Read Eclesiastés 1

Eclesiastés1

Tkyaqil Naqx toqwitz nok

¹Tej tten jun tk'wal Dab'i te nimaqkawil toj Jerusalen, ojtzqi'nxi'xtoq tu'nju' nim tnab'l, aye' junjun yol ja'lu e'tma.

²¡Tkyaqil naqgan! ¡Naqxgan, mixti'x tajb'en!³¿Titi' ntkanb'a'nju' xjal tu'n tkyaqilju' ntaq'una'n twitz tx'otx'?⁴Nche itz'ji junjun, nche kyim junjuntl, atzunte tx'otx' kukx ttenju'.⁵In jawu'lu' q'ij, ex innex, innanj junmajtlti'j tojxju' tb'e tu'n tjawu'l junmajtl.⁶Njub'in kyq'iq' toj tnayajkya'j inanjtz jumajtlti'j toj tb'a'nq'ob'kya'j. ¡Insutyanju' kyq'iq', insutyan! ¡Insutyan ex nnanj jumajtlti'j!⁷Kykyaqilju' nin a' nche pon toj ninnjab', atzunte' ninnjab' mixti'x innoj; axtzuntzu' nnanja' kyi'ju' nin a' janche jatza' anq'in tu'n kyb'et jumajtl tojxju' kyb'e.⁸Mixti'x jun tu'me'l tu'n tq'met b'ajx qgan tu'n tkyaqilju' ti'xti' lu; mixti'x nqe tk'u'ju' qwitz tu'nju' ntka'yi'n exju' qẍkyin tu'nju' ntb'i'n.⁹Mixti'te jun ti'xti' ktenb'el qa min ten ojtxi' mixti'te jun ti'xti' kb'inchetil qa min b'ent ojtxi'. ¡Mixti'te jun ti'xti' ak'a'jwit twitzju' tx'otx'!

¹⁰Kukx kymantekye xjalju': ¡Ak'a'jtzunte' lu!, chechij. Extzun oje tente' ojtxi' kyeqwitz.¹¹Oje b'jik'kyna'lju' ti'xti' ojtxi', ikyqe'xtzun ti'xti'ju' che ul k'ik'el kyna'l kyu'nju' che itz'jel yajxi'tel. Twitzlalil tu'n Pakb'al

¹²Ayine' pakb'al, inten te nimaqkawil kye aj Isarael toj Jerusalen,¹³oknxon nk'u'je' tu'n kyb'aj nka'yi'ne' tkyaqilju' nb'aj twitz tx'otx' tu'n kykane tuk'i'l nab'l. ¡Jun nin iqtzte' oje tzaj tq'o'n Qman Dyos kyib'aju' xjal tu'n lalun jaw kynima'n kyib'!¹⁴Eltzun nnik'tze' qa naqx toqwitzte' nnok tu'n tkyaqilju' nb'inchet twitz tx'otx', ikte' kse'n qajb'il tu'n qxi' knolte kyq'iq'.

¹⁵¡Layx b'ent ttzinsetju' ch'okti'j, ex lay b'ent tokju' mixti'x toj tajlal!

¹⁶Nmatzuntze' wib'xwib'e': Inchin okq'o'ne' te jun nimaqxjal, atixi'x tnab'l kyekywitz kykyaqilju' txqantl nimaqkawil e'kawin nejtl nwitze' toj Jerusalen; majx q'o'n wib'e' tu'n tel nnik'e' b'a'nxi'x ti'ju' nab'l ex ti'j ojtzqib'l, ex ti'ju' ti'xti' myab'a'n ex xnakyil, naqx tu'n tel nnik'e' qa ikxju' kse'n qajb'il tu'n qxi' knolte kyq'iq', nchije'.¹⁸Axxi'x, qa nim qnab'l, ex nim yajb'il qe; qa nimxi'xju' b'i'n qu'n, inqo yajtixi'xtl.

¹Ex nmaye' wib'xwib'e': Ja'lo k'ik'elnwitze' toju' tzalajb'il; chin anq'ile' b'a'n, nchije'. ¡Ex ikxte' lu naqx toqwitz nnok!²Eltzun nnik'tze' qa naq nnok toj qwi' kse'n aj qtze'n exqa mixti'x tajb'enju' achb'il.

³Waq'wib'e' tu'n tik' nwitze' ti'ju' tzalajb'il tu'n b'in, ẍaqlu'n qine' tu'n nab'l, naqx tu'n tel nnik'e' qa a b'a'nju' teju' xjal toju' jte' q'ij tchwinqlal twitz tx'otx'o.

⁴Eb'aj nb'incha'ne' nimaq aq'untl; eb'jaw nb'incha'n njaye' te kawb'il; ex ten wawale' ub'a.⁵Ok wawale' toju' wawb'ile' ex toju' ntx'otx'e', e'okwawa'ne' chukchaq tqan lob'j.⁶Eb'ajkub' nb'incha'ne' nimaq tkb'el a' tu'n kya'litju' tze b'jo'k wawa'ne';⁷e'nloq' nmajine' ichan ex qya, ex e'ten nmajine' itz'jniqe' tojx njaye'; ex nimxi'x txqan nwakyixe' ex nrite' ten kyekwitzju' e'ten nejtl nwitze' toj Jerusalen.⁸B'aj nchmo'n txqan nq'anpwaqe' ex nsaqpwaqe', nk'uwene' kyetoq txqantl nimaqkawil ex kye junxi'tl tx'otx'. E'tzun ichan ex qya ajb'itzalqe' eb'aj ten, in achune' kyuk'i'l xjal ex txqan nqyaye' ten.

⁹In okye' te jun nimaqxjal, nimxi'x txqan ti'xti' ten weye' kyekywitzju' e'ten nejtl nwitze' toj Jerusalen. Expe' kukxtoq tten nnab'lju'ye'.¹⁰Mixti' jumaj kub'wit nẍk'u'ẍi'n wib'e'; mixti' jumaj njuk'witwib'e' ti'j juntl tzalajb'il. Ojexi'x intzalaje' tu'n tkyaqil nk'u'je' toju' waq'une', ex o'kxte nkanb'aju'ye' tzalajb'il lu.

¹¹Nkub'tentzuntze' ximalte tkyaqilju' waq'unb'ene' nim tq'ijlalil xi' kyi'j tu'n kyb'aj b'ent, ex kane toj nwitze' qa tkyaqil ja'lu mixti'x ttx'o'lajil, ikxju' kse'n qajb'il tu'n qxi' tzyulte kyq'iq', mixti'x tajb'en twitzju' tx'otx' lu.

¹²Nkub'tentzuntze' ximal tib'aju' nab'l ex tib'aju' xnakyil: ¿Ti'xi'xtzunlo ktb'inch'a'tlju' nimaqkqwil tzul wi'jxi'ye', qa mya axju' matxi' b'inchet nejtl?¹³Ex el nniky'e' ti'j qa atixi'x tajb'enju' nab'l kyetwitz xnakyil, kse'n spik'un atixi'x tajb'en kyetwitz qxopin.¹⁴Inxitka'yi'n te' xjal ati tnab'l b'a'nxi'x, atzu'n xnak nttakla'ntib' toj qxopin. Matxitzun tz'el nnik'e' ti'j qa qkyaqil junx qopomela' b'aj,¹⁵kunxima'ntzuntze': Ax kb'ajelju' wi'je', kse'nx kb'ajel ti'ju' xnak, mixti'xte' tajb'en txqan nnab'le'. ¡Ex mixti'xte' lu ttx'o'lajil!¹⁶Qu'n mixi'xlo ktzajela' na'nju' ati tnab'l exju' mixti'x tnab'l; qu'n tkyaqil inik'tna'l aj tb'etq'ij, kkyimelju' ati tnab'l exju' mixti' tnab'l.

¹⁷Elpe' wik'o'ne' chwinqlal, qu'n tkyaqilju' nb'inchet twitzju' tx'otx' ok te jun myab'a'n weye'. Axxi'x, tkyaqil ja'lu mixti'x ttx'o'lajil, ¡ikxi'xte' kse'n qajb'il tu'n qxi' knolte kyq'iq'!¹⁸Ex elwik'o'ne' tkyaqil aq'untl ojetoq che nb'inchaye' twitzju' tx'otx', qu'n tkyaqil ati tu'n tkyejten teju' nxele' k'okyel.¹⁹Ex b'i'nxi'xtoq wu'ne' qa aju' xjal kjelten te nxele', b'a'ntzun ati tnab'l mujqa mixti', ilti'j kjelten tib'aj tkyaqilju' waq'unb'ene' maxi'x nb'inchaye' tuk'i'l nab'l twitz tx'otx'. ¡Expe' mixti'x ttx'o'lajil ja'lu!

²⁰Tetzunj nka'yinteju'ye' waq'unb'ene' matxi'toq che nb'inchaye' twitzju' tx'otx', ul toj nk'u'je' tu'nju' nim ẍin aq'unane',²¹qu'n atite xjal nnaq'unan tuk'i'l nab'l, ojtzqib'l ex twitzlalil, naqx tu'n tkyaj tq'o'nju' taq'unb'en te juntl min xsikti tu'n tten te. ¡Mixti'x ttx'o'lajil ja'lu ex mixya tnik'alilti'j!

²²Ikytzu'n, ¿titi' tajb'en teju' xjal tu'nju' inxi'x elb'aj tu'n taq'unan ex inxi'x b'ajx tk'u'j twitzju' tx'otx'?²³Tkyaqilju' tq'ijlalil tchwinqlal yajte'n, jun nin iqtzxi'x; mixpeti'x nnojlanju' tnab'l te qonik'an. ¡Ex mixti'x ttx'o'lajil ja'lu!

²⁴Ate b'a'nju' tu'n tb'inchante xjal tu'n twan ex tu'n tk'wan, ex tu'n ttzalaj tu'nju' twitz taq'unb'en, qu'n matxi' tz'el nnik'e' ti'j qa axte Qman Dyos kyej q'onte ja'lu.²⁵Qu'n, ¿alxi'xkye jaku' wan, mujqa tu'n ttzalaj qa mya tu'nx?²⁶Qu'n intzaj tq'o'nte Qman Dyos nab'l, ojtzqib'l ex tzalajb'il teju' xjal b'a'ntel twitz; atzu'n teju' b'inchal il ntq'o'n anb'il tu'n tjaw b'ent ex tu'n tchmet tk'uwen, tu'n txi' tq'o'ntl teju' b'a'ntel twitz. ¡Mixti'x ttx'o'lajil ja'lu ex ikx nnela'ju' kse'n qajb'il tu'n qxi' knolte kyq'iq'! Tkyaqil ati kmuj te

¹Tkyaqil ati tq'ijlalil twitzju' tx'otx'; ati jun kmuj te tkyaqilju' nb'aji:

²Maqo itz'ji ja'lo, najchi'j qokyim. nqo awan ja'lo, najchi'j jaw qb'uyi'n twitz qawal.³Nche kub' b'yo'n xjal ja'lo, najchi'j che q'ananjtz. Nkub' qxitu'n ja'lo, najchi'j jaw qb'incha'n.⁴Nqo oq' ja'lo, najchi'j qo tze'n. Nqo b'isun ja'lo najchi'j qo b'ixin.⁵Nche'x qchitu'n ab'j ja'lo, najchi'j che jaw qb'uyi'n. Nqo chlenqib' ja'lo, najchi'j kub' qpa'nqib'.⁶Nqo jyon ja'lo, najchi'j txi' qtzaqpi'n, Nb'ajx qk'u'n ja'lo, najchi'j b'ajx qxon.⁷Nkub' qlaqu'n ja'lo, najchi'j kub' qtzo'n. Numliqo' ja'lo, najchi'j qo yolin.⁸Nqk'u'jla'nqib' ja'lo, najchi'j tz'el qik'o'n qib'. Nqo q'ojin ja'lo, najchi'j toj nak'b'il ta'qo'.

⁹¿Titi' tajb'en teju' xjal tu'nju' nxi'x elb'aj tu'n taq'unan?¹⁰Inel nnik'e' ti'ju' aq'untl kyej tq'o'n Qman Dyos kyeju' xjal tu'n kyyajti tu'n.¹¹Tkyaqil kub' tb'incha'n Qman Dyos tb'anilxi'x, ex tojku'xi'x tq'ijlalil; kub' tq'o'n toj tnab'lu' xjal tu'n teltnik' ti'ju' tq'ijlalil tejumajx, extzun min npon kanunju' xjal tu'n teltnik' ti'j tkyaqilju' matxi' tb'incha Dyos exju' ktb'incha'.

¹²Awe' b'i'n wu'n qa a b'a'n tu'n tb'inchanteju' xjal, tu'n ttzalaj ex tu'n tachunteju' tchwinqlal,¹³qu'n qa nqo wan ex nqo k'wan, exqa nqnik'b'e'n twitzlalilju' qaq'unb'en, ate Qman Dyos saj q'onte qe.¹⁴Ex b'i'n wu'ne' qa tkyaqilju' matxi' tb'incha Qman Dyos ktenb'el tejumajx. Mixti'te tu'n toktz'aqtzet ex tu'n tel iq'et; aku' Qman Dyos kub' b'inchante, tu'ntzun kynimanju' xjal twitz.¹⁵Mixti' jun ti'xti' ati ja'lo miwtjunti' ojtxi', ex mixti' jun ti'xti' kb'entel na'mxwit tten. Ate Qman Dyos nb'inchante tu'n tb'aji ja'lo kse'n b'aj ojtxi'. Mya tnik'alilti'j nb'aj toju' chwinqlal

¹⁶Matxi' wile' twitzju' tx'otx', nim sb'ujtib'il ex nim il ati, awtlote atiju' tnik'alilti'j ex ttxolilti'j.¹⁷Qu'mtzun kub' nxima'ne' qa che okyelju' tnik'alkyi'j exqe' b'inchal myab'a'n toj xjel tu'n Qman Dyos, qu'n atiyile junjun kmuj te tkyaqilju' nb'aji ex te tkyaqilju' nb'inchet.

¹⁸Ex kub' nxima'ne' ti'ju' tu'me'l nb'eta' xjal, qa nche kub' tq'o'n Qman Dyos toj joyb'ilkyi'j tu'n telkynik' qa ikqe'xju' kse'nqe' txkup.¹⁹Axxi'x, axche ik'ela' xjalju' kse'nkye txkup: nche kyimju' xjal ex nche kyimu' txkup, ex axte kyxewju' tu'n kyanq'in kykyaqil. Mixti'te juntl ti'xti' atiwt teju' xjal kyekywitzju' txkup: tkyaqil ja'lu mixti'x ttx'o'lajil,²⁰ex junx che pomela' b'aj kykyaqil; kykyaqil e'kub' b'incha'n ti'j tx'otx' ex kykyaqil k'anjetlkyi'j toj tx'otx'.²¹¿Alxi'xkye kq'malte qa axxi'x njapunju' kyxew xjal toj kya'j, atzu'n kyxew txkup xi' nxa' t-xexi' tx'otx'?²²Matxi' wile' qa mixti' juntl ti'xti' b'a'nxi'x teju' xjal kyetwitz tu'n tnik'b'enteju' twitz taq'unb'en, qu'n a saja' q'o'na'ju', mixna' a'lo'xte ktzajel iq'inte junmajtl ka'yilteju' kb'ajel tkyimlenxi'.

¹Inximatzuntze' ti'ju' yajb'il nb'inchanjtz twitz tx'otx'. E'wilju'ye' xjal nche yajlanjtz intoq che oq' ex mix-a'lo' nq'uqb'ante kyk'u'j; inxi'xtoq che yajlanjtz kyu'nju' yajlalkye ex mix-a'lo' nklonkye.²Qu'mtzun elnnik'e' ti'j qa tzalajb'ilxi'x kyeju' oje che kyim kyekywitzju' itz'qe'x;³b'a'nxi'xpena' ta'qe'ju' namx kyitz'ji kyekywitzju' kab'e' tnej lu, qu'n na'mx tik' kywitz ti'ju' il nb'inchanjtz twitzju' tx'otx'.

⁴Ex matz'el nnik'e' ti'j, qa nnoktilil tu'n qaq'unan exqa b'a'n inela'ju' qaq'un, njaw tx'a'lti'j tk'u'j jun xjal ti'j juntl tu'n tpaj, ex ikxjalu mixti'x ttx'o'lajil, ikxu' kse'n qajb'il tu'n qxi' knolte kyq'iq'.

⁵Inkyma'n xjal kjalu: Naq chle'n tq'ob'ju' xjal mixti' tnab'l ex ax nkub' tb'o'ljsa'n tib', chechij.⁶Atzu'n nchiwe': Ate b'a'n naq jun jtoj tuk'i'l ojlab'l kyetwitz kab'e' jtoj nim sikte'n ti'j, naqx tu'n qxi' knolte kyq'iq'.

⁷Tej txi' nmiltz'u'n nwitze' toj jun plajtl, wile' juntl ti'xti' mixti'x ttx'o'lajil twitzju' tx'otx':⁸jun xjal naq tjunal, mixti'qe' tamiw, mixti' tk'wal, mixti'qe' titz'in, ex mixti'x nnojlan ch'i'n ex miẍti'x nqjen tu'n tchmon tq'inumal, ex mixti' nkub'ten ximalte alqe nnaq'unana' ex tiqu'n nkub'a' t-xk'a'yina'tib' ti'ju' ati te. Ex mixti'x ttx'o'lajil ja'lu ex jun iqtz alxi'x. Nten qipumal qa mujli qten

⁹Ate b'a'nju' kab'e' qb'aj kyetwitz qjunal, qu'n inka'yin ch'i'ntl twitzju' qaq'unb'en.¹⁰Qatzun makub' tz'aq junkye, aju' juntl kjawil wab'ante. ¡Atzu'n xjal tjunal, qab'anx twitz qu'n qama kub' tz'aq, mix-a'lo' kajwil wab'ante!¹¹Expe' qama che ktan kab'e' junx, che maq'tel kykab'ilx; qatzun naq jun, ¡lay maq'ti!¹²Qa naq tjunal jun ati lwiy kb'elti'j, qatzun kab'e' kyb'aj lay kub'kyi'j. Expe' ky'jaj te oxe' twitz lay laqnaj. Mya o'kxtzu' ta'te' nab'l tuk'i'lju' matxi' tzaj tab'q'i

¹³Toj juntl tu'me'l, ate nim toklenju' ku'xun prow ati tnab'l kyetwitzju' nimaqkawil matxi' tijin ex mixti' tnab'l, qu'n min ntk'mo'ntl nab'l.¹⁴Maskyepe' akxtoq tetzju' ku'xun toj kars ajtok te t-xelju' nimaqkawil matxi' tzaj twinqil, mujqa toj prowil setza' xpon toj kawb'il, matxi' tz'el nniky'e' kyi'ju' xjal nche onin tuk'i'l.¹⁶Ex b'a'nqa tnamju' xjal jakkawila', lay che tzalaj ti'j, exqe' kyyajajil che ul yajxi'tel. Ex mixti'x ttx'o'lajil ja'lu, ikxi'xte' kse'n qajb'il tu'n qxi' knolte kyq'iq'. Ati tu'n tjapun qyol nxiqtziya'n twitz Dyos

¹Aj txi'ya toj tja Dyos, ka'yinxa tu'me'l: lq'eka ex b'ina tu'n tkyaqil tk'u'ja te Dyos, kyetwitz tu'n tkub' tq'o'n chojb'ila kse'n nkyb'incha'n xjal mixti' kynab'lju' min nnel kynik' qa ilu' nkyb'incha'n.

²Lalun txi'naj ttziya'n jun tyola tu'n ttziya mujqa tu'n tnab'la te Qman Dyos, qu'n toj kya'j ta'te Qman Dyos, atzunta twitz tx'otx'. Qu'mtzun o'kxte q'manxju'ya aju' kb'entel tu'na,³qu'n qa nqo ximan nim inokok toj qwitz, exqa nim nqo yolin ati maj myab'a'ntlju' qyol nxiqma'n.

⁴Ajttziyante jun tyola twitz Qman Dyos, lwiyxi'x japun tu'na, qu'n min ntzalaj kyi'ju' mixti' kynab'l. Japunx tu'na aju' oje tmaya,⁵qu'n ate b'a'nju' min nxiqtziya'n kyetwitz nqtziya'n extzu'n lay japun qu'n.

⁶Lalun taja tu'n tb'inchan ila tu'n ttziya, qu'n jaku' tmatla twitzju' t-sanjelal Qman Dyos qa naq xtzpeta ti'j tyola. ¿Tiqu'n k'okyela' tq'o'na ttx'u'jil Qman Dyos tu'nju' kxel ttziya'na naq tu'n tkub' t-xitu'nju' matxi' b'ent tu'na?⁷Qu'mtzun, tu'nju' nim txqan ti'xti' inokok toj twitza ex nim txqan tyola ex milchaqx ti'xti' mixti' kynab'l, ati tu'n tnimana twitz Qman Dyos. Mixti'xte b'a'n toju' Chwinqlal

⁸Lalun jaw lab'tiya qama tila nche yajlanjtzju' prow toj jun tnam exqa min nb'inchanjtz tnik'alilti'j ex min nnimajtzju' kyoklen, qu'n jun xjal nim toklen toj kawb'il inkub' jpu'n til tu'n juntl nimxi'x toklen, e'tzun txqantl nimxi'xtl kyoklen nche kub'jpu'nte kyilju' kab'e' lu.⁹¡Inq'manjtztzuntz ti'j ja'lu qa xi'tch'iyju' tnam exqa nnajb'enju' nimaqkawil toj kojb'il!

¹⁰Aju' xjal majx tok tk'u'j ti'j pwaq, mixti'x nqe tk'u'j; aju' majx tok tk'u'j ti'j q'inumal, naq ch'i'nte' ati te toj twitz. Ex ikx mixti'x ttx'o'lajil ja'lu,¹¹qu'n qa nimxi'x ati, ex nimxi'xtl nnajset. ¿Ti'tzu'n k'ajb'ela' tu'n tten txqan q'inumal, ti'jxi'tlju' ati qe?¹²Aju' nnaq'unan, b'a'ntzun qa nwan b'a'nxi'x mujqa min, inwtan b'a'nxi'x, atzu'n q'inun min nnok twatl tu'n tpaju' tq'inumal.

¹³Matxi' wile' jun ti'xti' majx b'isb'ajilxi'x twitzju' tx'otx' lu: qa nimxi'xju' q'inumal, myab'a'n nnela' teju' tajaw,¹⁴qama tzaj jun k'aẍjel twitz kub'l, kb'elb'aju' q'inumal, extzunqa ati jun tk'wal, mixti'tlte kjel tq'o'n te.¹⁵Ikxtzu'n kse'n tej tul twitzju' tx'otx', ikxtzu'n k'anjela' ti'j: naq chle'n tq'ob' kse'nx itz'ja', ex mixti'xte' kxe'l tiq'i'n ti'ju' taq'unb'en.¹⁶Axxi'x b'isb'ajilx te'lu: ikxju' kse'n ula' twitz tx'otx', ikxtzun k'anjela'ju'. ¿Ti'tzun xtkanb'a tu'n txqan taq'un xtb'incha mixti'tl tz'oka'?.¹⁷Noqwittzun o'kxju', toj qlolj xtena' toj tkyaqil tchwinqlal, toj yajb'il, k'ixk'oj ex ma ku'x tq'o'n q'oj toj tk'u'j.

¹⁸Matxi' tz'el nnik'e' ti'j ate b'a'nju' ex tzalajb'ilxi'x tu'n qwan ex tu'n qk'wan, tu'n qnik'b'ente twitzlalilju' qaq'un inxi'x qo'elb'aj tu'n tb'inchet toju' jte' q'ij qchwinqlal ntzaj tq'o'n Qman Dyos, qu'n ana' xqo tzaja' q'o'na'ju'.¹⁹Toj juntl tu'me'l, kykyaqilju' xjal ntzaj tq'o'n Qman Dyos txqan kyq'inumal, ex ntzaj tq'o'n anb'il kye tu'n kynik'b'ente, qu'n ana' tzaj tq'o'n Qman Dyos kye tu'n kynik'b'ente txqan kyaq'unb'en.²⁰Ina' tzaj tq'o'n Qman Dyos tzalajb'il toj kyanmi, min nb'ajxtl kyk'u'j ti'ju' tq'ijlalil kychwinqlal.

¹Atix juntl ti'xti' matxi' tz'el nnik'e' ti'j nb'aj kyxol xjal twitzju' tx'otx' lu:²intzaj tq'o'n Qman Dyos txqan kyq'inumal ex ninb'ilkye junjun xjal, ex majx atiyileju' ti'xti' kye aju' npon kyk'u'j ti'j; extzun min q'o'n kye tu'n kynik'b'ente tkyaqil, junxi'qe'tlkye' nche nik'b'elte. ¡Ex mixti'x ttx'o'lajil ja'lu ex b'isb'ajilx!³Jaku' ten jo'naq tk'wal jun xjal ex jaku' tz'anq'in b'a'npun ab'q'i; naqtzun aju' maskye maten nimtoj, qa min xtzalaj toju' b'a'n, expe' qa min xku'x mqu'n; ape'te b'a'n jun k'wal noq e'la'n kyetwitzju' xjal lu.⁴Maskye naq xkub'naju' k'wal lu toj qxopin ja kjela' naja' tb'i,⁵b'a'ntzun qa min xtilju' q'ij ex mixti'xte sok tb'i'n, maspe' matz'ojlan twitzju' xjal lu,⁶b'a'npe'wtlo qa matz'anq'in jo'k'al (2,000) ab'q'i, qa min xtnik'b'eju' ati te. ¡Junxna' qo pomela'te' qkyaqil!

⁷Inxi'x oktilil tu'n taq'unanju' xjal tu'n twan, extzun mixti'x nqe tk'u'j.⁸¿Ti'xi'xtzu'n ati teju' xjal ati tnab'lju' mixti' teju' mixti' tnab'l, qa myaju' tojtzqib'l tu'n tb'ent tanq'in?

⁹Ate b'a'nju' nnok qka'yi'n kyetwitzju' naq nkub' qxima'n. Expe' ikx mixti'x ttx'o'lajil ja'lu, ikxju' kse'n qajb'il tu'n qxi' knolte kyq'iq'.¹⁰Aju' ati ja'lo, ojtxi'ku' toklen q'o'n tb'i, ex b'i'n alkye. Mix-a'lo' jun kb'entel tq'ojin tuk'i'lju' nimxi'x tipumal.¹¹Qa jun xjal nim nyolin, nim txqan tyol mixti'x tajb'en; ex mixti'xte nkanb'et tu'n ja'lu.¹²Qu'mtzun mix-a'lo'xte b'ilte alkyexi'xju' b'a'n teju' xjal toju' jte' q'ij tchwinqlal naqx tal witzik' twitzju' tx'otx'. K'ik'elju' jte' q'ij tchwinqlal naku'j leku'n, ¿alxi'xkye kpomel q'malte te titi' kb'ajel twitzju' tx'otx' tkyimlenxi'? Aju' nimxi'x toklen tu'n t-xib'inchet¹Ate b'a'nju' b'a'n qyolinjtz kyetwitz tb'anil k'ok'sb'il.
Ate q'iju' b'a'n aj qkyim kyetwitzju' q'ij aj qitz'ji.

²Ate b'a'nju' tu'n qxi' muqul kyetwitz tu'n qxi' tzalajeb'el; kykyaqil nakye' xjal nche kyim, na'nwtlote' tu'n kyk'u'ju' itz'qe'.

³A b'a'nju' tu'n qoq' kyetwitz tu'n qtze'n, b'a'ntzun myab'a'n tka'yinku' qwitz atzu'n te qanmi b'a'n nnela'.

⁴Inximante' xjal ati tnab'l ti'ju' kamik, atzu'n xjal mixti' tnab'l o'kxtzu' nximana' tu'n txi' tzalajeb'el.

⁵Ate b'a'nju' tu'n txiqb'i'n tzak'b'il kyu'n ati kynab'l kyetwitz tu'n qjaw nima'n kyu'n xjal mixti' kynab'l.

⁶Ikytq'ojq'ojel kytze' xjalju' mixti' kynab'l kse'n ch'i'x nspoq'ob'ti toj q'aq', ex ikx mixti'x ttx'o'lajil ja'lu.

⁷In okju' q'oj te takpuje'n teju' xjal ati tnab'l, ex tu'nju' pwaq nk'met ti'j myab'a'n nkub'a' b'o'lju' tchwinqlal.

⁸Ate b'a'nju' tu'n tpon b'aj ttxa'n jun qaq'un kyetwitz tu'n ttzyet.
Ate b'a'nju' ati qpasens kyetwitz nqnima'n qib'.

⁹Lalun naq tx'u'jina, qu'n ate xjalju' mixti' tnab'l naq ntx'u'jin.¹⁰Lalun t-xjelu'ya tiqu'n majx b'a'nju' tq'ijlalil ojtxi' kyetwitz ja'lo, mya tuk'i'l nab'lte' xjel lu.

¹¹Tb'anilxi'xte' ojtzqib'l ex nim tajb'en kyeju' nche anq'in twitz tx'otx', qa mujli tuk'i'l jun etzb'il.¹²Qu'n inqotklo'n nab'l kse'n pwaq, naqtzun ate' nab'l atixi'x tajb'en qu'n ntq'o'n tchwinqlalju' xjal ati tnab'l.

¹³Ximanxpe'ju'ya taq'un Qman Dyos matxi' tb'incha: ¿alxi'xkye jun kb'antel tz'anjtz tz'umante ti'ju' kyejni tch'okyi'n?¹⁴Qa b'a'n tela, tzalajxa toju' b'a'n lu; qatzun myab'a'n tela, ximanku'ya qa tu'nile Dyos tkyaqilju' tu'me'l lu, ex min b'i'n tu'nte' xjal titi' tzul ti'j yajxi'tel.

¹⁵Tkyaqil ja'lu matxi' wile' toju' tq'ijlalil nchwinqlale', naqxtojqwitz nnok: inche kyimju' b'a'n xjal extzun b'a'n wnaqqe', ate'tzuntl xjal myab'a'n kyb'inchb'aj nche anq'in nimtoj.

¹⁶Lalun tz'oka b'a'nxjalile, ex lalun tyek'uxi'x tnab'la. ¡Titi' ktyaju'ya'xi'x tib'a!

¹⁷Lalun tz'oka txkupxi'x, ex lalun naq tyo'ka. ¡Qu'n jaku' tz'el tchwinqlala lwiy!

¹⁸Ate b'a'n tu'n qtzyunte ja'lu b'a'nxi'x ex mixti' tu'n txi' qtzaqpi'nju' juntl.
Alkyete nniman te Qman Dyos k'elel b'a'n toj tkyaqil ja'lu.

¹⁹Nimxi'x tipumalju' ati tnab'l tu'n nab'l, kyekywitz lajoj kawil toju' nintnam.

²⁰Mixna' a'lo'te jun xjal twitz tx'otx' majxwit tz'aqli, o'kxwitju' b'a'n ntb'incha'n exwit min nb'inchan il.

²¹Lalun txitoksla'na tkyaqilju' nq'umli, laytzun tb'i'tza aj tyolinju' tmajina taq'wix ti'ja.²²Expena' ikxta, kanlixi'x twitza, b'a'npun majxi' yolina kyi'j txqantl. Tjyonjtzju' nab'l

²³Ik'nwitze' ti'j tkyaqil ja'lu tuk'i'l nab'l, qu'n kub' nq'o'ne' toj wanmiye' tu'n woke' atixi'x nnab'le'; mixtzunti'x npon kanune' ti'j.²⁴¡Mixti'x nchinpon kanune' kyi'j tkyaqilju' ati! Nimxi'xte' t-xilen. ¿Alxi'xkye kpomel kanun ti'j?

²⁵Oktililtzuntz wu'ne' tu'n tten wojtzqib'le', ex nxnaq'tza wib'e' tu'n tel yalju' nab'l wu'ne'. Eltzun nnik'tze' ti'j qa myab'a'nte' xnakyil, ex tontilte' xtrakyil.

²⁶Matxi' tz'el yal jun ti'xti' wu'ne' kuwxi'x tk'ayil kyetwitz kamik: aju' qya chab'axi'x nkub' twitz ichan tu'n ex nkuttz'u'li'n kyu'n tq'ob'. Alkye nniman te Qman Dyos ktzopajel toj tq'ob', atzu'n aj il kb'eltz'aq toju' t-xpatxab'.

²⁷Tej soktilil wu'ne' tu'n tjyet chik'b'ab'l titiqu'n nb'aja' junjun ti'xti', ayine' pakb'al, el nniky'e' ti'j ikjalu:²⁸¡na'mx tknetju' injyo'ne'! naq junku' ichan matxi' tz'el yal wu'ne' kyxol kab'k'al lajnaq (1,000), atzun mixti'x jun qya kyxol kykyaqil.²⁹O'kxte matxi' tz'el yalju' wu'ne': tz'aqlite' ichan kub' tb'incha'n Qman Dyos, axtzunte nkub' b'o'ljsantetib'.

¹¿Alxi'xkye jun kpomel kse'n ati tnab'l? ¿Alkye ojtzqilte tnab'l junjun ti'xti'? Inspik'e' twitzju' xjal tu'n nab'l; ex ntch'exb'e'n twitzju' xjal tx'u'j. Ninb'ilteju' nimaqkawil

²Japunx tchaq'b'il nimaqkawil tu'na, qu'n ikyxittziya'nju' twitz Qman Dyos.³Lalun tz'etza ojqel twitz. Lalun tz'okx tq'o'ntib'a kyoju' myab'a'n, qu'n jaku' tb'incha ti'xku' tajb'il ti'ja.⁴Ate nimaqkawilju' nchaq'un, ex mixti'x tu'n tchik'b'ante te juntl ti'ju' ntb'incha'n.⁵Alkyete njapun chaq'b'il tu'n, lay tzaj taq'wix ti'j, alkyetzunte ati tnab'l nkane toj twitz jtoj ex se'ntaq'wi tu'n tjapunju' chaq'b'il tu'n.⁶Axxi'x, ati jun kmuj ex jun tu'me'l tu'n kyb'inchet tkyaqilju' ati tu'n kyb'inchet, naqtzun a ch'uẍju' te xjal⁷mixti'x b'i'n tu'n titi' kb'ajel, ex mix-a'lo' jun tu'n tb'ant tmantepun te. Mix-a'lo'te ati toklen tib'aju' chwinqlal ex tib'aju' kamik

⁸Mix-a'lo'kye jun ati toklen tib'aju' chwinqlal, tu'nwt tten tu'n, ex mix-a'lo'kye ati toklen tib'aju' kamik. Mix-a'lo'te kb'entel toq teju' q'oj lu. Lay kletju' b'inchal myab'a'n tu'nju' til.

⁹El nniky'e' ti'j tkyaqil ja'lu tej toknxon nk'u'je' tu'n wojtzqinteju'ye' nb'inchet twitz tx'otx', exju' ntb'incha'n xjal myab'a'n ti'j twnaqil. Ate' ti'xti' mixti'x kytx'o'lajil

¹⁰Ex matxi' wile' inxi'x jaw nima'nju' xjal b'inchal myab'a'n ajt-xi muqb'aj; atzunju' xjal b'a'n tb'inchb'aj, miẍpeti'x ntzaj toju' ttnam. Mixti'xte' lu ttx'o'lajil,¹¹qu'n qa mixti'x xkub' tz'e'yset twitz lwiy tu'nju' il xtb'incha, atzuntzu' nnokxa' ten toj twi' tu'n tb'inchante naqx taq'wix.¹²¡Ikytzu'n nimtoj nnanq'inju' xjal nb'inchan il ex ljo'n tb'inchan il! (Atoqwe' b'i'n wu'n qa b'a'n nche'xa'ju' nche niman te Qman Dyos ex nche k'ulun te;¹³aye'tzu'n b'inchal myab'a'n toj myab'a'n nche'xa' ex nche ik' kse'n leku'n qu'n min nche niman te Qman Dyos.)¹⁴Iktzun nb'ajiju' twitzu' tx'otx', mya tu'me'l nche yajtiju' b'a'n xjal naku'j b'inchal taq'wixqe', aye'tzu'n b'inchal myab'a'n inxi'x che achun ku'xi'xtej b'a'n xjalqe'. ¡Mixya tu'me'lte' ja'lu toj nwitze'!

¹⁵Qu'mtzun a b'a'nju' tzalajb'il toj nwitze'. Ex ate b'a'nju' tu'n tb'inchante xjal twitz tx'otx', aju' tu'n twan, tu'n tk'wan ex tu'n ttzalaj, qu'n o'kxte tu'n tnik'b'enteju' tu'n taq'un ntb'incha'n toju' tchwinqlal ntzaj tq'o'n Qman Dyos twitzju' tx'otx' lu.

¹⁶Tetzunj intoq oktililxi'x wu'ne' tu'n tkane ex tu'n tel nnik'e', ex tu'n nka'yinteye' tkyaqilju' nb'inchet twitzju' tx'otx'. In pon jun kmuj mixti'x nnok qwatl tu'n tpaj,¹⁷apete' el nnik'ju'ye' ti'j qa min nkaneju' ntb'incha'n Qman Dyos toj twitzju' xjal exju' nb'aj twitz tx'otx'. B'a'nqa matz'oktilil tu'n, tu'n tknetu' tzaq'web'l, layx knet tu'n; maskyepe' matmaju' ati tnab'l qa ojtzqi'n tu'n, axxi'x na'mx teltnik' ti'j. Se'nju' Chwinqlal ex se'nju' kamik

¹Matz'oktilil wu'ne' naqx tu'n tel nnik'e' ti'j qa toj tq'ob' Qman Dyos ta' kyaq'un b'a'n xjal ex kyaq'un ati kynab'l. Min b'i'n tu'nte xjal ti'ju' tk'u'jlalil ex ti'ju' ik'jtib'il, b'a'ntzun qa twitzx ta'qe'.²T-ximanjtz b'a'nxi'x, ax che ik'ela' kykyaqil: kyi'j tnik'alkyi'j ex kyi'ju' mya tnik'alkyi'j, kyi'j b'a'n xjal ex kyi'ju' txkup xjal, kyi'j b'a'n kychwinqlal ex kyi'ju' myab'a'n kychwinqlal, kyi'j nkub' kyq'o'n chojb'il ex kyi'j min nche q'on chojb'il; ikx kb'ajelju' kyi'ju' min nche b'inchan il kse'nx kyi'ju' b'inchal il, kyi'ju' nkytziya'n jun kyol ex kyi'ju' min kytziya'n kyol.

³Atzun myab'a'nju' tu'n tkyaqilju' nb'aj twitz tx'otx': tu'n ax che ik'ela'ju' kykyaqil. Expena' nojni tnab'lu' xjal tu'n myab'a'n; inkub'ti'j tnab'l tu'n xnakyil toj tkyaqilju' tchwinqlal; inpon b'ajtzuntz toj muqb'il.

⁴Q'uqlixi'x tk'u'jlalilju' xjal atix tchwinwqlal, qu'n ate b'a'n jun tx'yan itz' kyetwitz jun b'alun kyimni.⁵Exqepe' itz'qe' b'i'n kyu'n qa che kyimel, aye'tzu'n kyimniqe'tl mixti' b'i'n kyu'n ex mixti'xte nkykanb'a'n, qu'n majx nnik' kyna'l.⁶Atzuntzu' nb'aja' kyk'u'jlalil, kyq'oj ex kyxim, ex milo tu'n kyula'tl b'inchal jun ti'xti' twitz tx'otx'.

⁷¡Qu'mtzun, kuwxa! Q'onku'x twaya titk'u'ja; q'onku'x tk'wa'ya b'in titk'u'ja, qu'n b'a'n ẍe ela' taq'una twitz Qman Dyos.⁸Q'onk ti'ja saq kukxju'; ex sunkxa k'ok'sb'il toj twi'ya kukxju'.⁹Tzalajxa atl junjun kmuj tuk'i'lju' t-xu'jila toju' tchwinqlala mixti'x ttx'o'lajil saj tq'o'n Qman Dyos twitz tx'otx'; qu'n o'kxte ktkanb'a'ju'ya tu'n txqan taq'una ntb'incha'na twitz tx'otx'.¹⁰Ex B'inchama tu'n tkyaqil tk'u'ja tkyaqilju' kb'antel tb'inchanteya; qu'n mixti'tlte tu'n tb'inchet toju' muqb'il jakpomela'ya ex mixti'te tu'n t-ximet, mixti'te ojtzqib'l ex nab'l. Mya tnik'alti'ju' nb'aj toju' chwinqlal

¹¹Matxi' wile' junjuntl ti'xti' twitz tx'otx', myaye' kuw che ojqelan nche kanb'an toj jun sqach, ex myaye' kuw che q'ojin nche kanb'ante q'oj; mya o'qe'kxju' ati kynab'l ati kywa, ex mya o'qe'kxju' k'atzkywi' q'inunqe', ex mya o'qe'kxju' xnaq'tza'nqe' b'a'n kyilwi; tkyaqil ja'lu teylex junjun.¹²Toj juntl tu'me'l, mix-a'lo' jun b'ilte jtoj pon q'ij te: kse'nqe' kyiẍ ajkytzyet tu'n tzuyb'ilkye exqe' pich' toj xpatxab', ikxtzunte xjalju', mixti' tnab'en ti'j ajtok takpuj twitz jun ti'xti' myab'a'n.

¹³Ex matxi' wil juntl ti'xti'ye' twitz tx'otx', inok te jun nimaq xnaq'tzb'il weye':¹⁴jun b'o's nintnam, naqjte'x xjal toj, oktzaqpaj jun nimaqkawil kuw q'ojil ti'j, b'aj tmqo'n ti'jile tu'n tkub'ti'j tu'n.¹⁵Ex najli jun xjal prow, extzun ati tnab'l, toju' nintnam, ex b'ent tklonteju' nintnam tu'n tnab'l, ¡ex mix-a'lo'te ntzaj na'nte! A nab'l ati tib'aj tkyaqil ti'xti'

¹⁶Atzu'n nchiwe', ana'te b'a'nju' ati qnab'l kyetwitz kuwqo', maskyepe' min nxib'i'n tnab'lju' xjal prow, ex min nkub'i'nju' tyol.

¹⁷Ate b'a'n tyol jun xjal ati tojtzqib'l chab'a' nb'aj tma'n, kyetwitz tyol jun kynimaqkawil xnak nxi'x ẍalb'i kuw.¹⁸Ate ojtzqib'lju' nim toklen kyekywitz aq'unb'il te q'ojb'il.
Naq tu'n jun ti'xti' myab'a'n sela' intzaja' nim xitb'il.¹Tu'n jun a'jin kyimni nkub' tzu'wixa' tb'anil k'ok'sb'il.
Ikytzu'n, anajte nnokq'o'n toklenju' naq toj twitz xjal nok kyetwitzju' ojtzqib'l nimxi'x toklen.

²Atzu' nximana'te' xjal ati tnab'l ti'ju' b'a'n, atzunte' xnak ti'ju' myab'a'n.

³Toj tkyaqilju' ntb'incha'n xjal xnak, intyek'u'n qa mixti'x tnab'l, maskyepe' intma'n qa mixti'x nche ximanju' txqantl.

⁴Qama tzaj ttx'u'jilju' nkawin ti'ja; lalun tzaj pa'l toj twi'ya, ate q'a'nb'ilju' qa myab'a'n sela' jun ti'xti', tu'n tnk'et chab'a mya tuk'i'l qtx'u'jil.

⁵Oje wile' jun taq'wix nb'inchanjtz twitzju' tx'otx' lu, ex aye'ku' kawil inche b'inchante:⁶aju' xjal min nximan nxiq'o'n jun toklen nimxi'x, aye'tzu'n xjal ati tnab'l naqch'i'n toklen nxiq'o'n.⁷Oje che wile' lq'o'n majin iqa'nqe' tu'n chej, aye'tzu'n kyk'wal nimaqkawil nche b'et tu'n kyqan naku'j tq'o'n majinqe'.

⁸Alkyete ma ku'x tb'incha'n jun jul, axte nku'x tz'aq toj.
Alkyete nlaqun nimaqtapi nnok tx'a'n tu'n kan.

⁹Aju' jsol ab'j, nk'ixb'i tu'n tjosli ab'j.
aju' npa'n toj si, jaku' tz'ok ttx'e'mu'ntib'.

¹⁰Qama b'aj twitzteju' k'uxb'il pab'l toj si exqa min xjqetl twitzte, ati tu'n tokxi'xtl qipumal ti'j. Ate b'a'nju' tu'n qaq'unan b'a'n tuk'i'l nab'l.

¹¹¿Titi' k'ajb'ela' jun xjal nkub' mansix kan tu'n, extzunqa matxi'toq tx'a'nju' kan?

¹²Inche tzalaj xjal ti'j tyolju' xjal ati tnab'l, atzu'n xnak nkub' b'o'lj tu'nxju' tyol:¹³Ajtaq'wi yolil mixti'x ttx'o'lajil tyol, ex nb'aj tyolin kyi'j xlab'yol.¹⁴¡Majx ati txqan tyolju' xjal xnak!
¿Alxi'xkye jaku' q'mante titi' tzul, mixna' a'lo'kyete b'ilte ti' tzul yajxi'tl?

¹⁵Inxi'x tb'yo'ntib'ju' xjal xnak tu'n taq'unan, ex min tojtzqi'n tb'eyilu' nintnam.

¹⁶¡Qab'anx twitzju' tx'otx', k'walju' tnimaqkawil, qa nche sqixinju' tk'wal nimaqkawil tu'n kyten kyoj nimaqwan!

¹⁷¡B'a'nxi'x teju' tnam tok jun tnimaqkawil nimaqxjal, ex nche wanju' kawil toj tojxi'xju' kmuj tu'n kywan, tu'n toktl kyipumal, mya tu'nwt kyaq'wi tx'ojtel!

¹⁸Naq ntyo'nkju' xjal ky'aj ajtku'tz tz'aq twi' tja; naq chle'n tq'ob', naq nka'yin ajtkub' xitju' tja.

¹⁹Kyejni q'o'n qwa tu'n qtzalaj, exju' ta'l ub'a tu'n tku'x qnik'b'e'n toj qchwinqlal; naq a mixti' pwaq te.

²⁰Lalun yolina ti'ju' nimaqkawil naqpe' toj tnab'la.
Lalun yolina taq'wix ti'ju' q'inun, b'a'nqa tjunala toj twitza, qu'n nche lipanju' pich', jaku' che b'ajx q'malte te.¹Chtonxa twaya toj a'; kna' tk'ma'ta tu'me'l t-xel yajxi'tel.

²Aq'punku'ya ati teya kse'nxju' mab'ent tu'na, qu'n min b'i'n tu'na titi' jaku' tzaj tib'aju' tnam.

³Qa jupli muj twitz kya'j, tzul jb'aj twitz tx'otx'.
Qama kub'tz'aq jun tze toj tnayaj q'ij, mujqa toj tb'a'nq'ob'kya'j, axtzuntzu' kjela'ten jama kub'a' tz'aq.

⁴Alkyete matz'okten twitz ti'ju' kyq'iq', lay tz'awan, ex alkyete matz'okten twitz ti'ju' muj, lay jaw tawal.

⁵Ikxtzu'n kse'n min b'i'n tu'na janxa' kyq'iq', ex kse'n nch'iya'ju' ne'ẍ toj t-xmilal ttxu, ex min b'i'n tu'na titi' ntb'incha'n Qman Dyos, ju' b'inchante tkyaqil ti'xti'.

⁶Awanxa tijaja prim ex awanxa te qale', qu'n minti' b'i'n tu'na alkye k'elelb'a'n, qa aju' tnejel awal mujqa aju' tkab', mujqa kykab'il.

⁷Majx tb'anilxi'xju' spik'un, ex b'a'n tu'n qka'yinteju' q'ij tu'n qwitz;⁸naqtzun aju' maskye maqo' anq'in b'a'npun ab'q'i twitz tx'otx' ex maqo' tzalaj toj, na'nku'ya qa nimxi'x tq'ijlalil qxopin tzul ex mixti'x ttx'o'lajil tkyaqilju' tzul. Nab'l kye ku'xun

⁹Tzalajxa ja'lo ku'xun, tzma ku'xunku'ya, tzalajxa toju' b'a'n ja'lo qu'n kb'entel tu'na. B'inchama tkyaqilju' makub' t-xima'na exju' matz'ok tka'yi'na, majxtzun na'nku'ya, jun q'ij k'okyela toj xjel tu'n Qman Dyos ti'j tkyaqil ja'lu.¹⁰Lalun txib'ajtl tk'u'ja ti'ju' ati toj tnab'la ex pa'mil tib'a ti'ju' yajb'il, qu'n ikxpete' tq'ijlalil ku'xumal mixti'x ttx'o'lajil.

¹Na'ntzju'ya ch'isalteya, ku'xunku'ya ja'lo ex na'mxku' toka toju' tq'ijlalil ch'uẍ; tzul tq'ijlalil ja ktma'ya'ya: Mixti'x inchin tzalajwe' toju' nchwinqlale', chiloya.²B'inchama ja'lo, na'mxku' kyupj q'ij, xjaw ex che'w, ex namxku' tanjtztlti'j muj tik'lenxi' jb'al.³Kpomel tq'ijlalil che lu'lulju' xq'uqil ja, ex che b'eltz'umju' ichan kuwqe'xi'x; kche b'aje'lju' cheb'l, ex lay b'ent kychentl; che najel kywitzju' nche ka'yimitz kyoj tokexspik'un,⁴ajtul kanunju' tq'ijlalil lu, che jpetelju' ttzija toj b'e, lay che q'ojq'ojixtlju' cheb'l wab'j; Kukx kyoq'kye pich'ju', atzunta lay che tb'itla;⁵kxob'ela aj tjax b'eta twitz jawl ex xob'ajilx tu'n tb'eta toj b'e.
Kb'el saqax twi'ya, lay tipatla tu'n tb'eta lay tna'tla tk'ok'jal jun ti'xti' ajt-xi' twana. Xi'na' t-xi'te xjal toju' tnajb'il tejumajx, kb'injtzelju' oq'e'n toj b'e ajtkyima.

⁶Na'ntzju'ya b'inchanteya, na'mxku' tlaqju' ky'jaj saqpwaq ex na'mxku' tpaxju' k'wil q'anpwaq; ex na'mxku' tpaxju' xar ttziju' t-xiklil a' ex na'mxku' tkupilju' tul tu'nb'il a' tib'aj xoch.⁷Qu'n ajtzun kyik' ja'lu, k'anjelti'ju' quq toj tx'otx', kse'nxtoq tten nejtl, atzunju' xewb'aj k'anjel jumajtlti'j tk'etz Dyos, qu'n a tzaj q'onte.

⁸Inxinma'n jumajtel, ayine' pakb'al: ¡Mixti'x ttx'o'lajil, mixti'x ttx'o'lajil! ¡Tkyaqil mixti'x tajb'en! Mankb'il yol

⁹Tu'ntzu'n nim tnab'lju' pakb'al ten, nim ojtzqib'l b'axtma'n kyeju' xjal. Ex oktq'o'n tilil tu'n teltnik' kyi'j txqan yol tuk'i'l nab'l ex eb'aj tnk'u'n kse'nxju' kynab'l.¹⁰Oktq'o'n tilil tu'n kyel yal yol atixi'x kyajb'en, ex tu'n kytz'ib'etu' yol ax ttxolilxi'xkyi'j.

¹¹Ikyqe' yolju' kyu'n xjal ati kynab'l kse'n ch'ut, ajtzun kyb'aj b'u'yi'n nk'u'nile kyten ikyqe' kse'nqe' stak awa'nqe' b'a'nxi'x naq tu'n jun k'ik'lel.¹²Nimaq oqxenb'il inetz qu'n kyoj. Layx b'ajte' ttxa'n tu'n kyb'aj tz'ib'et u'j, exqa nim nqxnaq'tza'nqib' inqo' sikti.

¹³Matxi' pon b'aju' pakb'ab'l. Matxi' b'aj chik'b'et tkyaqil. Nimana te Qman Dyos ex che japunxju' tchaq'b'il tu'na, qu'n atzunte xjalju' ati tu'n tb'inchante.¹⁴Qo okyel toj xjel tu'n Qman Dyos ti'j tkyaqilju' qb'inchb'en, qa b'a'n mujqa taq'wix, b'a'ntzun qa toj ewaj xqb'inchaya'.

Bible Society in Guatemala

https://app.library.bible/content/aea9d9099feb3a24