Revelation1
1ई किताब ऊ बात के बारे में हे जे परमेश्वर यीशु मसीह के प्रकट करलक। ई सभे बात बस होवे ही वाला हल। परमेश्वर उनका यीशु के प्रकट करलन जेकरा से ऊ ऊ लोगवन के बता सकतन कि जे उनका पर विश्वास करऽ हथन। यीशु ई सभे बात के अपन स्वर्गदूत के भेज के अपन दास यूहन्ना के देखईलन हे, जे उनकर सेवा करे वाला एगो आदमी हथन। 2हम यूहन्ना, परमेश्वर के ई गवाही के बारे में जे यीशु मसीह हमरा पर प्रकट करलन हे, आउर जे कुछ हम देखली हे, ऊ सभे तोरा बता रहली हे।3ऊ आदमी केतना धन्य हथन जे ई भविष्यद्वाणी के किताब के पढ़ऽ हथन जेकरा से दोसर लोग सुन सकऽ हथन, आउर ऊ सभे केतना धन्य हथन जे एकरा सुनऽ हथन आउर ई भविष्यद्वाणी के लिखल बात के पालन करऽ हथन, काहेकि ई सभे घटना जल्दी ही घटत।4हम, यूहन्ना, आसिया प्रान्त के विश्वासियन के सात कलीसिया के ई चिट्ठी लिख रहली हे। परमेश्वर तोहनी पर अनुग्रह करते रहतन आउर तोरा शान्ति देते रहतन। परमेश्वर मौजूद हथन, आउर ऊ हमेशा से मौजूद हथन, आउर ऊ भविष्य में अईतन आउर सभे के न्याय करतन। परमेश्वर के सिंहासन के सामने जे सात आत्मावन हे, ऊ भी तोहनी पर दया करते रहतन आउर तोरा शान्ति प्रदान करते रहतन। 5यीशु मसीह भी तोरा पर दया करते रहतन आउर तोरा शान्ति देते रहतन। ऊ हमनी के परमेश्वर के संदेश विश्वसनीय आउर गवाह के रूप में बतईलन हे। ऊ पहिला आदमी हथन जिनका परमेश्वर मरला के बाद फिन से जिन्दा करलन। ऊ ओही हथन जे धरती के राजावन के शासक हथन। काहेकि ऊ हमनी से प्रेम करऽ हथन, ऊ क्रूस पर मरते घड़ी हमनी ला अपन लहू बहईलन, आउर नतिजतन, परमेश्वर हमनी के पाप के क्षमा कर देलन हे। 6ऊ यीशु ही हथन जे हमनी के अईसन लोग बनईलन हे, जिनकर जिनगी पर परमेश्वर शासन करऽ हथन। ऊ हमरा याजक भी बनईलन हे जे परमेश्वर के सेवा करऽ हथन, जे यीशु के पिता हथन। लोग यीशु के महिमा करतन आउर उनकर अनन्तकाल ला अपन राजा के रूप में कबूल करतन। आमीन! 7गौर करऽ! यीशु स्वर्ग से आकाश के राह से वापस आवे वाला हथन। सभे कोई उनका देखतन, ईहाँ तक कि ऊ सभे लोग भी जिनकनी उनका क्रूस पर काँटी से ठोक के मार देलन हल। जखनी ऊ उनका अईते देखतन, तऽ धरती के हर कुल अपन पापवन लागी दुःख में शोक करतन। आमीन! 8प्रभु परमेश्वर कहऽ हथन: “हम ही अल्फा ही जे सभे चिजवन के शुरुआत करली हे। आउर हम ही ओमेगा ही जे सभे चिजवन का अन्त कर देम। हम ही ऊ ही जे अस्तित्व में ही, जे हमेशा से अस्तित्व में रहलन हे, आउर जे भविष्य में अईतन आउर जे सर्वशक्तिमान हथन सभे के न्याय करतन। हम ही ऊ ही जे हर चीज आउर सभे पर राज करऽ ही।” 9हम, यूहन्ना तोर भाई, यीशु पर विश्वास करऽ ही, जईसन कि तूँ करऽ हऽ। तोहनी जईसन, हम भी ऊ सभे दुःखवन के धीरज से सह रहली हे जे यीशु मसीह के राज में सभे कोई के सहभागी हे। रोमी सरकार हमरा निर्वासन में पतमुस टापू पर रखल गेल हल काहेकि हम लोगवन के यीशु के बारे में परमेश्वर के गवाही बता रहली हल।10ई एतवार के दिन हल, जौन दिन विश्वासी आराधना करे लागी जमा होवऽ हथन काहेकि परमेश्वर ऊ दिन यीशु के फिन से जिन्दा करलन हल। पवित्र आत्मा हमरा प्रेरित करलन जेकरा से हम दर्शन में बड़ी मनी चीज देख आउर सुन सकम। हम अपन पीछे कोई के बोलते सुनली। ओकर आवाज तुरही के आवाज जेतना तेज हल। 11बोले वाला हमरा से कहलन, “जे कुछ तूँ देख लऽ हे, ओकरा एगो किताब पर लिखऽ। जे कुछ तूँ लिख लऽ हे, ओकरा इफिसुस, स्मुरना, पिरगमुन, थुआतीरा, सरदीस, फिलदिलफिया आउर लौदीकिया के सातो नगर में रहे वालन विश्वासियन भीर भेजऽ दऽ।”12जखनी हम ई आवाज सुनली, तऽ हम अपन माथा घुमईली कि कौन हमरा से बात कर रहलन हे। जब हम मुड़ली, तऽ हम सात सोना के दीया रखे वाला दीवट देखली।13हम दीवट के बीच में एक आदमी के बेटा जईसन देखली जे इंसान जईसन दिखऽ रहलन हल। ऊ गोड़ तक ला एगो बागा पेहेनले हलन। ऊ अपन छाती पर एगो सुनहरा कमरबन्द बाँधले हलन। 14उनकर माथा के बाल उजला ऊन चाहे उजला बरफ के जईसन चमक रहल हल। उनकर आँख आग के लपटा के जईसन चमक रहल हल। 15उनकर गोड़ भट्ठी के तपिश से शुद्ध करल बढ़ियाँ पीतल के जईसन चमक रहल हल। जब ऊ बोलऽ हलन, तऽ उनकर गूँजते आवाज तेज धार वाला नदी के आवाज के जईसन होवऽ हल। 16ऊ आदमी जईसन दिखऽ रहलन हल आउर अपन दहिना हाथ में सातगो तरेगन पकड़ले हलन। उनकर मुँह से दू धार वाला तलवार निकल रहल हल। उनकर मुँह दिन के दूपहर में सूरज के अपन सामर्थ के जईसन चमक रहल हल। 17जब हम उनका देखली, तऽ हम उनकर सामने झुकली। हम एतना डेरा गेली कि हिल नऽ सकली। बाकि ऊ अपन दहिना हाथ हमरा पर रखलन आउर हमरा कहलन, “डरऽ मत! हमहीं प्रथम ही जे सभे कुछ शुरु करली हे आउर हम ही अंतिम ही जे सबकुछ खतम करम।” 18हम हमेशा से जिन्दा रहली हे। जखनी हम धरती पर अईली तऽ हम मर गेली हल, बाकि अब हम हमेशा लागी फिन से जिन्दा ही। हमरा भीर अधोलोक के कुँजी आउर मरल आदमी के जिन्दा करे के सामर्थ हे। 19येहिसे, जौन दर्शन तूँ हमरा बारे में देख लऽ हे, ओकरा लिख लऽ। हम तोरा सच्चाई बतायेम कि ई घड़ी का हो रहल हे आउर भविष्य में का होत। हम चाहऽ ही कि तूँ ऊ बात के भी लिख लऽ।20हम ऊ सातगो तरेगन के भेद समझायेम जेकरा तूँ हमर दहिना हाथ में देख लऽ हल आउर सातगो सोना के दीवट के भेद। आउर सातगो तरेगन आउर विश्वासियन के सातगो कलीसिया के स्वर्गदूतवन के देखावऽ हथन। आउर सात दीवट विश्वासियन के सात कलीसिया के देखावऽ हे।
Bridge Connectivity Solutions Pvt. Ltd.