Hebreos 1 पढ़ें

Hebreos1

Yolin Dyos tu'nelju' Tk'wal

¹B'a'npun maj yolin Dyos ojtxi' kyeju' qyajilb'en ex yolin toj chukchaq tu'me'l kyu'nelju' t-sanjelal.²Atzu'n toju' mankb'il tq'ijlalil ja'lo, mayolin qe tu'nelju' Tk'wal, ex tu'nelju' Tk'wal kub' tb'incha'na' tkyaqilju' twitz tx'otx' exju' kya'j, ex axju' Tk'wal sok tq'o'n etzilte.³Intqoptz'a'n K'walb'aj t-spik'umal Dyos ex tipumal, qu'n axju' K'wa'lb'aj tilb'ilal Dyos ex tu'nju' tyol tzyu'na' tkyaqilju' ati twitz tx'otx' ex twitz kya'j. Qb'ajlenxi'tzun txjet tu'n toj qil, kub' qe toj tb'a'nq'ob' Dyos toj kya'j. Nimxi'x toklen Tk'wal Dyos kyekywitz anjl

⁴Nimxi'x toklenju' Tk'wal Dyos kyekywitz anjl, qu'n nimxi'x toklenju' tb'i oktq'o'n Dyos kyetwitz kyb'i anjl.⁵Qu'n mixti' xitma'nte Dyos te jun anjl kjalu: Aya Nk'wale'; Ayine' ẍinx q'onte tchwinqlala, chiwt.
Ex mixti' tma ti'j jun anjl kjalu: Ayine' chin okyel te tman, atzunte k'okyel te nk'wale', chiwt.

⁶Tetzunj ttzaj tq'o'n Tk'wal twitzju' tx'otx' lu, tma kjalu: Ati tu'n kyk'ulun kykyaqilju' anjl twitz, chi Dyos.

⁷Atzu'n kyi'ju' anjl tma Dyos kjalu: Che okyel nq'o'ne' anjl kse'n kyq'iq', ex che okyel nq'o'ne' ajb'el kse'n q'aq', chi Dyos.

⁸Atzu'n ti'ju' Tk'wal intma'n kjalu: Milo b'ajela' tkawb'ila, Dyos, ex nkawina tojxi'x tu'me'l.⁹Ma tk'u'jlaya tnik'alilti'j ex matz'el tik'una myab'a'n; qu'mtzun ma sk'onjtza tu'n Dyos Tdyosa, ex tzalajb'ilxi'x ta'ya tu'n kyekwitzju' tuk'ila, chi Dyos.

¹⁰Ex ikx intma'n: Taye, aya kub' b'inchante tq'uqb'il tx'otx' atxi'x t-xe tnejel; ex aya kub' b'inchanteju' kya'j.¹¹Tkyaqiltzu'n tb'inchb'ena lu kche najel, atzunta ktenb'ela kukxju' tejumajx. Kykyaqil che b'ajel kse'n xb'alun inb'aj;¹²¡kche b'eltb'altz'i'na nakuj jun xb'alun, kche ch'ixpetel tu'na nakuj jun ch'ix xb'alun! Atzunta kukx ttenju'ya tejumajx; ex mixti'x b'ajsb'il teju' tchwinqlala, chi Dyos.

¹³Mixti' junmaj tmate Dyos te jun anjl kjalu: Qeku'ya ntx'u'kye' toj nb'anq'ob'e', tzmax ajkykub' nq'o'ne' tajq'oja tjaq' tqana, chiwt.

¹⁴Qu'n kykyaqilkye' anjl xewb'ajqe' ex inche ajb'en te Dyos, ex inche tzaj chq'o'n tu'n Dyos onilkyeju' nche k'monte kolb'il. Nimaq toklenju' kolb'il saj q'o'n qe

¹Qu'mtzun ati tu'n tok tenxi'x qnab'l ti'ju' yol matxi' qb'i, tu'ntzun lalun tz'el qpa'nqib' ti'j Dyos.²Nimxi'xpena' toklenju' chaq'b'il kyma anjl ojtxi', aye'tzu'n mixti' xikynima'n ex eb'jik' tib'aj, kub' tz'e'ysa'n kywitz tojxi'x tu'me'l.³¿Yajtzunqe, se'ntaq'wi tu'n qtzaqpaj teju' tz'e'ysb'il witzb'aj, qama kyej qtzaqpi'nju' kolb'il nimxi'x toklen? Qu'n aku'te Qajaw pakb'ante tqanil ti'j kolb'il tnejelxi'x, aye'tzu'n eb'inte kyma qa axxi'xju' yol lu, ex aye' ẍekyej q'onte qe.⁴Ex aku'te Dyos tzaj kuwsantexi'x qa axju' yol tzaj tma'n qe kyu'n techlal, kyu'n tb'inchb'en tb'anilxi'x ex txqan b'a'nq'ob'aj b'ent tu'n Xewb'aj Xjan toj chukchaq tu'me'l, kse'nxju' tajb'il Dyos. Ikyte Jesukrist kse'n qtzik

⁵Qu'n min tmate Dyos kye anjl tu'n kykawin kyib'aju' xjal toju' tq'ijlalil tzul, aju' nqo yolin ti'j.⁶Tchik'b'a pe'na' jun toju' tyol Dyos kjalu: ¿Titi'tzun toklenju' ichan? ¿titi'tzun kyoklenju' xjal? ¿Titi'qu'n intzaja' tna'na ex inxi'x ximana kyi'j?⁷Oktq'o'na jte' q'ij naqch'i'n toklen kyekywitz anjl, extzun oktq'o'na toklen nimxi'x tu'n tjaw nima'n;⁸tkyaqil kub' tq'o'na tjaq' tqan tu'n tkawin kyib'aj, chij.
Tu'ntzunju' kub' tq'o'n Dyos tkyaqil tjaq' tqanju' ichan, tkyaqil kyejten tjaq' tkawb'il. Na'mxtzun qlonte ja'lo qa tkyaqilwit tkub' tjaq' tkawb'il ichan.⁹Lutzunte' Jesus, oktq'o'n Dyos jte' q'ij naqch'i'n toklen kyekywitz anjl, atzun ja'lo matxi' q'o'n toklen nimxi'x ex majaw nimsa'n naq tu'nju' ik'x kamik tu'n, kyim naq tu'n qpaj qkyaqil tu'nju' t-xtalb'il Dyos.

¹⁰Kub' tb'incha'n Dyos tkyaqilju' ti'xti' tu'n tajb'en te, ex a tajb'il Dyosju' tu'n kyten kykyaqil tk'wal tuk'i'l toj tajwalil. Qu'mtzun atitoq tu'n tok Jesukrist tz'aqlixi'x tu'n Dyos tu'n tik'x tkyaqilju' yajb'il tu'n ex tu'n tok b'inchalte kolb'il kyeju' xjal.¹¹Aye'tzunju' mache eltpa'n Krist tu'n kyajb'en o'kxte Dyos, junx kyman tuk'i'l Krist sel pa'nkye; qu'mtzun mixti' nch'ixwite Krist tu'n kyoktq'o'n te titz'in.¹²Qu'n intma'n toj Tu'jil kjalu: Kxe'l npakb'ane' tb'iya kyeju' witz'ine', ex chin b'itzale' ti'ju' tb'iya toju' b'u'yb'il kyib', chij.

¹³Ex ikx intma'ntl kjalu: Atzu' kqeb'ila' nk'u'je' ti'j, chij.
Ikx jumajtl intma'n: Luqine' atinqine' kyuk'ilju' k'wa'lb'aj e'tzaj tq'o'n Dyos weye', chij.

¹⁴Ikse'nqe' k'wa'lb'aj kyitz'inkyib' junx kychib'jil ex kychk'el, ikyxtzunte Jesusju' tej tok te xjal, ok te xjal tu'n tb'ent tkyim, tu'ntzun tkub' t-xitu'n tipumal tajaw kamik, aju' tajaw il.¹⁵Tu'ntzu'n tkamik, ẍetzaqpeta'ju' xjal nche' xob' te kamik tkyaqil q'ij.¹⁶Qu'n min ulte' Qajaw Jesukrist onilkye anjl, xi' u'late' onilkyeju' tyajajil Ab'raam.¹⁷Tu'ntzun tb'ent tonin kyi'ju' xjal atitoq tu'n tok ikxju' kse'nkye, tu'ntzun tok te jun kynejel pale, in japunxi'x tu'n toj tajb'eb'l twitz Dyos, ex tu'n tchjet kyil xjal tu'n tu'nju' tkamik.¹⁸Tu'ntzunju' yajtite Krist ex ok toj joyb'ilti'j tu'n tajaw il, qu'mtzun ati tipumal tu'n tonin kyi'ju' nche ok toj joyb'ilkyi'j. Nimxi'x toklen Jesus kyetwitz Moyses

¹Qu'mtzun e'ntzik ex e'witz'in, aye'ye' oje che txokliye' tu'n Dyos tu'n kyokye' teku'xi'x, che ximanqe'ye' ti'ju' Jesukrist, Chq'o'n ex Kynejel pale nimaq toklen toj qokslab'l.²Qu'n oktq'o'n Dyos toklen Jesus nimxi'x, kse'n jun kynejel pale, ex tkyaqilju' tyol Dyos japunxi'x tu'n, kse'nte Moyses japunxi'x tkyaqil tu'n kyxolju' ttanam Dyos.³Atzunte Dyos oktq'o'n toklen Jesus nimxi'x kyetwitz Moyses, ikse'n jun b'inchal ja, nimxi'x toklen kyetwitzju' ja nb'ent tu'n.⁴Qu'n tkyaqil ja ati jun b'inchalte; ikxtzunte Dyosju' ate b'inchante tkyaqilju' ati.⁵Ajb'ente Moyses te Dyos, japun tu'n toj tkyaqil tajb'eb'l kyxol ttanam Dyos, ex ttziyaju' oktoq tma' Dyos yajxi'tl.⁶Atzunte Krist K'walb'ajte, japunxi'x tu'n kyxolju' ttanam Dyos, ayo' qa q'uqli qk'u'j ti'j kukxju', exqa kukxju' nqo' ayon ti'j toj tzalajb'il. Jun ojb'il kyeju' ttanam Dyos

⁷Qu'mtzun kse'n intma'n Xewb'aj Xjan toju' Tu'jil tyol Dyos kjalu: Qama kyb'iju'ye' intma'n Dyos ja'lo,⁸Lalun kub' kych'uẍsa'n kyanmiye' kse'n kyb'incha aj Israel tej tok kyq'o'n ttx'u'jil Dyos ex okkyq'o'n Dyos toj joyb'ilti'j toj chq'ajlaj.⁹Qu'n tma Dyos kjalu: Atzu' noka'ye' toj joyb'ilwi'je' kyu'n ojtxi' kyajilb'ene', extzun matxi'toq tz'ok kyka'yi'n nb'inchb'ene' toju' kab'naq ab'q'i.¹⁰Qu'mtzun tzaj ntx'u'jile' kyi'j, ex nmaye': Kukx kytenjuye' chukjni kynab'le', ex min kyajb'ile' tu'n kyoklpeye' wi'je', nchije'.¹¹Qu'mtzun tzaja' nq'oje kyi'j ex nmaye' kye qa lay che okx toju' tx'otx' te ojb'il wu'ne', chi Dyos.

¹²Qu'mtzun, kyka'yinx kyib'e' e'ntzik ex e'witz'in tu'n lalun tz'el kypa'n kyib'e' ti'ju' Dyos itz'; qu'n jaku' tu'n tpaj kyanmiye' myab'a'n mintz'oka' qe kyk'u'je' ti'j Dyos.¹³Kyq'uqb'am pe'kye' kyk'u'j kyxolilexe' atl junjun q'ij, atixku' anb'il tu'n kyb'inchanteye', tu'ntzun lalun kub' sb'u'n junkye' tu'n il ex tu'n lalun che okye' pi's twitz Dyos.¹⁴Qu'n atiqe qoklen tuk'i'l Jesukrist, qa kukx qtenju' wa'lqoxi'x toj qokslab'l exqa q'uqlokxi'x qk'u'j ti'j kse'nxju' tnejel.

¹⁵Qu'mtzun intma'n toj Tu'jil kjalu: Qama kyb'iju'ye' intma'n Dyos ja'lo, lalun kub' kych'uẍsa'n kyanmiye' kse'nqe' aj Israel okkyq'o'n ttx'u'jil Dyos, chij.

¹⁶¿Alkyeqe'tzu'n eb'inte tyol Dyos ojtxi', ex e'okten q'olte ttx'u'jil Dyos? Kykyaqilju' eb'je'tz tiq'i'n Moyses toj Ejipt.¹⁷¿Ex alkyeqetzu'n tzaj ttx'u'jil Dyos kyi'j toju' kab'naq ab'q'i? Aye'ju' eb'inchan il ex axtzu' e'kyaja' kyim toj chq'ajlaj.¹⁸¿Ex alkyetzun xa'ya' tma'n Dyos qa lay che okx toju' tx'otx' te ojb'il tu'n Dyos? Kyeju' min xikynima'n tyol Dyos.¹⁹Atzuntzu' nka'yina', qa min e'okxju' aj Israel toju' tx'otx' jatoq tu'n kyojlana' tu'n Dyos, tu'n tpaj min xikyoksla'n tyol Dyos.

¹Qu'mtzun, atixku' anb'il qe tu'n qok toju' ojb'il tzajni ttziya'n Dyos, ati tu'n txi' qka'yi'n qib', qu'n jaku' ati junqe min b'ent tokx toju' ojb'il kub'ni tb'incha'n Dyos.²Qu'n matxi' tzaj pakb'a'n tpakb'al b'a'n qe, kse'n xipakb'a'n kye xjal ojtxi'; aye'tzunkye mixti'x ajb'en kye, qu'n kyb'i extzun min xikyoksla'n.³Ayo'tzunqe oje qo' okslan te, qo'qe' okyex toju' ojb'il b'incha'n tu'n Dyos, kse'nju' oje tma: Qu'mtzun oje tzaj nq'oje kyi'j ex oje txinma'ne' kye qa lay che okx toju' ojb'il b'incha'n wu'ne' Dyos, chi Dyos.
Tma Dyos ja'lu, maskye ojetoq b'aj b'entju' taq'un, atxi'x tej tb'ent tkyaqil twitz tx'otx';⁴qu'n ati jun tnej toj Tu'jil tyol Dyos nyolin ti'ju' twuqi'n q'ij ex intma'n kjalu: Ojlante Dyos tej tb'entju' taq'un toj twuqi'n q'ij, chij.

⁵Ex intma'n jumajtl toju' Tu'jil tyol Dyos: Lay che okxkye' toju' ojb'il b'incha'n wu'ne', chij.

⁶Aye'ju' e' b'inte tpakb'al b'a'n nejku' min ẍe'okx toju' ojb'il tu'n tpaj min xikynima'n Dyos. Atzunte tzajni ttziya'n Dyos atixte' kyeju' junjuntl na'mx kyokx.⁷Qu'mtzun matzaj tq'o'n Dyos jun q'ijtl anb'il, aju' tq'ijlalil ja'lo, ex matzaj tma'n qe kse'n tma ojtxi' kye' aj Israel tu'nel Dab'i kjalu: Qama kyb'iye' ntma'n Dyos ja'lo, lalun kub' kych'uẍsa'n kyanmiye', chij.

⁸Qu'n naqwit xitq'o'n Joswe ojb'il kye aj Israel, mixti'wtlo yolin ti'j juntl tq'ijlalil.⁹Qu'mtzun atix jun q'ijtl anb'il kyeju' ttanam Dyos tu'n kyokx toju' ojb'il kub' tb'incha'n Dyos;¹⁰alkyete matz'okx toju' ojb'il b'incha'n tu'n Dyos, k'ojlaltzuntz toju' taq'un, ikse'nte Dyos ojlan tej tb'aj b'entju' taq'un.¹¹Qq'onktzun tilil tu'n qokx toju' ojb'il b'incha'n tu'n Dyos, tu'n mix-a'lo' tz'ok kse'nqe'ju' min xikyoksla'n tyol Dyos.

¹²Qu'n itz'te' tyol Dyos ex ati tipumal. Tzayunxi'xte' twitzte kyetwitz jun k'uẍtx'e'nb'il jqu'n twitzte toj kykab'il plaj, majx in okpun tojxi' qanmi ex tzmax toj kyaqamil qb'aqil; inb'aj tka'yi'n tkyaqilju' qxim ex tb'is qk'u'j.¹³Mixti'x jun tb'inchb'aj Dyos kb'entel tewin twitz, qu'n tkyaqil ti'xti' q'ancha'lile' twitz Dyos, ja kxe'la' qchik'b'a'n tkyaqilju' qb'inchb'en. Nimxi'x toklen Jesus kse'n kynejel pale

¹⁴Ate Jesus, Tk'wal Dyos, Kynejel pale nimxi'x toklen qe oje pon kanun toj kya'j. Qu'mtzun ati tu'n qwab'anteqib' toj qokslab'l ti'j.¹⁵Qu'n aju' kynejel pale qe intzaj q'aq'an tk'u'j qi'j tu'n tpaj mixti' qipumal, qu'n ikx okte toj joyb'ilti'j tu'n tajaw il kse'nx nqo' ik'a'; naqtzun ate mixti' b'inchan il.¹⁶Qoqe' lq'extzun tk'etz Dyos qek qk'u'j tu'n qpon kanun twitzju' tq'uqb'il jata' t-xtalb'il, tu'ntzun qtzajtq'o'n t-xtalb'il qe toju' tq'ijlalil inxi'x ojqelan toj qchwinqlal.

¹Kykyaqilju' kynejel pale, inche jaw sk'o'n kyxol xjal ex in okq'o'n kyoklen tu'n kyyolin kyi'j xjal twitz Dyos, ex tu'n tkub' kyq'o'n oyaj ex chojb'il tu'n tchjet kyil xjal.²Intzaj q'aq'an tk'u'ju' kynejel pale lu kyi'ju' mixti' b'a'n kyu'n ex kyi'ju' nche eltxalpuj ti'j Dyos, qu'n ikxnate mixti'xi'x tipumal;³tu'ntzun tpaju' mixti'xi'x tipumal, ilti'j tu'n txitq'o'n chojb'ilte til ex chojb'ilte kyilju' tnam.⁴Mix-a'lox jun xjal kb'entil t-sk'ontetib' tib'xtib' tu'n tok te nejenel, qu'n aku'te Dyos ntzaj txkonte ex aku' nokq'onte toklen kse'nte Aaron.⁵Qu'mtzun ikxte Kristju' mya' tu'nxtib' oka' te Nejenel, aku'te Dyos okq'onte toklen, qu'n a Dyos q'mante te kjalu: Ateju'ya nk'wale'; matxi' txi' nq'o'ne' tchwinqlala ja'lo, chi Dyos.

⁶Ex xitma'n Dyos te toj jun tnejtl Tu'jil kjalu: Aya pale te jumajx, ikx toklena kse'n toklen Melkisedek, chij.

⁷Tej tten Jesukrist twitz tx'otx', na'n Dyos tuk'i'l tkyaqil tipumal expe' majx oq' twitz Dyos inxi'xtoq kub'san tu'n tklonjtz toju' kamik; tzajtzun ttzaq'we'n Dyos tkub'sb'il tu'nju' atixi'x tchiylal Dyos te.⁸Tu'npetzu'n aku'te Krist Tk'wal Dyos, b'ent tnimet Dyos tu'n toj tkyaqilju' yajb'il ik'xtu'n;⁹Tetzunj tjapun tzqet tkyaqil tu'n, oktzuntz te b'inchal kolb'il tejumajx kye kykyaqilju' nche okslan te,¹⁰ex oktq'o'n Dyos te Kynejel pale kse'n toklen Melkisedek. Oqxenb'il kyi'ju' chalyol

¹¹Nimte' tu'n qyolin ti'j ja'lu, naqtzun aju' ch'uẍ tu'n tb'ajx nchik'b'ane' kyeye', qu'n mya lwiy nkane toj kywitze'.¹²Ayepe'wtlokye' nche q'o'n xnaq'tzb'il ja'lo tu'nju' ojtxi' okslalqeye'; atzunte' ape' kyajb'iljuye' tu'n kyxi' xnaq'tzet jumajtle' kyi'ju' tal tnejel xnaq'tzb'il ti'j tyol Dyos. Matxi' che okye' naku'j ne'ẍ o'kx kyajb'il kych'uye', atzu'n wab'j kuw min nxi' kyu'ne'.¹³Aye'tzu'n inx che ch'u'n ikqe'ju' kse'n jun ne'ẍ, min nelkynik' ti'ju' xnaq'tzb'il tnik'alxi'xti'j.¹⁴Aye'tzunkye' xjal matxi' che ch'iy a kywaju' wab'j kuw, aye'ju' inel kynik' ti'ju' b'a'n ex ti'ju' myab'a'n, qu'n matxi' tzik' kywitz ti'j nim ti'xti'.

¹Qu'mtzun qq'ok tilil tu'n qch'iy, lalun qo kyejten axtzu' toju' tnejel xnaq'tzb'il ti'j Krist. Lalun tz'anjtlqi'j kyi'ju' xnaq'tzb'il tzaj q'o'n qe nejku', kse'n ti'ju' tu'n tanjtzti'j qanmi kyi'ju' qb'inchb'aj myab'a'n, ti'j qokslab'l ti'j Dyos,²ti'ju' xnaq'tzb'il tib'aj jawsaj a', ti'ju' nkub' q'et q'ob'aj toj kywi' okslal, ti'ju' anq'ib'l kye kyimni ex ti'ju' tz'e'ysb'il witzb'aj tejumajx.³K'okyelxi'xtl tilil qu'n tu'n ttenxi'xtl qojtzqib'l qa ax tajb'il Dyosju'.

⁴Qu'n aye'ju' ma spik'b'anjtz toj kynab'l ex kyk'amju' oyaj tzaj toj kya'j, ex kyk'amju' Xewb'aj Xjan,⁵matz'el kynik' ti'ju' tyol Dyos ex kyi'ju' ipumalj che ul toju' tq'ijlalil tzul,⁶qama che kub' tz'aq jumajtl, lay b'ent tanjtz jumajtlti'j kyanmi twitz Dyos, qu'n injaw kyq'o'n jumajtl Qajaw Jesukrist twitz krus ex nel tch'ixaw kyu'n kywitz kykyaqil xjal.⁷Ikse'n tx'otx' nak' tu'n jb'al nkub' tib'aj: qama taq'ju' tx'otx' lu tawal b'a'n kyeju' nche aq'unan, kk'i'wlanjtzel tu'n Dyos;⁸qatzun ch'i'x mujqa saqch'i'x tawalju' tx'otx' lu xtaq', mixti'x tajb'en, ktzajel txko'n toj twi' tu'n Dyos ex majx kb'el tz'e'ysa'n. Qek qk'u'j kukxju' ti'j Dyos

⁹E'ntzik ex e'witz'in, q'uqlixi'x nk'u'je' kyi'je', maskye nchin yoline' kyeye' ti'ju' tx'otx' myab'a'n, qu'n q'uqlikye' kyk'u'j ti'j Dyos ex lepchqekye' ti'ju' tb'eyil kolb'il.¹⁰Qu'n tnik'alte Dyos ti'j, lay tzik'tna'l tu'n tkyaqilju' b'a'n nkyb'incha'ne' ex ljo'nx kyb'inchanteye' kyeju' okslal te, tu'ntzun ja'lu nkyek'una'ye' qa inkk'u'jla'ne' Dyos.¹¹Naq aju' a qajb'ilju'ye' tu'n toktilil kyu'ne' teyile junjun tu'n tjapun tu'n twitz Dyos, tu'ntzun kyk'monteye' nche ayone' ti'j.¹²Min qajb'ile' tu'n kyokye' ky'ej, kyknomile' kyi'ju' ati kyokslab'l ex nten kpasens, qu'n ikytzu'n kyk'ma'ya'ju' tzajni ttziya'n Dyos.

¹³Tej ttzaj ttziya'n Dyos tyol te Ab'raam, axju' tb'i tzaj tna'n ti'ju' tyol, qu'n mixti' juntl nimxi'x toklen kyetwitz tu'n ttzaj tna'n ti'j tyol;¹⁴ex tma: Kb'el nk'i'wla'na b'a'nxi'x ex kche chmetel tyajila b'a'nxi'x wu'ne', chi Dyos te Ab'raam.¹⁵Tentzun tpasens Ab'raam ex kub' tyo'n, ex tk'amju' tzaj ttziya'n Dyos te.¹⁶Qama tzajkyna'n xjal tb'i juntl ajkymante jun kyyol, intzajkyna'n tb'i juntl nimxi'x toklen kyekywitz, qu'n aye' tziyalju' ti'j tkyaqil.¹⁷Qu'mtzun axte Dyos tb'i tzaj tna'n ti'ju' tyol, qu'n tajb'il Dyos tu'n tyek'u'nte qa lay tch'exb'eju' tzajni ttziya'n.¹⁸Tu'ntzu'n kab'e' tu'me'l lu in qexi'x qk'u'j ti'j Dyos, qu'n tu'nju' tzajttziya'n ex tu'nju' tzaj tna'n tb'i, axxi'xju' yol ex layx jaw tch'exb'e'n oje tzaj ttziya'n qe.¹⁹Tu'ntzunju' tzajni ttziya'n Dyos lu in qeya' qk'u'j, kse'n jun k'uxb'il nku'x q'o'n t-xe a' tzyulteju' b'ark tu'n lalun yukchi. Atzunqe tzyulqe atzu' tzajna' ti'jxi'ju' xb'alun yo'l toj tnk'yejchaqil tja Dyos toj kya'j,²⁰ja okxa' nej Jesus qwitz jqolteju' tb'eyil tk'etz Dyos, matz'ok Jesus te kynejel pale nimxi'x toklen tejumajx, kse'n toklen Melkisedek. A Krist pale kse'n toklen Melkisedek

¹Ate Melkisedek nimaqkawiltoq toj tnam Salem ex paletoq te Dyos nimxi'x toklen. Tej tanjtzti'j Ab'raam toj q'oj, tkub'lenxi' kyi'ju' nimaqkawil tu'n, etz Melkisedek k'lulte ex kub' tky'iwla'n Ab'raam;²xi'tzun tq'o'n Ab'raam tlajoji'n tnej te Melkisedek ti'j tkyaqil tkamb'a toju' q'oj. Aju' b'iyj Melkisedek a tz'elpuna'ju' nimaqkawil tnik'alxi'xti'j, expe' a juntl tb'iju' nimaqkawil toj Salem, atz'elpuna'ju': nimaqkawil q'ol nak'b'il.³Mixti'x b'i'n alkye tman Melkisedek, alkye ttxu ex alkyeqe' ojtxi' tyajilb'en; min b'i'n jtoje titz'ji ex jtoje tkyim; ikyininxju' kse'n Tk'wal Dyos, aju' pale tejumajx.

⁴Nimxi'xte' toklen Melkisedek, qu'n xitq'o'n qyajilb'en Ab'raam tlajoji'n ti'ju' tkanb'a toj q'oj te.⁵Kse'n intma'n toj tkawb'il Moyses, ati kyoklenju' pale tyajajil Leb'i tu'n tel kypeyu'n tlajoji'n tkyaqil ti'xti' kyi'ju' tnam, aye'xju' kywnaqil, maskye tyajajilx Ab'raamqe'.⁶Atzunte Melkisedek, maskyepe' mya tyajajil Leb'i, tk'amju' tlajoji'n te Ab'raam ju' ojetoq ttziya Dyos tyol te. Ex kub' k'iwla'n Ab'raam tu'n Melkisedek;⁷ex mix-a'lox kb'entel tewante qa nimxi'x toklenju' ink'iwlan kyetwitzju' nkub' k'iwla'n.⁸Aye'kye' nche k'monte tlajoji'n toju' tq'ijlalil ja'lo, ichanqe' inche kyim; atzunte' intma'n toj tu'jil ti'j Melkisedek, kukx ttenju' qu'm mixti' intma'n toj Tu'jil qa oje kyim.⁹Toj juntl tu'me'l, aye' pale tyajajil Leb'i inche peyun tlajoji'n ja'lo, xikychjo'n tlajoji'n te Melkisedek tej t-xitchjo'n Ab'raam te;¹⁰qu'n tu'nju' tyajajil Ab'raamqe', maskye na'mxtoq kyitz'ji, naku'j aye'jun ate'toq tej tetz Melkisedek k'lulte Ab'raam.

¹¹Kyk'am aj Israel tkawb'il Moyses nyolin kyi'ju' pale tyajajil Leb'i, aye' tyajajil Aaron. Naqwit mache okju' aj Israel tnik'alkyi'j kyu'n pale lu, myawtlo ilti'j tu'n ttzaj juntl pale junxi'tl, kse'n toklen Melkisedek mya tyajajil Aaron.¹²Qama che ch'exb'etkye' pale, ex ati tu'n tch'exb'etju' kawb'il;¹³myana' tyajajil Aaron te' Qajaw, kse'n intma'n toj Tu'jil, xi'tzajna'te ti'j juntl tnej kyajil aj Israel b'ajx tz'etza' jun pale kyxol.¹⁴Qu'n b'i'nxi'x qu'n qa xi' itz'ja' Qajaw Jesukrist ti'j tyajajil Juda; ex tej tyolin Moyses min tma qa che okyel aj Juda te pale.

¹⁵Chik'lixi'xtzuntz qa aju' k'a'j pale lu junxi'tlte', ikx toklenju' kse'nte Melkisedek,¹⁶min sok te pale tu'nwtju' tyajajil kse'n intma'n kawb'il, ma tz'okte' te pale tu'nju' tchwinqlal mlay b'aj.¹⁷Qu'n intma'n Dyos ti'j toj Tu'jil kjalu: Aya pale tejumajx, ikx toklenju'ya kse'nte Melkisedek, chij.

¹⁸Ikytzu'n makyej najte' ojtxi' chaq'b'il tu'n tpaj mixti' tipumal ex mixti' tajb'en,¹⁹qu'n min xb'ent kyokju' xjal tnik'alkyi'j tu'n tkawb'il Moyses, ex ma tzaj q'o'n jun q'uqb'ab'l qk'u'j b'a'nxi'x te t-xelju' kawb'il lu, tu'n qpon lq'e tk'etz Dyos.

²⁰Tzaj tna'nte Dyos tb'i tej tok Jesukrist te pale, atzu'n tej kyokju' txqantl pale min tzaj tna'n tb'i,²¹atzu'n tej tok Jesukrist te pale tzaj tna'n Dyos tb'i ti'j, qu'mtzun tz'ib'a'n toj Tu'jil kjalu: Tzaj tna'nte Dyos tb'i ti'j ex lay tch'exb'eju' tyol qu'n tma: Aya pale tejumajx, chij.

²²Ikytzu'n a Jesus tziyante ex tq'uqb'axi'x tk'u'jlalil, qa ktb'incha' tu'n tjapunju' yol kyej b'entti'j tu'n Dyos tnejel.²³Aye'tzunkye' txqantl pale, nimxi' matxi' che b'ajten tu'n tpaju' nche kyim;²⁴atzunte' Jesus mina' junti' nkyim, lay kyej tq'o'nju' toklen te pale te juntl.²⁵Qu'mtzun ati tipumal Jesus tu'n kykletju' xjal tu'n tejumajx, aye' inche pon lq'e tk'etz Dyos noq tu'nel, qu'n itz'te' Jesus tejumajx tu'n tkub'san twitz Dyos kyi'j.

²⁶Qu'mtzun ate Jesus kynejel pale atixi'x tajb'en qe. Qu'n ate Jesus xjan te, mixti' til ex mixti'x ttz'ilil tanmi, pa'ntib' kyi'j aj il ex nimxi'x toklen kyetwitz kya'j.²⁷Mikxa'ju' kse'nqe' txqantl kynejel pale, inche kub' kyb'yo'n alu'mj te chojb'il atl junjun q'ij, tnejelxi'x te chojb'ilte kyil, yajxi'tzuntl te chojb'ilte kyilju' tnam. Atzunte Jesus noq junx maj oje txi' tq'o'n chojb'il kyil xjal ex tejumajx, qu'n aku'te xitq'o'ntib' tu'n tkyim.²⁸Ate intma'n toj tkawb'il Moyses tu'n kyok kynejel pale, aye' mixti'x njapun kyu'n twitz Dyos. Atzunte' tzajni ttziya'n Dyos qe tib'ajxi'ju' tkawb'il Moyses, tma Dyos qa k'okyel tq'o'nju' Tk'wal te kynejel pale, tz'aqli toj tkyaqil tejumajx. A Jesus ul q'inte ak'a'j yol kyej b'entti'j tu'n Dyos quk'i'l

¹Ate nimxi'x toklenju' toj tkyaqilju' nxiqma'ne' kyeye', aju' tu'n ati jun tnejel qpale nimaqxi'x toklen, xi'q'uqla' ja'lo toj tb'a'nq'ob' Dyos toj kya'j,²ex in najb'en toju' ja xjanxi'x, aju' ja xjan axxi'x lu aku' Dyos b'inchante, mya'ye' xjal.

³Kykyaqil kynejel pale nxiq'o'n kyoklen tu'n tkub' kyq'o'n oyaj ex chojb'il te Dyos, qu'mtzun ikxte Qajaw Jesukrist ati tu'n tkub' tq'o'n jun oyaj twitz Dyos.⁴Naqwit atite' Qajaw Jesukrist twitz tx'otx', mixti'x petlo sok te pale, qu'n ate'tlkye pale twitz tx'otx' nche kub' q'onte oyaj chqo'nqe' toj tkawb'il Moyses.⁵Tkyaqiltzunte' nkyb'incha'n pale lu twitz tx'otx' toju' kyajb'eb'l te Dyos, noqx jun techlal ex noq jun t-xlekumalju' ati toj kya'j, qu'n tej tb'inchante Moyses ja xjan, tzaj tma'n Dyos te kjalu: B'inkuya b'a'nxi'x ex b'ichanxa kse'nxju' oje txinma'ne' teya twi' witz, chi Dyos te.⁶Atzunte' tnejel qpale, matxi' tk'am jun nimaq toklen te pale tb'anilxi'x, ate ntzaj chik'b'ante yol kyejni b'entti'j tu'n Dyos tb'anilxi'x, tb'anilxi'xju' ntzaj ttziya'n qe kyetwitzju' tnejel.

⁷Naqwit okju' tnejel yol kyejni b'entti'j tu'n Dyos tzinunxi'x ti'j, myawtlo ilti'j tu'n tb'entti'j juntl tkab' yol.⁸Tka'yitzunte Dyos ati kypaltilju' xjal, tmatzuntz kjalu: Tzul tq'ijlalil —chi Qajaw— kjel b'entti'j jun ak'a'j yol wu'ne' kyuk'i'l aj Israel ex aj Juda.⁹Mikxa'tl te yol lu kse'n kyej b'entti'j wu'ne' kyuk'i'lju' ojtxi' kyajilb'ene', tej chab'axi'x eb'je'tz nxko'ne' tu'n kyetz wiq'ine' toju' tx'otx' Ejipt; Aye'tzunkye min xjapunju' yol kyu'n, qu'mtzun mache kyej nleb'a'ne', —chi Qman Dyos—.¹⁰Ate' ak'a'j yol kjel b'entti'j wu'ne' kyuk'i'l aj Israel toju' tq'ijlalil tzul, aja'lu, —chi Qman Dyos:— Kche kb'el nq'o'ne' nkawb'ile' toj kynab'l ex che kjel ntz'ib'a'ne' toj kyanmi. Ayine' chin nokyel te Kydyos aye'tzunkye che okyel te ntaname'.¹¹Min nojqelantl tu'n tq'on xnaq'tzb'il jun te juntel, jun kyxjalil mujqa kywitze'l tu'n telkynik' wi'je' ayine' Dyos, qu'n kykyaqil k'elelkynik' weye', k'elelkynik'ju' b'o's exqe' nimaq.¹²Kb'el najsa'ne' kyb'inchb'aj myab'a'n ex lay che tzaj nna'ntle' kyil, chi Dyos.

¹³Tu'ntzunju' nyolin Dyos ti'j juntl ak'a'j yol tu'n tkyej b'entti'j quk'i'l, intchik'b'a'n qa ojtxi'tlju' tnejel yol kyejni b'entti'j, mixti'tl tajb'en ex in nojqelan tu'n tkub' naj. Kab'e' ja xjan: jun twitz tx'otx' ex jun toj kya'j

¹Toju' tnejel yol kyej b'entti'j tu'n Dyos quk'i'l nk'u'na' kse'n tu'n qk'ulun te Dyos toju' ja xjan te twitz tx'otx'.²Ikytten ja xb'alunju' te k'u'lb'il jaw b'incha'n kjalu: Toju' tnejel mqo'n ajqokx ttzija tok tb'i Xjan Mqo'n, ja ta'qe' tkb'el kantil exju' mes ja tkub'a' wab'j xjansa'nqe' twitz Dyos.³Atzu'n tkab' mqo'n t-xexi' ti'jxi' xb'alun lik'u'ntz te maqb'il toj nky'ajchaq, tok tb'i Xjanxi'x Mqo'n;⁴atzuntzu' ta'ya' jun q'anpwaq q'olb'eb'l jankub'a' tz'e'yset sturak, ex tkaxilju' yol kyajni b'antti'j tokyile q'anpwaq ti'j. Tojtzu'n kax lu tku'x jun q'anpwaq xar tku'x mana toj, ex toju' kax tku'xa' ttze Aaron ma'toq t-xulin exju' tz'lan ab'j jatz'ib'ana' lajoj chaq'b'il.⁵Tib'ajtzu'n kax lu ate' kab'e' tilb'ilal anj Kerb'in kyb'i yek'b'ilte qa atzu' ta' Dyos, majxtoq ktxu'n tib'aju' kax tu'n kyxik'. Naqtzun aju' lay txinch'ik'b'a'nxi'xe' txqantl ti'xti' lu kyeye' ja'lo.

⁶Iktzunju', kykyaqilju' ti'xti' nk'u'mile kyten toju' ja xb'alun. Inche okxju' pale tkyaqil q'ij toju' tnejel mqo'n tu'n kyb'inchante k'u'lb'il te Dyos.⁷Atzu'n toju' tkab' mqo'n ati t-xexi' o'kxju' kynejel pale in okx toj naq junmaj toj ab'q'i; ajtzun tokx toju' kol ja Xjanxi'x ati tu'n tokx tiq'i'n tchk'el a'lumj te chojb'ilte til ex chojb'ilte kyilju' xjal.⁸Tu'ntzu'n ja'lu intyek'u'n Xewb'aj Xjan qe, qa ljo'nx tajb'enju' tnejel mqo'n te k'u'lb'il mixti' tu'me'l tu'n qokx toju' Xjanxi'x Mqo'n.⁹Tkyaqilte' lu naq jun techlal ti'ju' tq'ijlalil ja'lo; qu'n lay b'ent tu'n tqe kyk'u'ju' xjal naq tu'n inche'x kyq'o'n oyaj ex chojb'il toj ju' ja te k'u'lb'il, tu'nwt tkub'najsa'n kyilju' nche k'ulun toju' tu'me'l lu.¹⁰Qu'n ate' k'u'lb'il lu xi' nyolina' ti'j chib'j, k'wab'j ex ti'j chukchaq tu'me'l ẍtilsab'lkye, qu'n tkyaqilju' chaq'b'il lu o'kxtzu' najb'ena' te qxmilal ex che tenb'il akxku' npon tq'ijlalil tu'n tch'exb'et tu'n Dyos.

¹¹Atzu'n ja'lo matxi' tzul Krist ex matxi' tz'ok te kynejel pale nimaqxi'x toklen ex matxi' tzaj tq'o'n xtalb'il qe. Nimaqxi'x toklenju' ja xjan jannajb'ena' Krist ex tz'aqlixi'x kyetwitzju' tnejel, mya kyb'ichb'aj xjal ex mya te twitz tx'otx'.¹²Mya tchk'el chib' mujqa tchk'el qpoj tman wakx in okxtiq'i'n Qajaw Jesukrist te chojb'il kyil xjal toju' ja xjan, aku'te tchk'el ajb'en tu'n te chojb'il kyil xjal; naq jumaj ex tejumajx sokx toju' ja xjan, majx maqo kolpet tu'n tejumajx.¹³Aye'kye' xjal nche tz'ilix, inche ẍtilset tu'n tchk'el tman wakx ex chib', ex ttza'jil ttxu wakx nkub' tz'e'yset tib'aj q'olb'eb'l, qama witxk'et kyi'j.¹⁴Qatzun ikju' qa nche ẍtilset xjal tu'n kychk'el alu'mj ¡Yajtzunte' tchk'el Qajaw Jesukrist ma myatzulo nimxi'xte tipumal! Qu'n naq tu'nel Xewb'aj Xjan itz' tejumajx xitq'o'ntib' Qajaw Jesukrist te chojb'il mixti' ttz'ilil te Dyos, matxi' ẍtilset qanmi tu'n te tkyaqilju' qb'inchb'en te kamik, tu'ntzun qajb'en te Dyos itz'.

¹⁵Qu'mtzun ja'lo naq tu'nel Krist maqo ok toj jun ak'a'j yol kyej b'entti'j tu'n Dyos quk'i'l, qu'n ate Krist xkub'najsante kyilju' xjal kb'incha tjaq'ju' tnejel yol kyejni b'entti'j ojtxi', ex tu'nte kyk'ma'ya' xjal kyetzb'il tejumajx te Dyos, aju' tzajni ttziya'n kyeju' sk'onqe'tl tu'n.¹⁶Kse'n jun tu'jil etzb'il nkyej q'o'n mixti' tajb'en qa na'mtoq tkyimju' nkyej q'onte.¹⁷Qu'n mixti'x tajb'enju' tu'jil etzb'il qa itz'xju' xkyej q'onte, qatzun matxitoq kyim atitzun tajb'entz.¹⁸Qu'mtzun aju' tnejel yol kyej b'entti'j tu'n Dyos kyuk'i'l ojtxi' qyajilb'en, el kychk'el alu'mj tu'n tqexi'x tk'u'jlalilju' yol lu.¹⁹Qu'n tkyaqilju' chaq'b'il tz'ib'a'n toju' kawb'il xitma'n Moyses kye kykyaqil xjal; tb'ajlenxi'tzun tma'n, tzajtiq'i'n jni' t-smal rit kyeqka'yin ex jun t-ẍk'ilub' tze, ku'xtzun tnub'sa'n toju' kychk'el tal tman wakx ex kychk'el tman chib' smo'n twitz tuk'i'l a', oktzun twitxk'a'n ti'ju' tu'jil kawb'il ex kyi'j kykyaqil xjal.²⁰Xitma'ntzun Moysestz kjalu: Aju' chik' lu a tajb'enju' tu'n tkyej qexi'x tk'u'jlajilju' yol xkyej b'entti'j tu'n Dyos kyuk'ile', chij.²¹Ikx oktwitxk'a'n Moyses kychk'el alu'mj ti'ju ja xjan ex kyi'j kykyaqil ti'xti' nche ajb'en toj k'u'lb'il te Dyos.²²Ex a intma'nju' toj kawb'il, naku'j tkyaqil ti'xti' ati tu'n kyẍtilset tu'n chik'; ex min nkub' najsa'n kyilju' xjal qa min sel tchk'el jun alu'mj. Aju' tkamik Krist nel q'inte tkyaqil il

²³Qu'mtzun ilxi'xtoq ti'ju' kychk'el alu'mj tu'n tajb'en ẍtilsab'lkye ti'xti' naq tilb'ilalju' ati toj kya'j; aye'tzunkye' ti'xti' toj kya'j a chojb'ilju' nojqelan kye aju' tb'anilxi'x kyetwitz kychk'el alu'mj.

²⁴Myatzu' okxa'te Krist toju' ja xjan kyb'inchb'aj xjal, qu'n ate' ja lu, naq jun tilb'ilal ti'ju' ja ati toj kya'j, xi'okxa'te Krist toj kya'j, ja nyolina' qi'j twitz Dyos ja'lo.²⁵Ex min okxte Krist b'a'npun maj q'oltib' te chojb'il, kse'n nkyb'incha'n kynejel pale atl junjun ab'q'i nche okx tuk'i'l kychk'el alu'mj, ex myaku' kychk'el kse'nte Krist.²⁶Naqwit ikju' atiwtlo tu'n tkyim Krist b'a'npun maj ttzajlenx tb'entlen twitz tx'otx'. Atzunte' ja'lo tej xjapun b'aju' tq'ijlalil, naq jumaj xtyek'utib' Krist ex naq junmaj kyim te chojb'ilte qil.²⁷Ikse'nqe xjalqo' naq junmaj qo' kyimel, qkyimlenxi'tzun qo' okyel toj xjel,²⁸ikxtzunte Kristju' naq junmaj xtaq'tib' tu'n tkyim te chojb'ilte kyil xjal. Tzultzun jumajtl tkamaji'n, mya'tl tu'n tchjet kyil xjal, qu'n tzul klolkyeju' nche' ayon ti'j.

¹Ate' tkawb'il Moyses naqtaq jun t-xlekumalju' ti'xti' tb'anilxi'x atitoq tulel, mya awtju' kawb'il lu tzul q'onte ti'xti' tb'anilxi'x qe. Qu'mtzun layx che okju' xjal tz'aqli twitz Dyos tu'n kawb'il, tu'nju' axchojb'ilju' inkub' kyq'o'n twitz Dyos atl junjun ab'q'i.²Naqwit inche ẍtilsetju' xjal te il tu'nju' kawb'il, mixti'wtlo kyil ex mixti'wtlo nxi' kyq'o'ntl chojb'il atl junjun ab'q'i.³Aye'tzunkye inx xikyq'o'n chojb'ilte kyil atl junjun ab'q'i, ex atl junjun ab'q'i ntzaj kyna'n kyil.⁴Qu'n layx b'ent tnajsette' kyil xjal kyu'n kychk'el tman wakx ex kychk'el tman chib'.⁵Qu'mtzun tma Krist te Dyos tej tul twitz tx'otx' kjalu: Min tajb'ilta chojb'il ex oyaj twitza, qu'n matxi' tzaj tq'o'na nxmilale'.⁶Myab'a'n inche ela' chojb'il k'ok'sb'il exqe' oyaj tu'n tnajsetju' kyil xjal toj twitza.⁷Qu'mtzun xinma'ne' kjalu: Luqine' lu, tu'n nb'inchanteye' tajb'ila, kse'nxju' tz'ib'a'n wi'je' toju' Tu'jil tyola, nman Dyos, nchije', chij.

⁸Tnejelxi'x intma'n qa min tajb'il Dyos chojb'il mujqa alu'mj te oyaj, ex min tajb'ilju' chojb'il k'ok'sb'il te najsb'il kyil xjal, maskye iky intma'nju' toj kawb'il.⁹Ex intma'ntl: Luqine' lu, Dyos, machin nule' tu'n nb'inchanteye' tajb'ila, chij. Atzun ja'lu a ntma'nju' qa mixti'tl kyajb'enju' ojtxi' chojb'il ex a Krist sok tq'o'n Dyos te jun ak'a'j chojb'il.¹⁰Ma'tzun qo jaw t-sk'o'n Dyos tu'nju' japun tajb'il tu'n Qajaw Jesukrist tej txitq'o'n t-xmilal te chojb'il jumajx ex te kukxju'.

¹¹Kkyaqilju' pale aj Juda nche okx toj tja Dyos tkyaqil q'ij ex aye'x chojb'ilju' nche kub' kyq'o'n, maskyetzun mixti'x in najset kyil xjal kyu'n.¹²Atzunte Jesukrist naq junxju' chojb'il xtaq' twitz Dyos tu'n tnajset kyil xjal tejumajx, ex matxi' kub' qe toj tb'a'nq'ob' Dyos.¹³Axtzuntzu' k'ayola' tzmax ajkykub' tq'o'n Dyos tajq'oj tjaq' tqan,¹⁴qu'n naq tu'n junmaj kyim Krist, che okyela' xjal tzinunxi'x tejumajx tu'n Dyos tu'n kyajb'en o'kxtzu' te.¹⁵Qu'n iku' ntma'n Xewb'aj Xjan qe tej tmante kjalu:¹⁶Aju' yol kjel b'entti'j wu'ne' kyuk'i'l ajtpon kanun tq'ijlalil, aja'lu, chi Qajaw: Che kb'el nq'o'ne' nkawb'ile' toj kyanmi ex che kb'el ntz'ib'a'ne' toj kynab'l.¹⁷Ex lay tzajnna'n jumajtle' kyil ex kyb'inchb'aj myab'a'n, chi Xewb'aj Xjan.

¹⁸Ikytzu'n, qa matxi' che kub'najsa'nju' il, min nojqelan tu'n tkub'tl chojb'il te najsb'il il. Qq'onk tilil tu'n qpon lq'e tk'etz Dyos

¹⁹Qu'mtzun e'ntzik ex e'witz'in, matxi' tzaj q'o'n anb'il qe tu'n qokx toju' najb'il Xjanxi'x, naq tu'nel tchk'el Jesukrist,²⁰qa lepchiqo' ti'ju' ak'a'j b'e te chwinqlal xtjaq Jesukrist qe ti'ju' xb'alun lik'u'n te maqb'il toju' ja te k'u'lb'il, xi' nyolina' xb'alun lu ti'jku' t-xmilal Jesukrist.²¹Ja'lo ati jun qpale nimxi'x toklen toju' ja xjan toj kya'j.²²Qu'mtzun qoqe' lq'ex tk'etz Qman Dyos tu'n tkyaqil qanmi axxi'x ex tuk'i'l qokslab'l axxi'x, ẍtiluntl qanmi te il ex txjo'ntl qxmilal tuk'i'l a' ẍnu'l teju' il.²³Qek qk'u'j b'a'nxi'x ti'j Dyos ex lalun jawje qk'u'j toj qokslab'l, qu'n kjapumelte' Dyos tyol tu'n oje tzaj ttziya'n qe.²⁴Qjyom tu'me'l tu'n qoninte qib' qxolilex, tu'n tten qk'u'jlalil ex tu'n qb'inchanteju' b'a'n.²⁵Lalun kyej qtzaqpi'n tu'n qb'uyinteqib', kse'n nkyb'incha'n junjun, ape' qb'inchamju' qq'uqb'am qk'u'j jun te juntel; ex qq'onk tilil tu'nju' in qka'yi'n matxi' tzaj lq'e tq'ijlalil tulel Qajaw Jesukrist.

²⁶Qu'n qa inx qo b'inchan il extzun matxi' tz'el qnik' ti'ju' yol axxi'x, mixti' juntl chojb'ilte qil;²⁷noq o'kxtl in qayo'nju' xob'ajilxi'x ajqok toj xjel te b'ajsb'il, ajkyb'aju' ajq'oj ti'j Dyos toj q'aq'.²⁸Qa ati jun xjal inel txalpuj toj tkawb'il Moyses, extzunqa ati kab'e' mujqa oxe' tziyal ti'j qa axx min nxitnima'n, mixti'x ntzaj laqj tk'u'jlalil ex majx nkub' b'yo'n.²⁹¿Yajtzu'n ja'lo, ma myatzulo nimxi'x tz'e'ysb'il witzb'aj tzul tib'aju' xjal nkub' wab'inte Tk'wal Dyos ex neltik'u'nju' tchk'el, ex inel kysuchu'n T-xew Dyos nk'u'jlankye xjal? Qu'n aju' tchk'el Qajaw kuwsalteju' yol kyejni b'entti'j tu'n Dyos quk'i'l ex tu'n tchk'el Krist xtxjeta' kyanmi xjal toj il.³⁰B'i'nqe' qu'n aju' tma Qajaw kjalu: Ayinwe' chin q'olte tu'me'l t-xel kyeju' xjal nche b'inchan taq'wix ex ayine' chin q'olte tz'e'ysb'il kywitz, chij. Ex tmatl kjalu: Aku'te Qajaw k'okyel q'onte ttanam toj xjel, chij.³¹¡Xob'ajilxi'xte' qama qokub' tz'aq toj tq'ob'ju' Dyos itz'!³²Kyna'ntze' b'aj kyi'je' ojtxi' tej tzqekutoq kyk'monteju'ye' spik'un, tej tik'xkyu'ne' toju' yajb'il kuwxi'x kyu'n xjal.³³Ate' junjunkye' eb'jo'k yasu'n ex eb'jo'k ili'n kyu'n xjal kywitz kykyaqil xjal, aye'tzun junjuntlkye' tzaj b'is toj kyanmiye' tu'nju' nche yajtiju' kyuk'ile' toj kytzi xjal.³⁴Tzaj q'aq'an kyk'u'je' kyi'ju' ate'kxtoq toj kars, expe' e'tzalaje' tu'nju' b'je'l q'i'nju' ati kyeye', qu'n b'i'ntl kyu'ne' qa ati junkye' kyetzb'ile' toj kya'j tb'anilxi'x ex lay b'aj.³⁵Qu'mtzun qek kyk'u'je' ti'j Dyos, qu'n ktzajel tq'o'n Dyos jun chojb'il nimxi'x kyeye' qa q'uqlok kyk'u'je' kukxju' ti'j.³⁶In nojqelan tu'n tten kyipumale' toj ju' yajb'il, tu'ntzun kyb'inchanteye' tajb'il Dyos ex tu'n kyk'monteye' oje tzaj ttziya'n Dyos kyeye'.³⁷Qu'n intma'n toj Tu'jil tyol Dyos kjalu: Ch'inxtl, naqch'inxtl tulju' ati tulel. Lu xi' tulkanun.³⁸Aju' xjal tnik'alti'j naq tu'n tokslab'l k'anq'ila'; qatzun ma tz'anjti'j ti'jxi', lay chin tzalaje' ti'j, chiju' tz'ib'a'n.

³⁹Ayo'tzunqe mya ikqo'ju' kse'nqe' nanjkyi'j kyi'jxi' ex nche'x toj naje'n, xi'toqo'qe kyuk'ilju' nkub'ti'j kolb'il kyu'n, qu'n ati kyokslab'l. Aju' kyokslab'l ojtxi' xjal

¹Qa ati qokslab'l q'uqlixi'x qk'u'j tu'n qk'monteju' in qo ayon te; ex q'uqlok qk'u'j kyi'ju' ti'xti' na'mx tok qka'yi'n.²E'k'metkye' ojtxi' qyajilb'en tu'n Dyos qu'n atitoq kyokslab'l.

³Tu'n qokslab'l inela' qnik' ti'j qa tu'n tyol Dyos b'enta' twitz tx'otx', qu'mtzun aju' q'ancha'l ja'lo kub' b'incha'n kyi'j ti'xti' min q'ancha'lqe'.

⁴Tu'n tokslab'l Ab'el xaya' tq'o'n jun oyaj tb'anilxi'xte Dyos kyetwitz Kayin. Qu'mtzun okq'o'n Ab'el tnik'alti'j tu'n Dyos ex tk'amju' toyaj. Maskyetzun oje kyimte Ab'el, inx yolin qe tu'nju' ten tokslab'l.

⁵Tu'n tokslab'l Enok xiq'i'n tu'n Dyos itz' ex min kyim, ex min okyalju' t-xmilal, qu'n aku' Dyos xiq'inte. Ex intma'n toj Tu'jil tyol Dyos, qa intoq tzalaj Dyos ti'j Enok tej na'mxtoq txiq'i'n.⁶Lay tzalajte Dyos qi'j qa min nqoksla'n, qu'n kb'antel qok lq'e tk'etz Dyos qa in qoksla'n qa ati Dyos exqa intzaj tq'o'n tu'me'l t-xel b'a'n kyeju' nche' jyon ti'j.

⁷Tu'n tokslab'l Noe tzaj tma'n Dyos te ti'ju' na'mxtoq tyek'u'njtz, xitb'i'n Noe tyol Dyos ex jawtb'incha'n jun b'ark tu'n kyklet kyuk'i'lju' toj tja. Ex tu'nxju' tokslab'l Noe kub' tz'e'ysa'n kywitz xjal twitz tx'otx', atzunte okq'o'n tnik'alti'j tu'n Dyos.

⁸Tu'n tokslab'l Ab'raam xitnima'n txokb'ilte tu'n Dyos tu'n tetz toj ttanam, ex tu'n tpon toju' tx'otx' atitoq tu'n tk'monte te tetzb'il. Etztzuntz toju' ttx'otx' ex min b'i'n tu'n jatoq kpomela',⁹ex tu'nju' atitoq tokslab'l ti'j Dyos, anq'in kse'n najchaq xjal toju' tx'otx' xittziya'n Dyos te. Najan Ab'raam kyoj pach, ikxte Isaak ex Jakob' xitziya'n tx'otx' lu kye.¹⁰Qu'n intoq ayon Ab'raam ti'ju' nintnam b'incha'n tq'uqlil b'a'nxi'x, ju' aku' Dyos kub' ximante ex kub' b'inchante.

¹¹Ex ikx tu'n tokslab'l Ab'raam, tk'am tipumal tu'n titz'ji jun tk'wal, maskye matxitoq tijin ex mixti' nnalin Sara ju' t-xu'jil, qu'n xitoksla'n qa kjapumelju' tzaj ttziya'n Dyos te.¹²Qu'mtzun maskye matxitoq tijin Ab'raam, eb'je'l anq'in txqan xjal ti'j kse'n kyajlal che'w twitz kya'j ex kse'n tajlal tz'awun ttzi ninnjab', lay b'ent kyajlet.

¹³Kykyaqilju' xjal lu eb'aj kyim, ex min kyk'amju' ojetoq tzaj ttziya'n Dyos kye; tu'ntzunju' ati kyokslab'l xikyka'yi'n najchaq ex ojexi'x che tzalaj ti'j, atzuntzu' kymaya' qa najchaq xjalqe' ex naq ajb'etunqe' twitz tx'otx'.¹⁴Aye'tzu'n inche q'mante ikju', inkychik'b'a'n qa nche jyon ti'j jun kytanam.¹⁵Noqwit inche ximan ti'ju' tx'otx' jaeb'jetza', anjwitlokyi'j toju' kytanam;¹⁶aye'tzunkye intoq che jyon ti'j jun tnam tb'anilxi'x ati toj kya'j. Qu'mtzun min nch'ixwite Dyos tu'n tok te Kydyos, qu'n ati jun nintnam b'entni tu'n te kytanam.

¹⁷Iky' twitzlalil tokslab'l Ab'raam tu'n Dyos, ku chij, xitq'o'n Isaak te chojb'il. Xitq'o'nte Ab'raamju' tk'wal te chojb'il maskye naq jun twitz, ex maskye ojetoq txi' ttziya'n Dyos te kjalu:¹⁸Che chmetel tyajajila tu'nel Isaak, chij.¹⁹Qu'n q'uqlixi'x tk'u'j Ab'raam qa atite Dyos tipumal tu'n kyjaw anq'in xjal tu'n kyxol kyimni; qu'mtzun tk'am jumajtl Ab'raam tk'wal naku'j ojetoq jaw anq'in kyxol kyimni.

²⁰Tu'n tokslab'l Isaak e'kub' tk'iwla'n Jakob' ex Esawu.

²¹Tu'n tokslab'l Jakob', tej ch'inxtltoq tkyim, e'kub' tk'iwla'n tk'wal Jse, ex kub'ten k'ulul twitz Dyos qejlkub' tib'aju' tal tb'aston.

²²Tu'n tokslab'l Jse kyejtma'n kye aj Israel tej tkyim, qa yajxi'tel che b'je'letz toju' tx'otx' Ejipt, ex kyejtma'n kye titi' kkyb'incha' ti'ju' tb'aqil ajkyetz toju' tx'otx' Ejipt.

²³Tu'n kyokslab'l tman Moyses b'enta' tewit oxe' xjaw kyu'n tej titz'ji; qu'n okna' kyka'yi'n qa tb'anilxi'xtoqju' tal ne'ẍ, ex min e'xob' teju' tchaq'b'il nimaqkawil toj Ejipt tej tmante tu'n kykub' b'yetju' tal q'a.

²⁴Tu'n tokslab'l Moyses tej ichantltoq, min taj tu'n tok te talju' tmyal Paraon;²⁵a jaw t-sk'o'nju' tu'n tb'aj yajla'n junx kyuk'i'l ttanam Dyos, qu'n min taj tu'n ttzalaj kyi'ju' achb'il intq'o'n il naq te jte' q'ij.²⁶Kub' t-xima'n Moyses tu'n tik'xju' yajb'il tu'n kse'n kyajtela'toq Krist, jun q'inumal nimxi'x toklen toj twitz kyetwitzju' kyq'inumal aj Ejipt; qu'n xi'toka'te Moyses twitz ti'ju' tu'me'l t-xel tb'anilxi'x ktzajel tq'o'n Dyos.

²⁷Tu'n tokslab'l Moyses etz toju' tx'otx' Ejipt, ex min xob' teju' ttx'u'jil nimaqkawil; kub' twab'a'ntib' b'a'nxi'x naku'j in ka'yink teju' Dyos min q'ancha'l.²⁸Tu'n tokslab'l Moyses kub' tik'sa'n tq'ij Tzaqpib'l ex tchaq' kye aj Israel tu'n tok kywitxk'a'n tchk'el jun tal rit ttzi kyja, tu'ntzun lalun che kyimju' tnejel kyk'wal tu'n anjl matxitoq txi' q'o'n toklen tu'n tik' b'yolkyeju' tnejel k'wal.

²⁹Tu'n kyokslab'l aj Israel eb'jik'tza' toju' Kyeq Ninnjab' naku'j nche b'et tib'aj tzqij tx'otx'; tetzunj kyik'tz lpe aj Ejipt kyi'j, lwiyxi'x e'kyaj jaq'wi toj a'.

³⁰Tu'n kyokslab'l aj Israel b'ajkub' tz'aqju' nintapi ti'jile nintnam Jeriko, kyb'ajlenxi' b'et wuq q'ij ti'jile.³¹Ex tu'n tokslab'l Raab' aju' qya ajpajil, min kyima' kyuk'ilju' xjal min nche niman te Dyos, qu'n e'tk'amju' kab'e' aj Israel e'pon ka'yil toj ewaj chq'o'nqe'toq kyu'n aj Israel.

³²¿Titi'tl kxe'l nma'ne' kyeye'? Lay kanun anb'il tu'n tb'aj ntx'olb'a'ne' kyeye' ti'j Kedeon, ti'j B'arak, ti'j Sanson, ti'j Jepte, ti'j Dab'i, ti'j Samwel ex kyi'j txqantl t-sanjelal Dyos.³³Tu'n kyokslab'l aj Israel ti'j Dyos, kub'kyi'j txqantl nimaqtnam kyu'n; ex tu'nju' e'kawin tojxi'x tnik'alti'j, kyk'amju' tzaj ttziya'n Dyos kye, expe' jpet kytzi b'alun kyu'n,³⁴e'kyupiju' q'aq' inxi'xtoq che k'ant, e'tzaqpaj te kamik tu'n k'uẍtx'e'nb'il, kyk'am kyipumal tej numjniqe'toq ex eb'jo'k kuw toj q'oj ex kub'kyi'ju' kyajq'oj kyu'n.³⁵Ate'qe' qya kyk'am jumajtlu' kychmil mujqa kyal qu'n eb'jaw anq'in.
Aye'tzun junjuntel eb'ajkub' b'yo'n ex min kyaj tu'n kxitzaqpi'n, qu'n atoq kyajb'ilu' tu'n kyk'monte jun anq'ib'l tb'anilxi'x.³⁶Aye'tzun txqantl eb'aj xmayi'n ex eb'aj jiku'n toj asyal, ex eb'ajkub' k'lo'n toj xpatx'k'uxb'il ex eb'jo'kx jpu'n toj kars.³⁷Ate' junjuntl eb'aj kub' b'yo'n eb'aj xon toj ab'j, eb'je'x jon tu'n job'l tze mujqa e'kub' b'yo'n tu'n k'uẍtx'e'nb'il. Aye'tzun junjuntl noq nche b'etje, oksa'nk ttz'umal rit kyu'n mujqa ttz'umal chib', prowqe'xi'x, intoq che b'isun ex inxi'x che yajlanjtz.³⁸Mixti' tu'me'l tu'n kytenju' wnaq lu kyxolju' xjal aj il twitz tx'otx', naqx eb'etje toj chq'ajlaj, kyoj k'ul, kyoj jul ex kyoj pik.

³⁹Mixtzunti' kyk'amju' tzaj ttziya'n Dyos kye, extzun eb'jo'k tnik'alkyi'j ex ten kyokslab'l ti'j Dyos;⁴⁰qu'n atitoq jun t-xim Dyos tb'anilxi'x qe, tu'ntzun kyok tz'aqlixi'x junx quk'i'l tu'n Dyos. Xi'tenka' qwitz ti'j Krist

¹Ikytzu'n, txoli'nk qi'j kyu'n wnaq lu oje kyyek'u kyokslab'l ti'j Dyos, che qq'onkju' ti'xti' nche mqonqe, exju' il in qo kub' tzpet tu'n, qq'onk tilil tu'n qojqelan ex tu'n tten qipumal toju' qb'e ljo'n.²Xi'tenka' qwitz ti'j Jesus, qu'n ti'j te ntzaj anq'ina' qokslab'l ex tu'nte ntenxi'x qokslab'l. Ik'xtu'n Jesus twitz krus ex min okten twitz ti'ju' tkamik ch'ixb'ajilx, qu'n b'i'ntoq tu'n qa tb'ajlenxi'ju' yajte'n ktzajel q'o'n tzalajb'il te, atzu'n ja'lo q'uqli toj tb'a'nq'ob' Dyos.

³Qu'mtzun che ximanqeye' ti'ju' yek'b'il tu'n Jesus, ik'xtu'n tej ojexi'x yajti kyu'n xjal aj il; qu'mtzun lalun che kub' siktiye' ex lalun che kub' numje'.⁴Qu'n na'mx tokxi'x tilil kyu'ne' tu'n kyq'ojine' tuk'i'l il, ex na'mx tik'xkyu'ne' kse'nte Krist,⁵expe' matxi' tzik'tna'l kyu'ne' aju' kynab'le' ntzaj tma'n Dyos tu'nju' ẍe'okye' te tk'wal. Qu'n intma'n toj Tu'jil tyol Dyos kjalu: Nk'wal, lalun tz'el tik'u'na kawb'ilteya tu'n Qajaw, lalunpe' kub' numja qama tzak'unjtza tu'n.⁶Inche ttzak'u'nte Dyosju' nche tk'u'jla'n, ex inttz'e'ysa'n kywitzju' nche tk'mo'n te tk'wal, chiju' tz'ib'a'n.

⁷Tzik'xku' kyu'ne' qa nche' kawinjtze' tu'n Dyos, qu'n inche oktq'o'ne' te tk'wal. ¿Ma atitzulo jun k'walb'aj min ntzak'unjtz tu'n tman?⁸Qatzun min nche tzak'unjtze' tu'n Dyos, kse'n ntb'incha'n kye kykyaqilju' tk'wal, mya'tzun tk'wal Dyos qexi'xtze'.⁹Expe' tej k'walqotoq, maqotzaj tzak'u'n kyu'n qman twitz tx'otx' ex intoq qo' niman kye. ¿Yajtzu'n ja'lo ma laytzun qo niman te Dyos Manb'aj ati toj kya'j, tu'n ttzaj tq'o'n qchwinqlal tejumajx?¹⁰In qo kytzak'u'nkye' qman te twitz tx'otx' toju' jte' q'ij qchwinqlal tzalu twitz tx'otx', kse'nxju' b'a'n toj kywitz; atzunte Dyos in qotzaj ttzak'u'n te jun b'a'n qe, tu'n qok te xjan kse'nte.¹¹Axxi'x tkyaqilte' tz'e'ysb'il qwitz myab'a'n inela' qe toju' kmuj ajqtzak'unjtz, qu'n ina' ch'yon; qatzun tokel qnab'lju' tz'e'ysb'il qwitz, qo tenb'iltzuntz toj nak'b'il ex tojxi'x tnik'alti'j. Xob'ajilx qama tz'el qik'o'n tyol Dyos

¹²Qu'mtzun, tenx kyipumalju' kyq'ob'e' matx che sit exqe' kych'ekye' matxi' che kub'numj,¹³ex kjyome' b'e tzinun, tu'ntzun tb'anix kyqane' kox ex tu'n lalun kub' koxix jumajtl.

¹⁴Kyq'onk tilile' tu'n kytene' toj nak'b'il kyuk'i'l kykyaqil xjal ex kyxjansam kyib'e'; qu'n aye' mya xjansa'nkyib' layx tz'ok kyka'yin Qajaw.¹⁵Kyka'yinx kyib'e' tu'ntzun mix-a'lo' junkye' kjelten miwtjun tk'maju' xtalb'il intzaj tq'o'n Dyos, ex tu'n mix-a'lo'wt junkye' tz'ok kse'n junwi' tze k'a tlok' tu'n tb'iyun kye xjal.¹⁶Mix-a'lowt junkye' tz'ok ajpajil ex lalunwt tz'el kyik'u'ne' Dyos tu'n tpaj te twitz tx'otx'; kse'n tb'incha Esawu, xitk'a'yi'n toklen te tnejel k'walb'aj naq tu'n tpaj ch'i'n tich.¹⁷Yajxi'tzuntel tej tjapun tq'ijlalil tu'n tk'iwlanjtz tu'n tman, el ik'u'n ex min tk'amtlju' k'iwb'il; maskyepe' oq' b'a'nxi'x, mixti'x b'ent tch'exb'etlju' ojetoq b'entti'j tu'n.

¹⁸Min ẍepon lq'ekye' t-xe witz Sinayi, kse'nkye aj Israel, intoq b'ent tka'yit ex tmkyet, intoq k'ant q'aq' ti'jile, qlolj ti'jile ex atitoq q'ankyaq ti'jile;¹⁹ex min kyb'iye' tq'ojq'ojel chun ex tq'ojq'ojel twi' Dyos. Qu'n aye' eb'inte tq'ojq'ojel twi' Dyos, ekub'san twitz Dyos tu'n lalun yolintl kye,²⁰qu'n exob' teju' chaq'b'il tzaj tma'n Dyos kjalu: Alkyete makub' tq'o'n tqan tib'aju' k'ul lu, kb'ajel xoyit toj ab'j mujqa toj ch'ut, maskyepe' jun txkup.²¹Tkyaqilju' intoq nok kyka'yi'n majxtoq xob'ajilx, ex aku'pe' Moyses q'mante: Inxi'x chin lu'lune' tu'n nxob'ele', chij.

²²Aye'tzunkye' ja'lo xi' ẍe ulaye' t-xe witz Syon ex toju' ninttanam Dyos itz', aju' Jerusalen ati toj kya'j, ex mache ule' tu'n kytene' junx kyuk'i'lju' txqan anjl b'u'yi'n kyib' tu'n kyajwalin tb'i Dyos,²³kxolju' tnejel tk'wal Dyos tz'ib'a'n kyb'i toj kya'j. Matxi' che ul lq'eye' tk'etz Dyos, aju' che okyel xjal te tkyaqil twitz tx'otx' toj xjel tu'n, ex mache' ul lq'eye' kyk'etzju' xjal oje che ok tnik'alkyi'j tu'n Dyos,²⁴Mache ule' tk'etz Jesus, aju' sul q'inte ak'a'j yol kyej b'entti'j tu'n Dyos quk'i'l, ex mache' ul lq'eye' tk'etz Dyos tu'nju' tchk'el Jesus el chitj ẍtilsab'lqe, qu'n b'a'nxi'xju' chik' lu kyetwitz tchk'el Ab'el.

²⁵Qu'mtzun kyka'yinxe' b'a'nxi'x tu'n lalun tz'el kyik'o'ne' Dyos ajtyolin quk'i'l. Qu'n qa min e'kletju' xjal e'el ik'onte Dyos tej tyolin kyuk'i'l tza'lu twitz tx'otx'; mitzunloyaqe lay qoklet qama tz'el qik'o'n Dyos ja'lo, aju' ntzaj yolin qe tzmax toj kya'j.²⁶Tej tyolin Dyos ojtxi' kye aj Israel majx yukchi tx'otx' tu'n tq'ojq'ojel twi', atzu'n ja'lo intma'n kjalu: Mya o'kxju' tx'otx' klu'lul jumajtl wu'ne', expe' klu'lulju' kya'j, chij.²⁷Atzunju' intma'n: Klu'lul jumajtl, chij, atz'elpuna'ju' qa tkyaqilju' b'incha'nqe' tu'n Dyos, aye' nche' yukch, kche b'ajel tu'ntzun kykyejten oqe'kxju' mixti' tu'me'l tu'n kyukchi.²⁸Qq'onx chjonte te Dyos tu'nju' ma qk'amu' tkawb'il mixti' tu'me'l tu'n tyukchi, ex qo ajb'en te Dyos, tu'ntzun ttzalaj qi'j, ex tenx tchiylal qe, ex qo niman te.²⁹Qu'n ikyte Qdyos kse'n jun q'aq' nb'aj tz'e'y tkyaqil tu'n. Se'n tu'n ttzalaja' Dyos qi'j

¹Kyk'u'jlam kyib'e' kukxju' kyxolilexe', qu'n kyitz'imile kyib'e'.²Ex lalun tzik'tna'l kyu'ne' tu'n kyoke b'a'n xjal kyeju' nche pon kyjaye', ate junjun mixti' kynab'en ti'j, qa ekyejten anjl wtal kya.

³Q'aq'anx kyk'u'je' kyi'ju' jpu'nqe', nakuxwitloj aye'x junkye' jpu'nqeye' kyuk'i'l, ex q'aq'anx kyk'u'je' kyi'ju' nche yajlanjtz, ku'xwitloj aye'x junkye' ate' toj yajtib'il.

⁴Kyq'onke' toklen mjeb'le'n kykyaqile' ex che tenkuye' b'a'n toju' kymjeb'le'ne'; qu'n kche okyelju' ajpajil toj xjel tu'n Dyos, ex ikqe'kxju' pa'l mjeb'le'n.

⁵Lalun che jamjone' ti'j pwaq; che tzalajxe' ti'ju' ati kyeye', qu'n oje tma Dyos kjalu: Layx kyej ntzaqpi'na ex lay kyej nq'o'na tjunila, chij.⁶Qu'mtzun b'a'n tu'n qmante ja'lu tu'n tkyaqil qk'u'j: Ate Qman Dyos onilweye'; mixti' tu'n nxob'e'. ¿Tixixti' kb'antel tb'incha jun xjal wi'je'?

⁷Kyna'ntze' alkyeqe' nejenel e'ten kyxole' ex alkyeqe' e'xnaq'tzante tyol Dyos kyeye'; che ximane' ti'ju' kyaq'unb'en ex kse'n xjapuna' b'aju' kychwinqlal, ex tenx kyokslab'le' kse'nkye.

⁸Axte Qajaw Jesukrist te' ewi, ja'lo ex tejumajx.⁹Lalun txikyq'o'n kyib'e' toj chukchaq xnaq'tzb'il junxi'tl mujqa taq'wix. Ate' b'a'nju' tu'n tkuwix qanmi tu'n t-xtalb'il Qman Dyos, kyetwitz tu'n kyxi' lpeye' kyi'ju' kawb'il kyib'aj chukchaq t-xilel wab'j tu'n txi' qwan; qu'n mixti'xkye' lu kyajb'en kye xjal.

¹⁰Ati junqe qq'olb'eb'l, aju' lay b'ent kywan ti'j, aye' inx che ajb'en toju' ojtxi' ja xjan.¹¹Qu'n ate' kynejel pale ojtxi' in okx kyi'nju' kychk'el alu'mj toju' xjan ja, te chojb'il kyil xjal, aye'tzu'n kyxmilal alu'mj lu nche kub' pati'n ti'jxi'ju' kyxmuj.¹²Qu'mtzun ikxte Jesus axtzu' kyima' ti'jxiju' tnam, tu'n kypon lq'e xjal tk'etz Dyos tu'nelju' tchk'el.¹³Ikxtzunqeju' qoqe' ex ti'jxi' tnam tuk'i'l Jesus, ex tzik'xku' qu'n tkyaqilju' sik'xtu'n Jesus.¹⁴Qu'n mixti' junqe qtanam tejumajx tzalu twitz tx'otx', tzma in qo jyon ti'j qtanam tzul yek'u'n.¹⁵Qu'mtzun qajwalinktz tb'i Qman Dyos kukxju' tu'nel Qajaw Jesukrist. Qu'n qa nqo ajwalin tb'i Qman Dyos, inxi' qq'o'n jun oyaj te tu'n qtzi. ¡Qajwalinktz tb'i Qman Dyos!¹⁶Lalun tzik'tna'l kyu'ne' tu'n kyb'inchanteye' b'a'n ex tu'n kyoninte kyi'j junjuntl; qu'n atzunte oyaju' intzalaj Dyos ti'j.

¹⁷Kynimanqexe' kynejele' ex kyb'inxe' kykawb'il, qu'n aye' nche xq'uqinju' kyi'je', ex ojtzqi'n kyu'n qa che okyele' toj xjel tu'n Qman Dyos. Qu'mtzun che b'inqeye' kye tu'ntzun tb'entju' kyaq'un toj tzalajb'il ex mya toj b'is, qatzun min, lay kykanb'aye' jun b'a'n.

¹⁸Che' na'nqe' Dyose' qi'je', qu'n q'uqli qk'u'je' qa b'a'nju' nqb'incha'ne', qu'n qajb'ile' tu'n qb'inchanteye' b'a'n toj tkyaqil.¹⁹Ex inxi'x xinqanine' kyeye' tu'n kyna'n Dyose' wi'je', tu'n tq'onte anb'il tu'n npon jumajtle' lwiy kk'etze'. Qaninjtz k'iwb'il kyi'j okslal

²⁰Aju' Dyos ntzaj q'onte nak'b'il, jaw anq'in Qajaw Jesukrist tu'n kyxol kyimni, aju' nimaq k'ik'lel kyi'j rit, ex tu'nju' tchk'el xkyaja' qexi'x tk'u'jlalilju' yol kyej b'entti'j tejumajx tu'n Dyos,²¹axwittzun Qman Dyos q'onte kynab'le' tu'n kyel b'a'ne' toj tkyaqil, tu'n kyb'inchanteye' tajb'il; ex ax Dyos kq'olte qipumal tu'n qb'inchante tkyaqilju' tajb'il, tu'nel Jesukrist. ¡Nimanjtzxwit tb'i Jesukrist toj tkyaqil tab'q'iyil! Ikxwitju'.

²²E' ntzik ex witz'in, nchin kub'sane' kywitze' tu'n tkub' kyb'i'njuye' yol lu, qu'n ati tajb'en kyeye' tu'n tok kynab'le', ex mya nim yol xxintz'ib'a'ne' kyeye'.²³Ex wajb'ile' tu'n kyb'inteye' qa matxi' tz'etz tzaqpi'n qitz'in Timotey toj kars, qa lwiy sul tzalu, kxe'l wiq'i'ne' wuk'i'le' ajnxi'ye' ka'yilkyeye'.

²⁴Che kyq'olb'enxe' kykyaqil kynejele' ex kkyaqilju' qtzik ex qitz'in toj okslab'l. Ex nche'x q'olb'ene' kyu'nju' okslal toj Italya.

²⁵Tenxwit t-xtalb'il Dyos kyuk'i'le' kykyaqile'. Ikxwitju'.

Bible Society in Guatemala

https://app.library.bible/content/aea9d9099feb3a24