Matthew6
1अखनी सावधान रहऽ कि तूँ आदमी के देखावे ला अपन धार्मिकता के काम नऽ करिहऽ, नऽ तऽ तूँ अपन स्वर्गीय पिता से कुछो भी प्रतिफल नऽ पईवऽ।2येहिगुने, जखनी तूँ दान करिहऽ, तऽ अपना आगे तुरही नऽ बजवईहऽ, जईसे कपटी लोग आराधनालय आउर गलियन में करऽ हे, जेकरा से आदमी ओकर बड़ाई करतन। हम तोरा से सच कहऽ ही, कि ओखनी अपन प्रतिफल पा चुकलन।3बाकि जखनी तूँ दान करऽ हऽ, तऽ जौन तोर दहिना हाथ करऽ हे, ओकरा तोर बामा हाथ नऽ जाने पावे।4जेकरा से कि तोर दान गुप्त रहत, आउर तोर पिता जे गुप्त में देखऽ हथन, तोरा प्रतिफल देतन।5“आउर जखनी तूँ प्रार्थना करिहऽ, तऽ कपटी लोग के जईसन नऽ करिहऽ, काहेकि आराधनालय में आउर मुख्य सड़कवन के मोड़ पर खड़ा होके प्रार्थना करे ला पसन्द हे, जेकरा से लोग उनका देखे पईतन। हम तोरा से सच कहऽ ही, कि ओखनी अपन प्रतिफल पा चुकलन।6बाकि जखनी तूँ प्रार्थना करिहऽ, तऽ अपन भीतरी कोठरी में जा के, आउर अपन दुआरी बंद कर के अपन पिता से प्रार्थना करऽ, आउर तोर पिता जे गुप्त में देखऽ हथन, तोरा प्रतिफल देतन।7अखनी प्रार्थना करे के समय अन्यजातियन के जईसन बक-बक नऽ करिहऽ, काहेकि ओखनी के लगऽ हे कि ओखनी के बक-बक करलऽ से उनकर सुनल जायेत।8येहिगुने, तूँ ओखनी के जईसन नऽ बनऽ, काहेकि तोर पिता परमेश्वर तोरा माँगे से पहिले जानऽ हथन, कि तोर कौची-कौची जरुरत हे।9येहिगुने, तोरा ई रीति से प्रार्थना करे के चाही: ‘हे हमर पिता, तूँ जे स्वर्ग में हऽ, तोर नाम पवित्र मानल जाय। 10तोर राज आवे, तोर इच्छा जईसे स्वर्ग में पूरा होवऽ हे, ओईसहीं धरती पर भी पूरा होवे।11हमनी के रोजदिन के रोटी आज हमरा दऽ;12जईसे हम अपन अपराधियन के मांफ करली हे, ओईसहीं तोहूँ हमर अपराध के मांफ करऽ;13आउर हमरा परीक्षा में नऽ लईहऽ, बाकि बुराई से बचईहऽ, काहेकि राज आउर पराक्रम आउर महिमा सदा तोरे होवे।’ आमीन।14काहेकि जदि तूँ आदमियन के अपराध के मांफ करवऽ, तऽ तोर स्वर्गीय पिता भी तोर अपराध के मांफ करतन।15बाकि जदि तूँ दोसरा आदमियन के मांफ नऽ करवऽ, तऽ तोर पिता भी तोर अपराध के मांफ नऽ करतन।16येहिगुने यीशु आगे कहलन जखनी तूँ उपवास करिहऽ, तऽ दुःख होके कपटी लोग के जईसन मत करिहऽ, काहेकि ओखनी अपन मुँह येहिसे लटकईले रहऽ हथन, ताकि लोग उनका उपवासी समझतन। हम तोरा से सच कहऽ ही कि ऊ अपन प्रतिफल पा लेलन।17बाकि जखनी तूँ उपवास रहिहऽ, तऽ अपन माथा में तेल लगावऽ आउर अपन मुँह धो लऽ।18जेकरा से आदमी नऽ बाकि खाली तोर पिता परमेश्वर जे गुप्त में हथन, तोरा उपवासी जाने; आउर तोर पिता जे गुप्त में देख हथन, तोरा प्रतिफल देतन।19येहिगुने यीशु आगे कहलन अपना लागी धरती पर दौलत खजाना में जमा नऽ करिहऽ, जहाँ कीड़ा-मकोड़ा आउर काई बिगाड़ऽ हे, आउर जहाँ चोर सेंध लगावऽ आउर चुरावऽ हे।20एकर बदले, अपना लागी स्वर्ग में धन जमा करिहऽ, जहाँ नऽ तऽ कीड़ा-मकोड़ा आउर नऽ ही काई बिगाड़ऽ हे, आउर जहाँ चोर नऽ तऽ सेंध लगावऽ हे।21काहेकि जहाँ तोर धन हे ओही तोर मन भी लगल रहत।22येहिगुने यीशु आगे कहलन देह के दीया तऽ आँख हे। येहिसे, जदि तोर आँख बढ़ियाँ आउर सही हे तऽ तोर पूरा देह भी इंजोर रहत।23बाकि जदि तोर आँख बुरा हे, तऽ तोर पूरा देह भी अंधार रहत। येहिगुने, जे इंजोर तोरा में हे जदि ऊ अंधार बन जाय, तऽ ऊ अंधार कईसे बड़का होत!”24येहिगुने यीशु आगे कहलन कोई भी आदमी दूगो मालिक के सेवा नऽ कर सकऽ हे, काहेकि चाहे तऽ ऊ एगो से दुश्मनी रखत आउर दोसरका से प्रेम रखत, चाहे एगो से ईमानदार रहत आउर दोसरका के तिरस्कार करत। तूँ परमेश्वर आउर धन दूनो के सेवा करे के लायक नऽ हऽ।25येहिसे हम तोरा से कहऽ ही, कि अपन जान ला ई चिंता नऽ करिहऽ, कि तूँ कौची खईवऽ, आउर तूँ का पिवऽ, आउर नऽ ही अपन देह के बारे में ई चिंता करिहऽ, कि तूँ कौची पेहेनवऽ। का प्राण भोजन से, आउर देह कपड़ा से बढ़ के नऽ हे?26आसमान के पक्षियन के देखऽ, कि ऊ नऽ तऽ बुनऽ हे, आउर नऽ ही काटऽ हे, आउर नऽ ही खलिहान में जमा करऽ हे। बाकि तोर स्वर्गीय पिता ओकरा खिलावे हथन। का तूँ ओकरा से बेसकीमती नऽ हऽ?27बाकि तोहनी में से अईसन कौन हे जे जिनगी में एक घड़ी भी बढ़ा सकलन हे? 28आउर तोहनी कपड़ा लागी चिंता काहे करऽ हऽ? मैदान के सोसन के फूलवन पर गौर करऽ, कि ऊ कईसे बढ़ऽ हे। ऊ नऽ तऽ मेहनत करऽ हे आउर नऽ ही कपड़ा के बुनऽ हथन।29बाकि हम तोरा से कहऽ ही कि सुलैमान भी अपन वैभव में ओखनी में से कोई के जईसन कपड़ा पेहेनले नऽ हलन।30बाकि जदि परमेश्वर मैदान के ऊ घास के, जे आज हे आउर बिहान भाड़ में झोंकल जायेत, अईसन कपड़ा पेहनावऽ हथन, तऽ हे अल्पविश्वासियन! ऊ तोरा ओखनी से बढ़ के काहे नऽ पेहेनईतन?31“येहिगुने, तूँ चिंता कर के ई नऽ कहिहऽ, कि ‘हम का खायेम?’ चाहे, ‘हम का पियम?’ चाहे ‘हम का पेहनम?’32काहेकि अन्यजाति के लोग तऽ ई सभे चिजवन के खोज में रहऽ हे; येहिगुने तोर स्वर्गीय पिता जानऽ हथन कि तोहनी के ई सभे चिजवन के जरुरत हे।33बाकि पहिले तूँ परमेश्वर के राज आउर उनकर धार्मिकता के खोज करऽ, तऽ ई सभे चिजवन तोरा मिल जायेत। 34येहिगुने, तोहनी आवे वाला बिहान के फिकिर नऽ करिहऽ, काहेकि बिहान के दिन अपन फिकिर खुद कर लेत। आज के दिन ला एकर दुःख ही बड़ी हे।”
Bridge Connectivity Solutions Pvt. Ltd.