Revelation16
1फिन हम स्वर्ग मन्दिर में कोई के ऊँचा आवाज में ऊ स्वर्गदूतवन से बात करते सुनलन जिनका भीर सात कटोरा हल। ऊ उनका से कहलन, “ईहाँ से जा आउर अपन सात कटोरा में जे कुछ हे ओकरा धरती पर उण्डेल दऽ। ई तरह से परमेश्वर लोगवन के उनकर पाप के सजा देतन।”2तऽ पहिला स्वर्गदूत गेलन आउर ऊ अपन कटोरा में जे कुछ हल, ओकरा धरती पर उण्डेल देलन। आउर जे लोगवन जानवर के सेवक के जानवर के नाम अपन देह पर लिखे देलन हल, ओकरा पर भयंकर घाव हो गेल। ई ऊ लोग हलन जे जानवर के मूर्ति के आराधना करलन हल।3फिन दोसरा स्वर्गदूत अपन कटोरा में जे कुछ हल, ऊ समुद्र में उण्डेल देलन। नतिजतन, समुद्र के पानी लहू में बदल गेल। ऊ खून सड़ गेल आउर मरल इंसान के खून के जईसन बदबूदार हो गेल। समुद्र में रहे वालन सभे प्राणी मर गेल।4फिन तिसरका स्वर्गदूत अपन कटोरा में जे कुछो हल, ओकरा धरती के नदी आउर झरना पर उण्डेल देलन। नतीजा ई होल कि ओकर पानी लहू में बदल गेल।5फिन हम ऊ स्वर्गदूत के जे ऊ पानी के दूत हल, परमेश्वर से कहते सुनली, “हे परमेश्वर, तूँ अस्तित्व में हऽ आउर हमेशा से अस्तित्व में रहऽ हऽ। तूँ परमपवित्र आउर धर्मी हऽ। तूँ लोगवन के न्याय करे वाला निष्पक्ष न्यायाधीश हऽ।6तोर खिलाफ विवाद करे वालन तोर पवित्र लोगवन आउर भविष्यद्वक्तावन के घात करलक हे, येहिसे तूँ ओकरा लहू पिलाके दण्ड दे के न्याय करऽ हऽ।”7तऽ हम वेदी के जबाब देते सुनली, “हाँ, हे सर्वशक्तिमान प्रभु परमेश्वर, तूँ जे सभे पर शासन करऽ हऽ, तूँ लोगवन के पूरा तरह से सच्चा न्यायपूर्ण सजा दे हऽ।” 8फिन चौथा स्वर्गदूत अपन कटोरा में जे कुछो हल, ओकरा सूरज पर उण्डेल देलन। नतीजा ई हो कि सूरज एतना गरम हो गेल कि ओकरा से लोग बड़ी बुरा तरह से जले लगल।9काहेकि सूरज आदमियन के खराब तरह जला देलक हल, येहिगुने ओखनी परमेश्वर के नाम के बारे में निन्दा के बात कहलन काहेकि उनका भीर उनका ई तरीका से सजा देवे के शक्ति हल। बाकि फिन भी ओखनी मन फिरावे से इंकार कर देलन आउर ओखनी उनकर स्तुति करे से मना कर देलक।10तऽ पाँचवाँ स्वर्गदूत अपन कटोरा में जे कुछ हल, ओकरा पशु के सिंहासन पर उण्डेल देलन। नतिजतन, जहाँ पशु के शासन हल, ऊहाँ अंधार छा गेल। काहेकि ऊहाँ हर घड़ी रात ही रात हल, येहिसे जे लोग पर पशु के शासन हल, ऊ अपन भयंकर घाव के दरद आउर भी जादे महसूस करऽ सकऽ हलन। येहिसे ऊ ई दरद के चलते अपन जीभ काट रहलन हल।11ऊ स्वर्ग में शासन करे वालन परमेश्वर के बारे में भी बड़ी निन्दा करलन, काहेकि उनकर घाव बड़ी दर्दनाक हल। तईयो ओखनी गलत काम करे लागी मन फिराव करे से इंकार कर देलन।12फिन छठा स्वर्गदूत अपन कटोरा में जे कुछ हल, ओकरा फरात नदी पर उण्डेल देलन। एकरा से नदी के पानी सूख गेल आउर पूरब देशवन के राजावन अपन सेना के साथे नदी पार कर सकतन। 13फिन हम तीन दुष्टात्मा देखली जे मेंढ़कवन जईसन दिखऽ हल। एगो अजगर के मुँह से निकलल, एगो जानवर के मुँह से निकलल, आउर एगो झूठा भविष्यद्वक्ता के मुँह से निकसल।14अब ऊ आत्मा दुष्टात्मा हल जे चिन्ह चमत्कार करे में सक्षम हल। ऊ पूरा दुनियाँ के राजावन भीर अपन सेना जमा करे लागी गेलन। ऊ सेना ऊ खास दिन पर युद्ध लड़त जब सर्वशक्तिमान परमेश्वर अपन दुश्मन के सजा देतन।15हम प्रभु यीशु के ई कहते सुनली, “तूँ हमर बात धियान से सुनऽ: हम चोर के जईसन एकबैग आ रहली हे। ई ऊ लोगवन लागी धन्य होत जे सतर्क रहऽ हथन आउर सही तरीका से जीते रहऽ हथन। जब हम वापस आयेम तऽ उनका शर्मिंदगी महसूस नऽ होत। ऊ ऊ आदमी के जईसन होतन जे अपन कपड़ा पेहेनले रहऽ हथन जेकरा से ऊ दोसर लोगवन सामने लज्जित महसूस नऽ होतन।”16दुष्टात्मा शासकवन के एक जगह जमा करलन जेकर नाम इब्रानी भाषा में हर-मगिदोन हे।17तऽ सातवाँ स्वर्गदूत अपन कटोरा में से कुछ हवा में उण्डेल देलन, आउर मन्दिर के सिंहासन में से कोई ऊँचा शब्द से कहलन, “परमेश्वर विद्रोहियन के दण्ड देवे ला बंद कर देलन हे।”18फिन बिजुली चमकल, बादल गरजल आउर धरती जोर से हिलल। धरती पर जेतना दिन से लोग रहते अईलन हे, उतना दिन में कहियो एतना बड़का भूकम्प नऽ आयेल हल। 19ई भूकम्प के वजह से विशाल शहर तीन हिस्सा में बँट गेल। परमेश्वर दोसर देशवन के शहर के भी नष्ट कर देलन। परमेश्वर ई नऽ भूलईलन कि बेबीलोन शहर के लोगवन बड़ी पाप करलन हल। येहिसे ऊ अपन गोस्सा के जलजलाहट के दाखरस पिलईलन आउर उनका ऊ सजा देलन जेकर ऊ हकदार हलन।20भूकम्प के चलते हर द्वीप गायब हो गेल आउर पहाड़ बराबर जमीन बन गेल।21फिन आसमान से तैंतीस किलोग्राम के बड़का-बड़का ओला लोगवन पर गिरे लगल। तऽ लोगवन परमेश्वर के बारे में निन्दा करलन काहेकि ऊ ऊ बड़का-बड़का, भारी ओला से उनका ऊ भयानक तरीका से सजा देलन हल।
Bridge Connectivity Solutions Pvt. Ltd.