2 Pedro1
1Ayine' Simon Luch, tmajin Jesukrist qine' ex apostl qine' te, nche'x nq'olb'e'ne' matxi' ten kyokslab'l tb'anilxi'x kse'nqe', qu'n tnik'alti'j Qman Dyos ex Klolqe Jesukrist.2Tenxwit xtalb'il ex nak'b'il kyxole' tu'n kyojtzqib'le' ti'j Qman Dyos ex ti'j Qajaw Jesukrist. Qo anq'in kse'n tajb'il Dyos3Matzaj tq'o'n Dyos tu'n tipumal tkyaqilju' nojqelan qe tu'n qanq'in ex tu'n qniman te, tej selqnik' te Jesukrist, ex maqo ttxok tu'nju' toklen ex taq'unb'en tb'anilxi'x.4Mache tzaj ttziya'n ti'xti' lu qe, nimaq kyoklen ex twi' wi'yal qexi'x, tu'ntzun kyetze' toju' myab'a'n kse'n kyajb'il xjal twitz tx'otx' ex tu'n kyoke' kse'n tajb'il Dyos.5Qu'mtzun mya o'kx tu'n tten kyokslab'le', ati tu'n kyanq'ine' b'a'n; ex mya ok'x tu'n kyanq'ine' b'a'n, ati tu'n kyokye' k'atz;6mya ok'x tu'n kyoke' k'atz, ati tu'n kyjk'unte kyib'e'; mya ok'x tu'n kyjk'unte kyib'e', ati tu'n tten kypasense'; mya o'kx tu'n tten kypasense', ati tu'n kyq'onte kychwinqlale' te Dyos;7mya o'kx tu'n kyq'onte kychwinqlale' te Dyos, ati tu'n kyoke' kyitz'inxi'x kyib'e'; mya o'kix tu'n kyoke' kyitz'inxi'x kyib'e', ati tu'n tten kyk'u'jlalile'.8Qa nkyb'incha'ne' tkyaqil ja'lu, ex nche ch'iye' toj, ati twitzlalil kychwinqlale' ex q'ancha'l matze'l kynik'e' ti'j Qajaw Jesukrist.9Atzunju' min ntb'incha'n, iky toka' kse'n moẍ mujqa kse'n min nka'yinxi'x; min na'ntl tu'n qa ẍtilset tu'n Qajaw kyoju' til ojtxi'.10Qu'mtzun e'ntzik ex e'witz'in, loq' mache txkonjtze' ex mache sk'onjtze' tu'n Dyos, kyq'onk tilile' tu'n kykuwixxi'xe' toj, laytzun che kub' tz'aqtze'.11Ikytzu'n kq'onjtzela' anb'il kyeye' tu'n kyokxe' toju' tkawb'il Qajaw ex Klolqe Jesukrist tejumajx.12Qumtzun kxel nna'ne' kyeye' kukxju' tkyaqil ja'lu, expe' qa b'i'ntl kyu'ne' ex ljo'n kyu'ne' toju' ax oje txi' xnaq'tza'n kyeye'.13Qa itz'qinxe', a wajb'eb'lju'ye' tu'n kyxi' ntzak'u'ne' kyu'nju' nab'l lu.14Matxi' tzaj tma'n Qajaw Jesukrist weye' qa naqjte' qi'jtl tu'n wik'e' twitz tx'otx';15oktzun k'okyeltilil wu'ne' tu'ntzun ttzaj kyna'ne' tkyaqil ja'lu nkyimlenxi'ye'. Aye' e'lonte tajwalil Jesukrist16Mya la'j te' oje b'ajx qxnaq'tza'ne' kyeye' ti'ju' tipumal Qajaw Jesukrist exju' tulel tkamaji'n, qilku'qe' Qajaw kyu'nku' qwitze'.17Qile' tej tjaw nima'n ex tokq'o'n tajwalil tu'n Qman Dyos, tej ttzaj yolin Dyos ti'ju' tu'me'l tb'anilxi'x kjalu: Ate Nk'wal ja'ye' lu k'u'jla'n wu'ne', inxi'x chin tzalaje' ti'j, chij.18Ayo'ku'ye' ob'inte tq'ojq'ojel wi'yj lu tzaj yolin toj kya'j, qu'n ato'toqe' tuk'i'l Qajaw twi' xjan witz.19Tu'ntzunju' lu, inqexi'x tk'ujlalilju' b'aj kypakb'a'n t-sanjelal Dyos, kyb'inku'ye' b'ajkyma'n lu b'a'nxi'x. Iky tpakb'al ja'lu kse'n jun kantil nk'ant toj qlolj tzmax ajqsqix ex ajtul qoptz'aju' t-spik'umal sqixun che'w toj kyanmiye'.20Tnejelxi'x Kanex toj kywitze': Aju' tyol Dyos tz'ib'a'n toj Tu'jil kyu'n t-sanjelal, lay b'ent pjet qu'n kse'nxwitqe qnab'l,21qu'n min e'yolin kye' t-sanjelal Dyos kyu'nxkyib'; e'wnaq qekye' e'yolin kse'nx tzaj tma'n Dyos kye, q'i'nqe'toq tu'n Xewb'aj Xjan. Aye' nok kyq'o'n kyib' te xnaq'tzal1Ikx b'aju' ojtxi', ate' xjal chalyolqe' okkyq'o'n kyib' te t-sanjelal Dyos kyxol aj Israel; ikyxtzu'n ja'lo ate' chalyol k'okyel kyq'o'nkyib' te xnaq'tzal kyxole'. Che q'ol xnaq'tzb'il mya ax ex xob'ajilx kyeye', ex lay tzajkyna'ntl Qajaw Jesukrist kolpinkye; aye'x che tzajel q'inte jun xitb'il naqx myanim ajtultz'aq kyib'aj.2Nim che kxe'l lpe kyi'j toju' kyachb'il taq'wixi'x, ex tu'n kypaj che yolil xjal myab'a'n ti'ju' b'e ax.3Tu'ntzu'n kyjamjoni'n xnaq'tzal lu, che b'lol pwaq kyi'je' ajkyq'on xnaq'tzb'il mya ax; tu'ntpajtzun ja'lu, ojtxi'tl b'antni kyten tu'n kyxi' toj tz'e'ysb'il witzb'aj.4Min kub' tnajsa'n Dyos kyilju' anjl eb'inchan il, eb'ajx t-xon toj q'aq' ex e'kyaj tq'o'n toj qlolj, xwaku'nqe' toj xpatx'i'n k'uxb'il tzmax ajkyok toj xjel.5Ex min kub' tnajsa'n Dyos kyilju' xjal ojtxi', tzaj tq'o'n q'eqjab' kyib'aju' b'inchal myab'a'n, o'kx Noe kyuk'i'l wuqtl xjal e'tkol, ju' pakb'an tu'n kyanq'in xjal toj ttzinunal.6Ex kub' ttz'e'ysa'n Dyos kywitzu' nimaqtnam Sodom ex Komor, e'kub' ttz'e'ysa'n tzmax kykub' tza'jix, tu'n kyok te yek'b'il ti'ju' tzul kyi'ju' b'inchal taq'wix.7Atzu'n Lot, jun ichan tnik'alti'j, min kub' ttz'e'ysa'n, qu'n inxi'xtoq b'isun tu'n tpaj kyachb'ilju' b'inchal taq'wix.8Najli toqju' ichan tnik'alti'j kyoju' nimaqtnam lu, inxi'xtoq yajti tu'n tpaj ajtka'yinte ex ajtb'inte kyb'inchb'aju' xjal myab'a'n tkyaqil q'ij.9Qu'mtzun nche tklo'nte Qman Dyos okslalqe'xi'x te ajkyok toj joyb'ilkyi'j, ex kttz'e'ysa' kywitzju' b'inchal taq'wix toj tq'ijlalil ajkyok toj xjel.10Aye'xi'xpe' ljo'n kyanq'in toj achb'il myab'a'n ex nelkyik'o'n tkawb'il Qajaw, kb'el ttz'e'ysa'n Dyos kywitz. Taq'wix xjalqe' chalyol xnaq'tzal lu ex pi'sqe', min nche xob' nche wulin kyi'ju' nim kyoklen toj kya'j;11aye'tzunkye' anjl, maskye nimxi'x kyipumal ex nimaq kyoklen, min nok kyq'o'n kyib' wulil kyi'ju' oklenj lu toj tb'i Qajaw.12Ikyqe' xjalju'na'j kse'nqe' txkup: mixti'x kynab'l, naq nche anq'in, nche itz'ji tu'n kytzyunjtz ex tu'n kykub'yo'n. Nche yolin myab'a'n kyi'ju' min nche kane toj kywitz; ikyxtzun che kyimela' kse'nqe' txkup,13che yajtel kse'nx e'yajta' txqantl kyu'n. Nxi'x che tzalaj toj kywitz tu'nju' q'o'nkyib' tu'n kyachun junjun q'ij. ¡Ch'ixb'ajil qe'x ex junxi'qeku' ajkyten kyuk'i'le' kyoj junjun wan, nche tzalaj toj kyxja'jayi'n tuk'i'l sb'ub'l!14Majx tokkywitz kyi'j qya ex npon kyk'u'j kyi'j; majx ljo'n kyb'inchan il. Nche kysb'u'nju' min q'uqlixi'x kyk'u'j ti'j Krist; kyexi'x kyjyonteju' kyajb'il; b'entnitlti'j tu'n kyxi' toj naje'n.15Tzpetniqe', qu'n mache eltxalpuj ti'ju' b'e tzinun. Xi' lepcha'qe' ti'ju' yek'b'il tu'n B'alaam ju' sanjelal, tk'wal B'osor, t-xima tu'n tb'inchate myab'a'n tu'n tkanb'an pwaq16ex tzak'unjtz tu'n tpaj til: jun xhej b'ur min nyolin, yolin kse'n jun xjal ex min taj tu'n t-xitljo'n t-xnakyilju' sanjelal.17Ikyqe'kye xnaq'tzal na'j kse'nqe' xoch mixti' a' kyoj, kse'nqe' muj niqinje tu'n kyq'iq'; che xe'lq'o'n toj tz'e'ysb'il witzb'aj toj qlolj qxopinxi'x tejumajx.18Xa'wankuxi'x che yolin naqx tu'n kyjaw latb'i xjal kyi'j, nche okkychq'o'n ak'a'j okslal, tzqeku' telkypa'n kyib' ti'ju' b'e taq'wix, tu'n kyxi' kyiq'i'n tojxu' kyachb'il ex tajb'il kychib'jil.19Nxikyma'n kye tu'n kytzaqpet, extzun aye'ku'kye jtz'o'nqe' kse'n lq'o'n majin toj taq'wixil; qu'n kykyaqil xjal lq'o'n majin teju' makub'santeti'j.20Aye'kye' matxi' tz'el kynik' te Qajaw ex Klolqe Jesukrist, ex mache tzaqpet teju' myab'a'n twitz tx'otx', qama kychukutl kyib' kyoju' ti'xti' lu ex makub'kyi'j, che kxe'lxi'xtl toj il kyetwitz tnejel.21Miẍpe'wtlo ti'x sel kynik' teju' b'a'n b'e nejtl, kyetwitz telenxi' kynik' ti'j, yajxi'xtl sel kypa'n kyib' ti'ju' xjan chaq'b'il kyk'am.22Kyi'jtzun xjapuna' jun q'umb'en ax kjalu: Nanjtlti'ju' tx'yan leq'ulte t-xab', chij, ex juntl ntma'n kjalu: Aju' b'och tzmaxb'aj txjet ti'j, nxi'tl lmultib' toj xo'l, chij. Tulel jumajtl Qajaw1E'ntzik ex e'witz'in, a tkab' u'j ja'lu nxi' ntz'ib'a'ne' kyeye'. Matxinq'o'n kynab'le' kyoju' kab'e' wuje', qu'n wajb'ile' tu'n kyximane' b'a'n.2Kyna'ntze' tpakb'al b'a'n kymaju' t-sanjelal Dyos ojtxi'; exju' tchaq'b'il Qajaw ex Klolqe Jesukrist, b'ajx kyxnaq'tza'n apostl kyeye'.3Axi'xpe' tz'elx kynik'yju'ye' ti'j: che ul xjal toj b'ajsb'il tq'ijlalil o'kx k'okyela'ten kywitz ti'ju' kyachb'il ex twi' xmayilqe'4okkyxjelu' kjalu: ¿Ti'tzu'n xb'aj ti'ju' tziya'ntl qa tzul jumajtl Krist? Oje che b'ajkyimkye' qchman, ex kukx ttente twitz tx'otx'ju' atxi'x tkub'len b'incha'n tx'otx', chechi.5Min kyajb'ilju' xjal lu tu'n telkynik' ti'j, qa kub' tb'incha'n Dyos kya'j ex tx'otx' naq tu'n tyol atxi'x ojtxi', eltpa'n tx'otx' ti'ju' a'.6Ex b'ajkub' xitj twitz tx'otx' toju' tq'ijlalil tej ttzaj q'eqjab'.7Aye'tzu'n kya'j ex tx'otx' ate' ja'lo klo'nqe' tu'n kyxi' toj q'aq' tu'nx tchaq'b'il Dyos. Che b'ajeltz'e'y tu'n q'aq' lu toj tq'ijlalil ajkyok kykyaqil toj xjel ex ajkyxi' b'inchal myab'a'n toj naje'n.8Expe' lan tzik'tna'l kyu'ne' e'ntzik ex e'witz'in, aju' jun q'ij naku'j kab'k'al lajnaq (1,000) ab'q'i, ex aju' kab'k'al lajnaq (1,000) ab'q'i naku'j jun q'ij te Qajaw.9Mya yajxi'xwit njapunte Dyos tyol, kse'n nkyxima'n junjun, atite Qajaw tpasens kyi'je', min tajb'il tu'n tnaj jun kyxole', a tajb'ilju' tu'n tanjtzti'j kyanmi kykyaqil.10Ajtzun tulte Qajaw, naqx myanim ajtul kse'n ajtul jun eleq'. Che b'eltzun naj kya'jtz tu'n jun tq'ojq'ojel xob'ajilx, tkyaqilju' ati twitz kya'j che b'elxitj tu'n q'aq', extzu'n tx'tox' tuk'i'l tkyaqil kyb'inchb'aj xjal twitz, che b'ajel tu'n q'aq'.11Kna' che b'elb'aj tkyaqil tu'n q'aq', ¡se'n taq'witzun lay che anq'inkye' b'a'n, ex tu'n tel kypa'n kyib'e' ti'ju' myab'a'n!12Che ayonqe'ye' ti'ju' q'ij ajkyok kykyaqil xjal toj xjel tu'n Dyos, ex kyq'onk tilile'. Che b'ajel xitju' kya'j tu'n q'aq' toju' q'ij lu, ex kykyaqilju' che'w che kb'el yulj tu'n q'aq';13ayo'tzunqe nqo ayon ti'ju' ak'a'j kya'j ex ak'a'j tx'otx' tziya'ntl tu'n Dyos, atzuntzu' kb'antela'te' tnik'alti'j ex b'a'n.14Qu'mtzun e'ntzik ex e'witz'in, b'ankx nche ayone' tu'n kyulju' ti'xti' lu, kyq'onk tilile' tu'n kytene' b'a'n twitz Dyos, mixti' kytz'ilile' ex kyile'.15Kyna'ku'ye' tu'nju' kye qilwi tu'n Dyos, ati tpasens qi'j qu'n a tajb'ilju' tu'n qklet. Ex oje b'ajx ttz'ib'a'n qitz'in Pawl kyeye' ti'ju' lu, kse'nx tnab'l tzajni tq'o'n Dyos.16Oje b'ajx tma'n kyeye' ti'ju' lu kyoj kykyaqilju' tuj, naq aju' ati junjun yol ch'uẍ tu'n telqnik' kyi'j kyoju' tuj, qu'mtzun min nel kynik'ju' mixti' kyojtzqib'l exqe' mya wa'lqe'xi'x toj kyokslab'l, junxi'tl chik'b'ab'ente kyu'n, ikx nkyb'incha'nju' kyi'ju' txqantl Xjan Tu'jil, tu'ntzunju' che kxe'l toj naje'n.17Qu'mtzun e'ntzik ex e'witz'in, loq' b'i'ntl ja'lu kyu'ne', kyka'yinx kyib'e', tu'n lalun che sb'unjtze' kyu'n b'inchal myab'a'n ex tu'n kywe'ye' b'a'nxi'x toj kyokslab'le'.18Che ch'iyxkye' toju' ojtzqib'l ti'j Qajaw ex Klolqe Jesukrist ex che ch'iyxe' toju' tk'u'jlalil. ¡Awt Qajaw jaw ajwalet ja'lo ex te kukxju'! Ikxwitju'.
Bible Society in Guatemala