Revelation5
1फिन हम देखली कि जे आदमी सिंहासन पर बईठल हलन, ऊ अपन दहिना हाथ में एगो किताब पकड़ले हलन। ऊ किताब के दूनो तरफ वचन लिखल हल। फिन ऊ किताब के मोम के सात मुहर से बंद कर देलन हल, जेकरा से कोई भी ओकर लिखल बात नऽ पढ़ सकलन हल। 2हम एगो शक्तिशाली स्वर्गदूत के देखली जे ऊँचा आवाज में घोषणा कर रहलन हल: “ऊ कौन आदमी हथन जे किताब पर मोम के मुहर के तोड़तन आउर फिन सूचिपत्र के खोले आउर ओकरा में का लिखल बात पढ़े के लायक हे?”3तईयो कोई स्वर्गीय प्राणी, धरती पर कोई आदमी, चाहे मरलकन के निवास स्थान में कोई भी एतना योग्य नऽ हलन कि ऊ किताब के खोल के पढ़ सकतन।4जब हम देखली कि कहीं भी कोई भी ई योग्य नऽ हथन कि ऊ किताब खोल के पढ़ सकतन, तऽ हम फूट-फूट के रोली। हम येहिसे रोली काहेकि हम जानऽ हली कि परमेश्वर जे लिखलन हे ऊ खास हे, बाकि हम सोचली कि कोई भी कहियो नऽ जान पईतन कि ऊ का लिखलन हे।5बाकि चौबीसो पुरनियन में से एगो हमरा से कहलन, “तोरा रोवे के जरुरत नऽ हे! ई ऊ आदमी हथन जेकरा हम खोज रहली हे! ई ऊ आदमी हथन जिनका भविष्यद्वक्तावन यहूदा के गोत्र के शेर बतईलन हे आउर ऊ दाऊद के जड़ी से उगे वाला डाली हे। ऊ विजय हथन! येहिसे, ऊ किताब पर मोम के सात मुहर के तोड़ेला आउर किताब के खोले लागी भरपूर योग्य हथन!” 6फिन हम देखली कि सिंहासन भीर एगो मेम्ना खड़ा हल। चारगो जीवित प्राणी आउर प्राचीन उनका घेरले हलन। ऊ जिन्दा हलन, बाकि उनकर देह पर अईसन निसान हल जे देखावऽ हल कि दोसरा लोग उनका एक बार बेरहमी तरीका से मार डाललन हल। उनकर सात सींग हल। उनकर सातगो आँख भी हल। ई परमेश्वर के सातगो आत्मा हे जेकरा परमेश्वर पूरा धरती में भेज हथन। 7तऽ मेम्ना सिंहासन भी अईलक, आउर जे सिंहासन पर बईठल हलन, ऊ ऊ किताब उनका दे देलन।8जईसहीं मेम्ना किताब के कबूल करलन, चारो जीवित प्राणी आउर चौबीसगो प्राचीन मेम्ना के सामने घुटना टेक के बईठ गेलन। हर एक प्राचीन के हाथ में एगो वीणा आउर कुछ सोना के कटोरा हल जेकरा में धूप हल। धूप ऊ पवित्र लोगवन के प्रार्थना के निशान हल जे परमेश्वर के हे।9जिन्दा प्राणियन आउर प्राचीन लोग एगो अईसन गीत गईलन जे पहिले कहियो कोई नऽ गईलन हल। ओखनी मेम्ना लागी गीत गईलन, “तूँ ई किताब के हासिल करे लागी आउर एकरा मोम के मुहर के खोलेला योग्य हऽ जेकरा से तूँ पढ़ सकऽ कि एकरा में का लिखल हे। तूँ एकर योग्य हऽ काहेकि जखनी तूँ अपन जिनगी न्योछावर करलऽ, तऽ तूँ सभे कुल के लोगवन ला पाप से छुटकारा लागी अपन लहू बहईलऽ जेकरा से ऊ परमेश्वर के आराधना आउर आज्ञा मान सकतन। तूँ ई दुनियाँ भर के लोगवन लागी करलन हे। 10तूँ उनका अईसन लोग बनईलऽ हे, जेकरा पर हमर परमेश्वर शासन करऽ हथन आउर अईसन याजक बनईलन हे जे दोसरा लोग के परमेश्वर के आराधना करे लागी प्रेरित करतन। ऊ धरती में रहे वाला लोगवन के राजा होतन।”11जखनी हम ई सभे देख रहली हल, तऽ हम ढेरमनी स्वर्गदूतवन के गईते सुनली। ई सभे स्वर्गदूत सिंहासन, जीवित प्राणी आउर चौबीस प्राचीन के घेरले हलन। स्वर्गदूतवन के संख्या लाखो में हल, एतना जादे हल कि कोई भी गिन नऽ सकऽ हल कि केतना हल। 12स्वर्गदूत जोर से गा रहलन हल, “जे मेम्ना अपन जान दे देलन, ऊ ई योग्य हथन कि हर कोई उनका आदर करतन, उनका महिमा दऽ, उनका आशीष दऽ आउर कबूल करऽ कि ऊ केतना धनवान, बुद्धिमान आउर सामर्थी हथन!”13फिन हम स्वर्ग में, धरती पर, धरती के नीचे, समुद्र में, हाँ, ऊ सभे जगह में मौजूद हर प्राणी के ई गीत गईते सुनली, “सभे कोई हमेशा सिंहासन पर बईठल आदमी आउर मेम्ना के स्तुति आउर आदर आउर महिमा करतन आउर स्वीकार करतन कि ऊ केतना शक्तिशाली हथन!”14जब लाखो स्वर्गदूत आउर हर एक प्राणी ई गीत गईलन, तऽ चारो जीवित प्राणियन कहलन, “आमीन!” तऽ पुरनियन परमेश्वर आउर मेम्ना के सामने जमीन पर घुटना टेक के उनकर आराधना करलन।
Bridge Connectivity Solutions Pvt. Ltd.