Revelation19
1फिन हम स्वर्ग में एगो बड़ी बड़का भीड़ के जईसन आवाज सुनली। ऊ चिल्ला रहलन हल “हालेलूय्याह! परमेश्वर हमरा बचा लेलन हे! हमनी के परमेश्वर महिमावान, उद्धार देवेवाला आउर सामर्थी हथन!2उनकर स्तुति करऽ, काहेकि ऊ पूरा तरह से सच्चा आउर सही फईसला करऽ हथन! ऊ, ऊ दुष्ट शहर के सजा देलन हे जे वेश्या के जईसन हल, काहेकि ऊ नगर के लोगवन ढेरमनी अन्य लोगवन के उनकर जईसन व्यभिचार के काम करे लागी धरती के बहकईलन हल। उनकर स्तुति करऽ, काहेकि ऊ अपन सेवकवन के हत्या लागी उनका सजा देलन हे!” 3भीड़ फिन चिल्ला के कहलन, “हालेलूय्याह! ऊ नगर के जलावे वाला आग के धुआँ हमेशा उठते रहत!” 4तऽ चौबीसो प्राचीन आउर चारो जीवित प्राणी परमेश्वर के सामने सिंहासन पर बईठल परमेश्वर के दण्डवत करलन आउर कहलन, “सच हे! हालेलूय्याह!”5तऽ कोई सिंहासन में से बोल के कहलन, “हे उनकर सभे सेवकवन, हमर परमेश्वर के स्तुति करऽ! हे उनकर सभे सेवकवन आउर डरे वालन लोगवन स्तुति करऽ!” 6फिन हम लोगवन के एगो बड़ी बड़का भीड़ के शोरगुल सुनली। ऊ एगो बड़का शक्तिशाली समुद्र के लहर चाहे गरजे के आवाज के जईसन जोर से चिल्ला रहलन हल, “हालेलूय्याह! हमनी के प्रभु परमेश्वर सर्वशक्तिमान, जे सभे पर शासन करऽ हथन, राज करऽ हथन! 7हमनी के सच में आनन्द मनावे के चाही, आउर उनकर महिमा करे के चाही काहेकि अब ऊ समय आ गेल हे जब मेम्ना ऊ दुल्हिन से मिल जायेत, जेकरा से ऊ वियाह करे जा रहलन हे। ऊ वियाह लागी कपड़ा पेहेनलन हे।8परमेश्वर उनका पेहने लागी शुद्ध उजला कपड़ा देलन हे। ऊ महीन मलमल के कपड़ा हे।” ऊ कपड़ा ऊ सभे धार्मिक काम के देखावऽ हे जे परमेश्वर के लोग करऽ हथन।9फिन स्वर्गदूत हमरा से कहलन, “लिखऽ कि ऊ लोग केतना धन्य हथन जिनका परमेश्वर ऊ दावत में बोलावऽ हथन जब मेम्ना अपन औरत से वियाह करऽ हथन!” ऊ हमरा से ई भी कहलन, “परमेश्वर ई कहलन हे, आउर ई सच हे!”10तब हम ओकरा दण्डवत करे लागी उनकर गोड़ पर गिरली। ऊ हमरा से कहलन, "अईसन मत करऽ, हम तोर आउर तोर भईवन के साथी दास ही, जे यीशु के गवाही देवे पर अटल ही। परमेश्वर ही के दण्डवत करऽ।" काहेकि यीशु के गवाही भविष्यद्वाणी के आत्मा हे।11फिन हम स्वर्ग के खुलते देखली, आउर हम एगो अनोखा चीज देखली: यीशु एगो उजला घोड़ा पर सवार हथन! जे लोग यीशु के सच में जानऽ हथन, ऊ उनका हमेशा विश्वासयोग्य कहऽ हथन। ऊ सभे लोगवन के धार्मिकता से न्याय सही तरीका से करऽ हथन आउर ऊ ओखनी लोग से लड़ऽ हथन जे गलत काम करऽ हथन। 12अब उनकर आँख जलते ज्वाला के जईसन चमक रहल हल। उनकर माथा पर कई राजा के जईसन मुकुट हल। उनकर कपड़ा पर एगो नाम लिखल हल। खाली ओही जानऽ हथन कि ऊ नाम के का मतलब हे।13जे कपड़ा ऊ पेहेनले हलन ऊ लहू से झँक गेल। उनकर दोसर नाम परमेश्वर के वचन हे।14स्वर्गीय सेना उनकर पीछे-पीछे आ रहल हल। ऊ मेम्ना उजला घोड़ा पर सवार हलन आउर ऊ शुद्ध उजला मलमल के कपड़ा पेहेनले हलन।15आउर ओकर मुँह से एगो धारदार तलवार निकलल ताकि ऊ ओकरा पूरा जातियन पर प्रहार करत, आउर ऊ लोहा के राजदण्ड से उनका पर राज करतन, आउर ऊ सभे के शासक सर्वशक्तिमान परमेश्वर के क्रोध के जलजलाहट के दाखरस के रसकुण्ड में दाख रौंदतन।16उनकर जाँघ भीर ओकर कपड़ा पर एगो नाम लिखल अंकित हल: “ई ऊ राजा हथन जे दोसर सभे राजा पर शासन करऽ हथन आउर ई प्रभु हथन जे दोसर सभे प्रभु पर शासन करऽ हथन।” 17फिन हम एगो स्वर्गदूत के सूरज के प्रकाश में खड़ा होके आसमान के बीच में उड़े वाला सभे मांस खाय वाला चिरईंयन के ऊँचा आवाज में पुकारते देखली, “आवऽ आउर ऊ बड़का भोज लागी इकट्ठा जा जे परमेश्वर तोहनी लागी तईयार कर रहलन हे! 18आवऽ आउर परमेश्वर के शत्रु के मांस खा जे ई युद्ध में मरतन! राजा के मांस खा, सेनापतियन का मांस खा, ऊ लोगवन के मांस खा जे बहादुरी से लड़लक, घोड़वन आउर ओकर सवार के मांस खा, आउर स्वतंत्र चाहे दास कई तरह के लोगवन के मांस खा।”19फिन हम ऊ जानवर आउर धरती के राजा के अपन सेना जौरे देखली। ऊ घोड़वन पर सवार आउर उनकर सेना से लड़े लागी जमा होलन हल।20बाकि उजला घोड़ा पर सवार जानवर आउर झूठा भविष्यद्वक्ता के पकड़ लेलन। झूठा भविष्यद्वक्ता ऊ हे जे जानवर के मौजूदगी में चमत्कार करलन हल। अईसन कर के ऊ ऊ लोग के धोखा देलन हल जौन अपन माथा पर जानवर के चिन्हासी लगईलन हल आउर उनकर मूर्ति के आराधना करलन हल। तऽ परमेश्वर जानवर आउर झूठा भविष्यद्वक्ता के जिन्दा ही जलते ऊहें गंधक के झील में फेंक देलन।21आउर घोड़ा पर सवार अपन तलवार से, जे उनकर मुँह से निकलऽ हल, ओकर बाकि बचल सेना के मार देलन। चिरईं आके ऊ लोगवन आउर घोड़वन के मांस में से, जिनका ऊ मारलन हल, अपन इच्छा के मुताबिक खाय लगलन।
Bridge Connectivity Solutions Pvt. Ltd.