Matthew24
1आउर यीशु, मन्दिर से निकल के, अपन राह से जा रहलन हल। आउर उनकर चेलवन मन्दिर के भवन देखावे ला उनका भीर अईलन।2बाकि यीशु, जबाब दे के, उनका से कहलन, “का तोहनी ई सभे इमारतवन के नऽ देखऽ हऽ? हम तोरा से सच कहऽ ही कि पक्का तोर से ईहाँ पत्थर पर पत्थर भी नऽ बचत जेकरा ढाहल नऽ जायेत।”3फिन जखनी ऊ जैतून पहाड़ पर बईठल हलन, तऽ चेलवन खुद उनका भीर जा के, पूछे लगलन, “हमरा बतावऽ, ई सभे बात कहिया होत, आउर तोर आवे के आउर दुनियाँ के अन्त के का चिन्ह होत?”4यीशु उनका जबाब दे के, कहलन, “सावधान रहऽ कि कोई तोहनी के भटका नऽ देवे।5काहेकि बड़ी मनी लोग हमर नाम से आके कहतन, ‘हमहीं मसीह ईहों,’ आउर ढेर के भटका देतन।6आउर तोहनी लड़ाई आउर लड़ईयन के चर्चा के सुनवऽ। बाकि घबरा नऽ जईहऽ, काहेकि एकर होवे ला जरुरी हे, बाकि जहिया अन्त नऽ होत।7काहेकि जाति के खिलाफ जाति, आउर राज के खिलाफ राज उठ खड़ा होत, आउर हर जगह अकाल पड़त आउर भूकम्प आवत।8बाकि ई सभे बात प्रसव के पीड़ा के शुरुआत हे।9तऽ ओखनी दुःख देवे ला तोहनी के पकड़वईतन आउर तोहनी के मार देतन, आउर हमर नाम के कारण सभे जातियन के लोग तोहनी से दुश्मनी रखतन।10आउर तब बड़ी सा लोग ठोकर खईतन, आउर एक दोसर के धोखा देतन आउर एक दोसरा से दुश्मनी रखतन।11आउर बड़ी सा झूठा भविष्यद्वक्ता उठ खड़ा होतन, आउर ऊ बड़ी लोग के भटका देतन।12आउर अधर्म के काम बढ़े के कारण, बड़ी लोग के प्रेम ठण्डा पड़ जायेत।13बाकि जे आखिरी तक धीरज धईले रहतन, उनका उद्धार होत।14आउर सभे जातियन पर गवाह होवे ला राज के ई सुसमाचार के दुनियाँ भर में प्रचार करल जायेत, आउर तऽ अन्त आ जायेत।15येहिगुने, जखनी तूँ उजाड़ेवाला घिनामन चीज के जेकरा बारे में दानिय्येल भविष्यद्वक्ता के द्वारा कहल गेल हल, पवित्रस्थान में खड़ा होल देखिहऽ, एकरा जे पढ़तन ओही समझतन। 16तऽ जे यहूदिया प्रान्त में रहतन ओखनी पहाड़ पर भाग जायेत,17जे लोग छत पर रहतन ऊ घर में से कोई सामान लेवे ला नऽ उतरतन,18आउर जे लोग खेत में रहतन ऊ अपन कपड़वन लेवे लागी घरे वापस नऽ मुड़तन।19बाकि ऊ दिन जे सभे गर्भवती औरतियन आउर जे दूध पिलावऽ होत, ओखनी पर हाय! 20बाकि प्रार्थना करऽ जेकरा से कि तोहनी के भागेला जाड़ा में चाहे सब्त के दिन में नऽ होवे।21काहेकि ऊ दिन भारी दुःख होत, जईसन ई दुनियाँ के शुरुआत से आज तक नऽ होल हे, आउर नऽ ही फिनो कहियो होत।22आउर जदि ऊ समय घटावल नऽ जायेत हल, तऽ कोई प्राणी नऽ बचत हल। बाकि चुनल गेल के कारण, ऊ दिन घटावल जायेत।23तखनी जदि कोई तोरा से कहतन, ‘देखऽ, मसीह ईहाँ हथन!’ चाहे ‘ऊहाँ हथन!’ तऽ तूँ ई बात पर विश्वास नऽ करिहऽ!24काहेकि झूठा मसीह आउर झूठा भविष्यद्वक्ता उठ के खड़ा होत, आउर बड़का बड़का चिन्ह आउर अचरज देखावल जायेत, कि जदि हो सकत तऽ चुनल गेल के भटका देतन।25देखऽ, हम पहिले से ही तोरा बता देली हे।26येहिसे, जदि ओखनी तोरा से कहतन, ‘देखऽ, मसीह जंगल में हथन!’ तऽ तूँ निकस के ऊहाँ नऽ जईहऽ। चाहे, ‘देखऽ, ऊ भीतरी कोठरी में हथन,’ तऽ तोरा एकरा पर विश्वास नऽ करे के चाही।27काहेकि जईसे बिजुली पूरब से निकल के पच्छिम तक चमकऽ हे, ओईसहीं आदमी के बेटा भी आवेला होत।28जहाँ कहीं लोथ होत, गिद्धवन तऽ ओही जमा होवऽ हे।29बाकि ऊ घड़ी के दुःख के तुरन्त बाद सूरज अंधार हो जायेत, आउर चाँद अपन इंजोर नऽ देत, आउर तरेगन आसमान से गिर पड़त, आउर स्वर्ग के शक्तियन हिलावल जायेत।30आउर ओकर बाद आदमी के बेटा के चिन्ह आसमान में देखाई देत, आउर तऽ धरती पर सभे कुल के लोगवन रोतन। आउर ओखनी आदमी के बेटा के सामर्थ आउर बड़ी महिमा के जौरे बादलवन पर अईते देखतन।31आउर ऊ तुरही के तेज आवाज के साथ प्रभु अपन स्वर्गदूतवन के भेजतन, आउर ऊ उनका चुनलन चुनल गेल लोग के चारो तरफ से, स्वर्ग के छोर से लेके धरती के छोर तक जमा करतन।32अब अंजीर के पेड़ से ई दृष्टान्त सिखऽ। जब अंजीर के पेड़ के डाली मुलायम हो जा हे आउर ओकरा में पत्ता निकले लगऽ हे, तऽ तूँ जान ले हऽ, कि गरमी के मौसम करीब हे।33अईसहीं, जब तूँ ई सभे बात होते देखवऽ, तऽ जान लिहऽ कि ऊ बड़ी करीब हे, दुआरी पर हे।34हम तोरा से सच कहऽ ही कि जब तक ई सभे बात घटित नऽ हो लेवे, तब तक पक्का तोर से ई पीढ़ी के अन्त नऽ होत।35स्वर्ग आउर धरती टल जायेत, बाकि हमर बात कहियो नऽ टलत।36बाकि ऊ दिन आउर ऊ घड़ी के बारे में कोई नऽ जानऽ हे, नऽ स्वर्ग के स्वर्गदूत, नऽ ही बेटा, खाली पिता।37काहेकि जईसे नूह के दिन हल, ओईसहीं आदमी के बेटा के आवेला भी होत।38काहेकि जईसे जलप्रलय से पहिले के दिन में जौन दिन ला नूह जहाज में नऽ ढूकलन, ऊ दिन ला ऊ लोग खा आउर पियऽ हलन, शादी-वियाह करऽ हलन, आउर ओखनी में शादी-वियाह करल जा हल,39आउर जब तक जलप्रलय आके ओखनी सभे के बहा के नऽ ले गेल, तब तक ओखनी नऽ समझलन, ओईसहीं आदमी के बेटा के आवेला भी होत।40फिन दूगो आदमी खेत में होतन एगो के उठा लेवल जायेत, आउर एगो के छोड़ देवल जायेत।41दूगो औरतियन जाँता पिसते रहतन एगो के उठा लेवल जायेत, आउर एगो के छोड़ देवल जायेत।42येहिसे, जागल रहऽ काहेकि तूँ नऽ जानऽ हऽ कि तोर प्रभु कौन दिन अईतन।43बाकि ई जानऽ लऽ, कि जदि घर के मालिक जानतन हल कि चोर रात के कौन पहर में अईतन, तऽ ऊ सावधान रहतन हल आउर अपन घर में चोरी नऽ होवे देतन हल।44येहिगुने तोहनियो भी तईयार रहऽ, काहेकि जौन घड़ी के बारे में तोहनी सोचवो नऽ करवऽ आदमी के बेटा ओही घड़ी आ जईतन।45तऽ फिन ऊ विश्वासयोग्य आउर बुद्धिमान सेवक कौन हथन जेकरा ओकर मालिक अपन घर के नौकर-चाकरवन पर अधिकारी बनईलन कि ओकरा सही समय पर भोजन देतन?46धन्य हथन ऊ दास जेकरा, उनकर मालिक आके ओईसहीं करते पईतन।47हम तोरा से सच कहऽ ही कि मालिक ओकरा अपन सभे धन-दौलत पर अधिकारी ठहरईतन।48बाकि जदि ऊ दुष्ट दास अपन मन में अईसन सोचतन कि ‘हमर मालिक के आवे में बड़ी देर हे,’49आउर ऊ अपन साथी दासवन के मारे-पीटे लगलन आउर पियक्कड़वन के जौरे खाय-पिये लगलन।50तऽ ऊ दास के मालिक अईसन समय में वापस अईतन जखनी ओकर उम्मीद नऽ होत, आउर अईसन घड़ी में अईतन जेकरा ऊ जानऽ नऽ होतन।51आउर मालिक ऊ सेवक के टुकड़ा-टुकड़ा काट देतन आउर ओकर भाग कपटी लोग के साथे ठहरईतन; ऊ जगह में रोवे ला आउर दाँत पीसे पड़त।”
Bridge Connectivity Solutions Pvt. Ltd.