Santiago1
1Ayine' Santyay, tmajin Dyos ex tmajin Qajaw Jesukrist qine', nche'x nq'olb'e'ne' kab'lajoj tnej tyajajil Israel najliqe' toj tkyaqil twitz tx'otx'. A Dyos ntzaj q'onte qnab'l2E'ntzik ex e'witz'in, che tzalajxe' qama che oke' toj chukchaq joyb'ilkyi'je'.3Kanlitl kywitze' qama jyonjtz kyi'je' toj kyokslab'le', ntenxi'xtl kyipumale' tu'n tik'xju' yajb'il kyu'ne'.4Naq o'kx kyq'onk tilile' tu'n tten kypasense', tu'n tten kynab'le' ex tu'n kyoke' tnik'alkyi'je', tz'aqli qe'ye' toj kyokslab'le'.5Qati junkye' mixti' tnab'l, qaninx te Dyos, ate Dyos ktzajel q'onte; min nkub' txk'a'yu'nte Dyos kye kykyaqil xjal ex min ntzaj tpeju'ntl qplaj.6Naq o'kx qani'nx tuk'i'l tokslab'l, lalun jawje tk'u'j, qu'n aju' njawje tk'u'j iky nela' kse'n ttolob' ninnjab' nxi' iqa'n tojun plaj ex tojun plajtl tu'n kyq'iq'.7Atzunju' xjal iky tokslab'lju' kse'n ttolob' ninnjab', lalun tma qa ktk'ma'ju' ntqani'n te Qajaw,8qu'n aju' xjal junxi' t-xim ja'lo ex junxi'tl nt-xima'n najchi'j, naqx nmiltz'nje.9Qa ati jun okslal ch'i'n toklen kyxole' ati tu'n ttzalaj tu'nju' ati toklen twitz Dyos;10qatzun ati jun q'inun, ati tu'n ttzalaj qama kub' me'ssa'n tu'n Dyos. Qu'n ikyte q'inun kse'n tb'echal k'ul naq ch'i'ntoj nten.11Ajtkub' tz'e'y twitz tx'otx' tu'n q'ij, nche kub' tzqiju' k'ul, nkub' tz'aqu' tb'echil ex nkub'aj. Ikytzun q'inunju' nkub' b'aj tk'ixi' tq'inumal.12Ky'i'wla'nte' xjal in ik'xtu'n toj joyb'ilti'j, qu'n qama tzik'xtu'n, ktkanb'a' chwinqlal, aju' koron tziya'ntl tu'n Dyos kyeju' nche k'u'jlante.13Qa ati jun majyonjtzti'j tu'n tb'inchante taq'wix, lalun t-xima qa a Dyos njyonteti'j tnab'l, qu'n lay b'ent tokte Dyos toj joyb'ilti'j ex min ntjyo'nti'j jun xjal tu'n tb'inchante myab'a'n.14Tu'nxte' npon tk'u'j xjal ti'ju' myab'a'n noka' toj joyb'ilti'j, naku'j nxmoxonjtz ex nsb'et tu'n tb'inchante myab'a'n.15Tu'ntzu'n tajb'il tchib'jil nb'inchan il, ajtzun tch'iyju' til, ntzajtzun kamiktz.16E'ntzik ex e'witz'in, lalun kyaq' sb'u' kyib'e':17tkyaqilte' b'a'n ex ttzinunalxi'x a Dyos ntzaj q'onte qe, aku' Dyos b'inchankye che'w twitz kya'j. Axte Dyos ati kukxju', min ntch'exb'e'nte Dyos tnab'l ex mikxa' kse'n leku'n.18Tu'ntzu'n a tajb'il Dyosju' tu'n qok te tk'wal, matzaj tq'o'n qchwinqlal ak'a'j tu'nelju' tpakb'al b'a'n axxi'x, tu'ntzun qok tnejel okslal kyxolju' ak'a'j tch'isb'en. Tu'n tb'inchetju' ntma'n tyol Dyos19E'ntzik ex e'witz'in, kyb'inku'ye' kxe'l nma'ne' kyeye': kykyaqile' lwiyxi'x kyb'inku'ye' yol; lalun che jawnaj yoline' ex lalun che jawnaj kyaqb'iye'.20Qu'n aju' xjal nq'ojin lay b'ant tb'inchante tajb'il Dyos.21Kyq'onkje' tkyaqil myab'a'n matxi' chmet twitz tx'otx', ex kyk'mome' tyol Dyos toj me'sb'il matxi' pakb'et kyxole'; qu'n ati tipumal tyol Dyos lu tu'n kyklete'.22Kyb'inchanxe' ntma'n tyol Dyos, mya naqx tu'n tik' kyb'i'ye'; qatzun min, aye'xe' nkub' kysb'u'n kyib'e'.23Alkyete naq nik'tb'i' tyol Dyos ex min ntb'incha'n, ikyte' kse'n xjal nok tka'yi'n twitz toj lispej:24nok tka'yi'ntib', ajtzun tik'b'et, lwiyxi'x nik'tna'l tu'n se'ntoqju' twitz.25Atzunte' nkub' tb'i'n tkawb'il Dyos te tzaqpib'l tnik'alxi'xti'j ex nxitb'incha'n, mya naqnik' tb'i', k'i'wla'n toj tkyaqilju' ntb'incha'n.26Qa ati jun okslalxi'x toj twitz extzun min ntjk'u'n taq', naqx nt-sb'u'ntib' ex mixti'x tajb'en tokslab'l.27Ate okslab'lju' b'a'n ex ẍtilun twitz Qman Dyos aju': tu'n kyonet meb'a exqe' qya kyimni kychmil toju' yajb'il nik'xkyu'n, ex tu'n lalun qtz'ilsatlqib' toju' il twitz tx'otx'. Junilex kyilwi xjal kyu'ne'1E'ntzik ex e'witz'in, matxi' che okslane' te Qajaw Jesukrist, lalun junjunwt xjal kye tilwi kyu'ne' atzun junjuntl ik'o'nwt kyu'ne'.2Qawt matz'okx jun xjal q'inun toj chmab'lkyib'e', tok t-xmilq'ob' q'anpwaq ex tb'anil t-xb'alun, ex ma'wt tz'okx jun prow ttx'anqa'nqe'tl t-xb'alun,3chab'axi'xwittzun nokx kyiq'i'ne' q'inun ex nxikyma'ne' te: Qeku'ya tzalu, lu jun b'a'n q'uqb'il lu, chechiwte' te, atzunte' prow: we'ku'ta na'tz, mujqa qeku'ya twitz tx'otx', chechiwte' te,4myatzun junelni kyilwi xjaltz kyu'ne' kyxole' ex nche yoline' tuk'i'l kynab'le' myab'a'n.5E'ntzik ex e'witz'in, kyb'inkupe'ye': Mache jaw t-sk'o'n Dyos prowqe' twitz tx'otx', tu'n kyok q'inun toj kyokslab'l ex tu'n kyetzante kawb'il ttziya Dyos tu'n ttzaj tq'o'n kyeju' nche k'u'jlante;6aye'tzunkye' nche elkyik'o'ne' prow. ¿Mamyaqetzu'n q'inun nche alq'an kyi'je', ex nche'x q'inkyeye' kywitz tzyul kawb'il?7¿Mamyaqetzu'n q'inun nche xmayin ti'ju' tb'i Qajaw tzaj na'n kyib'aje'?8B'a'n nkyb'incha'ne' qama japun tkawb'il Dyos nimxi'x toklen kyu'ne' kse'nx ntma'n toj tu'jil kjalu: K'u'jlama twnaqila kse'nxta ntk'u'jla'n tib'a, chij.9Qatzun mya junile kyilwi xjal kyu'ne', nche b'inchan ile', ex nche ik'e' tib'aj tkawb'il Dyos.10Qama japun tkyaqilju' kawb'il tu'n jun xjal, naqtzun tu'n juntl chaq'b'il min xjapun tu'n, ati til kyi'j kykyaqil chaq'b'il toju' kawb'il.11Qu'n axte Dyos q'mante kjalu: Lalun tz'ajpajina, chij, ex tma: lalun b'yon xjala, chij. Qu'mtzun qa min sajpajin jun xjal, extzun ma b'yon xjal, matxi' tzik' tib'aj kawb'il.12Che yolinqe'ye' toj tu'me'l ex kyb'inchame' b'a'n, qu'n che okyele' toj xjel kse'nx ntma'n kawb'il nq'onte tzaqpib'l.13Aye'kye' min nlaqj kyk'u'j kyi'j txqantl, lay tzaj laqj kyk'u'jlalil ajtul tz'e'ysb'il witzb'aj, aye'tzunkye' nlaqkyk'u'j kyi'j txqantl, che kanb'al toju' q'ij ajkyok toj xjel. Qokslab'l ex qaq'unb'en14E'ntzik ex e'witz'in, ¿titi' tajb'en qa ati jun ntma'n qa ati tokslab'l, extzun min ntb'incha'n b'a'n? ¿Ma oktzun kletel o'kx tu'n tokslab'l?15Qatzun ati jun qtzik mo qitz'in, mo qanab', mixti' t-xb'alun ex mixti' twa te junjun q'ij;16txi'wtzun tma'n junkye' te kjalu: B'a'nwt che'xa'ye'; kyktxum kyib'e' ex kywanxe' tkyaqilju' kyajb'ile', qa chi, extzun min nxitq'o'nju' nojqelan te. ¿Titi' k'ajb'ela' tyol teju' ati nnojqelan te?17Ikytzun qokslab'lju': qa mixti' taq'unb'en b'a'n, kyimni.18Jaku' tma jun: Ati tokslab'la, atzunwe' ati waq'unb'ene'. Yek'uma tokslab'la mitzajxa' taq'unb'en; atzunwe' kxel nyek'u'ne' wokslab'le' tuk'i'l waq'unb'ene' b'a'n, chilo.19Intoksla'na qa jun Dyos ati, b'a'n ntb'incha'na ikyju'; naqtzun aju' ikyqe'x tajaw il nkyoksla'n qa jun Dyos, ex nche lu'lun tu'n kyxob'el twitz.20Tz'elx tnik'a ti'j, maskye ati tokslab'la ex q'uqli tk'u'ja ti'j Dyos, extzun min ntb'incha'na b'a'n, mixti'x tajb'en.21Tk'am Dyos ojtxi' qyajilb'en Ab'raam, ku'xwitloj tnik'alti'j tu'nju' tb'incha, tej tkub' tq'o'n Isaak ju' tk'wal te chojb'il.22Q'ancha'l tokslab'l Ab'raam tu'nju' tb'incha, ex tu'nju' tb'incha tzqeta' tokslab'l.23Ikytzu'n japuna' tyol Dyos ntma'n: Okslan Ab'raam te Dyos, qu'mtzun k'meta' tu'n Dyos ku'xwitloj tnik'alti'j, chij. Ikytzu'n ok Ab'raam te tamiw Dyos.24Tz'elxtzun kynik'e' ti'j, mya o'kx tu'n maqo okslan nqo k'meta' tu'n Dyos, ex ikx tu'n nqb'incha'n b'a'n.25Ikx Raab', ju' qya q'o'ntoq tib' toj ajpajil; k'met tu'n Dyos ku'xwitloj tnik'alti'j, qu'n e'tk'amju' sanjelal toj tja ex e'etz tchq'o'n toj juntl b'e.26Ikytzu'n, kse'n jun xjal mixti'tl tanmi, kyimnitl, ikytzun okslab'lju' qa mixti'xte ntb'incha'n b'a'n, kyimni. Titi' najb'ena' qaq'1E'ntzik ex e'witz'in, lalun tz'ok kyq'o'n kyib' txqanxi'x te xnaq'tzal kyxole', qu'n aye' xnaq'tzal che okyel kuwxi'x toj xjel tu'n Dyos kyekywitz txqantl.2Qkyaqil nqo eltxalpuj; qatzun intjk'u'n taq' ex min neltxalpuj toju' tyol, tnik'alte'ti'j, ex nb'ent tjk'unte tib'.3Njk'et jun chej qu'n qama tz'okx qq'o'n k'uxb'il toj ttzi tu'n tb'in qe.4Ex ikxqe' b'ark: maskye nimaqqe' ex nim kyq'iq' nxilmunkye, nb'ent kyxiq'i'n kyu'n xyotx'ilkye jakyab'ila' tu'n jun tal b'o's xqutz'b'ilkye.5Ikyxtzun qaq'ju'; jun piẍ tal b'o's te qxmilal, extzun nimaq ti'xti' jaku' b'ant tu'n. ¡Jun tal b'o's q'aq' jaku' b'aj txqan nimaq k'ul tu'n!6Ikytzun qaq'ju' kse'n q'aq', tal b'o's ti'j qxmilal, nojni tu'n taq'wixil, majx nqo tz'ilix tu'n. Jaku' qokub'o'lj toj il tu'n ex jaku' qo'x tq'o'n toj q'aq'.7Nkub'kyi'j kykyaqil tojk'ul txkup tu'n xjal, e'pich', e'kan ex txkup toj ninnjab', ex nche ok mans tu'n;8atzu'n qaq' mix-a'lo' nkub'sante ti'j. Taq'wixi'x min ntq'a' jk'u'tib', nojniti'j tu'n b'iyb'il.9In qajwali'n Qman Dyos tu'n qaq', ex tu'nxju' qaq' nche qili'na' xjal e'tb'incha Dyos kse'nx tilb'ilal.10Tojx qtzi nche etza' yol b'a'n ex yol myab'a'n. E'ntzik ex e'witz'in, myab'a'nju' nb'inchet lu.11Lay b'ant axwit jun t-xiklil a' tu'n tetz a' b'a'n tk'wanjtz ex a' k'a toj.12Kse'n tqan iw lay tz'el aseyt ti'j, ex lay tz'el iw ti'j tqan ub'a, ikyxtzu'n e'ntzik ex e'witz'in, lay tz'etz a' b'a'n tk'wanjtz toj jun t-xiklil a' pitz'moj. Aju' nab'l axxi'x13Qa ati jun kyxole' ati tnab'l ex nkane toj twitz, tz'anq'in toj tu'me'lxi'x ex tu'n tyek'u'nte kyu'n tb'inchb'en b'a'n, ex tu'n tok me's tu'nju' ati tnab'l.14Qatzun inxi'x tx'a'lti'j kyk'u'je' ti'j juntl, exqa nkyb'incha'ne' junjun ti'xti' tuk'i'l q'oj, mixti'xtzun tu'n kymantetze' qa ati kynab'le' ex min nkyma'ne' ax.15Qu'n mya Dyos ntzaj q'onte kynab'le', te twitz tx'otx'te', kynab'l xjal ex te tajaw il.16Qa ntx'a'lti'j kyk'u'je' ex nche q'ojine' ti'j juntl, mya tu'me'l nche anq'ina'ye' ex tkyaqil taq'wixil ati kyxole';17aye'tzunkye' ati kynab'l ntzaj tq'o'n Dyos, b'a'n nche anq'ina'; expe' min nche q'ojin, b'a'n xjalqe' ex b'a'n che niman. Nlaqj kyk'u'j ti'j juntl, min nok kyq'o'n kyib' kyuk'i'l txqantl ex ax che yolin, b'a'n nkyb'incha'n.18Aye'tzu'n noktilil kyu'n tu'n kyten xjal toj nak'b'il, nkub' kyq'o'n nak'b'il tu'n kyanq'in xjal tnik'alilti'j. Tk'u'jlalil achb'il te twitz tx'otx'1¿Tiqu'ntzun ati q'oj ex b'uju'n kyxole'? Axju' kyachb'ile' myab'a'n nq'ojin kyi'je' toj kyxmilale'.2Npon kyk'u'je' ti'j nim ti'xti', ex min nknet kyu'ne', intzun che b'yon xjaltze', ex inoktilil kyu'ne' tu'n tkub'ti'j juntel ex nche q'ojine' ti'j. Min nknetju' kyajb'ile' qu'n min nxikyqani'ne' te Dyos;3qatzun ma txikyqani'ne', lay tzaj q'o'n kyeye', qu'n mya toj tu'me'l nxa' kyqani'ne', kyajb'ile' tu'n tb'aj kynajsa'ne' te kyachb'ile'.4¡Ikyqe'ye' kse'n jun qya ajpajil! ¿Ma min b'i'n kyu'ne' qama quk'i'la qib' tuk'i'lju' taq'wix te twitz tx'otx', nqo ok ajq'oj ti'j Dyos? Alkyete matk'u'jla achb'il te twitz tx'otx', inok ajq'oj ti'j Dyos.5Axte' ntma'n toj Tu'jil kjalu: Inxi'x qotk'u'jla'n Xewb'aj Xjan tzaj tq'o'n Dyos toj qanmi, chij.6Inxi'x qo tonite' Dyos tu'n t-xtalb'il, qu'n intma'n toj Tu'jil: Nq'ojin Dyos kyi'ju' nkynima'n kyib', aye'tzu'n me'sqe' nche tk'u'jla'n, chij.7Qu'mtzun kyq'om kawi' kyib'e' te Dyos. Che we'ke' twitz tajaw il, k'elel oqte' kywitze'.8Che lq'eke' tk'etz Dyos, ex ktzajel lq'ete Dyos kyk'etze'. ¡Kytxjomil kyq'ob'e' aj il! ¡Kyẍtilsam toj kyanmiye' aye'ye' kab'e' kyk'u'je'!.9¡Che b'isunqe'ye', che oq'e' ex che jiq'chane'! ¡Tz'okxwit kytze'ye' te oq'el, ex tz'okxwit kytzalajb'ile' te b'is!10Kyme'ssanku' kyib'e' twitz Qman Dyos, che jawiltzun nimsa'ntze' tu'n. Lalun qo yolin kyi'j qtzik mo qitz'in11E'ntzik ex e'witz'in, lan che yoline' myab'a'n ti'j juntl kyxole'. Alkye nyolin myab'a'n ti'j juntl mujqa intma'n qa taq'wix, nyolin myab'a'n ti'ju' kawb'il ex ntma'n qa taq'wix. Qatzun nyolina ti'ju' kawb'il, noktq'o'n tib'a ajkawil tib'aj, mya inwt tq'a' kawi' tib'a te.12O'kxte Dyos tzaj q'onte kawb'il qe ex axte ajkawil, ate kkolol mujqa tu'n tkub' ttz'e'ysa'n qwitz; ¿yajtzunta, titi' toklena nyolina ti'j twnaqila? Min b'i'n qu'n qa itz'qo'x najchi'j13Kyb'intztzune' ja'lo, aye'ye' nkyma'ne': Qo xe'l ja'lo mo najchi'j toju' nintnam lu, qo tenb'el jun ab'q'i na'tz, kb'elqq'o'n qk'a'ẍ tu'n qkanb'an qpwaq, chechiye',14¡extzun min b'i'n kyu'ne' titi' kb'ajel kyeye' najchi'j! Ikyqe'nakyeye' kse'n jun tal muj njaw b'ent te junkmuj ex nkub'najtel.15Ate b'a'nju' tu'n kymanteye' kjalu: Qa tajb'il Dyos, qo anq'il ex qb'incha' lu mujqa juntl, chechiku'ye'.16Aye'tzunkye' nxi'x che yoline' ex njaw kynima'n kyib'e'; myab'a'nte' tkyaqilju' nimjtib'il na'j.17Aju' xjal b'i'n tu'n alkyeju' b'a'n extzun min ntb'incha'n, ati til. Oqxenb'il kyeju' q'inun1¡Kyb'intzju'ye' lu, aye'ye' q'inun! ¡Che oq'e' ex che uxine' tu'n tpaju' xitb'il tzul kyi'je'!2Che q'ayjel kyq'inumale'; che b'ajel wan tb'anil kyxb'alune' tu'n pok'.3Che b'ajel plutin kyq'anpwaqe' ex kysaqpwaqe', atzunju' plut lu in techla'n kyi'je', che b'ajele' naku'j tu'n q'aq'. Mab'aj kychmo'ne' txqan kyq'inumale' toju' tq'ijlalil lu, extzun a mankb'il q'iju'.4Kpeyul kyi'je' tu'nju' min kychoje twikyk'u'j kymajine' e'aq'unante kyawale'; matxi' tb'i Qajaw tq'ojq'ojel kywi' majin lu.5Tb'anilxi'x matxi' che anq'ina'ye' twitz tx'otx' ex mache achune', ma'xi'x kyk'a'cha kyib'e' kse'nqe' alu'mj nb'je'tz kywitz tu'n kykub' b'yet.6E'xikypoqo'ne' xjal mixti' kyil ex e'kub' kyb'yo'ne', min nb'ent kyklonte kyib'. Tenku' kypasense' tk'i na'j Dyos7E'ntzik ex e'witz'in, che ayonqe'ye' tzmax ajtul Qajaw. Kse'n aq'unal toj kojb'il ntayo'n ajtjaw tchmo'n tb'anil twitz tawal, intayo'n ajtetz jb'alil ex ajtanjti'j jb'alil.8Ikxtzunkyeju'ye' tenku' kypasense' ex kykuwsam kyib'e', qu'n matxi' tzul lq'e tq'ijlalil tu'n tul Qajaw.9E'ntzik ex e'witz'in, lalun che yoline' myab'a'n ti'j juntl, tu'n lalun che okye' toj xjel; qu'n lute Ajkawil ati ttzija.10E'ntzik ex e'witz'in, kyknome' kyi'ju' t-sanjelal Dyos e'yolin toj tb'i Qajaw ojtxi', ten kypasens ex ik'xkyu'n toj yajb'il.11Ky'i'wla'nqexi'x, qu'n e'kuwan ex ik'xkyu'n toju' yajb'il. B'i'ntl kyu'ne' tkyaqilju' yajb'il ik'xtu'n Job', exju' xtalb'il tb'incha Dyos te yajxi'tl, qu'n nxi'x laqjte Dyos tk'u'j ex nq'aq'an tk'u'j qi'j.12A ilxi'xti'ju' e'ntzik ex e'witz'in, lalun tzaj kytxko'ne' kya'j mo tx'otx', mo juntl ti'xti', ajkymante jun kyole', qa ikyju', ex ikyju'; qatzun mikxa'ju', ex mikxa'ju', tu'ntzun lalun che'x q'o'ne' tu'n Dyos toj tz'e'ysb'il witzb'aj.13Qa ati jun kyxole' nb'isun, q'onkutib' toj na'j Dyos. Qa ati jun ntzalaj, ajwalim tb'i Dyos kyu'n b'itz.14Qa ati jun yab', txkon qe'mju' tijwnaq kyxol okslal, tu'n kyna'n Dyos ti'j ex tu'n tok kysun aseyt ti'j toj tb'i Qajaw.15Qa q'uqli kyk'u'j ti'j Dyos ajkyna'n Dyos, kq'anetelju' yab', ate Qajaw kjawil wab'ante; qatzun ati il ojetoq tb'incha, kb'el najsa'n til tu'n Dyos.16Qu'mtzun kypa'nktz kyile' kyxolilexe', ex che na'nqe Dyose' kyi'je' kyxolilexe' tu'n kyq'anete'. Nimte' nb'ant tu'n tna'j Dyos okslal tnik'alti'j.17Ikytoqte Eliy t-sanjelal Dyos kse'n ayo', tetzunj tna'n Dyos q'uqlixi'x tk'u'j ti'j Dyos tu'n lalun tzaj jb'al, oxe' ab'q'i tk'i' nik'jan min tzaj jb'al.18Tetzun tna'n jumajtl Dyos, tzajtzun jb'altz ex jaw tawalju' tx'otx'.19E'ntzik ex e'witz'in, qa ati jun kyxole' matz'el txalpuj ti'ju' ax, exqa matz'anjtz anjsa'nti'j tu'n juntl okslal,20tz'elx kynik'e' ti'j qa alkyexku' matz'anjtz anjsante ti'j jun aj il toju' tb'e myab'a'n, kkletel aj il tu'n te kamik ex tkanb'a' tu'n kykub' tnajsa'n Dyos txqan tilju' aj il.
Bible Society in Guatemala