Read Jeremías 1

Jeremías1

Ch'i'n chik'b'ab'l

¹Aye' tyol ex tb'inchb'en Jeremiy ja'lu, tk'wal Ilkyiy. Tzajni Jeremiy kyxol kyyajajil pale najlqe'toq toju' tnam Anatot, toju' tnej kytx'otx' tyajajil B'enjamin.²Tzaj yolin Qman Dyos te Jeremiy tej ljo'ntoq oxlajoj (13) ab'q'i nkawin Josiy, tk'wal Amon, toj Juda.³Ex tzaj yolin Qman Dyos te, toju' tq'ijlalil ntoq kawin Joakyim, tk'wal Josiy toj Juda, tzmax tjapun junlajoj (11) ab'q'i nkawin Sedekyiy nimaqkawil toj Juda, toj tjwe'yi'n xjaw teju' ab'q'i lu, tej kyxiq'i'n xjal aj Jerusalen toj juntl tnam. Txokli Jeremiy tu'n Qman Dyos

⁴Tzaj yolin Qman Dyos weye' ex tma:

⁵Sk'o'ntla wu'ne' na'mxtoq tok iqa'n twi'ya tu'n ttxuya; na'mxtoq titz'jiya, matxi'toq tz'el npa'na; xima'ntltoq wu'ne' tu'n toka te nsanjelale' kyxol nimaqtnam. Chij.

⁶Ayintzunwe' xintzaq'we'ne': ¡Nman Dyos! ¡Tzmana' ku'xunqinwe' ex min nb'ent nyoline'! Nchije' te.

⁷Atzunte Qman Dyos tzaj tma'n: Lalun tmaya qa tzma ku'xuna. Kxe'lta ja matxa' nchq'o'na, ex kxe'l tma'na knchaq'e' teya.⁸Mix-a'loqe tu'n t-xob'a'ya, kna' chin tenb'ilwe' tuk'i'la klolteya. Ayine' Dyos Manb'aj nchin q'mante. Chij.

⁹Tzajtzun tnuqpi'n Qman Dyos tq'ob', okttzyu'n ntziye' ex tma weye':¹⁰Che kb'el nq'o'ne' nyole' toj ttziya. Kxe'l nq'o'ne' toklena ja'loxi'x kyib'aj kawb'il ex nimaqtnam, tu'n t-xb'oqinteya ex tu'n tik' t-xona, tu'n tkub' ttx'u'yi'na ex tu'n tb'aj t-xitu'na, ex ikx tu'n tjaw tb'incha'na ex tu'n tkux tawa'na. Chij.

¹¹Tzaj yolin Qman Dyos weye' ex tma: Jeremiy, ¿Titi' nxitka'yina? Chij. Jun tq'ob' tze almendro nchije' te.¹²Iku', ax tyola. Qu'n chin xq'uqile' tib'aju' nyole' tu'n tjapun. Chi Qman Dyos.

¹³Tzaj tma'ntl Qman Dyos weye' tkamaji'n: ¿Titi' inxi' tka'yi'na? Chij Jun k'wil nxi'x loqlon, xi' ttzaj qomtz'aj tzmax toj tb'a'nq'ob'kya'j. Nchije' te.

¹⁴Tzajtzun tma'n Qman Dyos weye': Tzmax ktzajela'ju' taq'wixil toj tb'a'nq'ob'kya'j kyib'aj kykyaqilju' najlqe' toju' tx'otx' lu.¹⁵Axxi'x, ayine' Dyos Mab'aj che tzajel ntxko'ne' kykyaqilju' kawb'il te toj tb'a'nq'ob'kya'j. Che ulju' kynimaqkawil che b'elkyq'o'n kyq'uqb'il te kawb'il ttziku' Jerusalen, twitz tkyaqilju' nintapi ti'jile ex kywitz tkyaqil nimaqtnam toj Juda.

¹⁶A tz'e'ysb'il witzb'aju' knchaq'e' kyi'ju' aj il lu machin kyej kykolb'ine', makub' kytz'e'ysa'n sturak ex mache k'ulun kye junxi'tl dyos aye'x e'kub' b'inchankye.¹⁷Atzunta kuwsam tib'a; kutxi'ya q'malte kye tkyaqilju' knchaq'e' teya. Lalun xob'a kye, qu'n qatzun min klu'lula wu'ne' kywitz.¹⁸Texju' q'ij ja'lo kb'el nq'o'na naku'j nintnam kuwsa'n, naku'j tqan ja k'uxb'il, naku'j nintapi q'anku'xb'il, tu'ntzun tokwe'ya kywitz kykyaqil xjal toju' tx'otx' Juda: kwitzju' kynimaqkawil, e'nejenel, e'pale ex kywitz kykyaqilju' xjal.

¹⁹Kjawil kyi'nkyib' ti'ja ex lay kub'ti'ja kyu'n qu'n chin tenb'ilwe' tuk'i'la klolteya. Ayine' Dyos Manb'aj nchin q'mante. Chi Qman Dyos. Min njapunju' tyol Dyos kyu'n aj Israel

¹Tzaj yolin Qman Dyos weye' ex tma':

²Kutxi'ya ex q'manxa toju' nintnam Jerusalen; ẍch'inxa kye tu'n kyb'inte b'a'nxi'x kjalu: ¡Lu ntma'n Qman Dyos! Na'n wu'ne' tej intoq nxmoxo'na, intoq nimana weye', tej tok nq'o'na te nxu'jile', intoq chin tk'u'jla'na tzaj lpeya wi'je' toj chq'ajlaj, toju' tx'otx' min njaw tawal.

³Xjansa'nqe'toq aj Israel nwitze', atoqte tb'anilxi'x twitz wawalju'ye'.
Qa atitoq jun naq'pon tq'ob' ti'j, intoq kub' ntz'e'ysa'ne' twitz intoq tzaj nq'o'ne' yajb'il tib'aj. Ayine' Dyos Manb'aj nchin q'mante, chiku'ya kye, chi Dyos.

⁴Kyb'intze' tyol Qman Dyos, tyajajil Jakob', kykyaqile' toj tja Israel.⁵Lu ntma'n Qman Dyos kyeye':
¿Titi' myab'a'n elyal wi'je' kyu'n ojtxi' kyyajilb'ene', tu'n elkypa'n kyib' wi'je'? Eb'ajx lpe kyi'j dyos mixti'x kyajb'en, ex aye'ku' e'ok mixti'x kyajb'en.⁶Min b'ajx kyk'u'j tu'n kjyon wi'je', extzun e'etzwiq'i'ne' toj Ejipt, exi' wiq'i'ne' toj chq'ajlaj toj tzqij tx'otx', nim xaq toj, mixti' a' toj, xob'ajilx mix-a'lo' najli ex mix-a'lo' nb'et toj.

⁷E'tzaj wiq'i'ne' toju' tb'anil tx'otx' lu, tu'n kywan ti'ju' tawal njaw ti'ju' tb'anil twitz awal njaw twitz. Aye'tzunkye naqẍe ul tz'ilsalte ntx'otx'e', matz'el wik'u'ne' ntx'otx'e' lu tu'n kypa.⁸Min ejyonju' pale wi'je', mixti' elkynik'ju' xnaq'tzal toj ntaname' weye', jawkyi'nkyib'ju' nejenel wi'je', toj tb'i B'aal e'yolina' nsanjelale' ex ek'ulun kywitz witzileb' mixti' kyajb'en. Tzyet q'oj tu'n Qman Dyos ti'j Israel⁹Qu'mtzun, ayine' Dyos Manb'aj: Ktzyetel jun q'oj wu'ne' kyi'je' ex kyi'j kychmane'.¹⁰Kupekyxi'ye' kyoju' swejtx'otx' toj ninnjab' tkub'exq'ij, kychq'onx junkye' tu'n tkyaj ka'yilte b'a'nxi'x, qa nb'inchet ikjalu:¹¹Qa ati jun nintnam nimal kye junxi'tl dyos matxi' tch'exb'e tdyos. ¡Extzun mya dyosqe'! Atzu'n ntaname' matxi' chin kyej tq'o'ne', ayine' kyajwalil,
naqx tu'n kypaj witzileb' mixti' kyajb'en.¹²¡Xob'xa kya'j te ja'lu! ¡Tzajx tchi ti'ja! Ayine' Dyos Manb'aj nchin q'mante.

¹³Kab'e' il matxi' tb'inchaju' ntaname': machin kyej kykolb'i'ne', ayine' t-xiklil a' itz', aye'x eku'x b'inchankye kyxoch min b'ent tk'u'yit a' kyoj qu'n inex a' kyxe, chi Qman Dyos. Tililju' kypi'sal aj Israel¹⁴Myana' lq'o'n majinte' Israel; myana' tk'wal lq'on majinte' ¿Tiqu'ntzun xa'q'i'n tkyaqilju' ati te?¹⁵¿Titiqu'n nche oka' tzaqpaju' ajq'oj kyi'j, naku'j b'alunqe' nxi'x che tzanun? B'ajkub' kyxitu'n ttx'otx' b'jo'k q'o'n kyq'aq'alju' nimaqtnam ex mix-a'lo'te kyejten kyoj.¹⁶Kub' pa'n twi'ya, kyu'n xjal aj Menpis ex aj Tapnes.¹⁷Matzaju'lu ti'ja, tu'n tpaj ẍin kyej tkolb'e'na ayine' Dyos Manb'aj, tib'aja intoq nẍaqlu'na toj b'e.¹⁸Tzun ja'lu, ¿ti'tzu'n tkanb'a'ya tu'nju' kxe'la Ejipt k'wal ti'ju' nin a' Nilo? ¿Titi' ktkanb'a'ya tu'n kxe'la Asirya k'wal ti'ju' nin a' Ewprates?

¹⁹Kb'el tz'e'ysa'n twitza tu'nx tb'inchb'ena myab'a'n axju' tpi'sila kxe'l q'onteya toj q'aq'. Ximanku'pe'ya, k'elil tnik'a ti'ju' myab'a'n ex yajb'il, saj tu'nju' ẍinkyej tkolb'i'na ex tu'n min xnimana weye', ayine' Dyos Manb'aj tib'aja. Ayine' Dyos Manb'aj te tkyaqil ipumalj nchin q'mante, chi Qman Dyos. Kypi'sal aj Israel²⁰Matxi' b'et q'ij jaw ti'ntib'a wi'je', min taja tu'n nxitb'i'na.
Tmaya: Lay chin ajb'enwe', chija. Matz'ajpajina nwitze' Kywi' nimaq witz ex kyjaq' tze pujin kyxaq.

²¹Ku'x wawa'na kse'n junwi' tb'anil lob'j ub'a, kse'n tijajil lob'j ub'a tb'anilxi'x. ¡Atzunta matxi'xi'x kub' ẍk'ostiya, min inetl nnik'e' teya!²²B'a'npetzunqa mattx'ajtib'a toj ta'l tza'j exqa mache ajb'en chukchaq q'eq tu'na; kukx ttente ttz'ilil tilju'ya nwitze'. Ayine' Dyos Manb'aj nchin q'mante.

²³¿Se'n taq'wi tu'n tmanteya: Mya tz'ilqinwe' b'ajx chin k'uluna'we' kywitz mya dyos qe', chiwta? Na'ntzpe'ju'ya tu'me'l se'n anq'ina'ya toj b'ya', ximankupe'ya tkyaqilju' matxi' tb'inchaya aya kamey ojqel b'eta inel tpa'ntib'a ti'ju' tb'eya;²⁴toj k'ul ttxu b'ur naq'li toj chq'ajlaj inxi'x xepjne naqwit ti' tu'n txitwan. Kse'n qa nxky'aqlin, mix-a'lo' kb'entel tjk'u'jte. Qama jyon jun b'ur ti'j, mixti' tu'n tel b'aj ti'j: qu'n toju' tq'ijlalil t-xky'aqli'n k'okyil yala' tu'n.

²⁵¡Israel, lalun tk'ixb'sa' tqana tu'n tojqelan mixti' t-xajab'a, lalun ku'x tzqij toj tqula! Atzunta tmaya: Lay, lay kyajte' wu'ne'; inchin laqjwe' kyi'ju' min ojtzqi'n kwitz ex chin xe'le' kyuk'i'l, chija. B'a'n tu'n ttz'e'yset kywitz aj Israel²⁶Ikse'n eleq' inel tch'ixaw ajtelyal, iktzu'n k'elila' tch'ixaw Israel, tkyaqilju' tnam, e'nimaqkawil, e'nejenel, e'pale exqe' sanjelal;²⁷qu'n nxikyma'n te jun tze: Aya nmane', chechij, atzu'n te jun ab'j: Aya ntxuye', chechij. Atzu'n weye' nin nche tzaj ka'yin, naq kytze'lkyi'j ntzaj kyq'o'n. Qatzun xi' ttzaj xob'ajil kyi'j, ntzaj kyma'n weye': ¡Kuttzaja klol weye'! chechij.²⁸Aj Juda, ¿jatzun ta'qe' kydyose' e'kub' kyb'incha'ne'? ¡Txqana' kydyose' kse'nx kyajlalju' nimaqtnam toj Juda! ¡Kuna'tzun kytzaj qa che kletile' kyu'n aj tulju' taq'wixil kyi'je'!²⁹¿Ti'tzu'n nkyq'ojine' wi'je', kykyaqilna'kye' majaw kyi'nkyib'e' wi'je'? Ayine' Dyos Manb'aj nchin q'mante.

³⁰Mixti'x oka' tz'e'ysb'il kwitz kyk'wale' kub' nq'o'ne', qu'n min sok kynab'le'. E'kub' kyb'yo'ne' sanjelal naku'j tx'u'j b'alunqe'ye'.³¹(Ex ikxqe'ye' najlqe'ye' toju' tq'ijlalil ja'lo, kyb'intze' tyol Qman Dyos.) Israel, ¿Ma ojetzun chin okxi'ye naku'j chq'ajlaj teya?, ¿mujqa te jun tx'otx' qxopin? Ntanam ¿tiqu'n inkyma'ne': Tzaqpi'nqo'qe'; milo najchi'j tu'n tanjqi'je' tk'etz? chechije'.³²¿Ma jakutzun tzik' kyna'l tachb'il jun qpoj qya tu'n? Atzunte' ntaname' matxi' b'et q'ij tik'len nna'le' tu'n.

³³¡Majxpe'tzun tojtzqi'na b'e ajt-xi'ya jyolkye ichan! ¡Xnaq'tzala toju' xnaq'tzb'il taq'wix!³⁴B'ajni txa'ju' ti'ja toj kychk'elju' prow ex mixti' kyil, toj kychk'elju' min ẍe' elyal toj kyil tu'na.³⁵In petzun tma'ntla: Mixti'we' wil. Min nq'ojintl te Dyos wi'je', chija. Tu'ntzu'n ntma'na qa mixti' tila, k'okyel toj xjel wu'ne'.³⁶¿Tiqu'n nxi'x oktilil tu'na tu'n tch'exb'enteya tuk'i'la? Ikx k'elel tch'ixawa tu'n Ejipt kse'n el tch'ixawa tu'n Asirya.³⁷K'anjetz ti'ja Ejipt toj tch'ixawa b'a'nxi'x, qu'n matxi' che el wik'u'nwe' ja matxi' tz'oka' qe' tk'u'ja, ex mixti'te' ktkanb'a'ya kyuk'i'l, chi Dyos. Matz'el kypa'n kyib' aj Israel ti'j Qman Dyos

¹Chi Qman Dyos: Qama kub' tpa'ntib' jun ichan tuk'i'l t-xu'jil ex mamjeju' qya tuk'i'l juntl ichan, lay kub' tmujb'a'ntl tib'ju' tnejel ichan tuk'i'l. ¡Mixyab'a'n tu'n tb'inchet ja'lu toju' tx'otx'! Atzunta Israel, matxi' tz'ajpajina kyuk'i'l txqan ichan, ¡tajb'iltzuntla tu'n tanjtzti'ja ja'lo nk'etze'! Ayine' Dyos Manb'aj nchin q'mante.

²Ka'yinqe'xpe'ya witz spajlqe', ka'yinxa b'a'nxi'x: ¿jatzunja min sajpajina'ya? Kub' qeya naku'j aj Arab'ya toj chq'ajlaj, intoq che tayo'na ichan k'u'jla'nqe' tu'na ttzi b'e. Makub' ttz'ilsa'na tx'otx' kyu'n ajpaji'n taq'wix nche tb'inchana.³Qu'mtzun min ntzajtl jb'al toj jb'alil. Majx nkub' tleb'a'n tib'a kse'n jun qya ajpajil; ¡inwtlo kub' tch'ixwe'n ch'i'na!⁴Tzqeku' intoq tma'na weye': Nman, wamiw toj nku'xumale',⁵¿ma kukxtzun ktx'u'jilju'ya? ¿ma majxtzun kxe'l tq'o'na tq'oja toj tk'u'ja? Chija. Intoqtzun tma'nju'ya lu, ex intoq che tb'incha'na tkyaqil myab'a'n. Chi Qman Dyos. Txokon Qman Dyos tu'n tanjtzti'j kyanmi aj Israel ex aj Juda

⁶Tzaj tma'n Qman Dyos weye' toj tq'ijlalil tkawin Josiy: ¿Matxi' tilju'ya xtb'incha pi's Israel? Xi' kywi' nimaq witz ex kyjaq' tze pujin, ex aq'wi ajpajil.⁷Nchiwe' qatoq k'anjetzti'j nk'etze' tb'ajlenxi' tb'incha'n tkyaqilju' il lu; ex mixti' sanjtz ti'j. Oktka'yi'n pi's Juda ja'lu, ju' ttzik;⁸ex til tej tel nsuchu'ne' pi's Israel ex kub' npa'nwib'e' tuk'i'l tu'n tpaju' ajpaji'n tb'incha. Atzu'n pi's Juda, ttzik Israel, mixti' xob' weye', xi'tlpe'te ex aq'wi ajpajil.⁹Lwiyxi'x xitb'incha'nte, makub' ttz'ilsa'nju' tx'otx'. Mixti'x xitnima'n nyole', k'ulun kye ab'j ex kye tze.¹⁰Tb'ajlenxipe' ja'lu, min anjtzti'ju' pi's Juda nk'etze' tu'n tkyaqil tk'u'j, inkub'pe' t-sb'u'ne'. Ayine' Dyos Manb'aj nchin q'mante. Chi Dyos weye'.

¹¹Tzaj tma'n Qman Dyos weye': Nimxi'x tilju' pi's Juda kyetwitzju' pi's Israel.¹²Kutxi'ya ex pakb'anxa toj tjawetzq'ij:
Lu xtma Qman Dyos: ¡Kutanjtz ti'ja nk'etze', pi's Israel! Knk'ma'ya tuk'i'l tzalajb'il lay ku'x ten ntx'u'jile' tink'u'je' qu'n inlaqwe' nk'u'j.
Ayine' Dyos Manb'aj nchin q'mante.¹³O'kx q'onk tila ti'ja. mana' matz'oka pi's weye' ayine' Dyos tib'aja; matz'ojqelana jyol junxi'tl tichana kyjaq tze pujin kyxaq, ex min exitb'i'na nchaq'b'ile'. Ayine' Dyos Manb'aj nchin q'mante, chi Qman Dyos, chiku'ya.

¹⁴Ayinku'ye' Dyos Manb'aj nchin q'mante: Kutanjtz kyi'je' pi's nky'wa'l, qu'n ayine' kyajawe'. Kjawil nsk'o'ne' junjun xjal toj junjun tnam, atzun kakab' toj junjun k'loj kywitze'l kyib', che kxe'l wiq'i'ntzuntze' Syon.¹⁵Che okyel nq'o'ne' kawil aye' nchin tzalaje' kyi'j, che kawil kyib'aje' tuk'i'l nab'l ex che ximal b'a'n.¹⁶Ajtzun kychmete' toju' tx'otx', ex nim txqan kyk'wale', mix-a'lo'tlte kyolil ti'j tkaxilju' nyole' kyejni b'entti'j; mix-a'lo'te' ktzajel na'nte'; expe' lay tz'ajb'entl ex lay b'inchet juntel. Ayine' Dyos Manb'aj nchin q'mante.¹⁷K'okyeltzun tb'i Jerusalen, te nkawb'ile' ayine' Dyos Manb'aj; kykyaqil nimaqtnam kyb'u'yi'kyib' atzu' tu'n kyniman weye', lay kub' kypi'sa'n jumajtlkyib' toju' taq'wix ati toj kyanmi.

¹⁸Ajtzun tponju' q'ij lu, ktmujb'a'tib' Juda tuk'i'l Israel, che anjetztzuntz junx toju' tx'otx' tjawetzq'ij tu'n kyul toju' tx'otx' xinq'o'ne' te kyetzb'ilju' ojtxi' kyyajilb'ene', chi Dyos. Xi' Israel toj witzleb'i'n¹⁹Israel, kub' nximane' tu'n tok nq'o'na te nk'wale' ex tu'n txinq'o'ne' tx'otx'a npon kyk'u'j xjal ti'j, aju' tx'otx' tb'anilxi'x toj tkyaqil twitz tx'otx'. Nchinawe' qa chi okyel tq'o'na te tmana exqa laytoq tz'el tpa'ntib'a, wi'je'.²⁰Atzunta ikyju'ya kse'n jun qya min njapun tyol te tchmil, ikqe'tzunju'ye' min xjapun kyole' nwitze'. Ayine' Dyos Manb'aj nchin q'mante, chi Dyos.

²¹Q'ojq'oj toj wi'yj kywi' witz: ¡aye' aj Israel nche oq' ex nche kub'san! Mache eltxalpuj ti'ju' b'a'n b'e matzik' nna'le' kyu'n, ayine' Dyos Manb'aj kyib'aj.²²Kutanjtz kyi'je' nk'etze', epi's k'wa'lb'aj, kche nq'a'na'ye' teju' kypi'sile', chi Dyos. Kytzaq'web'l aj Israel te Qman Dyos Luqo'ye' maqo' ule' tk'etza, qu'n aya Dyos Manb'aj Qdyose'.²³Mixti'te' tajb'en tu'n qxi' kywi' witz mujqa tu'n qẍch'in; o'kxtzu' nkleta'te tnam Israel tk'etz Qman Dyos.²⁴Matxi' qo k'ulb'an tu'n elsal ch'xawil k'luj witzleb'i'n atzun xkykanb'a ojtxi' qchmanju' atxi'x k'wal qo'toq: e'naj qrit, e'qwakyix, e'qk'wal ex qmyal.²⁵Qme'ssankutzun qib' tu'n qch'ixaw, qoqe' pitzeku' tu'n qch'ixaw, qu'n atxi'x k'wal qo'toq ex ja'lo, matxi' qo b'inchan il twitz Qman Dyos, ayo' exqe' ojtxi' qchman min nqo b'in te, Chi Jeremiy. Txokb'il tu'n tanjtzti'j kyanmi¹Intma'n Qman Dyos: Israel, qama tanjsa tib'a, nk'etze' tu'n tanjtza' ti'ja. qama che kyej tq'o'na twitzleb'a ex min sel tpa'ntltib'a wi'je',²b'a'ntzun ttzaj tna'ntza nb'iye' ajtmante jun tyola tib'aj ax, tnik'alilti'j ex ttxolilti'j. Te ky'i'wb'il ex ninb'il, k'okyela'we' nb'i kye nimaqtnam, chi Qman Dyos.

³Intma'n Qman Dyos kye xjal aj Juda ex aj Jerusalen: Che awanqe'ye' toju' tx'otx' mixti' tawal; lalun che awantle' kyxol ch'i'x.⁴E'aj Juda ex aj Jerusalen, kyq'onk kyechele' ex tz'elx kynik'e' qa ayine' Dyos Manb'aj, kyq'onku'ye' techal nyole' kyejni b'entti'j toj kyanmiye';
qatzun min ktzajel ntx'u'jile' kse'n q'aq' tu'n tpaju' kyb'inchb'aje' myab'a'n, ex mix-a'lo'xte' kb'antel tyupinte, chi Dyos. Xob'sanjtz Juda tu'n kypon txqantl tnam toj⁵Kymanxju'ye' lu toj Jerusalen ex Juda, kyẍch'inxe' tuk'i'l tq'ojq'ojel chun toj tkyaqilju' tx'otx', kyẍch'inxe' kuw: ¡Qo'qe'ye'! ¡Qb'uyim qib'! ¡Kyoju' nimaqtnam kuwsa'nqe'! chechiku'ye'.

⁶Kyiq'i'nktze' t-sut tnam tu'me'l Syon; ¡kyjyom kyewb'ile', ojqelqe'xe'! qu'n ktzajel wiq'i'ne' jun ninyajb'il ex xitb'il tu'me'l tb'a'nq'ob'kya'j.⁷Matxi' tz'etzju' b'alun toj tjul, lu ljo'n ttzaju' xitulkye nimaqtnam; matxi' tz'etz toju' tx'otx' xitulteju' ttx'otx'a, tu'n kykyaj t-xitu'n ninttanama ex tu'n kykub'naj xjal toj.⁸Qu'mtzun kyq'onk kyi'je' te b'is, che oq'e' ex che jiq'chane' tu'n k'ixk'oj, qu'n atix nim ttx'u'jil Qman Dyos qi'j, chiku'ya kye. Chij.

⁹Ayine' Dyos Manb'aj nchin qmante: Ajtponju' q'ij lu, che lu'lulju' nimaqkawil e'nejenel tu'n kyxob'il, ktzajel tchi kyi'ju' pale majx che kjel sak'puju' sanjelal, chi Qman Dyos.¹⁰Nmatzuntze': ¡Nman Dyos, ma'xi'x chanyola kyeju' xjal aj Jerusalen! Tzaj ttziya'na nak'b'il kye, atzu'n ja'lo tok kchil kyqul, nchije' te.

¹¹Ajtponju' kmuj lu, kxel q'met teju' tnam Jerusalen: Inul jumin jun kyq'iq' ntanton ti'ju' ntaname' intzaj toj chq'ajlaj. Mya kyq'iq' tu'n t-xq'iq'it triy;¹²kuwte' kyq'iq' ktzajel nq'o'ne' qu'n ktzajel nq'o'ne' tz'e'ysb'il kywitz ja'lo, chi Dyos. Txolinjtzkyi'j aj Israel kyu'n ajq'oj Kytxolikyib' ajq'oj kyi'ju' aj Israel¹³Kyk'ayinxe', xi'kytzaj tenenen ajq'oj naku'j muj, naku'j kyq'iq' jb'alqe' kykarwaj te q'oj, ojqelxi'x kyelju' kychej kyekywitz q'anjel. ¡Qab'anx qwitz, matxi' qob'o'lj!¹⁴Jerusalen, ẍtilsama tanmiya teju' taq'wixil tu'ntzun tkleta. ¿Ma kukxtzun kximalju'ya ti'ju' taq'wix?¹⁵Tzmajx Dan ex kywi'witz te Eprayin nche tzaja' taq'wix tqanil;¹⁶Kymanxe' kyeju' nimaqtnam ex te Jerusalen ljo'n kytzaj ajq'oj, tzajniqe'x toj jun tx'otx' najchaq inxi'x che ẍch'in tu'n kyq'ojin kyi'ju' nimaqtnam toj Juda,¹⁷k'okyil kytxoli'n kyib' ti'j Juda, naku'j xq'uqil kojb'ilqe', qu'n jaw ti'ntb'i Juda wi'je'. Ayine' Dyos Manb'aj nchin q'mante.

¹⁸Tu'n tpaju' tb'inchb'aja myab'a'n saja' lu tib'aja; atzun xtkanb'aya tu'n tila majx nku'x ẍb'o'nti'j tk'u'ja tu'n, Chi Dyos. Exch'yon ttanam Jeremiy ti'jtk'u'j¹⁹¡Inxi'x ku'x ẍb'o'n ti'nk'u'je'! ¡Inxi'x tuk'jne wanmiye' tu'n k'ixk'oj! ¡Inxi'x t'uẍjne wanmiye', lay njup ntziye'! Matxi' txinb'i'ne' tq'ojq'ojel chun, inxi'x che ẍch'in xjal tu'n kyq'ojin.²⁰Ljo'nxi'x tul tqanil te xitb'il; tkyaqilju' tx'otx' naq tik'lenxtl. Naqx myanim xitu'nqe'tlju' nxmuje' ikxqe' npache' xb'alunqe'.²¹¿Ma kukx k'okyel nka'yi'n kb'ander ajq'oju'ye' yob'a'nktz jawl ex ma kukx kxe'l nb'i'ne' tq'ojq'ojel chun?²²Xnakte' ntaname', min neltnik' weye' K'walqe' mixti'x kynab'l, min nche ximan. Majxpetzun b'a'nqe' tu'n kyb'inchan taq'wix, atzu'n tu'n kyb'inchante b'a'n mixti' b'a'n kyu'n. Chi Qman Dyos. Xitka'yi'n Jeremiy xitb'il tzul²³Wile' tx'otx', chq'ajlajtltoq ex mixti' ttx'o'lajil: xinka'yine' kya'j ex mixtoqti'te spik'un twitz.²⁴Exi' nka'yi'ne' witz intoq che lu'lun; tkyaqilju' kywi'witz tzaj tchewal kyi'j.²⁵Xinka'yine' mixti'tltoq jun xjal, ex matxitoq che'x oq kykyaqilju' pich'.²⁶Eb'ajx nka'yi'ne' awal naq chq'ajlajtl, kykyaqilju' nimaqtnam naqtoq kyik'lentl. Tu'n ttx'u'jil Qman Dyos kuwxi'x xb'aja' tkyaqil ja'lu.

²⁷Tzaj tma'n Qman Dyos: Tkyaqilju' tx'otx' kb'ajel yajti, ex lay kub' nnajsa'ne' tejumajx.²⁸Kb'el noju' tx'otx' tu'n b'is ex kb'el qloljixju' kya'j tu'n b'is. Matxi' chin yoline' ex lay tz'anjtz ti'jnk'u'je'; matxi' kub' nxima'ne', ilti'j kjapumel wu'ne'.²⁹Kykyaqil xjal ljo'n kyex oq; nche ewan kyxol nimaq k'ul ex xi' kyjax kywi' nimaq pik, tu'n tq'ojq'ojel kywi' xjal te q'oj ti'j chej exqe' smajil. Kykyaqilju' nimaqtnam matxi' che kyej kolb'i'n mix-a'lo' juntl xjal najli kyoj.³⁰Atzunta nintnam, xitjnitla, ¿titiqu'n noka' tq'o'n t-xb'aluna tb'anil? ¿titiqu'n nche oka' tq'o'na q'anpwaq te tachb'ila? ¿titiqu'n nche oka' tuk't-sa'na q'eq kyi'j twitza? Mixti'x tajb'en nb'aj tb'inchla'n tib'a tb'anilxi'x, matxina' tz'el ik'u'na kyu'n ichan nche laqj ti'ja ex kyajb'il tu'n tkub'yo'na kyu'n.³¹Inxinb'i'ne' tq'ojq'ojel wi'j toj k'ixk'oj, kse'n jun qya toktwitz k'ixk'oj tu'n tnejel tal; tq'ojq'ojel twi' Syon, in oq', nche'x tnuqpi'n tq'ob' ex intma'n: ¡Layqinxwite'! ¡Chin b'el kyb'yo'ne' b'yolxjal!, chij. Kyil aj Jerusalen¹Intma'n Qman Dyos: Kupe'kyxi'ye' kyoj tkyaqil b'e toju' tnam Jerusalen, kyka'yinxe' b'a'nxi'x, kyjyome' jamajx ate' xjal qa ati jun in anq'in toj tnik'alti'j, qa tajb'il tu'n tyolin ax. Qama tz'el yal kyu'ne', kb'el nnajsa'ne' til Jerusalen.²Ate' junjun najb'en nb'iye' ayine' Dyos Manb'aj kyu'n, extzun mya axju' kyol, chij.

³Nman Dyos, aye'ta' nche tjyo'n, aye' xjal ax che yolin. Kub' ttz'e'ysa'na kywitz, ex min kyna'. Ekub'o'lj tu'na, ex min okkynab'l. Tx'yanqe', we'jqexi'x kyetwitz ab'j, min kyajb'il tu'n tanjtzkyi'j toju' b'a'n b'e.⁴Kub'tzun nxima'ne': O'qe'kx prowju' min nche ximan, qu'n min b'i'n tajb'ila kyu'n, aju' tchaq'b'ila Nman Dyos.⁵Kxe'l nma'ne' kyeju' xjal ati kyoklen. B'i'nte' tajb'ila kyu'n Nman Dyos, aju' ntchaq'u'na. Aye'tzunkye kykyaqil jawkyi'nkyib' ti'ja, kub' kypi'si'nkyib' twitza.⁶Qu'mtzun che kb'el b'yo'n kyu'n toj k'ul b'alun, che b'ajel ẍilu'n kyu'n toj chq'ajlaj xo'j; che okyel tzaqpaj twiẍ k'ul kyi'j kyk'etz nimaqkytanam, che b'ajel kytzaqu'n ajkyetz; qu'n nim il matxi' b'aj kyb'incha'n, nim txqan kysb'ub'l.

⁷Chi Qman Dyos: ¿Se'n taq'wi kb'el nnajsa'ne' tkyaqil ja'lu? Matxi' chin kyej kykolb'e'ne' tk'wala, ex nkytziya'n kyol kywitz witzleb' mya dyosqe'. Nim txqan kywa xinq'o'ne', aye'tzunkye min ẍe niman weye' kykyaqil xikyq'o'nkyib' toj ajpaji'n.⁸Ikyqe'ju' kse'nqe' tmanchej kyajb'il tu'n kyẍchan nche ok il kyi'j kyxu'jil kywnaqil.⁹¿Ma laytzun kub' ntz'e'ysa'ne' kywitz tu'n ja'lu? ¿Ma laytzun tz'oknq'o'ne' tleq' jun tnam ikju'?¹⁰¡Kub'xwit b'o'lju' kyawal ub'a kyu'n kyajq'oj, maskye min xkub' kyxitu'n tkyaqil! ¡B'ajxwit kyjachu'n kyq'ob' qu'n mya wawaltlwe' lu!¹¹¡Mache jaw miltz'uju' aj Israel ex aj Juda wi'je'! Ayine' Dyos Manb'aj nchin q'mante. Chi Qman Dyos. Tqanilju' tz'e'ysb'il witzb'aj¹²Makub' kyewa'n aj Israel ex aj Juda Qman Dyos; kyma: Mixalo'te Dyos. Mixti'te qo ik'ela', lay tzaj q'oj ex we'yaj qi'j, Chechij.¹³Ikyqe' sanjelalju' kse'n kyq'iq', mixnati' tyol Qman Dyos kyuk'i'l.
Qu'n lu saj tma'n Qman Dyos nimtipumal weye': A tzulju' kyib'aj tu'nju' xkyma lu: Kb'el nq'o'ne' nyole' naku'j q'aq' toj ttziya, atzu'n tnam lu k'okyel naku'j si, tu'ntzun tb'aj tu'n q'aq' lu. Chij.¹⁵Chi Qman Dyos: Israel, ktzajel wiq'i'ne' jun tnam najchaq q'ojil ti'ja, jun ojtxi' tnam ex kuw. Min tojtzqi'na kyol ex min nkaneju' nkyma'n toj twitza.¹⁶Kykyaqil q'ojilqe' min nche xob', kamik qexi'xju' kyq'ojb'il.¹⁷Kxe'l kywanju' twitz tawala ex twaya, expe' che kb'el kyb'yo'n tk'wala ex tmyala. Che b'ajel kych'yo'n trita ex twakyixa, che b'ajel kylo'n tawala ub'a ex iw. Che kb'el kyxitu'n nimaqtnam kuwsa'nqe' q'uqlok tk'u'ja kyi'j kyu'n kyq'ojb'il. Chi Qman Dyos.

¹⁸Chi Qman Dyos: Laytzun majx che kub' nnajsa'ne' toju' tq'ijlalil lu.¹⁹Ajttzaj qani'n teya ¿Titiqu'n xtb'incha Qman Dyos tkyaqil ja'lu qe? Qa chechi, tzaq'wenxa kye: Ikxna' kse'n kyej kykolb'i'ne' Qman Dyos ex e'aq'wiye' ajb'el kye junxi'tl dyos tojku' ttx'otx', ikxtzunkyeju'ye' che ajb'ele' kye junxi'tl xjal toj juntl tnam. Chi Qman Dyos. Ab'tzib'l kye aj Israel²⁰Kymanxe' toju' tkawb'il Israel, ex te Juda:²¹B'intzju'ya lu, xnak tnam ex mixti' tnab'la, ate' twitza extzun min nka'yina ate' t-ẍkyina ex min nb'ina.²²Ayine' Dyos Manb'aj nchin yoline': ¿Ma min nche xob'e' weye? ¿Ma min nche lu'lune' nwitze'? Kub' nq'o'ne' tz'awun ttzi ninnjab' te nqach, jun nqach lay tz'exju' ninnjab' tib'aj. Mixti' kyipumalju' ttolob' aj kyukchi inche q'ajti ex lay b'ent kyex tib'aj.²³Ch'uẍ kyanmiye' ex pi's; ma chin kyej kykolb'e'ne', exi'tzuntze'.²⁴Mixti'x kub' kyxima'n ch'i'ne': qo'qe' niman te Qman Dyos, qu'n intzaj tq'o'n jb'al tojxi'x tq'ijlalil aj kyxulin tze ex ajkyb'aj ch'iy awal, ex majx ati tq'ijlalil tu'n, tu'n tjaw b'uyit twitz awal. Chechiwte'.²⁵Atzu'n ja'lo mikxa'tlju' tu'n tpaju' kyile', ex lay kynik'b'e'tlju'ye' xtalb'il lu.²⁶Qu'n ate' b'inchal myab'a'n toju' ntaname' inche xq'uqin kse'nqe' yol pich', inkub' kyq'o'n xpatxab' tu'n kytzyet xjal.²⁷Inche b'ajnoj kyja tu'n kyelaq', kse'nqe' kyja pich' b'incha'nqe' nche noj kyu'n pich'. Ikytzu'n e'jawa' q'inumax ex ten nim kyipumal,²⁸etzni kywitz ex k'a'cha'nkyib' b'a'nxi'x. Nim txqan kyil: min nkyb'incha'n tnik'alilti'j teju' meb'a ex min nxikynima'n toklenju' prow.²⁹¿Ma laytzun kub' ntz'e'ysa'ne' kywitz tu'n tpaj ja'lu? ¿Ma laytzun txinq'o'n kyleq'ju'ye' xjal ikju'? Ayine' Dyos Manb'aj nchin yolin.

³⁰Taq'wixi'xte' nb'aj toju' tx'otx' lu.³¹chajyolilte' nkypakb'a'n sanjelal; inche kawinju' pale kse'nx kyajb'il, ¡Atzun b'a'n toj twitzju' ntaname'! ¿Ti'tzu'n kb'ajel kyeye' ajtponju' mankb'il q'ij? chi Dyos. Ttxoli'nkyib' ajq'oj ti'j Jerusalen¹¡Kukyoqe' tyajajil B'enjamin, ¡che ewanqe'ye' ti'jxi' Jerusalen! Kyq'ajtzame' chun toj Tekoa, kywab'a'nktz jun techlale' toj B'et-akyerem, qu'n xi' ttzaj jun yajb'il, jun taq'wixil toj tb'a'nq'ob'kya'j.²Iky Syonju' kse'n jun tnej tx'otx' tb'anilxi'xte k'ik'leb'l kb'el xitu'n,³ja nche'xa' k'ik'lel kyuk'i'lju' kyrit; inkub' kyq'o'n kypach kyi'jile teyiletzun junjun tnej rit nche wan tojxju' plaj ja ta'qe'.⁴A nkyma'n kyajq'oju': ¡Kyb'incham kyib'e' tu'n qq'ojin ti'j! ¡Kuwqe'xe', qo'qe' oktzaqpaj q'ojil ti'j te wanq'ij!, Layqo'xwit, matxi' qo'qex, xi' qokyupj.⁵¡Qoqe' oktzaqpaj q'ojil kyi'j te qonik'an che qxitu'nku' kyja nimaq kywe'! Chechij.

⁶Matxi' tchaq'te Qman Dyos nimtipumal kjalu:
¡Kyik'sam tzeye' ex kyb'incha'nktze' jun kyxwe'lile' tu'n kyok tzaqpaje' q'ojil ti'j Jerusalen! B'entnitlti'j tu'n tkub' tz'e'ysette' nintnam twitz, qu'n nim taq'wixil toj.⁷Iky taq'wixilju' npoq'chaj toj Jerusalen kse'n a' njatz poq'chaj toj xoch. Naqx taq'wixil ex xitb'il ati toj; naqx k'ixb'len ex k'ixk'oj in nka'yine' toj.⁸Tz'e'yx twitza, Jerusalen, qatzun min, kjel nleb'a'na tu'n ntx'u'jile', kyjel nq'o'ntzuntza naku'j chq'ajlaj, mix-a'lo'tl xjal knajal toja. Chi Qman Dyos. Tqanilju' tz'e'ysb'il witzb'aj⁹Intma'n Qman Dyos nimtipumal kjalu: Che jyonjtzelu' aj Israel che kjelten b'a'nxi'x, kse'n ub'a nb'aj jyetl tkamaji'n kyxol tq'ob' tu'n min kyeja' jun. Chij.

¹⁰Xi'tzun ntzaq'we'ne' te: ¿Alkye ktzajel b'inweye', qa matxinyoli'ne' exqa matxinma'ne' lu kye? Nman Dyos, jpu'n toj kyẍkyin, min nb'ent kyb'i'n; inche xmayin ti'ju' tyola, min nkub' toj kywitz.¹¹Ayin junwe' nchin ttx'u'jin Nman Dyos; lay tzik'xtl wu'ne', nchije'.
Tzaj tma'n Qman Dyos weye': Tx'u'jina kyi'ju' ku'xun toj b'e, kyi'ju' ku'xun k'loji'nchaq kyb'aj. Che xe'lq'i'nkye' ichan kyuk'i'lxi' kyxu'jil toj kars exqe' tijwnaq matxi' tzaj kyab'q'i.¹²Che kjelju' kyja, kytx'otx' ex kyxu'jil kye txqantl. Qu'n k'okyel nq'ob'e' kyi'j tu'n ttz'e'yset kywitzju' najlqe' toju' tx'otx' lu. Ayine' Dyos Manb'aj nchin yolin.

¹³Kykyaqilx, nimaq ex k'ok'e', o'kxtzu' toka' kyxim tu'n kykanb'ante txqan ti'xti' mya toj tu'me'l. Kykyaqilju' sanjelal ex pale inche sb'un.¹⁴Inkub' kyq'a'na'n ch'i'n tk'ixb'len ntaname'; inkyma'n qa b'a'nile extzun mixti'xte b'a'n.¹⁵¡Inwtlo kub' kych'ixwe'n ti'xti' nkyb'incha'n lu, ju' inel wik'u'ne'! Mixpeti'x nkukych'ixwe'n jun ti'xti'! Qu'mtzun che k'ulb'al ex che kb'eltz'aq kse'nqe' txqantl, ajtkub' ntz'e'ysa'ne' kywitz. Ayine' Dyos Manb'aj nchin q'mante, chi Qman Dyos. Tpi'sal Israel¹⁶Intma'n Qman Dyos te ttanam: Che we'kupe'ye' kyoju' b'e ex kyka'yinxe' che xjelune' kyi'ju' b'e ojtxi', jata'ju' b'e tb'anil; che b'ete' toj, che ojlaltzuntze'. Chij. Aye'tzunkye kyma: Lay, min qajb'ile' tu'n qb'ete' toj. Chechij.

¹⁷E'kub' tq'o'n Qman Dyos xq'uqil, ex tma kyeju' tnam: Kyb'inxe' tq'ojq'ojel chun, chij. Atzunju' tnam tma: Lay txiqb'i'nqe'. Chechij.

¹⁸Qu'mtzun chi Qman Dyos: Kyb'intze', nimaqtnam, kyb'imju'ye' k'ik'el ti'ju' ntaname'.¹⁹B'intza, tx'otx': Ktzajel nq'o'ne' jun taq'wixil tib'aju' tnam lu twitzlalilju' kyxim myab'a'n; qu'n min xikyb'i'n nyole', elpe' kysuchu'n nkawb'ile'.²⁰¿Titi' k'ajb'ela' nkub' kyq'o'ne' sturak te Sab'a nwitze' exqe' awal nche puk'chaj te najchaq tx'otx'? Min nche kub' we' chojb'il k'ok'sb'il toj nwitz nche kub' kyq'o'ne' exqe' txqantl chojb'il nche kub' kyq'o'ne', chi Qman Dyos.

²¹Qu'mtzun ntma'n Qman Dyos: Che k'ulb'alkye' tnam lu wu'ne' ex che kb'eltz'aq. manb'aj ex k'wa'lb'aj, b'sin kamiw, che kyimel junx, chij. Tzul jun nintnam toj tb'a'nq'ob'kya'j ti'j Jerusalen²²Chi Qman Dyos: Intb'incha'ntib' jun nintnam kuw tu'n ttzaj q'ojil tzmax toj najchaq tx'otx' toj tb'a'nq'ob'kya'j.²³Iq'i'mile kysmaj ex kyk'uẍtx'e'nb'il; mya'lqe', mixti'x nlaqj kyk'u'j; ajkyjaw ẍch'in naku'j ninnjab' ntinun, ate'qe'kx ti'j chej. Naqx tu'n kyq'ojintl ti'j Syon, chij.

²⁴Chiqe'ju' xjal toj Jerusalen: Matxi' qb'iju'ye' tqanil, matxi' qokub'numje' tu'n xob'il; in qo b'isune' ex ati tk'ixk'ojil qi'je' kse'n jun qya ajtitz'ji tal.²⁵¡Lalun che exe' toj kojb'il, lalun che'x b'ete' toj b'e! ¡Luju' ajq'oj q'i'nqe' tq'ojb'il; xob'ajilx toj tkyaqil plaj! chechij.

²⁶¡Ntanam kyq'onk kyi'je' te b'is yek'b'ilte k'ixk'oj; xtolinku' tib'a toj tza'j, b'isuna ex tz'oq'a tu'n k'ixk'oj, kse'n makyim o'kxku' jun twitz k'wa'lb'aj; qu'n ntxoktxon tu'n tulju' xitulqe!

²⁷Chi Qman Dyos weye': Q'onku' ch'i'na ntaname' toj joyb'ilti'j. Ka'yima se'n tu'me'l nche anq'ina'. Chij.

²⁸Nman Dyos, kykyaqilkye' pi'sqe'; chalyolqe' ex mixti'x kynab'l; ikyqe' kse'n q'ank'uxb'il ex k'uxb'il.²⁹Aj t-xupinju' xupb'il kyq'iq', inkub' b'u'nb'ixju' plom tu'n q'aq'. ¿Titi' tajb'en tu'n kyẍtilset? Lay che najkye' b'inchal myab'a'n.³⁰K'okyel q'et kyb'i toj tz'is saqpwaq, qu'n e'eltik'u'na Nman Dyos. Pakb'an Jeremiy toj tja Dyos

¹Tzaj yolin Qman Dyos te Jeremiy, ex tman:²Tenku'ya ttzija te k'u'lb'il weye' ayine' Dyos Manb'aj, pakb'anxtzuna tqanil lu kye kykyaqilju' najlqe' toj Juda, nche okx k'ulul weye' toju' ja lu, tu'n ttzaj kyb'i'nju' nyole'³ayine' Dyos Manb'aj Dyos nimwipumale', janche k'uluna' aj Israel: Kyq'onk tilile' tu'n kyanq'ine' b'a'n ex tu'n kyb'inchanteye' b'a'n, che kjel najantzuntze' wu'ne' toju' tx'otx' lu.⁴Lalun tz'okqe kyk'u'je' kyi'ju' sb'ul, inkyma'n: ¡Lu tja Qman Dyos lu, lu tja Qman Dyos! Chechij.

⁵Qama che anq'ine' b'a'n, qama kyb'inchaye' b'a'n ex makyb'inchaye' tnik'alilti'j kyxolilexe';⁶qa min ẍekub' kyaju'nju'ye' te najchaq xjal, e'meb'a exqe' qya kyimni kychmil, qa min ẍekub' kyb'yo'ne' mixti' kyil toju' najb'il lu, qa min ẍek'ulune' kye junxi'tl dyos nche yajtiye' tu'n kypaj,⁷che kjel najane' wu'ne' tzalu toju' tx'otx' xinq'o'ne' tejumajx kye ojtxi' kyyajilb'ene'.

⁸Xi'nqeya'kye' kyk'u'j kyi'ju' yol mya ax mixti'x tajb'en kyeye'.⁹Inche elq'ane', nche b'iyune'; nche ajpajine', nche chanyole', inkub' kyq'o'ne' sturak twitz B'aal, nche k'ulune' kye dyos mixti' kyoklene' kyi'j,¹⁰inche ultzuntze' nwitze' toju' ja lu janjaw nimeta' nb'iye'. Chechiloye' qa matxi' che klete' tzalu, ex toj kynab'le' qa b'a'n tu'n kyb'inchanteye' ti'xti' nche elwik'o'ne'.¹¹¿Ma kyja leq'u' ja lu kyeye', janjaw nimeta' nb'iye'? Tkyaqil ja'lu matxi wile'. Ayine' Dyos Manb'aj nchin yolin.¹²Kupekyxi'ye' toju' njaye' xjan toj Silo, ju' tnejel najb'il jawnsk'o'ne' jatu'n ntena'ye', kyka'yinxtzune' xnb'inchaye' ti'j tu'n tpaj tilju' ntaname' Israel.¹³B'a'npuxi' pena'maj txinma'ne' kyeye' tu'n kyanq'ine' b'a'n, mixti'x nchinx kyb'i'ne', expe' mixti'x xi' toj kywinqile' tej kytzaj ntxko'ne'. Ayine' Dyos Manb'aj nchin yolin.¹⁴Qu'mtzun kse'n nb'inchaye' ti'ju' ja xjan toj Silo, ikytzun knb'incha'ye' ti'ju' ja te k'u'lb'il lu, ja nnimeta' nb'iye', ju' xinq'o'ne' kyeye' ex kye ojtxi' kyyajilb'ene', ex ja q'uqla' kyk'u'je'.¹⁵Che elix nxla'ja'ne' nwitze', kse'n kyex nxla'ja'ne' tyajajil Eprayin ju' kyitz'in kyib'e' kyuk'i'l. Min japun kyu'n aj Israel

¹⁶Jeremiy, lalun k'uluna weye' ti'ju' tnam lu, lalun kub'sana kyi'j. Lalun tz'ok ila, qu'n lay txinb'i'na.¹⁷¿Ma min ntka'yi'nju'ya nkyb'incha'n kyoju' nimaqtnam toj Juda ex kyoju' b'e toj Jerusalen?¹⁸Intzaj kyi'n kyk'wal si, aye'tzu'n manb'aj nche oktxqonte q'aq', aye'tzu'n qya nche b'inchan muqin tu'n tkub' kyq'o'n twitzju' kydyos tilb'ilal qya tok tb'i kyu'n: qya nimaqkawil toj kya'j. Ex in okkyq'o'n ntx'u'jile' tu'n tpaj nkub' kyq'o'n ta'l ub'a kywitz junxi'tl dyos.¹⁹Myayinwe' nchin b'o'lj, aye'xkye nkyb'o'ljsa'nkyib' tu'n tel kych'ixaw. Ayine' Dyos Manb'aj nchin yolin.²⁰Qu'mtzun axxi'x ktzajel nq'o'ne' ntx'u'jile' tib'aju' najb'il lu ex kyib'aju' xjal, expe' kyib'aj alu'mj, e'tze toj kojb'il ex awal. Ikte' kse'n ajt-xi' q'aq' toj k'ul, lay yupj, Chi Dyos chiku'ya.

²¹Q'manxa qa ayine' Dyos Manb'aj te tkyaqil ipumalj antine' kyib'aj aj Israel, in nma'ne' teju' ntaname': Kyq'onku'ye' tkyaqilju' chojb'il b'a'n toj kywitze', ex kywanxju'ye' chib'j lu.²²Qu'n tej kyetzwiq'i'ne' kyyajilb'ene' toj Ejipt, mixti'we' xinma'n kye ex min nchaq'e' tu'n tkub' kyq'o'n alu'mj te chojb'il k'ok'sb'il ex chojb'il.²³Awe' nchaq' kye tu'n kniman weye', wetzuntze' nche k'uluna' ayine' Dyos Manb'aj, aye'tzunkye' ntaname'. Ex xinma'ne' kye tu'n kyanq'i'n kse'nxju' nchaq'e' kye, tu'ntzun kyxi' toj b'a'n.²⁴Aye'tzunkye min nxikyb'i'ne' ex mixjun ok toj kywi', kub' kypi'sa'n kyib', e'anq'in kse'nxju' kynab'l taq'wix. Xi'pe' tzaja' kymiltz'u'n kytze'lkyi'j weye', mya tu'nwt kytzaj lq'e nk'etze'.²⁵Atxi'x kyetzlen kyyajajilb'ene' toj Ejipt tzmax toju' tq'ijlalil ja'lo, eb'aj tzaj nchq'o'ne' nsanjelale' kyxole' aye' ajb'el weye', kukxju' lepchitz juntl ti'j juntl.²⁶Aye'tzunkye' min nxikyb'i'ne', mixjun ok toj kywi'ye', kub'pe' kypi'sa'n xi'xtlkyib'e' kywitzju' kyyajilb'ene'.

²⁷Jeremiy, q'manxa tkyaqilju' lu kye, b'a'nqa min sok toj kywi'; ẍch'inxa kye maskye min xkyaj.²⁸Q'manxa kye: A nintnam ja'lu min nniman weye' ayine' Dyos Manb'aj, ex min tajb'il tu'n ttzak'it. Majx matxi' kub' naju' ax toj ttzi, chiku'ya, chi Dyos. K'u'lb'il kywitz witzleb' toj Jerusalen²⁹¡Aj Jerusalen, kyjomil kywi'ye' ex kyxonxe'! ¡Kyb'itzanx jun b'itze' b'isb'ajilx kyib'aju' b'us toj chq'ajlaj! Qu'n matxi' tzaj ttx'u'jil Qman Dyos kyi'ju' xjal toj Jerusalen, matxi' che kyajtkolb'i'n ex matxi' che eltik'o'n.

³⁰Chi Qman Dyos: Makyb'incha xjal aj Juda min nkub' toj nwitze': mache kub' kyq'o'n kywitzleb' ik'o'nqe' wu'ne' toju' ja te k'u'lb'il weye', mixti' xxikynima'n.³¹Jaw kyb'incha'n q'olb'eb'l te Topet toju' b'ya' B'en-inom, tu'n kykub' kytz'e'ysa'n kyk'wal ex kymyal, mya nchaq'ene' kye, expe' myawe' xima'n wu'n.³²Qu'mtzun ayine' Dyos Manb'aj nchin yolin, tzul q'ij lay txiq'ma'ntl tb'iju' najb'il lu Topet ex B'ya' B'en-inom, atl tb'iju' k'okyel: B'ya' B'iyb'il xjal. Tojtzun Topet che b'elexa' mqu'n kyimni qu'n mixjalojatl tu'n kyku'x mqu'na'.³³Che b'ajel kych'yo'n k'utz ex toj k'u'l txkupju' xjal lu kyimniqe'tl, ex mix-a'lo'te kxel xla'jankye.³⁴Che b'el nnajsa'ne' b'itz te ninq'ij ex te tzalajb'il, ex b'itz te mjeb'le'n kyoju' nimaqtnam toj Juda ex kyoju' b'e toj Jerusalen, tkyaqilju' tx'otx' kjel chq'ajlajix. Chi Qman Dyos.

¹Chi Qman Dyos: Tojtzu'n tq'ijlalil lu che b'je'letz q'i'n kyb'aqilju' nimaqkawil ex nejenel toj Juda, toj kymuqb'il, ex kyb'aqil pale, sanjelal exqe' ẍe najan toj Jerusalen,²che kjel woqb'a'ntzuntz toj q'ij, toj tqan xjaw ex che'w, kywitzu' ekyk'u'jla, e'ajb'en kye, exilpe kyi'j, exjelun ex ek'ulun kye. Mix-a'lo' kjawil iq'inkye tu'n kyku'x mqu'n. Che kjelten twitz, naku'j tz'is.³Aye'tzu'n che kjel anq'in kyxolju' xjal myab'a'n qe' lu, jaxjaku'tzun mache'xa' nsputi'ne', a kkyachu' tu'n kykyim, mya tu'n kyanq'in. Ayine' Dyos Manb'aj te tkyaqil ipumalj nchin q'mante. Tz'e'ysb'il kywitz aj Israel tu'nju' e'jaw miltz'uj ti'j Qman Dyos

⁴Jeremiy, q'manxju'ya tqanil lu wu'ne' teju' tnam:
Qa ati jun nkub' tz'aq, in jawe'tl; qama tz'el txalalan ti'ju' b'e, in pon jumajtl toj.⁵Atzunta, Israel, ¿tiqu'n xjawa' miltz'uja wi'je'? ¿Tiqu'n majx machin kyej tkolb'i'na? ¿Titiqu'n inxi'x kub' tpi'sa'ntib'a ex min tajb'ila tu'n tanjtzti'ja?⁶Matxi' chin kub' tene' b'ilkyeye' ex mix-a'loxi'te nb'iye' inwt anjtzti'j tanmi tu'nwt tmante axxi'x: ¿ti'tzu'n matxi' nb'inchaye'? chiwt. Kykyaqile' qo'ya kyele' toju' kyb'eye' kse'nqe' chej mixti' juk'b'ilkye ojqel kyel xi'kyxi' toj q'oj.⁷Naqpena'te' pich' siwenya nlik'ik'inje twitz kya'j b'i'n tu'n jtoj tz'anjtzti'j. Exqe' jun ch'ix paloms, kolondrin ex kruy b'i'n kyu'n jtoj che'x toj juntl tenb'il. Aye'tzunkye', ntaname', min kyojtzqi'n qe'ye' nkawb'ile'.⁸¿Se'n taq'wi tu'n kymanteye' qa ati kynab'le' exqa ati nkawb'ile' kuky'i'le' ayine' Dyos Manb'aj? ¡Matxina' ku'x kychuku'n ajtz'ib'al, tu'n tz'ib'b'il chajyolil!⁹K'elil kych'ixawju' xjal ati knab'l lu, kb'elkyi'j, kse'n txkup ajkykub' toj xpatxab'. ¿Jatzunta' kynab'l, matxina' tz'elkyik'o'nju' nyole'?¹⁰Qu'mtzun che kxe'l nq'o'ne' kyxu'jil kye txqantl ichan, ex kxe'lu' kytx'otx' kye txqantl xjal. Qu'n kykyaqilx, e'nimaq ex k'ok'e', o'kxtzu' nche ximana' ti'j q'inumal myab'a'n kanb'ab'ente; kykyaqilju' sanjelal ex pale nche sb'un.¹¹Naq nkyq'a'na'n tk'ixb'len ntaname' ti'jxi'; inkyma'n qa tkyaqil b'a'nile, extzun mixyab'a'n¹²¡Inwtlo kub' kych'ixwe'n ti'xti' nkyb'incha'n lu inel wik'u'ne'! Aye'tzunkye, ¡mixpeti'x nkyna'n tu'n kych'ixwi! Mitzunloyate' tu'n tkub' kych'ixwe'n. Qu'mtzun ajtkub' ntz'e'ysa'ne' kywitz, che takpujel ex che kb'eltz'aq kse'nqe' txqantl. Ayine' Dyos Manb'aj nchin yolin, Chiku'ya, chi Dyos.

¹³Chi Qman Dyos: Kjawil ntx'e'mu'ne' ntaname', naku'xwitloj njoyet triy. Lay kyejten jun twitz ub'a ti'j tqan, ex lay kyejten jun iw ti'j tqan. Naq kyxaq tzqij che kjelten. Chij.

¹⁴Ktma'tzun tnamtz: ¿Ti'tzu'n nb'ajqe tzalu? ¡Qo'qe' qkyaqil kyoju' nimaqtnam kuwsa'nqe', tu'ntzun majx tu'n qkub' b'yo'n! Qokyimel tu'n Qman Dyos; ntzaj tq'o'n b'i'yb'il toj qk'wa' a' qu'n ob'inchan il twitz.¹⁵Intoq qo ayon ti'ju' b'a'n ex mixti'xi'te b'a'n qk'am, Intoq qo ayon tu'n qq'anit ex naq xob'ajil ati.¹⁶¡Luju' ajq'oj tzul! ¡Q'ojq'ojqe' tchej nche q'ajti tzmax Dan! Max nlu'lun tkyaqilju' tx'otx' kyu'n ajkyjaw ẍch'in. Luqe' che ul xitulteju' tx'otx' ex tkyaqilju' tq'inumal e'nimaqtnam kyuk'i'lxi' najlqe' kyoj, chiku' tnam.

¹⁷Chi Qman Dyos: Che tzajel nq'o'ne' kan b'iyol kyi'je', che okyel tx'a'ne' kyu'n; mixti'te' mayn kmqolkye. Chij. Exch'yon ttanam Jeremiy toj tk'u'j¹⁸Mixti'tl q'a'nb'il teju' nk'ixk'oje', xi' nkub'aje'.¹⁹Q'ojq'oj toj kywi' ntaname' tu'n k'ixk'oj toj tkyaqilju' tx'otx': ¿Mixtzun a'lo'tl Qman Dyos toj Syon? ¿Ma mixa'lo'tlju' nimaqkawil atzu'? chechij. Atzunte Qman Dyos tzaj ttzaq'we'n: ¿Tiqu'n soka' kyq'o'ne' ntx'u'jile' tu'nju' nche k'ulune' kye witzileb', kyeju' junxi'tl dyos mixti'x kyajb'en? chi Dyos.²⁰Matzik'u' q'ijal, mab'jawu' twitz awal extzun mixti'xqe kolb'ilqe.²¹Inchin yajtiye' tu'nju' yajb'ilte ntaname'; matxi' kub'wi'je' tu'n b'is ex xob'il.²²¿Ma mixtzunloti' jun q'a'nb'il toj Kalaad? ¿Ma mixtzunloti' jun atzu' tu'n tq'anante? ¿Tiqu'ntzun mixti' nb'entju' ntaname'?¹¡Noqwit t-xiklil a' qe' nwitze', ikywit ta'l nwitze' kse'n tnimal a', tu'ntzun woq'e' q'ijtl ex qonik'an kyi'ju' kyimni toj ntaname'!²¡Noqwit ati jatu'n nnajana'ye' toj chq'ajlaj, tu'n nxi' oqe' najchaq ti'jxi' ntaname'!
Qu'n kykyaqilx min xjapun tyol Qman Dyos kyu'n jun k'loj xjalqe' ma jawkyi'nkyib'.³Majx naq'li kytzi tu'n kychan yol naku'j nche smajin. Mixti'x nche yolin ax toju' tx'otx'; xi'kykub' ichinxi'xtl atl junjun q'ij toju' myab'a'n: Intma'n Qman Dyos ikjalu: Min kyajb'il tu'n telkynik' weye', chij.

⁴Lay qetl tk'u'j jun xjal ti'j juntl naqpe' ti'j titz'in mo ti'j ttzik naqna' nkysb'u'n kyib'ju' kyitz'inkyib' ex njawkyi'n amiw yol ti'j jun ex ti'j juntl.⁵Teyile junjun nxmayin ti'j juntl, mix-a'lo' jun ax yolin. Matxi' che nq'et tu'n kychan yol taq'wixqe'xi'x, layx⁶kyej kyu'n.
Chi Qman Dyos: ¡Naqx sb'ub'l, naqx chajyolil! Min tajb'ilju' ntaname' tu'n teltnik' weye'.⁷Qu'mtzun ayine' Dyos Manb'aj te tkyaqil ipumalj nchin q'mante: ¿Ti'tzuntl knb'incha'ye' ti'ju' ntaname', qa mya tu'n t-ẍtilset toj q'aq'?⁸Iky kyaq'ju' kse'n talsmaj nb'iyun; naqx nche chanyol. Inche'x kyq'olb'e'n kamiw tuk'i'l tzalajb'il extzun nkub' kyq'o'n xpatxab' kwitz.⁹¿Ma laytzun kub' ntz'e'ysa'ne' kywitz tu'n kypaju' ti'xti' lu? ¿Ma laytzun txinq'o'ne' tleq' jun tnam ikju'? Ayine' Dyos Manb'aj nchin yolin.

¹⁰Che oq'e' ex che jiq'chanqe'ye' kyi'ju' witz, che uxine' kyi'ju' kojb'il te k'ik'leb'l, qu'n matxi' che b'aj tz'e'y ex mix-a'lo'tl inik' kyoj; mixti'tl tq'ojq'ojel toj kywi' alu'mj kyoj, eb'ajxpena' oqju' pich' exqe' tojk'ul txkup.

¹¹Kyjel nq'o'ne' Jerusalen naq tik'lenxtl, kjelten te kyja xo'j; che kjel chq'ajlajixju' nimaqtnam toj Juda wu'ne', che kjelten mixti' xjal kyoj. Chi Qman Dyos.

¹²¿Alkye jun atixi'x tnab'l tu'n tkane' ja'lu toj twitz? ¿Alqe matxi' txityek'u'na' Qman Dyos ti'xti' lu tu'n t-xitchik'b'a'n kye txqantl? ¿Tiqu'n b'ajni xitu'nju' tx'otx', tzqij naku'j chq'ajlaj mix-a'lo' nik' toj?

¹³Tzaq'web'l tu'n Qman Dyos: Matzaj tkyaqil ja'lu, qu'n kyej kykolb'e'n aj Israel xnaq'tzb'il b'ajx nq'o'ne' kye; min nxikyb'i'ne' ex mixjun kub'kyanq'i'n.¹⁴E'anq'in toju' tch'uẍal kyanmi, ek'ulun kwitzju' mya dyosqe', kse'nxju' xiyek'u'n kye kyu'n kyman.¹⁵Qu'mtzun ayine' Dyos Manb'aj te tkyaqil ipumalj, nchin q'mante: kxe'l nq'o'ne' kywa k'axi'x, kxe'l nq'o'ne' kyk'wa' a' tku'x b'i'yb'il toj.¹⁶Che kxe'l nslamu'ne' kyoj nimaqtnam min kyojtzqi'n ex min kyojtzqi'n kyman; knb'incha'ye' tu'n tljonjtz toj kyq'ij tu'n kykub' b'yo'n tu'n k'uẍtx'e'nb'il, tzmax ajkymankun kykyaqil, chi Dyos. Oq'el toj Jerusalen¹⁷Chi Qman Dyos nimtipumal kjalu: ¡Kyb'intzpe'ye'! che kytxkontzju'ye' qya ax kyaq'unju' tu'n kyoq'.

¹⁸¡lwix kukytzaj tu'n kyoq' tu'n b'is qi'j; nimxwit ta'l qwitz tz'el che exwit ta'l ttxowqwitz tu'n qoq'el!¹⁹Tzmaxtzu' Syon npona' tq'ojq'ojel wi'yj tu'n k'i'xk'oj: ¡Matxi' qokub' xitu'ne'!, ¡matxi' tz'el qch'ixawe'! Kjel qtzaqpi'nju'ye' qtx'otx'e', matxi' che kub' xitu'nju' qjaye'.²⁰Qya, kyb'intze' tyol Qman Dyos, kyb'intzju'ye' tqanil tu'n. Che kyxnaq'tzanxe' kyale' tu'n kyoq' exqe' qya kamiwe' tu'n kymante toj kyoq'el:²¹Matz'okxju' kamik toj qjaye', mapon toju' qjaye' te kawb'il; inche tb'yo'n k'wal kyoj b'e exqe' ku'xun jachaq ta'qe' xjal.²²E'kyaj woqonje ichan kyimniqe'tl kse'n tz'is toj kojb'il kse'n spiy nkyej tz'aq tu'n ch'umal ex mix-a'lo' njaw sk'onte, chi Qman Dyos.

²³Lu ntma'n Qman Dyos: Lalun jaw tnima'ntib'ju' ati tnab'l tu'nju' atixi'x tnab'l, exju' kuw tu'nju' ati tipumal expe' q'inun tu'nju' tq'inumal.²⁴Qa ati jun tajb'il tu'n tjaw tnima'ntib' nima'nktztib' tu'nju' ojtzqi'nqine' tu'n, tu'nju' b'i'n tu'n ayine' Dyos Manb'aj nimxi'x nk'u'jlalile' twitz tx'otx', in nb'incha'ne' tnik'alilti'j ex ttxolilti'j, atzunwe' nchin tzalaj ti'j. Ayine' Dyos Manb'aj nchin yolin, chi Dyos.

²⁵Lu ntma'n Qman Dyos: Tzul q'ij kb'el ntz'e'ysa'ne' kywitz kykyaqilju' tnam o'kx nb'jo'ka' kyq'o'n kyechel ti'j kychib'jil:²⁶Aye' Ejipt, Juda, Edom, Amon, ex Moab', ex kykyaqilju' najlqe' toj chq'ajlaj tek' nb'aj kyjon kywi'. Qu'n kykyaqilju' tnam lu ex tkyaqilju' tnam Israel, mixya okslalqe' weye' toj kyanmi. Witzleb'i'n ex axxi'x k'u'lb'il twitz Dyos

¹Tnam Israel, b'intzju'ya ntzaj tma'n Qman Dyos teya lu.²Chi Qman Dyos:
Lalun tz'el kykno'nju'ye' nkyb'incha'n txqantl nimaqtnam ex lalun che xob'e' kyeju' techlal twitz kya'j kse'n nkyb'incha'n nimaqtnam lu.³Mixti'te' tajb'en kyokslab'lju' tnam lu. Injaw kytx'emu'n jun xmil toj ku'j, juntzun b'inchal tilb'ilal nkub' b'inchante tu'n taq'unb'il,⁴nb'jo'k twiqo'ntzuntz tu'n saqpwaq ex q'anpwaq, inb'aj kyklawẍi'ntzu'ntz tu'n pojb'il tu'n lalun tzik' tz'aq.⁵Naku'j xob'tzb'il pich' qekye' witzleb' toj jun tnej awal melon; min nb'ent kyolin, inche'x iqa'n, qu'n min nche b'et. Lalun che xob'e' kye, mixna' a'loqi'j nkyb'incha'na' taq'wix mo b'a'n. Chi Qman Dyos.

⁶Nman Dyos, mix-alo' jun kse'n aya: nimta toklen, nim toklen tb'iya ex nimtipumal.⁷¿Alxi'xwitlokye min xob' teya, nimaqkawil kyeju' nimaqtnam? Atita toklen tu'n kyxob' xjal teya. Kyxol kykyaqilju' ati kynab'l ex nimaqkawil twitz tx'otx', mix-a'lo' jun kse'n aya.⁸Kykyaqilx xnakqe', Mixti' kynab'l. ¡Mixti'xte kynab'l k'elel ti'j jun piẍ tze!⁹Naq saqpwaqqe' kywitzleb' tzajni q'i'nqe' Tarsis, ex q'anpwaqqe' tzajni q'i'n Upas; naq b'incha'nqe' kyu'n b'inchal tilb'ilal ex aq'unal ti'j tb'anil k'uxb'il oksa'nk kyxb'alun morad ex kyeq, kykyaqilx b'incha'nqe' kyu'n xjal b'a'n kyxtokyinte.¹⁰Ate Qman Dyos axxi'x Dyos, aju' Dyos itz', nimaqkawil tejumajx. Majx nlu'lunju' tx'otx' ajttzaj ttx'u'jil; lay tzik'xju' ttx'u'jil kyu'n nimaqtnam.

¹¹(Kymanxe' aj Israel kyeju' nche niman kye txqantl dyos: Che najelkye' dyos twitz tx'otx'ju' myaye' eb'inchante kya'j ex tx'otx'; mixti'tl jun kjelten tjaq' kya'j, chechiku'ye'). B'itz Ajwalb'ilte Dyos (Jer 51.15-19)¹²Kub' tb'incha'n Qman Dyos tx'otx' tu'n tipumal; tuk'i'l tnab'l kyaja' tkuwsa'n twitz tx'otx', ex ximan tej tkub' tb'incha'n kya'j.¹³Intinun twitz kya'j tu'n ajttzaj julin jb'al, inche jawtiq'i'n muj tzmax mankb'il ttxa'n tx'otx', inche ttilky'a'n q'ankyaq toj jb'al ex netztiq'i'n kyq'iq' jak'u'na' tu'n.¹⁴Kykyaqil xjal mixti'x b'a'n kyu'n ex mixti' kynab'l Kyu'nx witzleb' nela' kych'ixawju' eb'inchankye: naq tilb'ilalqe', sb'ub'lqe' ex mixti' kychwinqlal;¹⁵mixti'x kyajb'en, ch'ixb'ajilqe'x, che b'elt-xitu'n Qman Dyos ajkyok toj xjel.¹⁶¡Atzunte' Dyos ajb'en Jakob' te, ate b'inchante tkyaqilju' ati! Jaw t-sk'o'n tnam Israel te tetzb'il. A tb'iju': Dyos Manb'aj te tkyaqil ipumalj. Yol kyxol nintnam tuk'i'lju' Sanjelal¹⁷Nintnam, txoli'ntl ti'ja, b'uyimqe'ya tti'xti'ya.¹⁸Qu'n lu ntma'n Qman Dyos: Ja'lotzun che pomel nq'o'nju'ye' xjal najlqe' toju' tx'otx' lu najchaq. che kb'el nq'o'ne' toj yajb'il qla'tzuntz qama chin kyjoye'. Chij.

¹⁹¡Qab'anx nwitze' toju' xitb'il weye'! ¡Mixti' q'a'nb'ilkyeju' nk'ixb'lene'! ¡Kub'tzun nximane' qa k'ik'exju' k'ixk'oj lu wu'ne'!²⁰Matxi' kub' xitu'nju' nxmuje', matxi' che b'aj laqj kykyaqilju' aqwil. Matxi' chin kyej kykolb'ine' nk'wale'; ¡oje che b'aj! Mix-a'lo'tlte jun tu'n kyjaw tb'incha'n npache' tu'nwt kyxi' t-slik'u'n xb'alun kyib'aj.

²¹Tx'yan qekye' nejenel teju' tnam lu: min nche jyon ti'j Qman Dyos. Qu'mtzun matxi' che k'ulb'an matxi' che b'ajx slamj kykyaqilju' kyrit.

²²¡Kyb'intzpe'ye'! ¡Lu jun tqanil! Ktzajel jun tq'ojq'ojel xitb'il toj jun tx'otx' toj tb'a'nq'ob'kya'j che kjel tq'o'n nimaqtnam toj Juda naq chq'ajlajtl, naq xo'j che najal kyoj.

²³Nman Dyos, b'i'n wu'ne' qa mya toj tq'ob'ju' xjal ta' tchwinqlal, qa mya toj tq'ob' ta' jatu'n tpon b'aja'.²⁴Qo ttzaku'ma tojxi'x tnik'alilti'j, mya tuk'i'l ttx'u'jila, qu'n jaku' qokub' tnajsa'na.²⁵B'ajsantzju'ya ttx'u'jila kyib'aju' nimaqtnam ju' min nelkynik' teya, kyib'aju' tnam min nxi' na'na kyu'n, qu'n matxi' b'ajx kyb'elq'un ttanam Jakob', majx makub' kyxitu'n naq tik'lenxtl toju' tx'otx' kyu'n. Min xinima'n yol kyejni b'entti'j

¹Tzaj yolin Qman Dyos weye', ayine' Jeremiy ex tma:²Tu'n tkub' kyb'i'n aj Israel yol teju' yol kyejni b'entti'j. Yolina kyuk'i'lju' xjal aj Juda exqe' aj Jerusalen,³q'manxa kye, qa ayine' Dyos Manb'aj, nchin q'mante qa majx k'elel wik'u'ne' xjal min ẍe'xtnima'nju' yol teju' nyole' kyejni b'entti'j.⁴Aju' yol kyej b'entti'j wu'ne' kyuk'i'lju' kyyajilb'ene' tej kyetz wi'ne' toj Ejipt, ikytoq tnamju' lu kye kse'n jun chuj janokx q'eta' k'uxb'il tu'n ttzaj b'unb'ix. Xinma'ne' kye: Chin kyb'ime', kyb'incha'nxe' tkyaqilju' manchaq'e' kyeye', che okyeltzuntze' te ntaname' ex ayine' Dyos kyib'aje'.⁵Qama chinx kyb'i'ne', kjapumelwe' nyol xintziya'ne' kye ojtxi' kyyajilb'ene', qa kxe'ltoq nq'o'ne' jun tx'otx' kye, aju' kytx'otx'e' ati ja'lo, janqojla' lech ex ta'lkab' naku'j a'. Nchije' kye. Chi Qman Dyos.
Ayintzunwe' xintzaq'we'ne' te: Ikxwitju' Nman Dyos, nchije'.

⁶Tzajtzun tma'n Qman Dyos: Pakb'anxju'ya yol lu kyoj nimaqtnam toj Juda ex kyoju' b'e toj Jerusalen. Q'manxa kye xjal tu'n ttzaj kyb'i'nju' yol teju' yol kyejni b'entti'j, che japunxtzun kyu'n.⁷Tej kyetzwiq'i'ne' kyyajilb'ene' toj Ejipt, o'kx xiwab'tzi'nju'ye' kye tu'n kyb'in weye', atxi'xtzunj ex toju' tq'ijlalil ja'lo inx xiwab'tzi'ne' kye.⁸Aye'tzunkye mixti'x nokye' toj kywi', min nxikyb'i'ne', e'anq'in toju' myab'a'n tokx toj kyanmi. Min kyaj tu'n kyjapunju' nyole' kyu'nju' nchaq'e' kye, tzajtzun nq'o'ne' tz'e'ysb'il kywitz q'ma'nqe' toju' yol kyejni b'entti'j wu'ne'. Chi Dyos.

⁹Tzaj tma'ntl Qman Dyos weye': Injaw kyb'u'yi'n kyib'ju' xjal aj Juda exqe' aj Jerusalen wi'je'.¹⁰Ax ilju' nkyb'incha'n axju' kyb'incha ojtxi' kyyajilb'en, kub' kypi'sa'n kyib' nwitze', exilpetzuntz k'ulul kywitz txqantl dyos. Junx e'ela' aj Israel kyuk'i'l aj Juda, min xikynima'n nyole' kyej b'entti'j kyuk'ilju' ojtxi' kyyajilb'en.¹¹Qu'mtzun ktzajel nq'o'ne' jun taq'wixil kyib'aj, lay che tzaqpaj toj. B'a'ntzunqa mache ẍch'in qanil o'nb'il weye', lay che'x nb'i'ne'. Ayine' Dyos Manb'aj nchin yolin.¹²Che kxe'ltzun xjaltz aj Juda ex aj Jerusalen qanil o'nb'il kyeju' dyos jankub' kyq'o'na' sturak, ex layx che klet kyu'n ajttzaju' taq'wixil kyib'aj.¹³Txqan kydyos aj Juda kse'nx kyajlal nimaqkytanam, ex matxi' jaw kyb'incha'n aj Jerusalen txqan q'olb'eb'l tu'n tkub' kyq'o'n sturak twitz B'aal, kse'nx kyajlal b'e kyoj nimaqtnam.¹⁴Qu'mtzun, lalun k'uluna nwitze' Jeremiy kyi'ju' tnam lu, lan chin tzajtna'na ex lalun kub'sana kyi'j, qu'n lay che'x nb'i'ne' ajkyqanin o'nb'il toju' yajb'il.

¹⁵¿Titi' nkyjyo'n aj Israel k'u'jla'nqe' wu'ne' toju' njaye' te k'u'lb'il, extzun matxi' kyb'incha txqan ti'xti' taq'wix? ¿Ma oktzun che kletel toju' yajb'il tu'n seb' ex chib'j ajtkub' kyq'o'n te chojb'il nwitze'?¹⁶Atoq tb'iju' Tqan olib'o pujin txijli toj twitz tb'anil wu'ne', ayine' Dyos Manb'aj, atzu'n ja'lo kb'el ntz'e'ysa'ne' t-xaqa ex che b'el njachu'nju'ye' tq'ob'a tu'n q'ankyaq ntinun.

¹⁷Ayine' Dyos Manb'aj te tkyaqil ipumalj, inku'x awante, matxi' nchaq'ju'ye' taq'wixil tib'aj tu'n tpaj kyil aj Israel ex aj Juda, qu'n matxi' tz'ok kyq'o'n ntx'u'jile' tu'n kub' kyq'o'n sturak twitz B'aal, chi Dyos. Kyajb'ilju' tajq'oj Jeremiy tu'n tkub' Kyb'yo'n

¹⁸Tzaj tma'n Qman Dyos weye' qa intoq che ximan wajq'oje taq'wix wi'je'. E'tjaqju' nwitze' tu'n tel nnik'e' ti'j.¹⁹Kyepenitoq weye', xi'toq nxi'q'i'ne' toj b'i'yb'il naku'j qpoj tman rit, mixtoqti' b'i'n wu'ne' qa intoq che ximan taq'wix wi'je'. Intoq kyma'n: Qtx'e'munktzju' tze xa'wanku' ja'lo, qxb'oqi'nktz twitzju' tx'otx' kyxolju' itz'qe', tu'ntzun mitzaja' na'tl. Chechij.

²⁰Atzunta Nman Dyos nimtipumala, jun ajkawilta tz'aqlixi'x. kanlixi'xju' t-xim xjal toj twitza. Q'oma anb'il tu'n nka'yinteye' ajtkub' ttz'e'ysa'na kywitzju' xjal lu, qu'n toj tq'ob'a ta'.

²¹Atzu'n kyeju' ichan aj Anatot, aye' kyajb'iltoq tu'n nkub' kyb'yo'ne' ex intoq kyma'n tu'n lalun chin yoline' toj tb'i Qman Dyos, qu'n kyajb'ilatoq tu'n nkub' kyb'yo'ne',²²chi Qman Dyos nimtipumal kye: Kb'el ntz'e'ysa'n kywitze': che kyimelju' ku'xun toj q'oj, aye'tzu'n kyk'wale' ex kymyale' che kyimel tu'n we'yaj.²³Mixti'te' jun kjelten qu'n tzul q'ij kb'el ntz'e'ysa'n kywitze' ichan aj Anatot, ex ktzajel nq'o'ne' taq'wixil kyib'aje'. Chi Qman Dyos. Xitma'n sanjelal te Qman Dyos¹Nman Dyos, qama chin kutene' yolil tuk'i'la tu'n tpaj jun ti'xti'; naq o'kxta ax tyola; wajb'iltzunwe' tu'n txinqani'ne' lu teya: ¿Tiqu'ntzun b'a'n nnela' tkyaqilju' ntb'incha'n b'inchal myab'a'n? ¿Titiqu'n toj nak'b'il ta'qe' njaw kyi'jkyib'?²Inche ku'x tawa'na, ex nche lok'an, nche ch'iy ex inche witzan. ajkyyolin naku'j nqaku' ta'qe' tk'etza, atzu'n toj kyanmi najchaq ta'qe'.³Atzunta Nman Dyos, tojtzqi'nqina; toktwitza wi'je' ex kanli twitza tkyaqilju' nxime' ti'ja. ¡Iq'inqe'xju'ya xjal lu toj b'i'yb'il naku'j ritqe'; q'onka kyechel tu'n kykub' b'yet ajtpon q'ij kye!⁴¿Ma kukxtzun ktenb'il tx'otx'ju' tzqij ex ch'u'ẍqe' itzaj toj kojb'il? Ljo'n kyb'aj kyimu' txkup ex pich' tu'n tpaj kyilju' xjal twitzju' tx'otx' toj kynab'l qa min ntka'yi'na nkyb'incha'n. Tzaq'web'l tu'n Qman Dyos⁵Qa ma'xi'x kub' siktiya tu'n tojqelb'ena kyuk'i'l xjal nche ojqelan tu'n kyqan, ¿se'ntaq'wi tu'n tok tq'o'ntib'a ojqelal kyuk'i'l xjal nche ojqelan ti'j chej? Min nb'ajx tk'u'ja toj jun tx'otx' ati nak'b'ila toj, ¿ti'tzu'n ktb'incha'ya toju' nin xaq ttzi Jordan?⁶Ma'pena' che jaw miltz'uju' titz'inku'xi'xa mo ttzika ti'ja, ex njaw toj kywi' nche ilin teya ttz'elti'jxi'ya. Lalun tz'okqe tk'u'j kyi'j, b'a'ntzun qa majx b'a'n che yolin tuk'i'la. Nb'isun Qman Dyos ti'ju' ttanam⁷Matxi' kyej nkolb'i'ne' ntaname', matxi' tz'el wik'u'nju'ye' wetoqe', matxi' kub' nq'o'nju'ye' tnam inxi'xtoq nk'u'jla'ne', toj kyq'ob' tajq'oj.⁸Aju' tnam lu, etza'ntoq wu'ne', ja'lo naku'j b'alun toj k'ul weye'; intzanunk wi'je', qu'mtzun nel wik'u'ne'.⁹Iky ntanamju'ye' kse'n jun pich' tb'anilxi'x t-xik', inche q'ojin txqantla pich' ti'j. ¡Kukytzaje' kykyaqile' tojk'ul txkup; kyb'uyintz kyib'e' tu'n kyule' toju' ninwan!¹⁰Nim txqan nejenel ajq'ojqe' matxi' kub' kyxitu'n wawale' ub'a, matxi'xi'x b'aj kywab'e'n nkojb'ile', matxi' kub' kyxitu'nju' tx'otx' nchin laqje' ti'j matxi' kyej chq'ajlajix kyu'n.¹¹Matxi' kub' kyxitu'n, matxi' kyej chq'ajlajtl kyu'n ja'lo nnul toj nk'u'je'. Tkyaqilju' tx'otx' chq'ajlajtl, ex mix-a'lo'xte nb'ajx tk'u'j ti'j.¹²Eb'ajtzaj xjal xitul kyib'aj kykyaqil b'us toj chq'ajlaj, qu'n ati jun nk'uẍtx'e'nb'ile', ayine' Dyos Manb'aj tkyaqilju' tx'otx' kb'el nxitune' tzajx toj jun ttxa'n ex kpomelx toj juntl, ex mix-a'lo'qex ktenb'ila' nak'b'il.¹³Triy xikyawa'n, atzun ch'i'x jaw kyb'u'yi'n; kub'o'lj tkyaqilju' kyaq'unb'en. Mixti'xte twitz kyawal jaw qu'n matzaj ntx'u'jile' kyi'j. Chi Qman Dyos. Tzaj ttziya'n Qman Dyos tyol kyeju' tnam Nqaku' ta'qe' tk'etz Israel

¹⁴Intma'n Qman Dyos kyi'ju' tnam b'inchal myab'a'n, nqaku' ta'qe' tk'etz Israel, aye' e'kub' xitunteju' tx'otx' xitq'o'n te tetzb'il Israel ttanam: Che jawil nxb'oqi'ne' toju' kytx'otx', ex k'elitz wiq'i'ne' Juda kyxol.¹⁵Kyb'jawlenxi'tzun nxb'oqi'ne', ktzajel q'aq'an nk'u'je' kyi'j, che anjetz wiq'i'n jumajtle' tojx kytx'otx' toj kytanam.¹⁶Axxi'x aye'nakye exi' yek'unte kye ntaname' tu'n kytziyante kyol toj tb'i B'aal, atzu'n ja'lo b'a'n kykub'ten kyxolju' ntaname', qama kyoksla kyokslab'lju' ntaname' exqa makytziya kyol toj nb'iye': Toj tb'i Qman Dyos, qa chechi.¹⁷Aye'tzu'n nimaqtnam min nchin tb'i'ne', kjawil nxb'oqi'ne' tuk'i'lxi' tlok', ex kb'el nxitu'ne'. Ayine' Dyos Manb'aj nchin yolin, Chij. Jun techlal tu'nju' Min njapun tyol Qman Dyos kyu'n aj Israel

¹Chi Qman Dyos weye: Kutxi'ya lq'ol jun k'alb'il sed ex k'lonka tk'u'ja, ex lalun ku'x tak'sa'na toj a', chij.²Tzajtzun nlq'o'ne' k'alb'il, kse'nx tchaq' Qman Dyos weye' ex oknk'lo'ne' nk'u'je'.³Tzajtzun yolintl Qman Dyos weye' ex tma:⁴Q'intzju'ya k'alb'il tok tu'na, ju' tloq'a, kutxi'tzuntza ttziju' nin a' Ewprates, ewankjtzuna atzu' toj tk'atxab' jun pik. Chij.⁵Nxi'tzuntze' ttziju' nin a' Ewprates, xiwewa'ntzuntze', kse'nxju' tchaq' Qman Dyos weye'.

⁶Tb'ajlenxi'tzun b'a'npun q'ij, tzaj tma'n Qman Dyos weye': Kutxi'ya ttziju' nin a' Ewprates, ex q'intzju'ya k'alb'il xinma'ne' teya tu'n txi' tewa'na atzu', Chij.⁷Nxi'tzuntze' ttziju' nin a' Ewprates, xinjyo'ne' toju' tx'otx' ex jatzwiq'i'ne' k'alb'il jaxa' wewana'ye', matxi'toq b'aj q'ayj ex mixtoqti'tl tajb'en.

⁸Tzajtzun yolintl Qman Dyos weye',⁹ex tma: Ikytzu'n kb'ela' nxitu'ne' kyninb'ilkyib' aj Juda ex aj Jerusalen.¹⁰Min kyajb'ilju' ntaname' b'inchal myab'a'n lu tu'n t-xikynima'n nchaq'b'ile', xi'lepchqe'ka' ti'ju' tku'x toj kyanmi. Xi' nche ajb'ena'tl ex nche k'ulun kye txqantl dyos. Ikyqe' kse'n k'alb'il lu, mixti'tl tajb'en.¹¹Kse'n nokjtz'et tk'u'j jun xjal tu'n k'alb'il, ikytoqtzun mujb'ab'lju' wuk'i'le' kyuk'i'lu' tnam Israel ex Juda, tu'n kyok te ntaname' ex tu'n t-xikyoli'nju' nb'iye', tu'ntzun kyok ninb'ilweye' ex ajwalilweye'. Aye'tzunkye min eb'in weye'. Ayine' Dyos Manb'aj nchin yolin, chi Dyos. Juntl techlalju' tz'e'ysb'il Witzb'aj Tzul

¹²Ex q'manxa kye: Chi Dyos Manb'aj kyib'aj aj Israel: Alkyexku' xar knojel tu'n b'in, chiku'ya kye. ¿Ma miẍtzunti' b'i'n qe'qu'n qa tkyaqil xar in noj tu'n b'in? chechilo aj Israel teya.¹³Atzunta tzaq'we'nxa kye: Chi Qman Dyos qa che b'el ttx'ujt-sa'n kykyaqilju' najlqe' toju' tx'otx' lu; e'nimaqkawil nche kub' qe toj tq'uqb'il Dab'i, e'pale, e'sanjelal ex kykyaqilju' najlqe' toj Jerusalen.¹⁴Che b'ajel tpa'ntzuntz kse'n xar, jun ti'j juntl, e'manb'aj ex k'walb'aj. Lay tzaj q'aq'an tk'u'j kyi'j, layx tzaj laqj tk'u'j kyi'j. Aku' Dyos Manb'aj inq'mante, chiku'ya kye. Chij. Q'ma'ntl te Israel¹⁵¡Israel, matxi' yolinte Qman Dyos! Lalun jawkynima'n kyib'e', kyb'inku'ye'.¹⁶Kynimanktze' Qman Dyos na'mxku' ttzaj tq'o'n qlolj tu'n kyjawtz'aqe' toj k'ul qxopin; na'mxku' tjaw b'entju' spik'un nche ayone' te te qlolj t-xlekumil kamik tu'n.¹⁷Qa min xxikyb'i'ne', chin oq'ile' toj ewaj tu'n tpaju' nimjtib'il ati kyoje; nim ta'l nwitze' k'elil, qu'n jtz'o'nqe'ju' trit Qman Dyos kyu'ne'. Tyol Qman Dyos teju' nimaqkawil¹⁸Q'manxa te nimaqkawil ex teju' t-xu'jil: Kukyku'tze' tib'aj q'uqb'il te kawb'il, che qeku'ye' twitz tx'otx', matxina' ku'tz tz'aqju' kykorone' toj kywi'ye', chiku'ya kye, chi Dyos.¹⁹Txoli'n kyi'ju' nimaqtnam toj Nekeb' mix-a'lo' kb'entel tik'x. Kykyaqilju' aj Juda exni q'i'nqe' majx eb'je'xq'i'n toju' tx'otx'.²⁰Kyka'yinxi'xpe'ye' luqe' ajq'oj che ul toj tb'a'nq'ob'kya'j ¿Jata' jun ch'laj rit xinq'o'ne' tu'n txi' tka'yina, aju' jun ch'laj rit ntnima'n tib'a ti'j? Tqanil qa k'elex q'i'n Israel toj juntl tnam²¹¿Ti'tzu'n ktma'ya Jerusalen aj tkawinjtza kyu'n xjal eb'aj t-xnaq'tza'na? Tzul k'ixk'oj ti'ja kse'n k'ixk'oj ti'j jun qya ajtitz'ji tal.²²Tiqu'ntzun saja' lu wi'je' qa chija, ati tu'n tkane' toj twitza qa tu'nju' nim tila; ¡Qu'mtzun makub' ẍb'iqb'a'na ex makub'yaju'na!²³¿Ma jakutzun ch'exb'en ka'yin jun xjal q'eq twinqil? ¿Ma jakutzun b'ent tel tiq'i'n jun leopa'rt tchinaq'il ti'j? Ikxtzunkyeju'ye' naq'liqe'tle' ti'ju' myab'a'n lay b'ent kyb'inchanteju'ye' b'a'n.²⁴Qu'mtzun che elix nslamu'ne' kse'n tz'is njaw tiqa'n kyq'iq' toj chq'ajlaj.²⁵Ax teju'ya lu Israel, atzun tajb'ilju'ya tu'n nb'inchanteye' teya Ayine' Dyos Manb'aj nchin yolin. Mana' tzik'nna'le' tu'na xi' soka' qetl tk'u'ja kyi'j witzileb' mixti' kyajb'en.²⁶Ikxwe' majx kb'el nẍb'iqb'a'na tu'ntzun tel tch'ixawa.²⁷Matxi' wile' inxi'x el b'aja ti'j, e' tajpaji'na, exju' tchwinqlala mijsoq'x toj ajpaji'n, exqe' tb'inchb'ena taq'wixqe'xi'x kywi' b'us ex kyoj kojb'il. ¡Qab'anx twitza Jerusalen! ¿Ma kukx kb'el tenju'ya toju' taq'wixil? Chi Qman Dyos. Nin q'ijal

¹Tzaj yolin Qman Dyos te Jeremiy tu'n tpaju' k'waj, ex tma:

²In oq' Juda tu'n b'is, Inche b'isunju' nimaqtnam toj, woqo'j qe'ju' xjal twitz tx'otx'. Inxi'x ẍch'in Jerusalen tu'n k'ixk'oj.³Inche'x kychq'o'n q'inun kymajin iq'il a'; inche'xju' majin kyoj xoch, ex mixti'te a', in anjtzkyi'j kyuk'i'l kẍoq' mixti' kyoj inel kych'ixaw ex nche kub' kyeqax, in jax kyktxu'n kywi'.⁴Naq nche kyej ka'yinju' aq'unal toj kojb'il njax kyktxu'n kywi' tu'n kych'ixaw, qu'n mixti'te' jb'al tzqijte tx'otx' b'a'nxi'x.⁵exqepena' kytxu msat toj kojb'il nche kyej kykolb'i'n kyal akxtoq kyitz'ji, qu'n mixti'te' k'ul tu'n kywante.⁶Inche kub' we' tojk'ul b'ur kywi' b'us toj chq'ajlaj, nche jk'un kyq'iq' kse'nkye xo'j; inkub' sjumjix kywitz qu'n mixti'te k'ul tu'n t-xikywan, chij Dyos. Kub'san Jeremiy twitz Qman Dyos ti'ju' tnam.⁷¡Nman Dyos, maskye nqo poqonjtze' tu'nju' qile' qo tonima naqx tu'n tyolinjtzju' tb'iya b'a'n! B'a'npun maj min xjapunju' tyola qu'ne', matxi' qo b'inchan ile' twitza.⁸Aya q'uqb'ab'l tk'u'j Israel, klol qeye' toju' tq'ijlalil ch'uẍ, ¿tiqu'ntzun naku'j najchaq xjala toju' tx'otx' naku'j jun ajb'etu'n xjal naq o'kx inkyejtenju' tu'n tex qonik'an tu'n?⁹¿Tiqu'ntzun ikju'ya kse'n jun xjal naq nka'yin, kse'n jun xjal te q'oj min nb'ent tonin? Nman Dyos, atina'ta qxole', kykyaqil b'ilte qa o'ttanamqo'ya ¡Lalun qokyej tkolb'i'na!

¹⁰Lu ntma'n Qman Dyos ti'ju' tnam Israel: Majx tjonku' tnam lu tu'n tb'et jaxjaku'. Qu'mtzun min nchin tzalaje' ti'j. Ktzajel nna'nju'ye' kyil ja'lo ex che okyel toj xjel wu'ne'. Chij.

¹¹Chi Qman Dyos weye': Lalun kub'sana nwitze' te jun b'a'n teju' tnam lu.¹²B'a'nqa mache mewayin b'a'npun maj, lay che'x nb'i'ne' kykub'sb'il; b'a'nqa matzaj kyiq'i'n txqan chojb'il k'ok'sb'il ex oyaj twitz awal weye', lay chin tzalaje' ti'j. Kb'el nxitu'ne' tu'n q'oj, we'yaj ex tx'u'j yab'il, chi Dyos.

¹³Xi'tzun ntzaq'we'ne' te: Nman Dyos; ate'kna' t-sanjelal kub'salte kyk'u'ju' xjal qa lay tzaj q'oj ex we'yaj, exqa ktq'a'ya nak'b'il lay b'aj toju' najb'il lu, nchije'.

¹⁴Tzajtzun ttzaq'we'n Qman Dyos weye': Chalyol qekye' sanjelal tu'n ikynkyma'nju' toj nb'iye'. Mixti'we' ẍe'x nchq'o'n, ex mixti'xi'we' chaq'b'il txinq'o'n kye, b'ajxpena' chin yolina'we' kyuk'i'l. Naq nokkye' lu toj kywitz, naq njaw kyxima'n, naq sb'ub'l ate'kju' sanjelal q'malte kyeye'.¹⁵Ayine', Dyos Manb'aj, nchin yoline' kyi'ju' sanjelal nche yolin toj nb'iye' ex mya nchaq'ajqe'ye', inkyma'n qa lay tzaj q'oj ex we'yaj toju' tx'otx' lu: che kyimelkye' sanjel lu toj q'oj ex tu'n we'yaj.¹⁶Exqe'tzu'n xjalxi' ja nche b'ina' kye, che kyimel toj q'oj ex tu'n we'yaj, kyuk'i'lxi' kyxu'jil, kyk'wal ex kymyal. Che b'elsnuk'eju' kyxmilal kyoju' b'e toju' tnam Jerusalen, ex mix-a'lo'x jun kb'elix mqunkye. Ikytzun kychja'ya' kyilju'.¹⁷Q'manxju'ya lu kyeju' ntaname'.
Chin oq'tzuntze' q'ijtl ex qonik'an, tu'n tpaj kb'el b'o'lju' ntaname', tu'n tk'ixk'ojelju' tk'ixb'len¹⁸Aj wexe' toj kojb'il, che kxe'l nka'yine' woqo'j qe'tlju' e'kyim toj q'oj; ajtzun wultle' toju' nintnam inche kyim xjal tu'n we'yaj, Exqepena' sanjelal ex pale che kxe'l toj juntl tx'otx' min kyojtzqi'n, chiku'ya, chi Dyos. Yolin Sanjelal tuk'i'l Dyos¹⁹Nman Dyos, ¿mamajx matxi' tz'el tik'u'na Juda? ¿Ma matxi' siktiya ti'ju' nintnam Syon? ¿Tiqu'n xqo' tk'ixb'saya tejumajx? Intoq qo' ayone' tu'n qtene' b'a'n, ex mixti'x xqk'ame'. Intoq qo' ayone' tu'n qq'ananjtze', ex naq xob'ajil ati qi'je'.²⁰Nman Dyos, matxi' tz'el qnik'e' ti'ju' qile' ex kypaju' ojtxi' qyajilb'ene'; matxi' qo b'inchan ile' twitza.²¹¡Lalun qo eltik'o'na, naq tu'n tnimanjtzju' tb'iya, lalun tz'el tik'u'na nintnam. jata' tq'uqb'ila te oklenj! ¡Na'ntzju'ya tyola kyej b'entti'j quk'i'le', japunxwit tu'na!²²¿Ma atitzun jun witzleb' jaku' tzaj jb'al tu'n? ¿Ma tu'nxtib'ju' kya'j ntzaj tq'o'n jb'al? ¡Minti' Taye, Nman Dyos! A na'ta ntzaj q'onte, a na'ta nb'inchankye tkyaqil ti'xti'; ¡Qu'mtzun q'uqli qk'u'je' ti'ja! Tqanilju' tz'e'ysb'il witzb'aj

¹Chi Qman Dyos weye': B'a'nqa e'ten Moyses ex Samwel nwitze' tzalu, layx tzaj laqjwe' nk'u'j ti'ju' tnam lu. Q'manxa tu'n kyex nwitze' ex tu'n kyxi'.²Qatzun matzaj kyqani'n teya ja che kxe'la', q'manxa kye toj nb'iye':
Aye' axkyeju' tu'n kykyim tu'n tx'u'j yab'il, tu'n tx'u'j yab'il che kyimela'; aye'tzu'n axkyeju' tu'n kykyim toj q'oj, tojx q'oj che kyimela'; aye'tzu'n axkyeju' tu'n kykyim tu'n we'yaj, tu'n we'yaj che kyimela'; aye'tzu'n axkyeju' tu'n kyexq'i'n toj juntl tnam, che elexq'i'n.

³Ayine' Dyos Manb'aj nchin yolin: Kyaje' chukchaq tz'e'ysb'il kywitz ktzajel nq'o'ne': Che ul b'iyb'aj toj q'oj, che b'ajel tzaqu'n kyu'n tx'yan, che ul k'utz ch'yolkye, che b'ajel ch'yo'n kyu'n tojk'ul txkup.⁴Knb'incha'ye' tu'n ttzaj xob'el kyi'j kykyaqil nimaqtnam twitz tx'otx' tu'nju' knb'incha'ye' kyi'j, tu'n tpaju' matxi' tb'incha Manases, tk'wal Esekyiy, toj Jerusalen, nimaqkawil toj Juda.

⁵¿Alxi'xkye ktzajel q'aq'an tk'u'j ti'ja Jerusalen?
¿alkye ktzajel laqj tk'u'j ti'ja? ¿alkye kb'ajextk'u'j tu'n tq'aneta?⁶Machin kyej tkolb'e'na, matzaj tmiltz'u'n ttze'lti'ja weye' ayine' Dyos Manb'aj nchin yolin. Qu'mtzun matxi' b'aj npasense', matzaq'pon nq'ob'e' tu'n tz'e'yset twitza ex makub' nxitu'na.⁷Mache'x nsputi'ne' t-xjala kse'n tqan triy, mache b'je'tz wiq'i'ne' kyoju' nimaqtnam toju' tx'otx'; makub' nxitu'ne' ntaname', mixti'qe'tl tk'wal ẍekyaj qu'n min xkyaj ttzaqpi'n tchwinqlal myab'a'n.⁸Nimxi'x qya kyimni kychmil ẍekyaj nq'o'ne' kyxol kyetwitz txqan tz'awan ttzi ninnjab'. Wanq'ijxi'x saj nq'o'ne' kamik kyi'ju' txub'aj kyuk'i'l kyal ku'xunqe'; naqx myanim saj nq'o'ne' b'is ex xob'ajil kyi'j.⁹Inche kub'aju' txub'aj b'a'npun kyal nche kyejten mixti'tl kyxew; nche ch'ixwi ex mixti'tl kyb'anil, matz'okju' q'ij te qxopin kye. Qa ate'x ẍekyaj anq'in, knb'incha'ye' tu'n kykub'yo'n kyu'n kyajq'oj. Ayine' Dyos Manb'aj nchin q'mante, chi Dyos. Jaw ẍch'inju' t-sajelal Dyos¹⁰¡Layqinxwite' na, machin tzajtiq'i'na naqx tu'n nwuline' ex tu'n nq'ojine' kyuk'i'lju' xjal twitz tx'otx'! Mix-a'lo'qexi' txa'nq'o'n pwaqe' ch'ex, ex mixa'lo'xi' tzaj q'onte nch'exe', kykyaqilxtzun xjal nche txkon il wib'aje'.¹¹Japunxwitju' qanb'en kyu'n, Nman Dyos, qa na'mx wajb'ene' b'a'n teya, qa b'ajx chinkub'sanaye' teya kyi'ju' wajq'oje toju' tq'ijlalil xitb'il ex b'is. Tma Dyos tqanil tz'e'ysb'il kywitz aj Israel¹²¿Alxi'xkye ktoqilte k'uxb'il te tb'a'nq'ob'kya'j ex q'ank'uxb'il?¹³Tu'ntzunte' tkyaqilju' kyile' aj Israel, che kxe'lnq'o'ne' kyq'inumale' ex kyk'uwene' kyeju' kyajq'oje' tkyaqilju' ati toj kytx'otx'e' tu'n tb'ajx kyjto'n.¹⁴Che kxe'l nq'o'ne' te k'a'yi'nmajin kye kyajq'oje' toj jun tx'otx' min kyojtzqi'ne', qu'n matzaj ntx'u'jile' kse'n jun q'aq' tu'n kyb'aje' tu'n, chi Dyos. Kub'san sanjelal te Qman Dyos¹⁵Nman Dyos, tkyaqil kanli twitza, ¡chin tna'ntza ex chin tonima! ¡Q'oma tu'me'l t-xel kyeju' ljol toj nq'ije'! Lalun naqwit ka'yina kye ajnkub' kyb'yo'ne' naqna' tu'nela nnik'xa' wu'ne' nchin wulinjtze'.¹⁶Enk'ame' tyola tej ttzaj yolina weye', ojexi'x intzalaje' kyu'n, qu'n teqina Nman Dyos nimtipumala.¹⁷Min xnmujb'awe' wib' kyuk'i'lju' o'kx nche ximana' tu'n kytzalaj; atxi'x tkb'u'lena wib'aje' njunalxwe' nchin anq'in matz'oku' ttx'u'jila te ntx'u'jile'.¹⁸¿Tiqu'ntzun majx ati k'i'xk'oj wi'je'? ¿Tiqu'n mixti'x nq'anetju' nk'ixb'lene'? Matz'oka weye' kse'n xoch mixti' a' toj, chi Jeremiy. Tzaq'web'l tu'n Qman Dyos¹⁹Tzajtzun ttzaq'we'n Qman Dyos weye': Qa matanjsa' tib'a nk'etze', knk'ma'tla ex k'ajb'ela weye'. Qa mya noqsoktena yolil mixti' tajb'en exqa o'kx ati tajb'en xxitma'na, atzuntza kyolil toj nb'iye'. Aye'kye' xjal lu tu'n tanjtzkyi'j tuk'i'la, ex myata tu'n txi' kyuk'i'l.²⁰Kb'el nq'o'na kse'n jun tapi q'ank'uxb'il layx yukchi teju' tnam lu. Che q'ojil ti'ja, layxtzun kub'ti'ja kyu'n, intina'we' tuk'i'la klolteya ex tzaqpilteya. Ayine' Dyos Manb'aj nchin q'mante.²¹Knkla'ya te kyipumalju' b'inchal myab'a'n, knkla'ya toj kyq'ob'ju' b'iyol, chi Dyos. Tk'am Jeremiy chaq'b'il te Qman Dyos

¹Tzaj tma'n Qman Dyos weye':²Lalun mjeya ex lalun che ten tk'wala toju' tx'otx' lu.³Qu'n kxe'l nma'ne' teya, ayine' Dyos Manb'aj, titi' kb'ajel kyeju' k'wal che itz'jel toju' tx'otx' lu exqe' manb'aj ate' kyk'wal.⁴Che kyimel tu'n kuw yab'il ex mix-alo' k'oq'el kyi'j, ex mix-alo' kb'elex mqunkye: che kjel pak'anje twitz tx'otx' kse'n txa. Kb'ajel toj kywi' tu'n q'oj ex we'yaj, ex che b'ajel ch'yo'n kyu'n k'utz ex kyu'n tojk'ul txkup.

⁵Ex tzaj tma'n Qman Dyos weye': Lalun tz'okxa toj jun ja janche b'isuna' xjal tij jun anmi, lalun tz'oq'a ex lalun tyek'uya k'ixk'oj toj tanmiya ti'j, qu'n mixti'tlwe' nnak'b'il, nk'u'jlalil ex tlaqb'il nk'u'j ti'ju' tnam lu. Ayine' Dyos Manb'aj nchin yolin.⁶E'nimaq kyoklen ex ch'i'n kyoklen che b'ajelkyim toju' tnam lu, mix-a'lo' kmqulkye ex mix-a'lo' k'oq'el kyi'j, mix-a'lo'te tu'n tok tjuma'n ttzitk'u'j mujqa tu'n tel tjon twi' tu'n b'is kyi'j.⁷Mix-a'lo'te kb'el q'onkye nimaqwan te q'uqb'ab'l kyk'u'ju' kywitze'l, expe' ti'j tkamik manb'aj mujqa txub'aj.

⁸Ex lalun tz'okxa toj jun ja jata' jun ninwan, tu'nwt tkub' qeya wal ex k'wal kyuk'i'l.⁹Qu'n che b'el nnajsa'nwe' b'itz te ninq'ij ex tzalajb'il exqe' b'itz te mjeb'le'n toju' tnam lu, ayine' Dyos Manb'aj kyib'aj aj Israel. Kb'ajel ja'lu tojx kyq'ijlalile' ex k'okyel kyka'yi'ne'.

¹⁰Aj txitma'na nyole' lu teju' tnam, ktzajel kyxjelu'n teya: ¿tiqu'ntzun xtchaq'a' Qman Dyos taq'wix nimxi'x lu? ¿Titi'tzu'n taq'wix xqb'inchaye'? ¿Titi'tzu'n il xqb'inchaye' twitz Qman Dyos? qa chechi.¹¹A q'manxju'ya kye: Chi Qman Dyos kjalu: Tu'ntpajte' inkyaj kykolb'e'ne' ojtxi' kychmane' ex exi' k'ulul ex nimal kye txqantl dyos, ayintzune' inkyaj kykolb'e'ne' ex min ekyb'inchatlju' xnaq'tzb'il b'ajx nq'o'ne' kye.¹²Exqetzunkye' tx'yan qexi'xtle kyekywitzju' ojtxi' kychmane', qu'n teyle junjun xkub' tpi'sa'ntib' tojxu' t-xim myab'a'n ex min nchinx kyb'i'ne'.¹³Qu'mtzun che elex nljo'ne' toju' tx'otx' lu tu'n kyxi'ye' toj jun tnam min kyojtzqi'ne' ex min xkyojtzqi ojtxi' kychmane', che ajb'eltzuntze' na'tz kye txqantl dyos q'ijtl ex qonik'an, layx tzaj laqjwe' nk'u'j kyi'je'.

¹⁴Ayine' Dyos Manb'aj nchin yolin, tzultzun q'ij lay kymatle': Itz'te' Qman Dyos etzq'inkye aj Israel toj Ejipt, chechiwte',¹⁵ate kxel kyma'ju'ye': Itz'te' Qman Dyos etzq'inkye aj Israel toju' nintnam toj tb'a'nq'ob'kya'j ex kyoj kykyaqilju' nimaqtnam jachaq b'ajxna'toq t-sputi'n, chechiku'ye'. Knb'incha'ye' tu'n tanjtzkyi'je' toju' kytx'otx'e' xinq'o'ne' kye ojtxi' kychmane'.

¹⁶Ayine' Dyos Manb'aj nchin yolin, che tzajel wiq'i'ne' txqan tzyul kyiẍ tzyulkye aj Israel, che tzajeltzun wiq'i'ne' txqan ub'al ub'alkye aj Israel ex tu'n kyb'je'x iq'i'n kyoj kykyaqilju' nimaq k'ul ex kywi'witz ex kyoj jul kywitz pik.¹⁷Qu'n inka'yi'ne' tkyaqilju' kyb'inchb'aj, ale'x tkyaqilju' kyil layx tz'ewit nwitze'.¹⁸Tnejelxi'x knb'incha'ye' tu'n kychjonte kamaju' kyil ex kyb'inchb'aj myab'a'n, qu'n makub' kytz'ilsa'n ntx'otx'e' kyu'n kywitzleb' taq'wixqexi'x ex kyimniqe', ex makyb'inchaju' ik'o'n wu'ne' toj tkyaqilju' tx'otx', chi Dyos. Kub'san Jeremiy twitz Dyos¹⁹Nman Dyos, wipumale' ex klol weye', aya kolb'ilweye' toju' kmoj xob'ajilx; che ul nimaqtnam twitza che tzajelx ttxa'n tx'otx' ex kkyma' teya: Naqx txqan dyos mya ax, mixti' kyajb'en ex mixti' kyipumal b'aj kyej q'o'n kyeju' qmane'.²⁰¿Ma oktzunlo kb'antel axju' xjal b'inchalkye tdyos? ¡Mixya dyos qekye' lu!, chechiku'. Tzaq'web'l tu'n Qman Dyos²¹Qu'npena'tzun, majx kxel nyek'u'ne' wipumale' te tkyaqil kye, k'eleltzun kynik'tz qa a nb'iju'ye' Dyos Manb'aj, chi Dyos. Kyil ex tz'e'ysb'il kywitz aj Juda¹Aj Juda, tz'ib'a'nte' kyile' tu'n k'uxb'il tz'ib'b'il, majx kyajni tz'ib'a'n nqoptz'aj twitzju' tab'jil kyanmiye', kyi'j tuk'a kyq'olb'eb'le'.²Inche tzaj kyna' kyk'walju'ye' q'olb'eb'l exqe' xmil xjansa'nqe' ja ta'qe' nimaq tze pujin kyxaq ex kywi'witz nimaq kywe'³ex kywi' b'us toj kojb'il. Knb'incha'ye' tu'n kyb'ajx alq'a'n tq'inumala ex tk'uwena tu'n kypaj txqan tila ex tu'n kyb'je'l xitu'n kyxjane' kywi' b'us toj tkyaqilju' kytx'otx'e'⁴kjel tq'o'na tx'otx' xinq'o'ne' te tetzb'ila, ex knb'incha'ye' tu'n toka te k'a'yi'nmajin kye tajq'oja toj jun tnam mi tojtzqi'na, qu'n matxi' tzaj ntx'u'jile' naku'j q'aq' tu'n tb'aja tu'n, chi Dyos. B'a'npun pakb'ab'l⁵Chi Qman Dyos: Txko'ntl tib'aju' xjal nnel tpa'ntib' wi'je', ju' xi'noka' qe tk'u'j kyi'j xjal ex kye xjal njyona' o'nb'il.⁶Ikyk'okyela' se'n ch'i'x toj chq'ajlaj, mixti'x nka'yinjtz nch'iy kyxol ab'j toj chq'ajlaj, ja mix-alo'x najli toj.

⁷Atzunte' xjal q'uqlok tk'u'j wi'je' k'i'wla'n, xi' nnayona' wi'je'.⁸k'okyel kse'n jun tze awa'n ttzi a', toj ak'tx'otx' ta'ya' tlok' ttziyele a' ex mixti' b'is te ajtul q'ij, qu'n majx pujin t-xaq kukxju'. Min nkub' jilj t-xaq toj q'ijal ex majx ljo'n twitzan.

⁹Mixti' juntl twi' sb'ul ex pi's kse'n toj tanmi xjal. ¿Alkye k'elel tnik' ti'j?¹⁰In b'ajnka'yi'ne' toj kyanmi xjal, Ayine' Dyos Manb'aj ex wojtzqi'ne' na'n tu'n kyk'u'j, nxinq'o'ne' kyleq' teyile junjun kse'nxchaqju' kyb'inchb'aj.

¹¹Ikyte njaw q'inumajxju' tuk'i'l sb'ub'l kse'n jun tz'chin naq nche kub'tpaqb'e'n kyjos txqantl pich'. Tojxi'x tkuwal kjela' tleb'a'n tq'inumal, naqjuntl okni toj twitz k'okyela'tl.

¹²Jun q'uqb'il tb'anilxi'xte' ja te k'u'lb'il, nim toklen atxi'x t-xetnejel.

¹³Nman Dyos, ti'ja tu'n toka'qe kyk'u'j aj Israel. Kykyaqilkye' nche kyej kolb'enteya k'elel kych'ixaw. Che b'elnaj kykyaqilju' nche el lq'e ti'ja kse'n jun b'iyj tz'ib'a'n toj quq, tu'n tpaj nkyaj kolb'e'na kyu'n, aya t-xiklil a' nchulq'ij. Nkub'san Jeremiy te Dyos¹⁴Chin tq'anama Nman Dyos, chin q'aneteltzuntze'. chin tkloma, tu'n nklete', o'kxna'ta njaw wajwali'ne'.¹⁵Intzaj kyma'n xjal weye': ¿Ti'tzu'n nb'aj ti'ju' tyol Dyos? ¡Tu'n kyjapun ja'luxi'x!¹⁶Extzun b'ajx chin oka'tene' qanilte tu'n ttzaj tq'o'na jun xitb'il kyib'aj, ex mya wajb'ilju'ye' tu'n ttzaj jun xitb'il kyi'j. B'i'nxi'x tu'na titi' xinma'ne', twitzna'ya xxa'nma'ne'.¹⁷Lalun tz'oka xob'ajilx weye', ana'ya kolb'ilweye' kse'n intine' toj b'is.¹⁸Chuksanqeku'ya ljolte toj nq'ije' ex myayine', aye'wt che kyajxob' ex myayine'. B'inchama tu'n ttzaj b'is kyi'j, majx toqinqeku'ya b'a'npun maj. Ik'sb'enteju' q'ij te ojlab'l

¹⁹Tzaj tma'n Qman Dyos weye': Kutxi'ya ex we'ku'ya ttziju' tnam, janche okxa' ex nche etza' nimaqkawil te Juda, ex ikx kytziju' txqantl tjpel Jerusalen.²⁰Q'manxa kye xjal: E' nimaqkawil ex aj Juda, kykyaqile' najlqe'ye' toj Jerusalen nche okxe' ex nche etze' kyoju' tjpel tnam lu, kyb'intze' tyol Qman Dyos.²¹A ntma'n Qman Dyos ja'lu: Tu'nelju' kychwinqlale', lalun jawkyiqa'n kyiqatze' toju' q'ij te ojlab'l ex lalun tz'okx kyiq'i'ne' toj Jerusalen.²²Ex lalun tz'etz kyiq'i'n kyiqatze' ex lalun kyb'incha jun kyaq'une' toju' q'ij te ojlab'l. Kyxjansanku'ye' q'ij te ojlab'l weye', kse'nxju' nchaq'e' kyeju' ojtxi' kychmane'.²³Aye'tzunkye min nxikyb'i'ne' ex min nkub' kyoksla'ne', kub' kypi'sa'n kyib' ex min xikyb'i'n ex min kyaq' tzak'u' kyib'.

²⁴Ayine' Dyos Manb'aj nchin yolin. Chin kyb'inku'ye' axxi'x, lan tz'okx kyiq'i'n jun iqtze' kyoju' tjpel nintnam toju' q'ij te ojlab'l, kyxjansanku'ye' q'ij lu weye' ex lalun kyb'incha jun kyaq'une' toj.²⁵Qama kyb'inchaye' ikju', che tenb'el nimaqkawil kukxju' toju' tq'uqb'il Dab'i ex kukx kyokxju' kyi'j txqan chej ex kyoj txqan karwaj ttzi nintnam, lepchqe'k nejenel exqe' xjal aj Juda ex aj Jerusalen ti'j. Ex che najal xjal kukxju' toj Jerusalen.²⁶Ex che tzajel xjal kyoju' nimaqtnam toj Juda ti'jile Jerusalen, ex toj kytx'otx' tyajajil B'enjamin, kyoj plan tx'otx', toju' tnej tx'otx' ja ta'qe' witz ex toj Nekeb'. Kb'ajtzajelkyiq'i'n alu'mj te chojb'il k'ok'sb'il ex te txqantl chojb'il toju' ja te k'u'lb'il, e'oyaj twitz awal k'ok'e'kywitz ex sturak, ex oyaj te aq'b'il chjonte.²⁷Qatzun min xkynimaye' nchaq'b'ile' tu'n kyxjansanteye' q'ij te ojlab'l weye' ex tu'n lan tz'okx kyiq'i'n kyiqatze' toj Jerusalen toju' q'ij lu, kb'eltzun nq'o'n q'aq'tze' kytzi tjpel nintnam, jun q'aq' majx che b'ajelju' ja te kawb'il tu'n ex mix-a'lo' kb'antel tipinte, chi Dyos. Ntechla'n tb'incha jun b'inchal xar

¹Tzaj yolin Qman Dyos weye' ex tman:²Kutku'xa tja b'inchal k'wil, atzuntzu' kxela' nma'ne' jun tqanil teya, chij.³Inku'xtzuntze' ayine' Jeremiy, ex okyalju' b'inchal k'wil wu'ne' intoq b'inchan xoq'l.⁴Qatzun min nelb'a'nju' k'wil ntb'incha'n, intoq kub' t-xitu'n ex nkub' tb'incha'n juntel tu'nxju' xoq'l, tzmaxi'j ajtkyaj b'a'n kse'nxju' tajb'il.

⁵Tzajtzun tma'n Qman Dyos weye':⁶¿Ma laytzun b'ant nb'inchanteye' kyi'je' aj Israel, kse'nx ntb'incha'n b'inchal k'wil lu ti'ju' xoq'l? Ikyqe'kyeju'ye' toj nq'ob'e' kse'n xoq'l toj tq'ob'ju' b'inchal k'wil. Ayine' Dyos Manb'aj nchin yolin.⁷Naq jun kmujx ajtkub' nxima'ne' tu'n tjaw nxb'oqi'ne', tu'n tkub' nxitu'ne', tumtkub' ntx'u'yi'ne' jun nintnam mo jun kawb'il.⁸Qatzun makyej ttzaqpi'n nintnamju' taq'wixil, laytzun tzaj nq'o'ne' tz'e'ysb'il witzb'aj xi'toq ttzaj nq'o'ne' tib'aj.⁹Kb'el nxima'ne' tu'n tjaw b'inchetl ex tu'n tb'ant jun nintnam mo jun kawb'il.¹⁰Qatzun matb'inchate' nintnam taq'wix exqa min xxitb'i'n ab'tzib'l wu'ne' te, lay che tzajnq'o'ntle' nxtalb'ile' ktzajeltoq nq'o'ne' te.

¹¹Q'manxa kyeju' xjal aj Juda ex kyeju' najlqe' toj Jerusalen qa a in nma'nju'ye' ayine' Dyos Manb'aj: Ati jun nxime' kyi'je', inxima'ne' tu'n tkub' ntz'e'ysa'n kywitze'. Kytzaqpinkje' kyb'eye' myab'a'n; kyka'yinxe' kychwinqlale' ex kyb'inchamju'ye' b'a'n.¹²Ate kkyma'ju' teya: ¡lanx tz'ex tq'ija! B'a'nxqe' qten tu'n qanq'ine' kse'nx qajb'ile' ex tu'n qtene' toj qpi'sale' toju' myab'a'n tkub' toj qanmiye', chechi.

¹³Qu'mtzun in nma'ne' ayine' Dyos Manb'aj: Kyxjelunxe' kyxolju' nimaqtnam, qa ati jun b'ilte kse'n ja'lu. ¡Mixyab'a'nte' xtb'inchaju' tnam Israel!¹⁴¿Mankub'naj jumaju' che'w kyib'aju' pik twi' Lib'ano? ¿Ma ntzun che'x tzqiju' qtx'ilun a' nche ku'tz kyk'u'ju' witz?¹⁵Atzunte' ntaname' matzik' nna'le' tu'n, Ex nkub' tq'o'n sturak kywitz dyos mya ax. Makub' tzpet toju' tb'e, aju' ojtxi' b'e, ex ljo'nqe' tb'e min ojtzqi'nqe'.¹⁶Iktzu'n xkyaja' ttanam tu'n te jun chq'ajlaj, te xob'ajilx kukxju'. Kykyaqilju' che b'jik'el toj majx che b'ajelxob'.¹⁷Ikyqine' kse'n kyq'iq' ntzaj tjawetzq'ij; che b'el oq wu'ne' kywitz kyajq'oj. lay che'x nka'yi'ne', ntze'lwi'jwe' kxel nmiltz'u'n kye, ajtul q'ij tu'n tz'e'yset kywitz, chi Dyos. Myab'a'n xim ti'ju' t-sanjelal Dyos

¹⁸Kymaju' xjal: Qnk'uku' jun qxim ti'j Jeremiy. Ate'nakye pale xnaq'tzalqe, exqe' ati kynab'l q'ol qnab'l, ex sanjelal tu'n ttzaj kyma'n tyol Dyos qe. Qpoqonx tu'n tkub'yo'n. Lalunx txiqb'i'nju' ntma'n, chechi. Tna'j Dyos Jeremiy¹⁹¡Nman Dyos, chin tb'intza! ¡B'intza titi' nkyma'n wajq'oje!²⁰¿Matu'ntzun taq'wix kchjete'alju' b'a'n? ¡Matxi' ku'x kyb'incha'n njulile'! Na'ntzpe'ya matxi' kub' nq'o'n wib'e' yolil kyi'j twitza, qanilte' tu'n lalun tzaj ttzaqpi'na ttx'u'jila kyib'aj.²¹¡Atzu'n ja'lu b'inchama tu'n kykyimju' kyk'wal tu'n we'yaj mujqa tu'n k'uẍtx'e'nb'il; che kyajxwitju' kyxu'jil kyimni kychmil ex mixti' kyal! ¡Che kyimxwitju' ichan tu'n tx'u'j yab'il, ex che kyimxwitju' kyku'xun toj q'oj!²²Naqx mikynab'en chq'onqe'tza jun k'loj eleq' kyi'j, ¡che jawxwit ẍch'in toj xob'ajil! Qu'n ma ku'x kyb'incha'n jun jul te xpatxab' weye', mab'ajkub' kyq'o'n xpatxab' toj nb'eye'.²³Atzunta Nman Dyos, tojtzq'ina tkyaqilju' kyxim matxi' b'aj kyb'incha'n tu'n nkub' kyb'yo'ne'. ¡Lan kub' tnajsa'na kyb'inchb'aj myab'a'n ex lalun tzik'tna'lju' kyil tu'na! ¡B'inchama tu'n kykub'tz'aq twitza, tz'e'ysanku'ya kywitz tuk'i'l ttx'u'jila! Jun techlal tiju' pa'x xar¹Tzaj tma'n Qman Dyos weye': Lq'a'ka jun tx'otx' xar, ex txkonqe'tza junjun tijwnaq teju' tnam ex junjun pale tijwnaqqe'tl.²Kutextzuntza toju' b'ya' B'en-inom, tu'me'lju' tyestos ttzi tnam, atzuntzu' tx'olb'anxa'ya nyole' kxe'l nma'ne' teya.³Q'manxa kjalu: E'nimaqkawil toj Juda ex aye'ye' najlqe'ye' toj Jerusalen, kyb'ime' saj tma'n Qman Dyos nimtipumal, janche k'uluna' aj Israel, ikjalu: Ktzajel nq'o'ne' jun xitb'il k'ixk'ojxi'x tib'aju' najb'il lu, majx che b'elchukji kykyaqilju' che b'ilte tqanil lu.⁴Qu'n machin kyaj kykolb'e'ne' aj Israel ex matz'okju' najb'il lu kyu'n te jun tx'otx' min ojtzqi'n, makub' kyq'o'n sturak kywitz txqantl dyos toj, ju' min ojtzqi'n kyu'n, kyu'n ojtxi' kyyajilb'en ex kyu'n nimaqkawil toj Juda, ex macheb'aj kub' kyb'yo'n xjal mixti' kyil.⁵Expe' mache b'jaw kyb'incha'n q'olb'eb'l tz'e'ysb'il kyeju' kyk'wal te chojb'il k'ok'sb'il twitz B'aal, mya nchaq'ene' kye ex min xinma'ne' kye, mixpeti'xwe' nxim ti'j.⁶Qu'mtzun tzul q'ij lay tz'ok q'o'ntlju' najb'il lu: Topet, ex lay tz'oktl te B'ya' B'en-inon, atl tb'iju' k'okyel: B'ya' B'iyb'en. Ayine' Dyos Manb'aj nchin yolin.⁷Che b'ajel nq'uchi'ne' kyximju' aj Juda ex aj Jerusalen toju' najb'il lu. Knb'incha'ye' tu'n tkub'kyi'j ex tu'n kykub'yo'n kyu'n kyajq'oj b'iyolqexi'x, ex tu'n kyb'aj ch'yo'n kyu'n k'utz ex kyu'n tojk'ul txkup.⁸Naq chq'ajlajtl kjela' nintnam lu wu'ne', te jun najb'il xob'ajilx. Majx che b'ajel xob' kykyaqilju' che ik'el toj ajkyka'yinte majx b'ajni xitj.⁹Knb'incha'ye' tu'n tb'ajx kych'yo'n xjal kyk'wal ex kymyal, ex tu'n tb'aj kych'yo'nkyib' junjun te junjuntl tu'n tpaju' mixti'tlte b'a'n kye ajtb'aj txoli'n ti'ju' nintnam kyu'n kyajq'oj b'iyolqexi'x, chi Dyos, chiku'ya kye.

¹⁰Tb'ajlentzun tma'na lu kye, kb'el tb'uchi'na xar kywitzku' ichan ate'qe' tuk'i'la,¹¹ex q'manxa kye: Chi Qman Dyos nimtipumal, qa che b'ajel tb'uchi'n nimaqtnam lu exju' nintnam kse'n ajtkub' txiju'n jun tx'otx' xar, layx b'entl t-xk'ojet. Che okyex kymqu'n xjal kyimni toj tenb'il Topet, tu'n tpaj mixti'tl jatu'n kyokxa' kymqu'n.¹²Ikytzun ktb'incha'ju' ti'ju' nintnam kyuk'i'lju' najlqe' toj. Ikx che kjela' nq'o'ne' kse'n Topet. Ayine' Dyos Manb'aj nchin yolin.¹³Jni'qe'xju' ja toj Jerusalen, e'tja nimaqkawil toj Juda ex kywi'ju' ja ẍekub'a' q'o'n sturak kywitz kykyaqil che'w ex mache kub' qo'n oyaj b'in kye txqantl dyos, che kjelten tz'il kse'nx Topet, chi Dyos chiku'ya kye, chi Qman Dyos.

¹⁴Anjtztzun ti'j Jeremiy Topet, xi' jaxa'chq'o'n tu'n Qman Dyos yolil toj tb'i, kub' we'tzuntz tpenju' ja te k'u'lb'il, xitma'n kye kykyaqilju' xjal toju' tnam:¹⁵Lu xtma Qman Dyos nimtipumal janche k'uluna' aj Israel: ktzajel nq'o'ne' tkyaqil tz'e'ysb'il witzb'aj matxi' nmaye' tib'aju' nintnam lu ex kyib'aj kykyaqilju' najlqe' toj, qu'n makub' kypi'sa'nkyib' tu'n mitxa' kyb'i'nju' nyole', chi Dyos, chi Jeremiy. Tqanil tib'aj Pasur, ajq'oj ti'j Jerusalen

¹Tej tb'inte Pasur, tk'wal Imer, pale ex ka'yil nim toklen toj tja Dyos, tb'aj tma'n Jeremiyju' tqanil lu,²tchaq' tu'n tokb'yo'n Jeremiy ex tu'n tok xmo'n toju' tze atitoq ttzi tjpel ja te B'enjamin ati jawl tk'etz tja Dyos.³Tojxi'tzun jun q'ijtl tchaq' tu'n tel tzaqpi'n Jeremiy toju' tze, tmatzun Jeremiy te: Matxi' tch'exb'e Qman Dyos tb'iya, Makor-misab'ib' tb'iya ja'lo, myatl Pasur.⁴Qu'n lu xtma Qman Dyos: K'okyela wu'ne' te xob'ajil texa ex kye kykyaqilju' tamiwa, twitzku'ya che b'ajelju' tamiwa tu'n kyk'uẍtx'e'nb'ilu' kyajq'oj. Che kb'el nq'o'ne' kykyaqilju' najlqe' toj Juda toj tq'ob' nimaqkawil aj B'ab'ilon, che b'ajxe'l q'i'ntzuntz B'ab'ilon mujqa che b'elb'y'o'n tu'n xuyb'il.⁵Ex ikx kxe'l nq'o'ne' tkyaqil tq'inumalju' nintnam lu toj kyq'ob'ju' tajq'oj, tkyaqilju' ati te ex e'ti'xti' twi' wi'yal ex tkyaqilju' kyk'uwen nimaqkawil toj Juda, tu'n kyb'ajx q'i'n tzmax B'ab'ilon.⁶Extzunta Pasur, kxel q'i'na tzmax B'ab'ilon kyuk'i'lxi' toj tjaya. Atzu' kkyimela'ya chix ex atzu' kb'elexa' mqu'na exqe' tamiwa intoq b'ajx tma'na tpakb'ab'la mya ax kye, Chi Dyos, chi Jeremiy te. Tkub'sb'il Jeremiy te Qman Dyos⁷Nman Dyos, machin kub' t-sb'u'na, Ex mawaq' sb'u'wib'e', kuwxi'xa ex makub'wi'je' tu'na, jachq'alx nchin okye' te kytzeb'l xjal, kykyaqilx nchin kyxmayi'ne'.⁸Majx o'kx tqanil xitb'il in nma'ne' ajnyoline', kukx wok i'li'ne' ex nchin xmayinjtze' qu'n nxintx'olb'a'ne' tyola.⁹Qama kub' nxima'ne': Lay chin ximantle' ti'j Dyos, lay chin yolintle' toj tb'i, qa nchije', injaw q'aq'b'ixju' tyola toj wanmiye' naku'j q'aq' ntz'e'ysan, majx nex meq'eq'en kyoj nb'aqile'. Inkub' ntzyu'n wib'e', mixti'xtzun nb'ent.¹⁰In nb'i'ne' nche b'ajwulub'ti xjal: ¡Ati xob'ajil tkyaqil plaj! ¡Wiqe'xe', qpoqonx!, chechij. Exqepe' wamiwe' kyajb'il tu'n nchan yole'. Qape ksb'etel qu'n, kb'eltzunti'jtz ex ktchja' qu'n, chechij.¹¹Atzuntz Nman Dyos, atiya wuk'i'le' kse'n jun q'ojil layx kub'ti'j, kb'elte' kyi'ju' ljolte toj nq'ije', ex layx kub'wi'je' kyu'n, che takpujel ex che kb'el ch'ixwi, che kb'el b'o'lj tejumajx toj kych'ixaw.

¹²Nman Dyos nimtipumala, in b'ajtka'yi'nta toj tnik'alilti'j, intka'yi'nta tojku' tanmi xjal, q'oma tu'n nlonteye' se'n kttz'e'ysaya'ya kywitzju' xjal lu, matxina' kub' nq'o'n wib'e' toj tq'ob'a.

¹³¡Che b'itzan qe'ye' te Qman Dyos, kyajwali'nktze', intklo'nju' nb'isun toj kyq'ob' b'inchal myab'a'n.

¹⁴¡Mixyab'ante' q'ij in itz'ja'ye'!
¡Mixwitlo tzaja' k'iwla'nte' q'ij tej witz'jiye' ti'j ntxuye'!¹⁵Mixyab'a'nte' okq'onte ttzalajb'il nmane' tej txiq'ma'n te qa q'aju' tk'wal itz'ji!¹⁶¡Tz'okxwitu' ichan lu kse'nqe' nimaqtnam kub'xwit t-xitu'n Dyos tejumajx! ¡Tb'ixwit jun nẍch'in toj k'ixk'oj te prim, ex q'oj ntenun te wanq'ij,¹⁷mixnati'x nkyime' tu'n Dyos toj tk'u'j ntxuye'! Axwittzulotzu' nkyaja' muqliwe' toj t-xmilal ntxuye', exwitlo mixti'x nnitz'jiye'.¹⁸¿Tiqu'ntzun nnitz'ja'ye' naqx tu'n woke' toj k'ixk'oj ex toj yajb'il, ex tu'n nkyime' toj ch'ixb'ajil? Tqanil tz'e'ysb'il kywitz aj Jerusalen

¹Exi' tchq'o'n nimaqkawil Sedekyiy Pasur, tk'wal Malkyiy, exju' pale Soponiy, tk'wal Maaseyiy, q'malte te Jeremiy kjalu: B'inchama xtalb'il, xjeluna te Qman Dyos qi'je', qu'n luju' Nab'ukodonosor nimaqkawil aj B'ab'ilon nq'ojin qi'je'. Qape' ktb'incha' Qman Dyos jun b'a'nq'ob'aj ex tu'n tex tlaq'b'a'n Nab'ukodonosor, chechij.
Yolintzun Qman Dyos te Jeremiy,³ex xittzaq'we'n Jeremiy kyeju' e'pon tchq'o'n Sedekyiy: Kymanxe' te Sedekyiy⁴qa a ntma'n Qman Dyos ja'lu: Che anjetz miltz'uju' nche onin kyuk'i'le' ti'jxi' tapi ti'ju' nimaqkawil aj B'ab'ilon ex kyi'ju' aj Kaldey, ex che tzajel nb'u'yi'ne' toju' nintnam lu.⁵Ayinku'we' chin q'ojil kyi'je', tu'n tkyaqil wipumale' ex tuk'i'l ntx'u'jile'.⁶Che kb'el nb'yo'ne' kykyaqilju' najlqe' toju' nintnam lu; ichan ex alu'mj che b'ajel kyim tu'n jun tx'u'j yab'il.⁷Yajxi'tzuntl kxe'l nq'o'ne' Sedekyiy, nimaqkawil toj Juda, toj tq'ob' Nab'ukodonosor ex toj kyq'ob' tajq'oj ch'i'ntoj kyq'ij, kyuk'i'lxi' tmajin e' t-xjal te q'oj, exqe' xjal itz'qe'x toju' nintnam tik'lenxi' tx'u'j yab'il, q'oj ex we'yaj. Knb'incha'ye' tu'n kykub'yo'n tu'n k'uẍtx'e'nb'il, layx laqkyk'u'jlalil. Ayine' Dyos Manb'aj nchin yolin.

⁸Ex ikx q'manxa kye xjal qa kxe'l nq'o'ne' anb'il kye, ayine' Dyos Manb'aj: qa a kjawil kysk'o'nju' tb'eyil chwinqlal mujqa aju' tb'eyil kamik.⁹Alkyete makyajten toju' nintnam lu, kkyimel toj q'oj, mo tu'n we'yaj, mo tu'n tx'u'j yab'il. Alkyetzunte matz'ex toju' tnam ex mataq'tib' kye aj Kaldey nchi q'ojink ti'ju' nintnam, lay kyim, tu'npetzunte' lay kyim.¹⁰Qu'n matxi' kub' nxima'ne' tu'n ttzaj taq'wix te t-xelju' b'a'n tib'aju' nintnam lu. Kxe'l nq'o'ne' toj tq'ob'ju' ninaqkawil aj B'ab'ilon, ex kb'el ttz'e'ysa'n tu'n q'aq'. Ayine' Dyos Manb'aj nchin yolin. Tqanil myab'a'n tiju' nimaqkawil aj Juda

¹¹Atzu'n ti'ju' tja nimaqkawb'il toj Juda, tja nimaqkawil Dab'i, q'manxa toj nb'iye' ikjalu:
B'intza ntma'n Qman Dyos: B'inchama tnik'alilti'j tkyaqil q'ij; tzaqpinqe'ma yaju'nqe' kyeju' yajulkye naqtzaj ntx'u'jile' ti'ja kse'n q'aq' mix-a'lo'x kb'entel tyupinte tu'n kypaju' tb'inchb'aja myab'a'n. Tqanil tz'e'ysb'il kywitz aj Jerusalen¹³Aya nintnam, nche kawine' tib'aju' b'ya', ikyqe'ye' kse'n pik tib'aju' plan tx'otx' ayine' Dyos Manb'aj chin q'ojil kyi'je'. Intzun kyma'ne': ¿Alxi'xkye kq'ojil qi'j? ¿alkye tzulkanun toju' qewb'il? chechije'.¹⁴Ikxtzu'n kse'n kyb'inchb'aje', kb'el ntz'e'ysa'n kywitze', kxe'l nq'o'n q'aq' toju' kynimaq k'ule', ex majx che b'aje'ju' k'ul ti'jile tu'n q'aq' lu. Ayine' Dyos Manb'aj nchin yolin, chi Dyos, chiku'ya, chi Dyos. Tqanil kye toj tja nimaqkawil aj Juda

¹Tzaj tma'n Qman Dyos weye': Kutku'xa toju' tja nimaqkawb'il ex pakb'anxa nyole' lu²twitzju' nimaqkawil aj Juda, q'uqli toju' tq'uqb'il Dab'i, kyuk'i'lju' nche kawin tuk'i'l exqe' xjal te toju' nintnam, ikjalu: Kyb'intze' tyol Qman Dyos.³Kyb'inchame' tnik'alilti'j ex toj tu'me'l toju' najb'il lu, kytzaqpime' yaju'n toj tq'ob'ju' yajulte, lalun kub'kyme'ssa'ne' najchaq xjal ex lalun kub' kyaju'ne', e'meb'a ex qya kyimni kychmil. Lan che kub' kyb'yo'ne' najchaq xjal toju' najb'il lu.⁴Qama kyb'inchaye' nxinma'ne' lu kyeye', che tenb'el kawil kukxju' toju' tq'uqb'il Dab'i, che okex kyoj txqan karwaj ex kyi'j chej ttziju' tja nimaqkawb'il, lepchqe'kju' nche kawin tuk'i'l exqe' tnam xjal.⁵Qatzun min xikyb'i'ne' oqxenb'il lu, xitjnitlte' tja nimaqkawb'il lu kjel. Ayine' Dyos Manb'aj nchin yolin, chiku'ya kye, chi Dyos.

⁶Qu'n lu ntma'n Qman Dyos ti'ju' tja nimaqkawil toj Juda ikjalu:
Ikju'ya weye' kse'n witz Kalaad, kse'n ttxa'nwitz Lib'ano, majxtzun kxe'l nma'ne' axxi'x kjel nq'o'na chq'ajlajtl, mix-a'lo'tl knajal toja.⁷Che tzajel nchq'o'ne' xjal iq'i'n kyb'iyb'il ti'ja, xitulxteya. Che b'ajel kytx'e'mu'n tb'anil tqankchana k'ute che okyex kyq'o'ntzuntz toj q'aq'.

⁸Yajxi'tzuntl che b'jik'el xjal te chukchaq nimaqtnam tk'etzju' nintnam lu, ex che xjelul kyxolilex: ¿Tiqu'n xtb'incha Qman Dyos ja'lu teju' nintnam lu? chechiku'.⁹Kxel tzaq'we'ntzuntz kye: Ma'na' kyej kykolb'e'n yol kyej b'entti'j tu'n Qman Dyos kyuk'i'l janche k'uluna', macheb'aj k'ulun kye txqantl dyos ex mache jawkynima'n, chi Dyos. Tqanil tu'n Jeremiy ti'j Salum (Joakas)¹⁰Lalun che oq'e' ti'ju' nimaqkawil Josiy, Lalun che oq'e' tu'nju' tkamik; xi' che oq'aye' ti'j Salum ju' tk'wal, layx tz'anjtztlti'j, layx til jumajtlju' jasitz'ja'.
Qu'n lu xtma Qman Dyos ti'j Salum, tk'wal Josiy, nimaqkawil toj Juda, ok toju' kawb'il tkyimlenxi' tman ex matz'ex toju' najb'il lu: lay tz'anjtzti'j,¹²axtzu' kkyimela'te' toju' tnam jaxxa' q'i'na', ex lay tz'ok tka'yi'ntlju' tx'otx' lu. Tqanil ti'j Joakyim¹³¡Malayxwita, tuk'i'l taq'wixil ex mixya toj tnik'alilti'j xjawa' tb'incha'na tjaya te kawb'il exqe' nimaq ja, nche oktq'o'na xjal aq'unal ex min ntchjo'na tekyq'ij!¹⁴Intma'na: Kjawil nb'incha'n jun nin tja nkawb'ile', kuky'i'l nimaq mqo'n toju' kol jawl, chija. Ex e'kyajtq'o'na tokexspik'un, b'jo'ktq'o'na k'ute kyi'ju' ttapiyil ex kyeq tk'wa' oktq'o'na.¹⁵¿Ma a nimaqkawilju' toj twitza k'uteyile ti'ju' tja?
B'a'n sanq'ina'te tmana tnik'alti'j toqna'te nb'incha'n ex tzinun, qu'mtzun b'a'n tena'.¹⁶Intoq tklo'n kyoklenju' prow ex jtz'o'nqe', qu'mtzun b'a'n tena'. Ikytzunte ojtzqi'n qi'nju'ye'. Ayine' Dyos Manb'aj nchin yolin.

¹⁷Atzunta o'kx nb'ajxa' tk'u'ja ti'j kanb'ab'l myab'a'n kanb'ab'ente, inkub' tb'yo'na mixti' til, ex nkub' tjtz'o'na ttanama ex toka yajulte, chi Dyos.

¹⁸Intma'n Qman Dyos ti'j Joakyin, tk'wal Josiy, nimaqkawil toj Juda, ikjalu:
Mix-a'lo'te k'oq'el ti'ja ajtkyima. Mix-a'lo'te k'oq'el ex chiwt: ¡Malaywita witz'in mo ntzik! ¡Qab'a'nx twitza! ¡Taye! ¡Malayxwita nimaqkawil!, chiwt.¹⁹Kb'elex mqu'na kse'n jun chej: naq k'elex jwo'na ti'jxi' Jerusalen. Tqanil ti'j Jerusalen²⁰¡Aj Juda, kukyjaxe' twi' witz Lib'ano ex che ẍch'ine'! ¡Jawx toj kywi'ye' kywi' witz toj B'asan! ¡Che ẍch'inqe'ye' tzmajx ttxa'nwitz Ab'arim, matxina' kub'kyi'j kykyaqilju' kyk'u'jlb'e'tza!²¹Nyoline' kyeye' tej kyxi'ye' twitz jawl, aye'tzunkye' min kyaje' tu'n kyb'inteye'. Iktzun matxi' kyb'inchaju'ye' tzajx toj kyku'xumale': ¡Minkyjo'ne' tu'n ntzaj kyb'i'ne'!²²Che b'ajxe'l jub'cha'n kykyaqilju' kynejele' tu'n kyq'iq', aye'tzu'n kyk'u'jlb'e'tza che elexq'i'n toj juntl tx'otx'. Che b'elch'ixwiye' ex che b'el me'sa'ne' tu'n tpaj tkyaqilju' kyb'inchb'aje' myab'a'n.²³Intzalaja ja'lo toju' tjaya, kyoj k'ute tzajniq'i'n toj Lib'ano, ¡ajtzun ttzaj k'ixk'oj ti'ja kyajtela, kse'n ajtitz'ji tal jun qya!, chi Dyos. Tqanil tu'n Dyos te nimaqkawil Jekoniy

²⁴Lu tyol Qman Dyos te Jekoniy, tk'wal Joakyin, nimaqkawil toj Juda, ikjalu: Kxe'l nma'ne' axxi'x wu'nxe': B'a'nqa jun xmilq'ob'ja ti'j nb'anq'ob'e' tu'n tok techel oklenj, jaku' tz'el nt'uxi'na,²⁵tu'n txinq'o'na toj kyq'ob' tajq'oja kyajb'il tu'n tkub' b'yo'na kyu'n, ju' inxi'x xob'a kye. Kxel nq'o'na te Nab'ukodonosor, nimaqkawil aj B'ab'ilon, ex kye aj Kaldey.²⁶Che kxelnq'o'ntzuntze' tuk'ilu' ttxuya toj jun tx'otx' jamyatzu' e'itz'ja'ye', axtzuntzu' che kyimela'ye' kykab'ile', chi Dyos.²⁷Layxna' tz'anjtzkye'kyi'j toju' tx'otx' jakyajb'ila'xi'x tu'n kyanjtz. Nlab'ti t-sanjelal Dyos²⁸¿Ma iktzun Jekoniyju' kse'n pa'x xar mixti'x tajb'en, kse'n jun toj tuja mix-a'lo'x nnajonte? ¿Tiqu'ntzun che elex xon kyuk'i'l tk'wal toj jun tx'otx' min ojtzqi'n?²⁹¡Aya tx'otx', aya tx'otx', aya tx'otx', b'intzju'ya tyol Qman Dyos!

³⁰Lu ntma'n Qman Dyos: Kytz'ib'anku'xe' ichan lu toju' kyu'jil tnam naku'xwitloj jun ichan mixti' tk'wal, jun ichan mak'ulb'an toju' tchwinqlal. Qu'n mixti'x jun tk'wal kpomel toju' tq'uqb'il Dab'i tu'n tkawin jumajtl toj Juda, chi Dyos. Q'uqb'ab'l kyk'u'j aj Israel yajxi'tl

¹A ntma'n Qman Dyos ja'lu: ¡Layqe'xwitju' k'ik'lel nchex kytzpet-sa'n nrite' ex nche'x slamj kyu'n!, chij.

²Lu ntma'n Qman Dyos kyeju' nche kawinteju' ttanam ikjalu: Matxi' che b'ajx kyslamu'ne' nrite', mache'x oq kyu'ne' ex min nche'x kyka'yi'ne'. Tik'x kb'el ntz'e'ysa'nkye' kywitz tu'n tpaju' kyb'inchb'ene' myab'a'n. Ayine' Dyos Manb'aj nchin yolin.³Ex ayinku'ye' chin tzajel b'uyinkye jte'tl nrite' kyoju' nimaqtnam jaẍe'xa' oq wu'ne', che b'ajel nb'u'yi'ne' ex che tzajel wanjsa'ntle' tojkyqanb'en, tu'n kypoq'on.⁴Che kb'el nq'o'ne' k'ik'lel ka'yilkye tu'ntzun mixalkye tu'n kyxob'a' ex tu'n lalun tz'aqi jun kyxol. Ayine' Dyos Manb'aj nchin yolin, chi Qman Dyos.

⁵Lu ntma'n Qman Dyos: Tzul jun q'ij knb'incha'ye' tu'n tten jun tyajajilkuxi'x Dab'i, jun nimaqkawil kkawil tuk'i'l nab'l ex k'aq'unal tuk'i'l tnik'alilti'j ex toj tzinun toju' tx'otx'.⁶Che kletel aj Juda toju' tq'ijlalil kkawil, ex q'uqli tk'u'jlalil che anq'ila' aj Israel. A tb'iju': A Qman Dyos q'ol qkanb'ab'l, k'okyel q'o'n, chi Dyos.

⁷Chi Qman Dyos kjalu: Tzul tq'ijlalil lay kymatl xjal: Tu'nel Qman Dyos etzq'inkye aj Israel toj Ejipt, chechiwt ajkymante jun yol ax,⁸atlte kkyma'ju': Tu'nel Qman Dyos, anjtzq'inkye tyajajil Israel toju' nintnam te tb'a'nq'ob'kya'j ex kyoju' txqantl nimaqtnam jab'ajxna'qe'toq t-sputi'n, chechiku'tl ajkymante jun yol ax, chi Dyos. Tqanil kyi'ju' sanjelal⁹A tqanil ja'lu kyi'ju' sanjelal: Inxi'x chin b'isune', Inxi'x lu'lun tkyaqil toj nwinqile', naku'j tx'ojtenil qine', kse'n jun xjal matxi' kub' tzyet tu'n q'e'n, naq tu'nel Qman Dyos exju' tyol xjan.¹⁰Matxi' che kub'puqli ajpajil toju' tnam, e'xjal nxi'x che ojqelan tu'n kyb'inchante myab'a'n, nok kyq'o'n kyipumal b'inchalte mya tnik'alti'j. Qu'mtzun tma Qman Dyos tu'n ttzaj taq'wix toju' tx'otx', ex makub' tzqiju' tx'otx', ex mache kub'tz'e'yju' kywa alu'mj toj chq'ajlaj.

¹¹Intma'n Qman Dyos ikjalu: Ikxpe' mixya nimalqe' Sanjelal ex pale weye'; matxi' che b'je'l yal wu'ne' nche b'inchan il tojku' njaye' te k'u'lb'il.¹²Qu'mtzun kb'el qloljixju' kyb'e ex kb'el ẍb'ilunix: knb'incha'ye' tu'n kyxilmu'n ex tu'n kyjaw tz'aq. Ktzajel nq'o'ne' xitb'il kyib'aj ajkyok toj xjel wu'ne'. Ayine' Dyos Manb'aj nchin yolin.

¹³Matxi' che wile' sanjelal aj Samarya nkyb'incha'n ti'xti' taq'wix nwitze': Matxi' kya tpakb'alil toj tb'i B'aal ex mache'x kytzpet-sa'n ntaname' Israel.¹⁴Matxi' che wile' sanjelal aj Jerusalen nche kyb'incha'n ti'xti' taq'wixi'x: Nche ajpajil ex nche sb'un, nche kyipumali'n b'inchal myab'a'n tu'n lalun kyej kytzaqpi'n myab'a'n. Ikyqe'ju' weye' kyuk'i'l najlqe' toju' nintnam kse'nqe' Sodom ex Komor.¹⁵Qu'mtzun ayine' Dyos Manb'aj nimwipumale', in nma'n jaye'lu kyi'ju' sanjelal: Kxe'l nq'o'n jun kywaye' k'axi'x, kxe'l nq'o'ne' kyk'wa' ati b'iyb'il toj, qu'n kyu'n sanjelal aj Jerusalen xkub'a' chmet il toj tkyaqilju' tnam, chi Dyos.

¹⁶Intma'n Qman Dyos nimtipumal ikjalu: Aj Israel, lalun txikyb'i'ne' nkyma'n sanjelal. Chajyolil nate' inkyma'n, aye'x nche kub'ximankye ti'xti', b'ajx che'xa' nma'ne' kye.¹⁷Tkyaqilte' b'a'n k'elela' chechi kyeju' nche el ik'onte nyole'. Atzu'n kyeju' ate'qe' tuk'i'l kypi'sal tokxju' kyxim toj kyanmi, lay tzajte jun taq'wix kyib'aje', chechij kye, chi Dyos. Tlab'te'n Jeremiy¹⁸Qaja' ¿alkyetzun ten toju' tb'uyjtib'il Qman Dyos toj ewaj?, ¿alkye lonte mujqa b'inteju' tyol? ¿alkye b'ajb'inteju' tyol?¹⁹Ikyte ttx'u'jil Qman Dyos kse'n q'ankyaq, kse'n jb'al tuk'i'l kyq'iq' inxi'x juman kyib'aju' b'inchal myab'a'n.²⁰K'elel ttx'u'jil Qman Dyos ajxi' tb'inchanteju' tb'is tk'u'j. Tzul q'ij kb'el kyxima'ne' ex che kaneb'el ja'lu toj kywitze'. Tpakb'al tu'n Qman Dyos kyi'ju' sanjelal chalyol²¹Min enchaq'we' sanjelal lu, expe' mixti'xwe' xinma'n kye, aye'tzunkye inxi'x cheb'aj ojqelan yolil toj nb'iye'.²²Naqwit matz'elkynik' teju' e'wa'n wu'ne', ma'wtlo txikyma'n nyole' teju' ntaname', ma'wtlo che kytxok tu'n tkyaj kytzaqpi'n kyb'e myab'a'n ex tu'n tkyaj kyq'o'n kyb'inchb'aj myab'a'n, chi Dyos.

²³Lu ntma'n Qman Dyos kjalu: Qa najchaq mujqa nqaku', ayinweju'ye' Dyos.²⁴¿Alxi'xkye kb'antel tewan nwitze'? Intinwe' toj tkyaqilju' kya'j ex tx'otx'. Ayine' Dyos Manb'aj nchin yolin.

²⁵Matxi' nb'iye' kychajyolilju' sanjelal lu in okkyq'o'n kyib' yolil toj nb'iye' ex qanche yolin wuk'i'le' toj witzik'.²⁶¿Jtojtzun kyej kytzaqpi'n sanjelal lu tu'n kymante ti'xti' mya ax, naq njaw kyxima'n ex nok toj kywitz?²⁷Tu'ntzu'n kywitzik' ate'qe'k q'malte kyxolilex, nkyb'incha'n tu'n tik'nna'le' kyu'n ntaname', kse'nqe' ojtxi' kychman ik'nna'le' kyu'n ex exi' kywitz B'aal.²⁸¡Qa ati twitzik' jun sanjelal, q'manx qa jun witzik', qatzun matk'amu' nyole', q'manx aku'xi'xju' nyole'! Mya junxte triy tuk'i'lju' tz'is. Ikywe' nyol kse'n q'aq', kse'n jun pojb'il npa'yet pik tu'n. Ayine' Dyos Manb'aj nchin yolin.

³⁰Qu'mtzun nchin q'ojine' kyi'ju' sanjelal lu nb'aj kyalq'a'nkyib' ti'ju' nyole'. Ayine' Dyos Manb'aj nchin yolin.³¹Nchin q'ojine' kyi'ju' sanjelal lu nche okten q'malkye ti'xti' nb'jaw kyma'n naku'xwitloj nyole'.³²nchin q'ojine' kyi'ju' sanjelal lu ate'qe'k q'mal kywitzik' te chajyolil, tu'ntzu'n txqan kyol e'kychaj yoli'n nche kytzpet-sa'n ntaname'. Min ẍe'x nchq'o'nwe' ex mixti' juwe' ti'xti' xxinma'n kye, mixti'xte tu'me'l tu'n kyonin ti'ju' tnam. Ayine' Dyos Manb'aj nchin yolin. Tu'me'l tu'n tq'meta' tyol Dyos

³³Jeremiy, qa matxi' qani'n teya tu'n jun xjal te toj tnam, mo tu'n jun sanjelal mo tu'n jun pale ikjalu: ¿titi'tzu'n toqxenb'il Qman Dyos? qa chi, a q'manxju'ya te: Intma'n Qman Dyos qa iqtz qe'ye' te, ex che kjel xone' tu'n, chiku'ya.³⁴Qatzun ati jun sanjelal mo pale mujqa jun xjal te toj tnam, intma'n: toqxenb'il Qman Dyos, qa chi, kb'el ntz'e'ysa'ne' twitz kyuk'ilxi' toj tja.³⁵Qa alkye jun matxitqani'n te tamiw mujqa te jun tojx kyjakyib', b'a'n tu'n txitma'n: ¿titi' sajttzaq'we'n Qman Dyos? ¿titi' xtma?,³⁶Mixti' tu'n tmantetl: toqxenb'il Qman Dyos, chiwt, qu'n alkye matmatl ikju', knb'incha'ye' tu'n kyokju' tyol te tiqatz. Mab'aj kych'ixpu'ne' tnab'lju' nyole' ayine' Dyos Manb'aj itz'qine' nimwipumale'.

³⁷Jeremiy, xjelunxtzuna kye sanjelal: ¿Titi' sajttzaq'we'n Qman Dyos? ¿Titi' saj tma'n? chiku'ya.³⁸Qatzun toqxenb'il Qman Dyos, qa chechi, tzaq'wenxa kye: Lu ntma'n Qman Dyos: Tu'nju' inx kyma'ne' yol xinma'ne' tu'n lalun kymaye',³⁹che jawil wiq'i'ne' naku'j jun iqtz, tuk'i'lxi' nintnam xinq'o'ne' kyeye' ex kye ojtxi' kychmane', che b'el nxontzuntze' najchaq wi'je'.⁴⁰Ex cheb'el nme'ssa'ne' ex k'elel kych'ixawe' tejumajx, layxpe' tzik'tna'l kyu'ne', chiku'ya kye, chi Dyos. E'yek'unjtz jte' chi'l Iw te techlal

¹Kyb'ajxlenxi'tzun q'i'n Jekoniy tk'wal Joakyin, nimaqkawil toj Juda, kyuk'i'lxi' nejenel toj Juda, eb'inchal chukchaq aq'untl ex b'inchal jupb'il ja, tu'n Nab'ukodonosor tzmajx B'ab'ilon, tzaj tyek'u'n Qman Dyos kab'e' chi'l iw weye' tkub'qe' tpen tja Dyos.²Tb'anilxi'x iw tku'xtoq toju' nejl nq'nax, atzu'n juntl taq'wix iw tku'x toj, layx b'ent tlo'yet.

³Tzajtzun tqani'n Qman Dyos weye' kjalu: ¿Titi' ntka'yi'na Jeremiy? chij. Xi'tzun ntzaq'we'ne': Iw, majx tb'anil qe'ju' b'a'n iw; aye'tzun taq'wix mixyab'a'nqe' layx b'ent kylo'yet, nchije'.

⁴Tzajtzun tma'n Qman Dyos weye' ikjalu:⁵Ayine' Dyos Manb'aj nchin q'mante: Kse'n tb'anil iw kxe'la' nka'yi'ne' tnam Juda xnchaq'e' tu'n tex toju' tnam lu tu'n tpon q'i'n toj kytanam aj kaldey. Che nxtalu'ye',⁶Che nxq'uqi'ye' ex che anjetz wanjsa'ntle' toju' tx'otx' lu. Xi' che jawila' b'ent wu'ne' tzalu ex lay che kub' nxitu'ntle', che b'elex wawa'ne' ex lay che jaw nxb'oqi'ntle'.⁷Kxe'l nq'o'ne' kynab'l tu'n tel kynik' qa ayine' Dyos Manb'aj, che okyel te ntaname' ex weye' che k'ulula', qu'n k'anjetzkyi'j wuk'i'le' tu'n tkyaqil kyk'u'j.

⁸Atzunte Sedekyiy, nimaqkawil toj Juda, kyuk'i'lju' nejenel exqe' najlqe' toj Jerusalen, ju' mache kyejten toju' tnam mujqa mache kub'ten toj Ejipt, ikyche elela' weye' kse'n taq'wix iw, ju' layx b'ent kylo'yet.⁹Knb'incha' jun ti'xti'ye' kyi'j mixyab'a'n k'elela' toj kywitz kykyaqil nimaqtnam twitz tx'otx', ex k'okyel te jun yek'b'il ti'ju' me'sb'il, ik'jtib'il ex qanb'en myab'a'n kyoj kykyaqil tnam jamache'xa' nslamu'ne'.¹⁰Ktzajel nq'o'ne' q'oj, we'yaj ex tx'u'j yab'il kyi'j, mix-a'lo'xte jun kjolpajel toju' tx'otx' xinq'o'ne' kye ex kye ojtxi' kychman, chi Dyos. Tzulju' ajq'oj toj tb'a'nq'ob'kya'j

¹Tzaj tma'n Qman Dyos tyol te Jeremiy ti'j tkyaqilju' tnam Juda toj tkyaji'n ab'q'i nkawin Joakyin tk'wal Josiy toj Juda. Atoq tnejel ab'q'iju' nkawin Nab'ukodonosor toj B'ab'ilon²Xitma'n Jeremiy, ju' t-sanjelal Dyos, tyol Dyos te tkyaqilju' tnam Juda ex kyeju' najlqe' toj Jerusalen. Tma:³Mab'ent junaq oxe' (23) ab'q'i ntzaj tma'n Qman Dyos tyol weye', tzajx toj oxlajoj (13) ab'q'i nkawin Josiy tk'wal Amon toj Juda ex tzmax ja'lo, ex matxi' txi' nyoli'ne' kyeye' kukxju', aye'tzunkye' min nchinx kyb'i'ne'.⁴Expe' b'a'npunxi' maj matxi' che tzaj tchq'o'n Qman Dyos tmajenju' sanjelal, mixti'x nche'x kyb'i'ne', expe' mixti'x kyajb'ile' tu'n tkub' kyb'i'ne' ex tu'n t-xikynima'ne'.⁵Matxi' b'ajx kyma'n kyeye' ikjalu: Kyq'onkje' kychwinqlale' myab'a'n ex kyb'inchb'aje' taq'wix, che anq'iltzuntze' kukxju' toju' tx'otx' tzaj tq'o'n Qman Dyos kyeye' ex kye ojtxi' kychmane'.⁶Lalun che'xe' kywitz txqantl Dyos, lalun che k'ulune' kye ex lan che jaw kynima'ne'. Lalun tz'ok kyq'o'ne' ttx'u'jil Qman Dyos tu'n witzleb'i'n b'incha'nqe' kyu'nxe', laytzun tzaj tq'o'n jun taq'wixtz kyib'aje', chechij.⁷Atzu'n ja'lo chi Qman Dyos kjalu: Mixti'x nchin tzajkyb'i'nkye', in okkyq'o'ne' ntx'u'jile' tu'n kyk'ulu'ne' kye kywitzleb'e' b'incha'n kyu'nxe', axtzunte ktzajel tz'aqju' kyib'aje', chij.

⁸Qu'mtzun ntma'n Qman Dyos nimtipumal ikjalu: Mixnati'x ntzaj kyb'i'ne' woqxenb'ile',⁹Che tzajel ntxko'ne' kykyaqilju' tnam toj tb'a'nq'ob'kya'j exju' nmajine' Nab'ukodonosor, nimaqkawil aj B'ab'ilon, tu'n kytzaj ex tu'n kyq'ojin ti'ju' tnam lu, kyi'j kykyaqilju' najlqe' toj ex kyi'j kykyaqilju' nimaqtnam ti'jile. Majx che b'ajel nxitu'ne'. Majx che kjel naq kyik'lentl ex xob'ajilx.¹⁰Knb'incha'ye' tu'n lalun b'itzanjtztl b'itz te ninq'ij ex tzalajb'il, ex b'itz te mjeb'le'n, ex lay b'injtztl kyq'ojq'ojel ab'j cheb'l, ex lay che k'antl kantil.¹¹Kjel xitj tkyaqilju' tnam lu ex naq tik'lentl kjel. Che tenb'el oxnaq lajoj (70) ab'q'iju' nimaqtnam lu tjaq' tkawb'il nimaqkawil aj B'ab'ilon.¹²Ajtzun tjapu'n oxnaq lajoj (70) ab'q'i, kb'el ntz'e'ysa'ne' twitzju' nimaqkawil aj B'ab'ilon tuk'i'lxi' ttanam tu'n tpaju' kyil, ex majx kjel nxitu'ne' tejumajx. Ayine' Dyos Manb'aj nchin yolin.¹³Tkyaqilju' oje nmaye' ex tku'x toju' u'j lu, ktzajel nq'o'ne' tib'aju' tnam lu, tkyaqilju' matxi' tnam Jeremiy kyi'j kykyaqilju' nimaqtnam.¹⁴Ex ikxkye, nimaqtnam ex nimaqkawil nim kyipumal che kawilkye. Iktzu'n k'okyela' t-xel kye tu'n tpaju' kyb'inchb'aj, chi Dyos. Tz'e'ysb'il kywitz nimaqtnam

¹⁵A saj tma'n Qman Dyos weye': Ka'yintza k'wab'l lu nojni tu'n ta'lju' nq'oje. Q'inxa ex q'onxa te kyk'wa' kykyaqil nimaqtnam jaxa' nchq'o'na.¹⁶Ajt-xikyk'wa'n che okelten xab'el ex k'okyel toj kywi' tu'n tpaju' q'oj ktzajel nchq'o'ne' kyi'j.

¹⁷Elntzyu'ne' k'wab'l te Qman Dyos ex xinq'o'ne' te kyk'wa' kykyaqil nimaqtnam janxa' tchq'o'ne' Qman Dyos.¹⁸Xinq'o'ne' te kyk'wa' aj Jerusalen ex kye nimaqtnam toj Juda, ex kye nimaqkawil ex nejenel, tu'n tkub'kyi'j ex tu'n kykyaj xitjniqe'tl, xob'ajil qe'xtl te yek'b'ilteju' qanb'en myab'a'n kse'n ta'qe' ja'lo.¹⁹Ikx xinq'o'ne' te tk'wa' paraon, nimaqkawil toj Ejipt, ex kyeju' nche kawin tuk'i'l ex te tkyaqilju' ttanam,²⁰ex kye chukchaq xjal ate' atzu', kye kykyaqil nimaqkawil toj tx'otx' Us ex toj kytx'otx' pilistey: aye' Askalon, Kasa, Ekron exju' kyajni te Asdod,²¹kye Edom, Moab' ex Amon,²²kye kykyaqil nimaqkawil kyoju' tx'otx' toj ninnjab' Mediteraney,²³kyeju' tnej tyajajil Dedan, Tema ex B'us, ex kyeju' tnam nche json kywi' ttx'u'k kyplaj,²⁴kye kykyaqil nimaqkawil aj Arab'ya, kye kykyaqil kynimaqkawil chukchaq xjal najlqe' toj chq'ajlaj,²⁵kye kkyaqil nimaqkawil kye Simri, Elam ex Medya:²⁶kye kykyaqil nimaqkawil toj tb'a'nq'ob'kya'j, nqaku' mujqa najchaq kyxol. Aye' kykyaqil kawb'il twitz tx'otx'. Yajxi'tzuntl tu'n txitk'wa'n nimaqkawil aj B'ab'ilon.

²⁷Tzajtzun tma'n Qman Dyos weye': Q'manxa kye qa ayine' Dyos Manb'aj nimwipumale', inchaq'u'ne' kye tu'n txi' kyk'wa'n tzmax ajxi'x kytx'ujti tu'n, ajkyxab' ex ajkykub' tz'aq tu'n lalun che jawe'tl tu'nju' q'oj ktzajel nq'o'ne' kyi'j.²⁸Qatzun min kyajb'il tu'n txi' kytzyu'n ex tu'n kyk'wante, q'manxa kye: A xtma Qman Dyos nimtipumal kyjalu: Tililxti'j tu'n txi' kyk'wa'ne'.²⁹Ktzyetelwe' ntz'e'ysante twitzju' nintnam xjansa'n weye'. ¿Ma laytzun tz'e'yset kywitze'? Ilti'j ktz'e'ysetelkye' kywitz, qu'n ktzajel nchq'one' q'oj kyi'j kykyaqilju' najlqe' twitzu' tx'otx'. Ayine' Dyos Manb'aj nimwipumale' nchin yolin.

³⁰Jeremiy, q'manxa tqanil tkyaqilju' ti'xti' lu. Q'manxa kjalu:
Nxi'x tinun toj twi' Qman Dyos nyolintz tzmax jawl, toju' najb'il xjan janajla'. Inẍch'intz kyi'ju' trit kse'n nwulin kyi'ju' pch'ul ub'a, kyi'j kykyaqilju' najlqe' twitzu' tx'otx'.³¹In pon tq'ojq'ojel tzmax janpona' b'aju' tx'otx', qu'n ktzyetel ttxolil kawb'il tu'n Dyos kyi'ju' nimaqtnam, che ttxka' kykyaqilju' ch'i'ntoj kyq'ij tu'n kyok toj xjel, tu'n kyxitq'o'n b'inchal myab'a'n toj kamik. Aku' Qman Dyos nyolin, chiku'ya, chi Dyos.

³²Intma'n Qman Dyos nimtipumal kjalu: Tzulte' taq'wixil ti'j jun nintnam ex k'ik'el ti'j juntl nintnam, ktzajel jun q'ankyaq kuwxi'x tzmax ttxa'n tx'otx', chij.³³Aye' che kyimel tu'n Qman Dyos toju' q'ij lu, che kjel woqonje tzajx jun ttxa'n tx'otx' ex ponx jun plajtl. Mix-a'lo'te k'oq'el kyi'j mix-a'lo'x kawil q'inkye tu'n kyku'x mqu'n, che kjel tolonje naku'j tz'is.³⁴¡Che ẍch'inqe'ye' k'ik'lal, che ẍch'inqe'ye' tu'n k'ixk'oj! ¡E'ẍaqlul rit, kyxtolim kyib'e' twitz tx'otx'! Matxi' tzulkanun tu'n kyb'yet xjal che kb'el b'yo'ne' kse'nqe' rit q'u'sqe'.

³⁵Lay b'ent kyoqu' k'ik'lel lay b'ent kyjolpaju' ẍaqlulkye rit.³⁶Nche ẍch'inju' k'ik'lel, nche ẍch'inju' ẍaqlulkye rit, qu'n matxi' kub' t-xitu'n Qman Dyos kywab'lu' rit.³⁷Tzaj ttx'u'jil Qman Dyos ex kub't-xitu'n tb'anil kykojb'il.³⁸Etz kse'n jun b'alun toj tja ex kyej xitju' kytanam, tzaj ttx'u'jil Qman Dyos ex tzaj tq'o'n jun q'oj kuwxi'x. Xob'sanjtz Jeremiy tu'n tkub' b'yo'n

¹Tzaj yolin Qman Dyos te Jeremiy, tej ttzyet tkawin Joakyim tk'wal Josiy toj Juda,²tma ikjalu: We'ku'ya tpenju' ja te k'u'lb'il, ex q'manxa tkyaqilju' xinma'ne' teya tu'n txitma'na kye xjal nche tzaj kyoju' nimaqtnam toj Juda tu'n kyul k'ulul toju' njaye'. Q'manxa tkyaqil kye.³Qaj kxel b'i'na kyu'n ex tu'n tkyaj kyq'o'nju' taq'wix, tu'ntzun lalun kub' ntz'e'ysa'ntle' kywitz tu'n tpaju' kyb'inchb'aj myab'a'n, kse'n xima'n wu'ne'.⁴Q'manxa kye ikjalu: Qa min ẍinkukyb'i'ne' ex min xkyb'inchaye' xnaq'tzb'il b'ajx nq'o'ne' kyeye',⁵exqa min xxikyb'i'ne' oqxenb'il kyu'n nmajine' sanjelal matxi' che'x nchq'o'nxi'ye' kyxole' ex min nche'x kyb'i'ne',⁶kb'incha'tzuntze' tiju' ja te k'u'lb'il lu kse'n nb'inchaye' ti'j Silo. K'okyel nq'o'ne' nintnam lu te yek'b'il qani'n taq'wixil kye kykyaqil nimaqtnam twitz tx'otx', chiku'ya kye, chi Dyos.

⁷Kyb'i pale, e'sanjelal ex tkyaqilju' tnam tej tb'ajx tma'n Jeremiy yol lu toj tja Dyos.⁸Tetzunj tb'aj tma'nju' tchaq' Qman Dyos te, tzyet kyu'n pale e'sanjelal exqe' xjal, ex xikyma'n te: Kkyimela.⁹¿Tiqu'n ntma'na'ya toj tb'i Qman Dyos qa kjelju' tja Dyos lu kse'n Silo, qa kb'el xitu'n nintnam lu exqa mix-a'lo'tl kjel najal toj?, chechij te. Ex tkyaqilju' tnam eb'jo'k tilj ti'j Jeremiy toj tja Dyos.

¹⁰Tetzunj kyb'inte nejenel toj Juda ti'toqju' nb'aj, eb'je'tz toju' tja nimaqkawb'il, eb'ajx toj tja Dyos, e'kub' qe twitz Ak'a'j Tjpel.¹¹Xi'tzun kyma'n pale ex sanjelal kye nejenel ex kye tnam xjal ikjalu: Ati tu'n tkub' b'yetju' xjal lu, qu'n makyb'iye' tu'nku' kyẍkyine' mayolin myab'a'n ti'ju' nintnam lu, chechij.

¹²Xi'tzun tma'n Jeremiy kyeju' nejenel ex kye tnam xjal ikjalu: Ate Qman Dyos saj chq'onweye' tu'n nyoline' toj tb'i, tu'n txinma'ne' tkyaqilju' xkyb'iye' ti'ju' tja Dyos lu ex ti'ju' nintnam lu.¹³Kyka'yinxe' kychwinqlale' ex kyb'inchame' b'a'n, che b'ine' te Qman Dyos, laytzun tzaj tq'o'n taq'wixil xb'aj q'met kyeye'.¹⁴Luqinwe' ntin toj kyq'ob'e', kyb'inchame' titi' kyajb'ile' wi'je'.¹⁵Naq o'kx kyb'inku'ye' b'a'nxi'x: qama chin kub' kyb'yo'ne', atitzun kyiltze' kyuk'ilxi' najlqe' toju' nintnam lu tib'aj jun xjal mixti' til; qu'n axxi'x ate Qman Dyos saj chq'onweye' q'malte chik'lixi'x tkyaqilju' ti'xti' lu, chi Jeremiy.

¹⁶Xi'tzun kyma'n nejenel ex tnam xjal kyeju' pale ex sanjelal ikjalu: Mixti' tilju' xjal lu tu'n tkub' b'yet; mana' yolin qe toj tb'i Qman Dyos, chechij.

¹⁷E'okten jte' tijwnaq q'malte kye tnam xjal ate'toq atzu' ikjalu:¹⁸Tej ntoq kawin Esekyiy, nimaqkawil toj Juda, yolin Mikyey aj Moreset toj tb'i Qman Dyos kye tkyaqilju' tnam Juda, ma ikjalu:
Chi Qman Dyos nimtipumal ikjalu: Kjelte' Syon naku'j kojb'entl, naq tik'lentlte' Jerusalen kjel ch'uqe ex knojel toj twi' tja Dyos tu'n tz'is, chij.

¹⁹¿Ma kub'tzun b'yo'n Mikyey tu'n nimaqkawil Esekyiy ex kyu'n tkyaqilju' tnam aj Juda? Tzajpena' t-xob'il ti'ju' nimaqkawil ex xitqani'n te tu'n ttzaj q'aq'an tk'u'j kyi'j. Mixtzunti'tl tzaj tq'o'n Qman Dyos toq'wix kyib'aj ju' matxitoq tzaj tma'n kye. ¿Ma oktzun k'okyex qq'o'nqeqib' tjaq' jun b'yojxjali'n kuwxi'x?, chechij.

²⁰Ex ikxju' Uriy t-sanjelal Dyos, tk'wal Semayiy ajkyiryat-jearim, yolin toj tb'i Qman Dyos ti'ju' nintnam lu ex ti'ju' tx'otx', kse'nxte Jeremiy.²¹Kyb'i ninaqkawil Joakyim exqe' nche kawin tuk'i'l ex tnejenel aju' tma Uriy, tajb'iltoqtzu'n nimaqkawil tu'n tkub' b'yo'n. Tetzunj tb'inte Uriy, xob' ex xi' oq Ejipt.²²Xitchq'o'n nimaqkawil Joakyim Elnatan tk'wal Akb'or kyuk'i'l jte'tl xjal toj Ejipt,²³tzaj kyiq'i'n Uriy tzmax Ejipt ex xikyq'o'n toj tq'ob' nimaqkawil Joakyim, tchaq'tzuntz tu'n tkub' b'yo'n ex tu'n tku'x xon toj jun jul.

²⁴Yolin Aykam tk'wal Sapan b'a'n ti'j Jeremiy, tu'ntzunju' min xiq'o'ntl Jeremiy toj kyq'ob' xjal tu'n tkub' kyb'yo'n. Kyiqb'il wakx te jun techlal

¹Tzaj yolin Qman Dyos te Jeremiy toj tkyaji'n ab'q'i nkawin Sedekyiy, tk'wal Josiy, toj Juda,²tma ikjalu: B'inchama jte' ky'jaj ex jun kyiqb'il wakx, q'onku'tzuntz ti'j tqula.³Q'onxtzun jun tqaniltza kye nimaqkawil aj Edom, aj Moab', aj Amon, aj Tiro ex aj Sidon, kyi'ju' ajsanjelal nche ul xb'etzalte nimaqkawil Sedekyiy toj Jerusalen.⁴Chaq'unxa tu'n t-xikyma'n kye kynimaqkawil qa ayine' Dyos Manb'aj nimwipumale' nchin q'mante kjalu:⁵Kub' nb'incha'ne' tx'otx', exqe' xjal ex txkup ate' twitz, tuk'i'l nim wipumale', ex jaku' txinq'o'ne' ja wajb'ila'ye' tu'n txi' nq'o'ne'.⁶Matxitzun kub' nq'o'ne' tkyaqilju' tx'otx' lu toj tq'ob' nmajine' Nab'ukodonosor, nimaqkawil toj B'ab'ilon, exqepe' tojk'ul txkup matxi' che kub' nq'o'ne' tjaq' tkawb'il.⁷Kykyaqil nimaqtnam che kjel tjaq' tkawb'il, tjaq' kyawb'il tk'wal ex tchman, tzmax ajtpon kmoj tu'n tkyajtlu' ttanam tjaq' kykawb'il nimaqtnam ex nimaqkawil nim kyipumal.⁸Qatzun ate' junjun nimaqtnam mo nimaqkawil min xkyaq' kawi'kyib' te Nab'ukodonosor, kb'el ntze'ysa'ne' kywitz tu'n q'oj, we'yaj ex tx'u'j yab'il, tzmax ajkykyaj kykyaqil tjaq' tkawb'il. Ayine' Dyos Manb'aj nchin yolin.

⁹Tu'ntzunju', lan che'x kyb'i'ne' sanjelal lu, ajnab'lil mo pjul witzik', exqe' ajk'a kyajb'il tu'n kymante titi' tzul ex ate'k q'malte kyeye' tu'n lalun kyaq'kyib'e' tjaq' tkawb'il nimaqkawil aj B'ab'ilon.¹⁰Chajyolilte' nxikyma'n kyeye', ex o'kx kykanb'aye' che elel iq'i'ne' toju' tnam ex tu'n kyb'ajx nsputi'ne' ex tu'n kyb'aj kyime'.¹¹Atzunte' nintnam mataq'tib' tjaq' tkawb'il nimaqkawil aj B'ab'ilon, kxe'l nq'o'ne' anb'il te tu'n tkyejten tojxju' ttx'otx' tu'n tanq'in toj ex tu'n tawan toj. Ayine' Dyos Manb'aj nchin yolin, Chi Qman Dyos.

¹²Xinma'n weye' lu, ayine' Jeremiy, te Sedekyiy nimaqkawil toj Juda, expe' xinma'ne' te: Kyq'onkxkyib'e' tjaq' tkawb'ilu' nimaqkawil aj B'ab'ilon ex ttanam, che anq'iltzuntze'.¹³¿Ma oktzun che kyimelkye' tuk'i'lju' ttanama toju' q'oj, tu'n we'yaj ex tx'u'j yab'il? Qu'n matxina' tmate Qman Dyos qa a kb'ajelju' kyi'j kykyaqil nimaqtnam qa min xkyaq'kyib' tjaq' tkawb'il nimaqkawil aj B'ab'ilon.¹⁴Lan che'x kyb'i'nkye'ye' sanjelal na'j ate'k q'ol kynab'le' tu'n lalun kyaq'kyib'e' te nimaqkawil aj B'ab'ilon, qu'n chajyolilte' inkyma'n kyeye'.¹⁵Intma'nte Qman Dyos qa mya chq'o'nqe' tu'n, naq kyak'a'n nche yolin toj tb'i Qman Dyos. Tu'ntzu'n che kxe'la' sputi'na'ye' tu'n Qman Dyos, ex che kyimele' kyuk'i'lxi' sanjelal nche q'mante lu kyeye'.

¹⁶Ex xinma'ne' kyeju' pale ex kye tkyaqilju' tnam ikjalu: A xtma Qman Dyos ja'lu: Lan che'x kyb'i'ne' sanjelal inkyma'n kyeye' qa lwiyxi'x che tzajel anjsa'ntlju' aq'unb'il toj tja Dyos eb'ajxq'i'n B'ab'ilon. Chajyolilte' lu inkyma'n kyeye'.¹⁷¡Lan che'x kyb'i'ne'! Kyq'om kyib'e' tjaq' tkawb'il nimaqkawil aj B'ab'ilon, che anq'iltzuntze'. ¿Titz'okxb'ajti'j qa makyaju' nintnam lu naq txqan ttx'aq'a'n jatl?¹⁸Qatzun t-sanjelal Dyos qexi'x, qa ayinxwe' nchin yolin, kyqaninxe' te Qman Dyos nimtipumal, tu'n lalun taj tu'n kyb'je'tzq'i'n aq'unb'il ate'x toj tja Dyos, toju' tja nimaqkawil toj Juda ex toj Jerusalen, tu'n lalun che b'ajxq'i'n B'ab'ilon, chi Dyos.

¹⁹Tej texq'i'n Jekoniy tk'wal Joakyin, nimaqkawil toj Juda, tu'n Nab'ukodonosor toj Jerusalen, ex xitiq'i'n B'ab'ilon kyuk'i'lxi' kykyaqilju' nimaq kyoklen toj Juda ex Jerusalen, min exitiq'i'n tqan tilb'ilal, exu' nin pil q'ank'uxb'il tkb'el a', exqe' tq'uqlil, exju' jni'tl aq'unb'il toj tja Dyos. Ape' ntma'n Qman Dyos nimtipumal kyi'ju' ti'xti' lu e'kyajten toj tja Dyos ex toj tja nimaqkawil toj Juda ex Jerusalen:²²Che kxelq'i'n B'ab'ilon, axtzuntzu' che kjela'ten, tzmaxi'j ajnmanteye' tu'n kytzaj wiq'i'n jumajtle' tzalu. Ayine' Dyos Manb'aj nchin yolin, chi Dyos, nchije' kye. Mya ax tmaju' sanjelal Ananiy

¹Tojtzun tjwe'yi'n xjaw texju' tkyaji'n ab'q'i nkawin Sedekyiy toj Juda, xitma'n sanjelal Ananiy tk'wal Asur, aj Kab'aon, te Jeremiy toj tja Dyos kywitzku' pale ex kywitz tkyaqilju' tnam, ikjalu:²—Matma Qman Dyos nimtipumal ikjalu: k'el nlaqu'n weye' iqtz tu'n nimaqkawil aj B'ab'ilon,³ex knb'incha'ye' toj kab'e' ab'q'itl tu'n kyanjtza q'i'ntlju' ti'xti' toju' ja te k'u'lb'il eb'ajx tiq'i'n Nab'ukodonosor toj B'ab'ilon.⁴Ex knb'incha'ye' tu'n kyanjtz q'i'ntl Jekoniy tk'wal Joakyin, nimaqkawil toj Juda, kyuk'i'l kykyaqilju' txqantl xjal eb'je'xq'i'n toj Juda ex eb'ajxq'i'n B'ab'ilon. K'el nxitu'nwe' iqtz nkub' tq'o'n nimaqkawil aj B'ab'ilon. Ayine' Dyos Manb'aj nchin yolin, chi Dyos, chij.

⁵Xitzun ttzaq'we'n Jeremiy, t-sanjelal Dyos, te sanjelal Ananiy, kywitzju' pale ex kywitz tkyaqilju' tnam ate'toq toj tja Dyos, ikjalu:

⁶—¡B'a'n, qama tb'incha Qman Dyos ikju'! ¡Naqwit tb'incha Qman Dyos tu'n kyjapunju' yol xtmaya, tu'n tanjtzkyi'ju' ajb'eb'l toj tja Dyos ex tu'n tanjtzkyi'j kykyaqilju' b'ajxni q'i'nqe'!.⁷Qaja' b'inkutzu'na kxel nma'ne' teya ex kye kykyaqil ja'lo:⁸Kymanakye' t-sanjelal Dyos eb'aj ten ojtxi' na'mxtoq witz'jiye' tuk'i'la, tqanil q'oj, b'is ex tx'u'j yab'il kyi'j nimaqtnam ex nimaqkawb'il nim kyipumal.⁹Qatzun matma jun Sanjelal qa b'a'n ktenb'ela'ju' tnam, o'kx qama japunju' ntma'n k'elela' tnik'tzil qa chq'o'nxi'x tu'n Qman Dyos, chi Jeremiy.

¹⁰Eltzun tiq'i'n Ananiy kyiqb'il wakx ti'j tqul Jeremiy ex b'aj ttoqi'n toj piẍi'n,¹¹axtzun kmoju' xitma'n kye kykyaqilju' ate'toq ikjalu:
—A xtma Qman Dyos kjalu: Ikytzu'n k'elela' wiq'i'ne' iqtz, nkub' tq'o'n nimaqkawil Nab'ukodonosor aj B'ab'ilon, toj kab'e' ab'q'itl ti'j kyqul kykyaqil nimaqtnam, ex k'elel nxitu'ne', chi Dyos, chij.
Ajntzun Jeremiy.¹²Tb'ajlenxi'tzun jte' q'ij telen tiq'i'n Ananiy iqb'il ti'j tqul Jeremiy ex kub' ttoqi'n, tzaj yolin Qman Dyos te Jeremiy ex tma:¹³Q'ma'ka te Ananiy qa ayine' nchin q'mante ijalu: B'aj ttoqi'na jun kyiqb'il wakx tze toj piẍi'n, atzunwe' matxi' kub' nnab'e'ne' jun tiqb'ila k'uxb'il.¹⁴Qu'n ayine' Dyos Manb'aj nchin q'mante: Matxi' kub' nq'o'ne' jun kyiqb'il wakx k'uxb'il ti'j kyqul kykyaqilju' nimaqtnam lu, tu'n kyajb'en te k'a'yi'nmajin te nimaqkawil Nab'ukodonosor aj B'ab'ilon. Exqepe' tojk'ul txkup matxi' che kub' nq'o'ne' tjaq' tkawb'il, chi Qman Dyos.

¹⁵Xitzun tma'n Jeremiy te Ananiy kjalu:
¡B'intzpe'ya Ananiy! Myana' chq'o'nta tu'n Qman Dyos, ex naq toka q'uqb'alte kyk'u'ju' xjal tu'n chajyolil.¹⁶Qu'mtzun ntma'n Qman Dyos kjalu: Kxel nchq'o'nta, qaja' tu'n tkub' naja twitzu' tx'otx'. Kkyimela toju' ab'q'i lu, qu'n mache okmiltz'uju' xjal wi'je' tu'na kyu'n tyola, chi Dyos.

¹⁷Kyimtzu'n sanjelal Ananiy toj twuqi'n xjaw texju' ab'q'i lu. Tuj Jeremiy kyeju' eb'je'xq'i'n

¹Kyb'ajlenxi'tzun q'i'n nimaqkawil Jekoniy tuk'i'lju' ttxu, exqe' majin toj tja nimaqkawil, e'nejenel toj Juda ex Jerusalen, exqe' b'a'n che b'inchan chukchaq ti'xti' e' tx'nol k'uxb'il, xit-sma'n Jeremiy t-sanjelal Dyos jun tuj, tu'n tpon tzmax B'ab'ilon, kyeju' tijwnaq itz'qe'xtoq kyxolju' eb'ajxq'i'n, ex kyeju' pale, sanjelal exqe' xjal eb'ajx tiq'i'n Nab'ukodonosor tzmajx B'ab'ilon.³Xisma'n u'j lu kyi'j Elasa tk'wal Sapan, tuk'i'l Kemariy tk'wal Ilkyiy, eb'ajx tchq'o'n Sedekyiy nimaqkawil toj Juda, yek'ulkyib' B'ab'ilon twitz nimaqkawil Nab'ukodonosor. Intma'n u'j kjalu:

⁴Lu ntma'n Qman Dyos nimtipumal kye kykyaqilju' eb'je'tz tiq'i'n toj Jerusalen tu'n kypon B'ab'ilon, ikjalu:⁵Kyb'incha'nktz kyjaye' ex che tenku'ye'; kyawank tqan kylob'eje' ex che wanqe'ye' ti'j.⁶Che mjeye', che tenx kyk'wale' e' kymyale', ikyqe'xju kyk'wale' che mje ex che tenx kyk'wal. Che chmet-xe' chixi' ex lalun kub'aj kyajlale'.⁷Che aq'unanqe'ye' tuk'i'lju' nintnam jaẍe'xa' nq'o'na'ye', ex che kub'sanqe'ye' nwitze' ti'j, qu'n b'a'n che tenb'ela'ye' qa b'a'n ta'ju' nintnam lu.⁸Inxi' woqxena'ne' kyeye', ayine' Dyos Manb'aj nim wipumale', ikjalu: lan kyaq' sb'u'kyib'e' kyeju' sanjelal exqe' npon kynab'l najlqe' kyxole', lalun che'x kyb'i'ne' kywitzik'.⁹Axxi'x, chajyolilte' tqanil nb'ajx kyq'o'n toj nb'iye' kyeye', chi Dyos.

¹⁰Intma'n Qman Dyos kjalu: Ajtzun tjapun oxnaq lajoj (70) ab'q'i kyu'ne' toj B'ab'ilon, che tzajel nka'yi'ntle' ex kjapumelu' nyole' b'a'n kyeye' tu'n tanjtzkyi'je' toju' najb'il lu.¹¹Kanliwe' nwitz se'nju' nxime' kyeye', jun xim tu'n kytene' b'a'n ex mya toq'wix, tu'ntzun kyxi'ye' yajxi'tl toj q'uqb'an k'u'jal. Ayine' Dyos Manb'aj nchin yolin.¹²Chin tzajel kyna'ntzuntze', che ultzuntze' k'ulul weye' ex che xelnb'i'ne'.¹³Kchin kyjya'ye' ex chin knetele' kyu'ne', qu'n chin kyjya'ye' tu'n tkyaqil kyk'u'je'.¹⁴Kxe'l nq'o'ne' anb'il tu'n njyete' kyu'ne', ex knb'incha'ye' tu'n kyetze' tjaq' yajb'il. Che eletz wiq'i'ne' kyoj kykyaqil najb'il jamache'xa' nsputi'ne', che nb'uyiye' ex che anjetz wiq'i'ntle' toju' najb'il lu jaẍe exa' wiq'i'ne'. Ayine' Dyos Manb'aj nchin yolin.

¹⁵Intzun kyma'ne': Mache tzaj tchq'o'n Qman Dyos t-sanjelal qxole' toj B'ab'ilon, chechije'.¹⁶(Ntma'nte Qman Dyos ti'ju' nimaqkawil tokx toj tq'uqlil Dab'i ex kyi'ju' xjal najlqe' toju' nintnam lu, aye' kywitze'le' min eb'je'xq'i'n kyuk'i'le', kjalu:¹⁷A nyol ju'ye' lu, ayine' Dyos Manb'aj nimwipumale': Che tzajel nq'o'ne' q'oj, we'yaj ex tx'u'j yab'il kyi'je'. Knb'incha'ye' tu'n kykyajtene' kse'nqe' lob'j iw q'anaqtl lu, taq'wixqexi'x layx b'ent kyxilo'yet.¹⁸Kb'el nljo'n toj kyq'ije' tu'n q'oj, wepyaj ex tx'u'j yab'il. Knb'incha'ye' tu'ntzun majx taq'wix che elela'ye' toj kywitz kkyaqil xjal kyoj kykyaqil nimaqtnam ajkyok ka'yi'ne' kyu'n, ex che okyel nq'o'ne' te yek'b'il qanb'en myab'a'n ex ch'xawil, taq'wixi'x che elela'ye' kye ex che b'ajel xob' kyeye' kyoj kykyaqil nimaqtnam ja mache b'ajx nsputi'ne'.¹⁹Qu'n min xxikyb'i'ne' b'ajx woqxena'ne' kyeye' kyu'nelju' nmajine', aye' nsanjelale', kukxtoq kytzaj nchq'o'nju'ye' ti'j juntl ex ti'j juntl ex ti'j juntl, mixti'xtoq nche kub'kyb'i'ne'. Ayine' Dyos Manb'aj nchin yolin.²⁰Kyb'inxtzunju'ye' nyole' ja'lo, kykyaqile' eb'je'x wiq'i'ne' toj Jerusalen ex eb'ajx wiq'i'ne' B'ab'ilon, Chi Dyos.)

²¹Lu ntma'n Qman Dyos nimtipumal, ti'j Akab' tk'wal Kolayiy, ex ti'j Sedekyiy tk'wal Maaseyiy, ju' ate'qe'k q'mal chajyolil kyeye' toj tb'i Qman Dyos: Knb'incha'ye' tu'n kykub'tz'aq toj tq'ob' nimaqkawil Nab'ukodonosor aj B'ab'ilon, ex tu'n kykub' tb'yo'n kywitzku'ye'.²²Qatzun matzaj kytxko'n aj Juda b'ajxniqe q'i'n B'ab'ilon taq'wix tib'aj jun, kkyma': Tzajxwit tq'o'n Qman Dyos tib'aja kse'n tb'incha kyi'j Sedekyiy ex Akab', aye' eb'aj tk'a'sa'n nimaqkawil aj B'ab'ilon toj q'aq', chechiku'.²³A kb'ajelju' kyi'j tu'n tpaju' myab'a'n b'aj kyb'incha'n toj Israel: e'ajpajin kyuk'i'l kyxu'jil kywnaqil ex b'ajx kyma'n chajyolil toj nb'iye' mya chq'o'nqe' wu'ne' tu'n kymante. Kanliwe' nwitz. Ayine' Dyos Manb'aj nchin yolin, chi Qman Dyos, chiju' u'j. Tpakb'al te Semayiy

²⁴Tchaq' Qman Dyos te Jeremiy tu'n txitma'n te Semayiy aj Neelam:²⁵Matma Qman Dyos nimtipumal ikjalu: Xit-sma'na jun u'j tojx tb'iya kye kykyaqil xjal najlqe' Jerusalen, ex te pale Soponiy tk'wal Maaseyiy, ex kye kykyaqil txqantl pale. Xittz'ib'a'na te Soponiy ikjalu:²⁶Matxi' tz'ok q'o'na te pale t-xel Joyada tu'n Qman Dyos, tu'n toka nim toklena ka'yilte tja Dyos. Qama tzul jun okni toj twi' ex matz'okten yolil naku'j t-sanjelal Dyos, k'okyex t-xmo'na toju' tze ex kjelt-xmo'na kyu'n xpatx'k'uxb'il.²⁷¿Tiqu'ntzun b'ajx txa' ttzak'u'na Jeremiy aj Anatot, ju' matxi' tz'okten yolil kywitze' naku'j t-sanjelal Dyos?²⁸Ulpena' t-sma'n jun u'j qeye' toj B'ab'ilon, intma'n kjalu: Che tenb'elkye' nimtoj ti'jxi' qtanam, kyb'incha'nktz kyjaye' ex che najanqe'ye' na'tz, kyawank kylob'aje' ex che nik'b'enqe'ye' ti'j, chij.

²⁹Xit-ẍch'i'n pale Soponiy u'j te Jeremiy.³⁰Tzajtzun yolin Qman Dyos te t-sanjelal kjalu:³¹Chq'onx tq'omliya kye kykyaqilju' b'je'xniqe' qa ayine' Dyos Manb'aj in nma'ne' kjalu: Matxina' yolin Semayiy aj Neelam toj nb'iye' kyeye' extzun mya chq'o'n wu'ne', ex matz'okten q'ol jun q'uqb'ab'l kyk'u'je' mya ax,³²kb'el ntz'e'ysa'ne' twitz Semayiy kyuk'i'lju' tyajajil, ayine' Dyos Manb'aj. Lay che ten tk'wal toju' ntaname', ex lay ten toju' tzalajb'il kxe'l nq'o'ne' teju' ntaname', qu'n matz'ok ajq'oj wi'je' kyu'nju' tyol. Ayine' Dyos Manb'aj nchin yolin, Chi Dyos. Tyol Qman Dyos ttziya ti'ju' tzul

¹A yolu' tzaj tma'n Qman Dyos te Jeremiy ikjalu:²A nyolju'ye' ayine' Dyos Manb'aj kjalu: Tz'ib'anku'xa toj jun u'j tkyaqilju' xb'ajx q'met teya,³qu'n tzul q'ij knch'exb'eye' kychwinqlalju' ntaname' aj Israel ex aj Juda. Ayine' Dyos Manb'aj nchin yolin, chi Dyos.

⁴A tyol Qman Dyos ja'lu kyi'j aj Israel ex aj Juda.⁵Chi Dyos kjalu:
¡Q'ojq'ojqe' xjal nche ẍch'in tu'n xob'el ex min nche nak'e!⁶Kyximankupe'ye' qa jaku' tzul tal jun ichan. ¿Tiqu'ntzun nxi'x kyxqutz'la'n kyib'ju' ichan naku'j tk'ixk'ojal ch'on wi'j kyi'j? ¿Tiqu'ntzun ẍekub' sb'une' kykyaqil?⁷¡Xi' tulkanun jun tq'ijlalil ch'uẍxi'x, b'ajx tzik'a' jumaj kse'n ja'lu! Jun tq'ijlalil kuw k'okyela' kyeju' tyajajil Jakob', oktzun che nkla'we'.⁸Ayine' Dyos Manb'aj nimwipumale' nchin yolin: Knkla'ye' ntaname' toju' yajb'ilte tojitz'jtib'il. ex lay tz'ok jumajtl te k'a'yi'nmajin kye najchaq xjal.⁹Ex k'ajb'el weye' ayine' Dyos Manb'aj, ex te Dab'i ju' k'okyel nq'o'ne' te tnimaqkawil. Ktkla' Qman Dyos ttanam (Jer 46.27-28)¹⁰Ayine' Dyos Manb'aj nchin yolin: Lan che xob'e' tyajajil Jakob', nmajin, lan che xob'e' aj Israel, Kna' che nkla'kye' kyuk'i'lju' tk'wala toju' najchaq tnam ja xanaqe' q'i'ne'. Che anjetzkye' najal toj tzalajb'il, toj nak'b'il, mix-alo' kxob'tzalkyeye'.¹¹Ayine' Dyos Manb'aj nchin yolin antinwe' kyuk'i'le' klolkyeye'. Che kb'el nxitu'ne' kykyaqil nimaqtnam, tuk'i'lxi' jaẍe'xa' nsputi'ne'. Aye'tzunkye' lay che kub' nxitu'ne' naq kb'el ntz'e'ysa'n kywitze' toj kyila: ilti'j kb'el ntz'e'ysa'ne' kywitze', chi Dyos.

¹²A xtma Qman Dyos ja'lu: Layx q'anetju' kyk'ixb'lene', mixti'te q'a'nb'ilte kyb'inchb'aje' myab'a'n.¹³Mixalo'te k'okyel ka'yinkyeye', mixalo'te kq'analte kyk'ixb'lene', ex layx che q'anete'.¹⁴Kykyaqilju' tajpaja sik' tna'la kyu'n, min nche ximantl kyi'je'. Mapena' che oknb'yo'ne' naku'j kyajq'ojqine', makub' ntz'e'ysa'n kywitze' kuw, tu'n tpaj txqan kyb'inchb'aje' myab'a'n, tu'n tpaj kyile' nim.¹⁵¿Tiqu'ntzun nche t'i'njeye' tu'n kyk'ixb'lene'? Layx q'anette' kyk'ixk'oje. Mache oke' wu'ne' toju' k'ixk'oj lu, tu'nju' nim txqan kyile' ex nim kyb'inchb'aje' myab'a'n.¹⁶Ex che b'ajel b'yo'nkye' kykyaqilju' che b'ajel b'yonkyeye', ex kykyaqilju' kyajq'oje' che b'ajxe'l q'i'n toj juntl tx'otx'. knb'incha'ye' tu'n kyajunjtzu' che yajulkyeye', ex tu'n kykub' alq'a'nju' che elq'al kyi'je'.¹⁷Oktzun che nq'a'na' jumajtle', knq'ana'ye' kyk'ixb'lene', b'a'n qama kymaju' kyajq'oje': Matxi' kyej kolb'e'nte Syon, mix-a'lo'tlte nb'ajx tk'u'j ti'j, qa chechi. Ayine' Dyos Manb'aj nchin yolin, chi Qman Dyos.

¹⁸Intma'n Qman Dyos kjalu: K'eletz wiq'i'ne' ttanam Jakob' toj yajb'il, ktzajel q'aq'anqk'u'je' ti'ju' ttx'o'tx', che jawil b'inchetlu' nimaqtnam toju' kyik'len exqe' tja nimaqkawb'il tojilex kykub'el.¹⁹Che b'itzanjtzel b'itz aq'b'il chjonte kyoj ex ktenb'el tzalajb'il kyoj. Lay che kub'aj, knb'incha'we' tu'n kychmet. Lay che el ik'o'n, qu'n che jawil nnima'ne'.²⁰Ikx che tenb'ela' aj Israel kse'n tnejel, kuw che tenb'ela' kytanam nwitze', ex kb'el ntz'e'ysa'ne' kywitzju' ate'k jtz'olkye.²¹Kyxoltzun k'eletza' jun kynejel: k'eletz jun kawil kyxolx. Knb'incha'ye' tu'n ttzaj lq'e nk'etze', ¿Altzulokye jaku' tkuwsatib' tu'n ttzaj lq'e nk'etze'? Che okyel te ntaname', ex chin okyele' te Kydyos. Ayine' Dyos Manb'aj nchin yolin, chi Qman Dyos.

²³Ikyte Dyos ttx'u'jil kse'n jun q'ankyaq, se'n jun kyq'iq' jb'al inxi'x ttoli'ntib' kyib'aju' b'inchal myab'a'n.²⁴K'elelxi'te Qman Dyos ttx'u'jil ajtjapunju' tb'is tk'u'j. Kpomel jun q'ij che kaneb'el ja'lu toj kywitze'. Ajtanjtzkyi'j aj Israel toju' kytanam

¹A ntma'n Qman Dyos ja'lu: Tojtzu'n tq'ijlalil lu, xi' che ajb'ela' kykyaqil tnej tyajajil Israel weye', ex che okyel te ntaname', chij.

²Chi Qman Dyos kjalu: Machinokye' b'a'nwnaq toj chq'ajlaj teju' tnam xkyaj kolchi te kamik. Tej intoq kyjyo'n aj Israel jatu'n kyojlana',³Xinyek'u'n wib'e' najchaq kye. Matxi' che nk'u'jlaye' tejumajx, qu'mtzun kukx tlaq nk'u'ju'ye' kyi'j.⁴Kjawil nb'incha'n jumajtla Israel. Tzul jumajtla kyuk'i'l chilchil b'ixil tuk'i'l nim tzalajb'il.⁵Tzul jumajtla awal ub'a kywi' witz toj Samarya, exqe' mache awan ub'a che nik'b'el ti'ju' twitz kyawal.⁶Qu'n tzul jun q'ij kjawil kyẍch'i'n xq'uqil kywi' witz te Eprayin ikjalu: Kukytzaje', qo'qe' toj Syon, twitz Qman Dyos, chechiku', chi Dyos.

⁷Intma'n Qman Dyos kjalu: Che b'itzan qe'ye' tuk'i'l tzalajb'il ti'ju' ttanam Jakob', ju' nim toklen kyxol kykyaqil nimaqtnam. Tu'n tb'injtzju' kyb'itze' ex kymanxe': Matkol Qman Dyos ttanam, aye' jte'tl min e'kyim kyxol aj Israel, chechiku'ye'.⁸Che eletz wiq'i'ntle' toju' tx'otx' te tb'a'nq'ob'kya'j ex che tzajel nb'u'yi'ne' tzmajx jachaq ta'qe'ye' toj tkyaqil twitz tx'otx'. Che tzajelju' moẍ ex kox, exqe' qya ch'onwi'qe' exqe' matx che itz'ji kyne'ẍ, ¡Nim txqan kyb'aj k'anjetz kyi'j!⁹Inche k'ulun nwitze' ex nche oq' ajtanjtzkyi'j. Che tzajel wiq'i'ne' janche b'eta' a', toj jun b'e tzinun ja lay che jawa' tz'aq. Ayina'we' kyman aj Israel, ex a Eprayin nk'wale' tzikb'aj, chi Dyos.

¹⁰E'nimaqtnam, kyb'intze' tyol Qman Dyos ex kymanx tqanile' kyoju' mlaj najchaq ikjalu: Mache b'ajx t-sputi'n Qman Dyos aj Israel, oktzun che tb'u'yi' ex che kxeltka'yi'n kse'n nchex tka'yi'n k'ik'lel trit, chechiku'ye'.¹¹qu'n tkolpite Qman Dyos ttanam Jakob', tkol te jun nintnam nimtipumal.

¹²Che ul ex che b'itzal tuk'i'l tzalajb'il twi' Syon, che tzalajel ti'ju' t-xtalb'il Qman Dyos: ti'j triy, ti'j b'in ex ti'j aseyt, kyi'j rit ex wakx. Che okyel se'n jun awal chab'a a'li'n, ex lay che kub'numjtl.¹³Che b'ixilju' txin toj tzalajb'il, ikyqe'xju' ku'xun exqe' tijwnaq. Kxel nq'uqb'a'ne' kyk'u'j: knch'exb'eye' kyoq'e'n tu'n tzalajb'il, nimxi'xtl kytzalajb'il kxe'l nq'o'ne' kyetwitzju' kyk'ixk'oj.¹⁴Knb'incha'ye' tu'n kywan pale tb'anil wab'j ex tu'n kywan ntaname' b'a'nxi'x ti'ju' nq'inumale'. Ayine' Dyos Manb'aj nchin yolin, chi Dyos.

¹⁵Intma'n Qman Dyos kjalu: In b'injtz toj twi' jun toj Rama, toj twi' jun xjal inxi'x oq'. A Rakyel, in oq' kyi'ju' tal. ex min ntjo'n tu'n tq'uqb'anjtz tk'u'j qu'n kyimniqe'tl, chij.

¹⁶Atzunte Qman Dyos ntzaj tma'n te: Lalun tz'oq'tla Rakyel; lan tz'eltl ta'l twitza, kna'tenb'elte' tu'me'l t-xelju' tb'isa: Che eletztlkye' tala toju' kytx'otx' ajq'oj. Ayine' Dyos Manb'aj nchin yolin.¹⁷B'a'nte' kxe'la'ya k'anjetz kyi'ju' tk'wala toj kytanam. Ayine' Dyos Manb'aj nchin yolin.¹⁸In nb'i'ne' nxi'x kub'kyoq'je'n tyajajil Eprayin, ex nkyma'n kjalu: Ikyqo'toqju'ye' se'n jun qpoj tman wakx smaron, ex matxi' qokub' tmansi'na'; qotiq'inx jumajtla tuk'i'la, ana'teju'ya Dyos Manb'aj qib'aje'.¹⁹El qpa'nqib'e' ti'ja, ex matxi' tz'anjtzti'j qanmiye'; matz'el qnik'e' ti'ju' qile' ex nqjuma'nqib'e' nqo ch'ixwiye' ex nqme'ssa'nqib'e' tu'n tpaju' qile' toj qku'xumale', chechij.²⁰Nk'walqe'we' tyajajil Eprayin k'u'jla'nqe' wu'ne'; ate nk'walju'ye' nchin laqxi'xe' ti'j. expe' ajtkub' ntzak'u'ne', min nik'tna'l wu'ne'; matz'exch'yon toj nk'u'je' ex ma'xi'x tzaj q'aq'an nk'u'je' ti'j. ayine' Dyos Manb'aj nchin yolin.²¹Aj Israel, kyq'onku'ye' techelju' b'e, Tu'ntzun tokyal kyu'ne' lwiy, kyka'yinkxi'xe' b'e jaeb'eta'ye'. ¡Kutanjtz kyi'je' aj Israel, kutanjtz kyi'je' kyoju' nimaqkytaname'!²²¿Ma kukxtzun ttakanjeju'ya, kse'n jun myalb'aj makub' tzpet? Ayine' Dyos Manb'aj, oje kub' nb'incha'ne' jun ak'a'j twitzju' tx'otx': jun qya te t-xq'lab'ju' ichan, chi Dyos. B'a'n che tenb'ela'tl aj Israel yajxi'tl

²³Intma'n Qman Dyos nimtipumal ikjalu:
Aj nch'exb'enteye' tu'me'l kychwinqlalju' aj Juda, ajkyten jumajtl toju' kytx'otx' ex kyoju' nimaqkytanam, kkyma' jumajtl: Awt Qman Dyos k'i'wlanteju' witz xjan lu jata' tnik'alilti'j, chechiku'.²⁴Che najalju' aj Juda exqe' najlqe' kyoj nimaqtnam na'tz, e'aq'unal ti'j awal ex k'ik'lel.²⁵Kxe'l nq'o'n txqanwe' kywa ex kyk'wa' siktniqe' ex mixti'tl kyipumal, Chi Qman Dyos.

²⁶Tzajtzun nna'nwib'tze' ex njaw ka'yine'. Majx b'a'n ela' nwitzik'e' weye'.

²⁷Tma Qman Dyos kjalu:
Tzul jun q'ij knb'incha'ye' tu'n kychmet xjal ex txkup kyoju' tx'otx' Israel ex Juda.²⁸Kse'nx tej woktene' xb'oqil, ch'uyil, yuch'il, xitul ex yajul, ikxtzu'n chin okyeltene' ka'yilte tu'n tjaw b'inchet ex tu'n tawet. Ayine' Dyos Manb'aj nchin yolin.

²⁹Lay q'manjtztlju' yol toju' tq'ijlalil lu ikjalu: Xikylo'n manb'aj tx'am ub'a, jawtzun b'ent pok'tz t-xe kywitzte kyk'wal.³⁰Qu'n alkyete malo'n tx'am ub'a, axtzunte che b'je'letz q'uchj twitzteju'. Teyilex junjun kkyimel tu'npajx til, chi Dyos.

³¹Matma Qman Dyos kjalu:
Tzul jun tq'ijlalil kjel b'ent jun nyole' ak'a'j kyuk'i'l aj Israel ex aj Juda.³²Mikxa'tlju' kse'n yol kyej b'entti'j wu'ne' kyuk'i'lju' ojtxi' kyyajilb'ene', tej kyetzwiq'i'ne' toj Ejipt, qu'n min japunju' nyole' kyu'n, extzun ayine' kyajaw. Ayine' Dyos Manb'aj nchin yolin.³³Ate yolju' kjel b'entti'j wu'ne' toju' tq'ijlalil lu kyuk'i'l aj Israel ikjalu: Kb'el nq'o'ne' nkawb'ile' toj kyanmi ex kjel ntz'ib'a'ne' toj kywi'. Che ajb'el weye' ex che okyel te ntanam kuxi'xe'. Ayine' Dyos Manb'aj nchin yolin.³⁴Min nojqelantl tu'n kyokten xnaq'tzalkyib' kyxolilex, mujqa xnaq'tzalte kytzik mo kyitz'in tu'n telkynik' weye', qu'n kykyaqil k'elel kynik' weye', tzajx kyuk'i'lju' nimaq kyoklen ponx kyuk'i'lju' ch'i'n kyoklen. Kb'el nnajsa'nwe' kyb'inchb'aj myab'a'n ex lay tzaj nna'ntle' kyil. Ayine' Dyos Manb'aj nchin yolin, Chi Qman Dyos.

³⁵Ate Qman Dyos kyej q'onte tu'n tk'antju' q'ij te q'ijtl aye'tzu'n xjaw ex che'w tu'n kyk'ant te qonik'an, ntb'incha'n tu'n tyukchiju' ninnjab' ex tu'n kyq'ajtiju' ttolob', a tb'iju' Qman Dyos nimtipumal, intma'n kjalu:³⁶Qama pon jun q'ij min ẍe japunju' nkawb'ile' lu kyu'n, atzun q'iju' mya ntanamqe'tle' aj Israel. Ayine' Dyos Manb'aj nchin yolin.³⁷Qama pon jun q'ij mab'ent kyechanteju' kya'j ex mab'je'l yal tzajx t-xe'xi' tx'otx' kyu'n, atzun q'iju' che elel wik'o'ne' aj Israel tu'n tpaj tkyaqilju' matxi' kyb'incha, chi Dyos.

³⁸Chi Qman Dyos ntma'n:
kpomel jun q'ij kjawil b'inchet jumajtlju' nintaname', ktzajelx jata' ja Ananel nimin twe' kpomelx ttzi tnam toj ttx'u'k.³⁹Kxe'ltzun nqachtz na'tz tzinun tu'n tpon tzmajx twi' Kareb', kxel txalpujtzuntz tu'n tpon tk'etz Koa.⁴⁰Tkyaqilju' b'ya' janche ku'xa' mqu'n kyimni ex janku'xa' xon tza'j, ex tkyaqilju' tx'otx' tib'aju' a' twitz xaq Sedron ex kpomelx jata' ttx'u'k jata' ttzi tnam kye chej tb'i toj tjawetzq'ij, che xjansanjtzel weye', ex tkyaqil ja'lu layx kub' tx'u'yetl ex lay kub' xitetl, chi Qman Dyos. Tloq' Jeremiy jun tx'otx'

¹Tzaj yolin Qman Dyos te Jeremiy toj tlajoji'n ab'q'i nkawin Sedekyiy toj Juda, twajxaqlajoji'ntoq ab'q'i nkawin Nab'ukodonosor.²Intoq che q'ojin t-xjal nimaqkawil aj B'ab'ilon ti'j Jerusalen toju' tq'ijlalil lu, atzu'n Jeremiy t-sanjelal Dyos jpu'ntoq tpen xq'uqb'il ti'ju' ja te nimaqkawb'il.³Ojetoq tchaq' nimaqkawil Sedekyiy tu'n tjpet, qu'n ojetoq tma Jeremiy kjalu: Matma Qman Dyos kjalu:
Knb'incha'ye' tu'n tkub' tz'aqju' nintnam lu toj tq'ob' nimaqkawil aj B'ab'ilon,⁴ex lay jolpaju' nimaqkawil Sedekyiy toj kyq'ob' aj Kaldey, kb'eltz'aq toj tq'ob'ju' nimaqkawil aj B'ab'ilon ex ati tu'n tpon yek'ultib' twitz.⁵Kxe'l tiq'i'n Nab'ukodonosor Sedekyiy tzmax B'ab'ilon, kjel tentzuntz nimtoj tzmax ajnmanteye'. B'a'nqa mache q'ojine' kyi'j aj Kaldey, layx che kanb'ane'. Ayine' Dyos Manb'aj nchin yolin, chi Qman Dyos, chi Jeremiy.

⁶Ex tma Jeremiy ikjalu: Tzaj yolin Qman Dyos weye', tman ikjalu:

⁷Ape' tila, tzul Anamel twitze'la tk'etza, ju' tk'wal Salum kyitz'inkyib' tuk'i'l tmana, q'malte teya ktlq'a'ya ch'i'n ttx'otx' toj Anatot, atita toklen tu'n tlq'onteya qu'n aya twitze'l nqaku'xi'x ti'j, chi Dyos.

⁸Ikxi'xju' tma Qman Dyos, ulju' nwitze'le' Anamel nk'itze' tpenju' xq'uqb'il ex tzaj tma'n weye' tu'n nlq'onteye' ttx'otx' ati Anatot, toj kytx'otx' tnej tyajajil B'enjamin, qu'n ayine' ati woklene' ti'j tu'n ntzyunteye', tu'nju' ayine' atixi'x woklene' tuk'i'l kyxol qwitze'le'. Tej tel nnik'e' ti'j qa jun chaq'b'il ja'lu tu'n Qman Dyos,⁹nloq'e' tx'otx' te nwitze'le' Anamel. Xinq'o'ne' wuqlajoj saqpwaq te qu'n ikytzaja' tq'o'nju', ex kub' tu'jilju' loq'enj lu, ok sey ti'j ex sqitetti'j kyu'n tziyal.¹¹Etzwiq'i'ne' kab'e' tilb'ilalju' tu'jil, jpu'n ttziju' jun kse'nxju' nb'inchet ti'j jun tx'otx' malq'et, atzu'n juntl jqo'n,¹²xinq'o'ntzuntze' te B'aruk, tk'wal Neriy ex tchman Maaseyiy, kywitzku' nwitze'le' Anamel, e'tziyal e'kub' sqitunteti'j ex kywitz kykyaqilju' aj Juda q'uqlqe'toq tpenju' xq'uqb'il.¹³Kywitztzun xa' nma'ne' te B'aruk kjalu:¹⁴Matma Qman Dyos nimtipumal nkyk'lu'n aj Israel ikjalu: Q'inxa kab'e' tilb'ilalju' tu'jil tx'otx' xlq'et lu, ju' jpu'nxi'x exju' jqo'n, k'u'nqe'xa toj jun tx'otx' k'wil, tu'ntzun tk'u'yet nim tab'q'iyil.¹⁵Qu'n chi Qman Dyos nimtipumal nkyk'lu'n aj Israel ikjalu: Che lq'onjtzel jumajtl ja, awb'il e'tqan ub'a toju' tx'otx' lu, chij. Tna'j Dyos Jeremiy

¹⁶T-xilenxi'tzun tq'o'n Jeremiy tu'jil tx'otx' te B'aruk tk'wal Neriy, xitma'n te Qman Dyos toj tna'j Dyos kjalu:¹⁷Nman Dyos, tb'inchaju'ya kya'j ex tx'otx' tu'n nimtipumala. Mixti' jun ti'xti' laywit b'ent tu'na.¹⁸Intyek'u'nta tk'ujlalil kye mutx' tnej xjal, ex nttz'e'ysa'na kywitz xjal tu'n tpaj kyil kyman. ¡Nman Dyos nimtipumala, a tb'iju'ya nimtipumal!¹⁹Majx tb'anilxi'xta t-xim ex nimtipumala toju' taq'una. Intka'yi'na tkyaqilju' nkyb'incha'n xjal ex ntq'o'na tu'me'l t-xel teyile junjun kse'nxju' kyb'inchb'aj.²⁰E'tb'inchaya b'a'nq'ob'aj ex techlal toj Ejipt, expe' ljo'nx tb'inchanteya ja'lo toj Israel ex kyxol kykyaqil xjal, ikytzu'n matxi' b'ajb'injtzu' tb'iya.²¹Etztiq'i'na ttanama Israel tu'n tipumala toj Ejipt, e'tb'inchaya b'a'nq'ob'aj ex techlal ex kykyaqil eb'aj t-xob'tza'na.²²Tzaj tq'o'nju'ya tb'anil tx'otx' lu kye aj Israel, kse'nx ojetoq ttziyaya kyeju' ojtxi' kyyajilb'en.²³Tetzunj kyoktz toju' tx'otx' ex tb'ajtzyet kytx'otx', min e'nimantl teya ex min e'oklpe tiju' xnaq'tzb'il b'ajx tq'o'na kye, ex mixti'x xikyb'incha'n tchaq'a kye. Qu'mtzun tzaja' tqo'na k'ixk'oj lu kyib'aj.

²⁴Atzu'n ja'lo matxi' b'aj kyb'incha'n kaldey kyxwe'lil tu'n kyq'ojin ti'ju' nintnam, ex kb'elti'j kyu'n tu'nju' q'oj, we'yaj ex tx'u'j yab'il. Ka'nxtzun lon, Nman Dyos, njapunju' tyola.²⁵Atzuntlta Nman Dyos, tchaq'a tu'n nlq'onteye' tx'otx' ex tu'n nchjonteye' twi' kywitzku' tziyal, b'a'nqa makub' tz'aqu' nintnam toj kyq'ob' kaldey, chi Jeremiy toj tna'j Dyos.

²⁶Tzajtzun ttzaq'we'n Qman Dyos te Jeremiy kjalu:

²⁷Ayinweju'ye' Dyos Manb'aj kyib'aj kykyaqilju' itz'qe'. Mixti'x jun ti'xti' laywit b'ent wu'ne'.²⁸Qu'mtzun nxinma'ne' teya: Knb'incha'ye' tu'n tkub' tz'aqju' nintnam lu toj tq'ob' Nab'ukodonosor, nimaqkawil aj B'ab'ilon, ex toj kyq'ob' kaldey.²⁹Che okyexju' kaldey nchi q'ojin toju' nintnam ex k'okyel kyq'o'n tq'aq'al, kb'ajel kytz'e'ysa'n kyuk'i'lxi' ja, ja noka' q'o'n ntx'u'jile', nche kub' tz'e'ysa'n sturak twitz B'aal ex nche kub' q'o'n oyaj b'in kywitz txqantl dyos kyib'aj.³⁰Ttzajlenx ojtxi', kukx kyb'inchante aj Israel ex aj Juda myab'a'n nwitze', kukx tok kyq'o'n ntx'u'jilju'ye' kyu'n kywitzleb' ju' aye'x nche kub' b'inchankye. Ayine' Dyos Manb'aj nchin yolin.³¹Exte' nintnam lu, ttzajlenx tej ttzyet tjaw b'inchet tzmax ja'lo, naqx q'ol ntx'u'jile' ta'ya'. Qu'mtzun knb'incha'ye' tu'n tkub'najsa'n,³²tu'ntzunte' xb'jo'k kyq'o'n aj Israel ex aj Juda ntx'u'jile' tu'nju' kyb'inchb'aj myab'a'n, ikyqe'xju' kynimaqkawil ex kynejel, e'pale ex sanjelal kyxol ex kykyaqilju' najlqe' toj Juda ex toj Jerusalen.³³Min nche tzaj ka'yin weye', naq kytze'lkyi'j ntzaj kymiltz'u'n weye', maskyetzun min nkyaj ntzaqpi'ne' tu'n kyxnaq'tzet, min nchin kyb'i'ne' ex min nkyq'a' tzak'u' kyib'.³⁴Mape' kub' kytz'ilsa'n ja te k'u'lb'il xjansa'n weye', mache kub' kyq'o'n kywitzleb' mixyab'a'nqe' toj.³⁵Ex eb'jaw kyb'incha'n q'olb'eb'l te B'aal toju' b'ya' B'en-inom, tz'e'ysb'ilkye kyk'wal ex kymyal te chojb'il twitz Molok, ikytzu'n ẍeb'inchana' il aj Juda, mab'aj kyb'incha'n ti'xti' mya ch'q'o'n wu'ne' expe' min xima'n wu'ne'. Yol tziya'n ti'ju' tzul

³⁶Ayine' Dyos Manb'aj, nche k'ulun aj Israel weye', nchin yoline' ti'ju' nintnam lu, ju' intma'na qa kb'eltz'aq toj tq'ob' nimaqkawil aj B'ab'ilon tu'nju' q'oj, we'yaj ex tu'n tx'u'j yab'il.³⁷Che b'ajel nb'u'yi'ne' kywnaqile' kyoj kykyaqilju' tx'otx' jamache'xa' nsputi'ne' tu'n ntx'u'jile' ex txqan nq'oje, ex che tzajel wiq'i'n jumajtle' toju' najb'il lu tu'n kyanq'in b'a'n.³⁸Che okyel te ntaname' ex che ajb'el weye'.³⁹Knb'incha'ye' tu'ntzun o'kxtzu' k'okyela'ten kyk'u'j ex kkyma' tu'n kyajwalinte nb'iye' toj tkyaqilju' kychwinqlal, tu'n kyten b'a'n exqe' kyyajajil.⁴⁰Kjel b'entti'j jun nyole' tejumajx kyuk'i'l: kntziya'ye' tu'n nb'inchanteye' b'a'n kye kukxju', ex kb'el nq'o'ne' toj kyanmi tu'n kyniman weye' tu'n tkyaqil kyk'u'j ex tu'n lan tz'el kypa'n kyib' wi'je'.⁴¹Chin tzalajele' ajnb'inchanteye' b'a'n kye, ex axxi'x che najal wu'ne' toju' tx'otx' lu tu'n tkyaqil nk'u'je', chi Qman Dyos.

⁴²Ex tmatl Qman Dyos ikjalu:
Kse'nx tej saj nq'o'ne' jun xitb'il nimxi'x ti'ju' tnam lu, ex ktzajel nq'o'ne' tkyaqilju' b'a'n matxi' ntziyaye'.⁴³Extzu'n nintnam lu xtmaya qa kjel chq'ajlajtl, mix-a'lo'tl xjal ex txkup knajal toj, ex kb'eltz'aq toj kyq'ob' kaldey, che lq'ol jumajtl kytx'otx'.⁴⁴Che lq'etel jumajtl ex kb'el kyu'jil, k'okyel sey kyi'j ex ksqitetel kyi'j kyu'n tziyal. Kb'inchetel ja'lu toj kytx'otx' tyajajil B'enjamin, ti'jile Jerusalen ex kyoju' nimaqtnam toj Juda, jni'x kyoju' tx'otx' kywi' witz ex toj plan, ex kyoju' nimaqtnam toj Nekeb', qu'n knb'incha'ye' tu'n lalun che yajtitl. Ayine' Dyos Manb'aj nchin yolin. Tqanil tu'n kyanq'in jumajtl b'a'n

¹Tej jpu'nxtoq Jeremiy tpenju' xq'uqb'il, tzaj yolin jumajtl Qman Dyos te, tma ikjalu:

²Ayine' Dyos Manb'aj, nkub' b'inchante tx'otx', b'aj nb'incha'ne' ex kub' nkuwsa'ne' toju' tkb'el, kxe'l nma'ne' teya:³Chin ttxkoma ex kxel ntzaq'we'na, ex kxe'l nma'ne' kyqanil nimaq ti'xti' te lab'te'n teya, ju' min kanli twitza.⁴Ayine' Dyos Manb'aj nche ajb'en aj Israel weye', ati jun tqanil wu'ne' kyi'ju' ja toj Jerusalen ex kyi'ju' kyja nimaqkawil toj Juda che b'ajel xitj. Qama che exe' q'ojil kyi'ju' kaldey b'incha'ntl kyxwe'lil te kyq'ojb'il ti'ju' nintnam lu, naq tu'n kykyaj txqan kyimni. Knb'incha'ye' tu'n kyb'aje' tu'nju' nin nq'oje kyi'je', qu'n matxi' txinmiltz'u'n tze'lwi'je' teju' nintnam lu tu'n tpaju' txqan kyb'inchb'aje' myab'a'n.⁶Oktzun che nq'ana'tle', che q'anetele' ex knb'incha'ye' tu'n kytzalaje' toj jun kychwinqlale' b'a'n ex nak'b'il.⁷Knch'exb'etle' kyanq'ib'l aj Juda ex aj Israel, ex che jawil nb'incha'n jumajtle' tu'n kyten kse'n tnejel.⁸Che nẍtilsa'ye' te tkyaqilju' kyil b'aj kyb'incha'n nwitze', kb'el nnajsa'ne' tkyaqilju' kyb'inchb'aj myab'a'n ex tu'n ẍe okmiltz'uj wi'je'.⁹Tzalajb'il k'okyela' Jerusalen weye', ktenb'el toklen ex ninb'ilte kywitz kykyaqil nimaqtnam twitz tx'otx'. Ajkyb'inte tqanil tkyaqilju' b'a'n ktzajel nq'o'ne' kyeju' najlqe' toj Jerusalen, ex ajkyxi' twitz jawl wu'ne', che xob'el, chi Qman Dyos.

¹⁰Ex tma Qman Dyos kjalu:
Inkyma'ne' qa chq'ajlaju' tx'otx' lu ex mixti'qe' xjal ex txkup najlqe' toj, ex mixti'xte ati kyoju' b'e toj Jerusalen ex kyoju' nimaqtnam toj Juda; ex mixti'xte xjal ex txkup kyoj. Oktzun che b'injtzel jumajtlkye'¹¹b'itz te ninq'ij ex tzalajb'il, ex kyb'itzju' ch'inxtl kymje, ex kb'injtzel ajkyb'itzante kjalu: Kyq'onx chjonteye' te Qman Dyos nimtipumal, qu'n b'a'n te Qman Dyos, tejumajxju' tk'u'jlalil. Ex kb'ajtzajel q'i'n oyaj te aq'b'il chjonte toju' ja te k'u'lb'il. Iku', knch'exb'eye' tanq'ib'lju' tnam lu, tu'n kyoktl kse'n tnejel. Ayine' Dyos Manb'aj nchin yolin, chi Dyos.

¹²Intma'n Qman Dyos nimtipumal ikjalu:
Ktenb'el jumajtl kywa alu'mj toju' tx'otx' lu, ju' chq'ajlaj ja'lo, mixti'qe' xjal ex txkup toj, ex kyoj kykyaqil nimaqtnam toj, jaxjaku' mache'xa' kyiq'i'n k'ik'lel kyalu'n ktenb'el kywa.¹³Che tenb'el jumajtl k'ik'lel ajlal kyrit Kyoju' nimaqtnam kywi' witz ex kyoj plan tx'otx', kyoj nimaqtnam toj Nekeb', toj kytx'otx' tyajajil B'enjamin, ti'jile Jerusalen ex kyoju' txqantl nimaqtnam toj Juda. Ayine' Dyos Manb'aj nchin yolin, chi Dyos.

¹⁴Intma'n Qman Dyos kjalu:
Kpomel jun q'ij che japumelju' nyole' ntziyaye' tu'n kyky'i'wlet aj Israel ex aj Juda.¹⁵Ajtjapunju' tq'ijlalil lu, knb'incha'ye' tu'n tten jun tyajajilxi'x Dab'i, kb'eltq'o'n tnik'alilti'j ex ttxolilxi'xti'j toju' nintnam.¹⁶Che kletel aj Juda toju' tq'ijlalil lu ex che tenb'el aj Jerusalen toj q'uq'li tku'jlalil. A tb'iju' k'okyel kyq'o'n kjalu: Tu'nte Qman Dyos nqo kanb'ana'.¹⁷Ayine' Dyos Manb'aj, a in nma'nju'ye': Ktenb'el jun tyajajil Dab'i kukxju' toju' kawb'il toj Israel,¹⁸ex che tenb'el pale kukxju' kyxol tyajajil Leb'i tu'n kyq'onte chojb'il k'ok'sb'il nwitze' tkyaqil q'ij, tu'n kytz'e'ysante oyaj kywitz awal k'ok'e'kywitz te ninb'ilweye' ex tu'n tkub' kyq'o'n txqantl chojb'il nwitze', chi Dyos.

¹⁹Tzaj yolin Qman Dyos te Jeremiy ex tma:

²⁰Kxe'l nma'ne' ayine' Dyos Manb'aj: Min nkub' xitjwe' nyol kyejni b'entti'j ti'ju' q'ij ex qonik'an, inul kanunte' q'ijtl ex qonik'an tojxju' kmoj te.²¹Ikxtzun nyolju'ye' kyejni b'entti'j tuk'i'l nmajine' Dab'i, ex ilti'j ktenb'el jun tyajajil toju' oklenj te tkawil, mujqa tu'n tjapunju' nyole' kyej b'entti'j kyuk'i'l pale aj Leb'i ajb'elqe' weye'.²²Ex che chmetelju' tyajajil Dab'i nmajine', exqe' ajb'el weye', e'aj Leb'i, kse'n kyajlal che'w twitz kya'j ex se'n tz'awun ttzi ninnjab', layx b'ent kyajlet, chi Dyos.

²³Tzaj yolin Dyos te Jeremiy ex tma:

²⁴¿Ma matxi' tila qa inkyma'n xjal qa matxi' che elkyik'o'n kab'e' ja xjal, ju' ayinku'ye' ẍin jaw sk'onkye, aye' aj Israel ex aj Juda? ¡Qu'mtzun nche elkyik'o'n ntaname', ex min nokkyq'o'ntl te nintnam!²⁵Ayine' Dyos Manb'aj, kxe'l nma'ne' kjalu: Ayine', kyejb'ent jun nyole' ti'ju' q'ijtl ex q'onik'a, ex oje che kub' nq'o'ne' kawb'il kawilteju' kya'j ex tx'otx',²⁶layx che elwik'o'nwe' kyyajajil Jakob' ex nmajine' Dab'i, ex che eletz kawil wu'ne' kyxolju' kyyajajil Ab'raam, Isaak ex Jakob'. Qu'n ktzajel q'aq'an nk'u'je' kyi'j ex knch'exb'eye' kyanq'ib'l, chi Dyos. Tqanil te nimaqkawil Sedekyiy

¹Tetzunj intoq q'ojin nimaqkawil aj B'ab'ilon, kyuk'i'l txqan t-xjal te q'oj te kykyaqil nimaqtnam ate'toq tjaq' tkawb'il, ti'j Jerusalen ex kyi'ju' nimaqtnam nqaku' tk'etz, tzaj yolin Qman Dyos te Jeremiy ex tma ikjalu:

²Inxinchq'o'na, ayine' Dyos Manb'aj nche ajb'en aj Israel weye', tu'n txi'ya q'malte te Sedekyiy, nimaqkawil toj Juda, ikjalu: Matzaj tma'n Qman Dyos kjalu: Knb'incha'ye' tu'n ttzyetju' nintnam lu tu'n nimaqkawil aj B'ab'ilon ex tu'n toktq'o'n tq'aq'al.³Lay jolpajta toj tq'ob', ktzyunjtzela ex kxel q'o'na te, tpomlenxi'tzun q'i'na twitz, kxel q'i'na B'ab'ilon.⁴Tojpetzu'n tkyaqilju' lu, chin b'inku'ya Sedekyiy, nimaqkawil toj Juda: Lay kyimta tu'n k'uẍtx'e'nb'il.⁵Toj nak'b'il kkyimela'ta, ex kb'el tz'e'ysa'n k'ok'sb'il ti'ja ajtkyima, kse'n b'aj tz'e'ysa'n tej kyb'ajkyimju' ojtxi' tyajilb'ena e'kawin nejtl twitza, ex kq'manjtzel ti'ja: ¡Ay, taye!, che oq'el ti'ja. Ayine' Dyos Manb'aj nchin yolin ex kma' ja'ye' lu, chiku'ya, chi Dyos te Jeremiy.

⁶B'ajx tma'ntl Jeremiy tkyaqil ja'lu te nimaqkawil Sedekyiy toj Jerusalen.⁷Intoqtzun che q'ojinkju' xjal te q'oj aj B'ab'ilon ti'j Jerusalen. O'qe'kx toqtlju' nimaqtnam Lakyis ex Aseka kuwsa'nqe' ate'x toj Juda. Min japunju' yol b'entniti'j tu'n kytzaqpetu' lq'o'n majin aj Eb'reyqe'

⁸Tzaj yolin Qman Dyos te Jeremiy tkyajlenxi' b'entti'j jun yol tu'n nimaqkawil Sedekyiy kyuk'i'l kykyaqilju' najlqe' Jerusalen tu'n kyxi' kytzaqpi'nju' majin lq'o'n.⁹A yolju' kyej b'entti'j, aye' ati kymajin lq'o'n aj Eb'rey, ichan mo qya, tu'n kyxi' kytzaqpi'n, tu'ntzun lan ten kymajin lq'o'n kywnaqilx.¹⁰Kykyaqilju' nejenel ex tkyaqilju' tnam ek'monte tkyaqilju' q'ma'n toju' yol kyej b'entti'j, ex eb'ajx kytzaqpi'n kymajin lq'o'n ex min e'ok kychq'o'ntl tu'n kyajb'en kye.¹¹Yajxi'tzuntel b'ju'l toj kyk'u'j tu'n tpaj eb'ajx kytzaqpi'n, ex eb'jo'k kychq'o'n jumajtl tu'n kyajb'entl kye te kymajin kq'o'n.

¹²Tzajtzun yolin Qman Dyos te Jeremiy, tma ikjalu:

¹³Ayine' Dyos Manb'aj nche ajb'en aj Israel weye', kyej b'entti'j jun nyole' kyuk'i'lju' ojtxi' kyyajilb'ene' tej kyetzwiq'i'ne' toj Ejipt, janche ajb'ena'toq te majin lq'o'n. Nchaq'e' kye¹⁴tu'n txi' kyq'o'n tzaqpib'l kye alkyexku aj Eb'rey atl junjun twuqi'n ab'q'i qa k'ayi'ntib' te majin kye ex matz'ajb'en qaq ab'q'i. Aye'tzu'n ojtxi' kyyajilb'ene' min nxikyb'i'ne' ex min xikyb'incha'n.¹⁵Aye'tzunkye' matxitoq kych'exb'eye' kynab'le', ex kyb'inchaye' b'a'n toj nwitze', tej xxikyq'o'ne' tzaqpib'l kyeju' kywnaqile' ate'k te kymajine' tlq'o'n. Ex kyej kytziya'ne' nwitze' toju' ja te k'u'lb'il xjansa'n weye'.¹⁶Yajxi'tzuntel xkych'exb'etl kyb'e, makub' kytxa'ju'ne' nb'iye', tej ẍe okkychq'o'n jumajtle' ojetoq che'x kytzaqpi'ne' tu'n kyajb'en jumajtl kyeye' te majin lq'o'n.¹⁷Ja'lo ayine' Dyos Manb'aj kxe'l nma'ne' kyeye': Mixti'x ẍinx kyb'i'nkye', mixnati'x ẍe'x kytzaqpi'ne' kymajine' lq'o'n kywnaqilqe'xe', qu'mtzun, kxe'l nq'o'ne' anb'il ja'jo tu'n ttzaj q'oj, tx'u'j yab'il ex we'yaj, tu'ntzun tb'inchanjtz jun taq'wix kyeye' kyxol kykyaqilju' kawb'il twitz tx'otx'. Ayine' Dyos Manb'aj nchin yolin.¹⁸Kyej b'entti'j jun yol nwitze' kyu'n nejenel toj Juda ex toj Jerusalen, junx kyuk'i'lju' ajb'el toju' tja nimaqkawb'il, e'pale ex kykyaqilju' kyxjalil: kub' kyaq'pu'n jun qpoj tman wakx toj kab'e' ex eb'jik'x kyxolju' kab'e' nik'janchaq. Lwiyxi'xtzun kub' kyxitu'ntlju' yol kyej b'entti'j ex min japuntl kyu'n.²⁰Tu'ntpajtzu'n knb'incha'ye' tu'n tkub'kyi'j kyu'n kyajq'oj ex tu'n kykub' b'yo'n, ex tu'n kyok te kychi' k'utz ex kychi' tojk'ul txkup.²¹Ex knb'incha'ye' tu'n tkub'kyi'j Sedekyiy nimaqkawil toj Juda kyuk'i'lxi' ajb'el te kyu'n kyajq'oj ex tu'n kykub' b'yo'n, toj kyq'ob' t-xjal nimaqkawil aj B'ab'ilon ẍekyaj tzaqpinkye ja'lo.²²Che tzajel nchq'o'n jumajtle' q'ojil ti'ju' nintnam lu, tu'n ttzyet kyu'n ex tu'n tok kytz'e'ysa'n. Ex knb'incha'ye' tu'n kykyaju' txqantl nimaqtnam toj Juda chq'ajlajtl ex mix-a'lo'tl najal kyoj. Ayine' Dyos Manb'aj nchin yolin, chi Qman Dyos. E'b'inju' tyajajil Rekab'

¹Tzaj yolin Qman Dyos weye' toj tq'ijlalil tkawb'il Joakyim tk'wal Josiy, nimaqkawil toj Juda, tma ikjalu:

²Kutxi'ya kyxol tyajajil Rekab' ex yolina kyuk'i'l. Q'inqe'xtzuna toj junju' ja toju' ja te k'u'lb'il, ex q'onxa kyk'wa' b'in, chij.³Ayine' Jeremiy, inxi'ye' jyolte Jaasaniy (tk'walu' juntl Jeremiy ex tchman Ab'asiniy), ex jyolkye ttzik mo titz'in ex tk'wal, ex kykyaqilju' tyajajil Rekab',⁴exi' wiq'i'ntzuntze' toj tja Dyos, toju' kyja tk'wal Anan, tk'wal Ikdalyas, jun ajb'el te Dyos. Xi' ta'ju' ja lu tk'etz kyja nejenel toj tja Dyos ex tib'aju' tja Maaseyiy, tk'wal Salum, ju' xq'uqil ttzi tja Dyos.⁵Eb'ajx nq'o'ne' xar ex k'wab'l kye tyajajil Rekab' nojniqe' tu'n B'in, ex xinma'ne' kye: Kyk'wanx ch'i'n kyb'ine', nchije' kye.

⁶Ex tzaj kytzaq'we'n kjalu: Min nqo k'wanqe' b'in, qu'n majx oje kyej q'ma'n qeye' ex kye qyajajile' tu'n Jonadab', tk'wal ojtxi' qyajilb'ene' Rekab', tu'n lalunx txiqk'wa'ne' b'in.⁷Ex kyejtma'n qeye' tu'n lalun jaw qb'incha'n qjaye', ex tu'n lan tz'ok qawale' mo tu'n lan ten tqan qlob'aje'. Tchaq' weye' tu'n qanq'ine' kukxju' kyoj pach xb'alun, tu'n qanq'ine' nimtoj twitzju' tx'otx' lu jatoq'o'ye' naku'j najchaq xjal.⁸In qb'i'nqe' tkyaqilju' tchaq' ojtxi' qyajilb'ene' Jonadab' qeye', ex mixti'x nqo k'wanqe' b'in, ayo'ye' e'qxu'jile' exqe' qk'wale',⁹ex min njaw qb'incha'nqe' qja ex mixti'qe' qawal ex mixti' qtx'otx'e' tok tawal.¹⁰Kyoj pach xb'alun najla'qo'ye' ex nche japun qu'ne' tkyaqilju' tchaq' Jonadab' ojtxi' qyajilb'ene' qeye'.¹¹Naqtzun ate' tej toktz tq'o'ntib' Nab'ukodonosor nimaqkawil aj B'ab'ilon toju' tx'otx' lu, o'tzaj oqe' toj Jerusalen kyeju' xjal te q'oj kaldey ex aj Sirya, qu'mtzun najlqo'ye' toj Jerusalen, chechij.

¹²Tzajtzun yolin Qman Dyos te Jeremiy ex tma:

¹³Ayine' Dyos Manb'aj nimwipumale' ex nche ajb'en aj Israel weye', inchaq'u'ne' teya tu'n txi'ya q'malte kye xjal aj Juda ex aj Jerusalen ikjalu: Kyknomile' xnaq'tzb'il ex kyb'inqe'xe' nchaq'b'ile'. Ayine' Dyos Manb'aj nchin q'mante.¹⁴Ka'nqe'xkye' tyajajil Jonadab', tk'wal Rekab', matxi' kyb'inchaju' chaq'b'il taq' kye tu'n lalun che k'wan b'in, ex tzmax ja'lo min nkyk'wa'n qu'n inkynima'n tchaq'b'il ojtxi' kyyajilb'en. Ikxwe' matxi' b'ajx nq'o'nxi'we' chaq'b'il kyeye', aye'tzunkye' min nchinx kyb'i'ne'.¹⁵Matxi' che b'ajx nchq'o'ne' kykyaqilju' nmajine', jun ti'jxi' juntl, q'malte kyeye' ikjalu: Kytzaqpinkje' kyb'inchb'aje' myab'a'n. Lalun che'x lpeye' kyi'j txqantl dyos ex lalun che k'ulune' kye, che tenb'eltzuntze' kukxju' twitzju' tx'otx' xinq'o'ne' kyeye' ex kye ojtxi' kyyajilb'ene'. Aye'tzunkye' min nok toj kywi'ye' ex min nchinx kyb'i'ne'¹⁶Ka'nxkye' tyajajil Jonadab' tk'wal Rekab', in japun tchaq'b'il ojtxi' kyyajilb'en kyu'n, aye'tzu'nkye' aj Israel min nchinx kyb'i'ne'.¹⁷Qu'mtzun in nma'ne' ayine' Dyos Manb'aj nimwipumale' ex nche ajb'en aj Israel weye', ikjalu: Kb'ajtzajel wiq'i'ne' tkyaqilju' k'ixk'oj matxi' nmaye' kyib'aj aj Juda ex kyib'aju' najlqe' toj Jerusalen. Qu'n matxi' chin yolinwe' kyeye', aye'tzunkye' min nchinx kyb'i'ne', matxi' che ntxoke', aye'tzunkye' mixti'x ntzaj kytzaq'we'ne', chiku'ya kye, chi Dyos.

¹⁸Expe' xitma'n Jeremiy kye tyajajil Rekab' ikjalu: Chi Qman Dyos nimtipumal Kydyos aj Israel, kjalu:
Tu'nju' matxi kyb'i'ne' tchaq'b'il ojtxi' kyyajilb'ene' Jonadab', ex matxi' kyb'inchaye' t-xnaq'tzb'il ex njapun kyu'ne' tkyaqilju' tchaq' kyeye'.¹⁹Ayine' Dyos Manb'aj nimwipumale' nche ajb'en aj Israel weye', axxi'x ktenb'el jun tyajajil Jonadab' ajb'el weye' kukxju', chi Dyos, chi Jeremiy. Jawt-ẍch'i'n B'aruk u'j toj tja Dyos

¹Tzaj yolin Qman Dyos te Jeremiy toj tkyaji'n ab'q'i nkawin Joakyim, tk'wal Josiy, nimaqkawil toj Juda, tma ikjalu:

²Q'intza jun u'j, ex tz'ib'anku'ya toj tkyaqilju' matxi' b'ajx nma'ne' teya kyi'j aj Israel ex aj Juda, ex kyi'ju' txqantl nimaqtnam, tzajx tej ttzyet nyoline' teya toj tq'ijlalil Josiy tzmax ja'lo.³Qaj nab'en ajkyb'inte aj Juda tkyaqilju' k'ixk'oj nxima'ne' tu'n ttzaj nq'o'ne' kyib'aj, qaj kjel kytzaqpi'nju' kyb'inchb'aj myab'a'n ex kb'el nnajsa'nwe' kyil ex kyb'inchb'aj myab'a'n, chi Dyos.

⁴Tzaj ttxko'n Jeremiy B'aruk tk'wal Neriy, xitma'ntzuntz te tkyaqilju' ojetoq tma Qman Dyos te, b'ajku'xtzun ttz'ib'a'n B'aruk toj jun tolin u'j.⁵B'ajxtzun tma'ntl Jeremiy te B'aruk ikjalu: Ka'ntzpe'ya, tu'nju' jpu'nqine' lay b'ent nxi'ye' toj tja Qman Dyos.⁶Qu'mtzun kutxi'ya toju' q'ij te mewayi'n ex ẍch'inktza u'j xinma'ne' teya xkub' ttz'ib'a'na, tu'ntzun tkyaqilju' tnam ex kykyaqilju' najlqe' kyoju' nimaqtnam toj Juda mache ul tzalu, tu'n kyb'inteju' tyol Qman Dyos.⁷Qaj ẍekub'san twitz Qman Dyos ex qaj xkyaj kytzaqpi'n kyb'inchb'aj myab'a'n, qu'n kuwju' ttx'u'jil Qman Dyos ex tq'oj matxi' tzaj ti'ju' tnam lu, chi Jeremiy.⁸Xitb'incha'n B'aruk tkyaqilju' tchaq' Jeremiy t-sanjelal Dyos te. Xi' toju' tja Dyos ex jaw t-ẍch'i'nju' tyo Qman Dyos.

⁹Toj tjwe'yi'n ab'q'i nkawin Joakyin tk'wal Josiy, nimaqkawil toj Juda, b'entti'j tu'n kymewayinju' najlqe' toj Jerusalen exqe' tzajniqe' kyoj txqantl nimaqtnam toj Juda, twitz Qman Dyos.¹⁰Xi' B'aruk toju' tpen tja Dyos jawl, toju' ak'a'j ttzija, tzajxtzun tk'etz tja Kemariy tk'wal Sapan ju' tz'ib'al tqanil, xit-ẍch'i'nju' tolin u'j jatku'xa' tyol Jeremiy te tkyaqilju' tnam xjal. Xit-ẍch'i'n B'aruk u'j kywitzju' nimaq kyoklen toj kawb'il

¹¹Tb'itzun Mikayiy, tk'wal Kemariy ex tchman Sapan, tkyaqilju' tyol Qman Dyos jawt-ẍch'i'n B'aruk toju' tolin u'j,¹²xi'tzuntz toju' tja nimaqkawil, toj tja tz'ib'al tqanil, ja b'u'yi'na'toq kyib'ju' nimaq kyoklen toj kawb'il, aye': Elisama, tz'ib'al tqanil; Delayas, tk'wal Semayas; Elnata, tk'wal Akb'or; Kemariy, tk'wal Sapan; Sedekyiy, tk'wal Ananiy, ex txqantl nimaq kyoklen.¹³Xitma'n Mikayiy kye tkyaqilju' tb'i tej tjaw t-ẍch'i'n B'aruk toju' tolin u'j twitzju' tnam.¹⁴Xi'tzun kychq'o'n nimaq kyoklen Jewdi, tk'wal Netaniy ex tchman Selemiy ex tk'wal tchman Kusi, q'malte te B'aruk tu'n t-xitiq'i'n tolin u'j jawt-ẍch'i'n twitz tnam kye. Xi'tzun tiq'i'n B'aruk tolin u'j ex pon yek'ultib' kywitz,¹⁵xitzun kyma'n te:
—Qeku'ya ex ẍch'inktza tolin u'j qeye', chechij.
Jawtzun t-ẍch'i'n B'aruk kye,¹⁶naqxi'xtzun nb'aj kyb'i'n, eb'ajxob' ex b'aj kyka'yi'n toj kywitz ex kyma:
—Kxel qma'nte' tkyaqil ja'lu te nimaqkawil, chechij.

¹⁷Xikyma'ntzuntz te B'aruk:
—Q'mantza qeye' se'n xb'ajkub'a' ttz'ib'a'na'ya lu, chechij.

¹⁸Xitzun ttzaq'we'n B'aruk kye:
—Matz'oktenku' Jeremiy q'malte weye' tkyaqil, ayintzunwe' ẍin okten tz'ib'alte toju' tolin u'j, chij.

¹⁹Xikyma'ntzuntz te B'aruk ikjalu:
—¡Kukyxi'ye' ewal, aya ex Jeremiy, ex mix-a'lo'x tu'n tb'inte jata'qe'ye'! chechij. Kub' ttz'e'ysa'n nimaqkawil Joakyim tolin u'j

²⁰Kyej kyq'o'n nimaq kyoklenju' tolin u'j toj tja Elisama, tz'ib'al tqanil, exi'tzuntz toj tja nimaqkawb'il q'malte tkyaqil ja'lu te nimaqkawil.²¹Tchaq'tzun nimaqkawil te Jewdi tu'n ttzaj tiq'i'n tolin u'j toj tja Elisama, tz'ib'al tqanil, ex tej tpon tiq'i'n Jewdi, jawt-ẍch'i'n twitzju' nimaqkawil ex kywitz kykyaqilju' nimaqxi'x kyoklen ate'toq tk'etz.²²Tojku'na' tb'eljoji'n xjaw, atoqtzu' ta' nimaqkawil toju' tja toj tq'ijlalil che'w, tkub'toq jun q'aq' nk'ant toj tkb'el twitz.²³Intzun b'aj t-ẍch'i'nchaq Jewdi oxe' mo kyaje' txol wa'l, intoq eltjon nimaqkawil tu'n jun kchil ex ntoq okxtq'o'n toju' q'aq'. Iktzu'n b'aj ttz'e'ysa'n tkyaqilju' tolin u'j.²⁴Mixti'x exob'ju' nimaqkawil exqe' nimaqxi'x kyoklen tej kyb'inteju' jaw ẍch'i'n, ex mixti'x kyek'u jun k'ixk'oj toj kyanmi.²⁵Xikkub'sa'n Elnatan, Delayiy ex Kemariy te nimaqkawil tu'n lalun kub' ttz'e'ysa'n tolin u'j, atzunte nimaqkawil miẍti'x exitb'i'n,²⁶tchaq'pe' kye Jerameel, nejenel toj kawb'il kye b'iyol, te Serayiy tk'wal Asnel, ex te Selemiy tk'wal Ab'deel, tu'n kytzyunte Jeremiy t-sanjelal Dyos ex B'aruk ttz'ib'al. Atzunte Qman Dyos exitewa'n. Okten Jeremiy q'malte juntl tolin u'j

²⁷Tkub'lenxi'tzun ttz'e'ysa'n nimaqkawil tolin u'j jatz'ib'a'nqetoq tyol Jeremiy b'ajx tma'n te B'aruk, tzaj yolin Qman Dyos te Jeremiy, tma kjalu:

²⁸Q'intz juntl tolin u'j ex tz'ib'anku' jumajtla tkyaqilju' tz'ib'a'ntoq toju' tnejel kub' ttz'e'ysa'n Joakyim, nimaqkawil toj Juda.²⁹Ex q'manxa kjalu: Lu xtma Qman Dyos: Kub' ttz'e'ysa'na tolin u'j, ex kub' tili'na Jeremiy tu'n tpaj kub' ttz'ib'a'n toj qa ilti'j tzulju' nimaqkawil aj B'ab'ilon xitulteju' nintnam ex tu'n tkyaj mixti'tl xjal ex txkup najalte.³⁰Ja'lotzun, ayine' Dyos Manb'aj, kxe'l nma'ne' teya Joakyim, nimaqkawil toj Juda, lay che tentlta tyajajil toju' tq'uqb'il Dab'i. Kjeltenta toj ttantonil q'ij ex toj txqan tchewal qonik'an,³¹ex kb'el ntz'e'ysa'n twitza, exqe' nimaq kyoklen tuk'i'la, tu'n tpaju' kyile'. Knb'incha'ye' tu'n tkub' kyib'aje' ex kyib'aju' najlqe' toj Jerusalen ex toj Juda, tkyaqilju' k'ixk'oj nmaye' kyeye', jni'xju' min b'ajx tojkywinqile', chiku'ya kye, chi Dyos.

³²Tzajtzun tiq'i'n Jeremiy juntl tolin u'j, xitq'o'n te B'aruk ttz'ib'al, kub' ttz'ib'a'ntzuntz tkyaqilju' b'ajx tma'n Jeremiy te, tkyaqilju' tz'ib'a'ntoq toju' tolin u'j ojetoq kub' ttz'e'ysa'n nimaqkawil Joakyim. Okttz'aqtza'n Jeremiy txqantl yol ikyininx tnab'lju'. Tkub'sb'il Sedekyiy te Jeremiy

¹Atl Sedekyiy tk'wal Josiy oktq'o'n Nab'ukodonosor, nimaqkawil aj B'ab'ilon, te nimaqkawil toj Juda ex mya Jokoniy tk'wal Joakyim²Atzunte Sedekyiy kyuk'i'lju' nimaq kyoklen tuk'i'l exju' tnam, mixti'x xikyb'i'n tyol Qman Dyos tzaj tma'n kye tu'nel Jeremiy.

³Exi' tchq'o'n nimaqkawil Sedekyiy, Jukal tk'wal Selemiy, exju' pale Soponiy tk'wal Maaseyiy, ka'yilte Jeremiy t-sanjelal Dyos ex q'malte te kjalu: Na'n Dyosa qi'je' te Qman Dyos.⁴Na'mtoq tokx kyjpu'n Jeremiy, qu'mtzun inxtoq b'et toju' tnam.⁵Ojetoqtzun cheb'je'tzju' t-xjal paraon te q'oj toj Ejipt. Ex tej kyb'inte kaldey ju' ntoq che q'ojin ti'j Jerusalen, eb'jik' b'et atzu'.

⁶Tzajtzun yolin Qman Dyos te Jeremiy, ex tchaq' tu'n txitma'n⁷toj tb'i kyeju' e'pon chq'o'n tk'etz ikjalu: Kymanxe' te nimaqkawil toj Juda saj chq'onkyeye' xjelul weye', matxi' che anjkye' t-xjal paraon te q'oj, ju' eb'aj tzaj onilkyeye', matxi' tz'anjtl kyi'j Ejipt.⁸Che ul jumajtlju' kaldey q'ojil ti'ju' nintnam Jerusalen, kb'el kytzyu'n ex k'okyel kyq'o'n tq'aq'al.⁹Ayine' Dyos Manb'aj, kxel wab'tzi'ne' kyeye': Lan tz'okxten toj kywi'ye' ex lalun kymaye' qa k'anjelkyi'ju' kaldey, qu'n lay che ik'b'ilkye'.¹⁰Maskyepe' qama kub' kyi'ju' kaldey te q'oj kyu'ne', ju' nche q'ojin kyi'je', exqa naq tal jte'xtl k'ixb'niqe'tl ẍe kyej kyu'ne' toju' kyxmuj, che jawil we'tlkye' xjal lu ex k'okyel kyq'o'n tq'aq'alju' nintnam, chi Dyos, chechiku'ye' te, chij. Okx jpu'n Jeremiy

¹¹Tej ljo'ntoq tkyaj kytzaqpi'n kaldey te q'oju' Jerusalen, qu'n kyb'i qa xi'toq kytzaju' t-xjal paraon te q'oj,¹²etz Jeremiy toju' nintnam tu'n txi' toj kytx'otx' tyajajil B'enjamin tu'n ttzyunte tetzb'il kyxolju' twnaqil.¹³Tetzunj tpon Jeremiy ttzi tnam B'enjamin tb'i, kub' mqo'n tu'n jun ichan Iriy tb'i, tk'wal Selamiy ex tchman Ananiy, nejeneltoq kye xq'uqil, ex xitma'n te:
—¡Ma kxe'la kyuk'i'l kaldey! chij.

¹⁴Xitzun ttzaq'we'n Jeremiy ikjalu:
—¡Chajyolil te'lu, layna' chinxwe' kyuk'i'l kaldey! chij.
Atzunte Iriy mixti'x kub' tb'i'n, tzyet tu'n ex xitiq'i'n kywitzju' nimaq kyoklen toj kawb'il.¹⁵Tzaj kytx'u'jilju' nimaq kyoklen ti'j Jeremiy ex kychaq' tb'ajuma'n ex tu'n tokx jpu'n toj tja Jonatan tz'ib'al tqanil, ju' ojetoq tz'ok te kars.¹⁶Tzajx pona' Jeremiy toj jun kars toj tx'otx', axtzuntzu' tena' nimtoj.

¹⁷Tchaq' nimaqkawil Sedekyiy tu'n tpon q'i'n Jeremiy toju' tja nimaqkawb'il, tetzunj tpon q'i'n Jeremiy twitz, xitqani'n nimaqkawil te toj ewaj ikjalu:
—¿Ma ati jun tqanil tu'n Qman Dyos? chij.
Xitzun ttzaq'we'n Jeremiy te:
—Ati, ex aja'lu: kb'el tz'aqiya nimaqkawil toj tq'ob' nimaqkawil aj B'ab'ilon, chij.

¹⁸Ex xitqani'n Jeremiy te nimaqkawil Sedekyiy ikjalu:
—¿Ti'tzu'n wile' xnb'inchaye' twitza nimaqkawil, mo kywitzju' nimaq kyoklen toj tkawb'ila, mujqa twitz tnam, tu'nju' ẍin okx kyjpu'ne'?¹⁹¿Jatzun ta'qe' sanjelal nche q'mante qa lay q'ojinju' nimaqkawil aj B'ab'ilon kyi'je' ex tiju' nintnam?²⁰B'intzpe'ya ja'lo nimaqkawil, ex q'aq'antl tk'u'ja wi'je' tu'nju' kxe'l nkub'sa'ne' teya: Lan tajtla tu'n nxiq'i'ntle' toj tja Jonatan tz'ib'al tqanil, naq chin kyime' atzu', chij.

²¹Tchaq'tzun nimaqkawil Sedekyiy tu'n tkyaj jpet Jeremiy tpenju' xq'uqb'il tja nimaqkawb'il ex tu'n tpon q'o'n jun twa junjun q'ij ti'ju' nkyk'a'yi'n b'inchal wab'j. Ex a b'inchanjtzu' tej atitoq wab'j toju' nintnam. Ikytzu'n kyeja' ten Jeremiy tpenju' kyja xq'uqil ti'j tja nimaqkawil. Ku'x q'o'n Jeremiy toj jun jul

¹Kyb'itzu'n Sepatiy tk'wal Matan, Kyedaliy tk'wal Pasur, Jukal tk'wal Selemiy ex Pasur tk'wal Malkyiy, tej tmante Jeremiy qe' yol twitz tnam ikjalu:²Lu xtma Qman Dyos kjalu:
Alqe makyajten toju' nintnam kkyimel toju' q'oj mo tu'n we'yaj mo tu'n tx'u'j yab'il. Atzunte' qa matz'ex ex mataq'tib' kye kaldey, tu'npete' oktkla' tchwinqlal.³Kb'el tz'aqte' nintnam lu toj kyq'ob' t-xjal nimaqkawil aj B'ab'ilon. Ktzyetel tu'n ex mix-a'lo' kb'entel tmqonte, chi Qman Dyos, chi Jeremiy.

⁴Xi'tzun kyma'n nimaq kyoklen te nimaqkawil ikjalu:
—B'a'ntkub' b'yette' xjal lu, qu'n naq tok xob'tzalkye xjal te q'oj ate'x toju' nintnam, ex kykyaqilju' xjal. Xitulte' tnam toka'te' xjal lu mya b'a'nwt, chechij.

⁵Xittzaq'we'n nimaqkawil Sedekyiy kye ikjalu:
—B'a'n, kyb'inchame' titi' kyajb'ile' ti'j. Mixti'xwe' kb'antel wu'n kyi'je', chij.

⁶Tzyettzun Jeremiy kyu'n ex ku'x kyq'o'n toju' t-xoch nejenel Malkyiy, atitoq tpen kyja xq'uqil ti'j aqwil, mixtoqti' a' toj, naq xoq'l ati toj, xisob'j Jeremiy toj.

⁷Juntzun aj Etyope Eb'ed-melek tb'i, q'uqlixi'xtoq tk'u'jlalil toju' tja nimaqkawb'il, tb'i intoq q'manjtz qa matxitoq ku'x q'o'n Jeremiy toju' jul. Atitoqju' nimaqkawil toj jun b'uyjtib'il ttzi tnam B'enjamin tb'i toju' tq'ijlalil lu.⁸Etztzun Eb'ed-melek toju' tja nimaqkawb'il ex xi' q'malte te nimaqkawil kjalu:

⁹Nimaqkawil, il te' xkyb'incha xjal lu ti'j Jeremiy. Matxi' ku'x kyq'o'n toj jun xoch, ex xi' tkyim toju' xoch lu, qu'n mixti'tlte wab'j toju' nintnam, chij.

¹⁰Tchaq'tzun nimaqkawil te Eb'ed-melek tu'n t-xitiq'i'n junaq lajoj (30) xjal tuk'i'l tu'n tjatz kyiq'i'n Jeremiy toju' jul na'mxku' tkyim.¹¹Exi'tzun tiq'i'n Eb'admelek ju' xjal, xi' toju' k'ub'l xb'alun toj tja nimaqkawb'il ex eb'je'tz tiq'i'n jte' ttx'anqa'n xb'alun, ku'x tq'o'nkyi'j aqwil te Jeremiy toju' jul,¹²ex xitma'n te ikjalu:
—Q'onqe'ka ẍb'u'y lu tjaq' t-xuka tu'n lalun k'ixb'iya tu'n aqwil, chij.
Tb'incha Jeremiy kse'n xiq'ma'n te.¹³Jatztzun kyjk'u'n ichantz aqwil ex jatz Jeremiy kyu'n toju' jul. Tb'ajlenxi'tzun ja'lu, axtzu' kyeja' ten Jeremiy tpen kyja xq'uqil ti'j tja nimaqkawil. Tchaq' Sedekyiy tu'n ttxket Jeremiy

¹⁴Tchaq'ju' nimaqkawil Sedekyiy tu'n tpon q'i'n Jeremiy t-sanjelal Dyos twitz, ttzi tja Dyos. Atzuntzu' xa' tma'n nimaqkawil te kjalu:
—Kxe'l nqani'n jun nxjele' teya, lalun kub' tewa'n jun ti'xti'ya nwitze', chij te.

¹⁵Xittzaq'we'n Jeremiy te:
—Qama txinq'o'ne' tzaq'web'l teju' t-xjela, kxe'l tma'na tu'n nkub' b'yo'ne' nimaqkawil, qatzun matxinq'o'n jun tnab'la, lay chinx tb'i'na, chij.

¹⁶Tojtzun ewaj xa'ttziya'n nimaqkawil te Jeremiy ikjalu:
—Majx lu Qman Dyos ntzaj q'onte qchwinqlal, lay nchaq'we' tu'n tkub' b'yo'na ex lay txinq'o'na toj kyq'ob'ju' kyajb'il tu'n tkub' b'yo'na kyu'n, chij.

¹⁷Xitzun tma'n Jeremiy te Sedekyiy ikjalu:
—A ntma'n Qman Dyos nimtipumal nche ajb'en aj Israel, ikjalu: Qama taq'tib'a jumajx kyeju' nejenel kye kynejel t-xjal nimaqkawil aj B'ab'ilon, ktkla' tchwinqlala kyuk'i'lju' toj tjaya, ex lay kub' tz'e'ysa'n nintnam lu.¹⁸Qatzun min xtaq'tib'a kye, che okyel tzaqpaju' kaldey ti'ju' nintnam ex k'okyel kyq'o'n tq'aq'al, ex lay tzaqpaja toj kyq'ob', chi Jeremiy.

¹⁹Xittzaq'we'n Sedekyiy te kjalu:
—Nchin xob'e' kye aj Juda matxi' che b'jik' kyuk'i'l kaldey; qama chin kub' tz'aqe' toj kyq'ob', chin b'ajel kytx'e'mu'ne', chij.

²⁰Xittzaq'we'n Jeremiy te:
—Layna' kub'tzaqta nimaqkawil toj kyq'ob'. B'inchama xtalb'il nimaqkawil, b'inxa tyol Qman Dyos matxi' b'ajx nma'ne' teya, b'a'n kxe'la'tzuntza ex kkletela.²¹Matxi' tzaj tyek'u'nte Qman Dyos weye' titi' kb'ajel, qama kub'tkuwsantib'a nimaqkawil tu'n lalun taq'tib'a:²²Che b'je'letz q'i'n kykyaqilju' qya qama che kyejten toju' tja nimaqkawil toj Juda ex che kxe'l q'o'n kyeju' nejenel kye t-xjal nimaqkawil aj B'ab'ilon, ex kkyma'ju' qya lu ikjalu:
Makub' sb'u'n nimaqkawil ex makub'ti'j kyu'n tb'anil tamiw, naqẍe ka'yin tej ẍe'x sob'ju' tqan toj xoq'l xkyaj kyleb'a'ntzuntz, chij.

²³Ex xitljo'n Jeremiy tq'omji te nimaqkawil kjalu:
—Che kxe'l q'o'n kykyaqilju' t-xu'jila ex tk'wala nimaqkawil kye kaldey, ex lay tzaqpaja nimaqkawil toj kyq'ob', kxel q'o'na te nimaqkawil aj B'ab'ilon, ex k'okyel q'o'n tq'aq'alju' nintnam, chij.

²⁴Xitzun ttzaq'we'n Sedekyiy te Jeremiy ikjalu:
—Qa inlaqja ti'ju' tchwinqlala, mix-a'lo'kyex tu'n tyolina'ya ti'j ja'lu.²⁵Qama kyb'iju' nimaqxi'x kyoklen qama chin yoline' tuk'i'la, che ul qanilte teya titi' saj tma'na weye' ex titi' xinma'ne' teya, ex kxel kytziya'n teya qa lay kub' b'yo'na kyu'n, che okyeltentzuntz qanilte tu'n toktena q'malte tkyaqil kye.²⁶Ateya tzaq'wenx kye qa naq ntzajtkub'sa'na weye' tu'n lalun nchaq'tle' tu'n txi'ya toj tja Jonatan, tu'n lalun kyima atzu', chij te Jeremiy.

²⁷Kykyaqilxtzu'n nimaqxi'x kyoklen eb'aj pon tk'etz Jeremiy ex eb'jo'kten xjelul te, atzunte xittzaq'we'n kye kse'nxju' tchaq' nimaqkawil te. Kyej kyq'o'ntzuntz toj nak'b'il, qu'n mix-a'lo'te b'inte titi' kyoli.²⁸Kyejtzun ten Jeremiy tpenju' kyja xq'uqil tzmax tej ttzyet Jerusalen. Tkub'ti'j Jerusalen

¹Toj tlajoji'n xjaw te tb'eljoji'n ab'q'i nkawin Sedekyiy toj Juda, ul Nab'ukodonosor, nimaqkawil aj B'ab'ilon, kyuk'i'l kykyaqilju' t-xjal te q'oj ti'j Jerusalen, ex b'akytxoli'n ti'j.²Toj b'eljoj tajlaj tkyaji'n xjaw te tjunlajoji'n (11) ab'q'i nkawin Sedekyiy, eb'jo'kxju' xjal ajq'oj toju' nintnam,³ex eb'jo'kx kykyaqilju' nejenel kye t-xjal nimaqkawil aj B'ab'ilon ex e'kub'ten ttzixi'xju' tnam. Aye' Nerkal-sareser, Samkar-neb'o, Sarsekyim, nimaqxi'x kyoklen toju' kawb'il, ex juntl Nerkal-sareser, nimxi'x toklen.

⁴Tetzunj kyka'yinte Sedekyiy nimaqkawil kyuk'i'lju' t-xjal te q'oj, eb'je'tz oq toju' nintnam. Qonik'an kyb'je'x toju' b'e kyk'etz tawal nimaqkawil, toj ttzi tnam kyxolju' kab'e' nimaqtapi, exi'tzuntz toju' b'e toju' b'ya' ttzi nin a' Jordan.⁵Aye'tzu'n kaldey te q'oj eb'ajxlpe kyi'j, ex kub'ti'j Sedekyiy kyu'n toj plan tx'otx' te Jeriko. Tzyet kyu'n ex xikyiqi'n twitz nimaqkawil Nab'ukodonosor, atitoq Rib'la, toju' tx'otx' Amat. Atzuntzu' tmaya' Nab'ukodonosor tu'n ttz'e'yset twitz: tma tu'n kyb'je'l toqi'n kywi' tk'wal Sedekyiy twitzku', ex kykyaqilju' nimaqxjal toj Juda.⁷Atzu'n ti'j Sedekyiy, tchaq' tu'n kyb'je'tzq'i'n twitz ex tu'n tb'aj xwaku'n toj xpatx'k'uxb'il ex tu'n txiq'i'n B'ab'ilon.

⁸Okkyq'o'n kaldey tq'aq'alju' tja nimaqkawb'il ex kyq'aq'alju' ja toju' nintnam, ex kub' kyniq'u'n nintapi ti'j Jerusalen.⁹Yajxi'tzuntl, tzaju' Neb'usaradan, chaq'ul kye xq'uqil nimaqkawil, eb'je'xtiq'i'nju' xjal najlqe' toju' nintnam ate'xtoq, exqe' ojetoq kyaq'kyib' kyuk'i'l kaldey, ikytzu'n tkyaqilju' tnam eb'ajx tiq'i'n B'ab'ilon,¹⁰O'qe'kx junjun prowqe'xi'x mixti' ati kye e'kyaj tq'o'n toju' tx'otx' Juda, ex b'ajx tq'o'n kyawal ex kytx'otx' te kyawb'il toju' q'ij lu. Xitzaqpi'n Jeremiy

¹¹Taq' Nab'ukodonosor nimaqkawil aj B'ab'ilon, chaq'b'il te Neb'usaradan, chaq'ul kye xq'uqil nimaqkawil, ti'j Jeremiy kjalu:¹²Kjel nq'o'ne' tu'n t-xitka'yi'na ex lalun tz'oktena yajulte, q'onxa te tkyaqilju' matqani teya, chij.¹³Kychaq'tzun Neb'usaradan kyuk'i'l Neb'usasb'an ex Nenkal-sarieser, kab'e' nimaqxi'x kyoklen toju' kawb'il, ex kkyaqilju' ajb'el te nimaqkawil aj B'ab'ilon, tu'n tetz q'i'n Jeremiy toju' tpen kyja xq'uqil ex kyej kyq'o'n te Kedaliy tk'wal Aykam ex tchman Sapan, tu'n t-xitiq'i'n tja. Ikytzu'n kyejten Jeremiy najal kyxolju' twnaqil. Yol tziyanjtz te Eb'ed-melek

¹⁵Tzaj yolin Qman Dyos te Jeremiy tej jpu'nxtoq tpen kyja xq'uqil, ex tma te:¹⁶Kutxi'ya q'malte te Eb'ed-melek aj Etyopiy kjalu: Lu xtma Qman Dyos nimtipumal nche ajb'en aj Israel te kjalu: Knb'incha'we' oje nmaye' tu'n ttzaj taq'wix ti'ju' nintnam lu. Oktla'ya ajtb'aju' lu.¹⁷Atzunta knkla'ya, tu'n lan kub' tz'aqa toj kyq'ob'ju' xjal na'j nxob'a kye. Ayine' Dyos Manb'aj nchin yolin.¹⁸Knkla'ya tu'n lalun kub' b'yo'na. Kb'entelta toq b'a'na, qu'n matz'ok qe tk'u'ja wi'je'. Ayine' Dyos Manb'aj nchin yolin, chiku'ya, chi Dyos. Kyejten Jeremiy tk'etz Kyedaliy

¹Tzaj yolin Qman Dyos te Jeremiy, tetzlenxi' tzaqpi'n toj Rama tu'n Neb'usaradan, chaq'ul kye xq'uqil. Knet Jeremiy tu'n Neb'usaradan xmo'ntoq toj xpatx'k'uxb'il kyxolju' xjal aj Jerusalen ex aj Juda eb'ajxq'i'n B'ab'ilon.

²Xiq'i'n Jeremiy tjunajlx tu'n chaq'ul, ex xitma'n te: Tzaj tma'n Qman Dyos tu'n ttzaj tq'o'n xitb'il tib'aju' tnam lu,³ex matb'inchaju' tzaj tma'n ja'lo. Kuwxi'x soka' lu kyeye' qu'n mache b'inchan ile' twitz Dyos ex min ẍe b'ine' te.⁴Ka'yintzpe'ya, k'el npoq'i'ne' xpatx'k'uxb'il ja xmo'na'ya ja'lo. Qa tajb'ila tu'n txi'ya wuk'i'le' B'ab'ilon, kuttzaja, kxel nka'yi'na. Qatzun min tajb'ila tu'n txi'ya wuk'i'le', kutkyaja. Ati toklena ti'j tkyaqilju' tx'otx', ka'yinxa ja b'a'n tu'n tkub' tena'ya.⁵Qa a tajb'ilju'ya tu'n tanjti'ja, kutanj ti'ja tk'etz Kyedaliy tk'wal Aykam ex tchman Sapan, ju' matxi' tz'ok q'o'n te kawil kyib'aju' nimaqtnam aj Juda tu'n nimaqkawil aj B'ab'ilon, ex tz'anq'ina tk'etz kyuk'i'lju' twnaqila. Kutxi'ya ja b'a'na' toj twitza, chi Neb'usaradan ju' chaq'ul, te Jeremiy. Ex xitq'o'n jun oyaj te Jeremiy ex twa, kyej tq'olb'e'ntzuntz.⁶Xi' Jeremiy tk'etz Kyedaliy toj Mispa, ex najan tuk'i'l ex kyuk'i'lju' xjal e'kyajten toju' tx'otx'. Jawkyi'nkyib' xjal ti'j Kyedaliy (2 R 25.23-24)

⁷Tetzunj kyb'inteju' chaq'ul ex xjal te q'oj aj Juda ate'xtoq kyoj kojb'il qa matxitoq tz'ok q'o'n Kyedaliy tk'wal Aykam te kawil toju' tnam tu'n nimaqkawil aj B'ab'ilon, ex matxitoq che kyej tq'o'n ichan e'qya ex k'wal prowqexi'x toju' tnam toj tq'ob', ju' min eb'ajxq'i'n B'ab'ilon,⁸Exi' kyuk'i'lju' kyxjal tk'etz Kyedaliy toj Mispa. Aye'jun toqju' Ismael tk'wal Netaniy, Joanan ex Jonatan tk'wal Karea, Serayiy tk'wal Tanumet, e'tk'wal Epay aj Netopa, ex Jesaniy tk'wal jun ichan aj Maakat kyuk'i'l t-xjal.⁹Xi'xi'x ttziya'n Kyedaliy kye ikjalu: Lan che xob'e' tu'n kyq'onte kyib'e' tjaq' kykawb'il kaldey. Che tenkje' toju' tx'otx', kyq'om kyib'e' tjaq' tkawb'il nimaqkawil aj B'ab'ilon, b'a'n che kxe'la'tzuntze'.¹⁰Chin kjel tenwe' Mispa, te kyxele' kywitz kaldey ajkyul tzala. Kyb'uyimkye' B'in, lob'j ex aseyt, che kjelten tzuntze' kyoju' nimaqtnam jata'qe'ye', chij kye.¹¹Ex kyb'i aj Juda ate'toq kyoj Moab', Amon, Edom ex kyoj txqantl tnam, qa taq'ju' nimaqkawil aj B'ab'ilon anb'il tu'n kykyajten junjun aj Juda toju' kytx'otx' ex ojetoq tz'oktq'o'n Kyedaliy te kykawil.¹²B'aj anjtzun kyi'jtz toj Juda, eb'aj tzaj kyojileju' tx'otx' jachaq eb'ajxa' slamj, e'pontzuntz yek'ulkyib' te Kyedaliy toj Mispa. Ex ikxkye eb'jo'kten k'u'l txqan b'in ex lob'j nimaq kyajlal. Jawtiq'i'ntib' Ismael ti'j Kyedaliy

¹³Exi' Joanan tk'wal Karea kyuk'i'lju' txqantl chaq'ul kye xjal te q'oj eb'aj kyejten kyoj kojb'il, tk'etz Kyedaliy toj Mispa,¹⁴ex xikyma'n te ikjalu:
—¿Ma min b'i'n tu'na qa matxi' tzaj chq'o'n Ismael tk'wal Netaniy tu'n B'aalis nimaqkawil aj Amon? chechij.
Atzunte Kyedaliy min exitoksla'n.¹⁵Ewajtzun xa'tjask'u'n Joanan te Kyedaliy kjalu:
—Q'ontza anb'il tu'n nxi'ye' b'yolte Ismael. Mix-a'lo' kb'ilte alkye xb'yonte. ¿Se'n taq'wi naq kb'el qyo'n qama kub' b'yo'na tu'n? Oklo che b'ajex slamj tzunkye xjaltz kykyaqilju' matx che b'ju'l tk'etza, exlo che b'elb'ajkye' kykyaqilju' ẍekyajten toj Juda, chij.

¹⁶Atzunte Kyedaliy xittzaq'we'n te ikjalu:
—¡Lan tb'inchaju'ya lu! Myana' axte' ntma'na ti'j Ismael, chij. Kub' b'yo'n Kyedaliy (2 R 25.25-26)

¹Tojtzun twuqi'n xjaw, xi' Ismael, tk'wal Netaniy ex tchman Elisama, toj tja nimaqkawil, toj Mispa chik'b'altib' te Kyedaliy. K'le'nqe'toq lajoj ichan tu'n. Atzuntzu' Mispa, tzmatoq nche wan,²naqx myanim tjaw kyiq'i'n kyib' Ismael kyuk'i'lju' lajoj ichan lepchqe'toq ti'j ex kub' kyb'yo'n Kyedaliy tu'n k'uẍtx'e'nb'il, ju' ojetoq tz'oktq'o'n nimaqkawil aj B'ab'ilon te kawil toj Juda.³Ex e'kub'tb'yo'n Ismael kykyaqilju' aj Juda ex kaldey te q'oj ate'toq tuk'i'l Kyedaliy toj Mispa.

⁴Tetzun juntl q'ij, ewitoq tkub'len b'yo'n Kyedaliy, mix-a'lo'xi'toq b'inteju' b'aj lu,⁵eb'aj pon kyajnaq ichan tzajniqe'toq Sikyem, Silo ex Samarya, jso'nile kyxmatzi, ẍilu'n kyxb'alun ex b'ajniqe' k'ixb'i kyu'nx. Ex q'i'ntoq twitz awal k'ok'e'kywitz kyu'n tu'n tkub' kyq'o'n te Qman Dyos toju' ja te k'u'lb'il.⁶Etztzun Ismael toj Mispa k'lulkye, intoq oq' toj b'e. Naqtzun nche kub'tk'lu'n, xitma'n kye:
—Kukytzaje' ka'yilte Kyedaliy tk'wal Aykam, chij.

⁷Naqtzun nche pon toj nky'ajchaqu' nintnam, ekub'yo'n kyu'n Ismael kyuk'i'lju' t-xjal ex eku'x kyq'o'n toj jun tjulil xoch.⁸Atzun lajoj kyeju' ichan lu xikyma'n te Ismael:
—Lan qokub' tb'yo'na, atiqe' qtriy, seb'ad ex ta'lkab' e'wa'n toj kojb'il, chechij.
Mixtzunti' e'kub'tb'yo'n Ismael kse'nqe' kyuk'i'l.⁹Axju' jul tchaq' nimaqkawil Asa tu'n tb'inchet tej intoq tklo'ntib' te nimaqkawil B'aasa aj Israel, axtzun julju' jae'ku'xa' tq'o'n Ismael kykyaqilju' ichan eb'aj Kub' tb'yo'n. Nimju' tjulil xoch lu, nojtzun kyu'n xjal eb'aj Kub' tb'yo'n Ismael.¹⁰Expe' e'ttzuy Ismael tmyal nimaqkawil exqe' xjal ate'xtoq Mispa, ju' ojetoq che kyej tq'o'n Neb'usaradan chaq'ul kye xq'uqil, tjaq' tkawb'il Kyedaliy. E'tzyet tu'n Ismael ex kub' b'e tu'n tu'ntoq tik'x toj tx'otx' Amon.

¹¹Tetzunj kyb'inte Joanan tk'wal Karea kyuk'i'lju' kynejel xjal te q'oj ate'toq tuk'i'l, ju' il matxitoq tb'incha Ismael,¹²eb'ajtzun tb'u'yi'n kykyaqilju' t-xjal ex exi' q'ojil ti'j Ismael. Okyal kyu'n tk'etzju' nin pil ati Kab'aon.¹³Tetzunj txi' ka'yi'n Joanan ex kykyaqilju' kynejel xjal te q'oj kyu'n q'i'nqe'toq tzyu'nqe'tl tu'n Ismael, ojexi'x che tzalaj,¹⁴b'aj anjtzkyi'j ex eb'jo'k lpe ti'j Joanan.¹⁵Atzunte Ismael e'tzaqpaj kyuk'i'l wajxaq t-xjal toj tq'ob' Joanan ex exi' toju' tx'otx' Amon.

¹⁶Atzunte Joanan kyuk'i'lju' kynejel xjal te q'oj, e'ok ka'yilkyeju' xjal te q'oj, e'qya, e'k'wal exqe' nimaq kyoklen toj kawb'il eb'ajx ttzyu'n Ismael tkub'lenxi' tb'yo'n Kyedaliy, aye' eb'aj anjtztiq'i'n Joanan tzmajx Kab'aon.¹⁷Kub'tzun b'etz kyu'n tzmax kypon Kyerup-kyimam, tk'etz B'elen, e'we' atzu'. Atoq kyximju' tu'n t-xikyljo'n kyb'e tzmajx Ejipt¹⁸tu'ntoq kyoq kye kaldey, qu'n intoq che xob' kye tu'n tpaj kub' tb'yo'n Ismael Kyedaliy, ju' ojetoq tz'ok q'o'n te kawil toju' nintnam tu'n nimaqkawil aj B'ab'ilon. Xikyma'n xjal te Jeremiy tu'n tna'n Dyos kyi'j

¹Eb'jo'k lq'e kykyaqilju' kynejel xjal te q'oj tk'i'xi' Joanan tk'wal Karea, ex Asariy tk'wal Osayiy, ex kykyaqilju' xjal, ch'i'n kyoklen ex nimaq kyoklen,²tk'etz Jeremiy t-sanjelal Dyos, xikyma'n te:
—Kxel qqani'n jun xtalb'ile' teya, lan kub' t-xk'a'yu'na: Kub'sana twitz Qman Dyos, ju' nnajb'ena te, qi'je'. Nimtoqqe' qb'aj nejtl, atzu'n ja'lo naqtal jte'xtl qb'aje' kse'n ntka'yi'na lu.³Kub'sana te Qman Dyos ja nnajb'ena'ya tu'n ttzaj tyek'u'n alkye b'e kxel qiq'i'ne', ex titi' kqb'incha'ye', chechij.

⁴Xitzun ttzaq'we'n Jeremiy kye:
—B'a'n. Chin kub'sale' twitzju' Qman Dyos ati qib'aj, kse'nx saj kyqani'ne' weye', ex kxel nma'nwe' kyeye' tkyaqilju' matzaj ttzaq'we'n weye', mixti'te kb'el wewa'ne', chij.⁵Xikyma'ntzuntz te Jeremiy:
—Awtju' Qman Dyos nnajb'ena te tz'ok te jun tziyal axxi'x tu'n tok miltz'uj qi'je' qa min xxiqb'incha'ne' ktzajel toqxena'n qeye'.⁶Qama kub'ju' ttzaq'web'l toj qwitze' mujqa min, kxel qb'i'n qeye' Qman Dyos jaxxa' qma'ne' teya tu'n tkub'sana twitz, tu'n qxi'tzuntze' toj b'a'n, chechij. Ttzaq'web'l Qman Dyos te tna'j Dyos Jeremiy.

⁷Yajxi'tzuntl toj lajoj q'ij, tzaj yolin Qman Dyos te Jeremiy,⁸e'tzajtzun ttxko'n Joanan tk'wal Karea, exqe' kynejel xjal te q'oj ate'toq tuk'i'l, ex kykyaqilju' xjal ch'i'n kyoklen ex nimaq kyoklen,⁹ex xitma'n kye: Lu xtma Qman Dyos, ju' kyqaniye' tu'n txinma'ne' kykub'sb'ile' twitz, ikjalu:

¹⁰Qama che kyajtene' toju' tx'otx' lu, knb'incha'ye' tu'n kytene' b'a'n, lay che kub' nxitu'ne', che b'el wawa'ne' ex lay che jaw nxb'oq'i'ne', qu'n ktzajel nb'ise' tu'n tpaj matxitoq tzaj nq'o'ne' xitb'il lu kyi'je'.¹¹Lan che xob'e' teju' nimaqkawil aj B'ab'ilon, ju' inxi'x che xob'e' te. Lan che xob'e' te, qu'n intinwe' kyuk'i'le' klolkyeye' ex kotpil kyeye' toj tq'ob'. Ayine' Dyos Manb'aj nchin yolin.¹²Ktzajel q'aq'an nk'u'je', ex knb'incha'ye' tu'n ttzaj q'aq'an tk'u'j kyi'je' ex tu'n kykyaj q'o'ne' tu'n toj kytx'otx'e', chi Dyos.

¹³Qatzun min kyajb'ile' tu'n kykyaje' toju' tx'otx' lu, qa min xxikyb'i'ne' Qman Dyos,¹⁴exqa makub' kyxima'ne': Ate b'a'n qo xe'lqe' najal Ejipt, ja lay qila'tle' q'oj, ex lay qb'iye' chun, ex lay qokyime' tu'n we'yaj, qa chechije',¹⁵kyb'intz petzune' ju' ate'xe' toj Juda, a ntma'n Qman Dyos kyeye' ikjalu: Qa axi'x tok kyximju'ye' tu'n kyxi'ye' najal Ejipt,¹⁶kpomelte' q'oj ex we'yaj ju' nche xob'e' te na'tz, ex axtzu' che kyimela'ye' na'tz.¹⁷Kykyaqilju' nche ximan tu'n kyxi' najal toj Ejipt, che kyimel na'tz tu'n q'oj, we'yaj mo tu'n tx'u'j yab'il. Mix-a'lo'te kjel anq'in, mix-a'lo'te ktzaqpajel toju' xitb'il tzul nq'o'ne' kyi'je', chi Dyos.

¹⁸A ntma'n Qman Dyos nimtipumal, ikjalu:
Se'nxtzu'n saj txqan ntx'u'jile' kyi'ju' najlqe' toj Jerusalen, ikxtzu'n ktzajel ntx'u'jile' kyi'je' qama che'xe' Ejipt. Che okyele' te jun yek'b'il toj qanb'en taq'wix, ex lay kyiltlju'ye' najb'il lu, chi Dyos.

¹⁹A tchaq'b'il Qman Dyos kyeye' ate'xe' toj Juda tu'n lalun che'xe' Ejipt. Kyb'inku'ye' b'a'nxi'x ja'lo.²⁰Mixyab'a'n nkyb'incha'ne', aye'xna'ye' ẍetzaj q'mante tu'n nkub'sane' te Qman Dyos, kymaye' ikjalu: Kub'sana qi'je' te Qman Dyos, ex q'mantza tkyaqilju' matchaq', tu'n qb'inchanteye', chechije'.²¹Matzun b'ajx nma'ne' ja'lo titi' saj tma'n Qman Dyos tu'n txinma'ne' kyeye', aye'tzunkye' min kyajb'ile' tu'n t-xikynima'ne'.²²Tu'ntzun tpaju', kyb'inku'ye' b'a'nxi'x, che kyimele' toju' tnam jakyajb'ila'ye' tu'n kyxi'ye' najal, tu'n q'oj, we'yaj ex tx'u'j yab'il, chi Jeremiy. Xiq'i'n Jeremiy Ejipt

¹Tetzunj tb'aj tma'n Jeremiy tkyaqilju' toqxena Qman Dyos tu'n txitma'n kye,²xikyma'n Asariy tk'wal Osayiy ex Joanan tk'wal Karea, kyuk'i'l txqantl ichan, te Jeremiy ikjalu: ¡Naqtak'a'nta'! Min saj toqxena'n te Qman Dyos teya tu'n ttzaj tma'na qeye' tu'n lanqo'xe' najal Ejipt.³Ate B'aruk tk'wal Neriy xq'mante qi'je', tu'n qtzyete' kyu'n kaldey ex tu'n qkub' kyb'yo'ne' mujqa tu'n qb'ajx kyiq'i'ne' tzmajx B'ab'ilon, chechij.

⁴Iktzu'n, mixti'x e'kyajten Joanan, e'nejenel kye xjal te q'oj exqe' xjal, toju' tx'otx' Juda, mixti'x xikyb'i'n tchaq'b'il Qman Dyos.⁵E'okpe'ten Joanan ex kykyaqilju' nejenel kye xjal te q'oj b'uyilkye jte'tl xjal ate'xtoq toj Juda ex anjtznikyi'j kyoj chukchaq tnam jab'ajxna'qe'toq slamj, ex e'kub' najan toj Juda.⁶E' ichan, qya, k'wal, e'tmyal nimaqkawil ex kykyaqilju' xjal e'kyaj tq'o'n Neb'usaradan chaq'ul kye xq'uqil, tu'n kyxitka'yi'n Kyedaliy, kyuk'i'lxi' Jeremiy ex B'aruk.⁷Mixti'x xikyb'i'n tchaq'b'il Qman Dyos, kykyaqil eb'ajx Ejipt ex e'pon tzmax toju' nintnam Tapnes.

⁸Tzaj yolin Qman Dyos te Jeremiy toj Tapnes ex tma:⁹Q'inqe'ktza jte' ab'j nimaq, mqunqeku'xa kywitzku' aj Juda, toju' kuw tx'otx' plansa'n twipe'n janche okxa' xjal toj tja nimaqkawb'il toju' nintnam.¹⁰Ex q'manxa kye: Lu xtma Qman Dyos nimtipumal: Knb'incha'ye' tu'n tulju' nmajine' Nab'ukodonosor, nimaqkawil aj B'ab'ilon, kb'el nq'o'ne' tq'uqb'il ex tja te kawb'il kyib'aju' ab'j ẍeku'x nmqu'ne' tzalu.¹¹Tzul ex kb'el t-xitu'n nintnam Ejipt. Che kyimelju' ati tu'n kykyim, aye'ju' ati tu'n kyex toj juntl tnam, che kxelq'i'n toj juntl tnam, aye'tzu'n ati tu'n kykyim toju' q'oj, che kyimel toju' q'oj.¹²K'okyel tq'o'n kyq'aq'alju' kyja kydyos aj Ejipt ex che b'elttz'e'ysa'n kydyos, mujqa che kxe'ltiq'i'n naku'j jpu'nqe'. Kb'ajel t-ẍtilsa'n nintnam Ejipt, kse'n jun k'ik'lel ajtokten b'yolkye ky'aq kyi'ju' t-xb'alun, kxe'ltzuntz mix-a'lo'xte kmqolte.¹³Che b'ajel t-xitu'n tqan tilb'ilal ate' toj Elyopolis, tojx Ejipt, ex k'okyel tq'o'n kyq'aq'al kyja kydyos aj Ejipt, chiku'ya kye, chi Dyos te Jeremiy. Tyol Qman Dyos kye aj Juda eb'ajx Ejipt.

¹Tk'am Jeremiy tyol Qman Dyos tu'n txitma'n kye kykyaqil aj Juda najlqe'toq Ejipt, kyoju' nimaqtnam Mikdol, Tapnes, Menpis ex toju' tx'otx' toj tb'a'nq'ob' kya'j.²A ntma'n Qman Dyos nimtipumal ikjalu:
Oje kyile' tkyaqilju' xitb'il tzaj nq'o'ne' tib'aj Jerusalen ex kyib'aj txqantl nimaqtnam toj Juda. Xitjniqe'tl ex mix-a'lo'tl najli kyoj,³tu'n kypaj myab'a'n kyb'inchaye', okna' kyq'o'ne' ntx'u'jile' tej kyok k'ulune' kye witzleb' ex kub' kyq'o'ne' sturak kywitz, aye' dyos mixti'x kyoklene' exqe' ojtxi' kyyajilb'ene' kyi'j.⁴B'a'npun maj e'tzaj nchq'o'ne' nmajine' sanjelal q'malte kyeye' tu'n lan che kyb'inchaye' taq'wix ik'o'nqe' wu'ne'.⁵Aye'tzunkye' mixti'x nxikyb'i'ne'. Mya tu'npe'wt tkyaj kyq'o'e' kyb'inchb'aje' myab'a'n, xipe' kyljo'ne' tu'n tkub' kyq'o'ne' sturak kywitz witzleb'.⁶Tzajtzun txqan ntx'u'jiltze', ojexi'x jamun naku'j q'aq' kyoj nimaqtnam toj Juda ex kyoj xky'ichb'e toj Jerusalen. B'aj kyej xitj ex chq'ajlajtl ja'lo.

⁷Qu'mtzun, in nma'ne' ayine' Dyos Manb'aj nimwipumale': ¿Tiqu'n aye'xe' nche tzaj q'inte jun nin taq'wix kyb'aje'? ¿Titiqu'n nkyb'incha'ne' taq'wix tu'n kykyim kykyaqilju' xjal aj Juda, e'ichan, qya ex k'wal, exqepe' tzma nche itz'j, tu'n mix-a'lo'tl tu'n tkyejten?⁸¿Tiqu'n noka' kyq'o'ne' ntx'u'jile' tu'n kyb'inchb'aje' ex nkub' kyq'o'ne' sturak kywitz junxi'tl dyos tzalu toj Ejipt, jaẍe ula'ye' najal? Tu'ntzun ja'lu tzul kyiq'i'ne' xitb'il kyi'je', ex che okyele' te jun yek'b'il tu'n qanb'en myab'a'n ex che b'el me'sa'ne' kyxol kykyaqilju' nimaqtnam twitz tx'otx'.⁹¿Ma matxi' tzik'tna'l kyu'ne' tkyaqilju' myab'a'n kyb'incha ojtxi' kyyajilb'ene', ex kyb'incha nimaqkawil toj Juda ex kyb'incha kyxu'jil, exju' kyb'inchaye' aye'ku'ye' ex kyb'incha kyxu'jile' toju' tx'otx' Juda ex kyoj xky'ichb'e toj Jerusalen?¹⁰Na'mxpe' kych'exb'entekye' che anq'in, ex min nche xob'e', ex na'mx kyb'inchanteye' e'xnaq'tzb'il ex e'kawb'il e'xinq'o'ne' kyeye' ex kye ojtxi' kyyajilb'ene'.

¹¹Qu'mtzun nxinma'ne' kyeye', ayine' Dyos Manb'aj nimwipumale': Matxi' kub' nxima'ne' tu'n ttzaj nq'o'ne' taq'wix kyib'aje' ex tu'n tkub' nxitu'ne' Juda.¹²Knb'incha'ye' kyi'ju' ẍekyaj toj Juda ex matz'okxten toj kywi' tu'n kyxi' najal toj Ejipt, tu'n kyb'aj na'tz tejumajx. Kykyaqil che kyimel toju' q'oj mo tu'n we'yaj e'nimaq kyoklen ex ch'i'n kyoklen, ex che okyel te yek'b'il te qanb'en myab'a'n ex me'sb'il, te jun xob'el.¹³Kb'el ntz'e'ysa'ne' kywitzju' che anq'il toj Ejipt kse'n tkub' ntz'e'ysa'ne' kywitzju' aj Jerusalen tu'n q'oj, we'yaj ex tx'u'j yab'il.¹⁴Mix-a'lo'te ktzaqpajel mujqa kjel anq'in kyxolju' jte'tl aj Juda ẍeb'ajx najal toj Ejipt. Maskyepe' matz'anjkyi'j tu'n kykub' najan toj Juda, lay tz'anjtz kyi'j, o'kxtzu'n qa matz'ex oq, chiku'ya, chi Dyos.

¹⁵Aye'tzunkye' ojtzqi'n kyu'n qa nkub' kyq'o'n kyxu'jil sturak kywitz txqantl dyos, exqe' qya ate'toq atzu', kykyaqil nimtoq tzqan kyb'aj, exqe'tzuntlju' aj Juda najlqe'toq toj tnayajkya'j toj Ejipt, xikytzaq'we'n te Jeremiy:

¹⁶—Lay txiqb'i'nqe' tpakb'al tu'n Dyos saj tiq'i'na qeye'.¹⁷Okpe' xelqljo'nqe' qb'inchanteju' matxi' kub' qxima'ne'. Kxel qljo'nqe' tu'n tkub' qq'o'ne' sturak ex oyaj b'in twitz qtxu nimaqkawil toj kya'j, kse'nx nqb'incha'ne' matxi' tzajxi' ex kse'nx kyb'inchaju' ojtxi' qyajilb'en, ex qnimaqkawil ex qnejenel kyoju' nimaqtnam toj Juda ex kyoj xky'ichb'e toj Jerusalen. Atitoqna'qe' qwa tnejel, b'a'n toqqe' qel ex mixti'te xitb'il tzaj qi'j;¹⁸ttzajlenxtzuntz tej min kub' qq'o'ntle' sturak ex oyaj b'in twitzju' qtxu nimaqkawil toj kya'j, tkyaqilxte' min nkanuntl, ex inche b'ajkyimju' qxjale' tu'n we'yaj mo toj q'oj, chechij.

¹⁹Ex kymaju' qya kjalu:
—Intoq che kub'qb'incha'nqe' muqin tilb'ilalju' qtxu nimaqkawil toj kya'j, ex intoq kub' qq'o'ne' sturak ex oyaj b'in twitz, tkyaqil ja'lu ntoq qb'incha'ne' qa b'a'n toj kywitz qchmile'. Ex kxel qljo'ne' tu'n tb'inchet, chechij.

²⁰Xi'tzun ttzaq'we'n Jeremiy kye kykyaqilju' ichan ex qya eb'ajx tzaq'wente te, ikjalu:

²¹—¿Ma mixtzunti' ntka'yi'n Qman Dyos toj kywitze', mujqa min na'ntl tu'n qa intoq kub' kyq'o'ne' exqe' ojtxi' kyyajilb'ene', kynimaqkawile', kynejele' ex tkyaqilju' tnam, sturak kywitz txqantl dyos kyoju' nimaqtnam toj Juda ex kyoj xky'ichb'e toj Jerusalen?²²Atzunte Qman Dyos min tajb'iltlju' myab'a'n xb'aj kyb'incha'ne' ex ik'o'nqe' tu'n. Qu'mtzun xitjnitlju' kytaname' ja'lo ex mix-a'lo'tl najli toj, matz'ok te jun yek'b'il qanb'en myab'a'n, xob'ajilxi'x.²³Matzaju' jun taq'wixil lu kyi'je' qu'n tu'na'ju' xb'ajkub' kyq'o'ne' sturak kywitz junxi'tl dyos, iktzu'n ẍeb'inchana' ile' twitz Qman Dyos, ex mixnati'x ẍe'x kyb'i'ne' t-xnaq'tzb'il ex tkawb'il, ex min ẍe'x kyb'incha'ne' tchaq' kyeye', chij.²⁴Ex xitma'ntl Jeremiy kye tkyaqilju' tnam, ex kyeku'ju' qya:
—Kyb'intze' tyol Qman Dyos lu kykyaqile', aj Juda nalqe'ye' toj Ejipt.²⁵Intma'n Qman Dyos nimtipumal janche ajb'ena' aj Israel, kjalu:
Aye'ye' qya, nkyma'nku'ye' tu'n kytziye' ex inkyb'incha'nku'ye', inkyma'ne' qa matxi' kytziyaye' tu'n tkub' kyq'o'ne' sturak ex oyaj b'in twitz kytxuye' Nimaqkawil toj Kya'j, ex ilti'j kkyb'incha'ju'ye' xkytziyaye'. ¡B'a'natzun, japunx kyu'ne' ex kyb'inchame' xkytziyaye'!²⁶Kyb'inkutzune' aj Juda nalqe'ye' toj Ejipt, aju' kxe'l nma'ne' kyeye', ayine' Dyos Manb'aj: Axxi'x, ayine' nim woklene', mix-a'lo' jun aj Juda kq'malte jumajtlju' nb'iye' toj Ejipt: Majx lu Qman Dyos, chiwt.²⁷Qu'n okxi'x k'okyel nka'yi'ne' ajttzaj nq'o'ne' xitb'il kyi'je', myaju' b'a'n. Majx che b'el nnajsa'ne' aj Juda najlqe' toj Ejipt tu'n q'oj mo tu'n we'yaj.²⁸Naqlo jte'tlte' qa min ẍekyim toju' q'oj exqa matz'anjkyi'j toj Juda. Oktzun kyla' kykyaqilju' e'kyajten toj Juda ex mache ul najal toj Ejipt, alqe' kjapumel, qa aju' nyole' mujqa aju' kyol.²⁹Kxe'l nq'o'ne' techlal lu kyeye', ayine' Dyos Manb'aj, yek'b'ilte qa che japumelju' xnmaye' kyeye', qa kb'el ntz'e'ysa'ne' kywitze' toju' nintnam lu:³⁰Kxe'l nq'o'ne' paraon Opra, nimaqkawil toj Ejipt, toj kyq'ob'ju' tajq'oj b'iyolqe', kse'nx tej txinq'o'ne' Sedekyiy, nimaqkawil toj Juda, toj tq'ob' Nab'ukodonosor, nimaqkawil aj B'ab'ilon, ju' tajq'oj B'iyolxi'x, chi Dyos. Yol ttziya Qman Dyos te B'aruk

¹Toj tkyaji'n ab'q'i nkawin Joakyin tk'wal Josiy, nimaqkawil toj Juda, intoq kub' ttz'ib'a'n B'aruk, tk'wal Neriy, aju' ntoq xitma'n Jeremiy te, xitma'n Jeremiy te B'aruk:²B'aruk, intma'na: ¡Malay qinxwite'! ¡Naqx b'is ex k'ixk'oj ntzaj tq'o'n Dyos weye'! Matxi' chin siktiye' tu'n woq'e' ex mixti'xte ojb'il weye', chija. A ntma'n Qman Dyos ja'lu ti'ja,⁴ex matzaj tma'n weye' tu'n txinma'ne' teya:
Kb'el nxitu'nwe' jaw nb'incha'ne', ex kjawil nxb'oqi'ne' ku'x wawa'ne'. Ikxtzun knb'incha'ye' toj tkyaqilju' tx'otx'.⁵¿Ma tajb'ila tu'n tqaninteya jun te lab'te'n? Lantzaj tqani'na, qu'n ktzajel nq'o'ne' xitb'il kyib'aj kykyaqilju' xjal. Tu'npete' knkla'ye' tchwinqlala jaxjaku' matxa'ya. Ayine' Dyos Manb'aj nchin yolin, chi Dyos, chi Jeremiy te B'aruk. Kub'kyi'j aj Ejipt toj Karkyemis

¹Tzaj yolin Qman Dyos te Jeremiy kyi'ju' nimaqtnam.²A tzaj tma'nju' ti'j Ejipt ex kyi'jku' t-xjal paraon Nekao te q'oj, nimaqkawil toj Ejipt, ju' atitoq Karkyemis, jata' nin a' Ewprates, ex kub' b'yo'n tu'n nimaqkawil Nab'ukodonosor aj B'ab'ilon, toj tkyaji'n ab'q'i ntoq kawin Joakyin, tk'wal Josiy, nimaqkawil aj Juda, ikjalu:

³¡Kynk'unku'ye' kykolb'ile'! ¡Kukyxi'ye' q'ojil!⁴¡Kyq'onkxe' kyiqb'il b'a'nchej! ¡Kukyjawe' b'a'n che chejine' kyi'j! ¡Kq'onkxe' kolb'il kywi'ye' ex kytxolinx kyib'e'! ¡Kyjqume' kych'ute'! ¡Kyq'onke' kyktone' k'uxb'il!

⁵¿Titi'tzu'n nka'yi'ne'? In anjtzkyi'j tu'n kyxob'el. Makub' kyi'ju' kyxjal te q'oj ex mache'x slamj, nche b'je'l oq, min nche'x ka'yin kytze'lkyi'j. ¡Ati xob'el toj tkyaqil plaj! Ayine' Dyos Manb'aj nchin yolin.⁶¡Layx b'ent kyoqu' kuw che b'et, ex lay che tzaqpaju' kuw che q'ojin! Inche jaw xliktz'aj ex nche kub' tz'aq ttzi nin a' Ewprates toj tb'a'nq'ob'kya'j.⁷¿Alkyetzu'n in ch'iy kse'n nin a' Nilo, kse'n jun tnimal a' nxi'x toloq'in?⁸A Ejipt nch'iy kse'n Nilo, kse'n jun tnimal a' nxi'x toloq'in. Nkyma'n aj Ejipt kjalu: Qo ch'iyel ex knojel twitz tx'otx' qu'n, che b'elqxitu'n nimaqtnam kyuk'i'lxi' najlqe' kyoj, chechij.

⁹¡Kutzun kyxi' txqan ti'j chej! ¡Kukyxi' txqan toj karwaj! ¡Tu'n kyb'ajxju' q'ojil: e' aj Etyopiy ex aj Lib'ya te q'oj, iq'i'mile kykolb'il; ju' xjal aj Lidya te q'oj, b'a'nxi'x che smajin!¹⁰A nq'iju'ye' lu, ayine' Dyos Manb'aj nimwipumale', a q'iju' knq'a'ye' tu'me'l t-xel kye wajq'oje. Che b'ajel tu'n K'uẍtx'e'nb'il tzmax ajtkanb'an, tzmax aj tk'wan chik'. Kna' nb'incha'we' jun b'yojxjali'n ayine' Dyos Manb'aj toju' nintnam toj tb'a'nq'ob'kya'j, tk'etz nin a' Ewprates.

¹¹¡Aj Ejipt, kukyxi'ye' Kalaad jyol q'a'nb'il! ¡B'a'nqa matz'ajb'en txqan q'a'nb'il kyu'ne', mixti'xte' tajb'en kyeye', mixnati'tlkye' q'a'nb'il kye!¹²B'i'ntlte' kyu'n nimaqtnam qa matxi' che kub'me'sa'ne', ex in b'injtza toj tkyaqilju' tx'otx' nẍch'ina; nche b'jo'k takpuju' q'ojil kyi'jilex, ex junx nche kub' kyxq'ipla'nkyib' twitz tx'otx', chi Dyos. Toktzaqpaj Nab'ukodonosor q'ojil ti'j Ejipt

¹³Tej xi'toq tpon Nab'ukodonosor, nimaqkawil aj B'ab'ilon, q'ojil ti'j Ejipt, tzaj yolin Qman Dyos te Jeremiy, tma:

¹⁴Kymanxe' tqanil toj Ejipt, toj Mikdol, toj Menpis ex Tapnes: ¡B'a'nqe'xe', kyb'incham kytene'! ¡Lu k'uẍtx'e'nb'il ljo'n twan kyi'jileye'!¹⁵¿Tiqu'n soqa' Apis, tman kwakyixe' xjan? ¿Tiqu'ntzun min xkub'we'? Mana' kub' nxitu'ne', ayine' Dyos Manb'aj.¹⁶Nche b'jaw trakpuju' kyxjale' te q'oj ex nche kub' tz'aq, nkyma'ntzuntz kyxolilex: ¡Qoqe' ex tzalu, qo'qe'ye' toj qtaqnam, toju' tx'otx' ja o'itz'ja'! ¡Qoqe' oq teju' q'oj!, chechij.

¹⁷Kymanxe' ti'j paraon, nimaqkawil toj Ejipt: Inxi'x tyoli'ntib', ajtzun tpon tq'ijlalil, mixti'tl nnel ttzi, chechiku'ye'.¹⁸Ayine', nimaqkawil qine', a nb'iye' Dyos Manb'aj nimtipumal, kxe'l nma'ne' axxi'x: Iky ajq'oju' tzul, kse'n witz Tab'or, nimin twe', ex kse'n witz Karmelo, nim jawna' lq'e tib'aj ninnjab'.

¹⁹Kyb'incham kyib'e' tu'n kyexe' ti'jxi' tnam, ju' najlqe'ye' toj Ejipt, kna' k'okyelte' Menpis te chq'ajlaj, kjel xitj, mixti'tl knajal toj.²⁰Ikyte Ejipt kse'n jun tal wakx tb'anil ka'yin, extzun mache tzaj txqan ta'jinchej toj tb'a'nq'ob'kya'j ch'olte.²¹Ikyqe' t-xjalju' te q'oj chjo'nqe' kse'nqe' qpoj tman wakx q'u'sqe', ex ikxkye che elex oq ex layx che kuwan, qu'n kpomel q'ij tu'n kykub'o'lj, ajtpon kmoj tu'n ttz'e'yset kywitz.²²Inxi'x che xub'an aj Ejipt kse'n kan ajkykub' oq ajkyul lq'e xjal ajq'oj q'ojil kyi'j tuk'i'l k'uxb'il, naku'j nche tx'emun nimaq tze.²³¡Che b'ajel kytx'emu'n kynimaqk'ul jupin! Ayine' Dyos Manb'aj nchin yolin. Nimxi'x kyb'aj kyekywitz ẍt'ikt'u'l, mix-a'lo'x kb'antel tajlankye.²⁴Che b'el me'sa'n aj Ejipt, ex che kb'el tjaq' tkawb'ilju' tnam te tb'a'nq'ob'kya'j, chi Qman Dyos.

²⁵Lu xtma Qman Dyos nimtipumal nche ajb'en aj Israel te, ikjalu:
Kb'el ntz'e'ysa'ne' twitz Amon, kydyos aj Teb'as, ex kb'el ntz'e'ysa'ne' kywitz aj Ejipt kyuk'i'lxi' kydyos exqe' kynimaqkawil, ex paraon kyuk'i'lxi' q'uqlok kyk'u'j ti'j.²⁶Knb'incha'ye' tu'n kykub'tz'aq toj kyq'ob' kyajq'oj b'iyulqe', toj tq'ob' Nab'ukodonosor, nimaqkawil aj B'ab'ilon, ex toj kyq'ob' t-xjal. Ajtzun tik' jun tq'ijlalil, kb'el naja'n jumajtl Ejipt kse'n tnejel. Ayine' Dyos Manb'aj nchin yolin, chi Qman Dyos. Oktkla' Qman Dyos ttanam (Jer 30.10-11)²⁷Lan che xob'e' tyajajil Jakob', ju' nmajine', lalun che xob'e' aj Israel. Kna' che nkla'kye' kyuk'i'l kyk'wale' teju' najchaq tnam jaẍe'xa' q'i'ne'. K'anjetzkyi'je' najal toj nak'b'il, mixti'te q'oj ex mix-a'lo' kxob'tzalkyeye'.²⁸Ayine' Dyos Manb'aj nchin yolin: Lan che xob'e' tyajajil Jakob', ju' nmajine', intina'we' kyuk'i'le'. Che kb'el nxitu'ne' kykyaqil nimaqtnam jachaq ẍeb'ajxa' nsputi'ne'. Aye'tzunkye' lay che kub' nxitu'ne', o'kx che kxelntzak'u'ne' toj kyile', ilti'j kb'el ntz'e'ysa'ne' kywitze', chi Dyos. Tqanil kyi'j pilistey

¹A tyol Qman Dyos ja'lu tzaj tma'n te Jeremiy t-sanjelal kyi'j pilistey, na'mtoq tq'ojin paraon ti'j Kasa:

²Inxi' nma'ne' lu, ayine' Dyos Manb'aj: Che ulju' ajq'oj toj tb'a'nq'ob'kya'j naku'j nin a' nxi'x qomtz'aj; inkyaj tmqu'n tx'otx' ex tkyaqilju' ati twitz, e'nimaqtnam exqe' najlqe' kyoj. Nche ẍch'in kykyaqilju' najlqe' toju' tx'otx', inxi'x che oq' xjal tu'n k'ixk'oj.³Aj t-xikyb'i'n nxi'x q'ajti kyqan chej ojqel kytzaj, e' kyq'ojq'ojel karwaj tululun kyb'ajtzaj, che b'elnumju' manb'aj ex che kjel kykolb'e'n kyk'wal.⁴Qu'n mapon q'ij tu'n kykub'najset pilistey, tu'n kyel iq'etju' tnam Tiro ex Sidon kye ju' ate'x onilkye, chi Dyos.
Che b'elt-xitu'n te Qman Dyos pilistey, ju' tzajniqe' toju' swejtx'otx' Kreta toj ninnjab'.⁵Kb'je'lel kyjon aj Kasa kywi', che kjel aj Askalon me. Aye'ye' jte'tl mankb'il ojtxi' xjal nimaq kywe', ¿jtojxi'xwitlo tu'n tajb'en ch'inkye' job'l kyu'n ti'j kyxmilale' te yek'b'il k'ixk'oj?⁶¡Tk'uẍtx'e'nb'il Qman Dyos! ¿Jtojtzun qjena? ¡Kutanj ti'ja toju' tjaya, qeku'ya, numeku'ya!⁷¿Se'n taq'wi ajtkub' nume extzun matchaq' Qman Dyos te, matoqxena Qman Dyos te tu'n tq'ojin ti'j Askalon ex kyi'j kykyaqilju' toj mlaj? Tpakb'al kyi'j aj Moab'

¹A tpakb'al ja'lu tu'n Qman Dyos nimtipumal, kyi'j aj Moab':
¡Qab'anxju' nimaqtnam Neb'o, xitjnitl! ¡Ttzyet Kyiryataym ex kub' me'sa'n! ¡Majxkub' xon tipumal twitz tx'otx'!²Matxi' b'aju' t-spik'umal Moab'. Nkynk'u'n kyximju' ajq'oj toj Esb'on tu'n tkub' naju' nintnam Moab'. Ikxta Madmen, kb'el xitu'na, ex lay qjen tipanju' q'oj ti'ja.³Njaw kyẍch'i'n xjal toj Oronaym: ¡Jun xitb'il ex maqokub'o'lj!⁴Makub' xitj Moab'; npon tq'ojq'ojel kyoq'el xjal tu'n b'is tzmajx Soar.⁵Inxi'x el ta'lkywitzju' ljo'n kyjax tk'u'j Luwit; inxi'x che ẍch'inju' ljo'n kyku'x Oranaym toj kyoq'el tu'n b'is tu'n tpaju' xitb'il.⁶¡Kukyoqe'! ¡Lwiyx, alkye kb'antel tklontetib'! ¡Che okxe' kse'n ch'i'x k'ul toj chq'ajlaj!

⁷Q'uqlitoq tk'u'ja Moab' ti'ju' tipumala ex kyi'j tq'inumala, extzun ikxta ktzyetela. K'elex q'i'n kyemos ju' tdyosa ti'jxi' ttx'otx'a, kyuk'i'lxi' pale exqe' nimaq kyoklen nche ajb'en twitz.⁸Tzulte xitb'il kyoj kykyaqilju' nimaqtnam, ex mix-a'lo'te kkletel, che kjel xitu'n b'ya' ex witz. Ayine' Dyos Manb'aj nchin yolin.⁹Kyq'onke' jun t-xik' Moab', qu'n kb'el xitu'n, majx che kjel xitju' nimaqtnam toj ex mix-a'lo'tl kjelten najal toj.

¹⁰(¡Tzajxwit taq'wix tib'aju' mintb'incha'n aq'untl tu'n tkyaqil tk'u'j, ju' oqxena'n tu'n Qman Dyos! ¡Tzajxwit taq'wix tib'aju' min xb'yon xjal!)

¹¹Matxi' che anq'in aj Moab' kukxju' toj nak'b'il, b'ajx che exa'xi' q'i'n ti'jxi' kytx'otx'. Ikse'n b'in naq nkyajten, min nelb'et toj jun lmet tu'nwt tik'x toj juntl lmet, qu'mtzun min nkub'naju' tk'ok'jal ex tk'ayil.

¹²Atzunte Qman Dyos intma'n:
Kpomel q'ij che tzajel nchq'o'ne' xjal tu'n tku'x kyqo'n b'in kyoj txqantl lmet, ex tu'n kykub' kypa'n lmet mixti' kyoj.¹³Che b'eltzun ch'ixwi aj Moab' ti'j Kyemos ju' kydyos, kse'nqe' aj Israel e'kub'ch'ixwi tu'n tpaj B'etel, jaq'uqla'toq kyk'u'j.

¹⁴Lalun kyma aj Moab': Kuw qo'qe', q'ojil qo'ye' nim qipumale', chechiwt.¹⁵Xi'tulju' xitulte Moab' kyuk'i'lxi' nimaqtnam toj; che kyimelkye' tb'anil ku'xun toj. Ikyju' ntma'n Nimaqkawil, a tb'iju' Qman Dyos nimtipumal.¹⁶Xi' tul lq'e xitb'ilte Moab', naqxi'x tu'n tkub'o'ljtel.¹⁷Kykyoq'e' ti'j Moab', aye'ye' nqaku' ta'qe'ye' tk'etz, ex kymame' kjalu: ¡Kyka'yinxpe'ye' majx makub' xitju' tkawb'il majx kuw ex tb'anilxi'xtoq!.

¹⁸Tku'tza toju' oklenj jata'ya, nintnam Dib'on, ex qeku'ya twitz tx'otx' tzqij, qu'n xi'tulkanunju' xitul ti'ja ex matxi' che kub't-xitu'n tkuwala.¹⁹We'ku'ya nintnam Aroer ttx'u'kju' b'e ex ka'yinxa, xjeluna kyeju' itz'qe'x titi' xb'aj.²⁰Matxi' kub' me'sa'n Moab' inxi'x xob'. ¡Che oq'e' tu'n b'is ti'j! ¡Kymanxe' tqanil toju' nin a' Amon qa matxi' kub' xitu'n Moab'!, chi Qman Dyos.

²¹Ulkanunju' tz'e'ysb'il witzb'aj b'antnitlti'j kyi'ju' nimaqtnam kywi' b'us Olon, Jaas, Mepaat,²²Dib'on, Neb'o, B'et-dib'laym,²³Kyiryataym, B'et-kamul, B'et-meon,²⁴Kyeryot, B'osra ex kykyaqilju' nimaqtnam toj Moab', nqaku' ex najchaq ta'qe'.

²⁵Intma'n Qman Dyos kjalu: Matxi' taqk'uju' tipumal Moab', ex xitjnitlju' toklen.

²⁶Che kytx'ojsanku'ye aj Moab', qu'n ma jawkyi'nkyib' ti'j Qman Dyos. Oktzun t-xq'ipu'tib' Moab' tiju' t-xab' ex kykyaqil che xmayil ti'j.²⁷Aj Moab', intoqna' che xmayine' kyi'j aj Israel ntoq che kub'kyoli'ne' tuk'i'l ik'b'il, kuxi'xtej jun eleq'.²⁸Che kyq'onqe'kje' nimaqtnam, ju' najlqe'ye' toj Moab', kukyxi'ye' najal kyoju' piky kse'nqe' xlak'uk' nb'aj kyb'incha'n kyja kywitz xaq.²⁹Ojtzqi'nxi'x nxi'x tnima'ntib' Moab': inxi'x jawtlaq'b'a'ntib' ex ntpi'ssa'ntib'.³⁰Ex tojtzqi'n Qman Dyos tx'u'j kywi', naq nkyla'ji'nkyib' ex nche xob'tzan.

³¹Qu'mtzun chi oq'ele' ex chin b'isule' ti'j tkyaqilju' tnam Moab' ex kyi'ju' ichan aj Kyir-eres.³²Chin oq'ele' nimxi'x ti'ju' tqan ub'a toj Sib'ma, kyewitzju' woq'e' ti'j Jaser. B'je'xniqe'toqu' tq'ob' ti'j ninnjab' pomniqe'toq tzmajx Jaser. Atzu'n ja'lu matxi' kub'o'lju' twitz tu'ntoq tjaw.³³Mixti'tlte sich' te tzalajb'il kyoju' awal toj Moab'. Matxi' b'aju' b'in kyoju' k'ub'lte. Miaxa'lo'tlte tu'n pch'unte ub'a, mixti'tlte b'itz te tzalajb'il.³⁴Nche ẍch'in aj Esb'on tu'n b'is, q'ojq'ojqe' tzmajx Elale ex Jaas, ex tzajx Soar ponx Oronaym ex Eklat-selisiy, qu'n expe' tzqij qe'tlju' t-xiklil a' toj Nimrim.

³⁵Intma'n Qman Dyos: Che b'el nyupi'nwe' aj Moab' ju' nche jawx kywi'witz kyoj q'olb'eb'l kye witzleb', q'ol chojb'il ex sturak kywitz kydyos.

³⁶Qu'mtzun nxi'x chin b'isune' ti'ju' tnam Moab' ex kyi'ju' ichan aj Kyir-eres kyuk'i'l xux te kyimni, qu'n naqẍe kub' naju' tq'inumal b'aj tchmo'n.³⁷Kykyaqil xjal elkyjon kywi' ex kyxmatzi, mab'aj kyk'ixb'sa'n kyq'ob' kykyaqil ex mab'jo'k kyq'o'n kyi'j te b'is.

³⁸Naq oq'e'n nnok kyoj kykyaqil tx'otx' plansa'n ex xky'ichb'e toj Moab', qu'n makub' npẍu'ne' Moab' kse'n jun k'wil mixti'tl tajb'en. Ayine' Dyos Manb'aj nchin yolin, chi Qman Dyos.

³⁹¡Che oq'e' ti'j Moab'! ¡Inxi'x xob' b'a'nxi'x! ¡Nxitewa'n twitz toj tch'ixaw! Matz'ok taq'wixi'x ex ik'b'iltwitz kye kykyaqilju' nqaku' ta'qe' tk'etz.

⁴⁰Intma'n Qman Dyos: Tzul tzaqpaju' ajq'oj ti'j Moab' kse'n jun q'anjel lik'u'nqe' t-xik'.⁴¹Che kb'el tz'aqu' nimaqtnam e' tkuwal toj tq'ob'ju' ajq'oj.⁴²Lay tentlju' nintnam Moab', qu'n majaw tiq'i'ntib' wi'je'.⁴³Qu'mtzun nchin yoline' ayine' Dyos Manb'aj: Ikyche okyela' xjalju' najlqe' Moab' kse'n txkup xla'ja'nqe' kyu'n ub'al naq tu'n kyxitz'aqtl toj jul mujqa toj xpatxab'.⁴⁴Aju' matzaqpaj kye ub'al kxel tz'aq toj jul. ex aju' majatz toj jul kb'eltz'aq toj xpatxab', qu'n tzul nq'o'ne' tq'ijlalil tz'e'ysb'il twitz Moab'. Ayine' Dyos Manb'aj nchin yolin.

⁴⁵Junjun mixti'tl kyipumal nche kub' oq jyol kolb'ilkye toj t-xlekumal Esb'on; atzunte Esb'on, ninttanam nimaqkawil Siyon, inb'aj tu'n q'aq', ex nximlenju' q'aq' nche b'ajtwanju' k'ul toj Moab', aju' tnam nxi'x tnima'ntib'.⁴⁶¡Malayxwita Moab'! ¡Ttanam Kyemos, matxi' b'o'lja! ¡Che kxelq'i'n tk'wala ex tmyala toj juntl tnam!⁴⁷Yajxi'tzuntel knch'exb'eye' tanq'ib'l Moab'; ayine' Dyos Manb'aj nchin yolin, chi Qman Dyos. Tpakb'al kyi'j aj Amon¹A tqanil ja'lu tu'n Qman Dyos ti'j Amon: ¿Ja ta'qe' kyk'wal aj Israel? ¿Ja ta'qe' etzalkye ti'xti' kye? ¿Tiqu'ntzun atlju' dyos Milkom tajaw Kad? ¿Tiqu'ntzun najliqe' aj Amon kyoju' nimaqkytnam?

²Ja'lotzun, ayine' Dyos Manb'aj nchin yolin: Kpomel q'ij, knb'incha'ye' tu'n t-xikyb'i'n aj Amon najlqe' toj nintnam Rab'a nche ẍch'in ajq'oj ajkyul q'ojil kyi'j; majx kjel xitju' nintnam, che b'ajelju' tnam ti'jile tu'n q'aq'. Che kanb'eteltzun jumajtl nimaqkytanam aj Israel. Ayine' Dyos Manb'aj nchin yolin.

³¡Che oq'e' aj Esb'on, matxi kub' xitu'n tnam Ay! ¡Che oq'e' qya aj Rab'a! ¡Kyq'onk kyi'je' te b'is, kyjumam ttzikyk'u'je'! ¡Che ojqelanqe'ye' naku'j okni toj kywi'ye', kyk'ixb'sam kyib'e'! qu'n kxel q'i'n dyos Milkom toj juntl tnam, kyuk'i'lxi' pale nche ajb'en te exqe' xjal nimaq kyoklen.⁴¿Tiqu'ntzun nkynima'n kyib'e' ti'ju' kyipumale'? Xi'na' tb'aj kyipumale', pi's tnam, ju' q'uqlok kyk'u'je' ti'ju' txqan q'inumal b'aj kychmo'ne' ex nkytma'ne': ¿Alxi'xkye tzul q'ojil wi'je'? chechije'.⁵Ja'lotzun ktzajel nq'o'n xob'ajil kyi'je' toj tkyaqil plaj. Ayine' Dyos Manb'aj nimwipumale' nchin yolin. Teyle junjunkye' k'elex oq tjunal, ex mix-a'lo'tl kb'uyilkye.⁶Yajxi'tzuntl knch'exb'eye' kyanq'ib'l aj Amon. Ayine' Dyos Manb'aj nchin yolin, chi Dyos. Tpakb'al kyi'j aj Edom

⁷A tqanil ja'lu tu'n Qman Dyos ti'ju' tnam Edom kjalu:
¿Ma mixti'tl nab'l toju' tnam Teman? ¿Ma mixti'tl tu'me'l kyu'n k'atzkywi'? ¿Ma naq xkub'naju' kynab'l?⁸¡Kukyetze' ojqel nalqe'ye' Dedan, kukyxi'ye' ewal! Qu'n kb'el nxitu'ne' tnam Esawu, matxi' pon q'ij te tu'n tkub' ntz'e'ysa'ne' twitz.⁹Ajtjaw b'uyit twitz awal nkyajq'et junjun txkyij, ajtzun kypon eleq' qonik'an, o'kx nxikyiq'i'nju' nojqelan kye.¹⁰Ayintzunwe' majx mache kub' nnajsa'ne' najlqe' Esawu, mab'jo'kyal wu'ne' ja e'wa'na'kyib' ex lay b'ent kyewantl. Kykyaqil ẍeb'ajkub'xitj, e'kyk'wal, kywitze'l exqe' ate' nqayin kyk'etz, mix-a'lo'tlte xkyaj tu'n tmante:¹¹Q'onqe'kja tk'wala ẍekyaj meb'a, che kxelnka'yi'we'. B'a'n kytenju' qya kyimni kychmil nk'etze', chij.

¹²Intma'n Qman Dyos kjalu:
Mana' tz'e'yset kywitzju' mixtoqti' tu'n ttz'e'yset kywitz, ex ikxkye' ati tu'n ttz'e'yset kywitze'.¹³Axxi'x kxe'l nma'ne' ayine' Dyos Manb'aj: kyjel chq'ajlajixte' nintnam B'osra, kjel xitj te yek'b'il qanb'en taq'wix ex me'sa'n, ex che kjel xitju' txqantl nimaqtnam tejumajx, chi Dyos.

¹⁴Ultq'on Qman Dyos jun tqanil weye', ul jun t-sanjel Dyos q'malte kye nimaqtnam kjalu: ¡Kyb'uyim kyib'e' ex kukyxi'ye' q'ojil ti'j Edom! ¡Kyb'incham kyib'e' tu'n kyxi'ye' q'ojil!¹⁵Che okyel nq'o'ne' aj Edom b'o'sxi'x kyolju' tnam, che elel ik'o'nxi'xe' kyxol xjal.¹⁶Mache sb'ete' tu'nju' nkynima'n kyib'e', qu'n inxi'x che xob'tzane' kye txqantl tnam. Najlqe'ye' toj tpa'xil pik, tzmajx te'qe'kxa'ye' kywi'witz. B'a'nqa tzmajx tokxa' kyjaye' jawl kse'n t'iw, tzmajxtzuntzu' che tzajela' tz'aqe' wu'ne'. Ayine' Dyos Manb'aj nchin yolin.

¹⁷Nimxi'xju' xitb'il tzul ti'ju' tnam Edom ex xob'ajilx, kykyaqilju' che ik'el tk'etz che jawil sak'puj ajtok kykya'yi'n tz'e'ysb'il twitz,¹⁸ikyk'okyela' kse'n tej kykub' xitju' tnam Sodom ex Komor exqe' nimaqtnam ate'toq nqayin kyk'etz. Mix-a'lo'tlte knajal toj, tk'i'xpe'wt jun xjal tu'n tten jte' q'ij. Ayine' Dyos Manb'aj nchin q'mante.¹⁹Naqx myanim ajwule', kse'n jun b'alun ajtetz toju' k'ul ttzi a' Jordan, ntzaj ojqelantzuntz jata' cha'x k'ul k'ik'leb'l, knb'incha'tzuntze' tu'n kyb'aj oq aj Edom, ex tu'n tkawinju' xjal kjawil nsk'o'ne'. ¿Alxi'xkye jun kse'n ayine'? ¿Alxi'xkye kq'ojil wuk'i'le'? ¿Alkye jun k'ik'lel kmqol weye'?²⁰Kyb'intze' nxime' matxi' b'entten ti'j Edom, ayine' Dyos Manb'aj, aju' aq'untl matxi' b'aj nnk'u'ne' kyi'ju' najlqe' Teman, expe' che kxelq'i'n qpoj tman rit, ex tb'anil k'ul che b'ajel qutxet.²¹Okxi'x q'ajtel ajtkub'kyi'j aj Edom, kyokchelju' tx'otx', kche ẍch'il kuw nche qanin o'nb'il, ex kpomel tq'ojq'ojel kywi' tzmajx ttzi ninnjab' kyeq tb'i.²²Kpomel tzaqpaju' ajq'oj ti'j B'osra kse'n jun t'iw lik'u'nqe' t-xik', ex che lu'lulju' aj Edom te q'oj naku'j qya ajtitz'ji tal toju' q'ij lu. Tpakb'alil ti'j Damask

²³A tqanil ja'lu tu'n Qman Dyos ti'j Damask:
Mache kub'ch'ixwi xjal najlqe' kyoju' nimaqtnam Amat ex Arpad, qu'n mache pon tqanil myab'a'n kye. Inxi'x che xob', layx b'entkyten toj nak'b'il.²⁴Mixti'tl kyipumal aj Damask, nkub' kyma'n tu'n kyik' oq. Mache kub'numj tu'n xob'el, b'is ex k'ixk'oj, naku'j jun qya ajtitz'ji tal.²⁵Matxi' kyej kolb'e'n nintnam tb'anilxi'xtoq ex tzalajb'iltoq ta'.²⁶Che kjel woqonje kyku'xun toj b'e toju' q'ij lu, ex che kyimel kykyaqil kyxjal te q'oj. Ayine' Dyos Manb'aj nim wipumal nchin yolin.²⁷K'okyel nq'o'ne' kyq'aq'al nimaqtapi ti'j Damask, ex che b'ajel tja nimaqkawil B'en-adad tu'n q'aq' lu. Tpakb'al kyi'j Kyedar ex Asor

²⁸A tqanil ja'lu tu'n Qman Dyos kyi'j tyajajil Kyedar ex kyi'ju' nejenel toj Asor, ju' kub'kyi'j tu'n Nab'ukodonosor, nimaqkawil aj B'ab'ilon:
¡Lwiqe'xe', che q'ojinqe'ye' kyi'j tyajajil Kyedar! ¡Kyxitunqeku'ye' tyajajil lu ate' toj tjawetzq'ij!²⁹Kyetzanqeku'ye' kyja ex kyalu'n, e' kyxb'alun ex tkyaqilju' nche ajb'en kye. Kyiq'inqemile' kykamey ex kyẍch'inxe' kye: ¡Ati xob'el toj tkyaqil plaj! chechiku'ye'.³⁰¡Kukyex oqe' najlqe'ye' toj Asor! ¡Kukyxi'ye' ewal! Ayine' Dyos Manb'aj nchin q'mante. Ati t-xim Nab'ukodonosor kyi'je', ju' nimaqkawil aj B'ab'ilon.³¹Nxinma'ne' kyeye', ayine' Dyos Manb'aj. ¡Wiqe'xe', che q'ojinqe'ye' ti'ju' tnam lu q'uqlixi'x tk'u'j ex min nb'ajx tk'u'j, mixti' tjpel ex mixti' jupb'ilte ex tjunalxi'x ati!³²¡Kyalq'anqemile' kykamey ex kykyaqilju' kyalu'n! Che b'ajxe'l nsputi'ne' xjal lu toj tkyaqil plaj inxi'x b'aj kyjso'n kywi' ttx'u'k kyplaj, ktzajel wiq'i'ne' xitb'il kyi'j toj tkyaqil plaj. Ayine' Dyos Manb'aj nchin yolin.³³Kjelte' Asor tejumajx te kynajb'il xo'j. mix-a'lo'tlte knajal toj ex mix-a'lo'tl ktenb'el jte' q'ij toj, chi Dyos. Tpakb'alil ti'j Elam

³⁴Tej ttzyet tkawin Sedekyiy toj Juda, tzaj tma'n Qman Dyos tqanil te Jeremiy ti'ju' nintnam Elam ikjalu:

³⁵Ayine' Dyos Manb'aj nimwipumale' nchin yolin: Che b'ajel ntoqi'ne' kysmaj aj Elam, aye' kyq'ojb'il nche ajb'enxi'x.³⁶Ktzajel nq'o'ne' kyq'iq' ti'ju' tnam lu toj kykyajel plaj te kya'j, tu'n kyb'ajx t-slamu'n toj tkyaqil plaj, tu'ntzun mixti'tl tnam che kjel jatu'n kypona'tl kyxjal klolkyib'.³⁷Knb'incha'ye' tu'n kylu'lun aj Elam kye kyajq'oj che ul b'yolkye, ktzajel nq'o'ne' jun xitb'ilkye, ktzajel nb'ajsa'ne' nq'oje kyi'j, tzajel nchq'o'ne' q'oj kyi'j majx tu'n kykub' xitj. Ayine' Dyos Manb'aj nchin yolin.³⁸Kb'el nq'o'ne' nq'uqb'ile' te toju' tnam Elam, ex che kb'el nb'yo'ne' kynimaqkawil ex kynejel. Ayine' Dyos Manb'aj nchin yolin.³⁹Yajxi'tzuntl knch'exb'eye' kyanq'ib'l aj Elam. Ayine' Dyos Manb'aj nchin yolin, chi Dyos. Kb'elti'j nintnam B'ab'ilon

¹A tqanil ja'lu tma Qman Dyos te Jeremiy ti'j B'ab'ilon kytanam kaldey:

²Kymanx tqanil jaye'lu, kymane' kye nimaqtnam. Kyq'onktze' techlalju' tqanil, lan kub' kyewa'ne'. Kymanxe': ¡Matzyetju' tnam B'ab'ilon! ¡Mixti'tlte xb'ent tu'n dyos B'el, mab'aj xob'ju' dyos Marduk! ¡Mixti'tlte xb'ent kyu'n kywitzleb' ex ma'xi'x b'je'l kych'ixaw!³Qu'n matxi' tzaj lq'e jun nintnam ti'j toj tb'anq'ob'kya'j kjel tq'o'n tnam lu chq'ajlajtl. Mixti'tlte xjal ex alu'mj knajal toj, kykyaqil che kxel oq, chi Dyos. K'anjetztl kyi'j aj Israel

⁴A ntma'n Qman Dyos ja'lu:
Tojtzu'n tq'ijlalil lu, che ulju' aj Israel ex aj Juda nche oq' jyolweye' ayine' Dyos Manb'aj, nche ajb'en weye'.⁵Che xjelul ti'ju' tb'eyil Syon, ex che kxe'ltzuntz, kkyma'n: Qo'qe' tk'etz Qman Dyos, ex qolpex ti'j tuk'i'l jun qyol kjel b'entti'j tejumajx, mixti' tu'n tik' tna'l, chechiku'.

⁶Ikytoq ntanamju'ye' kse'nqe' rit tzpetniqe', myab'a'n iq'b'enkye kyu'n k'ik'lel kye, eb'ajkyaj kytzpet-sa'n toj k'ul. Inche'x twi' jun witz ex nche'xtl twi' juntl witz, ex majx ik'tna'ju' kych'lajil kyu'n.⁷Inche'x ch'yo'n kyu'n kyajq'oj ajkyelyal kywitz ex nkyma'ntzuntz: Mya qpajqe', qu'n eb'inchan kye'lu il twitz Qman Dyos, ju' k'a'chalkye, ja oka' qe kyk'u'ju' ojtxi' kyyajilb'en, chechij.

⁸¡Kukyoqe' te B'ab'ilon, kytanam kaldey! ¡Kukyetze' nejlqe'ye' kywitzju' rit!⁹Knb'incha'we' tu'n kyok tzaqpaj jun b'yoj tnam nim kyipumal te tb'a'nq'ob'kya'j junx kmoj q'ojil ti'j B'ab'ilon. Kxel kytxoli'n kyib' ex kb'elti'j kyu'n. Nimaq q'ojil qexi'x, b'a'nxi'x che nik'un ajt-xi kyxon tal kysmaj.¹⁰Kb'ajxelkyiq'i'nju' ati kye kaldey, kxe'l kyiq'i'n tkyaqilju' maponkyk'u'j ti'j. Ayine' Dyos Manb'aj nchin yolin. Tej tkub'ti'ju' tnam B'ab'ilon.¹¹E'kaldey, b'je'l kyiq'i'ne' ati kye ntaname', ¡Che tzalajxe', che xlik'punqe'ye' kse'n jun qpoj ttxu wakx toj cha'x k'ul! ¡Che t'iqchaje' kse'nqe' b'anchej!¹²Atzunte' kynajb'ile' ex ninkytaname' ja itz'jna'qe'ye' majx k'elel tch'ixaw. Kjel te mankb'il kyxol nimaqtnam, kjel kolb'e'n chq'ajlajtl ex tzqij.¹³Qu'n ktzajel ntx'u'jile' ti'j ex kjel nq'o'ne' mixti'tl najalte, Majx kjel chq'ajlaltl. Kykyaqilju' che ik'el atzu' che jawil sak'puj ajkyka'yinte tz'e'ysb'il twitz matxitoq tzaj.

¹⁴¡Kynk'unx kyib'e' smajil, kyi'jile aj B'ab'ilon! ¡Kyxonxe' tkyaqilju' tal kysmaje' kyi'j, qu'n mache b'inchan il nwitze', ayine' Dyos Manb'aj!¹⁵¡Kyẍch'inktze' q'oj kuw toj tkyaqil plaj! ¡Matxi' taq'tib' B'ab'ilon! ¡Mache kub' tz'aqu' ja nimaq kywe', mache kub'tilju' nimaqtapi! ¡A tu'me'l t-xelju' wu'ne': kyq'ome' tu'me'l t-xel kye! ¡Kyb'inchame' kye kse'nxju' kyb'incha!¹⁶Mix-a'lo'tlte kjel kyq'o'ne' toj B'ab'ilon tu'nwt tawan mo tu'nwt tjaw tb'u'yi'n twitz awal. K'anjelkyi'ju' najchaq xjal toj kytanam aj kylonte q'oj kuw nxi'x xitun, teyle junjun kxel oq toj ttanam. K'anjetz kyi'j aj Israel

¹⁷Ikyqe' aj Israel kse'n rit tzpetni, xla'ja'n kyu'n b'alun. Tnejel xxiwan tu'n nimaqkawil aj Asirya; yajxi'tl tu'n Nab'ukodonosor nimaqkawil aj B'ab'ilon, majx b'aj ttoqi'n tb'aqil.¹⁸Qu'mtzun in nma'ne', ayine' Dyos Manb'aj nimwipumale'. Kb'el ntz'e'ysa'ne' twitzju' nimaqkawil aj B'ab'ilon tuk'i'lju' ttanam, kse'n nb'inchaye' ti'ju' nimaqkawil aj Asirya.¹⁹Knb'incha'ye' tu'n tanjtzkyi'j aj Israel toju' kytx'otx', ex tu'n tten kywa kse'nqe' rit nim kywa toj Karmelo, B'asan, kywi' witz te Eprayin ex Kalaad.²⁰Ayine' Dyos Manb'aj nchin yolin. Tojtzu'n tq'ijlalil lu che tenb'el aj Israel tzaqpi'n te il, qu'n kb'el nnajsa'ne' kyilju' che kjel anq'in wu'ne'. Kb'elti'ju' tnam B'ab'ilon²¹¡Che q'ojinqe'ye' ti'ju' tx'otx' Merataym ex kyi'ju' najlqe' Pekod! ¡Kykna'qe'ke' ex che kyb'yonqeku'ye' jumajx! ¡Kyb'inchanqe'xe' nchaq'b'ile' tkyaqil! Ayine' Dyos Manb'aj nchin q'mante.

²²Inxi'x q'ajti q'oj toj tkyaqilju' tx'otx', tuk'i'l jun nin xitb'il.²³¡Matxi' kub' yuchju' B'ab'ilon tx'nolkye kykyaqil tnam, naq tb'uchub'tl xkyajten! ¡Taq'wixi'x k'elela' kye nimaqtnam ajkyka'yinteju' mab'aj ti'j B'ab'ilon!²⁴Axta tnam B'ab'ilon xkub' q'onte jun xpatxab' teya, ex min xitka'yi'na xkub' tz'aqa toj. Makyej jupliya, makyej jitz'liya, qu'n maq'ojina wi'je' ayine' Dyos Manb'aj.²⁵Majaw njqo'ne' k'ub'l nq'ojb'ile', ayine' Dyos Manb'aj, ex mache b'jatz wiq'i'ne' q'ojb'il tu'n nq'oje, qu'n ayine' nimwipumale', ati tu'n nb'inchanteye' jun waq'une' toju' kytanam kaldey.²⁶¡Che q'ojinqe'ye' ti'j toj tkyaqil plaj! ¡Kyjqomqe'ye' kyk'uja! ¡Kyb'uyinqeme' xjal ex che kyb'yonqeku'ye'! ¡Lalun kyej anq'in juntl kyu'ne'!²⁷¡Kyb'yonqeku'ye' kykyaqilju' kyxjal te q'oj, che kyq'onqe'xe' toj b'iyb'il! ¡Malayqe'xwit! ¡Matxi' pon q'ij kye, matxi' che q'nax tu'n ttz'e'yset kywitz!

²⁸(Mache ponju' ẍetzaqpaj B'ab'ilon toj Syon, nkyma'n se'n tu'me'l xtaq'a' Qman Dyos tz'e'ysb'il kywitz aj B'ab'ilon tu'n tpaju' kyb'incha ti'ju' tja Dyos).

²⁹¡Che kytxkonqe'tze' kykyaqil smajil, tu'n kyq'ojin kyi'ju' aj B'ab'ilon! ¡Che tenku'ye' ti'jileju' nintnam tu'ntzun mix-a'lo' jun ktzaqpajel! ¡Che kyb'yonqeku'ye' toj kyil! ¡Kyb'inchanke' kyi'j kse'nxju' kyb'incha! Qu'n pi'sqe' weye', ayine' Dyos Manb'aj xjan, nche ajb'en aj Israel weye'.³⁰Qu'mtzun che kyimelju' kyku'xun kyoj b'e ex che kyimel kykyaqilju' kyq'ojil toju' q'ij lu. Ayine' Dyos Manb'aj nchin yolin, chi Dyos.

³¹Intma'n Qman Dyos kjalu: Pi's nintnam, nchin q'ojine' ti'ja, matxi' pon q'ij teya, matxi' q'naxa tu'n ttz'e'yset twitza.³²Ktokpajel tqana pi's nintnam ex kjawil tz'aqa, ex mix-a'lo' kjawil wab'anteya. K'okyel nq'o'ne' kyq'aq'al kykyaqil nimaqttanama, ex kb'ajel tkyaqilju' ti'jileya tu'n q'aq' lu, chij.

³³Intma'n Qman Dyos kjalu:
Inche yajti tnam aj Israel ex aj Juda toju' jitz'b'il. Jpu'nqe' ex min nche tzaqpinjtz kyu'n kyajq'oj.³⁴Atzunte' tzaqpilkye kuw ex a tb'iju' Qman Dyos nimtipumal. A kb'inchalte tnik'alilti'j, tzultq'o'n nak'b'il toju' tx'otx' ex xob'ajil kye aj B'ab'ilon, chij.

³⁵Chi Qman Dyos kjalu: ¡Tzul q'oj ti'ju' tnam B'ab'ilon ex kyi'ju' najlqe' toj! ¡Kyi'ju' nejenel ex kyi'ju' ati kynab'l toj!³⁶¡Tzul q'oj kyi'ju' ajnab'lil toj: ju' nok toj kywitz!³⁷¡Tzul q'oj kyi'ju' kyxjal te q'oj: che lu'lul tu'n xob'el! ¡Tzul q'oj kyi'ju' kychej ex kykarwaj! ¡Tzul q'oj kyi'ju' xjal te q'oj chjo'nqe' tu'n: che okyel naku'j qya! ¡Tzul q'oj kyi'ju' kyk'uwen: che b'ajxku' alq'a'nj!³⁸¡Tzul q'oj kyi'ju' nin a' toj: che'xku' tzqij! Qu'n twi' witzleb'il taq'wixi'xte' nintnam B'ab'ilon, tu'ntzu'n xkub'a' xitj tnab'l.

³⁹Qu'mtzun kb'ajel kyb'incha'n twiẍ k'ul ex xo'j kyja toj B'ab'ilon, ex che najal toj k'ul pich' toj. Layx che najan jumajtl xjal yajxi'tl toj.⁴⁰Kjel kse'nqe' tnam Sodom ex Komor, exqe' nimaqtnam nqaku' kyk'etz, tej kykub' xitj. Mix-a'lo'tl knajal toj, tk'i'xpe'wt naq jte' q'ij. Ayine' Dyos Manb'aj nchin yolin.

⁴¹Ntb'incha'ntib' jun nintnam nimtipumal tzmajx toju' tx'otx' te tb'a'nq'ob'kya'j kyuk'i'l txqan nimaqkawil, tu'n kytzaj q'ojil⁴²Q'i'nile kysmaj ex kych'ut; mya'lqe', mixti'x nlaq kyk'u'j, iky toj kywi'ju' ajkyẍch'in kse'n tq'ojq'ojil ninnjab', ex kyi'j chej nche b'eta'. B'incha'ntl kyten tu'n kyq'ojin ti'j B'ab'ilon.⁴³Atzu'n nimaqkawil aj B'ab'ilon, majx kub' sq'anax tej tb'inteju' tqanil lu, inxi'x b'aj tu'n b'is ex k'ixk'oj kse'n qya ajtitz'ji tal.

⁴⁴Naq myanim ajntzaje' kse'n b'alun netz kyoj k'ul ttzi nin a' Jordan, nxi'tzuntz jata' k'ik'leb' cha'x, ex knb'incha'ye' tu'n kyb'aj oqju' aj B'ab'ilon, ex knb'incha'ye' tu'n tkawinju' kjawil nsk'o'ne'. ¿Alkye kpomel kse'nwe'? ¿Alkye jun k'ik'lel kb'antel tq'ojin wuk'i'le'?⁴⁵Kyb'intze' nxime' matxi' b'ajnk'et kyi'j aj B'ab'ilon, ayine' Dyos Manb'aj, aju' aq'untl matxi' b'antten wu'ne' ti'j kytnanam kaldey: Okpe' che b'ajex q'i'n qpoj tman rit b'o'sqe', ex che b'ajel xitu'n b'us.⁴⁶Okxi'x q'ajtel B'ab'ilon ajtkub'ti'j, majx kyokchel tx'otx', ex kb'injtzel tq'ojq'ojel kywi' xjal kyoju' txqantl nimaqtnam ajkyẍch'in, chi Dyos. Tkub'lenxitj nintnam B'ab'ilon¹Intma'n Qman Dyos kjalu: Ktzajel nq'o'ne' jun kyq'iq' xitul ti'j B'ab'ilon ex kyi'j kaldey.²Knb'incha'ye' tu'n kysenjtz aj B'ab'ilon kyu'n kyajq'oj kse'n nxq'iq'et triy toj kyq'iq', knb'incha'ye' tu'n tkyaju' kytx'otx' mixti'tl najalte. Ajtpon q'ij tu'n t-xitunjtz, k'okyel q'oj ti'j te tkyaqil plaj.³¡Kyb'inchanx kyten kysmaje' smajil! ¡kyq'onke' kyktone' k'uxb'il! ¡Lalun laqkyk'u'je' kyi'j ku'xun aj B'ab'ilon; majx che kyb'yonqeku'ye' kyxjal te q'oj tejumajx!⁴Che kjel woqonje xjal kyoju' b'e toj tkyaqil kytx'otx' kaldey,⁵b'a'nqa mache b'inchan il aj Israel ex aj Juda nwitze' ex machmet kyil toju' tx'otx', min ẍekyaj nkolb'e'nwe', ayine' Dyos Manb'aj xjan nimwipumale', nche ajb'en aj Israel weye' nim.⁶¡Kukyoqe' ti'jxi' B'ab'ilon! ¡Che kyklom kyib'ju' kb'antel kyoq!. ¡Lalun che kyimkye' tu'n tpaj tilju' tnam! Matxi' pon kmuj tu'n tok tu'me'l t-xel wu'ne', ex oknq'a'ye' te tojx til.⁷Juntoq k'wab'l q'anpwaq te' B'ab'ilon toj nq'ob'e' intoq che tx'ojti kykyaqil xjal tu'n. Intoq che k'wan nimaqtnam ti'ju' b'in lu ex intoq naj kynab'l.⁸Naqtzun myanim xkutz'aq B'ab'ilon majx makub'uchj. ¡Che oq'e' ti'j! Kyiq'intze' q'a'nb'ilte tk'ixb'len qama q'anet.

⁹Matz'ok qq'ana'ne' B'ab'ilon, extzun mixti'x xq'anet. ¡Le'ku'j! Qo'qe' anj tojilex ttanam junjun, mana' kub'tz'e'ysa'nte' twitz kuwxi'x, majx majaw sutq'i'n toj kyq'iq'.

¹⁰Makanb'etju' qoklen tu'n Qman Dyos. Wiqe'xe', qo'qe'ye' q'malteju' xtb'incha Qman Dyos kyeju' te'qe' Syon.¹¹Tajb'il Qman Dyos tu'n tkub' t-xitu'n B'ab'ilon, ex matxi' kub' tq'o'n xim lu toj kyanmi nimaqkawil aj Medya. A tu'me'l t-xel ja'lu tu'n Dyos tu'n tpaju' b'inchanjtz ti'ju' tja te k'u'lb'il. ¡Kyb'inchanx kytene' talsmaj! ¡Kytzyunqeme' kolb'il!¹²¡Kyq'onxe' techlal tu'n tok q'oj kyi'ju' nimaqtapi ti'j B'ab'ilon! ¡Kyq'onke' onilkyeju' xq'uqil! ¡Kyq'onqe'ke' ka'yil! ¡Kychq'onqe'xe' nenul ti'j!
Qu'n tb'incha Qman Dyos ttenju' t-xim ex matb'incha kyi'ju' najlqe' B'ab'ilon.¹³Aya B'ab'ilon, atiya kyxol nimaq a' ex nim tq'inumala ati, ¡Matxi' q'naxa tu'n tb'aja, mixti'tl tu'n ttena ja'lo!¹⁴Matxi' ttziya Qman Dyos nimtipumal tchwinqlala: ¡Kche nchma'ye' txqan tajq'oja, kse'n txqan ẍt'ikt'u'l, ex che tzalajel ajtkub'ti'ja kyu'n!. B'itz ajwalb'ilte Qman Dyos (Jer 10.12-16)¹⁵Tb'incha Qman Dyos tx'otx' tu'n tipumal, kub' tkuwsa'n tx'otx' tu'n tnab'l, ximan tej t-xitlik'u'n kya'j.¹⁶Inxi'x tinun a' twitz kya'j tu'n, njawtz muj tu'n tzmax ttxa'nxi' tx'otx', nche qoptz'aj q'ankyaq tu'n toj jb'al ex netztiq'i'n kyq'iq' jak'u'na' tu'n.¹⁷Mixti'xkye xjal kynab'l kykyaqil ex xnakqe'. Nnel kych'ixawju' b'inchal witzleb': qu'n naq tilb'ilalqe' kyb'inchb'aj ex kyimniqe',¹⁸naq ti'xti'qe' mixti'x kyajb'en, ch'ixb'ilx, che b'elt-xitu'n Qman Dyos ajkyok toj xjel.¹⁹¡Kxa' kse'nte Qman Dyos ja ajb'ena' Jakob', b'inchalte tkyaqilju' ati! Ejaw t-sk'o'n aj Israel te teku'. A tb'iju' Qman Dyos nimtipumal. Ajb'en B'ab'ilon te tz'e'ysb'il witzb'aj tu'n Dyos²⁰¡B'ab'ilon, ikju'ya toj nq'ob'e' kse'n pojb'il, aya nq'ojb'ile'! Tu'nela nche b'aja' nb'uchi'ne' nimaqtnam ex nche b'ajnxitu'ne' kawb'il.²¹tu'nela nche b'aja' ntoqi'ne' chej ex chejil, e'karwaj exqe' q'elkye.²²tu'nela nche b'aj ntoqi'ne' ichan ex qya, e'tijwnaq ex ku'xun, q'a ex txin²³tu'nela nche b'aj ntoqi'ne' k'ik'lel ex rit, aq'unal ex wakx, kawil ex onil nim kyoklen. Tz'e'ysb'il twitz B'ab'ilon²⁴Kywitzku'tzune' ja'lo knq'a'ye' tu'me'l t-xel te B'ab'ilon ex kye kaldey tojx kyil, tu'nju' myab'a'n kyb'incha ti'j Syon. Ayine' Dyos Manb'aj nchin yolin.²⁵Nchin q'ojine' ti'ja, witz xitul, nt-xitu'na tkyaqilju' tx'otx'. Ayine' Dyos Manb'aj nchin yolin. K'aq'pomel nq'ob'e' tz'e'ysalte twitza, ktzajel ntoli'na kywitz pik ex k'okyela kse'n jun witz tz'e'ynitl.²⁶Mixti'xtl jun ab'j kjel ajtkyaj xitja tu'nwt tajb'en tu'n kyjaw b'inchet ja. kjela jun chq'ajlaj tejumajx. Ayine' Dyos Manb'aj nchin yolin.

²⁷¡Kyq'onxe' techlal tu'n tok q'oj toju' tnam! ¡Kyq'ajtzanxe' chun ex kyb'incham kytenju' nimaqtnam tu'n kyq'ojin ti'j B'ab'ilon! ¡Kyiq'inqe'tze' nimaqtnam toj Ararat kyi'j, toj Mini ex toj Askyenas! ¡Kyq'onke' jun nejenel tu'n kytzaj tiq'i'n xjal q'ojil! ¡Kukytzaj lq'e txqan xjal te q'oj kyi'j kyu'ne' naku'j ẍt'ikt'u'l nche tx'u'jin!²⁸Kyb'inchame' kyten nimaqtnam tu'n kyok tzaqpaj ti'j; kyb'inchame' kyten nimaqkawil aj Medya, exqe' kykawil ex nimaq kyoklen toj kawb'il ex toj tkyaqilju' tx'otx' tjaq' kykawb'il.

²⁹Majaw lu'lunju' tx'otx' ex nyokchi, qu'n ma japun t-xim Qman Dyos tu'n tkyaju' B'ab'ilon te jun chq'ajlaj xob'ajilx.³⁰Min ẍe q'ojintlju' xjal aj B'ab'ilon te q'oj, mache kyejten kyoju' kyja kuwsa'n, mab'aj kyipumal, expe' mache ok naku'j qya. Macheb'aj kub'tzyu'n nimaqtnam ex macheb'aj tz'e'ysa'n kyja.³¹Inxi'x che ojqelan sanjelal q'malte tqanil te nimaqkawil aj B'ab'ilon qama kub'ti'ju' ttanam tejumajx.³²Mache kub'ten ajq'oj kyoju' b'e nche ik'x toj nin a', macheb'aj kytz'e'ysa'n ja ta'qe' kolol ex matxi' tz'ok xob'el kyi'ju' xjal te q'oj.³³Qu'n intma'n Qman Dyos nimtipumal, janche ajb'ena' aj Israel, ikjalu: ¡Ikyte B'ab'ilonju' kse'n toj er nb'aj wab'e'n toj tq'ij triyi'n, ex lwiyxi'x kpomel q'ij tu'n tb'uyet twitz awal!, chi Dyos.

³⁴Intma'n Jerusalen, nintnam toj Syon, kjalu: Nnb'aj tq'uchi'ne' Nab'ukodonosor, nimaqkawil aj B'ab'ilon, ex nxitwane', inkyajtq'o'ne' kse'n pik'laq mixti'tl toj. Kse'n jun nin txkup toj ninnjab' nxitb'ilq'u'ne', noj tu'nju' kub' toj twitz wi'je', atzu'n kyejten ex t-xon. ¡Tz'ok tu'me'lt-xeltz te B'ab'ilon tu'n q'oj tb'incha wi'je'! ¡Tz'ok tu'me'l t-xeltz kye kaldey kyu'n xjal ekub' b'yon weye'!, chij. Yol tziyanjtz kye aj Israel³⁶Intma'n Qman Dyos kjalu: Knb'incha'ye' tnik'alilti'j teya, k'okyel nq'o'ne' tu'me'l t-xel kyeju' tajq'oja. Majx che kxel ntzqijsa'ne' nin a' ex t-xiklil a' toj B'ab'ilon,³⁷naq jun ch'uq ttx'anqa'ntl ja kjel, naq kyja xo'j k'okyela'tl, lay b'entl kynajan xjal toj kykyaqilx che xob'el toj ex taq'wixi'x.³⁸Kykyaqil che ẍch'il kse'nqe' b'alun ex che tzanul kse'nqe' tal b'alun.³⁹Ajkytz'e'y tu'n kyaq, kxe'l nq'o'ne' kyk'wa' tu'n kytx'ojti ex tu'n tnaj kynab'l. Che b'eltzuntz tu'n watl tejumajx layx tzaj kyna'nkyib' toj. Ayine' Dyos Manb'aj nchin yolin.⁴⁰Che kxelwiq'i'ntzuntze' toj b'iyb'il, kse'n ajkyxiq'i'n qpoj tman rit, chib' ex rit, chi Dyos. Tkub'el tz'aq B'ab'ilon⁴¹¡Matxi' kub'ti'ju' nintnam B'ab'ilon, ju' nim tyolinjtz toj tkyaqil twitz tx'otx'! ¡Majx nche b'ajxob'ju' nimaqtnam ajkyka'yinte!⁴²Matz'okxju' ninnjab' toj B'ab'ilon, makyej mulq'aj tjaq' a'.⁴³Majx ẍekyaj chq'ajlajixju' nimaqtnam toj, tzqij tx'otx'tl kyejni leb'a'n, mix-a'lo'tl najli toj, mix-a'lo'tl nnik' toj.

⁴⁴Kb'el ntz'e'ysa'ne' twitzju' dyos B'el toj B'ab'ilon, knb'incha'ye' tu'n tjatz t-xa'nju' xini tb'elq'u'n, ex lay che kub'santl nimaqtnam te. ¡Matx che kub' tz'aqju' nimaqtapi ti'j B'ab'ilon!⁴⁵¡Kukyetze' na'tz, ntanam, ex teyile junjun kyklom kyib'e', teju' ntx'u'jile' kuw!.⁴⁶Lan che xob'e', lan che b'isune' kyeju' tqanil nq'manjtz toju' tnam. Chukchaqte tqanil kq'manjtzel atl junjun ab'q'i, e'tqanil q'oj toju' tnam ex q'oj kyxol kawil.⁴⁷Tzul tq'ijlalil kb'el ntz'e'ysa'ne' kywitz witzleb' toj B'ab'ilon. Tkyaqilju' tnam kb'el me'sset kb'el noj kyu'n kyimni.⁴⁸Che tzalajelju' kya'j, tx'otx' ex tkyaqilju' ati aj tkub'ti'ju' B'ab'ilon, ajkyulju' xitulte te tb'a'nq'ob'kya'j. Ayine' Dyos Manb'aj nchin yolin.⁴⁹Kb'el tz'aqte' B'ab'ilon kyu'n txqan aj Israel eb'aj kub' kyb'yo'n kyu'n txqan xjal b'ajkub' kyb'yo'n toj tkyaqil tnam, chi Dyos. Tyol Dyos kye aj Juda ate' B'ab'ilon⁵⁰Aye'ye' ẍeklete' teju' b'yojxjal, kukyoqe' lan che kyajwe'ye', expe' qa te'qe'ye' najchaq, che ximanqe'ye' ti'j Qman Dyos ex kyna'ntze' Jerusalen.⁵¹Inkyma'ne': nqo ch'ixwiye' ajqb'inteye' nqo wulinjtze'. Nktxunjtz qwitze' tu'n ch'ixb'ajil, qu'n matxi' che b'jo'kxju' najchaq xjal tzmajx toju' najb'il xjan.

⁵²Atzunte Qman Dyos ntma'n: Tzul q'ij kb'el ntz'e'ysa'ne' kywitzju' witzleb' toj B'ab'ilon, ex che oq'elju' k'ixb'niqe' toj tkyaqil ttx'otx' B'ab'ilon.⁵³B'a'nqa majaw kylaq'b'a'n kyib' aj B'ab'ilon twitz kya'j tu'n tkub' kyq'o'n kyja kuwsa'n tzmajx jawl, ex che kxel nchq'o'ne' kyajq'oj xitulkye tzmajx na'tz. Ayine' Dyos Manb'aj nchin yolin, chi Dyos. Tkub' xitj B'ab'ilon⁵⁴Q'ojq'ojqe' xjal nche ẍch'in tu'n k'ixk'oj tzmajx B'ab'ilon, nul jun tq'ojq'ojil tzmajx toj kytx'otx' kaldey.⁵⁵Ate Qman Dyos nxitunte B'ab'ilon ex ma npon b'aj kyẍch'in. Ikyqe' ajq'oju' kse'n ttolob' ninnjab' njumin, che ul ti'j kse'n jun q'ankyaq.⁵⁶Mache ul xitulte B'ab'ilon; matxi' che tzyetju' kyxjal q'ojil kyu'n ex mache b'ajkytoqi'n kysmaj. Qu'n intq'o'nte Qman Dyos tz'e'ysb'il kywitz xjal kse'nxu' kyil.⁵⁷Intma'n Nimaqkawil, ju' Qman Dyos nimtipumal, kjalu: Che b'elntx'ujsa'ne' kynejel aj B'ab'ilon, e' kyajnab'lil ex kykawil, exqe' nim kyoklen toj kykawb'il ex e'kyxjal te q'oj, che b'eltzuntz tu'n wal tejumajx layx tzaj kyna'nkyib'.⁵⁸Nxinma'ne' ayine' Dyos Manb'aj: Majx che b'elxitu'n nimaqtapi ti'j B'ab'ilon tejumajx, ex che b'eltz'e'ysa'n tjpel nimaqqe', naq te twa q'aq' soka' eb'aj sikti nimaqtnam ti'j, chi Dyos. Xiq'i'n tpakb'ab'l Jeremiy tzmax B'ab'ilon

⁵⁹Xitq'o'n Jeremiy t-sanjelal Dyos jun oqxenj ti'j Serayiy tk'wal Neriy ex tchman Maaseyiy, toj tkyaji'n ab'q'i nkawin Sedekyiy, nimaqkawil toj Juda. Xi' Serayiy tuk'i'l nimaqkawil Sedekyiy tej txi' B'ab'ilon, atoq b'inchalte tten tkuẍb'il nimaqkawil.⁶⁰Tz'ib'a'ntltoq tqanil tu'n Jeremiy toj jun u'j ti'j tkyaqilju' xitb'il atitoq tu'n tul ti'j B'ab'ilon, tkyaqil ja'lu tz'ib'a'n toju' u'j,⁶¹ex xitma'n te Serayiy kjalu: Ajtpona B'ab'ilon, lan tzik'tna'l tu'na tu'n tjaw t-ẍch'i'na tkyaqilju' tqanil lu.⁶²Kxel tma'ntzuntza: Nman Dyos, oje tmaya qa kb'el t-xitu'na najb'il lu, ex mix-a'lo'tl knajal tzalu, lay che najantl xjal ex alu'mj toj, qu'n kjel tq'o'na te jun chq'ajlaj tejumajx, chiku'ya.⁶³Ex ajtb'aj t-ẍch'i'na u'j lu, xmonka ti'j jun ab'j ex xonxa toju' nin a' Ewprate,⁶⁴ex q'manxa: Iktzu'n kxela' mulq'aju' B'ab'ilon, ex lay jawe'tl toju' xitb'il ktzajel tchq'o'n Qman Dyos tib'aj, chiku'ya, chi Jeremiy xitma'n.
Atzu' nche pon b'aja' tyol Jeremiy tzalu. Tkawin Sedekyiy (2 R 24.18-20; 2 Cr 36.11-16)

¹Tetoq junaq jun (21) ab'q'i Sedekyiy ttzyet tkawin, ex junlajoj (11) ab'q'i kawin Jerusalen. Amutal tb'iju' ttxu, tmyal Jeremiy ex aj Lib'na.²Myab'a'n tb'inchb'aj twitz Qman Dyos, kse'nx tb'inchb'aj Joakyim.³Qu'mtzun tzaj tq'oj Qman Dyos ti'j Jerusalen ex ti'j Juda, ex eb'je'x t-xla'ja'n twitz. Kub'ti'j Jerusalen (2 R 24.20—25.7; Jer 39.1-7)
Yajxi'tzuntl jawtiq'i'ntib' Sedekyiy ti'ju' nimaqkawil aj B'ab'ilon.⁴Toj lajoj tajlal tlajoji'n xjaw te tb'eljoji'n ab'q'i nkawin Sedekyiy, ulju' nimaqkawil Nab'ukodonosor kyuk'i'l t-xjal te q'oj ti'j Jerusalen, ex b'aj kytxoli'nti'j. E'kub'ten tu'me'l ttziju' tnam, ex b'jaw kyb'incha'n kyxwe'lil tu'n kyq'ojin ti'jile.⁵Kub' mqo'n ti'ju' nintnam tzmax toj junlajoj (11) ab'q'i nkawin Sedekyiy.⁶Tzajxi'x we'yaj toju' nintnam toj b'eljoj tajlal tkyaji'n xjaw teju' ab'q'i lu, ex mixti'tltoq titi' tu'n t-xikywan xjal.⁷Kyb'inchatzun jun kyb'e kyoju' nimaqtapi ti'ju' nintnam, b'a'nqa txoli'ntoqti'j kyu'n kaldey, ex oq nimaqkawil kyuk'i'l t-xjal te q'oj toj qonik'an. Xi' e'exa' ttziju' nintnam kyxol kab'e' nimaqtapi, toj kyb'eyil tawal nimaqkawb'il, exi'tzuntz toju' tb'eyil b'ya' ttzi nin a' Jordan.⁸Aye'tzu'n xjal te q'oj kaldey exi' knolteti'j nimaqkawil Sedekyiy, ex kub'ti'j kyu'n kyoj plan tx'otx' te Jeriko. Kyej kolb'e'n kyu'n kykyaqilju' t-xjal te q'oj ex b'ajx kypa'n kyib'.⁹Tzyetju' nimaqkawil kyu'n kaldey ex xikyiq'i'n twitz nimaqkawil aj B'ab'ilon atitoq Rib'la, toj kytx'otx' aj Amat. Atzuntzu' tmaya' Nab'ukodonosor tz'e'ysb'il twitz Sedekyiy,¹⁰ex twitzku' tchaq'a' tu'n kyel tx'e'mu' kywi' tk'wal ex kywi' kykyaqil nimaqxjal aj Juda.¹¹Tchaq'tzuntz tu'n kyb'je'tzq'i'n twitz Sedekyiy, ex tu'n tokq'o'n taq'e'l xpatx'k'uxb'il tu'n txiq'i'n B'ab'ilon, atzuntzu' okxa' jpu'n tzmax tkyim. Tkub' xitu'n ja te k'u'lb'il (2 R 25.8-21; 2 Cr 36.17-21; Jer 39.8-10)

¹²Toj lajoj tajlaj tjwe'yi'n xjaw te b'eljlajoj ab'q'i nkawin Nab'ukodonosor, nimaqkawil aj B'ab'ilon, ul Neb'usaradan toj Jerusalen, nim toklen ex chaq'ul kye xq'uqil ti'n nimaqkawil,¹³ex oktq'o'n kyq'aq'al tja Dyos, tja nimaqkawb'il ex kykyaqilju' ja toju' nintnam, aye'xi'xpe' kyja kykyaqil nimaqxjal toj kawb'il toju',¹⁴aye'tzu'n xjal te q'oj kaldey lepchqe'ktoq ti'j b'ajkub' kyxitu'n nimaqtapi ti'jile Jerusalen.¹⁵Eb'je'xtzun tiq'i'n Neb'usaradan ju' xjal ate'xtoq toju' nintnam exqe' ojetoq kyaq'kyib' tuk'i'l nimaqkawil aj B'ab'ilon, exu' jte'tl b'inchal chukchaq aq'untl, eb'ajx tiq'i'n B'ab'ilon.¹⁶Naq jte'tl kyxolju' prowqe'xi'x e'kyaj tq'o'n tu'n kyaq'unanteju' tx'otx' ex tqan ub'a.

¹⁷B'aj kytxiju' kaldey txqan ti'xti' q'ank'uxb'ilqe' ate'toq toju' tja Dyos: e'tqan, nin tkb'el a' exqe' tq'uqlil, ex b'ajx kyiq'i'n tkyaqil q'ank'uxb'il B'ab'ilon.¹⁸Ex b'ajx kyiq'i'n jotb'il tza'j, e'jotb'il, eb'inchb'il kytxa'n kantil, e'nimaqlaq, e'pak' ex tkyaqil nche ajb'en toj k'u'lb'il q'ank'uxb'ilqe'.¹⁹Ex eb'ajx tiq'i'n chaq'ul kye xq'uqil tkyaqil ti'xti' q'anpwaq ex saqpuaq: e'tkb'el a', e'ti'j q'ob'aj, e'nimaqlaq, e'jotb'il tza'j, e'kyb'el kantil, e'pak' ex b'as tkb'el oyaj b'in.²⁰Aye'tzu'n kab'e' tqan, aju' nin tkb'el a' kyuk'i'lju' kab'lajoj (12) tman wakx q'ank'uxb'ilqe' qonte exqe' tq'uqlil tchaq' nimaqkawil Salomon tu'n kyb'inchet teju' tja Dyos, mixb'enta' t-ximet talal.²¹Te wajxaq metr tk'ich'intl twe' junjun tqan, atzun jwe' metr tk'i' nik'jan ttole; jultoq kyoj, ex wuq sentimetro tpimalju' q'ank'uxb'il ti'j.²²Teyile junjun tqan atitoq jun tilb'ilal q'ank'uxb'il tojx twi'xi', te kab'e' metr tk'ich'i'ntl twe', atitoq jun kutxb'il ti'jile q'ank'uxb'ilile, wiqo'n kranadiy ti'j. Junileqe'toqju' kab'e' tqan.²³Jo'naq kranadiy toktoq ti'jile junjun tilb'ila, kyajnaq qaqlajojtzu'n q'ancha'ltoq. Aye' aj Juda eb'je'xq'i'n

²⁴Ex e'ttzuy chaq'ul kye xq'uqil, Serayiy kynejel pale, ex Soponiy lepchix toklen ti'j kyxol pale, exqe' oxe' xq'uqil ttzi tja Dyos.²⁵E'ttzuyju' nejenel ntoq chaq'un kye xjal te q'oj, e'wuq ichan ajb'el teku' nimaqkawil ate'toq toju' nintnam, exju' nim toklen ntoq xnaq'tzankye xjal te q'ojil, ex oxnaq (60) xjal ate'toq toju' nintnam.²⁶Eb'ajx tiq'i'n Neb'usaradan kykyaqil twitz nimaqkawil aj B'ab'ilon, atitoq Rib'la, toj kytx'otx' aj Amat. Ex ttchaq' nimaqkawil aj B'ab'ilon atzu' tu'n kykub'yet.
Ikytzu'n eb'je'xq'i'n aj Juda toju' kytx'otx'.²⁸A kyajlal xjal ja'lu eb'je'x tiq'i'n Nab'ukodonosor toju' kytx'otx': eb'je'x tiq'i'n wuqk'al junlajnaq oxe' (3,023) xjal aj Juda toj twuqi'n ab'q'i ntoq kawin;²⁹atzun kab'k'al junaq kab'lajoj (832) aj Jerusalen b'je'x tiq'i'n toj twajxaqi'n ab'q'i nkawin;³⁰atzun junk'al wuqlajnaq jwe' (745) aj Juda extiq'i'n Neb'usaradan toj junaq oxe' (23) ab'q'i nkawin, japuntzun kyajlaltz toj junlajk'al lajnaq (4,600) xjal eb'je'xq'i'n. Tzaqpet Joakyin ex tk'am toklen toj B'ab'ilon (2 R 25.27-30)

³¹Tojtzun junaq jwe' (25) tajlal tkab'lajoji'n xjaw te junaq wuqlajoj (37) ab'q'i texlen q'i'n nimaqkawil Joakyin toj Juda, tzyet tkawin nimaqkawil Eb'il-merodak toj B'ab'ilon, majx b'a'n xjal oka' te Joakyin ex etztiq'i'n toj kars,³²b'a'n tb'inchate ex xitq'o'n toklen kyb'aju' txqantl nimaqkawil ate'toq tuk'i'l B'ab'ilon.³³Ikytzu'n b'enta' tel tiq'i'n Joakyin t-xb'alun ntoq ajb'en tu'n toj kars, ex wan tk'etzju' nimaqkawil toju' jni'tl tchwinqlal.³⁴Expe' tk'am Joakyin jun pwaq toj tkyaqilju' jni'tl tchwinqlal, tzmax tkyim, teju' nimaqkawil toj B'ab'ilon.

Bible Society in Guatemala

https://app.library.bible/content/aea9d9099feb3a24