Revelation14
1फिन हम मेम्ना के यरूशलेम में सिय्योन पहाड़ पर खड़ा देखली। उनका साथे एक लाख चौवालीस हजार लोग हल। ऊ उनकर माथा पर अपन आउर मेम्ना के अपन पिता के नाम लिखल हल।2हम स्वर्ग से एगो आउर आवाज सुनली। ई आवाज कोई बड़का झरना चाहे बड़ी तेज गड़गड़ाहट के आवाज जईसन हल। ई आवाज अईसन लग रहल हल जईसे बड़ी मनी लोग वीणा बजा रहल हलन हे। 3ई आवाज ऊ लोगवन के हल जे एगो नया गीत गा रहलन हल। ऊ सिंहासन आउर चारगो जीवित प्राणी आउर चौबीस प्राचीन के सामने खड़ा हलन। मेम्ना ई एक लाख चौवालीस हजार लोग के धरती के सभे लोगवन में से छोड़ईलन हल। खाली ओही ऊ गीत के सीख सकऽ हलन।4ऊ एक लाख चौवालीस हजार लोग आत्मिक रूप से शुद्ध हथन, जईसे कुँवारी नैतिक रूप से शुद्ध होवऽ हथन। ओखनी कोई झूठा देऊता के पूजा कर के खुद के अशुद्ध नऽ करलन हे। ऊ ऊ लोग हथन जे मेम्ना के साथे चलऽ हथन, जे एगो मेम्ना जईसन हथन, जहाँ भी ऊ जा हथन। ऊ ऊ सभे लोगवन के प्रतिनिधित्व करऽ हथन जिनका ऊ अखनी लागी धरती के लोगवन में से छोड़ईलन हे। जे लोग यीशु में विश्वास करऽ हथन ऊ अपन विश्वास साझा करतन आउर कई दोसर लोगवन के परमेश्वर आउर यीशु में विश्वास करे लागी प्रेरित करतन। 5ई लोगवन कहियो यीशु के इंकार नऽ करलन। ऊ हमेशा पवित्र जिनगी जीयऽ हलन।6फिन हम एगो आउर स्वर्गदूत के आसमान के बीच में उड़ते देखली। ऊ स्वर्ग से परमेश्वर के हमेशा सुसमाचार लेके अईलन जेकरा से ऊ ई धरती पर रहे वालन लोगवन के सुनईतन। ऊ एकरा हर जाति, हर कुल, हर भाषा बोले वालन के आउर हर समूह के लोगवन के सुनईतन।7ऊ ऊँचा आवाज में कहलन, “परमेश्वर के आदर करऽ आउर उनकर महिमा करऽ काहेकि अब सभे के न्याय करे के समय आ गेल हे! उनकर आराधना करऽ काहेकि ओही स्वर्ग आउर धरती आउर समुद्र आउर मीठा पानी के बनईलन हे।” 8फिन उनकर बाद एगो आउर स्वर्गदूत अईलन। आउर ऊ स्वर्गदूत कहलन, “बेबीलोन के दुष्ट शहर अब पूरा तरह से बर्बाद हो गेल हे! बेबीलोन हर देश के लोगवन के व्यभिचार कर के परमेश्वर के प्रति विश्वासघात करे लागी दाखरस पिलईलन करलन।” 9एकर बाद एगो आउर स्वर्गदूत अईलक आउर ऊ ऊँचा आवाज में कहलन, “जदि लोग ऊ जानवर आउर ओकर मूर्ति के आराधना करऽ हथन चाहे कोई के अपन माथा चाहे हाथवन पर ओकर चिन्हासी लगावे दे हथन,10परमेश्वर ओकरा उचित दण्ड देतन। ऊ सजा से लड़खड़ईतन जईसे कि ओखनी तेज दाखरस पी लेलन हे। ऊ ओकरा जलते गंधक में पीड़ा देतन, आउर उनकर पवित्र स्वर्गदूत आउर मेम्ना ओकरा देखते रहतन।” 11जे आग के धुआँ उनका पीड़ा दे हे, ओकर धुआँ हमेशा उठते रहत। परमेश्वर उनका बिना रुकले हर घड़ी पीड़ा देतन। येही ऊ सभे लोगवन के जौरे होत जे ऊ जानवर आउर ओकर मूर्ति के आराधना करऽ हथन चाहे जे कोई अपना ऊपर ओकर नाम लिखे दे हथन।12परमेश्वर के पवित्र लोग ऊ हथन जे परमेश्वर के आज्ञावन के पालन करऽ हथन आउर यीशु पर विश्वास करऽ हथन। ओकरा ई काम के ईमानदारी से करते रहे के चाही काहेकि जे लोग परमेश्वर के आज्ञा नऽ मानऽ हथन आउर यीशु के इंकार करऽ हथन, उनका ई पीड़ा के अनुभव होत।13फिन हम स्वर्ग से कोई के ई कहते सुनली, “ई लिखऽ: जे लोग प्रभु में विश्वासयोग्य होके मरऽ हथन, ऊ अखनी से केतना धन्य हथन।” पवित्र आत्मा कहऽ हथन, “हाँ, मरला के बाद उनका आउर जादे पीड़ा नऽ सहे पड़त। एकर बजाय, ई साफ हो जायेत कि ऊ अच्छा काम कर रहलन हल।”14फिन हम एगो आउर बड़ी खास चीज देखली। हम एगो उजला बादल देखली, आउर ऊ बादल पर एगो आदमी के बेटा जईसन बईठल हलन जे एगो इंसान के जईसन जना रहलन हल। आउर ऊ अपन माथा पर एगो सुनहरा मुकुट पेहेनले हलन आउर उनकर हाथ में एगो तेज हँसुआ हल। 15फिन एगो आउर स्वर्गदूत स्वर्ग के मन्दिर में से निकस के अईलन आउर ऊँचा आवाज से बादल पर बईठल वाला से कहे लगलन, “धरती पर अनाज पक चुकल हे। येहिसे ओकरा काटे के समय आ गेल हे। येहिसे अपन हँसुआ चलऽ के अनाज काटऽ।”16तब ऊ आदमी जे आदमी जईसन दिखऽ हलन आउर जे बादल पर बईठल हलन, ऊ अपन हँसुआ से धरती के सभे अनाज के काट देलन।17फिन एगो आउर स्वर्गदूत स्वर्गीय पवित्रस्थान से निकसल, आउर ऊ भी एगो तेज हँसुआ पकड़ले हल।18एगो आउर स्वर्गदूत वेदी से अईलन। ऊ ओही हथन जे वेदी के आग पर अधिकार से देख भाल करऽ हथन। ऊ हँसुआ पकड़ले स्वर्गदूत से ऊँचा आवाज में कहलन, “धरती पर अंगूर पक चुकल हे! येहिसे अपन हँसुआ से धरती के अंगूर के दाखलता से अंगूर के गुच्छा काट लऽ। फिन ऊ अँगूरवन के गुच्छा के जमा करऽ।”19तऽ स्वर्गदूत अँगूरवन के काटे लागी धरती पर अपन हँसुआ के इस्तेमाल करलन आउर ऊ दाखलता के कुण्ड में फेंक देलन जे ऊ जगह के देखावऽ हे जेज्जा परमेश्वर लोगवन के ओकर गलत काम के सजा देतन।20परमेश्वर यरूशलेम नगर के बाहर एगो दाख के कुण्ड में अँगूरवन के रौंदलन, आउर जखनी ऊ अईसन करलन, तऽ कुण्ड में से खून बहे लगल! लहू एतना बहे लगल कि एगो धारा बन गेल आउर घोड़ा के लगाम तक पहुँच गेल जे डेढ़ मीटर गहरा हल आउर तीन सौ किलोमीटर तक फैलल हल।
Bridge Connectivity Solutions Pvt. Ltd.