Revelation21
1फिन हम एगो नया आसमान आउर एगो नया धरती देखली। पहिला आसमान आउर पहिला धरती गायब हो गेल हल, आउर महासागर अब अस्तित्व में नऽ हल। 2फिन ऊ घड़ी हम पवित्र शहर यरूशलेम के देखली, जे परमेश्वर लागी खास हल, एगो नया रूप में। ई स्वर्ग में परमेश्वर से धरती पर उतर रहल हल। शहर बड़ी खूबसूरत लग रहल हल, जईसे शादी के दिन दुल्हिन लगऽ हे।3फिन हम परमेश्वर के सिंहासन से एगो ऊँचा आवाज सुनली, जे कह रहलन हल, “सुनऽ! अखनी परमेश्वर के निवास ऊहें रहतक जेज्जा लोग रहऽ हथन! ऊ उनकर होतन, आउर परमेश्वर खुद उनकर साथे रहतन। 4ऊ उनका ढाढ़स देतन जेकरा से ऊ फिन कहियो उदास नऽ रहतन। उनका में से कोई भी फिन कहियो नऽ मरतन, नऽ शोक करतन, नऽ रोतन, नऽ दुःख सहतन। परमेश्वर ऊ सभे चिजवन के दूर कर देलन हे, येहिसे ऊ हमेशा लागी चल गेलन हे।” 5तऽ परमेश्वर सिंहासन पर से कहलन, “सुनऽ! हम अखनी सभे कुछ नया कर रहली हे!” फिन ऊ हमरा से ई भी कहलन, “ई बात जे हम तोरा से कहली हे, ओकरा लिख लऽ। तूँ विश्वास करऽ कि हम एकरा सच में पूरा करम।”6ऊ हमरा से ई भी कहलन, “हम ई सभे काम पूरा कर लेली हे! हम ही ऊ ही जे सभे कुछ शुरु करली हे आउर हम ही सभे कुछ खतम करम। आउर जे कोई चाहतन, हम उनका मगनी में हमेशा ला जिनगी देम, मानऽ हम उनका अईसन झरना से पानी पिला रहली हे जेकर पानी लोगवन के जिन्दा रखऽ हे।7जे लोग शैतान पर जयवन्त होतन, ऊ सभे के हम ई देम; आउर हम उनकर परमेश्वर होयेम, आउर ऊ हमर बेटा होतन।8बाकि सभे लोग जलते गंधक के झील में तड़पतन। येही दोसरा बार मरे के मतलब हे। जे लोग डरपोक हथन, ऊ येही से तरह तड़पतन। आउर जे अविश्वासी हथन, जे घिनामन काम करऽ हथन, जे लोगवन के हत्या करऽ हथन, जे व्यभिचार करऽ हथन, जे जादू-टोना करऽ हथन, जे मूर्तिपूजा करऽ हथन, आउर जे झूठ बोलऽ हथन, ऊ भी येही तरह तड़पतन।” 9फिन एगो स्वर्गदूत हमरा भीर अईलन। ऊ, ऊ सात स्वर्गदूतवन में से एगो हलन जिनका भीर सातगो कटोरा में दाखरस हल, जे सात तरह के दुःख लावऽ हल। ऊ हमरा से कहलन, “हमरा साथे आवऽ। हम तोरा ऊ लोग देखायेम जे मेम्ना के दुल्हिन होत जे हमेशा लागी साथ रहत!”10फिन पवित्र आत्मा हमरा प्रेरित करलक जेकरा से हम दर्शन में सभे कुछ देख आउर सुन सकम। स्वर्गदूत हमरा एगो बड़ी ऊँचा पहाड़ के चोटी पर ले गेलन। ऊहाँ ऊ हमरा ऊ शहर देखईलन जे परमेश्वर लागी खास हे, नया यरूशलेम। ई स्वर्ग से परमेश्वर भीर से उतर रहल हल।11ऊ नगर परमेश्वर के महिमा से चमकते चमक से जगमगा रहल हल, आउर ऊ बेसकीमती यशब रतन के जईसन चमक रहल हल, आउर ऊ बढ़ियाँ काँच के जईसन शुद्ध हल।12शहर के चारो पट्टी एगो बड़ी ऊँचा शहरपनाह हल। दीवार में बारहगो फाटक हल। हर फाटक पर एगो स्वर्गदूत खड़ा हल। दुआरी पर इस्राएल के बारहगो गोत्र के नाम लिखल हल। हर दुआरी पर एक गोत्र के नाम हल।13शहर के पूरब दने तीनगो दुआरी हल। उत्तर के तरफ तीनगो दुआरी हल। दक्खिन के तरफ तीनगो फाटक हल। आउर पच्छिम के तरफ तीनगो फाटक हल।14शहरपनाह के नींव के बारह पत्थर हल आउर हर पत्थर पर ऊ बारह प्रेरितवन में से एगो के नाम लिखल हल जिनका मेम्ना नियुक्त करलन हल।15जे स्वर्गदूत हमरा से बात कर रहलन हल, ऊ एगो सोना के नापे वाला छड़ी रखले हल, जेकरा से ऊ नगर, ओकर फाटक आउर ओकर शहरपनाह के नापे लागी ओकर इस्तेमाल करलन। 16शहर आकार में चौकोर हल, मतलब कि एकर लम्बाई चौड़ाई के बराबर हल। स्वर्गदूत शहर के अपन छड़ी से नाप के बतईलन कि एकर लम्बाई बाईस सौ किलोमीटर हे आउर एकर चौड़ाई आउर ऊँचाई एकर लम्बाई के बराबर हल।17ऊ दीवार नापलन आउर बतईलन कि ई छियासठ मीटर ऊँचा हे। स्वर्गदूत ओही नाप लेलन जे लोग आमतौर पर इस्तेमाल करऽ हथन। 18आउर ओकर शहरपनाह के सामान यशब हे, आउर ऊ नगर शुद्ध सोना के हे, जईसन शुद्ध काँच के जईसन हे।19शहर के दीवार के नींव सुन्दर कीमती पत्थर से बनल हल। हर नींव के अलग-अलग पत्थर से बनल हल। पहिला नींव के पत्थर यशब हल। दोसरा नींव के पत्थर नीलम हल। तिसरका नींव के पत्थर लालड़ी हल। चौथा नींव के पत्थर पन्ना हल। 20पाँचवाँ नींव गोमेद हल। छठा नींव माणिक्य हल। सातवाँ नींव पितमणि हल। आठवाँ नींव पेरोज हल। नौवाँ नींव पोखराज हल। दसवाँ नींव लहसनिए हल। ग्यारहवाँ नींव धूम्रकान्त हल। आउर बारहवाँ नींव याकूत हल।21शहर के बारहगो फाटक बड़का-बड़का मोतियन से बनल हल। हरेक फाटक एक-एक मोती से बनल हल। शहर के सड़क शुद्ध सोना के हल आउर ओकरा में प्रतिबिम्ब साफ काँच के जईसन दिखऽ हल।22ऊ नगर में कोई मन्दिर नऽ हल। काहेकि सर्वशक्तिमान प्रभु परमेश्वर जे सभे पर राज करऽ हथन, आउर मेम्ना ऊहाँ हलन। येहिसे मन्दिर के कोई जरुरत नऽ हल।23अब शहर के प्रकाश लागी सूरज चाहे चंद्रमा के जरुरत नऽ होत, काहेकि परमेश्वर के महिमा आउर मेम्ना के दीया के तरफ से आवे वाला प्रकाश ही ओकरा भरपूर प्रकाश देत। 24शहर में रहे वालन लोग जे तरीका से रहऽ हथन, ऊ दुनियाँ के सभे जातियन लागी एगो उदाहरण होत। धरती के राजा परमेश्वर के महिमा आउर मेम्ना के आदर करे लागी अपन खजाना शहर में लईतन।25शहर में कहियो रात नऽ होत, येहिसे कोई भी शहर के फाटक के कहियो बंद नऽ करतन जईसन कि लोग आमतौर पर दिन के अंतिम में करऽ हथन। 26आउर जाति-जाति के लोग भी अपन महिमा आदर नगर में लईतन।27बाकि ऊ नगर में कोई भी अपवित्र चीज नऽ प्रवेश करत, नऽ कोई अईसन आदमी जे परमेश्वर जे परमेश्वर के नजर में घिनामन काम करऽ हे, नऽ कोई झूठ बोलऽ हथन, आउर नऽ कोई अईसन आदमी जे ऊ नगर में प्रवेश करतन, बाकि ओही लोग ऊ नगर में प्रवेश करतन जिनकर नाम परमेश्वर मेम्ना के किताब में लिखलन हे, मतलब ऊ किताब जेकरा में अनन्त जिनगी पावेवालन के नाम लिखल हे।
Bridge Connectivity Solutions Pvt. Ltd.