Jude1
1हम, यहूदा, जौन यीशु मसीह के दास सेवा करऽ ही, आउर याकूब के छोटका भाई ही। हम ई तोहनी ला चिट्ठी लिख रहली हे कि जिनका परमेश्वर बोलईलन हे, तोहनी के जिनका परमेश्वर पिता प्रेम करऽ हथन, तोहनी के जिनका यीशु मसीह अपना ला सुरक्षित रखलन हे।2हम प्रार्थना करऽ ही कि तोहनी के प्रति परमेश्वर अपन कृपालु व्यवहार के बढ़ईतन आउर तोरा जादे शान्ति देतन आउर तोरा उनकर प्रेम के जादे अनुभव करवईतन।3हे प्रिय साथी विश्वासी लोग! जिनका भक्तिभाव से हम प्रेम करऽ ही, हम तोरा उद्धार के बारे में ई चिट्ठी लिखे ला हमनी सभे सहभागी ही आउर अपन उत्सुकता से सभे से बढ़ियाँ कोशिश करली कि कईसे परमेश्वर हमनी सभे के जौन विश्वास करऽ हे, बचईलन। तईयो, बजाय एकर ई चिट्ठी हमरा तोरा लिखे पड़ल जेकरा से ऊ सभे सच बात के बचाव करे के बारे में तोरा से निवेदन करीयई जिनका पर हम विश्वास करऽ ही। येही ऊ सभे बात हे जेकरा परमेश्वर हर समय में ओखनी सभे लोग के सौंपलन हे जिनका ऊ पवित्र ठहरईलन हे।4हम तोरा से ओईसहीं करे ला निवेदन करऽ ही काहेकि कुछ आदमी चुपके से तोहनी के सभा में घूँस गेलन हे। ऊ अईसन आदमी हथन जिनका परमेश्वर बड़ी समय पहिले से सजा देवे लागी चुनल लेलन हे। ओखनी भक्तिहीन काम करऽ हथन। ओखनी सोचऽ हथन कि हमनी के परमेश्वर लोगवन के वासना से भरल अनैतिक होवे के आदेश येहिगुने देवऽ हथन काहेकि मसीह तऽ दयावान हथन। एकर जौरे ओखनी सभे ऊ बात के विरोध करऽ हथन जे यीशु मसीह के बारे में सच हे, जौन कि हमनी के खाली एगो स्वामी हथन आउर हमनी पर प्रभुता करऽ हथन।5जबकि तूँ पहिलहीं से ई सभे बात के जानऽ हलऽ, हम तोरा उनका याद करवावे के चाह रखऽ ही। याद रखऽ कि यीशु के इस्राएल के लोग के मिस्र देश से छुड़ा लेला के बाद, ऊ ओखनी के बीच में से अईसन लोग के नाश कर देलन जिनकनी के उनका पर विश्वास नऽ रखऽ हलन। 6एकर साथे ही, कुछ स्वर्गदूत अपन ऊ स्थायी पद पर टिकल नऽ रहलन जहाँ पर उनका भीर अधिकार हल बाकि ओकरा त्याग देलन। काहेकि ओखनी सभे अईसन करलन येहिसे परमेश्वर ओखनी बंधक बना के अनन्तकाल लागी अंधार में नरक में डाल देलन। परमेश्वर अईसन येहिसे करलन जेकरा से ऊ महान दिन पर फईसला करतन जौन दिन ऊ सभे बात के न्याय करतन।7येही बात ओखनी लोग लागी भी सच हे जौन सदोम आउर अमोरा के नगरवन में आउर ओकर अगल-बगल के नगर में रहल करऽ हलन। ओखनी सभे व्यभिचार से भर के पराया देह के पीछे अनैतिक रीति से ओईसने व्यवहार करलन जईसन ओखनी सभे स्वर्गदूत करलन हल। ओखनी सभे, सभे किसीम के गलत व्यभिचार के काम में भाग लेलन। ई स्वर्गदूत आउर लोग के नरक के आग में हमेशा ला दुःख देवे से, परमेश्वर ओखनी के एगो उदाहरण ठहरा रहलन हे ओखनी ला जौन उनका इंकार कर दे हथन। 8ओही तरह से, ई झूठा गुरु अईसन स्वप्नदर्शी हथन जे अनैतिकता से भरल जिनगी जीये से नऽ खाली अपन देह के गन्दा करऽ हथन, बाकि प्रभु के आदेश के भी निन्दा करऽ हथन ईहाँ ला कि ओखनी सभे परमेश्वर के अधिकार आउर तेजस्वी स्वर्गदूतवन के भी अनादर करऽ हथन।9ईहाँ तक कि परमेश्वर के प्रधान स्वर्गदूत में से एगो मीकाएल भी शैतान के खिलाफ ऊ समय पर निन्दात्मक आउर भेद भाव भरल आरोप लगावे में एतना हिम्मतगर नऽ हल जखनी ऊ मूसा के लाश के बारे में बाद-विवाद करलन हल। बजाय एकर, ऊ खाली एही कहलन, “प्रभु तोरा डाँटे!”10एकर उल्टा, ई झूठा गुरु ऊ आत्मिक बात के बारे में बुरा बात बोलऽ हथन जेकरा ऊ समझऽ नऽ हथन। ऊ सभे अईसन जानवर के जईसन हथन जौन तर्कशक्ति से सोच नऽ सकलन हे। जौन बात के ओखनी प्राकृतिक रूप से समझे में सक्षम हथन ओही ओखनी के नाश कर रहल हे।11ई उनका ला केतना आफत हे! ऊ कैन के जईसन काम करऽ हथन, जौन अपन भाई के हत्या करलन हल। ओखनी खुद के ओही पाप के करे लागी सौंप देलन हे, जौन धन पावे लागी बिलाम करलन हल। परमेश्वर निश्चित रूप से ओखनी के ओईसहीं नाश करतन, जईसे ऊ कोरह आउर ऊ लोग के नाश करलन हल जिनकनी उनका साथे मूसा के विरोध में बगावत करलन हल। 12ई लोग बेशरम होके तोहनी साथे खा हे। तोहनी के प्रीतिभोज में ऊ लोग पानी में छिपल चट्टान के जईसन हथन जेकरा से जहाज टकरा जा हे। ओखनी खाली खुद के ही देख भाल कर हथन। ऊ लोग अईसन बादल के जईसन निकम्मा हथन, जेकरा हवा अपना जौरे उड़ा के ले जा हे एकरा से पहिले कि ऊ बरसत। ऊ लोग अईसन पेड़ के समान निकम्मा हथन, जौन फसल के समय पर फल नऽ दे हे। ओखनी अईसन पेड़ के जईसन हथन जे दू बेरा येहिगुने मरतन काहेकि परमेश्वर ओकरा जड़ी से उखाड़ देतन। 13ऊ समुद्र के प्रचण्ड लहर के समान बेकाबू हथन। ओखनी अपन घिनामन काम के ओईसहीं प्रदर्शित करऽ हथन जईसे लहर फेन उठावऽ हे। ऊ अईसन तरेगन के जईसन हथन जे आसमान में ऊहाँ नऽ रहऽ हे जहाँ ओकरा रहे के चाही। परमेश्वर उनका ला अनन्त नरक के घोर अंधार सहेज के रख रहलन हे। 14ईहाँ तक कि हनोक, जौन आदम के वंशज के लोग के पीढ़ी में सातवाँ आदमी हलन, ऊ भी ई सभे झूठा गुरुअन के बारे में भविष्यद्वाणी करलन हल जखनी ऊ कहलन: “एकरा गौर से सुनऽ: पक्का रूप से प्रभु अपन अनगिनती पवित्र स्वर्गदूतवन के साथे अईतन। 15ऊ अईतन सभे के जिनगी के न्याय करे आउर ऊ सभे के अभक्ति के काम ला डाँटे जौन ओखनी भक्तिहीन रीति से करलन हे, आउर ऊ सभे भारी अपमान लागी जौन यीशु के खिलाफ ई सभे लोग बोललन हे, जौन पाप करऽ हथन आउर परमेश्वर के अनादर करऽ हथन।”16ई सभे झूठा शिक्षक खुद ही कुड़कुड़ा हथन आउर दोसरा से शिकायत करऽ हथन। ऊ अपन पापमय अभिलाषा के मुताबिक जिनगी जीयऽ हथन आउर अपने बड़ाई करऽ हथन। ओखनी जौन चाहऽ हथन ओकरा उनका से पावे लागी ऊ लोग के चापलूसी करऽ हथन।17बाकि तूँ हे प्रिय साथी विश्वासी लोग! जिनका से हम प्रेम करऽ ही, याद रखऽ जे हमनी के प्रभु यीशु मसीह के प्रेरितवन बड़ी समय पहिले सुसमाचार में कहलन हल।18याद रखऽ कि ओखनी तोरा से कहलन हल, “अंतिम दिन में यीशु के वापसी से पहिले, अईसन लोग होतन जौन ऊ सच्चा बात के जौन परमेश्वर हमनी के बतईलन हे मजाक उड़ईतन। ऊ अपन ऊ सभे पापमय अभिलाषा के मुताबिक जिनगी जीतन, जेकरा से परमेश्वर के अनादर होवऽ हे।” 19ई सभे मजाक उड़ावे वाला ऊ लोग हथन जौन विश्वासियन के एक दोसरा के प्रति गोस्सा दिलावऽ हथन। ओखनी अपन स्वभाविक प्रवृति के मुताबिक जिनगी जीय हथन। उनकर भीतर परमेश्वर के पवित्र आत्मा वास नऽ करऽ हे।20तईयो भी, तूँ हे प्रिय साथी विश्वासियन जिनका से हम प्रेम करऽ ही, परमेश्वर में अपन विश्वास बढ़ावे के द्वारा आउर पवित्र आत्मा के मदत से प्रार्थना करे के द्वारा,21ऊ रीति से जिनगी के बितईते रहऽ, जे तोरा परमेश्वर के प्रेम के अनुभव करे में सक्षम करऽ हे। अईसहीं करऽ जखनी तूँ हमनी के प्रभु यीशु मसीह के दया सहित वापसी करे के आसरा करऽ हऽ, जेकर फल होत उनका साथे हमेशा लागी जिनगी।22आउर उनकर प्रति दया करऽ जौन शंका में हथन ई बारे में कि ओखनी के किनका पर विश्वास करे के चाही।23बाकि जल्दी से दोसरा लोग के अईसे बचावऽ, जईसे कि तूँ ओकरा नरक के आग में से बाहरसी निकास रहलऽ हे। आउर कुछ दोसर लोग पर दया करऽ, बाकि उनका प्रति अईसे डरऽ जईसे कि उनकर देह के चलते उनकर कपड़ा के छू लेवे से ही तूँ पापी हो जईवऽ।24परमेश्वर तोरा पापी जिनगी के तरफ से लौट जाय से रोके में सक्षम हथन। ऊ ई बात में भी सक्षम हथन कि तोरा निर्दोष कर के अपन महिमामय मौजूदगी में ले जईतन। बड़ी खुशी के साथे तूँ ऊहाँ पर खड़ा होवऽ।25खाली एक्केगो गो परमेश्वर हथन। हमनी के प्रभु यीशु मसीह जौन हमनी ला करलन ओकर नतीजा, ऊ हमनी के उद्धार करलन। हम प्रार्थना करऽ ही कि हरेक जन जान लेतन कि परमेश्वर महिमामय, प्रतापी, सामर्थी हथन, आउर बड़ी अधिकार के साथे प्रभुता करऽ हथन। दुनियाँ के शुरु होवे के पहिले से ऊ अईसहीं हलन आज भी ऊ अईसहीं हथन आउर हमेशा ऊ अईसहीं रहतन! सच में अईसहीं होवे!
Bridge Connectivity Solutions Pvt. Ltd.