Read 1 Samuel 1

1 Samuel1

Tzaj tq'o'n Dyos jun tal Ana

¹Atitoq jun ichan Elkana tb'i kyxolju' toj tja Sup, najlitoq Rama, kyxolju' witz te Eprayin. Tk'wal Jeroam ex tchman Elyu. A tman tchmanju' Tou, tk'wal Sup, tyajajil Eprayin.²Kab'e'toqtzun t-xu'jil Elkana ate'. Aju' jun a tb'iju' Ana, atzu'n juntl Penina. Atitoqte' Penina tal, atzunte Ana mixtoqti'.³Tkyaqiltoqtzun ab'q'i nxi' Elkana k'ulul ex q'ol chojb'il twitz Qman Dyos nimtipumal toj Silo. Jata'qe'toq kab'e' tk'walju' pale Elyi, aye' Opni ex Pinees, paleqe'x twitz Qman Dyos.

⁴Ajtkub' tq'o'n Elkana chojb'il, inkub' tq'o'n jun tnej ti'j Penina ex kyi'ju' tal q'a ex txin,⁵atzu'n ti'j Ana intoq kub' tq'o'n tb'anilxi'xtl, qu'n intoq tk'u'jla'nxi'x, b'a'ntzunqa mixtoqti' in alan tu'n Qman Dyos.⁶Tu'ntzun tpaj ja'lu intoq q'ojin Penina ti'j Ana, naqxtoq tak'a'n tok q'olte ttx'u'jil ex intoq xmayin ti'j, majxtoq nel tch'ixaw tu'n tu'nju' mixtoqti' in alan tu'n Qman Dyos.

⁷Ajtoqtzun kyxi' toj tja Qman Dyos atl junjun ab'q'i, intoq okten Penina ik'lelte Ana ikju'; qu'mtzun majxtoq inkub' oq' Ana tu'n tpaj ex mixtoqti' in wan.⁸Atzunte Elkana ju' tchmil intoq xitma'n te: Ana, ¿tiqu'n in oq'a'ya? ¿Tiqu'n nb'isuna'ya ex min nwana? ¿Ma myatzun tb'anilqinxi'xe' kyekywitz lajoj tala?, chij te.

⁹Junmaj, tej ate'toq toj Silo, jaw we' Ana tb'ajenxi' wan. Q'uqlitoqu' pale Elyi toj jun tq'uqb'il nqayin ttziju' tja Dyos.¹⁰Kub'ten Ana kub'sal twitz Qman Dyos, qu'n inxi'xtoq b'isun, ex majx in noq' tu'n tpaj.¹¹Ex xittziya'n te Qman Dyos ikjalu: Dyos nimtipumala: qama tzajtka'yi'na yajb'il wi'je' ayine' tmajina, exqa matzaj q'aq'antk'u'ja wi'je' tu'n titz'ji jun wale', kxe'l nq'o'nwe' tu'n tajb'en teya toj tkyaqilju' tchwinqlal, ex lay tz'el joyitju' twi' toju' ajb'eb'l lu, chij.

¹²Tetzunj intoq na'n Dyos Ana twitz Qman Dyos, intoq tx'ikyex Elyi ti'ju' ttzi;¹³atzunte Ana intoq na'n Dyos toj tanmi. Mixtoqti' in q'ojq'ojex toj twi'; noq o'kxtoqju' ttzi in yukchi. Kub' t-xima'ntzun Elyitz qa tx'ujtenil,¹⁴ex xitma'n te:
—¿Ma kukx ttx'ujtiju'ya? ¡Spik'b'am tuk'i'la! chij te.

¹⁵Xi'tzun ttzaq'we'n Ana te:
—Minti' ta, mya inwt chin k'wanwe' b'in mujqa q'e'n kuw tq'ob', awe' nchin niq'in, nchin b'isune' ex ntinke' q'malte' te Qman Dyos.¹⁶Lalun kub' t-xima'na qa myab'a'n qyaqine', machin kub'tenwe' na'l Dyos nim tqan, qu'n inb'ajx nk'u'je' ex inxi'x chin b'isune'.

¹⁷—Awtnatzun Dyos kye aj Israel tzaj q'onte xxi'tqani'na te, chab'a txi'ya, chi Elyi xitma'n te.

¹⁸—Chjontexi'xna' teya, chi Ana te.
Anjtzun ti'j Ana jatzaja', in pon ex aq'wi wal, eltzunte' b'istzu' ti'j.

¹⁹B'a'n prim te juntl q'ij e'anj kyja toj Rama kyb'ajlenxi' k'ulun te Qman Dyos. Kub' kẍetzun Elkanatz tuk'i'l Ana, ex tzaj tna'n Qman Dyos tqanb'etz Ana.²⁰Kyajtzun Anatz ch'onwi', tetzunj tjapun tq'ijlalil, itz'ji jun tal ex oktq'o'n tb'i Samwel, qu'n xitqani'n te Qman Dyos.

²¹Tojtzunj tpon tq'ijlalil tu'n kyxi'tl Elkana kyuk'i'l kykyaqilju' toj tja toj Silo, tu'n tjapunju' tyol ojetoq ttziya, ex tu'n txitq'o'n chojb'il atl junjun ab'q'i;²²atzunte Ana mixti' xi', xitma'n te tchmil:
—Lay chinxe' qu'n na'mx telju' ne'ẍ ti'j tch'u', ajtzun tel, kxe'l wiq'i'ntzuntze' te Qman Dyos tu'n tkyejten jumajx, chij.

²³Atzunte Elkana ju' tchmil xittzaq'we'n te:
—B'inchamna'ya aju' b'a'n toj twitza. Atzun tyoya ajtel ti'na ne'ẍ ti'j tch'u'. Awttzun Qman Dyos tz'oninteya tu'n tjapunju' tyola tu'na, chij. Ikytzu'n kyeja' ten Ana ch'isalte tal tzmaxi'j tel ti'j tch'u'.²⁴Tetzunj tel tiq'i'n ti'j tch'u', xitiq'i'n tal q'a toj tja Qman Dyos toj Silo, akxtoq tel ti'j tch'u'. Ex xitiq'i'n jun qpoj tman wakx te oxe' ab'q'i, jun arob' arin ex jun tz'u'n b'in.²⁵Kub'tzun kyb'yo'n jun qpoj tman wakx te chojb'il ex xikyq'o'nju' tal q'a te Elyi.²⁶Ex xitma'n Ana te Elyi:
—Najsam Dyos tchwinqlala, taye, ayinweju'ye' qya inkub' tene' na'l Dyos nqayin tk'etza.²⁷Xinqani'ne' te Qman Dyos tu'n ttzaj tq'o'n wale' lu, ex matzaj tq'o'n weye'.²⁸Matxi' kub' nxima'ne' tu'n txinq'o'ne' te Qman Dyos, ex k'ajb'el te Qman Dyos toj tkyaqilju' tq'ijlalil tchwinqlal, chij.
Kub'tzun meje twitz Qman Dyos, majx kub'joqe twitz tx'otx'. Tb'itz Ana¹Kub'tentzun Anatz na'l Dyos ikjalu:
Nchin tzalaje' tuk'i'l tkyaqil nk'u'je' ti'j Qman Dyos qu'n intzaj tq'o'n wipumale'. Kchin tze'le' ja'lo kyi'ju' wajq'oje qu'n matxi' tz'onin wi'je'. ¡Ex inxi'x chin tzalaje'!²¡Mix-a'lo'te jun xjan kse'n Qman Dyos! ¡Mix-a'lo' jun nkolon kse'n Qman Dyos! ¡Ex mixti' juntl ti'jxi'!³Mix-a'lo' jun tu'n tyolin tuk'i'l nimjtib'il, Mix-a'lo' jun tu'n tjaw tnimanxi'x tib', qu'n o'kxte Qman Dyos b'ilte tkyaqil, ate in mlonte ex nxjelun ti'j kyb'inchb'aj xjal.⁴Inkub' t-xitu'n kysmaju' kuwqe', ex ntzaj tq'o'n kyipumalju' numjniqe';⁵Aye'ju' nimtoq kywa ati, nxikyq'a' majina'kyib' ja'lo naq tu'n jun piẍ kywa; aye'tzu'n intoq che q'aq'an, nim kywa ati ja'lo. Aju' qya mixtoqti' nnalan, matxi' tz'alan wuq maj; atzunju' nimtoq txqan tal, matxi'xi'x kub' b'aj.⁶O'kxte Qman Dyos ntzaj q'onte ex nel q'inte chwinqlal; nqo'x tiq'i'n toj muqb'il ex nqo jatztiq'i'n.⁷Tu'n Qman Dyos prowqo' mujqa q'inunqo'; in qo jaw tz'aq tu'n ex in qo jaw twab'a'n jumajtl.⁸Injaw tiq'i'nte Qman Dyos prow twitz tx'otx' ex njatz tiq'i'nju' nmon twa toj xob'l tz'is, tu'n tkub' tq'uqb'a'n kyxol nimaqxjal ex tu'n txi' tq'o'n nimaq toklen; qu'n ate Qman Dyos tajaw tq'uqlilju' tx'otx', ex kub' tq'o'nju' tx'otx' tib'aj.⁹Inche t-xq'uqi'nju' nche niman te jaxjaku' mache'xa', aye'tzunkye' b'inchal il nche kyim toj qxopin, qu'n mix-a'lo' jun nkanb'an tu'nx tipumal,¹⁰Che b'ajel tpink'u'nte Qman Dyos tajq'oj, ex ktzajel tq'o'n q'ankyaq kyib'aj. Che okyel kykyaqil xjal toj xjel tu'n Qman Dyos; kxe'l tq'o'n tipumalju' nimaqkawil jawni t-sk'o'n ex kch'iyelju' toklen tu'n, chi Ana toju' tb'itz.

¹¹Anjtztzun Elkanatz tja toj Rama, atzunju' tal q'a kyejten ajb'el te Qman Dyos tjaq' tkawb'ilju' pale Elyi. Kyil tk'wal Elyi

¹²Ayeju' tk'wal Elyi pi'sqetoq twitz Qman Dyos ex mixtoqti' inche niman te,¹³ex mixtoqti' in kyb'incha'nju' kyaq'un tojxi'x tu'me'l kse'n jun pale kyeju' tnam; qu'n ajtpon jun xjal tuk'i'l chojb'il, in pon jun kymajin tuk'i'l jun xokb'il chib'j, ex akxtoqtzun in tzq'aju' chib'j,¹⁴inku'x tq'o'n xokb'il toju' k'wil, tkyaqiltzu'n ntzyet tu'n xokb'il, nxitiq'i'n teju' pale. Ayiletzun nkyb'incha'nju' kye kykyaqil aj Israel nche pon toj Silo.¹⁵Expe' na'mxtoq tkub' tz'e'ysa'nju' unt tib'aju' q'olb'eb'l, in pon tmajenju' pale ex inxi' tma'n teju' inpon q'inte chojb'il: Q'ontza chib'j tu'n tk'a'set teju' pale; qu'n lay txi' tk'mo'nju' chib'j tzq'ajsa'n qa mya cha'x, chij.¹⁶Qatzun matxi ttzaq'we'nju' tajaw chojb'il qa tnejel tu'n ttz'e'ysanteju' unt, exqa yajxi'tl b'a'n tu'n txi' tiq'i'nju' tajb'il, atzunju' tmajin pale inxi' ttzaq'we'n: ¡Mikxa'ju', ati tu'n ttzaj tq'o'na ja'lo! Qatzun min, k'elel nxk'a'yine' teya, chij.¹⁷Qu'mtzun nimxi'xtoqju' il inkyb'incha'nju' ku'xun lu twitz Qman Dyos, qu'n mixti' toklenju' oyaj kye, ju' inche'x q'o'n te Qman Dyos.

¹⁸Atzunte' ku'xun Samwel kukxtoq tajb'enju' te Qman Dyos, ex oksa'nktoq jun t-ẍa'y sed.¹⁹Tkyaqiltzun ab'q'i, inxitiq'i'n ttxu jun tal pinpa't b'o's ax b'inchalte, ajkyxi' q'ol chojb'il tuk'i'lju' tchmil toj tja Qman Dyos.²⁰Atzunte Elyi ntoq tqani'n b'a'n kyib'aj Elkana tuk'i'lju' t-xu'jil, kjalu: Awt Qman Dyos q'onte tu'me'l t-xel teya tu'nttzajq'o'ntl tk'wala ti'ju' t-xu'jila lu, te t-xelju' matxi' tzaj tq'o'na te Qman Dyos, chij. Nche anjtzuntz kyja,²¹atzunte Qman Dyos intoq kub' tk'i'wla'n Ana, ex intoq kyej Ana ch'onwi'. E'itz'ji oxe'tl tal q'a ex kab'e' txin, atzunte Samwel intoq ch'iy twitz Qman Dyos.

²²Matxitoqtzun tijinxi'x Elyi, ex b'i'ntoq tu'n titi' nkyb'incha'n tk'wal kyi'j aj Israel, expe' qa intoq che kub'kẍe kyuk'i'lju' qya ntoq che ajb'en ttziju' Ja te Mujb'ab'l tuk'i'l Qman Dyos.²³Qu'mtzun xitma'n Elyi kye tk'wal: Kykyaqil xjal nche tzaj q'mante weye' qa taq'wixju' txqan kyb'inchb'ene'. ¿Tiqu'n nkyb'incha'na'ye' ikju'?²⁴E'nk'wal, myab'a'nju' nb'i'ne' nkyoli'n ttanam Qman Dyos kyi'je'.²⁵Qa ati jun xjal matb'incha taq'wix ti'j juntl, ate Qman Dyos klolte; qatzun ati jun xjal matb'incha taq'wix ti'jku' Qman Dyos, ¿alxi'xkye klolte?, chij kye. Aye'tzunkye mixti'x xikyb'i'nju' kyman, qu'n matxi'toq kub' t-xima'n Qman Dyos tu'n kykub' tb'yo'n.

²⁶Atzunte Samwel ljo'ntoq tch'iy, exju' tchwinqlal b'a'ntoq nela' toj twitz Qman Dyos ex toj kywitz xjal.

²⁷Pon jun t-sanjelal Qman Dyos xb'etzalte Elyi toju' tq'ijlalil lu ex xitma'n te: Matxi' tma Qman Dyos ja'lu: Kub' nyek'u'n wib'e' b'a'nxi'x kywitzju' ojtxi' tyajilb'ena tej ntoq che ajb'en toj Ejipt te Paraon.²⁸Ex e'jaw nsk'o'ne' tu'n kyoke' te pale nwitze' kyxol kykyaqil tnej tyajajil Israel, tu'n tkub' kyq'o'ne' chojb'il k'ok'sb'il tib'aju' q'olb'eb'l weye', ex tu'n kytz'e'ysanteju'ye' sturak, ex tu'n tok kyoksa'ne' kyxb'alune' nwitze'. Expe' xinq'o'ne' kykyaqilju' chojb'il inkub' kyq'o'n aj Israel te ninb'ilweye' kyeju' ojtxi' tyajilb'ena.²⁹¿Tiqu'ntzun naqch'i'n kyoklenju' chojb'il ex oyaj kyu'ne' ju' oje nchaq'e' tu'n kyb'inchet? ¿tiqu'n aye'xi'x tk'wala nche'x tb'i'na kye nwitze', tu'n tetzkywitz kyu'nju' tb'anil kyoyaj ntaname' aj Israel?, chi Qman Dyos.³⁰Qu'mtzun chi Qman Dyos ja'lo: nmaye' qa k'ajb'ela weye' kukxju' exqe'ju' toj tjaya, atzu'n ja'lo mikxa'tlju'; che kjawil nnimsa'nwe' inche niman weye', aye'tzunju' nchinel kyik'o'ne' k'elel kych'ixaw. Ayine' Dyos Manb'aj inchin q'mante.³¹Matxi' ponju' kmuj tu'n tkub' nxitu'ne' toklena ex kyoklenju' tyajilb'ena, ex mix-a'lo' junju' toj tjaya kb'el tijil.³²Ktzajel tb'isa ex ktzajel ttx'u'jila aj tka'yinteya tkyaqilju' b'a'n knb'incha'ye' toj Israel, atzu'n kyxolju' tyajajila mix-a'lo' jun ktijil.³³Oktzun kjel nq'o'ne' jun kyxolju' twitze'la nqayin tk'etzju' q'olb'eb'l weye', tu'ntzun ttzaj ttzitk'u'j tu'n ttx'u'jil, ex kykyaqilju' txqantl tyajajila che kb'el b'yo'n.³⁴Ktla'ya titi' kb'ajel kyi'ju' kab'e' tk'wala, Opni ex Pinees: kche kyimel kykab'il toj jun q'ijx.³⁵K'okyel nq'o'ntzuntze' jun pale b'a'n q'uqlixi'x nk'u'je' ti'j, ktb'incha'ju' wajb'ile' exju' b'a'n toj nwitze', che tenb'elju' tyajajil kukxju' ex k'okyel nq'o'ne' tu'n tajb'en kukxju' teju' nimaqkawil kjawil nsk'o'ne'.³⁶Aye'tzu'n mache kyej anq'in kyxolju' toj tjaya, che ul ex che b'eltzipe twitz tu'n jun saqpwaq mujqa tu'n jun piẍ wab'j, che kub'sal te tu'n txitq'o'n jun kyaq'un kyxolju' pale naqx tu'n jun kywa, chi Dyos, chiju' t-sanjelal Dyos te. Txokli Samwel tu'n Qman Dyos

¹Atzunju' ku'xun Samwel intoq ajb'en te Qman Dyos tjaq' tnuk'b'il Elyi. Naqtoq eqch qa ma'x tzaj yolin Qman Dyos toju' tq'ijlalil lu, tu'n tq'onte jun tqanil te jun xjal; myatoq q'achq'al in nul tyek'u'ntib' jun tqanil te jun xjal toj naku'j witzik'.²Tojtzun jun q'ij intoq wtanju' pale Elyi toju' tja, tej ljo'ntoq kynaju' twitz ex mixtoqti' nka'yinxi'xtl.³Kuẍlitoq Samwel toj tja Qman Dyos, ja ta'toq tkaxilju' tchaq'b'il Qman Dyos. Inxtoq k'entiju' kantil toju' ja xjan.⁴Tzaj txko'n tu'n Qman Dyos:
—¡Samwel!, chij.
—Atzunte Samwel xittzaq'we'n: luqine' lu, chij.

⁵Xi'tzun ojqelantz jatoq ta' Elyi ex xitma'n te:
—¿Ti'tzun?, luqine' lu, chij.
—Atzunte Elyi xittzaq'we'n te: mixti'we' nchin txkon ti'ja. Kutxi'ya wtal, chij te.⁶Atzunte Qman Dyos txkon jumajtl:
—¡Samwel!, chij.
Jawtzun we' Samwel ex xi' tk'etz Elyi ex xitma'n te:
—¿Ti'tzun?, luqine' lu, chij.
—Atzunte Elyi xittzaq'we'n te: mixti'we' nchin txkon ti'ja nky'ajul. Kutxi'ya wtal, chij.

⁷Na'mxtoqtzun tojtzqinte Samwel Qman Dyos, qu'n na'mxtoq tyek'u'ntetib' te.⁸Tzajtzun yolin Qman Dyos te Samwel toxmaji'n, jawtzun we' Samwel ex xi' q'malte te Elyi:
—Luqine' lu; ¿ti'tzun?, chij.
Kanetzuntz toj twitz Elyi qa a Qman Dyos ntxokon teju' ku'xun Samwel,⁹ex xitma'n te:
—Kutxi'ya kẍeb'il; qatzun matxokon Qman Dyos teya, tzaq'we'nxa te: Yolina qu'n kb'el nb'i'nwe' ayine' tmajina, chiku'ya, chij. Xi'tzun Samweltz kẍeb'il toju' tkuẍb'il.¹⁰O'kx tpon jumajtl Qman Dyos, kub'ten ex xittxko'n jumajtl kse'n tnejel:
—¡Samwel! ¡Samwel!, chij.
Atzunte Samwel xittzaq'we'n:
—Yolina qu'n kb'el nb'i'nwe' ayine' tmajina, chij.

¹¹Xi'tzun tma'n Qman Dyos te:
—Knb'incha'ye' jun ti'xti' kyxol aj Israel expe' majx kch'yol kẍkyinju' kche b'ilte.¹²Ilti'j kjapumel wu'ne' toju' q'ij lu, tkyaqilju' oje b'ajx nma'ne' te Elyi ti'ju' kb'ajel kyi'ju' toj tja.¹³Oje txinma'ne' te qa kb'el ntz'e'ysa'n kywitzju'ye' toj tja tejumajx, qu'n b'i'ntoq tu'n qa taq'wix nkyb'incha'n tk'wal nwitze', extzun min exi'ttzak'u'n.¹⁴Qu'mtzun oje ntziyaye' kyi'ju' toj tja Elyi qa layx kub'najsetlju' kyil tu'n chojb'il ex tu'n oyaj.

¹⁵Tb'ajlenxi'tzun ja'lu, kub'kẍe Samwel, tetzunj qsqix te juntl prim, e tjaqu' ttzi tja Qman Dyos. Intoq xob' Samwel tu'n txi' tman te Elyi aju' matxi'toq q'umli te toj naku'j witzik',¹⁶Atzunte Elyi xittxko'n ex xitma'n te:
—¡Samwel, nky'ajul!, chij.
—Luqine' lu, chi Samwel xittzaq'we'n.

¹⁷Xi'tzun tqani'n Elyi te:
—¿Ti'tzu'n saj tma'n Qman Dyos teya? b'inchama xtalb'il lalun kub' tewa'na weye'. ¡Awt Qman Dyos kub' tz'e'ysante twitza b'a'nxi'x qama kub' tewa'n jun ti'xti'ya nwitze' ti'j tkyaqilju' saj tma'n teya!, chij.

¹⁸Xitzun tchik'b'a'n Samwel tkyaqil te, ex mixti' kub' tewa'n, tmatzun Elyitz:
¡Ana'te Dyos Manb'aj! ¡B'inchet-xwitju' b'a'n toj twitz!, chij.

¹⁹Ch'iyte Samwel ex onin Qman Dyos ti'j, ex japun tkyaqilju' tyol ojetoq txi' ttziya'n te.²⁰Kykyaqiltzu'n aj Israel, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j, elkynik' te Samwel qa jun t-sanjelalxi'x Dyos.²¹Ex kub' tyek'u'n jumajtltib' Qman Dyos te Samwel toj Silo, qu'n atoqtzu' intzaja' tma'na' tyol te Samwel;¹atzuntlte Samwel intoq xitchik'b'a'n kye kykyaqil aj Israel. Xikyiq'i'n pilistey tkaxil tchaq'b'il Dyos
B'aj kyb'u'yi'n kyib' pilistey toju' tq'ijlalil lu tu'n kyq'ojin kyi'j aj Israel, ex e'etz aj Israel q'ojil kyi'j, e'kub'ten tk'etz Eb'en-eser. Aye'tzu'n pilistey e'kub'ten Apek,²E'tzajtzuntz q'ojil kyi'j aj Israel, tetzunj ttzyet kyq'ojin, kub'kyi'j aj Israel kyu'n, e'kub' kyb'yo'n lajk'al (4,000) ichan jae'q'ojina'.³Tetzunj tanjtzkyi'ju' aj Israel te q'oj toju' kynajb'il, kymaju' tijwnaq kyxol aj Israel: ¿Tiqu'n xtaja' Qman Dyos ja'lu tu'n tkub' qi'j kyu'n pilistey? ¡Qo'qe' iq'ilteju' tkaxil tchaq'b'il Qman Dyos, tu'ntzun tten qxol ex tu'n qklet kye qajq'oj!, chechij.

⁴Exi'tzun kychq'o'n aj Israel jun tnej xjal te q'oj toj Silo, ex tzaj kyiq'i'n tkaxil tchaq'b'il Dyos nimtipumal, ju' ati tq'uqb'il te tkawb'il kyib'aj kyerb'in. Ate'toqtzun kab'e' tk'wal Elyi aye' Opni ex Pinees kyxolju' iq'ilte tkaxil tchaq'b'il Dyos.⁵Atzunj tponju' kax jatoq ta'qe' aj Israel, e'jaw ẍch'in aj Israel tu'n nim tzalajb'il expe' majx tinunju' tx'otx' kyu'n.

⁶Tetzunj kyb'inte pilistey sich' lu, kyma: ¿Ti'tzuloti' nb'aj kyxol aj Eb'rey?, chechij. Atzunj kyb'inte qa matxi'toq ponju' tkax Qman Dyos Kydyos aj Eb'rey toju' kyxmuj,⁷tzaj tchi kyi'j ex kyma: ¡Matxi' che ul kydyos kyxol! ¡Qab'anxtzun qwitz ja'lo, qu'n mikxa'toqte' tnejel!⁸¡Qab'anx qwitz! ¿Alkyetzun kklolqe tu'n miqo' kub'a' tz'aq toj kyq'ob'u' dyos nim kyipumal lu? ¡Aye'na' e'kub' xitunkye aj Ejiptju' toj chq'ajlaj tu'n chukchaq yajb'il!.⁹¡Kuwqo'xtzun q'ojil ayo' pilistey, qoqe' q'ojin tu'n tkyaqil qipumal, tu'ntzun lalun qo ok te k'a'yi'nmajin kye aj Eb'rey, kse'n matxi' che oka' qe! chechij.

¹⁰E'tzajtzun aj Pilistyatz q'ojil ex kub'kyi'j aj Israel kyu'n, eb'ajx oqu' aj Israel toju' kyxmuj. Nim xjal eb'aj kyu'n, e'kyim oxmutx' o'lajk'al (30,000) ichan te q'oj kyxolju' ntoq che b'et tu'n kyqan.¹¹Xikyiq'i'nju' tkaxil tchaq'b'il Qman Dyos, ex e'kub' kyb'yo'n kab'e' tk'wal Elyi aye' Opni ex Pinees.¹²Tzaqpajtzun jun xjal te q'oj kyxol tyajajil B'enjamin toju' q'oj, ex pon ojqel toj Silo texju' q'ij. B'ajni laqju' ti'j ex txqan tx'otx' toj twi'.¹³Tej tpon, q'uqlitoq Elyi tib'aj jun q'a'jtz ttziju' ja, intoq ka'yinx toj b'e, qu'n inxi'xtoq b'ajx tk'u'j ti'ju' tkaxil tchaq'b'il Qman Dyos. Okxju' ichan lu toju' nintnam, ex xitma'n ti'ju' matxi'toq b'aj; axtzun kmuju' kyaq'wiju' xjal ẍch'il.¹⁴Tetzunj tb'inte Elyiju' sich' lu, xitqani'n:
—¿Ti'tzun ti'ju' nb'aj lu?, chij. Atzunju' ichan xi' ojqelan q'olte tqanil tu'n tb'inte Elyi,¹⁵tetoq kyajnaq wajxaqlajoj ab'q'i Elyi ex mixtoqti' nka'yintl.¹⁶Xitma'n te:
—Ma chintzaj oqe' ja'lo, tzma ẍin tzajxe' toj q'oj, chij.
—¿Ti'tzu'n matxi' b'aj, nky'ajul?, chi Elyi xitqani'n te.

¹⁷Xi'tzun ttzaq'we'n:
—Mache kub' oqu' aj Israel kywitz pilistey, matxi' che kyim txqan xjal, expe' matxi' che kyim kab'e' tk'wala Opni ex Pinees, ex matxi' txikyiq'i'n pilistey tkaxil tchaq'b'il Qman Dyos, chij.

¹⁸Naqtzun nb'aj tma'n ichan tzaj oq toj q'oj ti'ju' kax te Qman Dyos, xitz'aq Elyi ttze'lti'j ti'jxi'ju' tq'a'jtz, tu'me'l ttziju' ja, kub' toqju' ti'j tqul ex majx kyim, qu'n matxi'toq tijin. Kab'naq (40) ab'q'i ten te nejenel kyxol aj Israel.

¹⁹Ch'onwi'toqtzu'n tlib' Elyi, ju' t-xu'jil Pinees, ex ch'inxtltoq tb'anix, tzaj ch'on wnaq ti'j tej tb'inte qa matxi'toq txiq'i'n kax te Qman Dyos exqa matxi'toq kyimu' tlib' exju' tchmil; kub' t-xb'aq'la'n tib' tu'n k'ixk'oj ex itz'jiju' tal.²⁰Tetzunj kyka'yinteju' intoq che nenunte qa xi'toq tkyim, xikyma'n te: Lalun xob'a, qu'n matxi' tz'itz'ji jun tala q'a, chechij. Atzunte mixti' tzaq'wi ex mixti' xitq'o'n twi' ti'j;²¹oktzun tq'o'n tb'iju' tal Ikab'od, qu'n tma: Matxi' kyej Israel mixti' toklen, qu'n matxi' txiq'i'n kax te Dyos, chij. Tmaju' yol lu qu'n matxi'toq txiq'i'nju' kax te Dyos ex matxi'toq che kyimu' tlib' exju' tchmil. Tenju' tkax Dyos toj kytanam pilistey

¹Tetzunj atitltoqju' tkax Qman Dyos toj kyq'ob' pilistey, exkyiq'i'n Eb'en-eser tu'n tpon Asdod;²okx kyq'o'ntzuntz toj tja Dakon ju' kydyos, ex kub' kyq'o'n tk'etz.³Tetzunj kyponju' xjal aj Asdod te prim te juntl q'ij, xikyka'yi'n Dakon woqli twitz tx'otx' twitzju' tkax Qman Dyos. Jaw kyiq'i'nju' Dakon ex kub' kyq'o'n jumajtl jatoq tkub'a'.⁴Tetzu'n juntl prim, tej kypon xjal aj Asdod, xikyka'yi'n jumajtlju' Dakon woqli twitz tx'otx' twitzju' tkax Qman Dyos. Matxi'toq tz'el toqju' twi' exqe'ju' kab'e' tq'ob' ex woqlqe'toq ttzija. O'kxtoqju' t-xmilal b'a'nxtoq.⁵Qu'mtzun, ttzajlenxtzuntz, aj kyokxju' pale ajb'el te Dakon toju' ja te k'u'lb'il toj Asdod, min nche kub' we' tib'aju' ttzija.

⁶Tzajtzun tq'o'n Qman Dyos jun tz'e'ysb'il witzb'aj kuwxi'x ex tzaj tq'o'n jun nin xob'ajil kyib'aju' aj Asdod ex toj tkyaqilju' kytx'otx', eb'aj tk'ixb'sa'n tu'n tx'a'k kyeqk'u.⁷Tetzunj kylonte xjal aj Asdod ju' in b'aj, kyma: Myab'a'n tu'n ttenju' tkax Kydyos aj Israel qxol, qu'n tokju' Dyos lu tz'e'ysal qwitz kuwxi'x tuk'i'lxi' qdyos Dakon, chechij.

⁸Qu'mtzun xikyma'n tqanil kyeju' kynejel pilistey tu'n kyb'uyinte kyib' kyuk'i'l, ex xikyqani'n kye:
¿Titi' kqb'incha' ti'ju' tkax Kydyos aj Israel?, chechij.
—Aye'tzunkye xikytzaq'we'n: kyiq'inxe' toj nintnam Kat, chechij.
Xi'tzun kyiq'i'n pilistey kax atzu'.⁹Tpomlenxi'tzun kyq'o'n toj tnam Kat, kub' tq'o'n Qman Dyos xob'ajil toju' nintnam, eb'aj tk'ixb'sa'n kykyaqilu' xjal tu'n tx'a'k.¹⁰Aye'tzu'n pilistey xikyiq'i'nju' tkax Dyos toj Ekron; tetzuj tponju' tkax Dyos atzu', eb'jaw ẍch'inju' xjal toj Ekron: ¡Matzaj kyiq'ine' tkax Kydyos aj Israel tu'n qkyime' qkyaqile'!, chechij.

¹¹Matxitoq tz'ok tchi kamik toj tkyaqilju' nintnam, tu'ntzun tpaju' tz'e'ysb'il kywitz kuwxi'x tzaj tq'o'n Dyos, e'tzaj kytxko'n kykyaqilju' kynejel pilistey ex xikyma'n kye: Kyiq'imixe' tkax Kydyos aj Israel tza'lu. Kyanjsanx ti'je' jasaja' kyiq'ine', tu'ntzun lalun qo' kub' tb'yo'n qkyaqil, chechij.¹²Majx japun tq'ojq'ojel toj kywi'ju' xjal twitz kya'j, qu'n nojnitoq kyi'ju' xjal na'mxtoq kykyim tu'n tx'a'k kyeqk'u. Anjtz kyanjsa'n aj Pilistyaju' kax

¹Matxi'toqtzun ten wuq xjawju' tkax Qman Dyos toj kytanam pilistey.²E'b'ajtzajtzun kytxko'n pilistey pale exqe' ajpkab' ex xikyqani'n kye:
¿Titi' qse'ye' ti'ju' tkax Dyos Manb'aj? Kymantze' kse'n tu'n tanja' qanjsa'n ti'je' jatoq ta', chechij.

³Xi'tzun kytzaq'we'n:
—Qama tz'anj kyajsa'n ti'ju'ye' tkax Kydyos aj Israel, lalun tz'anj kyq'o'ne' naqkukx, kyq'onx jun oyaje' tu'n tpaju' taq'wix xkyb'inchaye' teju' Dyos. Che b'anixeltzuntze' ex kkaneb'el toj kywitze' tiqu'n na'mx tq'jenju' tz'e'ysb'il kywitze', chechij.

⁴Xi'tzun kyqani'n pilistey:
—¿Ti'tzun b'a'n tu'n txi' qq'o'ne' tu'n tpaju' taq'wix xqb'inchaye'?, chechij.
Xi'tzun kytzaq'we'nju' pale:
—Jwe' tilb'ilal tx'a'k q'anpwaq, jun tu'n junjun nejenel pilistey; ex jwe' tilb'ilal ich' q'anpwaqx, qu'n matxi' che tak'e' kyuk'i'lju' nejenel kyeye' tu'n junx yajb'il.⁵Qu'mtzun kyb'inchanku'ye' kyilb'ilalju' tx'a'k ex kyilb'ilalju' ich' nche yajun toju' tx'otx', ex kynimanktze' Dyos Kydyos aj Israel; qape'tzunlo lay ttz'e'ysatl kywitze', exqe' kydyose' ex kytx'otx'e'.⁶Lalun kub' kypi'sa'n kyib'e', kse'n b'ajkye aj Ejipt exju' nimaqkawil kye, qu'n e'etz kytzaqpi'n aj Israel tzmaxi'j ttzaj tq'o'n Dyos tz'e'ysb'il kywitz.⁷Kyb'inchanku'ye' jun karet ak'a'j; ex kyiq'intze' kab'e' ttxu wakx tzma nche alan ex b'ajx che iqana', ex che kyq'onkye' tu'n txi' kyjk'u'nju' karet, ex lalun kyaje' tu'n kyxilpeju' kyal kyi'j, kyq'onqe'kje' kyal toj kyja.⁸Kyiq'intzju'ye' tkax Dyos Manb'aj ex kyq'onkxe' toj karet, ex kyq'onqeku'ye' ti'xti' q'anpwaq kxe'l kyq'o'ne' tu'n tpaju' myab'a'n xkyb'inchaye' toj jun kax, toj jun plajtl. Ex kytzaqpinxe' karet tu'n txi' tjunal.⁹Kyka'yinxtzuntze' b'a'nxi'x: qama txi'ju' karet tu'me'l B'et-semes, tojxju' ttx'otx', tu'ntzun Qman Dyostz saja' yajb'il lu qib'aj; qatzun myatzu' xxa', k'elel qnik'tz qa myate xkub' tz'e'ysante qwitz, noqtzunlo soktz'aqxi'tz qi'j, chechij.

¹⁰Kyb'inchatzunju' ichan lu ikyju'. Tzaj kyiq'i'n kab'e' ttxu wakx akxtoq nche ch'iy kyal, ex tkyejlenxi' kyjpu'nju' kyal toj kyja, e'okkyk'lo'n ti'ju' karet;¹¹ex jax kyq'o'nju' tkax Qman Dyos toju' karet, tuk'i'lju' kax ja tku'qexa' tilb'ilal ich' ex tx'a'k q'anpwaqqe'.¹²E ik'b'ettzun kye wakxtzu' toju' b'e inxi' B'et-semes, intoq che jaq'un ex axtoqte kyb'eju' ljo'n, mixti' elkypa'n kyib' ti'j. Exi'tzu'n lpe pilistey kyi'j tzmax jata' nqach te B'et-semes.¹³Aye'tzunju' xjal najlqe'toq B'et-semes, ju' intoq che jon triy toju' b'ya', tej txi' kyka'yi'nju' kax e'jaw tzalaj b'a'nxi'x.¹⁴Tej tponju' karet toj tnajb'il Joswe te B'et-semes, we' atzu'. Atitoqtzun jun nin ab'j atzu'. Aye'tzunju' aj B'et-semes kub' kysi'wi'nju' ttzeylal karet, ex e'kub' kyq'o'nju' ttxu wakx te chojb'il k'ok'sb'il twitz Qman Dyos.¹⁵Matxi'toqtzun ku'tz kyiq'i'n aj Leb'i tkax Qman Dyos exju' kax jatku'qexa'ju' ti'xti' q'anpwaq, ex matxi'toq jaxkyq'o'n tib'aju' nin ab'j; kub' kyq'o'nju' aj B'et-semes chojb'il k'ok'sb'il ex junjuntl chojb'il twitz Qman Dyos toju' q'ij lu.¹⁶Aye'tzu'n jwe' nejenel kye pilistey, tb'ajlenxi' kyka'yi'n ja'lu, anjkyi'j Ekron texju' q'ij lu.

¹⁷Aye'ju' jwe' tilb'ilal tx'a'k q'anpwaq tzaj kyq'o'n pilistey tu'n tpaju' kyil twitz Qman Dyos, kyu'n junjunju' tnam Asdod, Kasa, Askalon, Kat ex Ekron;¹⁸aye'tzu'n ich' q'anpwaq kyinx kyajlalju' kse'n kyajlalju' nimaqkytanam jwe' kynejel pilistey, ayileju' nimaqtnam jpu'mile kyi'j tu'n nimaqtapi exqe' kojb'il mixti' tapi kyi'j. Majx kyej tenju' nin ab'j ja kub'a' q'o'n tkax Qman Dyos toj ttx'otx' Joswe, ju' aj B'et-semes.

¹⁹Eltzun tiq'i'n Qman Dyos kychwinqlal oxnaq lajoj (70) aj B'et-semes tu'n tpaj ku'x kyka'yi'n toju' kax. Eb'aj oq'u' tnam tu'n tpaj txqan xjal eb'aj kyim kyxol tu'n Qman Dyos.²⁰Kymatzu'n aj B'et-semes; ¿Alxi'xkye k'anq'il twitzu' Qman Dyos xjan lu? ¿Jawtzunlo jakxe'la'tl tu'n lalun ten qxol?, chechij.²¹Ex xikysma'n tqanil lu kyeju' xjal aj Kyiryat-jeraym: Matxi' tzajkyansa'n pilistey tkax Qman Dyos; qu'mtzun kukytzaje' q'ilte, chechij.

¹Aye'tzunju' xjal najlqe' Kyiryat-jearim, xikyiq'i'nju' tkax Qman Dyos, ex okxkyq'o'n toj tja Ab'inadab' ju' najlitoq twi' jun ttxa'nwitz; yajxi'tzuntel kub' kyxjansa'n Eleasar ju' tk'wal tu'n t-xq'uqinte. Ok Samwel te kynejel aj Israel

²Iky' winqi'n ab'q'i tpomlen q'o'n tkax Qman Dyos toj Kyiryat-jearim, ex kykyaqil aj Israel intoq che jyon ti'j Qman Dyos.³Qu'mtzun xitma'n Samwel kye kykyaqil aj Israel: Qama tz'anjkyi'je' tu'n tkyaqil kyk'u'je' tuk'i'l Qman Dyos, ati tu'n tex kyxone' junxi'tl dyos, exqe' tilb'ilal Astarte, ex ati tu'n txi' kyq'o'n kyib'e' toj tq'ob' Qman Dyos, ex o'kxtzu' tu'n kyk'uluna'ye' te. Che tzaqpajeltzuntze' tu'n tjaq' kykawb'il pilistey, chij kye.

⁴B'je'xtzun kyxon aj Israel chukchaq kyilb'ilal B'aal ex Astarte, ex o'kxtzu' e'k'uluna' te Qman Dyos.⁵Tchaq'tzun Samweltz: che kyb'uyime' kykyaqil aj Israel toj Mispa, ex chin kub'sale' twitz Qman Dyos kyi'je', chij.⁶B'ajtzun kyb'u'yi'n kyib' aj Israel toj Mispa, jatzkyiq'i'n a' atzu' ex kub' kyqo'n te jun oyaj twitz Qman Dyos. E'mewayin toju' q'ij lu ex kyma qa matxi'toq che b'inchan il twitz Qman Dyos. Atzuntzu' Mispa oka' Samwel te nejenel kyxol aj Israel.⁷Tetzunj kyb'inte pilistey b'u'yi'ntoqkyib' aj Israel toj Mispa, e'tzaju' kynejel pilistey q'ojil kyi'j. Tetzunj kyb'inte aj Israel, tzaj xob'il kyi'j.⁸Xikyma'ntzuntz te Samwel: Lalun qjena tu'n tkub'sana qi'j twitz Qman Dyos tu'n qklet toj kyq'ob' pilistey, chechij.

⁹Tzaj tiq'i'n Samwel jun qpoj tman rit ex kub' tq'o'n tkyaqil te chojb'il k'ok'sb'il twitz Qman Dyos, kub'santzuntz twitz Qman Dyos kyi'ju' aj Israel, ex tzaj ttzaq'we'n Qman Dyos.¹⁰Tetzunj intoq kub' tq'o'n Samwel chojb'il k'ok'sb'il, e'tzaju' pilistey q'ojil kyi'j aj Israel; atzunte Qman Dyos tzaj jun nin q'ankyaq tu'n kyi'ju' pilistey ex majx eb'ajxob', iktzu'n kub'a' kyi'j kyu'n aj Israel.¹¹Lwiyxi'xtzun eb'je'tzu' aj Israel Mispa ex eb'ajxlpe kyi'ju' pilistey, eb'ajx q'ojil kyi'j tzmax tjaq'ku'x B'et-kar.¹²Tzajtzun tiq'i'n Samwel jun ab'j, ex kub' tq'o'n kyxol Mispa tuk'i'l Sen, ex oktq'o'n tb'i Eb'en-eser, qu'n tma: Matxi' tz'onixi' Qman Dyos qi'j kukxju', chij.

¹³Kub'kyi'j pilistey kyu'n aj Israel ex mixti' kub' kytzyu'n jumajtlju' kytx'otx'; q'ojin Qman Dyos kyi'j pilistey tej itz'toq Samwel.¹⁴Aye' nimaqkytanam aj Israel matxi'toq kub' kytzyu'n pilistey, tzajx Ekron ex ponx Kat, e'eljumajtl kyu'n aj Israel. Ikytzu'n eljumajtlju' kytx'otx' aj Israel kye pilistey, ex ten nak'b'il kyxol aj Israel kyuk'i'l amorey.

¹⁵Ok Samwel te nejenel kyxol aj Israel toj tkyaqilju' tchwinqlal,¹⁶ex tkyaqil ab'q'i intoq xi' B'etel, Wilwal ex Mispa, tu'n tnik'et tkyaqilju' in nojqelan kyxol aj Israel kyoj kykyaqilju' tnam lu.¹⁷Ex intoq anjtzti'j Rama, janajla'toq, tzmaxtzuntzu' intoq kawina' kyib'aj aj Israel. Ex jawtb'incha'n jun q'olb'eb'l te Qman Dyos atzu'. Kyqani aj Israel kynimaqkawil

¹Tej ttijin Samwel e'oktq'o'n tk'wal te nejenel kyxol aj Israel.²Joel tb'iju' tnejel tk'wal, atzunju' tkab' Ab'iy tb'i, intoq che kawin B'eerseb'a.³Aye'tzu'n tk'wal Samwel mitoqkxa' nkyb'incha'nju' kse'nte kyman, eb'jo'k jamjol ti'j pwaq, intoq kyb'incha'ju' kyajb'il xjal tu'n pwaq ex mixtoqti' nkyb'incha'n tnik'alilti'j toju' kawb'il.⁴B'ajtzun kyb'u'yi'n kyib' kykyaqilju' tijwnaq kyxol aj Israel ex exi' yolil tuk'i'l Samwel toj Rama,⁵xikyma'ntzuntz te: Matxi' tijinta, aye'tzu'n tk'wala mikxa'tl nkyb'incha'n kse'n ntb'incha'na; qu'mtzun q'o'nk junta nimaqkawil tu'n tkawin qib'aje', kse'nx in b'inchet kyoj txqantl nimaqtnam.

⁶Myab'a'n ela' toj twitz Samwel tu'nju' xikyqani'n tu'n tkawil jun nimaqkawil kyib'aj, qu'mtzun kub'ten yolil tuk'i'l Qman Dyos toj na'j Dyos,⁷atzunte Qman Dyos tzaj ttzaq'we'n te: B'inchama alkyexku' nkyqani'n tnam, qu'n ayinwe' nchinel kyik'o'n tu'n lalun chin kawintle' kyib'aj, ex myata.⁸Atxi'x kyetzlen wiq'i'ne' toj Ejipt, matxi' kyb'inchaxi' weye' kse'n nkyb'incha'n teya ja'lo, matxi' chin kyej kyq'o'ne' tu'n kyk'ulun kye junxi'tl dyos.⁹Qu'mtzun b'inchama kse'n nkyqani'n; ex majx q'manxa kye ti'j tkyaqil toklenju' nimaqkawil kkawil kyib'aj, chij te.

¹⁰Xi'tzun tma'n Samwelju' tzaq'web'l tu'n Qman Dyos kyeju' tnam inkyqani'n jun nimaqkawil.¹¹Xitma'n kye:
—Atzun tzulju' kyib'aje' tu'nju' nimaqkawil kkawil kyib'aje': Che kxe'l tiq'i'nju' kyk'wale', ex che okyel tq'o'n junjun ti'j karwaj te q'oj, junjuntl ti'j chej, atzun junjuntl tu'n kyxi' xq'uqilte.¹²Che okyel tq'o'n junjun te nejenel kyib'aj kab'k'al lajnaq (1,000) xjal te q'oj, atzun junjuntl kyib'aj kab'naqlajoj (50). Kche okyel q'o'n jte'kye' tu'n kyaq'unanteju'ye' ttx'otx', ex tu'n tjaw b'u'yitju' twitz tawal, mujqa b'inchalkyeju' kyq'ojb'il ex kykarwaj te q'oj.¹³Ex che kxe'l tiq'i'nju' kymyale' tu'n kyajb'en te, b'inchal k'ok'sb'il, b'inchal twa ex chujal wab'j.¹⁴Kb'el ttzyu'nju' tb'anil kytx'otx'e', exju' tb'anil kyawb'ile' ub'a ex olib'o, kxe'l tq'o'ntzuntz kyeju' nche kawin tuk'i'l.¹⁵K'elel tiq'i'n tlajoji'n tnej ti'ju' kytriye' ex kyawale' ub'a, Kxe'l tq'o'ntzuntz kyeju' nche kawin tuk'i'l ex kyeju' nejenel kye t-xjal te q'oj.¹⁶Ex kche elel tiq'i'nju' kymajine' ichan ex qya, exqe'ju' kywakyixe' ex kyb'ure' tb'anilqexi'x, tu'n kyaq'unan toju' taq'un.¹⁷Ex kche eleltiq'i'n tlajoji'n tnej ti'ju' kyrite', expe' aye'ku'ye' kche ajb'ele' te.¹⁸Alkyetzun q'ij qama che k'ab'je' tu'n tpaju' nimaqkawil ojetoq jawkysk'o'ne', lay che'x b'i'ntle' tu'n Qman Dyos.

¹⁹Aye'tzunkye' tnam, mixjun xikyb'i'n b'ajx tma'n Samwel kye, xikytzaq'we'n: Maskyelo ikju'.
—B'a'ntzun qa ikyju', qajb'ilqe' tu'n tten jun nimaqkawil,²⁰tu'n qokye' kse'nqe' txqantl nimaqtnam, tu'n tkawin, tu'n tchaq'un ex tu'n tnuk'un qib'aje' tu'n qxi'ye' toj q'oj, chechij.

²¹Tb'ajelenxi'tzun tb'i'n Samwel kyolju' tnam, b'ajx tma'n te Qman Dyos;²²atzunte Qman Dyos tzaj ttzaq'we'n te:
—B'inchama kye aju' inkyqani'n, q'onka jun nimaqkawil kye, chij.
Tchaq'tzun Samweltz tu'n tanjile kyi'ju' aj Israel tojilex kytanam. Elyal Sawul twitz Samwel

¹Atitoq jun ichan Kyis tb'i kyxolju' tyajajil B'enjamin, tk'wal Ab'yel ex tchman Seror; a tman tchmanju' B'ekorat, ju' tk'wal Apiy. Majx nima'nte Kyis kyu'n xjal,²atitoq jun tk'wal, ku'xun tb'anil ka'yin, Sawul tb'i. Mixtoqti' juntl aj Israel tb'anil ka'yin kse'n Sawul, mixtoqti' jun xjal in japun twe' twi' t-semu'l.

³Jun q'ij exi' tz'aqju' tb'ur Kyis. Xitma'ntzuntz te Sawul ju' tk'wal:
—B'inchamtib'a ex kutxi'ya jyolkye b'ur, iq'inx junju'ya majin tuk'i'la, chij.

⁴Xi'tzun Sawultz, ik' toju' nimaq k'ul te Eprayin ex toju' tx'otx' te Salisa; ex mixti' e'knetju' b'ur tu'n. Ex ik' toju' tx'otx' Saalim ex toj kytx'otx' tyajajil B'enjamin, ex mixti' e'knet tu'n.⁵Tetzunj tpon toju' tx'otx' Sup, xitma'n Sawul teju' tmajin k'le'ntoq tu'n:
—Matz'anj qi'j, qajpe'lo xi' nximana'xi'xtlte' nmane' qi'j kyetwitz kyi'ju' b'ur, chij.

⁶Atzunju' majin xittzaq'we'n te:
—Ati jun t-sanjelal Dyos toju' nintnam lu, majx nima'n kyu'n kykyaqil xjal, qu'n tkyaqilju' intma'n ilti'j in japun. Qo'tzuna chix, qape' ktzajel tma'nju' b'e jatu'n qxa', chij.

⁷—Qo'chaqa, chi Sawul te. Naqtzun a, ¿titi' kxe'l qiq'i'n teju' ichan lu? Mixpena'ti'tl qwa. Mixti' jun ti'xti' tu'n txi' qq'o'n teju' t-sanjelal Dyos lu, chij.

⁸Atzunju' majin xittzaq'we'n:
—Ati jun tal medi saqpwaq iq'i'n wu'ne'. Kxe'l qq'o'n teju' sanjelal tu'n ttzaj tma'nju' b'e qe, chij.

⁹(Qa ati jun aj Israel tajb'il tu'n t-xjelun te Qman Dyos toju' tq'ijlalil ojtxi', intoq tma'n: Qo' tk'etzju' xjal npon tnab'l, chij; aju' sanjelal tb'i, atoq tb'iju' ojtxi'xi'x xjal npon tnab'l.)

¹⁰B'a'natzun, qo' atzu', chi Sawul.
Exi'tzuntz kykab'il toju' nintnam jatoq najla' t-sanjelal Dyos,¹¹tej kxi'toq kyjax tk'u'j witz tu'me'lju' nintnam, e'elyal junjun txin kyu'n kxi'toq kyxi' q'a'yil, ex xikyqani'n kye:
—¿Ma atzu' najla'ju' xjal npon tnab'l tzala?, chechij.

¹²Xi'tzun kytzaq'we'n kye:
—Ana'tzuntzu', naq a elni ch'i'ntl. Lwixi'x kukyxi'ye', matzul toju' nintnam qu'n kb'el q'etju' chojb'il toju' ja xjan ja'lo.¹³Naqtzun nche pone' kyjyome' atzu', na'mxtoq tu'n txi' toju' ja xjan tu'n twan. Lay che wana'ju' xjal qa na'mxtoq tpon, qu'n kb'el tk'i'wla'n chojb'il, tzmaxi'tzun che wal txokyenjtzu'. Qu'mtzun lwix kukyxi'ye' qu'n k'elel yalte' kyu'ne' ja'lo, chechij.

¹⁴Xi'tzun kyljo'n kyb'etz tu'n kyjax tu'me'lju' nintnam, tojxi'xtzunju' kmuj ch'inxtltoq kypon, xi' xa'tlte Samwel toj juntl b'e tej txi' toju' ja xjan.

¹⁵Atixtoqtzun jun q'ijtl tu'n tpon Sawul, ojetoq tzaj tma'n Qman Dyos te Samwel toj naku'j witzik':¹⁶Ktzajel nchq'o'ne' jun ichan najli toj kytx'otx' tyajajil B'enjamin, qloqx ja'lu najchi'j, k'ik'el tq'o'na te kawil toju' ntaname' Israel. Che kolpetil tu'n tjaq' kykawb'il pilistey, qu'n matxi' tzaj q'aq'an nk'u'je' kyi'ju' ntaname' tej xjapun tq'ojq'ojel kywi' tu'n k'ixk'oj nwitze', chi Qman Dyos te.

¹⁷Tetzunj txi' tka'yi'n Samwelju' Sawul, tzaj tma'n Qman Dyos te: Luju' ichan xinma'ne' teya. Atzun kkawilju' kyib'aj ntaname', chij te.

¹⁸Tej kypon ttziju' tnam, xilq'e Sawul tk'etz Samwel ex xitma'n te:
—B'inchama xtalb'il, q'mantz ch'i'na ja tu'me'l ta' tjaju' xjal npon tnab'l, chij.

¹⁹—Ayine', chi Samwel xittzaq'we'n—. Qo' toju' ja xjan, ex qo wan wuk'i'le' atzu'. Kxe'l nma'ne' teya najchi'j te prim tkyaqilju' tajb'ila tu'n t-xjelunteya weye', b'a'n tanjtzuntza.²⁰Matxi' che knetkye' b'ur e'xitz'aq kab'eje, lalun b'ajxtltk'u'ja kyi'j. Expena' tkyaqilju' tb'anilxi'x toj Israel k'okyel te teya ex kyeju' toj tjaya, chij te.

²¹Atzunte Sawul xittzaq'we'n:
—¡Tyajajil B'enjamin qina'we', aju' b'o'sxi'x kyxolju' tnej tyajajil Israel! exqepena' toj njaye' mixti'x kyoklen kse'nqe' txqantl ja xjal tyajajil B'enjamin. ¿Tiqu'n ntma'na tkyaqil ja'lu weye'?, chij.

²²Xi'tzun q'i'n Sawul tuk'i'lju' tmajin tu'n Samwel toju' nin ja, ex e'kub' tq'uqb'a'n kyoju' q'uqb'il nimxi'x kyoklen kyxolju' txqantl xjal txko'nqe'toq, ju' junaq lajoj (30) kyb'aj.

²³Xitma'ntzun Samweltz teju' b'inchal wab'j:
—Q'intzju'ya chib'j xinq'o'ne' teya, ju' xinma'ne' teya tu'n tkyaj tklo'na, chij.

²⁴Textzunju' kmuj jatztiq'i'n b'inchal wab'j jun tkux ex kub' tq'o'n twitz Sawul. Xitma'ntzun Samweltz te:
—Kyej npa'ne' chib'j lu teya. Wantzuna, qu'n pa'n wu'ne' teya toju' maj lu, ju' ẍe tzaj ntxko'ne' tnam, chij.
Wan Sawul tuk'i'l Samwel toju' q'ij lu.²⁵Tetzunj kyku'tz toju' ja xjan tu'n kykb'u'l toj nintnam, kub' b'incha'n kykuẍb'il Sawul twi' ja,²⁶ex kub'kẍe Sawul. Tetzun juntl q'ij xitxko'n Sawul tu'n Samwel twi' ja ex xitma'n te:
—We'ktza, ex kuxtxi'ya, chij.
Atzunte Sawul jaw we'. Eb'je'tztzuntz toj b'e tuk'i'l Samwel,²⁷tetzunj xi'toq kyku'tz ti'jxi' nintnam, xitma'n Samwel te Sawul;
—Q'manxa teju' tmajina tu'n txi'pun nej, atzunta yonku' jun kmoja nej, qu'n kxe'l nma'ne' teya ti'ti'ju' saj tma'n Qman Dyos weye', chij. T-xjansa Samwel Sawul te nimaqkawil kye aj Israel

¹Tzajtzun tiq'i'n Samwel jun lmet aseyt, ex jax tqo'n toj twi' Sawul ex oktma'tzi'n, xitma'ntzunte:
—Matxi' xjansanjtza ja'lo tu'n Qman Dyos tu'n toka te kawil toj Israel, ju' ttanam. Kkawila tib'aj ex oktkla'ya kyeju' tajq'oj ju' ate' ti'jile. Ex ajtkanb'ana, a techalju' qa a Qman Dyos matxi' tz'okq'onteya te kawil tib'aju' ttanam:²Aj qpa'nteqib' ja'lo, kche tk'lu'ya kab'e' ichan, nqayin tk'etzu' muqb'il te Rakyel, toj Selsa, toj kytx'otx' tyajajil B'enjamin. Ktzajel kyma'n teya qa matxi' che knetju' b'ur, ju' intoq che tjyo'na, exqa kyi'jtle' in b'isuna' tmana ex mya kyi'ju' b'ur, ex inximan titi' kt-se' ti'ja.³Ajtzun txi' lq'e ch'i'ntla ajtpona t-xeju' k'ol toju' najb'il Tab'or, ktk'lu' tib'a kyuk'i'l oxe' ichan xi' kyjax B'etel tu'n kyk'ulun te Dyos. Iq'i'n oxe' chib' tu'nju' jun, atzu'n juntl oxe' saq wab'j, atzu'n toxi'n iq'i'n jun tz'u'n b'in tu'n.⁴Ktzajel q'olb'e'na kyu'n, ex ktzajel kyq'o'n kab'e' saq wab'j teya. K'moma kye.⁵Kpomeltzuntza Kyib'ea te Qman Dyos, ja ta'qe' xq'uqil aj Pilistyaqe'. Ajtzun tokxa toj nintnam, ktk'lu' tib'a kyuk'i'l jun tnej t-sanjelal Dyos nche yolin ti'ju' ntzaj tma'n Dyos kye, xi'kyku'tz toju' ja xjan. Nejlqe' xjal kywitz nche chinb'an tzintzin, chilchil, xux ex arpa.⁶Kb'eltzun t-xew Dyostz tib'aja, kyoliltzuntza ti'ju' yol ktzajel tma'n Qman Dyos teya kse'nkye, ex k'okyela naku'j juntl ichan.⁷Aj tb'ajiju' lu ti'ja, b'inchamju'ya b'a'n toj twitza, qu'n k'oninjtzela tu'n Qman Dyos.⁸Ex kutxi' nejpuna Wilwal, atzun chin pone' tk'etza yajxi'ch'i'ntl tu'n tkub' q'et chojb'il k'ok'sb'il te b'inchb'il. Tenku' wuq q'ija atzu' tzmaxi'j ajnpone' kxe'l nma'ntzuntze' teya titi' ktb'incha'ya.

⁹Naqxi'xtzun nkyaj tq'olb'e'n Sawul Samwel tu'n tanj, ch'exb'enjtztzuntz tu'n Qman Dyos; ex ejapun tkyaqilju' techlal texju' q'ij lu.¹⁰Tetzunj kypon Sawul tuk'i'lju' tmajin toj Wib'ea, kyk'ulkyib' kyuk'i'l t-sanjelal Dyos inche yolin ti'j tyol Dyos. Kub' tentzun t-xew Qman Dyostz tib'aj Sawul, o'kx taq'wi Sawul yolil ti'j yol in tzaj tma'n Qman Dyos te, kse'nxju'kye.¹¹Kykyaqiltzunju' ojtzqi'ntoq Sawul kyu'n, tej kyka'yinte qa axjunte nyolin ti'ju' yol ntzaj tma'n Qman Dyos kyuk'i'lju' t-sanjelal Dyos, kyma kyxolilex: ¿Ti'tzun xb'aj ti'ju' tk'wal Kyis? ¿Ma axjunte Sawul t-sanjelal Dyos?, chechij.

¹²Tmatzun jun kyxol: ¿Altzunkyeju' kyman? Atzuntzu' tzajna'ju' yol: ¿Ma axtzun junte Sawul kyxol t-sanjelal Dyos?, chij.

¹³Tb'ajlenxi'tzun yolin Sawul ti'ju' yol ntzaj tma'n Dyos, pon tja.¹⁴Xi'tzun tqani'n ttzik mo titz'in tman kye tuk'i'lju' tmajin:
—¿Jae'tx'anja'ye'?, chijkye.
Atzunte Sawul xitma'n te:
—Jyolkyeju' b'ur. Tetzunj mixtoqti'x nche knet, oxi'ye' tk'etz Samwel, chij.

¹⁵Xi'tzun tma'nju' ttzik mo titz'in tman te:
—¿Ti'tzu'n saj tma'n Samwel kyeye'? kyb'inchame' xtalb'il, kymantze' weye', chij.

¹⁶Xitzun ttzaq'we'n Sawul te:
—Tzaj tma'n axxi'x qa matxi'toq che knetju' b'ur, chij.
Ex mixti'te xitma'n ti'ju' kawb'il, ju' ojetoq tma Samwel te.¹⁷Yajxi'tzuntel e'ttxok Samwel aj Israel, tu'n kypon Mispa k'ulun te Qman Dyos;¹⁸atzuntzu' xa' tma'n kye:
—Chi Qman Dyos kjalu: Aj Israel, ayine' netz iq'inkyeye' toj Ejipt, e'nkole' toj kyq'ob' aj Ejipt, ex kyeju' kykawb'il intoq che tx'iwunjtze' kyu'n.¹⁹Atzu'n ja'lo machin el kyik'o'ne' ayine' inklonkyeye' toj tkyaqilju' yajb'ilkyeye', ex machin el kyik'o'ne' tu'nju' in kyqani'ne' tu'n tok nq'o'ne' jun nimaqkawil kyeye'. Qu'mtzun, kyb'uyintz kyib'e' ja'lo, kse'nxju' kyyajajile' toj tneji'n ex toj k'loji'n, chi Dyos, chij.

²⁰Tchaq'tzun Samweltz tu'n kyb'jo'k lq'e kykyaqilju' tnej tyajajil Israel, ex atzu' pona' tz'aq kyi'ju' tyajajil B'enjamin.²¹Tchaq'tzuntz tu'n kypon lq'eju' tyajajil B'enjamin, ex atzu' pona' tz'aqtl kyi'ju' k'loj tyajajil Matri, kyxoltzun ja'lu pon tz'aq ti'j Sawul tk'wal Kyis. Tetzunj txi' jyob'aj mixti' knet,²²qu'mtzun xikyqani'n junmajtl te Qman Dyos, tu'n kyb'inte qa axtoqtzu' ta' Sawul atzu'. Atzunte Qman Dyos tzaj ttzaq'we'n qa atitltoq atzu' exqa matxi'toq tz'okx tewa'ntib' kyxolju' iq'inj.²³Exi'tzuntz iq'imitzte jatoq in newana'. Tetzunj tpon Sawul kywitzju' tnam, mixtoqti' jun aj Israel njapun twe' twi' t-semu'l.²⁴Xitzun t-xjelu'n Samweltz kye kykyaqil:
—¿Ma matxi' kyka'yiju'ye' ichan matxi' jaw t-sk'o'n Qman Dyos te nimaqkawil? ¡Mixti' jun aj Israel kse'nte!, chij.
Aye'tzunkye' aj Israel xikytzaq'we'n:
—¡Nimanjtzxwita nimaqkawil!, chechij.²⁵Eb'ajxtzun tchik'b'a'n Samwel kawb'il kyeju' tnam, ex e'kub' ttz'ib'a'n toj jun u'j ex okxtk'u'n toju' ja xjan te Qman Dyos. Xitma'ntzun Samweltz kye kykyaqil tu'n kyanj kyja.²⁶Ex ikxte Sawul xi' tja toj Wib'ea, kub'tzun tq'o'n Dyos toj kyanmi b'a'npun xjal min nche xob', tu'n kyxi' tuk'i'l.²⁷Ate'tzun junjuntl xjal kyma: ¿Ma axi'xtzun ma'na'j kklolqe? chechij. El kyik'o'n ex mixti' e'niman te; atzunte Sawul mixti' xi'tojtwinqil. Kub'kyi'j aj Amon tu'n Sawul

¹Xi' Naas, nimaqkawil kye aj Amon kyuk'i'lju' t-xjal q'ojil tu'n tkub'ti'j nintnam Jab'es toj Kalaad kyu'n. Xi'tzun kyma'n xjal najlqe' Jab'es te kjalu:
—Qnk'ukj ti'j jun qyol, qo' ajb'eltzuntze' teya, chechij.

²Xi'tzun ttzaq'we'n Naas ju' aj Amon kye:
—Qnk'ukjna'ti'j jun nyole' kyuk'i'le', qama kub' toj kywitze' tu'n tetz wiq'i'ne' jun tb'aq' kywitze' toj kyb'a'nq'ob'e' teyile junjunkye', tu'ntzun tel kych'ixaw aj Israel, chij.

³Xi'tzun kytzaq'we'nju' tijwnaq aj Jab'es te:
—Q'ontz wuq q'ij anb'ila qeye' tu'n txi' qsma'ne' tqanil toj tkyaqilju' tx'otx' Israel; qatzun mix-a'lo' sul onilqeye', ktzunlo qq'a' qib'tze' tu'n qajb'ene' teya, chechij.

⁴E'pontzu'n xjal q'ol tqanil Wib'ea, janajla'toq Sawul, ex xikyma'n tqanil kye xjal. Kykyaqiltzu'n xjal e'aq'wi oq'el majx ex ch'on toj kyanmi.⁵Intoqtzun anjtzku'ti'j Sawul toj kojb'il kyuk'i'lju' wakx, xitqani'n kye xjal:
—¿Titi'tzu'n nche iq'i'n xjal? ¿Tiqu'n nche oq'a'? chij.
Xikyma'n xjalju' tqanil kymaju' xjal e'tzaj Jab'es q'malte kye.⁶Tetzunj tb'inte Sawul ja'lu, ulju' t-xew Qman Dyos tib'aj; ex tzaj ttx'u'jil b'a'nxi'x.⁷Tzajtzun tiq'i'n jun muj tman wakx ex eb'aj kub'tpẍu'n, ex exi' tchq'o'n jte' sanjelal txolilte toj tkyaqilju' tx'otx' Israel. Aye'tzu'n sanjelal intoq kyma'n: Ikyche setila' kywakyixju' minti' xkyaq'kyib' tu'n kyxi' tuk'i'l Sawul ex Samwel kse'n ja'lu, chechij. Kykyaqiltzu'n xjal b'aj kyb'u'yi'n kyib' ex kymujb'a kyib' kyuk'i'l, qu'n majx e'tzaj xob' b'a'nxi'x.⁸Tetzunj kyb'aj tajla'n Sawulju' xjal toj B'esek, matxi'toq b'aj kyb'u'yi'n kyib' junaq wuqlajoj mutx' lajk'al (300,000) ichan aj Israel, atzun oxmutx' o'lajk'al (30,000) aj Juda.⁹Xi'tzun tma'n Sawul kyeju' xjal exi' q'olte tqanil:
—Kymanxe' kyeju' xjal najlqe' Jab'es qa che kletel najchi'j te wanq'ij qu'ne', chij.
Exi'tzun sanjelaltz q'malte tqanil kyeju' xjal najlqe' Jab'es, aye'tzunkye ojexi'x che tzalaj,¹⁰xikyma'ntzuntz te Naas.
—Qq'a'qib'e' tuk'i'la najchi'j, tu'n tb'inchanteya titi' tajb'ila qi'je', chechij.

¹¹Tetzu'n juntl q'ij eb'aj tnk'u'n Sawulju' t-xjal te q'oj toj oxe' tnej, na'mxtoqtzun qsqix eb'jo'kx kyxolju' ajq'oj jab'u'yi'na'toq kyib', eb'aj kub' kyb'yo'n txqan aj Amon tzmax tjapun wanq'ij. Aye'tzu'n e'kyaj anq'in eb'ajx sputj ex mixti' e'kyajten kab'e' junx.¹²Ate'tzun junjun xjal toju' tnam, xikyma'n te Samwel:
—¿Alkyeqe'tzu'n xjal eq'mante qa myab'a'n Sawul te nimaqkawil qib'aj? Kyq'onqe'tze' xjal lu tu'n kykub' qb'yo'ne', chechij.

¹³Atzunte Sawul mixti' taj ex tma:
—Mix-a'lo'te' kkyimel toju' q'ij ja'lo, qu'n matxi' kletju' tnam Israel tu'n Qman Dyos, chij kye.

¹⁴Xitzun tma'n Samweltz kye kykyaqil xjal:
Qoqe'ye' Wilwal tu'n ttzaj qeju' kawb'il atzu', chij kye.

¹⁵Tkyaqiltzunju' tnam eb'ajx Wilwal, atzuntzu' oka' kyq'o'n Sawul te nimaqkawil twitz Qman Dyos. Ex kub' kyq'o'n chojb'il te b'inchb'il twitz Qman Dyos, ojexi'x eb'aj tzalaj kykyaqil aj Israel tuk'i'l Sawul. Kyej tq'o'n Samwel kawb'il toj tq'ob' Sawul

¹Xi'tzun tma'n Samwel kye kykyaqil aj Israel:
—Makyile', tkyaqilju' saj kyqani'ne' ma nb'inchaye', ex matxi' kyej nq'o'ne' nimaqkawil kyib'aje'.²Luju' nimaqkawil lu kb'el nej kywitze'. Ayinwe' matxi' chin tijine' ex saqtl nwi'ye', exqe' nk'wale' ate'qe' kyxole'. Ayine' matxi' chin nuk'un kyxole' atxi'x toj nku'xumale' ex tzmax ja'lo,³ex luqine' lu: Qa matxi' kub' ntzyu'ne' jun twakyix mujqa tb'ur jun xjal, mujqa makub' njtz'o'ne', mujqa mayajti jun xjal wu'ne', mujqa mank'am pwaqe' tu'n nb'inchanteye' kyajb'il xjal, b'a'n tu'n kymanteye' ja'lo twitz Qman Dyos, ex twitzju' nimaqkawil matxi' jaw t-sk'o'n Qman Dyos, kxe'l nchjo'nwe' qa ati nk'ase', chij.

⁴Aye'tzunkye xikytzaq'we'n:
—B'ajx qo' kub'a' tjtz'o'nta ex b'ajx qo' yajta'ye' tu'na, ex b'ajx tk'ama' ta pwaq tu'n tb'inchanteya kyajb'il xjal, chechij.

⁵Xitma'ntl Samwel:
—Twitzku' Qman Dyos ex twitzju' nimaqkawil xjaw t-sk'o'n, qa mixti' jun wile' sel yal kyu'ne', chij. Mixti'natzun, chechij.

⁶Xi'tzun tma'ntl Samwel kyeju' tnam.
—Ate Qman Dyos etz iq'inkye ojtxi' qyajilb'en toj Ejipt kyu'nel Moyses ex Aaron.⁷Qu'mtzun kyb'incham kyib'e', qu'n chin yolile' kyuk'i'le' twitz Qman Dyos ti'j tkyaqilju' b'a'n matxi' tb'incha qe ex kyeju' ojtxi' qyajilb'en.⁸Tej kyxi' Jakob' kyuk'i'lju' tk'wal toj Ejipt, e oktenju' aj Ejipt yajlalkye, aye'tzunju' qyajilb'en ekub'san twitz Qman Dyos, e'tzajtzun tchq'o'n Qman Dyos Moyses ex Aaron tu'n kyetz kyiq'i'n toj Ejipt, ex e ul kyiq'i'n toju' najb'il lu.⁹Aye'tzunkye ik'tna'l Qman Dyos kyu'n, qu'mtzun exi' tq'o'n toj tq'ob' Sisara, ju' nejenel kyeju' xjal te q'oj te Jab'in, nimaqkawil te Asor, ex toj kyq'ob' pilistey ex toj kyq'ob'u' nimaqkawil te Moab', ju' e'q'ojin kyi'j.¹⁰Eltzun kynik'tz qa matxi'toq che b'inchan il twitz Qman Dyos tu'nju' kyej kytzaqpi'n tu'n kyk'ulun kye chukchaq kyilb'ilal B'aal ex twitz Astarte, ex ekub'san twitz Qman Dyos tu'n kyklonjtz toj kyq'ob'ju' kyajq'oj, ex xikytziya'n tu'n kyk'ulun o'kxte.

¹¹Ex ikx e'tzaj tchq'o'n Qman Dyos Jerub'aal, B'arak, Jepte ex Samwel tu'n kytzaqpete' toj kyq'ob' kyajq'oje', e anq'intzuntze' toj nak'b'il.¹²Aye'tzunkye' tej kyka'yinteye' xi'toq ttzaj Naas, nimaqkawil kye aj Amon q'ojil kyi'je', tzaj kyqani'ne' jun nimaqkawil tu'n tkawin kyib'aje', extzun atoq Qman Dyos nimaqkawil kyib'aje'.¹³Lutzunju' nimaqkawil kyeye' jawkysk'o'ne' lu. Matxi' tzaj tq'o'n Qman Dyos nimaqkawil xikyqani'ne' te.¹⁴Atzu'n ja'lo ati tu'n kynimane' ex tu'n kyk'ulune' te Qman Dyos, ati tu'n txi' kyb'i'ne' tq'ojq'ojel toj twi' ex tu'n txi' kyb'i'ne' tchaq'b'il, ex tu'n kyanq'ine' kse'n tajb'il Qman Dyos, aye'ye' exju' nimaqkawil kyib'aje'. Che anq'iltzuntze' b'a'n.¹⁵Qu'n qatzun min xxi' kynima'ne', exqa matz'elkyik'u'nju'ye' tchaq'b'il, kb'el tz'e'ysa'n kywitze' tuk'i'lxi'ju' nimaqkawil tu'n Qman Dyos.¹⁶Qu'mtzun lan che ik'b'ete' jata'qe'ye', qu'n okkyla'ye' jun nin techlal ktb'incha' Qman Dyos kywitzku'ye'.¹⁷Kanli kywitze' q'ijal ja'lo, tu'n tjaw b'uyit twitz awal, ¿Jek'ax? Oktzun chin kub'sale' twitz Qman Dyos, ex ktzajel tq'o'n q'ankyaq ex jb'al tu'n telkynik'e' te ex tu'n tkane' toj kywitze', kse'n ntka'yi'n Qman Dyos mache b'inchan ile' twitz tu'n tpaj makyqaniye' jun nimaqkawil kyib'aje', chi Samwel.

¹⁸Kub'santzun Samweltz twitz Qman Dyos, textzunju' kmuj tzaj q'ankyaq ex jb'al. Kykyaqiltzunju' tnam oktchi Qman Dyos ex tchi Samwel kyi'j.

¹⁹Qu'mtzun kykyaqilx xikyma'n te Samwel:
—Kub'sana twitz Qman Dyos kyi'ju' tmajina lu, tu'n lalun qokyime'; qu'n tib'ajxi'tlu' txqan qile' matz'ok qtz'aqtza'n txqantle' tu'nju' xiqqani'ne' jun nimaqkawil, chechij.

²⁰Atzunte Samwel xittzaq'we'n kye:
—Lalun che xob'e'. Mana'tzun che b'inchan ile'; naq o'kx laluntzun tz'el kypa'ntl kyib'e' ti'j Qman Dyos. Che k'ulun qe'ye' te tu'n tkyaqil kyk'u'je'.²¹Lalun che'x k'ulune' kywitzju' dyos mixti'x kyajb'en, qu'n lay b'ent kyonin kyi'je' ex lay b'ent kyklete' kyu'n qu'n myana' dyos qe'.²²Lay che kyej tzaqpi'nkye' tu'n Qman Dyos, naqx tu'nju' tb'i nim toklen; qu'n tajb'il tu'n kyoke' te ttanam.²³Ayintzunwe', awt Qman Dyos tz'oninweye' tu'n michin q'ojena'ye' tu'n nkub'sane' kyi'je', tu'n lalun chin b'inchan ile' twitz. Ape' knb'incha'ju'ye', che xe'l nxnaq'tza'ne' tu'n tb'ent kyanq'ine' b'a'n ex toj ttxolilti'j.²⁴O'kxkye' tu'n kyb'inchante, tu'n kynimane' te Qman Dyos ex tu'n kyk'ulune' axxi'x ex tu'n tkyaqil kyk'u'je' te, qu'n nimxi' ti'xti' tb'incha qe.²⁵Qatzun atzu' xb'ajxa' kyk'u'je' tu'n kyb'inchanteye' taq'wix tuk'i'lju' nimaqkawil kyeye', kche b'el najsa'ne' tu'n Qman Dyos, chi Samwel. Q'oj kyi'j pilistey

¹Matxi'toq tij ichanix Sawul tej ttzyet tkawin toj Israel; tetzunj matxi'toq b'ent jte' ab'q'i nkawin, ²E'jaw t-sk'o'n wuqk'al lajnaq (3,000) xjal te q'oj kyxol aj Israel. Jo'k'al (2,000) e'kyajten tuk'i'l toj Mikmas ex kywi'witz te B'etel; aye'tzu'n kab'k'al lajnaqtl (1,000) e'kyajten tuk'i'l Jonatan toj tnam Kib'ea toj kytx'otx' tyajajil B'enjamin. Aye'tzu'n txqantl xjal e'xitchq'o'n Sawul kyja.³Eb'ajkub' tb'yo'n Jonatan xjal te q'oj pilistey nche xq'uqi'n Kib'ea, ex kyb'i pilistey. Tchaq'tzun Sawul tu'n kyq'ajtzet chun toj tkyaqilju' tnam tu'n kyb'inte aj Eb'rey.

⁴Kyb'itzun kykyaqil aj Israel qa matxi'toq che b'aju' jun tnej pilistey xq'uqilqe' tu'n Sawul, exqa tu'n ja'lu e'el i'k'o'n aj Israel kyu'n pilistey, kyb'uyitzun kyib' kkyaqilju' xjal te q'oj tuk'i'l Sawul toj Kilkal.⁵Ex ikxkye' pilistey b'aj kyb'u'yi'n kyib' tu'n kyq'ojin kyi'ju' aj Israel. Atitoq oxmutx' o'lajk'al (30,000) kykarwaj te q'oj, o'lajk'al (6,000) xjal te q'oj ti'j chej ex nim txqantl xjal te q'oj nche b'et tu'n kyqan, kse'n tz'awun ttzi ninnjab'. Exi'tzuntz Mikmas ex e'kub'ten atzu', toj tjawetzq'ij te B'et-ab'en.

⁶Tetzunj kyka'yinte aj Israel majxtoq ch'uẍ tu'n kyq'ojin kyi'j, eb'ajx ewal kyoj jul toj pik ex kyxol pik, kyoj tb'e a' b'incha'n toj tx'otx' ex kyoj xoch.⁷Ex b'a'npun e'ik'x jlajin toju' nin a' Jordan toju' tx'otx' Kad ex Kalaad; atzunte Sawul kyajxten Kilkal, ex kykyaqilju' t-xjal te q'oj lepchqe'ktoq ti'j inxi'xtoq che xob'.⁸Wuq q'ij ayon Sawul atzu', kse'nxju' xitma'n Samwel te, tu'ntzu'n mixti'x q'o'n tu'n tpon Samwel toj Kilkal, ljo'ntoq kyanjkye' xjal.⁹Tchaq'tzun Sawultz:
—Kyiq'inqe'tze' alu'mj te chojb'il k'ok'sb'il ex te b'inchjtib'il, chij.
Axtzu'n Sawul kub' q'onteju' chojb'il k'ok'sb'il.

¹⁰Naqtzun in b'ajkub' tq'o'n Sawulju' chojb'il k'ok'sb'il tej tpon Samwel. Ex etz Sawil k'molte ex q'olb'elte,¹¹atzunte Samwel xitma'n te:
¿Tiqu'n xtb'inchaya lu? chij.
Xi'tzun ttzaq'we'n Sawul:
Tej xxi' nka'yi'ne' ljo'ntoq kyanju' xjal ex mixtoqti'x q'o'n tu'n tula toju' q'ij q'ma'ntl tu'na, extzun matxi'toq b'aj kyb'u'yi'n kyib' pilistey toj Mikmas,¹²kub' nximane' qa che kb'eletztoq q'ojil qi'je' toj Wilwal, extzun na'mxtoq tkub' nq'o'n wib'e' toj tq'ob' Qman Dyos, qu'mtzun ayinxe' ẍin kub' q'onteju' chojb'il k'ok'sb'il qu'n intoq ojqelan toj nwitze', chij.

¹³Atzunte Samwel xittzaq'we'n te:
—¡Mixyab'a'n xtb'inchaya! Noqwit matxi tb'i'na tchaq'b'il Qman Dyos tzaj tma'n teya, ma'wtlo kyej q'o'na tu'n tkawina tejumajx toj Israel.¹⁴Atzu'n ja'lo lay kyej tenju' tkawb'ila kukxju'. Ktjya'te Qman Dyos juntl ichan b'a'n toj twitz, ex k'okyel tq'o'n te nejenel teju' ttanam, qu'n mixti' xitb'i'n teju'ya tchaq'b'il Qman Dyos tzaj tq'o'n teya, chij te.¹⁵Ik'tzun b'et Samweltz toj Kilkal ex xi'tljo'n tb'e. Aye'tzu'n txqantl xjal te q'oj exi' lpe ti'j Sawul tu'n kyq'ojin, e'ik' Kilkal ex e'pon Kib'ea toj kytx'otx' tyajajil B'enjamin. Atzuntzu' e'xa'tajla'n Sawul xjal te q'oj ate'toq tuk'i'l, naqtoq junk'al lajnaq (600) ichan ate'.¹⁶Axtzuntzu' kyeja' ten Sawul tuk'i'l Jonatan ju' tk'wal kyuk'i'lxi' t-xjal te q'oj, Kib'ea kyxol tyajajil B'enjamin, aye'tzu'n pilistey e'kub'ten Mikmas,¹⁷Ate'toqpe' oxe' tnej xjal pilistey q'ojil tojk'ulqe' eb'je'tz toju' kyxmuj; jun tnej exi' Opra toju' tx'otx' Swal,¹⁸atzun jun tnejtl exi' B'et-oron, atzu'n toxi'n tnej exi' twi' witz tib'aju' b'ya' Seb'oyim, tu'me'l chq'ajlaj.

¹⁹Mixtoqtzunti' jun aq'unal ti'j k'uxb'il toj tkyaqil ttx'otx' Israel, qu'mtzun kyxima pilistey qa laytoq b'ent kyb'inchante aj Eb'rey kyk'uẍtx'e'nb'il ex kych'ut.²⁰Kykyaqil aj Israel atitoq tu'n kyxi' jqul twitzte kyxb'otz'b'il, kytz'utz', kyk'uxb'il, mujqa kych'ut kyuk'i'l pilistey.²¹Kab'e' toxi'n piẍ saqpwaq nkychjo'n juqb'il kywitzte xb'otz'b'il ex tz'utz', atzun jun toxi'n piẍ saqpwaq juqb'il kywitzte k'uxb'il ex ch'ut.²²Qu'mtzun mixtoqti'x kyk'uẍtx'e'nb'il mo kych'utju' xjal lepchqe'toq kyi'j Sawul ex Natan tu'n kyq'ojin toju' q'ij lu. Oqe'kxtoq Sawul ex Jonatan q'i'n kyk'uẍtx'e'nb'il ex kych'ut.²³Matxi'toqtzun che pon lq'e jun k'loj pilistey te q'oj toj tb'eyil Mikmas. Kub'kyi'j ajq'oj tu'n Jonatan

¹Jun q'ij xitma'n Jonatan tk'wal Sawul teju' onilte:
Kutzaja qo' ik'x jlajxi' a' q'ojil kyi'ju' xjal pilistey te q'oj toju' kyxmuj, chij.
Ex mixti' xitma'n te tman,²qu'n matxitoq kub' kyq'o'n Sawul kyxmuj ttxa'nwitz, ex t-xe junwi' kranad toj er, kyuk'i'l Junk'al lajnaq (600) xjal te q'oj lepchqe'k ti'j.³Atoq Ayiy iq'ilteju' t-ẍa'y pale, ju' tk'wal Aytub', tk'wal ttzik Ikab'ot, ju' tk'wal Pinees ex tchman Elyi pale te Qman Dyos toj Silo.
Mixtoqti' b'i'n kyu'n xjal qa matxitoq txi' Jonatan.⁴Atzunte Jonatan intoq tjyo'n tu'me'l tu'n tpon tzmax jata' kyxmuj pilistey te q'oj. Atitoq tu'n kyex kyxol kab'e' nimaq pik, B'oses ex Sene kyb'i,⁵jun toj tb'a'nq'ob'kya'j tu'me'l tnam Mikmas, atzu'n juntl toj tnayajkya'j tu'me'l tnam Kib'ea.⁶Xi'tzun tma'n Jonatan teju' onilte:
—Kutzaja, qo' ik'x jlajxi', tzmax jata'qe' ma' xjal min nche niman te Dyos. Qaj k'onil Qman Dyos qi'j, qu'n mya' ch'uẍte' te tu'n qkanb'an kyuk'i'l ch'i'n mujqa nim xjal, chij.

⁷Xi'tzun ttzaq'we'nju' onilte:
—B'inchama tkyaqilju' nkub' t-xima'na, qu'n luqinwe' onilteya toj tkyaqilju' ktb'incha'ya, chij te.⁸Xitzun tma'n Jonatan te:
—Qo'ik'ex jlajxi' ja ta'qe' ichan lu, ex kxel qyek'u'nqib' kye.⁹Qama tzaj kyma'n tu'n qayon kye tu'n kyku'tz jata'qo', qo' kjelten axtzu' ex lay qo jax ja ta'qe'.¹⁰Qatzun makyma tu'n qjax kyk'etz, qo jawix, qu'n jun techlalte' lu qa qo kanb'al tu'n Qman Dyos, chij te.

¹¹Qu'mtzun, xikyek'u'nkyib' kykab'il kywitz pilistey q'ojil. Tetzunj kyka'yinte pilistey, kyma: Kyka'yinxpe'ye', ljo'n kyetzju' aj Eb'rey kyoju' jyom jae'wa'nkxa' kyib', chechij.¹²E'tzaj ẍch'intzuntz kye Jonatan tuk'i'lju' onilte:
—¡Kukyjatze' ja to'qo'ye' qu'n kxe'l qla'ji'n jun ti'xtiye' kyeye'! chechij.
Xi'tzun tma'n Jonatan teju' onilte:
—Lpetza wi'je', qu'n che tzajel q'o'nkye' toj qq'ob' tu'n Qman Dyos, chij.

¹³Jaxtzun txakin Jonatan, lepchixju' onilte ti'j. Aye'tzu'n nche tzyet tu'n nche ku'tz ttoli'n, atzuntlju' onilte nkub' b'ajsankye.

¹⁴Qapelo junaq (20) ichan eb'aj toju' tnejel q'oj lu kyu'n Jonatan naq toj jte'x ky'jaj kojb'il.¹⁵Majx oktchi kyi'j kykyaqilju' ate'toq toju' kyxmuj exqe' ate'toq ti'jxi'. Tzaj xob'il b'a'nxi'x kyi'ju' xjal ntoq che xq'uqin ex kyi'ju' b'je'xniqe' q'ojil toj k'ul. Tzaj kyajnajnab' ex tzaj jun nin xob'il kyi'j.

¹⁶Aye'tzu'n t-xjal Sawul intoq che xq'uqin Kib'ea kyxol tyajajil B'enjamin, kyil tej kyb'jaw tilju' pilistey.¹⁷Xi'tzun tma'n Sawul kyeju' t-xjal ate'toq tuk'i'l:
—Kyka'yinxe' qa ato'yile qkyaqil, chij.
Atzunj telkynik' mix-a'lo'toq Jonatan tuk'i'lju' onilte.¹⁸Xi'toqtzu'nta' Tkax Qman Dyos kyxol aj Israel toju' q'ij lu, xitma'n Sawul te Ayiy:
—Q'intzju'ya Tkax Qman Dyos tza'lu, chij.

¹⁹Tetzunj intoq yolin Sawul tuk'i'lju' pale, ljo'ntoq kyb'jaw tiljxi'xtlju' pilistey toju' kyxmuj. Xitma'ntzun Sawultz te pale:
—Lalun tzaj tiq'i'ntla, chij.²⁰Textzu'n kmuj lu b'aj kyb'u'yi'n kyib' Sawul kyuk'i'lju' t-xjal te q'oj, exi'tzuntz q'ojil. Aye'tzu'n pilistey kyib'xkyib' b'aj kyb'yo'n kyib', qu'n nimxi'xju' xob'il matxi'toq tz'okten kyi'j.²¹Exqepe' aj Eb'rey te q'oj matxi'toq b'et q'ij ate'toq kyuk'i'l pilistey, xi'kyaq'a'tlkyib' kyuk'i'l aj Israel kyxjal Sawul ex Jonatan toju' kmuj lu.²²Tetzun kyb'inte jte'tl aj Israel b'ajxniqe' klolkyib' kywi'witz te Eprayin, qa intoq che oq pilistey, eb'ajxlpe q'ojil kyi'j.²³Tzmax toj B'et-ab'en pon kanuna'ju' q'oj, ex e'tkol Qman Dyos aj Israel toju' maj lu. Tma Sawul jun tyol tu'n tjapun tu'n

²⁴Matxi'toqtzun che kub'numju' aj Israel toju' q'ij lu, qu'n mix-a'lo' jun matxi'toq txitwan jun piẍ wab'j, qu'n ojetoq che kub' tq'o'n Sawul tu'n tjapun jun yol kyu'n kjalu: Tzajxwit taq'wixil tib'aju' xjal qama txitwan ch'i'n twa na'mxtoq tex q'ij, qa na'mxtoq tkub'kyi'ju' wajq'oje, chij kye.²⁵O'kx kyponju' xjal te q'oj toj jun k'ul janqojla' ta'lkab' twitz tx'otx'.²⁶Tej kyokxju' xjal toju' k'ul, intoq qojliju' ta'lkab' twitz tx'otx'; ex mix-a'lo'te xinik'b'ente tu'n tpaj kyxob'el ti'ju' yol xikytziya'n.²⁷Atzunte Jonatan, mixna'ti' tb'iju' yol tmaju' tman tu'n kytziyanteju' xjal te q'oj, jawtiq'i'n ch'i'n ta'lkab' toj jun aq tu'nju' tch'ut ex xitlo'n, majxtzun oktl tipumal.²⁸Ex xitma'n jun xjal te q'oj te:
—Matxi tma'n tmana kyeju' xjal te q'oj tu'n kytziyante jun kyol, qa mixti' jun tu'n txi' twan jun ti'xti', qu'n qatzun min ktzajel taq'wix tib'aj. Qu'npe'na'tzun matxi' che kub' b'aju' xjal tu'n we'yaj, chij.

²⁹Atzunte Jonatan xittzaq'we'n:
—Taq'wix xtb'incha nmane' teju' nintnam. Ka'nxa matxi' tz'ok wipumale' tu'nju' ch'i'n myel xb'aj wu'ne'.³⁰Mina'yate' naqwit mache wanju' xjal ti'ju' selkyiq'i'n kyeju' ajq'oj. ¡Ma'xi'xwitlo che b'o'ljkye' pilistey qu'n!, chi Jonatan te.

³¹Kub'kyi'j pilistey toju' q'ij lu kyu'n aj Israel, tzaj qe kyq'ojin Mikmas ex pon tzmax Ayalon. Matxi'xi'xtoqtzun che kub'numju' aj Israel te q'oj,³²eb'ajx tiljtzuntz ti'ju' matxi'toq tz'elkyiq'i'n kye ajq'oj, tzaj kyiq'i'n rit, ttxu wakx ex qpoj tman wakx, ex eb'aj kub' kyb'yo'n, xikych'yo'ntzuntz tuk'i'lxi' tchk'el.

³³Ate'tzun junjun eb'ajx q'malte te Sawul:
—Luqe' xjal nche b'inchan il twitz Qman Dyos, qu'n nche ch'yon chib'j tuk'i'lxi' tchk'el, chechij te.
Atzunte Sawul tma:
—¡Majx pi'sqe'kye'! Kytolintze' jun nin ab'j tzalu.³⁴Che' yoline' kyuk'i'lju' xjal ex kymanxe' kye tu'n ttzaj kyiq'i'n teyile junjun, tman twakyix mujqa trit, tu'n kykub' kyb'yo'ne' ex tu'n telu' kychk'el ex tu'n kywane' ti'j, tu'ntzun lalun che b'inchan ile' twitz Qman Dyos tu'nwt txi' kych'yo'ne' tuk'i'lxi' tchk'el, chij.
Textzu'n qonik'an lu, teyile junjun xitiq'i'n jun tman wakx, ex kub' kyb'yo'n atzu'.³⁵Jawtzun tb'incha'n Sawul jun tnejel q'olb'eb'l te Qman Dyos.³⁶Tmatzuntz:
—Qo'qe' q'ojil kyi'j pilistey toju' qonik'an ja'lo, ex qiq'imitz tkyaqilju' ati kye tzmax ajqsqix, ex majx che qnajsanku' kykyaqil, chij.
Kykyaqil xikytzaq'we'n:
—B'inchama tkyaqilju' b'a'n toj twitza, chechij te.
Atzunju' pale tma:
—Nej qqanix te Qman Dyos qa b'a'n, chij.

³⁷Xi'tzun tqani'n Sawul te Qman Dyos:
—¿Ma b'a'n tu'n qxi'ye' q'ojil kyi'ju' pilistey? ¿Ma che tzajel tq'o'na toj qq'ob'e'? chij.
Atzunte Qman Dyos min tzaj ttzaq'we'n toju' q'ij lu.³⁸Qu'mtzun tma Sawul:
—Kykyaqile' nejenelqe'ye' kye xjal te q'oj, che lq'etze' tzalu, ex kyka'yinxe' alkyeju' matxi' b'inchan il ja'lo.³⁹¡Axxi'x kntziya'ye' twitz Qman Dyos klol kye aj Israel, b'a'ntzun qa aju' nk'wale' Jonatan, kb'el b'yet!, chij.
Mix-a'lo' jun kyxolju' xjal te q'oj xitzaq'wente;⁴⁰qu'mtzun xitma'n Sawul kye kykyaqil aj Israel:
—Che tenku'ye' tza'lu, atzunwe' tuk'i'lju' nk'wale' Jonatan, qob'eltene' toj jun plajtl, chij.
—B'inchamju'ya b'a'n toj twitza, chechiju' t-xjal xikytzaq'we'n.

⁴¹Tmatzun Sawul:
—Nman Dyos, ¿tiqu'n na'mx ntzaj ttzaq'we'na, ayine' tmajina? Qa ayine' ati npaje' mujqa aju' nk'wale' Jonatan, a Urim kb'eltz'aq; qatzun aye' aj Israel ati kypaj, a Tunin kb'eltz'aq, chij.
Atzuntzu' kub'a' tz'aq kyi'j Sawul tuk'i'l Jonatan, kyajtzun tnamtz mixti' til.

⁴²Tmatzuntl Sawul:
—Kyka'yinxe' alqi'j makub' tz'aqa' qxole' tuk'i'lju' nk'wale' Jonatan, chij.
Atzu'ntzu' pon tz'aqa' ti'j Jonatan,⁴³xi'tzun tma'n Sawul te Jonatan:
—Q'mantza weye' titi' xtb'inchaya, chij.
Atzunte Jonatan jawtz tma'nju' til:
Jaw wi'ne' ch'i'n ta'lkab' tu'n twi' nch'ute' ex xinlo'ne'. Luqinwe' lu, chin kyb'yonku'ye', chij.

⁴⁴Atzunte Sawul jawtma'n kuw:
—¡Kub'xwit ttz'e'ysa'n Qman Dyos nwitze' kuwxi'x, qa min xkyima Jonatan! chij.

⁴⁵Atzu'n tnam xikytzaq'we'n te Sawul:
—¡Tiqu'ntzun kkyimel Jonatan, ma myatzun tu'n ẍe kanb'ana' aj Israel! ¡Mixti' tu'n tkyimte'! ¡Lu Qman Dyos nka'yin, mixti' tu'n tkub' tz'aq jun t-xya'mal twi' twitz tx'otx'! Qu'n aju' xtb'incha ja'lo, mab'ent tu'n tu'ntonb'il Qman Dyos, chechij.
Iktzu'n kleta' Jonatan tu'nju' tnam.⁴⁶Atzunte Sawul kyej ttzaqpi'n tu'n tq'ojin kyi'ju' pilistey, e'anjtzun pilistey toj kytx'otx'.

⁴⁷Toklenxi'tzun Sawul te nimaqkawil kyib'aj aj Israel, q'ojin toj tkyaqil plaj kyi'ju' tajq'oj, aye' aj Moab', aj Amon, aj Edom, exju' nimaqkawil toj Sob'a exqe' pilistey. Jaxjaku' nxa', intoq kanb'an.⁴⁸B'aj tb'u'yi'n jun tnej xjal te q'oj, ex kub'kyi'j aj Amalek tu'n. Iktzu'n e'tkola' aj Israel kyeju' eleq'.

⁴⁹Aye' tk'wal Sawul ja'lu: Jonatan, Isb'i ex Malkyiswa. Aye'tzu'n kab'e' tmyal aye': Merab' ju' tzikb'aj, ex Mikal i'tz'inb'aj.⁵⁰Aynoam toq tb'iju' t-xu'jil Sawul, tmyal Aymaas. Atzu'n nejenel kye t-xjal te q'oj Ab'ner tb'i, tk'wal Ner, ttzik mo titz'in tman Sawul.⁵¹A Kyis tman Sawul, atzu'n Ner tman Ab'ner, kykab'ilx tk'wal Ab'yel qe'.

⁵²Majxtoq kuwju' q'oj kyi'j pilistey toju' tq'ijlalil Sawul: Qu'mtzun o'qekxju' ichan kuwqe' ex min nche xob' nche t-xnaq'tza'n Sawul te t-xjal te q'oj. El ik'u'n Sawul tu'n Qman Dyos

¹Jun q'ij xitma'n Samwel te Sawul:
—Ma chintzaj tchq'o'ne' Qman Dyos tu'n t-xjanseta te nimaqkawil toj Israel ttanam. Qu'mtzun b'intzju'ya intma'n Qman Dyos teya.²Chi Qman Dyos nimtipumal: Kb'el ntz'e'ysa'ne' kywitzju' aj Amalek tu'n tpaju' kyb'incha kyi'j aj Israel, qu'n eb'je'tz q'ojil kyi'j toj b'e tej kyetz toj Ejipt.³Qu'mtzun kutxi'ya q'ojil kyi'j; majx b'ajsanqe'ku'ya kyuk'i'l kykyaqilju' ati kye, ex lalun tzaj laqj tk'u'ja kyi'j. B'yonqe'ku'ya ichan ex qya, k'wal ex ne'ẍ, ex ikxqe' tman wakx ex rit, kamey ex b'ur, chi Dyos, chi Samwel te Sawul.

⁴E'tzaj ttxko'n Sawulju' tnam ex jawtiq'i'n kyajlal atzu' Telaym. Junaqjo' mutx' (200,000) ichan nche b'et tu'n kyqan ex junmutx' jo'k'al (10,000) ichan aj Juda.⁵Xi'tzun Sawultz toju' nintnam kye Amalek ex e'kub'ten ttzi jun a',⁶ex xitma'n kye aj kyenit:
—¡Kypa'mil kyib'e'! ¡Kukyetze' kyxol aj Amalek, tu'n miche kub'a' nnajsa'ne' junx kyuk'i'l, qu'n b'a'nkye kyb'incha kye aj Israel tej kyetz toj Ejipt! chij kye.
Eltzun kypa'n kyib'u' aj kyenit kyi'j aj Amalek.⁷Oktzun tzaqpaj Sawultz q'ojil kyi'j aj Amalek, tzajx Ab'ila ponx tzmax Sur, ju' ati toj nqach te Ejipt, ex kub'kyi'j tu'n;⁸tzyet Akak ju' kynimaqkawil kyu'n ex okx kyjpu'n, ex e'kub' kyb'yo'n kykyaqilju' t-xjal te q'oj tu'n k'uẍtx'e'nb'il.⁹Atzunte Sawul kyuk'i'lju' t-xjal te q'oj mixti' kub' kyb'yo'n Awaw, ex mixti' e'kub' kyb'yo'n tb'anil ttxu rit, tman wakx, e'qpoj tman wakx q'u'sqe', exqe'ju' rit, ex mixti' e'kub' kyxitu'n ti'xti' twi' wi'yal. Noq oqe'kxju' mixti' kyajb'en kub' kyxitu'n.

¹⁰Tzaj yolintzun Qman Dyostz te Samwel, tman:

¹¹—Mixpe'wt soka' nq'o'ne' Sawul te nimaqkawil, qu'n matxi' tz'el pi's ex mixti' xxi' tb'i'ntlju' nchaq'b'ile', chij. Atzunte Samwel tzaj tb'is, ex kub'san twitz Qman Dyos tb'aj qonik'an.¹²Te jun q'ijtl, b'a'n prim xi' Samwel tk'etz Sawul, xi'tzun q'ma'n te qa ojetoq txi' Sawul toj Karmel, ex ojetoq jawtb'incha'n jun nin ab'j te nab'ab'lte, ex tej tb'ent tu'n, xi' Wilwal.¹³Xi'tzun Samweltz jatoq ta' Sawul, xi'tzun tma'n Sawul te:
—Awt Qman Dyos k'iwlanteya. Matxi' nb'inchawe' tchaq'b'il Qman Dyos, chij te.

¹⁴Atzunte Samwel xittzaq'we'n te:
—¿Tiqu'ntzun qe'ju' rit ex tman wakx nche jaq'un?, chij te.

¹⁵Xitzun ttzaq'we'n Sawul te:
—Xi' ẍetzaja' iq'i'na Amalek. Qu'n matxi' kyej kyklo'n xjalju' tb'anil rit ex tb'anil tman wakx, tu'n kykub' q'et te chojb'il twitz Qman Dyos. Aye'tzu'n txqantl matxi' che kub'qb'ajsa'ne', chij.

¹⁶—¡K'ulpe'ttziya, kxe'l nma'ne' teya ti'ju' saj tma'n Qman Dyos weye' te qonik'an ja'lo!, chi Samwel te.
—Q'mantzna'ya, chi Sawul te.¹⁷Xi'tzun tma'n Samweltz:
—¿Ma myatzun mixtoqti'x toklena nejtl? Extzun ja'lo, matxi' tz'oka te nejenel kyeju' tnej kyyajajil aj Israel, ex matxi' tz'ok q'o'na te nimaqkawil toj Israel tu'n Qman Dyos.¹⁸Qu'mtzun, xi'na' chq'o'na tu'n Qman Dyos tu'n txi'ya b'yolkye b'inchal il aj Amalek, tzmax ajkymankun tu'na,¹⁹¿tiqu'n mixti' xi'tb'i'na tchaq'b'il ex mache tzaj tiq'i'na sel iq'et kye ajq'oj? ¡Myab'a'n xtb'inchaya twitz Qman Dyos!, chi Samwel te.

²⁰Atzunte Sawul xittzaq'we'n:
—Mana' txinb'i'nwe' tchaq'b'il Qman Dyos ex ma nb'inchaye' saj tma'n tu'n nb'inchanteye': matzaj wiq'i'ne' Awaw, nimaqkawil kye aj Amalek tu'n tokx jpet, ex matxi' che kub'qb'ajsa'ne' aj Amalek.²¹Aye'na'kye xjal te q'oj ẍe' kyej klonkye' tb'anilxi'x ttxu rit exqe' tman wakx kyxolju' atitoq tu'n kykub' b'yet, tu'n kykub' q'et te chojb'il te ninb'ilte Qman Dyos toj Wilwal, chij te.

²²Atzunte' Samwel xitma'n te:
Ate Qman Dyos ntzalajxi'x qa chaq'aq'anqo', kyetwitz tu'n txiq'et chojb'il ex chojb'il k'ok'sb'il twitz; ate b'a'nju' chaq'aq'anqo' ex tu'n t-xiqb'i'n, kyetwitz tu'n tkub'qq'o'n chojb'il ex t-until rit twitz.²³Junx tilju' xjal minti' in nokslan te Qman Dyos tuk'i'lju' ajpkab'; exju' xjal ink'ulun kye witzileb' junx til tuk'i'lju' mya chaq'aq'an te Qman Dyos. Ma'na' tz'el tik'o'na tchaq'b'il, qu'mtzun matxi' tz'el ik'u'na tu'n te nimaqkawil, chij te.

²⁴Xi'tzun ttzaq'we'n Sawultz:
—Matxi' chin b'inchan ile', qu'n min xxinb'i'ne' tchaq'b'il Qman Dyos exju' tnuk'b'ila, kyeju' xjal ẍin xob'a'ye' ex matxi' nb'i'ne' kyqanb'e'tz.²⁵Qu'mtzun b'inchama xtalb'il, najsanku'ya wile' ex kutanj ti'ja wuk'i'le' k'ulul te Qman Dyos, chij.

²⁶Atzunte Samwel xittzaq'we'n te:
—Lay tz'anjwije' tuk'i'la, qu'n minti' nxitb'i'na tchaq'b'il Qman Dyos, atzu'n ja'lo matxi' tz'el ik'u'na tu'n, Ex lay tentla te nimaqkawil toj Israel, chij.

²⁷Tetzunj tik'b'et Samwel, xi' Sawul tzyulte ttxa'n tpinpa't ex xi't-ẍilu'n.²⁸Xi'tzun tma'n Samwel te Sawul:
—Ikxi'xtzu'n kse'n sela' tlaqu'na npinpa'te', matxi' tz'el tlaqu'n Qman Dyos kawb'il toj Israel teya. Matz'eltiq'i'n teya tu'n txitq'o'n te jun t-xjalila b'a'n xjalxi'x kyetwitza.²⁹Qu'n min nchan te Dyos yol, ju' nimxi'x toklen toj Israel, ex min nanjtzti'j tk'u'j, qu'n mya jun xjal tu'nwt tmeltz'je ti'j tyol, chij.

³⁰Atzunte Sawul xitma'n jumajtl:
—Matxi' chin b'inchan ile'. Noqtzun o'kx b'inchama xtalb'il, chin tnimama kse'nxju' woklene' te nimaqkawil kywitzju' tijwnaq ex kywitz kykyaqilju' xjal toj Israel. Kutanjtz jumajtlti'ja wuk'i'le' tu'n qk'ulun te Qman Dyos, chij te.

³¹Anjxtzunti'j Samwel tuk'i'l Sawul, ex k'ulun te Qman Dyos.³²Tchaq'tzun Samweltz:
—Kyiq'intze' Awaw, ju' nimaqkawil kye aj Amalek, chij.
Atzunte Awaw kyipeni te tpon twitz Samwel, toj tnab'l qa matxi'toq tzik'tna'lju' til exqa laytoq kyim toj yajb'il.³³Atzunte Samwel xitma'n te:
—Mache kub' tb'yo'na kyal txqan qya tu'n tk'uẍtx'e'nb'ila. Ikxtzun ttxu ju'ya ja'lo kjelten mixti' tal, chij te.
Ex mixti'tlte yol, Kub'tzun tpẍu'n Samwelju' Awaw twitz Qman Dyos toj Wilwal.³⁴Xi'tzuntz Rama, atzunte Sawul anjti'j tja, toj Wib'ea ju' ttanam.³⁵Atxi'xtzunj min oktka'yi'ntl Samwel twitz Sawul, maskyepe' tzaj tb'is b'a'nxi'x ti'j Sawul tej tkub' t-xima'n Qman Dyos tu'n tel te nimaqkawil toj Israel. Xjansanjtz Dab'i te nimaqkawil

¹Tzaj tma'n Qman Dyos te Samwel:
—¿Jtoj kyej tb'isuna ti'j Sawul? Min wajb'iltle' tu'n ttentl Sawul te nimaqkawil toj Israel. Qu'mtzun nojsanku'ya tuk'a wakx tu'n aseyt, ex kutxi'ya tja Jese, aj B'elen, qu'n matxi' jawnsk'o'ne' jun tk'wal tu'n tok te nimaqkawil, chij.

²Atzunte Samwel xittzaq'we'n:
—¿Se'ntzun chin xe'la'ye'? Qu'n qama tb'i Sawul, chin b'el tb'yo'ne', chij.
Atzunte Qman Dyos tzaj ttzaq'we'n te:
—Iq'inxa jun qpoj ttxu wakx ex q'manxa qa matxi'ya' q'olku'te te chojb'il nwitze'.³Txkontztzuntza Jese ti'ju' chojb'il, kxe'lma'ntzuntze' teya titi' ktb'incha'ya. Kt-xjansa'ju'ya kxe'l nma'ne' teya tu'n tok te nimaqkawil, chi Dyos te.

⁴Tb'incha Samwel kse'nx tzaj tma'n Qman Dyos te. Tetzunj tpon B'elen, e'etzju' tijwnaq te nintnam k'molte intoq che xob'inin, ex xikyqani'n te:
—¿Ma toj b'anil sula'ya?, chechij te.

⁵—Tojna'tzun, chi Samwel xittzaq'we'n —Machin tzaje' q'ol jun chojb'il te Qman Dyos. Kyẍtilsam kyib'e' ex kukytzaje' wuk'i'le' tu'n txi' qq'o'nju' chojb'il junx, chij.
Kub' t-xjansa'ntzun Samwelju' Jese exqe'ju' tk'wal, ex exi' tk'le'n ti'ju' chojb'il.⁶Tetzunj kyponju' tk'wal Jese, xitka'yi'n Samwel Elyab' ex kub' t-xima'n: Alote ichan ja'lu matxi' jaw t-sk'o'n Qman Dyos tu'n tok te nimaqkawil, chij.

⁷Atzunte Qman Dyos tzaj tma'n te Samwel: Lalun txi'twitza ti'ju' ka'yin mujqa ninxjal, qu'n min kub'tl toj nwitze'. Myate' kse'n ka'yi'n xjal; qu'n awe' in nka'yi'n aju' toj tanmi, chij.

⁸Tzajtzun ttxko'n Jese Ab'inadab', ex xityek'u'n te Samwel; atzunte Samwel tma:
Ex myate xjaw t-sk'o'n Qman Dyos, chij.

⁹Xi'tzun tyek'u'ntl Jese Sama te Samwel; ex myate', chi Samwel.

¹⁰Exi'tzun tyek'u'n Jese wuq tk'wal te Samwel, atzunte Samwel xitma'n te qa mixti' jun kyxol matxi'wt jaw t-sk'o'n Qman Dyos.¹¹Xitma'ntzuntz te:
—¿Ma o'qe'kxtzun tk'walju'ya?, chij.
—Atixju' ch'ip, ju' k'ik'lel rit, chi Jese xittzaq'we'n.
—Q'manxna'ya tu'n t-xitxokb'aj, qu'n lay tzyetju' qna'j Dyos qa minti' sul, chi Samwel te.¹²Xi'tzun tchq'o'n Jese ttxokli. Majx qb'oxinju' tal ku'xun, b'a'n xjal ex tb'anil tka'yink.
Tzajtzun tma'n Qman Dyostz te Samwel:
—Aju' lu, xjansanku'ya tu'n tok te nimaqkawil, chij.

¹³Tzajtzun tiq'i'n Samwelju' aseyt, ex kub' t-xjansa'nju' ku'xun Dab'i te nimaqkawil kywitzkuju' ttzik. Textzunju' kmuj lu, ulju' t-xew Qman Dyos tib'aj. E'kyajtzun tq'olb'e'n Samwel, xi'tzuntz Rama. Ajb'en Dab'i te Sawul

¹⁴Matxitoqtzun tz'el tpa'ntib' t-xew Qman Dyos ti'j Sawul, ex intoq yajlanjtz tu'n jun xewb'aj myab'a'n tzajni tq'o'n Qman Dyos ti'j.¹⁵Qu'mtzun xikyma'nju' xjal intoq che ajb'en te:
—Ina' tlo'na taye, in yajlanjtza tu'n jun xewb'aj myab'a'n saj tq'o'n Qman Dyos ti'ja.¹⁶Qu'mtzun qo' tchq'oma ayo'ye' ajb'el teya tu'n qjyonteye' jun xjal b'a'n chinb'an ti'j arpa, tu'n tchinb'an ajttzaju' k'ixk'oj ti'ja tu'nju' xewb'aj myab'a'n, tu'ntzun tel ti'ja, chechij te.

¹⁷—Kyjya'kna'ye' jun b'a'n chinb'al, ex kyiq'intze', —chi Sawul xittzaq'we'n.

¹⁸Xi'tzun tma'n junju' ajb'el:
—Oje wile' jun tk'wal Jese najli B'elen, b'a'n chinb'an; expe' jun b'a'n q'ojil mixti' in xob', inximan nejtl ajtel tma'n jun tyol; tb'anil ka'yin ex ati Qman Dyos tuk'i'l, chij.

¹⁹Exi'tzun tchq'o'n Sawul sanjelal tk'etz Jese tu'n txi' kyma'n te tu'n ttzaj t-sma'nju' tk'wal, aju' Dab'i k'ik'lel rit.²⁰Tzajtzun tchq'o'n Jese Dab'i ju' tk'wal tk'etz Sawul. Ex xi' t-sma'n Jese jun chej iqa'n wab'j tu'n, jun tz'u'n b'in ex jun tal chib'.²¹Iktzu'n pona' Dab'i twitz Sawul ex kyejten ajb'el te, ex k'u'jlanjtz b'a'nxi'x tu'n Sawul ex oktq'o'n te tonil;²²Ex xit-sma'n Sawul jun tqanil te Jese, xitkub'sa'n te tu'n tkyej tq'o'n Dab'i tk'etz, qu'n b'a'n ela' toj twitz.²³Qu'mtzun, aj tyajlanjtz Sawul tu'nju' myab'a'n xewb'aj chq'o'n tu'n Qman Dyos, nokten Dab'i chinb'al ti'ju' arpa. Tu'ntzunju' lu intoq jaw tzalaj Sawul ex b'a'ntoq ch'i'ntl ntna'n, ex intoq kyej tzaqpi'n tu'nju' myab'a'n xewb'aj. Kub' Kolyat tu'n Dab'i

¹B'aj kychmo'n pilistey kyxjal tu'n kyq'ojin ex b'aj kyb'u'yi'n kyib' toj Soko, kytanam aj Juda, e'kub'tentzuntz Epes-damim, kyxol Soko tuk'i'l Aseka.²Ex ikxte Sawul kyuk'i'lu' aj Israel b'aj kyb'u'yi'n kyib' ex eb'aj kub'ten toju' b'ya' Ela, b'aj kyb'incha'nkyib' tu'n kyq'ojin kyuk'i'l pilistey.³E'kub'ten pilistey twi' jun witz, ex ikxkye aj Israel twi' juntl witz, kyej tenju' b'ya' kyxol.⁴O'kx tetz jun xjal te q'oj kyxol pilistey, Kolyat tb'i, oxe'lo metr twe'. Atoqtzu' najla' toj nintnam Kat.⁵Tokxtoq jun toj twi' q'ank'uxb'il, ex toktoq jun kolb'il ti'j q'ank'uxb'ilx, jun kyintal tk'i' junaq jun lib'r (1.21) talil.⁶Exqe'ju' kolb'il twitz tqan, tuk'i'lju' tch'ut iq'i'ntoq ti'j tqul, q'ank'uxb'ilqe'x.⁷Nimxi'xtoq twe' tch'ut kse'n jun tqul chmob'l xb'alun, k'uxb'il twi' te oxlajoj tk'i' nik'jan lib'r talal. Ex nejliju' onilte.⁸Kub'tzun we' Kolat ex tma kye aj Israel te q'oj kjalu:
—¿Tiqu'n ẍe tzaja'ye' q'ojil nk'u'n kytene'? pilistey qinwe', aye'tzunkye' ajb'el qe'ye' te Sawul. Kysk'o'nktz junkye' kyxol tu'n ttzaj q'ojil wuk'i'le'.⁹Qa kuw tu'n tq'ojin wuk'i'le' exqa machin kub'e' tu'n, qo' okyele' te k'a'yi'nmajin kyeye', qatzun makub' wu'ne', aye'tzuntze' che okyel te k'a'yi'nmajin qeye', chij kye.¹⁰Ex e'oktik'le'n Wolyat aj Israel, ikjalu: ¡Kychq'ontze' jun ichan tu'n tq'ojin wuk'i'le' ja'lo!, chij.

¹¹Tetzunj kyb'inte Sawul ex kykyaqilju' aj Israel aju' tma pilistey, eb'ajxob' ex e'jaw lu'lun b'a'nxi'x.

¹²Atitoqtzun jun ichan toj B'elen, Jese tb'i, matxi'toq tijin toju' tq'ijlalil Sawul. Ate'toq wajxaq tk'walju' ichan lu, ex axtoq junju' Dab'i.¹³Ojetoq che b'ajxju' oxe' tnejel tk'wal toj q'oj tuk'i'l Sawul, aye' Elyab', Ab'inadab' ex Sama. Atzunte Dab'i tu'nju' ch'i'p,¹⁵ntoq xi' jatoq ta'qe' Sawul ex ntoq anjtzti'j B'elen tu'n txi' k'ik'lel rit.

¹⁶Atzu'n pilistey lu kukxtoq tetzu' ik'lelkye aj Israel tkyaqil prim ex tkyaqil qale, b'aj kab'naq (40) q'ij kukxtoqu' tu'n.

¹⁷Jun q'ij xitma'n Jese te Dab'i:
—Iq'i'ntza junaq litr wensi'n triy, exqe'ju' lajoj wab'j lu, ex wix q'inxa kyeju' ttzika ja tkub'a' kyxmuj.¹⁸Ex q'inxa lajoj ptij kyes lu teju' chaq'ul kye xjal te q'oj. Ka'yinxa se'nta'qe' ttzika ex q'intza tqanil qa b'a'nqe', chijte.

¹⁹Aye'tzunkye Sawul kyuk'i'lju' ttzik Dab'i ex kykyaqilu' aj Israel intoq che q'ojin kyuk'i'l pilistey toju' b'ya' Ela.

²⁰Tetzu'n juntl q'ij, jaw we' Dab'i b'a'n prim ex e'kyajtq'o'nju' rit tu'n kyxi' tka'yi'n juntl, kub'tzun b'etz tu'n, exi' tiq'i'nju' ti'xti' xitq'o'n tman te. Tetzunj tpon jatoq ta'qe'ju' ttzik, intoq kyb'incha'n kyib'ju' xjal te q'oj tu'n kyex q'ojil, ex intoq che b'ajẍch'in kuw.²¹Kub' kytxoli'n kyib' pilistey toj jun plaj, ex kub' kytxoli'n kyib'u' aj Israel toj jun plajtl.²²Atzunte Dab'i kyej tq'o'nju' tiq'i'n teju' ka'yilkye kyq'ojb'il ex kywa, xi' ojqelantzuntz kyky'etzu' xjal te q'oj txoli'n kyten qanilte kyeju' ttzik se'ntoq ta'qe'.²³Tetzunj intoq yolin Dab'i kyuk'i'l, etz Kolyat, twi' nintnam Kat, kyxol pilistey te q'oj txoli'ntoq kyten, ex aq'wi jumajtl ik'lelkye aj Israel, kse'nxju' ntoq tb'incha'n. Tb'i Dab'i ja'lu.²⁴Naqtzun nb'ent txi' kyka'yi'n aj Israel ichan lu, tzaj nim xob'il kyi'j ex e'kub' oq twitz,²⁵ex kyma: ¿Ma makyilju'ye' ichan setz? ¡Matzul ik'lelqe! Alkyete makub' ti'j tu'n, kxe'l tq'o'n nimaqkawil txqan tq'inumal, kxe'l tq'o'n tmyal te t-xu'jil exqe' toj tja lay che q'ontl chojb'il te nimaqkawil, chechij.

²⁶Xi'tzun tqani'n Dab'i kyeju' ate'toq tk'etz:
—¿Titi' kxe'l q'o'n teju' ichan makub' b'yonte pilistey lu, tu'n mitz'ela' qch'ixaw ayo' aj Israel? ¿Ti'tzu'n toklenma' pilistey lu, min niman te Dyos, tu'n kyoktik'le'n ttanam Dyos itz'?, chij.

²⁷Axte xikytzaq'we'n kse'n matxitoq kyma tnejel, ti'ju' kxe'l q'o'n teju' xjal qama kyimu' Kolyat tu'n.²⁸Atzunte Elyab', ttzik Dab'i, tb'i intoq yolin Dab'i kyuk'i'lju' xjal lu, tzaj ttx'u'jil ex xitma'n te:
—¿Titi' Sajtla'ya tzalu? ¿Alkye xkyaj tq'o'na k'ik'lelkyeju' jte' rit ate'qe' toj chq'ajlaj? Wotzqi'ntlwe' aya jaxja nnokxa' tq'o'ntib'a ex wojtzqi'ne' t-xima myab'a'n, matzulta naq ka'yilte q'oj, chij te.

²⁹Atzunte Dab'i xittzaq'we'n:
—¿Ti'tzu'n matxi' nb'inchaye'? Tzmape'na' ẍin yolin ch'i'we', chij.

³⁰El lq'etzuntz ti'ju' ttzik, atzunj txitqani'n te juntl, ax yolju' xiq'ma'n te.³¹Aye'tzu'n eb'inte Dab'i nxjelun, exi q'malte te Sawul, tchaq'tzun Sawultz tu'n txitxko'n Dab'i tk'etz.

³²Xi'tzun tma'n Dab'i te Sawul:
—Mix-a'lote tu'n t-xob' tema' pilistey lu, qu'n ayi'nku'we', ajb'el teya, chin xe'l q'ojil tuk'i'l, chij.

³³Atzunte Sawul xittzaq'we'n:
—Myab'a'n tu'n txi'ya tjunala q'ojil ti'j ma' pilistey lu, qu'n tzmaxi'x ku'xuna; atzunte' ichan lu q'ojilx atxi'x toj tku'xumal, chij te.³⁴Xi'tzun ttzaq'we'n Dab'i:
—Ayine' ajb'el teya, kse'n nchin k'ik'lene' kyi'ju' trit nmane', qama tzul jun oso mujqa jun b'alun q'il jun rit,³⁵nchinx lpeye' ti'j ex inel wiq'i'ne' toj kytzi; qatzun matzaj wi'je', ntzyetju' tjaq' ttzi wu'ne' ex nchin oktene' woch'ilte tzmax ajtkyim.³⁶Qu'mtzun, b'a'ntzunqa jun b'alun mujqa jun oso, nche kyim wu'ne', ayine' ajb'el teya nimaqkawil. Ikxtzu'n kb'ajela' ma' pilistey lu min niman te Dyos, qu'n mache oktik'le'n ttanam Qman Dyos itz'.³⁷Ate Qman Dyos matxi' klonweye' toj kytzi b'alun ex oso, ex chin tkla'ye' tema' pilistey lu, chij.
Xi'tzun tma'n Sawul te:
—Kuna' txi'ya ex awt Qman Dyos txi' tuk'i'la, chij.

³⁸Xi'tzun tma'n Sawul tu'n tokq'o'n t-xb'alun Dab'i, kse'nxju'te nnajb'en toj q'oj ex tu'n tjax q'o'n jun toj twi' q'ank'uxb'il ex tu'n tokq'o'n jun kolb'ilte.³⁹Mankb'ilxitzun oktk'lo'n Dab'i k'uẍtx'e'nb'il tk'u'j, tu'ntzun tpaj min naq'litoq tu'n kyajb'en q'ojb'il lu tu'n, mixpe' b'enta' tb'et kyuk'i'l. Xitma'ntzuntz te Sawul:
—Lay b'ant nb'ete' kyuk'i'lju' lu, qu'n min naq'liqine', chij.
E'eltiq'i'ntzuntz ti'j,⁴⁰tzaj tiq'i'n tpa te xob'l, ex jaw t-sk'o'n jwe' tal ab'j q'ib'un kyi'j toj a', ex ku'x tq'o'n toju' tpa iq'i'ntoq tu'n, twab'atzuntib'tz twitzju' pilistey tuk'i'lju' tpa te xob'l tzyu'ntoq tu'n.⁴¹Ex Kolyat pilistey chab'a ttzaj lq'e tk'etz Dab'i. Nejli onilte twitz.⁴²Tetzunj tka'yinte pilistey Dab'i, ex tej tlonte qa tal ku'xun, ex tb'anil ka'yin, minxi' toj twinqil,⁴³ape' tma'nju' te:
—¿Ma tx'yanqine' teya, tu'n ttzaja b'yolweye' tu'n tze?, chij.
Ex tzaj ttxko'n toj twi' Dab'i toj tb'iju' tdyos.⁴⁴Expe' tzaj tma'n te:
—¡Kutzaja tza'lu, kxel nq'o'na te kychi' k'utz ex kychi' tojk'ul txkup!, chij te.⁴⁵Atzunte Dab'i xittzaq'we'n te:
—Tzula wi'je' tuk'i'l k'uẍtx'e'nb'il, ch'ut ex b'o'sch'ut, ayintzunwe' machinxe' ti'ja toj tb'i Qman Dyos nimtipumal, janqo nimana'ye', ayo'ye' xqo oktik'le'na.⁴⁶Kb'el q'o'na toj nq'ob'e' ja'lo tu'n Qman Dyos, ex texju' kmoj ja'lo kb'el nb'yo'na ex k'elel nk'uẍpi'ne' twi'ya, aye'tzu'n t-xjala te q'oj che kxe'lnq'o'ne' te kychi' k'utz ex kychi' tojk'ul txkup. Kykyaqiltzu'n xjal twitz tx'otx' k'elelkynik' qa aku'te Dyos ati toj Israel;⁴⁷kykyaqilju' ate'qe' tza'lu k'elelkynik' qa min nkolonte Qman Dyos tuk'i'l k'uẍtx'e'nb'il ex ch'ut. Te Dyoste' q'oj lu, qu'mtzun che b'elq'o'ne' ja'lo tu'n toj qq'ob'e', chij te.

⁴⁸Tzajtzun tzaqpaj pilistey ti'j Dab'i, ex ikxte Dab'i lwiyxi'x tb'inchatib' tu'n tq'ojin ti'j:⁴⁹ku'x tq'o'n tq'ob' toju' tq'ob'pa, ex jatztiq'i'n jun ab'j, xit-xontzuntz tu'n tpa te xob'l ex majx tplajku'xi'xu' pilistey aq'pona'. Majx xi' tawa'ntib' ab'j toju' tplaj ex pon joqpajtzuntz twitz tx'otx'.⁵⁰Ikytzu'n kub'a' ti'ju' pilistey tu'n Dab'i. Naq tu'n jun pa te xob'l ex tu'n jun tal ab'j kub'a' tb'yo'n. Tu'ntzu'n mixtoqti' tk'uẍtx'e'nb'il iq'i'n,⁵¹xi' ojqelan ti'ju' pilistey, ex eltiq'i'n tk'uẍtx'e'nb'il, jatztiq'i'n toj tja, tu'nxtzu'n kub'a' tb'ajsa'n. Tb'ajlenxi'tzun ja'lu, el ttx'e'mu'n twi'.
Tetzunj kyka'yinte aj Pilistya matxi'toq kyimu' kynejel b'a'nxi'x q'ojin, e'kub' oqtzuntz.⁵²E'b'jaw ẍch'intzun xjaltz aj Israel ex aj Juda, tu'n kyxi' q'ojil, eb'ajxlpe kyi'j tzmax ttxa'n tnam Kat ex ttzi nintnam Ekron. Nimtoq txqan xjal pilistey te q'oj kyimniqe'tl pak'a'jqe' toj tkyaqilju' b'e txi'x Saaraym tu'n tpon Kat ex Ekron.

⁵³Kyanjtzlenxi'tzu'n aj Israel knolte kyi'j, b'je'tz kyiq'i'n tkyaqilju' ti'xti' toju' kyxmuj pilistey.⁵⁴Tzajtzun tiq'i'n Dab'i twi' Kolyat toj Jerusalen, aye'tzu'n tq'ojb'il Kolyat e'xi' tiq'i'n toju' tpach.

⁵⁵Matxi'toqtzun txitqani'n Sawul te Ab'ner ju' nejenel kye t-xjal te q'oj, tej tka'yinte ikytoqu' tex Dab'i q'ojil tuk'i'l ma' nin pilistey, kjalu:
—Ab'ner, ¿alkye tmanju' ku'xun lu?, chij.

⁵⁶—Nimaqkawil, axxi'x min b'i'n wu'ne', chi Ab'ner xittzaq'we'n.
—B'inx natzuna alkye, chij te.

⁵⁷Qu'mtzun, tej tanjtzti'j Dab'i, tkub'lenxi' tb'yo'n Kolyat, expe' iq'i'nju' twi' tu'n, xi'k'le'n tu'n Ab'ner twitz Sawul,⁵⁸xi'tzun tqani'n Sawul te:
—Q'mantza weye', q'a, ¿alkye tmana? chij.
Xi'tzun ttzaq'we'n Dab'i te:
—Awe' nman Jese aj B'elen, ajb'el teya nimaqkawil, chij. Kyma Jonatan ex Dab'i jun kyyol tu'n kyok kyekyten.

¹Tb'ajlenxi'tzun yolin Dab'i tuk'i'l Sawul, kamiwkyib' Jonatan tuk'i'l Dab'i, ex e'ok kyekyten, naku'j kyitz'inkyib'.²Atzunte Sawul, kyej tiq'i'n Dab'i texju' q'ij lu te ajb'el te, ex mixti' anj ttzaqpi'n tja.³Atzunte Jonatan tuk'i'l Dab'i kyma jun kyol tu'n kyok kyekyten tejumajx, qu'n ok Jonatan b'a'n xjal te Dab'i kse'nxju' in tk'u'jla'ntib'.⁴Expe' eltiq'i'n Jonatan tpinpa't exu' t-xb'alun oksa'nktoq, ex e'xitq'o'n te Dab'i, kyuk'i'lxi' tk'uẍtx'e'nb'il, t-smaj ex tk'alb'il.

⁵Tye'k'u Dab'i tojtzqib'l ex tnab'l tu'nju' taq'un in b'entile tkyaqilxu' intoq xitma'n Sawul te, qu'mtzun okq'o'n te nejenel kyeju' xjal te q'oj. Ex b'a'n ela' toj kywitz kykyaqilu' t-xjal Sawul te q'oj exqe' nejenel kyxol. El i'k'o'n Dab'i tu'n Sawul

⁶Tetzunj tanjtzkyi'ju' xjal te q'oj, tkyimlenxi' Kolyat tu'n Dab'i, eb'je'tzju' qya kyojile nimaqkytanam aj Israel k'molte nimaqkawil Sawul, intoq che b'itzan ex nche b'ixin tuk'i'l tzalajb'il kyuk'i'l kychinab': chilchil ex txijtxij.⁷Tetzunj intoq che b'itzan ex intoq che b'ixin, intoq kyma'n:
Mache kyim kab'k'al lajnaq (1,000) tu'n Sawul, atzun junmutx' jo'k'al (10,000) tu'n Dab'i, chechij.

⁸Tzaj toj twitz Sawul tu'n tpaj, jawtma'ntzuntz tuk'i'l ttx'u'jil:
—In q'umli qa junmutx' jo'k'al (10,000) xjal xkyim tu'n Dab'i, atzunwe' naq o'kx kab'k'al lajnaq. (1,000) ¡Naq tu'n tok kyq'o'ntl te nimaqkawil ja'lo!, chij.

⁹Atxi'xtzunj el ik'o'n Dab'i tu'n Sawul.

¹⁰Te junq'ijtl, ulju' myab'a'n xewb'aj tu'n Qman Dyos tib'aj Sawul, ex oktojtwitz toju' tja te kawb'il. Intoq tchinb'a'n Dab'i arpa kse'nxju' ntb'incha'n, atzunte Sawul iq'i'ntoq tch'ut.¹¹Ex minab'en okmiltz'uj Sawul b'yolte Dab'i, kamajku' pon t-xyu'n twitz tapi tu'n tch'ut, naq ate' Dab'i tkoltib' te.

¹²Tzaj xob' Sawul te Dab'i, qu'n intoq oninjtz Dab'i tu'n Qman Dyos, atzunte matxitoq kyej tzaqpi'n.¹³Qu'mtzun el tlaq'b'a'n tk'etz, ex oktq'o'n te chaq'ul kye jun tnej xjal q'ojil, nejlitoq Dab'i kywitz ajkyex ex ajkyultl.¹⁴B'a'niletoq inela' taq'un Dab'i, qu'n o'ni'ntoq tu'n Qman Dyos.¹⁵Tzaj xob'xi'xtl Sawul te, tej tka'yinte b'anile tel Dab'i.¹⁶Kykyaqiltzunju' aj Israel ex aj Juda intoq che tzalajxi'x ti'j Dab'i, qu'n a Dab'i nk'ulkye ajkyex toj q'oj ex ajtanjtzkyi'j.

¹⁷Jun q'ij xitma'n Sawul te Dab'i:
—Kxe'l nq'o'ne' tnejel nmyale' Merab' te t-xu'jila, qama tz'oka nimaq q'ojil min xob' ex kq'ojila toju' q'oj te Qman Dyos, chij te.
Kub' t-xima'n Sawul qa myaku'te kb'el b'yonte Dab'i, xkyimku'witloj toj kyq'ob' pilistey.

¹⁸Atzunte Dab'i xittzaq'we'n:
—Mixti'we' woklen ex mixti' kyoklenju' toj njaye' kyxol aj Israel, tu'nwtlo woke' te tji nimaqkawil, chij.

¹⁹Tetzunj tpon tq'ijlalil tu'n txi' tq'o'n Sawul Merab' ju' tmyal te t-xu'jil Dab'i, mixti' xiq'o'ntl te, xi'xa'q'onatl te Adryel aj Meola.²⁰Atzuntlte Mikal, juntl tmyal Sawul, intoq laqj ti'j Dab'i. Tetzunj txi' q'ma'n te Sawul, tzalaj tej tb'inte,²¹qu'n kub' t-xima'n tu'n txi' tq'o'n te t-xu'jil Dab'i, naqxwitlo tu'n tkub' tz'aq Dab'i tu'n Mikal toj kyq'ob' pilistey. Xitma'ntzuntz tkamaji'n te Dab'i:
—K'okyelta te njiye' ja'lo, chij.

²²Tchaq'tzun Sawul kyeju' nche ajb'en te kjalu:
—Che yolinqeye' tuk'i'l Dab'i ex kymanxe' te qa ayine' nimaqkawil, nchin tzalajxi'xe' ti'j ex kykyaqilju' ajb'el weye' nche tzalaj ti'j, exqa ilti'j tu'n tok te njiye'.

²³E'xi'tzu'n ajb'el te Sawul q'malte tkyaqil ja'lu te Dab'i, atzunte Dab'i xittzaq'we'n kye:
—¿Ma naqch'i'n toklen toj kywitze' tu'n tok jun xjal te tji nimaqkawil kse'n ayine' prowqine' ex mixti' woklene'?, chij.

²⁴Exi'tzu'n ajb'el te Sawul q'malteju' tma Dab'i te.²⁵Atzunte Sawul, atoqna' tajb'ilju' tu'n tkub' tz'aq Dab'i toj kyq'ob' pilistey, xitma'n kye:
—Kymanxe' te Dab'i qa min nojqelan tu'n ttzaj tq'o'n kse'nxju' nkyb'incha'n xjal te twi' t-xu'jil, awe' wajb'il, ayine' nimaqkawil, tu'n ttzaj tq'o'n jo'naq (100) ttxo'w kypich' pilistey, tu'ntzun tok tu'me'l t-xel kye wajq'oje, chij.

²⁶Aye'tzunju' ajb'el te Sawul xikyma'nju' lu te Dab'i, ex b'a'n ela' toj twitz Dab'i noqxwitlo tu'n tok te tjiju' nimaqkawil. Na'mxtoqtzun tjapun tq'ijlalil kyejni b'entti'j,²⁷exi' Dab'i kyuk'i'lju' t-xjal te q'oj, ex e'kub' tb'yo'n lajnaq (200) pilistey; ex exi' tiq'i'n kytz'umal twi' kytz'a'lb'il teju' nimaqkawil, tu'n tok te tji. Xi'tzun tq'o'n Sawul Milka ju' tmyal te t-xu'jil Dab'i.

²⁸Tetzunj tka'yinte ex tej teltnik' Sawul qa intoq onin Qman Dyos tuk'i'l Dab'i exqa intoq k'u'jlanjtz tu'n Mikal ju' tmyal,²⁹tzaj xob'xi'xtl te Dab'i twitzju' tnejel, ex ok te tajq'oj tejumajx.³⁰Expe' tkyaqil maj ajkytzaju' kynejel pilistey toj q'oj, b'a'nxi'xtoq nela' tu'n Dab'i kyekywitz kykyaqil txqantl nejenel kye t-xjal Sawul te q'oj, qu'mtzun inxi'xtoq nimanjtz. Kub'toq tb'yo'n Sawul Dab'i

¹Tchaq' Sawul te Jonatan ju' tk'wal ex kye kykyaqilju' nejenel te q'oj tu'n tkub' kyb'yo'n Dab'i. Atzunte Jonatan, qu'n kyetoqna' kyten tuk'i'l Dab'i,²xitma'n tqanil te, kjalu:
—Intjyo'n nmane' tu'me'l tu'n tkub' b'yo'na tu'n. Qu'mtzun tz'ewana najchi'j ja lay kneta'ya.³Chin tzajele' tuk'i'l nmane', ja tu'me'l ta'ya. Ex chin yolile' tuk'i'l ti'ja, kxe'l nma'ntzuntze' teya titi' kb'ajel, chij.

⁴Yolintzun Jonatan tuk'i'l tman ti'j Dab'i. Xitma'n te:
—Nimaqkawil, lalun tb'incha junta taq'wix ti'ju tmajina Dab'i, qu'n mixti'te taq'wix matxi' tb'incha teya, nim pe'na'te b'a'n matxi' tb'incha;⁵taq'u' tchwinqlal tu'ntkub'ti'ju' Kolyat, ex kyim tu'n, ikytzu'n kleta' tkyaqilju' tnam Israel tu'n Qman Dyos. Tilna'ta nimaqkawil, ex tzalaja tu'n tpaj. ¿Tiqu'ntzun tajb'ila'ya tu'n tkub' tb'yo'na Dab'i, extzun mixti' til?, chij te.

⁶Tej tb'aj tb'i'n Sawulju' tu'me'l tz'aqlixi'x tma Jonatan, tmatzuntz:
—Lu Qman Dyos nka'yin, lay kyimte Dab'i, chij.

⁷Tzajtzun txko'n Dab'i tu'n Jonatan ex xitma'n tkyaqilju' b'aj kyoli'n. Yajxi'tzuntel xitiq'i'n twitz Sawul ex ajb'en junmajtl te kse'nxju' tnejel.

⁸Ttzaj jumajtlju' q'oj, ex etz Dab'i q'ojil kyi'ju' pilistey ex kub'kyi'j tu'n, nim e'kub'tb'yo'n, ex txqantl e'kub' oq.⁹Atzuntlte Sawul, ul yajb'aj jumajtl tu'nju' myab'a'n xewb'aj chq'o'n tu'n Qman Dyos, q'uqlitoq tja ex tzyu'nju' tch'ut, intoqtzun chinb'an Dab'i,¹⁰xit-xon jumajtlju' tch'ut ti'j Dab'i. Atzunte Dab'i lwiy el jutzpaj, xi'pona'tlu' ch'ut twitzja. Textzu'n qonik'an lu etz oq Dab'i.¹¹Lwiyxi'xtzun tchaq' Sawul kyeju' t-xjal tu'n kyxi' xq'uqilte Dab'i tja, ex tu'n tkub' kyb'yo'n te prim te juntl q'ij. Atzunte Mikal ju' t-xu'jil Dab'i, xitma'n te:
—Qa min soqa texju' qonik'an ja'lo, kb'el b'yo'na najchi'j, chij te.

¹²Extzun q'o'n Dab'i ti'j aqwil toj tokexspik'un tu'n Mikal, kub'tzun oq Dab'itz.¹³Ex tzaj tiq'i'n Mikal jun witzileb' ex okxtq'o'n toj kuẍb'il, okxtq'o'n jun tq'axwe tzmal chib', ex jax t-sku'n jun xb'alun tib'aj.¹⁴Tetzunj tchaq' Sawul kyeju' t-xjal tu'n ttzyet Dab'i kyu'n, xitma'n Mikal kye qa yab'toq.¹⁵Atzunte Sawul e'xitchq'o'n jumajtl jyolte Dab'i, ex xitq'o'n chaq'b'il kye:
—¡B'a'ntzunqa yab' kyiq'imitze' ex kyiq'intze' tza'lu tu'n tkub' nb'yo'ne'!, chij.

¹⁶E'okxtzu'n t-xjal Sawul toj tja Dab'i, ex o'kxte' witzileb' exju' t-smal chib' knet kyu'n.¹⁷Xitma'ntzun Sawultz te Mikal:
¿Tiqu'n ẍin kub'a' t-sb'u'na, ex matxittzaqpi'na wajq'oje?, chij.
Xi'tzun ttzaq'we'n Mikal:
—Qu'n ttziya qatoq chin kb'el tb'yo'ne' qa min sex ntzaqpi'ne', chij.

¹⁸Iktzu'n tzaqpaja' Dab'i. Xi'tzuntz tk'etz Samwel toj Rama, ex xitma'n te tkyaqilju' matxi'toq tb'incha Sawul ti'j. Exi'tzun Dab'itz tuk'i'l Samwel najal toj tnam Nayot.¹⁹Tetzunj tb'inte Sawul qa atoqtzu' ta' Dab'i Nayot toj Rama,²⁰e'xitchq'o'nju' t-xjal tzyulte. Tetzunj kyponju' t-xjal Sawul, xikyka'yi'n jun tnej t-sanjelal Dyos nche yolin ti'ju' ntzaj tma'n Dyos kye, a Samwel nejenel kye. O'kx tkub' tenju' t-xew Dyos kyib'aju' t-xjal Sawul, ex ikxkye e'aq'wi yolil ti'ju' ntzaj tma'n Dyos.

²¹Tetzunj tb'inte Sawul, xitchq'o'n jun tnejtl xjal, ex ikxkye e'aq'wi yolil ti'ju' ntzaj tma'n Dyos. Toj toxmaji'n xit-sma'n Sawul jun tnejtl xjal, ex ikx b'aj ju' kyi'j.²²Aku'tzun Sawultz xi' Rama, tetzunj tpon tk'etz jun nin tkb'el a' toj Seku, xitqani'n jatoq ta'qe' Samwel ex Dab'i. Ex xijask'u'n te qa atoqtzu' ta'qe' toj Nayot te Rama,²³xi'tzuntz atzu'. Ex ikxte kub' t-xew Qman Dyos tib'aj ex aq'wi yolil ti'ju' ntzaj tma'n Qman Dyos, ex xitljo'n tb'e tzmax Nayot te Rama;²⁴expe' eltiq'i'nju' ti'j, ex b'aj q'ij ex qonik'an ẍb'iqli nyolin ti'ju' ntzaj tma'n Qman Dyos, twitz Samwel. Atzuntzu' tzaja' qeju' yol nq'umli: ¿Ma axtzun junte Sawul sanjelal?. Onin Jonatan ti'j Dab'i

¹Etz oq Dab'i toj Nayot te Rama, xi'tzuntz jatoq ta' Jonatan, qanilte te:
—¿Titi' matxi' nb'inchaye'? ¿Titi' npaje'? ¿Titi'ju' wile' matxi' nb'inchaye' twitz tmana, tu'nju' inchin tjyo'ne' tu'n nkub' tb'yo'ne'?, chij te.

²Xittzaq'we'n Jonatan te:
—¡Awt Qman Dyos myonte! ¡Lay kub' b'yo'nta tu'n! B'i'na'ta tu'n qa mixti' jun ti'xti' intb'incha'n nmane', qa mixwitti' saj tma'n weye'. ¿Ti'wttzunlo kb'ela' tewi'n nmane' weye'? ¡Layna'te' ikju'!, chij te.

³Xi'tzun tma'ntl Dab'i:
—B'i'na' tu'nte tmana qa b'a'n qten tuk'i'la, exlo min tajb'il tu'n tb'inteya tu'n mitzaja' jun q'oj kyxole'. ¡Lu Qman Dyos in ka'yin axxi'x naq in nelje wi'je'!, chij.

⁴Xi'tzun tqani'n Jonatan te:
—¿Ti'tzun tajb'ila tu'n nb'inchanteye'?, chij.

⁵Atzunte Dab'i xittzaq'we'n:
—Najchi'jna' tq'ij ak'a'j xjaw ex qotenb'il toju' wan tuk'i'lju' nimaqkawil. Qu'mtzun, q'om oxe' q'ija weye' tu'n wewane',⁶qatzun machin tzajtqani'ne' tmana, q'manxa te qama txinqani'n anb'ile' teya, qu'n ntoq ojqelanxi'x tu'n nxi'ye' toj ntaname' B'elen, kykyaqilju' toj njaye' nkub' kyik'sa'n ninq'ij tu'n tq'et chojb'il atl junjun ab'q'i.⁷Qama ttzaq'we b'a'ntzunlotz, kqeb'iltzun nk'u'jtze'; qatzun matzajttx'u'jil, k'eleltzun tnik'tza qa tajb'il tu'n tb'inchante jun taq'wix weye'.⁸Qu'mtzun b'inchama xtalb'il, ajb'el qinpena'we' teya expe' oje kyej b'entti'j qu'n twitz Qman Dyos tu'n qten toj b'a'nil. Qatzun ayine' tinpaje' chin tb'yonku'ya. Mya' ilti'jtz tu'n nxi' tiq'i'na twitz tmana, chij te.

⁹Xi'tzun ttzaq'we'n Jonatan:
—¡Lalun kub' t-xima'na ikju'! Qa manb'iwe' qa ikt-xim nmanjuye' ti'ja, kxel nma'we' teya, chij te.

¹⁰Xi'tzun tqani'n Dab'i te:
—¿Alkyetzu'n tzul q'malte weye' qa min xkub' toj twitz tmana?, chij.

¹¹Xitmantl Jonatan te:
—Qo'ya wuk'i'le' toj kojb'il, chij.
Xi'tzun kyk'le'kyib'tz,¹²atzuntzu' xa' tma'na' Jonatan te:
—Lu Qman Dyos nka'yin qa najchi'j mo kab'j, qloqxja'lu, knb'iye' titi' nt-xima'n nmane' ti'ja, tzultzun nsma'n tqanile' teya;¹³qatzun tajb'il tu'n tb'inchante taq'wix ti'ja, extzun min xinma'n teya ex lay chin nonine' ti'ja, tz'e'ysanjtzku'wej nwitz. ¡Ex awt Qman Dyos tz'oninteya kse'n sonin ti'j nmane'!.¹⁴Qatzun itz'qinxe' toju' tq'ijlalil lu, b'inchama xtalb'il weye' kse'nxju' xtalb'il ntk'mo'na te Qman Dyos. Qatzun nchin kyimkuye',¹⁵ka'yinqexch'inta toj njaye'. ¡Aye'tzu'n tajq'oja che kyimxwit, ex awt Qman Dyos q'onte tu'me'l t-xel kye! chij.
Iktzu'n xa'ttziya'n Jonatan te Dab'i,¹⁷ex tu'nju' kyexi'x kyten Jonatan tuk'i'l Dab'i, nakuj kyitz'inkyib', kyej tma'nxi'xtl tu'n tjapunju' tyol.¹⁸Tmatzuntz:
—Najchi'j, ninq'ij tq'ij ak'a'j xjaw, mixna' a'lo'x kb'el qe toju' tq'a'jtza, mixloti'xte k'elela'ya.¹⁹Tojixi'tzunlo toxi'n q'ij k'elelxi'x tnik'tzila. Qu'mtzun, kutxi'ya ewal jaxju' ewana'ya jumaj, ex atzu' tenku'ya tk'etzju' jun b'yuj ab'j.²⁰Kxe'l nxone' oxe' talsmaj toju' plaj lu, naku'xwitloj nchin xnaq'tzanwib'e' tu'n nnik'u'ne' b'a'nxi'x,²¹kxe'l nma'ntzuntze' teju' nmajine': kutxi'ya jyolkyeju' talsmaj, nchiku'ye'. Qama txinma'ne' te: Xi' ta'qe' nqaku'ch'i'ntl tza'lu; lwix iq'inqe'tza', qa nchije' te. B'a'ntzun tetzuntza, qu'n mixti'te nb'aj. Axxi'x, nxinma'ne' teya twitz Qman Dyos.²²Qatzun matxinma'ne' te: Xi' ta'qe'ju' talsmaj max chix, qa nchije' te, Kutxi'tzuntza qu'n tajb'il Qman Dyos tu'n toqa.²³Qu'n twitzku'te' Qman Dyos qtziyaya' qyol kyejni b'entti'j, chij te.

²⁴Xi'tzun Dab'i ewal toj kojb'il, tetzunj tponju' tq'ij ak'a'j xjaw, kub'qeju' nimaqkawil wal ti'j mes.²⁵Kub' qe twitz ja, jaxu' nkub'a' qe. Atzunte Jonatan kub' qe twitz, atzunte Ab'ner ttxlaj Sawul. Atzunju' tq'uqb'il Dab'i mix-a'lo' kub' qe toj.²⁶Mixti'te Sawul tma toju' q'ij lu, qu'n kub' t-xima'n qa b'aj tz'ilix tu'n jun ti'xti' exqa tu'nju' lu laytaq ten.²⁷Ex ikx toj tkab' q'ij teju' ninq'ij, mix-a'lo'x kub' qe toj tq'uqb'il Dab'i. Xitqani'ntzun Sawultz teju' tk'wal:
—¿Tiqu'n mixti' ulju' tk'wal Jese wal ewi ex ja'lo?, chij²⁸Atzunte Jonatan xittzaq'we'n:
—Tzaj tqani'n Dab'i anb'il weye', qu'n nojqelanxi'x tu'n txi' B'elen.²⁹Kub'san weye' tu'nt-xi' nq'o'ne' anb'il tu'n txi', qu'n nkub' kyik'sa'n toj tja jun chojb'il toj ttanam ex tchaq'ju' ttzik tu'n txi'. Expe' tzaj tma'n weye' qatoq kxe'l xb'etzalkyeju' twitze'l. Qu'mtzun mixti' xkub' qe wal tuk'i'la nimaqkawil, chij.

³⁰Tzajtzun ttx'u'jil Sawul ti'j Jonatan, ex tma:
—¡Tal ttxu tx'yan! ¡chita qa min b'i'n wu'ne' qa kyexi'x ttena tuk'i'lu' tk'wal Jese, ma min nche ch'ixwiye' tuk'i'l ttxuya!.³¹Qa min xb'ajte' ichan lu twitzju' tx'otx', nneljeti'ja tuk'ilju' tkawb'ila tu'n. ¡Qu'mtzun chq'onxa tjoyli ex q'intza, qu'n ati tu'n tkyimte' lu!, chij te.

³²Atzunte Jonatan xittzaq'we'n te:
¿Tiqu'ntzun kkyimela'? ¿ti'tzu'n matxi' tb'incha?, chij.

³³Oktzun t-xnik'cha'n Sawul tk'uẍtx'e'nb'il ti'j Jonatan. Kanetzuntz toj twitz qa a tajb'il tmanju' tu'n tkub' tb'yo'n Dab'i.³⁴Jawtzun we' Jonatan ti'j mes tuk'i'l ttx'u'jil, ex mixti' wan ti'ju' wab'j toj tkab' q'ij, qu'n ojexi'x b'isun ti'j Dab'i, ex matxi'toq tz'ok q'o'n ttx'u'jil tu'n tman.³⁵Tetzun prim te jun q'ijtl, ex Jonatan tuk'i'l jun tmajin ku'xunx toj kojb'il tojxu' kmuj b'entniti'j kyu'n tuk'i'l Dab'i,³⁶tchaq'tzuntz te:
—Kutxi'ya ojqel jyolkye talsmaj kxe'l nxone', chij.
Xi' ojqelantzun majentz, atzunte Jonatan xi't-xon jun talsmaj kuw, tu'n tpon tz'aq najchaq.³⁷Tetzunj tponju' majen ja kub'a' tz'aqu' talsmaj, xit-ẍch'in Jonatan kuw teju' tmajen:
—¡Xi'ta'qekye' talsmaj max chij!, chij.

³⁸Xit-ẍch'i'n jumajtl Jonatan teju' tmajin:
—¡Lwixi'x kutxi'ya, lalun kub' we'ya!, chij.
Jawtiq'i'n tmajin Jonatan talsmaj ex tzaj tiq'i'n teju' tajaw,³⁹ex mixti' eltniky' ti'j, qu'n o'qekxkye Jonatan ex Dab'i b'ilteju' techlal.⁴⁰Yajxi'tzuntel e'xitq'o'n Jonatan taq'unb'il te q'oj teju' tmajin ex xitma'n te tu'n kyxitiq'i'n toj nintnam.

⁴¹Naqtzun nb'ent tanjti'ju' majin, etz Dab'i ti'jxi' jun b'yoj ab'j, ex majx kub'joqe oxmaj twitz Jonatan. B'ajtzun kychle'nkyib', eb'aj oq' ex okkyma'tzi'nkyib', ojexi'x kub' toq'je'n Dab'i.

⁴²Yajxi'tzuntl xitma'n Jonatan te Dab'i:
—Kutxi'ya toj b'anil, qu'n toj tb'i Qman Dyos oje qmaya' qyol, ex oje txiqqani'n te tu'n tten quk'i'l tejumajx, ex kyuk'i'lju' tyajajila ex kyuk'i'lju' we', chij te.
Kub'tzun b'etz tu'n Dab'i, atzunte Jonatan anjtzti'j toj nintnam. Oq Dab'i te Sawul

¹Xi' Dab'i Nob', ka'yilteju' pale Aymelek, jaw lab'ti ti'j tej tetz k'lulte, ex xitma'n te:
—¿Se'n taq'witzun naq tjunala saja, ex mix-a'lo' saj tuk'i'la?, chij.

²Atzunte Dab'i xittzaq'we'n te:
Machin tzajchq'o'ne' b'inchal jun ti'xti' tu'n nimaqkawil, ex matzaj tma'n weye' qa mix-a'lo' juntl tu'n tb'inte titiqu'n ẍin tzaja' tchq'o'ne', ex titi'ju' chaq'b'il saj tma'n weye'. Aye'tzu'n ichan ate'qe' tjaq' nkawb'ile' makyej nma'ne' kye jatu'n qmujb'ante qib'e' kyuk'i'l.³B'a'nxpelo atiya, ¿titi' qwa ati tuk'i'la? Q'ontz jwe'we' nwa, mujqa ti'jxku' matz'elyal tu'na, chij.

⁴Xi'tzun ttzaq'we'n pale:
—Atite wab'j wuk'i'le', naq a mya wab'jxi' kse'n nkywan xjalxi', qu'n xjansa'n. Kxe'l nq'o'nwe' teya, naq a qa jk'u'nkyib'ju' ichan k'le'nqe' tu'na, tu'n mitxa' kytzyu'na' qya, chij.

⁵Xi'xi'xtzun ttzaq'we'n Dab'i te:
—Tkyaqil maj ajqexe' q'ojil min qotenqe' kyuk'i'l qya. Maskyepe' mya toj okslab'lu' qb'eye' lu, iqa'nxi'xti'j kyu'nkye' ichan atxi'x xqo tzaje', mitzunloyate' ja'lo, chij.

⁶Xi'tzun tq'o'n paleju' wab'j xjansa'n te Dab'i, qu'n o'kxtoq wab'ju' ate'toq xjansa'nqe' twitz Qman Dyos, expe' a q'iju' e'jaw q'i'n tib'aju' q'olb'eb'l, tu'n kykub' q'et kyxel ak'a'j.⁷Tojtzunju' q'ij lu atitoq jun tmajin Sawul, ju' ojetoq kyejten toju' ja xjan. Atoq Doew aj Edom, nejenel kye k'ik'lel kye talu'n Sawul.

⁸Xitma'n Dab'i te Aymelek:
¿Ma ati jun ch'ut mujqa jun k'uẍtx'e'nb'il tuk'i'la? Naq a mixti'x xtaq' anb'il tu'n kytzaj wi'nju'ye' nk'uẍtx'e'nb'ile' ex jte'tl nq'ojb'ile', qu'n inxi'xtoq ojqelan tu'n tb'inchet tchaq'b'ilju' nimaqkawil, chij.

⁹Xi'tzun ttzaq'we'n pale te:
Ati jun, aju' tk'uẍtx'e'nb'il Kolyat, ju' pilistey kub'ti'j tu'na toju' b'ya' Ela. Lu ati na'tz ti'jxi' ẍay, ptzo'n toj jun pinpa't. B'a'n tu'n t-xitiq'i'na qa ati tajb'en teya, qu'n o'kxte atiju' nk'etze', chij.
Xitzun ttzaq'we'n Dab'i:
Q'ontzna'ya, qu'n ate b'a'nxi'xju' kyekywitz txqantl, chij.

¹⁰Ax q'iju' lu kub' oq Dab'i twitz Sawul, ex xi' yek'ultib' te Akyis, nimaqkawil toj Kat.¹¹Aye'tzu'n nejenel kye t-xjal Akyis te q'oj xikyma'n te:
—¡Ma mitzunya Dab'i ja'lu, ajb'el te Sawul, ju' nimaqkawil toju' tx'otx' lu! ¡Anate intoq b'itzanjtzu' kyu'n b'ixil kjalu: kab'k'al Jo'naq (1,000) ichan xkub' tb'yo'n Sawul, atzun junmutx' jo'k'al (10,000) xkub' tb'yo'n Dab'i!, chechij.

¹²Jaw ximan Dab'i ti'ju' ntoq q'manjtz ti'j, ex xob' te Akyis nimaqkawil toj Kat.¹³Qu'mtzun, oktq'o'ntib' naku'j nnoktojtwi', naq tak'a'n okten sqitulkye tjpel ja, ex aq'wi ẍeriyil.¹⁴Xi'tzun tma'n Akyis kyeju' nejenel kye t-xjal te q'oj:
—¿Qama tz'okkyka'yi'ne' nnoktojtwi' ichan lu, tiqu'n saja' kyiq'ina'ye'?¹⁵¿Ma ntzun nojqelan jun nnoktojtwi' weye', tu'nju' saj kyiq'i'ne' xjal lu, tu'n tb'inchante chaqju' toj twitz toj njaye'?, chij.

¹Ik'b'et Dab'i atzu', ex xi' oq toju' jyom toj Adulam. Tetzunj kyb'inteju' ttzik exqe' twitze'l, exi' tk'etz.²Ex kymujb'a kyib' kykyaqilju' xjal yaju'nqe' tuk'i'l, ex kykyaqilju' atitoq kyk'as ex kykyaqilju' mixtoqti' nche tzalaj, ok Dab'i te nejenel kye. Qape'lo junk'al (400) ichan ate'toq tuk'i'l.

³Exi'tzun Dab'itz Mispa, toj Moab', ex xitma'n teju' nimaqkawil toj Moab':
—B'inchama xtalb'il, q'ontza anb'il tu'n kykyajten nmane' ex ntxuye' kyuk'i'le' tzmaxi'j ajnb'inteye' titi' ktb'incha' Dyos weye', chij.

⁴Iktzu'n exi' tiq'ina' Dab'i tman twitzju' nimaqkawil toj Moab', e'najantzuntz tk'etzu' nimaqkawil lu toj tkyaqilju' tq'ijlalil tej tten Dab'i toju' ja te kolb'il.⁵Xi'tzun tq'o'n Kad, ju' t-sanjelal Dyos, tnab'l Dab'i:
—Lalun kyajtena toju' ja te kolb'il. Kutxi'ya toju' kytx'otx' aj Juda, chij te. Xi'tzun Dab'itz ex pon toju' k'ul Eret. Eb'ajkub' b'yo'n Pale toj tnam Nob'

⁶Atzunte Sawul atoqtzu' ta' Wib'ea, q'uqlitoq t-xe jun tze tamarisko tb'i twi' witz xjan, tzyu'ntoqju' tch'ut ex txoli'nkyib'u' nejenel kye t-xjal ti'j. Atzunj tb'inte qa matxi'toq che knet Dab'i kyuk'i'lju' t-xjal,⁷xitma'n kyeju' tmajin txolchi qe'toq ti'j:
—Kyb'intzpe'ye', tyajajil B'enjamin: ¡Ma oktzun xe'ltq'o'n tk'wal Jese kytx'otx'e' ex kyawale' tqan ub'a te kykyaqile' toj kywitze', exqa kykyaqile' che okyel q'o'ne' tu'n te chaq'ul ex nejenel kye xjal te q'oj!⁸Kykyaqilxe' matxi' muje kytziye' wi'je', qu'n mix-a'lo' matxi' tzajxi' q'mante weye' qa kyejni b'entti'j jun kyolju' nk'wale' tuk'i'lju' tk'wal Jese; mix-a'lo' junkye' matxi'wt b'ajx tk'u'j wi'je'; mix-a'lo' jun saj q'mante weye' qama tz'oktq'o'n nk'wale' jun nmajine' tu'n tq'ojin wi'je', kse'n ntb'incha'n ja'lo, chij.

⁹Xi'tzun ttzaq'we'n Doew, aj Edom, ju' atitoq kyxolju' nejenel kye t-xjal Sawul, kjalu:
—Wilwe' tk'wal Jese tej tpon toj Nob' yolil tuk'i'lju' pale Aymelek, tk'wal Aytub'.¹⁰Xjelun Aymelek te Qman Dyos ti'j Dab'i, ex xitq'o'n twa exju' tk'uẍtx'e'nb'il Kolyat pilistey te, chij.

¹¹Tchaq'tzun nimaqkawil tu'n txi' txokb'aju' pale Aymelek ex kykyaqilju' pale toj Nob', twitze'lqe'x. Tetzunj kyb'ajpon twitzju' nimaqkawil,¹²xitma'n Sawul te Aymelek:
—Chin tb'itza b'a'nxi'x tk'wal Aytub', chij.
—Luqine' lu tu'n wajb'ene' teya nimaqkawil, —chi Aymelek xittzaq'we'n.

¹³Xi'tzun tqani'n Sawul te:
¿Tiqu'ntzun xjawa' kyiq'i'n kyib'e' tuk'i'l tk'wal Jese wi'je'? Xitq'o'na twa ex jun tk'uẍtx'e'nb'il, ex xjeluna te Dyos ti'j, naqx tu'n tjaw miltz'uj wi'je' ex tu'n kyb'aj tchmo'n t-xjal toj ewaj tu'n kyok tzaqpaj wi'je', kse'n ntb'incha'n ja'lo, chij.

¹⁴Xi'tzun ttzaq'we'n Aymelek te nimaqkawil.
—¿Alkyetzun jun kyxol kykyaqilju' nejenel kye t-xjala te q'oj majx okslalxi'x te Dyos kse'nte Dab'i, expena' tjiya nimaqkawil, ex nejenel kyeju' xq'uqilteya, expe' nnimanjtz toju' tkawb'ila?¹⁵¿Ma tzmatzun tnejel maj nchin kub'sane' te Dyos ti'j Dab'i? ¡Mikxa'te'! Lalun kub' t-xima'n jun ti'xti'ya wi'je', ex kyi'ju' toj njaye', qu'n mixti'we' b'i'n wu'n ti'ju' ti'xti' lu, chi Aymelek te.

¹⁶Atzunte nimaqkawil xi'tma'nxi'xtl:
—¡B'inku'ya Ayimelek, kkyimela kyuk'i'l kykyaqilju' twitze'la!, chij.

¹⁷Tchaq'tzun nimaqkawiltz kyeju' t-xjal inche xq'uqinte:
—¡Che kyb'yonku'ye' tpale Qman Dyos! Qu'n aye'x junkye' ate'qe' tuk'i'l Dab'i, b'i'ntoq kyu'n qa intoq newin Dab'i, ex min tzaj kyma'n weye', chij kye. Aye'tzu'n xq'uqilte mixti' aq'pon kyq'ob' kyi'ju' tpale Qman Dyos.¹⁸Xi'tzun tma'n nimaqkawiltz te Doew aj Edom:
—¡B'yonqe'ku'ya!, chij te. Oktzun tzaqpaj Doew b'yolkye pale, kyajnaq jwe' (85) ichan tok kyẍa'y sed e'kub' tb'yo'n toju' kmuj lu.¹⁹Ex okx toj Nob', ninkytanam pale, e'kub' tb'yo'n ichan, qya, k'wal, exqepe' tal ne'ẍ tu'n k'uẍtx'e'nb'il. Ex eb'aj Kub' tb'yo'n tman wakx, b'ur ex rit.²⁰Atzun jun tk'wal Aymelek, Ab'yatar tb'i xi' oq toju' q'ojtib'il, ex pon tzmax jata' Dab'i.²¹Xitma'ntzuntz te Dab'i qa matxi'toq che b'aj Kub' tb'yo'n Sawul tpale Qman Dyos,²²atzunte Dab'i xittzaq'we'n te:
—Kub'x nximante'ye' toju' q'ij lu, qa oktoq kxe'l tma'n Doew te Sawul. Tu'n npaje' matxi' che kub' b'yo'na' kykyaqilju' toj tjaya.²³Ja'lo, tenkja wuk'i'le' ex lalun xob'a, qu'n alkyete tajb'il tu'n tkub' b'yonteya, tnejel ati tu'n nkub' tb'yo'ne'. Mixti'te kb'ajel ti'ja, chij te. Tkol Dab'i nintnam Kyeyla

¹Jun q'ij e'q'ojin pilistey ti'ju' nintnam Kyeyla ex b'ajx kyelq'a'nju' triy akxtoq tb'aje'l toj er. Tetzunj txi' q'ma'nju' lu te Dab'i,²xi' qanilte te Qman Dyos, ikjalu:
—¿Ma b'a'n toj twitza tu'n nxi'ye' q'ojil kyi'ju' pilistey?, chij.
Atzunte Qman Dyos tzaj ttzaq'we'n:
B'a'nte', q'ojina kyi'j ex klomju'ya nintnam Kyeyla, chij.

³Aye'tzu'n t-xjal Dab'i xi'kyma'n te:
—¡Xob'ajilxpena' ato'qo' tza'lu toj Juda, mitzunloyate' qo'x q'ojil kyi'ju' pilistey toj Kyeyla!, chechij.

⁴Xi'tzun tqani'n jumajtl Dab'i te Qman Dyos, atzunte Qman Dyos tzaj ttzaq'we'n:
—Kutxi'ya toj Kyeyla, qu'n che kb'el nq'o'nwe' pilistey toj tq'ob'a, chij.

⁵Exi'tzun Dab'itz kyuk'i'lju' t-xjal toj Kyeyla, eq'ojintzuntz kyi'ju' pilistey atzu', majx e'mankun kyu'n ex eb'je'l kyiq'i'n jumajtlu' wakx kye. Iktzu'n ekleta'ju' xjal aj Kyeyla tu'n Dab'i.

⁶Atzunte Ab'yatar, ju' tk'wal Aymelek, kub' oq tu'n tmujb'antetib' tuk'i'l Dab'i toj Kyeyla, ex majx xitiq'i'nju' Ẍa'y.⁷Matxi'toqtzun txiq'man te Sawul qa atoqtzu' ta' Dab'i toj Kyeyla, ex kub' t-xima'n: Matxi' kub' q'o'n toj nq'ob'e' tu'n Dyos, tu'nju' matxi' tz'okx toj nintnam, matxi' kyej tjpu'ntib' kyoju' tjpel tnam, chij.

⁸Tchaq'tzun Sawultz tu'n kyb'ajtzaj kykyaqilju' t-xjal te q'oj tu'n kyb'ajx Kyeyla tu'n tok kytxoli'n kyib' kyi'j Dab'i kyuk'i'lu' t-jal.⁹Tetzunj tb'inte Dab'i qa intoq ximan Sawul tu'n tq'ojin ti'j, xitma'n teju' pale Ab'yatar tu'n ttzaj tiq'i'nju' ẍa'y tu'n txi' tqani'n te Qman Dyos.¹⁰Ex xitma'n Dab'i:
Nman Dyos, ayine' tmajena manb'iye' qa tzul Sawul xitulte tnam Kyeyla naq tu'npaje'.¹¹¿Ma tzultzu'n Sawul jyolweye' kse'nxju' matxi' nb'iye'? ¿Ma oklo chin xel q'o'ne' toj tq'ob' kyu'n xjal najlqe' toju' tnam Kyeyla? ¡Taye, Kydyos aj Israel, inkub'sa'ne' teya tu'n ttzaj tma'na! chij.
Atzunte Qman Dyos tzaj ttzaq'we'n:
—Tzulte' Sawul, chij.

¹²Xi'tzun tqani'ntl Dab'i:
—¿Ma ktzulo chin xel q'o'ne' kyuk'i'lju' nxjale' toj tq'ob' Sawul kyu'n xjal najlqe' toj Kyeyla?, chij.
Atzunte Qman Dyos tzaj ttzaq'we'n:
—Che xe'lq'o'ne' toj tq'ob', chij.

¹³E'etztzun Dab'itz kyuk'i'lju' t-xjal toj Kyeyla, qapelo junk'al lajnaq (600) kyb'aj, e'xi'tzuntz ex mixti'xte b'i'n jatu'n kypona'. Tetzunj tb'inte Sawul qa matxitoq tz'ex oq Dab'i toj Kyeyla, min ok iltl tu'n txi' jyolte. Najan Dab'i toj chq'ajlaj

¹⁴Iktzu'n kyajtena' Dab'i najal toj pik te kolb'il twi' jun witz toju' chq'ajlaj Sip, b'a'ntzunqa ntoq neltjoyli tkyaqil q'ij tu'n Sawul, min taj Qman Dyos tu'n tkub' tz'aq toj tq'ob'.¹⁵Tuk'i'lxi'petzunju', intoq xob' Dab'i te Sawul, qu'n matxi'toq tz'etz Sawul jyolte tu'n tkub' tb'yo'n. Qu'mtzun kyejten Ores, toju' chq'ajlaj Sip.

¹⁶Jun q'ij xi' Jonatan tk'wal Sawul toj Ores, kuwsalte tk'u'j Dab'i ex tu'n tqe tk'u'j ti'j Dyos.¹⁷Ex xitma'n te:
—Lalun xob'a, qu'n lay knetta tu'n Sawul ju' nmane'. Ana'ta k'okyel te nimaqkawil toj Israel, ayintzunwe' chin okyel te tkab' kawil. B'i'ntlpenate' lu tu'n nmane', chij te.

¹⁸Kyajtzun b'entti'j jun yoltz kyxol kykab'il, ex a Qman Dyos kub' kyq'o'n tztiyalte. Anjtzun Jonatan tja, atzunte Dab'i kyejten toj Ores.¹⁹Aye'tzu'n xjal aj Sip exi' toj Wib'ea yolil tuk'i'l Sawul, ex xikyma'n te:
—Lute' Dab'i nnewin toj qtx'otx'e' kyoj junjun kolb'il kuwsa'n twi' witz Akyila, toj Ores toj tnayajkya'j te chq'ajlaj.²⁰Qu'mtzun qama kub' t-xima'na nimaqkawil tu'n ttzaja jyolte, b'a'n tu'n tb'inchanteya, kxe'l qq'o'nqe' toj tq'ob'a, chechij.

²¹Xi'tzun ttzaq'we'n Sawul kye:
—¡Awt Qman Dyos ky'iwlankyeye' tu'n matzaj laqj kyk'u'je' wi'je'!²²kxe'l nkub'sa'ne' kyeye' ja'lo tu'n kyxi'ye' ka'yilte jatu'me'lxi'x ta', ex alkye oje ka'yinte atzu', qu'n oje tzaj q'ma'n weye' qa majx tx'yan tuk'i'l.²³Kyka'yinxe' b'a'nxi'x jachaqja ta'ju' tewb'il, kukytzajtzuntze' q'malte weye' ja tu'me'l ta'xi'x, chin xe'ltzuntze' kyk'etze'. Qatzun axxi'x atzu' ta' toju' kytx'otx'e', knjya'ye' chab'a' kyxolju' tyajajil Juda, chi Sawul.

²⁴Kyej q'olb'e'ntzun Sawultz kyu'n xjal aj Sip ex anjkyi'j toju' ninkytanam. Aye'tzunkye Dab'i kyuk'i'lju' t-xjal atoqtzu' ta'qe' Maon, toju' plan tx'otx' toj tnayajkya'j teju' chq'ajlaj,²⁵exi'tzun Sawul kyuk'i'lju' t-xjal jyolte Dab'i. Atzunte Dab'i tej txiq'ma'n te, ku'x ewil twitzju' xaq ati toj chq'ajlaj Maon. Ex tej tb'inte Sawul, xi' toju' chq'ajlaj Maon knolte Dab'i.²⁶Ljo'ntoq kyxi' Sawul kyuk'i'lju' t-xjal toj jun plaj teju' witz, atzu'n toj jun plajtl ljo'ntoq kyoq Dab'i kyuk'i'lju' t-xjal. Tetzunj matxi'toq b'aj ktxolb'a'n kyib' Sawul kyuk'i'lu' t-xjal kyi'jile Dab'i, ex ch'inxtltoq kytzyet kyu'n,²⁷o'kx tpon jun sanjelal q'malte te Sawul:
—¡Kutanjtz ti'ja ja'loxi'x nimaqkawil, qu'n matxi' che b'ajponju' pilistey toju' qtanam!, chij te.

²⁸Mixtzunti' ok iltl Sawul knolteti'j Dab'i, xi'tzuntz q'ojil kyi'ju' pilistey. Qu'mtzun okq'o'n tb'iju' najb'il lu pik te aq'pub'l. Exch'yon tchwinqlal Sawul te Dab'i

²⁹Exi'tzun Dab'itz najal kyoju' kolb'il kuwsa'nqe' toj En-kadi.¹Tetzunj tanjtzkyi'j Sawul q'ojil kyi'j pilistey, xiq'ma'n te qa atoqtzu' ta' Dab'i toju' chq'ajlaj En-kadi.²Jawtzun t-sk'o'n Sawul wuqk'al lajnaq (3,000) ichan kyxol kykyaqil aj Israel, exi'tzuntz jyolkye Dab'i kyuk'i'lju' t-xjal twitz xaq wa'lxi'x kywitz.³Intoqtzun che b'et, tej kypon kyk'etz junjun ch'laj rit, atitoq jun jyom nqayin kyk'etz, jatoq nche ewana' Dab'i kyuk'i'lju' t-xjal. Okxtzu'n Sawul k'u'jal toju' jyom lu,⁴xi'tzun kyma'n t-xjal Dab'i te:
—Ma japun tyol Qman Dyos toju' q'ij ja'lo, ju' tzaj ttziya'n teya qa kb'eltq'o'n tajq'oja toj tq'ob'a. B'inchamtzuna ja'lo aju' tajb'ila, chechij. Jawtzun we' Dab'i ex chab'a' eltjon jun piẍ tpinpa't Sawul;⁵telenxi'tzun tjon tzaj tb'is,⁶xitma'ntzuntz kyeju' t-xjal:
—¡Awt Qman Dyos tzyunweye' tu'n lalun tzaq'pon nq'ob'e' ti'ju' wajawe' nimaqkawil! ¡Ate nimaqkawil, qu'n a Qman Dyos jaw sk'onte!, chij.

⁷Iktzu'n e'tmaqa' Dab'i t-xjal tu'n miche oka' tzaqpaj ti'j Sawul, atzunte Sawul etz toju' jyom ex xitljo'n tb'e.⁸Textzunju' kmuj lu etz lpe Dab'i ti'j, ex xiẍch'in te:
—¡Nimaqkawil, nimaqkawil!, chij.
Anjtztzun ka'yin Sawul ti'jxi', atzunte Dab'i kub' meje majx kub'joqe twitz tx'otx',⁹ex xitma'n te:
—¿Tiqu'n nxa' tb'ina kyol xjal?, mixna' ti'we' nxim taq'wix ti'ja.¹⁰Tz'elku' tnik'a ti'j nimaqkawil, makub' q'o'na toj nq'ob'e' tu'n Qman Dyos toju' jyom, mixti' xkub' nb'yo'na, makyej nq'o'na tu'n tanq'ina, qu'n qa nimaqkawilta, a Qman Dyos jaw sk'onteya.

¹¹Ka'yintzpe'ya nimaqkawil ti'ti' iq'i'n wu'ne': jun piẍju' tpinpa'ta, ex tu'nte' lu ma'wtlo kub' nb'yo'na. Tu'ntzun teltnik'a qa myawe' nxim tu'n nb'inchante taq'wix ti'ja mo tu'n njaw miltz'uje' ti'ja, ex b'ajx chin nel txalpuja'we' twitza. Atzunta nimaqkawil toka ljoltonq'ije' tu'n nkub' tb'yo'na'.¹²¡Alo Qman Dyos ka'yilte alkye atitpaj qxol, ex kjel nq'o'ne' toj tq'ob'. Ayintzunwe' milo najchi'j tu'n taq'pon nq'ob'e' ti'ja nimaqkawil.¹³Ati jun yol nq'umli: Kyu'nju' b'inchal myab'a'n ntzaja'ju' il; qu'mtzun milo najchi'j tu'n taq'ponwe' nq'ob' ti'ja nimaqkawil.¹⁴Expe', ¿alqi'j matxi' tz'etza'ya nimaqkawil aj Israel q'ojil? ¿Alkye ljo'n toj tq'ij tu'na? ¡Ayine', naku'j jun kyimni tx'yanqine', mo naku'j ky'aq qine'!¹⁵Qu'mtzun awt Qman Dyos b'inchante tten qxol qkab'il; ¡awt mlonweye' qa ati wile' ex klonweye' toj tq'ob'a nimaqkawil!, chij te.

¹⁶Tetzunj tb'aj yolin Dab'i, jawẍch'in Sawul:
¡Ape'loya Dab'i, nky'ajul, nyolitza!, chij.
O'kx tjaw oq',¹⁷xitma'n te:
—Mixti'ta til, b'a'nju'ta matxi' tb'incha weye' te t-xelju' myab'a'n matxi' nb'inchaye' teya.¹⁸Matyek'uya ja'lo qa tajb'ila tu'n tb'inchanteya b'a'n weye', qu'n mana' chin kub'q'o'ne' toj tq'ob'a tu'n Qman Dyos ex min ẍinkub' tb'yo'na.¹⁹Ja' axxi'x, mixna' a'lo'te jun ajwit tel yalju' tajq'oj tu'n, laywit kub' tb'yo'n. Qu'mtzun awt Qman Dyos q'onte tu'me'l t-xel teya tu'nju' b'a'n xtb'inchaya weye' ja'lo!²⁰Matxi' tz'el nnik'e' ja'lo qa aya k'okyel te nimaqkawil, exqa k'elelb'a'n kawb'il toj Israel toj tq'ob'a.²¹Q'mantztzun jun tyola twitz Qman Dyos qa lay che kub' tnajsa'na nyajajile' exqa lay kub' tnajsa'na nb'iye' kyxolju' toj njaye', chij.²²Xi'tzun ttziya'n Dab'i te Sawul qa ktb'incha' ikju', anjtzun ti'j Sawultz toju' tja te kawb'il, atzunte Dab'i kyuk'i'lju' t-xjal exi' toju' kolb'il kuwsa'n. Kyim Samwel

¹Tej tkyim Samwel, kykyaqilu' aj Israel b'aj kyb'u'yi'n kyib' ex eb'aj oq' ti'j. Ku'x kymqu'n toju' tja toj Rama. Xi'tzunte Dab'itz toju' chq'ajlaj Paran. Jun b'aj kyxol Dab'i tuk'i'l Ab'ikayl

²Atitoq jun ichan nimaq q'inun toj Mayon, atitoq wuqk'al lajnaq (3,000) trit ex kab'k'al lajnaq (1,000) tchib', atitoq tk'a'ẍ toju' nintnam Karmel, ja nche' tjona' ti'j trit.³Nab'al tb'iju' ichan lu, tyajajil Kaleb'; majxtoq kuwju' xjal ex mya'l. Atzunte Ab'ikayl ju' t-xu'jil, tb'anil ka'yin ex atitoq tnab'l.

⁴Tetzunj atitoq Dab'i toj chq'ajlaj, tb'i qa atoqtzu' ta' Nab'al toj Karmel njon kyi'j trit, exi' tchq'o'n lajoj tmajin ex xitma'n kye tu'n t-xikyq'olb'e'n Nab'al toj tb'i,⁶ex tu'n t-xikyma'n tqanil te kjalu: Awt Qman Dyos k'iwlanteya ntzik kyuk'i'lju' toj tjaya ex tkyaqilju' ati teya.⁷Manb'iye' qa njon kyi'j rita. Ex b'i'nlo tu'na qa atzu' ẍetena' tk'ik'lela toj Karmel quk'i'le', mixti'te sel qiq'i'ne' kye ex mixti' xqb'inchaye' kye.⁸Qaninx pe'ya kye, kxel kyma'nxi'xtl teya. Qu'mtzun nchin kub'sane' teya tu'n ttzaj q'aq'an tk'u'ja kyi'ju' ku'xun lu, ex luqe' che pon tojku'xi'xju' tq'ijlalil, o'yintz ch'i'nqe' qwa mo qk'wa'ye titi' ati tuk'i'la, qu'n machin oke' naku'j tk'wala, chij.

⁹Exi'tzunju' tmajin Dab'i ex xikyma'nju' sanjelj te Nab'al, ex e'kyajten ayolte tzaq'web'l.¹⁰Atzunte Nab'al xittzaq'we'n kye:
—¿Alkyetzu'n Dab'i? ¿Alkyexi'xtzu'n tk'wal Jese? ¡B'a'npunqe'kye' k'a'yi'nmajin inche oq kywitzju' kyajaw toju' tq'ijlalil ja'lo!¹¹¿Ma oktzun kxe'l nq'o'nwe' kywa, kyk'wa' ex kychi'ju' jol kyi'j nrite' kyeye', min wojtzqi'nqe'ye' ex jalo tzajniqe'loye'?, chij.

¹²Anjtzun kyi'ju' tmajin Dab'i, tetzunj kypon tk'etz Dab'i, xikytx'olb'a'n tkyaqilju' tyol Nab'al te.¹³Tchaq'tzun Dab'itz kyeju' t-xjal:
—¡Kyiq'ime' kyq'ojb'ile' kykyaqile'! chij.
Oktzun kyk'lo'n t-xjal kyk'uẍtx'e'nb'il kyk'u'j, ex ikxte Dab'i; junk'al (400) ichan eb'ajx tuk'i'l, aye'tzun lajnaqtl (200) e'kyajten xq'uqilkyeju' kyiq'in.¹⁴Xi'tzun jun tmajin Nab'al q'malte te Ab'ikayl ju' t-xu'jil Nab'al:
—E'tzaj tchq'o'n Dab'i jte' sanjelal q'olb'elte qajawe', tzmax e'tzaja' tchq'o'na' toj chq'ajlaj, atzunte qajawe' mixya tu'me'lju' tyol xitma'n kye.¹⁵Extzun aye'ju' ichan lu majx b'a'n xjalqe' qeye' toj tkyaqilju' tq'ijlalil ob'ete' kyuk'i'l toj kojb'il, mixti' taq'wix kyb'incha qeye' ex mixti'te selkyiq'i'n qeye'.¹⁶Ape' kyb'inchaju' o' xq'uqinjtze' kyu'n q'ijtl ex qonik'an kyuk'i'lju' qrite'.¹⁷Tu'ntzu'n taq'wixi'x txkup xjalju' tchmila ex mixti'x nb'a'nt qyolin tuk'i'l, ximanku'ya ex ka'yinxa titi' tu'n tb'inchanteya, qu'n tzulte' taq'wix ti'j ex qib'aj, chij te.

¹⁸Ju'mtzun tzaj tiq'i'n Ab'ikayl lajnaq (200) wab'j, kab'e' tz'u'n b'in, jwe' rit k'a'sa'n, qapelo kab'naq (40) litr triy wensi'n, jo'naq (100) muqin ub'a tzqijsa'n, ex lajnaq (200) muqin iw tzqijsa'n; ex b'jax tq'o'ntzuntz kyi'j b'ur,¹⁹xitma'ntzuntz kye tmajin:
—Kukynejpune', atzun chinxwe' ch'imu'stltel, chij. Ex mixti' xitma'n te tchmil.

²⁰Jax Ab'ikayl ti'j jun b'ur, ex chab'a' tku'tz jutzun tk'u'j witz. O'kx txi' tka'yi'n xi'toq ttzaj Dab'i kyuk'i'lju' t-xjal k'lulte, xi'tzuntz k'molkye.

²¹Intoqtzun ximan Dab'i nb'et qa mixti'x soka' tu'nju' ojetoq t-xq'uqi tkyaqilju' atitoq te Nab'al toj chq'ajlaj, ex mixti' eltiq'i'n jun ti'xti' te, atzunte Nab'al taq'wixju' tu'me'l t-xel tu'n, tu'nju' b'a'n tb'inchate.²²Qu'mtzun ttziya: ¡Awt Qman Dyos tz'e'ysante nwitze' kuw qa minti' ẍeb'aj kykyaqilju' toj tja Nab'al wu'ne' ja'lo ex najchi'j!, chij.

²³Naqtzun nb'ent t-xitka'yi'n Ab'ikayl Dab'i, ku'tz ti'ju' tb'ur ex majx kub'joqe twitz tx'otx' te jun ninb'il,²⁴ex xitma'n te:
—¡Kub'xwit tz'aqu' il lu wib'aje', taye! B'inchama xtalb'il, q'ontza anb'il tu'n nyoline' tuk'i'la, tu'ntzun tb'inteya chik'b'ab'l wu'ne'.²⁵Lalun txitb'i'na Nab'al, mixyab'a'nte' ichan lu, chilo qa kjawil nima'n kyu'n xjal tu'nju' xtb'incha, wichiqa xnak. Kukxte'tu'n mixti'x tnab'l. Mixti'we' ẍewilju' tmajina ẍepon tchq'o'na, ayine' ajb'el teya.²⁶Expena' myab'a'n toj twitz Qman Dyos tu'n tula b'iyol tu'nku' tq'ob'a ex tu'n tela junx tuk'i'l. ¡Taq'xwit Dyos tu'n kyb'aju' tajq'oja kyuk'ilju' noktilil kyu'n tu'n tb'o'lja, kse'n kb'ajela' Nab'al!²⁷Atzu'n ja'lo kxe'l nkub'sa'ne' teya, tu'n t-xit-sipa'na oyaj saj wiq'i'ne' teya kyxolu' tmajina ate'qe' tuk'i'la,²⁸ex najsama wile' ayine' ajb'el teya. Kna' tenb'elta toju' kawb'il tu'n Qman Dyos kyuk'i'lju' tyajajila, qu'n inq'ojina toj tb'is tk'u'j Qman Dyos, ex lay tzaj jun taq'wixil ti'ja toj tkyaqilju' tchwinqlala,²⁹Qa a'lo jun maq'ojin ti'ja mujqa makub' t-xima'n tu'n tkub'yo'na tu'n, xq'uqi'na'ta b'a'nxi'x tu'n Qman Dyos. Aye'tzunkye' tajq'oja che elex xon tu'n Qman Dyos, kse'n ajkyxi xon ab'j tu'n pa te xob'l.³⁰Ajtzun kyjapu'n tkyaqilju' b'a'n oje tma Qman Dyos teya, ex ajtok q'o'na te nejenel tib'aj Israel,³¹mixti' tu'n ttzaj tb'isa ex mixti' tu'n tul toj tk'u'ja qa ma'wt che kub' tb'yo'na xjal mixti' kyil, mujqa ma'wt taq'a tu'me'l t-xel tu'nku' tq'ob'a. Qu'mtzun ajtkanb'ana tu'n Qman Dyos, a chin tna'tz ch'iwe', ayine' ajb'el teya, chij te Dab'i.

³²Xi'tzun ttzaq'we'n Dab'i te:
—Ajwalinjtzxwit Qman Dyos, saj chq'onteya k'lulweye' ja'lo,³³ex k'iwlanjtzxwita tu'nju' nximana, qu'n machin mqete' tu'na tu'n michin b'yona' xjale', ex tu'n mitz'oka' t-xel wu'ne' tu'nku' nq'ob'e'.³⁴Lu Qman Dyos nka'yin, machin tmaqa tu'n lalun nb'inchaye' taq'wix ti'ja, naqwit min soktilil ch'i'ntl tu'na tu'n ttzaja k'lulweye', mixwitloti' juntl ichan itz' toj tja Nab'al najchi'j, chij Dab'i te.

³⁵Xi'tzun ttzyu'nju' pon tiq'i'n Ab'ikayl te, ex xitma'n te:
—Chab'a' txi'ya toj b'anil tjaya. Mana' tila matxinb'i'ne' tyola saj tchik'b'a'na weye', ex knb'incha'ye' saj tqani'na, chij.³⁶Tetzunj tanjtzti'j Ab'ikayl jatoq ta' Nab'al, intoq ttzalajsa'n Nab'al jun ninwan kse'n twa nimaqkawil tja. Intoq tzalajxi'x ex b'a'n tx'ujtenil. Qu'mtzun mixti'te Ab'ikayl xitma'n te tzmaxi' tojxi' jun q'ijtl.³⁷Tetzun prim te juntl q'ij, matxi'toq tz'el toj twi' Nab'al, xitchik'b'a'n Ab'ikayl te tkyaqilju' matxi'toq b'aj, atzunte Nab'al naq myanim tzaj jun tyab'il ex majx kyej skanix.³⁸Tb'ajlenxi'tzun lajoj q'ij, tzaj q'o'nxi'xtl yab'il ti'j tu'n Qman Dyos ex majx kyim.³⁹Tetzunj tb'inte Dab'i qa matxi'toq kyim Nab'al, tma:
—¡Ajwalinjtzxwit Qman Dyos, qu'n matxi' taq' tu'me'l t-xel tu'nju' tb'incha Nab'al weye'! ¡Machin tmaqe' tu'n lalun nb'inchaye' jun taq'wix, ex ax Nab'al xchjonte til!, chij.
Yajxi'tzuntel xit-sma'n Dab'i jun tqanil te Ab'ikayl tu'n kymje.⁴⁰Tetzunj kypon tmajin Dab'i Karmel tu'n kyolin tuk'i'l Ab'ikayl, xikyma'n te:
—Maqotzaj tchq'o'ne' Dab'i tuk'i'la, qu'n tajb'il tu'n toka te t-xu'jil, chechij.

⁴¹Atzunte Ab'ikayl majx kub'joqe twitz tx'otx' te ninb'il, ex xittzaq'we'n:
—Naqna' jun tal majin qinwe' te Dab'i, ex luqine' lu tu'n tel ntx'jo'ne' ti'j kyqanju' tmajin, qama tchaq' weye', chij.

⁴²Tb'ajlenxi'tzun tma'n tyol lu, lwiyxi'x aq'wi b'inchal tib', ex jax ti'j jun b'ur kyuk'i'l jwe' tmajin qya, e'ik'lpetzuntz kyi'ju' tmajin Dab'i, mjetzuntz tuk'i'l Dab'i.

⁴³Ex mje Dab'i tuk'i'l Aynoam aj Jesreel, kykab'il e'ok te t-xu'jil.⁴⁴Atzunte Sawul ojetoq txitq'o'n Mikal ju' tmyal, ju' t-xu'jil Dab'i, te Palti tk'wal Lays aj Kalim. Exch'yon tchwinqlal Sawul te Dab'i

¹Exi' junjun xjal aj Sip q'malte tqanil Dab'i te Sawul toj Kib'ea, xikyma'n te: Atzu' nnewana' te Dab'i twi' witz Akyila tu'me'lju' chq'ajlaj, chechij.

²Xi'tzun Sawultz kyuk'i'l wuqk'al lajnaq (3,000) xjal te q'oj kuwqe'xi'x kyxol aj Israel toju' chq'ajlaj Sip jyolte Dab'i.³Kub'ten twi' b'o's witz Akyila, ttx'u'ku' b'e nnik' ttzi chq'ajlaj. Tetzunj atitoq Dab'i toj chq'ajlaj, tb'i qa intoq jyon Sawul ti'j tzmaxtzu',⁴e'tzajtzun tchq'o'n nenul toj ewaj ex tb'inte qa ax matxitoq pon Sawul.⁵Yajxi'tzuntel xi' japona' Sawul ex b'aj tka'yi'n b'a'nxi'x ja nche wtana' Sawul tuk'i'l Ab'ner, tk'wal Ner, ju' nejenel kye xjal te q'oj. Ex til atoqtzu' nwtana' Sawul tojxi'ju' xmuj, txoli'nkyib'u' t-xjal ti'jile.⁶Yolintzun Dab'itz tuk'i'l Aymelek, ju' itit ex tuk'i'l Ab'isay, tk'wal Saruya ex titz'in mo ttzik Joab', xitqani'n kye:
—¿Alkye ktq'a'tib' tu'n tku'x wuk'i'le' toju' xmuj tzmax jata' Sawul kyuk'i'lju' t-xjal?, chij.
—Chin b'elexwe' tuk'i'la, chi Ab'isay xittzaq'we'n:

⁷Textzu'n qonik'an lu, exi' Dab'i tuk'i'l Ab'isay toju' t-xmuj Sawul. Intoq wtan Sawul toju' xmuj, txpo'nku'xju' tch'ut toj tx'otx' tk'etz twi'. Kuẍliqe'toq Ab'ner kyuk'i'lju' xjal te q'oj ti'jile Sawul.⁸Xi'tzun tma'n Ab'isay te Dab'i:
—Matxi' kub' tq'o'n Qman Dyos tajq'oja toj tq'ob'a. Q'ontza anb'il weye' tu'n tkub' nb'yo'ne' ja'lo, kb'el nxyu'ne' twitz tx'otx' tu'nxu' tch'ut. Naq tu'n junxte' ajtaq'pon, chij.

⁹Atzunte Dab'i xitma'n te:
—Lalun kub' tb'yo'na, qu'n alkyete matzaq'pon tq'ob' ti'ju' nimaqkawil sk'o'n tu'n Qman Dyos, tzul tz'e'ysb'il twitz.¹⁰Lu Qman Dyos nka'yin, ate kb'el b'yonte Sawul, qa ajtpon kmuj tu'n tkyim mujqa ajtex q'ojil.¹¹Awt Qman Dyos myonweye' tu'n lalun kub' nxima'ne' tu'n tkub' nb'yo'ne' nimaqkawil sk'o'n tu'n. O'kxte' ch'ut q'intza exju' jun xar a' ati tk'etzu' tq'axwe, qo'tzuntza, chij te.

¹²Ikytzu'n ela' tiq'i'n Dab'i ch'ut exu' jun xar a' ate'toq tk'etz tq'axwe Sawul, exi'tzuntz. Mix-a'lote ka'yinkye ex b'inkye; mix-a'lo' tzaj tna'ntib'; kykyaqil ntoq che wtan, qu'n majx e'kyim tu'n watl tu'n Qman Dyos.¹³Tb'ajlenxi'tzun ja'lu ik'x Dab'i jlajxi' b'ya', twi' jun witz, najchaqinx kyxol.¹⁴Tzaj ẍch'intzuntz kuw te Ab'ner ex kyeju' xjal te q'oj:
—¡Na'ntztib'a Ab'ner!, chij.
Atzunte Ab'ner tzaj ttzaq'we'n:
¿Titi' toklena tu'nju' ntzaj ẍch'ina teju' nimaqkawil?, chij.

¹⁵Xi'tzun tma'n Dab'i te:
—¿Ma myatzunju'ya ichan q'uq'lixi'x tk'u'ju' nimaqkawil ti'ja toj Israel? ¿Se'ntzun taq'wi min ntxq'uqi'na nimaqkawil ju' tajawa? Matz'okx jun t-xjalilxa tu'n tkub' tb'yo'n.¹⁶Myab'a'n xtb'inchaya. Lu Qman Dyos nka'yin, b'a'n tu'nkykyime', qu'n na'mx kyxq'uqinteye' nimaqkawil jaw t-sk'o'n Qman Dyos. ¡Jyonxpe'ya tch'ut nimaqkawil exu' jun xar a' atitoq tk'etzu' tq'axwe, qama tz'el yal tu'na!, chij.

¹⁷Tetzunj teltnik' Sawul teju' yolin Dab'i, tma:
¡Ma aju'ya Dab'i, nky'ajul, nyolintza!, chij.
Atzunte Dab'i xittzaq'we'n:
—Ayinna'tzune', nimaqkawil.¹⁸¿Tiqu'ntzun ljo'na' toj nq'ije' tu'na nimaqkawil, ayine' ajb'el teya? ¿Ti'tzu'n myab'a'n xnb'inchaye'? ¿Titi' wile'?¹⁹B'inchama xtalb'il, nimaqkawil, chin tb'itza ayine' ajb'el teya: qama txitk'mo'n Qman Dyos jun oyaj, atzuntz xjaw iq'inteya nimaqkawil, tu'n tq'ojina wi'je'; qatzun tnab'l ichan ja'lu, tzajxwit taq'wixil kyib'aje' tu'n Qman Dyos. Qu'n machin etz kyxla'ja'ne' toju' tx'otx' te Qman Dyos, ex tu'nju' lu nchinx kychq'o'ne' tu'n wajb'ene' kye txqantl dyos.²⁰Min wajb'ilwe' tu'n tkub' qojl nchk'ele' najchaq ti'j Qman Dyos, ¡atzunta nimaqkawil, matz'etza naku' jyol ky'aq, ex lepchoka wi'je' kywi'witz naku'j kse'n njyet jun xlak'uk'!, chij te.

²¹Atzunte Sawul tma:
—¡Dab'i, nky'ajul, ayinwe' matxi' chin b'inchan il! ¡Matxi' chin okye' mixti' nnab'le', matxi' chin nelyale' toj nchuksb'ene'! Kutanjtz ti'ja, lay nb'inchantlwe' teya, qu'n matyek'uya tk'u'jlalila toju' q'ij lu, chij te.

²²Atzunte Dab'i xittzaq'we'n:
Luju' tch'uta lu nimaqkawil, kuttzaj junju' tmajina iq'ilte,²³awttzun Qman Dyos q'onte tu'me'l t-xel teyile junjun kse'nxju' tb'inchb'aj. Mapena' kub' q'o'na nimaqkawil tu'n Qman Dyos toj nq'ob'e', min saq'ponwe' nq'ob' ti'ja, qu'n aku'te xjaw sk'o'nteya.²⁴Ikxwittzu'n kse'nwe' xnb'incha teya ja'lo nimaqkawil, ikxwittzunwe' lalun taj Qman Dyos tu'n toktz'aq jun ti'xti' wi'je', chi Dab'i.²⁵Jawtzuntma'n Sawultz:
¡K'iwla'nxwita Dab'i, nky'ajul! ¡Che b'entel ti'xti' nimaq kyoklen tu'na ex tkyaqilju' ktb'incha'ya k'elelb'a'n! chij.
Anjtzun Sawultz tja, atzunte Dab'i xitljo'n tb'e. Ten Dab'i toj kytx'otx' pilistey

¹Tu'npetzunju', Intoq ximan Dab'i: Ilti'jlo chin b'el tb'yo'nwe' Sawul. Qu'mtzun ma'lo chinx oqe' toj kytanan pilistey tu'ntzun ntzaqpaje' toj tq'ob' ex tu'n lalun jyontl wi'je' toj tkyaqilju' tx'otx' Israel, chij.²Exi'tzun Dab'itz kyuk'i'lju' junk'al lajnaq (600) ichan ate'toq tuk'i'l tu'n kyxi' ajb'el te Akyis, tk'wal Maok nimaqkawil toj Kat.³Najantzun Dab'i kyuk'i'lju' t-xjal toj Kat, tk'etz Akyis, teyile junjun kyuk'i'lju' toj tja. Exi' tiq'i'n Dab'i kab'e' t-xu'jil, Aynoam aj Jesreel, ex Ab'ikayl t-xu'jilb'en Nab'al te Karmel.⁴Tetzunj tb'inte Sawul qa ojetoq txi' oq Dab'i toj Kat, mixti' xi'tl q'ojil ti'j.

⁵Xi'tzun tma'n Dab'i te Akyis:
—Qa b'a'n toj twitza nimaqkawil, tu'n ntene' tza'lu, nchin kub'sane' teya tu'n ttzaj tq'o'na anb'il tu'n nnajane' toj junju' nimaqttanama, qu'n myab'a'n tu'n nnajane' ayine' ajb'el teya toju' nintnam te tkawb'ila nimaqkawil, chij.

⁶Textzu'n q'ij lu, xitq'o'n Akyis nintnam Siklaj te Dab'i. Qu'mtzun majx kyej tenju' tnam lu toj tkawb'il Juda.

⁷Jun ab'q'i tuk'i'l kyaje' xjaw najan Dab'i toj kytx'otx' pilistey.⁸Intoq xi' kyuk'i'lju' t-xjal iq'imilte tkyaqilju' ati kye aj Kyesur, aj Kyeser ex aj Amalek, ju' matxitoq b'et ab'q'i najli qe'toq toju' tx'otx' xi'nix tu'me'l Sur, ex pomnix Ejipt.⁹Intoq q'ojin kyi'ju' xjal najlqe'toq toju' tx'otx' lu, ex majxtoq inche kub' tb'yo'nju' ichan ex qya. Ex intoq che'x tiq'i'nju' rit, wakx, b'ur, kamey exqepe' xb'alun. In nanjtztzun ti'jtz jata' Akyis,¹⁰atzunte Akyis intoq xitqani'n te: ¿Alkye tnam matxi' b'je'tz ti'na toj?, chij te. Atzunte Dab'i intoq xittzaq'we'n: Toj tnayaj Juda, mujqa Toj tnayaj Jerameel, mujqa Toj tnayaju' kytx'otx' kyenit, chij.

¹¹Majxtoq kykyaqilx nche Kub' tb'yo'n, e'ichan ex qya, tu'n lalun txi' jun q'malte toj Kat, ti'ju' ntb'incha'n. Ikytzu'n tb'incha Dab'i toj tkyaqilu' tq'ijlalil tej tnajan toj kytx'otx' pilistey.¹²Atzunte Akyis ju' nimaqkawil, q'uqlitoq tk'u'j ti'j Dab'i, ex ntoq t-xima'n: Xi' kyelxi'x tik'o'n Dab'i aj Israel, tu'ntzunju' lu k'ajb'el weye' kukxju', chij.

¹B'aj kyb'u'yi'n pilistey kyxjal te q'oj toju' tq'ijlalil lu tu'n kyq'ojin kyi'j aj Israel, ex xitma'n Akyis te Dab'i:
—B'i'na' tu'na qa ati tu'n texa wuk'i'le' kyuk'i'lju' t-xjala q'ojil, chij.

²Xi'tzun ttzaq'we'n Dab'i te:
—Iknatzu'n. Oktzun tla'ya ja'lo nimaqkawil aju' nb'ent wu'ne' ayine' ajb'el teya, chij.
Xi'tzun tma'ntl Akyis te:
—Qana'tzun ikju', k'okyel nq'o'na tejumajx nejenel kyeju' xq'uqilweye', chij. Xi' Sawul jyolti'j tk'etz jun qya ajpkab' aj Endor

³Ojetoqtzun kyim Samwel toju' tq'ijlalil lu, ex kykyaqil aj Israel ojetoq kub' kyoq'je'nju' tkamik, ex ojetoq ku'x kymqu'n toj Rama, ju' ninttanam. Atzunte Sawul ojetoq che ex t-xla'ja'n ajpkab' exqe' txkol xewb'aj toju' tx'otx'.

⁴B'aj kyb'u'yi'n kyib'ju' pilistey ex kub' kyq'o'n kyxmuj toj Sunem, ex ikxte Sawul eb'aj tb'u'yi'n aj Israel ex b'aj kynk'u'nkyib' Kilb'oa.⁵Tetzunj t-xitka'yi'n kyxmuj pilistey, b'aj xob' b'a'nxi'x ex majx oktchi ti'j.⁶Xjeluntzuntz te Qman Dyos, atzunte Qman Dyos mixti' tzaj ttzaq'we'n te toj witzik', ex tu'n Urim ex kyu'nju' t-sanjelal.⁷Qu'mtzun tchaq' kyeju' nejenel kye t-xjal:
—Kyjyome' jun qya txkol kyanmi kyimni, tu'n nxi'ye' jyol wi'je' tk'etz, chij.
Xi'tzun kytzaq'we'n nejenel kye t-xjal te:
—Ati jun qya toj Endor nche ttxko'n kyanmi kyimni, chechij.

⁸Eltzun tch'ixpu'n Sawul t-xb'alun, ex oktq'o'n junxi'tl, xi'tzuntz kyuk'i'l kab'e'tl ichan tk'etzju' qya lu te qonik'an. Ex xitma'n te:
—B'inchama xtalb'il jyoma titi' tzul wi'je', ex tu'n ttzaj ttxko'na tanmiju' kxe'l nma'ne' teya, chij.

⁹Xi'tzun ttzaq'we'nju' qya te:
—B'i'n tu'na ti'ju' tb'incha Sawul, eb'je'tz t-xla'ja'nju' nche jyon kyi'j xjal exqe'ju' nche txkon anmi. ¿Titiqu'n nchinxa tq'o'na'ya toj q'aq'?, chij te.

¹⁰Atzunte Sawul xitma'n te toj tb'i Qman Dyos, ikjalu:
—Lu Qman Dyos in ka'yin, mixti' jun ti'xti' taq'wix k'ik'el ti'ja tu'nju' lu, chij.

¹¹Xi'tzun ttzaq'we'nju' qya:
—¿Alkyetzu'n tajb'ila tu'n ttzaj ntxko'ne'?, chij.
—Txkontza Samwel, chi Sawul.

¹²O'kx myanim xitka'yi'n qya Samwel, jaw ẍch'intzuntz; ex xitma'n te Sawul:
—¡A pe'loya Sawul! ¿Tiqu'n ẍin kub'a' t-sb'u'na?, chij.

¹³Atzunte' nimaqkawil xitma'n te:
Lalun xob'a. ¿Ti'tzu'n nxitka'yina?, chij.
Xi'tzun ttzaq'we'nju' qya te:
—Nxi' nka'yine' jun dyos njatz toj tx'otx', chij.

¹⁴Xitzun tqani'n Sawul te:
—¿Se'n ka'yin?, chij.
Atzunju' qya xittzaq'we'n:
—Jun tijwnaq tok tpinpa't, chij.
Kanetzuntz toj twitz Sawul qa a Samwel, ex majx kub'joqe twitz tx'otx'.¹⁵Xi'tzun tma'n Samwel te:
—¿Tiqu'n nniplaja'ya tu'nju' nchin tzajttxko'na?, chij te.
Xi'tzun ttzaq'we'n Sawul:
—Ana' inxi'x chin b'isune', qu'n nche q'ojin pilistey wi'je' extzun matxi' chin kyej tleb'a'ne' Qman Dyos. Mixti' nchin tzaj ttzaq'we'ntle' kyu'nelju' sanjelal ex toj witzik'. Qu'mtzun matzajntxko'na, tu'n ttzaj tma'na weye' titi' tu'n nb'inchanteye', chij.

¹⁶Atzunte Samwel xittzaq'we'n te:
—¿Tiqu'n ntzaja' tqani'na weye', extzun matxi' kyej leb'a'na tu'n Qman Dyos ex matxi' tz'ok te ajq'oj ti'ja?¹⁷Matxi' senjtza tu'n Qman Dyos kse'nxju' tzaj tma'n teya wu'nele'. Matxi' tz'el tiq'i'nju' kawb'il teya ex matxi' txitq'o'n teju' tuk'i'la Dab'i,¹⁸Mixnati' xitnima'na tchaq'b'il Qman Dyos, ex min xjapunju' xitma'n teya tu'n kykub' tb'ajsa'na aj Amalek. Qu'mtzun matxi' tzaju' lu ti'ja.¹⁹Expe' kxel q'o'na tuk'i'lju' tnam Israel najchi'j toj kyq'ob' pilistey tu'n Qman Dyos. Ex najchi'j che tenb'ele' nk'etze' kyuk'i'lju' tk'wala. Ex che b'el tz'aqju' aj Israel te q'oj tu'n Qman Dyos toj kyq'ob' pilistey, chij.

²⁰Majxtzun kub' tz'aq Sawul twitz tx'otx', tnuqexi'xtoq. B'aj xob' b'a'nxi'x tu'nju' tyol Samwel, majx tzaj numj, extzun na'mxtoq twan tb'aj q'ij ex tb'aj qonik'an.²¹Tetzunj tka'yinteju' qya matxi'toq yupj tuk'i'l Sawul, xi' lq'e tk'etz ex xitma'n te:
—Ayine' ajb'el teya, matxi' nb'inchaye' saj tma'na. Majxpe' matz'elu' nchwinqlale' tink'u'je' naq tu'n t-xinnima'ne' tchaq'b'ila.²²Qu'mtzun najsama, b'inxa nyole': kxe'l nq'o'n jun twaya tu'ntzun tkuwix tanmiya ex tu'n tb'ent txi'ya, chij te.

²³Mixtoqti'x tajb'il Sawul tu'n twan, aye'tzu'n nejenel kye t-xjal exju' qya e'ok-il tu'n twan, chab'ax twan. Jawe'tzuntz twitz tx'otx' ex kub' qe twi' jun watb'il.²⁴Kub'tzun tb'yo'n qya jun qpoj tman wakx q'u's atitoq tja ex kub' t-xyuq'i'n arin tu'n tkub' tb'incha'n jte' muqin mixti' ttx'amal.²⁵Xitiq'i'ntzuntz te Sawul ex kyeju' nejenel kye t-xjal te q'oj. Tetzunj kyb'aj wan, kyej kq'olb'e'nju' qya, e'anjtzuntz texju' qonik'an lu. Min qe kyk'u'j pilistey ti'j Dab'i

¹B'aj kyb'u'yi'n aj Pilistyaju' kyxjal te q'oj toj Apek, aye'tzunkye aj Israel e'xmujin jata'ju' t-xiklil a' toj Jesreel.²Aj kyxi'lq'e junjun tnej xjal pilistey te q'oj te jo'naq (100) ex te kab'k'al lajnaq (1,000) chaq kyb'aj, teyile junjun tnej nejliju' nejenel kywitz, aye'tzuntlkye Akyis ex Dab'i kyuk'i'lju' t-xjal lepchqe'x xq'uqilkye.³Xi'tzun kyqani'n kynejel pilistey te Akyis:
—¿Titi' nkyjyo'n aj Eb'rey tza'lu?, chechij.
Atzunte Akyis xittzaq'we'n kye:
—Ate Dab'i, nejeneltoq kye t-xjal Sawul, nimaqkawil kye aj Israel. Matxi' tenxi' jte' ab'q'i wuk'i'le', ex atxi'x tej tq'ontetib' wuk'i'le' b'ajx tz'ela' yal jun taq'wix ti'j wu'ne', chij kye.

⁴Tzajtzun kytx'u'jil kynejel pilistey ti'j Akyis, ex xikyma'n te:
—Q'manxna'ya te tu'n kyxi' toju' najb'il oje txi' tq'o'na kye ex tu'n lalun txi' quk'i'l toju' q'oj; qu'n jaku' che jawmiltz'uj qi'j toju' q'oj. ¡Alote ktb'incha'ju' tu'n tkyaj b'a'n tuk'i'lju' tajaw, kpomel tyek'u'n kywi'ju' xjal te q'oj lu!⁵¡Ana'te Dab'i ja'lu intoq b'itzanjtz kyu'n b'ixil: kab'k'al lajnaq (1,000) ichan kyim tu'n Sawul, atzun junmutx' jo'k'al (10,000) kyim tu'n Dab'i!, chij, chechij.

⁶Tzajtzun ttxko'n Akyis Dab'i ex xitma'n te:
—¡Axxi'x lu Qman Dyos, tnik'altati'j! Ex tkyaqilju' tu'me'l ntb'incha'na kyxolju' xjal te q'oj b'a'n toj nwitze'. B'ajx tz'ela' yal jun ti'xti' taq'wix ti'ja wu'ne' atxi'x tej tula nk'etze'. Naq a min nel b'a'na toj kywitzju' nejenel kye pilistey,⁷Qu'mtzun kutanj ti'ja toj b'anil ja'lu, tu'ntzun mi b'incheta' jun ti'xti' myab'a'n toj kywitz, chij te.

⁸Xi'tzun ttzaq'we'n Dab'i te:
—¿Ti'tzu'n matxi' nb'inchaye'? ¿Ti'tzun matxi' tila nimaqkawil wi'je' toj tkyaqilju' tq'ijlalil lu, tu'nju' min tajb'ila tu'n nq'ojine' kyi'ju' tajq'oja?, chij.

⁹Atzunte Akyis xittzaq'we'n:
—Kanlina'we' nwitz qa majx b'a'nta naku'j jun tanjl Dyos, naqtzun a min kyajb'ilju' nejenel kye pilistey tu'n txi'ya quk'i'le' toj q'oj.¹⁰Qu'mtzun, aj kyjawe'ye' najchi'j naq intzaj t-xe kya'j, kb'el b'e kyu'ne' kyuk'i'lju' ajb'el teju' tajawa ju' ẍe tzaj tuk'i'la, chij te.¹¹Tetzunj kyjawe' Dab'i kyuk'i'lju' t-xjal te prim te juntl q'ij, anjkyi'j toj kytanam pilistey, aye'tzukye' pilistey exi' Jesreel. Kub'kyi'j aj Amalek tu'n Dab'i

¹Tetzunj kypon Dab'i kyuk'i'lju' t-xjal Siklaj toj toxi'n q'ij, matxi'toq che b'ajpon aj amalek toj Nekeb', ex matxi'toq kub'ti'j Siklaj kyu'n, matxi'toq kub' kytx'u'yi'n ex matxi'toq tz'ok kyq'o'n tq'aq'al.²Ex matxi'toq che b'ajx kyiq'i'nju' qya ex kykyaqilju' k'wal ex tijwnaq ate'toq atzu', expe' mix-a'lo'xi'toq jun kub' kyb'yo'n.

³Tetzunj kypon Dab'i kyuk'i'lju' t-xjal toju' nintnam ex tej kyka'yinte qa matxi'toq b'aj tu'n q'aq' ex matxi'toq che'x iq'i'nju' kyxu'jil, kyk'wal ex kymyal tu'n kyokx jpu'n,⁴e'aq'wi ẍch'il tu'n kyoq'il ex majx e'kub'numj tu'n tpaj.⁵Ex matxi'toq che'x iq'i'n kab'e' t-xu'jil Dab'i tu'n kyokx jpu'n, aye' Aynoam aj Jesreel, ex Ab'ikayl t-xu'jilb'en Nab'al aj Karmel.⁶Inxi'xtoq b'isun Dab'i qu'n kyajb'iltoqju' t-xjal te q'oj tu'n tb'aj kyxon toj ab'j, qu'n matxi'toq tzaj kytx'u'jil tu'nju' b'aj kyi'ju' kyk'wal. Oktzun qe tk'u'j ti'j Qman Dyos,⁷ex xitma'n teju' pale Ab'yatar, tk'wal Aymelek:
—B'inchama xtalb'il, q'intza ẍa'y, chij.
Naqtzun nb'ent tpon tiq'i'n Ab'yatar ẍa'y te Dab'i,⁸xitqani'n Dab'i te Qman Dyos:
—¿Ma b'a'n tu'n nxi'ye' knolkyeju' jun k'loj eleq' lu? ¿Ma kb'elkyi'j wu'ne'?, chij.
Atzunte Qman Dyos tzaj ttzaq'we'n:
—Kna'qe'ka, qu'n kb'elkye'kyi'j tu'na ex che kletelju' pres tu'na, chij.

⁹Lwiyxi'xtzun exi' Dab'i kyuk'i'lju' junk'al lajnaq (600) ichan ate'toq tuk'i'l, ex e'pon jata' t-xiklil a' B'esor. E' kyejten¹⁰lajnaq (200) ichan matxi'toq che sikti atzu', layxtoq kyipa tu'n kyik'x jlajin toju' a', aye'tzu'n junk'altl (400) xikyljo'n kyb'e tuk'i'l Dab'i knolte kyi'j leq'.¹¹Yajxi'tzuntl elyal jun aj Ejipt kyu'n toj chq'ajlaj, ex xikyiq'i'n twitz Dab'i, xipe' kyq'o'n twa ex tk'wa':¹²xikyq'o'n jun silun twa iw ex kab'e' tmuqin ub'a tzqijsa'n. Tb'ajlenxi'tzun wanju' aj Ejipt kuwix ch'i'ntl, qu'n matxi'toq b'ent oxe' q'ij ex qonik'an na'mxtoq twan ex na'mxtoq tk'wan.¹³Xi'tzun tqani'n Dab'i te:
—¿Alkye tajawa? ¿Jasaja'ya?, chij.
Xi'tzun ttzaq'we'n aj Ejipt te:
Aj Ejipt qinwe', tmajin jun aj Amalek, matxi' b'ent oxe' q'ij nkyajlen tleb'a'ne' wajawe' qu'n in yab'tiye',¹⁴qu'n oxi'ye' elq'al toj tnayajkya'j te kytx'otx' seretey, exju' kye aj Juda ex aj Kaleb'. Ex okqq'o'ne' tq'aq'al Siklaj, chij.

¹⁵Xi'tzun tqani'n Dab'i te:
—¿Ma jaku' txi'ya yek'ulte ja ta'qe' eleq' lu?, chij.
Atzunju' aj Ejipt xittzaq'we'n te:
Qama tzaj ttziya'na weye' twitz Qman Dyos qa lay chin kub' tb'yo'na exqa lay chinx tq'o'na teju' wajawe', kxe'l wiq'i'na tzmax ja ta'qe', chij.

¹⁶Exi' tiq'i'ntzuntz ja ta'qe' eleq', matxi'toq b'ajx kysputi'nkyib'u' eleq' toj tkyaqilju' kojb'il, intoq ku'x tjaq' kywa ex intoq che wan, qu'n intoq kytzalajsa'n tkyaqilju' matxi'toq tzaj kyelq'a'n toj kytx'otx' pilistey ex toj kytx'otx' aj Juda.¹⁷Oktzun tzaqpaj Dab'itz q'ojil kyi'j, tzyet-x tu'n te prim ex ponb'aj te qale, e'kub' tb'ajsa'n kykyaqil, noq o'qe'kx junk'al (400) ku'xun eb'ajx oq ti'j kamey min eb'aj tu'n.

¹⁸Kolpet tkyaqilju' b'ajx kyelq'a'n aj Amalek tu'n Dab'i, ex e'tzaqpetju' kab'e' t-xu'jil tu'n.¹⁹Mixti' jun tal ti'xti' mixwitti' kolpet ti'j tkyaqilju' b'ajx elq'a'n, mixti' jun k'wal mujqa tij ichan miwtjun tzaqpet, tkyaqil e'kletile tu'n Dab'i.²⁰Ex eltiq'i'n Dab'i tkyaqilju' kyrit ex kywakyix, aye'tzu'n intoq che xla'jankye alu'mj intoq kyma'n qa matxi'toq che kanb'et ja'lu tu'n Dab'i.

²¹Tetzunj tpon Dab'i jae'kyaja'tenju' lajnaq (200) ichan min exi' tuk'i'l tu'n tpaj matxi'toq che kub'numj, ttziju' nin a' B'esor, e'tzaj k'lulkye Dab'i kyuk'i'lju' lepchqe'toq ti'j. Atzunte Dab'i xi' lq'e q'olb'elkye.²²Ate'toqtzun junjunju' t-xjal, majx tx'yanqe', eq'ojin kyi'ju' min eb'ajx kyuk'i'l, kyma qa o'qe'kxju' kyxu'jil ex kyk'wal tu'n txi' q'et kye ex mixti'te juntl ti'xti' tu'n txi' kye ti'ju' matxi'toq kolpet, exwittzunlo tu'n kyik'b'ettz.²³Atzunte' Dab'i tma:
—Lalun kyb'inchaju'ye' lu q'aye, ana'te' Qman Dyos saj q'onte qe, maqo tkol, ex mache kub' tq'o'nju' eleq' ẍe oktzaqpaj elq'alqe toj qq'ob'.²⁴Alkyekye' kxel b'inkye, qu'n axte nxi'ju' kye' nche kyej xq'uqilkye ti'xti' kse'nxju' nxi' kyeju' nche b'ajx q'ojil, chij kye.

²⁵(Atxi'xtzun ttzaj qeju', a nb'inchetju' kyxol aj Israel).

²⁶Tetzunj tpon Dab'i Siklaj, xit-sma'n jni' ti'ju' eltiq'i'n kye ajq'oj, kyeju' tijwnaq toj Juda, aye' tuk'i'lqe, ex xit-sma'nju' tqanil lu kye: Lu jun oyaj kyeye' ti'ju' sel wiq'i'ne' kye tajq'oj Qman Dyos, chij.²⁷Ex xit-sma'n oyaj kyeju' ate'toq toj B'etel, toj Ramot toj Neweb', toj Jatir,²⁸toj Aroer, toj Sipmot, toj Estemoa,²⁹toj Rakal, ex kyeju' ate'toq kyoju' nimaqtnam toj Jerameel, ex kyeju' ate'toq kyoju' nimaqtnam kye aj Kyenit,³⁰ex kyeju' ate'toq Orma, toj Korasan, toj Atak,³¹toj Eb'ron, ex kyoj kykyaqilju' najb'il jaeb'eta' Dab'i kyuk'i'lju' t-xjal. E'kyim Sawul kyuk'i'lju' tk'wal toj q'oj (1 Cr 10.1-12)

¹Eq'ojin pilistey kyi'j aj Israel, aye'tzu'n aj Israel eb'aj kub' oq kywitz, nim eb'aj kyim twi' witz Kyilb'oa.²Eb'ajx lpe pilistey jyolkye Sawul kyuk'i'lju' tk'wal, ex e'kub' kyb'yo'n Jonatan, Ab'inadab' ex Malkyiswa.³Eb'ajx tiljtzuntz ti'j Sawul; ex aq'wi kyu'nju' xjal smajil, ex b'aj xob' Sawul b'a'nxi'x kye.⁴Qu'mtzun xitma'n teju' xq'uqilte:
—Iq'i'nktza tk'uẍtx'e'nb'ila ex chin t-xyuku'ya tu'n, tu'ntzun myaye' ma' xjal lu min nche niman te Dyos che b'el b'yonweye' ex tu'n lalun tz'el nch'ixawe' kyu'n, chij.
Atzunju' xq'uqilte mixti' taj, qu'n inxi'xtoq xob'. Tzajtzun Sawultz jaw tpich'b'a'nju' tk'uẍtx'e'nb'il, ex kub' t-xontib' tib'aj.⁵Tetzunj tlonteju' xq'uqilte qa matxi'toq kyim Sawul, ex ikxte kub' t-xyu'ntib' tu'nxju' tk'uẍtx'e'nb'il, ekyimtzuntz kykab'il.⁶Iktzu'n kyima' Sawul kyuk'i'lju' oxe' tk'wal, exju' xq'uqilte ex kykyaqilju' t-xjal toju' q'ij lu.⁷Tetzunj kylonte aj Israel najlqe'toq toj jun plajtl teju' b'ya' ex toj tjawetzq'ij te Jordan, matxi'toq che kub' oqu' aj Israel te q'oj ex matxi'toq che kyim Sawul kyuk'i'lju' tk'wal, b'aj kyej kyleb'a'n nimaqkytanam ex eb'ajx oq. Aye'tzu'n pilistey eb'aj pon ex eb'aj kyejten najal kyoju' nimaqtnam.

⁸Tetzunj kyb'ajxju' pilistey te juntl q'ij iq'imilkye ti'xti' kyi'ju' matxi'toq che b'ajkyim, knet Sawul kyuk'i'lju' tk'wal kyu'n woqlqe' twi'ju' witz Kyilb'oa.⁹El kyk'uẍpi'nju' twi' ex b'je'l kyiq'i'nju' tq'ojb'il, ex b'ajx kysma'n sanjelal q'malte toj kywi'yile kytanam pilistey ex toj tja kydyos.¹⁰Ex e'okx kyq'o'nju' tq'ojb'il Sawul toju' ja te k'u'lb'il teju' kydyos Astarte, atzunju' t-xmilal jaw kyyob'i'n ti'ju' nintapi te B'et-san.

¹¹Tetzunj kyb'inteju' xjal najlqe' toj tnam Jab'es toj Kalaad ti'ju' matxi'toq kyb'incha pilistey ti'j Sawul,¹²eb'aj yolinju' ichan min nche xob', atzunj kyb'ajlen b'et toj qonik'an, ku'tz kyiq'i'n t-xmilal Sawul ex kyxmilalju' tk'wal tiju' nintapi te B'et-san, anjtzun kyi'jtz Jab'es, jaeb'aj kub'a' kytz'e'ysa'na'.¹³Atzunju' kytza'jil ku'x kymqu'n toj Jab'es, tjaq' junwi' tze. Tb'ajlenxi'tzunju' lu e mewayin wuq q'ij.

Bible Society in Guatemala

https://app.library.bible/content/aea9d9099feb3a24