Isaías 1を読んでください。

Isaías1

Aye' aj Juda jun nintnam aj il

¹Tpakb'ab'l Isayiy, tk'wal Amos, Tzaj tyek'u'n Qman Dyos te ti'j Juda ex ti'j Jerusalen, toju' tq'ijlalil ntoq che kawin nimaqkawil Usiy, Jotam, Akas ex Esekyiy.²Tma: Tx'otx' ex kya'j, kyb'intzju'ye' ntma'n Qman Dyos kjalu: Macheb'aj nch'isa'ne' nk'wale' ex mache b'ajch'iy wu'ne', aye'tzunkye mab'jaw kyi'nkyib' wi'je'.³Tojtzqi'nte wakx tajaw ex tojtzqi'nte b'ur twab'l tu'n tajaw; atzunte Israel, ntanamku'xi'xe' min neltnik' ex mixti' tnab'l.

⁴¡E' b'inchal il, jun tnamqe'ye' nojni tu'n il, kyyajajil b'inchal myab'a'n qe'ye', e' pi's k'wal qe'ye'! matz'el kypa'n kyib'e' ti'j Qman Dyos ti'ju' Xjan Kydyos aj Isarael. matxi' kyej kykolb'e'ne'.⁵Matxi' che b'je'l pi'se', mixjalojatl tu'n kyoka' jumete'. Tkyaqilju' kywi'ye' ex kyanmiye' b'ajni k'ixb'i.⁶Tzajnix t-xe kyqane' japumnix toj kywi'ye'. mixti'tl tb'anil; tkyaqil k'ixb'ni, b'ajni tx'inj ex tx'a'k, mix-a'lo' matxi' tz'ok ẍponte mo q'anante, matxiwit t'ole' tu'n aseyt.

⁷Matxi' kyej chq'ajlajixju' kytx'otx'e', ex nche jamun nimaqtnam toj q'aq'. Kywitzku'xi'xe' nche wan kyajq'oje' ti'ju' kyawale'. Tkyaqil matxi' kyej chq'ajlajix, kse'n tnam Sodom tej tkub' xitj.⁸Noq o'kxte tnam Syon xkyej we', tjunal naku'j jun pach toj awb'il, tjunalx xkyej ten naku'j jun pach txol txqan lob'j melon, naku'j nintnam txoli'nkyib' tajq'oj ti'j.⁹Noqwit min xkyaj tq'o'n Qman Dyos nimtipumal jte'tl qb'aj, ikywitlo xqo oka' kse'n Sodom ex Komor. K'u'lb'il axxi'x twitz Dyos¹⁰E'nejenel aj Sodom, kyb'intze' tyol Qman Dyos, tnam aj Komor, kyb'inku'ye' t-xnaq'tzb'il Qman Dyos kyeye'.

¹¹Lu ntma'n Qman Dyos: ¿Titi' k'ajb'ela' txqan kychojb'ile' weye? Matxi' chin siktiye' tu'n txqan chojb'il k'ok'sb'il patu'n rit, exju' ky-until qpoj wakx; min nchekub' kychk'el tman wakx, kychk'el tman rit ex kychk'el tman chib', toj nwitze'.¹²¿Alkye xq'mante kyeye' tu'n tb'aj kytxa'ju'ne' q'olb'eb'l weye' ajkyule' nwitze'?¹³Lalun tzaj kyi'ntle' oyaj mixti' tajb'en weye'; lay tzik'xju' kysb'el wu'ne'. Nche tzajkytxko'nju'ye' tnam, tu'n tkub' kyik'sa'n ak'a'j xjaw ex q'ij te ojlab'l, lay nk'amtlwe' kyninq'ije', b'inchal myab'a'n.¹⁴Nche el wik'u'nwe' kyninq'ije' toj ak'a'j xjaw ex kyb'uyjtib'ile'; ¡mixyab'a'nqe' kyb'inchb'aje' toj nwitze' layx che ik'xtl wu'ne'!¹⁵Kse'n njaw kyi'n kyq'ob'e' tu'n kyk'ulune', nxiwewa'nwe' nwitz kyeye'; b'a'nqa nim txqan kyna'j Dyose', lay che'x nb'i'ne'. qu'n b'ajni txa'j kyq'ob'e' toj chik'.¹⁶¡Kytx'jom kyib'e', kyẍtilsam kyib'e'! ¡Min wajb'ile' tu'n nka'yintetle' myab'a'n nkyb'incha'ne'! ¡Kytzaqpinkju'ye il!¹⁷¡Kyknome' tu'n kb'inchanteye' b'a'n, kyq'onk tilile' tu'n kyb'inchanteye' tnik'alilti'j, kyonimju'ye' tokx tjaq' jitz'b'il, kyb'inchame' tnik'alilti'j teju' meb'a, kyklome' toklenju' kyimni tchmil! chij.

¹⁸Intma'n Qman Dyos kjalu: Kukytzaje', qo'qe' yolin. b'a'nqa kyaqxi'xju' kyile', knẍtilsa'we' kse'n txun che'w; b'a'nqa ikse'n jun xb'alun xwoqi'n toj txqan tz'il, kẍnu'lixel kse'n saq noq'.¹⁹Qama chin kyb'i'ye' kynik'b'e'ye' tb'anil awal ntzaj toju' tx'otx';²⁰qatzun mache kyajtene' tojxju' kypi'sile', ilti'j che kyimele' toj q'oj. Chi Qman Dyos tzaj tma'n. Kt-ẍtilsa' Qman Dyos Jerusalen²¹¡Se'n taq'wi soka', b'a'n nintnam, junx tuk'i'l jun qya ajpajil! Kykyaqiltoq kye' xjal najlqe' toja tnik'alkyi'j nejtl ex b'a'ntoq kychwinqlal, atzu'n ja'lo b'yolxjal q'e'tl.²²Saqpwaq toqa tnejel, ja'lo matxi' tz'oka te tz'is, ikytoqju'ya kse'n tb'anil b'in, atzu'n ja'lo matz'oka naq a'tl.²³Majx pi'sqe' kawil toja kamiw kyib' kyuk'i'l eleq'. Kykyaqilx nkytzyu'n pwaq ti'j chajyolil ex axi'x kyajb'ilju' oyaj. Min nkyb'incha'n tnik'alilti'j teju' meb'a ex min nxikyka'yi'n toklen qya kyimni tchmil.

²⁴Qu'mtzun, ntma'n Qman Dyos nimtipumal, nimtipumal toj Israel: ¡O'kxtzu'n! kychja'kye' wajq'oje. Knq'a' tu'me'l t-xele' kye.²⁵K'aq'pomel jumajtl nq'ob'e' ti'ja, ex majx kb'ajel npati'ne' ttz'isa; knẍtilsa'ya te tkyaqilju' ttz'ilila.²⁶Knb'incha'ye tu'n kyok tajkawila kse'nx tnejel, exqe' q'ol nab'l kse'nxju' tnejel. K'okyel q'ontzun tb'itza Nintnam tnik'alti'j, Nintnam tz'aqlixi'x.²⁷Che ntzaqpi'ye' najlqe' toj Syon tuk'i'l tnik'alilti'j ex kolb'il, tu'n tanjtzkyi'j wuk'i'le'.²⁸Aye'tzu'n pi'sqe' ex aj il kche b'ajel npẍu'ne', ex che kyimelju' nchin nelkyik'u'ne'.²⁹K'elel kych'ixawe' tu'n b'ansi ex tu'n txqan awal ju' achb'ajilxi'x kyeye', janche k'uluna'ye' kye witzleb'.³⁰Che okyile' kse'n t-xaq b'ansi tzqij, ex kse'n awal mixti' a' toj.³¹K'okyelju' kuw xjal kse'n ttxa triy, ex k'okyelju' taq'unb'en kse'n q'aq' nel tx'itj: kykab'il che jamul junx ex mix-a'lo' kyupilte, chi Dyos. Ktenb'el nak'b'il tu'n Qman Dyos kyxol tnam

¹Aye' yol ja'lu tma Isayiy tk'wal Amos, ti'ju' tzaj tkyek'u'n Dyos te ti'j Juda ex Jerusalen:

²Toju' mankb'il tq'ijlalil kjel we'ju' witz jata' tja Qman Dyos. A witzju' nimxi'x twe' ktenb'el, nimxi'x twe' kyekywitz tkyaqil txqantl witz. Kykyaqil nimaqtnam che ul twitz,³che b'ju'l txqantl tnam, ex kyma': Kukytzaje', qo'qe' jax twi' witz jata' Qman Dyos, toj tja Qman Dyos, Tdyos Jakob', tu'ntzun ttzaj tye'k'un tb'eyil. tu'ntzun tb'ent qb'et toju' tb'e, chechi. Qu'n toj Syon ktzajela' xnaq'tzb'il, toj Jerusalen ktzajela' tyol.⁴Kxjelul Qman Dyos kyoj nimaqtnam ex kb'el tnk'u'n q'oj kyxol txqan tnam. Che b'ajel kyb'incha'n kyk'uẍtx'e'nb'il te toch'b'il tx'otx' exqe' kych'ut te semu'l. Mix-a'lo' jun tnam kjawil tiq'i'n tq'ojb'il ti'j juntl ex lay che xnaq'tzanjtl ti'j q'oj.⁵¡Qo'qe'ye' tyajajil Jakob', qob'et toj t-spik'umal Qman Dyos!. Tz'e'ysb'il kywitzju' pi'sqe'⁶Nman Dyos, matxi' kyej ttzaqpi'nju'ya ttanama, ju' tyajajil Jakob'; nojni kyu'n jyolkyi'j xjal, tzajniqe' tjawetzq'ij, e'ajpkab' kse'nqe' kyxol pilistey, nb'ent tten kyol kyuk'i'l najchaq xjal.⁷Nojniju' tx'otx' tu'n q'anpwaq ex saqpwaq, ex txqan k'uwenj; nim txqan chej ex txqan karwaj toju' tx'otx'.⁸¡Ex ikxnojni kyu'n witzleb'! Nche k'ulunju' xjal kyeju' dyos b'incha'nqe' tu'n kyq'ob', ex tu'n twi'kyq'ob'.⁹Makub' kyme'ssa'nkyib', ex matxi' che nu'tx'j. ¡Lalun kub' tnajsa'na kyil!

¹⁰Che okyexju' xjal kyoj pik, ex tjaq'xi' tx'otx'; che ewal twitz Qman Dyos xob'ajilx, teju' t-spik'umal tajwalil.¹¹Ati tu'n tel kych'ixawju' nkynima'n kyib'; ex tu'n kykub' me'sset. O'kxte Qman Dyos ktyek'u' tajwalil toju' tq'ijlalil lu,¹²toju' q'ij ajtjawti'ntib' Qman Dyos nimtipumal kyi'j kykyaqilju' xjal nkynima'n kyib' ex pi'sqe', ex kyi'j kykyaqilju' xjal nkyla'ji'nkyib' tu'n kykub' me'ssa'n;¹³kyi'j kykyaqilju' nok kyq'o'n kyib' kse'nqe' k'ute toj Lib'ano, nimaq kywe' ex ate'kx jawl, mujqa k'ol toj B'asan;¹⁴kyi'j kykyaqilju' nok kyq'o'n kyib' te nimaq witz mo k'ok'e' witz,¹⁵Kyi'j kykyaqilju' nok kyq'o'n kyib' te ja nimaq kywe' mo nimaqtapi,¹⁶kyi'j kykyaqil kyb'ark aj Tarsis mo tb'anil b'ark.¹⁷Majx k'elel kych'ixawju' nkynima'n kyib' ex nkyla'ji'nkyib'. O'kxte Qman Dyos ktye'k'u tajwalil toju' tq'ijlalil lu.¹⁸che b'ajel t-xitu'n tkyaqilju' witzleb'.

¹⁹Ajtjawti'ntib' Qman Dyos, majx kytzajel tchiylal kyi'j xjal twitz tx'otx', k'okyex kylmo'nkyib' kyojile jyom toj pik, kyoj jul twitz tx'otx'; che ewal twitz Qman Dyos tu'nju' t-spik'umal tajwalil.²⁰Tojtzu'n tq'ijlalil lu che elex kyxon xjal kywitzleb' kye ich' ex kye sotz', aye' witzleb' q'anpwaq ex saqpwaq kub'ni kyb'incha'n tu'n kyk'ulun kye,²¹k'okyixtzun kyq'o'nkyib'tz kyoj jyom t-xe pik, kyoj jul twitz pik, tu'n ewan twitz Qman Dyos xob'ajilx, ajtul qoptz'aju' tajwalil, ajtjawe' ex ajtkub' noj twitz tx'otx' tu'n xob'il.²²Lalun qetl kyk'u'je' kyi'j xjal, ¿qu'n titi' tajb'en?. naqna' jun jiq'chanxte' tchwinqlal. Tz'e'ysb'il kywitz aj Juda ex aj Jerusalen¹¡Kyb'intz pekye'! Che eleltiq'i'n Qman Dyos nimtipumal kykyaqilju' nche q'onte tkyaqil kye aj Jerusalen ex aj Juda ex tkyaqilju' kywa ex kychewa.²Kb'el naju' kuw xjal exju' q'ojil tu'n, e'ajkawil ex sanjelal, e'ajna ex tijwnaq,³e'nejenel ex nimaqxjal, e'q'olnab'l, e'ajpkab' ex ajk'a,⁴ex k'walqe' che okyel tq'o'n te kynejel; tal q'aqe' che kawil kyib'aj.⁵Iktzun kb'ajelju' toju' tnam, che q'ojil jun ti'j juntl, expe' kyxol kamiw kyib'. Che q'ojilju' ku'xun kyi'j tijwnaq, ex che q'ojil prow kyi'ju' q'inun.⁶Okpe' kxe'l tma'n jun k'walb'aj te ttzik mo titz'in toj tja tman kjalu: Atipenata ti'j tu'n toktq'o'na; toka te qnejile'; kawina kyib'aju' txqan ttx'aq'a'n ja lu, chiku'.⁷Atzu'n juntl kxel ttzaq'we'n: Lay b'ent kyxi' woni'ne' ti'ju' taq'wix saj lu, mixpeti'we' nwa nja ex wi'je' tu'n tokset. Lalun chin okkyq'o'ne' te nejenel toju' tnam, chiku'.⁸Axxi'x matxi' kub'te' Jerusalen, makyej xitju' Juda, qu'n nche q'manjtz ex nche b'inchanjtz taq'wix twitz Qman Dyos atzu', tu'ntzu'n noka' kyq'o'n ttx'u'jil Qman Dyos.

⁹Axpe'na' kyb'inchb'en poqilkye; layx b'ent tewitju' kyil; junqe'x kse'n tnam Sodom, majx nxikypakb'ankyib' kye xjal. ¡Layqe'xwit, aye'x nche tzaj q'inte tq'ob' tze toj kywi'!¹⁰K'i'wla'nte' tnik'alti'j, qu'n b'a'n kxe'la ex ktnik'b'e' taq'unb'en.¹¹¡Malayxwitju' b'inchal myab'a'n, mixyab'a'n kxe'la'! Kb'el ttz'e'ysa'n Qman Dyos twitz tu'n tpaju' tb'inchb'en.

¹²K'walte' nimaqkawil nyajun tib'aj ntaname' ja'lo; toj kyq'ob' qya ta'ju' kawb'il ja'lo. Inkub' sb'u'na' kyu'n tnejenela ntanam, toj junxi'tl b'e nxa' q'i'na kyu'n.¹³B'incha'ntltib' Qman Dyos tu'n t-xjelun, ex tu'n t-xitljo'n ttxolil kawb'il ti'ju' ttanam.¹⁴Che ttxka' Qman Dyos tijwnaq exqe' nejenel toju' tnam, tu'n kyok toj xjel kjalu: Mab'aj kyaju'ne' tqan wawale'; mab'je'l kyalq'a'ne' ati kye prow, ex mab'ajx kyk'u'ne' kyeleq'e' kyjaye'.¹⁵¿Ti'tzu'n kyoklene' tu'nju' nche oktene' yajulkye ntaname' ex nche kub' kywab'e'ne' prowqe'? Chi Qman Dyos nimtipumal. Tz'e'ysb'il kywitzju' qya aj Jerusalen¹⁶Ikx tma Qman Dyos: Aye' qya aj Jerusalen, inxi'x kynima'n kyib', nkyb'aq'la'n ti'jkywi' ajkyb'et, elsal ch'xawqe' b'o'schaq txol kyqan nche b'et naku'j nche b'ixin, inxi'x che chilub'ti u'wj ti'j kyqan,¹⁷kb'eletz nq'uli'ne' kywi' te tz'e'ysb'il kywitz ex majx k'elil kych'ixaw, chi Dyos.

¹⁸Toju' Q'ij lu, kb'je'lel tiq'i'n Qman Dyos tkyaqill u'wj, nb'jo'k ti'j qanb'aj ex tzuyb'il wi'yj,¹⁹e'tojẍkyinb'aj, tqulq'ob'aj, su'tj txayl towi'yb'aj.²⁰k'alb'il wib'aj, tal xpatx'k'uxb'il ti'j qanb'aj, pasj, k'ok'sb'il, kolb'il qanb'aj,²¹e'xmilq'ob'aj, ex u'wj nche ok ti'j txa'nb'aj,²²e'tb'anil xb'alun, xb'alun te xmuj, ẍa'y exqe' tq'ob'pa,²³e'ka'yb'il witzb'aj, tb'anil xb'alun, si'pj.²⁴Tzu'wil ktenb'el t-xel k'ok'sb'il, aqwil te t-xel pasj, sk'o'j wi'yj te t-xel xyeb'i'n wi'yj, tx'a'y xb'alun te t-xel tz'umin xb'alun, jun sleq'ub' te t-xel tb'anil ka'yin.²⁵Aye' t-xjala che kb'el b'yo'n, che kyimelju' t-xjala te q'oj toj q'oj.²⁶Kjawil oq'e'n toju' nintnam ex che b'jo'kyel xb'alun jochin, ex majx kjel kolb'i'n.¹Naq jte'xtl ichan che kjel toju' tq'ijlalil lu wuq qya che q'ojil ti'j jun ichan ex kxe'l kyma'n te: Ayo'xqe' qok'a'cha'lteqib'e' ex ayo'xqe' qoktxulqib'e', naq o'kx tu'n toka te qchmile' tu'n lalun qokyaje' toj ch'ixb'ajil, chechi. Tzul q'uqb'ab'l k'u'jb'aj te tzalajb'il²Tzul tq'ijlalil, che poq'chajelju' kyxul tu'n Dyos, wiqb'il ex ajwalb'il kyeju' che kjel anq'in toj Israel; k'okyelu' twitz awal kjawil twitzju' tx'otx' te ajwalb'il ex te ninb'ilkye.³Aye' che kjel anq'in toj Syon, exqe' che kjel anq'in toj Jerusalen k'okyel q'o'n kb'i q'o'nkyib' toj tq'ob' Qman Dyos.⁴Ajtmante Qman Dyos tu'n ttz'e'yset kywitz ex ajtkub' ttz'e'ysa'n kywitz, kt-ẍtiljsa'ju' tnam Jerusalen teju' kychk'lel q'a xb'je'l, ex kttx'ja' kytz'ililju' najlqe' Syon.⁵Ktzajel tq'o'n Qman Dyos jun qxopin muj te q'ijl atzun jun te qonik'an ntilky'aj tqan q'aq' tib'aj tkyaqilju' witz Syon ex tib'aju' tnam b'u'yi'ntib' atzu'. Tib'ajtzun tkyaqil ja'lu, ktenb'elju' tajwalil Qman Dyos,⁶Te xq'uqilkye ex klol kye; k'ajb'el te kyxlekun te ttantonil q'ij ex kolb'ilkye jb'al ex te q'ankyaq. Techlal ti'ju' awal tqan ub'a¹Kxel nb'itza'ne' b'itz toj tb'iju' tb'anil wamiwe' nyolin ti'ju' tawal. Atitoq jun tnej tawal wamiwe' toj jun tb'anil tx'otx'.²Jaw tq'u'n tokel, ex b'jaw t-sk'o'n ab'j toj. tb'anil ij xitawa'n. Jawtb'incha'n jun tal pach nimin twe' toj nky'ajchaq awal ex jawtb'incha'n jun tkub'ilu' lob'j jatu'n tb'incheta' b'in. Atoq tajb'ilju' tu'n tel chi' tawal, atzunte' twitz lob'j el k'a.³Kymantz tzune' ja'lo alkye ati tpaj, aye'ye' najlqe' Jerusalen, ex aj Juda, qa aju' awal mujqa ayine'⁴¿Ti'toqtzunlo juntl ti'xti' tu'n tb'inchet ti'ju' wawale'? ¿Mujqa ati jun ti'xti' min xinb'incha'ne' ti'j? Wajb'iltoqe' tu'n tel chi'ju' twitz, ¿Tiquntzunlo sela' k'a?⁵Kxe'l nma'ne' kyeye' titi' knb'incha'ye' ti'ju' wawale': k'elel nxitu'ne' ch'laj tu'n tb'aj yajti; k'elel ntx'u'yi'ne' tapi tu'n tb'aj wab'e'n;⁶kjel ntzaqpi'ne'. Lay b'je'l tq'ob' ex lay jaw xb'oqet k'ul toj, kb'el k'ulixtzuntz ex lay tz'aq'unettel. Kxel nma'ne te muj tu'n lalun tzaj tq'o'n jb'al tib'aj, chi Dyos.⁷Ate' tawal Qman Dyos nimtipumal ju' nlaqj ti'j, aju' tnam aj Israel, aju' tnam aj Juda. Atoq tajb'il Qman Dyos tu'n kynimanteju' tkawb'il, extzun naq b'yojwnaqi'n nb'aj toj; tajb'iltoq tu'n tb'inchanjtz tnik'alilti'j, ex naq sich' te k'ixk'oj ntzaj tb'i'n. Xob'tzb'il kyeju' b'inchal myab'a'n⁸¡Qab'anx kywitze', naq nche b'aj lq'on kyjaye', naq nche' lq'on txqan kytx'otx'e', mixpeti' tkub'el juntl kyu'ne', nche najane' nakuj oqe'kxe' ate' toju' tnam!⁹Matzajttziya'nte Qman Dyos nimtipumal weye': Che b'elxitit nim ti'xti'; b'a'nqa nimaq ex tb'anilqe', mix-a'lo'xte knajal kyoj.¹⁰Ch'inxmi jun kyjaj ub'a naq jun b'aril ta'l k'elil. Lajoj kostal ij triy, noq jun kostatl ktq'a'.

¹¹¡Qab'anx kywitze', b'a'n prim nche tx'ujtiye', tu'n q'e'n nche kyaja'tene' nb'aj qonik'an!¹²Ati chnab' arpa kukxju', e'tzintzin, e'tunk'al ex e'xux, nim q'e'n atl junjun nimaqwan kyu'ne'; mixtzunti' nxikyka'yi'ne' tb'inchb'aj Qman Dyos, ex min nche' ti'ju' taq'un.¹³Qu'mtzun k'elex q'i'n ntaname' ti'jxi'ju' tx'otx', tu'n tpaj min kyajb'il tu'n telkynik'. Tkyaqilju' tnam kyuk'i'lxi' nejenel, che kyimel tu'n we'yaj ex k'waj.¹⁴Inxi'x xitk'ab'a'n muqb'il toj ttzi, naku'j jun txkup, tu'n t-xitb'ilq'u'n tnam kyuk'ilxi' nejenel, aye' ate' toj achb'il ex toj kytzalajb'il.¹⁵Majx che kjel me'sa'nju' xjal; che kb'el tzipeju' nkynima'n kyib'.¹⁶Ktyek'u' Qman Dyos nimtipumal tajwalil ajkyok xjal tu'n toj xjel; ktyek'u' Qman Dyos t-xjanb'il ajtb'inchante tnik'alilti'j.¹⁷Che b'ajel xitju' nimaqtnam rit qekye' che wal kyoju' ttx'anqa'n ja.

¹⁸Qab'anx kywitze' tu'nju' q'i'n taq'wixil kyu'ne' tuk'i'l chajyolil, k'lo'nqe'ye' tu'n il, kse'n taq'e'l jun karet jwob'lte.¹⁹Aye'ye' nkyma'ne': tb'inchaxwit Dyos tkyaqilju' ti'xti', tu'ntzun qka'yinte; tb'inchaxwit Dyos Xjan toj Israel ojqel, tu'ntzun qlonte, chechije'.²⁰¡Qab'anx kywitze', aye'ye' inokkyq'o'ne' myab'a'n te b'a'n, atzunju' b'a'n te myab'a'n, nokkyq'o'nju'ye' spik'un te qxopin, atzu'n qxopin te spik'un; nokkyq'o'ne' k'a te chi', atzu'n chi' te k'a!

²¹¡Qab'anx kywitze', aye'ye' ati kynab'le' toj kywitze' ex b'a'n kyximanteye' toj kywitze'!²²¡Qab'anx kywitze', aye'ye' kuw che k'wan q'e'ne', ex mix-alo' nb'ent q'e'n tu'n kse'n nkyb'incha'ne'!²³Aye'ye', naq tu'n pwaq nok kyq'o'ne' xjal mixti' til ex mixti' nok kyq'o'ne' toklenju' mixti' til.²⁴Qu'mtzun, kse'n q'aq' nb'aj ttz'e'ysa'n ttxa triy atzu'n taq' q'aq' nb'aj tjamu'n maj, ikxtzun che b'ajelaju'ye', kse'n awal inb'aj q'ayj tlok' exqe' tb'echil nche kub' q'ulj nakuj quq. qu'n nelkyik'une' t-xnaq'tzb'il ex tchaq'b'il Qman Dyos nimtipumal, ju' xjan Dyos toj Israel.²⁵Tu'ntzun tpaju' lu matzaj ttx'u'jil Qman Dyos ti'ju' ttanam, ex matzaq'pon tq'ob' tu'n ttz'e'yset kywitz. Eb'jaw lu'lunju' witz, eb'ajkyaj xonju' kyimni toj b'e naku'j tz'is. Na'mxpetzun tqjenju' ttx'u'jil Qman Dyos; kukx tjawtiq'i'n tq'ob'ju' tu'n tq'ojin.

²⁶Majaw tq'o'n Qman Dyos jun t-sut tnam ex matxi' t-ẍut'in juntl tnam najchaq ta'; nche tzaj tiq'i'nju' najchaqxi'x ta'qe'. Nche tzajtzuntz ojqelxi'x;²⁷mix-a'lo'x jun numjni ex siktni kyxol, mix-alo' jun mya'wit itz' b'a'nxi'x, mix-a'lo' jun mya'wit jtz'o'n tk'u'j b'a'nxi'x, ex mix-a'lo' jun ẍla'qwit taq'i'l t-xajab'.²⁸Ch'ut-xi'x kywi' tal kysmaj ex jtz'o'n kysmaj b'a'nxi'x. Tx'e'ju' k'uxb'il toj kyqan kychej naku'j ab'j, exju' tul tqan kykarwaj naku'j xkyeqchanpach;²⁹Iky tq'ojq'ojelju' kse'n ntzanun jun b'alun, ntzanun ajttzyet tchi', mix-a'lo'x kb'antel tel q'inte te.³⁰Ajtponju' q'ij q'ma'ntl, ktinulju' nintnam lu kse'n ninnjab' ti'j Israel; qatzun a'lo' nka'yinte tx'otx', ktla' kyajni toj qlolj kb'el jupe'qwitz tu'n txqan muj. Txokli Isayiy

¹Wile' Qman Dyos toju' ab'q'i tkyim nimaqkawil Osiy, q'uqlokx tib'aj jun tq'uqb'il nimin twe'; noj toju' ja te k'u'lb'il tu'n ttxa'n ttxo'w.

²Tokx jte' anjl tib'aj naku'j q'aq'. Qaqchaq kyxik' teyile junjun. Kab'e' kyxik' jpulte kywitz, ex kab'e'tl jpulte jni'tl kyxmilal, kyu'ntzu'n kab'e'tl kyxik' nche lipana'.³Ex ntoq kyma'n kyxolx:
Xjan, Xjan, Xjante' Qman Dyos nimtipumal; nojni tkyaqil twitz tx'otx' tu'n tajwalila, chechij.

⁴Tej tjaw tq'ojq'ojel kywi', majx b'aj lu'lun tjpel tja Qman Dyos ex kub' noj tu'n txqan sib'.

⁵Ex kub' nxima'ne' ¡Qab'anx nwitze', chin kyimilwe'!, mana' wile' Nimaqkawil, aju' Qman Dyos nimtipumal, tu'nku' nwitze'; xjal qina'we' mixyab'a'n nb'je'tz toj ntziye' twitz Dyos ex ikyqe'x tnam xjalju' janajlqine', nchije'.

⁶Tojtzu'n kmuj lu tzaj lipan junju' anjl naku'j q'aq' nk'etze'. Q'i'n jun ttxalq'aq' tu'n tzyu'n kyu'n txqan tx'ab'l, jawtiq'i'n tib'aju' q'olb'eb'l,⁷oktq'o'n ttxalq'aq' ti'j ntziye', tmatzuntz:
Ka'yintza, matz'okju' ttxalq'aq' lu ti'j ttziya. matxi' tz'elju' tila, matxi' b'ajkub'najset tila, chij.

⁸Xi'tzun nb'i'ne' toj twi' Qman Dyos, intoqtma'n:
¿Alkye kxe'l nchq'o'ne'? ¿Altzunkye qsanjelal?, chij.
Ayintzunwe' xintzaq'we'ne': Luqine' lu, chin tchq'onxa, nchije'.

⁹Tzajtzun tma'n weye': Kutxi'ya ex q'manxa teju' tnam kjalu: maskye makyb'iye', layx kane toj kywitze'; maskye makyile', layx tz'el kynik'e' ti'j, chiku'ya.¹⁰Q'imila kynab'lju' tnam lu; jpuma kyẍkyin ex jpunka kywitz tu'ntzun lalun kyka'yi ex tu'n lalun kyb'i, ex tu'n lalun kane toj kywitz, tu'ntzun lalun che b'ju'ltl nk'etze' ex lay che nq'anaye', chi Dyos.

¹¹Xitzun nqani'ne' te: ¿Jtojxixtzun, taye? nchije'.
Atzunte tzaj tma'n weye:
tzmaxi'j ajkyb'aj xitju' nimaqtnam ex mix-a'lo' juntl najli kyoj; tzmaxi' mixti'tl xjal najli kyoju' ja. ex matxitoq kub' chq'ajlajixju' kytx'otx',¹²matxitoq che b'je'x q'i'n xjal ti'jxi' tx'otx' tu'n Qman Dyos, ex matxitoq kyaju' tx'otx' mixti'tl najalte.¹³Qatzun makyajten tlajoji'n tnejtlju' tnam, ikx che b'ajel xitet, kse'n ajtkub' tx'emit jun k'ol mujqa b'ansi o'kxtl tkuchmal kjelten. (ti'jtzu'n tkuchmal lu k'eletza jun t-xul xjan), chi Dyos. Tnejel tpakb'ab'l Isayiy te Akas

¹E'tzaju' nimaqkawil Resin, aj Sirya, exju' nimaqkawil Peka, aj Israel, tk'wal Remaliy, q'ojil ti'j Jerusalen, kyajb'iltoq tu'n tkub'ti'j kyu'n ex min b'ent. B'aj ja'lu tej toktoq Akas, tk'wal Jotam ex tchman Osiy, te nimaqkawil toj Juda.²Pontzun tqanil teju' nimaqkawil Akas ex kye toj tja, ikjalu: Matxi' tz'ok kymujb'a'nkyib'u' aj Sirya kyuk'i'l aj Eprayin. E'aq'witzun nimaqkawil lu'lul tuk'ilju' tnam kse'n tze nche yukchi toj k'ul qa njub'in kyq'iq'.

³Tzajtzun tma'n Qman Dyos te Isayiy kjalu: Q'inxa Sear-yasub' ju' tk'wala ex kutxi'ya nelte nimaqkawil Akas ttxa'n tb'e a' jata' nin tk'b'el a', toju' tb'eyil tx'ajb'il,⁴q'manxa te kjalu:
Ka'yinxtib'a ex lalun jaw sak'puja; lalun xob'a ex lalun tz'oka ẍuj kywitzju' kab'e' ttxa'n si nche qusin, a Resin kyuk'i'l aj Sirya, exju' tk'wal Remaliy, nche k'ant tu'n kytx'u'jil.⁵Matxi' kyej b'entti'j jun kyxim aj Sirya kyuk'i'l tyajajil Eprayin ex tk'wal Remaliy, taq'wix ti'ja. Inkyma'n:⁶Qtzyuku' kytx'otx' aj Juda ex che qxob'sanx; qetzaku' ex qq'oku' tk'wal Tab'el te nimaqkawil kyxol, chechi.⁷Atzunte Qman Dyos ntma'n: ¡Lay japunte' lu!⁸Ate Damask ttxuylaltnam toj Sirya, atzun Resin nimaqkawil toj Damask; ex a Samarya ttxuylaltnam kye tyajajil Eprayin, atzunju' tk'wal Remaliy nimaqkawil Samarya; tojtzun oxnaq jwe' (65) ab'q'itl kb'el naj Eprayin te nintnam; ikxtzunkye' qa min xten kyokslab'le' axxi'x, lay che kyajtene' wa'lqe'ye', chi Dyos. Tkab' pakb'ab'l: ti'tz'jlen Manwel

¹⁰Ex tma Qman Dyos te Akas:

¹¹Qaninxchaqa te Tdyosa tu'n tb'inchante jun b'a'nq'ob'aj teya tu'n tajb'en tejun techlal, b'a'ntzun tzmax kub'l t-xexi' mujqa tzmax toj ninkya'j, chij.

¹²Xi'tzun ttzaq'we'n Akas: Lay, lay njoywe' ti'j Qman Dyos tu'nwt txinqani'ne' jun techlal te, chij.

¹³Xi'tzun tma'n Isayiy te:
Kyb'intze', aye'ye' toj tja Dab'i, nimaqkawil. ¿Ma min nqe kyk'u'je' nche yajune' kyi'ju' xjal, ex ikx nche yajune' ti'ju' Nmane' Dyos?¹⁴Ja'lo axte Qman Dyos kq'olte jun techlal: Ch'onwi'ju' txin k'itz'jel jun tal, Manwel tb'i k'okyel tq'o'n.¹⁵Kyes ktwa tuk'i'l ta'lkab' toj tne'ẍal.¹⁶Na'mxtoqtzun t-spik'e' tuk'ilju' k'wal, kjel kolb'e'n kytx'otx'ju' kab'e' nimaqkawil nxob'a kye.

¹⁷Ktzajeltzun tq'o'n Qman Dyostz jun tq'ijlalil b'ajx tzaja' tq'o'naxi' tib'aja, tib'aju' ttanama ex tja tkawb'ila, atxi'x telen tpa'ntib' Eprayin ti'j Juda. (Xi' nyolina lu ti'j nimaqkawil aj Asirya).

¹⁸Tojtzu'n tq'ijlalil lu che tzajel tiq'i'n Qman Dyos ju' xjal najlqe' ttziyile a' Ejipt kse'n txqan a'jin, ex che tzajel tiq'i'nju' najlqe' Asirya kse'nqe' onon nche jamun.¹⁹Kykyaqil che ul ex che b'elten toj nin chq'ajlaj ex kyoj jyom toj pik, kyxol txqan ch'i'x ex janche k'wana' wakx.²⁰Tojtzu'n q'ij lu k'ajb'elu' nimaqkawil aj Asirya tu'n Qman Dyos naku'j k'upb'il ntzaj majinet jlajxi' nin a' Ewprates, kb'je'lel tjon t-xya'mal kywi' aj Israel e'kyxmatzi e'txya'mal kyxmilal.

²¹Tojtzu'n tq'ijlalil lu, alqe makub' jun tal twakyix ex kab'e' tal trit²²nim tlech ktenb'el, kwal kyes. Ex kykyaqilju' mache klet toju' xitb'ilte tnam che wal kyes ex ta'lkab'.

²³Tojtzu'n tq'ijlalil lu, aju' jun tnej awaltoq te kab'k'al lajnaq (1,000) wi' ub'a ex te kab'k'al lajnaq (1,000) saqpwaq twi', kb'el k'ulix ex ktzajel ch'iy txqan nimaq ch'i'x toj.²⁴Naq yol txkup kb'antela' kyokx xjal smajil atzu', qu'n tkyaqilju' tx'otx' kb'el k'ulix kb'el noj tu'n ch'i'x.²⁵Mix-a'lotlte kxe'l kywi'yile witz jannoka'toq awal nej, qu'n ch'i'xiletlte' ex txqan k'ul nimaq. Naq k'ik'leb'l wakx ex rit k'okyela'tl. Oktq'o'n Isayiy tb'i jun tk'wal te techlal

¹Tzaj tma'n Qman Dyos weye': Q'intz jun nin tz'lena ex tz'ib'anku'ya twitz, tuk'i'l techtz'ib' q'ancha'l ex ojtzqi'n kjalu: Maer-salal-asb'as.²Q'inqe'tz tzuna pale Uriy ex Sakariy tk'wal Jeb'erekyiy te tziyal q'uqli kyk'u'jlalil, chij.

³Yajxi'tzuntl nkub' kẍeye tuk'i'l sanjelal qya, ju' nxu'jile', ex oktiqa'n twi' jun tal ex itz'jiju' tal. Tzajtzun tma'n Qman Dyos weye': q'onka tb'i Maer-salal-asb'as.⁴Qu'n na'mxtoqpe' tmante k'wal tat ex nan, che okyel leq' toj Damask ex Samarya, kb'ajxel q'i'n kyq'inumalju' tnam te nimaqkawil aj Asirya, chi Dyos.⁵Ex tzaj tma'ntl Qman Dyos weye':

⁶Naq tu'n kyxob'el te Resin ex te tk'wal Remaliy nela' kyik'u'n a' toj Siloe, ju' chab'axi'x nb'et,⁷ktzajel tiq'i'n Qman Dyos tnimal a' Ewprates kyib'aj (aju' nimaqkawil aj Asirya tuk'i'lxi' tkyaqil tipumal) Kb'ajel tyaju'n tkyaqilju' tb'eyil, ex kpiq'chajel ttziyile,⁸k'i'k'el tzmax Juda ex knojel tu'n, kjapumelte' tzmax tjaq' tqul. Ikyk'okyela' kse'n jun pich' lik'u'n toj t-xik', Emanwel, knojel toj tkyaqilju' ttx'otxa tu'n.

⁹Kyb'uyintz kyib'e', nimaqtnam, ex tzajx tchi kyi'je'; kyb'intz jaye'lu kykyaqile' najchaq tnam: b'a'nqa matz'ajb'en kyq'ojb'ile', ktzajel ttchi kyi'je' axxi'x, maskye matz'ajb'en kyq'ojb'ile', kb'elkyi'je'.¹⁰Mixti'x k'okyela'te' kyxime', qu'n kb'el xitjte'; maskye ma kyb'inchaye' ti'xku' kyajb'ile', layx japun, qu'n atite Dyos quk'i'le'. Te Qman Dyos tu'n kyxob'a'kye'

¹¹Inkub' ttzyu'ne' Qman Dyos kuw ex tzaj tab'tzi'n tu'n lalun txi' nljo'ne' kyb'e xjal lu. Chij kjalu:

¹²Lalun kymaye' qa chin jawil miltz'uje' kyi'je', kse'n nkyma'n tnam. Lan che jaw sak'puje' ex lalun che xob'e' te tkyaqilju' nq'manjtz kyeye'.¹³Weye' tu'n kyxob'a'kye' ayine' Dyos Manb'aj nimwipumale', qu'n xjan qinwe'; tenx nchiylale' kyeye' ex che xob'e' nwitze'.¹⁴Chin okyele' kse'n jun xpatxab' kyeye'; jun ab'j ja che jawila' trakpuje', ja che jawila' tz'aqu' kab'e' kykawb'il aj Israel; naku'j xpatxab' ja che jawila' tz'aqju' aj Jerusalen.¹⁵Nim che jawil trakpuj, che jawil tz'aq ex che kyimel; nim che tzyetil toj xpatxab', chi Dyos. Toqxenb'il Isayiy kye t-xnaq'tzb'en¹⁶Kyiq'ime' tqanil lu b'a'nxi'x; kyewanxe' chik'b'ab'l lu exqe' nxnaq'tzb'ile'.¹⁷Maskye matxitewa'ntib' Qman Dyos kye tyajajil Jakob', q'uqliwe' nk'u'j ti'j. Matx tz'okqewe' nk'u'j ti'j.¹⁸B'a'nq'ob'aj qo'qe' kyxol aj Israel kyuk'i'lju' nk'wale' e'tzaj tq'o'n Qman Dyos, okub' tq'o'ne' Qman Dyos nimtipumal najli twi' witz Syon.¹⁹Qama kyma xjal kyeye': Kyjya'kkyi'je' kyuk'i'l txkol anmi ex kyuk'i'l ajpkab' nkych'ixpu'n toj kywi' ex nche jasjne. kytzaq'wenxe' kye ¿Ma laytzun b'ent t-xjelun jun tnam te Dyos, ma kyetzun kyimni qo xjelula' kyi'ju' itz',²⁰tu'n ttzaj kyq'o'n qnab'l mujqa jun tpakb'al? chechiku'ye'. Qa min nche yolin kse'n tchaq'b'il Dyos, naqx toj kywitz nok.

²¹Naq kche b'etjel kye' xjal, jtz'o'nqe' ex nche we'yajti, tu'ntzu'n we'yaj tzul kytx'u'jil. Ktzajel kytxko'n toj twi'ju' kynimaqkawil exqe' kydyos. Nche jaxxi' ka'yin twitz kya'j²²yajxi'tzuntl che b'elka'yin twitz tx'otx', naq prowil ex qxopin k'okyil kyka'yi'n, oq'el ex qlolj. tkyaqil majx kb'el yupj. Titz'jlen ex tkawb'il nejenel te nak'b'il

¹Tnejelxi'x kub' tme'ssa'n Qman Dyos Kaliley, kytx'otx' Sab'ulon ex Neptali, nqayin tk'etz kytanam witzleb'il, ntzajx jlajxi' Jordan ex nponx tzmax ttzi ninnjab'; yajxi'tzuntl jaw nima'n.²Aju' tnam atitoq toj qxopin til jun nin spik'un; maqoptz'aj jun spik'un, kyeju' najlqe'toq toj qlolj.³Nman Dyos, jun nin tzalajb'il saj tq'o'na; nimxi'xju' tzalajb'il. Kykyaqilx nche tzalaj twitza kse'n ajtb'uyet twitz awal, kse'n kytzalajb'il xjal ajtb'ajx sipa'n txqan ti'xti' kye.⁴Qu'n makub' t-xitu'na yajb'il tib'aju' tnam, ju' jitz'b'il nche uxin toj, jni'xju jitz'b'il saj kyi'j. Kse'n b'aja' t-xitu'na tnam Madyan.⁵Che b'eltz'e'ysa'n kyxajab' xjal te q'oj nxi'xtoq che q'ajti e'xb'alun b'ajni txa'j toj chik' tu'n kyb'aj toj q'aq'.⁶Qu'n matz'itz'ji jun k'wal qxol matzaj tq'o'n Dyos jun k'wa'lb'aj qe ex matz'okq'o'n toklen tu'n tkawin. Che okyel q'o'n tb'i kjalu: Q'ol nab'l te lab'te'nxi'x, Dyos nimtipumal, Manb'aj tejumajx, Nimaqkawil te nak'b'il.⁷Kb'el qe toj tq'uqb'il Dab'i; kch'iyelju' tkawb'il toj tkyaqil plaj; ex lay b'aj ttxa'n nak'b'il ktenb'elju' tkawb'il wa'lxi'x. a tq'uqlilju' tnik'alilti'j ex toj tu'me'l. te ja'lo ex tejumajx Tu'nju' nimxi'x tk'ujlalil Qman Dyos nimtipumal kb'antela'. Ttx'u'jil Qman Dyos ti'j kykawb'il aj Israel⁸Tzaj tq'o'n Qman Dyos jun tpakb'alil kye aj Israel tyajajil Jakob';⁹kykyaqilju' tyajajil Eprayin, najlqe' Samarya, matxi' kane toj kwitz. Inkyma'n tuk'i'l nimjtib'il:¹⁰Matxi' che kub' tz'aqju' ladris, ab'jtzunte' t-xel kjawil qb'incha'ntl. Matxi' che b'ajkye' tze sikomoro, k'uteyiletlte' k'ajb'el te ttzeyil, chechij.¹¹Matxi' tb'inchate Qman Dyos tu'n kyul ajq'oj xob'ajilx; aku' saj chq'onkye tu'n kyul q'ojil.¹²Aye' aj Siryo ẍetzaj toj tjawetzq'ij, aye'tzu'n pilistey toj tkub'exq'ij. Jun b'ilq'unx che elila' aj Israel kyu'n. Na'mxtzun tqenju' ttx'u'jil Qman Dyos, kukx t-xob'san ja'lo.

¹³Atzunte' tnam min nanjtzti'j tuk'i'l Qman Dyos, ntz'e'ysante twitz; mixti'x nkyjyo'n Dyos nimtipumal.¹⁴Qu'mtzun k'elel tjon Qman Dyos twi' ex tje nimaqkykawb'il aj Israel, kse'n ajkyjaw tx'emit tut ex ajlaj. ¡jun q'ijx kb'ajila' tkyaqil ja'lu!¹⁵(Atzu' nyolina' twi' kyi'ju' tijwnaq ex nejenel, atzu'n tje kyi'ju' sanjelal chalyolqe').¹⁶Matxi' che'x kytzpet-sa'n nejenel tnam, exqe' lepchqe'x mache'x tzpet.¹⁷qu'mtzun min sajlaq tk'u'j Qman Dyos kyi'ju' ku'xun, ex min sajq'aq'antk'u'j kyi'ju' meb'a ex kyimni kychmil. Qu'n tyaqilju' tnam min nche niman te Dyos ex pi'sqe' ex kykyaqil nel kylanu'n kyol. Na'mx pena' tqen ttx'u'jil Qman Dyos; kukx t-xob'sanju'.

¹⁸Nim taq'unb'en il kse'n q'aq' nb'aj twan ch'i'x ex k'ul ex nche b'aj ttz'e'ysa'n tze toj k'ul, ex sib'tl nche jawt-xon twitz kya'j.¹⁹Njayinju' tnam toj q'aq' tu'n ttx'u'jil Qman Dyos nimtipumal, kb'el b'aj tu'n q'aq'; kyi'jxju' kyk'wal nche ch'yona' ex min ntzalaqkyk'u'j kyi'j kyitz'in. Junte' nwan jun plaj ex min nqe tk'u'j. juntl nwan jun plajtl ex min nnoj.²¹Nche q'ojin tyajajil Manases kyi'j tyajajil Eprayin, exqe' tyajajil Eprayin kyi'j tyajajil Manases, kykab'ilxtzun ẍemoje ti'j Juda. Na'mxpetzun tqen ttx'u'jil Qman Dyos, kukx t-xob'sanju'.¹¡Qab'anx kywitze', nkub' kyq'o'ne kawb'il mya tnik'alti'j ex nb'aje'x kyq'o'ne' tpakb'al chaq'b'il kuw.²Min nkyb'incha'ne' tnik'alilti'j kye prow ex min nxikyka'yi'ne' kyoklen prow toj ntaname', nb'je'l kyiq'i'ne' ti'xti' kye qya kyimni kychmil ex nche elq'ane' kyi'ju' meb'a!.³¿Ti'tzu'n kyb'incha'ye' ajkyoke' toj xjel ajkyka'yinteye' xi' ttzaju' tz'e'ysb'il witzb'aj najchaq? ¿Alqe kxela' kyqani'n o'nb'ile'? ¿Ja kjela' kyq'o'ne' kyq'inumale'?⁴Qa min ẍekub' me'ssa'ne' ex min ẍe'x q'i'ne' toj kars, che kyimele' kyuk'i'lju' nche kub' b'yo'n. Na'mxtzun tqjen ttx'u'jil Qman Dyos kukx t-xob'sanju'. Che ajb'el aj Asirya tz'e'ysal witzb'aj tu'n Dyos,⁵K'ajb'elju' nimaqkawil aj Asirya te ntzeye' tu'n ntx'u'jile', a njunb'ilju'ye' k'ajb'el ajttzaj nq'oje.⁶nxinchq'o'ne q'ojil ti'j jun tnam min nokslan weye', ti'j jun nimaqtnam nok tq'o'n ntx'u'jile', tu'n tb'je'l telq'a'n tq'inumal, tu'n kyb'aj twab'e'n kse'n xoq'l tojile b'e.⁷Atzunte' nimaqkawil aj Asirya mya t-ximju', ex mya tajb'ilju' tu'n tb'inchante. O'kxte t-ximju' tu'n t-xitun ex tu'n kyb'aj txqan nimaqtnam tu'n.⁸A ntma'n ja'lu: kykyaqilju' nimaqkawil nejenelqe' tjaq' nkawb'ile'.⁹Junileqekye' nimaqtnam Kalno ex Karkyemis wewe', junqe'x Amat tuk'i'l Arpad, ex Samarya tuk'i'l Damask.¹⁰Matxi' chin q'ojine' kyuk'i'l nimaqtnam nim txqan kydyos, nimxi'x txqan kywitzleb' kyekywitz aj Jerusalen ex aj Samarya.¹¹¿Ma laytzun b'ent nb'inchanteye' kyi'j aj Jerusalen ex kyi'ju' kywitzleb', kse'n xnb'inchaye' kyi'j aj Samarya kyuk'i'lju' kydyos?, chij, chi Dyos.

¹²Ajtzun tb'ant tu'n Dyos tkyaqilju' tu'n tb'inchante twi' Syon ex toj Jerusalen, kb'el ttz'e'ysa'n twitzju' nimaqkawil aj Asirya tu'nju' nxi'x tnima'ntib', ex tu'n jamjoni'n tok ti'j.

¹³Intma'n nimaqkawil aj Asirya kjalu: Tu'n wipumale' xb'enta' lu; ati nnab'le', ex mab'aj nxima'ne'. Mab'aj nch'exb'e'ne' kynaqachil nimaqtnam, mab'je'l wiq'i'ne' kyq'inumal, makub' kyi'ju' nimaqkawil wu'ne', tu'nju' kuwqine'.¹⁴Matz'el wiq'i'ne' kyq'inumal tnam; b'ajkub' ntzyu'ne' tkyaqilju' kytx'otx' kse'n ajkyjatzq'i'n jos kyajni kolb'e'n toj jun tja pich', mix-alo'xte' klipal, mix-a'lo'xte klab'tel mo tu'n tjaw ch'eqj, chij.

¹⁵¿Ma nimxi'x toklen k'uxb'il kyetwitzju' si'wil?, ¿ma nimxi'x toklenju' job'l tze kyetwitzju' jol tze? ¡kuxi'xtej aju' xtok ẍaqlulteju' xjal, extzun naq jun tzexi'!

¹⁶Qu'mtzun, k'elel tiq'i'n Qman Dyos nimtipumal kyipumalju' xjal kuwqe'xi'x, ex ktb'incha' tu'n kyjaw q'aq'lix kyxmilal tu'n ttantonil kyeq.¹⁷Aju' Qman Dyos xjan, spik'un toj Israel, kjawil b'ent te tqan taq' q'aq', jun q'ijx kb'ajela' ttz'e'ysa'n tkyaqil ch'i'x ex k'ul toj tkyaqilju' tx'otx'.¹⁸Majx che b'ajel t-xitu'n tb'anil k'ul ex tb'anil awal. Che kjel tq'o'n kse'n jun yab' mixti'tl tipumal.¹⁹Naqjte'xtl tze che kjelten toj k'ul, naqpe' jun k'wal kb'antel tajlante.²⁰Tojtzu'n tq'ijlalil lu lay tz'okqetl kyk'u'ju' jte'tl che kjelten toj Israel, exqe' mache klet kyxol tyajajil Jakob' kyi'ju' ẍeb'yonkye qu'n xi'kqeb'ela'tl kyk'u'j axxi'x ti'ju' Qman Dyos Xjan toj Israel.²¹Che b'ju'l lq'eju' jte'tl tyajajil Jakob' tke'tzju' Dyos min q'ancha'l.²²B'a'nqa nim tajlalju' tnam Israel kse'n tz'awun ttzi ninnjab', naq jte'xtlte' k'anjetz kyi'j. Matxi' b'entten tu'n tkub' xitet ktz'e'ysetel kywitz tu'nx tpaj kyil.²³Qu'n oje kub' t-xima'n Qman Dyos nimtipumal tu'n tb'aj xitet ex ktb'incha' toj tkyaqilju' tx'otx'.

²⁴Intma'n Qman Dyos nimtipumal kjalu: Ntanam, najlqe'ye' Syon, lalun che xob'e' kye aj Asirya, b'a'nqa mache yajtiye' toj kykawb'il ex majawkyi'n kytze kyi'je' kse'n kyb'incha aj Ejipt.²⁵Qu'n naq jte'xq'ijtl tzulju' tz'e'ysb'il kywitze', ex che b'ajel nxitu'ne' tu'n ntx'u'jile'.²⁶Ayine' Dyos Manb'aj nimwipumale' chin tz'e'ysalte kywitze' kse'n tej tkub'kyi'j aj Madyan twi' pik Oreb', oktzunkyla' aj Asirya wipumale'. kse'n nb'inchaye' kyi'j aj Ejipt.²⁷Atzun q'iju' lu k'elel wiq'i'ne' iqatz b'jawni kyq'o'n ttze'lkyi'je', ex k'eltoqitju' iqb'il kub'ni kyq'o'n tikyqule', chi Dyos. Ljo'nkypon aj Asirya Luqe' ajq'oj che ul Rimon,²⁸che ul toju' tnam Ayat, che ik'el Mikron, kjel kyq'o'n kyiqatz Mikmas,²⁹Che ik'etz toju' a' b'o's t-xe, ex che b'elten Keb'a; majx che b'ajelxob' aj Rama, ex che oqel aj Kib'ea ttanam Sawul.³⁰¡Che ẍch'ine', aj B'at-kalim! ¡Kyb'intze', aj Laysa! ¡Kytzaq'wentze', aj Anatot!³¹che elex oq aj Madmena, exqe' najlqe' Keb'im che ewal.³²Che b'elwe' ajq'oj ja'lo toj Nob'; kxelkyse'n kyq'ob' tu'n kyq'ojin ti'j Syon, ttxa'nwitz jata' Jerusalen.³³Kyka'yinxe', che b'jawil tb'ultx'i'n Qman Dyos nimtipumal nimaq tze tuk'i'l tipumal xob'ajilx; che b'jawil toqju' nimaq kywe'. che kb'el tz'aqu' te'qe'kx tzmax jawl twitz tx'otx'.³⁴Majx che b'eltjuma'n nimaq k'ul tu'n jun k'uxb'il, ex che kb'elb'aju' tb'anil tze toj Lib'ano. Tzultiq'i'n tyajajil Jese jun kawb'il te nak'b'il ex tnik'alilti'j¹Kch'iyel jun t-xul tkuchmal Jese; ktzajel ch'iy jun t-xul ti'ju' tlok'.²Majx ktenb'el t-xew Qman Dyos tib'aj, ex kxe'l tq'o'n tnab'l, tu'n telk'atz, tipumal, tu'n t-ximan b'a'n, tojtzqib'l ex tu'n tten tchi Dyos te.³Lay tma se'nkyten xjal naq tu'n kyka'yink, ex lay kub'ttz'e'ysa'n kywitz naq tu'n nxitb'i'n.⁴Kxjelul tojxi'x tnik'alilti'j kye prow ex ktkla' kyoklen prow toju' tx'otx'. Ikytyolju' kse'n b'ar tu'n ttz'e'yset kywitzju' txkupxjal, ex kb'el tb'yo'n b'inchal myab'a'n ajt-xi t-xupi'n.⁵K'okyel toksa'n ax ex tnik'alilti'j kukxju'.⁶Knajaltzun xo'jtz tuk'i'l rit toj tzalajb'il, ex kb'el paqe b'alan tuk'i'l chib' junx, junx kch'iyelju' qpoj tman wakx tuk'i'l b'alun, jun b'o's k'wal kxel ka'yinkye.⁷Ktuk'ila'tib' ttxu wakx tuk'i'l ttxu oso, ex che b'elpaqe kyal junx. kwalte' b'alun k'ul, kse'n tman wakx.⁸Kb'entel t-ẍchanju' k'wal toj tjul kan, kb'entel tokxtq'o'n tq'ob' toj tpaqb'il q'antin.⁹Mix-a'lo' kb'inchal taq'wix te juntl twi'yileju' witz xjan weye', qu'n kb'el noju' tx'otx' tu'n ojtzqib'l ti'j Qman Dyos, kse'n a' ntnojsa'n ninnjab'.¹⁰Tojtzu'n tq'ijlalil lu kjawilju t-xul tlok' Jese te jun techlal kye tnam; k'ik'el tjoyli kyu'n nimaqtnam, ex nimxi'x toklenju' najb'il ja ktenb'ila'. Kanb'ab'l ajtanjtzkyi'ju' b'ajxni q'i'nqe' toj juntl tnam¹¹Ktyek'u' jumajtl Qman Dyos tipumal toju' tq'ijlalil lu che kanb'etetlju' jni'tl ttanam tu'n, che anjetz tiq'i'ntl kyoj Asirya, Ejipt, Patros, Etyopiy, Elam, Sinar, Amat ex kyoju' tx'otx' ttzi ninnjab'.¹²Kjawil jun techlal tu'n kye nimaqtnam che b'ajel tb'u'yi'n aj Israel b'je'xniqe' ti'jxi' kytx'otx'; che tzajel tb'u'yi'n aj Juda b'ajxniqe' sputj toj kykyajel ttx'u'k kya'j.¹³Kb'ajel ttxa'n tkyaqkyk'u'j tyajajil Eprayin, ex kqenb'el kytx'u'jil aj Jada; Lay tx'a'tlti'jkyk'u'j tyajajil Eprayin kyi'j aj Juda, ex lay tzajtl kytx'u'jil aj Juda kyi'j tyajajil Eprayin.¹⁴Kykab'ilx che kxe'l q'ojil kyi'j pilistey tkub'exq'ij kb'je'lel kyiq'i'n kyq'inumalju' ate' tjawetzq'ij. Kpomil kyipumal tzmax Edom ex Moab', ex che kawil kyib'aju' aj Amon.¹⁵Kjqetel jun kyb'e tu'n Qman Dyos toju' ninnjab' kyeq tb'i, ktzajel tq'o'n tq'ob' kye tu'n kyjlajin toju' a' Ewprates, ktzajel t-xupi'n jun kyq'iq' xob'ajilx wuq tq'ob' kb'je'lila' tu'n, che ik'etz jlajintzuntz toj, tok kyxajab'.¹⁶Ajtzun kyanjtzju' jte'tl ttanam Qman Dyos toj Asirya, k'okyel yal jun kyb'e nimtoj, kse'n tej kyetz aj Israel toj Ejipt. B'itz aq'b'il chjonte¹Oktma'ya toju' tq'ijlalil tzul kjalu: Taye, chjonte teya, qu'n maskye tzaj ttx'u'jila wi'je', matxi' tzik'tna'l tu'na ex matz'anjtzwije' toj b'anil tu'na.²Aya Nman Dyos klol weye'; q'uqliwe' nk'u'j ti'ja, min nchin xob'e'. Aya Nman Dyos wewb'ile' ex wipumale', aya klol weye', chiku'ya.³Ex kb'entel kyxi'ye' k'wal tuk'i'l tzalajb'il toju' a' te kolb'il lu,⁴kkyma'tzuntze': Kyq'onx chjonteye' ex kyna'ntze' Qman Dyos, kymanxe' ti'xti' matxi' tb'incha, kye nimaqtnam, kyna'nxe' kye qa a Dyos ati tib'aj tkyaqil.⁵Che b'itzan qe'ye' te Qman Dyos, qu'n nimxi'x toklenju' matxi' tb'incha ati tu'n tojtzqinjtz toj tkyaqil twitz tx'otx'.⁶che ẍch'inqe'ye' tu'n kytzalajb'ile', najlqe'ye' Syon, qu'n atite Qman Dyos kyxole' ju' nim toklen ex xjan kye aj Israel. Tpakb'alilju' tzul ti'j B'ab'ilon

¹Tpakb'alil ti'j B'ab'ilon, tzaj tq'o'n Qman Dyos te Isayiy tk'wal Amos kjalu:

²¡Kyq'onktze' jun t-sut tnam techlal q'oj twi' witz chik'li! ¡Kyq'onxe' chaq'b'il kye xjal te q'oj! ¡Kyek'unx kyq'ob'e' kye tu'n kyul lq'e ttzi kyja nimaq kyoklen!³Matxi' che tzaj ntxko'ne' kuwqe', manchaq'e' kyeju' q'o'nkyib' q'ojil, aye' nche tzalaj ajnkanb'ane', tu'n kyb'inchanteju' tz'e'ysb'il witzb'aj wu'ne', chij.

⁴Njaw sich' kywi' witz, naku'j nim xjal nche ẍch'in. Q'ojq'oj toj kywi' nimaqtnam, e'tnam matxi' b'aj kyb'u'yi'n kyib'. Nche tnk'u'n Qman Dyos nimtipumal ju' xjal b'antnitlkyten tu'n kyq'ojin.⁵Che b'ju'l xjal te jun najchaq tnam tzmax ti'jmix kya'j. A Qman Dyos tzul kyuk'i'l taq'unb'il tu'n ttx'u'jil. tzul xitulte tkyaqilju' tx'otx'.⁶Che uxinqe'ye', qu'n ch'inxtl tul tq'ijlalil tu'n tul Qman Dyos, tzul nxi'x tinun tuk'i'l nimtipumal.⁷Majxtzun kb'el nuqtz'aj kyq'ob'ju' xjal kykyaqil kykyaqilx kb'ajel kyipumal⁸ktzajel tchi kyi'j. k'okyel b'is ex jun nin k'ixk'oj kyi'j kyxq'ipla'kyib' kse'n qya toj tk'ixk'ojal wnaq. Che b'ajel sak'puj naqkyka'yla' toj kywitz ex majx che b'elkyeqax tu'n kych'ixaw.

⁹Tzulte Qman Dyos, tq'ijlalil ttx'u'jil, xob'ajilx inxi'x jayun, majx kb'el chq'ajlajixu' tx'otx' tu'n ex che b'ajel kykyaqil aj il ate' toj.¹⁰Lay che k'antlju' che'w ex wotzche'w twitz kya'j; kb'el yupju' q'ij akxtoq tjawu'l, ex lay qoptz'aju' xjaw.

¹¹Intma'n Qman Dyos kjalu: Kb'el ntz'e'ysa'n kywitzju'ye' xjal tu'n tpaj kyil, exqe' b'inchal myab'a'n tu'n tpaj kyil. Kteneb'el ttxa'n nimjtib'il wu'ne' kyeju' nimal kyib', che b'el nme'ssa'ne' pi'sqe' ex q'o'nkyib' toj il.¹²Naqjte'xtl ichan che kjel anq'in wu'ne' naqch'i'nxi'xtl kyetwitz q'anpwaq tz'umin toj tx'otx' Opir.¹³Kyukcheltzun kya'jtz ex k'elel lq'eju' tx'otx' toju' jata' tu'n ntx'u'jile' ktzajel toju' tq'ijlalil lu, tu'n ntx'u'jile' b'a'nxi'x.

¹⁴Ikyche okyela' xjal kse'n msat xla'ja'n kyu'n xjal, mujqa kse'n txqan rit nche'x sputj, ex mix-a'lo' kb'uyilkye. Teyile junjun k'anjelti'j tojku' ttx'otx', k'anjel oq toj ttanam.¹⁵Kykyaqilju' mache elyal che b'elxyu'n tu'n kchil, kykyaqilju' mache tzyet che kb'el b'yo'n.¹⁶Kywitzku' che b'ela' pch'u'n tal kyk'wal twitz tx'otx'; kb'je'lex elq'a'n kyoj kyja ex che b'ajel yaju'n kyxu'jil.¹⁷Che okyel nchq'o'ne' tnam aj Medo kyi'j, aye' xjal min nb'ajxkyk'u'j ti'j saqpwaq ex min nche ximan ti'j q'anpwaq.¹⁸Che kb'el kyb'yo'n ku'xun tu'n kysmaj. lay tzaj q'aq'ankyk'u'j kyi'ju' akxtoq kyitz'ji ex lay tzajlaqkyk'u'j kyi'ju' k'wal.¹⁹Atzu'n B'ab'ilon, tb'anil xliky kye nimaqtnam, u'wj ex kyninb'il kaldey, kjelten kse'n Sodom ex Komor, tej kykub' nxitu'ne'.²⁰Layx kub'naja'n jumajtl, mix-a'lo'tl kb'el najan toj. Lay che kub'tentlju' aj Arab'ya atzu', ex lay che ponkyiq'i'ntl k'ik'lel kyrit toj.²¹Twiẍ k'ul qe'tl che najal toj, knojel kyoju' ja kyu'n xitx', che najal toj k'ul chmek' toj, ex che ẍchal chib' toj.²²Che ẍch'il xo'j kyoju' ja te kolb'il, ex che tenb'el xo'j kyoju' tb'anil tja nimaqkawb'il. Xi' tul q'ij te B'ab'ilon; naq jte' q'ijtl tu'n tten. Tu'n tanjtzkyi'ju' b'je'xniqe'

¹Ktzajel q'aq'an tk'u'j Qman Dyos ti'j Jakob'. Ktenb'el jumajtl Israel sk'o'n tu'n, ex ktb'incha' tu'n kyul jumajtl aj Israel toju' kytx'otx'. Che ulel lq'e te najchaq xjal kyk'etz, kymujb'a'kyib' kyuk'i'l tyajajil Jakob'.²B'a'npun xjal kyoj nimaqtnam che eletz k'molkye aj Israel ex che ul wab'alkye tzmax toj kytanam, oktzun che k'mojtzeltz kyu'n aj Israel te kymajin lq'o'n toju' ttx'otx' Qman Dyos. Che okyex kyq'o'n aj Israel toj kars aye' e'jpunkye tnejel, ex che b'elkyaju'nju' ojetoq che okq'onkye toj yajb'il nejtl. Xmayb'ilte nimaqkawil aj B'ab'ilon

³Tnam aj Israel, aj tojlana tu'n Qman Dyos te tkyaqilju' yajb'il teya, te tkyaqilju' tb'isa exju' ja yajta'ya,⁴kxe'l tma'na tb'anilxim lu te xmayb'ilte nimaqkawil aj B'ab'ilon:
¡Kyka'yinxe' jaxpona' b'aju' nim toklen toj twitz Kyka'yinxe' jaxpona' b'aju' tpi'sil!⁵Mattaqk'u Qman Dyos tipumalju' b'inchal myab'a'n, makub' ttoqi'n tb'arju' nim toklen toj twitz.⁶aju' intoq ttz'e'ysa'n kywitzju' nimaqtnam tuk'i'l tx'u'jil mixtoqti'x nqjen tu'n kyb'iyli, inxi'xtoq che kub'tjtz'o'n tnam tuk'i'l ttx'u'jil mixtoqti'x nlaqtk'u'j kyi'j nokten xla'jalkye.⁷Toj nak'b'il ta tkyaqilju' tx'otx', ex nẍch'in tu'n ttzalajb'il.⁸Expe' nche tzalaju' tzaj ex k'ute toju' k'ul Lib'ano tu'nju' matxi' kub'ti'ja inkyma'n: Mix-a'lo'tlte matxi' kub' tx'emunqeye' tkub'len tz'aqa, chechij.⁹Majx ẍejawtilju' kyimni kub'l toju' kynajb'il ex nche etz k'molteya. nche jaw sak'puju' kyxlekumal kyimni, kykyaqilxju' nejenel twitz tx'otx' nche etz k'lulteya; kykyaqilju' nimaqkawil kye tnam nche jawe' tib'aj kyq'uqb'il.¹⁰Kykyaqilx nche yolin inkyma'n teya: ex ikxta matxi' b'aj tipumala, matxi' pona kse'nqe'.¹¹Axtzuntzu' sula' b'aju' ninb'iltib'a ex kyq'ojq'ojel tchinab'a arpa. Q'anaq tkuẍb'ila ex ẍchoq'qe' che ktxulteya, chechi.

¹²¡Se'ntaq'wi saj tz'aqa twitz kya'j, aya nqoptz'aja te b'a'n prim! matzaj xona twitz tx'otx', aya intoq kub'kyi'j nimaqtnam tu'na.¹³Intoq kub't-ximana toj tanmiya: Chin jawixe' tzmax toj kya'j; kb'el nq'o'ne' nq'uqb'ile' kyib'aju' tche'w Dyos; chin b'elqeye' tzmajx toj tb'a'nq'ob'kya'j, twi' witz jankyb'u'yi'na' kyib'ju' dyos.¹⁴Chin jawixe' tzmajx tib'ajxi' muj jawtl; chin okyele' kse'nte Dyos nim toklen, chija.¹⁵¡Atzun ja'lu matxi' ku'x xona kyxol kyimni, tzmajx t-xexi' jul najchaq t-xe!¹⁶Aye'tzu'n nche lonteya majx nche kyej ka'yin ti'ja, nche kyajximan ti'ja ex inkyma'n: ¿Ma Atzun ichan ja'lu ntoq lu'lun tx'otx' tu'n, intoq che kub't-xitu'n nimaqtnam,¹⁷kyej chq'ajlajixju' twitz tx'otx' tu'n, e'kub' tb'ajsa'n nimaqtnam ex min e'ttzaqpiju' japu'nqe'?, chechi.¹⁸Kykyaqil nimaqkawil kye nimaqtnam nche ojlan tuk'i'l ninb'il, teyile junjun toj muqb'il;¹⁹atzunta matxixona najchaq ti'j muqb'il kse'n tz'is tzu'wxi'x, kse'n kyimni b'ajni wab'e'n, kyxol xjal kub'ni b'yo'nqe' okxni xyu'n kyqul, ku'xni xon toj xaq nim t-xe kymoj ab'j.²⁰Lay kuxmqu'na kse'nkye txqantl nimaqkawil, qu'n kub' tyaju'na ttx'otx'a ex ekub'tb'yo'na xjal toj ttanama. Lay che tenkye' kyyajajil b'inchal myab'a'n tejumajx.²¹Kyb'incham kyib'e' tu'n kykub'yetju' kyk'wal tu'n tpaj ẍeb'aj b'iyonju' kyman, tu'n lalun kyximatl tu'n kykawin twitz tx'otx' mo tu'n kynojsante twitz tx'otx' kyu'n nimaqtnam, chiku'ya ntanam.

²²Intma'n Qman Dyos nimtipumal kjalu:
Machinxe' aq'unal kyi'j, kb'el nnajsa'ne' tb'i B'ab'ilon kyuk'i'lxi' che kjelten, e'kyk'wal exqe' kychman.²³K'okyel wu'ne' te jun njab' mo sob'on te kynajb'il tukru kb'ajel nmso'ne' tu'n tz'isb'il te xitb'il, chij. A Qman Dyos nimtipumal inq'mante. Kb'el xitju' Asirya

²⁴Oje ttziya Qman Dyos nimtipumal kjalu:
Axxi'x, kjapumelte' oje nximanye' tu'n tb'inchet; aju' oje nmaye' tu'n tb'inchet kjapumel.²⁵Che kb'el nxitu'ne' aj Asirya toju' ntx'otx'e', che b'ajel nwab'e'ne' kywi' witz weye'. Kb'ajel tyaju'n kyiqb'il ti'jkywi' ntaname', lay kub' kyq'o'ntl iqtz tib'aju' ntaname'.²⁶A matxi' kub' nxima'ne' ti'j tkyaqil twitz tx'otx'. Naq tu'n toktl nq'ob'e' kyi'j kykyaqil nimaqtnam, chi Dyos.²⁷Matxi' kub' t-xima'n Qman Dyos nimtipumal, ex mix-a'lo' kb'a'ntel tmaqun ti'j. Matxi' jawtiq'i'n tq'ob', ex mix-a'lo' kb'a'ntel tch'exb'ente. Tpakb'ab'lju' tzul kyi'j pilistey

²⁸Tma Isayiy pakb'ab'l toju' ab'q'i tkyim nimaqkawil Ajas, ikjalu:

²⁹Lalun tzalaja, nintnam pilistey, tu'nju' matxi' toqju' b'ar tz'e'ysb'ilte kwitze', qu'n k'eletz jun wotz jasetza' jun kan, expe k'eletz jun wakxkan nlipan twitz kya'j.³⁰Ktenb'el kywa kyritju' prow kyoju' nkojb'ile'. exqe' xjal mixti' ati kye che ojlal toj nak'b'il. Aye'tzu'n t-xjala knb'incha'ye' tu'n kykyim tu'n we'yaj, ex che kb'el nb'yo'ne' jte'tl qama che kyejten.³¹¡Che oq'e' nimaqtnam pilistey, che ẍch'ine' tu'n b'is, che lu'lune' tu'n xob'ajil! Qu'n tzul jun tnej xjal te q'oj toj tb'a'nq'ob'kya'j naku'j sib' nb'uqin; mix-a'lo'x jun ichan nkyajtiq'i'ntib' kyxol.³²¿Titi' kb'a'ntel t-xitzaq'wet kyeju' ẍetzaj chq'o'n toju' tx'otx' lu? Oje kyej tkuwsa'nte Qman Dyos Syon, ex che kletelju' ttanam nche b'isun atzu'. Tpakb'ab'lju' tzul kyi'j aj Moab'¹Tpakb'ab'lju' tzul ti'j tnam Moab': Kub' xitu'n tnam Moab', toju' qonik'an tkub' xitu'n Ar; kub' xitu'n Moab', toju' qonik'an tkub'xitu'n Kyir.²Nche jawxju' xjal aj Dib'on oq'el toju' ja te k'u'lb'il ati twi' witz. Nche b'isun aj Moab' tu'nju' xitb'il e' aj Neb'o ex aj Medeb'a. Kykyaqilx sk'o'ji'n kywi', ex jonile kyxmatzi.³Nche b'etju' xjal kyoju' b'e tuk'i'l kyi'j te b'is; nche ẍch'in kywi' ja tu'n tpaj b'is. Kykyaqil nche oq' jachaq ta'qe' nim xjal ex nche kub'aj tu'n kyoq'el.⁴Nche qanin o'nb'il aj Esb'on ex aj Elale; q'ojq'ojqe' tzmax toj Jaas ajkyẍch'in. Qu'mtzun nche xob'ju' q'ojil aj Moab' ex majx k'okyel xob'e' kyi'j.⁵Nchin qanin o'nb'ile' ti'j Moab'; nche etz oqju' xjal ate' toj nche'x tzmax Soar ex tzmax Eklat-selisiy. Nche jawx tk'u'j witz Luyit nche oq'; toj tb'eyil Oronaym nche ẍch'in tu'n k'ixk'oj tu'nju' xitb'il.⁶Matxi' che kyej tzqiju' xoch toj Nimrim, tzqij qe'tlju' itzaj, kyimniqe'tlkye' k'ul, mixti'tl jun t-xaq cha'x.⁷Qu'mtzun nche b'uyin xjal kyq'inumal ex nb'ajx kyiq'i'n tzmax ti'jxi' a' chjaj.⁸Nẍchunju' sich' qanil o'nb'il ti'jile tnaqachil Moab'; nche ponju' oq'e'n tzmajxtzu' toj Eklaym ex tzmajxtzu' B'eer-elim.⁹B'a'nqa nojniqe' xoch toj Dimon tu'n chik', kxe'l nq'o'ne' txqantl kuw taq'wix tib'aj; jun b'alun kxel ch'onkyeju' mache klet toj Moab', exqe' mache kyej anq'in toj tx'otx' Moab'. Nche klon kyib'ju' xjal aj Moab' toj Juda¹Nche tzaj kysma'n qpoj tman rit tzmax toj tnam Sela toj chq'ajlaj, tu'n kyul tzmax toju' k'ul Syon.²Ikyqe' aj Moab'ju' ajkyik' toj nin a' Arnon kse'nqe' pich' sak'pu'jniqe' nche etz oq toj kyja.³Inkyma'n kye aj Syon: Kynk'unqeku' kyxime' tu'n qklete', kyq'onk kyib'e' klol qeye'. kynuqpinxe' kyxlekune' toj wanq'ij q'ij, naku'xwitloj te qonik'an; kyq'ome' anb'il kyeju' mache b'je'tz xla'ja'n toj kytanam, lalun che kytzuyju'ye' nche ewan.⁴Kyq'ome' anb'il kye nche etz oq toj Moab' tu'n kyklonte kyib' kyxole'. kukyoke' te klol kye kywitzju' b'iyul, chechi.
ajtzun tyank'uju' yalb'il exqa matxi'toq tzik'ju' xitb'il, ajkyik'b'etju' q'ojil,⁵Jun tyajajil Dab'i kkanb'alteju' kawb'il, ktkuwsa' tkawb'il tzajni qe toju' tk'u'jlalil. k'okyel te jun ajkawil tnik'alti'j, k'okyel tq'o'n kyoklen xjal ex ktb'incha' tu'n tulju' tnik'alilti'j lwiy.

⁶Qojtzqi'n nxi'x kynima'n kyib' aj Moab', Inxi'x jaw kynima'nkyib', tx'yanqe' ex naqx kyak'a'n nkyla'ji'nkyib'.⁷Qu'mtzun kykyaqilju' aj Moab' che oq'el ti'ju' kytanam; okxi'x che b'isul, che okyil toj k'ixk'oj kyu'n ichan aj Kyir-ereset.⁸Mache kyej tzqiju' tqan ub'a kyoju' tnam Esb'on ex Sib'ma, macheb'aj kyu'n nejenel kye nimaqtnam. Pomniqe'toq kyq'ob' tzmax Jaser, matxitoq txi mlen toj chq'ajlaj ex pomniqe'toq ti'jxi'tl ninnjab'.⁹Qu'mtzun nchin oq'e' kyi'ju' tqan ub'a toj Sib'ma, kse'nkye aj Jaser, nkub' ta'l nwitze' kyi'je' aj Esb'on ex aj Eleale, qu'n majaw sich' te q'oj ti'ju' twitz kylob'aje' ex kyawale'.¹⁰Kb'ajelju' kytzalajb'il kyoj kojb'il; lay che ẍch'intl xjal tu'n kytzalajb'il lay che b'itzantl toj tqan ub'a, ex lay che ytz'ontl ta'l ub'a te b'in. Layx che ẍch'intl.¹¹Nxi'x lipan wanmiye' kse'n chnab' arpa kyi'j aj Moab' ex ti'j Kyir-ereset.¹²B'a'nqa mache jax aj Moab' kywi' witz ex mache kub'san atzu' tzmax ajkysikti, b'a'nqa mache'x k'ulul toju' tja kydyos, mixti'xte kknetel tu'n.

¹³Aye' yol ja'lu tma Qman Dyos kyi'j aj Moab' mab'et-xi' q'ij.¹⁴Lutzun ntma'n Qman Dyos ja'lo:
Toj oxe' ab'q'itl, kse'n ntajla'n jun aq'unal nanq'in ti'j twi'tk'u'j, k'elel iq'etju' kyninb'ilkyib' aj Moab', tu'npetzunju' nim txqan kyb'aj; naqjte'xtl che kjelten ex mixti' kyipumal. Tpakb'alju' tzul ti'j Damask¹Tpakb'alju' tzul ti'j Damask: Lay tentl Damask te nintnam; Naq jun ch'uqtl ti'xti' xitjni kjel.²Kjel kolb'e'n tejumajx naq k'ul ktzajel ch'iy toj; che k'ik'lenjtzel alu'mj toj nak'b'il toj.³Lay tentl nimaqtnam tok nintapi ti'j kyxol tyajajil Eprayin, ju' kyninb'ilkyib' aj Israel; ex kb'el naj tkawb'il Damask, exqe' che kjelten kyxol aj Sirya, Chi Qman Dyos nimtipumal. Tz'e'ysb'il kywitz aj Israel⁴Kb'ajel tipumal Samarya toju' q'ij lu ju' tninb'il Jakob', ex kb'el naju' atitoq nimxi'x te.⁵K'okyel kse'n ajtb'uyet twitz awal njaw sk'o'n t-spiyil triy tu'n q'ob'aj, mujqa kse'n ajtb'jaw sk'o'n spiy toju' b'ya' Repayim.⁶janaq txkyajleb'entl kyajniten; mujqa kse'n nxyijet jun olib'o ex naq kab'e' mo oxe'tl twitz nkyajten tunun jun tq'ob', qa majxtzun kyaje' mo jwe' ti'j tkyaqilju' tze. Chi Qman Dyos janche ajb'ena' aj Israel.

⁷Tojtzu'n q'ij lu kxel tq'o'ntl xjal twitz ti'ju' ch'iyjsalte, ti'ju' Dyos xjan kye aj Israel.⁸Lay txi'tl ka'yilkye q'olb'eb'l e' txqantl ti'xti' b'incha'n kyu'n xjal. Lay txi'tltwitz kyi'ju' ẍwank xjansa'qe' lu ex kyi'ju' q'olb'eb'l ja nche'xa' tz'e'ysal sturak kye witzleb'.

⁹Tojtzu'n q'ij lu che kjeltzaqpaju' nimaqttanama kuwsa'nqe', kse'n kyb'ajkyaj tzaqpaj nimaqkytanam eb'ey ex amorey tu'n kyxob'el kye aj Israel. Che kjelten chq'ajlajtl,¹⁰qu'n matzik' tna'l Dyos tu'na ju' xklonteya, min na'n tu'na qa a klolxi'xteju'ya. Nche taq'una'na awal lu tb'anilqe', nkuxtawa'n tawala te ninb'il jun junxi'tl dyos.¹¹Nche'x tka'yi'na toju' q'ij nche ku'xtawa'na, ex njawu'l twi' tijajil toj juntl q'ij tu'na. Ajtzun ttzaju' tyab' mixti'x q'a'nb'ilte knajelju' awal.

¹²¡Kyb'inxe' kyq'ojq'ojelju' tnam txqan kyb'aj, ikyju' kse'n tq'ojq'ojel ninnjab'! Ex kyq'ojq'ojelju' nimaqtnam, kse'n tq'ojq'ojel tnimal a'.¹³Ajtzun kyxitzak'u'n Qman Dyos, nche b'je'l oq najchaq kse'n ttxa triy nxitiqa'n kyq'iq' twi' witz mujqa kse'n quq inxitiqa'n kyq'iq' jb'al.¹⁴Naku'j xob'ajilx te qale, na'mxtoqtzun qsqix ajkyb'aj. Atzun nb'aju' kyi'ju' nche elq'an qi'j, ikytzu'n che b'ajela' nche xitunqe. Tpakb'alilju' tzul kyi'j aj Etyopiy¹¡Layqe'xwitju' najlqe' toju' tx'otx' janjumina' kyq'ojq'ojel naku'j secha'l, aju' tx'otx' kyi'jxi'ju' nin a' toj Etyopiy,²nchex tchq'o'n t-xel ttzi nin a' Nilo, nche b'et kyoj b'ark ajlajqe' tib'aj a'! Kukyxi'ye', sanjelal ojqel che b'ete', ka'yilte jun tnam nimin twe' ex nqoptz'aj ttz'umal, jun nintnam xob'le'n toj tkyaqil plaj, jun tnam kuw ex nimaltib' najli toj jun tx'otx' a'li'n kyu'n nimaq a'.³Kykyaqile' najlqe'ye' tkyaqil twitz tx'otx', kkyla'ye' ajtjaw techlal twi' witz, kkyb'i'ye' ajtq'ajti chun.

⁴Tzaj tma'n Qman Dyos weye':
Ktzajel nka'yi'ne' tzmax jata'qine' kse'n spik'un toj jun q'ij q'ijal, kse'n muj toj ta'l che'w ajtjaw awal.⁵Ajtb'aj tb'echanju' tqan ub'a, ex ajtokju' tb'echil te lob'j ub'a, na'mtoqtzun tpon tq'ijlalil tu'n tb'uyet, kb'je'lel ẍtilsa'n tq'ob' tu'n kchil, kb'je'lel tx'e'mu'n ex che elex xon.⁶Tkyaqil che kjel xon kywi' witz kye pich' ch'yol txkup ex kye tojk'ul txkup. K'elexju' q'ijal na'tz kyu'n pich', ex kykyaqilju' tojk'ul txkup che kjelten atzu' toju' jb'alil.

⁷Tojtzu'n tq'ijlalil lu kb'ajtzajel q'in toyaju' tnam te Qman Dyos nimtipumal aj nimin twe' ex nqoptz'aj ttz'umal, jun nintnam xob'le'n toj tkyaqil plaj, jun tnam kuw ex nimaltib', najli toj jun tx'otx' a'li'n kyu'n nimaq a'. Che ulel q'i'n twi' witz Syon, ja nna'njtza' Qman Dyos nimtipumal. Tpakb'alilju' tzul ti'j Ejipt¹A tpakb'alju' tzul ti'ju' tnam Ejipt: Kyka'yinxe' Qman Dyos: Tzul Ejipt tib'aj jun tnej muj ojqel tel. Nche lu'lun kywitzleb' aj Ejipt twitz, ex nche xob'ju' aj Ejipt te.²Intma'n kjalu: Knb'incha'ye' tu'n tkub' kypa'n kyib' aj Ejipt ex tu'n kyq'ojin kyxolx: che q'ojil amiw ti'j kamiwx, e'nimaqtnam kyi'j nimaqtnam, kawb'il ti'j kawb'il.³Kb'el nchuku'ne' kynab'l, kb'el nxitu'ne' kyxim. Che xjelultzuntz kye witzleb' ex kye ajpkab', kye anmi ex kye jyolkyi'j xjal.⁴Kb'el nq'o'ne' Ejipt toj tq'ob' jun tajaw kuw; jun nimaqkawil kuw kkawilte. Chi Qman Dyos nimtipumal.

⁵Kb'ajelju' nin a' Nilo, majx kb'el tzqiju' nin a',⁶che tzu'wixtlju' tb'e a'. Che b'el b'o'sixju' nin a' toj Ejipt tzmax ajkykub' tzqij, che kb'el tzqiju' ajlaj ex k'ul;⁷che kb'el tzqiju' ajlaj ttziyile nin a' Nilo, ex tkyaqil awal ttziyile a', ex lay che tentl.⁸Kykyaqilju' nche tzyun kyiẍ ttzi' a' Nilo che jiq'tchal ex che oq'el che b'isulju' nku'x kyq'o'n kypa kyiẍb'il toj a'.⁹Che b'isulju' nche aq'unan ti'j sed xb'alun chub'i'ntwitz; ex che b'el sb'une'ju' chqol ex chmol;¹⁰che b'elyajtiju' b'inchal xb'alun, ex kykyaqilju' b'inchal chukchaq ti'xti' kb'el chukj kynab'l.

¹¹¡Xnakqe'ye', nejenel toj Soan, e'q'olnab'l nim kyojtzqib'le' toj Ejipt, axxi'x q'ol nab'l qe'ye' mixti' kynab'le'! ¿Tiqu'n nxikyma'ne' te paraon kjalu: Kyyajajil nim kynab'l qo'ye', ex kyyajajil ojtxi' nimaqkawil, chechije'?.¹²¿Jatzun ta'qe' tajnab'lila paraon, tu'n kyxnaq'tzante ex tu'n kymante titi' t-xim Qman Dyos nimtipumal nab'e'ntl ti'j Ejipt?¹³Xnakqekye' nejenel te Soan, makyaq' sb'u'kyib'u' nejenel te Menpis matxiq'i'n Ejipt toj b'e mya ax kyu'n nejenel tneji'n tx'otx'.¹⁴Makub' tq'o'n Qman Dyos jun xewb'aj chuksal kynab'l; matxi kyiq'i'n Ejipt toj jun b'e txalchi toj tkyaqilju' nkyb'incha'n, kse'n jun tx'ujtenil nxab' ex nẍutujla.¹⁵Mix-a'loxte kb'antel tonin ti'j Ejipt, b'a'nqa nim toklen mujqa ch'i'n toklen, tqan tut mujqa ajlaj.

¹⁶Naku'j qya che okyela' aj Ejipt toju' q'ij lu; che b'ajel xob' ajkyka'yinte ajtjaw tiq'i'n Qman Dyos nimtipumal tq'ob' kyi'j.¹⁷K'okyeltchi kyi'j aj Ejipt kye aj Juda, naq ajttzajkyna'n tb'i che xob'el teju' t-xim Qman Dyos nimtipumal ti'j Ejipt.¹⁸Tojtzu'n q'ij lu che tenb'el jwe' nimaqtnam toj Ejipt che yolil toj eb'rey ex kytziya' kyol ax te Qman Dyos nimtipumal. Nintnam te Q'ij tb'iju' jun k'okyel.

¹⁹Ktenb'el jun q'olb'eb'l te Qman Dyos tojku' tnam Ejipt toju' q'ij lu, ex kjawil b'incha'n jun ab'j ninb'ilte Qman Dyos nqayin tk'etz tnaqachal.²⁰K'ajb'el te techlal tu'n ttzaj na'yit Qman Dyos nimtipumal toju' tnam Ejipt. Ajkyẍch'in te Qman Dyos tu'n kyqanin onb'il kyi'ju' nche yajlankye, ktzajel tchq'o'n Qman Dyos jun tzaqpilkye, tu'n kyklet tu'n.²¹Ktyek'u'tib' Qman Dyos kye aj Ejipt, ex k'elelkynik' te, che k'ulul te, kxel kyq'o'n chojb'il ex kyoyaj te. Kytziya' kyyol ex kjapumel kyu'n te Qman Dyos.²²Ktk'ixb'sa' Qman Dyos Ejipt, yajxi'tzuntl ktq'a'na'. K'anjetz kyi'j tuk'i'l Qman Dyos, ex kq'aq'altk'uj kyi'j ex che tq'a'na'.

²³Ktenb'el jun ninb'e toju' q'ij lu, tzajx Ejipt kpomel tzmax Asirya. Kb'antel kypon aj Asirya tzmax Ejipt exqe' aj Ejipt kb'a'ntel kypon tzmax Asirya, ex che k'ulul aj Ejipt ex aj Asirya junx te Qman Dyos.

²⁴Tojtzu'n q'ij lu che okyelten aj Israel junx kyk'etz aj Ejipt ex aj Asirya, ex che okyel te jun k'iwb'il kyoju' tx'otx'.²⁵Che tzajel tky'i'wla'n Qman Dyos nimtipumal, oktma: Knk'i'wla'ye' ntaname' Ejipt, ex Asirya nb'inchb'aje' kyu'n nq'ob'e', exju' Israel we'kuxi'xe', chij. Kb'elkyi'j aj Ejipt ex aj Etyopya tu'n Asirya

¹Jun q'ij xitchq'o'n nimaqkawil Sarjon aj Asirya jun tmajin kawb'il nim toklen toju' nintnam Asdod, q'ojintzu'n tmajin kawb'il ti'ju' nintnam ex kub'ti'j tu'n.²Tojtzu'n tq'ijlalil lu tzaj yolin Qman Dyos te Isayiy, tk'wal Amos, ex tma: Iq'imila ti'ja taq'wixi'x oksa'n tu'na exju' t-xajab'a tok ti'j tqana, chij.
Tb'incha Isayiy ikju' ex kyejten mixti' t-xajab' ex ẍb'iqliyinin.³Tmatzun Qman Dyos: Matxi' ten oxe' ab'q'i nmajine' Isayiy mixti' t-xajab' ex ẍb'iqliyinin, te jun techlal ex tpakb'alil kye Ejipt ex Etyopya.⁴Ikxtzu'n che elextiq'i'n nimaqkawil aj Asirya aj Ejipt ex aj Etyopiy toju' kytx'otx', b'a'ntzun ẍjo'q mo ku'xun, mixti' kyxajab' ex ẍb'iqlqe', q'ancha'l kyẍo'p tu'n tel kych'ixaw.⁵Che b'ajelxob'ju' xjal ex che kb'el ch'ixwi ti'j Etyopiy jaq'uqla'toq kyk'u'j, ex ti'j Ejipt nimtoq toklen toj kywitz.⁶Kkyma' kykyaqilju' najlqe' toju' mlaj toju' tq'ijlalil lu, kjalu: kyka'yinxe' ja matxi' pona' b'aju' ja q'uqloka' qk'u'j, janqo qanina'toq o'nb'il, tu'n tkolon qi'j teju' nimaqkawil aj Asirya. ¿Se'ntzun taq'wi tu'n klonteqib' ja'lo? chechi. Tpakb'alil tu'n tkub'ti'j B'ab'ilon¹tpakb'ab'l ti'ju' chq'ajlaj: Che tzajel toj chq'ajlaj, jun najb'il xob'ajilx, kse'n kyq'iq'jb'al ntzaj toj tnayajkya'j.²Xob'ajilxte' saj tyek'u'n Dyos weye': nqo'x tpoqo'nju' poqol, nxitunju' xitul. ¡Kyiq'i'nktz kyib'e' aj Elam! ¡Kukyok tzaqpaje' q'ojil aj Medo! ¡Min wajb'ile' tu'n kyajtitlju' xjal!³In ch'yon toj nwinqile', inxquyla'n wib'e' tu'n k'ixk'oj kse'n qya ajtitz'ji tal, min nb'ent nb'i'ne' tu'n k'ixk'oj, ex min nb'ent nka'yine' tu'n xob'el.⁴Chukjni nnab'le', nch'on wanmiye' tu'n xob'el. Aj ntzalajb'ile' tu'n wojlane' ajtqo'qax, matxi' tz'ok te xob'ajil weye',⁵Matxi' kub' q'o'n mes ex matxi' b'ajkub' lik'u'n kyq'uqb'il xjal, matxi' tzyetju' ninwan. ¡Che we'ku'ye' nejenel te q'oj: kyq'onkye' aseyt ti'j kysmaje'!⁶Qu'n matzaj tma'n Qman Dyos weye': Kutxi'ya ex q'onku'ya jun xq'uqil tu'n tq'o'nte tpakb'ab'l tkyaqilju' matil.⁷Qama til karwaj jwo'n kyu'n kab'e' b'anchej mo xjal nchejin ti'j b'ur mo ti'j kamey, tu'n tka'yinte b'a'nxi'x, chij.

⁸Jawtzun ẍch'inju' ntoq xq'uqin: tojxu' nkb'ele' ta'qine' tkyaqil q'ij, Taye, ex tkyaqil qonik'an nchin xq'uqine'.⁹Lu jun karwaj tzul jwo'n kyu'n kab'e' b'anchej, chij. Tmatzun jun: ¡Matxi' kub'ti'j, matxi' kub'ti'ju' B'ab'ilon! Kykyaqilju' kyilb'ilal kydyos ẍekub' b'uchj twitz tx'otx', chij.

¹⁰Ntanam, matxi' cheb'aj wab'e'ne' kse'n triy, nxinma'ne' kyeye' aju' xnb'iye' te Qman Dyos nimtipumal janche k'uluna' aj Israel. Tpakb'ab'lilju' tzul ti'j Edom

¹¹Tpakb'ab'lju' tzul ti'j Edom:
Ntzaj ẍch'in jun weye' tzmax Seyir: Xq'uqil, ¿jni' or ja'lo toju' qonik'an lu? Xq'uqil, ¿jni or ja'lo toju' qonik'an lu? chij.¹²Atzunte xq'uqil xittzaq'we'n: Xi'qsqix, extzun xi' qokyupj. Qa kyajb'ile' tu'n kxjelune' che xjelunqeye', atzun tz'anjtz jumajtlkyi'je', chij. Tpakb'alil toj chq'ajlaj

¹³Tpakb'al toju' chq'ajlaj:
Aj Dedan, nb'aj qonik'an kyu'ne' kyoju' k'ul toj chq'ajlaj,¹⁴kukyetze' k'lulteju' ati k'waj ti'j kq'onxe' tk'wa' a'. Aye'ye' najlqe'ye' toj ttx'otx' Tema. kukyetze' k'lulteju' in oq, kyq'onxe' twa.¹⁵Qu'n in oq te k'uẍtx'e'nb'il, te k'uẍtx'e'nb'il jqu'n twitzte, teju' smaj naq tu'n txi' xontl ex teju' q'oj kuwxi'x.¹⁶Tzaj tma'n Qman Dyos we'ye':
Toj jun ab'q'itl ja'lo, kse'n ntajla'n jun aq'unal ti'j twitk'u'j nanq'ina', matxitoq b'aj tkyaqilju' toklen Kyedar nimxi'x¹⁷Ex naqjte'xtl kysmaju' q'ojil aj Kyedar kjelten, chij. Aku' Qman Dyos janche ajb'ena' aj Israel xq'mante. Tpakb'alil ti'j Jerusalen¹Tpakb'al ti'ju' b'ya' naku'j witzik': ¿Titzu'n nb'aj, kykyaqil nche jax kyib'aju' ja?²Nche b'ajtilj xjal ex nim tq'ojq'ojel toju' nintnam, nintnam majx ntzalaja, min ẍekyimju' t-xjala tu'n k'uẍtx'e'nb'il, min ẍekyim toj q'oj;³ojqel ẍeb'je'tz kykyaqilju' tnejenela, ex tej ẍeoq kye' smaj mache okx jpu'n. Mache b'ajx oqu' t-xjala kuwqe'xi'x najchaq, tetzunj ẍetzyet mache b'jo'kx jpu'n.⁴Qu'mtzun nmane': che lq'eqemile' wi'je', wajb'ile' tu'n woq'e' tuk'i'l tk'ayil; lan che oktene' q'uq'b'alte nk'u'je' tu'nju' xtk'ulb'a ntaname'.⁵Qu'n oje tchaq' Qman Dyos nimtipumal tu'n tpon jun q'ij b'isb'ajilx, te xitb'il ex chuksb'il toju' b'ya' te yek'b'il. Nche b'jawxitu'n nimaqtapi; npon kyq'ojq'ojelju' sich' tzmax kywi' witz.

⁶Matxi' b'entkyten tal kysmaj aj Elam, ex luqe' teqe'kx toj kykarwaj ex kyi'j kychej; matx b'je'tzkyiq'i'n aj Kyir kykolb'il.⁷Matx che kub'chmet karwaj kyoju' tb'anilxi'x tb'ya'ya, ex nche ponju' chejil q'ojil ttziju' nintnam.⁸Matxi' kyej kolb'e'n kolb'ilte Juda.
Kkyka'yine' k'ub'l aq'unb'il te q'oj toju' Ja toj K'ul toju' q'ij lu.⁹Kyile' nim k'atxa'j ti'ju' Ninttanam Dab'i ex nnoju' tkb'el a' ati kub'l;¹⁰Eb'aj kyka'yi'ne' ja toj Jerusalen ex b'ajkyxitu'ne' junjun tu'n tkuwsetju' nintapi.¹¹Jaw kyb'incha'ne' jul kyxolju' kab'e' nimaqtapi te tkb'elju' a' netz toju' ojtxi' tkb'el a'. Extzun min okkyq'o'n kywitze' ti'ju' b'inchante tkyaqil, aj kub'ni ximante ojtxi'.

¹²Mache txokliye' tu'n Qman Dyos nimtipumal toju' q'ij lu tu'n kyoq'e' ex tu'n kyb'isune', tu'n tel kyjon kywi'ye' ex tu'n tok kyq'o'n kyxb'alune' te b'is techel k'ixk'oj.¹³Aye'tzunkye' nche b'aj saqchane' ex nche b'ajtzalaje', nche b'yo'n wakxe' ex rit, nche ch'yon chib'je' ex nche k'wan b'ine'. Qoqe' wan ex qoqe' k'wan, qu'n najchi'j qoqekyim, chechije'.¹⁴Atzunte Qman Dyos nimtipumal makub' tyek'u'ntib' nwitze' ex matzaj tma'n toj nẍkyine': lay kub' nnajsa'ne' il lu; kche kyimelkye', chij. Tyolku' Qman Dyos nimtipumal. Ti'jku' nim toklen nka'yinte tja nimaqkawb'il

¹⁵Tzaj tma'n Qman Dyos nimtipumal weye': Kutxi'ya tk'etz Seb'na, nuk'ul toj tja nimaqkawb'il, ex q'manxa te:

¹⁶¿Titi' ntb'incha'na tzalu, mujqa alkye xiq'onte toklena tu'n jawtb'incha'na jun muqb'il tzalu, tu'n tb'inchante jun muqb'ilteya tzmax jawtl ex tu'n tokx tlku'na jun tojb'ila toj pik?¹⁷Kxelxona najchaq tu'n Qman Dyos, kse'n ntb'incha'n jun ichan kuw, Ktzyetela tu'n tuk'i'l tipumal,¹⁸kxel tololona tu'n kse'n jun xpo'tz kxelxona tu'n toj jun tx'otx' nim twitz. Atzuntzu' kkyimela'ya, atzuntzu' che kjela' karwaj nim kyoklen teya ex ch'ixb'ilx k'elela'ya te tja nimaqtkawb'ilu' tajawa.¹⁹K'elel wiq'i'na toju' toklena, k'elel wiq'i'na ti'ju' taq'una.

²⁰Atzu'n q'iju' ktzajel ntxko'ne' nmajine', aju' Elyakyim tk'wal Ilkyiy;²¹K'okyel nq'o'ne' t-xb'aluna ku'j ti'j: k'okyel nq'o'ne' jtz'ob'l tk'u'ja nim toklen tk'u'j ex kxe'l nq'o'ne' toklena te. K'okyel naku'j manb'aj kye' aj Jerusalen ex teju' tnam aj Juda.²²Ti'j tqul kb'ela' nq'o'ne' tal tja Dab'i; mix-a'lo' kb'entel tjpunteju' oktjqa' ex mix-a'lo' tu'n tjqonteju' matjup.²³K'okyel te tq'uqb'il te ninb'il kyeju' toj tja tma'n. Knb'incha'ye' tu'n tkyaj kuw toj toklen, naku'xwitloj jun klawẍ.²⁴Ti'j te kb'antela' kyok ye' tkyaqilju' nim toklen toj tja tman ex kyxol tkyaqilju' tyajajil, tkyaqilju' tkb'el k'wab'j k'ok'e'qe', e'k'wab'l ex k'ok'e' xar.

²⁵Tojtzu'n q'ij lu, k'eletz tz'aqu' klawẍ jaokxna' poji'n k'eletz xb'oqj ex k'elel tz'aq, ex tkyaqil tixti' yo'ltoq ti'j che b'el laqj, chiku'ya te, chi Dyos. Aku' Qman Dyos nimtipumal q'mante. Tpakb'alilju' tzul kyi'j Tiro ex Sidon¹Tpakb'alilju' tzul ti'j Tiro: Nche t'i'njneju' kyb'ark aj Tarsis, qu'n matxi' b'ajxitju' ttzitnam. Aju' janche ula'toq tzajniqe' Chipre matxi' kyej naj.²Numliqe' xjal aj Tiro exqe' xk'aẍlel aj Sidon. Intoq cheb'ji'k'xju' kyxq'uqil toj ninnjab'.³Ex kyoju' a' nimaq a'. Inxi'xtoq che kanb'an ti'ju' twitz kyawal njaw toj tnam Syor, ex kyawal njaw ttzi nin a' Nilo, ex intoq che xk'aẍlen kyuky'i'l nimaqtnam.⁴Ch'ixwenku'ya, Sidon, tkuwil ninnjab', qu'n ati tu'n txitma'na: Mixti'tl k'ixk'oj wi'je' tu'n wnaq, min nchin alantle'. Mixti'tl wale' q'a tu'n kych'iset mixti'tl wale' txin tu'n kyxnaq'tzet, chiku'ya.⁵Ajtpon tqanil kyej aj Ejipt, che oq'el tu'nju' xb'aj kyi'j aj Tiro.⁶Kkyma': Kukyxi'ye' Tarsis, che oq'e' aye' najlqe'ye' mlaj.

⁷¿Ma atzun nintnam ja'lu ojtxi'xi'x amiw kyoju' tzalajb'il ex tzeb'l? ¿Ma atzun ntoq b'etju' tu'n txi' najal toj najchaq tx'otx'?⁸¿Alkye xchaq'unte ja'lu tib'aj Tiro, ninttanam nimaqkawil, Tk'wal nimaqkawilqe' xk'aẍlel toj, ex nimaq q'inunqe' nche xk'aẍlen kye?⁹A Qman Dyos nimtipumal xq'mante tu'n tkume'sset tkyaqilju' nimjtib'il ex tu'n kykub'xoyet twitz tx'otx' kykyaqilju' yajul.¹⁰Kyaq'unanku'ye' tx'otx' aj Tarsis, qu'n mixti'tlte q'ojb'il.¹¹Matxit-se'n Qman Dyos tq'ob' tib'aj ninnjab', mache b'ajlu'lun nimaqtnam tu'n ex matchaq' tu'n kyb'ajxitu'n tkuwal Kanaan.¹²Ex tzaj tma'n kye aj Sidon: Kyq'onqe'kje' kytzalajb'ile' txin kub'niqe' jwo'ne'. maskye mab'entkyxi'ye' tzmax Chipre, layx b'ent kyojlane' atzu', chij.

¹³Kyka'yinxju'ye' tx'otx' lu, aju' janche b'incheta' b'ark. B'jaw kyb'incha'n kaldey ja nimaq kywe' ex b'aj kyxitu'n tja nimaqkawb'il toj Sidon, naqtx'anqa'n jatl ẍekyaj kyq'o'n. Aye'kye ati kypaj, myaqekye' aj Asirya.

¹⁴Che oq'e', kyb'ark aj Tarsis, qu'n matxi' kyajxitju' kyjaye' kuwsa'n.

¹⁵Tojtzu'n tq'ijlalil lu k'ik'eltna'l oxnaq lajoj (70) ab'q'i Tiro, toju' tq'ijlalil nanq'in jun nimaqkawil. Ajtzun tb'aju' oxnaq lajoj (70) ab'q'i, kb'inchetelju' ntma'n tb'itz qya ajpajil ti'j Tiro kjalu:

¹⁶Qya ajpajil ik'ni tna'la, q'ima tchinab'a arpa, ex b'eta tojele nintnam, q'ajtzama tb'anil chnab', ex b'itzana b'a'npun b'itz, atzun qil qa matzajna'na, chij.

¹⁷Ajtzun tjapunju' oxnaq lajoj (70) ab'q'i, tzul jumajtl Qman Dyos tib'aj Tiro. Ktq'a' jumajtltib' ajpajil kyuky'i'l kykyaqil nimaqtnam twitz tx'otx'.¹⁸Aye'tzu'n tkanb'ab'tl ti'ju' t-xk'aẍle'n che kxe'l tq'o'n te Qman Dyos; lay che'x k'uyet ex lay che kub'u'yi'n toj k'ub'lkye, che kxe'lq'et kyeju' nche ajb'en te Qman Dyos tu'n kylq'onte kywa nim ex kyxb'alun tz'uminqe'. Tz'e'ysb'il kywitz kykyaqil xjal twitz tx'otx'¹Kyka'yinxe', kb'el t-xitu'n Qman Dyos twitz tx'otx', kjel prowix ex kjel xitj tu'n, ex che kxe'l t-sputi'n xjal najliqe' twitz.²Junx k'elela' kye pale ex kye tnam, kye ate' kymajin lq'o'n ex kye lq'o'n majin, kye qya ate' kymajin lq'o'n ex kye qya lq'o'n majin, teju' nloq'on ex teju' nk'ayin, teju' nq'on che'x ex teju' nch'xon, teju' ati tk'as ex teju' tajaw k'as.³Kjel ẍb'ilete' tx'otx'. mixti'tlte kjelten toj. Qu'n a oje tma Qman Dyosju'.⁴Mab'ajtzqij twitz tx'otx' ex mab'a ch'uẍj, tkyaqil twitz tx'otx' xb'ajtzqij ex mab'aj kub'tilj, makyaju' kya'j ex tx'otx' b'isb'ajilxi'x.⁵Makub' yajtiju' tx'otx' kyu'n najalte, qu'n min nche japunju' kawb'il kyu'n, min nche'x kyb'i'nju' chaq'b'il, matxi' kub' kytoqi'n yol kyejni b'entti'j.⁶Qu'mtzun matxi' kub'aju' tx'otx' tu'n jun qanb'en, ex makub'tz'e'ysa'n kywitzju' najalte. Qu'mtzun mache kub'aju' najliqe' toj, naq jte'xtlju' xjal najlqe' twitz.

⁷Kb'elb'aju' b'in, k'okyel kyab'ju' tqan ub'a, che kjelju' nxi'xtoq che tzalaj toj b'is.⁸Mab'aju' tzalajb'il kyu'n tanb'or ex arpa, matxi' b'aj kyẍch'in amiw toj tzalajb'il.⁹Lay che k'wantl b'in kyoj b'itz; k'a qe'tlkye' k'wab'j kyeju' nche k'wante.¹⁰Xitjnitlju' nintnam mixti'x ttx'o'lajil, mix-a'lo'tl kb'antel tokx toj jun ja.¹¹Nche oq'ju' xjal kyoj b'e tu'n tpaj mixti' b'in; tkyaqilju' tzalajb'il matxi' kub'naj, matxi' b'je'l q'i'n toju' tx'otx'.¹²matxi' b'ajxitju' nintnam, tb'uchub'tlte' tjpel.¹³Ikytzu'n kb'ajela' kyoj kykyaqil nimaqtnam twitz tx'otx': kse'n naqnb'aj xyiju'n tqan aseyt, mujqa kse'n nb'aj sik'u'n twitz ub'a kse'n matxitoq b'aj b'uyit twitz awal.¹⁴Che ẍch'ilju' che kjel anq'in tu'n tzalajb'il, kjawil tq'ojq'ojel kywi' tzmax tkub'exq'ij, ajkyka'yinte toklen Qman Dyos.¹⁵Ikx toj tjawetzq'ij ex kyoju' tx'otx' toj ninnjab' kjawil kynima'n Qman Kydyos aj Israel.¹⁶Nche qb'i'n tzmax japomna' b'aju' tx'otx' nche b'itzan kjalu: ¡Ninb'ilteju' tnik'alti'j! chechij.
Ayintzunwe' nmaye': ¡Layqinxwite', malayqinxwite'! ¡Naqx sb'ub'l ati toj kyanmiju nche jawmiltz'uj!.¹⁷Che okyelkye' najliqe' toju' tx'otx' kse'nqe' txkup ljo'n kykanli kyu'n ub'al mujqa xi'kykub'tz'aq toj jun jul mo toj jun xpatxab'.¹⁸Alkye matzaqpaj toj kyq'ob' ub'al kb'elex tz'aq toj jul, ex alkye matzaqpaj toj jul kb'eltz'aq toj xpatxab'. Ktzajel jun q'eqjab' toj kya'j ex che lu'lulju' tq'uqlil tx'otx' te.

¹⁹Okxi'x lu'lulju' tx'otx', kb'ajel txij ajtb'aj xyiju'n.²⁰Kẍu'tajlab'el kse'n jun tx'ujtenil, okxi'x lu'lul kse'n jun tal pach. Matxi' kub'talalju' kyil xjal tib'aj kb'eltz'aq ex lay b'ent tjawe'tl.²¹Tojtzu'n q'ij lu kb'el ttz'e'ysa'n Qman Dyos kywitzju' ipumalj te toj kya'j, exqe' nimaqkawil twitz tx'otx';²²che b'ajel tb'u'yi'n, che okyextjpu'n toj kars, che kjel tjpu'n, tik'lenxi'tzun nim tq'ijlalil kb'el ttz'e'ysa'n kywitz.²³Ajtb'inchante Qman Dyos nimtipumal tnimaqkawb'il twi' witz Syon toj Jerusalen, che b'elqloljixju' q'ij exju' xjaw ex kkyla' nejenel toj kytanam tajwalil Qman Dyos. B'itz ajwalb'ilte Qman Dyos¹Taye, aya nchin nimane' teya; njaw wajwali'na ex nnimsa'ne' tb'iya, qu'n mache japunju' t-xima tb'anilxi'x, axxi'x ex tz'aqliqe'xi'x atxi'x ojtxi'.²Matxi' che kyej tq'o'na nimaqtnam naqx txqan ch'uq ab'jtl, naq kyik'lenxtlju' nimaqtnam kuwsa'nqe'; b'ajkub' t-xitu'na kyja nimaqkawb'il kye ajq'oj, ex layx che jaw b'incha'n jumajtl.³Qu'mtzun nnimanjtza tu'n jun tnam tx'u'j, nche xob' nimaqkytanam mya'l xjal teya.⁴Qu'n matxi' tz'oka kolb'ilkye prow, jun klolteju' prow toju' yajb'ilte, kolb'il te q'ankyaq, xmuj te tq'ob' q'ij. Iky kyxew xjalju' txkupqe' kse'n q'ankyaq toj jb'alil,⁵mujqa kse'n kyaq toj tzqij tx'otx'. Inkub'ti'ju' kymaqb'il ajq'oj tu'na kse'n ntchewsa'na tq'ob' q'ij tu'n tewun muj. Ilti'j nche kub'nume xjal txkupqe' tu'na.

⁶Kb'el tb'incha'n Qman Dyos nimtipumal jun ninwan kyu'n tb'anil wab'j ex tb'anil k'wab'j twi' witz Syon, kye kykyaqil nimaqtnam jun tb'anilxi'x wab'j ex tb'anil k'wab'j.⁷Twi' witz lu kb'ela' t-xitu'n Qman Dyos kutxb'ilkyetoq kykyaqil tnam, aju' xb'alun kutxb'ilkye nimaqtnama.⁸Majx kb'el t-xitu'n Qman Dyos kamik, k'elil t-sun ta'l kywitz kykyaqil xjal ex lay tajtl tu'n tel tch'ixawju' ttanam toj tkyaqil twitz tx'otx'. Aku' Qman Dyos q'mante.

⁹Kq'manjtzel toju' q'ij lu: Ate Qman Dyos ja'lu, q'uqli qk'u'je' ti'j ex maqo tkole'. Qoqe' tzalaj, qik'sanku' qu'n maqo tkol, chechij.

¹⁰A Qman Dyos kklolte witz Syon, atzu'n Moab' kb'ajel twab'e'n kse'n nb'aja' wab'et ttxa triy toj xob'l tz'is.¹¹Che kxe'ltnuqpi'n Moab' tq'ob' kse'n nxitnuqpi'n jun xjal tq'ob' ajt-xnu'xin toj a', atltzun junjun maj ajt-xityukcha'n tq'ob' kxel mulq'ajxi'xju' nimjtib'il toj.¹²Kb'el t-xitu'n Qman Dyos nimaqttapiyil ex nimin twe' ex kuw, che b'eltniq'u'n che kb'elt-xon twitz tx'otx'. B'itz te kanb'ab'l

¹Tojtzu'n q'ij lu kxel b'itzetju' b'itz lu toju' tx'otx' Juda:
Ati junqe ninqtanam kuw; tu'n qklet, b'jaw tb'incha'n Qman Dyos nimaqtapi kuwsa'nqe'.²Che kyjqomju'ye' ttzi tnam tu'n tokxu' jun nintnam tz'aqli ntanq'i'n tyol Dyos.³Nman Dyos, nche tk'u'na xjal b'a'n kychwinqlal toj nak'b'il, qu'n q'uqlok kyk'u'j ti'ja.⁴Majx q'uqlok kyk'u'j ti'j Qman Dyos, qu'n a kolb'il tejumajx.⁵Nche kub't-xonju' nkynima'n kyib', ex nkutme'ssa'n nintnam ntnima'ntib' majx nkub't-xon twitz tx'otx',⁶tu'n tb'ajwab'e'n kyu'nju' prow ex kyu'n minkynima'nkyib'.

⁷Tzinunte' kyb'eju' xjal tnik'alkyi'j; nb'aj tplansa'na kyb'e, Taye.⁸Ikxqe' q'uqli qk'u'je' toju' b'e yek'u'n kyu'n tkawb'ila, Taye. O'kxqe' qajb'il tu'n qximane' ti'ja.⁹Nchin jiq'chane' tu'n tkyaqil nk'u'je' ti'ja te qonik'an; nxi'x njyo'na tu'n tkyaqil nk'u'je'. Ajkyok xjal twitz tx'otx' toj xjel tu'na, k'elelkynik' ti'ju' tnik'alilti'j.¹⁰Maskye matzajlaqj tk'u'ja kyi'ju' b'inchal myab'a'n, layx che okkye' tnik'alkyi'j; taq'wixi'x kyb'inchb'aj toj kytx'otx'ju' b'a'nxjalqe' ex min nche ximan ti'j toklen Qman Dyos nimxi'x.¹¹Taye, b'incha'ntlte' tz'e'ysb'il kywitz tu'na, aye'tzunkye min kyajb'il tu'n telkynik' ti'j; oktzun k'elel kych'ixaw ajkyka'yinte tk'u'jlalil nimxi'x ti'j ttanama. ¡Che b'ajxwit tu'n tq'aq'ju' ttx'u'jila!¹²B'a'n ta'qo'ye' tu'na Nman Dyos; a na'ta nb'inchankye kykyaqilju' qaq'unb'ene'.¹³Taye, aya nqnima'ne', junxi'qe'tlju' matxi' che ok te qajawe', extzun o'kxna'ta Dyos Manb'aj qib'aje'.¹⁴Kyimniqe'nakye', lay che jaw anq'in; naqna' xlekunqe'kye' ex lay che jawe'tl; makub' ttz'e'ysa'na kywitz, mache kub't-xitu'na, makub' tnajsa'na tkyaqilju' nab'ab'lkye.¹⁵Tch'isaju'ya nintnam, Nman Dyos; tch'isaya tu'n tnimanjtzju' tb'iya, b'ajx tlaq'b'a'na tkyaqil tnaqachilju' tx'otx'.¹⁶In qjyo'na Nman Dyos toju' qb'ise', ajqtzaj ttzak'u'na toj chab'a yol.¹⁷Ikyqo'ju'ye' twitza, Nman Dyos, kse'n jun qya ch'onwi' xi'tpon kmuj te tu'n titz'ji tal, nxi'x tk'o'li'ntib' tu'n k'ixk'oj ex nẍch'in.¹⁸Itz'ji qale', qna'ye' k'ixk'oj tej titz'ji ob'anixe', naqtzun kyq'iq'te'. Min sul kolb'il qu'ne' teju' tnam, ex lay che itz'ji xjal tu'n kynajan twitz tx'otx'.¹⁹Aye'tzunta tkyimni che anq'iltl, che jawil anq'in jumajtl. Ktzajel kyna'nkyib'ju' nche wtan toju' tx'otx', ex che ẍch'il tu'n kytzalajb'il. Qu'n ntzaj tq'o'na spik'un naku'j ta'l che'w ex che jawitz anq'intlju' kyimni toj tx'otx'.

²⁰Kutxi'ya ntanam, kutokxa toj tjaya, ex jpumitza tjaya. Ewan jun kmuja, tzmax ajtik' ttx'u'jil Qman Dyos.²¹Qu'n k'eletz Qman Dyos toju' tja nimaqtkawb'il tz'e'ysalte kywitz xjal twitz tx'otx' tu'n tpaj kyil, ex lay che kub'tewa'ntl tx'otx'ju' ati kyil kche tyek'u'ju' b'yojxjali'n ẍe b'inchanjtz twitz. Tzaqpib'lkye aj Israel¹Tojtzu'n q'ij lu kb'el ttz'e'ysa'n Qman Dyos twitz Leb'yatan, ju' kan kuyi'ntib', aju' Leb'yatan, kan b'iyol, kb'el tb'yo'n tu'n tk'uẍtx'e'nb'il xob'ajilx, yaqinxi'x ex kuw.

²Ktma' Qman Dyos toju' q'ij lu: Che b'itzan qe'ye' teju' tqan ub'a tb'anilxi'x.³Ayinwe' Dyos Manb'aj nchinx ka'yinte ex q'achq'al nkub' nq'o'ne' a' tib'aj. Nxinka'yine' q'ijtl ex qonik'an, tu'n mlalun kub' yaju'n.⁴Min nchin q'ojinwe' ti'j. Naqwit ati ch'i'x ex taq'wix k'ul toj, mawtlo tz'ok q'oj wu'ne' kyi'j tek'witlo ẍeb'aj ntz'e'ysa'ne'.⁵Qa tajb'il tu'n nkolone' ti'j, lalun q'ojintl wi'je', iku', lalun q'ojintl wi'je', chi Qman Dyos.

⁶Klok'alte' ttanam Jakob' toju' tq'ijlalil tzul, kxulil Israel ex kb'echal, ex knojel twitz tx'otx' tu'n twitz.⁷B'ajx kub'a' ttz'e'ysana'te Qman Dyos kywitz aj Israel kse'n t-se kyi'ju' e'yajunkye, ex b'ajx che kub'a' tb'yo'n aj Israel kse'n e'kub' tb'yo'na' xjal ekub'yonkye.⁸Makub' ttz'e'ysa'n Dyos kywitz ttanam mache'x t-xla'ja'n toj chq'ajlaj, jun xupinx ẍe exa' t-xla'ja'n, kse'n ntzajumin kyq'iq' toj tjawetzq'ij.⁹Oktzun b'eltnajsa'n kyil tyajajil Jakob' majx kb'el naju' kyil: qama che kub'kytxiju'n tkyaqilju' q'olb'eb'l kye witzleb', kse'n nche kub'quqixa' tab'jil txun, tu'n lankyajkyq'o'ntl xmil xjansa'n ex q'olb'eb'l tz'e'ysb'il sturak nimkye junxi'tl dyos.

¹⁰Xitjnitlju' nintnam kuwsa'n, kse'n ja mix-alo'tl najalte, kse'n chq'ajlaj mixti' xjal najli toj. Naq te k'ik'leb'l wakxtel, nche b'ajtwan tq'ob' tze ex nkupaqe.¹¹Nche kub' toqju' tq'ob' tze ajkytzqij; intzun che'xju' qya sk'olte ex nok te kysi. Jun tnamte' mixti'x tnab'l. Qu'mtzun layx tzaj laqjtk'u'j ju' ch'isante, aju' kub'inchante.

¹²Ktb'incha' Qman Dyos toju' q'ij lu, tzajx Ewprates ponx ttzi nin a' toj Ejipt, kse'n ntriyit triy; aye'tzunkye' aj Israel che jawil q'i'ne' toj junjunali'n.¹³Kxel q'ajtza'n ninchun toju' q'ij lu, aye'tzu'n tzpetniqe' toj Asirya, exqe' b'ajxniqe' toj Ejipt, che tzajel k'ulul te Qman Dyos toj Jerusalen, twi' witz xjan. Ab'tzib'l kye aj Samarya¹¡Qab'anx twitzju' tnam Samarya, tninb'il ex tkoron Eprayin, ju' tnam twi' tx'ujtenil; ikyju' se'n tb'anil b'ech lwiy nkub' ch'uẍj, njawlq'e tib'aju' tb'anil tx'otx' toj b'ya', ninkytanam xjal naq nche tx'ujti!²Atitlte' jun ichan kuw tu'n Qman Dyos, kuwxi'x kse'n saqb'aqun tk'i'kyq'iq', kse'n q'ankyaq nxitun, kse'n txqan jb'al, kse'n txqan tnimal a' xob'ajilx. Kb'el t-xonju' tnam Samarya twitz tx'otx',³ex kb'el twab'e'n tninb'il ex tkoron ttanam Eprayin twi' tx'ujtenil. kyu'n tqan⁴Extzu'n tzqij b'ech tb'anil wiqb'il lu njaw jawlq'e tib'aju' tb'anil tx'otx' toj b'ya', ikyk'okyela' kse'n tnejel twitz iw toj q'ijal; qa a'lo' jun sokka'yinte exqa matz'okttzyu'n, kxel tlo'n.

⁵Tojtzu'n q'ij lu k'okyel Qman Dyos nimtipumal te jun koron, jun achb'il tb'anilxi'x kyeju' che kjelten toju' ttanam,⁶kt-xewsa' tnik'alilti'j kye ajkawil toj kawb'il ex che tkuxa' xjal te q'oj nche kolon ti'ju' nintnam. Oqxenb'il ex yol ttziya'n te Jerusalen⁷Ate'x txqantl nche lu'lun tu'n b'in, nche ẍutujla tu'n q'e'n kuw tq'ob', e'pale ex sanjelal nche ẍutujla; tu'n q'e'n kuw tq'ob', nche sutj tu'n b'in nche ẍutujla tu'n q'e'n kuw tq'ob', nche lu'lun ajtb'jo'k toj kywitz tx'ujtenilqe' ajtkub' kyq'o'n tz'e'ysb'il kywitz xjal.⁸B'ajni txa'j kykyaqilju' mes tu'n xab'en mijsoq'x, mixti'xte jun piẍ ẍtilunwt.⁹Nche yolin wi'je' ex nkyma'n: ¡Qa matzajta xnaq'tzalqeye', qama tzaj t-xnaq'tza'na matxi' tzaj tyek'u'n Dyos teya! ¡Naku'wtloj b'o's k'walqo'ye'¹⁰tzma nb'ent u'j qu'ne' kjalu: b'a, b'e, b'i, b'o, b'u! chechij.¹¹Qanatzun min xikyb'i'n, kxe'l q'met toj yol mixti' ttx'o'lajil, toj jun yol min ojtzqi'n, kse'nx kyolila' Dyos teju' tnam lu.¹²Ojetoq tmate Dyos kye ikjalu: Luju' nak'b'il lu, luju' ojb'il lu; tz'ojlanju' matxi' sikti, chij. mixtzunti'x kyej tu'n t-xikyb'i'n.¹³Qu'mtzun kyolil Qman Dyos kye' naku'xwitloj b'o's k'walqe' tzma nb'ent u'j kyu'n. Ajtzun kyxi' b'et che xe'l pak'chaj, che k'ixb'el, che kb'eltz'aq toj xpatxab', che tzyeteltzuntz.

¹⁴Kyb'inku'tzune' tyol Qman Dyos, xjal min nche ximane' nche kawine' tib'aju' tnam Jerusalen.¹⁵Inkyma'ne': Matxi' kyejb'ent jun qyole' tuk'i'lju' kamik, jun yol tuk'i'lju' kawb'il kye kyimni, tu'ntzun lalun kub'qi'je' tu'n yajb'il kuw ajtul kanun; matxi' qjoye' qewb'ile' toj chajyolil, kolb'il toj sb'ub'l, chechije'.

¹⁶Qu'mtzun ntma'n Qman Dyos: Kb'el nq'o'ne' jun ab'j toj Syon, jun ab'j sk'o'n ex twi' wi'yal, a ab'ju' k'okyel nim toklen ex k'okyel te tq'uqlil ja. Alkyetzun maqetk'u'j ti'j, k'anq'il toj nak'b'il.¹⁷K'ajb'elju' tnik'alilti'j plonb'ilte ja wu'ne' ajtjaw b'inchet, atzu'n ttzinunal k'ajb'el nib'elb'il, chij.
Atzu'n kolb'il matxitoq kyjoye' toj chajyolil kb'el xitj tu'n saqb'aqun, ex kxeltiqa'n a' jankyklo'na' kyib'e'.¹⁸Kb'el naju' kyyol b'entti'j tuk'i'lju' kamik, exju' kyol b'entti'j tuk'i'l kykawb'il kyimni kjel mixti' toklen. Tzulju' yajb'il xob'ajilx ex che b'elwab'e'ne' tu'n.¹⁹Che yajtele' tu'n alchaq ajtul. Tzul tkyaqil q'ij, q'ijtl ex qonik'an. Naqpe' ajt-xikyb'i'ne' tqanil che lu'lule'.²⁰Kse'n ajkykub' kẍe tib'aj jun kuẍb'il b'o'stwitz ex se'n tu'n kyktxunte kyib'e' tu'n jun b'o's xb'alun.²¹Ktb'incha' Qman Dyos kse'n tb'incha twi' witz Perasim, ktb'incha' kse'n tb'incha toju' b'ya' Kab'aon, tu'n tb'inchanteju' taq'un, maskye junxi'ku' tka'yinx, tu'n tjapunju' taq'un, ju' ati toj ewaj.²²¡Lantzun che oktle' mixti' kynab'le'!, qu'n naqtz'ok jitz'lixi'xtlju' xpatx'k'uxb'il kyi'je'; qu'n matxi' nb'iye' qa matxi' tchaq' Qman Dyos nimtipumal xitb'il teju' tnam lu.

²³Kyb'inkupe'ye', kyb'intze' kxe'l nma'ne' kyeye', kyb'intzju'ye' nyole' b'a'nxi'x:²⁴Kse'n ajt-xi' jun xjal awal, myanaqwit nq'u'n tkyaqil tq'ijlalil mujqa naqwit nkjon twitz tx'otx'.²⁵¿Ma myatzun naqa xb'aj tkjo'n tx'otx', nxitchto'n tijajil eneld mujqa komin, ex nxitawa'n triy toj txoli'n, ex nxitawa'n seb'ad ex ab'en ti'jile?²⁶A Dyos nxnaq'tzante se'n ktb'incha'ya'.²⁷Qu'n min ntriyitte' eneldo, ex min nik'x tolit jun karet tib'aju' komin; naqna' nkub'jette' eneldo tu'n jun tze ex ikxju' komin.²⁸In triyitte' triy, mitzunya o'kxwit ntb'inchetju' ti'j; inex tolit karet tib'aj ex nel pa'yitju' twitz triy, extzun lay kupch'ettju'.²⁹Ikxtzu'n ntnk'u'na' Qman Dyos nimtipumal t-xim. Te lab'te'n qexi'xju' t-xim ate', ex nche tb'incha'n tuk'i'l nab'l.¹¡Qab'anx twitz Aryel, aju' nintnam jatena' jte' q'ij Dab'i! Tzik'ku' jte' ab'q'i tu'n kyik'sante txqan kyninq'ij,²chin okyeltentzuntze' yajulte Aryel, nim oq'el kb'ajel. Ikyk'okyela' nintnamju' weye' kse'n Aryel.³Che tzajel nchq'o'ne' nxjale' te q'oj tu'n tb'aj kytxoli'n kyi'je', k'okyel njpu'ne' kyi'jileye' kyu'n kuwsb'il ex che b'el nk'u'ne' xjal tu'n kyq'ojin kyi'je'.⁴Majx kb'el me'seta, woqliya twitz tx'otx'; ajtjaw yolina naku'j jun xob'tzal; naku'j naq njiq'chantla ajtyolina.⁵Naqtzun myanim, toj jun kmujx, kb'el ttz'e'ysa'n Qman Dyos nimtipumal kywitzju' tajq'oja, tuk'i'l q'ankyaq, kyajnajnab', tuk'i'l nim tq'ojq'ojel, tuk'i'l kyq'iq' jb'al, q'ankyaq ex q'aq' xitul. Majx che kjelquqixkye' txqan tajq'oja, che b'ajelkye' txqan yajulteya kse'n nxi' iqa'n ttxa triy tu'n kyq'iq'.⁷Kykyaqilju' tnam min nb'ent kyajlet lu nche q'ojin ti'j Aryel, kykyaqilju' nche q'ojin ti'j ex nche oktzaqpaj xitulkye ja kuwsa'n, aye'ju' nche yajlante, naku'j jun witzik' te qonik'an che elela'.⁸Ikyk'okyela' kse'n nwitzk'an jun xjal nwe'yajti ex toj twitz qa nwan, ajtzun ttzaj tna'ntib' nxi'xwe'yajti; mujqa kse'n nwitzk'an jun xjal nk'wajti ex toj twitz qa nk'wan ajtzun ttzaj tna'ntib' nxi'xk'wajti nxi'x tzqije' toj tqul. Ikytzun kb'ajelju' kyi'ju' txqan tnam min nb'ent kyajlet lu nche q'ojin ti'ju' witz Syon.

⁹¡Kyljonxtzune' mixti' kynab'le'! ¡Kymoẍsankukyib'e' kukxju', tu'n lan che ka'yine'! ¡Che ẍutujlaku'ye' kukxju' kse'n tx'ujtenil, maskye mya tu'n q'e'n!¹⁰Matxi' tzaj tq'o'n Qman Dyos jun watl b'a'nxi'x kyib'aje'. Aye' t-sanjelal Dyos witzb'aj toju' tnam, matxitzun tz'ok tjpu'n Qman Dyos kywitz tu'n jun su't.¹¹Tkyaqil witzik' matxi' tz'ok kyeye' kse'n tz'ib'a'n twitz u'j b'altz'i'n ex jpu'n b'a'nxi'x. Qama txi' tq'o'n jun te jun b'a'n t-ẍch'i'n u'j ex matxi tma'n te: Ẍch'i'nktza lu, qa chi, ktzajel ttzaq'we'n: Lay b'ent, qu'n jpu'n b'a'nxi'x, chilo.¹²Qatzun matxi tq'o'n te jun xjal min b'ent t-ẍch'i'n u'j ex matxi tma'n te: Ẍch'inktza lu, qa chi, kxe'l ttzaq'we'n te: Min nb'ent nẍch'in u'je', chilo.

¹³Tzaj tma'n Qman Dyos weye': Najb'en tnam lu weye' naq tu'n tyol ex tu'n ttzi nnimana' weye', atzu'n tanmi najchaq ta' wi'je', extzu'n k'u'lb'il ntb'incha'n weye' xjalte' xjaw nab'linte ex naq xb'jaw b'ent toj kywi'.¹⁴Qu'mtzun kjel k'ab'chaj jumajtlju' tnam lu wu'ne' kyu'n b'a'nq'ob'aj ex ti'xti' te lab'te'n. Kb'el naj kynab'lju' ati kynab'l ex lay b'entl kyximanju' k'atzqe' kyxol.

¹⁵¡Qab'anx kywitzju' nche ewan twitz Qman Dyos tu'n lalun tz'el yalju' kyxim, nkyb'incha'n myab'a'n toj qxopin ex nkyma'n: Mix-a'lo'te nka'yin qi'j. Mix-a'lo'te nlonte!, chechij.¹⁶¡Inxi'x jyonjtz tu'me'l tu'n kychuksanjtz ti'xti'! Naku'j jun toklenju' xoq'l tuk'i'lju' naq'unan ti'j. Lay txitma'n jun ti'xti' teju' b'inchante: Myata b'inchanweye', chiwt, lay txitma'n jun piẍ b'a'n tx'otx' teju' b'inchante: Min kanli twitza ti'ju' ntb'incha'na, chiwt. Yol Tziya'n tu'n kyklet aj Israel¹⁷Toj jte' q'ijtl k'okyelju' nimaq k'ul te awb'il, aye'tzu'n awb'il che okyel te nimaq k'ul.¹⁸Tojtzu'n q'ij lu che b'ilju' xjal chkyinqe' aj tjawẍch'i'n u'j kye, exqe' moẍ kb'antel kyka'yin, lay che takanjetl toj qxopin ex qlolj.¹⁹Che tzalajel jumajtlju' min nkynima'n kyib' twitz Qman Dyos, che tzalajelju' xjal prowqe'xi'x ti'j Qman Dyos Xjan kye aj Israel.²⁰Che mankulju' xjal mixti' kynab'l, lay che tentlju' nkynima'n kyib', ex che b'ajelju' o'kxtzu' toka' kywi' ti'ju' myab'a'n,²¹aye'ma' nche poqonkye txqantl te b'yolxjal, ex nkub' kyq'o'n xpatxab' kye ajkawil, ex tu'n sb'ub'l min nkyjo'n tu'n tb'inchet tnik'alilti'j teju' mixti' til.

²²Qu'mtzun ntma'n Qman Dyos nkyk'lu'n aj Israel ju' klonte Ab'raam, ikjalu: Kxe'l qex ja'lo lay tz'eltl tch'ixaw Jakob', ex lay kub' ẍkyeqax,²³qu'n ajtel kynik'ju' tyajajil ti'ju' matxi' nb'inchaye' toj ttanam, k'elelkynik' ti'ju' woklene' xjan ex ktenb'el nchiylale' kye, ayine' Dyos Xjan kye aj Israel.²⁴K'okyel kynab'lju' xjal chukjni kynab'l, exqe' nche xmayin kyk'ma'ju' xnaq'tzb'il, chi Dyos. Kyi'ju' nkyjyo'n tonb'il Ejipt¹Intma'n Qman Dyos kjalu: ¡Qab'anx kywitzju' nk'wale' pi'sqe', nkub'kynk'u'n kyxim ex min ntzaj kyma'n weye', nb'aj kynk'u'n kyaq'un ex mixti'we' nxinma'n kye, inxi'xtzun b'aj kychmo'nxi'x kyiltz!²Ojqelxi'x kyel ajkyb'ajx toj Ejipt, atzu'n weye' min nchi xjelun; nche b'ajx klolkyib' tuk'i'l paraon, nkyklo'nkyib' tjaq' t-xlekumal Ejipt.³Oktzun k'elel kych'ixaw toju' kolb'il kyib' tuk'i'l paraon, xi' che b'elẍkyeqaxa' tu'n o'nb'il nkyjyo'n toj Ejipt.⁴B'a'nqa maxi'toq che b'ajx kychq'o'ne' t-xel kawil tzmax kyoj nimaqtnam Soan ex Anes,⁵kykyaqilx k'elel kych'ixaw tu'n nintnam mixti' b'a'n tu'n lu, layx che toni ex mixti' tajb'en kye, naq b'is ex xitb'il ntq'o'n, chi Dyos.

⁶Tpakb'alil kyi'ju' alu'mj toj Nekeb': Nche b'et xjal toju' tx'otx' xob'ajilx, janajlaqe' b'alun nche tzanun, e'kan wotz ex nimaq kan nche lipan, nb'ajx kyiq'i'n kyk'uwen ex kq'inumal kyi'j b'ur ex kyi'j kamey tzmax Ejipt, toju' tnam mixti'x tajb'en,⁷mixti' tipumal ex lay b'ent tonin. Qu'mtzun a tb'iju' wu'ne': Nin txkup ntzanun ex mixti'xte ntb'incha'n.⁸Kutzaja ja'lo ex tz'ib'anku'ya twitz jun tz'lan, tz'ib'anku'ya toj jun u'j tu'n tkyejten toju' tq'ijlalil tzul, te jun tziyb'il tejumajx.⁹Majx pi'sqe'kye' xjal lu, min njapun kyol kyu'n, min kyajb'il tu'n kyb'i'nte t-xnaq'tzb'il Qman Dyos.¹⁰A nxikyma'n kyeju' xjal npon kynab'l: Lalun che witzk'antle', chechi, ex nxikyma'n kye sanjelal: Lalun che tzakyma'ne' yek'u'n ax qeye'; aye' yol mya kuwqe' kymanqe'tze' qeye'; lalun tz'el kyiq'i'ne' qtzalajb'ile'.¹¹Kypa'mil kyib'e' ti'ju' b'e, lalun che'xe' toju' b'e tzinun, lalun kub' kyq'o'ne' Dyos Xjan kye aj Israel qwitze', chechij.

¹²Qu'mtzun ntma'n Dyos Xjan kye aj Israel ikjalu:
Inel kyik'o'nkyeye' oqxenb'il lu, nokqekyk'u'je' ti'ju' q'oj ex ti'ju' myab'a'n, ex a oksla'nju' kyu'ne';¹³qu'mtzun, ati kypaje'. Ikyqe'ye' kse'n nintapi nimin twe' b'ajni lo'n t-xe naq myanim ajttzaj niq'j;¹⁴che b'elxitu'ne' kse'n jun nin tx'otx' xar, majx nkub' b'uchj mixti'xte jun piẍ nkyaj tu'nwt tajb'en jotb'il ttxalq'aq' mujqa te pulb'il a' toj xoch, chij.

¹⁵Ntma'n Qman Dyos Xjan kye aj Israel ikjalu: Kutanjtz kyi'je', qex kyk'u'je' ex che kletele'. Ktenb'el kyipumale' qa min nche b'isune' ex q'uqli kyk'u'je', chij. Aye'tzunkye' min kyaje',¹⁶ape' kymaju'ye': Lay, ate b'a'n qo oqele' ti'j chej, chechije'. B'a'natzun, ikykb'ajelju' ajkyxi oqe'. Ex kymaye': Qo jawixe' kyoj karwaj kuw che ojqelan, chechij. B'a'natzun, kuw che ojqelanju' che kxe'l lpe kyi'je'.¹⁷Kab'k'al lajnaq (1,000) xjal che b'el oq twitz jun xjal, kykyaqile' che b'el oqe' kywitz jwe' xjal, tzmaxi'j aj kyko'pje' kse'n jun tze nkyej tx'ikye twi' jun witz mujqa kse'n jun techlal jawniq'o'n twi' jun ttxa'nwitz. Yol tziya'ntl tu'n tlaqb'il tk'u'jlalilju' tnam

¹⁸Atzunte Qman Dyos nayon kyeye', tu'n ttzaj q'aq'an tk'u'j kyi'je'; tajb'ilxi'x tu'n tyek'u'nte tk'u'jlalil kyi'je', qu'n tnik'alti'jte Qman Dyos. ¡B'a'nqe'xkye kykyaqil xjal q'uqli kyk'u'j ti'j!

¹⁹Tnam Syon, najliya Jerusalen: lay tz'o'q'tlta. Ktzajel q'aq'an tk'u'j Qman Dyos ti'ja ajtb'inte nẍch'ina nqanin o'nb'ila, naqntzajb'i'na tu'n, ktzajel ttzaq'we'n.²⁰Ex maskye matzaj tq'o'n Qman Dyos yajb'ilte twaya ex b'is te tk'wa'ya, ate xnaq'tzalteya, lay kub' ewantl; tu'nku' twitza ktka'ya'ya.²¹Qatzun matxitxalpuja toj tb'a'nq'ob'a mujqa toj tnayaja, ktb'i'ya jun nyolin ti'jxi'ya ex ktma' teya: Lute b'e tzalu, kukxi'ye' tzalu, ch.²²Oktzun che eleltik'u'na twitzleb'a saqpwaq exqe' ktxu'n kyi'j tu'n q'anpwaq, mixyab'a'nqe'tl teya. Che eleltik'u'na kse'n tz'is mixyab'a'n.²³Ktzajel tq'o'n Qman Dyos jb'al tib'aju' ij kxel tawa'na, ex ktzajel nim ttriya lantwitz toju' tx'otx'. Nim kywa twakyixa ktenb'el toju' q'ij lu.²⁴Exqepena' tman twakyixa exqe' tb'ura nche aq'unan toj kojb'il ktenb'el kywa tb'anilxi'x.²⁵Ajtpon tq'ijlalil tu'n kyb'yet nim xjal ex ajkykub' xitu'n ja kuwsa'nqe', kche b'etel nin a' ex tnimal a' kywi' witz ex kywi' b'us.²⁶Ktq'a'na' Qman Dyos ex k'okyel tptzo'n tk'ixb'len ttanam. Kk'anteltzun xjawtz kse'n q'ij, atzu'n q'ij kk'antel wuq majtl kuw, kse'n ajkyk'ant wuq q'ij junx. Tz'e'ysb'il twitz tnam Asirya²⁷Kyka'yinxe', aku' Qman Dyos tzul najchaq; nxi'x tx'u'jin kse'n txqan sib' nb'uqchaj, nxi'x yolin tuk'i'l ttx'u'jil, ikytyolju' kse'n q'aq' majx nttz'e'ysa'n,²⁸ikyt-xewju' kse'n jun nin a' nexlaqj njapunx tjaq' tqul jun xjal; tzul q'ol jun iqtz kyib'aju' nimaqtnam, tu'n kykub' t-xitu'n, k'okyex tq'o'n k'uxb'il toj kytzi tnam juk'b'ilkye, tu'n kykub' tzpet.²⁹Atzunkye' k'okyel b'itz, kse'n jun tzalajb'il xjan te qonik'an; ktzalajel kyanmiye', kse'n xjal nb'et toj tq'ojq'ojel chun tu'n txi' twi' witz te Qman Dyos, aju' kolb'ilkye aj Israel.³⁰Kb'injtzel tq'ojq'ojel twi' Qman Dyos kuwxi'x, ex ktyek'u' tipumal, kq'ojil tuk'i'l ttx'u'jil xob'ajilx, tuk'i'l jun q'aq' tkyaqil inb'aj tu'n, tuk'i'l q'ankyaq, txqan jb'al ex saqb'aqun.³¹Ajkyb'inte tq'ojq'ojel twi' Qman Dyos ex ajtkub' tz'e'ysa'n kywitz. Okxi'x k'okyeltchi kyi'j aj Asirya,³²ex atl junjun maj kykub' tjuma'n Qman Dyos, che q'ajtel tanb'or ex arpa Kq'ojilte Qman Dyos xob'ajilx kyi'j.³³Atxi'x ojtxi' b'incha'ntlte' kyi'j aj Asirya ex ti'j kynimaqkawil nim twitzju' najb'il te yajb'il ex nim t-xe, jun ninq'aq' nk'ant tu'n txqan si. Kjawil tk'ansa'n Qman Dyos tu'n t-xew, naku'j txqan q'ol. Kyi'ju' nche jyon o'nb'il toj Ejipt¹¡Qab'anx kywitzju' nche'x jyol o'nb'il Ejipt, exqe' nokqe kyk'u'j kyi'j chej, exqe' nokqe kyk'u'j qa nim txqan kykarwaj exqa nim txqan kyxjal kyi'j kychej, ex min nokqetlkyk'u'j ti'ju' Dyos Xjan kye aj Israel, min kyjyo'n Qman Dyos!²Ex ikxte Qman Dyos majxnb'ent tu'n, tu'n ttzaj tq'o'n jun xitb'il, ex ajtmante jun tyol, min nanjtzti'j tk'u'j. Kjawil tiq'i'ntib' kyi'ju' xjal b'inchal myab'a'n, kyi'ju' nche onin kyi'ju' b'inchal taq'wix.³Xjal qenakye' aj Ejipt, mya dyosqe'; mya xewb'ajqe' kychej, chib'jqe'. Kb'el ttz'e'ysa'n Qman Dyos kywitz, kb'elkyi'ju' nche kolon exqe' nche klonjtz; kykyaqilx che najel.

⁴Tzaj tma'n Qman Dyos weye' kjalu: Kse'n jun b'alun makub' tb'yo'n jun rit min nxob' kyeju' k'ik'lel, b'a'nqa mab'aj kyb'u'yi'n kyib' kykyaqil b'a'nqa mache okten ẍch'il xob'salte, ikytzu'n tzula' Qman Dyos nimtipumal. klolte ttanam twi' witz Syon.⁵Kse'n pich' nt-xq'uqi'n tpaqb'il nlipan tib'ajile, ikytzu'n ktkla'ya' Qman Dyos Jerusalen; kt-xq'uqi', oktkla', kkolol ti'j, ex ktzaqpetel tu'n, chij.

⁶Aj Israel, kutanjtz kyi'je' tk'etzju' matxi' che b'inchana' ile' twitz.⁷Qu'n ajkyel kyik'o'ne' kykyaqil kywitzleb'e' q'anpwaq ex saqpwaq eb'ajkub' kyb'incha'ne' tu'n q'el il kyq'ob'e', atzun q'iju' kb'elti'j Asirya tu'n k'uẍtx'e'nb'il, ex mya tu'n tipumal xjal. Tu'nju' q'oj che b'ela' oqju' kyxjal, aye'tzu'n ku'xun q'ojilqe' che okyel te lq'o'n majin;⁹kb'el oqju' kynimaqkawil tu'n xob'il, aye'tzu'n kynejel kjel kytzaqpi'n kb'ander. Aku' Qman Dyos inq'mante ja'lu, ati jun ninq'aq' b'incha'n tu'n toj Jerusalen tu'n ttz'e'yset kywitzju' tajq'oj. Kawb'il te tnik'alilti'j¹K'okyel jun nimaqkawil toj ttzinunal kkawila' e'kawil tu'n kykawin toj tnik'alilti'j.²Teyile junjunkye k'okyel naku'j kolb'il te kyq'iq' ex kolb'il te q'ankyaq, naku'j tb'e a' toj tx'otx' tzqij, naku'j tewan jun nin pik toj chq'ajlaj.³Che ka'yil b'a'nxi'x ex kkyq'a'kyib' tu'n kyb'inte b'a'nxi'x;⁴kb'el kyxima'n b'a'nxi'x ajkyb'inchante jun ti'xti', ex chexe'l kychik'b'a'n ti'xti' axxi'x.⁵Lay tz'okq'o'nju' xnak te nim toklen ex lay tz'ok q'o'n tx'yan xjal te nimaqxjal.⁶Qu'n aju' xnak nyolin tuk'i'l t-xnakyil ex nkub' t-xima'n taq'un myab'a'n; noktilil tu'n, tu'n tb'iyun ex nq'man chajyolil ti'j Qman Dyos; min nxitq'o'n twaju' nwe'yajti ex min nxitq'o'n tk'wa'ju' nk'wajti.⁷Atzu'n tx'yan xjal nsb'un ex nximan tu'n tb'inchante myab'a'n; nche tb'o'lsa'n prow tu'n chajyolil ex nkutb'lo'nju prow ntqani'n tu'n tb'inchanjtz tnik'alilti'jte.⁸Atzunte' b'a'n xjal nximan tu'n tb'inchante b'a'n, ex ntwab'a'ntib' tojxju' t-xim lu. Yol kyeju' qya min nche ximan ti'ju' tzul⁹Aye'tzunkye' qya min nb'ajx kyk'u'je', kyb'intzju'ye' kxe'l nma'ne' kyeye'. Kyb'intze' nyole', qya naqx q'uqli kyk'u'je'.¹⁰Q'uqli kyk'u'je' ja'lo, oktzun che yajtele' naqch'i'n tik'len jun ab'q'itl, qu'n kb'ajelte' twitz awal ex lay kyb'uyitle' twitz ub'a.¹¹Che lu'lune' aye'ye' min b'ajx kyk'u'je'; che xob'e' aye'ye' naq q'uqli kyk'u'je', kyiq'imilju'ye' kyi'je' lu ex kyq'onk kyi'je' te b'is.¹²Kyek'ume' b'is ti'ju' kytx'otx'e' tb'aniltoq ex tb'anil kyawale' ub'a.¹³Nimaq k'ul ex ch'i'x kb'ajel ch'iy toju' ntx'otx'e', kyoj kykyaqil ja te tzalajb'il ex sqach toju' nintnam.¹⁴Kjel tzaqpi'n tja nimaqkawb'il; kjeltenju' nintnam najli txqan xjal toj naq chq'ajlajtl; ex che kjeltzaqpi'n ja kuwsa'nqe' tejumajx; kyjonku' tojk'ul b'ur che najal toj, ex che walju' wakx toj.

¹⁵Tzultzun jumajtlju' tipumal Qman Dyos ch'isal qib'aj, ex ktzajel jumajtl tawalju' chq'ajlaj, atzu'n tx'otx' te awb'il k'okyel tb'anilxi'xtl.¹⁶Ktenb'el tnik'alilti'j ex ttxolilti'j toj tkyaqilju' tx'otx'.¹⁷Tzul nak'b'il tu'n tnik'alilti'j, tzalajb'il ex q'uqb'ank'u'jal tejumajx.¹⁸K'anq'ilte' ntaname' toj jun najb'il nak'li, kyoj ja b'a'n b'inchb'enkye, kyoj ja mixti'te nb'aj toj,¹⁹b'a'nqa mache kub'tx'e'mu'n tze toj k'ul ex matz'el tch'ixawju' nintnam.²⁰Che anq'ilkye' toj tzalajb'il, nim jb'al kb'el tib'aju' kyawale' ex tb'anil kywa kyb'ure' ex kywakyixe'. Tq'uqlil tk'u'jlalil ti'j Qman Dyos¹¡Qab'anx twitza xitul, b'ajx kub'a' xitu'nxi'ya; nnoktzaqpaja q'ojil kyi'ju' b'a'n kyten tuk'i'la, atzunta mix-a'lo' nokmiltz'uj ti'ja! Ajtb'aj xituna, kb'el najsa'na, ajtb'aj q'ojina, k'okyel q'oj ti'ja.²Taye, q'aq'antz tk'u'ja qi'je', nqo ayone' teya. Awta o'nb'ilqeye' tkyaqil prim, kolb'ilqeye' toj tq'ijlalil ch'uẍ.³Nche kub' oqju' tnam ajt-xikyb'i'n tq'ojq'ojel twi'ya, ajtyolina nche b'ajxsputju' nimaqtnam;⁴naku'j ẍt'ikt'u'l kyajq'oj jupliqe' kyib'aj, che b'el lik'puj kyib'aj ex k'elelkyiq'i'n kyq'inumal.⁵Ate Qman Dyos tib'aj tkyaqil, najli toj kya'j; matxi' tzaj tq'o'n ttzinunal ex tnik'alilti'j toj Syon,⁶xq'uqi'n tu'n kukxju'. K'uwenjte' nab'l ex ojtzqib'l te kolb'il; q'inumalte' ati tchi Qman Dyos qe.

⁷¡B'inxpe'ya nche oq'ju' kuw che q'ojin toj b'e ex nche oq'ju' chq'o'nqe' yolil tu'n tten nak'b'il!⁸Tz'inun kyoju' b'e mix-a'lo'te nb'et kyoj. Mache kub' xitju' yol kyejni b'entti'j exqe' nk'u'ntlkyi'j; mixti'xte xob'il ti'j jun ti'xti'.⁹Toj b'is ta'ju' tx'otx', xi' tkub' tzqiju' Lib'ano toj tch'ixaw, matxi' kyej chq'ajlajixju' b'ya' Saron, matxi' kub'sji'lixju' B'asan exju' witz Karmelo.

¹⁰Ntma'n Qman Dyos kjalu: Kjawil wiq'i'n wib'e' ja'lo; kxel nyek'u'ne' tkyaqil wipumale' ex woklene' ja'lo.¹¹Ttxa triy ex tz'is qekye' kxime' ex kyaq'une'; che b'ajele' tu'n nxewe' naku'j tu'n q'aq'.¹²Che b'eltza'jixkye' tnam; che b'ajel kse'n ch'i'x toj q'aq'.¹³Kyb'intzju'ye' matxi' nb'inchaye' aye'ye' najchaq ta'qe'ye', aye'tzune' nqaku' ta'qe'ye' tz'elx kynik'e' ti'ju' wipumale', chi Dyos.

¹⁴Nche lu'lunkye' xjal aj il toj Syon, ex majx ntzaj tchi kyi'ju' b'inchal myab'a'n ex nkyma'n: ¿Alxi'xkye junqe jaku' b'ent tanq'in toj jun q'aq' nxitun, toj jun q'aq' nk'ant tejumajx?, chechij.

¹⁵Alkyete nnanq'in toj tu'me'lxi'x ex nyolin ax, alkyete min jaw q'inumax tu'n sb'ub'l ex min ntq'o'ntib' naq tu'n jun oyaj, alkyete min nxitb'i'n yol ti'j b'yojxjali'n, ex min nok tq'o'n twitz ti'j myab'a'n,¹⁶atzunte k'anq'ilju' b'a'n, kkletel toj jun ja kuwsa'n kyu'n pik, ktenb'el twa kukxju' ex lay b'aju' ta.

¹⁷K'okyel tka'yi'n jumajtlju'ya nimaqkawil toj tajwalil; che kxe'l lq'eju' nqach teju' tnam najchaq.¹⁸Ajttzajtna'na xob'il kse'n sanq'ina'ya nejtl, ktma'ya: ¿Jatzunta'ju' intoq ajlan chojb'il te tnam? ¿Jatzunta' ntoq ik'twitz ti'ju' malb'il? ¿Jatzunta' nik'ultekyten ja nimaq kywe'?, chiloya.¹⁹Lay tz'anq'intla toj jun tnam mixti' tnab'l, ch'uẍ tu'n tkane tyol, chukjni tyol, mix-a'lo'x neltnik' ti'j.²⁰Ka'yinxpe'ya Syon, aju' nintnam janik'seta' qtzalajb'il; ka'yinxa Jerusalen, aju' nintnam q'uqlixi'x tk'u'jlalil; k'okyel kse'n kyxmuj xjal majx ati, lay che jawxb'oqli t-stakyil ex lay che laqju' taqwilil.²¹Atzu' nkub'tyek'u'na' Qman Dyos tajwalil. Jun najb'ilte' ja ta'qe' nin a', ex tnimal a' nim kywitz, extzun lay tz'elkyiq'i'n ajq'oj kyuk'i'l kyb'ark naqlmo'nqe' ex kyb'ark nim kyipumal.²²Lay kyipa kyaqwililju' b'ark lu tu'n kytzyetju' tze wa'lqe' kyoj lay b'ent kyk'letju' xb'alun lmolkye b'ark tu'n kyb'et. Nim q'inumal k'elel qiq'i'n kyej ajq'oj, naqpena' kox che elel q'inte tuk'i'l kye ex siktenilqe' che okyex elq'alkye. Qu'n a Qman Dyos ajkawil qe, ate b'inchal kawb'il qib'aj ex qnimaqkawil, ex a kklolqe.²⁴Mix-a'lo'te najli tojku' tnam tu'n tmante: Yab'qine', chiwt. Kb'el tnajsa'nte Qman Dyos kyilju' xjal toj tnam Syon. Tz'e'ysb'il kywitz aj Edom tu'n Dyos¹Che lq'eqe'tze' b'ilte, tnam; kyb'inku'ye' nimaqtnam. Tu'n tb'inteju' tx'otx' exqe' ate' twitz, tu'n kyb'inte twitz tx'otx' exqe' nche tzaj ch'iy twitz.²Qu'n nq'ojin Qman Dyos kyi'ju' nimaqtnam ex kyi'j kykyaqil kyxjal te q'oj, matxi' kub'tb'incha'n tten tu'n kykub'najset ex tu'n kykyim.³Che kjel tzaqpi'n kyimni, okxi'x che b'eltzu'wixju' kyimni ex kqojlel chik' kse'n a' kywi'witz.⁴Che kb'el yulj kykyaqilju' che'w twitz kya'j, kjawil tb'altz'i'ntib'ju' kya'j ex kykyaqilju' che'w che b'elyupj, kse'n nkub' tzqij ex nkub' tz'aq jun t-xaq ub'a mujqa t-xaq iw.⁵Qama jawb'ent tk'uẍtx'e'nb'il Qman Dyos twitz kya'j ex kb'eltz'aq tib'aj Edom, matxi' kyimju' tnam q'ma'ntl tu'n tb'aj.⁶Kb'ajel txa'j tk'uẍtx'e'nb'il Qman Dyos toj chik' ex unt, kse'n ajkykub' b'yet qpoj tman rit ex ttxu chib' te chojb'il. Ktb'incha' Qman Dyos jun chojb'il toj B'osra, nim b'yojxjali'n kb'ajel toj Edom.⁷Che kb'el b'yo'n kse'nqe' tojk'ul wakx, qpoj tman wakx ex tman wakx; Kb'ajel txa'ju' kytx'otx' tu'n chik', ex kb'ajel naju' quq tu'n unt.⁸A q'iju' lu tu'n tok tu'me'l t-xel tu'n Qman Dyos, a ab'q'iju' tu'n tel k'as tu'n tpaj Syon.⁹Che jawil b'entju' a' toj Edom te q'ol, atzu'n quq te atz'an; kk'antelju' tx'otx' kse'n q'ol.¹⁰Lay yupj q'ijtl ex qonik'an; kb'uqchajel t-sb'el kukxju'. Nimtoj tq'ijlalil kjel tzaqpi'n; milo k'ik'ela'tl jun xjal atzu'.¹¹Atzu' che najala' tukru ex xitx', ex kkyb'incha' joj ex ẍchin kyja. Kjel tq'o'n Qman Dyos tx'otx' lu chq'ajlajtl ex tz'inun toj.¹²Lay tentl jun nimaqkawil tu'n tkawin toj; che kb'el naj kykyaqilju' nejenel toj.¹³Che ch'iyel ch'i'x kyoju' tja nimaqkawb'il, ex la kyoju' ja kuwsa'nqe'. K'okyel te kynajb'il xo'j ex kykolb'ilkyib' pich' naku'j t'iw.¹⁴Che tenb'elju' twiẍ k'ul junx kyuk'i'l xo'j, kb'ajel kytxko'nkyib'ju' chib'. Atzu' knajala' xob'tzal nxob'san te qonik'an, ex k'elelyal tnajb'il jatu'n tojlana'.¹⁵Ktb'incha' tukru tpaqb'il atzu'. kjoyol ex che itz'jel tal, ex che b'ajel tb'u'yi'n tu'n kyklet tu'n. Ex atzu' kyb'u'yi'ya'kyib' q'anjel, junjun ma' tuk'i'l junjun ttxu.¹⁶Kyka'yinku'xe' tuj Qman Dyos ex kyẍch'inku'xe': Kykyaqilju' txkup lu che tenb'el, kykyaqilju' ma' ktenb'el jun xuj kye, qu'n aku' Qman Dyos xkub' ximante ex che b'ajel tb'u'yi'n tu'n jun xupin.¹⁷Matxi' tzaj tyek'u'n kynajb'il teyile junjun, matxi' tzaj tyek'u'n kytx'otx', ex che b'elten twitz tejumajx; che najal toj tkyaqil tab'q'iyil atzu'. K'anjetz ti'ju' tnam Syon¹Tzalajxju' chq'ajlaj, ju' tzqij tx'otx'; tzalajxwit b'a'nxi'x, tz'ub'chinxwit,²tzajxwit b'ech twitz kse'n liryo, tzalajxwit b'a'nxi'x. Ktb'incha' Qman Dyos xa'wankuxi'x kse'n Lib'ano, tb'anil tx'otx' kse'n Karmelo ex kse'n b'ya' Saron. Kykyaqil che ka'yilte tajwalil Dyos, ex toklen Qman Dyos.³Che kykuwsame' mixti' kyipumal, kyoninqe'xe' siktniqe',⁴kymanxe' kyeju' nche xob': ¡Kuwqe'xe', lalun che xob'e'! ¡Luna'te' Qman Dyos ati klolkyeye', ex kb'el ttz'e'ysa'n kywitzju' kyajq'oje' kse'nxju' kyil!, chechiku'ye' kye.⁵Che ka'yiltzun moẍtz ex che b'ilju' min nche b'in;⁶che xlik'pulju' tzkaj kse'nqe' msat, exqe' me che ẍch'il. Kpoq'chajel a' tuk'i'l tipumal toju' chq'ajlaj, tzqij tx'otx'.⁷K'okyelju' chq'ajlaj te njab', knojel toju' tzqij tx'otx' kyu'n kyxiklil a'. Kb'ajel ch'iy ptz'an ex ajlaj ja najlqe' xo'j ja'lo.⁸Ex ktenb'el jun ninb'e atzu' a tb'iju' k'okyel: xjan b'e. Lay che'xju' mya ẍtilsa'nkyib' toj, lay che b'etkye' xnakqe' toj.⁹Lay che ten b'alun atzu' ex lay che pon lq'eju' tojk'ul txkup. Toju' b'e lu k'anjetza'kyi'ju' tzaqpi'nqe'tl,¹⁰aye' matxi' che tkol Qman Dyos; che okyex toj Syon nche b'itzan tuk'i'l tzalajb'il, ex che anq'in toj tzalajb'il kukxju'. Knetel tzalajb'il ex nak'b'il kyu'n, mixti'tlte oq'e'n ex k'ixk'oj kb'ajel. Tkub'ti'j Juda tu'n Senakyerib' (2 R 18.13-37; 2 Cr 32.1-19)

¹Toj kyajlajoj ab'q'i ntoq kawin Esekyiy, q'ojin nimaqkawil Senakyerib' aj Asirya kyi'j kykyaqilju' nimaqtnam kuwsa'nqe' toj Juda ex e'kub' ttzyu'n.²Tzaj tchq'o'n jun nejenel kye t-xjal te q'oj tuk'i'l jun tnej xjal te q'oj kuwqe' tzmax Lakyis, ti'j Esekyiy nimaqkawil toj Jerusalen, ex kub' kynk'u'nkyib' tk'etzju' tb'e a' npon toju' tk'b'el nimin, toju' b'e nxi' toju' kojb'il tx'ajb'il su't.³Atzuntzu' e'etza' Elyakyim kyi'j, tk'wal Ilkyiy ju' ntoq ka'yinte tkyaqil toj tja nimaqkawb'il, ex Seb'a tz'ib'al tqanil; ex Joa, tk'wal Asap, ttz'ib'al nimaqkawil.⁴Tmaju' nejenel kye xjal te q'oj aj Asirya kye: —Kymanxe' tqanil lu te Esekyiy tu'n nimaqkawil nim toklen aj Asirya, ikjalu: ¿Tiqu'ntzun q'uqlixi'x tk'u'ja?⁵¿Ma a nkaneju' toj twitza qa ikyqe'x tb'anil yolju' kse'n tu'me'l njyet ex kse'n ipumalj tu'n tokju' q'oj? ¿Alqi'j q'uqla' tk'u'ja tu'n tjaw tiq'i'ntib'a wi'je'?⁶Inel nnik'e' qa atzu' q'uqla' tk'u'ja ti'j tipumal Ejipt. Anate' Ejipt naku'j tze matxi' kub'toqj, qama txiqtzyu'n nxitx'ikli toj qq'ob' ex nk'ixb'i tu'n. Ikytzun Paraonju', nimaqkawil aj Ejipt kye kykyaqilju' nokqe kyk'u'j ti'j.⁷Qatzun matmaya weye': Xi'q'uqla'qe' qk'u'j ti'j Qman Dyos janqo ajb'ena'ye', qa chechiye', ¿ma mitzun jun e'eltiq'i'n Esekyiy najb'il te k'u'lb'il exqe' q'olb'eb'l teju' Dyos lu, ex tchaq' kye xjal aj Juda ex aj Jerusalen tu'n kyk'ulun naq tib'aj jun q'olb'eb'l?⁸Tziyamti'j jun tyola tuk'i'l wajawe', ju' nimaqkawil aj Asirya: kxe'l nq'o'ne' jo'k'al (2,000) chej teya, qama che elyal xjal chejilqe' tu'na.⁹Laypena' xkyeta tu'n toq junju' nejenel mixti'x tipumal kyxol t-xjal aj Asirya, ¿ma oktzun che kyknetel chejil tu'na ex chej toj Ejipt?¹⁰Jakupe' kub't-xima'na qa mya tuk'i'l tonb'il Qman Dyos ẍintzaja'ye' q'ojil ex xitulteju' tnam lu. ¡A pena'te saj chq'onweye' q'ojil ti'j ex xitulte! chij.

¹¹Xitzun kytzaq'we'n Elyakyim, Seb'na ex Joa teju' nejenel kye xjal te q'oj aj Asirya, kjalu:
—B'inchama xtalb'il, yolina qeye' toj aramey, ina' kaneqe' toj qwitz. Lan tzaj yolina qeye' toj eb'rey, qu'n kykyaqilju' xjal ate'qe' toju' nimaqtapi nche b'in, chechij.

¹²Atzunte' nejenel kye xjal te q'oj aj Asirya tma:
—Mya tete' kynimaqkawile' ex mya kyeye' xqo tzaja' tchq'o'ne' qnimaqkawile' aj Asirya q'malte' lu. Kyena'kye' xjal ate'qe' tib'aju' nintapi, qu'n kykyaqilxe' kyuk'i'lju' xjal lu, kxel kywane' kytxaye' ex kxel kyk'wa'ne' kytz'a'le', chij.

¹³Kub'tzun we' nejenel kye xjal te q'oj lu ex jaw t-ẍch'i'n kuw toj eb'rey:
—Kyb'intzpe'ye' ntma'n nimaqkawil nim toklen te Asirya kyeye' kjalu:¹⁴Lalun kyq'a' sb'u'kyib'e' te Esekyiy; lay b'entkye kyklet tu'n.¹⁵Qa tok Esekyiy oksalte kyk'u'je' tu'n tqe kyk'u'je' ti'j Qman Dyos, exqa matxi tma'n kyeye': Kna' qokletelte' tu'n Qman Dyos; lay taj tu'n tkub'ti'ju' nintnam lu toj tq'ob'ju' nimaqkawil aj Asirya, qachi,¹⁶lalun txikyb'i'ne'. Machin tzaj tchq'o'ne' nimaqkawil toj Asirya q'malte kyeye' tu'n kyb'inchanteye' nak'b'il tuk'i'l, ex tu'n kyq'onte kyib'e' toj tq'ob', teyiletzun junjuntz ktnik'b'e' twitz tawal ub'a ex iw, ex kk'wal ti'jxju' t-xoch.¹⁷Yajxi'tzuntl che kxe'lq'i'ne' tu'n toj jun tx'otx' ikyininxju' kse'n kytx'otx'e', ja ntzaja' triy ex ub'a, tu'n tb'inchet wab'j ex b'in.¹⁸Qa nxitma'n Esekyiy kyeye' qa che kletele' tu'n Qman Dyos, lalun kyaq' sb'u'kyib'e' te. ¿Ma ma'tzun che kletju' txqantl tnam tu'n kydyos toj tq'ob'ju' nimaqkawil te Asirya?¹⁹¿Jatzun ta'qe' dyos te Amat ex te Arpad? ¿Jatzun ta'qe' kydyos aj Separb'aym? ¿Ma ma'tzun tb'ent tklet Samarya kyu'n toj kyq'ob' aj Asirya?²⁰¿Alkyetzun jun kyxol kykyaqilju' dyos lu xklet jun tnam tu'n toj tq'ob' nimaqkawil te Asirya? ¿Tiqu'ntzun nkub' kyximana'ye' qa kkletelju' Jerusalen tu'n Dyos Manb'aj? chij kye.

²¹Aye'tzunkye eb'ajkyaj nume ex mixti'xte xikytzaq'we'n, qu'n matxi'toq tchaq' nimaqkawil tu'n lalun txikytzaq'we'n.²²Aye'tzunkye Elyakyim, ka'yilte toj tja nimaqkawb'il; ex Seb'na, tz'ib'al tqanil; ex Joa ttz'ib'al nimaqkawil, kub' kylaqu'n kyi'j, exi'tzuntz tk'etz Esekyiy q'malte tyolju' chaq'ul kye xjal te q'oj aj Asirya. Klet Juda tu'n Qman Dyos te Ajq'oj (2 R 19.1-37; 2 Cr 32.20-23)

¹Tetzunj tb'inte nimaqkawil Esekyiy ja'lu, kub' tlaqu'n t-xb'alun ex oktq'o'n ti'j te b'is te techlal k'ixk'oj, ex xi' toju' tja Qman Dyos.²Ex exi' tchq'o'n Elyakyim, ju' ka'yilte toj tja nimaqkawb'il; ex Seb'na tz'ib'al tqanil, exqe' pale tijwnaqqexi'x, tok kyi'j te techlal k'ixk'oj, tk'etz Isayiy tk'wal Amos,³ex tu'n t-xikyma'n te toj tb'i nimaqkawil kjalu: Ato'qo'ye' toj jun tch'uẍal, tz'e'ysb'il witzb'aj ex ch'ixaw; kse'n jun qya ch'inxtl tb'anix, mixti'tl tipumal.⁴Noqwit matxi' tb'i Dyos Manb'aj janajb'ena'ya tyolju' nejenel kye t-xjal nimaqkawil aj Asirya, te i'lb'ilte Qman Dyos itz', ex naqwitj kub' tz'e'ysa'n twitz tu'nju' tyol aku' Qman Dyos xb'inte. Qu'mtzun b'inchama xtalb'il, na'n Dyosa kyi'ju' ate'qe'x, chi nimaqkawil xitma'n tq'umli.

⁵Exi'tzunju' nche kawin tuk'i'l nimaqkawil Esekyiy q'malte te Isayiy,⁶atzunte Isayiy xitab'tzi'n kye tu'n t-xikyma'n te Esekyiy kjalu: Chi Qman Dyos kjalu:
Lan xob'a te kyolju' tmajin nimaqkawil aj Asirya xkyma wi'je'.⁷Knb'incha'ye' tu'n tul q'mab'aj jun tqanil te tu'ntzun tanjtlti'j toju' ttanam, atzuntzu' knb'incha'ye' tu'n tkub' b'yo'n, chi Qman Dyos chechiku'ye' te, chi Isayiy.

⁸Tb'itzu'n nejenel kye xjal te q'oj aj Asirya matxi'toq tzik'b'et nimaqkawil aj Asirya toju' nintnam Lakyis. Eiky'b'ettzuntz Jerusalen, ex knet nimaqkawil aj Asirya tu'n ntoq q'ojin ti'ju' tnam Lib'na.⁹Tb'itzu'n nimaqkawil aj Asirya atzu' qa matxi'toq ljet jun q'oj ti'j tu'n nimaqkawil Tiraka aj Etyopya. E'tzaj tchq'o'n jumajtlju' nimaqkawil aj Asirya t-xel q'malte te nimaqkawil Esekyiy te Juda kjalu:¹⁰Matxi' tzaj tma'n Tdyosa ja q'uqloka' tk'u'ja teya qa lay kub'tz'aqa toj nq'ob'e'; lantzun tq'a' sb'u'tib'a te.¹¹Matxi' tb'iteya nb'ajkye nimaqkawil aj Asirya kyi'j kykyaqilju' tnam kyajb'il tu'n kyxitun. ¿Ma oktzun kletelta?¹²¿Ma eklettzu'n txqantl tnam kyu'n kydyos, ju' eb'ajkub' xitu'n kyu'n ojtxi' qchmane': aye' Kosan, Aran, Resep, exqe' xjal aj B'et-eden najlqe'toq Telasar?¹³¿Jatzun ta'qe' nimaqkawil aj Amat, aj Arpad, aj Separb'aym, aj Ena ex aj Ib'a?, chij xitma'n tq'umli.

¹⁴Xittzyu'n Esekyiyju' u'j xiq'o'n te kyu'n sanjelal, ex jawt-ẍch'i'n. Xi'tzuntz toj tja Dyos, ex jawtjqo'n u'j twitz Qman Dyos,¹⁵na'n Dyos ikjalu:

¹⁶Nman Dyos, nimtipumala, nche ajb'en aj Israel teya, tkub' tq'uqb'ila te kawb'il kyib'aj kyerb'in, o'kxta Dyos kye kykyaqilju' kawb'il twitz tx'otx', aya b'inchante kya'j ex tx'otx'.¹⁷Taye, b'inchama xtalb'il, b'intzpe'ya. Nman Dyos, ka'yintzpe'ya, b'intzpe'ju'ya tyol Senakyerib' saj tma'n weye', taq'wix tyol ti'ja, aya Dyos itz'.¹⁸Axte' Nman Dyos qa matxi' che kub' kyxitu'n nimaqkawil aj Asirya kykyaqil nimaqtnam ex kytx'otx',¹⁹ex matxi' che b'jo'kx kyq'o'n kydyos toj q'aq', qu'n myana' dyosqe', naq tzeqe' ex ab'j b'incha'n tu'n xjal. Qu'mtzun ekub'a' kyxitu'n.²⁰Atzu'n ja'lo Nman Dyos, qo' tkloma toj tq'ob', tu'ntzun kyb'inte kykyaqil tnam twitz tx'otx' qa o'kxta Dyos, Taye, chij.

²¹Xi'tzun tma'n Isayiy tq'umli te Esekyiy kjalu: Lu xtma Qman Dyos janche ajb'ena' aj Israel: Matxi' nb'iju'ye' tna'j Dyosa saj tma'na ti'j Senakyerib', nimaqkawil aj Asirya, chij.

²²A tma Qman Dyos ja'lu ti'ju' nimaqkawil aj Asirya:
Intze'n nintnam Syon ti'ja Senakyerib', kse'n jun txin. Inxi'x xmayin tnam Jerusalen ti'ja ajtanj ti'ja.²³¿Alkyetzu'n soktik'le'na ex mayolina taq'wix ti'j? ¿Alqi'j xjawa' tzaqpaja'ya ex majaw nima'ntib'a twitz? ¡Ti'jku' Dyos xjan te Israel!²⁴Majaw ilina te Qman Dyos kyu'nelju' nche kawin tuk'i'la. Matmaya: Machin jaxe' kywi' witz kyuk'i'l txqan nkarwaje' te q'oj, tojxi'xju' k'ul jupli kyu'n tze Lib'ano. E'kub' wik'sa'ne' k'ute nimaqxi'x kywe', exqe' tzaj tb'anilqexi'x. Njapune' kywi' witz nimaqxi'x kywe', ex kyoju' k'ul naku'j awal.²⁵Ku'x nlku'ne' xoch toj junxi'tl tx'otx' ex nk'wane' ti'ju' a' lu, ex e'kub' tzqiju' a' toj Ejipt wu'ne' tu'n nqane', chija.²⁶¿Mixtzunti' b'i'n tu'na qa ayine' Dyos Manb'aj, inkub' nk'unkyeju' ti'xti' lu? Nk'u'niletl wu'ne' atxi'x ojtxi', ex matxi' japun wu'ne' ja'lo; qu'mtzun nche t-xitu'na nimaqtnam kuwsa'n ex naq kyik'lenxtl nche kyej tu'na.²⁷Mixti' kyipumalju' xjal najlqe' toj, inxi'x che xob' ex nche ch'ixwi, ikyqe' kse'n cha'x k'ul toj kojb'il, naku'j k'ul ntzaj ch'iy twi' ja ex nb'ajtzqij tu'n kyq'iq' ntzaj tjawetzq'ij.²⁸Kanliwe' nwitz tkyaqilju' ntb'incha'na ex tkyaqilju' taq'una; b'i'n wu'ne' matxi' tzaj ttx'u'jila wi'je'.²⁹Wojtzqi'ne' ttx'u'jila ex ntnima'n tib'a, k'okyex nq'o'ne' jun arwoy toj ttxa'na, atzun jun k'uxb'il toj ttziya tu'n tjk'eta, ex k'anjel jumajtlti'ja wu'ne' toju' b'e jasaja'ya, chi Qman Dyos.

³⁰Xi'tzun tma'n Isayiy te Esekyiy: Lu jun techlal tiju' kb'ajel: kche wale' ti'ju' triy ntzaj ch'iy tu'nxtib' toju' ab'q'i ja'lo ex toju' juntl, tojtzun toxi'n ab'q'i che awale' ex kajwil twitz kyawale', tu'n tok kyawale' ub'a ex tu'n kywane' ti'ju' twitz.³¹Che okyelju' che kjel anq'in toj Juda kse'n awal: che lok'al ex che witzal,³²qu'n kjelten jni'toj Jerusalen; ate'qe' xjal che kjel anq'in twi' witz Syon. Kb'ajel ikju' tu'nju' nim tk'u'jlalil Qman Dyos nimtipumal.

³³Intma'n Qman Dyos ti'ju' nimaqkawil aj Asirya: Lay tz'okx toj Jerusalen, laype' b'ent txi' t-xon jun talsmaj ti'j, lay q'ojin ti'j tuk'i'l kolb'il ex lay jawkych'uqi'n tx'otx' ti'jile.³⁴K'anjelti'j tojxju' b'e jasaja'; lay b'ent tokx toju' nintnam lu. Ayinku'ye' Dyos Manb'aj nchin q'mante.³⁵Oknkla'we' nintnam lu, naq tu'n nk'u'jlalile' ti'ju' nmajine' Dab'i ex tu'nju' woklene', chi Qman Dyos, chi Isayiy.

³⁶Xi'tzu'n tanjl Qman Dyostz ex e'kub'tb'yo'n junaq oxmutx' kab'k'al lajnaq (185,000) xjal te q'oj aj Asirya; tojtzun jun q'ijtl kykyaqil matxi'toq che kyim.³⁷Eb'jawtzun tiq'i'n Senakyerib', nimaqkawil aj Asirya, t-xjal te q'oj ex anjtlti'j Ninib'e.³⁸Tetzun jun q'ij intoq k'ulun toju' ja te k'u'lb'il te Nisrok, ju' tdyos, kub' b'yo'n kyu'n tk'wal, aye' Adramelek ex Sareser, exi' oqtzuntz toju' tx'otx' Ararat. Atl Esaradon ju' tk'wal kawin te t-xel. Yab'ti Esekyiy Ex b'anix (2 R 20.1-11; 2 Cr 32.24-26)

¹Toju' tq'ijlalil lu yab'ti Esekyiy b'a'nxi'x, ex xi' Isayiy t-sanjelal Dyos, tk'wal Amos, ka'yilte ex xitma'n te:
—Chi Qman Dyos xtma: Q'mankja mankb'il tyola kyeju' toj tjaya, qu'n kkyimela. Lay b'enta, chij te.

²Atzunte Esekyiy okxtmiltz'u'n twitz twitz tapi, ex kub'san te Qman Dyos kjalu:

³Nman Dyos nchin kub'sane' teya, na'ntzju'ya wajb'eb'le' ma japun ex ttxolilti'ju' xnb'inchaye' twitza, ma nb'inchaju'ye' ntzalaja ti'j, chij. Kub' oq'tzuntz b'a'nxi'x.

⁴Tchaq'tzun Qman Dyos te Isayiy⁵tu'n t-xi'tl q'malte te Esekyiy kjalu: Matzaj tma'n Qman Dyos ja k'uluna' Dab'i ojtxi' tyajilb'ena kjalu:
Matxi' nb'iju'ye' tna'j Dyosa ex matxi' wile' ta'l twitza sel. K'anq'il o'lajoj ab'q'itla wu'ne'.⁶Knkla'ya tuk'i'l tnam Jerusalen toj tq'ob'ju' nimaqkawil aj Asirya. Ayinwe' chin klolteju' nintnam lu, chiku'ya te, chi Qman Dyos.

⁷Xittzaq'we'n Isayiy te:
—A techlal ja'lu ktzajel tq'o'n Qman Dyos teya qa kjapumelju' tyol teya:⁸Knb'incha'ye' tu'n tanjtzti'ju' tewan q'ij toju' lajoj sqit matxi' ku'tza' toj ttechb'ilq'ij Ajas, chij.
Anjtzun lajoj sqitun ti'ju' tewan q'ij matxi'toq ku'tz.

⁹Tej tb'anix Esekyiy teju' tyab'il, kub' ttz'ib'a'n b'itz lu:

¹⁰Matxi'toq kub' nximane' kjalu: Chin xe'le' tojku' tb'anil nchwinqlale'; nchinx chq'o'ne' toj tkawb'il kamik tzmax ajtpon b'aju' nchwinqlale'.¹¹Kub' nximane': Lay wiltle' Qman Dyos twitzju' tx'otx' lu, mix-alo'tl junju' nanq'in twitz tx'otx' okwit k'okyel nka'yi'ntle'.¹²Nkub'xitu'n njaye', nelq'i'n weye', naku'j kypach k'ik'lel. Naku'j tchemoj jun chmolju' nchwinlale'. nel jon ti'ju' chinb'ilte. Nchin yajtiye' tu'na q'ijtl ex qonik'an.¹³Nb'aj qonik'an wu'ne' nchin ẍch'ine' tu'n k'ixk'oj, naku'j tok jun b'alun toqilkye nb'aqile'. Nchin yajtiye' tu'na q'ijl ex q'onik'an.¹⁴Chab'a nchin t'i'njneye' kse'nqe' pich' kolondrin, nchin t'i'njneye' kse'nqe' paloms. Nche sikti nwitze' ka'yb'ente twitz kya'j. ¡Nman Dyos, nchin yajtiye', chin ttzaq'wentza!¹⁵¿Tixi'xti' tu'n txi' nma'ne' te, ana'te xb'inchante? Mixti'x noktl nwatle' tu'n tpaju' k'ixk'oj wi'je'.¹⁶Che anq'ilkye' klo'nqe' tu'n Qman Dyos, ex chin anq'ilwe' kyuk'i'l kykyaqil ja'lu.
Matxi' tzaj tq'o'n jumajtla nchwinqlale', b'a'nqine' tu'na.¹⁷Ka'nxlu nchin tzalajtle' tu'na te t-xel k'ixk'oj. Matxi' chin tkola teju' tjul kamik, qu'n makub' tnajsa'na tkyaqilju' wile'.¹⁸Lay b'entjaw nima'nta kyu'n ate' toj muqb'il, lay b'entjaw ajwali'na kyu'nju' kyimni, lay b'ent kyayonju' nche'x toj jul ti'ju' tyola njapun.¹⁹O'qe'kxkye' itz'qe' che ajwalilteya, kse'n nb'incha'ne' ja'lo. Nche yolinju' manb'aj kye kyk'wal ti'ju' tyola njapun tu'na.²⁰Atite Qman Dyos tzalu klol weye'. Che qq'ajtzanxju' qchinab' arpa ex qoqe' b'itzan toj tja Qman Dyos toj tkyaqilju' nqanq'i'n, chiju' b'itz.

²¹Ojetoq txitma'n Isayiy tu'n tkub'incha'n jun q'a'nb'il ti'j iw tu'n tokq'o'n ti'ju' yab'il ti'j nimaqkawil, ex q'anet nimaqkawil tu'n.²²Ex ojetoq txitqani'n Esekyiy te Isayiy:
—¿Ti'tzun techlal k'elela' nnik'e' qa b'a'n tu'n nxi'ye' toj tja Qman Dyos? chij. E'tk'am Esekyiy xjal e'tzaj chq'o'n tzmax B'ab'ilon (2 R 20.12-19; 2 Cr 32.27-31)

¹Toju' tq'ijlalil lu tb'i nimaqkawil Merodak-b'aladan, tk'wal B'aladan, nimaqkawil aj B'ab'ilonya, qa yab'toq Esekyiy ex matxi'toq b'anix, tzaj t-sma'n jte' u'j ex oyaj kyu'nel junjun t-sanjelal.²Tzalaj Esekyiy tej kyul ex b'ajx tyek'u'n tk'uwen kye, e'saqpwaq ex q'anpwaq, e'k'ok'sb'il, ex tb'anil aseyt exqe' k'ub'l taq'unb'il te q'oj, ex tkyaqilju' k'u'nile tu'n toj kykb'el. Mixti' jun ti'xti' toju' tja te kawb'il ex toj tkyaqilju' tkawb'il mixwitti' xityek'u'n kye.³Xi'tzu'n Isayiy t-sanjelal Dyos tk'etzju' nimaqkawil Esekyiy, ex xitqani'n te:
—¿Ja ẍetzaja'ju' xjal lu, ex titi' xkyma teya? chij.
Atzunte Esekyiy xittzaq'we'n:
—Toj jun tx'otx' najchaq ẍetzaja', toj B'ab'ilon, chij.

⁴Xitqani'ntl Isayiy:
—¿Ti'tzu'n xkyil toju' tja tkawb'ila? chij te.
Atzunte Esekyiy xittzaq'we'n:
—Makyil tkyaqilju' ati toj. Mixti' jun ti'xti' kyoju' nk'ub'le' mixwitti' xinyek'u'ne' kye, chij.

⁵Xi'tzun tma'n Isayiy te Esekyiy:
—B'intzpe'ya saj tma'n Qman Dyos nimtipumal kjalu:⁶Tzul q'ij, kb'ajxe'lq'i'n toj B'ab'ilon tkyaqilju' ati toj tja tkawb'ila ex tkyaqilju' b'aj kyb'u'yi'n tyajilb'ena. Mixti'xte jun kjelten.⁷Expe' che kxe'l q'i'n junjunju' tyajajila toj B'ab'ilon, che b'el kapari'n ex che okyel q'o'n ajb'el toj tja nimaqkawb'il, chij te.

⁸Atzunte Esekyiy kub't-xima'n qa naqpetzunqa maten nak'b'il ex q'uqli tk'u'jlalil toju' tchwinqlal, xittzaq'we'n te Isayiy:
—B'a'nte' tqanil saj tma'na lu weye' toj tb'i Qman Dyos, chij. Tq'uqb'a Qman Dyos tk'u'j Jerusalen¹Lu xtma Qman Dyos kjalu: Kyq'uqb'anxe' tk'u'ju' ntaname':²che yolinqeye' tuk'i'l tk'u'jlalil kye aj Jerusalen ex kymanxe' kye qa matxi' b'aj ttxa'nju' yajb'ilkye' qa matxi' kychoju' kyil, qa kamaj matxi' tz'e'yset kytwitz tu'n tpaj tkyaqilju' kyil, chi Dyos.

³Nẍch'in jun tq'ojq'ojel wi'yj kjalu: Kyb'inchame' jun tb'e Qman Dyos toj chq'ajlaj, kyb'inchame' jun ninb'e tzinun te Qman Dyos toju' tx'otx' min tq'o'n tawal.⁴Che kynojsanku'ye' kykyaqilju' qob'li, che kyniq'inku'ye' witz exqe' b'us, kjel kyq'o'ne' xaqchaq tx'otx' ex witzile te plan tx'otx' yiletl.⁵Ktzajeltzun tyek'u'n Qman Dyos tajwalil, ex kykyaqilju' xjal che ka'yilte junx. Aku' Qman Dyos xq'mante, chij.

⁶Ntma'n jun tq'ojq'ojel wi'yj kjalu: Ẍch'ina, chij, ¿Ti'tzun kxe'l nẍch'ine'?, nchije' xinxjelu'ne'. Q'manxa qa ikyqe' xjalju' kykyaqil kse'n itzaj, ¡Ikxi'xju' kse'n jun b'ech toj kojb'il!⁷Nkub' tzqiju' itzaj, atzu'n b'ech nkub' ch'u'ẍix ajttzaj t-xupi'n Qman Dyos kyib'aj. Axxi'x ikyqe'kye xjalju' kse'n itzaj.⁸Inkub'tzqiju' itzaj, atzu'n b'ech nkub' ch'u'ẍix, atzunte Qman Dyos tyol majx ati tejumajx, chiju' tq'ojq'ojel wi'yj.

⁹Kutjaxa, Syon, twi' jun witz, ẍch'ina kuwxi'x tu'n txitma'na jun b'a'n tqanil. Ẍch'ina kuwxi'x Jerusalen, lalun xob'a, ex q'manxa kyeju' tnam toj Juda: ¡Lute Qman Dyos ati kyib'aje'! chiku'ya.¹⁰Tzulte Qman Dyos tuk'i'l tipumal, kawil tuk'i'l tkyaqil tipumal. Tzultiq'i'n ttanam tkolpintexi'.¹¹Tzul kse'n jun k'ik'lel nxq'uqin kyi'j trit; nche jaw tchle'n qpoj tman rit, chle'nqe' ttzitk'u'j ajkyxi tiq'i'n ex chab'a nche'x tka'yi'n tzma ẍe alan. Tajwalil Qman Dyos janche ajb'ena' aj Israel¹²¿Alkye matxi' kub' echante ninnjab' tu'n tq'ob', mujqa matxi' txitecha'n twitz kya'j kyu'n twitq'ob'? ¿Alkye oje kub' mlonte tkyaqilju' quq twitz tx'otx', mujqa matxi' che kub'tmlo'n ttxa'nwitz ex nimaq k'ul toj tqan peẍ?¹³¿Alkye oje tzak'unxi'te Qman Dyos mujqa alkye oje txixnaq'tzante?¹⁴¿Alkye xiq'onte tnab'l ex tu'n tkane ti'j? ¿Alkye xiyek'untete tu'n tkawin toj ttxolilti'j? ¿Alkye xixnaq'tzante toju' ojtzqib'l? ¿Alkye xiyek'unteju' nab'l te?¹⁵Naku'j jun txat a' qekye' nimaqtnam te, naku'j jun twitz tz'awunqe' toj malb'il; iky kyoklen tnamju' toj ninnjab' kse'n jun twitz tz'awun.¹⁶Lay che kanunju' txkup toj tkyaqil Lib'ano tu'n tkub' q'et jun chojb'il k'ok'sb'il te Dyos, ex lay kanun si teju' q'aq'.¹⁷Mixti'x che oka' kykyaqilju' nimaqtnam twitz; mixti'x ch'i'n kyoklen twitz.

¹⁸¿Alkye junx tuk'i'l Qman Dyos kyeye'? ¿Se'ntzu'n tilb'ilal kb'el kyb'incha'ne'?¹⁹Jun b'inchal tilb'ilal nb'inchante tilb'ilal, ex jun uk'tzal k'okyel q'onte q'anpwaq ti'j ex nok tb'incha'n xpatx'saqpwaq ti'j.²⁰Aju' nb'inchante jun tilb'ilal ntjyo'n tze min q'ayj, ex ntjyo'n jun xjal b'a'n tz'aq'unan ti'j tze tu'n tb'aj tb'incha'n tu'n mitzik'a' tz'aq.

²¹¿Ma min b'i'ntoq kyu'ne'? ¿Ma b'ajx tz'oka' kyb'i'ne' nyolinjtz? ¿Ma min xiq'ma'n kyeye' ojtxi'? ¿Ma b'ajx kaneya' toj kywitze' atxi'x tb'ent twitz tx'otx'?²²Xi'ta'te Qman Dyos tkawb'il twitz kya'j tib'aju' tx'otx', nka'yin kyi'ju' xjal naku'j ẍt'ikt'u'l qe'. Nxit-slik'u'n kya'j kse'n jun saqxb'alun, nxitlik'u'n kse'n nxislik'et twi' jun ja xb'alun.²³Mixti'x nche oka' nimaqxjal tu'n ex nche kub' tnajsa'n nejenel twitz tx'otx'.²⁴Ikyqe' kse'n awal akxtoq kyku'x awa'n, tzmaxi'x nche lok'an toj tx'otx'. Qama tzaj t-xupi'n Dyos kyib'aj nche'x tzqij, ex nchex tiqa'n kyq'iq'jb'aj kse'n ttxa triy.²⁵Nxjelun Dyos Xjan kjalu: ¿Alkye k'okyel kyq'o'ne' qa ikyju' se'n ayine'? ¿Alkye jun junx wuk'i'le'?, chij.²⁶Kyka'yinxpe'ye' twitz kya'j: ¿Alkye b'inchante tkyaqilju' ja'lu? Junjunchaq kyten tu'n ex kykyaqil oktq'o'n kyb'i. Nimxi'x toklen ex tipumal kykyaqil tz'aqliqe'.²⁷Israel, tyajajil Jakob', ¿tiqu'n nlab'ta'ya? ¿Tiqu'n ntma'na'ya: Min ntlo'nte Qman Dyos nb'aj wi'je'; min nximante Dyos wi'je', chija?²⁸¿Ma mixtzunti' b'i'n tu'na? ¿B'ajtzun tb'iya'ya? Min nsiktite Qman Dyos, ju' Dyos tejumajx, ex min nnumj aju' b'inchante tkyaqil twitz tx'otx'; mixti' b'ajsb'il teju' tnab'l.²⁹Ntzaj tq'o'n tipumalju' siktni, ex nkuwixju' xjal in numj tu'n.³⁰In pena' che sikti ku'xun ex nche kub'numj, exqe'pena' kuwqe'xi'x nche kub',³¹aye'tzunkye' q'uqli kyk'u'j ti'j Qman Dyos ktenb'el kyipumal kukxju' ex kb'entel kylipan kse'nqe' q'anjel; kb'entel kyojqelan ex lay che sikti ex lay che kub'numj tu'n b'etb'en. Ttziya Qman Dyos tu'n kytzaqpet aj Israel¹Che numeku'ye' nwitze', tnam toj ninnjab'. kyiq'i'nktz kyib'e' nimaqtnam, tu'n tkyaqil kyipumale'. Kukytzaje', qoqe' yolin tib'aju' lu; kqb'u'yi'qib' tu'n qyolin ti'j.²¿Alkye kub' q'onte nimaqkawil lu toj tjawetzq'ij ju' nkanb'an kukxju'? ¿Alkye nkub' q'onkye nimaqtnam toj tq'ob' ex nb'inchante tu'n kyniman nimaqkawil te, tu'n kykub'tchen ex tu'n kyxit-sputi'n kse'n ttxa triy tu'n tk'uẍtx'e'nb'il ex tu'n t-smaj?³¿Alkye nb'inchante tu'n tljonte toj kyq'ij ex chab'a' nkub'kyi'j tu'n naku'j min nche kub'tqan twitz tx'otx'?⁴¿Alkye matxi' b'inchante aq'untl lu? ¿Alkye oje kyej tz'ib'ante tqanil ttzajlenx ojtxi'? Ayine' Dyos Manb'aj, oqinkxe' Dyos, ayine' tnejel ex mankb'il.⁵Kyilju' tnam toj ninnjab' ex tzaj tchi kyi'j; majx lu'lunju' tx'otx' tkyaqil. Xi'kytzaj, luqe' che ul.

⁶Teyile junjunju' nb'ant chukchaq aq'untl tu'n ntkuwsa'ntib' ex ntoni'n juntel.⁷Aju' b'inchal tilb'ilal nxi' oni'nte tx'nol q'anpwaq; atzu'n npojin tk'i tx'inb'il nxi' oninte jumal pojb'il, ex intma'n qa b'a'nju' tzuyb'ente, ex nkyajtb'incha'n tilb'ilal b'a'nxi'x tu'n klawẍ tu'n lalun ch'uyujla.

⁸Kyb'intzpe'ye' aj Israel, tyajajil Jakob', nmajine', oje jawnsk'o'ne', tnam tyajajil wamiwe' Ab'raam:⁹Ayine' netzq'inteya tzmax ttxa'n tx'otx', tzaj ntxko'na tzmax toju' tx'otx' najchaq ex xinma'ne': Aya nmajine', nchije' teya. Jaw nsk'o'na ex b'ajx tz'ela' wik'u'na'ya.¹⁰Lalun xob'a', qu'n atinqinwe' tuk'i'la; lan xob'a', ayinwe' Dyos jank'uluna'ya. Nxinq'o'nwe' tipumala, inwoni'na, tzyu'na wu'ne' toju' nq'ob'e' nkanb'an.¹¹Kykyaqilkye' nche ik'onteya k'elel kych'ixaw ex che b'el me'ssa'n; majx che b'el najsa'nkye' nche q'ojin ti'ja.¹²Kche tjya'ya tajq'oja ex lay che elyal tu'na; che okyelkye' nche q'ojin ti'ja naku'j mixti'qe' teya.¹³Qu'n xqno'na wu'ne' ayine' Dyos Manb'aj janajb'ena'ya; matxi' txinma'ne' teya: Lalun xob'a', chin onilwe' ti'ja, nchije' teya, chi Dyos.

¹⁴Intma'n Qman Dyos kjalu: Aj Israel, tyajajil Jakob', maskye b'o'sa ex mixti' tipumala, lalun xob'a; chin onilwe' tuk'i'la. Ayinwe' klolteya, ayine' Dyos Xjan te Israel.¹⁵K'okyela wu'ne' te jun triyb'il, ak'a'j ex kuw twitzte; che b'eltchena witz, che b'el tquqsa'na, che b'entelju' witz tu'na kse'nte ttxa triy.¹⁶Che b'ajel t-xq'iq'i'na ex che kxeltiqa'n kyq'iq'; che b'ajex sputi'n tu'n kyq'iq' jb'al. Che tzalajeltzuntze' wuk'i'le', che tzalajele' wi'je' ayine' Dyos Xjal.

¹⁷Nche jyon a' xjal prowqe' ex mixti' ati kye ex lay knet kyu'n. Matxi' kuxtzqij toj kyqul tu'n k'waj; ayintzunwe' chin xelka'yinkye, ayine' Dyos Manb'aj janche ajb'ena' aj Israel, lay che kyajnkolb'e'ne'.¹⁸Che jawitz poq'chaj a' wu'ne' kywi' sle'j witz e' t-xiklil a' kyoj b'ya'; kjawil b'entju' chq'ajlaj wu'ne' te sob'on, che jawitz poq'chaj a' wu'ne' toju' tzqij tx'otx'.¹⁹Che kxe'lwawa'ne' k'ute toj chq'ajlaj, e'tze akasya, ktxab' ex tqan olib'o; che nch'isa'ye' tzaj toju' tzqij tx'otx' kyuk'i'l tze ab'eto ex tzis,²⁰tu'n kylonte ex tu'n kyb'inte kykyaqil xjal, tu'n t-xikyb'i'n ex tu'n tkane toj kywitz qa tu'n wipumale' xnb'inchaju'ye' lu, ayine' Dyos Manb'aj, Xjan kye aj Israel, chi Dyos. Nxjelun Dyos kye witzleb'²¹Intma'n Qman Dyos, nimaqkawil kye tyajajil Jakob' kjalu: Kukytzaje' witzleb' klolte kyib'e', kukytzaje' klolte kyoklene'.²²Kukytzaje' q'malte qeye' titi' tzul yajxi'tl ex chik'b'alte ti'ju' matxi' b'aj, kb'el qb'i'nqe'; kymanqe'tzju'ye' ti'xti' che ul yajxi'tl tu'n kykane ja che pomela' b'aj;²³kyma'ntze' titi' kb'ajel yajxi'tl, kyek'untze' qa axxi'x dyosqe'ye'. kyb'inchame' titi' kb'antel kyu'ne', b'a'n mujqa taq'wix, jun ti'xti' tu'n qxob'e' ex tu'n toktchi qi'je'.²⁴¡Mixna'ti'xkye' kyoklen ex mixti'xte nb'ent kyu'ne'! Mijsoq'xte' xjal nk'ulun kyeye'.²⁵Kub' nq'o'ne' jun xjal toj tjawetzq'ij; mantxoke' tb'i, ex makanun toj tnayajkya'j. Nche kub' twab'i'n kawil naku'j xoq'lqe'; kse'n b'inchal k'wil, nt-xyuq'i'n xoq'l tu'n tqan.²⁶¿Alkye q'manteju' lu atxi'x t-xe tnejel, tu'nwtlo qb'inte? ¿alkye q'mante atxi'x ojtxi', tu'nwtlo qka'yinte qa ax te? Mix-a'lo' junkye' q'mante tpakb'al, mix-a'lo' jun tb'i'wt jun kyole'.²⁷Ayine' inq'mante te Syon atxi'x t-xetnejel, ex ayine' inxichq'onte jun sanjelal Jerusalen q'malte te qa lwiy che ul jumajtlju' t-xjal.²⁸Nxinka'yine' ex mix-a'lo' juntl dyos nul; mix-a'lo' jun tu'nwt tq'on nab'l, mix-a'lo' jun ntzaj tzaq'wenkye' nxjele'.²⁹¡Mixti'x junkye atiwt toklen! mixti'xte nb'ent kyu'n; naq witzleb'qekye' xopa'j kyoj, chi Dyos. Tmajin Qman Dyos¹Lu nmajine' lu, tzyu'n wu'ne', sk'o'n wu'ne', nchin tzalaje' ti'j. makub' nq'o'ne' nxewe' tib'aj tu'n tultiq'i'n tnik'alilti'j kye kykyaqil nimaqtnam.²Lay ẍch'in, lay jaw toj twi', lay b'injtz tq'ojq'ojel twi' toj b'e,³lay kub' ttoqi'nxi'xtlju' ajlaj toqnitl ex lay kub'tyupi'n ttxa'n tzaj ch'inxtl tkub'yupj. Axxi'x tzulte' tnik'alilti'j tu'n.⁴Lay tz'ojlan ex lay kub'aj tipumal, tzmax ajtkyajb'entju' tnik'alilti'j twitz tx'otx' tu'n. Che kb'el tenju' tnam ttzi ninnjab' b'ilteju' t-xnaq'tzb'il, chi Dyos.

⁵Aju' Qman Dyos, b'inchante kya'j ex xit-slik'u'n, b'inchante tx'otx' exqe' nche tzaj ch'iy twitz, ju' nq'onte kychwinqlal ex kyxewju' xjal najlqe' twitz, intma'n teju' tmajen kjalu:⁶Tzaj ntxko'na, ayine' Dyos Manb'aj, ex tzaj nxqno'ne' tq'ob'a, tu'n toka te kolb'ilkye xjal; ayine' nkub'inchanteya, wajb'ile' tu'n toka te techelju' nyole' kyejni b'entti'j tuk'i'lju' tnam, ex te spik'un kyeju' nimaqtnam.⁷Wajb'ile' tu'n tjqonteya kywitzju' moẍ ex tu'n kyetz tiq'i'na ate'kx toj kars, toju' jul ja najlqe' toj qxopin.⁸Ayinwe' Dyos Manb'aj, a nb'iju'ye' lu, ex lay waje' tu'n txiq'o'n wajwalile' te juntl ex lalun che jaw nima'n witzleb' te nxele'.⁹Mache japun kykyaqilju' nmaye' ojtxi', atzu'n ja'lo che kxe'l nma'n txqantle' ti'xti' ak'a'j; che xelnma'ne' kyeye' na'mxku' kyq'ancha'lix, chi Dyos. B'itz ajwalb'ilte Dyos tu'nju' kolb'il tu'n¹⁰kyb'itzanxe' jun b'itz ak'a'j te Qman Dyos; kyajwalinktze' aye'ye' najlqe'ye' najchaq aye'ye' nche b'ete' toj ninnjab' exqe' txkup najlqe' toj, e'tnam ate' ttzi ninnjab' exqe' najlqe' kyoj.¹¹Che tzalajxju' chq'ajlaj ex nimaqtnam kyoj exqe' kyxmuj tyajajil Kyedar. Che b'itzanxju' najlqe' Sela tu'n kytzalajb'il; jawxwit tq'ojq'ojel kywi' tzmax kywi' witz.¹²Che nimanxwit te Qman Dyos txi'wt kypakb'a'n ajwalb'ilte kyoju' tnam ttzi ninnjab'.¹³Kxe'l Qman Dyos q'ojil kse'n jun xjal kuw okxi'x q'ojil kse'n jun q'ojilxi'x; kjawil toj twi', kjawil t-ẍch'i'n q'oj ex kb'elkyi'ju' tajq'oj tu'n.

¹⁴Chi Qman Dyos kjalu: Min ẍin yoline' toj nim tq'ijlalil, naq ẍinkyejnumeye', mixti'te xnmaye'; atzu'n ja'lo chin ẍch'ile' kse'n jun qya ajtitz'ji tal, in oq' ex nxi'x xepjne.¹⁵Che b'elnxitune' nimaq k'ul ex witz, ex kjel tzqij tkyaqilju' k'ul wu'ne'; che kjel chq'ajlajixju' nimaq a' wu'ne' ex che kb'el tzqiju' njab' wu'ne'.¹⁶Che kxe'l wiq'i'ne' moẍ kyoj b'e ex kyoj jutz'b'e min ojtzqi'n kyu'n. K'okyelju' qxopin wu'ne' te spik'un kywitz, ex che b'el nplansa'ne' witz. Ilti'j che nb'incha'ju'ye' lu.¹⁷Aye'kye' q'uqli kyk'u'j ti'j jun witzleb', ex nxikyma'n kye tilb'ilal kjalu: dyosqe'kye' qeye', qa chechi, che kxe'l oqkye' tu'n kych'ixaw, chi Dyos. E'kub' moẍix aj Israel¹⁸Kyb'intzpe'ye', chkyin; tz'elx kynik'e' ex kyka'yinxe', moẍ.¹⁹Mix-a'lo'te' jun moẍxi'x ex chkyin kse'n nmajine', ju' chq'o'n wu'ne', mix-a'lo'te moẍxi'x ex chkyinxi'x kse'n nsanjelale', ju' nmajine'.²⁰Nim ti'xti' matxi' til ex min neltnik' kyi'j; in b'in, extzun mixti'xte ntb'i'n.²¹Tajb'ilte Qman Dyos, tu'nju' nkolon, tu'n tokju' t-xnaq'tzb'il nim toklen;²²intzun elq'anjtzju' tnam lu, nb'je'tz iq'i'n ti'xti' toj, matxi' che b'jo'kx jpu'n kykyaqil, matxi' che b'jo'kx jpu'n kyoj jul qxopin; nche'x iq'i'n ex mix-a'lo'te jun tzaqpilkye; nche'x iq'i'n, ex mix-a'lo' kolpilkye.

²³¿Alkyetzun junkye' nxib'i'nte ja'lu? ¿Alkye ktq'a'tib' tu'n tb'inteju' kb'ajel yajxi'tl?²⁴¿Altzunkye sajonte tu'n tkub'ti'j ex tu'n txi' iq'i'n tnam tyajajil Jakob'? ¿Ma myatzun Qman Dyos? E'b'inchan il twitz Qman Dyos, min kyaj tu'n kyxi' toju' b'e kyej tyek'u'n kye, ex min xikynima'n t-xnaq'tzb'il.²⁵Qu'mtzun tzaj ttx'u'jil kyi'j ex kub' ttz'e'ysa'n kywitz tu'n jun q'oj kuwxi'x ojexi'x e'tak' naku'j tu'n q'aq'; tu'npetzunju' mixti'x ok toj kywi'. O'kxte' Qman Dyos kolol¹Atzu'n ja'lo Israel, tyajajil Jakob' Chi Qman Dyos b'inchanteya kjalu: Lalun xob'a, qu'n matxi' kletta wu'ne'; tzaj ntxko'ne' tb'iya, wena'ta.²Qama tzik'a' toj a', chin tenb'ilwe' tuk'i'la, qama tzik'a' toj tnimal a', lay jaq'wiya; qama tzik'a' toj q'aq', lay tz'e'ya, lay jaw k'enta.³Ayinwe' tajawa, klolteya, ayine' Dyos xjan te Israel. Malq'etta wu'ne'; matxi' che'x nq'o'ne' Ejipt, Etyopiy ex Seb'a te chojb'il te kolpib'lteya,⁴qu'n in nk'u'jla'na, nim toklena ex kye tilwiya wu'ne'. Nche'x nq'o'ne' xjal ex nimaqtnam tu'n ttena weye' ex tu'n tkleta.⁵Lalun xob'a, atinqina'we' tuk'i'la. Che tzajel nb'u'ne' t-xjala toj tjawetzq'ij ex toj tkub'exq'ij.⁶Kxe'l nma'ne' toj tb'a'nq'ob'kya'j: Anjsanqe'tza, atzu'n toj tnayajkya'j: Lan che kyajtiq'i'na. Iq'inqe'tza nk'wale' ex nmyale' tzmax najchaq, tzmax mankb'il ttxa'n tx'otx',⁷kykyaqilju' iq'i'n nb'iye' kyu'n, aye' e'kub' nb'incha'ne' ex eb'enti wu'ne', aye' e'kub' nb'incha'ne' tu'n njaw nima'ne', nchije'.

⁸Kyiq'intze' ntaname', ati twitz naq a min ka'yin, ati t-ẍkyin naq a min b'in.⁹Kyb'uyimkyib'e' kykyaqile' tnam, kyb'uyim kyib'e' nimaqtnam. ¿Alkye junkye ojetoq tmaju' lu, mujqa matxi'toq tmaju' matxi' tzik' ojtxi'? Che kyq'onk tziyal ti'j tu'n kymante qa ax, tu'ntzun tb'injtz ex tu'n tq'manjtz qa ax, chij.

¹⁰Chi Qman Dyos ntma'n: Aye'kye' tziyal wu'ne', aye'ye' nmajine', esk'ete' wu'ne' tu'n telkynik'e' weye' ex tu'n tqe kyk'u'je' wi'je' ex tu'n tkane toj kywitze' alkyeqine'. Mixti'xi' juntl dyos oje ten nejtl nwitze', ex lay ten juntl yajxi'tel.¹¹O'qinkxwe' Dyos Manb'aj; mix-a'lo' juntl kkolol qa myayine', chij.

¹²Intma'n Qman Dyos kjalu: Xinma'ne' ex xinpakb'a'ne': e'nkole'; mya junxi'tl dyos xb'inchante, ex kanli kywitze'.¹³Ayinweju'ye' Dyos kukxju'. Mix-a'lo'te ktzaqpilkyeye' toj nq'ob'e'. Mix-a'lo'te kxitulte nnb'incha'ne', chij.

¹⁴Chi Qman Dyos Xjan kye aj Israel kjalu: Che kxe'lnchq'o'n xjale' B'ab'ilon naqx tu'n kyklete' ex che njqa'ye' kykyaqilju' ttzija, atzu'n kytzalajb'il kaldey k'okyel te k'ixk'oj.¹⁵Ayinweju'ye' Dyos Manb'aj, ch'isante Israel, ayine' Dyos Xjan ex kynimaqkawile', chij.

¹⁶Tjaq Qman Dyos jun tal b'e toj ninnjab', jun tal b'e toj tnimal a';¹⁷E'etz jun k'loj xjal te q'oj nim kyipumal tu'n, tuk'i'l kykarwaj ex kychej, te xitulkye. Ekub'xon ex min b'ent kyjawe'tl; e'kub' b'aj kse'n tmechil kantil nkub' yupj.¹⁸Chi Qman Dyos ja'lo teju' ttanam: Lalun tzajtna'ntlju'ya ewi, lalun ximantla ti'ju' ojtxi'.¹⁹Knb'incha' jun ti'xti'ye' junxi'tl, ex ktka'yi'ya kb'antel ja'loxi'x. Knjqa'ye' jun b'e toj chq'ajlaj ex che jawil b'ent a' toju' tx'otx' min ntzaj tawal²⁰Kche nimalju' tojk'ul txkup weye', exqe' ẍal ex ab'estrus, qu'n kjawil poq'chaj a' wu'ne' toj chq'ajlaj, che b'etel a' toju' tx'otx' min tq'o'n tawal, tu'n tk'wanju' ntaname' sk'o'n wu'ne',²¹aju' tnam kub' nb'incha'ne' tu'n njaw nimane' kyu'n.

²²Aye'tzunkye' aj Israel, tyajajil Jakob', min ekub'sane' nwitze', e'el siktiye' wi'je'.²³Min kub' kyq'o'ne' rit te chojb'il k'ok'j nwitze' ex mixti' njaw kynima'ne' kyu'n chojb'il. mixna'ti' noktenwe' qanil oyaj teya, tu'nwt t-siktiya, ex mixti' nyajuya, xi'wt nqani'ne' sturak teya.²⁴B'ajx tloq'a'xi'ta ptz'an tb'anil tk'ok'jal tu'nwt ttzaj tiq'i'na te oyaj weye', ex b'ajx chin jaw tnima'na tu'n t-until alu'mj te chojb'il. Mapena' chin siktiye' tu'na kyu'nju' tila; matz'ok ntx'u'jile' tu'na kyu'n tb'inchb'aja myab'a'n.

²⁵Naqtzun tu'n ayine' Dyos janajb'ena'ya, kb'el nnajsa'ne' tb'inchb'aja ex lay che tzajnna'ntlju'ye' tila.²⁶Qa ati wile' toj twitza, qq'ok qib' toj xjel. Q'mantza tyola, atzun qil qa mixti' tila.²⁷B'inchan ilju' tnejel tyajilb'ena, jawkyi'nkyib'ju' xnaq'tzalteya wi'je',²⁸kub' kysaqchb'e'n tkawilju'ya njaye'; qu'mtzun waje' tu'n tkub' xitu'n tnam Israel, ju' tyajajil Jakob', ex tu'n tb'aj yasu'n. In japunte Qman Dyos Tyol, O'kxte Dyos¹Chin tb'itza ja'lo, Israel, tyajajil Jakob', nmajine' sk'o'n wu'ne'.²Ayinweju'ye' Dyos Manb'aj, ch'isalteya, b'inchanteya na'mxtoq titz'jiya ex onilteya. Lalun xob'a, Jesurun, tyajajil Jakob', nmajine' sk'o'n wu'ne',³qu'n kb'etel tnimal a' wu'ne' toj chq'ajlaj, e'tal a' toju' ttx'otx' tzqij. Kxe'l nq'o'ne' ak'a'j kychwiqlalju' tyajila, che b'elnk'i'wla'ne'.⁴Ex che ch'iyil kse'n itzaj chab'a a'li'n tib'aj, kse'nqe' chjaj ate' ttzi a'.⁵Chilo jun: Te Qman Dyos qinwe', juntl k'okyel tq'o'ntib' te tyajajil Jakob', juntl k'okyel tq'o'n ti'j tq'ob': Te Qman Dyos, ex k'okyel tq'o'n tb'i Israel tmoju' tb'i.

⁶Chi Qman Dyos, nimaqkawil ex tzaqpilte Israel, Dyos nimtipumal, kjalu: Ayine' tnejel ex b'ajsb'il; mixti' juntl dyos wi'jxi'ye'.⁷¿Alkye juntl ikxju' kse'n ayine'? Tu'n tyolin ex tu'n ttzaj tchik'b'a'n weye'. ¿Alkye oje q'mante atxi'x t-xetnejel ti'ju' tzul, ex ntma'n ti'ju' kb'ajel?⁸Qu'mtzun, ¡kuwqe'xe', lalun che xob'e'! Ikynmaju'ye' ex xinma'ne' matxi' b'et q'ij, ex kanli kywitze'. ¿Ma atitzun juntl dyos wi'jxi'ye'? Mixti'te' juntl kolb'il; mixti'te juntl wojtzqi'ne'. Yol Ti'ju' witzleb'i'n

⁹Mixti'xte jun b'inchal witzleb' ati toklen, ex mixti'x kyoklenju' witzleb' nxi'x che laqj ti'j. Moẍqe'kye' nche niman kye ex xnakqe', qu'mtzun k'elel kych'ixaw.¹⁰Alkyete nkub' tb'incha'n jun tilb'ilal toj q'aq' tu'n tniman te naku'j dyos, naq nex tq'ij.¹¹Kykyaqilkye' nche niman te k'elel kych'ixaw. Naq xjal qekye' nche b'inchan witzleb'. Naqwit che ok kykyaqil toj xjel, k'elel kych'ixaw ex k'okyeltchi kyi'j.

¹²Qka'yikpe' titi' nb'ajte jun tx'nol k'uxb'il: ntzaj tiq'i'n ttx'inb'il, ajtzun ttz'e'yju' k'uxb'il tu'n toj q'aq', nokten tx'nolte tu'n pojb'il tu'n tb'enti tu'n. In aq'unan tuk'i'l tipumal. Qatzun min xwanju' tx'nol k'uxb'il, nkub'aj tipumal, exqa min xk'wan, nkub'sikti.

¹³Mujqa qka'yinx titi' ntb'incha'n b'inchal tilb'ilal: nkub' techa'n tu'n trekl, nkub' t-sqitu'n tilb'ilal tu'n tzetz'ib'b'il ex o'nb'il te sqitb'il, in aq'witzuntz b'inchalte tu'n josb'il; ikytzu'n nkub'a' tb'incha'na' jun tilb'ilal xjal, in okxtq'o'ntzuntz toj jun ja te k'u'lb'il.

¹⁴Mujqa, ati jun matxitawa'n tze k'ute, nch'iytzuntz tu'n jb'al, yajxi'tzuntel ati tze k'ute tu'n tkub' tik'sa'n. Qatzun tajb'il tzis mujqa k'ol, nche t-xq'uqi'n toj k'ul tzmax ajkylamix.¹⁵Ex najb'en kyu'n xjal te si; nxikyiq'i'n jni' te kyq'eẍ; nxikyiq'i'n jni'tl te t-siyil kywa; atzun jni'tl najb'en kyu'n tu'n tkub' kyb'incha'n jun tilb'ilal te kydyos, ex nche kub' meje k'ulul kywitz.

¹⁶Mujqa nik'janju' tze nokxtq'o'n jun xjal toj q'aq', nokxtk'a'sa'n tchi' tib'aj, ajtzun tb'ent nxitwan ex nqe tk'u'j. Ex nq'eẍnen ti'j, intma'n: ¡Tb'anilxi'x ato'qo' ti'j q'aq', xi'nmoq'tiwe'! chij.¹⁷Intzun kub' tb'incha'n jun tilb'ilal tdyos ti'ju' jni'tl tze, nkub' meje k'ulul twitz, ex nkub'san te kjalu: ¡Chin tkloma, qu'n aya ndyose'! chij.

¹⁸Mixti' b'a'n kyu'nkye' xjal lu, ex min nkane toj kywitz; moẍ kywitz min nb'ent kyka'yin, xk'ub' kywi', min nkane toj kywitz.¹⁹Min nche kub'ten ximal, mixti'x kynab'l tu'n tkane toj kywitz ex tu'nwt kymante: Nik'janju' tze sokx nq'o'ne' te si, mantzq'ajsaye' wab'j tib'aju' ttxalq'aq'il ex mank'a'saye' chib'j ex matxi' nwane'; ti'jtzunju' jni'tl makub' nb'incha'ne' jun ti'xti' taq'wixi'x lu, ¡naq jun piẍ tzete' nchin k'ulune' twitz!, chechiwt.²⁰Axxi'x ikte' kse'n qama txiqwan tza'j. Q'ol sb'u'qib' te chajyolilte'. Lay b'ent kyklonte kyib'ju' xjal lu. Layx kane toj kywitz qa naqx chajyolilju' tzyu'n kyu'n. Kub' tnajsa'n Qman Dyos kyil aj Israel ex e'tkol²¹Kyna'ntze' aj Israel, tyajajil Jakob'; qa aye'ye' nmajine'; nmajin qe'ye', ayine' nkub'inchankyeye'. Lalun tzik'nna'le' kyu'ne' aj Israel.²²Matxi' b'ajkub' nnajsa'nwe' kyile', kse'n nkub'naju' muj. Kutanjtztlkyi'je' nk'etze', ojena' che ntzaqpiye', chi Dyos.

²³¡Ẍch'ina Kya'j tu'n tzalajb'il tu'nju' matxi' tb'incha Qman Dyos! ¡Che ẍch'ine' tu'n tzalajb'il, t-xe tx'otx'! ¡Che ẍch'ine' tu'n kytzalajb'ile', e'witz ex nimaq k'ul kyuk'i'lju' nimaq tze, qu'n matxi' tzaj tyek'u'n Qman Dyos tajwalil matzaqpet Israel tu'n, aju' tnam tyajajil Jakob'!

²⁴A ntma'n Qman Dyos tzaqpilteya, ju' b'inchanteya na'mxtoq titz'jiya, kjalu: Ayinweju'ye' Dyos Manb'aj, b'inchante tkyaqilju' ti'xti', ayine' nxislik'unte kya'j ex kyej nkuwsa'ne' tx'otx' ex mix-a'lo' jun onin wi'je'.²⁵Min nq'o'ne' anb'il tu'n kyjapun kyolju' sanjelal chalyolqe'; inkub' ntzaksa'ne' kynab'lju' ajnab'lil. Inb'incha'ne' tu'n lan che kane ajnab'lil tekyib' ex tu'n tokju' kyojtzqib'l mixti'x tajb'en.²⁶Atzu'n kyyolju' nmajine' in nb'incha'ne' tu'n kyjapun ex tu'n telb'a'n kyximju' chq'o'nqe' wu'ne'. Che najal jumajtlkye' xjal toju' nintnam Jerusalen ex che jawil b'incha'n jumajtlju' nimaqtnam toj Juda. Knb'incha'ye' tu'n kyjawe' jumajtl toju' xitb'il.²⁷Jaku' txinma'ne' tu'n tkub' tzqiju' ninnjab' ex tu'n kykub'tzqiju' nin a'.²⁸Inxi' nma'ne' te Siro: Aya nk'ik'lele', kxe'l tb'incha'nta tkyaqilju' matxi' nma'ne' teya, nchije'; ex nxinma'ne' te Jerusalen: Kjawil b'inchet jumajtlta, nchije'; atzu'n teju' ja te k'u'lb'il: Che b'elix q'et tq'uqb'ila, nchije'. Kyej tq'o'n Qman Dyos tu'n tb'inchante Siro jun aq'untl¹T-xjansa Qman Dyos Siro te nimaqkawil, tzaj t-xqno'n tu'n tkawin kyib'aj nimaqtnam ex tu'n tb'je'ltiq'i'n kyq'ojb'il nimaqkawil. Nche tjqo'n Qman Dyos kyjpel nimaqtnam te Siro mix-a'lo' kb'entel tjpunte twitz. Ex intma'n ja'lo te kjalu:²Chin b'el nejwe' twitza, che b'elntilu'ne' nimaqtapi che okyex npa'ne' kyjpel nimaqtnam q'ank'uxb'ilqe' ex che b'ajel ntoqi'ne' k'uxb'il kytzi tnam.³Che kxe'lnq'o'ne' k'uwenj e'wa'nqe' teya, q'inumal k'u'nqe' toj ewaj, tu'n teltnik'a qa ayine' Dyos Manb'aj, janche ajb'ena' aj Israel, intzaj ntxko'ne' tb'iya.⁴Naqx tu'nelju nmajine' Jakob', ti'ju' ntaname' Israel jawni nsk'o'ne', matzaj ntxko'na ex matxinq'o'ne' toklena ati teya ja'lo, extzun min ojtzqi'nqine' tu'na.⁵Ayinweju'ye' Dyos Manb'aj, mixti' juntl; mix-a'lo'te juntl Dyos wi'jxi'ye'. Mab'ajnxnaq'tza'na teju' q'oj extzun min ojtzqi'nqine' tu'na,⁶tu'n kyb'inte kykyaqil xjal te tjawetzq'ij ex te tkub'exq'ij, qa mixti' juntl wi'jxi'ye'. Ayinwe' Dyos Manb'aj, mixti'te juntl.⁷Inul spik'un ex nok qxopin wu'ne', intzaj nq'o'ne' b'a'n ex ntzaj nq'o'ne' xitb'il. Wu'ne' tkyaqil ja'lu, ayine' Dyos Manb'aj. Toklen Qman Dyos tib'aj tkyaqil⁸Ktzajel nq'o'ne' kanb'ab'l tzmax toj kya'j, naku'j ẍmu's twitz kya'j ex jb'al toj muj, kb'el twitz tx'otx'; ktwitza' kolb'il ex kb'eltq'o'n tnik'alilti'j.

⁹Jun tx'otx' k'wil, mujqa juntl junxi'tl, min nkub'ten tx'utjel tuk'i'lju' b'inchalte. Min nxitma'n b'a'n tx'otx' teju' nnaq'unante: ¿Titi' nb'ajteya? chiwt, ex min nxitma'n jun ti'xti' te b'inchalte: Min nb'entta taq'unan, chiwt.¹⁰Expe' mixti' tu'n tel tik'u'n jun k'wal tman tu'nju' xk'walanjtz twitzju' tx'otx' tu'n.¹¹Intma'n Qman Dyos xjan kye aj Israel ju' b'inchankye ikjalu: ¿Oktzun che xjelulkye' weye' kyi'ju' nk'wale', mujqa tu'n ttzajkyma'ne' weye' se'n tu'me'l tu'n kyxi' nb'incha'ne' waq'une'?¹²Ayine' nb'inchante tx'otx' exqe' najlaqe' twitz, xinslik'u'ne' kya'j kyu'n nq'ob'e' ex nchaq'e' tu'n kyb'jawb'ent kykyaqilu' che'w.¹³Ayine' ntzaj chq'onte Siro tu'n tkanb'an, ex knb'incha'ye' tu'n telb'a'n tkyaqilju' tb'e; ate kjawil b'inchantetl nintaname' ex che ttzaqpi'ju' b'ajxni q'i'nqe' toj juntl tnam, lay tqani chojb'ilte ex mixti'te tu'me'l t-xel, chi Dyos. Aku' Qman Dyos nimtipumal xyolin.

¹⁴Intma'n Qman Dyos kye aj Israel kjalu: Kkyq'a'kyib'ju' aq'unal toj kojb'il aj Ejipt, e' xk'aẍlel aj Etyopiy, exqe' xjal aj Sab'a nimaq kywe', toj tq'ob'a ex che okyel te tmajena lq'o'n; k'lo'nqe' toj xpatx'k'uxb'il lepchqe'k ti'ja, che b'elmeje twitza ex che kub'sal twitza: Axxi'x atite Dyos kyxole', ex mixti' juntl, mixti' juntl dyos, chechiku', chi Dyos.

¹⁵Atzunta jun Dyos min q'ancha'l, jun Dyos kolol kyi'j aj Israel.

¹⁶Kykyaqilju' nche b'inchan witzleb' k'elel kych'ixaw, ex che b'elẍkyeqax.¹⁷Aye'tzunkye' aj Israel e'tkol Qman Dyos, eklet tu'n tejumajx, ex milo tu'ntela' tch'ixaw ex tu'n tkub' ẍkyeqax.

¹⁸Intma'nju' b'inchante kya'j, aku' Dyos ex tajaw tkyaqil, aju' kub'inchante kya'j, aju' kyej kuwsante, aju' kub' b'inchante, tu'n kynajan xjal twitz mya tu'nwt tten mixti' ati twitz, kjalu: Ayinwe' Dyos Manb'aj ex mixti' juntl.¹⁹Mya toj ewaj nchin yolina'we' ex mya toj qxopin twitzju' tx'otx'. Mixti'we' nxima'n kyeju' tyajajil Jakob': Chin kyjyome' ja mixti' jun ti'xti', nchiwte'. Axwe' chin yolin, ayine' Dyos Manb'aj, o'kxwe' tnik'alilti'j in nma'n, chi Dyos. Toklen Qman Dyos Kywitzju' Witzleb'²⁰Kukytzaje' ex kyb'uyim kyib'e', kykyaqile' ẍe'kyaj anq'ine' kyeju' tnam. Xnakqe'kye' xjal njaw kyiqa'n kywitzleb' tze toj prosesyon ex nche kub'ten k'ulil twitz jun dyos layx che klet tu'n.²¹Che yolinqe'ye' ex kymantze' yek'b'il, qa kyajb'ile' che xjelune' kyxolilexe': ¿Alkye q'mante ja'lu ttzajlenx t-xe tnejel? ¿Alkye q'mante atxi'x ojtxi'? ¿Mya myayintzunqine', ayine' Dyos Manb'aj? Mixti' juntl Dyos wi'jxi'ye'. Mixti'te juntl Dyos nkanb'an ex nkolon kse'n ayine'.

²²Kukytzaje' wuk'i'le' tnam ate'qe'ye' ttxa'n tx'otx', kche nkla'ye', ayinwe' Dyos, ex mixti' juntl.²³Oje nma jun nyole' tu'n tb'inchet, jun yol te kanb'ab'l tu'n tjapun, ex kjapumelju' yol lu: kykyaqil che b'elmeje nwitze', ex kykyaqil kkyma' jun kyol toj nb'iye' tu'n tjapun kyu'n²⁴ex kkyma': O'kx tuk'i'l Qman Dyos ta'te kanb'ab'l ex ipumalj, chechiku'. Kykyaqilju' nche el ik'un weye' k'elel kych'ixaw.²⁵Tkyaqilju' tnam Israel kkanb'al wu'ne' ex ktzalajel wi'je', chi Qman Dyos.¹Inkub' majtz'uju' dyos B'el, atzu'n dyos Neb'o nkub' tz'aq twitz tx'otx'. Ti'j chej nche'xa' iqa'na' witzleb', ex majx alqe' kyeju' alu'mj siktenilqe'.²Inche kub'majtz'uju' dyos ex nche kub' tz'aq twitz tx'otx' mixti' nb'ent kyklontekyib', aye'xjuntlkye nche'xq'i'n toj juntl tnam.

³Chin kyb'intzpe'ye', tyajajil Jakob', kykyaqile' ate'xe' kyxol aj Israel: Iqa'qe'kye' wu'ne' na'mxtoq kyitz'jiye'; chle'nqe'ye' wu'ne' toj nq'ob'e',⁴ex ayinxweju'ye' ajkytijine'; kukx kyxi' nka'yi'nju'ye' ajt-saqax kywi'ye'. Ayine' nb'inchankyeye', ex che jawil wiqa'ne' kukxju'; che kxelnka'yi'ne' ex che nkla'ye'.

⁵¿Alkye juntl kse'n ayine' toj kywitze'? ¿alkyetzun juntl qa ikychin ka'yinju'ye' kyeye'?⁶Ate' xjal nim q'anpwaq njatzkyiq'i'n toj kyb'ols, ex nche mlon saqpwaq toj tqan peẍ; nxi'kyab'tzi'ntzuntz te jun b'inchal tilb'ilal tu'n tkub' tb'incha'n jun kydyos tu'n kykub' meje twitz ex tu'n kyk'ulun te.⁷Nxikyiqa'n ti'j kyqul, nche'xtzuntz tuk'i'l; nkub' kyq'o'n tib'aj jun tq'uqlil axtzuntzu' nkyeja' ten, mixti'te ntyukcha'ntib' toj junplajtl. B'a'nqa nche ẍch'in nche qani'n o'nb'il te, mixjun nche tzaj ttzaq'we'n ex min nche tklo'n toju' yajb'ilkye.

⁸Kyna'nku'ye' lu, aj il, lalun b'jo'ktojkywitze', kyximanku'xi'xe';⁹kyna'ntzju'ye' oje b'aj atxi'x ojtxi'. Ayinwe' Dyos ex mixti' juntl; Dyos qinwe', ex mixti' juntl kse'n ayine'.¹⁰Q'ma'n tqanilju' b'ajsb'il wu'ne' atxi'x nejtl; q'ma'n tqanilju' tzul wu'ne' atxi'x ojtxi'. Ajnmantewe': Inche japunju' nxime'; knb'incha'we' tkyaqilju' makub' nxima'ne'.¹¹Matxi' tzaj ntxko'ne' jun xjal toj tjawetzq'ij, ktzajel najchaq kse'n jun t'iw ex che tb'incha'ju' nxime'. Oje nmaye' ex knb'incha'ye', matxi' b'ajkub'nxima'ne' ex kjapumel wu'ne'.¹²Chin kyb'intze', xjal ch'uẍ kyanmiye', ju' nkyxima'ne' qa layx che klete':¹³Naqaku' ta'te' kolb'il wu'ne'; lwiy tzulte' kolb'il, mya najchaq ta'te'. Ktzajel nq'o'nwe' kolb'il tib'aj Syon, tzul nq'o'ne' wajwalile' toj Israel. Kb'elti'j B'ab'ilon¹Kutku'tza tnam B'ab'ilon, ikju'ya kse'n jun txin na'm tmje, ex qeku'ya toj quq; kutku'tza toju' tkawb'ila, tnam Kalda, qpoj txin, ex qeku'ya twitz tx'otx', qu'n lay txitxko'ntla qpoj txin ex tb'anilxi'xa.²Luju' ka tu'n tchena ex chenku'ya triy, iq'imila ttxo'wa toj twitza, laq'b'a'nktza tana, tu'n kykyaj q'ancha'lixju' tqana, kutik'x jlajina toj nin a' tu'n tqana;³ẍb'iqb'anku'tib'a tu'n tkyaj q'ancha'lixju' ttz'a'lb'ila. K'okyel tu'me'l t-xel wu'ne', ex mix-a'lo'te' kmyolte tu'n tkub'sb'il, chi Dyos.

⁴Intma'n klolqe, ju' Dyos Xjan kye aj Israel, a tb'iju' Dyos Manb'aj nimtipumal, kjalu:⁵Qeku'ya tnam Kalda lalun ẍch'ina qpoj txin, kutokxa toj qxopin, qu'n lay txitxko'ntla nimaqkawil kyib'aj nimaqtnam.⁶Tej ttzaj ntx'u'jile' kyi'ju' ntaname', xinq'o'ne' ntaname' tu'n tkub' tz'aq toj tq'ob'a ex el kych'ixaw tu'na. Min tzaj laqj tk'u'ja kyi'j, kub' tq'o'na tkawb'ila kuwxi'x kyib'aju' tijwnaq.⁷Tmatzuntza: chin kawile' tejumajx, chija; mixti'te ximana kyi'ju' ti'xti' lu ex min ximana kyi'j ja che pomela' b'aj.⁸Qu'mtzun, b'intzju'ya lu, qya nanq'ina toj achb'il, min nb'ajx tk'u'ja toju' tkawb'ila, ex nkub' t-xima'na: O'qinkxe', mixti'te juntl; lay chin kyej we' kyimni nchmil ex lay chin kyaje' mixti' wale', chija.⁹Naq minab'en, toj jun q'ijx, che ulju' xitb'il lu tib'aja: kjela kyimni tchmila ex mixti' tala, b'a'nqa nxi'x ajpkab'ina ex nim t-sb'ub'la.¹⁰Q'uqlixi'xtoq tk'u'ja toju' tb'inchb'aja myab'a'n, ex kub't-xima'na: Mix-a'lo'te nka'yin wi'je', chija. Makub' t-sb'u'ntib'a kyu'n tnab'la ex tojtzqib'la. Makub' t-xima'na: Ayine' ex oqinkxe', chija.¹¹Tzultzunte' xitb'il tib'aja, ex lay b'ent tmqet twitz tu'n t-sb'ub'la; tzul jun xitb'il tib'aja lay b'ent tmyet tu'na; mixti' xima'n tu'na tzul jun taq'wix tib'aja mixti' tnab'ena ajtul tib'aja.¹²Ljonxa tajpkab'i'na exju' txqan tajk'ayi'na ntb'incha'na ntb'incha'na atxi'x ku'xuntoqa, atzun qil qa k'ajb'el teya, achaq qil qama che xob' xjal teya.¹³Nimqe' q'ol tnab'la matxi' che ten, matxipe' siktiya kyxol. ¡Kuna' kytzaju' t-xjala nelkynik' kye che'w, aye' npon kynab'l aj t-xikyka'yi'n che'w, aye' nche q'mante titi' tzul, xjawi'nchaq, ex noktilil kyu'n tu'n tkleta!¹⁴Ka'yintzpetzuna, ikqekye' kse'n ttxa triy: nche b'aj tu'n q'aq', min nb'ent kyklontekyib' teju' q'aq'. Qu'n mya jun q'aq' tuk'i'l ttxalq'aq', tu'nwt kykub' qe q'eẍnel ti'j.¹⁵Iktzu'n eb'aja'ju' tajpkab'a, ma'xi'x che yoline' kyuk'i'l toj tkyaqilju' tchwinqlala. Teyilex junjun toju' tb'e tzpetni ex mix-a'lo'te xklonteya. Tqanil ak'a'j tu'n Qman Dyos¹Kyb'intzpe'ju'ye' lu, tyajajil Jakob', tok tb'iya te Israel ex tyajajil Jadaya; intma'n jun tyola toj tb'i Qman Dyos; qa nkub'sana te Qman Dyos ja k'uluna' Israel, extzun mya ax ex mya toj tzinun tu'na;²intma'na qa najliya toju' xjan nintnam ex ntklo'ntib'a ti'ju' Dyos ja k'uluna' Israel, A tb'iju' Qman Dyos nimtipumal:³Atxi'x tnejelku' xinma'ne' ti'xti' te ojtxi' teya; ayinku'ye' nxiyek'unte. Tej waq'unane', eb'aj b'entju' ti'xti'.⁴B'i'ntoqna' wu'ne' qa pi'stoqa, qa ikju'ya kse'n k'uxb'il majx kuw ex min nkub'majtz'uja kse'n q'ank'uxb'il layx tz'umj,⁵xinma'ne' teya atxi'x ojtxi', xinma'ne' teya na'mtoqpe' kyjapun. Tu'ntzun lalun tmaya: A nwitzleb'e' xb'inchante, Aju' tilb'ilal xkub' nb'incha'ne' xq'mante, chiwta.⁶Matxi' tb'iya tkyaqil ja'lu; ximanpe'ya ti'j, kkaneb'iltzuntz toj twitza qa ax. Che xelnma'ne' txqantl ti'xti' teya ja'lo min tojtzqi'na qu'n toj ewaj ta'qe',⁷tzma ẍeb'ent ja'lo, mya ojtxi', tzma nche tb'i'na ja'lo. Tu'ntzun lalun tmanya: B'i'ntltoqwe' wu'n, chiwta.⁸B'ajx tb'iya'ya qa nche yolinjtz, ex min ojtzqi'nqe'toq tu'na, qu'n chkyinna'ta kukxju'. Kanlitltoqna'we' nwitz mib'a'n b'ina, ex pi's tb'iya atxi'x titz'jlenxa.

⁹Ik'xtzun wu'ne' naq tu'n woklene', njuk'wib'e' naq tu'n woklene' ex min kub' nxitu'na.¹⁰Nẍtilsaya, mikxa' kse'n nẍtilseta' saqpwaq, ik'nwitze' ti'ja toju' yajb'il naku'j chuj,¹¹Ma nb'inchaye' naqx tu'n woklene', qu'n mixti' tu'n tkub' saqchb'etju' nb'iye'. Lay waje' tu'n t-xiq'etju' ninb'ilweye' te juntl. Tkla'te Qman Dyos ttanam¹²Chin kyb'itze' aj Israel, tyajajil Jakob', ju' matxi' che ntxoke': O'qinkxwe' Dyos, ayine' tnejel ex b'ajsb'il.¹³Kyej nkuwsa'ne' tx'otx' tu'n nq'ob'e', xinslik'u'ne' kya'j tu'n nq'ob'e'; naq njaw nma'ne' kyb'i, tzyettzun kyanq'intz.¹⁴Kyb'uyim kyib'e' kykyaqile' ex kyb'intze': ¿Alkye junkye' q'mante ja'lu qa ikykb'ajelju': qa aju' ichan matxi' jawnsk'o'ne' ktb'incha' matxi' kub' nximane' tu'n tb'inchet ti'j B'ab'ilon ex kyi'ju' xjal kaldey?¹⁵Ayinawe' inq'mante, ayine' ntzaj txkonte, wu'ne' tzaja', ex kkanb'al jaxjaku' matxa'.¹⁶Che lq'eqetze' nk'etze' ex kyb'intzju'ye' lu: B'ajx chin yolina'we' toj ewaj ttzajlenx t-xetnejel; atinqintoqwe' tej tb'aj tkyaqil ja'lu. Atzu'n ja'lo matxi' txinq'o'n wipumale' te, ayine' Dyos Manb'aj ex matxi' tzaj nchq'o'ne', chi Qman Dyos.

¹⁷Intma'n Qman Dyos klolkyeye', aju' Dyos xjal kye aj Israel, ikjalu: Ayinwe' Dyos Manb'aj kyib'aje'; a nxinyek'u'ne' ti'xti' k'elelb'a'n kyeye', nche'x nẍaqlu'ne' toju' b'e tu'n tb'eta'ye'.¹⁸¡Naqwit nchex kyb'i'ne' nchaq'b'ile'! Xi'wtlo' telb'a'n tkyaqil kyeye' kse'n nch'iy jun tnimal a', ikywitlo kyq'inumalju'ye' kse'n ttolob' ninnjab',¹⁹matxi'wtlo che chmet-xi'x kyyajajile', miwtlo jun b'ent kyajlet kse'n tz'awun ttzi ninnjab'; miwtlo jun ẍekub' nxitu'ne', exwitlo min ẍe elwiq'i'ne' nwitze', chi Qman Dyos.

²⁰Kukyetze' toj B'ab'ilon, kukyoqe' kywitz kaldey. Kymanxe' tqanil lu tuk'i'l sich' te tzalajb'il, ex ponxju' tqanil kyu'ne' tzmax janpon b'aja' ttxa'n tx'otx'. Kymanxe' kjalu: ¡Matxi' ttzaqpi Qman Dyos Jakob' ju' tmajen!, chechiku'ye'.²¹Maskye e'ik' toj chq'ajlaj tu'n, min e' k'wajti; kub' tkab'sa'n piky ex etzchitj tnimal a' toj tu'n.²²Aye'tzu'n b'inchal myab'a'n, lay che'x toj b'a'n. Aku' Qman Dyos matxi' q'mante. Spik'unte' tmajin Qman Dyos kye nimaqtnam¹Chin kyb'intze' tnam ate'qe'ye' ttzi ninnjab', kq'ontzpe'ye' anb'il, nimaqtnam najchaq ta'qe'ye': Ntxkete' tu'n Qman Dyos na'mxtoqpe' witz'jiye'; tzaj ttxko'nju' nb'iye' tej antinxtoqe' toj t-xmilal ntxuye'.²Okju' waq'e' tu'n te jun k'uẍtx'e'nb'il jqu'n twitzte, nkub' tewa'ne' tjaq'ju' tq'ob', nokye' tu'n te jun talsmaj ch'ut b'a'nxi'x ex nxitk'u'ne' toju' tkb'el talsmaj.³Tzaj tma'n weye': Israel, nmajina, knyek'u'ye' wajwalile' nim toklen ti'ja, chij.⁴Atzunwe' ojetoq kub' nximane' kjalu: mixti'x tajb'enju' waq'une' matxi' b'ent, matxi' b'aj wipumale' ex mixti'xte xb'ent, nchije'. Axxi'x toj tq'ob' te Qman Dyos ta' twitzlalil waq'unb'ene', toj tq'ob' Qman Dyos ta'ju' tu'me'l t-xel.

⁵Matxi' nk'ame' woklene' twitz Qman Dyos, ana'te wipumale'. Ate Qman Dyos b'inchanweye' toj talb'il ntxuye' tu'n wokye' te tmajen, tu'n tanjtzkyi'j aj Israel tyajajil Jakob' tuk'i'l, chij ikjalu: Mya o'kxte' tu'n toka te nmajine' tu'n kyjaw jumajtlju' tyajajil Jakob' ex tu'ntanjtzjumajtl kyi'ju' ẍe' kyej anq'in kyxol aj Israel; k'okyelta te spik'un wu'ne' kye kykyaqil nimaqtnam, tu'n tpon tiq'i'na kolb'il wu'ne' tzmax mankb'il ttxa'n tx'otx', chij.

⁷Intma'n Qman Dyos kolol, aju' Dyos xjan kye aj Israel, teju' tnam matxi'xi'x tz'el ik'u'n, aju' nnel ik'u'n kyu'n txqantl tnam, matxi' tz'ok te majin k'a'yi'n kyeju' yajul, kjalu: Ajtka'yinjtza kyu'n nimaqkawil ex kyu'n kyk'wal, che jawil we' ex che b'elmeje twitza qu'n ayine' Dyos Manb'aj xjan kye aj Israel, njaw sk'onteya ex nche japun nyole', chij. Tqanil tu'n tjaw B'inchet jumajtlju' tnam Jerusalen⁸Chi Qman Dyos ntma'n: Ulju' kmuj tu'n t-xinyek'u'ne' nxtalb'ile' teya, ex xintzaq'we'na; ponju' q'ij te kolb'il, ex nkola. Nkola tu'ntzun naq tu'nela tu'n tkyaj b'entti'ju' nyole' tuk'i'lju' tnam, tu'n tjaw b'inchet jumajtlju' tnam, tu'n kyok te tajawju' tx'otx' kub'ni xitj,⁹tu'n txitma'na kyeju' jpu'nqe': Kykyaje' tzaqpi'nqe'ye'. atzu'n kyeju' ate' toj qxopin: Kyek'untz kyib'e'. Kknetel kywa kyalu'ne' kytziyile kykyaqil b'e, ex alkyeku' witz sji'l ktenb'ela' kwa kywakyixe'.

¹⁰Lay che naj tu'n we'yaj ex tu'n k'waj, ex lay che b'aj tu'n q'ij ex tu'n kyaq, qu'n k'u'jla'nqe' ex ẍaqlu'nqe' wu'ne', ex che kxe'l wiq'i'ne' ja ta'qe' t-xiklil a'.¹¹Knb'incha'ye' jun b'e kywi' witz ex che plansetelju' b'e wu'ne'.

¹²¡Kka'yinxpe'ye'! Najchaq ẍetzaja': junjun toj tnayajkya'j, junjuntl tkub'exq'ij, junjuntl toju' tnej tx'otx' Asuwan.¹³¡Ẍch'ina tu'n tzalajb'il kya'j! ¡Tzalajxi'xa tx'otx'! ¡Che ẍch'ine' tu'n tzalajb'il, witz! Qu'n matxi' tq'uqb'a Qman Dyos tk'u'ju' ttanam, matxi' tzaj laqjtk'u'j ti'j toju' yajb'ilte.

¹⁴Intoq tma'n Syon: Machin kyej tkolb'i'ne' Qman Dyos, matzik' nna'le' tu'n Dyos nchin ajb'ene' te, chij.¹⁵¿Ma ntzun ik'tna'l tal jun txub'aj tu'n mujqa min tk'u'jla'ntl jun txub'aj tal? Maskyepena' matzik' tna'l tu'nte jun txub'aj, awe' lay tzik'kyna'le' wu'ne'.¹⁶Majx tz'ib'a'n qe'kye' toj nq'ob'e', majx na'nqe' nimaqttapiya wu'ne'.¹⁷Ojqelxi'x kyelju' che jawil b'inchantetl kytaname' kyekywitzju' e'kub' xitunkyeye'; matxi' che b'ajxkye' ẍexitunkyeye'.¹⁸Ka'yinxpe'ya ti'jileya, ka'yinxa se'n nkyb'u'yi'na' kyib' kykyaqil ex xitanjtzkyi'j tk'etza.
Axx'ix, ayine' Dyos Manb'aj ikyqe' kykyaqil kse'n u'wj k'okyel tq'o'na, kse'n achb'il nok tq'o'n jun txin ajtmje.¹⁹Kub'ni xitju' ttanama, xitjni ex kub'ni naj; laytzun kanunte' ttx'otx'a kyeju' che najal toj. Najchaq ta'qekye' e'kub' xitunteya.²⁰Kxe'l kyma'n tk'wala t-xe t-ẍkyina ju' tzpetniqe'toq toj twitza: Naqch'i'nxi'xte' tx'otx' lu qe; q'ontz txqantla tu'n qnajane' twitz, chechilo.²¹Ktma'ntzuntza toj tk'u'ja: ¿Alkye saj q'onkye k'wal lu weye'? Mixtoqna'ti'we' wal ex layxtoq chin nalane'; ojetoq chinx iq'i'ne' toj juntl tx'otx' ex najchaq, ¿alkye xch'isankye? Ojetoq chin kyajq'o'ne' njunale', ¿jatzun ẍetzaja'? chilo.

²²Chi Qman Dyos ntma'n: Kche nq'a'ye' chaq'b'il kye nimaqtnam; kxe'l nq'o'ne' jun yek'b'il kyeju' tnam tu'n kytzaj kyiq'i'n tala chle'nqe' kyu'n, ex tu'n ttzaj kyiq'i'n tala txin ti'j kyqul.²³Che okyelju' nimaqkawil te kymanb'il, aye'tzu'n kymyal che xelka'yinkye. Che b'elmeje twitza majx kb'el kyplaj twitz tx'otx', ex k'elil kyleq'u'n quq ti'j tqana. K'eleltzun tnik'tza qa ayine' Dyos Manb'aj, ex min nel kych'ixawju' q'uqlok kyk'u'j wi'je', chi Dyos.

²⁴¿Ma jaku'tzun b'ent tel iq'etju' xkanb'et tu'n jun xjal kuw toj q'oj? ¿Mujqa jaku' b'ent ttzaqpaj jun xjal jpu'n toj tq'ob' jun kawil kuwxi'x?²⁵Atzunte Qman Dyos ntma'n qa okyi: K'elel iq'etju' xkub'ti'j te jun xjal kuw, ex k'elel iq'etju' xkub'ti'j tu'n kawil kuw. Ayinwe' chin q'ojil kyi'ju' nche q'ojin ti'ja; ayinku'we' chin klol kye tk'wala.²⁶Che okyel nchq'o'ne' nche yajun ti'ja tu'n t-xikych'yo'n kychib'jil ex tu'n kykub' tx'ojti tu'n kychk'el, naku'xwitloj tu'n b'in. Tu'ntzun telkynik' kykyaqilju' xjal qa ayine' Dyos Manb'aj klolteya; qa ayine' Nim wipumale' jak'uluna' Jakob', kolpilteya, chij.¹Intma'n Qman Dyos kjalu: ¡Lan kymaye' qa nnel wik'u'ne' Israel kytxuye', kse'n jun xjal inel tik'u'n t-xu'jil, mujqa exink'a'yi'ne' te majen kse'n jun xjal ati tk'as te juntl! Exi' k'a'yi'nkye' qu'n eb'inchan ile'; el ik'u'nte' kytxuye' Israel qu'n e'okye' pi's.²¿Tiqu'n mix-a'lo' knet wu'ne' tej wule'? ¿Tiqu'n mix-a'lo'te tzaj tzaq'wi tej ntxokone'? ¿Ma laytzun che klete' wu'ne' toj kywitze'? tu'npena' jun nyole' ajnmanteye', tu'n tkub' tzqiju' ninnjab' ex tu'n kykub'tzqiju' nin a'; tu'n kyb'ajkyimju' kyiẍ tu'n k'waj ex tu'n kykub'q'ayj tu'n tpaj mixti' a'.³In nktxu'ne' kya'j toj qxopin ex in nktxu'ne' naku'j toj xb'alun te b'is, chij. Q'uqb'ab'l tk'u'j tmajin Dyos toj yajb'il⁴Matxi' chin tzajt-xnaq'tza'ne' Qman Dyos tu'n nq'uqb'ante kyk'u'jju'ye' siktenilqe' tuk'i'l yol te tzalajb'il. Tkyaqil prim nchin jaw tk'asune' tu'ntzun txi' nb'i'nju'ye' tyol.⁵Matxi' tzaj tq'o'n Qman Dyos nnab'le', ex min xkub' npi'si'n wib'e' te ex min xxi' nmiltz'u'n nwitze' te.⁶Xinq'o'ne' tze'lwi'je' tu'n nb'aj asyali'ne' ex ku nchije', b'je'tz xb'oqi'n nxmatziye'. Min kub' wewa'n nwitze' kyeju' nche ilink ex nkytzub'i'n toj nwitze'.⁷Ate Qman Dyos nnonin weye': qu'mtzun min nche'xju' yajb'ilweye' toj nwinqile'; qu'mtzun wa'lqine' b'a'nxi'x kse'n jun pik, b'i'nxi'xna' wu'ne' lay tz'el nch'ixawe'.⁸Axtzu' ta'ju' kolol wi'je' nk'itze': ¿Ma ati jun ati tq'oj wi'je'? ¡Qo'qe'na' junx twitz ajkawil! ¿Ma ati jun ati toklen toj twitz tu'n tpoqonte? ¡Kuna'tzaj ex q'mantz weye'!⁹Ana'te' Qman Dyos nnonin weye'; ¿alkye kb'ajsalweye'? Che b'elnajkye' kykyaqilju' wajq'oje kse'n xb'alun nb'aj tu'n pok'.

¹⁰Aye'tzunkye' nche nimane' te Qman Dyos ex nxikyb'i'ne' tyolju' tmajen: qama che b'ete' toj qxopin, ex mixti'x ch'i'n spik'un toj kyb'eye', qek kyk'u'je' ti'j Qman Dyos; kyq'onxkyib'e' toj tq'ob' Qman Dyos.¹¹Kykyaqiltzunkye' nche txqon q'aq' ex nche b'inchan tal kysmaj tuk'i'l tqan taq' q'aq', aye'x che b'ajel tojxju' kyq'aq', tu'nxju' talsmaj nk'ant xkub' kyb'incha'n. Atzun tz'e'ysb'il kywitzju'ye' ktzajel tq'o'n Qman Dyos ex che kjel lantz'aj toju' k'ixk'oj. Yol q'uqb'ab'l tk'u'j Jerusalen¹Intma'n Qman Dyos kjalu: Kyb'intzpe'ye' kykyaqile' kyajb'ile' tu'n kyanq'ine' toj ttxolilti'j ex nche jyone' wi'je'. Kyka'yinxpe'ye' pik jaẍe' ela' iq'i'ne', exju' lukb'en ja e'etza' q'i'ne';²kyka'yinxpe'ye' Ab'raam, ju' kymane', ex Sara, ju' ja e'ela' itz'ja'ye'. Tjunaltoq tej ntxkonteye', kub'tzun nky'i'wla'ne' ex nim tyajajil e'tzaj nq'o'ne'.³Chin okyele' majx b'a'n tuk'i'l Syon, aju' nintnam majxtoq kub'ni xitj. K'okyelju' tzqij tx'otx' toj chq'ajlaj wu'ne' kse'n jun awal, kse'n awal kub' nq'o'ne' toj Eden. nim tzalajb'il ktenb'el atzu', k'okyel b'itz ex chnab' te ninb'il.

⁴Chin kyb'intzpe'ye', tnam, chin kyb'intze' nimaqtnam: kxel nchik'b'a'ne' nxnaq'tzb'ile' ex kkyq'a' nchaq'b'ile' spik'un kyoju' tnam.⁵Naqch'inxtl nkanb'ane', ch'inxtl tul kanunju' kolb'il wu'ne', che nkawi'ju'ye' tnam tuk'i'l wipumale'. Che ayolju' tnam ttzi ninnjab' wi'je' ex kqeb'il kyk'u'j ti'ju' wipumale'.

⁶Che ka'yinxe' twitz kya'j, ex che ka'yinku'ye' twitz tx'otx': kb'el najte' kya'j kse'n sib', kb'elb'aju' tx'otx' kse'n jun xb'alun ex che kyimelju' xjal najlqe' twitz kse'nqe' us. Atzunwe' kolb'il wu'n tejumajx, ex mixti' b'ajsb'il teju' kanb'ab'l wu'ne'.

⁷Chin kyb'intzpe'ye', aye'ye' b'i'n tnik'alilti'j kyu'ne', tnam ntnima'nju'ya nxnaq'tzb'ile'. Lalun che xob'e' teju' i'lb'il kyu'n xjal, lalun che jaw b'isune' tu'nju' kyol kuw,⁸qu'n che b'ajelkye' kse'n nb'aj jun xb'alun tu'n pok', kse'n lan b'ajni wan tu'n ẍchuq'. Atzunwe' nkanb'ab'l tejumajxte', majx ktenb'elwe' kolb'il wu'n, chi Dyos.

⁹Iq'i'nktz jumajtlju' tq'ob'a Nman Dyos, tenx tipumala; iq'i'nktz tib'a kse'n tb'inchaya ojtxi' toju' tq'ijlalil ojtxi'xi'x. B'aj tpẍu'na Raab', nin txkup toj ninnjab';¹⁰kub' tzqiju' ninnjab' tu'na, aju' a' jaloja t-xelo, ex tb'inchaya b'e t-xe ninnjab' tu'n kyik'tzju' e'tzaqpet tu'na.¹¹Ikytzu'n k'anjetza'kyi'ju' kolpi'n tu'n Qman Dyos, nche ẍch'in tu'n tzalajb'il aj kyokx toj Syon; ktzalajel kywitz kukxiju', okxi'x che tzalajel ex b'a'n che tenb'ela', mixti'tlte k'ixk'oj ex oq'e'n kye.

¹²Ayinku'we' chin q'olte tipumala. ¿Alqetzun kxob'ela'ya? ¿Ma kye xjal? ¿Ma kyeju' xjal nche kyim, ikyqe' kse'n k'ul?¹³¿Ma oktzun k'ik'el tna'l Qman Dyos tu'na, ju' ch'isanteya, ju' xislik'unte kya'j ex kyej tkuwsa'n tx'otx'? ¿Ma oktzun klu'lula tkyaqil kmuj, te kytx'u'jilju' nche yajun, naq nche ayon tu'n tk'ulb'ana kyu'n? ¿jatzunta'ju' kytx'u'jil lu?¹⁴Alkyete nyajti toju' yajtib'il, lwiyxi'x ktzaqpetel; lay kyimte' toju' jul qxopin ex ktenb'el twa kukxju'.

¹⁵Ayinwe' Dyos Manb'aj kyib'aje', a nb'iju'ye' Dyos Manb'aj nimtipumal; ayine' nxiyukchante ninnjab' ex e'jaw tinunju' ttolob',¹⁶xinslik'u'ne' kya'j ex kyej nkuwsa'ne' tx'otx'. Kub' nq'o'ne' nyole' toj ttziya ex nkola toj nq'ob'e'. Aya ntaname', nchije' te Syon.

¹⁷Na'ntztib'a Jerusalen, lwix we'ktza. Matzikxju' ttx'u'jil Qman Dyos tu'na kse'n jun xjal nxitk'wa'n q'e'n, nxitk'wa'n tzmax ajtb'aj tu'n, tzmax ajttzyet twi' b'a'nxi'x.¹⁸Mix-a'lo' jun kb'entel t-xiẍaqlunteya, kyxol kykyaqilju' tk'wala; mix-a'lo' jun kxel xqnonteya kyxol kykyaqilju' tk'wala ẍe'ch'iy tu'na.¹⁹Mache tzaju' kab'e' xitb'il lu tib'aja: makub' xitu'n ttanama ex mab'je'x iq'i'n tkyaqil ti'xti' toj, ex mache b'ajkyimju' twnaqila tu'n we'yaj ex toju' q'oj. ¿Alkye ktzajel laqj tk'u'j ti'ja? ¿Alkye kq'uqb'alte tk'u'ja?²⁰Mixti'x kyipumalju' tk'wala kse'nqe' pich' matxi' che kyej toj xpatxab', woqo'jqe' jaxjaku' kyoj xky'ichb'e, k'ixb'iniqe' tu'n ttx'u'jil Qman Dyos, tu'nju' tzak'b'il tu'n Dyos.²¹Qu'mtzun, b'intzju'ya lu, nintnam kub'ni b'o'lja, aya ntx'ujtiya, mya tu'n b'in;²²Lu ntma'n Qman Dyos, aju' nkolon kyi'ju' ttanam, ikjalu: K'elel wiq'i'ne' k'wab'j lu toj tq'ob'a matxi' tx'ujtiya tu'n; lay k'wantla ti'ju' ntx'u'jile'.²³Kxe'l nq'o'ne' kyeju' ẍe yajun teya, kyeju' ntoq kyma'n teya: Xonku'tib'a twitz tx'otx', qo ik'ele' tib'aja, chechij; atzunta ku chija, kub' t-xon tib'a twitz tx'otx' tu'n tkub' wab'e'na kse'n quq. Tqanil tzaqpib'lte Jerusalen¹Iq'i'nktz tib'a Syon, kuwsam tib'a; Jerusalen, xjan nintnam, q'onka ti'ja tb'anilxi'x, qu'n lay che okxtlkye' ma' witzleb'il toja, aye' mya ẍtilun kychwinqlal.²Iq'i'nktz tib'a Jerusalen, chtomila quq ti'j tqana, qekxa toju' tkawb'ila. Iq'imila tze ti'j tqula tnam Syon, ju' xiq'i'na toj kars.

³Chi Qman Dyos kjalu: Mixti' junwe' pwaq nk'am tej kyxi' q'i'ne' te lq'o'n majin; ex mixti' jun pwaq kxe'l nq'o'ne' tu'n kykolpete' ja'lo.⁴Xi'ju' ntaname' toj Ejipt ojtxi' ex najan te najchaq xjal atzu'; yajxi'tzuntl kub' yaju'n tu'n Asirya extzun mixti' til.⁵Atzu'n ja'lo nxinka'yine', matxi' txiq'i'n ntaname' toj B'ab'ilon extzun mixti' til. Inxi'x che ẍch'inju' nche kawin kyib'aj tu'n kytzalajb'il ate'qe'k q'ol ntx'u'jile' kukxju'.⁶Tzultzunte' q'ij k'elel tnik'ju' ntaname' ex kkaneb'il toj kywitz qa ayine' Dyos Manb'aj matxi' chin yoline', chi Dyos.

⁷Tb'anilxi'xte' tka'yinx twi' witz ajttzaju' q'ilte b'a'n tqanil, aju' tzul q'inte tqanil nak'b'il, aju' npakb'ante kolb'il ex ntma'n te Syon: Nimaqkawilte' Dyos janajb'ena'ya, chij.⁸¡B'inxpe'ya! Injaw toj kywi' t-xq'uqila junx nche ẍch'in tu'nju' kanb'ab'l, qu'n inkyka'yi'n tu'nku' kywitz tzul jumajtl Qman Dyos toj Syon.⁹¡Che ẍch'inqe'ye' tu'nju' kanb'ab'l, aj Jerusalen kub'ni xitj, qu'n matxi' tzaj laqj tk'u'j Qman Dyos ti'ju' ttanam, matxi' kolpet Jerusalen tu'n!¹⁰Matxi' tyek'u Qman Dyos tipumal kywitz kykyaqil nimaqtnam. Kb'injtzel toj tkyaqil twitz tx'otx' qa matxi' qoklet tu'n Qman Dyos.¹¹¡Kukyetze' ja'loxi'x toj B'ab'ilon, lalun txikytzyu'n jun ti'xti'ye' tz'il, lwix kukyetze' toj B'ab'ilon! ¡Che okxe' ẍtilun kukxju' aye'ye' nche iqankye aq'unb'il twitz Qman Dyos!¹²Lantzun che etze' ojqel, lalun che etz oqe', qu'n che nenunjtzele' toj tkyaqil plaj tu'n Qman Dyos janche ajb'ena' aj Israel. Yajb'ilte tmajin Qman Dyos ex tkanb'ab'l¹³Kkanb'alte' nmajine', kajwil nima'n b'a'nxi'x.¹⁴Ikxju' kse'n e'jaw lab'ti txqan xjal ti'j, tej t-xikyka'yi'n matxitoq chukjiju' twitz matxitoq naju' tilb'il kse'n tilb'ilal jun xjal,¹⁵ex che kjel lab'ti txqan nimaqtnam; lay tz'elkytzi nimaqkawil ajt-xikyka'yi'n, qu'n okkyla' ex k'elelkynik' ti'j aju' b'ajx kyila'xi'.¹¿Alkye kxe'l okslanteju' matxi' qb'iye'? ¿Alqe matxi' txityek'u'na Qman Dyos tipumal?²Tajb'iltoq Qman Dyos tu'n tch'iyju' tmajen kse'n jun tal awal tzmaxi'x nch'iy nxitawa'n tlok' toj tzqij tx'otx'. Myatoq tb'anil ex myab'a'n tka'yink, mixyab'a'n tka'yink;³ik'o'n kyu'n xjal ex suchu'n. Jun ichan atixi'xtoq toj k'ixk'oj, naq'litltoq toju' yajb'il. Kse'n jun xjal mya qajb'il tu'n tok qka'yi'n, el qik'u'n ex mixti' xiqq'o'n toklen.⁴Extzun atoq iqalte tkyaqilju' yajb'ilqe, intoq ik'xju' qk'ixk'oj tu'n. Toj qnab'l qa a Qman Dyos k'ixb'sante, qa kub' ttz'e'ysa'n twitz ex eltch'ixaw tu'n.⁵K'ixb'sanjtz tu'n tpaj qil, b'aj yajla'n tu'n tpaju' qb'inchb'aj myab'a'n; tu'nju' tz'e'ysb'il twitz ula' nak'b'il qe, ob'anix naq tu'nju' b'aj k'ixb'sa'n.

⁶Ob'ajx tzpet qkyaqil, kse'n che'x tzpet rit, teyile junjun b'ajx kyljo'n kyb'e, atzunte Qman Dyos jaw tq'o'n tkyaqilju' qil te tiqatzju' tmajen.⁷B'aj yajla'n, ex min jawtiq'i'ntib', mixpeti' xitma'n jun tyol; xiq'i'n toj b'i'yb'il naku'j qpoj tman rit, ex naqkub' nume, mixti'te tma, kse'n jun rit naqntyo'nk ajtel jon ti'j.⁸Xiq'i'n mixti' til, ex mix-a'lo'kye klonte; mix-a'lo' jun b'ajx tk'u'j ti'j. Kub' najsa'n twitzju' tx'otx' lu, kub' b'yo'n tu'n tpaj kyilju' ntaname'.⁹Ku'x mqu'n kyk'etz xjal b'inchal myab'a'n, ku'x mqu'n kyuk'i'l xjal mixmyab'a'nqe', extzun min tb'incha jun il. ex min etz jun yol te sb'ub'l toj ttzi.¹⁰Taj Qman Dyos tu'n tk'ixb'sanjtz toju' yajb'il. Tu'nju' taq'tib' te chojb'il tu'n tpaj il, nimtoj tchwinqlal ktenb'el kche tla'ju' tyajajil; che japumelju' t-xim Qman Dyos naq tu'nel.¹¹Ktka'yi' spik'un tik'lenxi' txqan yajb'ilte, ex kqeb'iltk'u'j ajtb'inte; nim che kletil tu'n tmajin Qman Dyos tnik'alti'j, qu'n ate kxe'l iqanteju' kyil.¹²Qu'mtzun kxe'l tq'o'n Qman Dyos jun toklen kyxolju' nimaq kyoklen, ex k'okyel ttxa'n kanb'ab'l kyuk'i'lju' kuwqe', qu'n mataq'tib' tu'n tkyim ex matz'ok kyajlal b'inchal myab'a'n, extzun naqx jawtiqa'n kyil txqan xjal ex yolin kyi'ju' aj il. Tk'u'jlalil Qman Dyos tejumajx¹Ẍch'ina tu'n tzalajb'il, qya min nalana ex mixti'qe' tala; b'itzana b'a'nxi'x tu'n tzalajb'il, aya b'ajx tz'itz'ja' jun tala, qu'n intma'n Qman Dyos kjalu: Nimxi'x talju' qya ik'u'n ktenb'il kyetwitzju' qya ati tchmil, chij.²Nimsanxju'ya tpach xb'aluna, slik'unxa xb'alun ja najla'ya ex lalun xob'a; jk'unqe'xa taq'e'l ex awanqeku'xa stak b'a'nxi'x,³qu'n kb'el puqlita toj tnayaja ex toj tb'a'nq'ob'a; kb'elkyi'j txqan nimaqtnam kyu'n tyajajila che kb'el najan kyoju' nimaqtnam chq'ajlajqe' ja'lo.⁴Lalun xob'a, lay tz'elta tch'ixaw; lay tz'ok i'li'na ex mixti' tu'n tch'ixwa'ya. K'ik'el tna'lte' tch'ixawa el ku'xuntoqa ex lay tzajtna'ntla tch'ixawa el tej tkyim tchmila,⁵qu'n kxelq'i'nta tu'n ch'isanteya te t-xu'jil. A tb'iju' Dyos Manb'aj nimtipumal; ate Dyos Manb'aj Xjan kye aj Israel klolteya, aju' Dyos tib'aj tkyaqil twitz tx'otx'.

⁶Ikytoqju'ya kse'n jun xu'jilb'aj txinx kyejni q'o'n ex inxi'x b'isun, atzu'n ja'lo matxi' txkonjtztla tu'n Dyos janajb'ena'ya ex intma'n teya:⁷Naq jun kmuj xkyej nq'o'na, tu'ntzu'n nk'u'jlalile' nimxi'x qob'entel junmajtl.⁸Naq jun kmuj ntx'u'jile' tzaj, kub' wewa'n jun kmuj wib'e' twitza, ex tzaj laqj nk'u'je' ti'ja tu'n nk'u'jlalile' tejumajx. Chi Qman Dyos klolteya.

⁹Kse'n xintziya'ne' te Noe, qa lay tzajtl q'eqjab' tu'n tjawtl a' tib'aj tx'otx'. ikytzu'n kxe'l nma'n jun nyole' ja'lo tu'n tjapun lay tzajtl ntx'u'jile' tuk'i'la ex lay chin q'ojintle' tuk'i'la.¹⁰B'a'nqa matzik' kych'exb'e'nkyib'ju' witz toj jun plajtl exqa mache tzaj niq'ju' ttxa'nwitz, lay b'aj nk'u'jlanteya ex lay kub' xitju' nyole' te nak'b'il kyejni b'entti'j tuk'i'la. Chiju' Qman Dyos nq'aq'an tk'u'j ti'ja. Aju' ak'a'j Jerusalen¹¹¡Qab'anx twitza nintnam, b'ajni yajtiya tu'n q'ankyaq, mix-a'lo' q'uqb'al tk'u'ja! Che kb'el nq'o'ne' ab'j tq'uqb'ila kyib'aj tb'anil ab'j aye'tzu'n ab'j sapiro che ajb'el te tq'uqb'ila;¹²che jawil nb'incha'ne' tjaya nimaq kywe' ab'j rub'i aye'tzu'n ab'j rub'ilo che okyel te tjpel, aye'tzu'n nimaqtapi ti'jile tb'anil ab'jile.¹³Ayinwe' chin xnaq'tzalkye tk'wala; kykyaqilxkye che anq'il b'a'n.¹⁴Kkuwixela tu'n tnik'alilti'j, lay kub'yaju'ntla ex lay xob'a, ex lay jaw ximantla tu'nju' xob'ajil.¹⁵Qa alkye sul q'ojil ti'ja, mya tu'n npaje', ex kb'elti'ju' matz'ok tzaqpaj q'ojil ti'ja tu'na.

¹⁶Ayinna'we' ẍin ch'isanteju' xjal nnaq'unan ti'j k'uxb'il aju' nnokx t-xupi'n q'aq' tu'n tk'ent ex nche kub' tb'incha'n chukchaq aq'unb'il te q'oj; ex ayine' ẍin ch'isanteju' xjal nxitun tu'n kyb'aj t-xitu'n ti'xti';¹⁷mixtzun a'lo'xi'te kub' b'inchante jun aq'unb'il tu'n tkub' najsa'na tu'n. Kjpetel kytzi kykyaqilju' poqol teya tu'na. Awe' nxinq'o'n kyeju' nche ajb'en weye': aju' kanb'ab'l. Ayine' Dyos Manb'aj nchin q'mante, chi Dyos. Intzajtoyi'n Qman Dyos tk'u'jlalil kye kykyaqil¹Kukytzaje' k'wal a' kykyaqile' nche k'wajtiye'; kukytzaje' aye'ye' mixti' kypwaqe', kknetel wab'j naqkukx kyu'ne', che wanqe'ye'; kknetel ta'l ub'a ex lech kyu'ne' naqkukx.²¿Tiqu'n nkub'a' kynajsa'n kymediye' ti'ju' mya wab'j? ¿Tiqu'n nb'aj kynajsa'ne' twikyk'u'je' ti'ju' min nche noje' tu'n? Chin kyb'itze' b'a'nxi'x ex che wale' ti'ju' tb'anil wab'j, kche wale' ti'ju' tk'ok'jalxi'x.³Kukytzaje' nk'etze' ex chin kyb'inku'ye', chin kyb'itze' ex che anq'ile'. Kjel b'entti'j jun nyole' tejumajx kyuk'i'le', che japumeltzun nyoltze' kyej b'entti'j toj tk'u'jlalil tuk'i'l Dab'i.⁴Oknq'o'ne' Dab'i te tziyal kye kykyaqilju' nimaqtnam, te nejenel ex xnaq'tzal kyeju' tnam.⁵Che tzajel ttxko'na tnam min tojtzqi'na kywitz; ojqel che pomel tnam tk'etza min ojtzqi'na kyu'n, qu'n matxi' jaw nnima'na, ayine' Dyos Manb'aj, Xjan kye aj Israel.

⁶Kyjyome' Qman Dyos atixku' tu'me'l tu'n tknet kyu'ne', kytxkonxe' atixku' nqaku'.⁷Tzaqpinkj tb'eju' b'inchal myab'a'n, exju' pi's xjal tu'n tkyajttzaqpi'nju' t-xim; kutanjtz kyi'je' tk'etz Qman Dyos, ktzajel q'aq'ante' tk'u'j kyi'je'; kutanjtz kyi'je' tk'etz Qman Dyos, nimte tk'u'jlalil tu'n tkub' tnajsa'n qil.⁸Qu'n mikxa'we' nxim kse'nkye', ex mikxa'we' nb'incha'n kse'n nkyb'incha'ne'. Kse'n ta'ya' kya'j tib'aju' tx'otx', iktzu'n ta'we' nxim ex nb'inchb'aj tib'ajxi'tlu' kye'. Chi Qman Dyos ntma'n.

¹⁰Kse'n jb'al ex txun che'w nche tzaj twitz kya'j, min nanjtlkyi'j qa na'mxtoq tb'aj kyak'sa'n twitz tx'otx', inkyb'incha'n tu'n ttzaj tawal ex tu'n ttzaj poq'li, injaw ij twitz tu'n txi' awet ex wab'j te k'a'chb'il,¹¹ikytzun nyolju'ye' in nma'ne' lay tz'anjtzti'j wuk'i'le' qa min saq'unan nejtl, inpe' tb'incha'nju' wajb'ile' intb'incha'nju' chaq'b'il nxinq'o'ne' te.

¹²Che eletzkye' na'tz tuk'i'l tzalajb'il, che ul jumajtle' toj nak'b'il toju' kytx'otx'e'. Okxi'xpetzun che b'itzalju' witz ex k'ul tu'n tzalajb'il ajkyka'yinte ex kykyaqilju' tze toj k'ul che poq'chal toj kyq'ob'.¹³Che tzajel ch'iy tzaj te kyxel ch'i'x, ex che tzajel ch'iy ktxab' te kyxel la; kjawil nima'n tb'i Qman Dyos tu'nju' lu; k'okyel ju'lu te techlal tejumajx, ex milo kb'ela' xitu'n. Tu'me'l t-xel kyeju' njapun tyol Dyos kyu'n¹Intma'n Qman Dyos kjalu: Kyanq'imju'ye' tnik'alilti'j, kyb'inchamju'ye' ttxolilti'j, qu'n naqch'inxtl kytzaqpete' wu'ne'; kxe'l nyek'u'ne' wipumale' tu'n nkolone'.²Tzalajb'il teju' xjal nche tb'incha'n chaq'b'il lu ex nche japun b'a'nxi'x tu'n, ntnima'nju' q'ij te ojlab'l ex min nkub' t-saqchb'e'n, ex chab'a' nxitka'yi'n tu'n lalun b'inchan myab'a'n, chij.

³Qa ati jun najchaq xjal matxi tq'o'ntib' toj tq'ob' Qman Dyos, mixti' tu'n tmante: Oklo chin elel tpa'ne' Qman Dyos ti'ju' ttanam, chiwt. Exju' xjal mixti' tu'me'l tu'n tten t-xu'jil, mixti' tu'n tmante: Ikqinwe' kse'n jun tze tzqij, chiwt.⁴Qu'n chi Qman Dyos ntma'n: Qama kub' kynima'n ichan, mixti' tu'me'l tu'n tten kyxu'jil, q'ij te ojlab'l, exqa ma japunju' wajb'ile' kyu'n exqa makyb'inchaju' nyole' kyejni b'entti'j,⁵kxe'l nq'o'n junwe' ti'xti' kye b'a'nxi'x kyekywitz kyk'wal ex kymyal; awe' kxe'l nq'o'n kye tu'n tkyej tz'ib'etju' kyb'i tejumajx toju' njaye' kyojxi' nimaqtapi; k'okyel nq'o'ne' jun kyb'i tejumajx, layx kub'najset.⁶Exqe'ju' najchaq xjal makyaq'kyib' weye', tu'n kyajb'en ex tu'n kyk'u'jlan weye', tu'n kyok te nmajine', qama kynimaju' q'ij te ojlab'l ex min xkub' kysaqchb'e'n exqa makyb'inchaju' nyole' kyejni b'entti'j,⁷che tzajel wi'ne' twi' witz xjan weye' ex che tzalajel wu'ne' toju' ja te nab'l nb'iye'. Kche nk'ma'we' chojb'il k'ok'sb'il ex chojb'il makub' kyq'o'n tib'aju' q'olb'eb'l weye', qu'n k'okyel we' nja te nab'l nb'iye' kye kykyaqilju' tnam.⁸K'anjetz kyi'ju' ate'x toj chq'ajlaj, ex kkyb'uyi'tlkyib' wu'ne', chij. Aku' Qman Dyos inq'mante ja'lu, aju' nb'inchante tu'n kyb'uyinte jumajtlkyib' aj Israel b'je'xniqe' sputj. Tzak'b'ilkye myab'a'n nejenel⁹Kukytzaje', tojk'ul txkup; kukytzaje', txkup te toj k'ul, che kych'yonqe'xju'ye' rit;¹⁰qu'n moẍqe'kye' xq'uqilte ntaname', mixti'xte nxikyka'yi'n. Kykyaqil ikyqe' kse'nqe' tx'yan min nche chiyon; naq nche wtan ex nche witzk'an; o'kx kyajb'ilju' tu'n kywtan.¹¹Ikyqe'ju' kse'n tx'yan inxi'x che we'yajti ex mixjun nche noj, k'ik'lelqe' mixti'x nkane toj kywitz; teyilex junjun tojx tb'e, naq o'kx nkyjyo'nju' aju' ati tajb'en kye, chij.¹²Inkyma'n: Qo'qe' jyol b'in ex k'wab'j tx'omsa'n tu'n qtx'ojti. Ex ikx qb'incha'ju' najchi'j, mujqa nimxi'xtl qb'incha'.¹Inche kyimju' xjal tnik'alkyi'j ex mix-a'lo'te nb'ajxtk'uj kyi'j; inche kub' naju' b'a'n xjal, ex mix-a'lo'te nkane toj twitz qa ajkykyim mixti'tlte yajb'ilkye²ex nche pon toju' nak'b'il. Mana' che b'et toj b'a'n b'e atzu'n ja'lo nche ojlan toj kymuqb'il. Yol kyi'ju' k'u'lb'il te witzleb'i'n³Che lq'etze', e'tk'wal ajk'ayi'n, aye'ye' e'itz'jiye' toj ajpaji'n:⁴¿Alqi'j nche xmayina'ye'? ¿Alqi'j nche sq'iluna'ye'? ¿Alqi'j netza' kyiq'ina' kyaq'e'? Tk'wal ilqe'kye', twi' chalyolqe'ye';⁵Inche aq'wiye' b'inchal ti'xti' mijsoq'x kyxe k'ol ex kyxe kykyaqil tze pujinqe', ex nche kub' kyq'o'ne' k'wal te chojb'il kytzi a' nche etz kyxol ab'j.

⁶Majx akyajb'ilju'ye' aj Israel, tu'n kyk'ulune' kywitzju' ab'j sq'ib'un ttzi a', majxna' ati jatu'n kyk'uluna'ye' atzu', Matxi' kub' kyqo'ne' chojb'il b'in kywitz, matxi' kub' kyq'o'ne' twitz awal k'ok'e'kywitz kye. ¿Ma oktzun chin tzalajele' tu'n tkyaqil ja'lu?⁷Kub' kyq'o'ne' kykuẍb'ile' twi' jun witz nimin twe' jupin kyu'n tzaj, ex atzu' ejaxa'ye' q'olku' chojb'il.⁸E'kub' kyq'o'ne' kywitzleb'e' taq'wiqe'xi'x ttze'lti'ju' tjpel tjaya. Ik'nna'le' kyu'ne', ex kub' kyẍb'iqb'a'n kyib'e' ex ekub'kẍeye' tib'aj kykuẍb'ile' nim twitz; kyejb'ent kyole' kyuk'i'lju' ichan e'kub' toj kywitze' tu'n kykub'kẍeye' kyuk'i'l, ex majx tokkywitze' ti'ju' witzleb'.

⁹Matz'oktilil kyu'ne' q'ol aseyt twitz dyos Melek ex txqan k'ok'sb'il; exikychq'o'ne' sanjelal najchaq, mache b'ajx kylmu'ne' tzmax toj tkawb'il kamik.¹⁰E'kub' siktiye' tu'n kyb'ete' nim, ex min elkynik'e' qa mixti' tajb'en. Q'i'ntoq kywaye', qu'mtzun mixtoqti' nche siktiye'.

¹¹¿Alkyeqe'tzu'n dyos lu jatoq nche xob'a'ye' ex jatoq nche nimana'ye', tu'nju' min xjapun kyyole' wuk'i'le' ex majx matzik' nna'le' kyu'ne' tejumajx? Tej mixtoqti' nche nimane' weye', mixti'we' nyol ex naku'j min nxi' toj nwinqile'.¹²Oktzun kxe'l nchik'b'a'nwe' kychwinqlale', toj kynab'le' qa majx tzinun ta'qe'ye'.¹³Ajkyẍch'ine' qanil o'nb'il, lay che oninjtze' ex lay che klete' kyu'n kywitzleb'e'. Naq che kxe'lqi'n kykyaqil tu'n kyq'iq'; naq tu'n jun xupin che b'ela' naj. Aye'tzunkye' q'uqlok kyk'u'j wi'je' che najal toju' tnam ex che najal twi'ju' witz xjan weye', chi Dyos. Tz'e'ysb'ilkywitz aj Israel ex q'a'nb'ilte¹⁴Kb'injtzeltzuntz aj tq'manjtz kjalu: Kyb'inchame' jun b'e plan, che kyiq'imilju'ye' maqb'il tu'n tik'xju' ntaname'.¹⁵Qu'n aju' Dyos te jawnixi', aju' ati tejumajx ex xjan tb'i, intma'n kjalu: Najliqinwe' toj jun najb'il toj kya'j ex xjansa'n, ex atinqine' tuk'i'lju' me's ex nb'isun, inxiwoni'ne' ex inkuwsa'ne'.¹⁶Lay chin oktene' poqilte ntaname' kukxju', ex lay chin q'ojine' kukxju' ti'j; qu'n jaku' lay qetl kyk'u'ju' xjal ju' oje che nch'isaye' wi'je'.¹⁷Majx ten jun tq'ijlalil ntx'u'jile' tu'n tpaju' kyil aj Israel, kub' ntz'e'ysa'ne' kywitz ex elnpa'n wib'e' kyi'j; aye'tzunkye jawkyiq'i'nkyib' ex kub' kypi'sa'nxi'xtlkyib'.¹⁸Matxi' wilju'ye' kyb'inchb'aj, kche nq'a'na'we' ex che ojlal wu'ne' ex che tenb'el toj nak'b'il b'a'nxi'x. Knq'uqb'a'ye' kyk'u'ju' nche b'isun,¹⁹kxel nma'ntzuntze' kye kykyaqil: ¡Tenx nak'b'il kyeju' ate'qe' najchaq, ex tenx nak'b'il kyeju' ate'qe' naqaku'! ¡Knq'ana'we' ntanam! nchiku'ye'.²⁰Aye'tzunkye' b'inchal myab'a'n ikyqe' kse'n ninnjab' ntinun, mixjun nb'ent tkub' nak'e ex nche etz t-xonju' xoq'l ex tz'il tu'n ttolob'.²¹Mixti'xte b'a'n kyeju' b'inchal myab'a'n, chij. Aku' Qman Dyos q'mante. Mewayi'n axxi'x¹Tzaj tma'n Qman Dyos weye' kjalu: Ẍch'ina kuwxi'x, lalun xob'a, jawx toj twi'ya kuw kse'n jun chun; tzak'unxju'ya ntaname' tu'n kypaju' til, tzak'unxa tyajajil Jakob' kyi'ju' kyil.²Inche jyon wi'je' tkyaqil q'ij inxi'x che tzalaj tu'n nelkynik' ti'ju' nb'eye', ku'xi'xtej jun tnam ntb'incha'n b'a'n ex min nche kub' kytxa'ju'n nkawb'ile'; nche qanin kawb'il tnik'alkyi'j weye' kuxi'xtej nche tzalaj nche tzaj lq'e nk'etze',³extzun a nkyma'nju': ¿Titi' qomewayila', mina'jon ntka'yi'nte Dyos? ¿Tiqu'n kqyaju'ya'qib', mina'jon ntzaj tka'yi'nte'? chechij. Inkub' kyq'o'n kyk'a'ẍe' toj tq'ij mewayi'n ex nche oktene' yajulkye kyaq'unale';⁴Inche iline' ex nche q'ojine' kyxolxe' toju' q'ij te mewayi'n inxi'x che b'ujune' tu'n kyq'ob'e'. Mixti'x tajb'en nche mewayine' ikju', layx tzaj nb'i'ne' kyna'j Dyose'.⁵¿Ma atzu' nchin tzalaja'ye' ti'ju' kymewayi'ne' tu'nju' nxi'x che b'isune' nxi'x che kub' tzipeye' nwitze' naku'j ajlaj exqa tu'nju' nche kub' kẍeye' tuk'i'l kyxb'alune' te b'is toj tza'j? ¿Ma atzun mewayi'nju' toj kywitze', toju' q'ij nchin tzalaje' ti'j?⁶Myanate'. Anate' mewayi'n nchin tzalaje' ti'j: aju' tu'n kyelkyiq'i'ne' yajb'il mya tnik'alilkyi'j ex tu'n kyel kypju'ne' iqb'il ti'j kyqul xjal; tu'n kytzaqpi'nte qe'ju'ye' yaju'nqe' kyu'ne' ex tu'n lan che oktle' mya'l kyib'aj xjal;⁷tu'n t-xikyq'o'ne' kywaju' nche we'yajti ti'ju' kywaye' tu'n t-xikyq'o'ne' kyposad prow mixti' kyja; tu'n t-xikyq'o'ne' kyxb'alunju' mixti' kyi'j ex tu'n kyonine' kyi'j kyxjalile'.⁸Kspik'eb'eltzun toj kywitztze' kse'n ajqsqix ex lwiy che q'anetelju' kyk'ixb'lene'. Kb'el neju' tojxi'x tu'me'l kywitze' ex kxel lpeju' wajwalile' kyi'je'.⁹Che tzajel ntzaq'we'ntzuntze' qama chin kytxoke'; qama che ẍch'ine' nche qanin o'nb'ile', kxe'l nma'ne' kyeye': Luqine' lu Qama kub' kynajsa'ne' tkyaqil yajb'il, qa min ẍe ok kyili'n junjuntle' exqa min xjaw kyiq'i'n yole' kyi'j,¹⁰Qama kyaq'kyib'e' ajb'el teju' nwe'yajti, qama che onine' ti'ju' nojqelan kye nche b'isun, kqoptz'ajeltzun spik'untz kyeye' toj qlolj, k'okyelju' qlolj kyeye' te spik'un kse'n wanq'ij.¹¹Che kxelnẍaqlu'ne' kukxju', nim kywaye' kxe'l nq'o'ne' toj chq'ajlaj, k'okyel kyipumale' wu'ne' ex che okyele' kse'n jun tnej awal chab'a a'li'n, kse'n jun t-xiklil a' majx ati a' toj.¹²Kjawil kyb'incha'ntlju' kytaname' xitjni ex kjawil kyb'incha'ntl tib'aju' tq'uqlil ojtxi' tkub'len. K'okyel q'o'n kyb'iju' ttanama B'inchaltl nimaqtapi kub'ni xitj, B'inchal jumajtl ja xitjni. Yol ti'ju' q'ij te ojlab'l¹³Kynimanku'ye' q'ij te ojlab'l; lan kyb'inchaye' ti'chaq kyajb'ile' toju' q'ij xjan weye'. Tz'okxju' q'ij lu kyu'ne' te tzalajb'il, te jun q'ij xjan tu'n tnimet weye' ayine' Dyos Manb'aj; nimanku'ya, lan kub' tb'incha'n tu'n ti'xti'ya toj.¹⁴Qama kyb'inchaye' lu, knetel kytzalajb'ile' wuk'i'le', che kxe'lwiq'i'n tzuntze' tu'n kuykanb'ane' kywi' witz toju' tx'otx' che okyel jumajtle' tajawju' tetzb'il ojtxi' kyyajilb'ene' Jakob', chij. Aku' Qman Dyos inq'mante ja'lu. Kyil aj Israel ex tz'e'ysb'il tywitz¹Na'mx tkub'ajte Qman Dyos tipumal tu'nwt lay b'ent tkolon, ex min xkub' chkyinixte' tu'nwt lay che tzajb'i'ne' tu'n.²Naq aju' ati jun maqb'il kyxole' tuk'i'l Dyos tu'nju' il ẍeb'aj kyb'incha'ne' tu'nju' kyile' nxa'tjpu'n twitz tu'n lalun che tzajb'i'ne' tu'n.³B'ajni txa'j kyq'ob'e' tu'n kychk'el xjal b'ajniqe' txa'j twikyq'ob'e' kyu'n taq'wix, chajyolil inkyma'ne', myab'a'n yol nb'je'tz toj kytziye'.⁴Mix-a'lo' inq'mante til juntl toj tnik'alti'j, ex mya toj tnik'alti'j noka' toj xjel. Atzu' nqeya'xi'x kyk'u'je' ti'ju' chajyolil ex kyi'ju' yol mya ax, nojniqe'ye' tu'n taq'wixil ex axju' taq'wixil nkyb'incha'ne'.⁵Iky kyximju'ye' kse'n tjos q'antin ex nkyb'incha'ne' se'n tchemoj xin; qa ati jun xxich'yonteju' jos lu, kkyimel, qatzun makub' qwab'e'n, che eletz kan tuk'i'l kyb'iyb'il toj.⁶Lay che okju' kychemuj xin lu te xb'alun; layx tz'ajb'enju' nkychmo'n tu'n jun xjal. Mixyab'an tkyaqilju' nkyb'incha'n naq'liqe' kyq'ob' tu'n kyb'yon xjal,⁷nche ajb'en kyqan b'inchalte myab'a'n, ojqel kyel tu'n kykub' kyb'yo'n xjal mixti' til. Majxtokx b'yojxjali'n toj kywi', naqx xitul ta'qe' jachaq nche b'eta'.⁸Mixti'x nak'b'il kyxole' kyuk'i'l xjal, mixya toj tu'me'lju' nkyb'incha'ne'. Mixya tzinunju' kyb'eye' ljo'n, mixti'x nak'b'il kyeju' nche b'et toj.

⁹Qu'mtzun matz'el lq'eju' kolb'il qi'j ex min nulkanunju' tzaqpib'l qk'etz; intoq qo ayon ti'ju' spik'un, ex naqx qlolj ati; qajb'iltoq spik'un, ex toj qlolj nqo b'eta'.¹⁰In qxmaka'n qb'e kse'n moẍ twitz jun tapi, kuxi'xtej mixti' qwitz; tojxi'x wanq'ij q'ij nqo jawa' tz'aq naku'j qonik'an; b'a'nqo' extzun naku'j kyimniqo'.¹¹Qkyaqil nqo ẍch'in kse'n txkup oso, nqo oq' naku'j paloms; nqo ayon ti'ju' kolb'il ex min nul kanun; nqo ayon ti'ju' tzaqpib'l, ex najchaq ta'.¹²Matxi' qb'inchaye' myab'a'n twitza Dyos, axju' qile' inq'mante; nche tzaj qna'ne' qb'inchb'aje' twitza ex qojtzqi'ne' qile' myab'a'n.¹³Matxi' qo oke' pi's ex min nqo b'ine' teya Nman Dyos, min xqaje' tu'n qoklpeye' ti'ja matxi' qmaye' tu'n qb'yon xjale' ex matz'el qpa'nqib'e' ti'ja, makub' qxima'ne' tu'n qsb'u'ne' kyi'j txqantl.¹⁴Min nb'inchanjtztlte' tnik'alilti'j najchaq ta'tlte' tojxi'x tu'me'l, naq njatokpajte' axxi'x kyxol xjal ex mixti'tlte tnik'alilti'j.¹⁵Matxi' kub'najte' ax, ex alkye neltpa'ntib' ti'j taq'wix inkub' alq'a'n.
Myab'a'n sela' toj twitz Qman Dyos tej xtka'yinte min nb'inchanjtz tnik'alilti'j.

¹⁶Jaw lab'ti Qman Dyos tej tka'yinte mix-a'lo'te nonin toju' lu; jawtzun tiq'i'ntib' tu'nx tipumal ex axte kanb'an¹⁷Mab'aj tktxu'ntib' naku'j tu'n kton k'uxb'il, matz'ok toksa'n kolb'il naku'j kutxb'il toj twi' mab'jo'k tu'me'l t-xel tu'n naku'j nok tq'o'n t-xb'alun xjo'w ex tzaj tq'oj b'a'nxi'x.¹⁸Ktq'a' Qman Dyos tu'me'l t-xel teyile junjun kse'nxchaq til; kb'el ttz'e'ysa'n kywitzju' tajq'oj. Ktq'a' tu'me'l t-xel kyeju' nche el ik'onte; exqepe' najlqe' kyoj tnam toj ninnjab'.¹⁹Kykyaqil xjal tzajx tjawetzq'ij ponx tkub'exq'ij, che nimal te Qman Dyos ajkyka'yinte toklen, qu'n tzul kse'n jun tnimal a' lmo'n tu'n jun kyq'iq' nimtipumal.²⁰Tzul tzaqpilte tnam Syon kyuk'ilxi' kykyaqil tyajajil Jakob' aye' qama tz'anjtzti'j kyanmi tu'nju' kyil. Aku' Qman Dyos inq'mante ja'lu.

²¹A ntma'n Qman Dyos ja'lu: Kjel b'entti'j jun nyole' kyuk'i'le' ex kntziya'ye' lay che elwiq'i'ne' wipumale' ex nxnaq'tzb'ile' xinq'o'ne' kyeye' ex kye kyyajajile' tejumajx, chi Dyos. Tajwalil ak'a'j Jerusalen¹We'ktza Jerusalen, qoptz'ajxa, qu'n matxi' tzul spik'un teya ex nqoptz'aju' tajwalil Qman Dyos tib'aja.²Majx jupli qlolj twitz tx'otx', toj qonik'an ta'qe' nimaqtnam, atzu'n tib'aja kqoptz'ajel t-spik'umal Dyos ex ktenb'elju' tajwalil tib'aja.³Che ulju' nimaqtnam toju' t-spik'umala, ex che ul nimaqkawil toj t-spik'umala ntzaj t-xe kya'j.⁴Ka'yinxpe'ya ti'jileya: inkyb'u'yi'n kyib' kykyaqil ex che ul tk'etza. Tzmax najchaq che b'ajtzajela' tk'wala; chle'nqe' tmyala ajkyb'ajtzaj.⁵Okxi'x tzalajela ajkyxi tka'yi'na, okxi'x nojel tanmiya tu'n tzalajb'il; che tzajel q'i'n k'uwenj kyoju' tnam toj ninnjab' teya, che kxe'l q'o'n kyq'inumal nimaqtnam teya.⁶Nim txqan chej kamey che ul tk'etza tzajniqe' toj Madyan ex Epa; che b'ju'l kykyaqil aj Sab'a, iqa'n q'anpwaq ex sturak kyu'n, ex kkyq'a' tqanil tb'inchb'aj Qman Dyos tb'anilqexi'x.⁷Che okyel kykyaqilju' rit toj Kyedar teya; che ajb'elju' rit toj Neb'ayot teya, tu'n kykub' tq'o'na te oyaj tb'anilxi'x tib'aju' q'olb'eb'l twitz Qman Dyos, majx tb'anilxi'x k'elela'ju' tja te k'u'lb'il tu'n.

⁸¿Alkyeqetzu'n nche lipan naku'x muj, naku'j kse'nqe' paloms nchex lik'ik'in toj kyja?⁹B'ark qekye' che ul junx, kyuk'i'l b'ark te Tarsis nejliqe' kywitz txqantl q'i'nqe' tk'wala ẍetzaj najchaq tu'n, tuk'i'l kyq'anpwaq ex kysaqpwaq te ninb'ilte Qman Dyos Xjan janche ajb'ena' aj Israel, ju' okq'onte toklena nimxi'x.¹⁰Najchaq xjalqe' che jawil b'inchantetl nimaqtapi ti'ja, ex che ajb'el kynimaqkawil teya; b'a'nqa kub' tz'e'ysa'n twitza tu'n Dyos tej ttzaj ttx'u'jil ti'ja, atzu'n ja'lo matzajlaqjtk'u'j ti'ja tu'n tk'ujlalil.¹¹Che jqetelju' tjpela kukxju'; lay che jpet q'ijtl ex qonik'an, tu'n kytzaj q'i'n kyq'inumal nimaqtnam teya ex tu'n kyokxju' nimaqkawil kyuk'i'l txqantl tuk'i'la.¹²Qa ati jun tnam min sajb'en teya, kb'el xitj; b'a'ntzun nimaqtnam, majx che b'ajel xitj.

¹³Lu ntma'n Qman Dyos te Jerusalen: Tzulju' q'inumal twi' witz Lib'ano tuk'i'la: e'tze tzaj, tzis ex tu'n tb'entju' njaye' xa'wanku'xi'x, tu'n tajwaletju' jakb'ela' nq'o'n nqane'.¹⁴Che b'ju'l kyk'walju' eb'aj yajlanteya kb'el kyme'ssa'nkyib' twitza, ex kykyaqilju' ntoq che el ik'onteya che b'elmeje twitza ex kkyma' teya: Ninttanam Qman Dyos, Aya Syon te Dyos Xjan kye aj Israel, chechiku' teya.¹⁵Lay kyej kolb'e'ntla, lay kyej ik'o'na ex lay kyeja tjunala, k'okyela tb'anilxi'x tejumajx wu'ne', ktenb'el tzalajb'il toja tejumajx.¹⁶Kxel kyq'o'n nimaqtnam tb'anil wab'j teya ex ktzajel kyiq'i'n nimaqkawil kyq'inumal teya; k'eleltzun tnik'tza qa ayine' Dyos Manb'aj klolteya, qa ayine' Nim Wipumale' ja ajb'ena' Jakob', tzaqpilteya.

¹⁷Q'anpwaq kxe'l nq'o'ne' teya te t-xel q'ank'uxb'il, ex saqpwaq te t-xel k'uxb'il, ex q'ank'uxb'il te t-xel tze, ex k'uxb'il te t-xel ab'j. Kb'incha'ye' tu'n tkawin nak'b'il teya ex tu'n txi' iq'i'na tu'n ttzinunal.¹⁸Lay b'injtz jumajtl q'oj kyxol xjal toju' ttx'otx'a ex lay tzajtl xitb'il toju' tx'otx' tzyu'n tu'na, okpe' k'okyel tq'o'na tb'i nimaqtapi ti'ja Kolb'il exqe' tjpela k'okyel tq'o'na kyb'i ajwalb'il.

¹⁹Min nojqelantl tu'n ttzaj k'ant q'ij ti'ja te q'ijtl, ex tu'nwt ttzaj k'ant xjaw ti'ja te q'onik'an, qu'n ayine' Dyos Manb'aj chin okyel te t-spik'umala tejumajx; ayine' Dyos Manb'aj, chin qoptz'ajele' ti'ja.²⁰Lay kub' yupju' q'ij exju' xjaw teya, qu'n ayine' Dyos Manb'aj, chin okyel te t-spik'umala tejumajx; kb'ajel kytxa'nju' tq'ijlalil tb'isa.

²¹Che okyel kykyaqilju' xjal toja te b'a'nxjal, che okyel tajawju' tx'otx' tejumajx, ikyqe' kse'n t-xul junwi' awal ku'x wawa'ne', taq'unb'en nq'ob' qe'ye' tu'n nyek'unteye' wajwalile'.²²Che chmetelkye' jun tzb'ojtl xjal lu toj mutx'chaq; che chmetelkye' tal naqjte'x kyb'aj lu te jun nintnam. Knb'incha'ye' ayine' Dyos Manb'aj tu'n tb'ant lwiy, tojxi'x tq'ijlalil, chi Dyos. Tqanil kolb'ilkye aj Israel¹Ati T-xew Qman Dyos wuk'i'le', machin eltpa'ne' Dyos tu'n wajb'ene' te; machin tzaj tchq'o'ne' q'olte b'a'n tpakb'al kye prow, q'uqb'alte kyk'u'ju' nche oq', q'olte tqanil tzaqpib'l kyeju' jpu'nqe', tzaqpib'l kyeju' ate'kx toj kars.²q'malte tqanilju' tq'ijlalil b'a'n tb'is tk'u'j Dyos aju' tq'ijlalil ajtok t-xel kye qajq'oj tu'n Qman Dyos Machin tzaj tchq'o'ne' q'uqb'alte kyk'u'ju' nche b'isun,³q'olte kyoklenju' najlqe' toj Syon te t-xel b'is tu'n tok kyk'ok'sb'il te kytzalajb'il te t-xel oq'e'n, tu'n kyb'itzan b'itz te t-xel b'is. K'okyel tq'o'n kyb'i K'ol nche kanb'an, awa'nqe' tu'n Qman Dyos tu'n tyek'u'nte tajwalil.

⁴Che jawil b'inchetlu' ojtxi' xitjniqe', che jawil b'inchetju' ja ojtxi'tl xitjniqe', ex che b'incheteltlju' nimaqtnam xitjniqe'.⁵Che okyel kyq'o'ne' najchaq xjal xq'uqilkyeju' kyalu'ne', kytx'otx'e' ex kyawale'.⁶Ex k'okyel q'o'n kyb'iye' te tpale Dyos te tmajin Qman Dyos. Kkynik'b'eye' kyq'inumal txqantl nimaqtnam ex che okyelju' kyajwalil wiqb'ilkyeye'⁷Matxina' che yajtiye' ntanam ma'xi'x b'je'l kych'ixawe' ex mache ok i'li'ne', qu'mtzun kyk'ma'ye' txqan q'inumal toju' kytx'otx'e' ex che tzalajele' tejumajx.

⁸Qu'n nxi'x tzalaj Qman Dyos ti'ju' tnik'alilti'j, ex ineltik'u'n elq'a'n ex b'yojxjali'n. Ktzajel tq'o'n b'a'n tu'me'l t-xel kyeye' ex kjel b'entti'j jun tyol tejumajx kyeye'.⁹Che okyelju' kyyajajile' nim kyoklen kyxol nimaqtnam. k'elelkynik' kykyaqilju' mache okka'yinkye qa jun tnamqe' ky'i'wla'ntl tu'n Qman Dyos.

¹⁰¡Inxi'x chin tzalaje' ti'j Qman Dyos! Majx machin tzalaje' ti'j Qman Dyos, qu'n machin tkole', ¡machin kanb'ane' tu'n! ikyqinju'ye' kse'n jun q'a xi' tmje tokx koron toj twi' ikyqine' kse'n jun txin xi' tmje mab'aj tb'incha'ntib' ex ate'k tu.¹¹Qu'n kse'n nche tzaj ch'iy awal toj tx'otx' ex kse'n nche tzaj kyxul toj awal, ikytzu'n ktb'incha' Qman Dyos kanb'ab'l ex tu'n kyb'itzan kykyaqil nimaqtnam b'itz te tzalajb'il.¹Lay chin kyej numeye', tu'n nk'u'jlalile' ti'ja Syon, lay chin kub' qeye', tu'n nk'u'jlalile' ti'ja Jerusalen tzmax ajtul kykanb'ab'le' kse'n ajqsqix ex ajtul kolb'ilkyeye' kse'n jun ttxa'n tzaj nk'ant.²Kyka'yi' nimaqtnam ajkyklete', kyka'yi' kykyaqil nimaqkawil kyajwalile'. K'okyeltzun q'o'n jun kyb'iye' ak'a'j aku' Qman Dyos k'okyel q'onte.³Che okyele' te tb'anil tkoron nimaqkawil toj tq'ob' Qman Dyos.⁴Lay q'manjtztl ti'ja: Kyejni leb'a'n chiwt, ex lay q'manjtztl ti'ju' ttx'otx'a: xitjni, atl kq'manjtzelju' ti'ja: Tnam majx nkub' toj nwitze', ex kq'manjtzel ti'ju' ttx'otx'a, Nxu'jile'. Qu'n aju'ya inxi'x kub' toj twitz Qman Dyos. atzunte k'okyel kse'n chmilb'aj teju' ttx'otx'a.⁵Qu'n kse'n ajtmje jun q'a tuk'i'lju' txin nt-xmoxo'n, ikytzu'n kk'monjtzela tu'n Dyos te t-xu'jil, kjawil b'incha'ntla tu'n ex ktzalajel tuk'i'la, kse'n ttzalajb'il chmilb'aj ti'j t-xu'jil.⁶Jerusalen, mache kub' nq'o'ne' xq'uqil kyib'aju' nimaqtapi ti'ja kkyma'n kukxju' q'ijtl ex qonik'an: Lan che kub'numeye' aye'ye' nche k'ulune' te Qman Dyos,⁷lalun kyaje' tu'n tkub' qe tzmax ajtjaw tb'incha'ntlju' Jerusalen ex ajtb'inchante tu'n tajwalinjtz kyu'n kykyaqil xjal, chechi.

⁸Oje tma Qman Dyos tu'n ttzaj tq'o'n tb'anq'ob' nimtipumal kjalu: Lay wajtle' tu'n kywante tajq'oja ttriya ex tu'n lan txikyk'wa'n najchaq xjal b'in taq'unb'en tq'ob'a;⁹aye'xkye' che jawil b'uyinte kyawale', che wale' ti'j ex chin jawil kyajwali'ne'; kjawil kyb'u'yi'ne' ub'a ex che k'wal b'ine' kyoj tpen njaye' xjan, chi Dyos.

¹⁰kukyetze', kukyetze' kyoj ttzija, kyb'inchame' tb'e ntaname'. Chab'a kyb'inchame' nim b'e kyẍtilsame'n kyiq'imile' ab'j toj; kyq'onktze' techal txokb'ilkye nimaqtnam.¹¹Intma'n Qman Dyos tpakb'alil tzmax japomna' b'aj twitz tx'otx' kjalu: Kymanxe' te nintnam Syon qa matxi' tzulju' klolte. Che tzajel tiq'i'n Qman Dyos ttanam matxitoq che tzaqpet tu'n chij.¹²Kq'manjtzel kyi'j aj Israel kjalu: Aju' xjan tnam, Aye' tzaqpi'nqe'tl tu'n Qman Dyos, ex kq'manjtzel ti'j Jerusalen kjalu: A achb'ajilxi'xju' nintnam, aju' nintnam mya kyejni leb'a'n. Inttz'e'ysa'n Qman Dyos kywitz tajq'oj¹—¿Alkyetzu'n na'j saj B'osra, tanmi tnam Edom, tok t-xb'alun chmo'n tk'ikyaq, tzul nxi'x qoptz'aj t-xb'alun ojqeltel b'a'nxi'x?
—Ayinweju'ye', in nma'ne' tpakb'alil kanb'ab'l ex nim wipumale' tu'n nkolone'.

²—¿Tiqu'ntzun kyaq ka'yin t-xb'aluna, kuxi'xtej matxi' b'ajb'eta tib'aj ub'a?

³—Ikju', machin b'ete' njunale' tib'aj ub'a, mix-a'lo'te sonin weye'; macheb'aj nwab'e'ne' wajq'oje toj ntx'u'jile' macheb'aj nwab'e'ne' tuk'i'l nq'oje, mab'jo'k txatju' kych'k'el tiju' nxb'alune' ex mab'ajtxa'j tkyaqilju' wi'je' toj.⁴Makub' nxima'ne' qa jun q'ij knb'incha'ye' tnik'alilti'j matxitoq pon q'ij tu'n kytzaqpetju' ntaname'.⁵Tzaj nka'yi'ne' ex mix-a'lo'toq onilweye'; majx njaw lab'tiye' tu'n mix-a'lo' onilweye'. Machin kanb'ane' tu'n nq'ob'e' maten wipumale' tu'n ntx'u'jile'.⁶tuk'i'l ntx'u'jile' eb'ajkub' nb'lo'ne' nimaqtnam, eb'ajkub' nxitu'ne' tu'n nq'oje mab'aj qojli kychk'el wu'ne' twitz tx'otx'. T-xtalb'il Dyos kye aj Israel⁷Wajb'ile' tu'n nyoline' ti'j tk'ujlalil Qman Dyos, tu'n kyxi' nb'itza'ne' ajwalb'ilte tu'n tkyaqilju' matxi' tb'incha qe, tu'nju' t-xtalb'il nimxi'x kye aj Israel, ti'nju' matxi' tb'incha tu'n t-xtalb'il ex tu'n nimxi'x tk'u'jlalil.⁸Tmate Dyos kjalu: Ntanam qe'weju'ye', e' nk'wale' lay che jawmiltz'uj wi'je', chij. Ex mache tkol,⁹toj tkyaqilju' kyb'is. mya juntl saj tchq'o'n xklonkye; aku'te Qman Dyos saj. Mache ttzaqpi tu'n tk'ujlalil ex tu'n tlaqb'il tk'u'j. mache jawtiq'i'n, mache jaw tchle'n. Ikytzun matxi' tb'inchaju' kukxu'.¹⁰Aye'tzunkye mache ok pi's te Qman Dyos ex matz'ok kyq'o'n ttx'u'jilju'; qu'mtzun sok te kyajq'oj ex matzaj tq'o'n q'oj kyi'j.¹¹Tzaj kyna'ju' tq'ijlalil ojtxi', tej tten Moyses tzaqpinkye ttanam, ex nche xjelun kjalu: ¿Jatzunta' Dyos klonte Moyses toj nin a' Nilo ju' k'ik'lel kyi'ju' ttanam? ¿Jata'ju' tzaj q'onte t-xew xjan te Moyses?,¹²aju' b'inchante tu'n ttenju' tipumal tb'anilxi'x tuk'i'l Moyses, aju' xi' aq'punte ninnjab' kyeju' ttanam tu'n tten jun tpakb'alil ti'j tejumajx,¹³aju' ik'xq'inkye t-xe ninnjab' ex min e'jaw ẍjilj, kse'nqe' chej nche b'et toj chq'ajlaj,¹⁴ex kse'nqe' wakx ajkyku'tz toj plan tx'otx', ¿chechij. Aku'te t-xew Qman Dyos ẍaqlulkye. Ikytzu'n xa't-ẍaqlu'n ttanam ex mab'injtz tpakb'alil ex tajwalil. Na'j Dyos qanb'il tonb'il Dyos¹⁵Nman Dyos, ka'yintza tzmax toj kya'j, tzmax toju' najb'il xjan ex tb'anil ja najla'ya. ¿Jatzunta' tk'u'jlalila nimxi'x ex tipumala? ¿Tzunju' ntna'ntoqa qi'je'? ¿Mamixtzunti'tl tlaq'b'il tk'u'ja qi'je'?¹⁶¡Ateju'ya qmane'! B'a'nqa minqo oktq'o'ne' Ab'raam te tk'wal, ex b'a'nqa minqotzaj tna'ne' Israel, ateju'ya qmane', Nman Dyos; ateju'ya tzaqpilqeye' kukxju'.¹⁷¿Tiqu'ntzun ntjo'na'ya, Nman Dyos, tu'n qel txalpuje' ti'ju' tb'eya? ex tch'uẍsa'na qanmiye' tu'n lanlun qonimane' teya? Miltz'untztl twitza qeye' tu'n tk'u'jlalila qi'je' ajb'el qo'ye' teya ex kyi'ju' tnej qyajajile' etza'n tu'na.¹⁸¡Naq ch'i'ntoj o'okye' tajawju' tx'otx'! Makub' kyaju'n qajq'oje' tjaya te k'u'lb'il.¹⁹Maqokyaje' naku'j b'ajx kawina' qib'aje', kuxi'xtej b'ajx qiqaya'ju'ye' tb'iya.¹Naqwit txitlaqu'na kya'j ex tu'n tku'tza tu'n kylu'lunju' witz teya ajtula,²kse'n ajkyb'aj tz'e'yju' ch'i'x tu'n q'aq' mujqa kse'n ajtloqlon a' tu'n. K'eleltzun kynik'ju' tajq'oja ti'ju' tb'iya ex che lu'lulju' nimaqtnam twitza.³Tej tb'inchanteya ti'xti' xob'ajilqe'x naqmix qnab'ene', tej tku'tza, eb'aj lu'lunju' witz teya.⁴B'ajx b'injtza' ex b'ajx tz'ilwa'xi'tl qa atiwt juntl dyos ti'jxi'ya inwt che tb'incha'n ti'xti' lu o'nb'il kyeju' q'uqlok kyk'u'j ti'j.⁵Intk'mo'n teju'ya nb'inchante b'a'n tuk'i'l tzalajb'il ex ntzajtna'n tu'n tb'inchanteju' tajb'ila.
Matzaj ttx'u'jila qu'n mana' qo b'inchan ile'; matxi b'et q'ij nokqq'o'ne' ttx'u'jila.⁶Qkyaqile' ikyqo'ye' kse'n xjal tz'il; tkyaqilju' qaq'unb'ene' b'a'n ikyqe' kse'n ẍb'u'y tz'il; qkyaqile' xqo okye' kse'n t-xaq tze nb'je'l tz'aq, ex nqo'x kyiqa'ne' b'yojxjali'n eqb'inchaye' naku'j tu'n kyq'iq'.⁷Mix-a'lo'tlte nxina'nteya ex mix-a'lo'tl noktq'o'ntilil tu'n tqe tk'u'j ti'ja; qu'mtzun makub' tewa'ntib'a qeye' ex maqo kyej tq'o'na tu'n kypaju' qb'inchb'aje' myab'a'n.

⁸Tu'npetzunju' aya qmane', Nman Dyos; tx'otx' qo'qe', ateju'ya b'inchal k'wil; ¡aya kub'inchanqeye' qkyaqile'!⁹Nman Dyos, lalun q'ojinxi'xa qi'je' ex lalun tzaj tna'ntla qb'yoj xjali'ne'. ¡O'ttanam qo'na'ya!¹⁰matxi' che kyej chq'ajlajixu' xjan nimaqttanama naq tik'lentlju' Jerusalen kub'ni xitj.¹¹Kub' xitju' najb'il xjan tb'anilxi'xtoq tu'n q'aq' janajwalinjtza'toqa kyu'n ojtxi' qchmane'. ¡Tkyaqilju' nxi'xtoq qo tzalaje' ti'j, xitjniqe'tl!¹²¿Mixtzunti'x ktb'incha'ya tu'n tkyaqil ja'lu, Nman Dyos? ¿Mamixti'xte ktma'ya tu'n ex maqob'el tme'ssa'n xi'xtla tejumajx? B'ajsab'l Kyeju' B'inchal Myab'a'n¹Intma'n Qman Dyos kjalu: Aye'ju' mixti'xi'te tzajkyqani'n weye' ẍe kub'san nwitze'; machin jyete' kyu'nju' b'ajx chin kyjoya'xi'ye' nejtl. Te jun tnam b'ajx kub'sana' nwitze' xxanma'ne' kjalu: Luqine' lu nchije'.²B'aj q'ij wu'ne' xinq'o'n nq'ob'e' tu'n ttzaj wiq'i'ne' jun tnam pi's ljo'ntoq tb'e, myab'a'n axnxitiq'i'nju' tnab'l myab'a'n;³jun tnam nwitzku'xi'xe' in oka'toq tq'o'n ntx'u'jile' kukxju'; intoq kub' tq'o'n chojb'il kye witzleb' kyoj awal ex intoq kub' ttz'e'ysa'n sturak kyib'aj q'olb'eb'l tzq'ajsa'n loq';⁴intoq kub' qe kyxol muqb'il ex nb'aj qonik'an tu'n kyoj e'wb'il intoq ch'yon tchib'jil b'och nojni tk'wil tu'n ta'l chib'j tzu'wtl.⁵Intma'n kjalu: Axtzun tenkja'ya na'tz, lalun chin tzaj tyeku'na; qu'n xjanqinxi'xwe', chij. Ikyqe'kye xjalju' lu kse'n q'aq' nk'ant nb'aj q'ij; in okkyq'o'n ntx'u'jile' naku'j sib' toj qwitz.⁶Tkyaqiltzunte' lu tz'ib'a'ntl nwitze', ex lay naqwit kb'el nchle'n nq'ob'e'; k'okyel nq'o'ne' tu'me'l t-xel kye,⁷tu'n tpaju' b'yojxjali'n xkyb'incha ex xb'aj kyb'incha'n kyman. E'b'aj tz'e'ysan sturak kywi' witz ex b'jo'k kyq'o'n ntx'u'jile' kywi'witz. Nejtl che okyel toj xjel wu'ne' kkychja'tzuntz toj kyil, chij. Aku' Qman Dyos q'mante. Ttziya Qman Dyos tu'n ttzaj tq'o'n k'i'wb'il⁸Intma'n Qman Dyos kjalu: Qa nim ta'l ub'a ati min nkub' kytxa'ju'nkye xjal, qu'n nim b'in inel toj. Ikytzunwe' knb'incha' tu'n nk'u'jlalile' kyi'ju' nmajine'; lay kub' nxitu'ne' tkyaqilju' nintnam.⁹Knb'incha'ye' tu'n kychmet tyajajil Jakob' ex tu'n kyten xjal aj Juda najal kywi'witz weye'. Aye' sk'o'nqe' wu'ne' che tzyulteju' tx'otx', che najalju' ajb'el weye' twitz.¹⁰Nim txqan tritju' njyon wi'je' che tenb'el toju' b'ya' Saron ex che wal kywakyix toju' b'ya' Akor.¹¹Aye'tzunkye' nelkypa'n kyib'e' wi'je' ex nik'tna'lju' witz xjan weye' kyu'ne', nkub' kyq'o'ne' wab'j ex b'in kywitz Kad ex Meri, aye' witzleb' janche qanina' xjal kyswert,¹²myab'a'n tzul kyeye': che kb'el b'yo'ne' tu'n k'uẍtx'e'nb'il. Qu'n e'ntxokye' ex min ntzaj kytzaq'we'ne'; nyoline' kyeye' ex min nkub' kyb'i'ne'; xikyb'incha'ne' min nkub' toj nwitze', a jawkysk'o'nju'ye' nel wik'u'ne'.

¹³Tu'ntzunju' nxinma'ne' kyeye': Ktenb'el kywaju' nche ajb'en weye', aye'tzunkye' che okyele' twitz we'yaj; ktenb'el kyk'wa'ju' ajb'el weye', aye'tzunkye' che najele' tu'n k'waj; che tzalajelju' ajb'el weye', aye'tzunkye' k'elel kych'ixawe';¹⁴che b'itzalju' ajb'el weye' tu'nju' tzalajb'il ati toj kyanmi, aye'tzunkye' che ẍch'ile' ex che oq'ele' tu'n b'is ex yajb'il nik'xkyu'ne'.¹⁵K'ajb'elju' kyb'iye' kyu'n sk'o'nqe' wu'ne' tu'n ttzajkytxko'n taq'wix ex kamik kyi'j txqantl xjal, aye'tzunwe' nmajin knch'exb'eye' kyb'i.¹⁶Alkyexku' xjal toju' tnam lu matqani jun k'i'wb'il, ktzajel tqani'n weye' ayine' Dyos njapun nyole'; ex alkyexku' xjal toju' tnam lu matma jun tyol tu'n tjapun tu'n, ktma' toj nb'iye' ayine' Dyos njapun nyole'. Mab'jik'tna'lju' yajb'il e'tena' ojtxi', lay tz'ok nka'yi'n jumajtle' yajb'ilkye.

¹⁷Kyka'yintzpe'ye', kb'el nb'incha'ne' jun ak'a'j kya'j ex jun ak'a'j tx'otx'. K'ik'el tna'lte' matxi' b'ajik', mix-a'lo'tlte ktzajel na'nte.¹⁸Che tzalajxe' tejumajx tu'nju' kb'el nb'incha'ne', qu'n knb'incha'ye' jun Jerusalen tzalajb'il ktenb'ela' ex knajal jun tnam tuk'i'l tzalajb'il toj.¹⁹Kchin tzalajelku'we' ti'j Jerusalen ex knna'we' tzalajb'il ti'ju' ntaname'. Lay b'injtz jumajtl oq'e'n toj ex lay b'injtztl sich' tu'n b'is.²⁰Mixti'tlte k'wal okwit kyimel b'o'sx, ex mixti'tlte tijwnaq laywit japun tchwinqlal. Ku'xunte' qama kyim ajtel jo'naq ab'q'i, qatzun min xjapun toj jo'naq ab'q'i, qani'n myab'a'n tib'aj.²¹Kjawil kyb'incha'n xjal kyja ex che najal kyoj, k'okyel kyawa'n tqan ky-ub'a ex che wal ti'j.²²Mya junwt kjawil b'inchante ja ex junxi'tlwit knajal toj, mujqa junwt k'awal ex junxi'tlwit kwal ti'j. Ktenb'el tchwinqlalju' ntaname' nimtoj kse'n junwi' tze, kche walju' ntaname' ti'ju' kyaq'unb'en²³Lay kub'najte' kyaqunb'en ex lay che kyim kyk'wal qa na'mxtoq tb'aj kychwinqlal, qu'n aye' kyyajajilju' oje che tk'i'wla Qman Dyos, ex ikyche tenb'ela'ju' kyyajajil che ul yajxi'tl.²⁴Na'mtoqpe' kytzaj yolin weye', chin xe'l tzaq'wiye' kye che b'elnb'i'ne', na'mxtoq kyb'aj yolin.²⁵Che walju' xo'j junx kyuk'i'l qpoj tman rit, kwal k'ulju' b'alun kse'n wakx, atzu'n kan kwal tx'otx'. Mix-a'lo'te jun kb'incha; taq'wix te juntl twi' witz xjan weye', chi Dyos. Ik'b'ilte k'u'lb'il mya Ax¹Intma'n Qman Dyos: A nq'uqb'ilju'ye' kya'j atzu'n tx'otx' kykub'el nqane'. ¿Jatzun kb'entela' tjaw kyb'incha'ne' jun njaye'? ¿Jatzun kb'entela' tkub' kyb'incha'n jun najb'ile' jatu'n wojlana'ye'?²¡Ayinku'ye' nb'inchante tkyaqilju' ti'xti' lu, ikytzu'n tzyeta' kyten! Ayine' Dyos Manb'aj nchin q'mante.
Aweju'ye' xjal noknka'yi'n aju' prow nnanjtzti'j tanmi intnima'n nyole'.³Ate'tzunkye xjal nkub' kyq'o'n jun tman wakx te chojb'il, ex nkub' kyb'yo'n jun xjal; nokx kyxyu'n tqul jun rit ex nel kytoqi'n twi' jun tx'yan; nkub' kyq'o'n kyoyaj twitz awal k'ok'e'kywitz ex nkub' kyqo'n tchk'el b'och; nkub' kytz'e'ysa'n sturak, ex nche k'ulun te jun witzleb'. Aye' e'sk'onte kyb'e lu inxi'x kub' toj kywitz, tu'n kyb'inchante tkyaqil ja'lu.⁴Ikxwe' knsk'a'ye' yajb'ilkye, ktzajel nq'o'ne' nxi'x che xob' te kyib'aj. Qu'n e'tzaj ntxko'ne' ex mix-a'lo' tzaj tzaq'wi, nyoline' kye ex mix-a'lo' kub'inte; xikyb'incha'nju' min nkub' toj nwitze', a jawkysk'o'nju' nnel wik'o'ne', chi Dyos. Tz'e'ysb'il witzb'aj ex tzaqpib'l⁵Kyb'inku'ye' tyol Qman Dyos, aye'ye' nkynima'ne' tyol, kjalu: Ate' junjun kywnaqile', aye' nche ik'onkyeye', ljo'n toj kyq'ije' kyu'n tu'nju' nche k'ulune' weye', inkyma'n kjalu: Yek'umtzun Qman Dyos tajwalil; qajb'ile' tu'n qka'yinteye' nche tzalaje', chechij. Naqtzun che b'el ch'ixwitl.⁶Ate' inxi'x jukin ntzaj toju' nintnam, aju' tq'ojq'ojil ntzaj toju' ja te k'u'lb'il, tq'ojq'ojil twi' Qman Dyos te' ajttz'e'ysante kywitzju' tajq'oj toj kyil.

⁷Itz'ji tal Syon toj junkmuj na'mxtoq ttzyet tch'yon taq'lenal.⁸¿Alkye oje b'inte kse'n lu? ¿Alkye oje lonte kse'n ja'lu? ¿Ma jawb'ent jun nintnam toj jun q'ijx? ¿Ma naq toj jun kmujx jawa' b'ent jun tnam? Atzunte Syon tej ttzyet tna'nte k'ixk'oj lwiyxi'x e'itz'ji tal.⁹¿Se'n taq'witzun ajnmqonte toqwe' tu'n lalun che itz'ji, extzun wu'ne' nche itz'ja'?, chij. Aku' Qman Dyos inq'mante.

¹⁰Che tzalajxe' tuk'i'l Jerusalen, che tzalajxe' tuk'i'l, kykyaqile' nkyk'u'jla'ne', kymujb'am kyib'e' toju' ttzalajb'il kykyaqile' matxi' che oq'e' ti'j.¹¹Ex ktq'uqb'a' kyk'u'je' kse'n jun txub'aj tzmax ajkykyaj tzalaje' tu'n¹²Qu'n ayine' Dyos Manb'aj nchin yolin. Knb'incha'ye' tu'n tul nak'b'il te kse'n jun nin a', ex kyq'inumal nimaqtnam kse'n jun tnimal a' nxi'x piq'chaj. Che k'a'chanjtzele' tu'n, che kxel tchle'ne' toj tq'ob' ex che b'ajel tz'u'li'ne' tu'n kyib'aj tqan.¹³Oknq'uqb'a'ye' kyk'u'je' kse'n ntq'uqb'a'n jun txub'aj kyk'u'ju' tal, ex kqeb'el kyk'u'je' toj Jerusalen.

¹⁴Che tzalajele' ajkyka'yinteju'ye' lu, che tzalajel junmajtl kyxmilale' kse'n itzaj Ktyek'u'te Qman Dyos tipumal kyxolu' tmajin Exju' tq'oj kyi'ju' tajq'oj.¹⁵Qu'n toj q'aq' tzula' Qman Dyos, naku'j xkyeqchanpach kykarwaj, majx ktzajel tb'ajsa'n tk'ayil ttx'u'jil ex naku'j q'aq' tz'e'ysb'il witzb'aj tzultq'o'n.¹⁶Che okyel tq'o'n Qman Dyos kykyaqil xjal toj xjel tuk'i'l q'aq', kb'el ttz'e'ysa'n kywitz kykyaqil xjal tu'n tk'uẍtx'e'nb'il ex nim che kb'el tb'yo'n.

¹⁷Intma'n Qman Dyos kjalu: Aye'kye' nkyxjansa'nkyib' ex nkyẍtilsa'nkyib' tu'n kyok toj k'u'lb'il kye witzleb' kyoj awal lepchqe'x ti'ju' jun nb'et kyxol, aye' nche ch'yon kychib'jil b'och ex ich' mujqa kychib'jil txqantl txkup majx che b'elnajset tejumajx, qu'n wojtzqi'ne' kyb'inchb'aj ex kyxinb'e'tz.
Chin ultzuntze' ayinku'ye' b'uyilkye kykyaqilju' tnam ex nimaqtnam, che ultzuntz ex kyka'yi' wajwalile'.¹⁹Kxe'l nq'o'n jun techlale' knq'a'ye' anb'il tu'n kytzaqpaj junjun ex che kxe'lnchq'o'ne' kyoju' nimaqtnam: toj Tarsis, toj Lib'ya, toj Lidya, aju' tx'otx' ja b'a'n che smajin xjal, toj Tub'al, toj Kresya ex kyoju' tx'otx' najchaq toj ninnjab', aye' b'ajx kyb'iya' jun pakb'ab'l wi'je' ex b'ajx kyila' wajwalile'; aye'tzun che kxelq'mante wajwalilju'ye' kyxol nimaqtnam.²⁰Che ul kykyaqilju' kywnaqile' kyu'n che b'ajtzajel kyoj kykyaqil nimaqtnam, kyi'j b'anchej, kyoj karwaj, kyi'j literas, kyi'j chej mul, ex kyi'j kamey. Che ul te jun oyaj weye' toj Jerusalen, ju' witz xjan weye', kse'nqe' oyaj nche tzaj kyiq'i'n aj Israel kyoj b'itidor ẍnu'l toju' njaye' te k'u'lb'il. Ayine' Dyos Manb'aj matxi' chin q'mante.

²¹Che jawil nsk'o'ne' junjun kyxol tu'n kyok te pale ex onilkye pale. Ayine' Dyos Manb'aj matxi' chin q'mante.

²²Ex intma'n Qman Dyos kjalu: Kse'n ak'a'j kya'j ex ak'a'j tx'otx' kb'el nb'incha'ne' che tenb'el tejumajx, ex ikx che tenb'elju' tyajajila exju' tb'iya tejumajx.²³ex atl junjun xjaw toju' q'ij ak'a'j xjaw, ex atl junjun sman toju' q'ij te ojlab'l, kykyaqil ichan che ul kub'sal tziplqe' nwitze'. Ayine' Dyos Manb'aj matxi' chin q'mante.

²⁴Che b'ju'l ex che kyla' woqo'j qe'tlju' kyimni tu'n tpaj b'ajkub' kypi'sa'n kyib' nwitze'. Lay che kyimju' ẍchuq' che ch'yolkye, ex lay yupju' q'aq' ntz'e'ysankye. ¡Iky'b'ilxi'x che elela' kye kykyaqil xjal!, chi Dyos.

Bible Society in Guatemala

https://app.library.bible/content/aea9d9099feb3a24