Numbers21
1अराद नगर के राजा जौन नेगेव के यहूदिया के दक्षिणी जंगल में कनानियन के निवास स्थान में रह हलन। ऊ एगो समाचार सुनलन कि इस्राएली अथारिम गाँव के सड़क पर आ रहलन हे। एहिसे उनकी सेना ने इस्राएलियन पर हमला कईलन आउर ओकरा में से कुछ के पकड़ लेलन। 2तब इस्राएलियन गहराई से ई मन्नत कईलन, “हे यहोवा, यदि तूँ कनानी लोग के हरावे में हमर मदत करवऽ, तऽ हम उनकर सभे नगर के सत्यानाश कर देम।”3यहोवा उनकर विनती सुनलन, आउर ऊ उनका कनान के लोग के सेना के हरावे लागी सामर्थ देलन। इस्राएली फौज सभे लोग के मार देलन आउर उनकर नगर के सत्यानाश कर देलन। ऊ घड़ी से, ऊ जगहा के होर्मा कहल जा हे। जेकर मतलब हे "विनाश।" 4तब इस्राएलियन लोग होर पहाड़ के छोड़लन आउर एदोम देश के चारो तरफ जाय लागी लाल समुद्र के नीचे के लम्बा यात्रा लेलन। बाकि लम्बा यात्रा के चलते इस्राएली लोग राह में बेचैन हो गेलन,5आउर परमेश्वर आउर मूसा पर बुड़बुड़ाय लगलन। ऊ कहलन, “तूँ हमनी के मिस्र से निकास के जंगल में मरे लागी काहे ले अईलऽ हे? हिंयाँ नऽ तऽ खाय लागी आउर नऽ कुच्छो पिये लागी पानी हे। आउर हम ई घटिया मन्ना खाय से नफरत करऽ ही!” 6एहिसे यहोवा उनकर बीचे में बिखधर सांप भेजलन। ढेर सा लोगवन के सांपवन काट लेलक आउर उनकर मौत हो गेल।7तब लोग मूसा भीर आके चिल्ला के कहे लगलन, “अब हम जान गेली हे कि हमनी यहोवा आउर तोर खिलाफ पाप कईली हे। यहोवा से प्राथना करऽ कि साँपवन के दूर कर देतन!” येहिसे मूसा लोगवन लागी प्रार्थना कईलन।8तब यहोवा मूसा से कहलन, “एगो बिखधर सांप के नमूना बनावऽ आउर ओकरा खम्भा के अंतिम छोर पर लगावऽ। जे लोग के सांप काटल हे, ऊ जदि ऊ नमूना के देख लेतन, तऽ ऊ ठीक हो जईतन।”9येहिसे मूसा पीतल के एगो सांप के नमूना बनईलन, आउर ओकरा खम्भा के अंतिम छोर पर लगईलन। फिर जिनका भी सांप काटलक हल, ऊ पीतल के सांप के देखलक, तऽ ऊ ठीक हो गेल।10तब इस्राएलियन ओबोत जगह से चल देलन, आउर ऊंहाँ डेरा खड़ा कईलन।11तब ऊ ओबोत से निकल के मोआब के पूर्वी सीमा पर जंगल में अबारीम में गेलन। 12ऊहाँ से ऊ ऊ तराई में गेलन जेज्जा जेरेद नदी के तल हे, आउर ऊहाँ डेरा खड़ा कईलन।13फिन ऊ अर्नोन नदी के उत्तर के तरफ यात्रा कईलन। ऊ इलाका जंगल में ऊ जमीन के नगीच हे जेज्जा एमोरी लोग रह हथन। अर्नोन नदी मोआब आउर जहाँ एमोरी लोग रहऽ हथन, जेकर बीच के सीमा हे।14येहिसे यहोवा के लड़ाई के किताब में ई जगह के बारे में लिखल हे,“सूपा में वाहेब, आउर उहाँ के घाटी,आउर अर्नोन के घाटी 15आउर उहाँ के घाटी के ढलान,जे मोआब के सीमा पर आउर गाँव तक फईलल हे।”16उहाँ से इस्राएलियन बैर के चल देलन। ऊहाँ एगो कुईयाँ हल। जेज्जा यहोवा पहले मूसा से कहलन हल, “लोगवन के जमा करऽ, आउर हम ओखनी के पानी देम।” 17ऊहाँ इस्राएलियन ई गीत गईलक:“हे कुईयाँ, हमनी के पानी दे!एकर बारे में बढ़िया गाबऽ!18ई कुईयाँ के बारे में गाबऽ,जेकरा हमर हाकिम लोग खोदलन।ऊ अपन राजदण्ड आउर अपन लठियन से मट्टी खोदलन।”तब इस्राएली ऊ जंगल के छोड़ के मत्ताना से होकर चल गेलन।19आउर मत्ताना से इस्राएली नहलीएल आउर बामोत गाँव से होके भी गेलन।20तब ऊ बामोत से मोआब कि तराई में गेलन, ऊहाँ पिसगा पहाड़ जंगल के उपरे हे।21तब इस्राएली लोग एमोरियन के राजा सीहोन भीर दूत भेजलन। ऊ ई खबर देलन।22"हमनी के अपन देश में यात्रा करे ला अनुमति दऽ। हम राजा के मुख्य सड़क पर पैदल चलम, जे दक्षिण से उत्तर के तरफ जा हे। तब तक रहम, जब तक हम तोर देश से यात्रा पूरा नऽ कर लेम। हम कोई खेत या अंगूर के बगईचा से होके नऽ चलम, चाहे तोर कुईयाँ से पानी नऽ पियम।"23बाकि राजा सीहोन इनकार कईलन। ऊ उनका अपन देश में चले के अनुमति नऽ देलन। एकर बजाय ऊ रेगिस्तान में इस्राएलियन पर हमला करे लागी ऊ अपन पूरा सेना के भेज देलन। ऊ यहाज गाँव में इस्राएलियन पर हमला कईलन।24बाकि इस्राएलियन उनका पूरा रीति से तलवार से मार देलन, आउर दक्षिण में अर्नोन नदी से लेके उत्तर में यब्बोक नदी तक, उनकर देश पर अधिकार कर लेलन। ऊ ऊ जमीन पर रुक गेलन जहाँ अम्मोनी लोग के झुण्ड रहऽ हल, काहेकि अम्मोन के फौज मजबूती से सीमा के रक्षा कर रहल हल।25ई तरह से इस्राएलियन ऊ सभे नगर आउर कस्बा पर अधिकार कर लेलन जहां एमोरी रहऽ हलन, आउर थोड़ा इस्राएली ओकरा में रहे लगलन। ऊ हेशबोन शहर के राजधानी आउर आस पास के गाँव पर कब्जा कर लेलन।26हेशबोन देश के राजधानी हल। ई वह नगर हल जहाँ एमोरियन के राजा सीहोन शासन करऽ हलन। उनकर फौज पहले मोआब के राजा के सेना के हरा देलन हल, आउर फिर उनकर लोग दक्षिण में अर्नोन नदी तक मोआब के सभे जमीन में रहे लगलन।27येही वजह से, कवि लोग में से एगो कवि बड़ी पहले लिखलन हल,“हेशबोन में आवऽ, ऊ नगर जहां राजा सीहोन राज करऽ हथिन।हम चाहऽ ही कि नगर के फिर से निर्माण होवे।28हेशबोन से आग भड़क उठल, सीहोन के नगर से लौ निकलल; जेकरा सेऊ मोआब के आउर नगर के जला देलक। ऊ अर्नोन नदी के किनारे के पहाड़ियन के शासक के नाश कर देलन। 29हे मोआबी लोग तोरा पर भारी विपत्ति पड़ल हे।तोहनी जे अपन देवता मूर्ति कमोश के उपासना करऽ हऽ ओकरा नाश कर देवल गेल हे! जे पुरुष कमोश कि पूजा करऽ हल ऊ भाग गेलन हे आउर अब शरणार्थी हथन,आउर जे औरतियन उनकर पूजा करऽ हल ऊ एमोरी लोगवन के समूह के राजा सीहोन कि सेना पकड़ लेलक हल।30बाकि हमनी सीहोन आउर एमोर के ऊ वंशज के,उत्तर में हेशबोन के राजधानी से लेके दक्षिण में दीबोन नगर तक हरा देली हे।हम उनका नोपह आउर मेदबा नगर तक पूरी तरह खतम कर देली हे।”31अईसे कर के इस्राएली लोग ऊ देश में जहां एमोरी रहऽ हलन, रहे लगलन।32जब मूसा याजेर नगर भीर के क्षेत्र का पता लगावे ला कुछ लोग के भेजलन, तब इस्राएली लोग ऊ इलाका के सभे नगर में रहे लगलन आउर कब्जा कर लेलन, आउर ऊ उहाँ रहे बालन एमोरी लोग के समूह के निकास देलन।33तब ऊ उत्तर के तरफ बाशान के देश के तरफ मुड़ गेलन, बाकि बाशान के राजा ओग आउर उनकर सभे सेना ने एद्रेई नगर में ओकरा पर हमला कईलक।34यहोवा मूसा से कहलन, “ओग से मत डरऽ, काहेकि हम तोर आदमी के ओकर आउर ओकर सेना के पराजित करम, आउर ओकर समूचे देश पर अधिकार करे में समर्थ करम। तूँ ओकरा साथे ओही करबऽ जे तूँ एमोरी लोग के समूह के राजा सीहोन के साथे कईलऽ हल, जो हेशबोन में शासन करऽ हलन।”35आउर ओईसहीं होल। इस्राएलियन के लोग ओग के सेना के हरा देलन, आउर राजा ओग आउर उनकर बेटवन आउर उनकर सभे परजा के मार देलन। एक्कोगो भी आदमी जिन्दा न बचलन! आउर तब इस्राएली देश में अधिकार कर के रहे लगलन।
Bridge Connectivity Solutions Pvt. Ltd.