阅读1 Juan 1

1 Juan1

Yol te chwinqlal

¹Nxi qtz'ib'a'ne' kyeye' ti'ju' atitltoq t-xetnejel, aju' oje qb'iye' ex oje qile' kyu'nku' qwitze'. Qu'n qile' ex okqmko'ne' tu'n qq'ob'e'. Aju' Yol te chwinqlal.²Yek'unjtzu' chwinqlal lu: qile' ex nqtziya'ne', ex nxi' qpakb'a'ne' chwinqlal tejumajx lu kyeye', aju' atitoq tuk'i'l Manb'aj ex ma yek'unjtz qe.³A nxiqma'ne' kyeye' aju' oje qile' ex oje qb'iye', tu'n kymujb'ante kyib'e' quk'i'le', kse'nqe' mujb'a'n qib'e' tuk'i'l Qman Dyos ex tuk'i'l Jesukrist ju' Tk'wal.⁴Nche'x qtz'ib'a'ne' lu kyeye' tu'n ttzqetju' qtzalajb'ile'. Ate Dyos spik'un

⁵A tzaj t-xnaq'tza'n Jesukristju' qeye' ex nxi' qpakb'a'ne' kyeye': Ate Dyos spik'un ex mixti' qlolj tuk'i'l.⁶Qama qma qa juna'n qib' tuk'i'l Dyos, extzun nqo anq'in toj qlolj, chalyol qo' ex min nqanq'i'n ax.⁷Qatzun nqo anq'in toju' spik'un, kse'nte Dyos ati toj spik'un, atitzun mujb'ab'ltz qxol, ex nqo ẍtilset tu'n tchk'el Jesus ju' Tk'wal.

⁸Qama qma qa mixti' qil, ayo'x nqo sb'unte qib' ex min nqo yolin ax;⁹qatzun mab'jaw qma'n qil twitz Dyos, tz'aqlite Dyos ex b'a'n tqe qk'u'j ti'j, kb'el tnajsa'n qil ex qo t-ẍtilsa' te tkyaqil myab'a'n.¹⁰Qama qma qa b'ajx qo b'inchana' il, inok qq'o'n Dyos te chalyol ex min nqk'mo'nju' tyol. A Jesukrist yolil qi'j

¹E'tal nk'wal, nb'ajx ntz'ib'a'n jaye'lu kyeye' tu'n lalun che b'inchan ile'. Qatzun ati jun mab'inchan il, ati jun kolol qi'j twitz Manb'aj, aju' Jesukrist, ex tz'aqlixi'x.²Taq'tib' Jesukrist te chojb'il tu'n kynajset qil; ex mya o'kx qil, ex kyil kykyaqil xjal twitz tx'otx'.

³Qama che'x qb'i'n tchaq'b'il Dyos, matxitzun tz'el qnik'tz te Dyos.⁴Qatzun ati maq'mante: Wojtzqi'nwe', qa chi, ex min nche'x tb'i'n tchaq'b'il, min nyolin ax.⁵Atzunte' qa nxiqb'i'n tyol, atzuntzu' ntena'xi'x tk'u'jlalil kse'nte Dyos nqo tk'u'jla'n.⁶Alkye inq'mante qa juna'ntib' tuk'i'l Dyos, ati tu'n tanq'in kse'n anq'ina' Jesukrist. Aju' ak'a'j chaq'b'il

⁷E'ntzik ex e'witz'in, mya ak'a'jte' chaq'b'il nxi' ntz'ib'a'ne' kyeye' lu: axte chaq'b'ilju' kyk'ame' tzajx t-xetnejel. Ate' ojtxi' chaq'b'il a b'i'ntlju' kyu'ne'.⁸Atzu'n ja'lo, nxi' ntz'ib'a'ne' jun ak'a'j chaq'b'il kyeye', axxi'x te Krist ex kyeye', qu'n xi'tkub'aju' qlolj ex xi'tqoptzajxi'xju' spik'un axxi'x.

⁹Qama tma jun qa ati toj spik'un, extzun neltik'o'n ttzik mo titz'in, atix toj qlolj.¹⁰Aju' ntk'u'jla'n ttzik mo titz'in, nnanq'in toj t-spik'umal Dyos, ex minti' takpuje'n toj tanmi.¹¹Atzunte' neltik'o'n ttzik mo tiz'in, inanq'in toj qlolj ex inx takajla toj qlolj, ex min neltnik' jatu'n t-xa', qu'n moẍ tu'nju' qlolj.

¹²E'tal nk'wal, nxi' ntz'ib'a'ne' lu kyeye', qu'n matxi' kub' najsa'n kyile' tu'n Dyos tu'nel Jesukrist.¹³E'manb'aj, nxi' ntz'ib'a'ne' lu kyeye', qu'n matxi' tz'el kynik'e' teju' atitl ttzajlenx t-xetnejel. E'ku'xun, nxi' ntz'ib'a'ne' lu kyeye' qu'n matxi' kub'ti'ju' tajaw il kyu'ne'.

¹⁴Mab'ajx ntz'ib'a'ne' kyeye' tal nk'wal, qu'n matxi' tz'el kynik'e' teju' Manb'aj. Mab'ajx ntz'ib'a'ne' kyeye' manb'aj, qu'n matxi' tz'el kynik'e' teju' atitltoq atxi'x t-xetnejel. Ex mab'ajx ntz'ib'a'ne' kyeye' ku'xun, qu'n kuwqe'ye' ex matxi' kyk'ame' tyol Dyos toj kyanmiye', ex matxi' kub'ti'ju' tajaw il kyu'ne'.

¹⁵Lalun kyk'u'jlaye' twitz tx'otx', exju' nb'aj twitz tx'otx'. Alqe nk'u'jlante te twitz tx'otx', min ntk'u'jla'n Dyos;¹⁶qu'n tkyaqilju' ti'xti' twitz tx'otx' myatzu' ntzaja' tk'etz Dyos, te twitz tx'otx'xte', aye' ja'lu: e'tajb'il qchib'jil, achb'il kyi'ju' nche qka'yi'n ex nimjtib'il toj qchwinqlal.¹⁷Atzunte' twitz tx'otx' xi' tb'aj kyuk'i'l tkyaqilju' achb'il myab'a'n twitz: atzunte' ntb'incha'n tajb'il Dyos ktenb'el kukxju'. Yol ax ex chajyolil

¹⁸E'tal nk'wal, a b'ajsb'il tq'ijlalilju' ja'lo. B'i'ntl kyu'ne' qa tzul neju' ajq'oj ti'j Krist; matxitzun che jawb'ent txqan ajq'oj ja'lo ti'j Krist. Qu'mtzun nel qnik' ti'j qa toj b'ajsb'il tq'ijlalil ta'qo' ja'lo.¹⁹Mache b'je'x qxol; axxi'x myatoq quk'i'lqe', naqwit quk'i'l qe'xi'xtoq, ma'wtlo che kyejten qxol. Ma'tzun b'aj ikyju' tu'n tel q'ancha'lin qa mya kykyaqil quk'i'lqe'.

²⁰Matxi' tz'ok q'o'n kyoklene' tu'n Xewb'aj Xjan, ex matxi' tz'el kynik'e' kykyaqile' teju' ax.²¹Nxi' ntz'ib'a'ne' kyeye' qu'n kyojtzqi'ntle' ax; ex b'i'n kyu'ne' lay chan yolju' nyolin ax.²²¿Alkyetzu'n chalyol? Aju' inq'mante qa myate Jesusju' Krist. Atzunte ajq'oju' ti'j Krist, qu'n neltik'o'n Qman Dyos tuk'i'l Jesus ju' Tk'wal.²³Alkyexku' matz'el ik'onte Tk'wal Dyos, ex neltik'o'n Dyos Manb'aj; alkyetzun mak'monte K'walb'aj, ex ntk'mo'n Manb'aj.

²⁴Qu'mtzun kyajxwit tenju' yol toj kyanmiye' aju' kyb'iye' atxi'x kyokslane'; qatzun ati toj kyanmiye' kukxju', ex che tenb'ele' juna'n kyib'e' tuk'i'l K'walb'aj ex tuk'i'l Manb'aj.²⁵Ate oje tzaj ttziya'n Jesukrist qe, aju' chwinqlal tejumajx.

²⁶Nxi' ntz'ib'a'ne' kyeye' kyi'ju' kyajb'il tu'n kysb'un kyi'je'.²⁷Aye'tzunkye' ati Xewb'aj Xjan kyuk'i'le', tu'n Xewb'aj Xjan soka' tq'o'n Jesukrist kyoklene', ex min nojqelan alkye kxnaq'tzal kyeye', qu'n aju' Xewb'aj Xjan tzajni tq'o'n Dyos kyuk'i'le' kxnaq'tzal kyeye' ti'j tkyaqil ti'xti', ex ax t-xnaq'tzb'il, mya chajyolil. Kyjunam kyib'e' kukxju' tuk'i'l Krist kse'nx matxi' t-xnaq'tza Xewb'aj Xjan kyeye'.

²⁸Ja'lotzun e'tal nk'wal, kymujb'am kyib'e' kukxju' tuk'i'l Krist, tu'ntzun q'uqli qk'u'j ajtul jumajtl ex tu'n lalun qokub' ch'ixwi twitz ajtul.²⁹Loq'tzun b'i'ntl kyu'ne' tnik'alti'j Jesukrist, tz'elx kynik'e' qa kykyaqilju' nche b'inchante tnik'alilti'j tk'wal Dyos qe'. Tk'wal Dyos qo'

¹Inxi'x qotk'u'jla'nte Qman Dyos, nqo okq'o'n te tk'wal Dyos, ex ax tk'wal Dyos qo'. Qu'mtzun min nelkynik' xjal qe, qu'n na'mx telkynik' te Dyos.²E'ntzik ex e'witz'in, tk'wal Dyos qo'tel. Maskye na'mx qlonte se'n qo okyela' yajxi'tl, b'i'ntl qu'n ajtul jumajtl Jesukrist, qo okyel kse'nte, qu'n k'okyel qka'yi'nkuxi'x.³Ex kykyaqilju' maqe kyk'u'j ti'j, kyẍtilsa'kyib' kyu'nxkyib', kse'nxte Jesukrist ẍtilun.⁴Kykyaqiltzunkye' mache b'inchan il, taq'wix ntb'incha'n; qu'n a tilju' qa taq'wix nb'inchet.⁵B'i'ntl kyu'ne' ulte' Jesukrist twitz tx'otx' tu'n tel tiq'i'n kyil kykyaqil xjal, ex mixti' junte til.⁶Ikytzu'n, kykyaqilju' mujliqe' kukxju' tuk'i'l Jesukrist, lay che b'inchantl il; aye'tzunkye' inx che b'inchan il, na'mx telkynik' te ex min nkane' toj kywitz.⁷E'tal nk'wal, lalun kyaq' sb'u'kyib'e': ate' nb'inchante tnik'alilti'j, tnik'alte' ti'j, kse'nte Qajaw tnik'alti'j;⁸atzunte' inx b'inchan il, te tajaw il, qu'n ate' tajaw il b'inchal il ttzajlenx t-xe tnejel. Tu'ntzunju' sula'te' Tk'wal Dyos: tu'n tb'ajkub' t-xitu'n xb'aj tb'incha'n tajaw il.

⁹Mix-a'lo' jun tk'wal Dyos inxwit b'inchan il, qu'n nche anq'inkye kse'nxte Dyos; ex lay inxwit che b'inchan il qu'n tk'wal Dyos qe'.¹⁰Q'ancha'l alkyeqe' tk'wal Dyos ex alkyeqe' tk'wal tajaw il, qu'n alkye min ntb'incha'n b'a'n mujqa min ntk'u'jla'n ttzik mo tiz'in, mya te Dyos. Chaq'b'il tu'n qk'u'jlante qib' qxolilex

¹¹Ate oje kyb'iju'ye' ttzajlenx tnejel: tu'n qk'u'jlante qib' qxolilex.¹²Lan qo ok kse'n Kayin, tk'waltoq tajaw il ex kub' tb'yo'n titz'in. ¿Tiqu'ntzun kub'a' tb'yo'n? Myana' b'a'ntoq tb'inchb'aj Kayin, atzunte' titz'in b'a'n tb'inchb'aj.

¹³E'ntzik ex e'witz'in, lalun che jaw sak'puje' qama che el ik'o'ne' kyu'n xjal te twitz tx'otx'.¹⁴Matxi' qoetzqe toju' kamik, itz'q'o'tl ja'lo, inel qnik' ti'j ikyju' qu'n ina' che qk'u'jla'n qtzik mo qitz'in. Alkyete min ntk'u'jla'n ttzik mo titz'in, kyimnix.¹⁵Kykyaqilju' inelkyik'o'n kytzik mo kyitz'in, b'yol xjalqe', ex b'i'ntl kyu'ne', jun b'yolxjal lay b'antten tchwinqlal tejumajx.¹⁶Qojtzqi'ntl qeju' tk'u'jlalil ja'lo qu'n mataq'te Jesukrist tchwinqlal tu'nqpaj; ikxtzunqeju', ati tu'n qq'onte qchwinqlal tu'n kypaj qtzik mo qitz'in.¹⁷Qatzun ati jun q'inun ex matz'ok tka'yi'n nojqelan o'nb'il te jun ttzik mo titz'in, extzun min nxitq'o'n, ¿Se'n taq'wi tu'n tmante qa ati tk'u'jlalil Dyos toj tanmi?¹⁸E'tal nk'wal, lalun qk'u'jla qib' naq tu'n qtzi, qyek'um tu'n qb'inchb'en. Se'n tu'me'l tu'n tqe qk'u'j ti'j Dyos

¹⁹Ikytzu'n k'elela' qnik' ti'j qa to'qo' toju' ax, ex kqeb'el qk'u'j twitz Qman Dyos;²⁰qatzun na'n tu'nqk'u'j qa ati jun qil, ate Dyos nimxi'x toklen ex tojtzqi'n tkyaqil.²¹E'ntzik ex e'witz'in, qatzun miẍtite' qil na'n tu'n qanmi, q'uqli qk'u'j twitz Dyos;²²ex ktzajel tq'o'n tkyaqilju' matxi qqani'n te, qu'n nxiqnima'n tchaq'b'il Dyos ex nqb'incha'n b'a'n toj twitz.²³A tchaq'b'il Dyosju' tu'n qokslan te Jesukrist ju' Tk'wal, ex tu'n qk'u'jlante qib' qxolilex kse'nx tchaq' qe.²⁴Aye' nche'x kynima'n tchaq'b'il, nche anq'in tuk'i'l ex ati kyuk'i'l. Ikytzu'n nela' qnik' qa ati Dyos toj qanmi: tu'nju' Xewb'aj Xjan tzaj tq'o'n toj qanmi. T-xew Dyos ex t-xew ajq'oj ti'j Krist

¹E'ntzik ex e'witz'in, lalun che'x kyoksla'ne' kykyaqilju' pakb'al nche q'mante qa ati T-xew Dyos kyuk'i'l, tz'elx kynik'e' kyi'j qa T-xew Dyos ati kyuk'i'l mujqa mya. Qu'n nim pakb'al chalyolqe' ate' twitz tx'otx'.²K'elel kyniky'e' alkye ati T-xew Dyos tuk'i'l kjalu: kykyaqil pakb'al nche q'mante qa axxi'x ul Jesukrist kse'n jun ichan, ati T-xew Dyos kyuk'i'l.³Alkyetzunte inq'mante qa min ul te Jesukrist kse'n jun ichan, mixti' T-xew Dyos tuk'i'l; aju' t-xew ajq'oj ti'j Krist ati tuk'i'l. B'i'ntl kyu'ne' ati tulelju' xewb'aj lu; atitlte' ja'lu kyxol xjal.

⁴E'tal nk'wal, te Dyos qe'ye' ex makub' kyi'ju' chalyol na'j kyu'ne', qu'n nimxi'x tipumalju' ati kyuk'i'le' kyetwitzju' ati twitz tx'otx'.⁵Te twitz tx'otx'qe'; qu'mtzun nche yolin kyi'j ti'xti' twitz tx'otx', aye'xtzu'n te twitz tx'otx' nche kub' b'inkye.⁶Ayo'tzunqe te Dyos qo'. Aju' ojtzqi'n Dyos tu'n nkub' tb'in qyol, atzunju' mya te Dyos min nqokub' tb'i'n. Atzuntzu' nela' qnik' alkye ati Xewb'aj te ax tuk'i'l ex alkye ati xewb'aj te sb'ub'l tuk'i'l. Atite Dyos tk'u'jlalil

⁷Atixi'x nk'u'je' kyi'je' e'ntzik ex e'witz'in, ati tu'n qk'u'jlante qib' qxolilex, qu'n tuk'i'l Dyos ntzaja' tk'u'jlalil. Kykyaqilju' nche k'u'jlan tk'wal Dyos qe' ex kyojtzqi'n Dyos.⁸Alkyete min nk'u'jlan, na'mx teltnik' te Dyos, qu'n nk'u'jlante Dyos.⁹Tzaj tyek'u'n Dyos tk'u'jlalil qe tej ttzaj tchq'o'n o'kxku' jun Tk'wal twitz tx'otx' tu'n tten qchwinqlal tu'n.¹⁰A tk'u'jlaliju' kjalu: mya ma'wt qk'u'jla Dyos, ate Dyos xk'u'jlanqe ex matzaj tchq'o'n Tk'wal, tu'ntzun ajtkub' te chojb'il, che najsetel qil tu'n.

¹¹Ati nk'u'je' kyi'je' tal nk'wal, qa ikyxqo tk'u'jlaya' Dyosju', ex ikxqe tu'n qk'u'jlante qib' qxolilex.¹²Mix-a'lo'te oje tz'ok ka'yinte Dyos; qatzun maqk'u'jla qib' qxolilex, ati Qman Dyos quk'i'l ex nq'ancha'lix tk'u'jalil qoj.¹³Anela' tnik'tzilju' qa nqo anq'in tuk'i'l Dyos exqa ati Dyos quk'i'l, tu'nju' matxi' tzaj tq'o'n T-xew qe.¹⁴Ex ayo'ku'ye' matxi' qolonte ex nxiqma'ne' qa tzaj tchq'o'n Qman Dyos Tk'wal klol kye kykyaqil xjal.¹⁵Alkyexku' matz'el tnik' qa ate Jesus Tk'wal Dyos, nanq'in tuk'i'l Dyos ex ati Dyos tuk'i'l.

¹⁶Ikytzu'n nel qnik' ti'j tk'u'jalil Dyos qi'j ex maqoksla. Atite Dyos tk'u'jalil, ex aju' nk'u'jlan, nanq'in tuk'i'l Dyos ex ati Dyos tuk'i'l.¹⁷Ikytzu'n ntena'xi'x qk'u'jlalil, tu'ntzun tqe qk'u'j toju' q'ij ajqok toj xjel; qu'n ikyqo' kse'n Jesukrist twitz tx'otx'.¹⁸Qa ati qk'u'jlalil, lay qoxob'. A pena' axxi'x tk'u'jalil nex xla'jante xob'ajil, qu'n tu'nju' xob'el ati tz'e'ysb'il witzb'aj. Qu'mtzun alkye nxob', na'mx tten tk'u'jlalil axxi'x toj tnami.

¹⁹In qo k'u'jlanqe, qu'n nejtl xqo tk'u'jla Dyos.²⁰Qa ati jun inq'mante kjalu: Ink'u'jla'ne' Dyos, qa chi, extzun neltik'o'n ttzik mo titz'in, chalyol. Qa min ntk'u'jla'n jun xjal ttzik mo tiz'in, nokku' tka'yi'n, ex lay b'ent tk'u'jlante Dyosju' min nok tka'yi'n.²¹A oje tchaq' Jesukristju' qe kjalu: alkye ntk'u'jla'n Dyos, ikx k'u'jlam ttzik mo titz'in. Nkub'ti'j myab'a'n twitz tx'otx' tu'n qokslab'l

¹Qa nqoksla'n qa a Jesus Krist, tk'wal Dyos qo'; exqa nqk'u'jla'n Manb'aj, ati tu'n qk'u'jlan kye tk'wal Manb'aj.²Qa nqk'u'jla'n Qman Dyos ex nqb'incha'n tchaq'b'il, ex nel qnik' ti'j qa nche qk'u'jla'n tk'wal Dyos.³Ate nqk'u'jla'n Dyosju' qa nche qb'incha'n tchaq'b'il; ex mya ch'uẍqe' tchaq'b'il,⁴qu'n kykyaqilju' nche ok te tk'wal Dyos, nkub'ti'ju' myab'a'n twitz tx'otx' kyu'n. Tu'n qokslab'l nkub'a'ti'ju' myab'a'n qu'n.⁵Alkye ntoksla'n qa a Jesus Tk'wal Dyos, nkub'ti'j myab'a'n twitz tx'otx' tu'n. Tziyb'il ax ti'ju' Tk'wal Dyos

⁶Tej tul Jesukrist, jaw a' twi' ex el tchk'el; mya o'kx jaw a' twi', ex el tchk'el. Ex a Xewb'aj Xjan ntziyante, qu'n ax te Xewb'aj Xjan tyol.⁷Oxe' q'olte tziyb'il ti'ju' lu:⁸aju' T-xew Dyos, exju' a', tuk'i'lju' tchk'el Jesukrist; ex ax yolju' nkyma'n oxe' lu.⁹In pena' xiqoksla'n kyol xjal, mitzunloyate' ttziyb'il Dyos nimxi'x toklen, qu'n ina' ttziya'n qe ti'ju' Tk'wal.¹⁰Alkye nokslan teju' Tk'wal Dyos, ati tziyb'il lu toj tanmi; atzunju' min nokslan te Dyos, naku'j chajyolil te, qu'n min ntoksla'n ttziyb'il Dyos ti'ju' Tk'wal.¹¹A nttziya'n Dyosju' tu'n matzaj tq'o'n qchwinqlal tejumajx, ex ati qchwinqlal lu qama qokslaju' Tk'wal.¹²Qa nqo anq'in tuk'i'lju' Tk'wal Dyos, ati qchwinqlal lu; altzunkyete min nanq'in tuk'i'l Tk'wal Dyos, mixti' tchwinqlal tejumajx. B'ajsb'il yol ex nab'l

¹³Nxi' ntz'ib'a'ne' kyeye' okslalqe'ye' te Tk'wal Dyos, tu'n kyb'inteye' qa ati kychwinqlale' tejumajx.

¹⁴Q'uqli qk'u'j ti'j Dyos, qu'n b'i'n qu'n qa titi' matxi qqani'n te kse'nju' tajb'il, nqo tzaj tb'i'n.¹⁵Kse'nxtzu'n nqo tzaj tb'i'n Dyos ajttzaj qna'n, ex b'i'n qu'n qanqk'mo'n titi' matxi qqani'n te.

¹⁶Qama til jun okslal juntl okslal ntb'incha'n jun il mya te kamik, ati tu'n tna'n Dyos ti'j, ex ktzajel tq'o'n Dyos tchwinqlalju' okslal lu, qa mya jun il te kamik. Ati jun il te kamik, ex lay txinma'ne' tu'n kyna'n Dyose' tu'n tpaj.¹⁷Tkyaqil taq'wix nb'inchet, il; ex atite il mya te kamik.

¹⁸B'i'ntl qu'n aye'kye' tk'wal Dyos qe'tl, min nche b'inchantl il, qu'n xq'uqi'nqe' tu'n Tk'wal Dyos, ex min nche oktzyu'n tu'n tajaw il.¹⁹B'i'n qu'n te Dyos qo', ex kykyaqil xjal twitz tx'otx' te'qe' tjaq' tkawb'il tajaw il.²⁰Ex b'i'n qu'n oje tzulju' Tk'wal Dyos ex tzaj tq'o'n qnab'l tu'n telqnik' ti'ju' Dyos axxi'x. Nqo anq'in tuk'i'lju' ax, aju' Jesukrist Tk'wal Dyos. Ex ato' tuk'i'lju' Dyos axxi'x, ex ntzaj tq'o'n qchwinqlal tejumajx.²¹Kyka'yinx kyib'e' tal nk'wal kyeju' witzleb'.

Bible Society in Guatemala

https://app.library.bible/content/aea9d9099feb3a24