Matthew26
1अईसन होल कि जब यीशु ई सभे बात कह चुकलन, तऽ अपन चेलवन से कहलन,2“तूँ जानऽ हऽ, कि दू दिन के बाद फसह के परव आ रहल हे, आउर आदमी के बेटा क्रूस पर चढ़ावे जाय लागी पकड़वावल जईतन।”3तऽ प्रधान याजक आउर प्रजा के पुरनियन, कैफा नाम के महायाजक के महल में जमा होलन।4ओखनी मिल के यीशु के छिप के पकड़े आउर मार डाले के उपाय करलन।5काहेकि ऊ एक दोसर से कहे लगलन, “परव के समय नऽ, अईसन नऽ होवे कि लोगवन में दंगा भड़क जाय।”6जब यीशु बैतनिय्याह गाँव में शमौन कोढ़ी के घर में हलन,7जब ऊ मेज पर बईठल हलन, तऽ एगो औरत संगमरमर के बरतन में बड़ी बेसकीमती इत्र लेके उनका भीर अईलन, आउर ऊ उनकर माथा पर उण्डेल देलक।8बाकि जब उनकर चेलवन ई देखलन, तऽ गोस्सा होके एक दोसर से कहे लगलन, “ई बरबादी के वजह का हे?9एकरा बड़ी दाम में बेच के गरीबवन के देवल जा सकल हल।”10यीशु ई जान के ओकरा से कहलन, “तूँ ई औरत लागी काहे बहस कर रहलऽ हे? काहेकि ऊ हमरा लागी बढ़ियाँ काम करलन हे।11काहेकि गरीब हरदम तोरा जौरे रहतन, बाकि हम तोहनी के साथे हमेशा नऽ रहम।12काहेकि ऊ ई इत्र हमर देह पर उण्डेल के हमरा दफन कर देलन हे।13हम तोरा से सच कहऽ ही, कि पूरा दुनियाँ भर में जहाँ कहीं ई सुसमाचार के प्रचार करल जायेत, ऊहाँ ई औरत जे करलन हे, ओकर चर्चा भी ओकर याद में करल जायेत।”14तब बारहो में से एगो, जेकर नाम यहूदा इस्करियोती हल, प्रधान याजकवन भीर गेल।15आउर कहलक, “जदि हम उनका पकड़वा देम, तऽ तूँ हमरा केतना देवे ला चाहऽ हऽ?” ओखनी ओकरा लागी चाँदी के तीस सिक्का तौल देलन।16ओही घड़ी से ऊ उनका पकड़वावे के मौका खोजे लगलक।17अखमीरी रोटी के परव के पहिलका दिन चेलवन यीशु भीर आके कहलन, “तूँ कहाँ चाहऽ हऽ, कि हम तोरा लागी फसह के भोज तईयार करूँ?”18ऊ कहलन, “नगर में फलाना आदमी भीर जा के ओकरा से कहऽ, ‘गुरु जी कहऽ हथन, “हमर समय करीब हे। हम अपन चेलवन के साथ तोर घर में फसह मनायेम।”’” 19चेलवन यीशु के आज्ञा मुताबिक करलन, आउर फसह के भोजन तईयार करलन।20जखनी साँझ होल, तऽ ऊ बारहो चेलवन के जौरे भोजन करे ला बईठ गेलन।21जखनी ऊ खा रहलन हल, तऽ ऊ कहलन, “हम तोरा सच कहऽ ही, कि तोहनी में से एगो हमरा पकड़वईतन।”22ऊ बड़ी उदास होलन, आउर सभे कोई उनका से पूछे लगलन, “हे प्रभु, का ऊ हम ही?”23ऊ उनका से जबाब देलन, “जे कोई हमर परोसल थाली में हाथ डालतक ओही हमरा पकड़वईतक।24आदमी के बेटा ओईसहीं पकड़वावल जईतन, जईसे उनकर बारे में शास्त्र में लिखल हे। बाकि हाय ऊ आदमी पर, जेकर हाथे आदमी के बेटा पकड़वावल जईतन! ओकरा लागी बेहतर ई होत हल कि ऊ आदमी जनम ही नऽ लेत हल।”25अब यहूदा, जे उनका पकड़वईतक, जबाब देलक आउर कहलक, “हे रब्बी, जरुर ही ऊ हम नऽ ही,?” ऊ उनका से कहलन, “ई तऽ तूँ खुद ही कह देलऽ हे।”26जखनी ऊ खा ही रहलन हल, तऽ यीशु रोटी लेके कहलन परमेश्वर के धन्यवाद, आउर तोड़लन। ऊ ओकरा चेलवन के देलन आउर कहलन, “लऽ, खा। ई हमर देह हे।”27ऊ कटोरा लेके धन्यवाद करलन, आउर उनका दे के कहलन, “तोहनी सभे के सभे एकरा में से पियऽ।28काहेकि ई वाचा के हमर ऊ लहू हे, जे बड़ी लोग के पापवन के मांफी लागी बहावल जा हे।29बाकि हम तोरा से कहऽ ही, कि दाख के ई रस ऊ दिन तक कहियो नऽ पियम, जहिया तक तोहनी जौरे अपन पिता के राज में नया नऽ पियम।”30जब ऊ भजन गा चुकलन, तऽ जैतून पहाड़ पर चल गेलन।31तऽ यीशु उनका से कहलन, “तोहनी सभे आज रात के हमरा चलते ठोकर खईवऽ, काहेकि शास्त्र में लिखल हे, ‘हम चरवाहवन के मारम आउर झुण्ड के भेड़वन तित्तर-बित्तर हो जायेत।’ 32बाकि जी उठला के बाद हम तोरा से आगे गलील में चल जायेम।”33बाकि पतरस जबाब दे के उनका से कहलन, “चाहे तोर कारण सभे लोग ठोकर खा के गिर जाय, तईयो हम कहियो नऽ गिरम।34यीशु पतरस से कहलन, हम तोरा से सच कहऽ ही, कि आज ही रात के, मुर्गा के बाँग देवे के पहिले, तूँ तीन बार हमरा नकार देवऽ।”35पतरस उनका से कहलन, “चाहे हमरा तोरा जौरे मरे भी पड़त, तईयो हम तोरा कहियो इंकार नऽ करम।” दोसर सभे चेलवन भी एही बात कहलन।36तब यीशु उनका जौरे गतसमनी नाम के जगह पर गेलक, आउर अपन चेलवन से कहलन, “जब तक हम ऊहाँ जा के प्रार्थना करऽ ही, तखनी तक ईहें बईठल रहिहऽ।”37आउर ऊ पतरस आउर जब्दी के दूनो बेटवन के अपना जौरे ले गेलन, आउर उदास आउर बेचैन होवे लगलन।38तऽ ऊ उनका से कहलन, “हमर मन बड़ी उदास हे, ईहाँ तक कि हम मरे वाला ही। ईहें रहऽ गौर से देखऽ आउर हमरा साथे जागल रहऽ।”39ऊ थोड़ा आगे बढ़लन, आउर मुँह के बल धरती पर गिर के प्रार्थना करे लगलन। ऊ कहलन, “हे हमर पिता, जदि हो सकत, तऽ ई कटोरा हमरा से हट जाय। तईयो जईसन हम चाहऽ ही ओईसन नऽ, बाकि जईसन तूँ चाहऽ हऽ ओईसने होवे।”40तऽ ऊ चेलवन भीर अईलन आउर उनका सुतल पईलन, आउर पतरस से कहलन, “तऽ का तूँ हमरा जौरे एक घड़ी तक जागे में सक्षम नऽ हऽ?41जगल रहिहऽ आउर प्रार्थना करते रहिहऽ कि तूँ परीक्षा में नऽ पड़िहऽ। आत्मा तऽ तईयार हे, बाकि देह कमजोर हे।”42ऊ दोसरका बेरा गेलन आउर फिन प्रार्थना करलन। ऊ कहलन, “हे हमर पिता, जदि ई हमरा पिये बेगर नऽ टल सकत, तऽ तोर इच्छा पूरा होवे।”43ऊ फिन अईलन आउर उनका सुतल पईलन, काहेकि उनकर आँख नींद से भारी हो गेल हल।44तब ऊ ओखनी के छोड़ के, फिन चल गेलन, आउर तिसरका बेरा प्रार्थना कर के ओही बात फिन बोललन।45तऽ यीशु चेलवन भीर अईलन आउर उनका से कहलन, “का तूँ अखनियो भी सूतल हऽ आउर आराम कर रहलऽ हे? देखऽ, ऊ समय निकट आयेल हे, आउर आदमी के बेटा पापियन के हाथ पकड़वावल जईतन।46उठऽ, हमनी चलम। देखऽ, हमरा पकड़वावे वाला भीर में आ गेल हे।”47ऊ अखनी कहऽ ही रहलन हल, कि देखऽ, यहूदा जे बारहो में से एगो हलन, अईलन। उनकर जौरे महायाजक आउर लोगवन के पुरनियन के तरफ से तलवार आउर लाठी के साथ एगो बड़का भीड़ भेजल गेल हल।48आउर जे आदमी यीशु के पकड़वावे वाला हल, ऊ उनका ई कह के इशारा करलक, कि “जिनका हम चूम लेम ओही यीशु होतन। उनका पकड़ लिहऽ।”49ऊ तुरन्त, यीशु भीर, अईलक आउर कहलक, “नमस्कार, हे रब्बी!” आउर उनका चूम लेलक।50बाकि यीशु उनका से कहलन, “हे दोस्त, तूँ जे करे अईलऽ हे ओही करऽ।” तऽ ओखनी आके यीशु पर हाथ धईलक, आउर उनका पकड़ लेलक।51देखऽ, यीशु के चेलवन में से एगो हाथ बढ़ा के, तलवार खींच लेलक, आउर महायाजक के दास पर चलऽ के, ओकर कान उड़ा देलक।52तऽ यीशु उनका से कहलन, “अपन तलवार अपन मियान में रखऽ, काहेकि जे तलवार चलावऽ हे ऊ सभे तलवार से मारल जईतन।53चाहे का तूँ समझऽ हऽ, कि हम अपन पिता विनती नऽ कर सकली हल, आउर ऊ स्वर्गदूतवन के बारह पलटन से जादे हमरा भीर एक ही बार में भेज देतन? 54बाकि पवित्रशास्त्र के बात कईसे पूरा होत, कि अईसन होवे ला जरुरी हे?”55ऊ घड़ी यीशु भीड़ से कहलन, “का तोहनी तलवार आउर लाठी लेके हमरा डाकू समझ के पकड़े ला अईलऽ हे, जईसे कोई डाकू भीर अईलऽ हे? हम रोजदिन मन्दिर में बईठ के उपदेश करऽ हली, तऽ तोहनी हमरा नऽ पकड़लऽ।56बाकि ई सभे येहिसे होल, कि भविष्यद्वक्तावन के पवित्रशास्त्र में लिखल बात पूरा होवे।” तऽ सभे चेलवन, उनका छोड़ के भाग गेलन।57ओखनी यीशु के पकड़ के ले गेलन, ऊ यीशु के कैफा नाम के महायाजक भीर ले गेलन, जहाँ शास्त्री आउर पुरनियन जमा हो गेलन हल।58बाकि पतरस दूर से महायाजक के अँगना तक उनकर पीछे चल अईलन। ऊ भीतर गेलन आउर नतीजा देखे लागी सेवकवन लोग के जौरे बईठ गेलन।59अब प्रधान याजक आउर सभे महासभा यीशु के खिलाफ झूठा गवाही खोजे में लगल हल, कि उनका मार देवे।60जबकि दूगो झूठा गवाह सोझे अईलक, तईयो भी उनका कोई नऽ मिललक। बाकि बाद में दू लोग सामने अईलक।61आउर कहलन, “ई आदमी कहऽ हथन, ‘हम परमेश्वर के मन्दिर के ढाह सकली हे, आउर तीन दिन में ओकरा बना सकली हे।’”62महायाजक खड़ा होके, उनका से कहलन, “का तोरा पास कोई जबाब नऽ हे? ऊ तोर खिलाफ का गवाही दे रहल हे?”63बाकि यीशु चुपचाप रहलन। महायाजक उनका से कहलन, “हम जिन्दा परमेश्वर के शपथ खा के तोरा आज्ञा दे ही, ताकि तूँ हमरा बतावऽ कि का तूँ परमेश्वर के बेटा मसीह हऽ।”64यीशु उनका जबाब देलन, “ई तूँ तऽ खुद ही कहलऽ हे। बाकि हम तोरा से कहऽ ही, अब से तूँ आदमी के बेटा के सर्वशक्तिमान परमेश्वर पिता के दहिना तरफ बईठल, आउर आसमान के बादल पर अईते देखवऽ।”65तऽ अपन कपड़ा फाड़ के, महायाजक कहलक, “ई निन्दा के बात कहलन हे! हमनी के अखनियो गवाह के जरुरत काहे हे? देख लऽ, अखनी तऽ तूँ निन्दा सुन लेलऽ।66तूँ का सोचऽ हऽ?” ऊ जबाब देलन, “ऊ मौत के सजा के लायक हे।”67तब ओखनी उनकर मुँह पर थूकलक आउर उनका पीटलक, आउर ओकरा में से कुछ उनका थप्पड़ मार के,68कहे लगल, “हे मसीह, हमरा बारे में भविष्यद्वाणी करऽ। जे तोरा थप्पड़ मारलक हे ऊ कौन हे?”69पतरस बाहरे अँगना में बईठल हलन, आउर एगो दासी उनका भीर आके कहलक, “तूँ भी यीशु गलीली के जौरे हलऽ।”70बाकि पतरस उनका सभे के सामने ई कह के इंकार कर देलक आउर कहे लगल, “हम नऽ जानऽ ही, कि तूँ का कह रहलऽ हे।”71जब पतरस बाहर फाटक भीर गेलन, तऽ दोसर दासी उनका देख के ऊहाँ के लोगवन से कहलन, “ई आदमी भी यीशु नासरी के जौरे हलन।”72ऊ फिन किरिया खा के इंकार करलन, “हम ऊ आदमी के नऽ जानऽ ही!”73थोड़ा देर के बाद जे लोग ऊहाँ भीर में खड़ा हलन, ओखनी आके पतरस से कहलन, “सच में तूँ भी ओखनी में से एगो हऽ, काहेकि तोर बोली भी तोर भेद खोल रहल हे।”74तऽ ऊ कोसे आउर किरिया खाय लगलन, “हम ऊ आदमी के नऽ जानऽ ही”, आउर तुरन्त मुर्गा बाँग देलक।75तऽ पतरस के यीशु के कहल गेल बात याद अईलक, कि “मुर्गा के बाँग देवे से पहिले तूँ तीन बेरा हमर इंकार करवऽ।” येहिगुने ऊ बाहरे गेलन आउर फूट-फूट के रोवे लगलन।
Bridge Connectivity Solutions Pvt. Ltd.