Revelation18
1ई घटना के घटित होवे के बाद हम एगो आउर स्वर्गदूत के स्वर्ग से उतरते देखली। परमेश्वर ई स्वर्गदूत के बड़ी बड़कागो अधिकार देलन हल। ई स्वर्गदूत एतना चमक रहल हल कि धरती पर तेज रोशनी फैल रहल हल।2स्वर्गदूत बड़ी जोर से चिल्ला के कहलन, “परमेश्वर बुरा शहर बेबीलोन के पूरा तरह से नष्ट करे वाला हथन। लोग अब शहर के खण्डहरवन में नऽ रहतन। सभे तरह के दुष्टात्मा के अड्डा ऊहाँ रहत। सभे तरह के अशुद्ध आत्मा आउर घिनामन मैला ढोवे वाला चिरईं भी ऊहाँ रहत। 3परमेश्वर बाबुल के नाश करे जा रहलन हे काहेकि ऊ दुष्ट शहर कई लोग के व्यभिचार के भयानक दाखरस में शामिल होवे लागी प्रेरित करलन। बाबुल ऊ धरती के राजा के प्रभावित करलक, आउर ओखनी अपन लोगवन के यौन अनैतिकता करे लागी मजबूर करलन। बाबुल बुरा वासना में रहे के एगो उदाहरण भी स्थापित करलक। ई दोसर स्थान के लोगवन के भी ओही तरह जीये लागी प्रेरित करलन। भोग-विलास के शक्ति से चिजवन बेचे वालन ऊ लोगवन के सामान बेच के बड़ी मनी पईसा कमईलन।” 4फिन हम स्वर्ग से कोई आउर के बोलते सुनली। ऊ कहलन, “हमर लोगवन, बाबुल के ऊ बुरा शहर से भाग जा! जदि तूँ ऊहाँ रहवऽ, तऽ तोहूँ ऊहाँ के लोगवन के तरह पाप के सहभागी बनवऽ। आउर जदि तोहूँ उनकर जईसन पाप करवऽ, तऽ हम तोरा ओईसहीं सजा देम, जईसन हम ओकरा देम। 5भाग जा, काहेकि ऊ दुष्ट नगर के लोगवन बड़ी बड़का अपराध करलन कि स्वर्ग तक पहुँच गेल हे आउर अब परमेश्वर ओकरा ओकर पाप के सजा देतन।” 6स्वर्ग से आयेल आवाज ऊ स्वर्गदूतवन से कहलन जिनका परमेश्वर बाबुल के दण्ड देवे लागी ठहरईलन हल, “ऊ शहर के लोगवन के ओतना ही दण्ड दऽ जेतना ओखनी दोसर लोगवन के नुकसान पहुँचईलक हे। बलुक, उनका ओकरा से दूगुना कष्ट दऽ जेतना ओखनी दोसर लोगवन के देलक हल। 7बेबीलोन शहर के लोग खुद के आदर दे हलन। ऊ सुख-विलास में शामिल हलन। जेतना ऊ अईसन करऽ हलन। ओतना ही ऊ दोसरा के पीड़ा दे हलन आउर उनका दुःखी करऽ हलन। अईसन येहिसे करऽ हलन काहेकि ओखनी के मन में भरोसा हल कि ऊ रानी हथन आउर हमेशा दोसरा पर राज करतन। उनका भरोसा हल कि ऊ अपन जरुरत के हर चीज खुद जुटा सकऽ हथन। उनका भरोसा हल कि उनका जौरे कहियो कुछ खराब नऽ होत।8काहेकि बेबीलोन के लोग बड़ी दुष्ट हथन, येहिसे उनका पर एक साथे भयानक घटना घटत। कुछ लोग मर जईतन आउर कुछ उनका लागी विलाप करतन। लोग भूखा रहतन काहेकि उनका भीर भोजन नऽ रहत। शहर पूरा तरह से जल जायेत। प्रभु परमेश्वर उनका ई सभे तरीका से न्याय करे के लायक हथन काहेकि ऊ शक्तिशाली हथन।” 9धरती पर रहे वालन लोगवन के राजा बाबुल के लोगवन के साथे यौन अनैतिकता करऽ हलन। ऊ बाबुल के लोगवन के साथे भोग-विलास में शामिल हलन। येहिसे जखनी ऊ शहर के जलते देखतन तऽ ऊ बड़ी विलाप करतन। 10ऊ शासक बाबुल से बड़ी दूर खड़ा होतन काहेकि उनका डर होत कि जदि ऊ जादे करीब आ गेलन तऽ परमेश्वर उनका भी सजा देतन। ऊ कहतन, “महान बेबीलोन, ऊ मजबूत शहर लागी ई केतना भयानक हे! परमेश्वर ऊहाँ रहे वालन लोगवन के एतना जल्दी दण्ड दे रहलन हे!” 11आउर धरती के व्यापारी नगर के चलते बड़ी विलाप करतन, काहेकि जे चिजवन ऊ बेचे ला चाहऽ हथन, ओकरा में रहे वाला कोई भी आदमी उनका फिन से कहियो ऊ चिजवन के नऽ खरीदतन।12ऊ सोना, चाँदी, कीमती पत्थरवन आउर मोतियन से बनल आभूषण बेचऽ हथन। ऊ बढ़ियाँ सनी आउर रेशम से बनल महँगा लाल रंग के कपड़ा आउर नींबू कि लकड़ी बेचऽ हथन, जे महँगा बैंगनी कपड़ा आउर लाल रंग में रंगल होवऽ हे।13ऊ कई तरह के सुगन्धित लकड़ी आउर हाथीदांत, सभे से महँगा लकड़ी, काँसा, लोहा आउर संगमरमर से बनल कई तरह के सामान बेचऽ हथन। ऊ दालचीनी, मसाला, धूप, इत्र, लोबान, दाखरस, जैतून के तेल, बढ़ियाँ आटा आउर अनाज बेचऽ हथन। ऊ मवेशी, भेड़, घोड़ा आउर रथ आउर आदमियन के देह आउर प्राण बेचऽ हथन। ऊ इंसान के भी गुलाम के रूप में बेचऽ हथन।14हाँ, बाबुल के लोग जे मनमोहक चीज चाहऽ हथन, ऊ सभे खतम हो चुकल हे! परमेश्वर उनकर ढेरमनी कीमती चिजवन नाश कर के उनका सजा देलन हे! ऊ अपन सभे चिजवन हमेशा लागी गवाँ चुकलन हे।15ढेरमनी व्यापारियन ई सभे चिजवन के बेच के ढेरमनी पईसा कमईलन। ऊ व्यापारी बाबुल से बड़ी दूर खड़ा होतन काहेकि उनका डर होत कि जदि ऊ बड़ी नजदीक आ गेलन तऽ परमेश्वर उनका भी सजा देतन। आउर ऊ बड़ी विलाप करतन।16आउर ऊ कहतन, “ऊ बड़का शहर में बड़ी भयानक घटना होल हे! ऊ शहर एगो अईसन औरत के जईसन हे कि जे बढ़ियाँ मलमल आउर बैंगनी आउर बेसकीमती लाल रंग के कपड़ा पेहनऽ हथन आउर कीमती पत्थर आउर मोतियन से जड़ल सोना के गहना पेहनऽ हथन।17बाकि परमेश्वर ई सभे बेसकीमती चिजवन के एतना जल्दी नाश कर देलन हे!” हरेक जहाज के कप्तान, हरेक यात्री, सभे नाविक आउर समुद्र से सम्बंधित काम करे वालन सभे लोग नगर से दूर खड़ा होतन।18जखनी ऊ ऊहाँ जलते आग के धुआँ देखतन तऽ चिल्ला उठतन, “कोई भी शहर ऊ बड़का शहर जईसन कहियो नऽ रहल!” 19ऊ अपन माथा पर धूरी भी डालतन ई देखावे लागी कि ऊ दुःखी हथन। फिन ऊ बड़ी दुःखी होके चिल्लईतन, “बाबुल में बड़ी भयानक घटना घटल हे। ऊ शहर में रहे वालन लोगवन ढेरमनी महँगा चीज खरीदलन, जेकरा से जहाज रखे वालन लोग ऊ चिजवन के ऊहाँ ले जा के ढेरमनी पईसा कमईतन। परमेश्वर ऊ शहर के एतना जल्दी बर्बाद कर देलन हे!” 20तऽ स्वर्ग से कोई बोललन, “हे स्वर्ग में रहेवालन, बाबुल शहर के जौरे जे होल हल, ओकरा पर आनन्द मनावऽ! हे परमेश्वर के पवित्र लोग, तूँ प्रेरितवन आउर भविष्यद्वक्तावन सहित, आनन्द मनावऽ काहेकि परमेश्वर ऊ नगर के लोगवन के न्याय कर के उचित सजा देलन हे, काहेकि ओखनी तोरा जौरे एतना बुरा करलन हल!”21फिन एगो शक्तिशाली स्वर्गदूत अनाज पीसे लागी एगो बड़का पत्थर के चक्की के एगो पत्थर उठईलन आउर ओकरा समुद्र में फेंक देलन। फिन ऊ कहलन, “परमेश्वर बेबीलोन के महान शहर के एकबैग नाश कर देतन! ई पूरा तरह से गायब हो जईतन, जईसे ऊ पत्थर समुद्र में गायब हो गेल हल! बेबीलोन हमेशा लागी गायब हो जायेत! 22ऊ नगर में फिन कहियो कोई वीणा बजावे वाला नऽ बजईतन, नऽ कोई गावे वाला गईतन, नऽ कोई बाँसुरी बजईतन, नऽ कोई तुरही बजईतन, नऽ कोई कारीगर कोई चिजवन बनईतन, नऽ कोई जाँता पिसते देखाई देत। 23ऊहाँ फिन कहियो कोई दीया नऽ जलत। ऊहाँ फिन कहियो कोई दूल्हा आउर उनकर दुल्हिन के खुशी भरल आवाज नऽ सुनाई देत। परमेश्वर ई शहर के नाश कर देतन काहेकि एकर व्यापारी धरती के सभे से खास लोग हलन। ऊ एतना समृद्ध हलन काहेकि ऊ अईसन लगऽ हल कि शहर जादू-टोना कर के हर समूह के अपन लोगवन के तरह जिये लागी मजबूर करलन हल। 24ई नगर भविष्यद्वक्तावन आउर परमेश्वर के पवित्र लोगवन के दोसर लोगवन में से अन्य लोगवन के हत्या के भी कसूरवार हे। काहेकि ई हिंसा के इस्तेमाल करलन आउर उपद्रव के उदाहरण पेश करलन, येहिसे ई धरती पर लोगवन द्वारा करल गेल हर हत्या के दोषी हे!”
Bridge Connectivity Solutions Pvt. Ltd.