Revelation3
1तऽ यीशु मसीह हमरा से कहलन सरदीस शहर के विश्वासियन के कलीसिया के स्वर्गदूत के ई संदेश लिखऽ: हम ओही ही जेकरा भीर परमेश्वर के सातगो आत्मा आउर सातगो तरेगन हे। हम तोरा से ई बात कहे ला चाहऽ ही: “हम जानऽ ही कि तूँ का कर रहलऽ हे। तूँ आत्मिक रूप से जीवित होवे लागी जानल जा हऽ तोर एगो नाम हे। जबकि, तूँ सच में हमरा लागी जोश से काम नऽ कर रहलऽ हे।2होशियार! तूँ हमरा प्रति अपन भक्ति पूरा तरह से खोवे के खतरा में हऽ। अपन बचल भक्ति के नया करऽ। तूँ अखनी लागी ऊ सभे नऽ करलऽ हे जे परमेश्वर जानऽ हथन कि तोरा करे के चाहऽ हल।3येहिसे याद करऽ कि तूँ परमेश्वर के आज्ञा के सुन के केतना खुशी से कबूल करलऽ। आज्ञा तोड़े लागी मन फिरा आउर फिन से आज्ञा माने लागी शुरु करऽ। जदि तूँ हमर आज्ञा पालन करे में होशियारी नऽ बरतवऽ, तऽ हम तोरा ऊ घड़ी सजा देम, जखनी तूँ एकर उम्मीद भी नऽ कर रहलऽ होत। तूँ नऽ जान पईवऽ कि कौन घड़ी हम तोर सजा देवे वाला ही।4तईयो, सरदीस नगर में कुछ अईसन नाम वाला विश्वासी लोग हथन जौन अपन कपड़ा पाप के अशुद्ध नऽ करलन हे। ऊ हमरा जौरे हमेशा रहतन आउर हर तरह से शुद्ध रहतन। येही उनकर हक हे।5ई तरह से हम विजय आदमी के पूरा तरह से उजला कपड़ा पेहनायेम आउर उनकर नाम जिनगी के किताब में हमेशा बनल रहत। हम अपन पिता परमेश्वर आउर उनकर स्वर्गदूतवन के बतायेम कि हम ओकरा निजी तोर से जानऽ ही। 6हर लोग जे आत्मिक तोर से समझदार हथन उनका धियान से सुने के चाही कि पवित्र आत्मा विश्वासियन के कलीसिया से का कहऽ हथन।”7तऽ फिन यीशु मसीह हमरा से कहलन फिलदिलफिया के नगर में विश्वासियन के कलीसिया के स्वर्गदूत के ई संदेश लिखऽ: हम ऊ ही जे हमेशा सही काम करऽ ही। हम ऊ ही जे हमेशा पवित्र आउर सच बोलऽ ही। जईसे राजा दाऊद भीर लोगवन के प्राचीन नगर यरूशलेम में प्रवेश करे ला कुँजी देवे के अधिकार हल, ओईसहीं हमरा भीर लोगवन के स्वर्ग में प्रवेश करे ला आदेश देवे के अधिकार हे। जदि हम कोई लागी कोई मौका पैदा करऽ ही, तऽ कोई भी ओकरा ऊ अवसर से छाँट नऽ सकऽ हे। जदि हम केकरो कोई मौका देवे से इंकार करऽ ही, तऽ कोई भी ओकरा ऊ मौका नऽ दे सकऽ हे। हमरा भीर तोरा से कहे लागी ई सभे बात हे: 8“हम जानऽ ही कि तूँ का कर रहलऽ हे। (हम तोर सामने एगो दुआरी खोल के रखली जेकरा कोई भी बंद नऽ कर सकऽ हे) हम जानऽ ही कि जबकि तूँ सामर्थ में कम हऽ, तईयो तूँ हमर आज्ञा के पालन करलऽ हे आउर तूँ कबूल करलऽ हे कि तूँ हमर नाम पर विश्वास करऽ हऽ। धियान रखऽ कि हम तोरा एगो अईसन मौका दे रहली हे जेकरा कोई भी तोरा देवे से मना नऽ कर सकतन।9देख हम शैतान के ऊ आराधनालय वालन के तोर वश में कर देम जे यहूदी बनल बईठल हथन, पर हथन नऽ, बलुक झूठ बोलऽ हथन, देखऽ हम अईसन करम कि ऊ आके तोर पाँव में दण्डवत करतन, आउर ई जान लेतन, कि हम तोरा से प्रेम रखऽ ही।10जब हम तोरा संतोष से दुःख सहे के आज्ञा देली, तऽ तूँ हमर बात मान लऽ। येहिसे हम तोरा ऊ संकट के घड़ी में बचा के रखम जेकर सामना पूरा धरती के मानव जाति आउर दुनियाँ के जल्दी ही करे पड़त। ई दुःख के प्रति हर जगह लोग कईसे जबाब दे हथन, ओकरा से चलत कि ऊ सचमुच में कईसन हथन।11हम जल्दी ही आवे वाला ही, येहिसे हमरा पर विश्वास करते रहऽ। कोई के भी ऊ प्रतिफल के खोवे के कारण परमेश्वर तोरा देवे ला चाहऽ हथन, विजय के मुकुट कोई के कारण नऽ छीन लेवे।12हम विजय आदमी के अपन परमेश्वर के मन्दिर में एगो खम्भा के जईसन सुरक्षित बनायेम। ऊ हमेशा परमेश्वर के मन्दिर में रहतन। हम ओकरा पर अपन परमेश्वर के नाम लिखम। हम ओकरा पर अपन परमेश्वर के शहर के नाम भी लिखम। ऊ शहर नया यरूशलेम हे। ई हमर परमेश्वर से स्वर्ग से उतरे वाला हे। हम जय पावल आदमी पर अपन नया नाम भी लिखम। 13सभे कोई जे आत्मिक रूप से समझदार हथन, उनका धियान से सुने के चाही कि पवित्र आत्मा विश्वासियन के कलीसिया से का कहऽ हथन।”14तऽ फिन यीशु मसीह हमरा से कहलन लौदीकिया शहर के विश्वासियन के कलीसिया के स्वर्गदूत के ई संदेश लिखऽ: जे आमीन हमहीं ऊ ही जे परमेश्वर के सभे प्रतिज्ञा के साबित करऽ ही। हम ही ऊ ही जे परमेश्वर के बारे में पूरा सच्चाई से गवाही दे ही। हम परमेश्वर के सऊँसे सृष्टि के राजा ही। हम तोरा से ई बात काहेला चाहऽ ही:15“हम जानऽ ही कि तूँ का कर रहलऽ हे। तूँ अपन विश्वास नऽ छोड़लऽ हे, बाकि तूँ हमरा से बड़ी प्रेम नऽ करऽ हऽ। हम चाहऽ ही कि तूँ हमरा ला चाहे हमर खिलाफ समर्पण करऽ!16बाकि तूँ बस मामूली आउर गुनगुना हऽ नऽ ठण्डा हऽ नऽ गरम हऽ। तूँ हमरा से जादे प्रेम नऽ करऽ हऽ, फिन भी तूँ दावा करऽ हऽ कि तूँ हमरा पर विश्वास करऽ हऽ। ई घिनामन हे, आउर ई वजह से हम तोरा अस्वीकार करे जा रहली हे। 17तूँ ई बात के बखान करते रहऽ हऽ कि तूँ केतना धनवान हऽ। तोरा एहसास नऽ हे कि तूँ असली में दुःखी हऽ। तोरा कोई के जरुरत हे जे तोरा पर दया करतन। तूँ असली में गरीब हऽ, आंधर हऽ, आउर तोरा भीर कपड़ा नऽ हे।18हम तोरा सलाह दे ही कि तूँ हमरा से ऊ सभे कुछ खरीदऽ जे तोरा जरुरत हे, मानऽ तूँ हमरा से शुद्ध सोना खरीद रहलऽ हे जे तोरा सच में धनवान बना देत। हम तोरा धर्मी बनायेम, मानऽ तूँ हमरा से उजला कपड़ा खरीद रहलऽ हे जेकरा से तूँ शर्मनाक रूप से नंगा होवे के बजाय कपड़ा पेहेन सकऽ। हम तोरा सच्चाई समझावे में मदत करम, मानऽ तूँ हमरा से आँख के मरहम खरीद रहलऽ हे जेकरा से तूँ अपन बेमार आँख पर मल सकऽ जेकरा से तूँ देख सकऽ।19हम अपन सभे प्रेम करे वालन के अनुशासन सिखावऽ ही। येहिसे ईमानदारी से अपन मन फिरावऽ।20धियान दऽ! हम तोहनी में से हर एगो से विनती करऽ ही कि तूँ हमरा से सच्चा प्रेम करऽ, जईसन कि हम तोर घर के दुआरी पर खड़ा ही आउर तोरा दरवाजा खोले लागी खटखटा रहली हे। जदि हमरा से प्रेम कर के जवाब दे हऽ, तऽ हम उनकर प्रिय दोस्त बन जायेम। ई अईसन होत जईसन कि ऊ हमरा अपन दरवाजा से पुकारते सुनलऽ आउर ऊ दरवाजा खोललन आउर हम उनकर घर अईली आउर हम जौरे खाना खईली।21हम विजय होली हे आउर अब अपन पिता जौरे सिंहासन पर बईठऽ ही। ओही तरह से हम सभे विजय के अपना जौरे सिंहासन बईठ गेली हे।22हर एक आदमी जे आत्मिक रूप से समझदार हथन, उनका गौर से सुने के चाही कि पवित्र आत्मा विश्वासियन के कलीसिया से का कहऽ हथन।”
Bridge Connectivity Solutions Pvt. Ltd.