Mark7
1एक दिन कुछ फरीसियन आउर कुछ यहूदी शास्त्री आउर यरूशलेम से आयेल लोग यीशु भीर जमा होलन।2फरीसियन देखलन कि यीशु के कुछ अशुद्ध चेलवन मतलब उनकर खास यहूदी परम्परा के पालन करे में हमेशा हाथ बिना धोले खाना खा ले हलन।33 फरीसियन आउर बाकि सभे यहूदी अपन पुरनिया द्वारा सिखावल गेल उनकर परम्परा के कड़ाई से पालन करऽ हलन। उदाहरण लागी, जखनी तक ओखनी अपन हाथ के एक खास रीति से धो नऽ ले हलन, तखनी तक खाना नऽ खा हलन,4आउर खास करके जब ओखनी बाजार से लौटऽ हलन, तऽ जब ला ओखनी नहा नऽ ले हलन तब ला ओखनी खाना नऽ खा हलन; आउर अईसन बड़ीमनी दोसर बात हल जे ओखनी के माने ला मिलल हल: जईसे कटोरा, लोटा, ताँबा, के बरतन खटिया, सुराही आउर दोसर चिजवन के धोवे ला।5ओही दिन, फरीसियन आउर शास्त्रियन, आउर व्यवस्था के धरमगुरु लोग देखलन कि उनकर कुछ चेलवन अपन हाथ के खास रीति से बेगर धोले खाना खा रहलन हल। येही से ओखनी यीशु से सवाल पूछ के कहलन, “तोर चेलवन हमनी के पुरनिया के परम्परा पर नऽ चलऽ हथन! जदि ओखनी हमनी के रीति-रिवाज से अपन हाथ के नऽ धोवऽ हथन तऽ ऊ खाना काहे खा ले हथन!”6फिन यीशु उनका से कहलन, “यशायाह तोहनी के पुरखावन के भविष्यद्वाणी करलन हल, आउर उनकर वचन तोहनी के बखान बड़ी अच्छा से करऽ हे जौन बढ़ियाँ बने के ढोंग करऽ हथन!” ऊ ई शब्द के लिखलन जौन परमेश्वर कहलन हल:ई लोग अईसन बात करऽ हथन जईसे कि ओखनी हमर आदर करऽ हथन,बाकि मन से ओखनी हमर आदर करे के बारे में एकदम नऽ सोचऽ हथन। 7उनका लागी हमर आराधना करे ला बेकार हे,काहेकि ऊ खाली ओही बात के सिखावऽ हथन जौन लोग कहऽ हथन,जईसे कि मानऽ हम ऊ बात के आज्ञा देली हे। 8अपन पुरखावन के जईसन, तूँ भी ऊ बात के पालन करे से नकारऽ हऽ जेकर आज्ञा परमेश्वर देलन हे। बदले एकर, “तूँ खाली ओही परम्परा के पालन करऽ हऽ जौन दोसरा कोई सिखईलन हे।”9यीशु उनका से ई भी कहलन, “तूँ सोचऽ हऽ कि तूँ परमेश्वर के आज्ञा के पालन करे से इंकार करे में चतुर हऽ, ताकि तूँ अपन परम्परा के पालन कर सकवऽ!10उदाहरण लागी, तोहनी के पुरखा मूसा परमेश्वर के आज्ञा के लिखलन हल कि' अपन माय बाप के आदर करिहऽ। ऊ ई भी लिखलन हल कि जौन आदमी अपन पिता आउर अपन माता के बारे में गन्दा बात बोलतन तऽ अईसन आदमी के अधिकारी लोग मौत के सजा देतन। 11बाकि तूँ लोगवन के सिखावऽ हऽ कि जदि तूँ अपन माय बाप के अपन भेंट देवे के बजाय ओकरा परमेश्वर के देवऽ तऽ ई ठीक बात हे। तूँ ओकरा अपन माय-बाप से अईसन कहे के आज्ञा दे हऽ कि' जौन हम तोरा हासिल करवावे लागी तोरा देवे वाला हली, अब ऊ हम परमेश्वर के देवे के वादा करली हे। येही से अब हम तोहर मदत नऽ कर सकऽ ही!' 12एकर नतीजा से, तूँ सच में लोगवन से कह रहलऽ हे कि अब उनका अपन माय-बाप के मदत करे के जरुरत नऽ हे।13येहिगुने अईसे तूँ अपन परम्परा से परमेश्वर के आज्ञा के उल्लंघन करऽ हऽ! तूँ दोसरा के अपन बात सिखावऽ हऽ आउर उनका से कहऽ हऽ कि ओकरा उनका पालन करे के चाही। आउर तूँ अईसने आउर बड़ी काम करऽ हऽ।”14तऽ यीशु फिन से भीड़ के नजदीक आवे लागी कहलन। फिन ऊ उनका से कहलन, “तोहनी सभे लोग हमर बात सुनऽ! जे बात हम तोहनी के बतावे वाला ही ओकरा समझे के कोशिश करऽ।15जे कुछ लोग खा हथन ओकर चलते परमेश्वर उनका अशुद्ध नऽ समझऽ हथन। एकर उल्टा, ई ओही बात हे जौन लोग के भीतर के मन से निकल हे जौन परमेश्वर के द्वारा उनका अशुद्ध समझे के कारण बनऽ हे।”16जौन कुछ तूँ हमरा कहते सुनलऽ हे ओकर बारे में तोहनी सभे के धियान से विचार करे के चाही।17एकर बाद भीड़ के छोड़ के यीशु अपन चेलवन के साथे एगो घर में गेलन। ओखनी उनका से ऊ दृष्टान्त के बारे में उनका से सवाल पूछलन जौन ऊ अखनी बोललन हल।18ऊ उनका जबाब देलन, “का तूँ समझलऽ नऽ कि एकर का मतलब हे? तोरा समझे के चाही कि जौन कुछ बाहरी से हमनी के भीतर जा हे, ऊ परमेश्वर लागी हमनी के अशुद्ध करे के कारण नऽ बन सकऽ हे।19हमनी के मन में घूँस के ओकरा बिगाड़े के बदले, ई खाना हमनी के पेट में चल जा हे, आउर बाद में हमर देह से शौच के जरिये बाहरी निकल जा हे।” अईसन कहे के द्वारा, यीशु ई ऐलान कर रहलन हल कि परमेश्वर लागी ऊ शुद्ध होवे के कारण कोई भी खाना खा सकलन हे।20यीशु आगे ई भी कहलन, “ई विचार आउर काम ही होवऽ हे जे लोग के भीतर से निकलऽ हे, जौन परमेश्वर लागी उनका अशुद्ध होवे के कारण बनऽ हे।21खास कर के, ई कोई आदमी के एकदम भीतरी मन होवऽ हे जौन उनका गन्दा बात सोचे लागी प्रेरित करऽ हे; ऊ सभे व्यभिचार काम करऽ हे, ऊ सामान चोरावऽ हे, ऊ हत्या करऽ हे।22ऊ व्यभिचार करऽ हे, ऊ लोभी होवऽ हे, ऊ सभे गलत भावना से काम करऽ हे, ऊ लोगवन के धोखा दे हे। ऊ दुर्व्यवहार से काम करऽ हे, ऊ लोगवन से जलन करऽ हे, ऊ दोसरा के बारे में गन्दा बात के बोलऽ हे, ऊ घमण्ड करऽ हे, आउर ऊ मूर्खता वाला काम करऽ हे।23एगो आदमी के मन में ई सोच-विचार आवऽ हे, आउर फिन गन्दा काम करऽ हे, आउर परमेश्वर लागी ई उनकर अशुद्ध होवे के कारण बनऽ हे।”24यीशु आउर उनकर चेलवन गलील से निकल के, सोर आउर सीदोन के इलाका के अगल-बगल के देश में गेलन। जौन घड़ी ऊ एगो घर में ठहरल हलन, तऽ ऊ नऽ चाहऽ हलन कि कोई ई बात के जानतन, बाकि लोगवन के तुरन्त पता चल गेल कि ऊ ईहाँ हलन।25एगो औरत यीशु के बारे में सुनलन, जेकर बेटी में एगो अशुद्ध आत्मा घूँसल हल। तुरन्त ऊ यीशु भीर आके उनकर पावऽ पर गिर गेलन।26अखनी ऊ औरत यहूदी नऽ हलन। उनकर पुरखावन भी यहूदी नऽ हलन। ऊ खुदे सीरिया प्रान्त के यूनानी औरत सुरूफिनीकी इलाका में जनम लेलन हल। ऊ यीशु से विनती करलन कि ऊ उनकर बेटी में से दुष्टात्मा के निकास देतन।27यीशु औरत से कहलन, “जौन कुछ बच्चवन खाय ला चाहऽ हे पहिले उनका ऊ खा लेवे दऽ, काहेकि ई बढ़ियाँ नऽ हे कि कोई ऊ खाना के लेके जेकरा माय बच्चवन लागी बनईलन हल तनी-तनिगो कुत्तवन के आगे डाल देतन।”28औरत जबाब देलन, “हे मालिक, जे तूँ कहऽ हऽ ऊ सही हे, बाकि घर के कुत्तवन भी मेज के नीचे पड़ल-पड़ल बच्चवन से गिरल चूरचार के खा हे।”29यीशु उनका से कहलन, “जे तूँ कहलऽ हे ओकरे चलते, घरे चल जा। हम तोर बेटी में से ऊ दुष्टात्मा के निकास देली हे।”30ऊ औरत अपन घरे जा के देखलन कि उनकर बेटी चुपचाप खटिया पर पड़ल हल आउर ऊ दुष्टात्मा निकल गेल हल।31यीशु आउर उनकर चेलवन सोर के अगल-बगल के देश से निकल के उत्तर तरफ सीदोन होते, फिन पूरब तरफ दिकापुलिस नगर के क्षेत्र से होते, आउर फिन दक्खिन तरफ गलील के झील के पास के नगरवन में गेलन।32ऊहाँ, कुछ लोग उनका भीर एगो अादमी के लईलन जे बहिर हलन आउर बोल नऽ सकऽ हलन। ओखनी यीशु से विनती करलन कि ऊ उनका चंगा करे लागी उनका पर अपन हाथ रखतन।33तऽ यीशु ओकरा भीड़ से दूर तक ले गेलन कि ऊ दूनो अकेले हो जाय। फिन ऊ अपन एक-एक अँगुली ऊ अादमी के कान में डाललन। अपन अँगुली पर थूकला के बाद, ऊ अपन अंगूरियन से ऊ अादमी के जीभ के छूलन।34फिन ऊ स्वर्ग तरफ देख के आह भरलन, आउर ओकरे भाषा में ऊ अादमी के कान में कहलन, “इप्फत्तह” जेकर मतलब हे, “खुल जा!”35ओही घड़ी ऊ अादमी साफ-साफ सुने लगल। ऊ साफ तौर से बोलहूँ लगल, काहेकि जेकरा चलते ऊ बोल नऽ पावऽ हलन, ऊ जीभ के बन्धन खुल गेल हल।36यीशु लोग से कहलन जौन कुछ ऊ करलन हे ओकर बारे में कोई से नऽ कहिहऽ। जबकि ऊ बार-बार ओकरा आउर दोसरा के एकर बारे में कोई के नऽ प्रचार के आदेश देलन हल, बाकि ऊ एकर बारे में आउर भी प्रचार करते रहलन।37जौन लोग एकरा बारे में सुनलन ऊ बड़ी चौंक के एक दोसरा से कहे लगलन, “जौन कुछ ऊ करलन हे ऊ गजब हे! दोसरा चमत्कार काम के करे के अलावे, ऊ तऽ बहिरन के सुने के काबिल बनावऽ हथन! आउर जे बोल नऽ सकऽ हथन उनका ऊ बोले के काबिल बनावऽ हथन!”
Bridge Connectivity Solutions Pvt. Ltd.