Matthew23
1तब यीशु भीड़ से आउर अपन चेलवन से बात करे लगलन,2आउर कहलन “शास्त्री आउर फरीसियन मूसा के गद्दी पर बईठल हथन। 3येहिगुने, जे कुछ भी ओखनी तोहनी से कहतन, ओकरा करिहऽ आउर मानिहऽ। बाकि उनकर जईसन काम मत करिहऽ, काहेकि ओखनी कहऽ तऽ हथन, बाकि करऽ नऽ हथन।4आउर ओखनी अईसन बोझा के बाँध के, जे भारी हे आउर जेकरा उठावे ला मुश्किल हे, ओकरा आदमी के कन्धा पर रख दे हथन, बाकि ऊ ओकरा अपन अँगुली से भी सरकावेला नऽ चाहऽ हथन।5बाकि ऊ अपन सभे काम लोगवन के देखावे ला करऽ हथन। काहेकि ओखनी अपन ताबीजवन के चौड़ा करऽ हथन आउर अपन कपड़ा के झालर के बढ़ावऽ हथन।6आउर उनका भोज में खास-खास जगह, आउर आराधनालय में खास-खास आसन पसन्द करऽ हथन,7आउर बाजार में नमस्कार, आउर लोगवन के बीच में ‘रब्बी’ कहलावेला उनका बढ़ियाँ लगऽ हे।8बाकि तोहनी ‘रब्बी’ नऽ कहलईहऽ, काहेकि तोहनी के एक्केगो गो गुरु हे, आउर तोहनी सभे भाई-भाई हऽ। 9आउर तोहनी में से कोई भी धरती पर कोई के भी ‘पिता’ नऽ कहतन, काहेकि तोहनी के एक्केगो गो स्वर्गीय पिता हथन।10आउर ‘गुरु’ भी नऽ कहलईहऽ, काहेकि तोर एक्केगो गो गुरु हथन, मतलब कि मसीह।11बाकि जे तोहनी में से महान होतन, ऊ तोहनी के सेवक बनतन।12बाकि जे कोई अपन बड़ाई करतन ऊ नम्र बनतन, आउर जौन नम्र बनतन उनकर बड़ाई करल जायेत।13बाकि हे कपटी शास्त्री आउर फरीसी लोग, तोहनी पर हाय! काहेकि तोहनी आदमी लागी स्वर्ग के राज के दुआरी बंद करऽ हऽ। काहेकि तूँ ओकरा में खुद भी भीतरे नऽ ढूकऽ हऽ, आउर नऽ ही भीतरे ढूके वाला के ढूके के इजाजत दे हऽ।14हे कपटी शास्त्रियन आउर फरीसियन, तोहनी पर हाय! काहेकि तोहनी विधवावन के घर खाय जा हऽ, आउर देखावे ला बड़ी लम्बा प्रार्थना करऽ हऽ। तोहनी के एकर जादे सजा मिलत।15हे कपटी शास्त्री आउर फरीसियन, तोहनी पर हाय! काहेकि तूँ एगो गैर-यहूदी आदमी के अपन मत में लावे ला समुद्र के पार चल जा हऽ आउर सुखल जमीन पर घूमते फिरऽ हऽ, आउर जखनी ऊ तोर मत में आ जा हे, तऽ ओकर जिनगी के अपना से दूगुना नरकीय बना दे हऽ।16हे आंधर अगुवन, तोहनी पर हाय, जे कहऽ हऽ कि ‘जदि कोई मन्दिर के किरिया खाय तऽ ओकरा से कुछो नऽ होवऽ हे, बाकि जदि मन्दिर के सोना के किरिया खा हे, तऽ ऊ बंध जायेत।17हे मूर्खवन, आउर अंधरन! बतावऽ कि कौन बड़ा हे, सोना कि ऊ मन्दिर जेकरा से सोना पवित्र होवऽ हे?.18आउर जे कोई वेदी के किरिया खईतन, तऽ ऊ कुछो नऽ हे। बाकि जदि कोई ओकरा पर रखल गेल चढ़ावा के किरिया खईतन, तऽ ऊ बंधा गेलन हे।’19हे मूर्खवन आउर अंधरन! बतावऽ कि कौन बड़ा हे? चढ़ावा कि ऊ वेदी, जेकरा से ऊ चढ़ावा पवित्र होवऽ हे?20येहिसे जे कोई वेदी के किरिया खा हे, ऊ ओकर आउर ओकरा पर जे कुछ रखल गेल हे, ओकर भी किरिया खा हे।21आउर जे कोई मन्दिर के किरिया खा हे, ऊ ओकर आउर ओकरा में रहे वाला परमेश्वर के किरिया खा हे।22आउर जे कोई स्वर्ग के किरिया खा हे, ऊ परमेश्वर के सिंहासन के, आउर ओकरा पर बोले वाला के भी किरिया खा हे।23हे कपटी शास्त्रियन आउर फरीसियन, तोहनी पर हाय! काहेकि तोहनी पुदीना आउर सौंफ आउर जीरा के दसमांश तऽ दे हऽ, बाकि तोहनी व्यवस्था के गड़ल बात मतलब कि न्याय, आउर दया, आउर विश्वास के छोड़ दे हऽ। बाकि ई जरुरी हल कि एकरा भी करते रहतऽ हल, आउर ओकरा भी नऽ छोड़तऽ हल।24हे आंधर अगुवन, तोहनी मच्छड़ के तऽ छान दे हऽ, बाकि ऊँट के निगल जा हऽ!25हे कपटी शास्त्रियन आउर फरीसियन, तोहनी पर हाय! काहेकि तोहनी कटोरा आउर थाली के तऽ ऊपरे-ऊपरे साफ करऽ हऽ, बाकि भीतर से ऊ लोभ-लालच आउर भोग विलास से भर गेल हे।26हे आंधर फरीसियन! पहिले कटोरा आउर थाली के तऽ भीतरे से मईसऽ, जेकरा से ओकर बाहरी हिस्सा भी साफ हो जाय।27हे कपटी शास्त्री आउर फरीसियन, तोहनी पर हाय! काहेकि तोहनी चूना से चुनेटल गेल कब्र के जईसन हऽ, जे ऊपर से तऽ सुन्दर देखाई दे हे बाकि भीतर से मुरदा के हड्डियन आउर सभे किसीम के अशुद्धता से भरल हे।28अईसहीं, तोहनियो ऊपर से धर्मी देखाई दे हऽ, बाकि भीतर में कपट आउर अधर्म से भरल हऽ।29हे कपटी शास्त्रियन आउर फरीसियन, तोहनी पर हाय! काहेकि तोहनी भविष्यद्वक्तावन के कब्र बनावऽ हऽ, आउर धर्मियन के कब्र सम्हारऽ हऽ।30आउर तोहनी कहऽ हऽ, ‘जदि हमनी पुरखावन के समय में रहती हल, तऽ भविष्यद्वक्तावन के हत्या में हमनी हत्या करे में सहभागी नऽ होती हल।’31येहिगुने तोहनी अपन खिलाफ खुद ही गवाही दे हऽ कि तोहनी भविष्यद्वक्तावन के हत्यारा लोग के वंशज हऽ।32अखनी तोहनी अपन पुरखावन के पाप के घईला भर दे हऽ!33हे साँपवन, हे करैंतवन के बच्चवन, तोहनी नरक के दण्ड से बच कईसे बचवऽ?34येहिसे, देखऽ, हम तोहनी भीर भविष्यद्वक्तावन आउर, बुद्धिमान लोग आउर शास्त्रियन के भेजऽ ही। ओखनी में से कुछ के तोहनी मार देवऽ आउर क्रूस पर चढ़ा देवऽ, आउर ओखनी में से कुछ के तोहनी अपन आराधनालय में कोड़ा मारवऽ आउर एक नगर से दोसर नगर में खदेरले चलवऽ।35ताकि धरती पर बहावल गेल सभे धर्मियन के लहू तोहनी के माथा पर पड़े, धर्मी हाबिल के लहू से लेके बिरिय्याह के बेटा जकर्याह के लहू तक, जिनका तोहनी मन्दिर आउर वेदी के बीच में मार देलन हल।36हम तोरा से सच सच कहऽ ही कि ई सभे बात ई पीढ़ी के लोग पर आ पड़त।37यीशु कहेला जारी रखलन, हे यरूशलेम, हे यरूशलेम, तोहनी जे भविष्यद्वक्तावन के मार डाललऽ हे, आउर जे तोरा भीर भेजल गेलन, उनका पर पत्थरवाह करऽ हऽ! केतना बार हम चाहली कि जईसे मुर्गी अपन बच्चवन के अपन पंखवन के तरे जमा करऽ हे, ओईसहीं हमहूँ तोर बाल-बच्चा के जमा कर लेम, बाकि तूँ नऽ चाहलऽ।38देखऽ, तोर नगर तोरा ला उजाड़ छोड़ल जा हे। 39काहेकि हम तोरा से कहऽ ही कि अखनी से लेके जखनी ला तूँ ई नऽ कहवऽ कि ‘धन्य हथन ऊ जे प्रभु के नाम से आवऽ हथन’ ऊ समय लागी तूँ हमरा फिन कहियो नऽ देखवऽ।”
Bridge Connectivity Solutions Pvt. Ltd.