Matthew25
1“तऽ स्वर्ग राज के तुलना ऊ दस कुँवारियन से करल जायेत, जे अपन मशालवन लेके, दूल्हा से भेंट करे ला निकलल हल।2ओकरा में से पाँचगो मूरख आउर पाँचगो लूरगर हल।3काहेकि जब मूरख कुँवारियन अपन मशाल ले गेल, आउर ऊ अपन जौरे कुछ तेल नऽ ले गेल।4बाकि लूरगर कुँवारी अपन मशालवन के जौरे कुप्पियन में तेल भी भर लेलन हल।5अखनी जब दूल्हा के आवे में देर हो गेल, तऽ ओखनी सभे के नींद आ गेल आउर ऊ सूत गेलन।6बाकि आधा रात के हल्ला होल, 'देखऽ, दूल्हा से, बाहरे जा के उनका से मिलऽ।7तऽ ओखनी सभे कुँवारियन जागल आउर अपन मशालवन के ठीक करलक।8मूर्खवन लूरगरकन से कहलक, ‘अपन तेल में से कुछ हमरा दे दऽ, काहेकि हमर मशाल बुते वाला हे।’9बाकि लूरगरकिन जबाब देलन, ‘जरुर ई हमरा आउर तोरा लागी ई जादे नऽ होत। एकर बजाय उनका भीर जा, जे अपन कुछ बेचऽ आउर खरीदे हथन।’10जखनी ऊ मोल किनेला जा रहल हल, तऽ दूल्हा आ गेलन, आउर जे तईयार हल ओखनी उनका जौरे वियाह के भोज में चल गेल, आउर नौकरवन दुआरी बन्द कर देलन।11एकर बाद मूरख कुँवारी भी आके कहे लगल, ‘हे स्वामी, हे स्वामी, हमनी लागी दरवाजा खोल दऽ।’12बाकि ऊ, जबाब देलन, ‘हम तोरा से सच कहऽ ही, हम तोरा नऽ जानऽ ही।’13येहिगुने होशियार रहऽ, काहेकि तूँ नऽ ऊ दिन के, आउर नऽ ही ऊ घड़ी के जानऽ हऽ।14काहेकि ई ऊ आदमी के जईसन हे जे यात्रा पर जा रहलन हल। ऊ अपन सेवकवन के बोलईलन आउर ओखनी के अपन संपत्ति सौंप देलन।15ओखनी में से एगो के ऊ पाँचगो तोड़ा देलन, दोसरका के दूगो, आउर एगो के ऊ एगो मतलब कि सभे कोई के ओकर शक्ति के मुताबिक तोड़ा देलन। आउर ऊ तुरन्त दोसरा देश में चल गेलन। 16जखनी ऊ चल गेलन, तऽ जिनका पाँचगो तोड़ा मिलल हल ऊ जा के ओकरा से रोजगार करलन, आउर पाँचगो तोड़ा आउर कमईलन।17ओईसहीं, कर के जिनका ही दूगो तोड़ा मिलल हल, ऊ भी दूगो आउर कमईलन।18बाकि जे दास के एगो तोड़ा मिलल हल, ऊ चल गेलन, आउर जमीन में गबड़ा खोद के अपन मालिक के तोड़ा गाड़ देलक।19बड़ी दिन के बाद, ऊ सेवकवन के मालिक वापस अईलन आउर ऊ ओखनी से हिसाब-किताब लेलन।20जे सेवक के पाँचगो तोड़ा मिलल हल, ऊ पाँच तोड़ा आउर लेके अईलन, आउर कहलन, ‘हे मालिक, तूँ हमरा पाँचगो तोड़ा देलऽ हल, बाकि देखऽ, हम पाँचगो तोड़ा आउर कमा लेली हे।’21उनकर मालिक उनका से कहलन, ‘शाबाश, अच्छा आउर विश्वासयोग्य सेवक! तूँ थोड़ा सा चीज में वफादार रहलऽ हे। हम तोरा ढेर चिजवन के अधिकारी बनायेम। अपन मालिक के खुशी में शामिल होवऽ।’22जे सेवक के दूगो तोड़ा मिलल हल, ऊ भी आके कहलन, ‘हे मालिक, तूँ हमरा दूगो तोड़ा देलऽ हल। बाकि देखऽ, हम दूगो आउर तोड़ा कमईली हे।’23ओकर मालिक ओकरा से कहलन, ‘शाबाश, अच्छा आउर वफादार सेवक! तोहूँ थोड़ा चिजवन में विश्वासयोग्य रहलऽ हे। हम तोरो ढेर चिजवन के अधिकारी बना देम। अपन मालिक के आनन्द में शामिल होवऽ।’24जे दास के एक तोड़ा मिलल हल, ऊ भी आके कहे लगल, ‘हे मालिक, हम जानऽ हली, कि तूँ कड़ा पानी के आदमी हऽ, आउर जेज्जा तूँ नऽ रोपलऽ हे ओज्जा से तूँ काटऽ हऽ, आउर जेज्जा तूँ नऽ छिंटल हे ओज्जा से भी बटोरऽ हऽ।25हम डर गेली, येहिगुने चल गेली आउर तोर तोड़ा जमीन में गाड़ देली। देखऽ, जे कुछ तोर हे, ऊ तोरा भीर हे।’26बाकि ओकर मालिक जबाब दे के ओकरा से कहलन, ‘हे दुष्ट आउर आलसी दास! तूँ तऽ जानऽ हलऽ, कि जेज्जा हम नऽ रोपली हे ओज्जे से काटऽ ही; आउर जेज्जा से नऽ छिंटली हे ओज्जे से चुनऽ ही।27येहिसे, तोरा हमर तोड़ा सेठ-साहूकार के दे देवे के चाहऽ हल, आउर जहिया हम अईती हल तऽ शूद के साथ हमर तोड़ा हमरा लौटा देत हल।28येहिसे, ऊ दास के मालिक दोसरा सेवक से कहलन ओकरा से ऊ भी तोड़ा छिन लऽ, आउर जेकरा भीर दसगो तोड़ा हे उनका दे दऽ।29काहेकि जेकरा हीं सभे कुछ हे, उनका आउर भी जादे देवल जायेत। बाकि जिनका हीं कुछो भी नऽ हे, ओकरा से ऊ भी, छीन लेवल जायेत, जे उनका हीं हे।30ऊ बेकामी दास के बाहरसी अंधार में बिग दऽ, जहाँ रोवे ला आउर दाँत पिसेला हे।’”31“अब जखनी आदमी के बेटा सभे स्वर्गदूतवन जौरे अपन महिमा में अईतन, तऽ ऊ अपन महिमा के सिंहासन पर विराजमान होतन।32आउर सभे जातियन उनका सामने जमा करल जायेत, आउर जईसे चरवाहा भेड़वन के बकरियन से अलग कर दे हे, ओईसहीं ऊ भी ओखनी के एक दोसर से अलग करतन।33ऊ भेड़वन के अपन दहिना तरफ आउर बकरियन के अपन बामा तरफ खड़ा करतन।34तब राजा अपन दहिना तरफ के लोगवन से कहतन, ‘हे हमर पिता से आशीष पावे वाला लोग, आवऽ, ऊ राज के अधिकारी हो जा, जे दुनियाँ के शुरुआत से तोरा लागी तईयार करल गेल हे।35काहेकि हम भूखल हली, आउर तूँ हमरा खाय लागी देलऽ; हम पियासल हली, आउर तूँ हमरा पिये ला देलऽ; हम अनजान हली आउर तूँ हमरा घर में ले अईलऽ;36हम उघारे हली, आउर तूँ हमरा पेहनईलऽ; हम बेमार हली आउर तूँ हमर सेवा करलऽ; हम जेल में हली आउर तूँ हमरा भीर मिले ला अईलऽ।’37तब धर्मी उनका जबाब दे के कहतन, ‘हे प्रभु, हम कहिया तोरा भूखल देखली, आउर खिलईली? चाहे प्यासल देखली आउर तोरा पिलईली?38आउर हम कहिया तोरा परदेशी देखली, आउर अपन घर में रखली? चाहे उघारे देखली आउर कपड़ा पेहनईली?39आउर हम कहिया तोरा बेमार चाहे जेल में देखली, आउर तोरा से मिले ला अईली?’40तब राजा उनका जबाब देतन, ‘हम तोरा से सच कहऽ ही, कि जे तोहनी हमर ई छोटकन भईवन में से एगो के साथे करलऽ, ओही हमरा साथे भी करलऽ।’41तब ऊ अपन बामा तरफ के लोगवन से कहतन, ‘हे श्रापित लोगवन, हमर सामने से ऊ अनन्त आग में चल जा, जे शैतान आउर ओकर स्वर्गदूतवन लागी तईयार करल गेल हे।42काहेकि हम भूखल हली, बाकि तूँ हमरा कुछो खाय ला नऽ देलऽ; हम पियासल हली, बाकि तूँ हमरा पिये ला नऽ देलऽ;43हम परदेशी हली, बाकि तूँ हमरा अपन घर में नऽ ठहरईलऽ; उघारे हली, बाकि तूँ हमरा नऽ पेहेनईलऽ; हम बेमार आउर जेल में हली, बाकि तूँ हमरा से कहियो मिले ला नऽ अईलऽ।’”44“तब ऊ भी जबाब देतन, ‘हे प्रभु, हम कहिया तोरा भूखल, चाहे पियासल, चाहे परदेशी, चाहे उघारे, चाहे बेमार, चाहे जेल में देखली, आउर तोर सेवा नऽ करली?’45तब ऊ उनका जबाब देतन, ‘हम तोरा से सच कहऽ ही, कि तूँ जे ई छोटकन से छोटकन में से कोई एगो के साथे नऽ करलऽ, ऊ हमरा साथे भी नऽ करलऽ।’46ई अनन्त दण्ड भोगतन, बाकि धर्मी अनन्त जिनगी पईतन।”
Bridge Connectivity Solutions Pvt. Ltd.