Mark12
1फिन यीशु यहूदी अगुवन से बात कर के एगो दृष्टान्त बतईलन जेकरा में एगो सीख हल। ऊ कहलन, “कोई आदमी दाख के बारी लगईलन। ऊ ओकरा देख-भाल करे लागी ओकर चारो तरफ बाड़ा घेर देलन।” ऊ अंगूर के पेरला पर ओकरा से निकले वाला रस के जमा करे लागी एगो पत्थर के हौद बनईलन। ऊ अपन दाख के बारी के देख-रेख करे लागी कोई आदमी के बईठे लागी एगो गुम्मट भी बनईलन। ऊ, ऊ दाख के बारी के कुछ आदमी के भाड़ा पर दे देलन कि ऊ ओकरा देख-रेख करतन आउर ऊ दोसर देश में यात्रा पर निकल गेलन। 2जब अंगूर के कटनी के समय आयेल, तऽ दाख के बारी के मालिक अपन अंगूर के बगईचा के देख-रेख करे वाला भीर एगो दास के येहिगुने भेजलन, काहेकि ऊ अंगूर के बगईचा के उपज के अपन भाग उनका से लेवे लागी चाहऽ हलन।3बाकि जब ऊ दास पहुँचलन, तऽ ओखनी ऊ दास के पकड़ के पिटलक, आउर ओखनी उनका फल में से कुछ नऽ देलक। ओकर बाद ओखनी उनका खाली हाथ भगा देलक।4बाद में मालिक उनका भीर अपन दास में से एगो दोसरा के भेजलन। बाकि ओखनी उनकर माथा फोड़ देलन आउर उनका बेईज्जती करलक।5बाद में मालिक एगो आउर दास के भेजलन। जौन लोगवन दाख के बारी के देख-भाल कर रहलन हल ओखनी ऊ आदमी के मार देलन। ओखनी आउर भी ढेर दास के साथे बुरा बर्ताव करलन जिनका ऊ भेजलन हल। कुछ के ऊ पिटलन आउर कुछ के ऊ मार देलन।6ऊ मालिक भीर अखनी भी एगो आउर आदमी हलन, जौन उनकर बेटा हलन, जिनका ऊ बड़ी जादे प्रेम करऽ हलन। येहिगुने, अंतिम में अपन बेटा के ओकरा भीर भेजलन, काहेकि ऊ सोचलन हल कि ऊ उनकर बेटवन के पछान लेतन आउर उनका साथे बढ़ियाँ बर्ताव करत।7बाकि जखनी दाख के बारी के देख-रेख करे वाला लोग उनकर बेटा के अईते देखलक, तऽ ऊ एक दोसरा से बोललन, 'देखऽ! एही मालिक के बेटा हथन, जौन कोई दिन ई दाख के बारी के वारिस होतन! येही से आवऽ हमनी एकरा मार दऽ जेकरा से ई दाख के बारी हमनी के हो जायेत!8ओखनी मालिक के बेटा के पकड़ लेलन आउर उनका मार देलन। ओकर बाद ओखनी उनकर लाश के दाख के बारी के बाहर फेंक देलन।9येही से हम तोहनी सभे के बतायेम कि दाख के बारी के मालिक का करतन। यीशु आगे कहलन ऊ आके ऊ सभे बुरा लोगवन के जौन उनकर दाख के बारी के देख-रेख कर रहलन हल मार देतन। तऽ ऊ दाख के बारी के देख भाल करे लागी दोसरा लोगवन के दे देतन।10का तूँ नऽ जानऽ हऽ कि पवित्रशास्त्र का कहऽ हे? जौन लोग भवन बना रहलन हल ओखनी एगो पत्थर के इस्तेमाल करे से नकार देलन। बाकि प्रभु ओही पत्थर के ओकरा सही जगह पर रखलन आउर ऊ भवन के सभे से जादे खास पत्थरवन गेल!11“ई काम प्रभु करलन हे, आउर हमनी ई काम देख के हैरान करऽ ही।” 12तब प्रधान यहूदी अगुवा, जान लेलन कि जखनी ऊ दुष्ट लोगवन द्वारा करल गेल काम के बारे में ई दृष्टान्त बतईलन तऽ ऊ उनका पर इजलेम लगा रहलन हल। येहिसे यहूदी अगुवन उनका कैद करे ला सोचलन, बाकि ऊ ई बात से डरऽ हलन कि जदि यहूदी अगुवन अईसन करतन तऽ लोगवन के भीड़ का करत। येही से ऊ उनका छोड़ के चल गेलन।13यहूदी अगुवन यीशु भीर कुछ फरीसी के भेजलन जौन सोचऽ हलन कि यहूदियन के खाली ओही लगान देवे के चाही जौन उनकर अपन यहूदी अधिकारी चाहऽ हलन कि लोग चुकईतन ओखनी हेरोदेस अंतिपास आउर रोमी सरकार के समर्थन करे वाला दल के कुछ सदस्य के भेजलन। ऊ सभे यीशु के फँसावे लागी चाहऽ हलन: ऊ सभे यीशु से कुछ अईसन बोलवावे ला चाहऽ हलन जेकरा से ओकरा में से कोई झुण्ड उनका पर गोस्सा हो जाय ताकि ओखनी उनका खिलाफ इजलेम लगा सकत।14उनका पहुँचला पर, ओखनी में से एगो यीशु से कहलन, ''हे गुरु, हम जानऽ ही कि तूँ खाली ओही व्यवस्था सिखावऽ हऽ जौन सच हे। हम ई भी जानऽ ही कि तूँ लोगवन के विचार से प्रभावित नऽ होवऽ हऽ। बदले एकर, तूँ सच्चाई से लोगवन के सिखावऽ हऽ कि परमेश्वर के मार्ग उनका से का चाहऽ हथन कि ऊ करतन; तूँ उनकर सामाजिक उपाधि लागी सम्मान प्रकट नऽ करऽ हऽ। येही से हमनी के बतावऽ कि तूँ ई मामला के बारे का सोचऽ हऽ; का ई सही हे कि हमनी रोमी सरकार के लगान देऊँ, कि नऽ देऊँ ई? का हमनी के लगान देवे के चाही, कि हमनी के उनका लगान नऽ देवे के चाही?15यीशु जानऽ हलन कि ऊ सभे सच में ई जाने ला नऽ चाहऽ हे कि परमेश्वर ओखनी से का चाहऽ हथन कि ऊ करतन। येहिसे ऊ उनका से कहलन, “हम तोर कपट जानऽ ही कि तूँ हमरा से कोई अईसन बात कहलावे लागी चाहऽ हऽ कि जेकरा से तूँ हमरा पर इजलेम लगा सकऽ, बाकि हम अईसहीं तोहर सवाल के जबाब देम। हमरा भीर एगो चाँदी के दीनार लेके आवऽ ताकि हम ओकरा देखम।” 16जखनी ऊ उनका भीर एगो सिक्का लेके अईलन, तऽ ऊ उनका से पूछलन, “ई सिक्का पर केकर छवि हे?'' आउर एकरा पर केकर नाम हे?'' ओखनी जबाब देलन, ''ई कैसर के नाम आउर चित्र हे, मतलब जौन आदमी रोमी सरकार पर शासन करऽ हथन।17यीशु उनका से कहलन, ''ई बारे में जौन सरकार के हे ऊ सरकार के दऽ आउर जौन परमेश्वर के हे ऊ परमेश्वर के दऽ।” जौन ऊ कहलन ओकरा से ऊ सभे हैरान हो गेलन।18कुछ सदूकियन के झुण्ड के लोग ई बात से इंकार करऽ हलन कि मरे के बाद आदमी फिन से जी उठ हथन। लोगवन के फिन से जिन्दा होवे के विचार के मजाक उड़ा के यीशु के बदनाम करे लागी, ओखनी में से कुछ लोगवन उनका भीर आके उनका से पूछलन, 19“हे गुरु, मूसा हमनी लागी ई व्यवस्था लिखलन हे कि जदि कोई पुरुष बिना संतान पईदा करल मर जाय, तऽ ऊ मरल आदमी के विधवा से उनकर भाई वियाह करत। तऽ जदि ऊ दूनो वंश पईदा करतन, तऽ सभे लोग ई समझतन कि ऊ मरलकन आदमी के संतान हे, आउर ई रीति से मरल अादमी के वंश बनल रहत। 20येही से ईहाँ एगो उदाहरण हे: एगो परिवार में सातगो भाई हलन। सभे से बड़का भाई एगो औरत से वियाह करलन, बाकि उनका जरिये उनकर औरत के कोई आउर संतान पईदा नऽ होल। तऽ बाद में ऊ मर गेलन।21दोसरका भाई ई व्यवस्था के पालन करते ऊ औरत से वियाह कर लेलन आउर ऊ भी कोई संतान नऽ पईदा करलन। तऽ बाद में ऊ मर गेलन। तिसरका भई भी ओईसहीं करलन जईसन दोसरका भाई करलन हल। बाकि ऊ भी कोई संतान पईदा नऽ करलन, आउर बाद में ऊ मर गेलन।22अंतिम में ऊ सातो भईवन एक-एक कर के ओही औरत से वियाह करलन, बाकि केकरो से कोई संतान पईदा नऽ करलन, आउर एक-एक कर के ऊ मर गेलन। बाद में ऊ औरत भी मर गेल।23येही से, जौन कुछ लोगवन कहऽ हथन जदि ऊ सच होत, कि अादमी मरे के बाद फिन से जी उठतन, तऽ तूँ का सोचऽ हऽ कि जखनी लोगवन फिन से जिन्दा होतन तऽ ऊ औरत किनकर मेहरारू होतन? धियान रखऽ कि ऊ औरत ऊ सातो भईवन से वियाह कर चुकलन हल!”24यीशु उनका जबाब देलन, तोहनी पक्का रूप से गलत हऽ। तूँ नऽ जानऽ हऽ कि पवित्रशास्त्र एकर बारे में का शिक्षा दे हे। तूँ लोगवन के फिन से जिन्दा करे के परमेश्वर के सामर्थ के नऽ समझऽ हऽ।25ऊ औरत ऊ सभे भईवन में से केकरो औरत येहिगुने से नऽ होत, काहेकि जखनी लोगवन फिन से जिन्दा होतन, तऽ मरद के औरत रखे के आउर औरत के मरद रखे के बजाय, ऊ सभे स्वर्ग में स्वर्गदूत जईसन हो जईतन। आउर स्वर्गदूत वियाह नऽ करऽ हथन।26बाकि हमरा लोगवन के मरे के बाद फिन से जिन्दा होवे के बारे में बोले दऽ। जौन किताब मूसा लिखलन, ऊ किताब में ऊ ओखनी लोगवन के बारे में कुछ कहलन जौन मर गेलन हे, जेकरा हमरा लगऽ हे कि तूँ ऊ पढ़लऽ होत। जौन घड़ी मूसा जरते झाड़ी के देख रहलन हल, तऽ परमेश्वर उनका से कहलन, जौन परमेश्वर के आराधना अब्राहम, इसहाक, आउर याकूब करऽ हथन ऊ हमहीं ही। परमेश्वर ई नऽ कहलन होत जदि ऊ लोग के फिन से जिन्दा नऽ करलन होत आउर जदि ऊ अखनी भी उनकर परमेश्वर नऽ होतन हल। 27“परमेश्वर के आराधना मरलकन लोग नऽ करऽ हथन। ऊ जिन्दा लोग होवऽ हथन जौन उनकर आराधना करऽ हथन। येहिगुने जखनी तूँ कहऽ हऽ कि मरलकन लोग फिन से जिन्दा नऽ होतन, तऽ तूँ बड़ी जादे गलत हऽ।”28यहूदी शास्त्री के एगो आदमी उनकर बात के सुनलन। ऊ जानऽ हलन कि यीशु सदूकियन के सवाल के जवाब बड़ी बढ़ियाँ रीति से देलन हलऽ। येहिसे ऊ आगे आके यीशु से पूछलन, ''सभे से खास आज्ञा का हे?''29यीशु जवाब देलन, ''सभे से खास आदेश ई हे, हे इस्राएली लोगवन, सुनऽ! प्रभु हमनी के परमेश्वर, खाली ओही हमनी के परमेश्वर हथन। 3030 तोरा प्रभु अपन परमेश्वर से पूरा मन से ऊ सभे बात में जौन तूँ चाहऽ हऽ आउर जे महसूस करऽ हऽ, ऊ सभे बात में जे तूँ सोच हऽ, आउर ऊ सभे बात में जे तूँ करऽ हऽ, प्रेम करे के चाही!' 31अगला सभे से खास आज्ञा ई हे: 'तोरा अपन अगल-बगल के लोगवन से ओतना ही प्रेम करे के चाही जेतना तूँ अपने आप से करऽ हऽ। ई दूनो आदेश से बढ़ के कोई भी खास आदेश नऽ हे!'' 32ऊ शास्त्री यीशु से कहलन, ''हे गुरु, तूँ बढ़ियाँ से जबाब देलऽ हे। तूँ सच कहलऽ हे कि परमेश्वर ही एगो परमेश्वर हथन, आउर ई कि कोई आउर परमेश्वर नऽ हथन।33तूँ ई भी ठीक-ठीक कहलऽ हे कि ऊ सभे बात में जे हमनी चाहऽ ही आउर मन में महसूस करऽ ही, ऊ सभे बात में जौन हम सोचऽ ही, आउर ऊ सभे बात में जौन हम करऽ ही, हमनी के परमेश्वर से प्रेम करे के चाही। आउर तूँ ठीक-ठीक कहलऽ हे कि हमनी के ऊ लोगवन से जेकर सम्पर्क में हम आवऽ ही उनका से ओतना ही प्रेम करे के चाही जेतना हम अपने आप से करऽ ही। आउर तूँ ई भी ठीक-ठीक से कहलऽ हे कि भोजन चाहे जानवर के होमबलि करे चाहे बलिदान चढ़ावे के तुलना में ई काम के करे ला परमेश्वर के जादे खुश करऽ हे। 34यीशु जान लेलन कि ई आदमी चलाकी से जबाब देलक हे। येहिसे ऊ उनका से कहलन, “हमरा लगऽ हे कि तूँ परमेश्वर के अपना ऊपर राज करे देवे लागी फईसला लेवे के नजदीक ही हऽ।” एकर बाद, यीशु के फँसावे के कोशिश में उनका से ई तरह के आउर सवाल पूछे से यहूदी अगुवन डरलन।35बाद में, जौन घड़ी यीशु परमेश्वर के भवन के अँगना में शिक्षा दे रहलन हल, तऽ ऊ लोगवन से पूछलन, ''अईसन काहे हे कि यहूदी शास्त्री आदमी कहऽ हथन आउर ऊ ठीके कहऽ हथन कि मसीह राजा दाऊद के बेटा हथन?36पवित्र आत्मा दाऊद के मसीह के बारे में ई कहे लागी प्रेरित करलन हलऽ, 'परमेश्वर हमर प्रभु से कहलन, “हमर दहिना तरफ ऊ जगह में बईठऽ, जहाँ हम तोरा सभे लोगवन से जादे आदर देम! ऊ घड़ी तक ईहें बईठल रहऽ जखनी तक कि हम तोर दुश्मन के पूरा तरह से हरा नऽ देम!” 37ई चलते, काहेकि दाऊद खुद ही मसीह के हमर प्रभु, कहऽ हथन, तऽ मसीह राजा दाऊद के वंश के आदमी कईसे हो सकऽ हथन? उनका तऽ “दाऊद से ढेर बढ़ के होवे के चाही!” जखनी ऊ ई सभे बात के सिखावऽ हलन तऽ बड़ी मनी लोग उनकर बात के आनन्दपूर्वक सुनऽ हलन।38जौन घड़ी यीशु लोगवन के शिक्षा दे रहलन हल, तऽ ऊ ओखनी से कहलन, “होशियार रहऽ कि तूँ ऊ सभे यहूदी व्यवस्था के शास्त्री लोग जईसन वर्ताव नऽ करऽ। उनका अच्छा लगऽ हे कि लोगवन उनका इज्जत करतन, येहिसे ऊ लोगवन के देखावे लागी कि ऊ केतना खास हथन, लम्बा कपड़ा धारण करऽ हथन आउर इधर-उधर टहलऽ हथन। उनका ई भी अच्छा लगऽ हे कि लोगवन बजार में उनका इज्जत पूर्वक नमस्कार करतन।39उनका यहूदी आराधनालय में सभे से खास आसन में बईठे में अच्छा लगऽ हे। परव में ओखनी अईसन आसन में बईठे ला पसन्द करऽ हथन जहाँ सभे से आदरणीय लोगवन बईठऽ हथन।40ऊ विधवा के घर के सभे दौलत भी चोरा ले हथन। बाकि दोसरकन लोग से अईसन विचार करवावे लागी कि ऊ धर्मी हथन, ऊ लोग के बीच में लम्बा समय तक प्रार्थना करते रहऽ हथन। परमेश्वर जरुर उनका कठोर सजा देतन!”41बाद में, यीशु परमेश्वर के भवन में ऊ दान भण्डार के सामने बईठ गेलन, जेकरा में लोगवन परमेश्वर लागी दान डालल करऽ हलन। जखनी ऊ ऊहाँ बईठल हलन, तऽ ऊ ढेरमनी लोग के ओकरा में से एगो दान भण्डार में पईसा डालते देखलन, आउर ऊ धियान देलन कि सभे लोग बड़ी जादे मात्रा में पईसा डाललन हे।42फिन एगो गरीब विधवा आके ओकरा में दूगो ई छोटा ताँबा के सिक्का डाललन, जौन मिल के एगो रोमी एक पईसा के बराबर कीमत के होवऽ हे।43यीशु अपन चेलवन के अपन चारो तरफ जमा कर के कहलन, “सच तऽ ई हे कि ऊ दोसरका लोगवन भीर तऽ बड़ी दौलत हे, बाकि ओखनी दान भण्डार खाली ओकर तनिसा हिस्सा देलन हे।”44बाकि ई औरत, जौन बड़ी गरीब हे, जौन सभे धन डाल देलन हे जेकरा से उनका अपन आज के जरुरत के समान लागी देवे के हल। येहिसे, “ई गरीब विधवा दान पात्र में बाकि दोसरा सभे से जादे पईसा डाललन हे!”
Bridge Connectivity Solutions Pvt. Ltd.