Read 2 Samuel 1

2 Samuel1

Tb'i Dab'i qa kyim Sawul

¹Tkyimlenxi'tzun Sawul, kub'kyi'j aj Amalek tu'n Dab'i. Kyejtzun ten kab'e' q'ij Dab'itz Siklaj.²Tojtzun toxi'n q'ij pon jun xjal te q'oj tzajni kyxolju' t-xjal Sawul matxi'toq b'aj t-ẍilu'nju' ti'j ex txqantoq tx'otx' toj twi' te yek'b'il b'is. Tej tpon twitz Dab'i, kub' meje majx kub'joqe twitz tx'otx' tuk'i'l ninb'il.³Xi'tzun t-xjelu'n Dab'i te:
—¿Jasaja'ya?, chij.
—Ma chintzaj oqe' toju' kyxmuj aj Israel te q'oj, chiju' ichan xittzaq'we'n.

⁴—¿Titi'tzu'n xb'ajkyeye'? ¡B'inchama xtalb'il, q'mantza!, chi Dab'i okten qanilte.
Xi'tzun tma'nju' ichan:
—Mache kub' oqju' xjal ate'toq toju' q'oj, ex nimqe'ju' matxi' che b'aj. ¡Matxi' pena' b'aj Sawul tuk'i'l Jonatan ju' tk'wal!, chij.

⁵—¿Jatzun xtb'iya'ya qa matxi' b'aj Sawul ex Jonatan ju' tk'wal?, chi Dab'i xitqani'n te.⁶Xitzun ttzaq'we'nju' ichan:
—Atinqintoqku'ye' twi' witz Kyilb'oa, tej xxi' nka'yi'ne' Sawul lutx'loktoq ti'ju' tch'ut, ex wile' ch'inxtoq tkub'ti'j kyu'n tajq'oj ate'kx ti'j chej ex kyoj karwaj.⁷Texjtzunju' kmuj sanjtz ka'yin ti'jxi', tetzunj ẍin tile', ẍinx ttxko'ntzuntze'. Ku, nchije' ẍinxe' tk'etz.⁸Saj tqani'ntzuntz alkyeqintoqe', xxi' nma'tzuntze' qa aj Amalek qine'.⁹Saj tma'ntzuntz tu'n nponxi'xtle' tk'etz ex tu'n tkub' nb'yo'ne' jun elx, qu'n matxitoq tz'ok toj k'ixk'oj extzun itz'xtoq.¹⁰Qu'mtzun ẍinpon lq'eye' tk'etz ex makub' nb'yo'ne', qu'n makane toj nwitze' qa laytoq b'entl tanq'in tkub'lenxi' ti'j. Ex matz'el wiq'i'ne' tkoron toj twi' exu' ti'j tq'ob' te oklenj, tu'n ttzaj wiq'i'ne' teya, taye, chij.

¹¹Kub'tzun kyẍilu'n Dab'i kyi'j kyuk'i'lju' t-xjal te yek'b'il b'is,¹²e'oq'tzuntz b'a'nxi'x ex e'mewayin tzmax qonik'an kyi'j Sawul ex Jonatan, qu'n e'ex ch'yon toj kyk'u'j, ex tu'nju' kub'kyi'j aj Israel t-xjal Qman Dyos te q'oj.¹³Yajxi'tzuntel xitqani'n Dab'i teju' ku'xun pon q'inte tqanil:
—¿Ja najla'ya?, chij.
Atzunte xittzaq'we'n:
—Te najchaq xjal qinwe', aj Amalek qine', chij.

¹⁴Atzunte Dab'i xitma'n te:
—¿Se'n taq'witzun saq'pon tq'ob'a ti'ju' nimaqkawil sk'o'n tu'n Qman Dyos?, chij.¹⁵Ex tzaj ttxko'n jun t-xjal te q'oj, ex tchaq' te:
—¡B'yonku'ya!, chij.
Aq'pon tb'yo'ntzuntz ex majx kyim tu'n,¹⁶nxi'ku'toq tma'n Dab'i:
—Tu'nx tnab'la kykyimela'ya, qu'n axa xq'mante qa aya xkub' b'yonteju' nimaqkawil sk'o'n tu'n Qman Dyos, chij te. Kyb'isjil Sawul ex Jonatan

¹⁷Xitb'itza'n Dab'i jun b'itz te b'is tu'nju' kykamik Sawul tuk'i'l Jonatan ju' tk'wal,¹⁸ex tchaq' tu'n txi' xnaq'tza'n kyeju' aj Juda. Xi' tz'ib'a'na'ju' b'itz lu toju' Kyuj Nimaqxjal Tnik'alkyi'j:

¹⁹¡Ayy Israel, matxi' b'aju' tipumala kywi' witz! ¡Se'n taq'wi xkub' kyi'ju' nimaq q'ojil!²⁰Laluntzun t-xikyq'o'ne' tqanil toj Kat ex lalun txikyma'ne' kyoj xky'ichb'e toj Askalon, tu'n miche tzalaja' qya pilistey tu'n miche xlik'puna'ju' qya mib'a'n che niman te Qman Dyos tu'n kytzalajb'il.

²¹¡Layxwit tzajtl jb'al ex mixwit kub'a' ta'l che'w kyib'aje' witz toj Kilb'oa, qu'n mache okye' tnajb'il kamik! Atzu' eb'aja' wab'e'na' kolb'il kyeju' nimaq q'ojil. Atzu' xkub'aja' tqoptz'ajilju' tkolb'il Sawul.

²²Mixti' jumaj ma'wt tz'anjtz kyi'j Sawul ex Jonatan mixwitti' kychk'el ex ky-until nimaq q'ojil min nche xob' ti'ju' kyk'uẍtx'e'nb'il ex tal kysmaj.

²³Majxtoq b'a'n xjalqe' Sawul ex Jonatan, inxi'xtoq che tzalaj xjal kyi'j, mi kyelen tekyib' tej itz'qe'toq ex junx ẍe kyim. ¡Ojqelxi'xtoq che b'et kyekywitz t'iw! ¡Kuwqe'xi'x kyekywitz b'alun!

²⁴¡Che oq'e' tmyal Israel ti'j Sawul, qu'n intoq che ktxunjtze' tu'n toj xb'alun kyaq smo'n tky'i cha'x ex tz'umin sed, ex intoq oktq'o'n kyilb'ilal q'anpwaq ttxa'nile!²⁵¡Se'n taq'wi xkub' kyi'ju' nimaq q'ojil toju' kojb'il jab'aja' q'oj! ¡Kywi' nimaq witz xkyima' Jonatan!²⁶¡Nchin b'isune' b'a'nxi'x ti'ja witz'in, Jonatan! ¡Majx b'a'n xjal soka'ya weye'! nimxi'x soka' tk'u'jlalila weye' kyetwitz kyk'u'jlalil qya.²⁷¡Se'n taq'wi xkub'a' kyi'ju' nimaq q'ojil! ¡Matxi'tzun che kub' xitu'nju' q'ojb'il! chi Dab'i toju' tb'itz. Ok Dab'i te nimaqkawil toj Juda

¹Tb'ajlenxi'tzun ja'lu, xitqani'n Dab'i te Qman Dyos kjalu:
—¿Ma b'a'n tu'n nxi'ye' toj junju' nimaqtnam toj Juda?, chij.
Tzajtzun ttzaq'we'n Qman Dyos te:
—Ilti'j tu'n txi'ya, chij.
—¿Jatzun b'a'na' tu'n nxi'ye'?, chi Dab'i.
—Toj Eb'ron, chi Dyos.

²Xi'tzun Dab'itz atzu' kyuk'i'lju' kab'e' t-xu'jil: Aynoam, tzajni toj tnam Jesreel, ex Ab'ikayl, t-xu'jilb'en qtzan Nab'al aj Karmel.³Ex eb'ajx tiq'i'nju' t-xjal tuk'i'l, kyuk'i'lju' toj kyja, e'kub' najantzuntz kyoj nimaqtnam Eb'ron.⁴Yajxi'tzuntel eponju' xjal aj Juda atzu', ex okkyq'o'n Dab'i te nimaqkawil tib'aj Juda.
Tetzunj txi' q'ma'n te Dab'i qa aye' aj Jab'es toj Kalaad eku'x mqunte Sawul,⁵e'xitchq'o'n Dab'i jte' xjal q'malte kye kjalu: Awt Qman Dyos k'i'wlankyeye', tu'nju' b'a'n xkyb'inchaye', ma ku'x kymqu'ne' Sawul ju' kyajawe'.⁶B'a'nwt tb'incha Qman Dyos kyeye', ex japunxwitju' tyol. B'aywe' knq'a'we' tu'me'l t-xel kyeye' tu'nju' xkyb'inchaye'.⁷Atzu'n ja'lo, kuwqe'xe' ex lalun che xob'e', maskye matxi' kyim Sawul ju' kyajawe', matxi' chin xjansanjtzwe' kyu'n tyajajil Juda te nimaqkawil, chij kye. Q'oj kyxol aj Israel kyuk'i'l aj Juda

⁸Atzunte Ab'ner, tk'wal Ner, nejenel kye t-xjal Sawul te q'oj, tzaj ttxko'n Is-b'oset tk'wal Sawul, ex xitiq'i'n toj Maanaym,⁹ex oktq'o'n toklen atzu' te nimaqkawil toj Kalaad, Kyesuri, Jesreel, Eprayin, B'enjamin ex kykyaqil aj Israel.¹⁰Tetoq kab'naq (40) ab'q'i Is-b'oset tej ttzyet tkawin toj Israel, ex naq kab'e' ab'q'i kawin. Aye'tzunkye' tyajajil Juda nima'ntoq Dab'i kyu'n te kynimaqkawil,¹¹qu'mtzun wuq ab'q'i tk'i' nik'jan kawin Dab'i toj Juda ex atzu' tena' tkawb'il toj Eb'ron.

¹²Etztzun Ab'nertz toj Maanaym ex pon toj Kab'aon, nejli kywitzu' t-xjal Is-b'oset te q'oj.¹³Ex ikxte Joab', tk'wal Seruya, etz toj Eb'ron kyuk'i'lju' t-xjal Dab'i te q'oj, ex kyk'ulkyib' kyuk'i'l tk'etzju' k'anb'il a' toj Kab'aon. Kykab'ilju' tnej xjal te q'oj e'kub'ten junjun toj junjun plaj teju' k'anb'il a'.¹⁴Xi'tzun tma'n Ab'ner te Joab':
—Kukyexju' ku'xun q'ojil qwitz, chij.
—B'a'natzun, chi Joab' te.

¹⁵Qu'mtzun e ik' kab'lajoj (12) kyxolju' tyajajil B'enjamin ex t-xjal Is-b'oset ju' tk'wal Sawul tu'n kyq'ojin, ex e ik' kab'lajoj (12) kyxolju' t-xjal Dab'i te q'oj.¹⁶Teyile junjun tzyetju' tajq'oj tu'n ti'j twi' ex okt-xyu'n tk'uẍtx'e'nb'il ttxa'n tchil, ex junx kykub'tz'aq kykyaqil kyimniqe'tl kyu'n. Qu'mtzun Elkat-asurim tb'iju' najb'il lu okq'o'n toj Kab'aon.¹⁷Kuw oka'ju' q'oj toju' q'ij lu, kub'kyi'j Ab'ner kyuk'i'lju' aj Israel te q'oj kyu'nju' t-xjal Dab'i.¹⁸Ate'toqju' oxe' tk'wal Seruya, aye': Joab', Ab'isay ex Asael. Kuwtoq tz'ojqelan Asael kse'n msat toj plan tx'otx',¹⁹oktzinetzuntz knolteti'j Ab'ner tu'n mi tzaqpaja'.²⁰Tetzunj tanjtz ka'yin Ab'ner ti'jxi', tma:
—¡A pe'loya Asael!, chij.
—¡Ayinatzune'!, chi Asael.

²¹Xi'tzun tma'n Ab'ner te:
—Chin tq'onkja. Ate b'a'n tzyum junju'ya majen ex q'inkja tkyaqilju' iq'i'n tu'n, chij.
Atzunte Asael mixti'x kyej ttzaqpi'n,²²xitma'n jumajtl Ab'ner te:
—¡Chin tq'onkja, mujqa tajb'ila tu'n tkub' nb'yo'na! ¿ti'tzun kxe'l nma'ne' ajnpone' yek'ul wib'e' twitzju' ttzika Joab'?, chij te.

²³Atzu'n txi' tka'yi'n Ab'ner rinchix Asael ti'j, ex tq'o'n tch'ut ti'jxi' ex okt-xyu'n ttzitk'u'j Asael ex majx jlajin ttze'lti'j, axtzuntzu' kub'a' tz'aq Asael ex majx kyim. Kykyaqiltzunju' ntoq che ik' ja kub'a' tz'aq Asael kyimnitl, intoq che kub' we' ka'yilte.²⁴Aye'tzunkye Joab' ex Ab'isay xikyljo'n tkanliti'j Ab'ner. Atzu' epona' toju' b'ya' Ama, ju' ati tk'etz Wiya, toj tb'eyil chq'ajlaj toj Kab'aon, tej tex q'ij.²⁵Atzuntzu' b'aja' kychmo'na' kyib' tyajajil B'enjamin tuk'i'l Ab'ner, ex b'aj kynk'u'nkyib' kykyaqilx tu'n kyq'ojin twi' jun witz.²⁶Xitzun t-ẍch'i'n Ab'nertz te Joab':
—¿Ma layxtzun b'aj ttxa'nju' b'yoj xjal? ¿Ma na'mx teltnik'a qa naq b'is kjel tq'o'n qe? ¿Jtojtzun txitma'na kye t-xjala tu'n lalun che q'ojintl kyi'ju' kyitz'in mo kytzik?, chij.

²⁷Atzunte Joab' xittzaq'we'n:
—Axxi'x lu Qman Dyos nka'yin, naqwit mixti' saj tma'na lu weye', ma'wtlo che q'ojinju' nxjale' kyi'ju' kyitz'in mo kytzik tzmax ajqsqix, chij.

²⁸Tchaq'tzun Joab'tz tu'n kyjaw q'ajtza'n chun, ex ju'm kywe'ju' t-xjal, min xikyljo'ntl tkanlikyi'j aj Israel ex min e'q'ojintl.²⁹Eb'et Ab'ner kyuk'i'lju' t-xjal te q'oj toju' plan tx'otx' te Arab'a toj tkyaqilu' qonik'an lu, xikytaqk'u'n kyb'e toju' nin a' Jordan ex toj B'itron, e'pontzuntz Maanaym.

³⁰Mixti' xi'tl Joab' knolteti'j Ab'ner ex b'aj tb'u'yi'nju' t-xjal te q'oj, atzunj ttzyet t-ẍch'injtzu' kyb'i, elyal qa matxi'toq che b'aj b'eljlajoj (19) kynejel t-xjal Dab'i te q'oj ti'jxi'tl Asael.³¹Aye'tzunkye' t-xjal Dab'i te q'oj, kub' kyb'yo'n wajxaqlajnaq (360) xjal kyxol tyajajil B'enjamin ex t-xjal Ab'ner.

³²Tb'ajlenxi'tzun ja'lu, xiq'i'n t-xmilal Asael B'elen ex ku'x mqu'n atzu', ja mqu'na' tman. B'aj qonik'an kyu'n Joab' kyuk'i'lju' t-xjal te q'oj eb'et, ex atzu' espik'e'ya' Eb'ron.

¹Nimtoj tenju' q'oj kyxol toj tja Sawul kyuk'i'lju' toj tja Dab'i, xi'toqtzu'n tten kyipumalju' te Dab'i, aye'tzu'n te Sawul xi'toq kykub' b'aj. Aye' toj tja Dab'i (1 Cr 3.1-4)

²Aye' tk'wal Dab'i ja'lu e itz'ji tej atitoq toj Eb'ron: Amnon, tnejel k'wal, tal Aynoam aj Jesreel;³atzu'n tkab', a Kyilab', tal Ab'ikayl, t-xu'jilb'en qtzan Nab'al, aj Karmel; toxi'n Ab'salon, tal Maaka, ju' tmyal Talmay, nimaqkawil te Kyesur;⁴tkyaji'n Adoniy, tal Awit; tjwe'yi'n Sepatiy, tal Ab'ital;⁵twaqaqi'n Itream, tal Ewla, juntl t-xu'jil Dab'i. Kykyaqil ja'lu e'itz'ji tej atitoq Dab'i Eb'ron. Taq'tib' Ab'ner tuk'i'l Dab'i

⁶Tetzunj intoq noktaq'lju' q'oj kyxol tyajajil Sawul kyuk'i'lju' tyajajil Dab'i, xi'toq ttenxi'x tipumal Ab'ner kyib'aju' tyajajil Sawul.⁷Atitoqtzun jun tqya Sawul, Rispa tb'i, tal Aya. Xi'tzun tma'n Is-b'oset te Ab'ner:
—¿Tiqu'n xkub'a' kẍeya tuk'i'lju' tqya nma'ne'?, chij.

⁸Tzaj txqan ttx'u'jil Ab'ner tu'n tpaju' xitma'n Is-b'oset te, ex xittzaq'we'n te:
—¿Ma tx'yanqine' tu'n wajb'ene' kye aj Juda? Matxi' chin okye' b'a'n kyeju' toj tja Sawul, ju' tmana, kyuk'i'l twitze'l ex kyuk'i'lju' tamiw, expe' min xxi'nq'o'na toj tq'ob' Dab'i. ¿Atzunta ja'lo nchin tpoqo'na qama chin b'inchan ile' tuk'i'l jun qya?, chij.⁹¡Ja'lotzun, tz'e'ysanjtzxwit nwitze' kuw tu'n Qman Dyos qa min xnb'inchaye' matxi' ttziya Qman Dyos te Dab'i,¹⁰tu'n kyel wiq'i'nju'ye' tk'wal Sawul toju' kawb'il, tu'ntzun tkawin Dab'i toj Israel ex toj Juda, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j!, chij te.

¹¹Majx jpet ttzi Is-b'oset tu'n Ab'ner, qu'n intoq xob' te.¹²Atzunte Ab'ner e'xitchq'o'n sanjelj q'malte te Dab'i kjalu: ¿Alqetzun kjela' tx'otx'? Qb'inchamti'j jun qyol: chin onile' tuk'i'la toj chukchaq tu'me'l tu'n tok tkyaqil Israel tjaq' tkawb'ila, chij xitma'n tq'umli.

¹³Atzunte Dab'i xittzaq'we'n: B'a'na'tzun qama kyej b'entti'j jun qyol, naq o'kx ati tu'n ttzaj tiq'i'na Mikal, ju' tmyal qtzan Sawul, ajtula nk'etze', chij.¹⁴Expe' e'xitchq'o'n Dab'i jte' sanjelj q'malte te Is-b'oset: Q'ontzju'ya nxu'jile' Mikal, ju' inmejeye' tuk'i'l ex nchoje' tu'n jo'naq (100) ttxo'w kypich' pilistey, chij.

¹⁵Atzunte Is-b'oset tchaq' tu'n tel iq'i'n te Paltyel ju' tchmil, tk'wal Lays;¹⁶atzunte Paltyel xi' lpe ti'j intoq oq', pon wab'alte toj B'awrim. Atzuntzu' xa' tma'na' Ab'ner te tu'n tanj, ex anjtzti'j Paltyel.

¹⁷Yajxi'tzuntel yolin Ab'ner kyuk'i'lju' tijwnaq kyxol aj Israel, ex xitma'n kye: Ojtxi'ku' nkyqani'ne' tu'n tok Dab'i te nimaqkawil.¹⁸Matxi'tzun ponju' kmuj tu'n tok te nimaqkawil, qu'n oje ttziya Qman Dyos te, qa naqx tu'nel ktzaqpajela' nintnam Israel tjaq' kykawb'il pilistey ex toj kyq'ob' txqantl tajq'oj, chij kye.

¹⁹Ex ikx yolin Ab'ner kyuk'i'lju' tyajajil B'enjamin, tetzunj tb'aj yolin xi'tl toj Eb'ron q'malte te Dab'i titi' kyma aj Israel exqe' tyajajil B'enjamin.²⁰Pon kyuk'i'l junaq (20) xjal toj Eb'ron tk'etz Dab'i, atzunte Dab'i kub' tq'o'n jun ninwan te Ab'ner ex kyeju' tuk'i'l.²¹Xi'tzun tma'n Ab'ner te Dab'i:
—Machinxe' ja'lo b'uyilkye aj Israel tu'n tkyajb'ent jun kyyol tuk'i'la, nimaqkawil, tu'ntzun tkawina kse'nxju' b'a'n toj twitza, chij.
Etztzun Dab'itz wab'alte Ab'ner, atzunte Ab'ner anj toj tzalajb'il. Kub' tb'yo'n Joab' Ab'ner

²²Tojtzunju' kmuj lu pon Joab' kyuk'i'lju' t-xjal Dab'i tzajniqe' toj q'oj, iq'i'n txqan ti'xti' kyu'n, aju' matxi'toq tz'elkyiq'i'n kye ajq'oj. Atzunte Ab'ner matxi'toq tz'etz tk'etz Dab'i toj Eb'ron, ex matxi'toq tz'anj toj tzalajb'il, tetzlenxi' tk'etz Dab'i.²³Tetzunj tpon Joab' kyuk'i'lju' xjal te q'oj, xijask'u'n te qa pon Ab'ner, tk'wal Ner, tk'etzju' nimaqkawil, exqa exwab'aj tu'n Dab'i.²⁴Xi'tzun Joab'tz tk'etzju' nimaqkawil, ex xitma'n te:
—¿Titi'tzu'n matxi' tb'inchaya, nimaqkawil? Matzul Ab'ner tk'etza, ex matz'anj ttzaqpi'ntla.²⁵¿Ma mixtzunti' b'i'n tu'na qa naq sul Ab'ner, tk'wal Ner, sb'ulteya, exqa naq sul ka'yilte titi' nb'aj tza'lu, ex tu'n tb'inte tkyaqilju' ntb'incha'na?, chij te.

²⁶Naqtzun nb'aj yolin Joab' tuk'i'l Dab'i, e'xitchq'o'n jte' xjal knolteti'j Ab'ner, ewaj twitz Dab'i, ex anjtzti'j kyu'n tzmax ttzi xoch te Sira.²⁷Tetzunj tpon jumajtl Ab'ner kyu'n toj Eb'ron, xiq'i'n tu'n Joab' tk'etzu' tjpel nintnam, tu'n kyolin kykab'ilx, atzuntzu' kub'a' tb'yo'n, tu'n tpaj kub' tb'yo'n Asael ju' titz'in.²⁸Yajxi'tzuntl, tej tb'inte Dab'i, tma: Lu Qma Dyos nka'yin, qa myaqinwe' exju' ntaname' ati tpaj, tu'n xkyim Ab'ner, tk'wal Ner.²⁹¡Kub'xwit tz'aqju' tilil tib'aj Joab' ex kyib'aju' toj tja, kukxwit kyab'tiju' tu'n chk'oj, tx'a'k mujqa koxil, che kub'xwit b'yo'n ex tu'n tik'x we'yaj kyu'n!, chij.

³⁰Kub' b'yo'n Ab'ner kyu'n Joab' tuk'i'l Ab'isay, qu'n kub' tb'yo'n Ab'ner kyitz'in toju' q'oj b'aj Kab'aon.

³¹Tchaq'tzun Dab'itz te Joab' ex kyeju' k'le'nqe'toq tu'n: Kyẍilunku'ye' kyi'je' ex kyq'onk kyi'je' jochin te b'is, ex kynimanku'ye' tkamik Ab'ner, chij. Xi' lpe Dab'i ti'ju' anmi,³²ex ku'x kymqu'n Ab'ner toj Eb'ron. Atzuntzu' kub'a' oq'a' nimaqkawil b'a'nxi'x tib'aju' muqb'il te Ab'ner, ex kykyaqilju' xjal ax kyb'inchaju'.³³Xi'tzun tb'itza'n nimaqkawil jun b'itz b'isb'ajil tu'n tkamik Ab'ner:
¿Se'n taq'wi xkyima Ab'ner, mixya toj tu'me'l ja'lu,³⁴myana' xmo'n ta tq'ob' ex min tokx tqana toj xpatx'k'uxb'il? ¡Mab'aja kse'n nkyima' jun xjal toj kyq'ob' b'inchal taq'wixil!, chij.
Exqe' xjal inxi'xtoq che oq' ti'j.³⁵Exi'tzuntz kub'sal te Dab'i tu'n twan ch'i'n, na'mxku' texju' q'ij, atzunte Dab'i tma:
—¡Kub'xwit ttz'e'ysa'n Qman Dyos nwitze' kuw qama chin wan wab'je' mujqa juntl ti'xti' na'mxtoq tex q'ij!, chij.

³⁶Kykyaqil kane toj kywitz ex b'a'n ela' kye, qu'n tkyaqilju' ntb'incha'n nimaqkawil intoq che tzalaju' xjal ti'j.³⁷Kane toj kywitz kykyaqil aj Israel toju' q'ij lu qa mixti'te' nimaqkawil toklen ti'ju' tkamik Ab'ner, tk'wal Ner.

³⁸Xitma'ntzun nimaqkawiltz kyeju' nejenel kye t-xjal te q'oj:
—Kanli kywitze', matxi' kub' qojli jun nejenel nim toklen toj Israel, jun nimaqxjal.³⁹Tu'npetzu'n ayine' nimaqkawil sk'o'n tu'n Qman Dyos, machin kub' numje' tu'nju' b'yojxjali'n xkyb'inchaju' tk'wal Seruya. ¡Awt Qman Dyos q'onte tu'me'l t-xel teju' xb'inchante il lu!, chij. Kub' b'yo'n Is-b'oset

¹Tetzunj tb'inte Is-b'oset, tk'wal Sawul qa matxi'toq kyim Ab'ner toj Eb'ron, majx kub'numj, ex kykyaqil aj Israel oktchi kyi'j.²Ate'toqtzun kab'e' ichan kyitz'inkyib' intoq che ajb'en te Is-b'oset nejenelqe'toq kye jun tnej eleq'. B'aana tb'i jun, atzu'n juntl Rekab'. Tk'wal Rimonqe' aj B'eerot, tyajajil B'enjamin, qu'n aju' tnam B'eerot intoq okq'o'n te tyajajil B'enjamin,³expe' ikxtej kyxi' oqju' aj B'eerot toj Witaym, ja najlqe' kse'n jun ajb'etun.

⁴Atzunte Jonatan, tk'wal Sawul, atitoq jun tk'wal Mepi-b'oset tb'i. Tetoqtzun jwe' ab'q'i Mepi-b'oset tej tpon tqanil qa matxi'toq b'aj Sawul ex Jonatan toj Jesreel; atzunju' qya ka'yilte ik'tiq'i'n ex xi' oq tuk'i'l, tu'ntzunju' ojqeltoq tel, eltz'aqju' k'wal tu'n ex majx kyej tzkajix tqan.

⁵Atzunte Rekab' ex B'aana, tk'wal Rimon aj B'eerot, exi' tja Is-b'oset, ex e'pon tojku'xi'xju' kmuj kuw tq'ob' q'ij, intoq ojlan Is-b'oset, ex majx tzaj twatl.⁶Atzunju' qya xq'uqil ttzija intoq xq'iq'in triy, o'kx tik' wtan, qu'mtzun mix-a'lo' lonkye Rekab' ex B'aana ju' titz'in tej kyokx.⁷Tej kyokx toju' ja, kuẍlitoq Is-b'oset tib'aj tkuẍb'il; axtzuntzu' kub'a' kyb'yo'na' ex el kyk'uẍpi'n twi', xikyiq'i'ntzuntz ex eb'et b'aj qonik'an toj tb'eyil Arab'a⁸tu'n tpon kyiq'i'n te Dab'i toj Eb'ron. Xikyma'ntzuntz teju' nimaqkawil:
—Luju' twi' Is-b'oset tk'wal Sawul lu, nimaqkawil, aju' tajq'oja ex tajb'il tu'n tb'aja tu'n. Makub' q'o'n toj tq'ob'a ja'lo tu'n Qman Dyos tu'n tok tu'me'l t-xel tu'na te Sawul ex kyeju' tyajajil, chechij.

⁹Atzunte Dab'i xittzaq'we'n kye:
—Lu Qman Dyos in ka'yin, aju' matxi' chin tkolxi'ye' toj yajb'il,¹⁰tetzunj tul jun xjal q'malte weye' qa matxi'toq kyim Sawul, toj tnab'l qa b'a'nju' tqanil tzaj tma'n, wichaqa tu'nxju' tqanil lu kub' njpu'ne' ex kub' nb'yo'ne' toj Siklaj.¹¹¡Ikxtzunkye' kb'ajel kyi'j ja'lo, b'inchal myab'a'n, tu'nju' makub' kyb'yo'ne' jun xjal mixti' til, tej intoq ojlan, extzun tojku' tja! Qu'mtzun, ¡kkychja'ye' tkamik! ¡Che b'el nnajsa'ne' twitzju' tx'otx' lu!, chij kye.¹²Tchaq'tzun Dab'itz kyeju' nejenel kye t-xjal, tu'n kykub' kyb'yo'n; b'je'l kytx'e'mu'n kq'ob' ex kyqan, ex eb'jaw kyyob'i'n tk'etzu' tkb'el a' toj Eb'ron. Yajxi'tzuntl xikyiq'i'n twi' Is-b'oset ex ku'x kymqu'n toj Eb'ron, toj tmuqb'il Ab'ner. Ok Dab'i te nimaqkawil toj Israel ex Juda (1 Cr 11.1-3)

¹Yajxi'tzuntel, kykyaqil tyajajil Israel exi' yolil tuk'i'l Dab'i toj Eb'ron, ex xikyma'n te: Qchk'el qib' tuk'i'la,²axxi'x, maskye atoq Sawul qnimaqkawile', ateju'ya nejeneltoq kye aj Israel ajkyex q'ojil. Expena', teta oje tzaj ttziyana' Qman Dyos tu'n tiq'inte twitzju'ya tnam Israel ex tu'n tkawina toj, chechij te.

³Iktzu'n eb'aj yolina'ju' tijwnaq tuk'i'l Dab'i toj Eb'ron, ex kyej b'entti'j jun kyol tuk'i'l twitz Qman Dyos. Okkyq'o'ntzun Dab'itz te nimaqkawil toj Israel.⁴Tetoq junaq lajoj (30) ab'q'i Dab'i tej ttzyet tkawin, ex kab'naq (40) ab'q'i kawin:⁵kawin wuq ab'q'i tk'i' nik'jan toj Eb'ron tib'aj Juda, atzun junaq oxlajoj (33) ab'q'i kawin toj Jerusalen tib'aj tkyaqil Israel ex Juda. Tzyetju' ipumalj toj Syon tu'n Dab'i (1 Cr 11.4-9)

⁶Xi'tzun Dab'i nimaqkawil kyuk'i'lu' t-xjal te q'oj toj Jerusalen q'ojil kyi'j jeb'usey, najlqe'toq toju' tnej tx'otx' lu. Toj kynab'l jeb'usey qa laytoq b'ent tokx Dab'i toju' nintnam kuwsa'n, xikyma'n te: Lay b'ent toktzta tza'lu, naqpe' kyu'n moẍ ex tzkajqe' lay b'ent toktza'ya, chechij.⁷Atzunte Dab'i kub'ti'ju' kolb'il kuwsa'n toj Syon tu'n, ju' tok tb'i Ninttanam Dab'i.⁸Matxitoqtzun txitma'n Dab'i toju' q'ij lu: Alkyete matxi' q'ojil kyi'j jeb'usey, kutokx toju' tb'e a' tjaq' tx'otx' ex b'yonqeku' moẍ ex tzkaj, qu'n aye' ju'lu majx inche elwik'o'ne' b'a'nxi'x, chij. Atzuntzu' tzaja'ju' in q'manjtz: Lay b'ent kyokxju' moẍ ex tzkajqe' toj tja Qman Dyos, ch.⁹Kub'tentzun Dab'itz toju' kolb'il kuwsa'n, oktq'o'n tb'i Ninttanam Dab'i, ex jawtb'incha'n nimaqtapi ti'jile, tzajx tk'etzu' plansa'n ex ponx tk'etzju' ja te kawb'il. E'tzaj tchq'o'n Iram t-xel tk'etz Dab'i (1 Cr 14.1-2)

¹⁰Ljo'nxi'xtoq tch'iyju' tkawb'il Dab'i, ex atitoq Qman Dyos nimtipumal tuk'i'l.¹¹Qu'mtzun e'tzaj tchq'o'n Iram, nimaqkawil toj Tiro, t-xel tk'etz Dab'i, e'aq'unal ti'j tze, eb'inchal ab'j, b'aj tzaj kyiq'i'n tze k'ute ex jaw kyb'incha'n tja Dab'i te kawb'il.¹²Kanetzuntz toj twitz Dab'i qa matxi'toq japun tyol Qman Dyos tuk'i'l tu'n tok te nimaqkawil toj Israel, ex matxi'toq ch'iyju' tkawb'il naq tu'nju' tk'u'jlalil ti'j Israel ttanam. Txqantl tk'wal Dab'i (1 Cr 3.5-9; 14.3-7)

¹³Tetzlenxi'tzun Dab'i toj Eb'ron pon toj Jerusalen, ex e'tzaj tiq'i'n txqantl t-xu'jil ex tqya atzu', e'itz'ji txqantl tk'wal kyuk'i'l.¹⁴Aye' tk'wal ja'lu e itz'ji toj Jerusalen: Samuwa, Sob'ab', Natan, Salomon,¹⁵Ib'ar, Elisuwa, Nepej, Japiya,¹⁶Elisama, Elyada ex Elipelet. Kub'kyi'j pilistey tu'n Dab'i (1 Cr 14.8-17)

¹⁷Tetzunj kyb'inte pilistey qa matxi'toq xjansanjtz Dab'i te nimaqkawil toj Israel, eb'je'tz tilj jyolte kykyaqil; tb'itzun Dab'i ex xi' toju' kolb'il kuwsa'n.¹⁸Eb'ju'ltzun lq'eju' pilistey ex eb'ajkub' ten toju' b'ya' Repaym.¹⁹Tu'ntzunju', xitqani'n Dab'i te Qman Dyos:
—¿Ma b'a'n tu'n nq'ojine' kyi'ju' pilistey? ¿Ma kchin toni'ya tu'n tkub'kyi'j?, chij.
Atzunte Qman Dyos tzaj ttzaq'we'n:
—B'a'nte' tu'n txi'ya q'ojil kyi'j, qu'n che kxe'l nq'o'nwe' toj tq'ob'a, chij.

²⁰Pontzun Dab'itz toj B'aal-perasim, ex ekub'ju' tajq'oj tu'n atzu'. Qu'mtzun tmaya': Matjaq Qman Dyos nb'eye' kse'n jun tnimal a' kyxolu' wajq'oje, chij. Ex oktq'o'n tb'iju' tx'otx' lu B'aal-perasim.²¹Expe' e'kyaj kyxon aj Pilistyaju' kydyos, atzunte Dab'i kyuk'i'lju' t-xjal eb'ajxkyiq'i'n.

²²Aye'tzunkye' pilistey eb'aj pon jumajtl toju' b'ya' Repaym,²³xi'tzun tqani'n Dab'i te Qman Dyos, atzunte Qman Dyos tzaj tma'n te:
—Lalun txi'ya q'ojil kywitzxi', kytxolink kyib'e' kyi'jile ex xi' txa'ya b'yolkye kytze'lkyi'j ajtpona kyxe tqan b'alsamo.²⁴Aj txi' tb'i'na ajtq'ajti qanb'aj twi' tze, wixtzun txi'tzu'ya b'yolkye, qu'n a techlalju' qa nejlqine' twitza, tu'n kyb'aju' xjal pilistey te q'oj, chij te.

²⁵Tb'incha Dab'i kse'nxju' tchaq' Qman Dyos te, e'kyimu' pilistey tu'n, tzajx Kab'aon ex pon kanun Kyeser. Iktoq tiq'i'n Dab'i tkax Qman Dyos (1 Cr 13.5-14)

¹Eb'aj tb'u'yi'n jumajtl Dab'i xjal te q'oj sk'o'nqe' kyxol aj Israel, oxmutx' o'lajk'al (30,000) kyb'aj.²Eb'je'tz toju' tnam B'aala toj Juda kyuk'i'lju' b'a'npun tnej xjal te q'oj, kub' t-xima'ntzuntz tu'n tik'tiq'i'nju' tkax Qman Dyos atzu', jaina'yeta' tb'i Qman Dyos nimtipumal, ju' tkub' tq'uqb'il kyib'aju' kyerb'in.³Etzkyiq'i'nju' kax tja Ab'inadab' ju' najlitoq twi' tal witz, xikyiq'i'ntzuntz tib'aj jun karwaj ak'a'j. Nejlqe' Usa ex Ayo, tk'wal Ab'inadab' twitzju' karwaj.⁵Atzunte Dab'i kyuk'i'lju' aj Israel intoq che b'itzan ex nche b'ixin tuk'i'l tkyaqil kyipumal twitz Qman Dyos, kyuk'i'l chnab' arpa, tzintzin, chilchil, tzo'tz ex txijtxij.⁶Tetzunj kypon toju' najb'il Er te Nakon, e'jaw takpuju' tman wakx, atzunte Usa oktune ti'ju' kax tu'n mikub'a' tz'aq.⁷Atzunte Qman Dyos tzaj ttx'u'jil ti'j Usa tu'n tpaju' okttzyu'n kax, qu'mtzun eltiq'i'n tchwinqlal axtzu', kub' tz'aqtzun Usatz tk'etzju' kax kyimnitl.

⁸Tzaj tb'is Dab'i tu'n tpaj eltiq'i'n Qman Dyos tchwinqlal Usa, qu'mtzun oktq'o'n tb'iju' najb'il lu Peres-usa, ex majx kyej tenju' tb'i ikju'.⁹Textzunju' q'ij lu oktchi Qman Dyos ti'j Dab'i, ex tma: ¡Layx txi' wiq'i'ntlwe' tkax Qman Dyos njaye'!, chij.¹⁰Axtzuntzu' tchaq'a' tu'n txi' iq'i'nju' tkax Qman Dyos tja ob'ed-edom te tnam Kat, qu'n mixti'x xiq'i'ntl toj Ninttanam Dab'i.¹¹Oxe' xjaw kyejten kax te Qman Dyos tja Ob'ed-edom, ex kub' k'i'wla'n Ob'ed-edom exqe'ju' toj tja tu'n Qman Dyos. Pon tiq'i'n Dab'i tkax Qman Dyos toj Jerusalen (1 Cr 15.1—16.6)

¹²Tetzunj txi' q'ma'n teju' nimaqkawil Dab'i qa matxi'toq che kub' k'i'wla'n toj tja Ob'ed-edom kyuk'i'lxi'ju' ati te tu'n Qman Dyos naq tu'nju' kax, xi' Dab'i q'ilte kax tuk'i'l tzalajb'il tja Ob'ed-edom tu'n tpon tiq'i'n toju' Ninttanam Dab'i.¹³Axtaqtzun kyik'b'etju' iq'ilte kax te Qman Dyos, kub' tb'yo'n Dab'i jun tman wakx te chojb'il ex jun tman rit q'u'sqe'.

¹⁴Inxi'xtoq b'ixin Dab'i tu'n tkyaqil tipumal oksa'ntoq jun t-ẍa'y sed,¹⁵ex ikxqe'ju' aj Israel intoq che ẍch'in tu'n kytzalajb'il toj tq'ojq'ojel chun, iq'i'nju' kax te Qman Dyos kyu'n.

¹⁶Tetzunj tponju' kax te Qman Dyos toju' Ninttanam Dab'i, etz ka'yin Mikal, tmyal Sawul, ttzi tokix spik'un; tetzunj txi' tka'yi'n intoq xlik'pu'n ex in b'ixin nimaqkawil Dab'i twitz Qman Dyos, tzaj tx'a'l titk'u'j ti'j.

¹⁷Xiq'i'nju' kax te Qman Dyos toju' tkub'el, toj jun pach xb'alun kub' tb'incha'n Dab'i texju' kax. Axtzun kmuju' kub' tq'o'n Dab'i chojb'il k'ok'sb'il ex chojb'il te mujb'ab'ltib'il twitz Qman Dyos,¹⁸tb'ajlenxi'tzun ja'lu e'kub' tky'i'wla'nju' tnam toj tb'i Qman Dyos nimtipumal,¹⁹ex b'aj t-sipa'n wab'j kye kykyaqil aj Israel, ichan ex qya, ex junjun kylo' tzqij ub'a. Kyb'ajlenxi'tzun wan eb'aj anj kyja.

²⁰Ex ikxte Dab'i anj tja tu'n txi' tqani'n k'i'wb'il kyib'aju' toj tja; atzunte Mikal, tmyal Sawul, etz k'lulte ex xitma'n te:
—¡Chiloya qa b'a'n xtb'inchaya kywitzju' qya k'ayi'n majen kye tmajena, wichaqa mixti'x tnab'la! chij te.

²¹Atzunte Dab'i xittzaq'we'n:
—Twitz Qman Dyos ẍin b'ixina'we', aju' jaw sk'onweye' te t-xel tmana ex kyxol kykyaqilju' toj tjaya, tu'n wokye' nejenel te tnam Israel. Qu'mtzun inchin b'ixine' twitz.²²Kpena' chin nimalxi'xtlwe' kyetwitzu' ja'lo; kb'el nb'o'si'nxi'xtl wib'e' twitz, kyetwitzju' nt-xima'na, aye'tzuntlju' qya nche tma'na, kche nimal weye'.

²³Ex mixti' alan Mikal toj tkyaqil tchwinqlal. Tzaj ttziya'n Qman Dyos tu'n tk'iwlante Dab'i (1 Cr 17.1-27)

¹Tetzunj matxi'toq b'ent tten nimaqkawil Dab'i toju' tja te kawb'il ex matxi'toq kub' q'o'n toj nak'b'il tu'n Qman Dyos kyuk'i'l kykyaqilju' tajq'oj nqaku' ta'qe',²xitma'n te Natan, aju' t-sanjelal Dyos:
—Ma b'a'ntzulo, najlqinwe' toj jun ja te kawb'il k'ute, atzunju' tkax Qman Dyos naq toj pach xb'alun, chij.

³Atzunte Natan xittzaq'we'n te:
—B'inchama tkyaqilju' makub' t-xima'na, qu'n atite Qman Dyos tuk'i'la, chij.

⁴Textzu'n qonik'an lu, tzaj yolin Qman Dyos te Natan, ex tma:

⁵Kutxi'ya yolil tuk'i'l nmajine' Dab'i, ex q'manxa te kjalu: Ayine' Dyos Manb'aj ẍin q'mante, ma myatzuloya kjawil b'inchante jun ja te k'u'lb'il ja chin tenb'ila'ye'.⁶Atxi'x tej kyetzwiq'i'ne' aj Israel toj Ejipt, tu'n tul kanunx ja'lo, b'ajxa' chin tena'ye' kyoj ja te k'u'lb'il, naqx nchin b'etjeye' kyoj pach xb'alun.⁷Toj tkyaqilju' tq'ijlalil tej ẍin b'ete' kyuk'i'l, b'ajx txa'nma'ne' te junju' kynejel, aye' eb'jaw nsk'o'ne' tu'n kykawin tib'aju' ntaname' Israel, tu'n tjaw tb'incha'n jun ja te k'u'lb'il k'ute ttzeyil.⁸Qu'mtzun, ayine' Dyos Manb'aj nimwipumale', matz'el wiq'i'na ti'j k'ik'lej rit, tu'n toka nejenel te ntaname' Israel;⁹matxi' chin tenxi'ye' tuk'i'la jaxjaku' nb'eta'ya, matxi' che b'aju' tajq'oja xjaw kyi'nkyib' ti'ja wu'ne', ex matxi' txinq'o'ne' toklena kse'nkye nimaqxjal twitzju' tx'otx' lu.¹⁰Expe' matxi' tz'el npa'ne' kytx'otx'ju' ntaname' Israel, ex matxi' che kub' nq'o'ne' atzu', tu'n kynajan tojku' kytx'otx', ja lay che oka' ik'le'n ex tu'n lalun che yajlanjtz kyu'n b'inchal myab'a'n kse'n ojtxi',¹¹tej kyoknq'o'ne' nejenel tu'n kykawin tib'aj ntaname' Israel. Ktenb'ela toj nak'b'il wu'ne' kyuk'i'l kkyaqil tajq'oja. Ex majx nxi' nma'ne' teya qa che tzajel nq'o'ne' tyajajila,¹²ajtzun tjapun tchwinqlala ex tku'x mqu'na kyk'etz tyajilb'ena, kjawil nsk'o'ne' jun tyajajila ex kxe'l nq'o'ne' kawb'il toj tq'ob'.¹³Ate kjawil b'inchante jun ja te k'u'lb'il weye', ex knkuwsa'ye' tkawb'il tejumajx.¹⁴Chin okyele' te tman, atzunte k'okyil te nk'wale'. Qatzun matb'incha jun taq'wix, kb'el ntz'e'ysa'ne' twitz ex kb'ajel nq'ob'ane' toj asyal kse'n nkyb'incha'n manb'aj kye kyk'wal,¹⁵ex lay tz'el wiq'ine' nxtalb'ile' te kse'n sel wiq'i'ne' te Sawul, tu'n toka te t-xel.¹⁶Che nxq'uqi'we' tyajajila exju' tkawb'ila kukxju', ex ktenb'elte' tkawb'ila tejumajx, chi Dyos, chiku'ya te, chij.

¹⁷Xi'tzun tma'n Natan tkyaqil ja'lu te Dab'i, ikxi'xu' kse'n til ex tb'i.¹⁸Atzunte nimaqkawil Dab'i okx yolil twitz Qman Dyos, ex tma: Nman Dyos, ¿alkyeqine' exqe'ju' toj njaye' tu'nju' saj tq'o'na woklene' nim?¹⁹¡Nman Dyos, naq ch'i'nte' lu toj twitza, matxi'pe'na' tzaj tma'na titi' ktb'incha'ya kyi'ju' nyajajile' tjax chix! ¡Mix-a'lo' jun xjal kse'n aya, Taye!²⁰¡Mixti'tl tu'n txinma'ne' teya, Nman Dyos, qu'n ojtzqi'n qina'we' tu'na b'a'nxi'x!²¹Matb'inchaya tkyaqilju' ti'xti' te lab'te'n lu, kse'nxju' tzaj ttziya'na ex kse'n b'a'n toj twitza, tu'n tel nnik'e' kyi'j;²²qu'mtzun, ¡nimta toklen, Nman Dyos! Mix-a'lo' juntl kse'n aya ex mixti' juntl dyos ti'jxi'ya, b'i'n qu'ne'.²³Naqpena' ttanama Israel, ¡mixti' juntl kse'nte, naq o'kxte toj tkyaqil twitz tx'otx'! Tzaqpet tu'na Nman Dyos, tu'n tok te ttanama, jaw tnimsa'na tej tb'inchanteya nimaq ti'xti' toj ex b'inchb'en te lab'te'n. Mache eltiq'i'nju'ya txqantl tnam kyuk'i'lxi' kydyos twitzju' ttanama kolpet tu'na toj Ejipt,²⁴qu'n matxi' jaw t-sk'o'na Israel tu'n tok te ttanama tejumajx, ex tu'n toka Nman Dyos, te Tdyos.

²⁵Qu'mtzun, Nman Dyos, kukxwit tten tyolju'ya tzaj ttziya'na weye' ju' tmajena ex kyeju' nyajajile', ex japunxwit kse'n xtmaya.²⁶¡Jawxwit nima'nju' tb'iya kukxju', tu'ntzun tq'manjtz qa aya Dyos Manb'aj nimtipumal! ¡Che tenxwitju' nyajajile' twitza kukxju'!.²⁷Nman Dyos nimtipumala, matxi' tzaj tma'na weye' qa kukxju' che kawilju' nyajajile'; qu'mtzun, maskye naq tmajinqina, inxi' nkub'sa'ne' lu teya.²⁸Taye, tkyaqilju' tyola ax qe', qu'n Dyos na'ta, ex matxi' tzaj ttziya'na txqan b'a'n weye';²⁹qu'mtzun b'inchama xtalb'il, k'iwlanqeku'ya nyajajile' tu'n kyten kukxju' twitza. Matxi'na' tzaj ttziya'nta Nman Dyos, tu'nju' tk'i'wb'ila, k'i'wla'nqe'kye' nyajajile' tejumajx, chi Dab'i. Kanb'an Dab'i kyoj q'oj (1 Cr 18.1-13)

¹Tb'ajlenxi'tzun ja'lu kub'kyi'j pilistey tu'n Dab'i, ex e'kyajten tjaq' tkawb'il, ex etzaqpaju' txqantl tnam tu'n toj kyq'ob'.²Ex e'kub' aj Moab' tu'n, eb'aj kub'tjoqb'a'n twitz tx'otx' txoli'n kyten, ik' qinb'a'ntzun jun q'intz kyib'aj: e'kub' tb'yo'nju' e'kyaj kyjaq' kab'e' echa'n tu'n q'in, aye'tzu'n naq jun echan ik' kyib'aj minti' e'kub' tb'yo'n. Iktzu'n e'kyaja' aj moab' tjaq' tkawb'il Dab'i ex e chojon te.

³Ex kub'ti'j Adad-eser, tu'n Dab'i tk'wal Reob', nimaqkawil te Sob'a, tej xi'toq txi' kolpilte jumajtlju' tx'otx' ja inik'a' nin a' Ewprates tu'n tkawin jumajtl tib'aj.⁴E'kub' tjpu'n Dab'i kyajk'al jo'naq (1,700) xjal te q'oj kyi'j chej ex kab'mutx' lajk'al (20,000) tu'n kyqan; ex eb'aj ttoqi'n kyqan kykyaqilju' chej jk'ulkye karwaj te q'oj, e'kyajtzun tklo'n jni'tel naqx tu'n kyjk'et jo'naq karwaj.

⁵O'kxtzun kypontlju' aj siryo te Damask onilte Adad-eser, nimaqkawil toj Sob'a, ex mixti' e'kanun te Dab'i, qu'n e'kyim kab'mutx' o'lajk'al (22,000) aj siryo tu'n.⁶Kub' tq'o'ntzun Dab'itz jun tnej xjal te q'oj xq'uqil toj Sirya te Damask, e'kyajtzun aj Sirya tjaq' tkawb'il ex e'chojon te. Iktzu'n intoq kanb'ana' Dab'i tu'n Qman Dyos jaxjaku' matxa'.

⁷Kanb'antzun Dab'itz kyi'ju' kolb'il q'anpwaq intoq che ajb'en kyeju' nejenel te Adad-eser, ex exi' tiq'i'n Jerusalen.⁸Ex kanb'an kyi'j txqan q'ank'uxb'il toj B'eta ex B'erotay, kab'e' nimaqtnam te Adad-eser.

⁹Tetzunj tb'inte Toy, nimaqkawil toj Amat, qa matxi'toq kub'kyi'j kykyaqilju' t-xjal Adad-eser tu'n Dab'i,¹⁰tzaj tchq'o'n Joram ju' tk'wal kyuk'i'l ti'xti' saqpwaq, q'anpwaq, ex q'ank'uxb'il, te q'ol chjonte te Dab'i tu'nju' q'ojin ti'j Adad-eser ex tu'nju' kub'ti'j tu'n, qu'n ikxte Toy ojetoq q'ojinxi' tuk'i'l Adad-eser.¹¹Kub' t-xjansa'n Dab'i kykyaqilju' oyaj lu twitz Qman Dyos, kse'nxju' ojetoq tb'incha ti'j q'anpwaq ex saqpwaq, aju' eb'aj tzaj tiq'i'n kyoju' nimaqtnam eb'jo'kx tjaq' tkawb'il:¹²toj Edom, toj Moab', toj Amon, kyxol pilistey ex kyxol aj Amalek, exju' eltiq'i'n tej tq'ojin tuk'i'l Adad-eser, tk'wal Reob', nimaqkawil toj Sob'a.

¹³Jaw nima'nte Dab'i b'a'nxi'x. Tetzunj tmiltz'uj tkub'lenxi' kyi'j edom tu'n, eb'aj kab'mutx' jok'al (18,000) aj Edom tu'n toj b'ya' Sal.¹⁴Ex e'kub' tq'o'ntlu' junjun tnej xjal xq'uqil toj tkyaqil Edom, kykyaqiltzu'n aj Edom ekyejten tjaq' tkawb'il, qu'n intoq kanb'an Dab'i tu'n Qman Dyos jaxjaku' matxa'. Nimaq ajb'el te Dab'i (2 S 20.23-26; 1 Cr 18.14-17)

¹⁵Kawin Dab'i tojxi'x tu'me'l ex tnik'alilti'j kyib'aj kykyaqil xjal toj tkyaqil Israel.¹⁶Atoq Joab' tk'wal Seruya nejenel kyeju' xjal te q'oj; atzu'n Josapat tk'wal Ayilud ajtz'ib'al te nimaqkawil.¹⁷Aye'tzunkye Sadok, tk'wal Ayitub', ex Ayimelek tk'wal Ab'yatar, pale qe'toq; atzu'n Serayiy aj tz'ib'altoq,¹⁸atzu'n B'enayiy tk'wal Joyada, nejenel kye xq'uqil kyeretey ex peletey. Aye'tzu'n tk'wal Dab'i pale qe'toq. Onin Dab'i ti'j Mepi-b'oset

¹Jun q'ij xjelun Dab'i: ¿Ma ati jun kyxol tyajajil Sawul kyejni anq'in, tu'n wonine' ti'j te nab'ab'lte Jonatan?, chij.

²Atitoqtzun jun majin toj tja Sawul, Sib'a tb'i, xi' txokb'aj tu'n tpon tk'etz Dab'i. Tetzunj tpon, xitqani'n nimaqkawil te:
—¿Ma aya Sib'a?, chij.
Atzunte xittzaq'we'n:
—Ayin na'tzune', ajb'el teya, chij.

³Xi'tzun tqani'n nimaqkawil te:
—¿Ma atix jun kyxol tyajajil Sawul xkyej anq'in tu'n nb'inchanteye' b'a'n te toj tb'i Qman Dyos?, chij.
Atzunte' Sib'a xittzaq'we'n:
—Atix jun tk'wal Jonatan, tzkajqe' kab'e' tqan, chij.

⁴—¿Jatzun ta'ya'?, chi nimaqkawil.
—Xi' ta'ya' tja Makyir tk'wal Amyel, toj Lodeb'ar, chi Sib'a xittzaq'we'n.

⁵Tchaq'tzun nimaqkawiltz tu'n txi' iq'b'aj jatoq ta';⁶tetzunj tpon Mepi-b'oset, tk'wal Jonatan ex tchman Sawul, twitz Dab'i, kub' tzipe te ninb'il.
—¡Mepi-b'oset! chi Dab'i xitma'n te:
Atzunte xittzaq'we'n:
—Luqine' lu nimaqkawil, titi' wajb'ene' teya, chij.

⁷Xi'tzun tma'n Dab'i te:
—Lalun xob'a, qu'n kxel nka'yi'nta b'a'nxi'x te nab'ab'lte Jonatan ju' qtzan tmana. Knb'incha'ye' tu'n kyxi' anjsa'n tkyaqilju' ttx'otx' qtzan tchmana Sawul teya, ex kwala wuk'i'le' kukxju', chij.

⁸Atzunte Mepi-b'oset kub' tzipe ex xitma'n:
—¿Tiqu'ntzun ntzaja' laqj tk'u'ja wi'je', nimaqkawil, extzun ikqinju'ye' ja'lo kse'n jun kyimni tx'yan?, chij.

⁹Atzunte nimaqkawil tzaj ttxko'n Sib'a, ju' ojtxi' ajb'eltoq te Sawul, ex xitma'n te:
—Matxi' txinq'o'ne' tkyaqilju' atitoq te Sawul ex tkyaqilju' atitoq kye tyajajil te Mepi-b'oset ju' tchman.¹⁰Qu'mtzun aya kb'el aq'unanteju' tx'otx' kyuk'i'lju' tk'wala exqe' tmajena, ex kxe'l tk'u'nju'ya kjawil twitz, tu'ntzun kywanju' tyajajil Sawul kukxju', expe' atzu' kwala' Mepi-b'oset ju' tchman nk'etze', chij te.
Ate'toq o'lajoj (15) tk'wal Sib'a ex junaq (20) tmajen,¹¹xittzaq'we'n Sib'a te nimaqkawil:
—Knb'incha'we' tkyaqilju' matxi' tmaya weye', chij.
Atoqtzuntzu' nwana' Mepi-b'oset kukxju' tja Dab'i, naku'xwitloj tk'walku' nimaqkawil.¹²Expe' atitoq jun tk'wal b'o's, Mikayiy tb'i, kykyaqiltzunju' najlqe'toq tja Sib'a intoq che ajb'en te Mepi-b'oset.¹³Atzunte Mepi-b'oset, tu'nju' tzkajqe'toq kykab'il tqan, najlitoq Jerusalen, qu'n atoqtzu' nwana' tk'etzu' nimaqkawil. Kub'kyi'j aj Siryo ex aj Amon tu'n Dab'i (1 Cr 19.1-19)

¹Tik'lenxi'tzun jte' q'ij kyim Naas, nimaqkawil kye aj Amon, atl Anun ju' tk'wal kawin te t-xel.²Kub'tzun t-xima'n Dab'i tu'n tk'u'jlante Anun, tk'wal Naas, kse'nx tb'inchaju' tman te, e'xitchq'o'ntzun jte' nejeneltz kye t-xjal te q'oj q'olb'elte Anun tu'n tpaj kyimju' tman. Atzunj kyponju' nejenel kye t-xjal Dab'i toj kytanam aj Amon,³xikyma'nju' kynejel aj Amon te Anun, ju' kynimaqkawil: ¿Oktzun xe'l toksla'na qama che tzaj t-sma'n Dab'i xjal lu q'olb'elteya, ex k'ol chjonte tu'nju' tb'incha tmana te? ¡Naqlo ẍe' ulkye' xjal lu ka'yilte ex nenulte nintnam tu'n tkub'kyxitu'n!, chechij.

⁴Tchaq'tzun Anuntz tu'n kykub' tzyu'n nejenel kye t-xjal Dab'i, ex tu'n tel jon nik'jan kyxmatzi ex tu'n tkub' laqu'n nik'janju' kyi'j, ku'pumnix twi' kẍo'p. Eb'aj anj tchq'o'ntzuntz.⁵Tetzunj tb'inte Dab'i, tchaq' tu'n kyxi' k'lub'aj tu'n mlalon tz'el kych'ixaw, ex tu'n txi' q'ma'n kye tu'n kykyajten Jeriko ex tu'n kyanjtz tzmaxi' ajtb'aj ch'iyju' kyxmatzi.

⁶Ex kane toj kywitz aj Amon qa matxi'toq che ok te tajq'oj Dab'i, qu'mtzun kychoj kab'mutx' lajk'al (20,000) xjal aj Siryo te q'oj te B'et-reob' ex te Sob'a, kab'k'al lajnaq (1,000) te nimaqkawil Maaka, atzun junmutx' lajk'al (12,000) te Is-tob'.

⁷Tb'itzun Dab'i ex xitchq'o'n Joab' kyuk'i'l kykyaqil t-xjal te q'oj.⁸Eb'je'tztzun aj Amontz ex kub' kytxoli'n kyib' tu'n kyq'ojin ttziju' nintnam, aye'tzunkye' aj siryo, te Sob'a ex te Reob', exqe'ju' t-xjal Is-tob' ex te Maaka e'kub'ten toj kojb'il.⁹Tetzunj tka'yinte Joab' tej kytzaj niq'j ajq'oj twitz ex ti'jxi', eb'jaw t-sk'o'nju' t-xjal te q'oj aj Israel kuwxi'x che q'ojin, tb'inchatzun tib'tz tu'n tq'ojin kyi'ju' aj siryo.¹⁰Aye'tzun txqantl e'kyaj tq'o'n tjaq' tkawb'il Ab'isay ju' titz'in, tu'n kyq'ojin kyi'j aj Amon,¹¹ex xitma'n te: Qama tka'yiya xi'toq qkub'e', wixkukytzaje' onilqeye', qatzun matxinka'yine' xi'tkub'kyi'je', qo xe'le' onilkyeye'.¹²Kuwxa, ex qoq'ojin tu'n tkyaqil qipumal tu'n tkletju' ninqtanam ex nimaqttanam Qman Dyos. ¡Ex tb'inchaxwittzun Qman Dyosju' b'a'n toj twitz!, chij te.

¹³Xi'tzun Joab'tz kyuk'i'l t-xjal q'ojil kyi'j aj siryo, aye'tzunkye e'kub' oq twitz.¹⁴Tetzunj kyka'yinte aj Amon e'kub' oqju' aj Siryo, ex e'kub' oqkye twitz Ab'isay, eb'jo'kx toj nintnam. Mixtzunti'tl ok il Joab' tu'n tq'ojin kyi'j aj Amon ex anjti'j Jerusalen.

¹⁵Tetzunj kyka'yinte aj Siryo qa matxi'toq kub'kyi'j kyu'n aj Israel, b'aj kyb'u'yi'n jumajtlkyib'.¹⁶Tchaq' Adad-eser tu'n kyxi' q'ib'aju' siryo ate'toq jlajxi' nin a' Ewprates, ex e'pon Elam. Nejlitoq Sob'ak kywitz, nejenel kye t-xjal Adad-eser te q'oj.¹⁷Naqtzun inb'ent tb'inte Dab'i ja'lu, eb'aj tb'u'yi'n kykyaqil aj Israel te q'oj, ex e'jlajin a' Jordan ex e'pon Elam. Atzuntzu' eq'ojina' aj Siryo tuk'i'l Dab'i, ex oktilil kyu'n tu'n tkub' Dab'i,¹⁸tetzunj kyka'yinte xi'toq tkub'kyi'j, e'kub' oq kywitz aj Israel, qu'n matxitoq che kyim jo'mutx' (40,000) xjal ti'j chej, atzun junk'al o'lajnaq (700) iq'i'n kykarwaj te q'oj; expe' tak'xi'x Sob'ak ju' nejenel kyeju' xjal aj Siryo tu'n Dab'i, ex axtzu' kyaja' kyim.¹⁹Tetzunj kyka'yinte kykyaqilju' nimaqkawil q'o'ntoq kyib' tuk'i'l Adad-eser matxi'toq che kub' kyu'n aj Israel, e'yolin tu'n lan che q'ojintl kyuk'i'l aj Israel ex e'kyajten tjaq' kykawb'il. Atxi'xtzunj exob' aj Sirya tu'n kyonintl kyi'ju' aj Amon. Tb'inchb'en Dab'i tuk'i'l B'et-sab'e

¹Jumaj, tej nche b'echin tze, toju' tq'ijlalil intoq che exu' nimaqkawil q'ojil, e'xitchq'o'n Dab'i Joab' exqe' nejenel, kyuk'i'l kykyaqil aj Israel te q'oj, eb'aj kub' kyb'yo'n aj Amon ex okkytxoli'nkyib' ti'jile nintnam Rab'a. Atzunte Dab'i, axtzu' kyeja' ten Jerusalen.

²Jun qale, akxtoq tb'aj ojlan Dab'i toj tkuẍb'il, ex b'etel tib'aju' tja te kawb'il, o'kx txi' tka'yi'n jun qya tzmaxtzu' na'tz tb'anil ka'yin intoq ichin, qu'n tzmaxtoq nt-ẍtilsa'ntib' teju' ttx'ajin. Tchaq' Dab'i tu'n t-xib'i'n alkyeju' qya lu, ex xiq'ma'n te qa a B'et-sab'e, tmyal Elyam, t-xu'jil Uriy ju' itit. Tchaq'tzuntz kye jte' sanjelal tu'n tpon kyiq'i'n tk'etz, kub' kẍetzuntz tuk'i'l, anjtzunte qyatz tja.

⁵Majx kyej ch'onwi'yixju' qya, ex oktma'n te Dab'i.⁶Tchaq'tzun Dab'itz te Joab' tu'n ttzaj tchq'o'n Uriy ju' itit, ex ku chi Joab' tzaj tchq'o'n.⁷Tetzunj tul Uriy twitz Dab'i, xi' t-xjelu'n te se'ntoq ta' Joab' exqe'ju' xjal te q'oj, ex se'n telju' q'oj.⁸Tchaq'tzuntz te tu'n tanj tja ex tu'n kyb'aj ttxjo'nju' tqan.
Naqtzun inb'ent tetz Uriy toju' ja te kawb'il, xi' t-sma'n nimaqkawil jun wab'j tb'anilxi'xte jun oyaj te;⁹atzunte Uriy, axtzu' exa' qonik'an tu'n ttziju' ja te kawb'il kyuk'i'lju' xq'uqil te nimaqkawil.¹⁰Xiq'ma'ntzuntz te Dab'i qa minti' anj Uriy tja, xitzun t-xjelu'n Dab'i te:
—¿Tiqu'ntzun minti' sanja tjaya, tzmana' sula toju' tb'eya?, chij.

¹¹Atzunte Uriy xittzaq'we'n te:
—Myab'a'n sela' toj nwitze' tu'ntoq wanje', tu'n nxi'ye' wal ex k'wal, ex tu'n nkub' kẍeye' tuk'i'l nxu'jile', atzunju' kax xjan naq xb'alun tokx tib'aj ex kyib'aju' xjal te q'oj aj Israel ex aj Juda; expe' tib'aju' nnejele' Joab' ex kyib'aju' nejenel kye t-xjala te q'oj, nimaqkawil. ¡Naq tu'nela nimaqkawil, lay nb'inchawe' ikju'!, chij.

¹²Tchaq'tzun Dab'i te:
—Kuna' tkyeja ja'lo, najchi'jtzun txinq'o'n anb'ile' teya tu'n tanja, chij.
Qu'mtzun kyej Uriy jun q'ijtl toj Jerusalen.¹³Xi'tzun ttxko'n Dab'i wal ex k'wal tuk'i'l, ex kub' ttx'ojt-sa'n. Tetzunj tok qonik'an, etz Uriy ex xi' wtal kyuk'i'lju' xq'uqil ja te kawb'il, mya tu'nwt tanj tja.

¹⁴Tetzun juntl prim, kub' ttz'ib'a'n Dab'i jun u'j te Joab', ex xitq'o'n tu'n txi' tiq'i'n Uriy.¹⁵Xi' ttz'ib'a'n ikjalu: Q'onka Uriy twitzxi', ja in nipina'xi'x q'oj, ex kyq'onkje' tjunal tu'n tkub' b'yo'n kyu'n ajq'oj, chij xittz'ib'a'n.

¹⁶Tetzunj tb'aj ttxoli'n Joab' ti'jileju' nintnam tu'n tq'ojin ti'j, kub' tq'o'n Uriy jata'qe'ju' xjal te q'oj kuwqe'xi'x,¹⁷tetzunj minab'en kyb'je'tzu' kolol ti'ju' nintnam q'ojil ti'j Joab', eb'aj jte' nejenel kye t-xjal Dab'i te q'oj, ex ajun Uriy b'aj kyxol.

¹⁸Taq'tzun Joab' jun tqanil chik'lixi'x ti'ju' b'aj toju' q'oj,¹⁹ex xitma'n teju' sanjelal ikjalu: Ajtb'aj tma'na te nimaqkawil tkyaqil ti'ju' q'oj;²⁰extzun nab'en ntzajku' ttx'u'jil nimaqkawil exqa matqani teya: ¿Titiqu'n ẍepona' lq'exi'xe' q'ojil tk'etzju' nintnam? ¿Ma mitzunjunti' b'i'n kyu'ne' qa ntzaj kyxon ti'xti' tzmaxtzu' tib'aj tapi,²¹kse'n b'aja' Ab'imelek, tk'wal Jerub'aal tu'n jun qya toj Teb'es, tej ttzaj t-xon jun ka te cheb'l tzmaxtzu' twi' tapi? ¿Titiqu'n ẍepona' lq'exi'xe' tk'etzju' tapi?, qa chi. Kxe'l ttzaq'we'ntzuntza: Expena' matxi' b'aj Uriy ju' itit, nejenel kye t-xjala te q'oj, chiku'ya te, chij.

²²Xi'tzunte sanjeltz, tetzunj tpon tk'etz Dab'i, b'ajx tma'n tkyaqilju' matxi'toq txitma'n Joab' te. Atzunte Dab'i tzaj ttx'u'jil ti'j Joab' tej tb'inte, ex xitma'n teju' sanjel:
—¿Titiqu'n ẍe'pon lq'exi'xe' tk'etzju' nintnam tu'n kyq'ojine'? ¿Ma mitzun jun b'i'n kyu'ne' qa ntzaj kyxon ti'xti' tzmaxtzu' twi' nintapi, kse'n b'aja' Ab'imelek, tk'wal Jerub'aal tu'n jun qya toj Teb'es, tej ttzaj t-xon jun ka te cheb'l tzmaxtzu' twi' nintapi? ¿Titiqu'n ẍepona' lq'exi'xe' twitz nintapi?, chij.

²³Xi'tzun ttzaq'we'n sanjelal:
—Mastoq ati tu'me'l kyu'n xjal eb'je'tz tilj q'ojil qi'je' ti'jxi' nintnam, atzunj qxi'ye' q'ojil kyi'j anj jumajtlkyi'j qu'ne' tzmax ttzi nintnam.²⁴Atzuntzu' eb'aj tzaja' smajina' twi' nintapi kyi'ju' t-xjala te q'oj, ex e'kyim jte' nejenel, ex axjun Uriy ju' itit kyim kyxol, chij.

²⁵Xi'tzun ttzaq'we'n Dab'i te t-sanjel Joab':
—Q'manxa te Joab' tu'n lalun b'isun tu'n tpaj, qu'n ikxte nb'aju' toj jun q'oj. Naq o'kx tu'n tq'ojin kuwxi'xtl, tzmax tu'n tb'aj t-xitu'n nintnam. Atzunta q'uqb'anxa tk'u'j, chij.

²⁶Tetzunj tb'inte t-xu'jil Uriy qa matxi'toq kyimu' tchmil, kyejten toj b'is;²⁷tik'lenxi'tzu'n tq'ijlalilju' b'is, tchaq' Dab'i tu'n txi' q'ib'aj ex pon tiq'i'n toju' tja te kawb'il, oktq'o'n te t-xu'jil ex ul jun tk'wal tuk'i'l. Mixyab'a'n ela'ju' tb'incha Dab'i toj twitz Qman Dyos. Tzak'u'njtz Dab'i tu'n Natan

¹Tzaj tchq'o'n Qman Dyos Natan ju' t-sanjelal tk'etz Dab'i. Tetzunj tpon Natan tk'etz, xitma'n te:
—Atitoq kab'e' ichan toj jun nintnam. Aju' jun q'inun, atzu'n juntl prow.²Nimtoq txqan tritju' q'inun ex twakyix,³atzunte prow naq o'kxku' jun tal ttxu trit tzajni tlq'o'n. A kub' ch'isante, ex ch'iyte' tal trit kyuk'i'lju' tk'wal tk'etz; junxtoq nche wana' ex nche k'wana', ex ttzitk'u'j intoq wtana'. ¡Inxi'xtoq tk'u'jla'n ichanju' tal trit naku'j jun tmyal!⁴Jumaj, pon jun xjal xb'etzalte ichan q'inun; atzunte q'inun mixti'x el jun tal rit mujqa wakx ti'jtk'u'j tu'n tkub' tb'incha'n twaju' tula, ape' tb'inchaju' elt-xk'a'yi'n tal tritju' prow ex kub' tb'incha'n te twaju' ula pon.

⁵Tzajtzun ttx'u'jil Dab'i ti'ju' ichan lu, ex xitma'n te Natan:
—¡Lu Qman Dyos in ka'yin, in ati tu'n tkub' b'yetju' xjal xb'inchante ja'lu!⁶¡Ex ati tu'n tchjonte kyajmaj twi'ju' tal rit, qu'n mixti'x sexch'yon ti'tk'u'j! chij.

⁷Xitma'ntzun Natantz te:
—¡Aju'ya xjal lu! Ex lu matxi' tma Qman Dyos, ti'ja: Majaw nsk'o'na tu'n toka te nimaqkawil toj Israel, ex mankola toj tq'ob' Sawul;⁸matxinq'o'ne' tja kawb'il teya exqe'ju' tqya Sawul, exqepe' kawb'il toj Israel ex toj Juda. Naqwitna' ch'i'n ja'lu, mawtlo txi' nq'o'n txqantl ti'xti'ye' teya.⁹¿Titiqu'n sel tik'una'ya nyole', ex mya' b'a'n xtb'incha? Makub' tb'yo'na Uriy ju' itit, mache ajb'en aj Amon b'yolte tu'na ex matz'el tiq'i'nju'ya t-xu'jil.¹⁰Machin eltik'o'na tej tokmiltz'uja ti'ju' t-xu'jil Uriy ju' itit tu'n tkub' t-xu'jila'na, ja'lo majx kjelten b'yojtib'il toj tjaya.¹¹Ayinku'ye' Dyos Manb'aj inchin q'mante: Knb'incha'ye' tu'n tjaw anq'inju' taq'wixil kyxolju' toj tjaya, ex twitzku'ya che elil wiq'ine' t-xu'jila ex kxe'l nq'o'ne' te junju' tyajajila, ex q'ijlku' kb'el kẍe kyuk'i'l.¹²Qama tb'inchata' il toj ewaj, atzunwe' knb'incha'ye' kywitz kykyaqil aj Israel tojxi'x spik'un, chi Dyos, chi Natan te.

¹³Xitma'ntzun Dab'itz te Natan:
—Matxi' chin b'inchan ile' twitz Qman Dyos, chij.
Atzunte Natan xitma'n te:
—Myata kb'el tz'e'ysa'n twitz tu'n Qman Dyos, ex lay kyima.¹⁴Naq o'kxju' tk'wala tzma sitz'j kkyimel, qu'n matxina' tb'inchaya jun nimaq il twitz Qman Dyos, chi Natan te.

¹⁵Tetzunj tanj Natan tja, tzaj tq'o'n Qman Dyos jun yab'il kuwxi'x ti'ju' tal tk'wal Dab'i itz'ji tuk'i'l t-xu'jil qtzan Uriy.¹⁶Aq'witzun Dab'itz kub'sal twitz Qman Dyos ti'ju' tk'wal, mewayin, ex b'aj qonik'an tu'n kuẍli twitz tx'otx'.¹⁷Aye'tzu'n tijwnaq najlqe'toq toju' tja te kawb'il intoq che'x q'malte te tu'n tjawe', atzunte mixti'x taj, ex mixti' taj tu'n twan kyuk'i'l.

¹⁸Tb'ajlenxi'tzun wuq q'ij kyimju' k'wal, aye'tzunju' nejenel kye t-xjal Dab'i intoq che xob' tu'n txi' kyma'n te, qu'n kub' kyxima'n: Tepena'j itz'xtoqju' k'wal, intoq qo'x yolin te ex mixti'x nqo' ok toj twi', ¡mitzunloyate' ja'lo matxi' kyim! ¡Jaku'lo tb'incha jun ti'xti' taq'wixi'x ajtb'inte!, chechij.

¹⁹Tetzunj tel tniky' Dab'i qa intoq che yolinju' nejenel kye t-xjal kyxolilex, kane toj twitz qa matxi'toq kyimju' k'wal; xi'tqani'ntzuntz kye:
—¿Ma matxi' kyimu' k'wal?, chij.
—Matxi' kyimte' —chechij.

²⁰Jawe'tzun Dab'itz twitz tx'otx', b'aj ichin, b'aj ch'ixpun ex oktq'o'n k'ok'sb'il ti'j, okxtzuntz k'ulul te Qman Dyos toju' ja te k'u'lb'il. Tb'ajlenxi'tzun k'ulun, xi' wal tja.²¹Xikyqani'ntzun nejeneltz te:
—¿Titi'tzun ntb'incha'na, nimaqkawil? Tej itz'xtoqju' ne'ẍ, intoq mewayina ex intoq oq'a ti'j; atzu'n ja'lo xkyim, ¡Majawe'ya ex makub' tena wal!, chechij te.

²²Atzunte Dab'i xittzaq'we'n:
—Tej itz'xtoqju' ne'ẍ, intoq chin mewayine' ex intoq chin oq'e', qu'n kub' nxima'ne' qaj ktzajel q'aq'an tk'u'j Qman Dyos wi'je'.²³Atzu'n ja'lo matxi'na' kyim, ¿titi' k'ajb'ela' qama chin mewayintle', layna' tz'anjtzti'j wu'ne'? ¡Xipe' nxi'we' tk'etz, atzunte layx tz'anjtztlti'j nk'etze'! chij. Titz'jlen Salmon

²⁴Yajxi'tzuntel okten Dab'i q'uqb'alte tk'u'j B'esab'e ju' t-xu'jil. Xi' xb'etzalte ex kub'kẍe tuk'i'l, ex ul juntl tal, oktq'o'n Dab'i tb'i, Salomon. Tk'u'jlate Qman Dyos k'wal lu,²⁵ex tzaj tma'n te Dab'i tu'nel Natan ju' t-sanjelal. Oktzun tq'o'n Dab'i tb'iju' k'wal Jedidiyas, kse'nxju' tzaj tma'n Qman Dyos te. Kub'ti'j Rab'a tu'n Dab'i (1 Cr 20.1-3)

²⁶Atzuntlte Joab' xi' q'ojil ti'ju' nintnam Rab'a kytanam aj Amon, tetzunj ch'inxtoq ttzyetu' nintnam jata' kawb'il tu'n,²⁷xit-sma'n tqanil lu te Dab'i: Nchin q'ojine' ti'j Rab'a, ex matxi' tzyetu' nintnam wu'ne', ju' kuwsa'n kyu'n tb'eyil a' tjaq' tx'otx'.²⁸Qu'mtzun nimaqkawil, b'uyinqe'tza txqantl xjal te q'oj, lwix q'ojina ex tzyuma nintnam, qu'n qa ayine' ẍin b'inchante, jaku' tz'ok q'o'n nb'iye' ti'j, chij xit-sma'n.

²⁹Ku, chi Dab'i eb'aj tb'u'yi'nju' t-xjal toj tneji'n ex e'xi' q'ojil ti'j Rab'a, ex tzyet kyu'n.³⁰Elkyiq'i'n q'anpwaq koron toj twi'ju' nimaqkawil, ate'k tb'anil ab'j ti'j, masch'i'n oxnaq kab'lajoj lib'r tk'i' nik'jan (72.6) talal ex jaxkyq'o'n toj twi' Dab'i. Ex nim ti'xti' twi' wi'yal etzkyiq'i'n Dab'i toju' nintnam lu,³¹aye'tzunju' xjal ate'xtoq toju' nintnam, eb'je'tz tiq'i'n ex e'oktq'o'n aq'unal tuk'i'l job'l tze, yelb'i ex k'uxb'il pab'l toj si, ex tu'n ttzq'ajset ladris toj chuj. Ex ax tb'inchaju' kyi'ju' txqantl nimaqkytanam aj Amon, anjtzun ti'jtz kyuk'i'lu' t-xjal toj Jerusalen. Eltch'ixaw Tamar tu'n Amnon

¹Atitoq jun tmyal Dab'i tb'anilxi'x ka'yin, Tamar tb'i, tanab' Ab'salon. Matzajtlte Amnon, tk'walx Dab'i, oklaqj ti'j,²expe' majxkub' yab'ti tu'n tpaj; mixtoqti'x tu'me'l toj twitz tu'n tb'inchante jun ti'xti' ti'j, qu'n na'mxtoq txi' tzyu'n te Tamar tu'n jun ichan.³Atitoqtzun jun tamiw Amnon, tx'yan tuk'i'l, Jonadab' tb'i, tk'wal Sima, kyitz'in kyib' tuk'i'l Dab'i.⁴Jun q'ij xitqani'n Jonadab' te:
—¿Titi' nniq'ina, tk'wal nimaqkawil, qu'n atl junjun q'ij q'ancha'lxi'xtl twitza? Q'mantza weye', chij te.
Atzunte Amnon xittzaq'we'n te:
—Naq tu'n tpaju' matxi' chin oklaqje' ti'j Tamar, tanab' witz'ine' Ab'salon, chij.

⁵Xi'tzun tq'o'n Jonadab' jun tnab'l:
—Kutxi'ya kẍeb'il ex yab'sanku'tib'a. Ajtzun tpon tmana ka'yilteya, kub'sanxa te tu'n ttzaj tchq'o'n Tamar ju' tanab'a q'olte twaya ex tu'n tkub' tb'incha'n axtzu' tk'etza, tu'n toktka'yina ex tu'n t-xitwanju'ya tb'inchb'aj, chij te.

⁶Xi'tzun Amnontz kẍeb'il ex kub' tyab'sa'ntib'. Tetzunj tponju' nimaqkawil ka'yilte, xitma'n Amnon te:
—¡Taye, najsama! Qaj saj tchq'o'n ch'inta wanab'e' Tamar tu'n tkub' tb'incha'n nwaye' tza'lu, ex aku' ktzajel q'onte weye', chij.

⁷Xitzun tchq'o'n Dab'i Tamar ja, ex xitma'n te:
—Kutxi' ch'i'nta tja t-xib'ena Amnon, ex b'inchankx jun twaya, chij te.

⁸Ku, chi Tamar xi' tja t-xib'en Amnon, kuẍlitoq. Tzaj tiq'i'n Arin ex b'aj t-xyuq'i'n, axtzu' b'aja' tb'incha'na' ex okx ttzq'ajsa'n;⁹tzajtzun tiq'i'n tlaq ex xitq'o'n twa; atzunte Amnon mixti' taj tu'n twan ex xitma'n kye kykyaqilju' te'qe'toq tu'n kyb'je'x.¹⁰Tetzunj matxi'toq che b'je'x kykyaqil, xitma'n Amnon te Tamar:
—Iq'i'ntza wab'j tza'lu toj kuẍb'il, ex aku'ya ktzajel q'onte weye', chij.
Ku, chi Tamar e'tzaj tiq'i'nju' muqin e'kub' tb'incha'n ex xitiq'i'n te t-xib'en Amnon toj tkuẍb'il,¹¹tetzunj tpon lq'e tu'n twan, kub' ttzyu'n ex xitma'n te:
—Kutzaja, wanab', kẍeku'ya wuk'i'le', chij te.

¹²Atzunte xittzaq'we'n:
—Lay, Amnon, lalun tb'inchaju'ya lu wi'je', qu'n minti' in b'inchanjtzte' lu toj Israel. ¡Lalun tb'inchaju'ya taq'wixil lu!¹³¿Jatzun chin xe'laye' tuk'i'lu' nch'ixawe' lu? Atzunta, k'okyel q'o'na te jun xjal mixti'x tnab'l toj Israel. B'inchama xtalb'il q'manxa te nimaqkawil, layna' tmaqte' tu'n wokye' te teya, chi Tamar te.

¹⁴Atzunte Amnon mixti' xitb'i'n, kub' tkutz'i'n Tamar ex kub'kẍe tuk'i'l, qu'n atixixte tipumal kyetwitz.¹⁵Yajxi'tzuntel majx tzaj tx'a'lti'j tk'u'j ti'j, ex majx el tik'u'nxi'x kyetwitz intoq tk'u'jla'n. Qu'mtzun xitma'n te:
—We'k'tza ex kutxi'ya, chij.

¹⁶Atzunte Tamar xittzaq'we'n te:
—¡Lay, Amnon, qu'n qama chin ex t-xla'jana ja'lo tzalu, nimaq ilxi'xtl kyetwitzju' matxi' tb'inchaya wi'je'!, chij.
Atzunte Amnon mixti' xitb'i'n;¹⁷tzajpe' txko'nju' tmajin ex xitma'n te:
—¡Iq'i'mixju'ya qya lu tza'lu, ex jpumixa ja b'a'nxi'x twitz!, chij.

¹⁸Etztzun tiq'i'nju' majin tuja, ex kyej jpu'nju' ja b'a'nxi'x. Atzunte Tamar, toktoq jun t-xb'alun ku'j tb'anilxi'x, kse'nxju' intoq okkyq'o'n kymyal nimaqkawil na'mtoq kymje,¹⁹kub' tlaqu'n ex jax tchto'n tza'j toj twi', xi'tzuntz intoq oq' toj b'e, atokx tq'ob' toj twi'.²⁰Xi'tzun tqani'n Ab'salon ju' t-xib'en te:
—¿Ma a Amnonju' t-xib'ena xb'inchante lu teya? Qana'tzun aju', lalun txi' tma'na Tamar, qu'n t-xib'ena'ya. Lalun txitq'o'nxi'xa lu toj tk'u'ja, chij te.
Tetzunj tka'yinte Tamar, qa matxi'toq kyej kolb'i'n, axtzu' kyeja' tja t-xib'en Ab'salon.²¹Tetzunj tb'inte nimaqkawil Dab'i ja'lu, tzaj txqan ttx'u'jil; extzun min xittzak'u'n Amnon, qu'n intoq tk'u'jla'n tu'nju' a tnejel tk'walju'.²²Mixtzunti'te Ab'salon xitma'n te Amnon, atzu'n toj tanmi inxi'xtoq tx'a'lti'j tk'u'j ti'j qu'n matxi'toq tz'el tiq'i'n tch'ixawju' tanab'. Oktq'o'n Ab'salon tu'me'l t-xel te Amnon

²³Tb'ajlenxitzun kab'e' ab'q'i, xiniqetoq t-xjal Ab'salon jol kyi'j trit toj B'aal-asor, nqaku' tk'etz ttanam Eprayin, e'ttxoktzun Ab'salon kykyaqilju' tk'wal nimaqkawil toj jun wan.²⁴Expe' xiku' tk'etzu' nimaqkawil, ex xitma'n te:
—Wajb'ile' tu'n ttena nimaqkawil kyuk'i'lju' nejenel kye t-xjala toj jun wan njaye', ayine' ju' ajb'el teya, xiniqe'ku' nxjale' jol kyi'j nrite', qu'mtzun wajb'ile' tu'n kytene', chij.

²⁵Atzunte' nimaqkawil xittzaq'we'n te:
—Lay, nky'ajul, myab'a'n tu'n qxi'ye' qkyaqile', qu'n jaku' nimxi'x tpwaqa b'aj, chij.
Ok il Ab'salon ti'ju' nimaqkawil, ex mixti'x taj tu'n txi', naq o'kx xitqani'n ky'i'wb'il tib'aj.²⁶Xi'tzun tma'n Ab'salontz te:
—Qatzun mixti'x tu'me'l tu'n txi'ya, maskye o'kxu' ntzike' Amnon, chij.
Atzunte' nimaqkawil xitqani'n te:
—¿Tiqu'ntzun tajb'ila'ya tu'n txi' Amnon?, chij.

²⁷Tu'ntzunju' ok ilxi'x Ab'salon, chab'ax taju' nimaqkawil tu'n txi' Amnon kyuk'i'lju' txqantl tk'wal.
Matxi'toqtzun kub' tb'incha'n Ab'salon jun ninwan kse'nte jun nimaqkawil,²⁸ex ojetoq txitma'n kyeju' tmajen: B'a'nx che ka'yine' ti'j Amnon ajttzyet twi', ajtzun txi' nma'ne' tu'n tkub' kyb'yo'ne', wix kub' kyb'yo'ne'. Lalun che xob'e' ti'j, qu'n nchaq'b'il we'. Qu'mtzun, kuwqe'xe' te, chij kye.

²⁹Qu'mtzun, ku chiqeju' tmajen Ab'salon, kub' kyb'yo'n Amnon. Tetzunj kyka'yinteju' txqantl tk'wal nimaqkawil eb'jaw we', eb'aj oqtzuntz kyi'j kychej.

³⁰Inxtoqtzun che b'et tej tponaj tqanil te Dab'i qa matxi'toq che kub' tb'yo'n Ab'salon kykyaqilju' tk'wal.³¹Jawe'tzun nimaqkawiltz, b'aj tlaqu'nju' ti'j te yek'b'il b'is ex kub' joqetzuntz twitz tx'otx'. Ex kykyaqilju' nejenel kye t-xjal ju' ate'toq atzu' b'ajkub' kylaqu'nju' kyi'j;³²atzunte Jonadab', tk'wal Sima, ju' kyitz'inkyib' tuk'i'l Dab'i, yolin ex tma:
—Lalun kub' t-xima'na nimaqkawil qa matxi' che kub' b'yo'n kykyaqilju' tk'wala. Naq o'kxte Amnon xkub' b'yo'n, qu'n iky kub' t-xima'n Ab'salonju' atxi'x tej tkub'tyaju'n Amnon Tamar ju' tanab'.³³Qu'mtzun, lalun kub' t-xima'na nimaqkawil qa matxi' che b'aju' tk'wala. O'kxte Amnonju' matxi' b'aj, chij.

³⁴Tetzunj txi' oq Ab'salon, xitka'yi'n ku'xun intoq xq'uqin, nim txqan xjal ljo'ntoq kyku'tz toj tb'eyil Oronaym, tk'u'j witz. Xi' ojqelantzun ku'xuntz q'malte teju' nimaqkawil qa exi' tka'yi'n txqan xjal ljo'ntoq kyku'tz toj tb'eyil Oronaym.³⁵Atzunte Jonadab' xitma'n teju' nimaqkawil:
—Luqe'ju' tk'wala che ul nimaqkawil, kse'nxju' xkub' nximane' ayine' ajb'el teya, chij.

³⁶Naqtzun inb'aj yolin, tej kyponju' tk'wal nimaqkawil, ex e'kub' oq' b'a'nxi'x. Ex ikxju' nimaqkawil kub' oq' kyuk'i'lju' nejenel kye t-xjal.³⁷Atzunte Ab'salon xi' oq tk'etz Talmay, tk'wal Amyud, nimaqkawil te Kyesur, ex kyejten oxe' ab'q'i atzu'. Atzunte Dab'i intoq oq' tkyaqil q'ij ti'j Amnonju' tk'wal,³⁹tetzunj tik' tna'l tu'n, tajb'ilxi'xtoq tu'n tok tka'yi'n Ab'salon. Anjtzti'j Ab'salon tu'n Joab'

¹B'i'ntoq tu'n Joab' tk'wal Sarb'ya, qa intoq ximan nimaqkawil ti'j Ab'salon,²tchaq'tzuntz tu'n t-xitxokb'aj jun qya tx'yanxi'x tuk'i'l toj Tekoa. Xitma'ntzuntz te: Q'onk ti'ja te b'is naku'xwitloj in b'isuna; ex lalun tz'ok tq'o'na k'ok'sb'il ti'ja, tu'n tq'ancha'lin qa matxi' b'et q'ij in b'isuna ti'j jun kyimni.³Kutxi'tzuntza twitzju' nimaqkawil ex q'manxa te kse'nxju' kxe'l nma'ne' teya, chij.
Tb'ajlenxi'tzun tma'n Joab' te, ti'ju' kxe'l tma'n,⁴xi'tzun qyatz aj Tekoa twitzju' nimaqkawil, majx kub'joqe twitz tx'otx' te ninb'il, ex xitma'n te:
—¡Q'aq'antz tk'u'ja wi'je' nimaqkawil, chin tonima! chij.⁵Xi'tzun tqani'n nimaqkawil te:
—¿Ti'tzun in niq'ina?, chij.
Atzunte xittzaq'we'n:
—Mixti'we' nchmil, oje kyim,⁶ate'toqtzun kab'e' wale' ayine' ju' ajb'el teya, e'jaw q'ojin toj kojb'il; tu'ntzunju' mix-a'lo' kub' pa'nkye, k'ixb'iju' jun tu'nju' juntl ex majx kyim.⁷Atzun ja'lo kykyaqilu' nwitze'le' matxi' jawkyi'nkyib' wi'je' ex kyajb'il tu'n txi' nq'o'ne' xb'iyun toj kyq'ob', tu'n tkub' kyb'yo'n kse'nxju' xtb'incha te titz'in, extzun o'kxku' walju'ye' ati toklen ti'ju' etzb'il. Kyajb'il tu'n tkub' kynajsa'n o'kxku' jun twitztl wale' atix, tu'n lalun kyejten tyajajilju' qtzan nchmile' twitzju' tx'otx', chij.

⁸Xittzaq'we'ntzun nimaqkawiltz teju' qya:
—Kuna' txi'ya tjaya, kxe'l nchq'o'nwe' klolteya, chij.

⁹Atzunju' qya xittzaq'we'n te:
—Qatzun matzaju' taq'wix, tu'n tkub' tz'aq wib'aje' ex kyib'aju' toj tja nmane', ex mya tib'aja nimaqkawil mujqa tib'aju' tkawb'ila, chij.

¹⁰Xi'tzun ttzaq'we'n nimaqkawil:
—Qa ati jun tajb'il tu'n tb'inchante jun taq'wix ti'ja, q'intza nk'etze' ex lalunx yajuntl ti'ja, chij.

¹¹Atzunte qya ilxi'xtoqti'j tu'n, xitma'n:
—¡Chin kub'sale' teya nimaqkawil, kub'san ch'i'nta wi'je' twitz Dyos, tu'n lalun tz'ok tu'me'l t-xel tkamik qtzan wale' tu'nju' nwitze'le', qu'n nimxi'xtlju' xitb'il tzul qama kub' b'yo'nju' juntl!, chij.
Xi'tzun tma'nju' nimaqkawil:
—¡Lu Qman Dyos in ka'yin, laype' ku'tz tz'aq jun t-xya'mal twi'ju' tala!, chij.

¹²Xitma'n jumajtlju' qya te:
—Najsamxi'xa, nimaqkawil, q'ontza anb'il tu'n txi' nma'n juntl nyole', ayine' ju' ajb'el teya, chij.
—Q'mantzna'ya, chiju' nimaqkawil te.

¹³Xi' tqani'ntzun qyatz te:
—¿Tiqu'ntzun tajb'ila'ya nimaqkawil tu'n tb'inchanteju'ya lu ti'ju' ttanam Qman Dyos? Tu'nxtzunju' tyola matxi' tmaya nimaqkawil, ati tila, qu'n min tjo'na tu'n tanjtzti'ju' tk'wala exni oq.¹⁴Qkyaqil ati tu'n qkyim; ikyqo'ju' kse'n a' ajtel qojl twitz tx'otx', layx b'ent tjaw iq'etl. A pena'te' Qman Dyos ntzaj yek'unte tu'me'l tu'n tanjtzti'ju' xjal exni oq, mya tu'nwt tel tiq'i'nju' tchwinqlal.¹⁵Qu'mtzun machin nule' q'malte lu teya nimaqkawil, qu'n machin xob'e' kye xjal. Machin tzaje' yolil tuk'i'la, qu'n makub' nximane' qaj minab'en matzaj ttzaq'we'nju'ya xinqanine' teya.¹⁶Qama chin tzaj ttzaq'we'na nimaqkawil, qo kletele' tu'na tuk'i'lju' wale' twitzju' tx'otx' lu, ttx'otx' Qman Dyos.¹⁷Qu'mtzun ayine' ju' ajb'el teya nimaqkawil, inchin nayone' tu'n tqe nk'u'je' ti'ju' tzaq'web'l tu'na, qu'n ina' nelta tniky' ti'ju' b'a'n ex ti'ju' myab'a'n, kse'n jun tanjl Qman Dyos. ¡Kyajxwit ten Qman Dyos tuk'i'la nimaqkawil!, chiju' qya te.

¹⁸Xi'tzun ttzaq'we'n nimaqkawil teju' qya:
—B'inchama xtalb'il, lalun kub' tewu'n jun ti'xti'ya ti'ju' kxe'l nqani'ne' teya, chij.
—Qanintza, chiju' qya xittzaq'we'n.

¹⁹Xi'tzun tqani'nju' nimaqkawil te:
—¿A Joab' xiq'manteju' lu teya, ax?, chij.
Atzunju' qya xittzaq'we'n:
—Lu Qman Dyos in ka'yin, ikxi'xte' kse'n xtmaya. Ana'tzun Joab' ju' nejenel kye t-xjala, saj chq'onweye' tu'n ntzaje', ex aku' saj q'mante tkyaqilju' tu'n nmanteye'.²⁰Matb'incha, naqwitlo tu'n tb'aj nk'et ch'i'naqtlju' ti'xti'. Tojtzqina'ta nimaqkawil, tkyaqilju' inb'aj toju' tnam, qu'n atixi'x tnab'la kse'n jun tanjl Qman Dyos, chij te.

²¹Tu'ntzunju' yol lu, xitma'n nimaqkawil te Joab':
—Matxi' b'aj nik'ette' ti'xti' lu wu'ne'. Kutxi'ya ex k'lentza ku'xun Ab'salon, chij.²²Kub'tzun joqe Joab'tz twitz tx'otx' te ninb'il, xitqani'n k'i'wb'il tib'aju' nimaqkawil ex xitma'n te:
—Matxi' tz'el nnik'e' ja'lo nimaqkawil qa b'a'n wilwiye' tu'na, qu'n matxi' tb'inchaya kse'n jun tyolju' ajb'el lu teya, chij te.

²³Xi'tzun Joab'tz q'ilte Ab'salon toj Kyesur tu'n tpon Jerusalen.²⁴Atzunte nimaqkawil tchaq' tu'n t-xiyal tja ex mixti' tu'n tpon q'i'n twitz; qu'mtzun xi' Ab'salon tja ex min tilju' nimaqkawil.

²⁵Mixtoqti' jun xjal toj tkyaqil Israel tb'anilxi'x ka'yin kse'n Ab'salon, ex tu'nju' lu inxi'xtoq jaw nima'n. Mixtoqti' jun ttzakajil tzajx t-xe tqan japunx toj twi'.²⁶Ajtel tjon Ab'salon twi' ajtjapunchaq junjun ab'q'i, qu'n myab'a'n in tna'n toj, kyaje' lib'r tk'i' nik'jan talalju' twi', kse'nxju' malb'il toju' kawb'il.²⁷Ate'toqtzun oxe' tk'wal Ab'salon ex jun tmyal, Tamar tb'i, tb'anilxi'x ka'yin.

²⁸Kab'e' Ab'q'i ten Ab'salon toj Jerusalen ex mixti'x b'ent tpon jumaj twitzju' nimaqkawil,²⁹xi'tzun tqani'n Ab'salon xtalb'il te Joab' tu'n txi' te t-xel tk'etzju' nimaqkawil; atzunte Joab' min taj. Xitkub'sa'n jumajtl Ab'salon tu'n txi' ex mixjun taj.³⁰Xitma'ntzun Ab'salontz kyeju' tmajin:
—¡Kukyxi'ye' ex kyq'onke' tq'aq'al t-seb'ad Joab' awa'n tu'n toju' ttx'otx' ati tk'etzju' we'!, chij kye.
Ku, chechiju' tmajin Ab'salon exi' q'olokte tq'aq'al tawal Joab',³¹atzunte Joab' lwiyxi'x xi' ojqelan tja Ab'salon, ex xitma'n te:
—¿Tiqu'n soka' kyq'o'na' tmajina tq'aq'al wawale'?, chij te.

³²Atzunte Ab'salon xittzaq'we'n te:
—Xinma'ne' tq'umli teya tu'n ttzaja, tu'nwtzunlo txi'ya te nxele' tk'etzju' nimaqkawil ex tu'n txitma'na te qa mixti'x ttx'o'lajil tu'nju' ẍin netze' toj Kyesur; awtlote b'a'n axtzu' ẍin kyeja' tene'. Wajb'ilwe' tu'n nxi'ye' tk'etzju' nimaqkawil, exqa ati wile', chin tb'yo'nku'tzuntze', chij.

³³Xi'tzun Joab'tz tk'etzu' nimaqkawil ex xitma'n kse'n xitma'n Ab'salon te, atzunte nimaqkawil tchaq' tu'n t-xitxokb'aj. Atzunj tpon Ab'salon twitzju' nimaqkawil, majx kub'joqe twitz tx'otx' te ninb'il. Atzunte' nimaqkawil tk'am ex oktma'tzi'n. Jawtiq'i'ntib' Ab'salon ti'j Dab'i

¹Tb'ajlenxi'tzun jte' q'ij, ten jun tkarwaj Ab'salon te q'oj ex txqan tchej, ex e'kub' tnik'u'n jun tnej xjal kab'naqlajoj (50) kyb'aj te xq'uqilte.²Intoq jaw we' b'a'n prim ex nkub'ten ttzi b'e, ttzi nintnam, ex intoq che'x ttxko'n xjal nche b'aj pon twitz nimaqkawil tu'n tb'inchante tnik'alilti'j kye toj jun q'oj matzaj kyxol, ex intoq xitqani'n kye alkye nintnam ẍetzaja'. Qama txikyma'nju' xjal qa kyxol junju' tnej tyajajil Israel ẍetzaja',³intoq xitma'n kye: Tnik'alti'jte' tyola ntma'na, tu'me'lxi'x, extzun mix-a'lo'xte nkub' b'inteya toju' tkawb'il, chij kye.⁴Expe' nxittz'aqtza'ntl: ¡Ayinwte' ajkawil toju' tnam lu, ajwitlo kyul kykyaqilju' ati q'oj kyxol exqa toj tu'me'l q'malte weye', inwtlo nb'incha'ne' tnik'alilti'j kye!, chij.⁵Expena' qama pon lq'e jun xjal q'olb'elte, nxitq'o'n Ab'salon tq'ob' te, nnoktchle'n ex nnoktma'tzi'n.⁶Iktoqtzun ntb'incha'nju' kyuk'i'l kykyaqil aj Israel nche pon twitzju' nimaqkawil tu'n tb'inchanjtz tnik'alilti'j kye, ikytzu'n e'kanb'eta' tu'n.

⁷Tb'ajlenxi'tzun kyaje' ab'q'i, xitma'n Ab'salon teju' nimaqkawil:
—Chin kub'sale' teya nimaqkawil, q'ontza anb'il tu'n nxi'ye' Eb'ron, tu'n tjapunju' xintziya'ne' te Qman Dyos.⁸Qu'n tej antintoqe' Kyesur, toj Sirya, ayine' ajb'el teya nimaqkawil, xintziya'ne' te Qman Dyos qa chin k'ulule' te, qama tz'anjtoq wi'je' Jerusalen, chij.

⁹Xi'tzun ttzaq'we'nju' nimaqkawil te:
—Kutxi'ya ex lalun b'ajx tk'u'ja, chij te.
Xi'tzun Ab'salontz Eb'ron.¹⁰Tojxtzunju' kmuj lu, e'xitchq'o'n jte' t-sanjelal kyxol kykyaqilju' tnej tyajajil Israel q'malte kye qa naq aj txi' kyb'i'nju' tq'ojq'ojel chun, tu'n kyyolinte qa matxi'toq tz'ok q'o'n Ab'salon te nimaqkawil toj Eb'ron.¹¹Expe' exi' ttxko'n lajnaq (200) xjal aj Jerusalen, mixti' b'i'n kyu'n titi'ju' in b'aji, chechilo qa b'a'nju' txokb'enkye.¹²Expe' xitchq'o'n Ab'salon ttxokli jun q'ol tnab'l Dab'i, Aytopel tb'i, najlitoq toj Wilo, ninttanam, tu'n tten tuk'i'l ajtkub' tq'o'n chojb'il. Ikytzu'n, xi'toq tten kyipumal tej tmoje kyol ti'ju' kawb'il ex xi'toq kyok txqantl t-xjal Ab'salon. Etz oq Dab'i toj Jerusalen

¹³Pon jun sanjelal q'malte te Dab'i qa matxi'toq tz'ok kymujb'a'nkyib' aj Israel tuk'i'l Ab'salon.¹⁴Tchaq'tzun Dab'i kye kykyaqil nejenel kye t-xjal toj Jerusalen.
—¡Qo'qe' oq ja'loxi'x, qu'n qatzun min lay b'ent qklonte qib' te Ab'salon! ¡Ojqelqe'xe', lwix qo'qe'ye', qu'n jaku' kub'qi'j tu'n, ex jaku' qokub' tb'yo'n qkyaqilx tu'n k'uẍtx'e'nb'il toju' nintnam! chij kye.

¹⁵Xi'tzun kytzaq'we'ntz te nimaqkawil:
—Qb'incha'qe' ktma'ya qeye' nimaqkawil, chechij.

¹⁶Ikytzu'n etza' nimaqkawil kyuk'i'l kykyaqilju' ntoq che kawin tuk'i'l, noq o'qe'kx lajoj tqya e'kyaj tq'o'n xq'uqilteju' ja te kawb'il.¹⁷Tetzlenxi'tzu'n nimaqkawil kyuk'i'l kykyaqilju' eb'je'tz tuk'i'l, e'kyajwe' tk'etzju' mankb'il ja ttxa'n nintnam.¹⁸E'kub'tenju' nejenel kye t-xjal ttx'u'k, aye'tzu'n seretey ex peletey ju' xq'uqilte nimaqkawil, exqe' junk'al lajnaq (600) jetey e'ik'lpe ti'j kytzajx toj nintnam Kat, intoq che ik'o'k twitz nk'u'mile kyten.¹⁹Tojtzu'n kmuj lu xitma'n nimaqkawil te Itay, aj Kat:
—¿Tiqu'ntzun saja'tlta quk'i'le'? Masb'a'n kutanj ti'ja tu'n tkyajtena tuk'i'lju' ak'a'j nimaqkawil, naqpena' etzni xla'ja'nta, tena' junxi'tl nintnam.

²⁰¿Se'n taq'wi tu'n txi' nma'ne' teya tu'n ttzaja quk'i'le'? Mipena' jun b'i'n we'wu'n ja chin pomela'ye', extzun tzmapena' tula ewi. Masb'a'n kutanj ti'ja ex k'lenqe'xju'ya twnaqila. ¡Awttzun Qman Dyos k'iwlanteya ex ten tuk'i'la kukxju'!, chij te.

²¹Atzunte Itay xittzaq'we'n te nimaqkawil:
—Lu Qman Dyos nka'yin ex twitzku'ya nimaqkawil, jaxjaku' matena'ya axtzuntzu' chin tenb'ela'we' ayine' ajb'el teya, b'a'ntzun toj chwinqlal mujqa toj kamik, chij.

²²—Kuna' tzaja quk'i'le', chi Dab'i te.
Ikytzu'n xi' Itay tuk'i'l Dab'i, junx kyuk'i'l kykyaqilju' t-xjal Dab'i exqe' eb'ajxlpe ti'j.²³Kykyaqilju' xjal ntoq che oq' b'a'nxi'x. Eb'jik'x kykyaqil toju' a' Sedron; iky'xtzun nimaqkawiltz nejlqe' kykyaqilju' xjal twitz toju' tb'eyil chq'ajlaj.²⁴Ex ajun Sadok xi' kyuk'i'l kykyaqil aj Leb'i iq'ilte tkaxil tchaq'b'il Qman Dyos, ju' kyej kyq'o'n tk'etz Ab'yatar tzmaxi'j kyetz kykyaqilju' xjal toju' nintnam.²⁵Atzunte nimaqkawil xitma'n te Sadok:
—Iq'inx jumajtlju'ya kax te Dyos toju' nintnam, qu'n qama tzaj q'aq'an tk'u'j Qman Dyos, k'anjetzwe' wi'j tu'n ex k'okyel nka'yi'n jumajtle' kax exju' ja tkub'a'.²⁶Qatzun matzaj tma'n qa min tzalaj wi'je', toj tq'ob' ta'qine'; b'incham wi'je' aju' b'a'n toj twitz, chij.

²⁷Ex xitma'ntl nimaqkawil te pale Sadok:
—Kutanj kyi'je' tuk'i'l Ab'yatar toju' nintnam kyuk'i'l kyk'wale' ex lalun che b'isune'. Aya tuk'i'l tk'wala Aymaas, ex Ab'yatar tuk'i'lu' Jonatan ju' tk'wal.²⁸Ayintzunwe', chin kjeltene' kyoju' plan toj chq'ajlaj, tzmax ajtpon kypakb'ale' weye', chij.

²⁹Anjtzun kyiq'i'ntl Sadok tuk'i'l Ab'yatar ju' tkax Qman Dyos toj Jerusalen, ex axtzu' e'kyaja'ten.³⁰Jax Dab'i twitzju' witz Olib'o; mixtoqti' t-xajab' ex intoq oq' ex ktxu'nkxju' twi' te yek'b'il b'is.³¹Tetzunj txi' q'ma'n te Dab'i qa ajun Aytopel matxi'toq moje tuk'i'l Ab'salon, kub'san Dab'i twitz Qman Dyos tu'n tkub' xitju' nik'u'nti'j tu'n Aytopel.

³²Tej tjapun Dab'i twi' witz, ja noka' k'u'lb'il te Qman Dyos, etz Usay k'lulte, kyxol tnej kyyajajil arkyit, b'ajni tlaqu'n t-xb'alun ex nojnokx toj twi' tu'n tx'otx'.³³Xitma'n Dab'i te:
—Qama tzaja wuk'i'le', k'okyela te jun iqtz weye';³⁴qatzun matz'anjti'ja toj Jerusalen exqa matxitma'na' te Ab'salon: Nimaqkawil, chin ajb'elwe' teya kse'n in ajb'ene' tnejel te tmana, qa chija te, k'onila wuk'i'le' tu'n tkub' xitet t-xim Aytopel,³⁵ate'qe'kye' pale Sadok ex Ab'yatar atzu'. Q'manxa kukxju' kye tkyaqilju' matb'iya toju' ja te kawb'il.³⁶Ex ate'qe' kyk'wal atzu', Aye' Aymaas ex Jonatan, tkyaqiltzunju' nb'aj q'manxa kye, tu'ntzun ttzaj kyma'n weye', chi Dab'i.

³⁷Pontzu'n Usay, ju' tamiw Dab'i, toj Jerusalen, tojku'xi'xju' kmoj tej tokx Ab'salon toj nintnam. Yolin Dab'i tuk'i'l Sib'a

¹Naqtzun ch'i'n tik'len b'et Dab'i ti'jxi' witz, tej tetz Sib'a ju' tmajin Mepi-b'oset, k'lulte. Kyuk'i'l kab'e' b'ur iqa'n lajnaq (200) wab'j kyu'n, ex jo'naq (100) muqin tzqijsa'n ub'a, ex jo'naq (100) lob'j atitoq toj tq'ij ex jun tz'u'n b'in.²Xi'tzun tqani'n nimaqkawil te:
—¿Ti'tzu'n tajb'enju' lu saj ti'na?, chij.
Xi'tzun ttzaq'we'n Sib'a te:
—Aye' b'ur tu'n kyxi' kyiqa'n toj tjaya nimaqkawil; aye'tzu'n wab'j exqe' lob'j tu'nt-xi' kywanju' t-xjala te q'oj, atzu'n b'in te kyk'wa'ju' mache kub' sikti toj chq'ajlaj, chij.

³Xi'tzun tqani'n nimaqkawil te:
—¿Jatzunta' tchmanju' tajawa?, chij.
Atzunte Sib'a xittzaq'we'n te:
—Makyajten Jerusalen, qu'n toj twitz qa k'anjel kyanjsa'n aj Israel tkawb'il qtzan tchman te ja'lo, chij.

⁴Xi'tzun ttzaq'we'n nimaqkawil te:
B'a'natzun, ja'lo tetla tkyaqilju' tetoq Mepi-b'oset, chij.
Atzunte Sib'a xittzaq'we'n majx kub'joqe twitzju' nimaqkawil:
—¡Kukxwit wilwiju'ye' tu'na nimaqkawil!, chij te.

⁵Tetzunj tponju' nimaqkawil Dab'i toj B'awrim, okyal jun ichan tyajajil Sawul twitz. Tk'wal Wera, Simey tb'i, okten ililte Dab'i⁶ex intoq xon ab'j ti'j Dab'i ex kyi'j kykyaqilju' nejenel kye t-xjal; extzun xq'uqi'ntoqju' nimaqkawil kyu'n t-xjal ex kyu'n kykyaqil xjal,⁷atoktoq Simey yasulte kjalu:
—¡Kuxtxi'ya tza'lu, myab'a'n xjal, b'yol wnaq!⁸¡Matxi' kub' tz'e'ysa'n twitza tu'n Qman Dyos tu'n tpaju' txqan toj tja Sawul eb'aj kub' tb'yo'na naq tu'n toka kawil te t-xel! ¡Atzu'n ja'lo matxi' txi' tq'o'n Qman Dyos tkawb'ila te tk'wala Ab'salon, lutzuna inkub' tchjo'na txqan tila ja'lo, qu'n b'yolxjal na'ta!, chij te.

⁹Atzunte Ab'isay, tk'wal Seruya, xitma'n teju' nimaqkawil:
—¿Ma naqtzun in nik'xtu'na nimaqkawil, tokju' tchi' k'utz xjal lu ililteya? ¡Machine' k'uẍpilte twi'! chij.

¹⁰Atzunte nimaqkawil xittzaq'we'n te:
—Mixti'ta toklen ti'j, tk'wal Saruya. Tok te'lu yasulweye', chq'o'nlote' tu'n Qman Dyos. Extzunqa ikju', ¿alxi'xkye jun b'a'n tu'n txi' qaninte te titi' intb'incha'n?, chij.

¹¹Ex xitma'n kye Ab'isay ex kye kykyaqilju' nejenel kye t-xjal, kjalu:
—Aku'pena' nk'wale' tajb'il tu'n nkub' tb'yo'ne', ¡mitzunloya jun tyajajil B'enjamin! ¡Kyq'onkje' tu'n tmante taq'wix wi'je', chq'o'nlo tu'n Qman Dyos!¹²Qape' ajtka'yinte Qman Dyos yajb'ilweye', chin tk'i'wla'ye' te t-xelju' qanb'en in nb'i'ne' ja'lo, chij.

¹³Xi'tzun tljo'n Dab'i tb'e kyuk'i'lju' t-xjal, atzunte Simi xi'xa'tl tk'u'jile witz, junx kyel tuk'i'l Dab'i nyasun te, in xon ab'j ex in tchto'n quq.¹⁴Tetzunj tponju' nimaqkawil kyuk'i'lju' xjal lepchqe'toq ti'j ttziju' nin a' Jordan, matxi'toq che kub' sikti, ex e'ojlan atzu'. Okx Ab'salon toj Jerusalen

¹⁵Atzuntlte Ab'salon okx toj Jerusalen, lepchqe' kykyaqilu' aj Israel tuk'i'l Ayitopel.¹⁶Ex xi' usay ju' arkyit, tamiw Dab'i, k'lulte Ab'salon, intoq ẍch'in kjalu:
—¡Nimanjtzxwitu' nimaqkawil!, chij.

¹⁷Xi'tzun tqani'n Ab'salon te:
—¿Ma atzun xtb'inchaju'ya teju' tamiwa? ¿Tiqu'ntzun min xxi'ya tuk'i'l?, chij.

¹⁸Atzunte usay xittzaq'we'n te:
—Lay b'ent, qu'n atzu' tu'n ntena'ye' tuk'i'lju' matxi' jaw t-sk'o'n Qman Dyos ex kyu'n kykyaqilju' tnam aj Israel.¹⁹Ex juntl, qa ati tu'n wajb'ene' te juntl, atzu' tu'n wajb'ena'we' te tk'walju' wamiwe'. Qu'mtzun chin ajb'elwe' teya nimaqkawil, kse'nxju' matxi' chin najb'ene' te ttatiya, chij.²⁰Yajxi'tzuntel xitqani'n Ab'salon te Aytopel:
—¿Titi'kye' nkyma'n, titi' qb'incha' ja'lo? chij.

²¹Atzunte Ayitopel xittzaq'we'n te:
—Kẍeku'ya kyuk'i'lju' tqya tmana, ẍekyaj tq'o'n xq'uqilteju' ja te kawb'il. Kkaneb'eltzuntz toj kywitz kykyaqil aj Israel qa matxi' tz'el tik'uma'na twitz ttatiya, Iktzu'n kkyiq'i'xi'xtl kyib'ju' kyekyten tuk'i'la, chij.²²Kub'tzun b'incha'n jun pach xb'alun te Ab'salon tib'ajxi'ju' ja, atzuntzu' oka' ten jwolkye tqya tman kywitz kykyaqil aj Israel;²³qu'n aj txi' qanit jun nab'l te Ayitopel toju' tq'ijlalil lu, ikxtoq inela'ju' kse'n inxi' jyet nab'l toj tyol Dyos. Nimxi'xtoq toklen Ayitopel te Dab'i ex te Ab'salon. Kub't-xitu'n Usay t-xim Ayitopel

¹Yajxi'tzuntel xitma'n Aytopel te Ab'salon:
—Q'ontza anb'il tu'n kyjaw nsk'o'ne' junmutx' lajk'al (12,000) xjal, ex tojxju' qonik'an lu chin elixe' knolte Dab'i.²Ajtzun tkub' sikti ex mixti'tl tipumal, chin okyel tzaqpaje' ti'j ex majx kjel xob' wu'ne', ex che kb'el oq kykyaqilju' xjal ate'qe' tuk'i'l. Noq o'kxku' nimaqkawil kb'el nb'yo'ne',³k'anjetztzun wanjsa'ntl kyi'ju'ye' kykyaqilju' tnam tuk'i'la, kse'n jun qya akxtoq kymje, nex oq ex nche b'ent jumajtl tuk'i'l tchmil. Naqna' junte' ichan tajb'ila tu'n tkyim; kykyaqiltzunju' xjal che kjelten toj b'anil, chij.

⁴B'a'n ela'ju' xinb'e'tz lu toj twitz Ab'salon ex toj kywitz kykyaqilu' q'ol nab'l toj Israel.⁵Ex tchaq' Ab'salon tu'n ttzaj txko'n Usay ju' arkyit, tu'n tmante jun tyol.⁶Atzunj tpon Usay twitz Ab'salon, xitma'n te:
—Lu t-xinb'e'tz Aytopel. ¿Ma b'a'n tu'n qb'inchanteye' mujqa taq'wix? Q'mantz junta tyol qeye', chij.

⁷Atzunte Usay xittzaq'we'n te:
—Myab'a'nte' t-xinb'e'tz Aytopel ja'lo.⁸Kanlixi'xna'ta twitz qa min nxob'te' ttatiya kyuk'i'lju' t-xjal, inxi'xpena'lo che tx'u'jinkye' ja'lo kse'n jun ttxu oso mache el xk'a'yi'nju' tal. Expe' juntel, naq'lite' ttatiya tu'n tq'ojin ex lay kyej tente' kyk'etzju' xjal toju' qonik'an ja'lo.⁹In pena'lo newunte' ja'lo toj jun jul mujqa toj juntl najb'il. Tojpena' juntl tu'me'l, naq ajtb'injtz qa matxi' che b'aj junjunju' t-xjala toju' tnejel q'oj, oklo kb'el kyxima'n xjal qa matxi' kub'kyi'ju' ate'qe' tuk'i'la,¹⁰expena'ju' min xob', mujqa aju' majx tx'u'j kse'n jun b'alun; majx che tzajel xob', qu'n b'i'n kyu'n kykyaqil aj Israel qa min xob'te' ttatiya exqe'ju' ate'qe' tuk'i'l.¹¹Atzu'n nchiwe', b'uyinqe'tza kykyaqil aj Israel tuk'i'la, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j, qu'n nim txqan kyb'aj kse'n tz'awun ttzi ninnjab', ex aku'ya kb'el nej kywitz toj q'oj.¹²Qo okyil tzaqpajtzuntz q'oj ti'ju' tmana jaxjaku' ta'ya'. Qo' pomel tilj kyib'aj kse'n ta'l che'w ajtkub' twitz tx'otx', kb'ajel qu'n kyuk'i'lxi' t-xjal ex mix-a'lo'tlte kyej anq'in.¹³Expe' qama tz'okx ewal toj jun nintnam, qkyaqilx aj Israel kxe'l qiq'i'n aqwil ex che b'ajxe'l qtoli'n ab'j ti'jileju' nintnam lu tu'n tpon qxon tzmax toj xaq, chij.

¹⁴Kub'xi'xju' t-xinb'e'tz Usay toj twitz Ab'salon ex toj kywitz kykyaqil aj Israel kyetwitzju' te Aytopel. (Qu'n aku' Qman Dyos b'inchante tu'n tkub' xitju' t-xinb'e'tz Aytopel, tu'n ttzaj tilj taq'wixil tib'aj Ab'salon.)¹⁵Yajxi'tzuntel xitma'n Usay kye pale Sadok ex Ab'yatar ti'ju' nab'l xitq'o'n Aytopel te Ab'salon ex kyeju' tijwnaq kyxol aj Israel, ex ti'jute nab'l xitq'o'n,¹⁶tu'nwtzunlo txi' kyma'n lwiyxi'x te Dab'i, tu'n tik'x toj jun plajtl teju' nin a' Jordan, ex tu'n lalun kub'ten toj chq'ajlaj toju' qonik'an lu, tu'n lalun kub' b'yo'n exqe' t-xjal.

¹⁷Jun qya majen xi' q'malte kye Jonatan ex Ayimaas, qu'n atoqtzu' ate'qe' toj En-rokel, ex ch'uẍtoq kye tu'n tkub' kyyek'u'nkyib' toj nintnam, atzunj kyb'inte lwiy exi' q'malte te Dab'i.¹⁸Ex e'ilwi tu'n jun q'a, xi'tzuntz q'malte te Ab'salon. Exi'tzuntz ojqel ex e'pon tja jun ichan najli nqayin tk'etz B'awrim, ex eku'x ewal toj jun xoch twi' pe'n.¹⁹Atzu'n t-xu'jilju' ichan lu kub' tq'o'n jun tjpelu' xoch, ex jax tchto'n triy triyi'ntl tib'aj. Mix-a'lo'tzunte ka'yinte ja'lu.²⁰Tetzunj kyponju' t-xjal Ab'salon, xikyqani'n teju' qya:
—¿Ja ta'qe' Aymaas ex Jonatan?, chechij.
Xi'tzun ttzaq'we'n qya kye:
—Mache ik' tza'lu, ex xi'ẍe'xa' tu'me'l nin a', chij.
Xi'tzun kyljo'n t-xjal Ab'salon kyb'e jyolkye, atzunj mixti'x e'knet kyu'n, anjkyi'j Jerusalen.²¹Kyanjlenxi'tzun, e'jatz Aymaas ex Jonatan toju' xoch, exi'tzuntz ojqel q'malte teju' nimaqkawil Dab'i; xikyma'n te tu'n tik'x lwiy jlaj a', qu'n matxi'toq txitq'o'n Aytopel kynab'l tu'n kyq'ojin kyi'j.²²Lwiyxi'xtzun e'jawe' Dab'i kyuk'i'l kykyaqilju' t-xjal, ex e'jlajin toj nin a' Jordan. Kykyaqilx matxitoq che jlajin tej qsqix te juntl q'ij.

²³Tetzunj min xib'incha'n t-xinb'e'tz Aytopel, jaw tq'o'n tiqb'ilu' tb'ur, xi'tzuntz tja toju' ttanam ja itz'jna', atzunj kyb'ajlen tnik'u'n toj tja, jaw tjtz'o'ntib'. Ikytzu'n kyima' ex ku'x mqu'n toju' muqb'il te tman. Pon Dab'i Maanaym

²⁴Pon Dab'i toj Maanaym tojxi'xu' kmuj tej tjlajin Ab'salon toju' nin a' Jordan kyuk'i'l kykyaqil aj Israel.²⁵Ojetoq tz'oktq'o'n Ab'salon Amasa te nejenel kyeju' t-xjal te q'oj, te t-xel Joab'. Ate Amasa tk'wal jun aj Ismael, Itra tb'i, ojetoq kub' kyk'le'nkyib' tuk'i'l Ab'ikayl, tmyal Naas ex titz'in Seruya, ttxu Joab'.

²⁶Kub'ten Ab'salon kyuk'i'l aj Israel toju' tx'otx' Kalaad,²⁷tetzunj tpon Dab'i toj Maanaym, etz k'ulb'aj kyu'n Sob'i, tk'wal Naas, aj Rab'a toj Amon; ex Makyir, tk'wal Amyel, aj Lodeb'ar; ex B'arsilay, aj Rokelim toj Kalaad.²⁸Pon kyiq'i'n tkuẍb'il, tk'o'ẍ, e' tx'otx' k'wil, ex ikx triy, seb'ad, arin, twitz awal wensi'n, chinaq', prijol,²⁹ta'lkab', kykyesil wakx ex rit, tu'n kywan Dab'i kyuk'i'lju' xjal lepchqe'toq ti'j; qu'n kub' kyxima'n qa matxi'toq che sikti, ex qa nche q'aq'an ex nche k'ok'on, qu'n tzajniqe' toj chq'ajlaj. Kub'ti'j Ab'salon ex kyim

¹Jawtiq'i'n Dab'i kyajlalu' t-xjal te q'oj, ex e'kub' tq'o'n nejenel kyib'aj junjun tnej te kab'k'al lajnaq (1,000) ex kyib'aj jun tnej te jo'naq (100).²Yajxi'tzuntl e'kub' taq'pu'nju' t-xjal toj oxe' tnej; juntzun tnej xitq'o'n tjaq' tchaq'b'il Joab', jun tnejtl tjaq' tchaq'b'il Ab'isay, tk'wal Saruya ex kyitz'inkyib' tuk'i'l Joab', atzu'n jun tnejtl tjaq' tkawb'il Itay, aj Kat. Ex xitma'n kye kykyaqilju' t-xjal te q'oj:
—Chin xe'lwe' kyuk'i'le' toj q'oj, chij.

³Aye'tzunkye xikytzaq'we'n te:
—Lalun tb'inchaya lu nimaqkawil, qu'n mixti' tz'ela' teju' ajq'oj qama qokub' oqe' mujqa makyim nik'janqe', atzunta nimaqkawil nimxi'x toklena kse'n junmutx' jo'k'al (10,000) qb'aje'. Qu'mtzun ate b'a'n tu'n tkyajtena nimaqkawil toju' nintnam tu'n kyxi' t-sma'na onilqeye' tzmax tza'lu, chechij.

⁴Xi'tzun ttzaq'we'n nimaqkawil kye:
—Knb'incha'ye' b'a'n toj kywitze', chij, textzu'n kmoj kub'ten toj jun plaj ttziju' nintnam, aye'tzu'n t-xjal te q'oj intoq che etz toj q'oj toj kab'k'al lajnaqchaq (1,000) ex toj jo'naqchaq (100) kyb'aj.

⁵Expe' tchaq' nimaqkawil kye Joab', Ab'isay ex Itay, tu'n lalun che okten b'yolte ku'xun Ab'salon, naku'xwitloj ate, kykyaqiltzu'n xjal te q'oj kyb'iju' chaq'b'il xitq'o'n nimaqkawil ti'j Ab'salon.⁶Ikytzu'n eb'ajxa' junjun tnej t-xjal q'ojil kyi'ju' aj Israel te q'oj.
Atzu' oka' q'oj toju' k'ul te Eprayin,⁷ex kub'kyi'ju' xjal aj Israel kyu'n t-xjal Dab'i. Nim txqan xjal e'kyim toju' q'ij lu, qu'n kab'mutx' lajk'al (20,000) ichan eb'aj.⁸Matxi'toq kub' noj tkyaqilju' tx'otx' tu'n q'oj, expe' toju' maj lu nimxi'xtl xjal eb'aj tu'nju' k'ul kyetwitz tu'n k'uẍtx'e'nb'il.⁹Atzunte Ab'salon iqa'n tu'n jun tchej mul, naq myanim oktokpaj kywitzju' t-xjal Dab'i. Okx tlmo'ntib'ju' chej tjaq' jun nin b'ansi, o'kx tkyaj xwakju' t-xya'mal twi' Ab'salon kyxol tq'ob' tze majx kyej xtunin, atzunte chej majx tlaj tb'e.¹⁰Atzunju' xjal lonte xi' q'malte te Joab':
—Mawile' Ab'salon in xtunin ti'j junwi' b'ansi, chij.

¹¹Atzunte Joab' xittzaq'we'n te:
—Qanatzun matila, ¿tiqu'ntzun minti' xkub' tb'yo'na axtzu'? Ma'wtlo txinq'o'nwe' lajoj saqpwaq teya ex jun k'alb'il tk'u'ja, chij.

¹²Atzunju' ichan lu xittzaq'we'n te Joab':
—Maskyewtlo matzaj tq'o'na kab'k'al lajnaq (1,000) saqpwaq weye', mixti' tu'n taq'ponwe' nq'ob' ti'ju' tk'wal nimaqkawil; qu'n qb'iqe' tchaq'b'ilju' nimaqkawil taq' teya, te Ab'isay ex te Itay, tu'n txi' kyka'yi'nju'ye' kuxun Ab'salon.¹³Ex juntl, naqwit ma nb'inchaye' ikju', mixwitlo ti'x tajb'en, qu'n mixti' jun ti'xti' laywit tb'i nimaqkawil, exwitlo mixti'x xtb'inchaya tu'n nklete', chij.

¹⁴Atzunte Joab' xittzaq'we'n te:
—Lay tz'extl nq'ije' tuk'i'la, chij. Jatztiq'i'n oxe' talsmaj ex e'aq'pon t-xyu'n ti'j tanmi Ab'salon, i'tz'xtoq ti'ju' b'ansi.¹⁵Ex xikytxoli'n kyib' lajoj onilte Joab' ti'j Ab'salon, ex kub' kyb'ajsa'n.¹⁶Tchaq'tzun Joab'tz tu'n txi' q'ajtza'nju' chun, aye'tzunju' xjal te q'oj mixti' xi'kyljo'ntl tu'n kyq'ojin kyi'ju' aj Israel, qu'n exi' tmyo'n Joab'.¹⁷Ku'x kymqu'n t-xmilal Ab'salon toj jun jul nim t-xe atitoq toju' k'ul, ex jaw kych'uqb'a'n txqan ab'j tib'aj. Yajxi'tzuntel kykyaqil aj Israel eb'ajx oq kyja.¹⁸Tej itz'xtoq Ab'salon, tchaq' tu'n jaw b'incha'n jun tilb'ilal ab'jile, ju' ati toju' Tb'ya' Nimaqkawil, ex oktq'o'n tb'i ti'j, qu'n mixtoqti' jun tk'wal tu'n tkyaj te nab'ab'l. Axtzun tb'iju' kyejten, tilb'ilal Ab'salon.

¹⁹Atzunte Aymaas, tk'wal Sadok, xitma'n te Joab':
—Q'ontz ch'i'n anb'ila weye' tu'n nxi'ye' ojqel q'malte teju' nimaqkawil qa matxi' tb'incha Qman Dyos xtalb'il qu'n matxi' klonjtz toj kyq'ob' tajq'oj, chij.

²⁰Atzunte Joab' xittzaq'we'n te:
—Myata tu'n txi' q'malte tqanil ja'lo. B'a'n txi'ya toj jumajtl, mya ja'lo, qu'n tk'walna' nimaqkawilju' xkyim, chij.

²¹Atzunte Joab' xi' xa' tma'n te jun xjal te q'oj aj Etyope:
—Kutxi'ya ex q'manxa tqanil te nimaqkawil ti'ju' matxi' b'aji, chij.
Ku, chi aj Etyope, kub' tzipe te ninb'il twitz Joab', xitzuntz ojqel.²²Xitma'n jumajtl Ayimaas te Joab':
—Q'ontzx anb'ila weye' tu'n nxi' lpeye' ttze'lti'j aj Etyope, chij.
Atzunte Joab' xittzaq'we'n te:
—¿Tiqu'ntzun tajb'ila'ya tu'n txi'ya, witz'in, layna' tzaj q'o'n jun oyaj teya tu'nju' tqanil kpomel tma'na?, chij.²³Maskyetzun chi Ayimaas xittzaq'we'n:
Xi'tzun tma'n Joab' te:
—¡Kuxna' txi'ya!, chij.
Xi'tzun Ayimaastz ojqel toju' b'ya', ex nej twitz aj Etyope.²⁴Atzunte Dab'i akxtoq q'uqli kyxolu' kab'e' ttzi nintnam, atzunju' xq'uqil atokxtoq twi' ja, tib'aj ttzi nintapi ti'ju' nintnam. O'kx t-xitka'yi'n jun ichan xi'toq ttzaj ojqel tel,²⁵ex xitma'n kuw teju' nimaqkawil. Atzunju' nimaqkawil tma:
—Qa tjunal tzul, junlo b'a'n tqanil tzul ti'n, chij.
Tej ljo'n tul lq'eju' xjal,²⁶xitka'yi'n xq'uqil juntl xjal ojqel tel, ex xit-ẍch'i'n teju' xq'uqil ttzi nintapi kjalu:
—¡Tzul juntl ichan ojqel! chij.
Atzunju' nimaqkawil xittzaq'we'n:
—Exlo b'a'n tqanil tzultiq'i'n, chij.

²⁷Xitma'ntlju' xq'uqil:
—Naku'j a Ayimaas, tk'wal Sadok, nejli toj nwitze', tu'nju' tz'ojqelan, chij.
Atzunju' nimaqkawil tma:
—B'a'nlote' tqanil tzultiq'i'n, qu'n b'a'nte' xjal lu, chij.

²⁸Pon lq'etzun Ayimaas, ex majx kub'joqe twitzju' nimaqkawil, xitq'olb'e'n ex xitma'n te:
—Ajwalinjtzwitju' Qman Dyos, nk'uluna te nimaqkawil, qu'n matxi' che eltiq'i'nju' xjaw kyiq'i'n kyib' ti'ja, chij.

²⁹Xi'tzun tqani'n nimaqkawil te:
—¿Ma b'a'n ta'ya' q'a Ab'salon?, chij.
Atzunte Ayimaas xittzaq'we'n:
—Tej ẍintzaj tchq'o'ne' Joab', ajb'el teya, mache jawtilju' xjal, naqtzun aju' mixti' xnb'iye' titoq nb'aji, chij.

³⁰Xitma'ntzun nimaqkawiltz te:
—We'ku'ya tza'lu, ex axtzu' tenkja'ya, chij. Ku, chi Ayimaas kub' we' atzu'.³¹Tojtzunju' kmuj lu pon aj Etyope, ex tma:
—B'intzju'ya b'a'n tqanil lu nimaqkawil: matxi' tb'incha Qman Dyos xtalb'il teya, qu'n matxi' klonjtza tu'n kye kykyaqilju' xjaw kyiq'i'n kyib' ti'ja, chij.³²Atzunju' nimaqkawil xitqani'n te:
—Yajtzu'n q'a Ab'salon, ¿ma b'a'n ta'ya'?, chij.
Xi'tzun ttzaq'we'n aj Etyope:
—Ikwit che b'aja' kykyaqilju' tajq'oja nimaqkawil, ex kykyaqilju' njaw kyiq'i'n kyib' ti'ja tu'n tb'o'lja, kse'n xb'aja' ku'xun lu, chij.³³Tzaj tb'isju' nimaqkawil b'a'nxi'x, ex jax oq'il toju' tja b'incha'n tib'aju' ttzija. Atzunj xi'toq tjax, intoq oq' ex intma'n kjalu: ¡Jata'ya Ab'salon! ¡Jata'ya, nky'ajul! ¡Maswitlo b'a'n ayine' ẍin kyim te t-xela!, chij.

¹Tej kyb'inteju' xjal te q'oj qa intoq b'isun nimaqkawil ex intoq oq' ti'j Ab'salon ju' tk'wal, exi' q'malte te Joab'. Qu'mtzun aju' q'ij lu, te kanb'ab'l jawb'ent te b'is.³Naqqe'pe' xjal te q'oj min kyajb'il tu'n kyyek'unte tej kyokx toju' nintnam: majxtoq b'isju' kywitz, naku'j mache kub' oq toju' q'oj.⁴Atzunju' nimaqkawil inxi'xtoq ẍch'in, ex ktxu'n twitz, intoq tma'n: ¡Jata'ya Ab'salon! ¡Jata'ya nk'wal, nk'wal!, chij.

⁵Xi'tzun Joab'tz toju' tja nimaqkawb'il, ex xitma'n te nimaqkawil:
—Matxi' tz'elti'na kych'ixawju' ajb'el teya nimaqkawil, extzun matxi' kleta kyu'n, exqe' tk'wala, tmyala, e't-xu'jila exqe' tqyaya.⁶Matxi' tyek'uya ja'lo nimaqkawil, qa mixti'x kyoklenju' nejenel kye t-xjala, qu'n nche tk'u'jla'nxi'xa aye' nche el ik'unteya, aye'tzu'n nche k'u'jlanteya nche eltik'o'na. Matxi' tz'el nnik'e' ja'lo, qa maswitlo b'a'n toj twitza naqwit itz'x Ab'salon maskyewtlo matxi' qokyime'.⁷Ja'lo, kutetza q'mal jun tyola tu'n tqe kyk'u'ju' xjal ate' tuk'i'la, qu'n qatzun min, lu Qman Dyos nka'yin, mixti' juntl t-xjala kjelten toju' qonik'an ja'lo. Ch'uẍxi'x k'elela' teya nimaqkawil, kyetwitz tkyaqilju' taq'wix matxi' tzajxi' ti'ja atxi'x toj tk'walila tzmax ja'lo, chij.⁸Etztzun nimaqkawiltz ex kub' qe ttzi nintnam. Tetzunj tex tqanil kye kykyaqil xjal qa q'uqliju' nimaqkawil ttzi nintnam, eb'aj pon kykyaqil twitz. Anjti'j Dab'i Jerusalen
Aye'tzu'n xjal aj Israel matxi'toq che b'ajx oq kyja.⁹Intoqtzun kywuli'nkyib' kykyaqilju' tnej tyajajil Israel kyxol ex intoq kyma'n: A nimaqkawil Dab'i klonqe tjaq' kykawb'il pilistey; atzu'n ja'lo tu'n tpaj Ab'salon sexa' oq toju' nintnam.¹⁰Atzu'n ja'lo, matxina' kyimte' Ab'salon toj q'oj, ju' ok qq'o'n te nimaqkawil ¿Titzu'n nqyo'n, tiquntzun min nqo'xa' txkolte Dab'i tu'n tanjtzti'j te qnimaqkawil?, chechij.¹¹Ponju' kyyol kykyaqil aj Israel lu tzmax toj tja nimaqkawil Dab'i. Atzunte Dab'i xitma'n tq'umli jun tqanil kye pale Sadok ex Ab'yatar, kjalu: Che yolinqe'ye' kyuk'i'lju' tijwnaq toj Juda, ex kyqaninxe' kye tiqu'n min q'o'n tu'n nxikytxko'n jumajtle' toju' njaye' te kawb'il;¹²kymanxe' kye qa mya tu'me'l tu'n kykyajten b'ajsb'ilxi' tu'n kymante tu'n tanjwi'je', extzun qitz'inqib'e' junx qyajajile' kyuk'i'l, chij.¹³Ex tchaq' tu'n txi' q'ma'n te Amasa: Qitz'inxqib' tuk'i'la, qu'mtzun kxe'l qe ja'lo, aya k'okyel te nejenel nimaq toklen te t-xel Joab' kyib'aj nxjale' te q'oj. Qatzun minti' xjapun nyole' teya, kub'xwit tz'e'ysa'n nwitze' kuwxi'x tu'n Qman Dyos, chij.¹⁴Iktzu'n kub'a' kyi'ju' xjal aj Juda tu'n, kykyaqiltzu'n xjal xikyma'n tqanil teju' nimaqkawil tu'n tanjtzti'j kyuk'i'l kykyaqilju' nejenel kye t-xjal.¹⁵Anjtztzun ti'ju' nimaqkawil, ex pon ttzi nin a' Jordan. Aye'tzuntlkye' xjal aj Juda, exi' k'molte ex onilte toj Wilwal tu'n tik'tz tib'aj nin a' Jordan.¹⁶Ex ikxte Simi, tk'wal Jera, tyajajil B'enjamin, aj B'awrim, oktilil tu'n, tu'n kyku'tz kyuk'i'lju' xjal aj Juda k'molte nimaqkawil Dab'i.¹⁷Kyuk'i'l kab'k'al lajnaq (1,000) ichan tyajajil B'enjamin. Ex ikxtlte Sib'a, kymajin toj tja Sawul, kyuk'i'lu' o'lajoj (15) tk'wal ex junaq (20) loq'ojtmajin, nejtl kypon ttzi Jordan twitzju' nimaqkawil.¹⁸E'ik'x toju' a' b'o's t-xe onilkyeju' toj tja nimaqkawil tu'n kyik'tz toju' a', naqwitlo tu'n tkyej b'a'n tuk'i'l. Tetzunj ikytoq tik'xju' nimaqkawil toj a', kub' tzipe Simi twitz,¹⁹ex xitma'n te:
—Najsama nimaqkawil, lalun kub' ttz'e'ysa'na nwitze' tu'nju' wile' ex lalun tzaj tna'na nb'inchaye' tej tetza Jerusalen. Lalun kuxten tq'oja wi'je',²⁰qu'n ayinxwe' na'lte wile', ayinpena'we' ẍin netz neje' ja'lo k'molteya kyxol kykyaqilju' tyajajil Jse, chij.

²¹Atzunte Ab'isay, tal Saruya, tma:
—¿Ma laype'tzunlo kub' b'yette' Simi, tu'nju' tyol taq'wix tma ti'ju' nimaqkawil sk'o'n tu'n Qman Dyos?, chij.

²²Atzunte Dab'i xittzaq'we'n te:
—¡Mixti'kye' kyoklen ti'j ja'lu, tal Seruya! ¿Tiqu'n nche' maquna'ye' weye'? Matxi' tz'el nnik'e' ja'lo qa ayine' nimaqkawil toj Israel, qu'mtzun mix-a'lo' kkyimel toj Israel ja'lo, chij.

²³Xiyolintzuntz te Simi, ex xitma'n twitz Qman Dyos te qa laytoq kyim.

²⁴Ex etz Mepi-b'oset, tk'wal Sawul k'lulte. Atxi'x tej tetzju' nimaqkawil, ex tzmax tanjtztlti'j b'a'n ex itz'x, na'mxtoq tel ttxjo'n Mepi-b'oset tqan, ex na'mxtoq tel tjon t-xmatzi, ex na'mxtoq ttxjetu' ti'j.²⁵Tetzunj tul k'molte nimaqkawil toj Jerusalen, xitqani'n te:
—¿Titiqu'n minti' xa'ya wuk'i'le' Mepi-b'oset?, chij.

²⁶Atzunte xittzaq'we'n:
—Inkub' t-sb'u'ne' nmajine'. Tu'na' tpaju' koxqine', xinma'ne' te tu'n tjaw tq'o'n t-xalmi ncheje' tu'n nxi'ye' tuk'ila.²⁷Atzuntlte jawtiq'i'n yol wi'je' twitza. Atzunta nimaqkawil, ikyna'teju'ya kse'n jun tanjl Dyos, qu'mtzun b'inchama aju' b'a'n toj twitza.²⁸Atitoqpena' tu'n qkub' b'yo'nqe' qkyaqile' toj tja nmane' twitza nimaqkawil, ayintzunwe' ajb'el teya nimaqkawil, intzaj tk'le'na tu'n nwane' tk'etza. Qu'mtzun, ¿titi'tlu' tu'n txinqani'ne' teya nimaqkawil?, chij.

²⁹Xi'tzun ttzaq'we'n nimaqkawil te:
—Mixti'tlte tu'n qyolin. Oje nchaq'we' tu'n tkub' kpa'nju'ye' tx'otx' kyxole' tuk'i'l Sib'a, chij.

³⁰Atzunte Mepi-b'oset xittzaq'we'n te:
—Kyajtenku'j tuk'i'l tkyaqil. Axi'xpete b'a'nju' tu'n sanjtzti'ja toj b'anil nimaqkawil, toju' tjaya te kawb'il, chij.

³¹Atzunte B'arsilay, aj Kalaad, tzajx toj Rokelim wab'alte nimaqkawil tu'n tik'tz toju' a' Jordan ex atzu' kyeja' tq'olb'e'n.³²Matxi'toq tijinxi'x, qu'n tetoq kyajnaq (80) ab'q'i, ex xitq'o'n tkyaqilu' nnojqelan teju' nimaqkawil toju' tq'ijlalil tej tten toj Maanaym, qu'n q'inuntoq.³³Xi'tzun tma'n nimaqkawil te B'arsilay:
—Qo'ya wuk'i'le' Jerusalen, kxe'l nka'yi'nta atzu', chij te.

³⁴Atzunte B'arsilay xittzaq'we'n:
—Matxi' chin tijinwe' tu'n nxi'ye' Jerusalen tk'etza nimaqkawil,³⁵matxi' chin japune' toj kyajnaq (80) ab'q'i; mixti'tl tk'ok'jalu' wab'j exu' k'wab'j weye', mixti' nna'ntle' qa k'ok'j mujqa mya; ex min nb'i'ntle' toj kywi' aj b'itzal. Qu'mtzun, myab'a'n tu'n wokye' te jun iqtz teya nimaqkawil.³⁶Naqna' ẍin tzajwe' wab'al teya tu'n tjlajinteya nin a' Jordan, ¿Ma chjo'nxi'xtzunlo nimaqkawil?.³⁷Apewe' kxe'l nkub'sa'n teya nimaqkawil, tu'n ttzaj tq'o'na anb'il weye' tu'n tanjwi'je' toj ntaname', tu'n nkyime' atzu' ex tu'n nku'x mqu'ne' toju' muqb'il kye nmane'. Lutzu'n nk'wale' Kyimam, juntl ajb'el teya nimaqkawil. B'a'n tu'n txi' tuk'i'la, ex b'inchama te aju' b'a'nxi'x toj twitza, chij te.

³⁸Xi'tzun ttzaq'we'n nimaqkawil te:
—Kuttzajna' Kyimam wuk'i'le', ex knb'incha'ye' te aju' b'a'nxi'x toj twitza. Ex kxe'l nq'o'nwe' teya tkyaqilju' matqaniya weye', chij.³⁹Kykyaqilju' xjal e'jlajin toju' nin a' Jordan. Tetzunj tjlajin nimaqkawil, oktma'tzi'n B'arsilay te q'olb'eb'lte. Anjtzun ti'j B'arsilaytz tja jatoq najla'.⁴⁰Atzunte' nimaqkawil xitljo'n tb'e Wilwal tuk'i'l Kyimam, kyuk'i'l kykyaqilju' xjal aj Juda ex nik'jan aj Israel.⁴¹Kykyaqiltzunju' aj Israel eb'aj pon ka'yilte nimaqkawil, ex xikyma'n te:
—¿Titiqu'n aye'xi'xju' qitz'ine' aj Juda ẍe okwe' tk'etza nimaqkawil, ex aye' ẍe' ik'tz iq'inteya kyuk'i'lju' toj tjaya, exqe' t-xjala te q'oj toju' nin a' Jordan?, chechij.⁴²Xi'tzun kytzaq'we'n kykyaqil aj Juda kye aj Israel:
—Tu'na' qwitze'lku'xi'x qib'e' tuk'i'l nimaqkawil. Ex mya tu'me'l tu'n ttzaj kyq'oje' qi'je'. ¿Ma atzuntzu' nqo wanka'qe' ti'ju' nimaqkawil, mujqa matxi' txiqtzyu'n jun ti'xti'ye'?, chechij.

⁴³Xi'tzun kytzaq'we'n aj Israel:
—Lajojmajxi'xtl pena'qe' qoklen ti'ju' nimaqkawil kyekywitze'. Tzikb'aj qo'pena'qe' kyeye' kyxolu' junjun tnej qyajajil. Qu'mtzun, ¿tiqu'n nqo' ela' kyik'u'ne'? ¿Ma myayo'tzune' xqo ximan nejtl tu'n tanjtzti'ju' qnimaqkawil? chechij.
Aye'tlpe' aj Juda intoq che wulinxi'xtl kyekywitzu' aj Israel. Jawtiq'i'ntib' Seb'a

¹Atitoq jun ichan myab'a'n xjal kyxol tyajajil B'enjamin toj Wilwal, Seb'a tb'i, tk'wal B'ikri. Okten q'malte kyeju' tnam tu'n tjaw kyiq'i'n kyib' q'ojil, ex intoq tma'n: ¡Mixnati'xte' qoklen tuk'i'l Dab'i, tk'wal Jese! ¡Qo'qe'ye' qja qkyaqilx aj Israel!, chij.

²Kykyaqiltzunju' ichan aj Israel kyej kyqo'n Dab'i, ex exi' lpe ti'j Seb'a, tk'wal B'ikri. Aye'tzunkye' aj Juda, tzajx tk'etz Jordan ex tponx Jerusalen, e'kyajten tuk'i'lju' kynimaqkawil.

³Tej tpon jumajtl Dab'i toju' tja te kawb'il toj Jerusalen, exi' tiq'i'n lajoj tqya e'kyaj tq'o'n xq'uqilteju' tja nimaqkawb'il, toj jun ja ex e'kub' tq'o'n xq'uqil kyi'j, atzuntzu' e'tk'a'chaya' ex mixti' kub' kẍetl kyuk'i'l. Atzuntzu' eb'aj kyaja' jpu'na' ex mixti'tl kychmil tzmax tej tkyim.

⁴Yajxi'tzuntel tchaq'ju' nimaqkawil te Amasa:
—Txkonqe'tzju'ya ichan aj Juda, tu'n kytzaj tuk'i'la tza'lu toj oxe' q'ijtel, chij.

⁵Tetzunj txi' Amasa b'uyilkye, min kanunju' oxe' q'ij xiq'ma'n te.⁶Xitma'ntzun Dab'i te Ab'isay:
—Nimxi'xtlte' taq'wixil ktb'incha' Seb'a qe kyetwitz tb'incha Ab'salon. Qu'mtzun k'okyela te nejenel kye nxjale' te q'oj ex kutxi'ya knolte, qu'n jaku' tz'okx toj jun nintnam jpu'mile ti'j tu'n nimaqtapi, jaku'tzun tzaqpajtz, chij.

⁷Etztzun Joab'tz toj Jerusalen kyuk'i'lju' t-xjal, exqe' seretey ex peletey xq'uqil nimaqkawilqe', exqe' b'a'nxi'x che q'ojin, e'etz toj Jerusalen tuk'i'l Ab'isay knolte Seb'a.⁸Tetzunj ch'intltoq kypon tk'etzju' nin pik toj Kab'aon, etz Amasa k'lulkye toj kyb'e. Oksa'ntoqtzun ti'j Joab' te q'oj, k'lo'nk tk'alb'il tk'u'j, ex yob'a'nkju' t-xuyb'il atku'x toj tja toj jun plaj, ju' eltz'aq tej t-xilq'e tk'etz Amasa ex jaw tiq'i'ntl.⁹Xi'tzun Joab'tz tzyulte t-xmatzi Amasa tu'n toktma'tzi'n, ex xitqani'n te:
—¿Ma b'a'n ta'ya, witz'in?, chij.

¹⁰Atzunte Amasa mixti' ximan ti'ju' t-xuyb'il Joab' tzyu'ntoq tu'n. Naqtzun myanim okx t-xyu'n Joab' toj tk'u'j ex majx etz chitq'uju' toj tk'u'j twitz tx'otx'. Majx b'aj ex min kub' tb'ajsa'nxi'xtl Joab' qu'n junx aq'pon tu'n. Xi'tzun kyljo'n Joab'tz tuk'i'l Ab'isay ju' titz'in knolti'j Seb'a, tk'wal B'ikri.

¹¹Kub'tzun we' jun t-xjal Joab' tk'etzju' t-xmilal Amasa, ex tma:
—¡Alkyete atzu' ta' tuk'i'l Joab' ex tuk'i'l Dab'i, lpex ti'j Joab'!, chij.¹²Inxtoqtzun t-xtoli'ntib' Amasa toju' tchk'el toj nky'ajchaq b'e; el laq'b'a'n ttx'u'k b'e tu'nju' xjal te q'oj lu ex jaxtq'o'n jun pinpa't tib'aj, qu'n xitka'yi'n qa kykyaqilju' xjal ljo'ntoq kypon intoq che kub' we' ka'yilte.¹³Telenxi'tzun ti'n toj b'e, e ik' kykyaqilju' t-xjal Joab' tu'n kyxi' knolte Seb'a.

¹⁴Ik' Seb'a toj tkyaqil kytx'otx' tnej tyajajil Israel tzmax Ab'el-b'et-maaka, kykyaqiltzu'n tyajajil B'ikri b'aj kyb'u'yi'n kyib', ex e'okx lpe ti'j toju' nintnam.¹⁵Tetzunj kypon t-xjal Joab' toj Ab'el-b'et-maaka, okkyb'incha'n kyxwe'lil ti'jxi' tapi tu'n tb'ent kyjax q'ojil ti'ju' nintnam, ex tzyet kyxitunteju' nintapi tu'n kykyaqil.¹⁶O'kx myanim, tzaj ẍch'in jun qya tx'yanx tuk'i'l tzmax tib'aj nintapi ti'ju' nintnam:
—¡Kyb'inchame' xtalb'il, chin kyb'itze'! ¡Kymanxpe'ye' te Joab' tu'n ttzaj lq'e, qu'n wajb'ile' tu'n nyoline' tuk'i'l!, chij.

¹⁷Tetzunj tpon lq'e Joab', xitqani'n qya te:
—¿Ma aju'ya Joab'?, chij.
Atzunte xittzaq'we'n: ayine', chij.
Atzunju' qya xitma'n te:
—B'intzpe'ya nyole', ayine' ajb'el teya, chij.
Q'mantzna'ya, chij Joab'.

¹⁸Aq'witzuntz q'malte:
—Intoq q'manjtz ojtxi' kjalu: Alkyete tajb'il tu'n tb'inte jun tqanil, qaninx toj Ab'el. Ikytzu'n nb'aja' nk'eta' jun ti'xti'.¹⁹Ajunqe' ninqtanam kyxolju' mixti' q'oj kyxol ex tnik'alkyi'j toj Israel, ¡ex nim kyoklen! Atzuntlta tajb'ila tu'n qkub' t-xitu'na. ¿Titiqu'n tajb'ila'ya tu'n tkub' t-xitu'na ttanam Qman Dyos?, chij te.

²⁰Atzunte Joab' xittzaq'we'n te:
—¡Myana'te'! Myawe' tb'is nk'u'j tu'n tkub' nxitu'n ex tu'n tkyej nq'o'ne' naq tik'lentl.²¹Myana'te' tnam, naqna' jun ichante' najli kywi' witz te Eprayin, Seb'a tb'i, qu'n majaw tiq'i'ntib' q'ojil ti'ju' nimaqkawil Dab'i. Kyq'omitze' tjunal, kyjeltzun nq'o'nwe' nintnamtz, chij.
Etztzun ttzaq'we'n qya te Joab':
—K'elex qxonqe' twi' teya tzmax tib'aj nintapi, chij.

²²Xi'tzun qyatz tuk'i'l tu'me'l tyol ex kub'ti'j kynab'lju' xjal toju' tnam tu'n, el kyk'uẍpi'n twi' Seb'a, ex ku'tz kyxon te Joab'. Tchaq'tzun Joab'tz tu'n txi' q'ajtza'n chun tu'n tkyaj kytzaqpi'n nintnam, teyiletzun junjun e'anj kyja, atzunte Joab' anjtlti'j Jerusalen yolil tuk'i'l nimaqkawil. Nimaq ajb'el kye t-xjal Dab'i (2 S 8.15-18; 1 Cr 18.14-17)

²³Okq'o'n Joab' te nejenel kyib'aj kykyaqilju' xjal te q'oj toj Israel, atzunte B'enayiy, tk'wal Joyada, te nejenel kyib'aju' xq'uqil seretey ex peletey.²⁴Atzu'n Adoram ka'yilte aq'untl ilxi'xti'j, atzu'n Josapat tk'wal Alyud te t-ajtz'ib'al nimaqkawil.²⁵Atzu'n Seb'a tz'ib'al tqanil, aye'tzun paleju' Sadok ex Ab'yatar.²⁶Ex ikx Ira, aj Jayir, paletoq te Dab'i. Tu'me'l t-xel kyu'n aj Kab'aon

¹Tzaj jun nin we'yaj te oxe' ab'q'i toj tq'ijlalil Dab'i. Xi'tzun t-xjelu'n Dab'i te Qman Dyos, atzunte Qman Dyos tzaj ttzaq'we'n: Tu'n tpaju' b'yojwnaqi'n tb'incha Sawul kyuk'i'lju' toj tja, qu'mtzun saja' we'yaj, qu'n e'kub' kyb'yo'n aj wab'on, chij.

²E'tzaj ttxko'n Dab'i aj Kab'aon ex yolin kyuk'i'l. (Mya aj Israel qe'kye' aj Kab'aon, naq jun tzb'oj xjalqe' kyyajajil amorey ju' kyej b'entti'j jun kyol kyuk'i'l aj Israel, atzuntlte Sawul kub' t-xima'n tu'n kyb'aj kykyaqil naq tu'n kpaju' aj Israel ex aj Juda.)³Xi'tzun tqani'n Dab'i kye:
—¿Titi' kyajb'ile' tu'n nb'inchanteye' kyeye'? ¿se'n taq'wi tu'n telju' taq'wix xb'inchanjtz kyeye', tu'ntzun qk'i'wlanjtze' ayo'ye' ttanam Qman Dyos?, chij kye.

⁴Aye'tzu'n aj Kab'aon xikytzaq'we'n te:
—Myana' pwaqte' tx'eqlix qxole' tuk'i'l Sawul exqe' toj tja, ex min qajb'ile' tu'n tkyim jun kyxol aj Israel, chechij.
Xi'tzun tma'n Dab'i kye:
—Kymantzna'ye' titi' kyajb'ile' tu'n nb'inchanteye' kyeye', chij.

⁵Aye'tzunkye xikytzaq'we'n:
—Qajb'ile' tu'n ttzaj kyq'o'ne' wuq tyajajilju' ichan tajb'iltoq tu'n qkub' tnajsa'ne' tu'n lalun qo' tentle' toj kytx'otx'e', kjawil qjtz'o'ne' kyqul twitz Qman Dyos toj Wib'ea ttx'otx' Sawul, ju' sk'o'n tu'n Qman Dyos, chechij.
B'a'n ela' toj twitzju' nimaqkawil tu'n kyxi' tq'o'n,⁷o'kx Mepi-b'oset exch'yon toj tk'u'j, ju' tk'wal Jonatan ex tchman Sawul, qu'n ojetoq kytziya jun kyol tuk'i'l Jonatan twitz Qman Dyos.⁸Aye'tlju' kab'e' tal Rispa tmyal Aya e'ten tuk'i'l Sawul, e'ttzuy, Aye' Armon ex Mepi-b'oset, exqe' jwe' tal Merab', tmyal Sawul, ju' e'ten tuk'i'l Adryel, tk'wal B'arsilay aj Meola,⁹exi' tq'o'ntzuntz toj kyq'ob' aj Kab'aon, aye'tzunkye jaw kyjtz'o'n kyqul twi' witz, twitz Qman Dyos. Ikytzu'n ekyima' wuq junx, in tzyetku' tq'ijlalil tu'n tjaw joyet seb'ad.¹⁰Oktzun tq'o'n Rispa, tmyal Aya, ok tq'o'n jun t-xb'alun jochon te b'is, ex jax joqe tib'aj jun pik. Kyejten xq'uqilkye anmi atzu', tzaqex tej ttzyet tjaw joyet seb'ad tzmax ttzaj jb'al, qu'n min taj tu'n kyul lq'e k'utz kyk'etzju' kyimni te q'ijtl, ex tu'n lalun che ulju' tojk'ul txkup te qonik'an.

¹¹Tetzunj tb'inte Dab'i ti'ju' tb'incha Rispa, tqya Sawul,¹²xi' ex tzaj tiq'i'n tb'aqil Sawul ex tb'aqil Jonatan ju' tk'wal, toj kytx'otx'ju' aj Jab'es toj Kalaad. Aye'ju' xjal lu xi'ni kyelq'a'n toju' k'wik' toj B'et-san, jae'jawa' kyob'ana' pilistey tej tkub'kyi'j Sawul kyu'n toj Kyilb'oa.¹³Tchaq'tzun Dab'itz tu'n kyxi' iq'i'nju' kyb'aqil Sawul ex Jonatan, ex tu'n kyxi' iq'i'nju' jawjtz'o'n kyqul;¹⁴ku'xtzun kymqu'n kyb'aqil Sawul ex Jonatan toju' tmuqb'il Kyis, ju' tman Sawul, toj Sela, toj kytx'otx' tyajajil B'enjamin. Tkyaqil b'inchet kse'nx tchaq'ju' nimaqkawil. Tb'ajlenxi'tzun ja'lu, tzaj tb'i'n Qman Dyos kykub'sb'ilju' tnam. Klet Dab'i tu'n Ab'isay

¹⁵E'aq'wi jumajtl pilistey q'ojil kyi'j aj Israel. Etztzun Dab'itz q'ojil kyi'j kyuk'i'lju' nejenel kye t-xjal. Kub' sikti Dab'i b'a'nxi'x,¹⁶o'kxtoq ttzaju' Isb'i-b'enob', nim jun twe', b'yolte. Iq'i'ntoq jun tch'ut masch'i'n qaq lib'r tk'i' nik'jan talal, ex k'lo'nktoq jun tk'uẍtx'e'nb'il ak'a'j tk'u'j.¹⁷Atzunte Ab'isay, tk'wal Seruya, xi' onilte Dab'i, oktb'yo'n pilistey ex majx kyim tu'n. Kyb'inchatzun t-xjal Dab'itz tu'n ttziyante kye tu'n lalun tz'extl q'ojil kyuk'i'l tu'n lalun yup kytzaj aj Israel. Q'oj kyi'j xjal nimaqkwe' (1 Cr 20.4-8)

¹⁸Yajxi'tzuntel ok juntl q'oj kyu'n aj Israel kyi'j pilistey toj Wob'. Kub' tb'yo'n Sib'ekay ju' Sap toju' q'oj lu, ju' tzajni tyajil kyi'ju' xjal nimaq kywe'.¹⁹Ex tej tokjumajtl q'oj toj Wob' kyi'j pilistey, a Elanan tk'wal Jayir aj B'elen, kub' b'yonte Kolyat ju' aj Kat, iq'i'ntoq jun tch'ut nimin twe' ex lalun tk'etz.

²⁰Ok juntl q'oj toj Kat. Atitoqtzun jun ichan nimxi'x twe' atzu', kab'lajoj (12) twi'tqan ex kab'lajoj (12) twi'tq'ob': qaqchaq junjun tq'ob' ex qaqchaq junjun tqan. Kyyajajilx nimaq kywe',²¹okten ik'lelkye aj Israel ex kub' b'yo'n tu'n Jonatan, tk'wal Sima ju' ttzik Dab'i.²²Xi' tzajna' kyyajilju' kyaje' nimaq kywe' lu ti'j Repa, ju' aj Kat, e'kub' tz'aq toj tq'ob' Dab'i ex toj kyq'ob'ju' nejenel kye t-xjal. Tb'itz Dab'i tej tkanb'an (Sal 18)

¹Xitb'itza'n Dab'i tb'itz te Qman Dyos tej tklet tu'n toj tq'ob' Sawul ex toj kyq'ob' kykyaqilju' tajq'oj.²Tma kjalu: Aya taye, Aya ktxulweye', jun ja kuwsa'n tu'n nklete', tu'na inchin tzaqpeta'ye',³Aya Ndyose', jun pik te wewb'ile', kolb'ilweye', tu'nju' tipumala inchin kletaye', ti'ja inchin newana'ye' ikju'ya kse'n jun ja kuwsa'n te kolb'ilweye', inchin tklo'na. ¡Machin tzaqpete' tu'na toj q'oj!⁴O'kxa Nman Dyos, b'a'n tu'n tjaw nimset tb'iya: Aj txi' ntxko'na, inchin tklo'na toj kq'ob'ju' wajq'oje.

⁵Qu'n machin b'aj tb'alq'i'ne' kamik toju' ttolob'; majx matz'oktchiju' xitul wi'je'.

⁶Aju' kamik machin b'aj tb'alq'i'ne' toju' taqwil; ¡ex machin nokye toj t-xpatxab' kamik.!⁷Te ẍin kub' yajtiye' ntxoke' Qman Dyos, xinqanine' o'nb'il teju' Ndyose', ex intzaj tb'i'ne' toju' tja; ¡ponju' tq'ojq'ojel nwi'ye' toj t-ẍkyin!.

⁸Tzajtzun jun nin kyajnajnab'tz twitz tx'otx'; eb'aj yukchiju' tq'uqlil kya'j; majx eb'aj yukchi tu'n ttx'u'jil Qman Dyos.⁹Inxi'xtoq netz sib' toj ttxa'n atzu'n toj ttzi intoq netz q'aq' in jamun; ¡intoq che etz toj ttzi ttxalq'aq' inche k'enti!¹⁰Tjaqju' ttzi kya'j, ku'tztzuntz. ¡Nimtaq txqan q'eqmuj tjaq' tqan!¹¹Jaxqe tib'aj t-xik' jun kyerb'in, tzaj lipantzuntz toj kyq'iq'.¹²Ajb'enju' qlolj tu'n exju' txqan muj iqa'n tuk'i'l jb'al te tja.¹³Tzaj qoptz'aj q'ankyaq tzmax tk'etz; kub'tzun ttxalq'aq'tz in k'enti naku'j jb'al.

¹⁴Tb'incha Qman Dyos nim toklen tu'n tb'injtzu' tq'ojq'ojel twi' intinun tzmax toj kya'j.¹⁵E'tzaj t-xon talsmaj ex q'ankyaq, aye'tzunju' wajq'oje majx eb'ajx slamj tej kykub' oq.¹⁶Majx kyej q'ancha'lix t-xeju' ninnjab'; ex b'aj kyej q'ancha'lixu' tq'uqlil tx'otx', tu'n tq'ojq'ojel twi' Qman Dyos, tej ttzaj t-xupi'n kuw.

¹⁷Tzaj tq'o'n Qman Dyos tq'ob' weye' tzmax toj kya'j, ex njatz tiq'i'ne' toju' nin ninnjab'.¹⁸Machin tkole' kyeju' wajq'oje nim kyipumal inxi'xtoq tx'a'lti'j kyk'u'j wi'je' ex mastoq nim kyipumal nwitze'.¹⁹E'oktzaqpaj q'ojil wi'je' tej ma'toq chin kub'o'lje', atzunte Qman Dyos sonin weye':²⁰Machin ttzaqpiye' ex machin tkole'; ¡qu'n nchin tk'u'jla'ne'!²¹Matxi' tzaj tq'o'nte Qman Dyos tu'me'l t-xel weye' tu'nju' nchwinqlale' b'a'n,²²qu'n inchin b'ete' toj tb'e; ¡B'ajx kub'a' nxk'a'yi'na'wib'e' twitz!²³Majx na'nqe' kykyaqilju' tchaq'b'il wu'ne', ¡B'ajx chin ela' txalpuje' kyi'ju' tkawb'ila!²⁴Matxi' chin lpeye' ti'j chaq'aq'an qine' te; matxi' njuk'wib'e' ti'ju' myab'a'n.²⁵Matxi' tzajtq'o'nte Qman Dyos tu'me'l t-xel weye' qu'n b'a'n wele' twitz.

²⁶Aya Taye, njapunta tyol tuk'i'lju' xjal njapun tyola tu'n, Tz'aqlixi'xa tuk'ilju' in oktilil tu'n,²⁷axxi'x yolina tuk'i'lju' ax yolin, In nab'lina ti'ju' tx'yan tuk'i'l.²⁸In chetklo'nta' me'sqe', aye'tzu'n inkynima'n kyib' inel kych'ixaw tu'na.²⁹Aku'ta Taye, spik'un weye'; aya Qman Dyos, intzaj q'onte spik'un toju' nqloljile'.³⁰Tu'nju' tonb'ila che b'ajela' wajq'oje, ex chin iky'ixe' tib'aju' nimaqtapi kyi'jileju' ninkytanam.

³¹Tz'aqlixi'xte' Dyos tb'eyil; b'a'n tu'n tqe qk'u'j ti'ju' kyej ttziya'n. ¡Inche tklo'nte Qman Dyos kykyaqilju' q'uqli kyk'u'j ti'j!³²¿Alkyetzuntlju' dyos ti'jxi' Qman Dyos? ¿Alkyetzun juntl dyos kb'a'ntel qklet tu'n?³³Ate Qman Dyos kolb'ilweye' nimtipumal inchin toni'ne' tu'n wanq'ine' b'a'n,³⁴majx smaj che b'etju' nqane' tu'n, kse'n tz'ojqelan jun msat, inchin tkuwsa'ne' ajnxi'ye' toj kyq'iq',³⁵inchin t-xnaq'tza'ne' tu'n tb'ant nq'ojine', intzaj tq'o'n wipumale' tu'n ttz'umet q'ank'uxb'il te smaj wu'ne'.³⁶Aya inxq'uqinweye' ex inchin tklo'na; tkyaqilju' nb'incha'ne' matxi' q'ancha'lin tu'nju' tb'anila.³⁷Naqch'i'n sela' nb'eye' tu'na, ex mixti' ẍin jaw ẍq'ilpuje'.

³⁸Inik' lpeye' kyi'ju' wajq'oje, ex eb'aj wu'ne', tzmaxi' sanjtzwi'ju'ye' tej kymankun wu'ne'.³⁹¡E'kub' nb'ajsa'ne'! ¡Majx e'kyaj npẍu'ne'! ¡Majx e'kyaj tjaq' nqane'! Mix e'jawa' we'tl.⁴⁰Tzaj tq'o'na wipumale' toj q'oj; matb'inchaya tu'n kykub' tzipe nwitze' aye'ju' xjaw kyi'nkyib' wi'je',⁴¹ex tu'na ẍe kub'a' oq wajq'oje nwitze'. Iktzu'n ẍekub'a' nb'ajsa'ne' intx'a'lti'j kyk'u'j wi'je'.⁴²Intoq che qanin o'nb'il, ex mix-a'lote oninkye; e'txokon te Qman Dyos, ex mixti' e'tzaj ttzaq'we'n.⁴³¡Majx e'kyaj nb'uchine' kse'n quq! ¡B'aj nxjab'le'ne' kse'n xoq'l toj b'e!⁴⁴In tkola tej tjaw kyiq'i'n kyib'ju' ntaname' wi'je', machin tene' tu'na te nejenel kyib'aj nimaqtnam, ex mache ajb'en xjal weye' mixtoqti' ojtzqi'nqe' wu'ne'.⁴⁵Aj txi' nma'ne', inche b'in weye'; inchin jaw nimane' kyu'n najchaq xjal,⁴⁶inche tzaj xob'u' najchaq xjal weye', inche lu'lun ajkyetz toju' kyewb'il.

⁴⁷¡Nimanjtzxwitju' Qman Dyos! ¡Xjanxi'xwit toklenju' klol weye'! ¡Jawxwit nima'n Qman Dyos, inklonweye' ex inxq'uqinweye'!⁴⁸Ate Dyos xq'onte tu'me'l t-xel kyeju' wajq'oje ex matxi' che okxtq'o'n tnam tjaq' nkawb'ile'.⁴⁹inchin tklo'ne' kye wajq'oje, kyeju' ẍe jawmiltz'uj wi'je'. ¡inchin tklo'na Nman Dyos kyeju' xjal tx'u'jqe'!⁵⁰Qu'mtzun injaw nnima'na kyxolju' nimaqtnam ex inchin b'itzane' toj tb'iya.⁵¹Intzaj tq'o'na tipumalju' nimaqkawil jawni t-sk'o'na tu'n tkanb'an; k'u'jla'n Dab'i kukxju' tu'na kyuk'i'lxi' tyajajil, chi Dab'i toju' tb'itz. Mankb'il tyol Dab'i¹Aye' mankb'il tyol Dab'i ja'lu:
Aju' Dab'i tk'wal Jese ju' ichan jaw nima'n tu'n Dyos ju' nimaqkawil sk'o'n tu'n Qman Dyos ja k'uluna' Jakob', tb'anilxi'xtoq b'itzan b'itz toj Israel, tchik'b'a kjalu:

²Nyolin t-xew Qman Dyos toj ntziye', atiju' tyol toj ntziye'.³Oje yolinte Qman Dyos janche k'uluna' aj Israel; oje tzaj tma'n Xq'uqilkye aj Israel weye': Alkyete makawin kyxol xjal tuk'i'l tnik'alilti'j, ex toj tchiylal Qman Dyos,⁴K'okyel kse'n ajttzaj t-xe kya'j, kse'n q'ij in k'enti te prim qa ẍtilun twitz kya'j, in ch'iyju' itzaj tu'n tkub'lenxi' jb'al.⁵Qu'mtzun majx atiju' nyajajile' twitz Qman Dyos, qu'n kyej b'entti'j jun tyol tejumajx wuk'i'le', majx kyej nk'etti'j ex axxi'x. Intzaj tq'o'n tkyaqil kanb'ab'l weye' ex intb'incha'n tu'n kyjapun tkyaqilju' wajb'ile'.⁶Aye'tzunkye' b'inchal myab'a'n kykyaqil che okyel kse'n ch'i'x inex xoyit, ex mix-a'lo' injaw tzyunkye.⁷Tu'n jun k'uxb'il mujqa jun ch'ut in che'xa' ptxo'n, tu'n kyokxq'et toj q'aq' tu'ntzun kyb'aj patj kykyaqilx, chi Dab'i. E'nimaq q'ojil kyxol t-xjal Dab'i (1 Cr 11.10-47)

⁸Aye' b'a'nxi'x che q'ojin ja'lu kyxolju' t-xjal Dab'i: A Is-b'oset, ju' akmonit, nejenel kyeju' oxe' kuwqexi'x, e'kub' tb'yo'n kab'k'al (800) ichan tu'nju' tch'ut toj jun q'oj.⁹Ti'jxi'tzun atl Eleasar tk'wal Dodo, aj Aoyit, kyxolju' oxe' kuwqe'xi'x. Ten tuk'i'l Dab'i toj Pas-damim, tej kyb'uyinte kyib' pilistey atzu' tu'n kyq'ojin, aye'tzuntlkye aj Israel eb'jik' b'et.¹⁰Atzunte Eleasar kub' twab'a'ntib' b'a'nxi'x ex okten b'yolkye pilistey tzmaxi'j kykub' siktiju' tq'ob' ex mixti' el ttzaqpi'nju' tk'uẍtx'e'nb'il. Jun nin kanb'ab'l tb'incha Qman Dyos toju' q'ij lu. Exi'tzun lpe xjaltz te q'oj ti'j Eleasar tu'n tkub' kyetza'nju' b'je'l kye ajq'oj.

¹¹Ti'jxi'tzuntl Eleasar atl Sama, tk'wal Awe, ju' ararit. Tej kyb'uyinte kyib' pilistey toj Ley, jata' jun kojb'il awa'n karb'ans toj, e'kub' oqu' aj Israel te q'oj kywitzu' pilistey.¹²Atzunte Sama kub' twab'a'ntib' toju' kojb'il ex e'tkol, ekub'ju' pilistey tu'n. Iktzu'n kanb'ana' Qman Dyos.

¹³Oxe'tzun kyxolju' junaq lajoj (30) xjal te q'oj min nche xob', exi' tk'etz Dab'i toju' jyom toj Adulam, toj tq'ij b'uyit twitz awal. Aye'tzu'n xjal pilistey te q'oj atoqtzu' ta' kyxmuj toju' b'ya' Repaym.¹⁴Atoqtzu' ta' Dab'i toju' ja kuwsa'n, tej tkub' kyq'o'n jun tnej pilistey kyxmuj toj B'elen.¹⁵Atzunte Dab'i tma: ¡Naqwit ati jun tzaj q'inte nk'wa'ye' ti'ju' a' toju' xoch ttzi B'elen!, chij.

¹⁶Aye'tzu'n oxe' xjal te q'oj min nche xob' eb'jo'kx kyxolju' xjal pilistey te q'oj, ex jatzkyiq'i'n a' toju' xoch ttzi B'elen, xikyiq'i'ntzuntz te Dab'i. Atzunte Dab'i el tqo'n te chojb'il twitz Qman Dyos ex mixti' xitk'wa'n,¹⁷tmatzuntz: ¡Awt Qman Dyos klonweye' tu'n lalun txi' nk'wa'ne'! ¡Qu'n naku'j kychk'elku' ichan ja'lu ju' ẍe'x q'elte, qu'n jaku'toq che kub' b'yo'n tej ẍe tx'anj q'elte! chij. Mixti'x xitk'wa'n. Aye' oxe' ichan min nche xob' ex kuwqe' eb'inchanteju' lu.¹⁸Atoq Ab'isay, titz'in mo ttzik Joab', tk'wal Sarb'ya, nejenel kye junaq lajoj (30) ichan min nche xob'. Junmaj oktzaqpaj q'ojil kyi'j o'lajnaq (300) ichan tuk'i'lju' tch'ut, ex e'kub' tb'yo'n. Iktzu'n jawa' nima'na' kyxolju' junaq lajoj (30),¹⁹ok nim toklen kywitzju' txqantl, qu'n okq'o'n te nejenel kye. Mixti' pon kse'nqe' oxe' tnejel.²⁰Atzunte B'enayiy, tk'wal Joyada, tzajni toju' tnam Kab'seel, mixtoqti' nxob' qu'n tb'incha txqan ti'xti'. A kub' b'yo'nkye kab'e' tk'wal Aryel aj Moab', ex jun q'ij intoq kub' che'w, ku'x toj jun jul ex kub' tb'yo'n jun b'alun.²¹Ex kub' tb'yo'n jun aj Ejipt ttxlak'e iq'i'n jun tch'ut: ok tzaqpaj B'enayiy b'yolte tuk'i'l jun tze, el txk'a'yi'nju' tch'ut toj tq'ob' ex kub' tb'yo'n tu'nxju' tch'ut.²²Tu'ntzunju' lu, jaw nima'n B'enayiy, tk'wal Joyada, kyxolju' junaq lajoj (30) ichan min nche xob';²³ex ok nim toklen kywitzju' txqantl, ex mixti' pon kse'nqe' oxe' tnejel. Ex oktq'o'n Dab'i te nejenel kyeju' xq'uqilte.

²⁴Aye'tzun junaq lajoj (30) xjalju' min nche xob' lu: A Asael, titz'in Joab'; ex Elanan, tk'wal Dodo aj B'elen;²⁵ex Sama, aj Arod; ex Elika, aj Arodx;²⁶ex Eles, ju' paltita; ex Ira, tk'wal Ikyes aj Tekoa;²⁷ex Ab'yeser, aj Anatot; ex Sib'ekay, aj Usa;²⁸ex Salmon, aj Aoyit; ex Maaray, aj Netopa;²⁹ex Eled, tk'wal B'aana, aj Netopax; ex Itay, tk'wal Rib'ay, aj Wib'ea, ju' ati toj kytx'otx' tyajajil B'enjamin;³⁰ex B'enayiy, aj Piraton; ex Iday, najli ttzi a' Kaas;³¹ex Ab'i-alb'on, ju' arb'atit; ex Asmab'et, aj B'awrim;³²ex Elyab'a, ju' saalb'onita; exqe'ju' tk'wal Jasen; ex Jonatan;³³ex Sama, ju' ararit; ex Ayam, tk'wal Sarar, ararit-x;³⁴ex Elipelet, tk'wal Aasb'ay, tk'walju' aj Maaka; ex Elyam, tk'wal Aytopel, aj Wilo;³⁵ex Esray, aj Karmel; ex Paaray, ju' arb'it;³⁶ex Iwal tk'wal Natan, aj Sob'a; ex B'ani, aj Kad;³⁷ex Selek, aj Amon; aj Naaray, aj B'eerot, onilte Joab', tk'wal Sarb'ya;³⁸ex Ira, aj Jatir; ex Wareb', aj Jatirx;³⁹ex Uriy, itit. Junaq wuqlajoj (37) tu'n kykyaqil. Jaw kyajlalju' tnam tu'n Dab'i (1 Cr 21.1-17)

¹Tzaj jumajtl ttx'u'jil Qman Dyos kyi'j aj Israel, ex kub' tq'o'n toj tanmi Dab'i tu'n tjaw tiq'i'ntib' kyi'j, tchaq' te tu'n tjawtiq'i'n jun kyajlal aj Israel ex aj Juda. ²Tchaq'tzun nimaqkawiltz te Joab', kynejel xjal te q'oj xq'uqilte:
—Kutxi'ya kyxol kykyaqil tnej tyajajil Israel, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j, ex iq'i'nktza kyajlal, tu'ntzun nb'inteye' jte' b'a'nqe' te q'oj, chij.

³Atzunte Joab' xittzaq'we'n te nimaqkawil:
—Awt Qman Dyos chmet-santexi'xju' ttanam twitzju' ati ja'lo, ex tenxwit tchwinqlala nimaqkawil tu'n tka'yinteya; naqtzun a, ¿titi' k'ajb'ela' teya tu'n tjaw ti'na kyajlal?, chij.

⁴Ilxi'xtzunti'j xitb'i'n Joab' exqe' nejenel kye xjal te q'oj, tchaq'b'ilju' nimaqkawil, e'etztzuntz twitz nimaqkawil tu'n tjawkyi'n kyajlalju' tnam Israel.⁵E' ik'x jlaju' nin a' Jordan, tzyettzuntz kyu'n toj Aroer ex toju' nintnam ati toj nky'ajchaqju' b'ya', tu'me'l Kad ex Jaser.⁶Kyik'lenxi'tzun atzu', exi' Kalaad ex Kades, kytanam itit. E'pontzuntz Dan, tzmaxtzuntzu' anjtza'kyi'j tu'n kypon Sidon.⁷Yajxi'tzuntel exi' toju' ja kuwsa'n toj Tiro ex kyoj kykyaqil nimaqkytanam eb'ey ex aj Kanaan, tzmax kyelpun yal toj tnayaj Juda, tu'n tpon B'eerseb'a.⁸Tetzunj tjapun b'eljoj xjaw tuk'i'l junaq (20) q'ij, tb'ajlenxi' kyb'eti'n tkyaqilju' tx'otx', e'pon Jerusalen.⁹Xi'tzun tq'o'n Joab' tajlalu' tnam teju' nimaqkawil, atitoq jo'naq mutx' (800,000) ichan b'a'nqe' te q'oj kyxol aj Israel, atzun oxnaq kab'mutx' lajk'al (500,000) kyxol aj Juda.

¹⁰Eltzun tniky' Dab'i qa a ati tpaj tu'nju' tchaq' tu'n tjaw kyajlalu' tnam, ex jatz tpa'n til twitz Qman Dyos:
—Matxi' chin nb'incha jun nin ile', tu'nju' xnb'inchaye' lu. Qu'mtzun b'inchama xtalb'il Taye, chin tnajsama ja'lo, qu'n mixti' ẍin ximane' ti'j, chij.¹¹Tetzunj tjawe' Dab'i te prim toj juntl q'ij, xitma'n Qman Dyos te Kad ju' sanjelal, janxjeluna' Dab'i:¹²Kutxi'ya tk'etz Dab'i, ex q'manxa oxe' ti'xti' nkub' nq'o'ne' twitz, tu'n tjaw t-sk'o'n jun kyxol alkye tajb'il tu'n nb'inchanteye', chij te.¹³Xi'tzun Kad tk'etz Dab'i, ex xitma'n te:
—Matzaj tma'n Qman Dyos weye' tu'n tjaw t-sk'o'na alkye b'a'n toj twitza: ma aju' oxe' ab'q'i we'yaj toju' tx'otx', mo aju' tu'n toq oxe' xjawa kywitzju' tajq'oja, mujqa oxe' q'ij tx'u'j yab'il toju' tx'otx'. Ximankutzuna ja'lo, ex sk'o'nktza tu'ntzun txinma'ne' te Qman Dyos, chij.

¹⁴Atzunte Dab'i xittzaq'we'n te Kad:
Matxi' chin jtz'ete'. Ja'lo ate b'a'nju' aku' Qman Dyos k'okyel tq'ob' qi'je', qu'n nimte tk'u'jlalil, kyetwitz toj kyq'ob' xjal, chij.

¹⁵Tzajtzun tq'o'n Qman Dyos jun tx'u'j yab'il kyib'aj aj Israel, tzyet-x te prim lu, tzmax tjapunju' q'ij q'ma'ntl, ex eb'aj kyim wajxaqmutx' o'lajk'al (70,000) ichan, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j.¹⁶Tetzunj naqxi'xtoq tu'n kykyimtlju' najlqe' toj Jerusalen tu'nju' anjl, exch'yonju' xitb'il lu toj tk'u'j Qman Dyos, xitma'ntzuntz teju' anjl b'iyol: ¡O'kxtzu'n, tky'i'xju'!, chij te.
Xi'toqtzun ta'ju' anjl toju' kmuj lu, ja ntriyina'toq Arawna ju' jeb'usey.¹⁷Tetzun tka'yinte Dab'i, ljo'ntoq kyb'aju' tnam tu'nju' anjl, xitma'n te Qman Dyos:
—¡Ayinwe' ẍin b'inchal il! ¡Ayinwe' ti npaj! ¿Titi'tzu'n xkyb'inchaju' tnam lu? ¡Wib'ajwe' q'ontza'teju'ya tz'e'ysb'il witzb'aj lu ex kyib'aju' toj njaye'!, chij. Jawtb'incha'n Dab'i jun q'olb'eb'l (1 Cr 21.18-27)

¹⁸Tojxtzu'n q'ij lu, xi' Kad tk'etz Dab'i, ex xitma'n te tu'n tjaw tb'incha'n jun q'olb'eb'l te Qman Dyos, jatoq ntriyina' Arawna ju' jeb'usey.¹⁹Xi'tzun Dab'i b'inchalte xitma'n Kad te kse'nxju' tchaq' Qman Dyos.²⁰O'kx txi' tka'yi'n Arawna najchaq, xi'toq ttzaju' nimaqkawil kyuk'i'lju' ajb'el te tk'etz. Tzajtzun nej Arawna k'lulkye, ex kub' tzipe twitzju' nimaqkawil,²¹ex xitma'n te:
—¿Ti'tzun ch'i'nta twitqan nimaqkawil saja xb'etzalweye'?, chij.
Xi'tzun ttzaq'we'n Dab'i te:
—Wajb'ile' tu'n ttzaj tk'a'yi'na jantriyana'ya, tu'n tjaw nb'incha'ne' jun q'olb'eb'l te Qman Dyos atzu', tu'ntzun telju' tx'u'j yab'il toju' tnam, chij.

²²Atzunte Arawna xittzaq'we'n te:
—Mixti'te' nimaqkawil, tzyumta' aju' b'a'nxi'x toj twitza, ex q'onku'ya chojb'il k'ok'sb'il. Luqe' tman wakx lu te chojb'il k'ok'sb'il, ex b'a'n tu'n kyajb'enju' pitxb'il exqe' tze ti'j kyqul wakx te si.²³¡Kxe'l nq'o'nwe' tkyaqilju' lu teya nimaqkawil!, chij te.
—Expe' tmatl Arawna:
—¡Kub'xwittzun tk'u'ju' Qman Dyos tu'na, nimaqkawil!, chij.

²⁴Atzunte nimaqkawil xittzaq'we'n te:
—Chjontexi'x teya, naqtzun a knlq'a'we' kse'nxju' twi', qu'n lay kub' nq'o'nwe' chojb'il k'ok'sb'il twitz Qman Dyos qa mya nloq'oje'.
Ikytzu'n tloq' Dab'i tx'otx' lu exqe' tman wakx tu'n kab'naq lajoj (50) saqpwaq,²⁵atzuntzu' jawa' tb'incha'n jun q'olb'eb'l te Qman Dyos, ex e'kub' tq'o'n chojb'il k'ok'sb'il ex chojb'il te b'inchjtib'il. Tzajtzun tb'i'n Qman Dyos kub'sb'il ti'ju' tx'otx', ex eltiq'i'nju' tx'u'j yab'il toju' tnam Israel.

Bible Society in Guatemala

https://app.library.bible/content/aea9d9099feb3a24