Matthew14
1ऊ घड़ी, "गलील प्रान्त के शासक" हेरोदेस यीशु के बारे में खबर सुनलन।2आउर ऊ अपन सेवकवन से कहलन, “ई तऽ यूहन्ना बपतिस्मा देवे वाला हे। ऊ मरलकन में से जी उठलन हे, आउर येहिसे उनकर शक्तियन काम कर रहलक हे।”3काहेकि हेरोदेस यूहन्ना के कैदी बना के उनका बाँधलन, आउर अपन भाई फिलिप्पुस के मेहरारू हेरोदियास के कारण, उनका कैदखाना में डाल देलन।4काहेकि यूहन्ना उनका से कह रहलन हल, “ओकरा रखे ला तोरा ला सही नऽ हे।”5आउर यूहन्ना के मार देवे इच्छा रखते भर में, ऊ भीड़ से डर गेलन काहेकि ओखनी उनका भविष्यद्वक्ता मानऽ हलन।6बाकि जहिया हेरोदेस के जनमदिन आयेल तऽ हेरोदियास के बेटी मेहमान के बीच में नाच करलक आउर नाच के हेरोदेस के खुश करलक,7जौन वजह से किरिया खा के जे कुछ भी ऊ माँगतन ओकरा हेरोदेस देवे के वादा करलन।8अखनी ऊ अपन माय के द्वारा पहिलहीं से माँगल जाय पर, कहलन, “हमरा येही थाली में यूहन्ना बपतिस्मा देवे वाला के मुड़ी दे दऽ।”9आउर राजा बड़ी दुःखी होलन, बाकि वादा आउर उनका साथ भोजन पर बोले वाला के वजह से, आज्ञा देलन कि ओकरा ऊ देवल जाय।10आउर ऊ कसाई सिपाहियन के जेल में भेज के यूहन्ना के मुड़ी कटवा देलन।11आउर यूहन्ना के मुड़ी थाली में लावल गेल, आउर ऊ लड़की के दे देवल गेल आउर ऊ लईकी ओकरा अपन माय भीर ले गेल।12ओकर बाद उनकर चेलवन अईलन आउर यूहन्ना के लाश के ले जा के गाड़ देलन। आउर जा के ओखनी यीशु के ई बात के खबर देलन कि का होल हल।13जब यीशु ई खबर सुनलन तऽ ऊ अपन चेलवन के साथे नाव से गलील झील के किनारे एगो अईसन जगह गेलन जेज्जा कोई नऽ रहऽ हे।14आउर बाहर आके ऊ बड़ी बड़का भीड़ देखलन, आउर उनका पर तरस खईलन, आउर ओखनी के बेमारी के चंगा करलन।15अखनी साँझ होला पर उनकर चेलवन यीशु भीर आके कहलन, “ई जगह सुनसान हे, आउर पहिलहीं से देर हो चुकल हे। भीड़वन के जाय दऽ ताकि गाँव में जा के अपना लागी भोजन खरीद सकतन।”16बाकि यीशु ओखनी से कहलन, “ओखनी के बाहरसी जाय के जरुरत नऽ हे। तोहनिये ओखनी के खाय लागी दऽ।”17बाकि ओखनी उनका से कहलन, “हमनी भीर ईहाँ पाँचगो रोटियन आउर दूगो मछलियन के छोड़ के आउर कुछो नऽ हे।”18बाकि ऊ कहलन, “ओकरा ईहाँ हमरा भीर ले आवऽ।”19यीशु भीड़ के घास पर बईठे ला आज्ञा दे के, पाँचगो रोटियन आउर दूगो मछलियन के लेके, ऊपर स्वर्ग के तरफ ताक के ओकरा आशीषित करलन, आउर ओकरा तोड़ के चेलवन के देते गेलन, आउर चेलवन भीड़वन के।20आउर ओखनी सभे लोग खा के अघा गेलन। आउर ओखनी बचलकन टुकड़वन के जमा कर लेलन जेकरा से बारह दौरी भर गेल।21जखनी औरतियन आउर लईकवन के छोड़ के खाय वाला लोग लमसम पाँच हजार मरद हलन।22आउर तुरन्त यीशु अपन चेलवन के नाव पर चढ़ के ओखनी से पहिले ऊ पार चल जाय लागी मजबूर करलन, जब तक कि ऊ भीड़ के भेज देतन।23आउर भीड़ के भेज के ऊ खुद ही अकेले प्रार्थना करे लागी पहाड़ पर चढ़ गेलन। जब साँझ होल, तब ऊ ऊहाँ अकेले हलन।24बाकि नाव जे पहिलहीं से समुद्र के बीच में हल, लहर से डगमगा रहल हल, काहेकि हवा ओकर उल्टा हल।25फिन रात के चौथा पहर भोर होवे से पहिले यीशु पानी पर चल के ओखनी भीर अईलन।26बाकि उनका झील पर चलते देखके, चेला लोग घबरा के कहे लगलन, ई तऽ भूत हे, आउर ओखनी डर के मारे चिल्लाय लगलन।27बाकि यीशु तुरन्त उनका से बात कर के कहलन, “हिम्मत रखऽ! ई हम ही। डरऽ मत।”28बाकि पतरस उनका जबाब दे के कहलन, “हे प्रभु, जदि तूँ हऽ, तऽ हमरा पानी पर से चल के अपना भीर आवे के आज्ञा दऽ।”29आउर यीशु कहलन, “आवऽ।” आउर पतरस नाव से बाहर उतर के, यीशु भीर जायला पानी पर चले लगलन।30बाकि तेज हवा के देखके ऊ डर गेलन, आउर जखनी डूबे लगलन, तऽ ऊ ई कह के चिल्लईलन, हे प्रभु, बचा लऽ!31बाकि यीशु तुरन्त अपन हाथ बढ़ा के पतरस के पकड़ लेलन, आउर कहलन, “हे अल्पविश्वासी! तूँ शंका काहे करलऽ?”32आउर जखनी यीशु नाव पर चढ़ गेलन, तऽ हवा थम गेल।33आउर जौन चेला नाव पर हल ओखनी यीशु के दण्डवत कर के कहलन, “सचमुच तूँ परमेश्वर के बेटा हऽ।”34आउर पार उतर के, ऊ गन्नेसरत शहर के जमीन पर पहुँचलन।35आउर ऊहाँ के लोग यीशु के पछान के आस पास के पूरा इलाका में खबर भेजलन, आउर ऊ लोग सभे बेमार लोगवन उनका भीर लईलन।36आउर बेमार लोग यीशु से विनती करे लगलन, कि ऊ ओखनी के खाली अपन कपड़ा के कोरी के ही छू लेवे देतन, आउर जेतना लोग उनका छूलन ऊ चंगा हो गेलन।
Bridge Connectivity Solutions Pvt. Ltd.