Revelation6
1फिन हम देखली कि मेम्ना ऊ सातगो मोम के मुहर में से पहिला टुकड़ा खोललन, जेकरा से ऊ किताब बंद हल। जब ऊ अईसन करलन, तऽ हम चारगो जीवित प्राणी में से एगो के गर्जन के जईसन ऊँचा आवाज से कहते सुनली, आवऽ।2फिन हम एगो अनोखा चीज देखली: एगो उजला घोड़ा जेकर सवार धनुष आउर तीर पकड़ले हल। परमेश्वर उनका एगो मुकुट देलन जेकरा ऊ जीते जा रहलन हल ओकर जीत के मान्यता में पेहेनतन हल। सवार परमेश्वर के दुश्मन से लड़तन आउर उनका हरावे लागी पूरा तरह लायक होके स्वर्ग से बाहरे अईलन,3फिन मेम्ना मोम के दोसरा मुहर खोललन, जेकरा से ऊ किताब बंद हल। जखनी ऊ खोललन, तऽ हम दोसरा जीवित प्राणी के ई कहते सुनली, आगे आवऽ।4फिन एगो आउर घोड़ा देखाई देलक। ऊ चमके वाला लाल हल! ऊ घोड़ा पर एगो सवार भी बईठल हलन, परमेश्वर सवार के धरती पर लड़ाई करे लागी शक्ति देलन कि शान्ति उठ जाय ई तरह से दुनियाँ के लोग एक दोसरा के मार डालतन, ई उद्देश्य लागी परमेश्वर चमकदार लाल घोड़ा पर सवार के एगो बड़का तलवार देलन।5फिन मेम्ना मोम के तिसरका मुहर खोललन जेकरा से किताब बंद हल। जखनी ऊ खोललन, तऽ हम तिसरका जीवित प्राणी के ई कहते सुनली, "आगे आवऽ" फिन हम एगो आउर अनोखा चीज देखली, एगो करिया घोड़ा जेकरा पर सवार तराजू पकड़ले हलन! 6आउर हम ओखनी चारगो जीवित प्राणी के बीच में से एगो शब्द ई कहते सुनली, “एक दीनार के सेर भर गेहूँ, आउर एक दीनार के तीन सेर जौ, बाकि जैतून के तेल, आउर दाखरस के बारियन क्षति नऽ पहुँचावऽ।” 7फिन मेम्ना मोम के चौथा मुहर खोललन जेकरा से किताब बंद हल। जखनी ऊ खोललन, तऽ हम चौथा जीवित प्राणी के ई कहते सुनली, आगे आवऽ!8फिन हम एगो आउर अनोखा चीज देखली: एगो घोड़ा जे बेमार होवे के चलते पियर हो गेल हल आउर ओकरा पर दूगो सवार हलन। पहिला सवार के नाम हल 'ऊ जे लोगवन मरला के कारण बनऽ हथन। घोड़ा पर ओकर पीछे बईठल सवार के नाम हल अधोलोक हल। परमेश्वर ई सवार के धरती के एक चौथाई मारे के अधिकार देलन। ऊ युद्ध चाहे अकाल चाहे महामारी पैदा कर के चाहे जंगली जानवरवन के आबादी वाला इलाका में लाके लोगवन के मार सकऽ हथन।9फिनो मेम्ना मोम के पाँचवाँ मुहर खोललन जेकरा से ऊ किताब बंद हल। जखनी ऊ किताब खोललन तऽ हम स्वर्ग में एगो वेदी के निचे ऊ लोगवन के आत्मा देखली जेकरा दोसरा लोग येहिसे मार देलन हल काहेकि ऊ भरोसा वाला गवाही के रूप में परमेश्वर के संदेश ईमानदारी से सुनऽ हथन। 10ई सभे आत्मा परमेश्वर के ऊँचा आवाज में पुकारलन, हे सर्वशक्तिमान, पवित्र आउर सच्चा परमेश्वर, तूँ हर घड़ी ओही करऽ हऽ जे सही हे आउर जे सही हे ओकर फईसला करऽ हथन! येहिसे कृपा कर के धरती पर ऊ रहे वाला लोगवन के हमर लहू ला उनका सजा दऽ जौन हमरा मार डाललन हे!11तऽ परमेश्वर ऊ सभे के एगो उजला कपड़ा के बागा देलन। परमेश्वर उनका से कहलन कि ऊ कुछ देर आउर धीरज रखतन, काहेकि उनकर साथी दास आउर भाई अईसन लोग आउर भी हलन जे यीशु पर अपन विश्वास के अस्वीकार करे के बदले मरे वाला हलन। बाकि जईसहीं ऊ सभे मर जईतन, परमेश्वर ऊ लोगवन के दण्ड देतन जौन उनका मारलन हल आउर ऊ लोगवन के भी मार देतन जिनकर आत्मा अखनी स्वर्ग में हल।12फिन हम देखली कि मेम्ना मोम के छठा मुहर खोललन जेकरा से किताब बंद हल। जब ऊ अईसन करलन, तऽ धरती जोर से हिल उठल। सूरज टाट के जईसन ढेर करिया हो गेल, मानऽ बकरी के करिया बाल से बुनल गेल शोक के कपड़ा हे। चाँद पूरा हो गेल आउर ऊ लहू के जईसन लाल हो गेल। 13तऽ आसमान से तरेगन धरती पर गिर पड़ल। ऊ अईसन गिरल जईसे अंजीर के पेड़ पर लगल सभे अंजीर तऽ झड़ जा हे जब पेड़ बड़ी तेज हवा से हिलऽ हे। 14आउर आसमान फट के दूगो दिशा में लोंघड़ गेल, जईसे कोई किताब दू टुकड़ा में फट जा हे, आउर दू दिशा में लोंघड़ जा हे। आउर सभे पहाड़ आउर द्वीप भी अपन जगह से हट गेल। 15तऽ धरती के सभे लोग, ईहाँ ला कि राजा, ऊँचा पद के अधिकारी, सेनापति, धनवान लोग आउर प्रतापी लोग आउर दास भी गुफा आउर पहाड़ी चट्टान में छिप गेलन। 16ऊ पहाड़ आउर चट्टान से पुकार के कहे लगलन, “हमरा पर गिरा आउर हमरा तर कर दऽ! ई तरह स्वर्ग में सिंहासन पर बईठल परमेश्वर हमरा नऽ देख पईतन! आउर ई तरह से मेम्ना हमरा सजा नऽ दे पईतन!” 17“काहेकि आज ऊ भयानक दिन हे जौन दिन परमेश्वर आउर मेम्ना ऊ लोगवन के सजा देतन जौन गलत काम करलन हे, आउर हम जानऽ ही कि हमनी में से कोई भी बेकसूर नऽ हथन!”
Bridge Connectivity Solutions Pvt. Ltd.