ອ່ານ Osey 1

Osey1

Aju' t-xu'jil Osey exqe' tk'wal

¹A tyol Qman Dyos ja'lu tzaj tma'n te Osey, tk'wal B'eeri, toj kyq'ijlalil Usiy, Jotam, Akas ex Esekyiy, nimaqkawil toj Juda, ex Jerob'oam, tk'wal Joas, nimaqkawil toj Israel.

²Tzyet tmante Qman Dyos tyol te Osey ju' t-sanjelal tu'n tmante kjalu: Matxi' tb'incha taq'wixju' tnam Israel ex matxi' tz'el tpa'ntib' wi'je'. Kuxtxi'ya ex q'intza jun qya ajpajil te t-xu'jila, ex tenx tk'wala tuk'i'l, aye'tzu'n tk'wala tuk'i'l che okyel te tal jun qya ajpajil, chi Dyos.

³Tzajtzun tiq'in Osey Komer tmyal Dib'laym te t-xu'jil, ch'onwi'yix tu'n ex itz'ji jun tal q'a.⁴Tzajtzun tma'n Qman Dyos te Osey: Q'onka tb'i k'wal Jesreel, qu'n toj jte' q'ijtl kb'el ntz'e'ysa'ne' kywitz tyajajil nimaqkawil Jewu tu'n tpaju' b'yojwnaqil tb'incha toj Jesreel ex kb'el nb'ajsane' tkawb'il Israel.⁵Kb'el nxitu'ne' kyipumalju' xjal aj Israel te q'oj toju' b'ya' Jesreel toju' tq'ijlalil lu, chi Dyos.

⁶Ch'onwi'yix jumajtlu' qya Komer ex itz'jitl jun tal txin. Atzunte Qman Dyos tzaj tma'n te Osey; Q'onka tb'i tmyala Lo-rwama, qu'n lay tzaj laqjtl nk'u'je' ti'ju' tkawb'il Israel, ex lay kub' nnajsa'ne' til.⁷Atzu'n te tkawb'il Juda ktzajel laqj nk'u'je' ti'j, ayinkuwe' Dyos chin klol kye; ex lay che nkole' tu'n q'oj, tu'n smaj mo tu'n k'uẍtx'e'nb'il ex mya kyu'n aj chejil, chi Dyos.

⁸Telenxi' Lo-rwama ti'j tch'u', ok jumajtlu' qya Komer ch'o'nwi' ex itz'j juntl tal q'a.

⁹Tzajtzun tma'n Qman Dyos te Osey: Loami tb'i k'wal lu q'onka, qu'n tu'n tpaj lay che oktle' te ntaname' ex lay chin noktle te Kydyose', chi Dyos. Kb'entel jumajtlu' tnam Israel¹⁰Jun q'ij che okyel aj Israel naku'j tz'awun ttzi ninnjab', mix-a'lo'x kb'entel techante ex kb'entel tajlante. Ex lay t-xinma'ntle' kyeye': Qa mya ntanamqe'tle', atlpewe' kxe'l nma'n kyeye': Ntanam qe'kye', ayine' Dyos i'tz', nchiku'we'¹¹Kb'ajeltzun kyb'u'yi'n kyib' aj Juda ex aj Israel ex noq jun kynejel k'okyel kyq'o'n. K'anjetz kyi'j kykyaqilu' ate' jaxjaku' tu'n kyb'ju'l toj Jerusalen, ¡Nim toklenju' tq'ij Jesreel k'okyel! chi Dyos.¹Kxe'ltzun kyma'ntze' kye kyitz'ine' mo kytzike' kjalu: Ttanam Dyos ex kxe'l kymane' kye kyanab'e': Matzajlaqj tk'u'j Dyos kyi'je', chechiku'ye'. Elkypa'n kyib' aj Israel ti'j Qman Dyos²Chi Qman Dyos kjalu: ¡Kypoqonxjuye' kytxuye', kypoqonxe', qu'n mya nxu'jiltlwe' ex myayintlwe' tchmil! ¡Tu'n lalun tz'ajpajintl! ¡Ex tu'n lalun che ku'xtentl tajpaj titk'u'j!³Qatzun min xkyaj tkyajsa'n, majxtzun kb'el nẍb'iqb'a'ntze' majx kjel ẍb'iqe' kse'nx tej titz'ji, kjawil b'ent wu'ne' te jun chq'ajlaj majx kjel te tzqij tx'otx', expe' kkyimel tu'n k'waj wu'ne'.⁴Lay tzaj laqj nk'u'je' kyi'ju' tal, qu'n toj ajpaji'n ẍetzaja'ti'n.⁵Matxi'ju' kytxu toj ajpaji'n; mix-a'lotlte nniman te, tej tmante: Machinxe' jyolkye wajpaje', aye' nche tzaj q'onte nwaye' ex nk'wa'ye', e'tzmal nrite' ex nxb'alune' tz'umin, ex waseyte' kyuk'i'l nk'wa'ye', chij.

⁶Qu'mtzun kb'el njpu'ne' tb'e tu'n ch'i'x ex k'okyel nch'laji'ne' ti'j, tu'ntzun lalun tz'el yal tb'eyil tu'n.⁷Kxe'l lpe kyi'j tajpaj extzun lay kub'kyi'j tu'n; Kjyol kyi'j, ex lay che elyal tu'n. Ktma'tzuntz kjalu: K'anjel wi'je' tk'etz tnejel nchmile', b'a'ntoq tinqina'we' tuk'i'l kyetwitz ja'lo, chiku'.

⁸Min selte' qya lu tnik' qa ayine' nchinxtoq q'onte ttriy, tb'in ex taseyt; ayintoqe' nchin jaw chmet-sante t-saqpwaq ex tq'anpwaq xkub' tb'incha'n twitzileb' tu'n.⁹Qu'mtzun, k'elel wi'ntle' te k'anjel wi'ntlwe' ntriy ex nb'in toju' q'ij ajtjaw b'uyit awal, ex k'anjel wi'nwe' tzmal nrit ex nxb'alun tz'umin, xinq'o'ne' te ktxub'lte.¹⁰Kywitzku' tajpaj kb'ela' nẍb'iqb'a'ne'. ¡Mix-a'lo'x jun kklolte toj nq'ob'e'!¹¹Kb'el nnajsa'ne' ttzalajb'il, e'tninq'ij ex ak'a'j xjaw, exqe' tq'ij te ojlab'l ex tkyaqilju' tninq'ij.¹²Kb'el nxitu'ne' tqan t-ub'a ex tqan t-iw, aye'ju' intoq tma'n kyi'j: Atzun chjob'lteju' lu tzaj kyq'o'n wajpaje', chij. kjawil b'ent wu'ne' te jun tx'otx' mixti' tawal, kb'ajel kywan toj k'ul txkupju' k'ul toj.¹³Kb'el ntz'e'ysa'ne' twitz tu'nju' tq'ijlalil xkub' tq'o'n sturak kywitz witzileb', tej intoq achun kyoj tu ex t-xmilq'ob' lepchiktoq kyi'ju' tajpaj ex matzik' nna'le' tu'n. Ayine' Dyos Manb'aj nchin q'mante, chi Dyos. Ntk'u'jla'n Qman Dyos Israel ttanam¹⁴Tu'npetzunju', k'okyel nxmoxi'n jumaqjtle': kxe'l wi'ne' toj chq'ajlaj kchin yolitle' te tu'n toklaqtl wi'je'.¹⁵Kxe'l nq'o'ntle' tqan t-ub'a, ex kjawil b'entju' b'ya' Akor wu'ne' tu'n tqe jumajtl tk'u'ju' qya. atzuntzu' ktzajela' ttzaq'we'n weye' kse'n toj tku'xumal, kse'n toju' q'ij tej kyetzju' ntaname' toj Ejipt.¹⁶Ktzajel tma'ntzuntz weye' kjalu: aya nchmile', mya tu'nwt ttzajtma'ntl, Nb'aal chiwt. Ayine' Dyos Manb'aj nchin q'mante.¹⁷Ex kche elel wi'ne' kyb'i twitzleb' toj ttzi, layx che tzaj tna'ntl.

¹⁸Tojtzu'n tq'ijlalil tjawx chix kjel b'entti'j jun yol wu'ne' kyuk'i'l tojk'ul txkup, e'pich' exqe' kan; che k'elel wi'ne' smaj, k'uẍtx'e'nb'il, ex k'elel wiq'i'ne' q'oj toju' tnam lu, tu'ntzun ttenju' ntaname' toj nak'b'il.¹⁹K'okyelta Israel te nxu'jile' tejumajx, k'okyela te nxu'jilkuxi'xe' kse'nxju' ntma'n kawb'il, qu'n inxi'x chin laqje' ti'ja.²⁰K'okyela te nxu'jile' ex chin okyele' b'a'n teya, k'eleltzun tnik'tza weye' ayine' Dyos Manb'aj.²¹Ayine' Dyos Manb'aj nchin q'mante: knb'incha'ye' tu'n tq'onte kya'j, jb'al tib'aj ju' tx'otx';²²atzunte tx'otx' ktq'a' txqan tawal triy, b'in ex aseyt, ikytzu'n kb'antela'ju' b'ya' Jesreel.²³Kb'el nq'o'ne' ntaname' toju' tx'otx', ex k'okyel we'ku'xi'xe'; ktzajel laqj nk'u'je' ti'j Lo-rwama, ex kxe'l nma'ne' te: Lo-ami ¡Aya ntaname'!, nchiku'ye', atzunte ktzajel tma'n weye' ¡Aya Ndyose'! chiku'. Aju' qya ajpajil ex Osey¹Tzaj tma'n jumajtl Qman Dyos weye': Kutxi'ya ex k'u'jlama jun qya k'u'jla'n tu'n tamiwa ex ajpajil. Ikytzu'n nche nk'u'jla'ne' aj Israel ayine' Dyos Manb'aj, maskyepe' matz'anjtlkyi'j k'ulul kye junxi'tl dyos ex nkywanju' muqin tzqij ub'a nokx kyq'o'n kywitz witzileb', chij.²Tzajtzun nlq'o'ne' nxu'jile' tu'n o'lajoj medi (15) saqpwaq. ex qaqlajnaq lajoj (330) litr Seb'ad.³Xinma'ntzuntze' te: k'okyela te nxu'jile' nim tq'ijlalil; lalun tz'ajpajina ex lalun txi'tla tuk'i'l juntl ichan, ex ikxwe' majx chin nokyelwe' b'a'n teya, nchije' te.

⁴Ikyqextzun aj Israelju' b'a'npun ab'q'i che kjelten mixti' kynimaqkawil ex mixti' kynejel, lay kub' kyq'o'ntl chojb'il expe' lay che tentl kyab'aj xjanqe', mixti'tl kyxb'alun pale ex mixti'tl kywitzleb' ktenb'el tojele kyja.⁵Yajxi'tzuntel k'anjetz kyi'ju' aj Israel ok kyjya' Qman Dyos exju' Dab'i kynimaqkawil. Kche pomel tk'etz Qman Dyos tuk'i'l ninb'il toj mankb'il tq'ijlalil ex kyk'mo'ju t-xtalb'il. Tq'oj Dyos kyi'j aj Israel¹Kyb'intze' aj Israel aju' ntma'n Qman Dyos. Matxi' tzyet tq'ojin kyi'ju' najlqe' toju' tx'otx' lu, qu'n mixti'tlte ax kyxolju' xjal tza'lu, min nlaq kyk'u'j ex min nelkynik' te Dyos.²Inpe' tzajkyna'n tb'i Dyos ti'j jun ti'xti' mya ax ex nche chanyol nche b'yonwnaq ex nche elq'a'n, nche ajpajin ex nche b'iyun, naqx nche b'yonxjal kukxju'.³Qu'mtzun, toj b'is ta'ju' tx'otx'; mixti' kyipumalju' najlqe' toj; ex kyuk'i'l tojk'ul txkup exqe' pich' nche kyimaju' kyiẍ toj ninnjab'. Nche' tpoqo'n Qman Dyos Pale⁴Chi Qman Dyos kjalu: ¡Mix-a'lo'x jun tu'n tpoqon ex tu'n ttzak'un ti'j juntl! O'kxtzu' ta'we' nq'oj ti'ja, aya pale.⁵Kb'el tz'aqa te q'ijtl ku'xi'x, ex kb'el tz'aqju' t-sanjelal Dyos tuk'i'la te qonik'an, ex kb'el nxitu'ne' ttxuya.⁶Mixti' tojtzqib'lju' ntaname', qu'mtzun xkub' xituna'. Atzunta pale, matz'eltik'u'na ojtzqib'l, K'elel wiq'i'na toju' toklena te pale. Mana' b'jik'kyna'lju' nxnaq'tzb'ile' tu'na ayine' Tdyosa, Ex k'ik'el kyna'lwe' tyajajila wu'n.

⁷Tej pena' ẍe jaw chmet pale, majx ẍe b'inchanxi'xtl il nwitze'; qu'mtzun kjawil nmiltz'u'ne' ninb'il kye te kych'ixaw.⁸Xi' nche anq'ina' kyi'ju' il nkyb'incha'n ntaname'; qu'mtzun kyajb'il tu'n kyb'inchan xjal il.⁹Kb'el ntz'e'ysa'n kywitzju'ye' xjal exqe' pale, tu'n tpaju' kyb'ichb'en myab'a'n,¹⁰Mina'jon nche ajb'entl weye' ayine' Dyos Manb'aj, Che wal ex lay che noj b'a'nxi'x; Che okyel ajpajil ex lay tzul kyk'wal. E'k'ulun aj Israel kwitz witzileb'¹¹In naj qnab'l tu'n ajpaji'n, ex tu'n k'waj b'in.¹²Nche xjelunju' ntaname' kye kywitzleb' tzeqe, ex nkyjyo'n kyi'j tu'n jun piẍ tze. Tzpetniqe' toj ajpaji'n, myab'a'n tb'eju' ntaname' ljo'n: nche ajpajin ex nelkypa'n kyib' wi'je' aniye' Kydyos.¹³Nche'x tz'e'ysal sturak ex nkub' kyq'o'n chojb'il kywi' nimaq witz ex kywi' ttxa'nwitz ex kyjaq' kyxlekumal k'ol, chjaj ex b'ansi. qu'mtzun matxi' che okju' kymyal te ajpajil, ex nche ajpajinju' kylib'.¹⁴Laytzun kub' ntz'e'ysa'we' kywitzju' kymyale' tu'nju' nche ajpajin ikxqe' kylib'e' tu'nju' nche ajpaji'n, qu'n aye'ku'ye' nchex kyuk'i'l qya ajpajil; ajtkub' kyq'o'ne' chojb'il nok kymujb'a'n kyib'e' kyuk'i'lju' qya ajpajil naku'j jun k'u'lb'il. ¡Ikytzu'n nxa' tzpeta' jun tnam mixti' tnab'l.!

¹⁵Qama tz'oka Israel te ajpajil, tu'npe' o'kx Juda laywit b'inchan il. ¡Lalun che'xe' toj Kilkal mixti' tu'n kyjaxe' toj B'et-ab'en ex lalun tzaj kyna'ne' tb'i Dyos tib'aj jun ti'xti'!¹⁶Pi'sju' tnam Israel naku'j jun tal wakx nt'ikpuj; ¿ma oktzun che kxe'ltka'yi'n Qman Dyos tu'n kykub' tq'o'n toj tb'anil kytwa, naku'xwitloj tal b'o's a'la'jqe'?¹⁷Matxi' txit-xontib' Eprayin toj witzleb'i'n. ¡Kykyaqil matxi' che b'ajkub' tz'aq naku'j txqan tx'ujtenil! Ex kukxu' kyu'n nche b'aj ajpajin ex kyajb'ilxi'x tu'n tel kych'ixaw kyetwitz tu'n kyjaw nima'n.¹⁹Che kxe'l iqa'n tu'n kyq'iq', ex che b'elch'ixwi ti'ju' kywitzleb'i'n.¹Kyb'intzju'ye' lu, pale; kyb'intzpeye' tnam aj Israel; kyb'intze' aye'ye' toj tja nimaqkawil: Kye nakye' tzula' xjel, qu'n matxi' che oke' te xpatxab' toj Mispa, jun xpatxab' tkub' twi' witz Tab'or,²Kse'n xoch kyejni leb'a'n toj b'ya' Sitim. Qu'mtzun kb'el ntz'e'ysa'ne' kywitze'.³Wojtzqi'na Eprayin; ex wojtzqina Israel. Matz'oka Eprayin te ajpajil; ex matxi' b'aj ttxa'ju'ntib'a Israel.

⁴Axju' tb'inchb'aja tnam myab'a'n, min najonte tu'n tanjtzkyi'je' tuk'i'l Dyos. Matxi kub'ti'ja tu'n ajpaji'n, qu'mtzun min nel tnik'a ti'j Dyos.⁵Axju' kyninb'il kyib'a' aj Israel nyek'unte kyila'; Njaw trakpuja Eprayin ti'jxju' tila, ¡expe' axjuna Juda kjawel trakpuja kyuk'i'l!⁶Okpe' che jyole' wi'je' kyuk'i'l kyrite' ex kywakyixe', ex lay chin knete' kyu'ne' qu'n che kjel nleb'a'ne'.⁷Mache oke' naku'j qya ajpajil, qu'n machin kub'kysb'u'ne' tej ẍe k'ulune' kye txqantl dyos. Tu'ntzu'n min nche nimane' weye' noq ch'inxtl tkub' xitu'n kytx'otx'e'. Tz'e'ysb'il kywitz Israel ex Juda⁸¡Kyq'ajtzanxu'ye' xux te q'oj toj Kyib'ea, exju' chun toj Rama! ¡Kyq'onxe' tqanil xob'ajil toj B'et-ab'en! ¡Tu'n t-xob' B'enjamin!⁹Kxe'l nma'ne' tpakb'alil kyxole' tnej tyajajil Israel aju' kb'ajel ilxi'xti'j: Majx che kb'el nxitu'ne' Eprayin toju' tq'ijlalil ajtkub' ntz'e'ysa'ne' kywitze'.

¹⁰Chi Qman Dyos kjalu: Ikqe'kye' kynejel aj Juda kse'nqe' xjal nche' laq'b'an nqach. ¡Ex majx che kb'el nnajsa'ne' tu'n ntx'u'jile'!¹¹Jtz'o'nte Eprayin ja'lo mixti'tl nnimanjtzu' toklen, qu'n xi' soka' tq'o'na'tl twitz, kyi'j junxi'tl dyos.¹²Qu'mtzun kb'el nxitu'ne' tkawb'ilju' tnam lu exju' tkawb'il Juda kse'n pok' nokten walte tze.

¹³Ajtzun tkayinte Eprayin qa matxitoq b'o'lj, ex ajtka'yinte Juda matxitoq tak', che kxe'ltzuntz qanil o'nb'il teju' nimaqkawil aj Asirya; extzun lay b'ent kyq'anit tu'n nimaqkawil lu.¹⁴Chin xe'l tzaqpaje' b'yolte Eprayin ex Juda kse'n jun b'alun aj txi' t-xontib' b'iyul; ayinku'ye' chin b'ajel tzaqunkye ex chin oqele' txab' kytzyet wu'ne' ex mix-a'lo' kb'entel tklonkye' toj nq'ob'e'.

¹⁵K'anjeltzun wi'jtze' toj nnajb'ile' tzmaxi'j ajtel kynik' ti'ju' kyil ex ajkyul jyolweye'. ¡Tojtzunju' yajb'ilkye chin kyjya'ye'! Naqx Inkyma'n aj Israel tu'n tanjtzkyi'j tk'etz Dyos¹Kukytzaje' kykyaqile', kutanj qi'j tk'etz Qman Dyos. Ate xb'aj b'yonqe, ex ate kq'analqe; maqo k'ixb'i tu'n ex okqo tq'ana'.²Noq toj kab'e' oxe' q'ijx ktzajel tq'o'n jumajtl qchwinqlal, qo jawil twab'a'n tu'n qanq'in twitz.³¡Qq'onk tilil tu'n telqnik' te Qman Dyos! Axxi'x tzulte Qman Dyos quk'i'l, kse'n ajtjawu'l q'ij, axxi'x kse'n ajttzaj jb'al nb'aj ak'u' tx'otx' tu'n kse'n tnejel jb'al na'mxtoq tetz jb'alil. Ttzaq'web'l Qman Dyos⁴Chi Qman Dyos kjalu: ¿Titi' knb'incha'ye' kyeye' Eprayin ex Juda? ¿Titi' kche nse'ye'? Iky kyk'u'jlalile' wi'je'. Kse'n muj te prim, ex kse'n ta'l che'w te b'a'n prim, texju' prim nkub'naj.⁵Qu'mtzun aju' nyole' xpon kyeye' kyu'n nsanjelale', iky sela' kse'n q'ankyaq b'iyul majx ẍeb'aje' tu'n.⁶Awe' wajb'il chin kyk'u'jlame', myate' chojb'il tu'n tzaj kyq'o'ne' weye' tz'elx kynik'e' qa ayine' Dyos, myate' tu'n tkub' kyq'o'ne' chojb'il k'ok'sb'il nwitze'.

⁷Ikx ntanamju'ye' kse'n Adan, matz'ik' tib'aju' nchaq'b'ile' ex min nb'intl.⁸Matxi' tz'ok Kalaad te jun nintnam aj il, matxi'xi'x b'aj txa'j toj tik'len chik'.⁹Jun k'loj eleq' qekye' pale. tokkywitz kyi'ju' xjal; nche kub' kyb'yo'n xjal ex nche elq'an kyi'j toj tb'eyil Sikyem.¹⁰Matxi' wile' ti'xti' taq'wixi'x nkyb'incha'n aj Israel: Matxi' tz'ok Eprayin te ajpajil, ex ikx Israel matxi' txilpe ti'j.¹¹Ex ikxta Juda matxi' kyej b'entti'j tq'ijlalil tz'e'ysb'il twitza.
Naqa xntch'exb'eye' tchwinqlalju' ntaname' Israel.¹Qa wajb'ile' tu'n nq'aninteye' ntaname': nelyal kyil Eprayin ex aj Samarya taq'wixi'x. Qu'n kykyaqilx nche b'aj chanyol; ikqe' kse'n eleq' nche b'jo'kx elq'al tk'u'ja ex nche oktzaqpaj elq'al kyi'j xjal toj b'e.²Min nche ximan ti'j qa na'mile wu'ne' tkyaqil kyb'inchb'aj taq'wix. atzu'n ja'lo mache jpet tu'nxju' kyb'inchb'en myab'a'n.³Nxi'x kytzalajsa'n nimaqkawil exqe' nejenel tu'n kyb'inchb'aj myab'a'n ex kychajyolil.⁴Kykyaqilx ajpajilqe'; ikyqe' kse'n chuj, naqa xk'ent inxi'x k'ent ajxi'x tkub' jayun b'ankxpun ntx'amset tq'otjel wab'j.⁵Ajtok tq'ij nimaqkawil, majxkub' yab'ti tu'n b'in kyu'n nejenel ¡ex junx nela' kyuk'i'lju' nche xmayin!⁶K'u'n kyq'oj toj kyanmi nche oklq'e tk'etzu' nimaqkawil naqx tu'n tb'o'lj kyu'n. min nche wtan ajtb'aj qonik'an qu'n inxi'x che ximan se'n kb'o'ljela' kyu'n ajqsqix.⁷Kykyaqilx ikyqe' kse'n jun chuj nk'ant majx ẍeb'aju' kawil kyu'n. Kykyaqilju' kynimaqkawil matxi' che b'aj kyu'n ex mix-a'lo' jun xqanin o'nb'il weye', chi Dyos. Matz'el tpa'ntib'u' tnam ti'ju' Tdyos⁸Matxi' txit-smo'ntib' Eprayin kyuk'i'l txqantl tnam. Ikyte Eprayin kse'n jun muqin noq jun plaj tzq'aj.⁹Matz'elq'in tipumal kyu'n najchaq xjal. Ex min neltnik' ti'j, ¡expe' matxi' kub' saqax t-xya'mal twi' ex min nel tnik' ti'j!¹⁰Axju' kynimb'ilkyib' aj Israel xtziyan kyi'jx Extzun min nanjtzkyi'j, ex min nche jyon wi'je' ayine' Kydyos.¹¹Ikyte Eprayin kse'n jun xu'ch noq nttakla'ntib' ex min nximan: nqanin o'nb'il te Ejipt ex lwiy nxi'tl qanil tnab'l te Asirya.¹²Ajtzun kxi' na'tz, kxe'l nxone' pa te xpatxab' kyib'aj; kche b'eltz'aqtzuntz wu'ne' kse'nqe' pich' twitz kya'j, kche tzyetel wu'ne' tu'n tpaju' kyb'inchb'en taq'wix.

¹³¡Qab'anx kywitz tu'n sel kypa'n kyib' wi'je'! Kb'elkyi'j tu'n xitb'ilkye, qu'n majawkyi'nkyib' wi'je'. Wajb'ilwe' tu'n kyklet wu'ne' aye'tzunkye nche chanyol wi'je'.¹⁴B'a'n qama che ẍch'in toj kuẍb'il, min nche kub'san nwitze' tu'n tkyaqil kyanmi. Maskye nkyk'ixb'sa'n kyib' ajkyqanin kywa triy ex kyk'wa' b'in; ¡matxi'na' jawkyi'nkyib' wi'je'!¹⁵Oje che b'ajx nxnaq'tza'ne' ex matxi'nq'o'ne' kyipumal, aye'tzunkye mab'aj kyxima'n ti'xti' taq'wix wi'je'.¹⁶Mache k'ulun jumajtl kye witzleb'; ikqe' kse'n jun smaj txalchi, min pon yalju' tal janxa' nik'una'. Tu'nju' kyol taq'wix wi'je' kche b'ajelju' kynejel tu'n k'uẍtx'e'nb'il, ex k'elel kych'ixaw toj Ejipt. Kub' tz'e'ysa'n twitz Israel tu'n tpaj witzleb'i'n¹Q'ajtzanxa chun, kse'n jun xq'uqil nxq'uqin tib'aju' ntaname' ayine' Dyos. Qu'n min xjapunju' yol kyejni b'entti'j kyu'n matxi' tz'el kypa'n kyib' ti'ju' nxnaq'tzb'ile'.²Che ultzuntz k'ulul weye', nche' ẍch'in kjalu: ¡Matxi' tz'el qnik'e' teya Tdyos Israel!³Extzun min kyajb'il tu'n kyb'inchante b'a'n, qu'mtzun kche jyonjtzel kyu'n kyajq'oj.

⁴Matxi' che b'jo'k kyq'o'n kynimaqkawil ex mixti'xte saj kyma'n weye', matxi' che b'jo'k kyq'o'n kynejel ex min b'i'n wu'ne'. Matz'ajb'en saqpwaq ex q'anpwaq kyu'n tej xkub' kyb'incha'n kywitzleb', ex xkub' kyxitu'nkyib'.⁵¡Majx ntik'o'n nk'u'ju'ye' wakx nche k'ulune' te, aj Samarya! Matxi' tzaj txqan ntx'u'jile' ti'j. ¿Jtojtzun kyẍtilsa kyib'e' aj Israel?⁶¡Mya Dyoste' tal wakx ati Samarya! Naqna' jun xjalte' b'inchante ex majx kb'el npẍu'ne'.⁷Ktz'e'ysetel kywitze' qa min nchinx kyb'i'ne': mixti'x twitz kyawale' kjawil ex mixti'x twitz kytriy k'elel; qatzun ma'x tz'el ch'i'n kyu'ne'; naqxte kywa najchaq xjal k'okyela'.⁸¡Kyjel xitju' Israel! Kyjel kse'n ttx'anqa'n k'wil mixti'tl tajb'en.⁹Tu'n tpaj exi' qanil onb'il Asirya kse'n jun b'etlaj tx'yan ¡Xitq'o'n Eprayin oyaj naqx tu'n ttzaj o'ni'n!¹⁰B'a'ntzun qa matxikyq'o'n oyaj kyxol nimaqtnam, Che kxe'l nsputi'ne' kyoj txqantl nimaqtnam, Ex kpomil jun tq'ijlalil lay che tentl nimaqkawil ex nejenel kye.

¹¹Qu'n nim txqan q'olb'eb'l matxi' b'jaw kyb'incha'ne' Eprayin; naqx tu'n kyb'inchan ile' nche ajb'ena'.¹²Nim xnaq'tzb'il matxi' b'ajx ntz'ib'a'ne' kyeye', aye'tzunkye' mache b'je'l kyik'o'ne'.¹³Inxi'x kub' kyq'o'ne' chojb'il, ex nxi' kych'yo'ne' kychib'jilu' chojb'il; ayintzunwe' min nchin tzalaje' kyuk'i'le', ayine' Dyos Manb'aj: na'nwe' kyile' wu'n, kb'el ntz'e'ysa'n kywitze' tu'n tpaju' kyile', k'anjetl kyi'je' Ejipt.¹⁴Aj Israel, nche jaw kyb'incha'ne' tja nimaqkawb'il, ayintzune' matxi' tzik'nna'le' kyu'ne', ayine' ch'isalkyeye'. Ikxte Juda nche jawtb'incha'n nimaqtnam kuwsa'nqe', oktzun che b'ajel npati'nwe' toj q'aq' majx che b'ajelju' tja nimaqkawb'il. Tqanil tz'e'ysb'il kywitz aj Israel¹Lan che jawnaj tzalaje', Israel; lan che xlik'pune' tu'n kytzalajb'ile' kse'n nkyb'incha'n txqantl tnam, matxina' che oke' ajpajil tu'n xkyaj kytzaqpi'ne' Dyos. Ajtel twitz kyawale' kyoju' er ja inela' b'inchet triy xi' nche q'ona' chjonteye' kyeju' mya dyos qe'.²Tnam Israel, lay ten kytriye' ex kyb'ine' ex lay kanun kyb'ine' ak'a'j.³K'anjetlkyi'je' Ejipt, ex kche wal tz'il wab'je' toj Asirya. Lay che najantle' toju' ttanam Qman Dyos:⁴lay che k'wantl b'ine' ninb'ilte Qman Dyos, expe' lay b'entl kyq'on chojb'ile'. Qama txi' kywan jun kywaye' naku'j te b'is, ex che kjel tz'ilixju' che kxe'l wante. Kxe'l kywane' wab'j lu, extzun lay b'ent t-xikyiq'i'ne' toj tja Dyos.⁵¿Titi' kb'antel kyu'ne' toju' ninq'ij aju' nim toklen te Qman Dyos?⁶Mana' che'x oqe' teju' xitb'il saj kyib'aje' che tzyunjtzele' Ejipt, ex che b'elex mqu'ne' Menpis. Kb'el noj kyk'uwene' saqpwaq tu'n ch'i'x, ex che ch'iyel ch'i'x toj kyxmuje'.

⁷¡Matxi' pon tq'ijlalil tu'n ttzaj tz'e'ysb'il kywitze'! ¡Matxi' pon tq'ijlalil tu'n kychjonteye' kyile'! ¡Oktb'i'ya Israel qa matxi' pon tq'ijlalil! Ina' kyma'ne': Xnakte' t-sanjelal Dyos. Okni toj twi'ju' ichan xewsa'n tu'n Dyos, chechije' Iky nkyma'nju'ye' lu, qu'n nojniqe'ye' tu'n il, nimxi'x kytx'u'jile'.⁸Xq'uqilte Eprayin kub'a' tq'o'nte Dyos t-sanjelal aye'tzunkye' nkub' kyq'o'ne' xpatxab' toj tb'e; ¡Inxi'xpe' walti'j kyk'u'je' ti'j toju' tja Dyos!⁹Mache kub' tzuwixe' toju' kyile', kse'nqe' najlqe'toq Kyib'ea. Laytzun tzik'tna'lte' kyb'inb'aje' taq'wix tu'n Qman Dyos ex kb'el ttz'e'ysa'n kywitze' tu'n tpaju' kyile'. Kyajtel Israel tu'n tpaj til:¹⁰Intma'n Qman Dyos kjalu: Intzalaje' tej kyknete' wu'ne' kse'n nknet lob'j ub'a tu'n jun xjal toj chq'ajlaj. Iky eb'jela' ojtxi' kychmanju'ye' weye', kse'n tnejel twitz lob'j iw. tetzunj kypon tk'etz B'aal-peor xi' kyaq'atlkyib' kyuk'i'lju' dyos mya ax, mache ok ik'b'ajilqe'xi'x, kse'nqe' witzileb' nche' kyk'u'jla'n.¹¹Lay tentlte' txqan tq'inumal Eprayin: kxe'l iqa'n tu'n kyq'iq' kse'n t-xaq tze, lay che oktlkye' qya ch'onwi', lay tentlkye qya aj Israel kyal.¹²Qatzun mache anq'in kyk'wal kyu'n, ayinwe' chin elelq'inkye ex lay kyej junkye. ¡Qab'a'nx kyej xjal kywitz ajtel npa'nwib'e kyi'j!¹³Nok nka'yi'ne' ikynche t-se'n Eprayin tk'wal kse'nqe' txkup nche tzyet kyu'n xjal toj k'ul: nche etztiq'in ex nche'x tq'o'n tu'n kykub' b'yo'n.

¹⁴¡Nman Dyos, b'inchama kye aju' tu'n tb'inchateya! ¡Tu'n lalun che alantlu' qya ex tu'n lalun tentl ta'l kyimi'ẍ! Ttx'u'jil Qman Dyos ti'j Eprayin¹⁵Chi Qman Dyos kjalu: Kyb'inchaye' taq'wix tej kyule' Kyilkal, atzuntzu' tzaja' ntx'u'jile' kyi'je'. Tu'n tpaju' kyb'inchb'aje' taq'wix kche elex nxla'ja'ne' toj njaye'; ex lay che nk'u'jlatle'. kykyaqilxju' kynejele' pi'sqe'.¹⁶Matxi' che k'ixb'iye' Eprayin; kse'n jun tze tzqijtl tlok' ex min nwitzantl. b'a'n qama che ul kk'wale', ayinwe' chin kb'el b'yonkye, chi Dyos.¹⁷Aj Israel, che elel ik'o'ne' tu'n Qman Dyos qu'n min nche okslane' te. Qu'mtzun che ik'ele' toju' kytaname', ex noq kche b'etenjele' kyojile junjun nimaqtnam. B'ajkub' xitu'n kyq'olb'eb'l aj Israel¹Ikyqe' aj Israel kse'n junwi' tqan ub'a txijli toj twitz tu'ntzu'n txijlixi'xtoq txqanxi'xtl q'olb'eb'l nche kyb'incha'n; tu'nju' tb'anilxi'xju' kytx'otx', ex tb'anilqe'xi'xtlju' kyab'aj xjansa'nqe'.²Kyajb'il aj Israel tu'n kyk'u'jlante Dyos, ex kyeju' mya dyos qe' atzun ja'lo kkychja' kyil. Che b'elt-xitu'n Qman Dyos kyq'olb'eb'l ex kyab'aj xjansa'nqe'.

³Kkyma'tzuntz: Mixti' qnimaqkawil qu'n min nqo niman te Qman Dyos. ex naqwit ati ¿Ti'wttzuloti' kb'antel tu'n nimaqkawil qe?⁴Noq nyolin ex nyolin, nxittziya'n jun ti'xti' mya ax ex nkyaj b'enttij jun yol kyu'n; ikytzu'n nch'iyju' taq'wixil kse'n junwi' k'ul b'iyul toj kojb'il.

⁵Nche lu'lunju' xjal aj Samarya; nche' oq' tu'n tpaj kywitzleb' tal wakx matz'exq'i'n B'et-ab'en. Tu'ntzunju' nche oq'a' tnam exqe' pale, qu'n matxi' kub' naju' ninb'ilkye.⁶Aku'pe' tal wakx kxe'l q'in Asirya. tu'n txi' q'o'n teju' nin nimaqkawil. Extzun majx k'elel tch'ixaw Eprayin: Kb'el ch'ixwi Israel tu'n tpaj kxe'l q'i'n twitzleb'.⁷Kb'el naju' nimaqkawil toj Samarya kse'n jun xpe'lb'en ntananje tib'aj a'.⁸Che b'ajel xitu'n najb'il xjan te witzileb'i'n ja xb'inchana' il tnam Israel. Che b'ajel ch'iy txo'k ex ch'i'x kyib'aju' kyq'olb'eb'l, aye'tzu'n xjal kxe'l kyma'n kyeju' nimaq witz: ¡Kukytzaj niq'je' qib'aje'!, ex kxe'l kyma'n kye k'ok'e' witz: ¡ktzaj tz'aqe' qib'aje'! Tz'e'ysb'il twitz Israel tu'n Dyos⁹Chi Qman Dyos kjalu: Aj Israel, na'mx tkyej kytzaqpine' tu'n kyb'inchan ile' ttzajtlenx kyb'inchan ile' toj Kib'ey. ¡Kukx kytenju'ye' toj il! Qu'mtzun kb'elkyi'je' tu'n q'oj aye'ye' b'inchal taq'wix toj Kib'ey.¹⁰Kb'el ntz'e'ysa'n twitzju'ye' tnam lu. Kb'ajel kyb'u'yi'n kyib' nimaqtnam q'ojil ti'j. Ajtkub' ntz'e'ysa'ne' twitz tu'n tpaju' myab'a'n xtb'incha.

¹¹Ikytoq Eprayin kse'n jun wakx mansi'ntl ex tajb'ilxi'x tu'n ttriyin. Atzu'n ja'lo matxi' jax nq'o'ne' tiqb'il tib'aju' tqul tb'anilxi'x, tu'n txi' tjk'u'n karwaj; atzunte Juda matxi' kjol kyuk'i'l wakx, atzuntlte Jakob' kb'ajel txijinte tq'ub'en.¹²Ex xinma'ne' kye: kyawanku'xe' tnik'alilti'j tu'n kyb'uyinteye' tk'u'jlalil. Kyaq'unanku'ye' tx'otx' tu'n toktl tawal, qu'n a tq'ijlalilu' ja'lo tu'n kyjyonteye' Qman Dyos. tzmax ajtul tq'o'n kolb'ilkyeye' nakuj jb'al.¹³Aye'tzunkye' ma ku'x kyawa'ne' taq'wix, naqx xitb'il xkyk'ame'. naqx chajyolil tokx toj kytziye' naku'j kywaye'.
Tu'n tpaj xi' soka' qe kyk'u'je' ti'j kykarwaje' te q'oj ex kyi'j txqan kyxjale' te q'oj,¹⁴kche jawil tilju' kyxjale' ex kykyaqilju' kyjaye' kuwsa'nqe' che b'elxitj, kse'n kub'a' xitu'n B'et-arb'el tu'n nimaqkawil Salman toju' q'oj tej tkub' b'yo'n txub'aj kyuk'i'lxi' tal.¹⁵Ikxtzun che okyela'ju'ye', najlqe'ye' toj B'etel, tu'n tpaj txqan taq'wix xkyb'inchaye'. Kb'ajelte' nimaqkawil aj Israel ajtjawu'l q'ij. Ntk'u'jla'nte Dyos ttanam b'a'nqa pi's¹Chi Qman Dyos teju' ttanam kjalu: Israel, tej ikyqe'toqu'ye' kse'n jun k'wal, intoq che nk'u'jla'ne'. E'etzwiq'i'ne' toj Ejipt, qu'n nk'wal qena'ya.²Tetzu'n nchin txokone' kyi'je', xi'pe' nela' kypa'ntl kyib'e' wi'je'. Ntanam, xi' nche q'ona'tl chojb'ile' kyeju' mya dyosqe' ex nkub' kypati'n sturak kywitz witzleb'.³E'xipe' nxb'etza'ne' tnam Israel ex e'xinxnaq'tza'ne' tu'n kyb'ete'; aye'tzunkye' min kane toj kywitze' qa nchin xq'uqine' kyi'je'.⁴E'tzaj nlaq'b'a'ne' nk'etze' tuk'i'l tlaqb'il nk'u'je' ex nk'u'jlalile', e'oknlaq'b'a'ne' ti'j ntziye'; naku'j ne'ẍ tzma nch'u'n; kub' nq'o'ne' kywaye',⁵Aye'tzunkye' min kyaje' tu'n tanjtzkyi'je' wuk'i'le'. Qu'mtzun k'anjel jumajtlkyi'je' Ejipt, ex kkawil Asirya kyib'aje'.⁶Tzul q'oj kyi'ju' nimaqkytaname' ex che b'ajelju' kyjaye' kuwsa'n, che b'elb'ajsa'ne' tu'n tpaj kyxime' myab'a'n.⁷Matxi' tz'el kypa'n kyib'e' wi'je' ntanam; xi' toka'tl kywitze' kyi'ju' mya dyos qe' ex min nb'ent kyonin kyi'je'.

⁸¿Se'n taq'wi ajkykyaj nkolb'e'ne' Eprayin? ¿Se'ntaq'wi ajkykyaj ntzaqpi'ne' Israel? ¿Ma che kb'el nxitu'ne' kse'n tkub' nxitu'ne' nintnam Adma, mujqa tu'n nb'inchanteye' kyeye' kse'n nb'inchaye' te Seb'oyim? ¡Inlaqjwe' nk'u'j kyi'je', ex nche exch'yone' toj nk'u'je'!⁹Lay tzajtl ntx'u'jile' kyi'je': lay che kub' nxitu'ntle', qu'n ayine' Dyos Manb'aj, mya jun xjal qine', Xjan qinwe' ex atinqine' kyxole', ex min ẍinule' xitulkyeye'.

¹⁰Kchin tzanule' kse'n jun b'alun, aye'tzunkye' che nimale' weye'. Kchin tzanule', che b'ju'ltzuntze' nxi'x che lu'lune' ajkytzaje' te tkub'exq'ij nwitze'.

¹¹Naku'j pich' qe'ye' nche lu'lune' ajkytzaje' Ejipt; naku'j xu'ch qe'ye' ajkytzaje' Asirya; che najal jumajtle' toj kyjaye' wu'ne'. Ayine' Dyos Manb'aj nchin yolin. Kyil ttanam Dyos¹²Matxi'xi'x che chanyole' weye' Eprayin; matxi'xi'x chin kub'kysb'u'ne' Israel. Ikx qe'tlkye' aj Juda matxi' tz'el kypa'n kyib'e' wi'je', qu'n inxi'x che k'ulune' kywitz witzleb'.¹Tu'n kyq'iq' nnoja' Eprayin: tkyaqil q'ij lepchix ti'ju' kyq'iq' te tjawetzq'ij. njaw chmet tchajyolil ex tq'oji'n, nkyaj b'entti'j tyol tuk'i'l Asirya ex nxit-sma'n toyaj aseyt te Ejipt.

²Kq'ojil Qman Dyos ti'j Israel. Kb'el ttz'e'ysa'n twitz ttanam Jakob' tu'n tpaj myab'a'n tchwinqlal; kb'el tchjo'n kse'nxju' tb'inchb'aj.³Tej na'mxtoq titz'ji Jakob' tzyetju' tuẍil tqan ttzik tu'n, tetzunj matxi'toq ichamix b'ujun tuk'i'l jun anjl.⁴B'ujun tuk'i'lju' anjl ex kub'ti'j tu'n; oq' ex xitkub'sa'n te tu'n ttzaj laqj tk'u'j ti'j. Kub' tyek'u'ntib' Dyos twitz toj B'etel ex yolin Dyos tuk'i'l atzu'.⁵A Qman Dyos nimtipumal: ¡ex a tb'iju': Qman Dyos!⁶Aj Israel, kutanjtz kyi'je' tuk'i'l Dyos; kyb'inchame' b'a'n ex toj tzinun, qek kyk'u'je' kukxu' ti'ju' kydyose'.

⁷Chi Qman Dyos kjalu: Min tz'aqli kymalb'il aj Kanaan, qu'n majx kgan tu'n kyelq'an.⁸Aye'tzuntlkye' Eprayin inkyma'ne': ¡Matxi' qo q'inumaxe', matz'okyal jun qq'inumale'; mix-a'lo'te kpoq'il qi'je' qa ati qile' tu'n qkanb'ab'le' toj sb'ub'l!, chechiye'.⁹Ayine' Dyos Manb'aj Kydyose' ttzajlenx tej ate'toqe' Ejipt, kche najal jumajtle' wu'ne' kyoj pach xb'alun, kse'nx tej kyb'ete' toj chq'ajlaj.

¹⁰Nyolinwe' kyeye' toj kytzi nsanjelale' ex nim xb'ajx nyek'une' kyeye', toj kytzi nyolina'ye' kyuk'i'l techlal kyeye'.¹¹Ate' junxi'tl dyos toj Kalaad, extzun mya dyosqe'. Nche kub' q'o'n chojb'il tman wakx toj Kilkal; ikyqe' kyq'olb'eb'l kse'n ch'uq ab'j kyxolile txol awal toj kojb'il.

¹²Xi' oq Jakob' toj tx'otx' Aram, ex atzu' aq'unana' k'ik'lel rit tu'n tkanb'et t-xu'jil.¹³Etzti'n Qman Dyos tnam Israel toj Ejipt tu'nel jun t-sanjelal; ¡e't-xq'uqi tu'nel t-sanjelal!

¹⁴Matxi' tz'ok kyq'o'n aj Israel ttx'u'jil Qman Dyos, matxi'xi'x tz'ok kyq'o'n jun tk'ayil te. Qu'mtzun kb'el ttz'e'ysa'n Qman Dyos kywitz tu'nju' kyb'inchb'en myab'a'n, ex kb'el tz'aqju' kyb'inchb'en taq'wix kyib'aj. Tej tkub' xitj Israel tkyaqil¹Tej intoq che yolin tyajajil Eprayin, nima'ntoq kyyol kyu'n txqantl tnej tyajajil Israel; tu'ntzun tpaj ek'ulun te B'aal, eb'inchan il twitz Qman Dyos ex e'kyim.²¡Ex kukx kyb'inchan ilju'! Nkub' kyb'incha'n kysaqpwaq te kywitzleb' kse'nx nkub' kyxima'n b'inchalte. Inkyma'ntzuntz: ¡kyq'onku'tzun chojb'ile' kywitz ja'lo! chechij, aye'tzu'n xjal nche okkyma'tzi'n witzleb' wakx che ka'yin.³Qu'mtzun kche okyel kse'n muj te prim, ex kse'n ta'l che'w te b'a'n prim, texu' kmuj nkub'naj, kse'n ttxa triy naq nxitiqa'n kyq'iq', ex kse'n sib' nnex toj telex sib'.

⁴Chi Qman Dyos kjalu: Ayinwe' Kydyose', atxi'x ate'xtoqe' Ejipt: Lalun tz'ok kyq'o'n juntle' te Dyos nwitze', qu'n o'qinkxwe' klolkyeye'.⁵E'nxq'uqiye' kyoju' tx'otx' nche tanton toj chq'ajlaj.

⁶Atzu'n tej min xb'ajtl kywateye' matz'okxten nimjtib'il toj kyanmiye' ex matzik' nna'le' kyu'ne'.⁷Qu'mtzun chin okyile' kse'n b'alun kyeye' ex kse'n jun tx'u'jb'alam nk'utzin ti'j tchi' toj b'e.⁸Chin nelixe' mqolkyeye' toj b'e kse'n jun ttxu oso matoq che'x tzpet tal, ex kb'ajel nẍilu'ne' kyanmiye'. Kse'n jun b'alun, axtzu' nche b'ajtch'yo'na'; kse'n jun txkup ajtb'aj ttzaqi'n tchi'.⁹Che kb'el nxitu'ne' Israel, ex mix-a'lo' kklolkyeye' toj nq'ob'e'.¹⁰¿Jatzunta' kynimaqkawile' ja'lo, tu'n tkolon kyoj kykyaqil nimaqkytaname'? ¿Jatzun ta'qe' nejenel kyeye' Jaxa' kyqanine' kynimaqkawile' ex kynejele'?¹¹Tzaj ntx'u'jile' kyi'je' tej txinq'o'ne' kynimaqkawile' ex tzaj ntx'u'jile' kyi'je' tej kyel wiq'i'ne'.

¹²Tz'ib'a'ntlte' toj jun u'j tkyaqil taq'wix xtb'incha Eprayin.¹³Matxi' pon kmuj tu'n kyitz'je' Israel, naq aju' ikyqe'ju'ye' kse'nqe' k'wal xnak min nb'ent kyten b'a'nxi'x tu'n kyul itz'ji.¹⁴¿Ma inxtzun che ayone' Qa che nkla'ye' te tipumal kamik? ¿Jata' tipumala te xitul, kamik? ¡Kutzaja xitulteju' tnam lay laqtlwe' nk'u'j kyi'je'!¹⁵B'a'n qama che b'echantle' Israel kse'n itzaj, tzulu' kyq'iq' toj tjawetzq'ij, aju' kyq'iq' kuw njub'in toj chq'ajlaj, che tzqijelju' t-xiklil a' ex che najelju' nin a' tu'n. Tzulju' kyajq'oje', che b'je'lex tiq'i'n tkyaqil kyk'uwene'.¹⁶Kb'el ntz'e'ysa'n kywitze' aj Samarya tu'n tpaj sel kypa'n kyib'e' wi'je'. Kche b'ajele' tu'n k'uẍtx'e'nb'il, che b'eltzeq'u'n kyk'wale' twitz tx'otx' ex kb'je'lex k'ab'cha'n kk'u'ju' qya ch'o'nwi'qe' toj nky'ajchaq. Txokb'il tu'ntanjtzkyi'j aj Israel tuk'i'l Dyos¹¡Kutanjtz kyi'je' Israel tuk'i'l Qman Dyos, mache kub' tz'aqe' tu'n tpaj kyile'!²Kutanjtz kyi'je' tuk'i'l Qman Dyos. Ex kymanxe' lu toj kyna'j Dyose': Najsanku'ya tkyaqil qile' ex k'moma ninb'il nxiqq'o'ne' teya tu'n tkyaqil tk'uja.³Lay qo kletqe' tu'n Asirya expe' lay b'ent qojqe' ti'j chej. Lay che okqq'o'ntlqe' qb'inchb'aj tu'n qq'ob'e' te Qdyose', qu'n o'kx tuk'i'la Nman Dyos, nkneta' q'uqb'ab'l tk'u'j meb'a, chechiku'ye'. Tma Qman Dyos tu'n tk'i'wlante Israel⁴Chi Qman Dyos: Kche nq'ana'ye' toj kypi'sile'; Kche nk'u'jla'ye' maskye myab'a'n qe'ye' weye', qu'n matxi' tz'el ntx'u'jile' kyi'j.⁵Chin okyele' kyeye' Israel kse'n ẍmu's, atzunkye' kche b'echile', kse'nqe' b'ech liryo. kche okyelu' kylok'e' kuw kse'n witz Lib'ano;⁶okxi'x che ch'iyel tq'ob' tb'anilqexi'x kse'n tq'ob' tze olib' ex iky tk'ok'jal kse'n k'ute toj Lib'ano.⁷Che najaltle' tjaq' kolb'ilkyeye' wu'ne'; kche ch'iyeltzuntze' kse'n triy, kche b'echale' kse'n tqan lob'j ub'a ex che okyele' b'a'n kyolinjtze' kse'n b'in toj Lib'ano.⁸Kkyma'tzuntze' Eprayin kjalu: ¿Mixti'tlqe' tajb'en witzleb' qe? ¡Ayinwe' chin ka'yilte ex chin xq'uqilteju' ntaname'! Ikyqinwe' kse'n junwi' tzaj kukx ttenju' cha'x, ex atzuntzu' che witzalaju' ntaname' wu'ne'. B'ajsb'il⁹Aye' ati kynab'l ex k'atzqe' tu'n telkynik' ti'ju' yol lu: Tzinun qe'kye' tb'e Qman Dyos, ex aye' tnik'alkyi'j nche b'et toj; aye'tzunkye' b'inchal il nche' jaw tz'aq toj.

Bible Society in Guatemala

https://app.library.bible/content/aea9d9099feb3a24