Joel1
Kub' kyyaju'n ẍt'ikt'u'l awal
1A yol ja'lu tzaj tma'n Qman Dyos te Joel, tk'wal Petwel, xitma'n Joel kjalu:2Kyb'intzju'ye' lu b'a'nxi'x, tijwnaq, ex kykyaqile' najlqe'ye' toju' tx'otx' lu. ¿Ma oje kyilxi' junkye' yajb'il kse'n ja'lu? ¿Ma min ik' jun ti'xti' kse'n ja'lu tej ẍe anq'in ojtxi' kyyajilb'ene'?3Kytx'olb'anxe' kye kyk'wale', tu'ntzun t-xikyma'n kyk'wale' kye kyk'wal, ex tu'n t-xikyma'tnlkye kye kyk'wal.4Tkyaqil b'aj kyu'n ẍt'ikt'u'l: aju' b'aj kyej kyu'n junjun, txqantl b'aj wante.5¡Kyna'ntzkyib'e', twi' tx'ujtenil! ¡Kukyoq'e', aye'ye' majx yo'lok tk'wajil b'in kyi'je', qu'n naqpe' b'in k'elel q'i'n kyeye'!6Qu'n aye' ẍt'ikt'u'l, naku'xi'xtej jun tnej xjal te q'oj kuw ex txqan kyb'aj, naku'j twitzte b'alunju' kywitzte, tzak'an kywitzte naku'j twitzte ttxu b'alun, matxi' che kub'ten toju' tx'otx'.7Matxi' b'aj kyyaju'n qawal ub'a, matxi' b'aj b'o'lju' tqan iw kyu'n; majx matxi' che b'ajkyej sjile kyq'ob'ju' tqan iw kyu'n.8Kse'n jun txin ch'inxtltoq tmje inoq', nok tq'o'n ti'j jochon tu'n tpaj makyimju' ku'xun atitoq tu'n tmje tuk'i'l,9ikyqe'xtzun paleju' nche oq' qu'n mixti'tlte twitz awal k'ok'e'kywitz ex ta'l ub'a toj tja Dyos aju' nkub' q'o'n te oyaj te Dyos.10Matxi' naju' awal toj kojb'il; b'is ta'ju' tx'otx'. Matxi' naju' triy, matxi' che kub' tzqij tqan lob'j ub'a, ex matxi' che kub' tzqij tqan olib'o.11Che oq'xe' tu'n b'is, aye'ye' nche aq'unane' toj tqan ub'a, qu'n makub' yajti awal exju' twitz triy ex seb'ad.12matxi' che kub' tzqiju' tqan ub'a, ex matxi' che kub' yajtiju' iw. Ex mache kub' tzqiju' tqan lob'j kranadiy, tut, mansan ex kykyaqilju' tze toj kojb'il. ¡Ikytzu'n xkub'a' naj kytzalajb'il kykyaqilju' xjal!13Kyq'onk kyi'je' jochon ex che oq'e' tu'n k'ixk'oj, aye'ye' pale, nche ajb'ene' ti'j q'olb'eb'l, qu'n mixti'tlte oyaj twitz awal k'ok'e'kwitz ex b'in. toju' tja Qman Dyos.14Che kyb'uyintzju'ye' tnam ex kymanxe' tu'n kymewayin; che kyb'uyinqe'tze' tijwnaq ex kykyaqil xjal najlqe' toju' tx'otx', toj tja Qman Dyos Qdyos ex che kub'sanqe'ye' te Qman Dyos.15¡Qab'anx qwitz, matxi' tzul lq'eju' q'ij te tz'e'ysb'il qwitz tu'n Qman Dyos! ¡Xob'ajilx, qu'n tzul xitb'il qib'aj tu'n Qman Dyos nimtipumal!16Qwitzku' sela' q'i'n qwa, ex matxi' b'aju' tzalajb'il toj tja Qman Dyos.17Maku'xq'ayju' ij toj tx'otx', mixti'x xjawte triy ex matxi' che kub' xitju' qk'uja.18¡Inxi'x che oq'ju' alu'mj tu'n we'yaj! mixpe'ti'x nelyal jatu'n kysik'una'; ljo'n kykyim junjun tnej rit tu'n we'yaj.19¡Nman Dyos, nchin kub'sane' teya, qu'n jni'xte' k'ul toj chq'ajlaj e'tze toj kojb'il matxi' che b'aj tu'n q'aq'!20¡In pena' che kub'sanju' tojk'ul txkup teya, qu'n matxi' che kub' tzqiju' tal a', ex maja ẍeb'aju' kywa alu'mj tu'n q'aq'!1Kyq'ajtzanxe' chun twi' witz Syon; kyq'ajtzanxe' twi' witz xjan te Dyos tu'n kyjaw lab'ti xjal. Tu'n kylu'lun kykyaqilju' najlqe' toj Juda, qu'n xi' tul tq'ijlalil tz'e'ysb'il witzb'aj tu'n Qman Dyos:2jun q'ijte' qxopin ex qlolj, q'eqmuj ex nim tewun. Tej kyb'jo'k tzaqpaj ẍt'ikt'u'l Jun tnej q'ojil kuwqe' ex nim txqan kyb'aj, matxi' che kub'tilj kywi' witz kse'n qlolj ajtul juptz'aj te qonik'an. B'ajx tzaja'xi' junmaj ex lay tzaj jumajtl kse'n ja'lu.3Ikyqe'ju' kse'n q'aq' majx nb'aj ttz'e'ysa'n tkyaqil: tb'aniltoqte' tx'otx' tej na'mxtoq kyul, atzu'n ẍe ul, chq'ajlajtl xkyaj kyu'n. ¡Mixti' jun ti'xti' laywit b'aj kyu'n!4Naku'j chej kyka'yinx, kuw che ojqelan kse'nqe' aj chejil,5ex nche q'ajt ajkyik' lipan kywi' witz nakuj che q'ajt karwaj te q'oj, kse'n t-xaq tze tzqij inxi'x spoqob't toj q'aq'. Ikqe' kse'n txqan xjal te q'oj nim kyipumal txoli'nkyib' toj q'oj.6Nche lu'lun xjal kye ajkyxi' kyka'yi'n, majx in chukji kywitz tu'n xob'el.7Kse'nqe' xjal min nche xob' toj q'oj, kuw che ojqelan ex nche b'je'x tib'aj ninttapiyil tnam, tenenen kyb'je'l mix-a'lo'x jun nel tpa'ntib'.8Min nche oktakpuj tekyib'; teyile junjun ljo'n tb'e, maskye nche pon tz'aq smaj kyxol min nche b'ajxsputj.9Nche okx lipan toj nintnam, nche okx kyib'aj nintapi, nche okx kyoju' ja nche okx kyoj tokixspik'un kse'nqe' eleq'.10Njaw lu'lun tx'otx' kywitz, ntinunju' kya'j kyu'n, nche kub' yupju' q'ij ex xjaw exqe' che'w min nche tilk'ajtl kyu'n.11Nejlite Qman Dyos kywitz t-xjal te q'oj, kuw tq'ojq'ojel twi' inxi'x tinun. Nim txqan kyajlalju' t-xjal te q'oj; lay b'ent kyajletju' njapun tchaq'b'il kyu'n. ¡Nim toklenju' q'ij ex xob'ajilx ajtul tz'e'ysb'il witzb'aj tu'n Qman Dyos! Mix-a'lo'x kb'entel tmqonte. Tzaj laqj tk'u'j Qman Dyos12Atzu'n ja'lo ntma'n Qman Dyos kjalu: Kutanjtz kyi'je' wuk'i'le' tu'n tkyaqil kyanmiye'. ¡Che mewayine', che ẍch'inqe'ye' ex che oq'e'!13¡Kutanjtz jumajtlkyi'je' wuk'i'le' ayine' Dyos, tz'ex ch'yonx toj kyk'u'je' mya naqx tu'n kytziye'! Qu'n nlaqj nk'u'je' kyi'je' ayine' Dyos Manb'aj, nim npasense' ex nim nk'u'jlalile', ex lwiy ntzaj laqj nk'u'je' tu'n lalun ntz'e'ysatle' kywitze'.14Qape' jaku' lay kub' ttz'e'ysa'ntlju' kwitze' tu'n, jaku' atlju' ky'i'wb'il tzaj tq'o'n kyib'aje': ktzajel q'o'n k'ok'e' twitz awal, b'in tu'n tajb'en te oyaj toj tja Qman Dyos.15¡Kq'ajtzanju'ye' chun twi'ju' witz Syon! Che kb'uyimju'ye' tnam ex kmanxe' tu'n kmewayin;16kb'uyimju'ye' ttanam Qman Dyos, ex che kxjansame'; che kb'uyimju'ye' tijwnaq, exqe'ju' k'wal exqepe'ju' ne'ẍ tzma nche ch'u'n. ¡Exqe'ju' ku'xun akxtoq kmje tu'n kyetz toj kyja!17Kyoq'e' pale, aye'ye' tmajen Qman Dyos, ex kmanxe' t-xolju' ttzi tja Qman Dyos tuk'i'lju' q'olb'eb'l: Nman Dyos, najsanku'ya kyilju' ttanama; lalun taja tu'n kxmayin xjal ti'ju' ttanama; lalun taja tu'n tkub'kyi'j kyu'n txqantl nimaqtnam ex tu'nwt kmante xjal nche niman kye txqantl dyos: ¿Jatzunta'ju' Dyos nche ajb'ene' te? chechiwt.18Tzajtzun tyek'u'n Qman Dyos tk'u'jlalil teju' ttanam; tzaj laqj tk'u'j ti'ju' ttanam,19tmatzuntz:Ktzajel nq'o'n kwaye' triy, ta'l ub'a ex aseyt, tzmaxi'j ajtqe kyk'u'je'; ex lay wajtle' tu'n kxmayin xjal nche niman kye txqantl dyos kyi'je'.20Che elel nlaq'b'a'ne' ẍt'ikt'u'l nche tzaj toj tnayajkya'j kyi'je', ex che pomel nq'o'ne' toj chq'ajlaj. Che kxe'l nxone' ẍt'ikt'u'l nejlqe' toju' Kyimni Ninnjab', aye'tzu'n ate'qe' kyi'jxi' che kxe'lnq'o'ne' toj Ninnjab' Mediteraney, che b'elq'ayj ex che b'eltzu'wix. ¡Ex che nb'incha'ye' nimaq ti'xti'!21Tzalajxta b'a'nxi'x, tx'otx', ex lalun xob'a, qu'n nimaq ti'xti' kche tb'incha Qman Dyos.22Lalun che xob'e' tojk'ul txkup, qu'n ktzajel puqlitlte' k'ul te kwaye', kche witzalkyeju' tqan lob'j, nim txqan iw ex ub'a ktenb'el.23¡Che tzalajxe' xjal te tnam Syon, che tzalajxe' ti'j Qman Dyos nche ajb'ene' te! Ntzaj tq'o'nte' jb'al kyib'aje' tojxi'x tq'ijlalil, ntzaj jb'al toj jb'alil ex ntzaj t-xe jb'alil kse'nxju' ntb'incha'n tnejel.24K'elel b'a'nju' triy ex nim txqan b'in ex aseyt kjawil.25Ktzajel nq'o'nwe' nim kyeye' te t-xelju' ab'q'i minti' jaw kyu'ne' tu'n kpaju' ẍt'ikt'u'l, kyu'nju' nim txqan kb'aj naku'j q'ojilqe' e'tzaj nq'o'ne' kyib'aje' xitul.26Kche walkye' tzmax aj knoje, ex kjawil kyajwaline' Dyos Manb'aj, qu'n nim ti'xti' xnb'inchaye' kyeye'. Milo najchi'j tu'n tel jumajtl tch'ixawju' ntaname',27aye'tzunkye' aj Israel k'elelkynik'e' qa atinqine' kyuk'i'le' ayine' Dyos Manb'aj, exqa ayine' Dyos Manb'aj, ex mixti' juntel. ¡Milo tu'n tela' jumajtl tch'ixawju' ntaname'! Tzulju' t-xew Qman Dyos Xjan28Tib'ajxi'tl ja'lu ktzajel nq'o'ne' nxewe' kyib'aj kykyaqil xjal: che yolilju' kyk'wale' ex kmyale' te nxele' kye xjal, che witzk'alju' tijwnaq atzu'n kyeju' kyk'wale' chin yolile' kye toj naku'j witzik'.29Ex ktzajel nq'o'ne' nxewe' kyib'aj majen ichan ex qya kyoju' q'ij lu;30Kche nyek'u'ye' txqan ti'xti' tb'anilxi'x twitz kya'j, atzu'n twitz tx'otx', chik' q'aq' ex txqan sib'.31Kb'el qloljixju' q'ij, atzunju' xjaw kb'el kyeqax naku'j chik', ch'inxtltoq tulju' q'ij te Qman Dyos, nim toklenju' q'ij ex xob'ajilx.32Kykyaqiltzu'n mache kub'san toj tb'i Qman Dyos che kletel teju' kamik, qu'n twi' witz Syon ex toj Jerusalen, ktenb'e'la' kolb'il, kse'nx oje tma Qman Dyos. O'qekxkye' sk'o'nqe' tu'n che kjel anq'in.1Ajtponju' q'ij lu, chi Qman Dyos: junxi'tl che anq'ila'ju' xjal toj Juda ex toj Jerusalen wu'ne'.2Kche nb'uyi'ye' kykyaqil nimaqtnam, che kxel wiq'i'ne' toju' b'ya' Josapat, atzuntzu' che okyela' toj xjel ti'ju' xb'ajkye ti'ju' ntaname'. Qu'n eb'ajx kysputi'n aj Israel toj tkyaqil twitz tx'otx', ex b'ajx kysipa'nju' ntx'otx'e' kyxol.3B'aj kyaq'pu'n ntaname', kse'nxju' kub' te junjun, Eb'ajx kyk'a'yi'nju' k'wal q'a ex txin, eb'ajxtzuntz najsalte te twi' ti'j b'in ex kyuk'i'l qya ajpajil. Xjel kye nimaqtnam tu'n Qman Dyos4¿Titi' kyajb'ile' weye' aj Tiro, aj Sidon ex pilistey? ¿Ma kyajb'ile' tu'n kyok tzaqpaje' wi'je'? ¿Ma kyajb'ile' tu'n tel kpeyune' jun ti'xti'? ¡Yomqe'ye' nej tzma nche q'anaxkye'!5B'ajx kyelq'a'nju'ye' nsaqpwaqe' exju' nq'anpwaqe', ex b'ajx kyiq'i'n nk'uwene' toj tja kydyose'.6B'ajx kyiq'i'nju' aj Juda ex aj Jerusalen najchaq, ex eb'ajx kyk'a'yi'ne' te majen kyeju' xjal kriek.7Ayintzunwe' che eletz wiq'i'ne' jaeb'ajxa' kyk'a'yina'ye', ex knb'incha'ye' kyeye' tu'n kyik'e' toju' yajb'il kse'nxju' xkb'incha'ye' kye.8Che kxe'l nk'a'yi'ne' kyk'wale' ex kmyale' kye aj Juda, tu'ntzun txi' kyk'a'yi'ntl kye aj Sab'a te najchaq tx'otx'. Ayinku'ye' Dyos Manb'aj nchin q'mante.9Kmanxju'ye' lu kyeju' nimaqtnam: ¡Kyinktze' twitz q'oj xjan! ¡Che ktxkontzju'ye' xjal min nche xob'! ¡Tu'n kyulju' nimaq q'ojil ex tu'n kb'ajx toj q'oj!10Kyb'incham kyk'uẍtx'e'nb'ile ti'j ktz'u'tze' ex kych'ute' ti'j ksemule', aye'tzunju' xjal nche' numj tu'n kmante: ¡Kuwqinwe'! Chiku'.11Kykyaqilxe' nimaqtnam, naqaku' ta'qe'ye', ¡Lwiqe'xe', kb'uyimkyib'e'! ¡Naqpena'ju' mib'a'n q'ojin tu'n ttzaj q'ojil!12Kyb'inchamkyib'e' nimaqtnam ex kukxi'ye' toju' b'ya' Josapat, qu'n atzu' che okyela' nimaqtnam nqaku' ta'qe' toj xjel tu'n Qman Dyos.13Qu'n mixmyab'a'nqe', che kyjo'nktze' kse'n triy matxi' tzqij, qu'n matxi' ponju' tq'ijlalil tu'n tjaw b'uyit; che kpech'ime' kse'n ub'a, tu'n matxi' b'ent tkyaqil tu'n tel ta'l.14Matxi' b'aj kyb'u'yi'n kyib' tnam xjal toju' b'ya' jankub'a' nk'eta' jun ti'xti', qu'n matxi' tzul lq'eju' q'ij te Qman Dyos.15Che kb'el yupju' q'ij ex xjaw aye'tzunju' che'w lay che qoptz'ajtl.16Ajtb'inchante Qman Dyos tu'n tb'injtzu' tq'ojq'ojel twi' inxi'x tinun tzmax twi' witz Syon, toj Jerusalen, majx njaw lu'lunju' kya'j exju' tx'otx'. Atzu'n kyeju' aj Israel ttanam, jun kolb'ilte' Qman Dyos kye. Tb'anil kolb'il tzul te Juda17K'eleltzun kynik'tze' weye' qa ayine' Dyos Manb'aj, najlqine' toj Syon, witz xjan weye'. K'okyelte' nintnam Jerusalen xjan: lay kub' jumajtlti'j kyu'n najchaq xjal.18Toju' tq'ijlalil lu, nim b'in ex lech kb'etel, nakuj a' nb'et kwi' witz, aye'tzunju' ttxiklil a' te Juda kche jawil ch'iy. Kjawitz laqj jun t-xiklil a' toju' njaye' tu'n tb'aj ta'li'nju' b'ya' Sitim.19Naq tik'lenxtlte' Ejipt kjelten, atzun Edom kjel b'ent te chq'ajlaj, qu'n e'oktzaqpaj q'ojil kyi'ju' xjal te Juda ex e'kub' kb'yo'nju' xjal mixti' kyil toju' ktanam.20Ayinku'we' chin q'olte tu'me'l t-xelju' kykamik; lay kub' nnajsa'n tilju'ye' ati tpaj. Aye'tzunkye Juda ex Jerusalen che najal xjal kukxju' kyoj, ayintzunwe' Dyos Manb'aj chin najale' twi' witz Syon.
Bible Society in Guatemala