Matthew5
1फिन यीशु भीड़ के देखके, पहाड़ी पर चढ़ गेलन, आउर जखनी ऊ बईठ गेलन, तऽ उनकर चेला लोग उनका भीर अईलन।2आउर अपन मुँह खोल के, ऊ ओखनी के सिखावे ला शुरु करलन,3धन्य हथन ऊ जे आत्मा के दीन हथन, काहेकि स्वर्ग के राज उनका हे।4धन्य हथन ऊ जे शोक कर हथन, काहेकि ऊ शान्ति पईतन।5धन्य हथन ऊ जे नम्र हथन, काहेकि ऊ धरती के अधिकारी होतन। 6धन्य हथन ऊ धार्मिकता के भूखल आउर पियासल हथन, काहेकि ऊ तृप्त करल जईतन।7धन्य हथन ऊ जे दयालु हथन, काहेकि उनका पर दया करल जायेत।8धन्य हथन ऊ जे मन के शुद्ध हथन, काहेकि ऊ परमेश्वर के देखतन।9धन्य हथन ऊ शान्ति स्थापित करे वाला हथन, काहेकि ऊ परमेश्वर के बेटा कहलईतन।10धन्य हथन ऊ जे धार्मिकता के कारण सतावल जा हथन, काहेकि स्वर्ग के राज उनकरे हे।11धन्य हऽ तूँ, जखनी लोग हमरा कारण तोहनी के निन्दा करतन आउर तोरा सतईतन आउर झूठ बोल बोलके सभे तरह के बुरा बात बोलतन।12जखनी आनन्दित आउर मगन होईहऽ, काहेकि तोरा लागी स्वर्ग में बड़का प्रतिफल हे, येहिगुने कि ओखनी ऊ भविष्यद्वक्तावन के जे तोहनी से पहिले हलन अईसहीं सतईलन हल।13तूँ धरती के नमक हऽ। बाकि जदि नमक के स्वाद बिगड़ जाय, तऽ फिन ओकरा कौन चीज से नमकीन करल जायेत? फिन ऊ कोई काम के नऽ रहल, खाली एकर कि आदमी के गोड़ तर धाँगल जायला ओकरा बाहरसी फेंक देवल जाय।14तूँ दुनियाँ के इंजोर हऽ। जौन शहर पहाड़ पर बसल होवऽ हे ऊ छिप नऽ सकल हे।15आउर लोग दीया जला के टोकरी के नीचे नऽ, बलुक दीवट पर रखऽ हथन, आउर ओकरा से घर के सभे लोग भीर इंजोर पहुँचऽ हे।16ओईसहीं, तोरा इंजोर सभे आदमियन के सामने चमकत, जेकरा से ओखनी तोर भला काम के देख के तोर पिता के, जे स्वर्ग में हथन, बड़ाई करतन।17ई नऽ समझऽ कि हम व्यवस्था के चाहे भविष्यद्वक्तावन के शिक्षा के लोप करे ला अईली हे। हम लोप करे लागी नऽ, बाकि पूरा करे ला अईली हे। 18काहेकि हम तोरा से सच कहऽ ही, कि जब तक आसमान आउर धरती के अन्त नऽ होत जब तक सभे बात पूरा नऽ होत ऊ घड़ी तक निश्चित रूप से व्यवस्था के एगो मात्रा चाहे एगो बिन्दु के भी अन्त नऽ होत।19येहिगुने, जे कोई ई छोटकन से छोटकन आज्ञावन में से कोई एक्कोगो गो के भी तोड़तन, आउर लोगवन के ओईसहीं करे ला सिखईतन, तऽ ऊ स्वर्ग के राज में सभे से छोटा कहलईतन। बाकि जे कोई ओकर पालन करतन आउर ओकर शिक्षा देतन, ऊ आदमी स्वर्ग के राज में महान कहलईतन।20काहेकि हम तोरा से कहऽ ही, कि जदि तोर धार्मिकता शास्त्री लोग आउर फरीसी लोग के धार्मिकता से बढ़ के नऽ रहे, तऽ तोहनी जरुर स्वर्ग के राज में प्रवेश नऽ कर पईवऽ।21“तूँ सुन चुकलऽ हे कि पहिलका जमाना में लोगवन से अईसन कहल गेल हल कि ‘हत्या नऽ करिहऽ,’ आउर ‘जे कोई हत्या करतन, तऽ ऊ न्याय के अधीन होतन।’ 22बाकि हम तोरा से ई कहऽ ही कि जे कोई अपन भाई पर गोस्सा करतन, ऊ न्याय के अधीन होतन। आउर जे कोई अपन भाई के ‘निकम्मा’ कहतन, 'ऊ महासभा के अधीन होतन। आउर जे कोई ‘अरे मूरख’ कहतन, ऊ नरक के आग के सजा के अधीन होतन।23येहिसे, जखनी तूँ अपन भेंट वेदी पर चढ़ईहऽ, आउर ऊहाँ तोरा याद आवे, कि तोर भाई के मन में तोर खिलाफ कोई बात हे,24तऽ अपन भेंट के ओकरा वेदी भीर छोड़ के चल जईहऽ; आउर पहिले अपन भाई से मेल मिलाप करऽ, आउर तऽ वापस आके अपन चढ़ावा।25जखनी तूँ अपन दोष लगावे वाला के साथे राह में हऽ, तऽ उनका जौरे जल्दिये समझौता कर लिहऽ, कहीं अईसन नऽ होवे कि दुश्मन तोरा न्यायाधीश के सौंपतन, आउर न्यायाधीश तोरा सिपाही के सौंप देतन आउर तोरा जेल में डाल देवल जाय।26हम तोरा से सच कहऽ ही, कि जब ला तूँ ऊ आदमी के सभे कर्जा नऽ चुका देवऽ, तब ला तूँ जेल से बाहरसी नऽ आ पईवऽ” 27“तूँ सुन चुकलऽ हे कि अईसन कहल गेल हल कि ‘व्यभिचार मत करिहऽ।’ 28बाकि हम तोरा से ई कहऽ ही कि जे कोई आदमी कोई औरत पर बुरा निगाह करतन, ऊ अपन मन में ओकरा से व्यभिचार कर चुकलन।29बाकि जदि तोर दहिना आँख तोरा ठोकर खिलावे, तऽ ओकरा निकास के अपना से दूर फेंक दऽ। काहेकि तोरा लागी येही बढ़ियाँ होत कि तोर अंग में से एगो के नाश हो जाय आउर तोर पूरा देह नरक में नऽ डालल जाय।30आउर जदि तोर दहिना हाथ तोरा ठोकर खिलावे, तऽ ओकरा काट के अपना से दूर फेंक दऽ, काहेकि तोरा लागी येही बढ़ियाँ होत कि तोर अंगवन में से एगो के नाश हो जाय आउर तोर पूरा देह नरक में नऽ डालल जाय।”31“आउर अईसन भी कहल गेल हे कि, ‘जे कोई अपन मेहरारू के तलाक देवे, तऽ ऊ ओकरा तलाकनामा देवे।’ 32बाकि हम तोरा से ई कहऽ ही कि जे अपन मेहरारू के व्यभिचार के अलावे कोई आउर कारण से तलाक देवे, तऽ ऊ ओकरा से व्यभिचार करवावऽ हे। आउर जे कोई ऊ छोड़ल गेल से वियाह करऽ हे, तऽ ऊ भी व्यभिचार करऽ हे।”33“फिन, तोहनी सुन चुकल हे कि ‘झूठा किरिया नऽ खईहऽ, बाकि प्रभु परमेश्वर लागी अपन किरिया के पूरा करिहऽ।’ 34बाकि हम तोरा से ई कहऽ ही: कहियो कसम ही नऽ खईहऽ, नऽ स्वर्ग के, काहेकि ऊ परमेश्वर के सिंहासन हे; 35आउर नऽ धरती के, काहेकि ऊ उनकर गोड़ के चौकी हे; आउर नऽ यरूशलेम के, काहेकि ऊ महान राजा परमेश्वर के नगर हे। 36आउर अपन माथा के भी किरिया नऽ खईहऽ, काहेकि तूँ एगो बाल के भी उजला चाहे करिया नऽ कर सकलऽ हे।37बाकि तोर बात ‘हाँ के हाँ,’ चाहे ‘नऽ के नऽ’ होवे। बाकि जे कुछ एकरा से जादे होवऽ हे ऊ बुराई से होवऽ हे। 38तूँ सुन चुकलऽ हे कि अईसन कहल गेल हल कि ‘आँख के बदले आँख, आउर दाँत के बदले दाँत।’ 39बाकि हम तोरा से कहऽ ही कि बुराई के सामना नऽ करिहऽ। एकर बजाय, जे कोई तोर दहिना गाल पर थप्पड़ मारे, ओकरा तरफ दोसरका भी फेर दिहऽ।”40आउर कोई तोरा पर मुकदमा कर के तोर कुरता लेवे ला चाहतन, तऽ ओकरा अंगरखा भी ले लेवे दऽ।41आउर जे कोई तोरा एक कोस ले जायला मजबूर करतन, तऽ उनका साथे दू कोस चल जईहऽ। 42जे कुछ तोरा से माँगतन, ओकरा दिहऽ, आउर जे तोरा से कर्जा लेवे ला चाहऽ हे, ओकरा से मुँह नऽ मोड़िहऽ।43“तूँ सुन चुकलऽ हे, कि अईसन कहल गेल हल कि ‘अपन पड़ोसी से प्रेम रखिहऽ, आउर अपन दुश्मन से दुश्मनी रखिहऽ।’ 44बाकि हम तोरा से ई कहऽ ही, कि अपन दुश्मन से प्रेम रखिहऽ, आउर अपन सतावे वाला ला प्रार्थना करिहऽ। 45जेकरा से तूँ अपन स्वर्गीय पिता के संतान ठहरवऽ। काहेकि ऊ भला आउर बुरा दूनो पर अपन सूरज उगावऽ हथन, आउर धर्मी आउर अधर्मी दूनो पर बरसा बरसावऽ हथन।46काहेकि जदि तूँ अपन प्रेम करे वाला से ही प्रेम रखऽ हऽ, तऽ एकरा से तोरा का फईदा होत? का चुंगी लेवे वाला भी अईसन नऽ करऽ हथन? 47आउर जदि तूँ खाली अपन भईवन से ही प्रेम रखऽ हऽ, तऽ कौन सा बड़का काम करऽ हऽ? का मूर्तिपूजक भी अईसहीं नऽ करऽ हे?48येहिसे, तूँ ओईसहीं सिद्ध बनऽ, जईसे कि तोर स्वर्गीय पिता परमेश्वर जे स्वर्ग में सिद्ध हथन।”
Bridge Connectivity Solutions Pvt. Ltd.