikytoq kb'ajelju'. Qu'npe'na' lwiy nxi' oqe' toj tx'otx' Spanya, qu'n b'i'nxi'x wu'ne' lwiy ntzaj q'aq'an tk'u'ja, ex mya lwiy ntzaj ttx'u'jila, ex b'i'n wu'ne' nimxi'x tk'u'jlalila, qu'n ntpakb'a'n jun tz'e'ysb'ilwitzb'aja, ex lwiy najtzti'j tk'u'ja.3Qu'mtzun Nman Dyos, nchin kub'sane' teya tu'n nkub' tb'yo'na. Ate b'a'nju' tu'n nkyime' kyetwitz tu'n wanq'ine', chij.4Atzunte Qman Dyos tzaj ttzaq'we'n te:
—¿Ma atzun b'a'n toj twitza tu'n ttx'u'jina? chij.5Etztzun Jonas toju' nintnam ex kub'ten toj tjawetzq'ij teju' nintnam; kub' tb'incha'n jun t-xmuj atzu' ex kub' qe tjaq'ju' tewun, intoq nayon titi' kb'ajel ti'ju' nintnam.6Atzunte Qman Dyos tb'incha tu'n ttzaj ch'iy junwi' tze tu'n ttenxi'xtl t-xlekun Jonas, tu'ntzun tten b'a'nxch'i'ntl. Nxi'xtoq tzalaj Jonas ti'ju tal wi' tze lu.7Tetzunj qsqix te juntl q'ij, tb'incha Qman Dyos tu'n tokten jun xton walteju' wi' tze, ex kub' tzqij tu'n.8Tetzunj tjawu'l q'ij, tzaj tq'o'n Qman Dyos jun kyq'iq' moq'moj toj tjawetzq'ij, tu'ntzun yalxju' q'ij toj twi' Jonas, tna' Jonas qa majxtoq kb'el numj ex tajb'iltoq tu'n tkyim.
—Masb'a'n tu'n nkyime' kyetwitz tu'n wanq'ine', chij intoq tma'n.9Atzunte Qman Dyos xittzaq'we'n te:
—¿Ma b'a'n toj twitza tu'n ttzaj ttx'u'jila naq tu'nju' makub' tzqiju' wi' tze?
—¡B'a'na'tzun nela' toj nwitze'! ¡Naq ch'i'naqx min chin kyimaye' tu'n ntx'u'jile'!, chi Jonas xittzaq'we'n te Dyos.10Atzunte Qman Dyos xitma'n te:
In pena' nexch'yonta jun tal wi' tze toj tk'u'j, extzun myaya xi' awante ex mya tu'na xch'iya'; toj junx qonik'an xch'iya' ex toj juntl xkub'a' tzqij.11¿Ma laytzun b'ajxwe' nk'u'j ti'ju' Ninib'e, jun nintnam nintzku' ja ta'qe' kab'mutx' lajk'al (20,000) xjal mixti' b'i'n kyu'n se'n tu'n kykleta', ex nim txqan kyalu'n? chi Dyos.
Bible Society in Guatemala