Matthew15
1कुछ समय यरूशलेम से कुछ फरीसी आउर शास्त्री यीशु भीर आके कहे लगलन,2“तोर चेलवन प्राचीनवन के परम्परा के तोड़ काहे रहलन हे? काहेकि जखनी ऊ रोटी खा हथन तऽ अपन हाथ के नऽ धोवऽ हथन।”3बाकि यीशु जबाब दे के उनका से कहलन, “तोहनी भी अपन परम्परा के कारण परमेश्वर के आज्ञा के उल्लंघन काहे करऽ हऽ?4काहेकि परमेश्वर ई कह के, आज्ञा देलन हल, ‘अपन पिता आउर अपन माय के आदर करिहऽ,’ आउर ‘जे कोई आदमी अपन पिता चाहे माय के बारे में बुरा कहऽ हे, ओकरा मार देवल जाय।’5बाकि तूँ कहऽ हऽ, ‘जे कोई भी अपन पिता जी आउर माय से कहऽ हे, कि “जौन कुछ हम अपना तरफ से मदत कर सकली हल, परमेश्वर के ऊ एगो चढ़ावा हे,”’6ऊ जरुर अपन बाबूजी के निरादर करऽ हे। ई तरह से तूँ अपन परम्परा के वजह से परमेश्वर के वचन के बेकार कर देलऽ हे।7हे कपटी लोग! यशायाह तोर बारे में ई कह के ठीके भविष्यद्वाणी करलन हल, 8‘ई लोग ओठ से तऽ हमर आदर करऽ हे, बाकि ओकर मन हमरा से दूर रहऽ हे।9बाकि आदमी के देवल आज्ञा के धरम के उपदेश के रूप में सिखा के, ओखनी बेकार में हमर उपासना करऽ हे।’”10आउर भीड़ के बोला के यीशु ओखनी से कहलन, “सुनऽ, आउर समझऽ।11जे मुँह में जा हे ओकरा में से कुछो आदमी के अशुद्ध नऽ करऽ हे, बाकि जे मुँह से निकलऽ हे, ओही आदमी के अशुद्ध करऽ हे।”12तऽ कुछ समय के बाद आके चेलवन यीशु से कहलन, “का तूँ जानऽ हऽ, कि ई वचन सुन के फरीसियन अपमानित होलन हे?”13बाकि जबाब दे के, कहलन, “ऊ सभे पौधा जे हमर स्वर्गीय पिता नऽ लगईलन हे, ऊ उखाड़ल जायेत।14उनका जाय दऽ ऊ आंधर राह देखावे वाला हे, जदि एगो आंधर, आंधर के राह देखईतन तऽ दूनो गबड़ा में गिर पड़तन।”15अखनी जबाब दे के पतरस उनका से कहलन, “ई दृष्टान्त हमरा समझा दऽ।”16बाकि यीशु कहलन, “का तूँ भी अब लऽ नासमझ हऽ?17का तूँ अखनी भी नऽ समझ हऽ कि जे कुछ भी मुँह में जा हे, ऊ पेट में जा हे, आउर शौच से निकस जा हे?18बाकि जे बात मुँह से निकलऽ हे ऊ मन से निकलऽ हे, आउर ओही आदमी के अशुद्ध करऽ हे।19काहेकि बुरा विचार, हत्या, व्यभिचार, विषय वासना, चोरी, झूठा गवाही आउर निन्दा मन से ही निकलऽ हे।20येही ऊ काम हे जे आदमी के अशुद्ध करऽ हे, बाकि बेगर हाथ धोले भोजन करे ला आदमी के अशुद्ध नऽ करऽ हे।”21ओकर बाद ऊहाँ से निकल के, यीशु सोर आउर सीदोन के शहर में चल गेलन।22आउर देखऽ ऊ इलाका एगो कनानी औरत अईलन, जे ई कह के चिल्ला रहल हल, “हे प्रभु, दाऊद के संतान, हमरा पर दया करऽ! हमर बेटी पूरा तरह से दुष्टात्मा से जकड़ल हे।”23बाकि यीशु ओकर एक्कोगो बात के जबाब नऽ देलन। आउर आके उनकर चेलवन ई विनती करे लगलन, “एकरा दूर भेज दऽ, काहेकि ऊ चिल्लईते हमर पीछे आ रहल हे।”24बाकि जबाब दे के यीशु औरत से कहलन, “इस्राएल के घराना के भूलायेल भेड़ के छोड़ के हम केकरो भीर नऽ भेजल गेली हे।”25बाकि ऊ, आके, उनका आगे ई कह के झुकलन, “हे प्रभु, हमर मदत करऽ!”26अखनी ऊ जबाब दे के कहलन, “लईकवन के रोटी लेके ओकरा कुत्ता के आगे डाले ला बढ़ियाँ नऽ हे।”27बाकि ऊ कहलक, “हाँ, हे प्रभु, तईयो कुत्ता भी तऽ अपन मालिक के मेज से गिरे वाला टुकड़वन के खा हे।”28तऽ यीशु जबाब दे के, ओकरा से कहलन, “हे बेटी, तोर विश्वास बड़ा हे; जईसन तूँ चाहऽ हऽ तोरा ला ओईसने हो जाय।” आउर ओकर बेटी ओही घड़ी चंगा हो गेल।29आउर ऊहाँ से निकल के यीशु गलील झील के पास अईलन, आउर एगो पहाड़ पर चढ़ के ऊ ऊहाँ बईठ गेलन।30आउर बड़ी बड़का भीड़ अपना साथे लँगड़न, अंधरन, लूल्हन, आउर गूंगन, आउर ढेर लोग के लेके उनका भीर अईते रहलन। आउर ओखनी ओकरा उनकर गोड़ पर डाल देलन, आउर ऊ ओखनी के चंगा करलन,31येहिगुने गूंगन के बोलते, लूल्हन के निमन होते, लँगड़न के चलते, आउर अंधरन के देखते, ई देख के भीड़ अचरज करलन। आउर ओखनी इस्राएल के परमेश्वर के स्तुति करलन।32बाकि यीशु अपन चेलवन के बोला के, कहलन, “हमरा भीड़ पर तरस आवऽ हे, काहेकि ओखनी पहिले से ही तीन दिन से हमरा साथे हे, आउर ओखनी भीर खाय ला कुछ नऽ हे। आउर हम ओखनी के भूखल विदा करे ला नऽ चाहऽ ही, अईसन नऽ होवे कि ओखनी राह में मूर्छित हो जईतन।” 33आउर चेलवन उनका से कहलन, “ई सुनसान जगह में हमनी के एतना रोटी कहाँ से मिलत, कि एतना बड़का भीर के खिला सकम?”34आउर यीशु उनका से कहलन, “तोरा भीर केगो रोटी हे?” आउर ओखनी कहलन, “सातगो रोटी आउर थोड़ा सा छोटा मछली भी हे।”35आउर यीशु भीड़ के जमीन पर बईठे ला आज्ञा दे के,36ऊ सातगो रोटियन आउर मछलियन के लेलन। आउर धन्यवाद दे के ऊ ओकरा तोड़लन आउर ओकरा अपन चेलवन के देते गेलन, आउर चेलवन भीड़ के देते गेल।37आउर ओखनी खा के तृप्त हो गेलन। आउर ओखनी बाकि बचलकन टुकड़ा से भरल सातगो मौनी लेके गेलन।38बाकि औरतियन आउर लईकवन के छोड़ के खाय वाला चार हजार मरद हलन।39आउर यीशु अपन चेलवन जे जौरे भीड़ के विदा कर के, नाव पर चढ़ गेलन, आउर मगदन प्रदेश में चल गेलन।
Bridge Connectivity Solutions Pvt. Ltd.