Mark6
1यीशु कफरनहूम से निकल के अपन जनम स्थान नासरत चल गेलन। उनकर चेलवन उनका साथे गेलन। 2यहूदियन के अगला सब्त के दिन में, ऊ यहूदियन के आराधनालय में जा के लोगवन के शिक्षा देलन। जौन उनका सुन रहलन हल ओकरा में से बड़ी लोग चौंक गेलन कि उनका में एतना बुद्धि आउर चमत्कार करे के शक्ति कहाँ से लईलन हे।3ओखनी कहलन, “ई तऽ एगो साधारण बढ़ई हे! हम सभे इनका आउर इनकर परिवार के जानऽ ही! हम सभे इनकर माय मरियम के जानऽ ही! हम इनकर छोटकन भईवन याकूब, योसेस, यहूदा, आउर शमौन के भी जानऽ ही! आउर इनकर छोटकी बहिनियन ईहाँ हमनी के बीच में ही रहऽ हे!”4यीशु ऊ सभे से कहलन, “ई जरुर सच हे कि दोसरा जगह में लोग भविष्यद्वक्ता के सम्मान करऽ हे, बाकि उनकर अपन जनम स्थान के नगर में उनकर सम्मान नऽ करऽ हे!” ईहाँ तक कि उनकर रिश्तेदारवन आउर उनकर घर के लोग भी उनकर सम्मान नऽ करऽ हथन!5जबकि ऊ ईहाँ कुछ बेमरियन पर अपन हाथ रख के उनका चंगा करलन, बाकि ऊ कोई दोसरा चमत्कार नऽ कर पईलन।6ऊ ई बात से हैरान होलन कि एतना लोग उनका पर अविश्वाश करलन हे, बाकि ऊ ओखनी के गाँव में जा-जा के ओखनी के शिक्षा देते रहलन।7एक दिन, यीशु 12 चेलवन के एक साथे अपना भीर बोलईलन। फिन ऊ उनका से कहलन कि ऊ उनका दू-दूगो कर के अलग-अलग नगर में शिक्षा देवे लागी भेजे वाला हथन। ऊ उनका ऊ लोगवन में से दुष्टात्मावन के निकासे के अधिकार देलन जे अशुद्ध आत्मावन के वश में हलन।8ऊ उनका ई भी आज्ञा देलन कि जखनी ऊ यात्रा करतन तऽ जूति पेहेनतन आउर लाठी साथे ले जईतन। ऊ उनका से कहलन कि खाना नऽ लिहऽ आउर नऽ कोई झोली में पईसा लिहऽ जेकरा में उनकर यात्रा लागी आपूर्ति चाहे कोई धन रखल जाय। ऊ उनका एगो कोई दोसरा कुरता भी लेवे के आज्ञा नऽ देलन।10ऊ उनका ई भी आज्ञा देलन, “जदि कोई जन तोरा अपन घर में रुके ला कहतन, तऽ जब तक ऊ नगर से नऽ निकलवऽ तब तक उनकरे घर में रहिहऽ।11जहाँ कहीं लोग तोहनी के स्वागत नऽ करतन आउर जहाँ कहीं लोग तोहनी के बात नऽ सुनतन, तऽ ऊहाँ से निकलते ही अपन गोड़ के धूरी झाड़ दिहऽ। अईसन कर के तूँ ई बात के गवाही दे रहलऽ हे कि ओखनी नऽ तऽ तोहनी के स्वागत करलक आउर नऽ तोहर समाचार के कबूल करलन।” 12फिन जब बारह चेलवन अलग-अलग नगरवन में गेलन, तऽ ऊ प्रचार करे लगलन कि लोग अपन पाप के पछतावा करतन।13ऊ लोगवन में से बड़ी दुष्टात्मा के भी निकास रहलन हल, आउर ऊ बड़ी बेमार लोग पर जैतून के तेल के अभिषेक कर के चंगा कर रहलन हल।14तब राजा हेरोदेस अंतिपास जौन यीशु करते हलन ओकर बारे में सुनलन। कुछ लोग यीशु के बारे में कह रहलन हल, “ई सच में यूहन्ना बपतिस्मा देवे वाला हथन! ऊ मरल में से जिन्दा हो गेलन! एही चलते उनका भीर ई चमत्कार के करे के शक्ति हे!”15दोसरा लोग कह रहलन हल, “ई पुरनका भविष्यद्वक्ता एलिय्याह हथन, जिनका फिन से भेजे के परमेश्वर वादा करलन हल।” केतना दोसरा लोग यीशु के बारे में कह रहलन हल, “नऽ, नऽ, ई कोई आउर भविष्यद्वक्ता हथन, ई ऊ दोसरा भविष्यद्वक्ता के जईसन हथन जे बड़ी पहिले होलन हल।”16लोग जौन बात कह रहलन हल ओकरा सुनला के बाद, राजा हेरोदेस अंतिपास खुद से कहलन, “ऊ चमत्कार के करे वाला ऊ अादमी जरुर यूहन्ना बपतिस्मा देवे वाला होतन! हमहीं तऽ अपन सिपाहियन के उनकर मुड़ी काट देवे के आज्ञा देली हल, बाकि ऊ फिन से जी उठलन हे!”17काहेकि बीतल समय में राजा हेरोदेस यूहन्ना के कैदी बना के जेल में डाल देलन हल। राजा हेरोदेस अंतिपास अईसन येही से करलन हल काहेकि ऊ अपन छोटका भाई फिलिप्पुस के औरत, हेरोदियास से वियाह कर लेलन हल।18हेरोदेस यूहन्ना के जेलखाना में येहिगुने डाल देलक हल काहेकि ऊ हेरोदेस से कह रहलन हल, “परमेश्वर के व्यवस्था तोरा तोहर भाई के औरत से वियाह करे ला सही नऽ हे।” 19बाकि काहेकि फिलिप्पुस के औरत, हेरोदियास यूहन्ना से बदला लेवे ला चाहऽ हल, येही से ऊ चाहऽ हलऽ, कि कोई उनका मार दे। बाकि ऊ अईसन येही से नऽ कर पईलन काहेकि जौन घड़ी यूहन्ना जेलखाना में हलन, हेरोदेस यूहन्ना के ओकरा से बचा के रखलन हलऽ।20हेरोदेस अईसन येही से करलन काहेकि ऊ यूहन्ना के आदर करऽ हलन, आउर ऊ जानऽ हलन कि ऊ एगो अईसन धर्मी आउर पवित्र जन हथन जे अपन खुद के परमेश्वर में समर्पित कईले हथन। जब भी हेरोदेस यूहन्ना के बात के सुनऽ हलन, तऽ ऊ बड़ी डर जा हलन, बाकि उनका यूहन्ना के बात सुने ला अच्छा भी लगऽ हल।21आखिरकार यूहन्ना के हत्या होते देखे के सही समय हेरोदियास के तब मिलल जब ओखनी हेरोदेस के जनमदिन पर सम्मान करलन। ऊ सभे से खास अधिकारियन, सभे से मुख्य सेनापतियन, आउर गलील जिला के सभे से खास लोगवन के अपने साथे खाना खाय आउर खुशी मनावे लागी नेऊता देलन।22जौन घड़ी ऊ खाना खायेत हलन तऽ हेरोदियास के बेटी घर में आके राजा आउर उनकर अतिथियन के सामने नाचलक। ऊ राजा हेरोदेस आउर उनकर अतिथियन के एतना खुश कर देलक कि ऊ उनका से कहलन, “तोर जौन इच्छा हे ऊ माँगऽ, आउर ऊ हम तोरा देम!”23ऊ ओकरा से ई वादा भी करलन, “जौन कुछ तूँ माँगवऽ, ऊ हम तोरा देम! जदि तूँ माँगवऽ तऽ हम तोरा अपन आधा संपत्ति आउर आधा राज तक दे देम।”24एकर बाद, ऊ बेटी अपन माय, हेरोदियास भीर गेल आउर जौन राजा हेरोदेस कहलन हल उनका बतईलक। ऊ अपन माय से पूछलक, “हमरा का माँगे के चाही?” ओकर माय जबाब देलक, “राजा से माँग कि ऊ तोरा यूहन्ना बपतिस्मा देवे वाला के मुड़ी दे देतन!”25ऊ लड़की जल्दी से घर में गेल आउर अपन विनती के साथे राजा के सामने में सीधा पहुँच गेल। ऊ कहलक, “हम चाहऽ ही कि तूँ कोई के यूहन्ना बपतिस्मा देवे वाला के मुड़ी काट के येही घड़ी परोसे वाला थाली में रख के हमरा ला देवे के आदेश दऽ!”26जौन ऊ माँगलक हल ओकरा सुन के राजा बड़ी परेशान हो गेलन काहेकि ऊ जानऽ हलन कि यूहन्ना बड़ी धर्मी अादमी हलन। बाकि ऊ ओकर विनती से इंकार नऽ करलन काहेकि ऊ ई वादा करलन हल कि जौन कुछ ऊ माँगी ऊ ओकरा देतन, आउर उनकर अतिथियन भी उनकर वादा के सुनलन हल।27फिन राजा ओही घड़ी आदेश देलन कि जा के यूहन्ना के मुड़ी काट दऽ आउर ओकरा लड़की भीर ले आवऽ तऽ ऊ सिपाही जेल में जा के यूहन्ना के मुड़ी काट देलक।28ऊ ओकरा एगो परोसे वाला थाली में रख के ले अईलक, आउर ऊ लड़की के दे देलक। ऊ लड़की ओकरा अपन माय भीर ले गेल।29जे घटना होल हल ओकरा सुन के यूहन्ना के चेलवन जेल में जा के यूहन्ना के लाश के लेलन; फिन ओखनी उनका कब्र में गाड़ देलन।30जौन लोग के यीशु अपन प्रेरितवन के अगुवाई करे ला चुनलन हल, ऊ सभे ऊ जगह से आ गेलन जहाँ ऊ ओखनी के भेजलन हल। ओखनी उनका समाचार देलन कि ओखनी का-का करलन हल आउर ओखनी लोग के का-का सिखईलन हल।31ऊ उनका से कहलन, “हमरा साथे अईसन जगह चलऽ जहाँ कोई अादमी नऽ रहे, ताकि हम एकांत में रहम आउर तनिसा आराम कर लेम!” ऊ अईसन येही से कहलन काहेकि उनका भीर बड़ी लोग हमेशा अईते रहऽ हलन आउर फिन चल जा हलन, जेकर नतीजा यीशु आउर उनकर चेलवन के खाना खाय चाहे कुछ आउर काम करे के समय नऽ मिलऽ हल।32येही से ऊ खुदे एगो नाव पर चढ़ के एगो अईसन जगह चल गेलन जहाँ कोई अादमी नऽ रहऽ हल।33बाकि उनका जईते बड़ी लोग देख लेलन। ओखनी ई भी चिन्ह लेलन कि ऊ यीशु आउर उनकर चेलवन हलन, आउर ओखनी देख लेलन कि ऊ कहाँ जा रहलन हल। येही से अगल-बगल के नगर से अपन जगह से ऊ जगह दने आगे-आगे दौड़लन जहाँ यीशु आउर उनकर चेलवन जा रहलन हल। सच में ऊ यीशु आउर उनकर चेलवन से पहिले ऊहाँ पहुँच गेलन हल।34जब यीशु आउर उनकर चेलवन नाव पर से उतरलन तऽ यीशु एगो बड़ी भीड़ के देखलन। उनका ओखनी पर तरस आयेल काहेकि ऊ बिना चरवाहा के भेड़वन के जईसन उलझन में हल। येही से ऊ ओखनी के बड़ी बात के सिखईलन। 35दूपहर बीत गेला के बाद चेलवन उनका भीर आके कहलन, “ई एगो अईसन जगह हे जहाँ कोई नऽ रहऽ हे, आउर बड़ी देर हो गेल हे।36येहिसे लोगवन के विदा करऽ कि ऊ अगल-बगल के नगरवन आउर गाँव में जा के अपना लागी खाना कीन लेतन!”37बाकि ऊ उनका जबाब देलन, “नऽ, तूँही ओखनी के कुछ खाई ला दऽ!” ओखनी जबाब देलन, “ईहाँ तक कि जदि हमनी भीर एगो आदमी के 200 दिन काम कर के कमायेल दीनार से जादे होवे तईयो हम ई भीड़ के खिलावे लागी भरपूर रोटी नऽ खरीद सकऽ ही!”38बाकि ऊ ओखनी के पूछलन, “तोहनी भीर केतना रोटी हे? जा के देखऽ!” ओखनी जा के देखलन आउर फिन कहलन, “हमनी भीर खाली पाँचगो रोटी आउर दूगो पकल मछली हे!”39ऊ चेलवन के आज्ञा देलन कि ऊ सभे लोग के हरियर घास पर बईठे ला कहतन।40तऽ लोग झुण्ड बाँध के बईठ गेलन। कुछ झुण्ड में 100-100 लोग हलन, आउर कुछ झुण्ड में 50-50 लोग हलन।41यीशु ऊ पाँचगो रोटी आउर दूगो मछली के लेलन। ऊ स्वर्ग तरफ देख के ओकरा लागी परमेश्वर के धन्य करलन। फिन ऊ रोटी आउर मछली के टुकड़ा-टुकड़ा तोड़-तोड़ के चेलवन के देते गेलन ताकि ऊ ओकरा लोगवन में बाँट देतन।42सभे लोग ई खाना के तब तक खईलन जब तक कि ऊ खा के अघा नऽ गेलन!43बाँटला के बाद फिन चेलवन बचलकन रोटियन आउर मछली के टुकड़वन से बारह दौरी भर लेलन।44ऊहाँ लगभग पाँच हजार आदमी हलन जौन रोटी आउर मछलियन खईलन हल। ईहाँ तक कि ओखनी औरतियन आउर लईकवन के तऽ गिनबो नऽ करलन। 45तुरन्त यीशु अपन चेलवन से नाव पर चढ़ेला आज्ञा देलन आउर फिन ओखनी के आगे-आगे बैतसैदा नाम के नगर जाय ला कहलन, जौन गलील के झील के दोसरा तरफ पास में हे। ऊ रुक के ऊहाँ मौजूद बड़ी लोगवन के विदा करलन।46लोगवन के विदा कर के ऊ प्रार्थना करे लागी पहाड़ पर चल गेलन।47जब साँझ होल, तऽ चेलवन के नाव झील के बीच में हल, आउर यीशु जमीन के किनारे अकेले हलन।48जखनी चेलवन नाव खेब रहलन हल तऽ ऊ देखलन कि हवा उनकर उल्टा चलते हे। नतीजा से, उनका बड़ी मोसीबत हो रहल हल। बिहने भोरिये अंधारे होल, तऽ रात के चौथा पहर ऊ पानी पर चल के उनकर नजदीक पहुँचलन। उनकर मन हल कि ऊ चल के उनका से आगे निकल जईतन 49ओखनी उनका पानी पर चलते देखलन, बाकि ओखनी सोचलन कि ऊ कोई भूत हे। येहिगुने ऊ चिकरे लगलन50काहेकि जब ओखनी देखलन तऽ ऊ सभे के सभे डेरा गेलन हल। बाकि ओखनी से उनका बात करलन। ऊ ओखनी से कहलन, “हिम्मत रखऽ! डेरा मत काहेकि ई हम ही!”51ऊ नाव पर चढ़ के ओखनी के साथे बईठ गेलन, आउर हवा चले ला बंद हो गेल। जौन ऊ करलन हल ओकर बारे में ओखनी पूरा तरह से चौंक गेलन हल।52जबकि ओखनी यीशु के रोटी आउर मछली के मात्रा बढ़ईते देखलन हल, तईयो ऊ एकर मतलब नऽ समझ सकलन, जईसन कि ओखनी के समझे के चाहऽ हल, काहेकि ओखनी के मन कठोर हो गेल हल।53जखनी ऊ नाव में होके गलील के झील के तनिसा आगे बढ़लन, तऽ ऊ गन्नेसरत नगर के तट पर अईलन। तऽ ओखनी नाव के ऊहें बाँध देलन।54जईसहीं ऊ नाव से उतरलन, लोग यीशु के चिन्ह गेलन।55येही से ऊ लोगवन के ई बतावे लागी सभे प्रान्त में दौड़ गेलन कि यीशु ईहाँ पर हथन। तऽ लोग बेमरियन के खटिया पर सुता देलन आउर उनका उठा के ऊहाँ तक गेलन जहाँ कहीं लोगवन के ई कहते सुनलन कि यीशु ईहाँ हथन।56जौन कोई गाँव, नगर, चाहे बस्ती के जगह में ऊ गेलन, ऊ लोग ऊहाँ के बेमरियन के बजार में ले आवऽ हलन। तऽ बेमार लोग यीशु से विनती करऽ हलन कि ऊ उनकर चाहे उनकर कपड़ा के छोर के छुये देतन ताकि यीशु उनका चंगा कर देतन। जेतना उनका चाहे उनकर कपड़ा के छूलन, ऊ सभे के सभे चंगा हो गेलन।
Bridge Connectivity Solutions Pvt. Ltd.