2 Tesalonisenses1
1Ayine' Pawl tuk'i'l Silb'ano ex Timotey, nche'x qq'olb'e'ne' aye'ye' okslalqe'ye' te Qman Dyos ex te Qajaw Jesukrist toj nintnam Tesalonik.2Awt Qman Dyos ex Qajaw Jesukrist tzaj q'onte t-xtalb'il ex tnak'b'il kyeye'. Ktz'e'ysetel kywitz aj il tu'n Krist ajtul3E'ntzik ex e'witz'in, ati tu'n qq'on chjonteye' te Dyos kukxju' kyi'je', tu'me'lte' tu'n qb'inchanteye' qu'n in ch'iy kyokslab'le' ex kyk'u'jlalile' kyi'j txqantl.4Qu'mtzun nqo tzalaje' ajqyoline' kye okslal ti'j Dyos tu'nju' kyipumale' toj kyokslab'le' toj tkyaqil yajb'il kyi'je' ex k'ixk'oj nik'xkyu'ne'.5A yek'b'il ja'lu qa tu'me'lxi'x tu'n Dyos matxi' che oke' toj xjel tu'n ex mataq' anb'il tu'n kyoke' toju' tkawb'il, tu'n tpajtzu'n nche yajtiye' ja'lo.6Tu'me'lte' tu'n ttz'e'ysante Dyos kywitzju' nche yajun kyeye',7ex tu'n tq'onte ojb'il kyeye' junx quk'i'le', aye'ye' nche yajtiye', toju' tq'ijlalil ajtul Qajaw Jesus kyuk'i'l tanjl ati kyipumal, ajttzaj toj kya'j toj tqan taq' q'aq'.8Tzul tz'e'ysalte kywitzju' min nelkynik' te Dyos ex min nkynima'n tpakb'al b'a'n tu'n Qajaw Jesus.9Kb'el ttz'e'ysa'n kywitz tu'n xitb'il tejumajx, ex che b'je'lex q'o'n najchaq ti'j Dyos ex ti'jxi' tajwalil ex tipumal,10toju' tq'ijlalil ajtul Qajaw tu'n tjaw nima'n kxolju' xjan tnam ex tu'n ktzalaj kykyaqilju' okslal ti'j; matxina' kyokslaye' tpakb'al b'a'n xiqpakb'a'ne' kyeye'.11Tu'ntzunju' nqo na'n Dyose' kukxju' kyi'je', nxi' qqani'ne' te Qman Dyos tu'n kyanq'ine' b'a'n twitz se'nx txokb'enkyeye' tu'n, ex tu'n tjapun tkyaqil kyximb'e'tze' b'a'n tu'n tipumal Dyos, ex tu'n kyb'antju' aq'untl nkyb'incha'ne' tu'n kyokslab'le'.12Ikytzu'n kjawil nima'n tb'i Qajaw Jesus kyi'je', ex che jawil nima'ne' tu'n, tu'nju' t-xtalb'il Qman Dyos ex Qajaw Jesukrist. Aju' xjal aj ilxi'x1Atzun ja'lo e'ntzik ex e'witz'in, ajtultl Qajaw Jesukrist ex ajqmujb'ante qib' tuk'i'l, nxiqkub'sa'ne' kyeye'2tu'n lalun kych'exb'enaj kynab'le' ex lalun che jaw sak'puje' qa ati jun maq'mante qama tk'am jun yek'b'il tu'n Xewb'aj Xjan, mujqa matk'am xnaq'tzb'il ku'xwitloj matxi qma'ne' te mujqa toj quje' qa matxi' tzul tq'ijlalil tu'n tul Qajaw.3Lalun kyaq' sb'u'kyib'e'. Nej che q'ojilkye xjal ti'j Dyos, tzulnejte' jun xjal aj ilxi'x, ju' kxe'l toj naje'n.4Atzun ajq'oju' ti'j Dyos ex kyi'ju' nche k'ulun te Dyos, expe' kb'el qe toj tja Dyos ex k'okyel tq'o'ntib' te Dyos.5Kyna'ntze' nyoline' ti'ju' lu kyeye' tej atinxtoqe' kyxole'.6B'i'ntl kyu'ne' ja'lo alkyeju' nmqonte, tu'ntzun lalun tzul na'mxtoq tpon tq'ijlalil.7Ljo'na' tulte' t-xim myab'a'n toj ewaj, naqa sel q'i'nju' mqolte ja'lo.8Oktzun tyek'u'tib' xjaltz aj ilxi'x, ex kb'el b'yo'n tu'n Qajaw, naq kxel t-xupi'n ex k'elel tipumal tu'n t-spik'umal Qajaw ajtul.9Q'o'n tipumalju' xjal aj ilxi'x tu'n tajaw il ajtul; che b'antel techlal ex b'a'nq'ob'aj mya ax tu'n.10Ksb'ul kyu'n tb'inchb'en myab'a'n kyi'ju' xjal che kxe'l toj tz'e'ysb'il witzb'aj, tu'n tpaj min nkyk'mo'n tpakb'al b'a'n axxi'x tu'n kyklet.11Qu'mtzun nche kyej tq'o'n Dyos tu'n kysb'unjtz tu'n b'inchal myab'a'n ex tu'n txi' kyoksla'n chajyolil,12tu'n kyxiq'o'ntzuntz toj tz'e'ysb'il witzb'aj kykyaqilju' min nche okslan teju' tpakb'al b'a'n axxi'x, axtzu' q'uqla' kyk'u'j toju' kyb'inchb'aj myab'a'n. Ojaw t-sk'o'n Dyos tu'n qklet13Ilti'j tu'n qq'onteye' chjonte te Dyos kyi'je' ntzik ex e'witz'in, k'u'jla'n qe'ye' tu'n Qajaw, qu'n mache jaw sk'o'ne' tu'n Dyos tu'ntzun nejtl tu'n kykanb'anteye' kolb'il tu'nel Xewb'aj Xjan nxjansankyeye', ex tu'n kyk'monteye' tpakb'al b'a'n axxi'x matxi' kyokslaye'.14E'txkonjtze' tu'n Dyos toju' tpakb'al b'a'n xiqpakb'a'ne': tu'ntzun tten kyoklene' toju' tajwalil Qajaw Jesukrist.15Qu'mtzun e'ntzik ex e'witz'in, lalun tzik'tna'lju' xnaq'tzb'il xiqq'o'ne' kyeye', ayo'ku'ye' mujqa toj u'j.16Matxi' qotk'u'jla Qajaw Jesukrist ex Qman Dyos, ex matxi' tzaj tq'uqb'a'n qk'u'j tejumajx tu'n t-xtalb'il,17Awt Qajaw ex Qman Dyos kuwsante kyanmiye' ex tz'oninkyeye' tu'n kyb'inchanteye' b'a'n ex tu'n kyoline' b'a'n. Tqani Pawl tu'n kyna'n Dyos ti'j1E'ntzik ex e'witz'in, atzun ja'lo, che na'nqe Dyose' qi'je', tu'ntzun tpon pakb'ab'l tyol Dyos lwiyxi'x toj tkyaqil plaj ex tu'n tk'monjtz toj tzalajb'il, kse'n b'aj tej tpon kyxole'.2Ex che na'nqe' Dyose' qi'je' tu'n qklonjtze' tu'n Dyos kyeju' xjal b'inchal myab'a'n ex pi'sqe', qu'n mya kykyaqil xjal nche okslan te Qajaw.3Atzunte Qajaw njapun tyol, ex a k'onilkyeye' tu'n kywe'ye' toj kyokslab'le' ex che xq'uqinjtzele' tu'n te tajaw il.4Ex q'uqli qk'u'je' ti'j Qajaw qa nkyb'incha'ne' matxi' b'ajx qma'ne' kyeye' ex kyb'incha'ye' kukxju'.5Awt Qajaw tz'oninkyeye' tu'n tten kyk'u'jlalile' kse'n tk'u'jlalil Dyos kyi'je', ex tu'n tq'onjtz kyipumale' tu'n Krist toju' yajb'il kyi'je'. Ilti'j tu'n qaq'unan6E'ntzik ex e'witz'in, kxe'l qma'ne' chaq'b'il kyeye' toj tb'i Qajaw Jesukrist, kypa'mil kyib'e' ti'j alkyexku' okslal min nb'et ex min nanq'in kse'nx matxi' txiqxnaq'tza'ne' kyeye'.7Kanlikye' kywitz se'n tu'n kyanq'ina'ye' tu'n tel kykno'ne' qi'je': min o'tenqe' kyxole' miwtjun o'aq'unane',8ex min o'wane' miwtjun qchoj qwaye'. Ojexi'x pena' o aq'unanqe' q'ijtl ex qonik'an tu'n lalun kub' qq'o'n jun iqtze' kyib'aje'.9Axxi'x atitoqqe' qoklen tu'n txi' qqani'ne' o'nb'ilqeye' kyeye', o'aq'unan tzune' tu'n tkub' qq'o'ne' jun yek'b'il kyeye' tu'n txi' kyb'incha'ne'.10Xiqq'o'ne' chaq'b'il kyeye' tej qtene' kyxole' kjalu: alkyete min tajb'il tu'n taq'unan, ex mixti' tu'n twan.11Matxitzun qb'iye' ate' junjun kyxole' min kyajb'il tu'n kyaq'unan, naq nex kyq'ij ttzi kyja xjal.12Nxiqma'ne' ex nxiqoqxena'ne' kyeju' xjal lu tu'n qoklene' tzaj tq'o'n Qajaw Jesukrist, che aq'unanqe' tu'n kyk'a'chante kyib', tu'ntzun lalun che yajun kye txqantl.13Naq o'kx lalun che siktiye' tu'n kyb'inchanteye' b'a'n, e'ntzik ex e'witz'in.14Qa ati jun min nxitb'i'nju' nxiqma'ne' toju' u'j lu, kyka'yinke' alkye ex lalun kyuk'ilakyib'e' tuk'i'l, tu'n tkub' ch'ixwi.15Naq o'kx lalun tz'ok te kyajq'oje', kyq'onxe' tnab'l kse'n jun qtzik mo qitz'in. Q'olb'eb'l te b'ajsb'il16Axwit Qman Dyos q'ol nak'b'il tzaj q'onte nak'b'il kyeye' toj tkyaqil tq'ijlalil ex toj tkyaqil tu'me'l. Awt Qajaw ten kyuk'i'le' kykyaqile'.17Ayine' Pawl, nxi' ntz'ib'a'ne' q'olb'eb'l lu kyeye' tu'n nq'ob'e'. Ikytzu'n nkub'a' nsqitu'ne' kyi'j kykyaqil wuje'; ikytzun chin tz'ib'a'n ju'ye'.18Awt Qajaw Jesukrist tzaj q'onte t-xtalb'il kyeye' kykyaqile'.
Bible Society in Guatemala