Mark10
1यीशु अपन चेलवन के साथे ऊ जगह से निकल गेलन, आउर ऊ यहूदिया देश से होते यरदन नदी के पूरब के तरफ गेलन। जखनी उनका भीर लोगवन के भीड़ जमा हो गेल, तऽ जईसन ऊ हमेशा करते रहऽ हलन, ओईसहीं ऊ फिन से शिक्षा देवे लगलन।2जौन घड़ी यीशु शिक्षा दे रहलन हल, तऽ कुछ फरीसियन उनका भीर आके पूछे लगलन, “का हमनी के व्यवस्था कोई आदमी के अपन मेहरारू के तलाक देवे के आज्ञा दे हे?” ओखनी ई सवाल येही से पूछलन ताकि उनकर शिकायत में सही हो, चाहे ऊ “हाँ” में उत्तर दे चाहे “नऽ” में।3यीशु उनका उत्तर देलन, “मूसा तोहर पुरखावन के अईसन आदमी के बारे में का आज्ञा देलन हे जौन अपन मेहरारू के तलाक दे हे?”4उनका में से एगो जबाब देलन, “पवित्रशास्त्र में मूसा अनुमति देलन हे कि अईसन आदमी एगो त्यागपत्र लिखतन ताकि ऊ उनका विदा कर सकतन।” 5यीशु उनका से कहलन, “अईसन तोहर हठीला स्वभाव के कारण हल कि मूसा तोहनी लागी ई आज्ञा देलन।6याद रखऽ कि जखनी परमेश्वर सभे से पहिले आदमी के बनईलन, तऽ ऊ एगो आदमी के रचना करलन आउर ऊ आदमी के मेहरारू होवे लागी ऊ एगो औरत के रचना करलन। 7येही से पता होवऽ हे कि परमेश्वर कहलन कि, जखनी कोई औरत आउर मरद वियाह करऽ हथन, तऽ उनका वियाह के बाद अपन माय बाप के साथे नऽ बाकि अपन मेहरारू के जौरे रहे के चाही।8बदले एकर, ऊ दूनो एक साथे रहतन, आउर एतना जादे घुल-मिल जईतन कि ऊ एक ही आदमी के जईसन हो जईतन। येही चलते, जबकि जौन आदमी वियाह करऽ हथन ऊ अलग-अलग देह हलन, बाकि वियाह के बाद परमेश्वर उनका एगो देह के जईसन मानऽ हथन, येही से ऊ चाहऽ हथन कि ऊ एक दोसरा से बियाहल जोड़ा बनल रहे। 9काहेकि ई ठीक हे कि एगो मरद के अपन मेहरारू के तलाक नऽ देवे के चाही। परमेश्वर उनका एक साथे जोड़लन हे, आउर ऊ चाहऽ हथन कि ऊ एक साथे रहतन!”10जखनी यीशु आउर उनकर चेलवन घर में अकेले हलन, तऽ ओखनी उनका से एकर विषय में फिनो से पूछलन।11यीशु उनका से कहलन, “परमेश्वर मानऽ हथन कि जौन मरद अपन मेहरारू के तलाक दे के दोसरा मेहरारू से वियाह करऽ हे तऽ ऊ व्यभिचार करऽ हे।12परमेश्वर ई भी मान हथन कि जौन मेहरारू अपन मरद के तलाक दे के दोसरा मरद से वियाह करऽ हे ओहू व्यभिचार करऽ हे।”13फिन एक दिन लोग छोटका लईकवन के यीशु भीर लेके आवे लगलन कि ओखनी पर हाथ रख के उनका आशीष देतन। बाकि उनकर चेलवन ओखनी के डाँटलन।14जखनी यीशु ई देखलन तऽ गोस्सा गेलन। ऊ अपन चेलवन से कहलन, लईकवन के हमरा भीर आवे दऽ! ओखनी के मना मत करऽ! अईसने आदमी जौन विनम्र आउर परमेश्वर पर भरोसा रखऽ होतन! जईसन कि ई सभे करऽ हथन ओही अपन जिनगी में परमेश्वर के राज के अनुभव कर सकऽ हथन।15ई सच बात के धियान में रखऽ: “जौन अपना ऊपर परमेश्वर के शासन के स्वागत लईकन जईसन नऽ कर हथन ऊ निश्चित रूप से ऊ राज में जेकरा पर परमेश्वर शासन करऽ हथन जा नऽ करतन।”16ओकर बाद यीशु लईकवन के अपन गोदी में उठा लेलन। ऊ उनका पर अपन हाथ भी रखलन आउर यीशु परमेश्वर से उनका आशीष करे के विनती करलन।17जखनी यीशु अपन चेलवन साथे फिन से यात्रा करे ला शुरु कर रहलन हल, तऽ एगो आदमी उनका भीर दौड़ते अईलन। ऊ यीशु के आगे ठेहुनियाँ मार के उनका से पूछलन, “हे उत्तम गुरु, हम का करीयई जेकरा से हम अनन्तकाल तक परमेश्वर के साथे जिन्दा रह सकम?”18यीशु उनका से कहलन, ''तूँ नऽ जानऽ हऽ कि तूँ हमरा बढ़ियाँ कह के का बोल रहलऽ हे! खाली परमेश्वर ही उत्तम हथन!19बाकि तोर सवाल के जवाब में, तूँ मूसा के आज्ञा के तऽ जानऽ हऽ; “केकरो हत्या नऽ करिहऽ, व्यभिचार नऽ करिहऽ, चोरी नऽ करिहऽ, कोई बात के बारे में झूठ मत बोलिहऽ, केकरो धोखा नऽ दिहऽ, आउर अपन माय बाप के आदर करिहऽ।” 20ऊ आदमी कहलन, “हे गुरु, जब से हम समझदार होली हे तब से ई सभे आज्ञावन के मानते अईली हे।”21यीशु उनका तरफ प्रेम भरल नजर से देखलन। ऊ उनका से कहलन, “एगो बात हे जौन अखनी तक तूँ नऽ करलऽ हे। अपन घरे जा के अपन सभे धन-दौलत बेच दऽ, आउर ओकर बाद ऊ धन गरीब लोग के दे दऽ। एकर नतीजा के रूप में, तूँ स्वर्ग में आत्मिक रूप से धनी हो जईवऽ। जौन हम तोरा से कहली हे, ओकरा करे के बाद, हमरा साथे होलऽ आउर हमर चेला बन जा!”22यीशु के ई बात से ऊ आदमी उदास हो गेल। ऊ बड़ी दुःख के साथे चल गेल, काहेकि ऊ अपन धन नऽ दे सकऽ हल।23यीशु चारो तरफ के लोगवन के देखलन। फिन ऊ अपन चेलवन से कहलन, “जौन आदमी धनी होवऽ हथन उनका लागी खुद के परमेश्वर के राज के अधीन रखे ला बड़ी कठिन होवऽ हे।”24जौन यीशु कहलन हल ओकरा से चेलवन हैरान हो गेलन। ओखनी सोचऽ हलन कि परमेश्वर धनी लोग के पक्ष ले हथन, येही से जदि परमेश्वर उनका उद्धार नऽ करतन, तऽ ऊ केकरो भी उद्धार नऽ करतन। यीशु फिन उनका से कहलन, “हे प्यारे विश्वासियन, तूँ जे हमर देख-रेख में हऽ, कोई भी आदमी लागी ई फईसला लेवे ला बड़ा मुश्किल होवऽ हे कि ऊ अपन जिनगी में परमेश्वर के राज करे देतन।”25ऊँट जईसन बड़का जानवर के सिलाई करे वाला सूई के छोटा छेद से जाय ला बड़ी मुश्किल हे। “धनवान लोगवन लागी ई फईसला लेवे लागी लगभग ओतना ही मुश्किल हे कि ऊ परमेश्वर के अपन जिनगी पर राज करे देतन।”26चेलवन बड़ा हैरान हो गेलन। येही से ओखनी यीशु से कहलन, “जदि अईसन हे, तऽ फिन कोई आदमी कईसे उद्धार पईतन!”27यीशु उनका देखलन, आउर फिन ऊ कहलन, “हाँ, लोगवन लागी खुद के उद्धार करे ला असंभव हे! बाकि परमेश्वर जरुर उनका उद्धार कर सकऽ हथन, काहेकि परमेश्वर कुछ भी कर सकऽ हथन!” 28पतरस कहलन, “देखऽ, हम तऽ सभे कुछ पीछे छोड़ के तोर चेला बन गेली हे।”29यीशु उत्तर देलन, “हम चाहऽ ही कि तूँ ई सच के जान लऽ: जौन अपन घर के, अपन भईवन के, अपन बहिन के, अपन पिता के, अपन माय के, अपन बाल-बच्चवन के, आउर अपन जमीन के खेत के हमर चेला बने लागी आउर शुभ समाचार के प्रचार करे लागी छोड़ देलन हे,30ऊ सभे ई जिनगी में ओकर सौ गुणा हासिल करतन जेतना ऊ पीछे छोड़ देलन हे। एकरा में घर आउर परिवार के सदस्य: भाई, बहिन आउर माय आउर बाल-बच्चवन आउर जमीन के खेत शामिल हे। एकर साथे, लोगवन उनका ईहाँ धरती पर येहिगुने सतावल जईतन काहेकि ऊ सभे हमरा पर विश्वास करऽ हथन बाकि युग में परमेश्वर के साथे अनन्तकाल के जिनगी बितईतन।31ढेर लोगवन जिनका दोसरा लोग बड़ी खास मानऽ हलन ऊ सभे परमेश्वर के द्वारा बेकार मानल जईतन, आउर कई लोगवन जिनका दोसरा लोगवन बेकार मानऽ हथन ऊ परमेश्वर द्वारा बड़ी बेसकीमती मानल जईतन!”32जखनी ऊ यात्रा करते रहलन तऽ कुछ दिन के बाद, यीशु आउर उनकर चेलवन यरूशलेम जाय वाला राह पर जा रहलन हल। यीशु उनकर आगे-आगे जा रहलन हल। चेलवन हैरान हलन आउर जौन दोसरा लोगवन उनकर साथे हलन ऊ डरल हलन। राह में यीशु 12 चेलवन के फिन से एकांत में एगो जगह पर ले गेलन। फिन ऊ ओखनी के बतावे लगलन कि उनका साथे का होवे वाला हे।33ऊ कहलन, “धियान लगा के सुनऽ! हम यरूशलेम जा रहली हे। ऊहाँ प्रधान महायाजक आउर यहूदी शास्त्रियन हमरा, मतलब आदमी के बेटा के बंदी बना लेतन। ऊ ई बात के ऐलान करतन कि हमरा मारल जाय के चाही। ओकर बाद हमरा अन्यजाति के रोमी अधिकारी भीर जईतन।34उनकर लोग हमर मजाक उड़ईतन आउर हमरा पर थूकतन। ऊ हमरा कोड़ा मारतन, आउर ओकर बाद हमरा मार देतन। बाकि एकर बाद तिसरका दिन हम फिन से जी उठम!”35राह में, जब्दी के बेटा याकूब आउर यूहन्ना, यीशु भीर आके उनका से कहलन, “हे गुरु, हम चाहऽ ही कि जौन हम तोरा से हमरा लागी करे ला कहम ऊ तूँ हमरा लागी करिहऽ!”36यीशु उनका से कहलन, “ऊ कौन बात हे जौन तूँ चाहऽ हऽ कि हम तोरा लागी करियो?”37ऊ उनका से कहलन, “जखनी तूँ शक्तिशाली होके राज में अपन महिमा के सिंहासन पर बईठिहऽ, तऽ हमनी में से एगो तोर दहिना तरफ बईठतन आउर एगो तोर बामा तरफ बईठतन।”38बाकि यीशु उनका से कहलन, “तूँ समझऽ नऽ हऽ कि तूँ का माँग रहलऽ हे।” फिन ऊ उनका से पूछलन, “का तूँ दुःख उठा सकऽ हऽ जईसन हम दुःख उठावे वाला ही? का तूँ ऊ बपतिस्मा ले सकऽ हऽ, जौन बपतिस्मा हम लेवे वाला ही?”39ऊ उनका से कहलन, “हाँ, हम अईसन करे के लायक ही!” तऽ यीशु कहलन, “ई सच हे कि तूँ भी ओईसहीं दुःख उठा सकलऽ हे, जईसन हम दुःख उठायेम, आउर तूँ ऊ बपतिस्मा लेवऽ, जेकरा हम लेवे वाला ही।40बाकि ऊ हम नऽ ही जौन ई बात के चुनाव करऽ ही कि हमरा भीर कौन बईठतन। परमेश्वर ओखनी लोगवन के ऊ जगह देतन जेकरा ऊ पहिले से चुन लेतन।”41बाकि के दसगो चेलवन बाद में सुनलन कि यूहन्ना आउर याकूब का विनती करलन हल। जेकर नतीजा के रूप में, ऊ सभे उनका पर गोस्साल हलन।42फिन जखनी यीशु ओखनी के एक साथे बोलईलन, तऽ ऊ उनका से कहलन, “तूँ जानऽ हऽ कि जौन लोगवन अन्यजाति पर शासन करऽ हथन उनका खुद के शक्तिशाली देखावे में आनन्द आवऽ हे। तूँ ई भी जानऽ हऽ कि उनकर अधिकारियन के दोसरा के आदेश देवे में आनन्द आवऽ हे।”43बाकि तूँ उनका जईसन मत बनऽ! एकर उल्टा, जदि तोहनी में से कोई आदमी महान बने लागी चाहऽ हथन, तऽ उनका खुद के दोसरा के सेवक बने के चाही।44आउर जदि तोहनी में से कोई चाहऽ हथन कि परमेश्वर उनका सभे से खास समझतन, तऽ ऊ तोहनी में से बाकि के लोगवन लागी दास के काम करऽ।45ईहाँ तक कि हमर, मतलब आदमी के बेटा, सेवा करवावे नऽ, बाकि सेवा करे अईलन हे, आउर लोगवन के पाप लागी भुगतान के रूप में जिनगी देवे लागी अईलन हे, आउर ओखनी के ऊ दंड से रिहाई लागी मोल लेवे अईलन हे, जिनका परमेश्वर पापियन लागी ठहरईलन हल।46यरूशलेम जाय वाला राह में यीशु आउर उनकर चेलवन यरीहो शहर में पहुँचलन। फिन, जखनी बड़ी बड़का भीड़ के साथे यरीहो से निकल रहलन हल, तऽ एगो आदमी जे देख नऽ सकऽ हल आउर हमेशा लोगवन से पईसा माँगऽ हल, सड़क के किनारे बईठल हल। ओकर नाम बरतिमाई हलऽ, आउर उनकर पिता के नाम तिमाई हल।47जखनी ऊ लोग ई कहते सुनलन कि यीशु नासरी जा रहलन हे, तऽ ऊ ऊँचा आवाज में पुकारे लगल, “हे यीशु! तूँ जौन दाऊद के वंशज हऽ, हमरा पर दया करऽ!”48बड़ी मनी लोगवन उनका डाँटलन आउर उनका कहलन कि चुप रहऽ। तईयो, ऊ आउर भी ऊँचा आवाज में पुकारे लगलन, “तूँ जौन दाऊद के वंशज हऽ, हमरा पर दया करऽ!”49यीशु रुक के कहलन, “उनका ईहाँ आवे लागी कहऽ!” ऊ लोग आंधर आदमी के ई कहऽ के बोलईलन, “यीशु तोरा बोला रहलन हे! येहिसे हिम्मत रखऽ आउर खड़ा होवऽ आउर चलऽ!”50जखनी ऊ उछल के खड़ा होल तऽ ऊ अपन कपड़वन के एक तरफ फेंक देलक, आउर ऊ यीशु भीर चल आयेल।51यीशु ओकरा से पूछलन, “तूँ का चाहऽ हऽ कि हम तोरा मदत कईसे करियो?” ऊ आंधर आदमी उनका उत्तर देलक, “हे गुरु, हम फिन से देखे के लायक होवे ला चाहऽ ही!”52यीशु उनका से कहलन, “काहेकि तूँ हमरा पर विश्वास करलऽ, येहिगुने हम तोरा चंगा कर देली हे! येहिसे तूँ जा सकऽ हऽ!” तुरन्त ऊ देखे लगल। आउर ऊ राह पर यीशु के साथे चल गेलन।
Bridge Connectivity Solutions Pvt. Ltd.