Revelation15
1फिन आसमान में एगो आउर बड़ी खास चिन्ह देखाई देलक। हम सात स्वर्गदूतवन के देखली। परमेश्वर उनका विद्रोही लोगवन के सातगो अलग-अलग तरीका से सजा देवे के काम सौंपलन हल। ई आखिरी बार हे जखनी परमेश्वर लोगवन के ई तरह से सजा देतन, काहेकि ई सजा के जरिये ऊ धरती पर लोगवन के ऊ सभे सजा देलन होत जेकर ऊ हकदार हथन।2हम काँच के एगो बड़का समुद्र के जईसन इलाका भी देखली जे रोशनी से चमक रहल हल। हम ऊ लोगवन के भी देखली जौन जानवर चाहे ओकर मूर्ति के पूजा नऽ कर के आउर कोई के भी जानवर के नाम के देखावे वाला अंक से उनका चिन्हित नऽ करे देवे के ओकरा पर विजय प्राप्त करलन हल। ऊ काँच के बड़का समुद्र के जगह पर खड़ा हलन। ऊ वीणा पकड़ले हलन जे परमेश्वर उनका देलन हल।3ऊ लोग अईसन गीत गा रहलन हल जईसन परमेश्वर के सेवक मूसा बड़ी पहिले गईलन हल। ई ओही तरह के गीत हल जईसन मेम्ना अखनी गावऽ हथन। आउर ओखनी गईलन, “हे सर्वशक्तिमान प्रभु परमेश्वर, जे सभे पर शासन करऽ हथन, तूँ जे कुछ भी करऽ हऽ ऊ बड़ी अनोखा हे! तूँ हमेशा पूरा तरह से धार्मिकता के मार्ग आउर सच्चाई से काम करऽ हऽ। तूँ हमेशा राजा के रूप में शासन करऽ हऽ! 4हे प्रभु, सभे लोग तोरा से डरतन आउर तोरा नाम के आदर करतन, काहेकि खाली तूँही पवित्र हऽ। हाँ, हर जातियन के लोग अईतन आउर तोर आराधना में दण्डवत करतन काहेकि तूँ देखईलऽ हे कि तूँ सभे के न्याय सही ढंग से करलऽ हे।” 5फिन, ओकर बाद, हम देखली कि स्वर्ग में गवाही के तम्बू के मन्दिर के दुआरी खुलल हल। ऊ स्वर्गीय मन्दिर धरती पर ऊ तम्बू के जईसन हल जेकरा में पवित्र सन्दूक रखल हल।6सातगो स्वर्गदूत जिनकर काम विद्रोही लोगवन के सातगो अलग-अलग ढंग से सजा देवे के हल, मन्दिर से बाहरसी अईलन। स्वर्गदूतवन शुद्ध, उजला मलमल के कपड़ा पेहेनले हलन। ओखनी अपन छाती पर सुनहरा कपड़ा के कमरबन्द भी बाँधले हलन।7चारगो जीवित प्राणी में से एगो सातो स्वर्गदूतवन के एक एकगो सुनहरा कटोरा देलन। हरेक कटोरा में ओखनी लोगवन लागी अलग-अलग तरह के सजा हल जौन गलत काम करलन हल। स्वर्गदूत ई सजा परमेश्वर के तरफ से दे हलन, जे हमेशा-हमेशा ला जिन्दा रहऽ हथन। 8तऽ मन्दिर में धुआँ भर गेल जे महिमावान आउर सर्वशक्तिमान परमेश्वर के मौजूदगी के देखावऽ हल। जखनी स्वर्गदूत विपत्तियन दे रहलन हल तखनी ला धुआँ ऊहें रहल। जब सातो स्वर्गदूतवन धरती के लोगवन के सात अलग-अलग तरीका से सजा देवे ला बंद कर देलन, तऽ कोई भी आदमी मन्दिर में फिन से प्रवेश कर सकऽ हलन।
Bridge Connectivity Solutions Pvt. Ltd.