Mark13
1जखनी यीशु परमेश्वर के भवन से निकल रहलन हल, तऽ उनकर चेलवन में से एगो उनका से कहलन, “हे गुरु, देखऽ ई दिवारवन में पत्थर के ई बड़का-बड़का काटल खण्ड ई केतना अनोखा हे, आउर ई भवन केतना हैरान कर देवे वाला हे!”2यीशु उनका से कहलन, “हाँ, ई विशाल भवन जेकरा तूँ देख रहलऽ हे केतना हैरान कर देवे वाला हे, बाकि हम तोरा ओकर बारे में कुछ बतावे लागी चाहऽ ही। विदेशी हमलावर एकरा पूरा रीति से बर्बाद कर देतन, जेकर नतीजा ई होल कि ई परमेश्वर के भवन क्षेत्र में कोई भी पत्थर दोसरा पत्थर के ऊपरे नऽ छोड़ल जायेत।”3जखनी ऊ घाटी से पार होके जैतून के पहाड़ पर पहुँचलन, तऽ यीशु मन्दिर के सामने बईठ गेलन। जौन घड़ी पतरस, याकूब, यूहन्ना, आउर अन्द्रियास उनका साथे अकेले हलन, तऽ ओखनी उनका से पूछलन,4“हमनी के बतावऽ कि ई बात कहिया घटित होत जौन योजना परमेश्वर बनईलन हे? हमनी पर परकट करे लागी कौन बात चिन्ह होत कि ई बात होवे वाला हे?”5यीशु उनका उत्तर देलन, ''चौकस रहऽ कि जे कुछ घटित होवे वाला हे ओकरा बारे में कोई तोरा धोखा नऽ दे!6बड़ी लोग अईतन, आउर सभे आदमी ई दावा करतन कि ऊ हम ही। हर एगो अादमी अपन बारे में कहतन, 'हम मसीह ही!' ऊ बड़ी लोग के धोखा देतन।7जखनी भी लोग तोरा ऊ युद्ध के बारे में बतईतन जौन हो रहल हे आउर जौन युद्ध हो सकऽ हे, तऽ खुद के परेशान मत होवे दिहऽ। ई बात जरुर घटित होत। बाकि जब ई घटित होत, तऽ ई मत सोचिहऽ कि ई संसार के अन्त हे!8अलग-अलग राज में रहे वाला देश अपने में लड़ाई करतन, आउर अलग-अलग सरकार भी अपने में लड़ाई करतन, अलग-अलग जगह में भूकम्प होत आउर अकाल पड़त। तऽ ई बात घटित होत, ऊ घड़ी लोग दुःख उठावे लागी अखनी शुरुआत करतन। ई पहिला बात जेकरा ऊ सहऽ हथन, ऊ ओईसन पहिला वेदना के जईसन होत जौन एगो औरत के तखनी होवऽ हे जखनी ऊ एगो बच्चा के जनम देवे वाली होवऽ हथन। एकर बाद ऊ आउर भी जादे पीड़ित होतन।9ऊ घड़ी लोगवन जौन तोरा साथे करतन ओकरा लागी तईयार रहऽ। काहेकि तूँ हमरा पर विश्वास करऽ हऽ, येही से ओखनी तोरा बंदी बना के धार्मिक महासभा के सामने तोरा पर मुकदमा चलईतन कोड़ा से पिटतन। दोसरा लोग तोरा यहूदी आराधनालय में पिटतन। राजपाल आउर राजा के मौजूदगी में लोग तोरा पर मुकदमा चलईतन। जेकर नतीजा ई होल कि, तूँ उनका हमर बारे में गवाही होवऽ।10बाकि एकरा से पहिले अन्त के घड़ी आ जाय परमेश्वर जे योजना बनईलन हे, ऊ ओकरा पूरा कर के हमर अनुयायीयन के सभे देश के लोगवन के शुभ समाचार प्रचार करे के हे।11जखनी लोगवन तोरा पर मुकदमा चलावे लागी बंदी बनईतन, तऽ ई चिंता मत करिहऽ कि तूँ का बोलवऽ। बदले एकर, जौन परमेश्वर ऊ घड़ी तोहर मन में डालतन ओही बोलिहऽ। ऊ घड़ी बोले वाला खाली तूँ नऽ होवऽ। ऊ पवित्र आत्मा होतन जौन तोरा द्वारा बात करतन।12दोसरा बुरा बात जौन घटत: जौन लोग हमरा पर विश्वास नऽ करऽ हथन, ऊ अपन भाई-बहिनियन के धोखा देतन बंदी बनावे में दोसरा लोगवन के सहायता करतन, जेकरा से सरकार उनका मौत के सजा देतन। दे। कुछ माय-बाप अपन लईकवन के धोखा देतन आउर कुछ लईकन अपन माय-बाप के धोखा देत जेकरा से सरकारी अधिकारी उनकर माय-बाप के हत्या कर दे। 13ढेरमनी लोग तोरा से येहिगुने बैर रखतन काहेकि तूँ हमरा पर विश्वास करऽ हऽ। बाकि परमेश्वर तोहनी सभे के जौन हमरा पर मजबूती से भरोसा रखऽ हथन बचईतन जखनी तक तोहर जिनगी के अन्त नऽ हो जायेत।14ऊ घड़ी के दौरान ऊ घिनामन चीज मन्दिर में प्रवेश कर जायेत। ऊ मन्दिर के अशुद्ध कर देत आउर ओकरा छोड़ देवे लागी लोगवन के प्रेरित करल जायेत। जखनी तूँ ओकरा ऊहाँ देखिहऽ जहाँ ओकरा नऽ होवे के चाही, तऽ जल्दी से भाग जईहऽ! जौन भी आदमी एकरा पढ़तन ऊ ई चेतौनी पर धियान देतन! ऊ घड़ी जौन लोग यहूदिया प्रान्त में रहतन ऊ पहाड़ियन पर भाग जईतन। 15जौन लोग अपन घर के छत से बाहर होतन, ओखनी कुछ लेवे लागी अपन घर में नऽ जईतन।16जौन खेत में काम कर रहलन हे, ऊ ढेर जादे कपड़ा लेवे लागी अपन घर में नऽ लौटतन।17जब अईसन घटित होवऽ हे, तऽ गर्भवती औरतियन आउर जौन अपन लईका के दूध पिलावऽ होतन उनका लागी ई केतना भयानक आफत होत।18ऊ दिन में लोग बड़ी दुःख उठईतन। जौन घड़ी परमेश्वर सभे से पहिले संसार के सृष्टि करलन हल, जहिया से लेके अखनी तक लोग कहियो ई तरह के दुःख नऽ उठईतन, आउर नऽ फिन कहियो अईसन दुःख उठईतन। येही से प्रार्थना करऽ कि ई दर्दनाक घटना जाड़ा में नऽ घटित हो, जखनी यात्रा करे ला मुश्किल होत।20जदि प्रभु ई तय नऽ करलन होत कि ऊ घड़ी के घटा दऽ जखनी लोगवन दुःख उठावऽ हथन, तऽ कोई लोग नऽ बचतन हल। बाकि ऊ, ऊ समय घटावे के फईसला येहिसे लेलन काहेकि ऊ ओखनी लोगवन के चिंता हे जिनका ऊ चुनलन हे।21ऊ घड़ी लोग झूठ बोलके कहतन कि ऊ मसीह हथन। आउर कुछ परमेश्वर के तरफ से भविष्यद्वक्ता होवे के दावा करते देखाई देतन। ऊ घड़ी ओखनी सभे बड़ी तरह के अनोखा काम आउर चिन्ह देखईतन। ऊ ओखनी के धोखा देवे के कोशिश करतन जिनका परमेश्वर चुनलन हे। येहिसे ऊ घड़ी जदि कोई तोहरा से कहतन कि देखऽ, मसीह ईहाँ हथन! चाहे फिन कोई कहतन कि देखऽ, ऊ ऊहाँ पर हथन! तऽ एकरा पर विश्वास नऽ करिहऽ! 23सावधान रहिहऽ! याद रखऽ कि हम ई सभे बात होवे के पहिले ही तोरा चेतौनी दे देली हे!24ऊ घड़ी के बाद जखनी लोग ई तरह के दुःख उठईतन, तऽ सूरज के अंधार कर देतन आउर चाँद में इंजोर भी नऽ रहत; 25परमेश्वर आसमान के तरेगन के गिरा देतन, आउर सभे आकाश मंडल के अपन जगह पर से हिला देतन। 26तऽ लोग हमरा, मतलब कि आदमी के बेटा के, सामर्थी रूप से आउर महिमा में बादल पर अईते देखतन। 27तऽ हम अपन स्वर्गदूतवन के भेजम कि ऊ ओखनी लोगवन के जौन धरती के ई जगह से आसमान के ऊ जगह तक जमा करतन जेकरा परमेश्वर चुनलन हे। 28अब हम चाहऽ ही कि तूँ ई दृष्टान्त से कुछ सिखऽ लऽ कि अंजीर के पेड़ कईसे बढ़ऽ हे। जब ओकर डाली कोमल हो जा हे आउर पत्ता निकले लगऽ हे तखनी तूँ जानऽ हऽ कि गरमी के समय भीर आ गेल हे।29ओईसहीं, जखनी तूँ ऊ सभे बात के घटते देखिहऽ जेकरा हम अखनी समझईली हे, तऽ तूँ जान लेवऽ कि हमर लौटे के घड़ी बड़ी नजदीक हे। ई अईसन होत कि मानऽ हम दुआरी पर ही। 30ई सच बात के धियान में रखिहऽ; जखनी तक ई सभे बात पूरा नऽ होत तखनी तक ई पीढ़ी नऽ मरतन।31तूँ पक्का हो सकऽ हऽ कि ई बात घटित होत जेकर हम भविष्यद्वाणी करली हे। धरती आउर जौन कुछ आसमान में हे ऊ सभे एक दिन नाश हो जायेत, बाकि ई सभे बात जौन हम तोरा से कहली हे एकदम से घटित होत। 32बाकि ऊ ठीक-ठीक समय के कोई नऽ जानऽ हथन जखनी हम वापस लौटम। स्वर्ग के दूत भी नऽ जानऽ हथन। ईहाँ तक कि हम, मतलब परमेश्वर के बेटा भी नऽ जानऽ ही। खाली हमर पिता जानऽ हथन।33येहिसे तईयार रहिहऽ! हमेशा होशियार रहऽ आउर प्रार्थना करते रहिहऽ, काहेकि तूँ नऽ जानऽ हऽ कि ई घटना के समय हम कखनी वापस लौटम!34ई अईसन बात के जईसन होत। दूर देश जाय के इच्छा रखे वाला आदमी जखनी अपन घर से निकले वाला रहऽ हथन, तऽ ऊ अपन सेवक के अधिकार दे हथन कि घर के व्यवस्था तोरा करे ला हे। ऊ हर एक दास के बतावऽ हथन कि उनका का करे के हे। फिनो ऊ दरबारी से कहऽ हथन कि तूँ उनकर वापसी लागी तईयार रहिहऽ।35ऊ आदमी के हमेशा तईयार रहे के हे, काहेकि ऊ नऽ जानऽ हथन कि उनकर घर के स्वामी साँझ के, आधा रात के, भोर से पहिले जखनी मुर्गा बाँग दे हे, चाहे सवेरे में आसमान में सूरज के धूप देखाई देला के बाद लौटतन। ओही तरह से, तोरा भी हर घड़ी तईयार रहे के हे, काहेकि तूँ नऽ जानऽ हऽ कि हम कखनी लौटम।36कहीं अईसन नऽ होवे कि जखनी हम अचानक एका-एक लौटम, तऽ पायेम कि तूँ तईयार नऽ हऽ!37ई बात जे हम तोहनी चेलवन से कहऽ रहली हे ऊ हम सभे से कहऽ रहली हे: “हर घड़ी तईयार रहऽ!”
Bridge Connectivity Solutions Pvt. Ltd.