Revelation4
1ई सभे बात के बाद, हम, यूहन्ना एगो आउर अनोखा बात देखली: स्वर्ग में एगो दुआरी खुलल हल! जे हमरा से पहिले बात करलन हल, जिनकर शब्द तुरही के जईसन हल, ऊ हमरा से फिन बात करलन आउर कहलन, “ईहाँ ऊपर आवऽ! हम तोरा ऊ सभे घटना देखायेम जे बाद में घटित होत।”2आउर तुरन्त पवित्र आत्मा हमरा प्रेरित करलन, आउर हम दर्शन में देखे आउर सुने लगली। हम एगो अनोखा बात देखली: स्वर्ग में एगो सिंहासन हल आउर ऊ सिंहासन पर कोई बईठल हलन। 3सिंहासन पर बईठल शासक चमकदार यशब माणिक्य रतन के तरह चमक रहल हल। सिंहासन के चारो तरफ एगो मेघधनुष चमकदार हरियर पन्ना रतन के जईसन चमक रहल हल। 4ऊ सिंहासन के चारो तरफ चौबीसगो सिंहासन हल, आउर ओकरा पर चौबीसगो पुरनियन बईठल हलन, जे शुद्ध उजला कपड़ा पेहेनले हलन, आउर उनकर माथा पर सोना के मुकुट हल।5सिंहासन से बिजुली के चमक आउर गरज के गड़गड़ाहट निकल रहल हल। सिंहासन के सामने सातगो मशाल जल रहल हल। ई सभे मशाल परमेश्वर के सातगो आत्मा के अगुवाई करऽ हल। 6सिंहासन के सामने भी कुछ अईसन हल जे काँच के बनल समुद्र जईसन देखाई दे हल। ई बिल्लौर के तरह साफ हल। सिंहासन के चारो पट्टी एगो जीवित प्राणी खड़ा हल। सभे प्राणी के देह के चारो पट्टी आँख हल। 7पहिला जिन्दा प्राणी शेर जईसन हल। दोसरा जिन्दा प्राणी बछड़ा जईसन हल। तिसरका जीवित प्राणी के मुँह आदमी जईसन हल। चौथा जीवित प्राणी उड़े वाला उकाब जईसन हल। 8चारो जीवित प्राणियन में से सभे के छौ-छौगो पंख हल। ई जीवित प्राणियन के आँख पूरा तरह से झाँकल हल। ऊ हर घड़ी बिना रुकले कहते रहऽ हलन: “पवित्र, पवित्र, पवित्र प्रभु परमेश्वर सर्वशक्तिमान हथन जे सभे पर आउर सभे पर शासन करऽ हथन। ऊ ओही हथन जे हमेशा से अस्तित्व में हलन, जे अखनी भी मौजूद हथन, आउर जे भविष्य में अईतन आउर सभे के न्याय करतन।” 9जीवित प्राणी बार-बार परमेश्वर के स्तुति, आदर आउर धन्यवाद करऽ हथन, जे सिंहासन पर विराजमान हथन आउर जे हमेशा जिन्दा रहऽ हथन। जखनी ऊ अईसन करऽ हथन, 10तऽ चौबीसगो प्राचीन भी परमेश्वर के सिंहासन के सामने घुटना टेकऽ हथन। ऊ परमेश्वर के सामने झुकऽ हथन, जे हमेशा जिन्दा रहऽ हथन। ऊ अपन मुकुट उनकर सिंहासन के सामने रखऽ हथन आउर कहऽ हथन, 11“हे हमर प्रभु परमेश्वर, तूँ ई योग्य हऽ कि सभे प्राणी तोर महिमा करतन, आउर तोर आदर करतन आउर कबूल करतन कि तूँ केतना सामर्थी हऽ। तूँ ई योग्य हऽ काहेकि तूँही सबकुछ बनईलऽ हे। हाँ, सभे कुछ ओईसहीं हे जईसन तूँ एकरा बनावे के फईसला करलऽ हल।”
Bridge Connectivity Solutions Pvt. Ltd.