Matthew22
1तब यीशु फिन से यहूदी अगुवन से दृष्टान्त में बात करे लगलन, आउर कहलन,2स्वर्ग के राज ऊ आदमी के जईसन हे, जे राजा हे, आउर जे अपन बेटा लागी वियाह के भोज तईयार करलन।3आउर जौन लोगवन के वियाह के भोज में नेऊता देवल गेल हल ओखनी के बोलावे ला ऊ अपन दास के भेजलन, बाकि ओखनी आवेला नऽ चाहलन।4फिन से ऊ दोसर दास लोग के ई कह के भेजलन, जौन लोग के नेऊता देवल गेल हे ओखनी से कह दऽ, “देखऽ, हम अपन भोज तईयार कर देली हे। हमर बैल आउर पालल मोटा बछड़ा मारल गेल हे, आउर सभे कुछ तईयार हे। वियाह के भोज में आवऽ”5बाकि ओखनी बेगर कोई धियान देले ही, कोई अपन खेतवन में, आउर कोई अपन रोजगार करे चल गेलन।6बाकि आउर दोसर लोग उनकर दास लोग के पकड़ के, ओखनी के बेईज्जती करलन आउर ओखनी के मार देलक।7बाकि राजा गोस्सा गेलन, आउर अपन सिपाहियन के भेज के ऊ हत्यारा लोग के मार देलन, आउर ओकर शहर के जला देलन।8“तब राजा अपन दासवन से कहलन, ‘वियाह के भोज तऽ तईयार हे, बाकि जे लोग के नेऊता भेजल गेल हल ओखनियो आवे के लायक नऽ रहल।9येहिसे चौराहा पर जा, आउर जेतना लोग तोरा मिलऽ हे, ओखनी सभे के वियाह के भोज में नेऊता दऽ।’10आउर ऊ दास लोग सड़कवन पर जा के, बुरा आउर भला दूनो, जेतना लोग उनका मिललन, ओखनी सभे के जमा करलन, आउर वियाह के घर भोजन करे वाला लोग से भर गेल।11बाकि जब राजा भोजन करे वाला लोगवन के देखे ला भीतरे गेलन, तऽ ऊ एगो आदमी के देखलन जे वियाह के कपड़ा पेहेनले नऽ हल। 12तऽ राजा ओकरा से कहलन, ‘हे दोस्त, वियाह के पोशाक पेहेनले बेगर तूँ ईहाँ भीतरे कईसे आ गेलऽ?’ बाकि ऊ आदमी चुप हो गेलन।13तब राजा सेवकवन से कहलन, ‘एकर हाथ-गोड़ बाँध के, एकरा बाहरसी अंधार में बिग दऽ। जहाँ रोवे आउर दाँत पीसे पड़त।’14काहेकि बोलावल गेल तऽ बड़ी हे, बाकि चुनल गेल थोड़ा सा हे।”15तऽ फरीसियन जा के, आपस में राय-मशवरा करलन कि यीशु के बात में कईसे फँसावल जाय।16आउर अपन चेलवन के हेरोदियन के साथ उनका पास भेज के ओखनी कहे लगलन, “हे गुरु, हम जानऽ ही कि तूँ सच्चा हऽ, आउर तूँ परमेश्वर के राह के शिक्षा सच्चाई से दे हऽ, आउर तोरा कोई बात के फिकिर नऽ रहऽ हे, काहेकि तूँ आदमी के मुँह नऽ देखऽ हऽ।17येहिगुने, हमरा बतावऽ कि तोरा का लगऽ हे? का रोमन कैसर के निजी लगान देवे ला सही हे, कि नऽ हे?”18बाकि यीशु, उनकर चलाकी के जान के कहलन, “हे कपटी लोग, तोहनी हमरा काहे परखऽ हऽ?19लगान के चाँदी के सिक्का हमरा देखावऽ।” आउर ओखनी उनका भीर एगो दीनार ले अईलन। 20यीशु ओखनी से पूछलन, “ई सिक्का पर छवि आउर नाम केकर हे?”21ओखनी जबाब देलन, “कैसर के।” तऽ ऊ उनका से कहलन, “येहिगुने जौन चीज कैसर के हे, ऊ कैसर के दऽ, आउर जौन चीज परमेश्वर के हे, ओकरा परमेश्वर के दऽ।”22आउर ई बात के सुन के, ओखनी अचरज करलन, आउर यीशु के छोड़ के ओखनी चल गेलन।23ओही दिन, कुछ सदूकी जे कहऽ हलन कि मरलकन के पुनरुत्थान नऽ होवऽ हे, यीशु भीर अईलन आउर उनका से सवाल पूछलन,24आउर कहलन, “हे गुरु, मूसा कहलन हल कि ‘जदि कोई निसंतान मर जाय, तऽ ओकर भाई ओकरा मेहरारू से वियाह करऽ हे आउर अपन भाई ला संतान पैदा करऽ हे।’ 25बाकि एगो परिवार में सातगो भाई हल, आउर पहिलका वियाह कर के मर गेल। आउर बाल-बच्चा नऽ होवे के कारण ऊ अपन मेहरारू के अपन भाई लागी छोड़ गेल।26अईसहीं दोसरका आउर तिसरका भाई भी करलन, आउर सातो भाई के येही हाल होल।27आउर आखिरकार, ऊ औरत भी मर गेल।28येहिसे, पुनरुत्थान में, ऊ सातो में से केकर मेहरारू होत? काहेकि ऊ सातो भाई के पास रहल हल।”29बाकि यीशु ओखनी के जबाब दे के कहलन, “तोहनी पवित्रशास्त्र के चाहे परमेश्वर के सामर्थ के नऽ जान हऽ, येही वजह से तोहनी भटक गेलऽ हे।30काहेकि पुनरुत्थान में नऽ तऽ कोई वियाह करऽ हथन, आउर नऽ ही वियाह होवऽ हे, बाकि ओखनी स्वर्ग में स्वर्गदूतवन के जईसन होतन।31बाकि का तूँ मरलकन के पुनरुत्थान के बारे में नऽ पढ़लऽ हे, जे परमेश्वर तोरा से ई वचन कहलन हल,32‘हम अब्राहम के परमेश्वर, आउर इसहाक का परमेश्वर आउर याकूब के परमेश्वर ही’? ऊ तऽ मरल लोग नऽ, बाकि जिन्दा लोग के परमेश्वर हथन!” 33आउर ई सुन के, भीड़ यीशु के उपदेश से अचरज होलन।34बाकि जब फरीसियन सुनलन, कि यीशु सदूकियन के मुँह बंद कर देलन हे, तऽ ओखनी एक जगह होलन।35आउर ओखनी में से एगो व्यवस्थापक यीशु के परखे लागी, ई सवाल पूछलन,36“हे गुरु, व्यवस्था में कौन सा आज्ञा सभे से बड़का हे?”37बाकि यीशु उनका से कहलन, “तूँ प्रभु अपन परमेश्वर से अपन पूरा मन, आउर पूरा प्राण, आउर अपन सभे बुद्धि से प्रेम रखऽ। 38ई बड़का आउर पहिला आज्ञा हे।39आउर ओकरे जईसन ई दोसरका भी हे कि ‘अपन पड़ोसी से अपने जईसन प्रेम करऽ।’ 40ई दूनो आज्ञावन पर ही पूरा व्यवस्था आउर भविष्यद्वक्तावन के आधार टिकल हे।”41अखनी फरीसी लोग के एकजूट होला पर यीशु उनका से सवाल पूछ के,42कहे लगलन, “मसीह के बारे में तूँ का सोचऽ हऽ? ऊ केकर बेटा हथन?” ओखनी उनका से कहलन, “दाऊद के।” 43ऊ ओखनी से कहलन, फिनो दाऊद आत्मा में उनका प्रभु कह के कईसे संबोधित करलन,44प्रभु हमर प्रभु से कहलन कि, “हमर दहिना बईठऽ, जब तक कि हम तोर दुश्मन के तोर गोड़ के तरे नऽ कर देम।” 45“येहिगुने, जदि दाऊद मसीह के ‘प्रभु’ कहऽ हथन, तऽ ऊ ओकर बेटा कईसे होलन?”46आउर कोई भी यीशु के एक भी बात के जबाब देवे के लायक नऽ हलन, आउर ऊ दिन के बाद कोई भी आगे से उनका से सवाल करे के हिम्मत नऽ जुटा पईलन।
Bridge Connectivity Solutions Pvt. Ltd.